ដោយ៖ សុផារី

ស្វាយរៀង៖ គម្រោងផ្លូវល្បឿនលឿនភ្នំពេញ-បាវិត នឹងក្លាយជាគម្រោងផ្លូវល្បឿនលឿនទី២នៅក្នុងប្រទេសកម្ពុជា បន្ទាប់ពីផ្លូវល្បឿនលឿនភ្នំពេញក្រុងព្រះសីហនុ ដែលទើបត្រូវដាក់ឱ្យដំណើរការកាលពីដើមខែតុលាកន្លងមក។ ផ្លូវនេះជាសរសៃឈាមសេដ្ឋកិច្ច ដ៏សំខាន់មួយទៀតសម្រាប់កម្ពុជា ដែលនឹងនាំក្តីសង្ឃឹមនៃការអភិវឌ្ឍ ឱ្យហូរចូលមកកាន់ខេត្តជាប់ព្រំដែនមួយនេះ ព្រមទាំងខេត្តដែលឆ្លងកាត់។

លោក លឹម សៀងហេង អភិបាលក្រុងបាវិត បានមានប្រសាសន៍ប្រាប់ Property Area Asia កាលពីដើមសប្តាហ៍មុននេះថា តាមរយៈគម្រោងផ្លូវល្បឿនលឿននឹងនាំមកនូវវិនិយោគិនជាច្រើនមកកាន់ក្រុងបាវិត ក៏ដូចជាខេត្តស្វាយរៀងទាំងមូល។ ក្រៅពីនេះ គម្រោងនេះក៏នឹងជួយសម្រួលការដឹកជញ្ជូនទំនិញឆ្លងកាត់ពីប្រទេសវៀតណាម ទៅកាន់ទីក្រុងភ្នំពេញ និងបណ្តាខេត្តឆ្លងកាត់ផ្សេងៗទៀតផងដែរ។

គម្រោងផ្លូវល្បឿនលឿនភ្នំពេញ-បាវិតក៏នឹងក្លាយជាកត្តាជំរុញសេដ្ឋកិច្ចខេត្តស្វាយរៀងឱ្យកាន់តែរីកចម្រើនមួយកម្រិតបន្ថែមទៀត។ លោកអភិបាលបានបញ្ជាក់ប្រាប់ថា បច្ចុប្បន្ននេះ មានវិនិយោគិនជាច្រើនបាន និងកំពុងធ្វើការវិនិយោគលើគម្រោងរោងចក្រគ្រប់ប្រភេទ នៅតាមតំបន់សេដ្ឋកិច្ចពិសេស ដែលបានផ្តល់ការងារជូនប្រជាពលរដ្ឋជាច្រើន។

លោកឧកញ៉ា នួន រឹទ្ធី អគ្គនាយកក្រុមហ៊ុនអចលនទ្រព្យ KFA បានមានប្រសាសន៍ប្រាប់ Property Area Asia នៅថ្ងៃទី១៣ ខែតុលា ឆ្នាំ២០២២នេះថា គម្រោងផ្លូវល្បឿនលឿន នឹងធ្វើឱ្យការតភ្ជាប់ពីតំបន់មួយទៅតំបន់មួយកាន់តែជិត រយៈវេលានៃការធ្វើដំណើរកាន់តែខ្លី ហើយទោះបីជាតំបន់សងខាងផ្លូវមិនអាចឱ្យឆ្លងកាត់ក្តី ប៉ុន្តែវានៅតែផ្តល់អត្តប្រយោជន៍ដល់វិស័យអចលនទ្រព្យរបស់ខេត្តគោលដៅ និងខេត្តឆ្លងកាត់ ជាពិសេសនៅតំបន់ផ្លូវច្រកចេញ (Exit way)។

