ដោយ៖ វឌ្ឍនៈ

ភ្នំពេញ ៖ ស្ថានភាពនៃទីផ្សារអចលនទ្រព្យនៅតាមតំបន់មួយចំនួននៅកម្ពុជាបានហាក់មានសន្ទុះល្អប្រសើរឡើងវិញ តែខ្លះទៀតនៅតែរក្សាលំនឹង ដូចកាលពីដើមឆ្នាំមុនដដែល។ ក្នុងនោះ ខេត្តសៀមរាបដែលជាខេត្តសក្ដានុពលមួយនៅកម្ពុជា ក៏មិនទាន់មានការប្រែប្រួលអ្វី ជាការកត់សម្គាល់ឡើយ មកដល់ដើមឆ្នាំ២០២៣នេះ។

លោក សំ សីហា ប្រធានសាខានៃក្រុមហ៊ុនអចលនទ្រព្យ Century 21 Zillion Holding ប្រចាំខេត្តសៀមរាប បានឱ្យដឹងថា មួយរយៈពេលចុងក្រោយនេះ ស្ថានភាពអចលនទ្រព្យនៅខេត្តសៀមរាប មិនទាន់មានអ្វីប្រែប្រួលនោះទេ។ គម្រោងវិនិយោគថ្មីៗនៅមិនទាន់មានលេចរូបរាងនៅឡើយ បើទោះបីជា គម្រោងអភិវឌ្ឍន៍ព្រលានយន្តហោះអន្តរជាតិសៀមរាបថ្មី បានប្រកាសពីការដាក់ដំណើរការឆាប់ៗនេះក្តី។

លោកបន្តថា លោកមិនទាន់ហ៊ានវាយតម្លៃ ពីស្ថានភាពយ៉ាងណានោះដែរ ពីទីផ្សារអចលនទ្រព្យនៅខេត្តសៀមរាប។ កាលពីឆ្នាំមុន មានអ្នកវាយតម្លៃថាស្ថានភាពនឹងល្អតែមកដល់ឆ្នាំនេះ នៅតែរក្សាលំនឹងថេរ និងមិនមានការប្រែប្រួលឡើយ។

ការអភិវឌ្ឍអចលនទ្រព្យគឺ ត្រូវពឹងលើការវិនិយោគពីខាងក្រៅប្រទេសទើបមានកំនើនប្រសើរ ប៉ុន្តែ ស្របនឹងសេដ្ឋកិច្ចពិភពលោកនៅមិនទាន់មានភាពប្រាកដប្រជានៅឡើយនោះ ទីផ្សារនិងស្ថានភាពអចលនទ្រព្យនៅកម្ពុជាក៏ត្រូវបានមើលឃើញថានឹងនៅតែរក្សាភាពថេរដូចនឹងឆ្នាំមុន។

លោកឧកញ៉ា ឃាង ពុទ្ធី ប្រធានក្រុមប្រឹក្សាភិបាល នៃសមាគមអ្នកជំនាញអចលនទ្រព្យកម្ពុជាបានលើកឡើងផងដែរថា ស្ថានភាពអចលនទ្រព្យនៅកម្ពុជាអាចវាយតម្លៃបានថា នឹងដូចមុនកូវីដ១៩វិញនៅចុងឆ្នាំ២០២៣។ សម្រាប់នៅដើមឆ្នាំនេះ ទីផ្សារអចលនទ្រព្យនឹងអាចប្រសើរនៅតំបន់ណាដែលមានការអភិវឌ្ឍគម្រោងរដ្ឋ ដូចជា ស្ពាន ថ្នល់ ហើយសន្ទុះនៃតម្លៃដីធ្លីក៏កើនឡើង ទៅតាមសន្ទុះនៃការអភិវឌ្ឍរបស់រដ្ឋផងដែរ។

លោកបន្តថា ការវិនិយោគដីធ្លី ដើម្បីប្រាក់ចំណេញ ត្រូវបង្កើនការប្រុងប្រយ័ត្ន ពីព្រោះពេលនេះជាពេលមួយ ដែលយើងអាចនិយាយបានថា “ប្រយ័ត្ន” ខុសពីប៉ុន្មានឆ្នំា ដែលការវិនិយោគដីធ្លី គឺមានផលចំណេញខ្ពស់ ដូច្នេះបើទិញហើយដឹងតែចំណេញអាស្រ័យលើទីតាំង និងរយៈពេលនៃការវិនិយោគ៕

