ដោយ: លាងហួរ

ប៉េកាំង: ក្រសួងពាណិជ្ជកម្មចិនបានឱ្យដឹង កាលពីថ្ងៃសុក្រ ទី២៣ ខែធ្នូ ថា លំហូរវិនិយោគផ្ទាល់ពីបរទេស (FDI) ចូលប្រទេសចិន បានកើនឡើង៩,៩ភាគរយដល់ជិត១,១៦ពាន់ពាន់លានយ័ន(ប្រហែល១៦៦,០៣ពាន់លានដុល្លារ) នៅក្នុងរយៈពេល១១ខែដំបូង នៃឆ្នាំ២០២២នេះ។

នៅក្នុងលក្ខខណ្ឌប្រាក់ដុល្លារអាមេរិក លំហូរចូលបានកើនឡើង១២,២ភាគរយ ពីមួយឆ្នាំទៅមួយឆ្នាំ រហូតដល់១៧៨,០៨ពាន់លានដុល្លារអាមេរិក។

ទិន្នន័យពីក្រសួងបានបង្ហាញថា លំហូរ FDI ចូលឧស្សាហកម្មសេវាកម្ម កើនឡើង០,៩ភាគរយ ពីមួយឆ្នាំទៅមួយឆ្នាំ រហូតដល់៨៤២,៦១ពាន់លានយ័ន(ប្រហែល១២០,៦១ពាន់លានដុល្លារ)  ខណៈដែលលំហូរចូលឧស្សាហកម្មបច្ចេកវិទ្យាជាន់ខ្ពស់ បានកើនឡើង៣១,១ភាគរយធៀបនឹងឆ្នាំមុន។

ជាពិសេស លំហូរ FDI នៅក្នុងការផលិតបច្ចេកវិទ្យាជាន់ខ្ពស់  បានកើនឡើង៥៨,៨ភាគរយ ធៀបនឹងរយៈពេលដូចគ្នាកាលពីឆ្នាំមុន ខណៈវិស័យសេវាកម្មបច្ចេកវិទ្យាជាន់ខ្ពស់បានកើនឡើង២៣,៥ភាគរយ ពីមួយឆ្នាំទៅមួយឆ្នាំ។

នៅក្នុងអំឡុងពេលនោះ ការវិនិយោគពីសាធារណៈរដ្ឋកូរ៉េ អាល្លឺម៉ង់ អង់គ្លេស និងជប៉ុន បានកើនឡើង១២២,១ភាគរយ ៥២,៦ភាគរយ ៣៣,១ភាគរយ និង២៦,៦ភាគរយរៀងៗគ្នា។

លំហូរវិនិយោគផ្ទាល់ពីបរទេស ចូលតំបន់កណ្តាល របស់ប្រទេសចិនបានរាយការណ៍ថា មានការកើនឡើង២៨,៦ភាគរយពី តាមពីក្រោយដោយ២៤,៦ភាគរយ នៅតំបន់ភាគខាងលិច  និង៧,៧ភាគរយ នៅតំបន់ភាគខាងកើត៕

ដោយ៖ សុផារី

សៀមរាប៖ ខេត្តសៀមរាបជាគោលដៅទេសចរណ៍ពិភពលោកមួយ ដែលមានអំណោយផលល្អពីធម្មជាតិ បូករួមនឹងការអភិវឌ្ឍថ្មីពីសំណាក់រាជរដ្ឋាភិបាល និងឯកជន។ អ្នកជំនាញបញ្ជាកថា ដោយសារអំណោយផលពីធម្មជាតិ និងកត្តាខាងលើ សៀមរាបសក្តិសមត្រូវបានអភិវឌ្ឍន៍ជាអចលនទ្រព្យសម្រាប់ការចូលនិវត្តិន៍ និងអាគារពាណិជ្ជកម្ម។

លោកស្រី អាន សុធីតា អគ្គនាយិកាក្រុមហ៊ុន PropNex Cambodia បានមានប្រសាសន៍នៅថ្ងៃទី២២ ខែធ្នូថា ហេដ្ឋារចនាសម្ព័ន្ធតភ្ជាប់ពីភ្នំពេញទៅកាន់ខេត្តសៀមរាបត្រូវបានរៀបចំរួចរាល់ អាកាសយានដ្ឋានអន្តរជាតិសៀមរាប និងអំណោយផលពីធម្មជាតិ ដូចជា បឹងទន្លេសាប ជាដើម ដែលជាសក្តានុពលសំខាន់របស់ខេត្តសៀមរាប។

លើសពីនេះ អ្នកនាងបន្តថា ដីធ្លីនៅក្នុងខេត្តសៀមរាបនៅមានទំនេរច្រើន និងមានតម្លៃសមរម្យ ដែលអាចឱ្យអ្នកវិនិយោគអាចទិញយកសម្រាប់ការវិនិយោគ និងអភិវឌ្ឍន៍បាន។