លោកឧកញ៉ាបញ្ជាក់ថា សក្តានុពលខ្លាំងបំផុតនៃអចលនទ្រព្យ បានមកពីគម្រោងផ្លូវល្បឿនលឿន គឺកើនមានឡើងនៅត្រង់តំបន់ផ្លូវច្រកចេញ ដែលនឹងកើតមានជាទីប្រជុំជន ផ្សារលក់ដូរ ជាដើម ដែលនេះនឹងជំរុញតម្លៃដីធ្លី និងអចលនទ្រព្យនៅក្នុងតំបន់។

លោកឧកញ៉ាថា “សក្តានុពលនៃផ្លូវល្បឿនលឿន គឺនៅត្រង់ exit way នៅពេលមានផ្លូវចេញ នឹងកើតជាភូមិ កន្លែងលក់ដូរ តីប្រជុំជន នៅទីនេះ។​ ដូច្នេះ តម្លៃកើនឡើងនៃអចលនទ្រព្យ គឺនៅត្រង់ផ្លូវចេញ”។

សម្ដេចតេជោ ហ៊ុន សែន នាយករដ្ឋមន្រ្ដីនៃកម្ពុជា កាលពីថ្ងៃទី១៦ ខែកញ្ញា ឆ្នាំ២០២២កន្លងមក បានសម្រេចបង្កើតគណៈកម្មការអន្ដរក្រសួង ដើម្បីជំរុញដំណើរការអនុវត្ដគម្រោងផ្លូវល្បឿនលឿនតភ្ជាប់ពីរាជធានីភ្នំពេញ ទៅក្រុងបាវិត ដោយបានចាត់តាំង លោក ស៊ុន ចាន់ថុល ទេសរដ្ឋមន្រ្ដី រដ្ឋមន្រ្ដីក្រសួងសាធារណការ និងដឹកជញ្ជូន ជាប្រធាននិងលោក សុខ ចិន្ដាសោភា រដ្ឋមន្រ្ដីប្រតិភូអមនាយករដ្ឋមន្រ្ដី និងជាអគ្គលេខាធិការក្រុមប្រឹក្សាអភិវឌ្ឍន៍កម្ពុជា ជាអនុប្រធាន។

លោក ស៊ុន ចាន់ថុល ទេសរដ្ឋមន្រ្ដីរដ្ឋមន្រ្ដីក្រសួងសាធារណការ និងដឹកជញ្ជូន កាលពីពេលថ្មីៗនេះ បានបង្ហើបពីពេលវេលាក្នុងការបើកការដ្ឋានសាងសង់ផ្លូវល្បឿនលឿនខាងលើ ដោយលើកឡើងថា អាចនឹងចាប់ផ្ដើមនៅពាក់កណ្ដាលឆ្នាំ២០២៣ ខាងមុខ។

លោក ស៊ុន ចាន់ថុល បានមានប្រសាសន៍ថា រដ្ឋាភិបាលបានចុះMOU ជាមួយក្រុមហ៊ុន China Road and Bridge Corporation (CRBC) រួចរាល់ហើយ ហើយគ្រោងចុះហត្ថលេខាលើកិច្ចព្រមព្រៀងនៅក្នុងខែវិច្ឆិកាខាងមុខ ដើម្បីអាចបើកការដ្ឋានឲ្យបាននៅពាក់កណ្ដាលឆ្នាំ២០២៣។

គម្រោងផ្លូវល្បឿនលឿនភ្នំពេញ-បាវិត (Phnom Penh-Bavet Expressway) ជាខ្សែផ្លូវថ្មីទាំងស្រុង ដែលមានប្រវែងសរុប១៣៥គីឡូម៉ែត្រ ចេញពីភ្នំពេញនៅចំណុចផ្លូវខ្សែក្រវាត់ក្រុងទី៣ កាត់តាមខេត្តកណ្តាល ខេត្តព្រៃវែង និងខេត្តស្វាយរៀង ឆ្ពោះទៅក្រុងបាវិត ព្រំដែនកម្ពុជា-វៀតណាម៕

