ដោយៈ លក្ខិណា

ភ្នំពេញៈ យោងតាមសេចក្តីប្រកាសព័ត៌មាន របស់ក្រុមប្រឹក្សាអភិវឌ្ឍន៍កម្ពុជា នៅល្ងាចថ្ងៃទី១៤ តុលា២០២២នេះបានឱ្យដឹងថា គណៈកម្មាធិការវិនិយោគកម្ពុជា នៃក្រុមប្រឹក្សាអភិវឌ្ឍន៍កម្ពុជា បានសម្រេចចេញវិញ្ញាបនបត្រចុះបញ្ជីគម្រោងវិនិយោគ ជូនក្រុមហ៊ុនវិនិយោគ២លើគម្រោងរោងចក្រ ដោយមួយនៅខេត្តកំពង់ស្ពឺ និងមួយទៀតនៅខេត្តកណ្ដាល។

យោងតាមសេចក្ដីប្រកាសនោះឱ្យដឹងថា គម្រោងរោងចក្រទាំងពីររួមមាន ទី១.គម្រោងបង្កើតរោងចក្រកាត់ដេរសម្លៀកបំពាក់ ដែលមានទីតាំងនៅ ភូមិអង្គរោងឃុំមហាឬស្សី ស្រុកគងពិសីខេត្តកំពង់ស្ពឺ មានទុនវិនិយោគប្រមាណ៥,៨លានដុល្លារអាមេរិក និងបង្កើតការងារបានចំនួន២.៣៣៦នាក់។

ទី២ គម្រោងបង្កើតរោងចក្រផលិតខ្សែ ក្រវ៉ាត់និងកាបូបគ្រប់ប្រភេទ មានទីតាំងវិនិយោគនៅភូមិព្រែកសំរោង៣ សង្កាត់តាខ្មៅ ក្រុងតាខ្មៅ ខេត្តកណ្ដាល មានទុនវិនិយោគ ប្រមាណ៥,៥លានដុល្លារអាមេរិកនិងបង្កើតការងារបានចំនួន១.៧១៨នាក់ ។

នៅក្នុងឆ្នាំ ២០២២នេះ តាមរយៈក្រុមប្រឹក្សាអភិវឌ្ឍន៍កម្ពុជាបានបង្ហាញឱ្យឃើញថា មានគម្រោងវិនិយោគថ្មីៗ ជាបន្តបន្ទាប់ទាំងគម្រោងតូចៗនិងធំៗ មានតម្លៃរហូតដល់ពាន់លានដុល្លារ ត្រូវបានអនុម័តឱ្យដំណើរការវិនិយោគ ដែលបង្ហាញពីការកក្រើកឡើងវិញ នៃសកកម្មភាពនៅក្នុងប្រទេសកម្ពុជា ទោះបីជាមិនទាន់មានវិនិយោគិនបរទេស ចូលមកច្រើនដូចមុនស្ថានភាពកូវីដ១៩ក្ដី៕

ដោយៈ សុខុម

សិង្ហបុរី: ជាទូទៅ នៅក្នុងសំណង់អគារខ្ពស់ៗ ជាពិសេសអគារកប់ពពក គេពិតជាកម្រឃើញកន្លែង ដែលមានធម្មជាតិបៃតងណាស់ នៅក្នុងទីក្រុង ហើយបើនៅក្នុងទីក្រុង ដែលមានប្រជាជនរស់នៅច្រើនកកកុញ ដូចនៅសិង្ហបុរី ជាដើម គឺរឹតតែមិនបាច់និយាយទៅទៀត។

ទោះជាយ៉ាងណា ដោយគិតគូរយ៉ាងហ្មត់ចត់ ប្រកបដោយចក្ខុវិស័យវែងឆ្ងាយអំពីសុខុមាលភាព របស់អ្នកនៅក្នុងអគារ ស្ថាបត្យករបានរចនាប្លង់អគារកប់ពពកមួយដែលមានឈ្មោះថា CapitaSpring Tower នៅក្នុងប្រទេសសិង្ហបុរី ដោយមានដាំរុក្ខជាតិ និងដើមឈើរហូតដល់ទៅ៨០.០០០ដើមដើម្បីជួយបន្សុទ្ធខ្យល់ក្នុងអគារ ផ្ដល់ទេសភាពបៃតង និងភាពស្រស់ស្រា​យបែបធម្មជាតិពិតៗ។

