ដោយ: លាងហួរ

សៀមរាប: ក្រុមហ៊ុនអាកាសចរណ៍Cambodia Angkor Air (CAAir) បានដំណើរការដោយជោគជ័យ នូវជើងហោះហើរដំបូង  ដែលតភ្ជាប់ពីខេត្តសៀមរាប ទៅកាន់ទីក្រុងហាណូយរបស់វៀតណាម។ នេះបើយោងតាមសេចក្តីប្រកាសព័ត៌មានរបស់ក្រុមហ៊ុននៅថ្ងៃសុក្រនេះ។

សេចក្តីថ្លែងការណ៍បានបញ្ជាក់ថា ជើងហោះហើរដំបូង បានចាកចេញពីអាកាសយានដ្ឋានអន្តរជាតិ ខេត្តសៀមរាប ហើយបានចុះចតនៅអាកាសយានដ្ឋានអន្តរជាតិNoi Bai ទីក្រុងហាណូយកាលពីថ្ងៃព្រហ​ស្បតិ៍  ដោយដឹកអ្នកដំណើរចំនួន៦៨នាក់។

ក្រុមហ៊ុននេះបានបន្ថែមថា យន្តហោះ Airbus A320 បានត្រឡប់មកខេត្តសៀមរាបវិញ ក្នុងថ្ងៃតែមួយជាមួយនឹងអ្នកដំណើរចំនួន៨១នាក់។

ស្ថិតនៅភាគពាយព្យនៃប្រទេសកម្ពុជា ខេត្តសៀមរាប គឺជាឧទ្យានបុរាណវិទ្យាអង្គរដ៏ល្បីល្បាញ  និងជាគោលដៅទេសចរណ៍ ដ៏ពេញនិយមបំផុតរបស់កម្ពុជា។

សេចក្តី​ថ្លែងការណ៍​ដដែលបាន​បន្ត​ថា ដំបូង​ឡើយ ក្រុមហ៊ុនអាកាសចរណ៍នេះ នឹង​ធ្វើ​ការ​ហោះហើរ​ចំនួន៣ជើង ​ក្នុង​មួយ​សប្តាហ៍​ ដោយ​យន្តហោះ Airbus A320 នៅ​រៀងរាល់​ថ្ងៃ​អង្គារ ព្រហស្បតិ៍ និង​ថ្ងៃសៅរ៍។

លើសពីនេះ សម្រាប់ជើងហោះហើរ ទៅកាន់ប្រទេសវៀតណាម ក៏មានជើងហោះហើរបន្ត រវាងខេត្តសៀមរាប និងទីក្រុងហូជីមិញ ដោយមានជើងហោះហើរ២ជើង ជារៀងរាល់ថ្ងៃ ជើងហោះហើររវាងខេត្តសៀមរាប និងដាណាង ចំនួន១ជើងក្នុងមួយថ្ងៃ ជើងហោះហើររវាងភ្នំពេញ និងហាណូយចំនួន៣ជើងក្នុងមួយសប្តាហ៍ ។

ចំណែកជើងហោះហើរ រវាងភ្នំពេញ និងហូជីមិញ មានជើងហោះហើរ២ជើងជារៀងរាល់ថ្ងៃ ហើយរវាងក្រុងព្រះសីហនុ និងហូជីមិញ មានជើងហោះហើរ១ជើងជារៀងរាល់ថ្ងៃផងដែរ៕

ដោយ: លាងហួរ

តូក្យូ: ក្រុមរដ្ឋមន្ត្រីហិរញ្ញវត្ថុមកពីក្រុមប្រទេសឧស្សាហកម្ម ទាំង៧(G7) បានសន្យាផ្តល់ប្រាក់ រហូតដល់៣២ពាន់លានដុល្លារ នៅឆ្នាំក្រោយ ដើម្បីជួយអ៊ុយក្រែនដោះស្រាយ ជាមួយនឹងសង្គ្រាមឈ្លានពានដ៏យូររបស់រុស្ស៊ី។