ដោយ: គង់ លាងហួរ

បាងកក: អាជ្ញាធរផ្លូវល្បឿនលឿនថៃ (ETA) គ្រោងស្នើសុំសាងសង់ដំណាក់កាលដំបូងនៃគម្រោងផ្លូវល្បឿនលឿន Chalong Rat-Nakhon Nayok-Saraburi ក្នុងខែមករានេះ។

គម្រោង​នេះ​នឹង​សាងសង់​ផ្លូវ​ល្បឿន​លឿន​ប្រវែង១៩,២៥គីឡូម៉ែត្រ ដែល​តភ្ជាប់​ផ្លូវ​ល្បឿន​លឿន Chalong Rat ទៅ​ផ្លូវ​ក្រវាត់​ទី៣ របស់​ទីក្រុង​បាងកក ដែល​មាន​ឈ្មោះ​ថា MR10 ក្រោមថវិកាសាងសង់ប្រមាណ៩៩៤,៥លានដុល្លារអាមេរិក។

លោក Surachet Laophulsuk អភិបាលអាជ្ញាធរផ្លូវល្បឿនលឿនថៃ (ETA) បានមានប្រសាសន៍ថា ETA មានទំនុកចិត្តថា គម្រោងនេះនឹងត្រូវបានអនុម័ត ដោយក្រុមប្រឹក្សាអភិវឌ្ឍន៍សេដ្ឋកិច្ច និងសង្គមជាតិ (NESDC) នៅពេលដាក់ជូនលទ្ធផលសវនាការសាធារណៈ នៅថ្ងៃពុធនេះ។

លោក​បាន​បន្ត​ថា គម្រោង​នេះ​អាចត្រូវ​បាន​អនុម័ត ព្រោះ​ផ្លូវនេះនឹង​ជួយ​សម្រួល​ចរាចរណ៍ ​ដោយ​ភ្ជាប់​ទៅ​នឹង​ផ្លូវ​ហាយវ៉េ​បាងកក-កានចាន់បូរី របស់​នាយកដ្ឋាន​ផ្លូវ​ហាយវ៉េ។

លោក Surachet បានអះអាងថា នៅពេលគម្រោងនេះទទួលបានការអនុម័ត ដោយក្រុមប្រឹក្សាអភិវឌ្ឍន៍សេដ្ឋកិច្ច និងសង្គមជាតិ  ETA នឹងបញ្ជូនគម្រោងទៅគណៈរដ្ឋមន្ត្រី ដើម្បីអនុម័តមុនពេលចេញព្រះរាជក្រឹត្យស្តីពីការដកហូតកម្មសិទិ្ធដីធ្លី។

លោក​បាន​បន្ថែម​ថា “ការ​ព្រាង​ព្រះរាជក្រឹត្យ​នឹង​ប្រើ​ពេល​ប្រហែល​១ខែ ហើយ​ការ​អនុម័ត​នឹង​ប្រើ​ពេល​៦​ខែ​ទៀត ”។

ទន្ទឹមនឹងនោះ ដីធ្លីនឹងត្រូវបានដកហូតក្នុងរយៈពេលពីឆ្នាំ២០២៤-២០២៥ ហើយការសាងសង់នឹងចំណាយរយៈពេល៣៦ខែ។

អភិបាល ETA បានបន្ថែមថា ការវាយតម្លៃផលប៉ះពាល់បរិស្ថានរបស់គម្រោងក៏ត្រូវបានអនុម័តដោយគណៈកម្មការធនធានធម្មជាតិ និងបរិស្ថានជាតិកាលពីឆ្នាំមុនផងដែរ៕

ដោយ៖ លាងហួរ

ភ្នំពេញ៖ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានមានប្រសាសន៍ថា ការអភិវឌ្ឍបៃតង គឺជាគំនិតផ្ដួចផ្ដើម ដែលត្រូវបានចាប់ផ្ដើមដោយប្រទេសកម្ពុជា។

សម្ដេចតេជោ ហ៊ុន សែន បានលើកឡើងបែបនេះ នៅក្នុងជំនួបជាមួយលោកស្រីម៉ីលីន វ៉ាន មន្ត្រីជាន់ខ្ពស់ផ្នែកវិភាគគោលនយោបាយ នៃអគ្គលេខាធិការដ្ឋានហិរញ្ញវត្ថុ នៃក្រុម​ការងារត្រួត​ពិនិត្យ​រួម ​នៃ​ក្រុម​ប្រទេសអាស៊ី​ប៉ាស៊ីហ្វិក ​អំពី​កិច្ច​សហប្រតិបត្តិការ​អន្តរជាតិ ដើម្បីប្រឆាំងការសម្អាតប្រាក់ និងហិរញ្ញប្បទាន ដល់ការរីកសាយភាយអាវុធប្រល័យ (ICRG-JG ) នាព្រឹកថ្ងៃទី១១ មករា នេះ។

