ដោយ៖ សុផារី

ភ្នំពេញ៖ ក្រសួងសាធារណការ និងដឹកជញ្ជូនស្នើក្រុមហ៊ុនចិន ដែលកំពុងសិក្សាគម្រោងផ្លូវនាវាចរណ៍ និងប្រព័ន្ធភស្ដុភារកម្មទន្លេបាសាក់ ឱ្យពន្លឿនការងារឱ្យបានចប់សព្វគ្រប់ និងគ្រប់ជ្រុងជ្រោយយ៉ាងយូរត្រឹមខែមករា ឆ្នាំ២០២៣។

ក្រុមហ៊ុនចិនទាំងពីរនោះ រួមមាន ក្រុមហ៊ុនសាជីវកម្មស្ពាន និងថ្នល់ចិន(CRBC) និងជំនាញការរបស់ក្រុមហ៊ុន CCCC Water Transport Consultant។

លោក ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន បានដឹកនាំកិច្ចប្រជុំពិនិត្យវឌ្ឍនភាពការងារគម្រោងសិក្សាផ្លូវនាវាចរណ៍ និងប្រព័ន្ធភស្ដុភារកម្មទន្លេបាសាក់ ជាមួយតំណាងក្រុមហ៊ុនតាំងពីរ  ដើម្បីជួយជំរុញល្បឿននៃការសិក្សានេះឱ្យបានលឿន និងអាចបញ្ចប់នាពេលដ៏ខ្លីខាងមុខប្រកបដោយគុណភាព និងប្រសិទ្ធភាពខ្ពស់ ជាពិសេសទទួលបានលទ្ធផលគ្រប់ជ្រុងជ្រោយតាមផែនការដែលបានរំពឹងទុក។

លោកទេសរដ្ឋមន្ត្រី បានស្នើសុំឱ្យភាគីក្រុមហ៊ុនទាំងពីរយកចិត្តទុកដាក់បន្ថែមទៀតលើការសិក្សាបច្ចេកទេសលម្អិតឱ្យមានគុណភាពខ្ពស់ និងត្រូវសហការកាន់តែជិតស្និទ្ធបន្ថែមទៀតជាមួយមន្ត្រីបច្ចេកទេសក្រសួង ដើម្បីពន្លឿនគម្រោងសិក្សានេះឱ្យបានចប់សព្វគ្រប់ និងគ្រប់ជ្រុងជ្រោយយ៉ាងយូរត្រឹមខែមករា ឆ្នាំ២០២៣។

គម្រោងផ្លូវនាវាចរណ៍ និងប្រព័ន្ធភស្ដុភារកម្មទន្លេបាសាក់នេះ នឹងជួយជំរុញការដឹកជញ្ជូនតាមផ្លូវទឹក និងភស្តុភារកម្មនៅកម្ពុជាឱ្យកាន់តែមានប្រសិទ្ធភាពថែមមួយកម្រិតទៀត ជាពិសេសអាចជួយកាត់បន្ថយការចំណាយ និងថ្លៃដើមនៃការដឹកជញ្ជូនឱ្យកាន់តែទាបជាងមុន ព្រមទាំងផ្ដល់ភាពងាយស្រួលក្នុងការធ្វើសមាហរណកម្មវិស័យដឹកជញ្ជូនតាមផ្លូវទឹកផ្ទៃក្នុងប្រទេសផង និងអាចតភ្ជាប់ជាមួយអន្តរជាតិបានកាន់តែងាយស្រួលផងដែរ។

ភាគីទាំងពីរបានពិភាក្សាយ៉ាងផុសផុល និងផ្លាស់ប្ដូរមតិយោបល់លើទិន្នន័យ និងព័ត៌មានទាក់ទងនឹងការងារបច្ចេកទេសផ្លូវទឹក ការសិក្សា និងការវាយតម្លៃចាំបាច់លើផ្នែកបរិស្ថាន សង្គម និងសេដ្ឋកិច្ច ផងដែរ៕

