ដោយៈ គង់ សូរិយា

       ភ្នំពេញៈ ក្រុមហ៊ុនអចលនទ្រព្យលំដាប់ពិភពលោកKW Cambodiaបានសម្ភោធដាក់ឲ្យដំណើរការ ជាផ្លូវការនូវAppរបស់ខ្លួនមានឈ្មោះkwcambodia.com។

ក្រុមហ៊ុនអចលនទ្រព្យលំដាប់ពិភពលោកនេះ បានដំណើរការកម្មវិធី​របស់ខ្លួនរយៈពេលមួយថ្ងៃពេញ ដោយមានអ្នកជំនាញ អ្នកអភិវឌ្ឍន៍អចល​នទ្រព្យជាច្រើនរយនាក់ នៅសាលសន្និសីទព្រីមៀរ សែនសុខ។

ក្រុមហ៊ុKW Cambodia មានសាខានៅរាជធានីភ្នំពេញ ខេត្តបាត់ដំបង ខេត្តសៀមរាប និងខេត្តកំពង់ចាម។

លោកឧកញ៉ាសំ សុខនឿនប្រធានKW SAM SN បានមានប្រសា  សន៍ឲ្យដឹងថា ក្រុមហ៊ុនលំដាប់ពិភពលោកនេះ បាននិងកំពុងដំណើរការផ្តល់សេ​វាកម្មអចលនទ្រព្យ ប្រកបដោយទំនុកចិត្ត និងផ្តោតលើបច្ចេកវិទ្យា ដើម្បីជួយសម្រុញ និងសម្រួលដល់ការប្រើប្រាស់របស់អតិថិជន។

លោកបន្តថា “ការអភិវឌ្ឍន៍Appនេះឡើង ចំណាយប្រាក់រាប់លានដុល្លារអាមេរិក ដើម្បីសម្រួលការទិញលក់អចលនទ្រព្យ ក៏ដូចជាជួយពង្រិកសេវាកម្ម និងជម្រុញទំនុកចិត្តក្នុងទីផ្សារបន្ថែមទៀត”។

ចំណែកលោកឧកញ៉ាបណ្ឌិតគីម ហ៊ាងប្រធានKW Cambodiaបានមានប្រសាសន៍ឲ្យដឹងផងដែរថា យើងបាននិងកំពុងពង្រីកសក្តានុពលរបស់យើង និងពង្រីកទំនុកចិត្ត ការបណ្តុះបណ្តាល និងអភិវឌ្ឍន៍បច្ចេកវិទ្យា ដើម្បីជួយលើកកំពស់វិស័យនេះ និងទាក់ទាញការវិនិយោគឲ្យបានកាន់តែច្រើនមកកម្ពុជា។

លោកបន្តថា “បច្ចេកវិទ្យាដើរតួនាទីកាន់តែសំខាន់ឡើង ក្នុងវិស័យអចលនទ្រព្យ ដែលចាំបាច់ឲ្យយើងពង្រីកការវិនិយោគបន្ថែម ដើម្បីទាក់ទាញ និងសម្រួលដល់ការប្រើប្រាស់របស់ងតិថិជនរបស់យើង”។

ទាក់ទងនឹងការពង្រីកការិយាល័យ នៅតាមបណ្តាខេត្តនានា លោកឧកញ៉ាបណ្ឌិតគីម ហ៊ាង បានបញ្ជាក់ថា ការពង្រីកសមាជិកភាពនៃសាខារបស់ក្រុមហ៊ុនKW Cambodia ជាការងាយនោះទេ ប្រសិនជាយើងទទួលអ្នកចង់ទិញម៉ាកយីហោនេះនៅកម្ពុជា ប៉ុន្តែការជ្រើសរើសសមាជិក ដែលគិតតែពីផលប្រយោជន៍ផ្ទាល់ខ្លួន ជាបញ្ហាដែលយើងមិនផ្តោតនោះទេ ប៉ុន្តែអ្វីដែលយើងផ្តោត គឺចង់ឲ្យអ្នកទិញយីហោរបស់យើង អាចរួមចំណែកប ណ្តុះបណ្តា​លធនធានមនុស្ស និងជួយដល់វិស័យនេះ ក៏ដូចជាសេដ្ឋកិច្ចកម្ពុជាឲ្យមានភាពរិកចម្រើនកាន់តែខ្លាំង៕