ក្រុមរដ្ឋមន្ត្រីប្រទេសទាំង៧ បានជួបប្រជុំគ្នាតាមវីដេអូZoom ដោយបានបញ្ជាក់ថា G7 នៅតែប្តេជ្ញាចិត្តយ៉ាងមុតមាំ ក្នុងការដោះស្រាយតម្រូវការហិរញ្ញវត្ថុរយៈពេលខ្លីបន្ទាន់របស់អ៊ុយក្រែន។

ថវិកាចំនួន៣២ពាន់លានដុល្លារនេះ នឹងអនុញ្ញាតឱ្យទីក្រុងគៀវ បន្តការផ្តល់សេវាមូលដ្ឋាន អនុវត្តន៍ការជួសជុលដ៏សំខាន់បំផុត និងស្ថិរភាពសេដ្ឋកិច្ច ។

ទន្ទឹមនឹងនោះ រដ្ឋមន្ត្រីការបរទេសG-7 បានរិះគន់រុស្ស៊ី ចំពោះការវាយប្រហារផ្នែកថាមពល និងហេដ្ឋារចនាសម្ព័ន្ធក្នុងប្រទេសអ៊ុយក្រែន និងបានឯកភាពគ្នាបង្កើនការគាំទ្រ ដើម្បីជួយដល់ប្រជាជនអ៊ុយក្រែន ក្នុងការស៊ូទ្រាំនឹងរដូវរងាដ៏អាក្រក់នេះ។

តាមរយៈសេចក្តីថ្លែងការណ៍ របស់រដ្ឋមន្ត្រីការបរទេសអាល្លឺម៉ង់លោក Annalena Baerbock បានបញ្ជាក់ថា ការវាយប្រហារដ៏ធំ និងដោយចេតនារបស់រុស្ស៊ី ដោយប្រើកាំជ្រួច និងយន្តហោះគ្មានមនុស្សបើករបស់អ៉ីរ៉ង់ បានធ្វើឱ្យប្រជាជនអ៊ុយក្រែន រាប់លាននាក់រស់នៅក្នុងភាពងងឹត  និងរងាខ្លាំង។

ប្រទេសអាល្លឺម៉ង់ បានធ្វើជាម្ចាស់ផ្ទះនៃកិច្ចប្រជុំថ្នាក់ រដ្ឋមន្ត្រីតាមប្រព័ន្ធវីដេអូ មុនពេលដែលតំណែងជាប្រធានប្តូរវេនរបស់ G-7 នឹងត្រូវផ្ទេរទៅឱ្យប្រទេសជប៉ុន ក្នុងខែមករាខាងមុខ។

រដ្ឋមន្ត្រីការបរទេសជប៉ុន លោក Yoshimasa Hayashi បានថ្លែងប្រាប់កិច្ចប្រជុំថា  វាជារឿងសំខាន់សម្រាប់G-7 ក្នុងការពង្រឹងកិច្ចសហប្រតិបត្តិការរបស់ខ្លួន ស្របពេលដែលសង្គ្រាមឈ្លានពានរបស់រុស្ស៊ី កំពុងបន្តអូសបន្លាយពេល។

ក្រុមរដ្ឋមន្ត្រីការបរទេស G-7 ក៏បាន ថ្កោលទោសយ៉ាងខ្លាំង ដល់រដ្ឋាភិបាលតាលីបង់ នៅក្នុងប្រទេសអាហ្វហ្គានីស្ថាន ចំពោះការសម្រេចចិត្តនាពេលថ្មីៗនេះ ក្នុងការរារាំងស្ត្រីពីការចូលរៀន នៅសាកលវិទ្យាល័យផងដែរ៕