 ដោយៈ វឌ្ឍនៈ

ភ្នំពេញៈ តំបន់តាមបណ្ដោយផ្លូវ៥៩៨ ឬហៅថាផ្លូវជា សុផារ៉ា កាលពីមុន ជាតំបន់មួយចាត់ទុកជាតំបន់ឆ្ងាយពីទីក្រុង ជាតំបន់វាលស្រែលិចទឹក តែបានប្រែក្លាយជាតំបន់ ដែលមានការទាក់ទាញខ្លាំង ទៅលើការអភិវឌ្ឍអចលនទ្រព្យ។

បច្ចុប្បន្ននេះមានអ្នកអភិវឌ្ឍន៍អចលនទ្រព្យជាច្រើន បានទៅកាន់តំបន់នោះ និងអភិវឌ្ឍន៍លំនៅឋានជាបន្តបន្ទាប់ ដែលធ្វើឱ្យតំបន់នេះក្លាយជាតំបន់ទាក់ទាញ ទៅលើការអភិវឌ្ឍផ្ទះអាជីវកម្ម និងផ្ទះសម្រាប់អ្នកមានប្រាក់ចំណូលមធ្យមឡើងទៅ។

អ្នកស្រីវ៉ន ណារ៉ាដាលីន ប្រធានផ្នែកលក់នៃបុរីKK The Resident 598 បានមានប្រសាសន៍កាលពីថ្ងៃទី១៣ តុលាកន្លងមកថា តំបន់តាមបណ្ដោយផ្លូវ៥៩៨ ឬហៅថាផ្លូវឯកឧត្តម ជាសុផារ៉ា គឺជាតំបន់ដែលកំពុងមានសក្ដានុពលខ្ពស់ ដោយយើងឃើញថាតំបន់នេះ ស្ថាប័នរដ្ឋធំៗបានមកចូលកាន់តំបន់នោះ ហើយអាជីវកម្មតាមបណ្ដោយផ្លូវនេះ ក៏កំពុងមានភាពមមាញឹកបណ្តើរៗ។

អ្នកស្រីបន្តថា ដោយមើលឃើញពីសក្ដានុពល នៃការអភិវឌ្ឍនៅតាមបណ្ដោយផ្លូវជា សុផារ៉ាមានការរីកចម្រើនបែបនេះ ទើបគម្រោង KK The resident បានសម្លឹងមើលពីការអភិវឌ្ឍ សម្រាប់ផ្គត់ផ្គង់ជូនអតិថិជននៅក្នុងតំបន់នោះដែរ ។

អ្នកស្រីបន្តថា គម្រោងនេះបានចាប់ផ្ដើមអភិវឌ្ឍន៍ឡើង ចំពេលដែលប្រទេសកម្ពុជា និងពិភពលោកទាំងមូល កំពុងមានវិបត្តិកូវីដ១៩ ប៉ុន្តែការលក់នៃគម្រោងរបស់យើង ក៏នៅតែទទួលបានការគាំទ្រពី អតិថិជននិងប្រជាពលរដ្ឋ ដែលកំពុងមានតម្រូវការលំនៅឋានសម្រាប់រស់នៅ និងសម្រា​ប់ធ្វើអាជីវកម្ម។ អ្នកស្រីបន្តថា “គម្រោងរបស់យើងមានជាប្រភេទផ្ទះ អាជីវកម្មដែលអតិថិជនអាចប្រកបអាជីវកម្មបាន និងមានប្រភេទផ្ទះ វីឡាផងដែរ ” ។

អ្នកស្រីបន្តទៀតថា ទោះបីជាកម្ពុជានិងពិភពលោកកំពុងស្ថិតនៅក្នុងវិបត្តិនៃសង្គ្រាមរុស្ស៊ី និងអ៊ុយក្រែន និងវិបត្តិកូវីដ១៩ដែលមិនទាន់បញ្ចប់ទាំងស្រុង ហើយធ្វើឱ្យទីផ្សារអចលនទ្រព្យ នៅក្នុងប្រទេសមានបញ្ហាផងដែរនោះ តែសម្រាប់ការលក់ផ្ទះរបស់គម្រោង KK The Resident នៅតែបន្តទទួលបានអតិថិជនទិញជាហូរហែរ។