ដោយ៖ សហការី

កំពត៖ ត្រឹមរយៈពេលប៉ុន្មានសប្តាហ៍ក្រោយបើកការដ្ឋាន គម្រោងពង្រីក និងលើកកម្រិតគុណភាពផ្លូវជាតិលេខ៣៣ ពីទីរួមខេត្តកំពត ដល់ច្រកលក ដែលសាងសង់ដោយក្រុមហ៊ុនសាជីវកម្មស្ពាន និងថ្នល់ចិន (CRBC) សម្រេចបានជិត៦ភាគរយហើយ។

នេះបើយោងតាមលោក សង់ ស៊ីណាវ៉េត អគ្គនាយករង នៃអគ្គនាយកដ្ឋានសាធារណការ និងជាប្រធានអង្គភាព បានអញ្ជើញចុះត្រួតពិនិត្យបច្ចេកទេសសាងសង់ និងវឌ្ឍនភាពការងារ បានចុះត្រួតពិនិត្យការងារ ថ្ងៃទី១៣ ខែមករា ឆ្នាំ២០២៣។

គិតចាប់ពីថ្ងៃប្រកាសបើកការដ្ឋានជាផ្លូវការ មកទល់បច្ចុប្បន្ន ការអនុវត្តគម្រោងការងារខាងលើ សម្រេចលទ្ធផលបាន៥,៨០% នៃទំហំការងារសរុប ដោយរួមមាន ការកៀរកាយពង្រីកតួផ្លូវ និងការកិនបង្ហាប់ដោយកន្លែង។

ការអញ្ជើញចុះត្រួតពិនិត្យដោយផ្ទាល់នាពេលនេះ គឺធ្វើឡើងក្នុងគោលបំណងត្រួតពិនិត្យលើការងារបច្ចេកទេស ដើម្បីធានាឱ្យបានថាការសាងសង់ ត្រូវបានអនុវត្តទៅតាមលក្ខណៈបទដ្ឋានបច្ចេកទេស ប្រកបដោយគុណភាព ក៏ដូចជាវឌ្ឍនភាពការងារ របស់គម្រោងពង្រីក និងលើកកម្រិតគុណភាពផ្លូវជាតិលេខ៣៣ នេះផងដែរ។

លោកប្រធានអង្គភាពអនុវត្តគម្រោង ក៏បានពាំនាំអនុសាសន៍ផ្តាំផ្ញើរដ៏ខ្ពង់ខ្ពស់របស់lokទេសរដ្ឋមន្ត្រី រដ្ឋមន្រ្តីក្រសួងសាធារណការ និងដឹកជញ្ជូន ដែលបានណែនាំឱ្យក្រុមហ៊ុន CRBC ត្រូវយកចិត្តទុកដាក់ឱ្យបានខ្ពស់បំផុត ក្នុងការអនុវត្តការងារឱ្យបានត្រឹមត្រូវតាមលក្ខណៈបច្ចេកទេស ជៀសវាងការធ្វើខុសហើយត្រូវធ្វើឡើងវិញដដែលៗ។

លើសពីនេះទៅទៀត ក្រុមហ៊ុនត្រូវគិតគូរឱ្យបានម៉ត់ចត់ពីសុវត្ថិភាពនៅតាមការដ្ឋាន ដោយដាក់ផ្លាកសញ្ញាផ្តល់ដំណឹង ផ្លាកសញ្ញាបញ្ជៀសចរាចរណ៍ និងការស្រោចទឹកកាត់បន្ថយដីហុយជាដើម ជៀសវាងការរំខានបងប្អូនប្រជាពលរដ្ឋ។