ប្រភេទអចលនទ្រព្យដែលគួរវិនិយោគ និងអភិវឌ្ឍន៍ អ្នកនាងមានផ្តល់យោបល់ថា ខេត្តសៀមរាបត្រូវការការអភិវឌ្ឍនបន្ថែមទៀតលើអចលនទ្រព្យផ្នែកលំនៅឋាន និងពាណិជ្ជកម្ម។ ការអភិវឌ្ឍពាណិជ្ជកម្មនៅទីនេះមិនមែនសំដៅទៅលើតែអាគារការិយាល័យ កាស៊ីណូ តែក៏អាចសំដៅដល់សួនសត្វ និងសួនកំសាន្ត ជាដើម។ ចំណុចសំខាន់មួយទៀត អំណោយផលលើភាពបៃតង នាំឲ្យខេត្តសៀមរាបជាកន្លែងសក្តិសមបំផុតសម្រាប់ការអភិវឌ្ឍប្រទេសផ្ទះចូលនិវត្តន៍ (Retirement Home)។

អ្នកនាងមានប្រសាសន៍ថា “សៀមរាបជាកន្លែងល្អសម្រាប់ធ្វើ retirement home  ដោយសារសៀមរាបមានភាពបៃតង។ បើប្រៀបធៀបនឹងតំបន់ផ្សេងៗ ខេត្តសៀមរាបមានតំបន់បៃតងច្រើន”។

អ្នកនាងបង្ហាញជំនឿជាក់ថា នៅក្នុងរយៈពេល៣ទៅ៥ឆ្នាំទៀត ខេត្តសៀមរាបនឹងនៅតែជាតំបន់ដែលប្លែក ល្អ អស្ចារ្យ ខុសពីពេលបច្ចុប្បន្ន ហើយអ្នកវិនិយោគធំៗ នឹងធ្វើការជ្រើសរើសខេត្តសៀមរាបជាកន្លែងសម្រាប់ការវិនិយោគ៕

  ដោយៈ ស៊ីវ ម៉េង

       ភ្នំពេញៈ គំរោងដ៏ធំ ស្ថិតនៅកណ្តាលទីក្រុងកោះពេជ្រD.I RIVIERAត្រូវបានក្រុមហ៊ុនOCIC សម្រេចប្តូរឈ្មោះ Diamond Bay Garden ដែលតាមផែនការគំរោងនេះ នឹងបញ្ចប់នៅពាក់កណ្តាលឆ្នាំ២០២៤ខាងមុខនេះ។

ប្រធាននាយកដ្ឋានផ្នែកលក់នៃក្រុមហ៊ុនOCIC អ្នកស្រីរី ណាវីបានមានប្រសាសន៍ឲ្យដឹងតាមទូរស័ព្ទ នារសៀលថ្ងៃទី២៣ ធ្នូកន្លងមកថា ក្រុមហ៊ុនOCIC បានសម្រេចបង្កើតក្រុមហ៊ុនDBG ដើម្បីសាងសង់គំរោងនេះបញ្ចប់តាមផែនការ ដែលគ្រោងនឹងបញ្ចប់នៅឆ្នាំ២០២៤ខាងមុខនេះ ប្រសិនេះជាគ្មានអ្វីប្រែប្រួលទេនោះ។

អ្នកស្រីបន្តថា “បច្ចុប្បន្នយើងបាន និងកំពុងដំណើរការសាងសង់អា​គារA &B កំពស់៣៩ជាន់។ ចំណែកអាគារCនឹងសាងសង់នាពេលខាងមុខ អាស្រ័យលើស្ថានភាពសេដ្ឋកិច្ចរបស់យើង មានភាពអំណោ​យផលឬយ៉ាងណា”។ អ្នកស្រីបន្តថា “ខុនដូនៅគំរោងនេះ បាននិងកំពុងលក់ជាមួ​យនឹងតម្លៃ២៩០០ដុល្លារក្នុងមួយម៉ែត្រការ៉េ”។

ជាមួយគ្នានេះ ក្រុមហ៊ុនកំពុងរៀបចំទីសាញឡើងវិញ នូវអាគារកណ្តាលគំរោងនេះ ដែលវាមិនមែនជាផ្សារទំនើបនោះទេ ប៉ុន្តែជាការអភិវឌ្ឍន៍បែបចម្រុះ ដោយអាគារកណ្តាលនេះ នឹងមានការិយាល័យ កន្លែងហាត់ប្រាណ អាហារ និងភេសជ្ជៈជាដើម។

អ្នកស្រីរី ណាវីបានបន្តថា តាមផែនការផ្សារបែបចម្រុះនេះ នឹងបញ្ចប់ការសាងសង់ និងបើកដំណើរការដំណាលគ្នា នឹងអាគារខុនដូផងដែរ ខណៈ​បច្ចុប្បន្នក្រុមហ៊ុនកំពុងRenovate អាគារនេះឲ្យមានភាពស្រស់ស្អាត តាមរយៈការដាំដើមឈើបែបធម្មជាតិ និងប្រភេទវល្លរ៍ ដើម្បីធ្វើយ៉ាងណាឲ្យមានភាពស្រស់ស្អាត និងទាក់ទាញការចាប់អារម្មណ៍៕