អ្នកស្រីបន្តថា “ភាពវិជ្ជមានទាំងនេះ គឺដោយសារតែគម្រោងរបស់យើងនៅកៀកនឹងក្រុង ឬអាចនិយាយបានថានៅក្នុងក្រុងតែម្ដង មានផ្សារទំនើបៗនៅជុំវិញងាយស្រួល ក្នុងការធ្វើដំណើរចេញចូលក្នុងតំបន់ និងងាយស្រួលក្នុងការរកស៊ីជាដើម”។

អ្នកស្រីបន្ថែមថា គម្រោងអភិវឌ្ឍន៍លំនៅឋាន KK The Resident ត្រូវបានសាងសង់ឡើងលើទំហំដីជាង៤ហិចតា ដោយក្នុងនោះ៣ហិចតាមានបែងចែកជា តំបន់រស់នៅនិងតំបន់ធ្វើអាជីវកម្ម ចំណែកជាង១ហិចតាទៀតសម្រាប់សាងសង់ជាអគារពាណិជ្ជកម្ម ។ អ្វីដែលពិសេសនោះ គឺក្នុងគម្រោងមានការបែងចែក ការរស់នៅបែបឯកជនភាព និងការរស់នៅបែបអាជីវកម្ម ដោយយើងមានផ្សារសហគមន៍បែបទំនើប នៅក្នុងបុរីនោះផ្ទាល់តែម្ដង និងមានអគារខុនដូរហូតទៅដល់៣អគារនៅក្នុងថែមទៀតផង។

ជាការកត់សម្គាល់ ការអភិវឌ្ឍនៅតាមបណ្ដោយផ្លូវជា សុផារ៉ាក្នុងរយៈពេលប៉ុន្មានឆ្នាំកន្លងមកនេះ មានការរីកចម្រើនគួរឱ្យកត់សម្គាល់ ដោយមានក្រុមហ៊ុនក្នុង និងក្រៅស្រុកជាច្រើន បានបោះទុនអភិវឌ្ឍន៍គម្រោងនានាក្នុងតំបន់នោះ ដូចជាគម្រោងអគារខុនដ គម្រោងលំនៅឋានតម្លៃមធ្យមឡើង សម្រាប់អ្នកមានចំណូលមធ្យមកម្រិតខ្ពស់ និងអ្នកចំណូលខ្ពស់ ក៏ដូចជាគម្រោងបុរីលំនៅឋាន ដែលអភិវឌ្ឍន៍ដោយវិនិយោគិន ក្នុងស្រុកជាច្រើនទៀត៕

   ដោយៈ គង់ សូរិយា

       ភ្នំពេញៈ អគ្គនាយកក្រុមហ៊ុនERA Cambodia លោកខន គង្គាបានចែែករំលែកគន្លឹះសំខាន់ៗខ្លីអំពីរបៀបលុយត្រូវបានបង្កើតឡើង ហើយអ្នកណាបានបង្កើតវាឡើង។

លោកខន គង្គាបានសរសេរលើបណ្តាញទំនាក់ទំនងសង្គមរបស់ខ្លួនកាលពីថ្ងៃទី១៣ តុលាកន្លងមកថា លុយ(Money)ត្រូវបានបោះផ្សាយ(បង្កើត)ដោយធនាគារកណ្តាល និងធនាគារដែលអ្នកប្រើប្រាស់រាល់ថ្ងៃ។ កាលពីអតីតាកាលលុយ គឺជាវត្ថុដែលអាចកាន់បានហើយវាមានតម្លៃចរិកទៅតាមទំហំ និងទំងន់(Commodity)របស់វា។ ដូចនេះកាលពីសម័យនោះអ្ន កអាចយកមាន់ដូរយកអង្ក… បន្ទាប់មកទៀតយកមាសដូរជាមួយនឹងទំនិញនិងសេវាកម្មផ្សេង…បន្ទាប់មករដ្ឋាភិបាលក៏បោះជាកាក់(Coin) ដែលអាចផលិតពីប្រាក់ មាស ឬលោហៈមានតម្លៃផ្សេងទៀត។