អគារកប់ពពកដែលផ្សារភ្ជាប់ នឹងធម្មជាតិបៃតងយ៉ាងកម្រនេះ ទើបតែត្រូវបានសាងសង់បញ្ចប់ជាស្ថាពរ និងដាក់ឱ្យដំណើរការកាលពីពេលថ្មីៗនេះប៉ុណ្ណោះ។ នេះបើយោងតាមសារព័ត៌មាន CNN ចុះផ្សាយកាលពីថ្ងៃសុក្រ ទី១៤ ខែតុលា។

ដោយមានកម្ពស់២៨០ម៉ែត្រ និងមានជាន់សរុបចំនួន៥១ជាន់ CapitaSpring Tower នៅពេលនេះ បានស្ថិតក្នុងចំណោមអគារខ្ពស់ៗបំផុតនៅក្នុងប្រទេសសិង្ហបុរី។

អគារនេះជាកម្មសិទ្ធិឯកជន របស់ក្រុមហ៊ុនអចលនទ្រព្យខ្នាតយក្សចំនួន២ គឺក្រុមហ៊ុនCapitaLand និងក្រុមហ៊ុនMitsubishi Estate ហើយអ្នកជួលអគារនេះ ក៏រួមមាន ទាំងធនាគារវិនិយោគអាមេរិក J.P. Morgan ផងដែរ។

ដើម្បីឱ្យស្របតាមការជំរុញរបស់រដ្ឋាភិបាល ធ្វើយ៉ាងណាធានាឱ្យបានថា សង្កាត់ពាណិជ្ជកម្មនៅក្នុងប្រទេសសិង្ហបុរី ផ្ដល់នូវអ្វីលើសពីទីធ្លាការិយា​ល័យ ក្រុមហ៊ុនអភិវឌ្ឍន៍ក៏បានបើកចំហតំបន់ទេសភាពខ្លះ នៃអគារនេះដើម្បីស្វាគមន៍សាធារណជន៕ CNN៕

ដោយៈ សហការី

តាកែវៈ បុរី HK Residence បាននិងកំពុងចាប់ផ្តើមការសាងសង់នៅក្នុងតំបន់សក្តានុពល នៅក្នុងតំបន់រមណីយដ្ឋានភ្នំតាខ្មៅ នៃខេត្តតាកែវ ដោយផ្តល់ជូននូវជម្រើស ផ្ទះវីឡាស្រស់ស្អាតបំផុតនៅក្នុងតំបន់ ជាមួយតម្លៃទាបជាងទីផ្សារ និងអាចផ្តល់ផលចំណេញខ្ពស់ ក្នុងរយៈពេលដ៏ខ្លីខាងមុខ។

គម្រោងបុរីនេះមានឈ្មោះថា HK Residence ដែលមានទីតាំងស្ថិតនៅភូមិកណ្ដឹងតូច ឃុំកណ្ដឹងតូច ស្រុកបាទី ខេត្តតាកែវ ស្ថិតនៅព្រំប្រទល់រវាងខេត្តកណ្តាលនិងរាជធានីភ្នំពេញ មានទំហំរហូតដល់៥ហិចតា ដែលជំហានទី១ កំពុងសាងសង់លើផ្ទៃដីទំហំ២ហិចតាជាមុនសិន ហើយនឹងបន្តពង្រីកការអភិវឌ្ឍបន្ថែមទៀត នាពេលខាងមុខ។