គម្រោងពង្រីក និងលើកកម្រិតគុណភាពផ្លូវជាតិលេខ៣៣ ត្រូវបានប្រកាសបើកការដ្ឋានជាផ្លូវការ កាលពីថ្ងៃទី៣០ ខែធ្នូ ឆ្នាំ២០២២ ក្រោមអធិបតីភាពដ៏ខ្ពង់ខ្ពស់របស់ សម្តេចតេជោ នាយករដ្ឋមន្ត្រីនៃព្រះរាជាណាចក្រកម្ពុជា។ គម្រោងនេះមានប្រវែងប្រមាណ៥២,៥៧គីឡូម៉ែត្រ តភ្ជាប់ពីខេត្តកំពត (បំបែកពីផ្លូវជាតិលេខ៣ ត្រង់ចំណុចគ.ម១៤៨+១០០) ទៅកាន់ច្រកលក (ព្រំដែនកម្ពុជា-វៀតណាម) ឆ្លងកាត់ភូមិសាស្រ្ត ស្រុកទឹកឈូ និងស្រុកកំពង់ត្រាច នៃខេត្តកំពត ហើយឆ្លងកាត់ភូមិសាស្រ្ត ក្រុងកែប និងស្រុកដំណាក់ចង្អើរ នៃខេត្តកែប គ្រប់គ្រងដោយ ក្រសួងសាធារណការ និងដឹកជញ្ចូន ក្រោមឥណទានសម្បទានពីរដ្ឋាភិបាល នៃសាធារណរដ្ឋប្រជាមានិតចិន រួមជាមួយនិងថវិការបស់រាជរដ្ឋាភិបាលកម្ពុជា សម្រាប់ការដោះស្រាយផលប៉ះពាល់ និងពន្ធអាការផ្សេងៗ៕

ដោយ: គង់ លាងហួរ

ប៉េកាំង: ទីភ្នាក់ងារព័ត៌មានចិន Xinhua បានឱ្យដឹងនៅថ្ងៃសុក្រនេះថា ប្រទេសចិននឹងជំរុញការផ្តល់ហិរញ្ញប្បទានដល់ក្រុមហ៊ុនអភិវឌ្ឍន៍អចលនទ្រព្យ ដែលមានគុណភាពល្អ និងដាក់ចេញនូវផែនការគាំទ្រចំនួន១០០ពាន់លានយ័ន(១៤,៨៦ពាន់លានដុល្លារ) សម្រាប់ប្រាក់កម្ចីទិញផ្ទះជួល។

សារព័ត៌មាន Xinhua បានរាយការណ៍ពីចំណាត់ការចុងក្រោយបង្អស់ ដើម្បីបន្ធូរបន្ថយវិបត្តិសាច់ប្រាក់ងាយស្រួល ដែលបានញាំញីវិស័យអចលនទ្រព្យចិន ចាប់តាំងពីពាក់កណ្តាល ឆ្នាំ២០២០។ ផែនការនេះផ្តោតជាសំខាន់ទៅលើក្រុមហ៊ុនអចលនទ្រព្យ ដែលមានគុណភាពខ្ពស់ជាមួយនឹងទំហំធំ និងមានសារៈសំខាន់ជាប្រព័ន្ធ។

ក្រុមនិយតករនឹងកែលម្អច្បាប់ “បន្ទាត់ក្រហមបី” សម្រាប់ក្រុមហ៊ុនអចលនទ្រព្យសាកល្បងចំនួន៣០ ដោយមិនផ្តល់ឈ្មោះជាក់លាក់របស់ក្រុមហ៊ុនទាំងនោះទេ។

គោលនយោបាយ “បន្ទាត់ក្រហមបី” បានរឹតបន្តឹងលើការខ្ចីប្រាក់ពីសំណាក់ក្រុមហ៊ុនអភិវឌ្ឍន៍អចលនទ្រព្យ ដោយកំណត់លើសមាមាត្របំណុលរបស់ពួកគេ។

យោងតាមផែនការនេះ អាជ្ញាធរនឹងលើកទឹកចិត្តស្ថាប័នហិរញ្ញវត្ថុឱ្យចរចា ដើម្បីពង្រីកបំណុល ដល់ក្រុមហ៊ុនអភិវឌ្ឍន៍អចលនទ្រព្យប្រកបដោយគុណភាព ដោយផ្អែកលើមូលដ្ឋានសមហេតុផល។