លោកបន្តថា សម័យបច្ចុប្បន្ននេះ លុយត្រូវបានបង្កើតឡើងជាក្រដាសឬផ្លាស្ទិក(Fiat) ហើយជាទូទៅដើម្បីផលិតលុយមួយរយដុល្លាអាមេរិក ថ្លៃដើមចំណាយប្រហែល$0.20ម្ភៃសេន មានន័យថារាល់ការផលិត$100 រដ្ឋាភិបាលចំនេញ$99.8ដុល្លារ នេះជាវិធីដែលលុយត្រូវបានផលិតឡើង។

បច្ចុប្បន្ននេះលុយ97% នៃលុយរបស់ពិភពលោកជាទូរលេខ(Number)នៅក្នុងប្រពន្ធ័កុំព្យូទ័រ លុយក៏ត្រូវបានផលិតឡើង តាមរយៈបំណុល (Debt) ឧទាហរណ៍ថាអ្នកយក$100ទៅដាក់ធានាគារ ដើម្បីយកការប្រាក់ ធានាគារអាចយក90% នៃលុយរបស់អ្នកទៅអោយអ្នកផ្សេងទៀតខ្ចីស្មើរ $90 តាមច្បាប់ធានាគារត្រូវតម្កល់10% (Fractional Reserve) ស្មើ$10។ លុយមួយដុល្លារនេះ ក្លាយទៅជាលុយ$190ដុល្លារហេីយប្រតិបត្តិការនេះជាហូហែរបន្តទៀត។

លោកខន គង្គាបានបន្តថា “ដូចនេះលុយ$100 បានបង្កើតទៅជាលុយរាប់ពាន់ដុល្លារ ពីទទេ(Nothing)។ បំណុលកាន់តែច្រើន លុយក៏ត្រូវបានបង្កើតឡើងកាន់តែច្រើន។ លោកបន្ថែមថា “អ្នកដែលគ្រប់គ្រងលុយជាអ្នកដែលគ្រប់គ្រងពិភពលោក”៕

ដោយ: លាងហួរ

ហ្សាកាតា: គម្រោងផ្លូវរថភ្លើងល្បឿនលឿន ក្នុងប្រទេសឥណ្ឌូនេស៊ី ដែលជាផ្នែកមួយនៃគំនិតផ្តួចផ្តើមខ្សែក្រវាត់ និងផ្លូវរបស់ប្រទេសចិន នឹងឈានទៅបើកដំណើរការនៅឆ្នាំ២០២៣ ទោះបីជាប្រទេសទាំង២កំពុងចរចាគ្នាអំពីគម្រោងនេះថាប្រើប្រាស់លើសថវិកាក៏ដោយ។

ប្រធានាធិបតីឥណ្ឌូណេស៊ីលោក Joko Widodo បានត្រួតពិនិត្យស្ថានីយ៍រថភ្លើងថ្មីមួយ ជាទីតាំងដែលក្រុមហ៊ុនសាងសង់ផ្លូវដែក PT KCIC បានដាក់បង្ហាញរថភ្លើង ដែលផលិតនៅប្រទេសចិននៅលើផ្លូវដែក។

ខ្សែរថភ្លើងប្រវែង១៤២គីឡូម៉ែត្រនេះ នឹងតភ្ជាប់រដ្ឋធានីហ្សាកាតាជាមួយនឹងទីក្រុងដ៏ធំបំផុតមួយ របស់ប្រទេសឥណ្ឌូណេស៊ីគឺ ទីក្រុងបាងដុង(Bandung)។

លោកបានមានប្រសាសន៍ថា “ផ្លូវរថភ្លើងល្បឿនលឿននេះ នឹងក្លាយជាផ្លូវដំបូងគេក្នុងអាស៊ាន ហើយយើងសង្ឃឹមថា វានឹងបង្កើនការតភ្ជាប់រវាងប្រទេសនានា និងតភ្ជាប់បន្ថែមទៀតទៅកាន់ព្រលានយន្តហោះ ឬផ្លូវរថភ្លើងល្បឿនលឿនផ្សេងទៀត នៃបណ្តាប្រទេសសមាជិកអាស៊ាន”។