ដោយ៖​ សុផារី

ភ្នំពេញ៖ អគ្គនាយកដ្ឋានគយ និងរដ្ឋាករកម្ពុជា បានចេញសេចក្តីជូនដំណឹង សម្រេចពន្យារពេលបង់ពន្ធ និងអាករលើរថយន្តចង្កូតស្តាំគ្មានពន្ធ មានស្រាប់ក្នុងប្រទេសដែលបានចុះបញ្ជីរួចរហូតដល់ថ្ងៃទី៣១ ខែធ្នូ ឆ្នាំ២០២២។ នេះបើតាមសេចក្តីជូនដំណឹងដែលចេញផ្សាយនៅថ្ងៃទី១៣ ខែតុលានេះ។

អគ្គនាយកដ្ឋានគយ និងរដ្ឋាករកម្ពុជា បានបញ្ជាក់ថា “ដោយពិនិត្យឃើញពីស្ថានភាពលំបាក ក្នុងរដូវវស្សា ដែលប៉ះពាល់ដល់អាជីវកម្មរបស់ម្ចាស់រថយន្តចង្កូតស្តាំគ្មានពន្ធ មានស្រាប់ក្នុងប្រទេស ដែលបានមកចុះបញ្ជីរួច ប្រមុខរាជរដ្ឋាភិបាល បានផ្ដល់ការអនុញ្ញាតពន្យារពេលជូន ដល់ម្ចាស់រថយន្តចង្កូតស្តាំគ្មានពន្ធ មានស្រាប់ក្នុងប្រទេស ដែលបានចុះបញ្ជីរួច មកបំពេញកាតព្វកិច្ចពន្ធ និងអាកររហូតដល់ ថ្ងៃទី៣១ ខែធ្នូ ឆ្នាំ២០២២”។

ជាមួយគ្នានេះ អគ្គនាយកដ្ឋានគយ និងរដ្ឋាករកម្ពុជា បានរំលឹកដល់ម្ចាស់រថយន្តចង្កូតស្ដាំ ដែលបានចុះបញ្ជីរួច ប៉ុន្តែនៅមិនទាន់បានមកបំពេញកាតព្វកិច្ចពន្ធ និងអាកឱ្យប្រញាប់រួសរាន់ ចូលមកបង់ពន្ធ និងអាករ​នៅតាមបណ្តាអង្គភាពគយ និងរដ្ឋាកររាជធានី-ខេត្ត ដែលសាមីខ្លួនបានចុះបញ្ជីរថយន្តរបស់ខ្លួន ឱ្យបានតាមការកំណត់ជាកំហិត ដើម្បីចៀសផុតពីការបង្ក្រាប ដោយមន្ត្រីគយ និងរដ្ឋាករមានសមត្ថកិច្ចតាមដងផ្លូវ ការដ្ឋាន អាជីវកម្មដ្ឋាននិងតាមទីកន្លែងសាធារណះជាយថាហេតុ។

ប្រភពដដែលឱ្យដឹងថា នៅក្រោយ ថ្ងៃទី៣១ ខែធ្នូ ឆ្នាំ២០២២ រថយន្តចង្កូតស្ដាំបានដែលពុំបានបំពេញកាតព្វកិច្ចពន្ធ និងអាករ នឹងក្លាយជាមុខសញ្ញានៃការបង្ក្រាបរឹបអូស ដោះជាគ្រឿងបន្លាស់ ឬកំទេចចោលតាមច្បាប់ និងបទប្បញ្ញត្តិជាធរមានដោយពុំមានការអនុគ្រោះទៀតឡើយ។

អគ្គនាយកដ្ឋានគយ និងរដ្ឋាករកម្ពុជាសង្ឃឹមថា ម្ចាស់រថយន្តគ្មាន ពន្ធមានស្រាប់ក្នុងប្រទេសទាំងអស់ ចូលមកបំពេញកាតព្វកិច្ចពន្ធនិងអាករឱ្យបានគ្រប់ៗគ្នា និងទាន់ពេលវេលា​។ រថយន្តចង្កូតស្តាំគ្មានពន្ធ មានស្រាប់ក្នុងប្រទេស ដែលបានមកចុះបញ្ជីរួច ដែលមិនទាន់ចូលបង់ពន្ធមានចំនួនជាង៣ពាន់គ្រឿង៕