ក្រុមអាជ្ញាធរក៏នឹងគាំទ្រការទូទាត់សងបំណុលនៅក្រៅប្រទេសរបស់អ្នកអភិវឌ្ឍន៍ ដោយផ្តល់នូវការគាំទ្រគោលនយោបាយ និងតាមរយៈការជួយកែលម្អការគ្រប់គ្រងការប្តូរប្រាក់បរទេសផងដែរ៕

ដោយ៖ សហការី

កំពត៖ ផ្លូវថ្មីមួយខ្សែ​តភ្ជាប់ឧទ្យានជាតិ ព្រះមុនីវង្សបូកគោ ឆ្ពោះទៅកាន់ផ្លូវជាតិលេខ៤ ដែលមានប្រវែងសរុប៦១គីឡូម៉ែត្រ រហូតមកដល់ពេលនេះឈូសឆាយសម្រេចបានប្រមាណជា៤០គីឡូម៉ែត្រហើយ គិតត្រឹមខែមករាឆ្នាំ២០២៣​នេះ។

ការអភិវឌ្ឍ​ផ្លូវ​ថ្មី​នេះ មានការ​​ចូលរួម​ពី​អ្នកឧកញ៉ា​ល្បី​ ២ ​រូប​គឺ​អ្នកឧកញ៉ា​ ម៉ុង រិទ្ធី ជា​អ្នកផ្ដល់​ដី​សម្បទាន​ដូងប្រេង រីឯ​អ្នកឧកញ៉ា ​សុខ គង់ ជា​អ្នកចំណាយ​ថ្លៃ​ការសាងសង់ ក្រោមកិច្ចសម្របសម្រួល​រប​ស់លោក​ឧបនាយករដ្ឋមន្ដ្រី ជា សុផារ៉ា និងអនុម័តដោយ​សម្តេចតេជោ ហ៊ុន សែន ​រដ្ឋមន្ដ្រី កាលពី​ថ្ងៃទី ​១៨ ធ្នូ ឆ្នាំ​ ២០២១​។

លោក កែវ សិទ្ធិ ប្រធានផ្នែកលក់ និងទីផ្សារ នៃក្រុមហ៊ុនសុខា អូតែល បានប្រាប់កម្ពុជាថ្មីថា ក្រុមការងារការដ្ឋាន កំពុងសម្រុកធ្វើយ៉ាងខ្លាំងក្នុងការឈូសឆាយបើកផ្លូវនេះ។ លោកបន្ថែមថា នៅក្នុងកិច្ចការងារនេះ មានផលលំបាកច្រើន ដោយសារស្ថានភាពផ្លូវលើភ្នំសម្បូរព្រៃ និងជ្រលង កន្លែងខ្លះត្រូវចាក់​បំពេញដី និងថ្ម ហើយកន្លែងខ្លះទៀត ត្រូវបំផ្ទុះដើម្បីកាយថ្មបើកផ្លូវ។ ទោះយ៉ាងណា លោកថា ក្រុមការងារនឹង​ពន្លឿនការស្ថាបនាផ្លូវនេះ។

ថ្លែងនៅក្នុង​ពិធី​សម្ពោធ​សៀវភៅ​លើក​​ដំបូងចំណង​ជើង​ថា ​“​អាថ៌កំបាំង​ពីក្រោយ​ភាពជោគជ័យ​របស់​អ្នកឧកញ៉ា​បណ្ឌិត សុខ គង់​” កាលពីថ្ងៃទី ០៣ មករា អ្នកឧកញ៉ា ​សុខ គង់ ​អគ្គនាយក​ក្រុមហ៊ុន​សុខា​អូ​តែ​ល និង​សូគីម៉ិច​គ្រុប​ បានឱ្យដឹងថា​ “​យើង​មានការ​អភិវឌ្ឍ​ច្រើន​នៅលើ​ភ្នំ​បូកគោ ដូចជា ផ្លូវ​កាត់​ពី​ស្រែ​៥០០ទៅ​កំពង់សោម​”។