លោក Joko widodo បានបន្តថា គម្រោងនេះសម្រេចបានការសាងសង់៨៨,៨ភាគរយ ហើយគ្រោងបើកដំណើរការពាណិជ្ជកម្ម នៅក្នុងខែមិថុនា ឆ្នាំ២០២៣។

ក្រុមហ៊ុន KCIC បានរាយការណ៍ថា គម្រោងនេះកំពុងប្រឈមនឹងការចំណាយលើសប្រមាណ២ពាន់លានដុល្លារ ដែលបង្កើនការចំណាយសរុបដល់១១៣ពាន់ពាន់លានរូពៀ (៧,៣៦ពាន់លានដុល្លារ)។ចំណែកប្រទេសចិនបានប៉ាន់ប្រមាណគម្រោងនេះថា ត្រូវចំណាយថវិកាតិចជាង១ពាន់លានដុល្លារអាមេរិកប៉ុណ្ណោះ។

ប្រធានក្រុមហ៊ុន KCIC លោក Dwiyana Slamet Riyadi បានបញ្ជាក់ពីភាពមិនស្របគ្នា ក្នុងការគណនាតម្លៃ ដោយនិយាយថាការចរចាកំពុងដំណើរការដើម្បីដោះស្រាយបញ្ហានេះ៕

ដោយៈសុផារី

ភ្នំពេញៈ ក្រោយការបើកដំណើរការផ្សារទំនើប Mega Mall ដំបូងគេបង្អស់នៅក្នុងរាជធានីភ្នំពេញ គឺ Chip Mong Mega Mall 271 បានជំរុញឱ្យការផ្គត់ផ្គង់ទីផ្សារលក់រាយ ក្នុងឆ្នាំ២០២២នេះមានទំហំជាង២០ម៉ឺនម៉ែត្រក្រឡា។

យ៉ាងណាក្តី អ្នកជំនាញមើលឃើញថា ទីផ្សារលក់រាយនៅមិនទាន់មានភាពល្អប្រសើរណាស់ណានោះទេ ដោយអាចបន្តរហូតដល់ដើមឆ្នាំ២០២៣បន្តទៀត ដើម្បីត្រលប់ទៅកាន់ស្ថានភាព ដូចមុនវិបត្តិកូវីដ១៩វិញ។

យោងតាមរបាយការណ៍ប្រចាំត្រីមាសទី៣ ឆ្នាំ២០២២ របស់ក្រុមហ៊ុន CBRE Cambodia ចេញផ្សាយនៅដើមខែតុលានេះ បានឱ្យដឹងថា នៅក្នុងរយៈពេល៣ខែចុងក្រោយនេះ អត្រាកាន់កាប់ទីផ្សារលក់រាយ ក្នុងក្រុងភ្នំពេញមានភាពល្អប្រសើរ ដោយគ្របដណ្តប់ជាង៧០ភាគរយ នៃទំហំទី​ផ្សារសរុប កើនឡើងពីប្រមាណ៦៨ភាគរយ នៅក្នុងត្រីមាសទី២។

អ្នកនាងជិន ច័ន្ទដាលុច្ស ប្រធានផ្នែកវាយតម្លៃនៃក្រុមហ៊ុនអចលនទ្រព្យ CBRE Cambodia បានមានប្រសាសន៍នៅថ្ងៃទី៧ ខែតុលាកន្លងមក​ថា សម្រាប់ពេលមួយឆ្នាំ២០២២នេះ យើងសង្គេតឃើញមានការផ្គត់ផ្គង់ទីផ្សារលក់រាយមានចំនួនច្រើន ដោយនឹងមានប្រហែល២០៧.០០០ម៉ែត្រក្រឡា។

អ្នកនាងបានលើកឡើងថា ក្នុងការផ្គង់ផ្គត់ទាំងនោះ ទំហំទី៤៥ភាគរយនៃការផ្គត់ផ្គង់សរុប ត្រូវបានបញ្ចប់ការសាងសង់រួចរាល់ហើយ ខណៈ៥៥ភាគរយទៀត គ្រោងនឹងបញ្ចប់ការសាងសង់ នៅត្រឹមដំណាច់ឆ្នាំ២០២២នេះ ដែលភាគច្រើននៃគម្រោងដែលគ្រោងនឹងបញ្ចប់ បានមកពីគម្រោងផ្សារទំនើបអ៊ីអនម៉លទី៣។