  ដោយៈ វឌ្ឍនៈ

ភ្នំពេញៈ ក្នុងរយៈពេល៣ឆ្នាំហើយ ដែលស្ថានភាពអចលនទ្រព្យ នៅក្នុងប្រទេសកម្ពុជា បានជួបប្រទះនឹងបញ្ហាលើទីផ្សារ ដោយសារតែវិបត្តិនៃជំងឺកូវីដ១៩ និងវិបត្តិនៃសង្គ្រាមរវាងរុស្ស៊ី និងអ៊ុយក្រែន។

ប៉ុន្តែអ្នកជំនាញនៃវិស័យអចលនទ្រព្យ លោកឧកញ៉ាឃាង ពុទ្ធីបានមើលឃើញថា ស្ថានភាពអចលនទ្រព្យនៅឆ្នាំនេះ គឺជាសញ្ញាល្អសម្រាប់ឆ្នាំក្រោយ ហើយនៅចុងឆ្នាំ២០២៣ វិស័យនេះនឹងវិលទៅរកស្ថានភាពដូចនឹងមុនវិបត្តិឡើងវិញ។

លោកឃាង ពុទ្ធីប្រធានក្រុមប្រឹក្សាភិបាលនៃសមាគមអ្នកជំនាញអចលនទ្រព្យបានប្រសាសន៍ ក្នុងកិច្ចសម្ភាសន៍មួយជាមួយទូរទស្សន៍ក្នុងស្រុកឱ្យដឹងថា ស្ថានភាពនៃវិស័យអចលនទ្រព្យ ក្នុងប្រទេសកម្ពុជានឹងវិលរកភាពប្រក្រតីឡើងវិញ ពោលគឺដូចនឹងស្ថានភាព មុនកូវីដ១៩នៅចុងឆ្នាំ ២០២៣ខាងមុខនេះ ។

លោកបន្តថា អ្វីដែលលោកអះអាងដូចនេះ ដោយសារហេតុផលមួយចំនួនដូចជា ទី១ យើងបានមើលឃើញថា ជំងឺកូវីដ១៩សឹងតែបាត់ទៅវិញហើយមកដល់បច្ចុប្បន្ននេះ ហើយវាក៏ត្រូវបានគេចាត់ទុក ដូចជា ជំងឺផ្ដាសា​យធម្មតា ។ អ្វីដែលពិសេសបណ្ដាប្រទេសមួយចំនួន ក៏បានចាត់ទុកជំងឺនេះជាជំងឺធម្មតា នឹងស៊ាំជាមួយជំងឺនេះទៅហើយ ។ ទី២ យើងរំពឹងថាសង្គ្រាមរវាងរុស្ស៊ី និងអ៊ុយក្រែននឹងបញ្ចប់នៅឆ្នាំ២០២៣ ហើយនឹងធ្វើឱ្យវិនិយោគិនបរទេស អាចធ្វើដំណើរចេញចូលស្វែងរក ការវិនិយោគឡើងវិញផងដែរ”។​លោកបន្តថា “នៅពេលសង្គ្រាមត្រូវបានបញ្ចប់ វិស័យថាមពលអន្តរជាតិ ចំណីអាហារ ឥន្ធនៈក៏នឹងវិលទៅរកតម្លៃដូចធម្មតាឡើងវិញ”។

លោកឧកញ៉ាឃាង ពុទ្ឋីបានបន្ថែមថា នៅឆ្នាំ ២០២៣ខាងមុខនេះដែរ ក៏ជាឆ្នាំ ដែលប្រទេសកម្ពុជារៀបចំការបោះឆ្នោតថ្នាក់ជាតិ ជ្រើសរើសតំណាងរាស្ត្រ ហើយក្រោយការបោះឆ្នោតរួចស្ថានភាព នៃការវិនិយោគក៏នឹងប្រសើរឡើងដូចគ្នា ពីព្រោះថាជាទូទៅទាំងប្រជាជនកម្ពុជា និងវិនិយោ​គិនតែងតែរងចាំមើលពីការបោះឆ្នោត តែសម្រាប់លោកគិតថា ដោយសារតែកម្ពុជាយើងជាប្រទេស ដែលមានអ្នកនយោបាយចាស់ទុំច្រើន ដូច្នេះស្ថេរ​ភាពនយោបាយក៏នឹងល្អប្រសើរក្រោយការបោះឆ្នោត ។