លោកចាប ពៅអគ្គនាយកបុរី HK Residenceបានមានប្រសាសន៍ ឲ្យដឹងកាលពីពេលថ្មីៗនេះថា បុរីនេះមានប្រភេទផ្ទះវីឡា ដែលមានទំហំផ្ទះ១៣,៥ម៉ែត្រគុណ៧,២ ដែលមាន៣បន្ទប់គេងនិង៣បន្ទប់ទឹក អមជាមួយសួនច្បារដ៏ស្រស់ស្អាត នៅក្នុងផ្ទះនីមួយៗដាច់ដោយឡែកពីគ្នា។ ជាពិសេ​ស ផ្លូវនៅក្នុងបុរីមានទំហំចន្លោះពី២០ ទៅ៣០ម៉ែត្រ និងមានសួនច្បារ ទីលានកំសាន្តសម្រាប់កុមារ កន្លែងហាត់ប្រាណ ។ល។

លោក ចាប ពៅ បានមានប្រសាសន៍ឱ្យដឹងបន្តថា បុរី HK Residence មានទីតាំងស្ថិតនៅក្នុងតំបន់សក្តានុពលខ្ពស់ មិនត្រឹមតែមានទីតាំងនៅជិតរាជធានីភ្នំពេញ ដោយធ្វើដំណើរតាមរយៈផ្លូវជាតិលេខ២ នៅជិតផ្លូវក្រវាត់ក្រុងទី៤ និងទីតាំងរមណីយដ្ឋានភ្នំតាម៉ៅផងដែរ។

លោកបន្តថា បន្ថែមលើសនេះ គម្រោងវិនិយោគធំៗជាច្រើនគ្រោងមកបណ្ដាក់ទុន ដូចជា គម្រោងរមណីយដ្ឋានខ្នាតអន្តរជាតិលំដាប់ខ្ពស់ ទំហំជាង៥០ហិចតា និងគម្រោងបុរីរបស់ក្រុមហ៊ុនផ្សេងៗទៀត។ អ្វីដែលសំខាន់ជាងនេះ ការអភិវឌ្ឍលើបណ្ដាញហេដ្ឋារចនាសម្ព័ន្ធ ផ្លូវ ទឹក ភ្លើង គឺមានគ្រប់គ្រាន់ ដោយមិនមានភាពខ្វះខាតឡើយ ដែលនេះនឹងបង្កលក្ខណៈកាន់តែងាយស្រួលដល់ការរស់នៅរបស់អតិថិជន។

លោកអះអាងថា “ទីតាំងនេះមានសក្តានុពលល្អបំផុតនេះ នឹងជំរុញឱ្យ ការវិនិយោគនៅលើបុរី HK Residence ក្នុងរយៈពេល៥ឆ្នាំខាងមុខនេះ នឹងអាចផ្តល់ផលចំណេញខ្ពស់ មួយគុណនឹងពីរ”។

សម្រាប់អតិថិជនដែលមានចំណាប់អារម្មណ៍ទិញ អញ្ចើញមកមើលទីតាំងថ្ងៃនេះ នឹងអាចរើសទីតាំងល្អបានមុនគេ។ សម្រាប់ការបង់ប្រាក់ អតិថិជនអាចទទួលបានការសម្រួលឯកសារ រត់ការធ្វើប្លង់ជូន សម្រាប់ការខ្ចីពីធនាគារក្នុងអត្រាការប្រាក់ទាបបំផុត ពីធនាគារដៃគូរជាច្រើនរបស់បុរី៕

 ដោយៈ វឌ្ឍនៈ

ភ្នំពេញៈ បណ្ដោយផ្លូវជាតិលេខ៦អា ជាតំបន់ដែលមានសកក្ដានុពលខ្ពស់ក្នុងការអភិវឌ្ឍលំនៅឋាន ជាក់ស្ដែងបច្ចុប្បន្ននេះ គេសង្កេតឃើញមានបណ្ដុំបុរីធំៗបានលេចរូបរាងឡើងជាបន្តបន្ទាប់។

នៅពេលអនាគតដ៏ខ្លីខាងមុខនេះ តំបន់តាមបណ្ដោយផ្លូវជាតិលេខ៦អានឹងក្លាយជាទីក្រុងថ្មីមួយ និងមានការអភិវឌ្ឍកាន់តែខ្លាំង។