ដោយៈ សុផារី

ភ្នំពេញៈ លោកបណ្ឌិត សុខ ទូច ប្រធានរាជបណ្ឌិត្យសភាកម្ពុជាបានបង្ហាញក្តីរំពឹងថា ប្រទេសចិននឹងជួយធ្វើឱ្យសេដ្ឋកិច្ចកម្ពុជា កាន់តែមានភាពរីកចម្រើន និងក្លាយជាគំរូរបស់ប្រទេសក្នុងតំបន់អាស៊ាន ជាពិសេសលោកបណ្ឌិតសង្ឃឹមថា រដ្ឋាភិបាលចិននឹងជួយស្តារ ក៏ដូចជាជីកព្រែក នៅតាមទន្លេបាសាក់ ពីព្រែកអំបិលទៅសមុទ្រ ដើម្បីសម្រួលដល់ការដឹកជញ្ជូនតាមផ្លូវទឹក។

ចូលរួមក្នុងពិធីបិទវេទិកាវិទ្យាសាស្ត្រស្តីពី ទំនាក់ទំនងកម្ពុជា-ចិន និងរំឭកខួប១០០ព្រះវស្សា កាលពីល្ងាចថ្ងៃទី២២ ខែធ្នូ ឆ្នាំ២០២២ លោក សុខ ទូច មានប្រសាសន៍ថា ប្រទេសកម្ពុជានិងចិន កំពុងមានទំនាក់ទំនង​ជាមួយគ្នាលើ៥ចំណុចធំៗ តាំងពីអតីត បច្ចុប្បន្ន រហូតដល់អនាគត ក្នុងនោះមានប្រវត្តិសាស្ត្រ សេដ្ឋកិច្ច វប្បធម៌ បរិស្ថាន និងពេលទៅថ្ងៃអនាគត។

លោកបានបន្តថា ក្នុងចំណោមទាំង៥ចំណុចនេះ គឺផ្នែកសេដ្ឋកិច្ច ដោយចិនបានជួយធ្វើឱ្យកម្ពុជា មានការរីកចម្រើនផងដែរ តាមរយៈការវិនិ​យោគមកលើវិស័យផ្សេងៗ ហើយបានធ្វើឲ្យតម្លៃអចលនទ្រព្យនៅកម្ពុជា មានការកើនឡើង និងសង្ឃឹមថានៅពេលចប់កូវីដ-១៩ វិនិយោគគិនចិន នឹងមកបណ្ដាកទុនវិនិយោគនៅកម្ពុជាច្រើនឡើងបន្ថែមទៀត។

លោកបណ្ឌិតក៏រំពឹងផងដែរ មិត្តចិននឹងជួយស្ដារដៃព្រែកតភ្ជាប់ទៅខេត្តកំពត ដើម្បីកម្ពុជាងាយស្រួល ក្នុងការនាំផលិតផលទៅកាន់សមុទ្រ ដែលចំណាយតិចលើការដឹកជញ្ជូន ជាងការដឹកតាមរថយន្ត និងរថភ្លើង។

លោកបណ្ឌិត សុខ ទូច លើកឡើងថា “បើយើងចង់ទៅសមុទ្រយើងត្រូវជីកប្រឡាយ ហើយសង្ឃឹមថា មិត្តចិននឹងជួយសហការជីកព្រែក”។ លោក​បន្តថា “យើ​ងនាំទំនិញតាមផ្លូវគោក គឺមានតម្លៃខ្ពស់ណាស់ តែបើយើងនាំតាមផ្លូវទឹករឹតតែថោក យើងដឹងហើយ១០០ឡាន ស្មើនឹងមួយទូរទេះភ្លើង១០រទេះភ្លើង បាន១នាវា។ ដូច្នេះមាននាវាដឹកនាំទំនិញ ធ្វើឱ្យតម្លៃកាន់តែថោក នឹងធ្វើទំនិញកាន់តែងាយស្រួលប្រកួតប្រជែង”។

លោកបណ្ឌិតបានបន្តថា សម្រាប់ការរៀបចំផែនការស្ដារផ្លូវទឹក និងការសាងសង់ផែរណបរបស់កម្ពុជា គឺជាទិសដៅមួយដែលមានសារៈសំខាន់ណាស់ ក្នុងការធ្វើឱ្យចម្ងាយដឹកជញ្ជូនពីគ្រប់ផ្លូវទន្លេ ទៅកាន់សមុទ្រកម្ពុជាកាន់តែខ្លី កាត់បន្ថយពេលវេលា និងចម្ងាយដឹកជញ្ជូន ចំណេញថវិកា ក្នុងការដឹកជញ្ជូន កាត់បន្ថយគ្រោះថ្នាក់ចរាចរណ៍ និងសម្ពាធនៃការប្រើប្រាស់ផ្លូវ ព្រមទាំងបង្កើនសកម្មភាពដឹកជញ្ជូន តាមផ្លូវទឹកកាន់តែច្រើនផងដែរ៕