លោកពុទ្ធីបានបញ្ជាក់ផងដែរថា ការទិញដីនៅក្នុងដំណាក់កាលនេះ មិនថាអ្នកមានលុយច្រើន ឬអ្នកទិញដើម្បីទុកវិនិយោគក្ដី គួរមានការប្រយ័ត្នប្រយែងបន្តិច ពីព្រោះស្ថានភាពពេលនេះ វាមិនដូចនឹងស្ថានភាពមុនទេ។

លោកពន្យល់ថា ពីមុនដីធ្លីមានតម្លៃទាប ការទិញដីទុកចំណេញនៅមានឱកាសខ្ពស់ តែពេលនេះតម្លៃដីធ្លីបានឡើងខ្ពស់ហើយ ហើយបើទោះ​បីជាស្ថិតនៅក្នុងស្ថានភាពនៃវិបត្តិក្ដី ក៏តម្លៃដីធ្លីអត់មានធ្លាក់ចុះទេ មានតែបន្តឡើង។ ដូច្នេះហើយការទិញដីទុកចោល ដើម្បីយកចំនេញមិនធ្វើអ្វីសោះគួរមានការគិតគូរ៕

ដោយៈ សុផារី

ភ្នំពេញៈ លោកទេសរដ្ឋមន្ត្រី ស៊ុន ចាន់ថុល រដ្ឋមន្រ្តីក្រសួងសារធារណការ និងដឹកជញ្ជូនបានមានប្រសាសន៍ឱ្យដឹងថា គម្រោងផ្លូវរថភ្លើងក្រោមដី លើដី និងលើអាកាសក្នុងរាជធានីភ្នំពេញ បានសិក្សាចប់សព្វគ្រប់ហើយ ត្រៀមដាក់ជូនប្រមុខរាជរដ្ឋាភិបាល ធ្វើការពិនិត្យសម្រេចជ្រើសរើសនាពេលឆាប់ៗនេះ។

លោកទេសរដ្ឋមន្ត្រី ស៊ុន ចាន់ថុល រដ្ឋមន្រ្តីនៃក្រសួង សារធារណការ និងដឹកជញ្ជូន បានមានប្រសាសន៍ក្នុងកិច្ចសម្ភាសនៅថ្ងៃទី២២ ខែធ្នូម្សិលមិញថា គម្រោងផ្លូវរថភ្លើងក្រោមដី លើដី និងលើអាកាស ក្នុងរាជធានីភ្នំពេញ បានសិក្សាចប់សព្វគ្រប់ហើយ ដោយបច្ចុប្បន្ននេះ កំពុងធ្វើការកែសម្រួលបន្តិចបន្តួច ដើម្បីធ្វើយ៉ាងណាឱ្យគម្រោង នៃការអភិវឌ្ឍប្រព័ន្ធដឹកជញ្ជូនសាធារណៈរបស់កម្ពុជាមានលក្ខណៈគ្រប់ជ្រុងជ្រោយ។

លោកទេសរដ្ឋមន្ត្រីបន្តថា ក្រោយពីកែការសម្រួលរួចរាល់ គម្រោងផ្លូវរថភ្លើងក្រោមដី លើដី និងលើ អាកាសនឹងត្រៀមដាក់ជូនប្រមុខរាជរដ្ឋាភិបាលធ្វើការពិនិត្យសម្រេចជ្រើសរើស យកប្រព័ន្ធដឹកជញ្ជូនសាធារណៈណាមួយដែលសមស្រប និងអាចទទួលយកបាន សម្រាប់រាជធានីភ្នំពេញ ដើម្បីដោះស្រាយបញ្ហានៃការកកស្ទះចរាចរណ៍ និងគ្រោះថ្នាក់ចរាចរណ៍ ដែលកំពុងកើតមាននាពេលបច្ចុប្បន្ននេះ។