អ្នកនាងបន្តថា យ៉ាងណាក្តី ទីផ្សារមួយនេះនៅមិនទាន់មានភាពធូរស្រាលច្រើននៅឡើយទេ។ សម្រាប់តម្លៃជួលផ្សារប្រភេទ Community Mall និង Prime Retail Podium បានធ្លាក់ចុះចន្លោះ៤ ទៅ៥ភាគរយ ពីមួយត្រីមាសទីមួយត្រីមាស ស្របពេលដែលផ្សារប្រភេទ Shopping Mall នៅបន្តមានភាពរឹងមាំបន្តទៀត។

អ្នកនាងសង្កត់ធ្ងន់ថា “យើងគិតថា ទំនោរនេះនឹងនៅបន្តរហូតដល់ចុងឆ្នាំ២០២២ និងដើមឆ្នាំ២០២៣ ជាមួយនឹងការផ្គត់ផ្គង់ថ្មី។ ទោះបីជាអត្រាការកាន់កាប់ផ្សារលក់រាយ មានការកើនឡើងដល់ជាង៧០ភាគរយក្តី ប៉ុន្តែវានៅវែងឆ្ងាយទៀត ដើម្បីឈានទៅដល់កម្រិតមុនវិបត្តិ ដែលមានអត្រាចន្លោះពី៩០ទៅ៩៥ភាគរយ”។

ជាមួយគ្នានេះ អ្នកស្រីអាន សុធីតាអគ្គនាយិកាក្រុមហ៊ុនPropNex Cambodiaបានមានប្រសាសន៍ឲ្យដឹងកាលពីពេលថ្មីៗនេះថា ទំហំនៃការ​ផ្គត់ផ្គង់ទីផ្សារលក់រាយនៅទីក្រុងភ្នំពេញ បានឈានដល់កម្រិតលើសតម្រូវ​ការ ដោយសារចំនួនផ្សារបែបសហគមន៍ និងផ្សារទំនើបធំៗត្រៀមនិងបាន​បើកដំណើរការកាន់តែច្រើន។

អ្នកស្រីបន្តថា “វាត្រូវការពេលវេលាបន្ថែមទៀត ដើម្បីធ្វើឲ្យទីផ្សារស្រូបយកអ្វីដែលមានការផ្គត់ផ្គង់ស្រាប់ ដើម្បីធ្វើឲ្យទីផ្សារនេះមានសភាពប្រសើរឡើង”៕

សុខុម

ប៉េកាំង: កាសែតរដ្ឋចិន បានចុះផ្សាយថា អាជ្ញាធរមូលដ្ឋានក្នុងប្រទេសចិន បានចាប់ផ្តើមជួយទិញផ្ទះដើម្បីរំលស់ចំនួនដែលលក់មិនទាន់ចេញកុំឱ្យសល់ច្រើនពេក។ នេះបើយោងតាមសារព័ត៌មាន CNA ចុះផ្សាយកាលពីថ្ងៃព្រហ្បតិ៍ ទី១៣ ខែតុលា។

នេះគឺជាវិធានការថ្មីចុងក្រោយ បន្ទាប់ពីរដ្ឋាភិបាលចិន បានដាក់ចេញគោលនយោបាយជាបន្តបន្ទាប់ដើម្បីជួយស្រោចស្រង់វិស័យអចលនទ្រព្យ ប៉ុន្តែនៅតែមិនអាចជំរុញកំណើនតម្រូវការក្នុងទីផ្សារ ជាពិសេសទីផ្សារលំនៅដ្ឋាន។