លោកស្រីតាំង ហួរ នាយិកាក្រុមហ៊ុនAmatak Property Service បានមានប្រសាសន៍កាលពីម្សិលម៉ិញនេះថា តំបន់នៅតាមបណ្ដោយផ្លូវ៦អា រយៈពេល២ឆ្នាំចុងក្រោយនេះ ឃើញមានការអភិវឌ្ឍខ្លាំង ដូចជា ប្រភេទបុរី ហើយថ្មីៗនេះក៏លឺព័ត៌មានថា គេនឹងអភិវឌ្ឍន៍ផ្សារទំនើបនៅតំបន់នោះផងដែរ។ ដូច្នេះហើយនៅពេលដែលមានផ្សារទំនើប មានអ្នករស់នៅច្រើន តំបន់នោះ នឹងក្លាយទៅជាទីក្រុងលឿន។

លោកស្រីបន្តថា “សក្ដានុពលនៃតំបន់ផ្លូវជាតិលេខ៦អា យើងមានពហុកីឡដ្ឋានថ្មី និងធំជាងគេនៅកម្ពុជា ដូច្នេះទីក្រុងថ្មីនឹងត្រូវពង្រីកនៅជុំវិញគម្រោងស្តាតនោះហើយ”។ អ្នកស្រីបន្តថា “ទីតាំងជុំវិញស្តាតនោះគឺល្អខ្លាំងណាស់ដោយមានទន្លេអមសងខាង ហើយពីរបីខាងមុខទៀតតំបន់នោះនឹងមានមនុស្សទៅរស់នៅកាន់តែច្រើន ដោយបច្ចុប្បន្ននេះយើងឃើញថាមានបុរីធំៗកាន់តែច្រើន កំពុងពង្រីកខ្លួនហើយ សុទ្ធតែជាបុរីល្បីឈ្មោះនៅកម្ពុជា”។

លោកស្រីតាំង ហួរបានបន្ថែមថា ចាប់តាំងពីមានការអភិវឌ្ឍជាបុរី លំនៅឋាននៅតំបន់នោះ ក៏បានជំរុញឱ្យតម្លៃដីធ្លី នៅតាមបណ្ដោយផ្លូវជាតិលេខ៦អា មានសន្ទុះកើនឡើងមួយកម្រិតទៀតផងដែរ ប៉ុន្តែការកើនឡើងនៃតម្លៃដីនេះ ក៏នៅតែអាចទទួលយកបាន និងអាចធ្វើឱ្យអ្នកអភិវឌ្ឍន៍ទទួលបានប្រាក់ចំណេញក្នុងការអភិវឌ្ឍ។

លោកស្រីបន្តថា “ដីនៅជិតក្រុងកាន់តែមានតម្លៃខ្ពស់ ហើយបើទៅឆ្ងាយពីក្រុងបន្តិចតម្លៃក៏ទាបទៅតាមហ្នឹងដែរ ជាក់ស្ដែងដីនៅក្បែរតន្លេសាបមកជិតក្រុងបន្តិច តម្លៃមានរហូតដល់៣០០០ដុល្លារអាមេរិក ក្នុងមួយម៉ែត្រការ៉េ ហើយបើទៅឆ្ងាយជិតដល់ព្រែកតាមាក់តម្លៃ ក្រោម១០០០ដុល្លារអាមេរិកក្នុងមួយម៉ែត្រការ៉េ ”។

ជាមួយគ្នានេះ លោកប៉ូ អ៊ាវគង់ អគ្គនាយកក្រុមហ៊ុនAdvance បានលើកឡើងផងដែរថា តំបន់ផ្លូវលេខ៦អាជាតំបន់ ដែលមានការទាក់ទាញទៅលើការអភិវឌ្ឍលំនៅឋាន តម្លៃមធ្យមឡើងដល់តម្លៃខ្ពស់ ពីព្រោះផ្ទះនៅតាមបណ្ដោយផ្លូវជាតិលេខ៦អា មានដល់ខ្ទង់លានដុល្លារអាមេរិក ក្នុងមួយល្វែង ។