ដោយៈ វឌ្ឍនៈ

ភ្នំពេញៈ ក្រុមការងាររដ្ឋាភិបាលដឹកនាំដោយ លោកជា សុផារ៉ា ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់បាននិងកំពុងសម្រុក រៀបចំអភិវឌ្ឍន៍ហេដ្ឋារចនាសម្ព័ន្ធនៅតំបន់ថ្មី ដែលរដ្ឋាភិបាលរៀបចំជូនពលរដ្ឋស្ម័គ្រចិត្ត ចេញពីតំបន់អភិរក្សទៅតាំងទីលំនៅឋានភូមិរុនតាឯក។

រដ្ឋាភិបាលក៏មានគម្រោងសាងសង់ផ្សារ រហូតដល់៨ទីតាំង ដើម្បីសម្រួលដល់ប្រជាពលរដ្ឋទៅរស់នៅតំបន់នោះ ឲ្យមានមុខរបរអាជីវកម្មសម្រាប់ប្រាក់ចំណូល។

លោកជា សុផារ៉ា រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់បានឲ្យដឹងថា ក្រុមការងារកំពុងរៀបចំគម្រោងសាងសង់ផ្សារ ចំនួន៨នៅតំបន់អភិវឌ្ឍន៍ ភូមិធម្មជាតិរុនតាឯក ក្នុងស្រុកបន្ទាយស្រី ខេត្តសៀមរាប។ ក្រៅពីនេះដែរ នៅក្នុងតំបន់នោះក៏មានគម្រោងសាងសង់សាលារៀនសម្រាប់កូនចៅបងប្អូន ប្រជាពលរដ្ឋទៅរស់នៅតំបន់នោះ មានសាលារៀននៅជិតផ្ទះ ទទួលចំណេះដឹងនិងបន្តការសិក្សានៅថ្នាក់ខ្ពស់បន្តទៀត។

លើសពីនេះទៅទៀត ក្រុមការងារក៏កំពុងរៀបចំហេដ្ឋារចនាសម្ព័ន្ធសំខាន់ៗនៅក្នុងតំបន់នោះ ដូចជាប្រព័ន្ធភ្លើងសម្រាប់ប្រើប្រាស់ របស់ប្រជាពលរដ្ឋហេដ្ឋារចនាសម្ព័ន្ធផ្លូវថ្នល់ ជាដើម។

លោកជា សុផារ៉ាឱ្យដឹងទៀតថា ចាប់តាំងពីពេលចាប់ផ្ដើមដំបូងដែលប្រកាសឱ្យពលរដ្ឋស្ម័គ្រចិត្តទៅរស់នៅតំបន់ថ្មី ភូមិរុនតាឯក មកដល់ថ្ងៃទី១២ តុលា ២០២២ មានពលរដ្ឋចំនួន៨៤៩៤គ្រួសារហើយដែលបានស្ម័គ្រចិត្តមកចាប់ឆ្នោតយល់ព្រមទៅរស់នៅតំបន់ថ្មីនោះ ។

លោកបន្ថែមថា សម្រាប់ប្រជាពលរដ្ឋដែលរស់នៅ ក្នុងឃុំព្រះដាក់ស្រុកបន្ទាយស្រី ដែលមិនចង់ចាកចេញទៅរស់នៅតំបន់ថ្មីនោះ ក៏មិនថាអីដែរ តែសូមឱ្យពលរដ្ឋក្នុងតំបន់នេះ ជួយទប់ស្កាត់ការសាងសង់សំណង់ថ្មីៗដែលប៉ះពាល់ដល់តំបន់អភិរក្ស និងចូលរួមទប់ស្កាត់ការហូរចូលនៃអ្នកចំណូលថ្មី មកពីតំបន់ផ្សេងពីបណ្ដាខេត្តផ្សេងចូលមកក្នុងតំបន់នោះ។