លោកស្រី ម៉ីលីន វ៉ាន មន្ត្រីជាន់ខ្ពស់ផ្នែកវិភាគគោលនយោបាយនៃអគ្គលេខាធិកាដ្ឋាន ហិរញ្ញវត្ថុបានសំដែងនូវការរីករាយ ដែលបានដឹកនាំគណៈប្រតិភូមកកាន់ប្រទេសកម្ពុជា ។

លោកស្រី ម៉ីលីន បានគោរពវាយតម្លៃខ្ពស់ចំពោះការប្ដេជ្ញាចិត្តរបស់កម្ពុជា ក្នុងការប្រឆាំងការសម្អាតប្រាក់ និងហិរញ្ញប្បទាន ដល់ការរីកសាយភាយអាវុធប្រល័យ។ លោកស្រីបានលើកទឹកចិត្តកម្ពុជា ឲ្យនាំមុខប្រទេសដទៃទៀត ក្នុងវិស័យហិរញ្ញប្បទានបៃតង និងការអភិវឌ្ឍបៃតង។

សម្ដេចតេជោ ហ៊ុន សែន បានអរគុណលោកស្រីម៉ីលីន និងប្រតិភូ ដែលបានអញ្ជើញមកកាន់ប្រទេសកម្ពុជា និងបានជម្រាបជូនប្រតិភូ អំពីយុទ្ធសាស្ត្រនៃការទប់ស្កាត់ជំងឺកូវីដ១៩ នឹងបានជម្រាបជូនប្រតិភូផងដែរ អំពីកិច្ចផ្ដួចផ្ដើមអភិវឌ្ឍន៍បៃតងដែលរាជរដ្ឋាភិបាលកម្ពុជាបានផ្ដួចផ្ដើមឡើងក្នុងកិច្ចប្រជុំកំពូលអាស៊ាននាពេលកន្លងមក៕

  ដោយៈ គង់ សូរិយា

       ភ្នំពេញៈ លោកទេសរដ្ឋមន្រ្តីស៊ុន ចាន់ថុលរដ្ឋមន្រ្តីក្រសួងសាធារណៈ​ការ និងដឹកជញ្ជូន បានដឹកនាំកិច្ចប្រជុំពិនិត្យស្វែងយល់ លើវិធានការកែលម្អប្រព័ន្ធរំដោះទឹកភ្លៀង តាមបណ្ដោយផ្លូវជាតិលេខ៤ ស្ថិតក្នុងខណ្ឌពោធិ៍សែនជ័យ រាជធានីភ្នំពេញ។

កិច្ចប្រជុំនេះ រៀបចំឡើងដើម្បីពិនិត្យពិភាក្សា ស្វែងយល់ពីវិធានការ និងវិធីសាស្រ្តផ្សេងៗ ក្នុងការកែលម្អប្រព័ន្ធរំដោះទឹកភ្លៀង តាមបណ្ដោយផ្លូវជាតិលេខ៤ ស្ថិតក្នុងខណ្ឌពោធិ៍សែនជ័យ រាជធានីភ្នំពេញ ដើម្បីលើកជាគម្រោងផែនការ សម្រាប់ដោះស្រាយបញ្ហាប្រឈមពាក់ព័ន្ធ ដែលធ្លាប់បានកើតមានឡើងនាពេលកន្លងមក ក្នុងគោលបំណងលើកកម្ពស់សុខភាព អនាម័យ សុខុមាលភាពសាធារណៈ និងរក្សាបាននូវសោភ័ណភាពទីក្រុងផងដែរ។

អង្គប្រជុំបានផ្លាស់ប្ដូរមតិយោបល់យ៉ាងផុសផុល លើការងារបច្ចេក​ទេសទាក់ទង នឹងគម្រោងសិក្សាលើការកែលម្អប្រព័ន្ធរំដោះទឹកភ្លៀង ដើម្បីធ្វើយ៉ាងណា កំណត់ឱ្យបាននូវបញ្ហាប្រឈមផ្សេងៗ ដែលអាចកើតមានឡើងនៅក្នុងគម្រោង។