លោកបន្តថា “នៅពេលតំបន់ណាមួយ ចាប់ផ្ដើមមានអ្នកអភិវឌ្ឍន៍លំនៅឋានតម្លៃខ្ពស់ ហើយទទួលបានជោគជ័យ ក៏មានអ្នកអភិវឌ្ឍន៍ថ្មីៗជាបន្តបន្ទាប់ ចូលទៅកាន់តំបន់នោះ ដើម្បីស្វែងរកទីតាំងដើម្បីអភិវឌ្ឍន៍ទៅតាមនោះដែរ ឬគេហៅថាបណ្ដុំបុរី ”៕

ដោយៈ សុផារី

ភ្នំពេញៈ របាយការណ៍ប្រចាំត្រីមាសទី៣ ឆ្នាំ២០២២ របស់ក្រុមហ៊ុន CBRE Cambodia ចេញផ្សាយនៅដើមខែតុលានេះ បានឱ្យដឹងថា នៅក្នុងរយៈពេល៣ខែចុងក្រោយនេះ ទីផ្សារបុរីគ្រប់ប្រភេទ និងគ្រប់ទម្រង់កំពុងប្រឈមការប្រកួតប្រជែងខ្ពស់ ដែលជំរុញឱ្យមានការធ្លាក់ចុះតម្លៃ គួរឱ្យកត់សម្គាល់។

អ្នកនាង គឹម គិនកេសា អ្នកគ្រប់គ្រងជាន់ខ្ពស់នៃក្រុមហ៊ុនអចលនទ្រព្យ CBRE Cambodia បានមានប្រសាសន៍ថា សម្រាប់ទីផ្សារបុរីនៅក្នុងទីក្រុងភ្នំពេញ ប្រឈមនឹងការប្រកួតប្រជែងកាន់តែខ្លាំង ពីមួយឆមាសទៅមួយឆមាស សម្រាប់គ្រប់ប្រភេទនៃបុរី និងគ្រប់ទម្រង់នៃបុរី។

អ្នកនាងបន្តថា “ទីផ្សារបុរីប្រភេទប្រណិត និងមធ្យមកំពុងប្រឈមការប្រកួតប្រជែងខ្ពស់ ដែលបណ្ដាលមកពីលំហូរចូល នៃអ្នកអភិវឌ្ឍន៍ជាតិ និងអន្តរជាតិថ្មី។ ជាពិសេស អ្នកអភិវឌ្ឍន៍ខុនដូមួយចំនួន ក៏បាននិងកំពុងផ្លាស់ប្ដូរមកអភិវឌ្ឍន៍បុរីផងដែរ”។

អ្នកនាងបន្តថា ចំណែក បុរីប្រភេទតម្លៃសមរម្យ ការប្រកួតប្រជែងកើតឡើងចំពោះអ្នកអភិវឌ្ឍន៍ ដែលមានស្រាប់នៅក្នុងទីផ្សារ ដែលហាក់ដូចជាទទួលរកនូវផលប៉ះពាល់ធ្ងន់ធ្ងរ បណ្ដាលមកពីផលប៉ះពាល់លើចំណូលរបស់អតិថិជនក្រុមនេះ។

អ្នកជំនាញរូបនេះ បានមានប្រសាសន៍បញ្ជាក់ថា ក្រុមអតិថិជនបុរីប្រភេទតម្លៃសមរម្យជាក្រុម ដែលទទួលរងផលប៉ះពាល់ធ្ងន់ធ្ងរជាងគេ នៅ ក្នុងកំឡុងពេលវិបត្តិសេដ្ឋកិច្ចបែបនេះ។

ការប្រកួតប្រជែងនេះ បាននាំមកនូវការធ្លាក់ចុះ នៃតម្លៃបុរីគ្រប់ប្រភេទ និងគ្រប់ទម្រង់។

យោងតាមរបាយការណ៍ ដែលបានចេញផ្សាយបានបង្ហាញថា ប្រភេទវីឡាទោលបានធ្លាក់ចុះ០,៤ភាគរយ ប្រភេទវីឡាភ្លោះធ្លាក់ចុះ៤,២ ភាគរយ ផ្ទះអាជីវកម្មធ្លាក់ចុះ២,៣ភាគរយ និងប្រភេទផ្ទះធម្មតាបានធ្លាក់ចុះ០,៤ភាគរយ៕