ទីផ្សារអចលនទ្រព្យក្នុងប្រទេសចិន បានដាំក្បាលចុះកាន់តែជ្រៅក្នុងរយៈពេលប៉ុន្មានខែចុងក្រោយនេះ ដោយតម្លៃបានធ្លាក់ចុះខ្លាំង ការលក់ក៏ស្ងាតដូចចោរលួចសេះ ហើយការវិនិយោគក៏ស្ងាត់ឈឹងកាលពីខែសីហា ខណៈវិធានការរឹតបន្តឹងកូវីដ-១៩ ដ៏អូសបន្លាយ និងពលរដ្ឋនាំគ្នាធ្វើពហិការឈប់បង់កម្ចីទិញផ្ទះទូទាំងប្រទេសនេះបានធ្វើឱ្យទស្សនវិស័យអចលនទ្រព្យធ្លាក់ចូលក្នុងវិបត្តិកាន់តែជ្រៅទៅៗ។

អ្នកទិញផ្ទះបានបង្កើនការប្រុងប្រយ័ត្នខ្ពស់ណាស់ នៅក្នុងការសម្រេចចិត្តទិញ ឬ មិនទិញផ្ទះ ទោះបីជាទីក្រុងជាង២០០ទូទាំងប្រទេសចិន បានចាត់វិធានការអន្តរាគមន៍ដើម្បីជំរុញការលក់ ដូចជា តាមរយៈការផ្តល់ឧបត្ថម្ភធន ការបញ្ចុះតម្លៃពិសេសសម្រាប់ការទិញជាក្រុម ការបង់ប្រាក់មុន ឬ Down Payment កាន់តែតិច និងបញ្ចុះអត្រាការប្រាក់សម្រាប់កម្ចីទិញផ្ទះជាដើមយ៉ាងណាក្ដី។

ពេលនេះ ទីក្រុងស៊ូចូវ (Suzhou) ដែលស្ថិតនៅភាគខាងកើតប្រទេសចិន មានគម្រោងទិញផ្ទះ រហូតដល់ទៅប្រមាណ១០.០០០យូនីត នៅក្នុងសង្កាត់ចំនួន១០របស់ខ្លួន។ នេះបើតាមកាសែតចិន Securities Times បានចុះផ្សាយ កាលពីថ្ងៃព្រហស្បតិ៍ ទី១៣ ខែតុលា៕ Reuters៕

ដោយៈ ស៊ីវ ម៉េង

       ភ្នំពេញៈ អ្នកជំនាញលក់អចលនទ្រព្យមួយរូប កញ្ញាងួន ច័ន្ទចរិយាបាន និងក្រុមការងារបានសម្រេចបើកក្រុមហ៊ុន អចលនទ្រព្យElegant Propertyជាមួយនឹងក្តីរំពឹងខ្ពស់ក្នុងទីផ្សារ ដែលការប្រកួតប្រជែងមានការកើនឡើង។

ស្ថាបនិកនិងជាអគ្គនាយិកាក្រុមហ៊ុនElegant Property កញ្ញាងួន ច័ន្ទចរិយាបានមានប្រសាសន៍ឲ្យដឹង ក្នុងពិធីបើកសម្ភោធក្រុមហ៊ុនកាលពីរាត្រីថ្ងៃទី១២ តុលាកន្លងមកថា ដោយសារមើលឃើញសក្តានុពលក្នុងទីផ្សារនេះ ស្របពេលដែលបទពិសោធន៍ប្រឡូក ក្នុងវិស័យនេះរយៈពេលវែង និងកសាងបាននូវបណ្តាញទំនាក់ទំនងរ៉ឹងមាំ កញ្ញាសម្រេចចិត្តបង្កើតក្រុមហ៊ុននេះឡើង ដោយឈរលើគោលការណ៍សុច្ចរឹតភាព ជំនាញ ក្រមសីលធ៌មវិជ្ជាជីវៈ និងភាពស្មោះត្រង់ជូនអតិថិជន។

កញ្ញាបានបន្តថា “ជាក្រុមហ៊ុនថ្មីយើងបាន និងកំពុងផ្តោតលើការទិញ លក់ ជួលអចលនទ្រព្យ និងសហការក្នុងភាពជាដៃគូជាមួយក្រុមហ៊ុនដៃគូ ដទៃទៀត ដើម្បីលើកកំពស់និងរួមចំណែក ធ្វើឲ្យវិស័យអចលនទ្រព្យនៅកម្ពុជាកាន់តែមានភាពរីកចម្រើនបន្ថែមទៀត”។