ជាងនេះទៅទៀត អង្គប្រជុំបានពិភាក្សាលើការពង្រីកវិសាលភាពការងារនេះ ឱ្យបានកាន់តែទូលំទូលាយ និងមានភាពច្បាស់លាស់ ដើម្បីអាចដោះស្រាយនូវបញ្ហាប្រឈម ឆ្លើយតបទៅនឹងតម្រូវការជាក់ស្ដែងរបស់ប្រជាពលរដ្ឋ។

បន្ថែមពីនេះ លោកទេសរដ្ឋមន្ត្រី បានផ្ដល់អនុសាសន៍ដល់ក្រុមការងារ ធ្វើយ៉ាងណាជំរុញពន្លឿន លើការសិក្សាពីបច្ចេកទេសនៃគម្រោងការ​ងារកែលម្អប្រព័ន្ធរំដោះ ទឹកភ្លៀងនេះឱ្យបានឆាប់រហ័ស ដើម្បីធ្វើបទបង្ហាញគោរពជូនទៅលោកបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្រ្តី រដ្ឋមន្រ្តី ក្រសួងសេដ្ឋកិច្ច និងហិរញ្ញវត្ថុ ដើម្បីពិនិត្យ និងផ្តល់អនុសាសន៍បន្ថែមសំដៅជំរុញឱ្យគម្រោងនេះ អាចអនុវត្តទៅបានដោយជោគជ័យ៕

ដោយៈ សុខុម

ប៉េកាំង: ពេលនេះបណ្ដាក្រុមហ៊ុនបរទេស កំពុងត្រៀមខ្លួនហក់ចូលបោះទុនវិនិយោគនៅក្នុងប្រទេសចិនឡើងវិញ បន្ទាប់ពីចិនបានបើកប្រទេសឡើងវិញ ដោយបន្ធូរបន្ថយវិធានការរឹតបន្តឹងការធ្វើដំណើរ និងព្រំដែនដ៏តឹង​រ៉ឹងរបស់ខ្លួនដើម្បីទប់វិបត្តិកូវីដ-១៩ កាលពីថ្ងៃអាទិត្យទី៨ ខែមករា កន្លងទៅ។

ប៉ុន្តែក្រុមធុរជន និងអ្នកវិភាគលើកឡើងថា ខណៈចំណាត់ការបន្ធូរបន្ថយនេះ អាចជួយជំរុញការវិនិយោគពីបរទេស សេដ្ឋកិច្ចរបស់ប្រទេសចិន ក្រោយវិបត្តិកូវីដ-១៩ គឺនៅតែត្រូវការពេលវេលា ដើម្បីងើបឡើងវិញសន្សឹមៗ។ នេះបើយោងតាមសារព័ត៌មាន CNA ចុះផ្សាយកាលពីថ្ងៃពុធ ទី១១ ខែមករា។

ដំណឹងអំពីបណ្ដាក្រុមហ៊ុនបរទេស កំពុងត្រៀមខ្លួនហក់ចូលទីផ្សារប្រទេសចិន ឡើងវិញគួរឱ្យអបអរសាទរនេះកើតឡើង ខណៈប្រទេសចិន កំពុងបន្តប្រឹងប្រែង ដោះស្រាយបញ្ហានៃការកើនឡើង ករណីឆ្លងវីរុសកូវីដ-១៩។

ការបន្ធូរបន្ថយការរឹតបន្តឹងកូវីដ-១៩ ភ្លាមៗនេះបាននាំឱ្យវីរុសកូវីដ-១៩ ឆ្លងរាលដាលពាសពេញប្រទេស ដោយយោងតាមការប៉ាន់ប្រមាណបង្ហាញថា ក្នុងមួយថ្ងៃៗមានករណីឆ្លងរាប់លានករណីឯណោះ។

ទោះជាយ៉ាងណាក៏ដោយចុះ ក្រុមមន្ត្រីចិន បានគូសបញ្ជាក់ថា វីរុសកូវីដ-១៩ដែលកំពុងឆ្លងសព្វថ្ងៃជាប្រភេទវីរុសស្រាល គឺមិនអាចសាហាវនោះឡើយ ហើយបានបង្ហាញសុទិដ្ឋិនិយមថា ការឆ្លងនឹងស្ថិតក្រោមការគ្រប់​គ្រ​ងបានក្នុងពេលឆាប់ៗនេះ នៅពេលឈានដល់ភាពស៊ាំនៅក្នុងសហគមន៍៕ CNA៕