លោកបញ្ជាក់ថា “ផ្លូវភ្លើងក្រោមដី នៅរាជធានីភ្នំពេញ ក៏បានសិក្សាចប់សព្វគ្រប់ ឥឡូវយើងឱ្យអ្នកសិក្សាកែសម្រួលបន្តិចសិន អ៊ីចឹងយើងប្រៀ​បធៀបលើប្រព័ន្ធរថភ្លើងលើដី ផ្លូវរថភ្លើងលើអាកាស និងក្រោមដី គឺបានសិក្សាចប់ទាំង៣ហើយ និងធ្វើរបាយការណ៍ជូនទៅប្រមុខរាជរដ្ឋាភិបាល សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃកម្ពុជា ដើម្បីជ្រើសរើស តើប្រព័ន្ធមួយណាល្អជាងចំពោះរាជធានីភ្នំពេញយើង”។

គម្រោងកសាងរទេះភ្លើងក្រោមដី នៅក្នុងរាជធានីភ្នំពេញត្រូវបានសិក្សាដោយក្រុមហ៊ុនគមនាគមន៍ និងសំណង់នៃប្រទេសចិនCCCC (China Communications Construction Company Limited) ដែលជាក្រុមហ៊ុនមេនៃក្រុមហ៊ុន សាជីវកម្មស្ពានថ្នល់ចិន CRBC (China Road and Bridge Corporation)៕

ដោយៈ សុផារី

ភ្នំពេញៈ រាប់ចាប់តាំងពីបើកឱ្យដំណើរការ រយៈពេល៨០ថ្ងៃ ផ្លូវល្បឿនលឿនភ្នំពេញ-ក្រុងព្រះសីហនុ មានយានយន្តធ្វើចរាចរណ៍សរុបចំនួន៨៣១.០០០គ្រឿង ដែលគិតជាមធ្យមមានយានយន្ត ធ្វើចរាចរណ៍ប្រមា​ណ១ម៉ឺនគ្រឿងក្នុងមួយថ្ងៃ។

លោក ហ៊ាង សុទ្ធាយុត្តិ អគ្គនាយកនៃអគ្គនាយកដ្ឋានបច្ចេកវិទ្យា និងទំនាក់ទំនងសាធារណៈ នៃក្រសួងសាធារណការ និងដឹកជញ្ជូន បានបញ្ជា​ក់នៅថ្ងៃទី២២ ខែធ្នូ ឆ្នាំ២០២២ថា នៅដំណាច់ឆ្នាំ ឬអំឡុងថ្ងៃបុណ្យឆ្លងឆ្នាំ២០២២-២០២៣ខាងមុខនេះ នឹងមានកំណើនរថយន្តធ្វើដំណើរកាន់តែច្រើន ដែលអាចឈានដល់ការកកស្ទះនៅច្រកចូលទៀតផង។

លោកបានបន្តថា ក្រសួងសាធារណការ និងដឹកជញ្ជូន បានសហការជាមួយក្រុមហ៊ុនផ្លូវល្បឿនលឿន ក្នុងការរៀបចំធ្វើស្វ័យប្រវត្តិកម្ម ក្នុងការរៀបចំការទូទាត់ប្រាក់ សម្រាប់ការធ្វើដំណើរលើផ្លូវល្បឿនលឿន ដើម្បីសម្រួ​ល ដល់ការធ្វើដំណើររបស់ប្រជាពលរដ្ឋមក សង្គេតឃើញថា គឺមិនមានបញ្ហា​កកស្ទះចរាចរណ៍ លើផ្លូវល្បឿនលឿនទៀតនោះទេ ទោះបីមានយានយន្តច្រើន បានធ្វើចរាចរណ៍លើផ្លូវល្បឿនលឿនភ្នំពេញ ក្រុងព្រះសីហនុនេះក៏ដោយ។