​            អ្នកឧកញ៉ាបាន​បន្ដថា​ “​ប្រហែលជា​ខែ៤ទៀត យើង​អាច​ភ្ជាប់​គ្នា​បាន​ហើយ ចំពោះផ្លូវ​ ១ ​ខ្សែ​នោះ​។ វា​មិនទាន់​ជា​ផ្លូវ​កៅស៊ូ​ល្អ​អ្វី​នោះទេ គ្រាន់តែ​អាចធ្វើ​ដំណើរ​បាន​​”​។​

លោក​ ជា សុផារ៉ា រដ្ឋមន្ដ្រីក្រសួង​រៀបចំ​ដែនដី នគរូបនីយកម្ម និង​សំណង់ បានឱ្យដឹងនៅក្នុងពិធី​បញ្ចុះបឋមសិលា​កសាង ព្រះពុទ្ធ​ប្បដិមា​កម្ពស់​១០៨​ម៉ែត្រ​ដ៏​ធំ​បំផុត​នៅ​កម្ពុជា និង​ស្ថិត​ក្នុងចំណោម​ព្រះពុទ្ធ​ប្បដិមា​ខ្ពស់ៗ​លើ​ពិភពលោក។

លោក​បានលើកឡើងកាលពីថ្ងៃទី០៤ មករា ថា “​​រាជ​រដ្ឋាភិបាល​បានអនុញ្ញាត​ឱ្យ​ស្ថាបនាផ្លូវ​ថ្មី​ ១​ ខ្សែ​ទៀត ត​ភ្ជាប់​ពី​ផ្លូវជាតិ​លេខ​៤ ត្រង់​គីឡូម៉ែត្រ​១៥៨+២០០ ឆ្ពោះទៅ​ភ្នំ​បូកគោ ឆ្លងកាត់​តាម​ដី​សម្បទាន​សេដ្ឋកិច្ច​ចម្ការ​ដូងប្រេង​ប្រមាណ​២៧ ​គីឡូម៉ែត្រ​ទទឹងផ្លូវ១៨​ម៉ែត្រ​”។

លោក​រដ្ឋមន្រ្តីបានបន្តថា ”ជា​ទិសដៅ រាជរដ្ឋាភិបាល​គាំទ្រ និង​លើកទឹកចិត្ដដ​ល់​ការអភិវឌ្ឍ​ឧទ្យាន​ជាតិ​ព្រះមុនីវង្ស​បូកគោ ស្របតាម​ប្លង់គោល ការប្រើប្រាស់​ដី​គម្រោង​អភិវឌ្ឍន៍​ក្រុង​បូកគោ ចក្ខុវិស័យ​ឆ្នាំ​ ២០៣៥ និង​ត្រូវ​អភិរក្ស​តំបន់ ដែល​មានគុណ​តម្លៃ​ជីវចម្រុះ តំបន់​ទី​ជម្រាល ផ្ទៃ​រង​ទឹកភ្លៀង អាង​ស្ដុក​ទឹក ទីតាំង​ប្រ​វ​ត្ដិ​សាស្ដ្រ ទីសក្ការៈ និង​តំបន់​រដ្ឋបាល​សាធារណៈ​”។

បន្ថែមលើនេះ លោក ជា សុផារ៉ា បានគូសបញ្ជាក់ថា ក្រុមហ៊ុន​សុខាអូតែល របស់អ្នកឧកញ៉ា សុខ គង់ ​បាននិងកំពុង​អភិវឌ្ឍ​គម្រោង​៤​ ទីតាំង រួមមាន សាងសង់​ភូមិគ្រឹះ ៧៦១៣​ខ្នង និង​ផ្ទះ​២១៩២ ​ល្វែង ដែល​បាន​បើក​ការដ្ឋាន​សាងសង់​កាលពី​ថ្ងៃទី​៧ មីនា ឆ្នាំ​២០២០​។

ក្រុមហ៊ុន​សុខាអូតែល ​ទទួលបាន​សិទ្ធិ​សម្បទាន​វិនិយោគ​អភិវឌ្ឍនៅ​ឧទ្យាន​ជាតិ​ព្រះមុនីវង្ស “​បូកគោ​” ។ ក្រុមហ៊ុន បានបោះទុនរាប់រយលានដុល្លារ ដើម្បីវិនិយោគអភិវឌ្ឍកែច្នៃតំបន់នេះឱ្យមានការរីកចម្រើនគ្រប់ផ្នែក រួមមាន ទេសចរណ៍ វប្បធម៌ សាសនា និងវិស័យអចលទ្រព្យជាដើម៕