ដោយៈ គង់ សូរិយា

       កោះកុងៈ ក្រុមមន្រ្តីជំនាញ និងសហគមន៍មូលដ្ឋានបានជួបប្រជុំគ្នា ដើម្បីពិភាក្សាពីផែនការ បង្កើតសហគមន៍ទេសចរណ៍ថ្មីចំនួនពីរ ដើម្បីទាក់ទាញភ្ញៀវទេសចរណ៍ជាតិ អន្តរជាតិទៅទស្សនាខេត្តមួយនេះ។

កិច្ចប្រជុំនេះ ធ្វើឡើងក្រុមការងារមន្ទីរទេសចរណ៍ ខេត្តកោះកុងនិងបាន ពិគ្រោះយោបល់ជាមួយស្ថាប័នពាក់ព័ន្ធ ដូចជា មន្ទីរបរិស្ថានខេត្ត មន្ទីរកសិកម្ម រុក្ខាប្រមាញ់និងនេសាទខេត្ត អាជ្ញាធរឃុំ សហគមន៍តំបន់ការពារធម្មជាតិកណ្តោល សហគមន៍នេសាទកណ្តោល និងអង្គការមរតកស្ដីពីការរៀបចំបង្កើតសេវាកម្មអេកូទេសចរណ៍ នៅសហគមន៍ទាំង២។

សហគមន៍ទេសចរណ៍ចំនួន២ ដែលគ្រោងបង្កើតឡើងរួមមាន សហគមន៍ទេសចរណ៍ តំបន់ការពារធម្មជាតិកណ្ដោល និងសហគមន៍នេសាទកណ្ដោល ស្ថិតនៅសាលាឃុំកណ្ដោល ភូមិកណ្តោល ឃុំកណ្តោល ស្រុកបូទុមសាគរ៕

ដោយ៖ សហការី

ភ្នំពេញ៖ ក្រុមហ៊ុនសាងសង់ព្រលានយន្តហោះអន្តរជាតិតេជោ (TIA) គិតត្រឹមថ្ងៃទី១៤ ខែតុលា ឆ្នាំ២០២២នេះ សម្រេចបានវឌ្ឍនភាពចំនួន៤០ភាគរយហើយ ដោយគម្រោងសាងសង់នេះគ្រោងបញ្ចប់ដំណាក់កាលទី១នៅឆ្នាំ២០២៤។

យោងតាមសេចក្ដីប្រកាសព័ត៌មាន ចេញផ្សាយដោយក្រុមហ៊ុនវិនិយោគព្រលានយន្តហោះនេះ បានបញ្ជាក់ថា ទឹកប្រាក់វិនិយោគដែលទទួលបានពីសញ្ញាបណ្ណរបស់ TIA នឹងត្រូវប្រើប្រាស់សម្រាប់ការសាងសង់ និងការអភិវឌ្ឍន៍ TIA នៅខេត្តកណ្តាល។

អត្រាការប្រាក់(Coupon rate) របស់សញ្ញាបណ្ណនេះគឺ៥,៥% ក្នុងមួយឆ្នាំ ជាមួយនឹងរយៈពេល៣ឆ្នាំ ហើយត្រូវបានធានាដោយក្រុមហ៊ុន Overseas Cambodian Investment Corporation Ltd (OCIC) ។

ក្រុមហ៊ុន OCIC គឺជាក្រុមហ៊ុនវិនិយោគក្នុងស្រុកមួយធំជាងគេក្នុងប្រទេសកម្ពុជា ដែលជំនាញ នៅក្នុងការអភិវឌ្ឍន៍លើវិស័យអចលនទ្រព្យ សំណង់ ការគ្រប់គ្រងអចលនទ្រព្យ ការអប់រំ វេជ្ជសាស្ត្រ ផ្សារទំនើប សណ្ឋាគារ រោងម៉ាស៊ីនកិនស្រូវ និងសង្វាក់ផលិតកម្មជាដើម ជាមួយនឹងគម្រោងសំខាន់ៗជាច្រើនដូចជា TIA ទីក្រុងកោះពេជ្រ កោះនរា ទីក្រុងរណបជ្រោយចង្វារ និង ទីក្រុងទំនើប Olympia ជាដើម៕