លោកបានអំពាវនាវដល់បងប្អូនប្រជាពលរដ្ឋ ដែលប្រើប្រាស់ផ្លូវល្បឿនលឿនទាំងអស់ សូមគោរពច្បាប់ចរាចរណ៍ និងសូមប្រើប្រាស់ប្រព័ន្ធបច្ចេកវិទ្យា ដែលក្រសួងសាធារណការ និងក្រុមហ៊ុនផ្លូវល្បឿនលឿន បានបំពាក់ជូនឱ្យប្រើប្រាស់ ឬបង់លុយតាមស្លាកលេខរថយន្តជាមុន តាមរយៈទូរសព្ទដៃ ជាមួយធនាគារណាមួយដែលជាដៃគូរបស់ក្រសួង ដូចដែលបានជម្រាបជូនជាបន្តបន្ទាប់ ឬប្រើប្រាស់ឧបករណ៍OBU ដើម្បីបញ្ចៀសការកកស្ទះនៅច្រកចូល និងចេញ ពិសេសនៅអំឡុងថ្ងៃបុណ្យឆ្លងឆ្នាំខាងមុខ ពី​ព្រោះការប្រើឧបករណ៍ OBU ឬបង់លុយមុននេះ មិនពិបាករងចាំយកកាត ឬអាប់លុយឡើយ។

ផ្លូវល្បឿនលឿន -ភ្នំពេញព្រះសីហនុ ជាផ្លូវរបៀងយុទ្ធសាស្ត្រសំខាន់បំផុតនៅកម្ពុជា ជួយកាត់បន្ថយពេលវេលាធ្វើដំណើរពីរាជធានីភ្នំពេញ ទៅផែសមុទ្រក្រុងព្រះសីហនុ និងជួយកាត់បន្ថយតម្លៃភស្តុភារកម្មផងដែរ។ ផ្លូវល្បឿនលឿននេះ សាងសង់ក្រុមហ៊ុនសាជីវកម្មស្ពានថ្នល់ចិន (CRBC) ប្រើរយៈពេលសាងសង់៤៨ខែ ចំណាយថវិកាជិត២ពាន់លានដុល្លារសហរដ្ឋអាមេរិក៕

ដោយ: លាងហួរ

វ៉ាស៊ីនតោន: ក្រសួងពាណិជ្ជកម្មអាមេរិកបានឱ្យដឹង កាលពីថ្ងៃព្រហ​ស្បតិ៍ម្សិលមិញនេះថា  សេដ្ឋកិច្ចអាមេរិកបានកើនឡើង៣,២ភាគរយ នៅក្នុងត្រីមាសទី៣ ដែលជំរុញមកពីការចំណាយរបស់អ្នកប្រើប្រាស់ និងការវិនិយោគ បានកើនឡើងខ្ពស់ជាងការព្យាករណ៍កាលពីលើកមុន។

សេដ្ឋកិច្ចដ៏ធំបំផុតរបស់ពិភពលោកមួយនេះ បានកើនឡើងជាលើកដំបូងក្នុងឆ្នាំ២០២២នេះ  ចាប់ពីខែកក្កដាដល់ខែកញ្ញា បន្ទាប់ពីមានការធ្លាក់ចុះចំនួន២ត្រីមាស ដោយបានបង្កឱ្យការភ័យខ្លាច ចំពោះការដាំក្បាលចុះនៃសេដ្ឋកិច្ចកាន់តែអាក្រក់ទៅៗ។