កញ្ញាងួន ច័ន្ទចរិយាបានក្លាយជាទូតសុឆន្ទៈរបស់គេហទំព័រPropertyarea.asiaផងដែរ។

កញ្ញាបានបន្តថា ទោះបីជាមានវិបត្តិជំងឺកូវីដ១៩  និងបញ្ហាសង្រ្គាមក្តី ប៉ុន្តែកញ្ញាសង្កេតឃើញថា អ្នកវិនិយោគជាតិ អន្តរជាតិនៅតែបន្តវិនិយោគក្នុងវិស័យនេះ ពិសេសទីផ្សារបុរី និងខុនដូ នៅតែមានតម្រូវការខ្ពស់ពីអតិថិជន ដែលភាគច្រើនជាជនជាតិខ្មែរ។

កញ្ញាងួន ច័ន្ទចរិយានៅតែររំពឹង និងមានសុទិដ្ឋិនិយមខ្ពស់លើវិស័យនេះ នឹងមានភាពរីកចម្រើនរយៈពេលវែងបន្តទៀត ដោយសារការរីកចម្រើនសេដ្ឋកិច្ច ការកើនឡើងនូវប្រាក់ចំណូល របស់ប្រជាជនវ័យក្មេងច្រើន ពិសេសកម្ពុជាមានប្រជាជនវ័យក្មេងច្រើន ដែលពួកគេជាសក្តានុពលរបស់​ប្រទេស៕

ដោយ: លាងហួរ

សេអ៊ូល: ប្រាក់កម្ចីរបស់គ្រួសារ ក្នុងប្រទេសកូរ៉េខាងត្បូងពីធនាគារ បានធ្លាក់ចុះខ្លាំងបំផុត នៅក្នុងខែកញ្ញា ចំពេលមានការកើនឡើងអត្រាការប្រាក់ និងការធ្លាក់ចុះនៃទីផ្សារអចលនទ្រព្យ។

ការផ្តល់ប្រាក់កម្ចីរបស់ធនាគារដល់គ្រួសារ រួមទាំង កម្ចីលើគោលនយោបាយបានធ្លាក់ចុះ១,២ពាន់ពាន់លានវ៉ុន(ប្រហែល៨៤០,៩៦លានដុល្លារអាមេរិក) នៅក្នុងខែកញ្ញា បន្ទាប់ពីបានកើនឡើង០,៣ពាន់ពាន់លានវ៉ុន នៅក្នុងខែសីហា នេះបើយោងតាមទិន្នន័យរបស់ធនាគារកូរ៉េ នៅថ្ងៃព្រហស្បតិ៍នេះ។

កំណើនប្រាក់កម្ចីទិញផ្ទះបានថយចុះមកត្រឹម០,៩ពាន់ពាន់លានវ៉ុន ពី១,៦ពាន់ពាន់លានវ៉ុន កាលពីខែមុន ខណៈដែលប្រាក់កម្ចីផ្សេងទៀតបានថយចុះ២,១ពាន់ពាន់លានវ៉ុន។ ធនាគារកណ្តាលរបស់កូរ៉េខាងត្បូង បានសម្រុកដំឡើងអត្រាការប្រាក់ ចាប់តាំងពីខែសីហាឆ្នាំ២០២១ ដើម្បីទប់ទល់នឹងបំណុលគ្រួសារខ្ពស់បំផុត និងអតិផរណា ដែលកំពុងកើនឡើង។

អាជ្ញាធរហិរញ្ញវត្ថុ នឹងគ្រប់គ្រងកំណើនបំណុលគ្រួសារ ឱ្យមានស្ថិរភាព និងបន្តកិច្ចខិតខំប្រឹងប្រែង ដើម្បីសម្រាលបន្ទុកហិរញ្ញវត្ថុ សម្រាប់ប្រជាជន ដែលមានប្រាក់ចំណូលទាប ឬតម្រូវការពិតប្រាកដ៕