ដោយ: សុផារី

ភ្នំពេញ: អចលនទ្រព្យលំនៅឋានជាប្រភេទអចលនទ្រព្យ ដែលបន្តទទួលបានតម្រូវការ និងភាពពេញនិយមច្រើនបំផុតនៅក្នុងប្រទេសកម្ពុជា។

ដូច្នេះ នៅក្នុងស្ថានភាពបច្ចុប្បន្ន អ្នកអភិវឌ្ឍន៍ត្រូវសិក្សាអំពីតម្រូវការជាក់ស្តែងរបស់អតិថិជន ចន្លោះតម្លៃដែលពេញនិយម និងស្ថានភាពទីផ្សារអចលនទ្រព្យនាពេលបច្ចុប្បន្នផងដែរ។

លោកស្រី អាន សុធីតា អគ្គនាយិកាក្រុមហ៊ុន PropNex Cambodia បានមានប្រសាសន៍ឲ្យដឹងកាលពីចុងសប្តាហ៍មុនងថា នៅក្នុងស្ថានភាពតម្រូវការលំនៅឋានរបស់ប្រជាជនកម្ពុជា នាពេលបច្ចុប្បន្ននេះ គេសង្កេតឃើញថា ប្រភេទអចលនទ្រព្យមួយចំនួន ដែលធ្លាប់ទទួលបានការពេញនិយមកំពុងធ្លាក់ចុះវិញ ខណៈប្រភេទអចលនទ្រព្យខ្លះទៀត ហាក់បង្ហាញកំណើនតម្រូវការខ្ពស់ឡើងវិញ។

លោកស្រីសុធីតា បានបន្ថែមថា តាមរយៈនិន្នាការតម្រូវការថ្មីនេះ អ្នកអភិវឌ្ឍន៍លំនៅឋានត្រូវស្វែងយល់អំពីតម្លៃ ដែលអ្នកទិញ ឬអ្នកវិនិយោគអាចមានលទ្ធភាពទិញបាន ដូច្នេះហើយពួកគាត់អាចរចនាចេញម៉ូតលំនៅឋានតាមគុណតម្លៃ ដែលអតិថិជនអាចជ្រើសរើសបាន។

លោកស្រីបានសង្កត់ធ្ងន់ថា “អ្នកអភិវឌ្ឍន៍ត្រូវស្វែងយល់ពីតម្រូវការរបស់អតិថិជន មុននឹងអភិវឌ្ឍន៍ ឬចេញម៉ូតប្រភេទផ្ទះណាមួយ”។

ជាមួយគ្នានេះ លោក ប៉ូវ អ៊ាវគង់ អគ្គនាយកក្រុមហ៊ុនអចលនទ្រព្យ Advance បានឱ្យដឹងនៅថ្ងៃទី១៣ ខែមករា ឆ្នាំ២០២៣នេះថា អ្នកអភិវឌ្ឍន៍ ត្រូវសិក្សាឱ្យបានច្បាស់លាស់អំពីចរន្តនៃទីផ្សារ និងតម្រូវការនៃទីផ្សារ មុននឹងវិនិយោគលើអ្វីមួយ។

លោកបន្តថា “ជាអ្នកវិនិយោគត្រូវការសិក្សាឲ្យបានច្បាស់លាស់ អំពីចរន្តនៃទីផ្សារ និងតម្រូវការនៃទីផ្សារ ព្រមទាំងការរំពឹងទុក(speculation​) នៃទីផ្សារអចលនទ្រព្យបច្ចុប្បន្នផងដែរ”។លោកបញ្ជាក់បន្ថែមថា “អ្នកវិនិយោគគាត់ត្រូវមើលទីតាំង តម្លៃ និងទិសដៅនៃការវិនិយោគថា តំបន់ណាមួយរីកចម្រើននៅ ក្នុងលក្ខខណ្ឌច្បាស់លាស់នៅក្នុងផ្នែកណាមួយ ដើម្បីអាចវិនិយោគបាន”៕