នៅក្នុងខែធ្នូនេះ ក្រសួងពាណិជ្ជកម្មអាមេរិក បានបង្កើនតួលេខ GDP រហូតដល់២,៩ភាគរយ ដោយតួលេខនេះជាការប្រសើរឡើងរួចទៅហើយពី២,៦ភាគរយ ដែលបានរាយការណ៍ ជាលើកដំបូងនៅក្នុងខែតុលា។

ក្រសួងពាណិជ្ជកម្មអាមេរិកបានបញ្ជាក់ថា ការកើនឡើងនៃផលិតផ​លក្នុងស្រុកសរុបពិតប្រាកដ សម្រាប់ត្រីមាសទី៣ បានឆ្លុះបញ្ចាំងពីការកើនឡើងនៃការនាំចេញ ការចំណាយរបស់អ្នកប្រើប្រាស់ ការវិនិយោគថេរ ដែលមិនមែនជាលំនៅដ្ឋាន ការចំណាយរបស់រដ្ឋបាលក្នុងស្រុក និងរដ្ឋ និងការចំណាយរបស់រដ្ឋាភិបាលសហព័ន្ធ។

ចំណែកការកើនឡើងនៃសេវាកម្មត្រូវបានទប់ស្កាត់ មួយផ្នែកដោយការធ្លាក់ចុះនៃទំនិញ ការលក់រថយន្ត និងគ្រឿងបន្លាស់រថយន្តមានភាពយឺតយ៉ាវដូចការទិញអាហារ និងភេសជ្ជៈ ខណៈដែលពលរដ្ឋអាមេរិក កំពុងប្រឈមនឹងថ្លៃចំណាយខ្ពស់។

ក្រសួងពាណិជ្ជកម្មបានបន្តថា ការកើនឡើងនៃការចំណាយរបស់រដ្ឋាភិបាលត្រូវបាននាំមុខ ដោយការកើនឡើងនៃប្រាក់សំណងបុគ្គលិក និងការចំណាយលើវិស័យការពារជាតិ។

ទិន្នន័យ​ដដែលក៏​បាន​បង្ហាញ​ផង​ដែរ​ថា ​ការ​ចំណាយ​លើ​ការ​ប្រើ​ប្រាស់​ផ្ទាល់​ខ្លួន​បាន​កើន​ឡើង២,៣ភាគរយ ដែល​ខ្ពស់​ជាង​ការ​ប៉ាន់​ប្រមាណ​កាលពីមុន១,៧ភាគរយ។

ទោះបីជាយ៉ាងណា សហរដ្ឋអាមេរិក មិនទាន់ភាពច្បាស់លាស់ទេថា តើអ្នកប្រើប្រាស់ នឹងអាចរក្សាល្បឿននៃការចំណាយបច្ចុប្បន្ន របស់ពួកគេបានរយៈពេលយូរប៉ុន្មាននោះទេ។

លោកស្រី Rubeela Farooqi   ប្រធានសេដ្ឋវិទូអាមេរិកប្រចាំក្រុមហ៊ុន High Frequency Economics បានមានប្រសាសន៍ថា ថ្វីបើមានការកើនឡើងយ៉ាងឆាប់រហ័ស នៃអត្រាការប្រាក់យ៉ាងក្តី ប៉ុន្តែសេដ្ឋកិច្ចអាមេរិកកំពុងរីកចម្រើន ហើយសំខាន់ជាងនេះគឺពលរដ្ឋអាមេរិក នៅតែបន្តចំណា​យដដែល។

ធនាគារកណ្តាលអាមេរិក បានដំឡើងអត្រាការប្រាក់ចំនួន៧ដង ក្នុងឆ្នាំនេះ ក្នុងគោលបំណង ដើម្បីកាត់បន្ថយអតិផរណា ដែលហក់ឡើងដល់កម្រិតខ្ពស់បំផុតមិនធ្លាប់មាន ជាច្រើនទសវត្សរ៍កន្លងមក៕