សម្ដេចអគ្គមហាសេនាបតីតេជោហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានមានប្រសាសន៍កន្លងមកថា ពលរដ្ឋដែលមករស់នៅក្នុងតំបន់អភិវឌ្ឍន៍ ភូមិរុនតាត្រូវបានយកចិត្តទុកដាក់ ទាំងសុខុមាលភាព និងជីវភាពរស់នៅ ហើយពលរដ្ឋក្នុងតំបន់នេះនឹងត្រូវរៀបចំបណ្ណក្រីក្រជូនគ្រប់គ្នា ដូច្នេះនៅពេលត្រូវចូលមន្ទីរពេទ្យ ឬសេវាណាមួយពីរដ្ឋនឹងត្រូវបានយកចិត្តទុកដាក់ខ្ពស់៕

ដោយ: គង់ លាងហួរ

ភ្នំពេញ:ទំហំនៃការនាំចេញផលិតផលកាត់ដេរ សម្លៀកបំពាក់ ស្បែក​ជើង និងផលិតផលធ្វើដំណើររបស់ប្រទេសកម្ពុជា សម្រេចបានកំណើន២៤ភាគរយក្នុងរយៈពេល៩ខែដំបូង។ នេះបើយោងតាមការចេញផ្សាយពីគេហទំព័ររបស់អគ្គនាយកដ្ឋានគយ និងរដ្ឋាករនៅថ្ងៃព្រហស្បតិ៍នេះ។

របាយការណ៍ដដែលបានបង្ហាញថា ប្រទេសកម្ពុជាបាននាំចេញផលិត​ផលសរុប ដែលមានទំហំទឹកប្រាក់១០,២៥ពាន់លានដុល្លារអាមេរិក ក្នុងអំឡុងខែមករាដល់ខែកញ្ញាឆ្នាំនេះ ពោលគឺកើនឡើង២៤ភាគរយ ពី៨,២៤ពាន់លានដុល្លារ ធៀបនឹងរយៈពេលដូចគ្នាកាលពីឆ្នាំមុន។

របាយការណ៍បានបន្តថា ឧស្សាហកម្មកាត់ដេរសម្លៀកបំពាក់ ស្បែក​ជើង និងផលិតផលធ្វើដំណើរ គឺជាប្រភពប្តូរប្រាក់បរទេសច្រើនជាងគេសម្រាប់ប្រទេសកម្ពុជា ដែលស្មើនឹងជិត៦០ភាគរយនៃតម្លៃនាំចេញសរុប។

អនុរដ្ឋលេខាធិការ និងជាអ្នកនាំពាក្យក្រសួងពាណិជ្ជកម្ម លោក ប៉ែន សុវិជាតិ បានចាត់ទុកកំណើននេះថា ជំរុញមកពីការចាប់ផ្តើមឡើងវិញពេញលេញ នៃសកម្មភាពសេដ្ឋកិច្ចសង្គមក្នុងប្រទេស  និងការកើនឡើងនៃតម្រូវការសកល ខណៈដែលជំងឺរាតត្បាតសកលបានថយចុះ។

លោកបានប្រាប់សារពត៌មានស៊ីនហួថា កិច្ចព្រមព្រៀងភាពជាដៃគូសេដ្ឋកិច្ចទូលំទូលាយក្នុងតំបន់ (RCEP) ដែលចូលជាធរមានកាលពីដើមឆ្នាំនេះ ក៏បានរួមចំណែកដល់កំណើនដ៏ធំនេះផងដែរ។

រដ្ឋលេខាធិការក្រសួងការងារ លោក ហេង សួរ បានថ្លែងក្នុងសន្និសីទសារព័ត៌មានកាលពីថ្ងៃពុធម្សិលមិញនេះ ថា ឧស្សាហកម្មកាត់ដេរសម្លៀកបំពាក់ ស្បែកជើង និងផលិតផលធ្វើដំណើរមានរោងចក្រ និងសាខាជាង១២០០ ដែលមានកម្មករនិយោជិតប្រមាណ៨៣ម៉ឺននាក់ ដែលភាគច្រើនជាស្ត្រី៕