ដោយៈ ច្រាយ ចំណាន

       ភ្នំពេញៈ ស្របពេលទីផ្សារខុនដូកាន់តែមានប្រជាប្រិយភាព ក្នុងចំណោ​មប្រជាពលរដ្ឋខ្មែរ អ្នកជំនាញបាននិងកំពុងមើលឃើញ តំបន់ចំនួន៤ ដែលការអភិវឌ្ឍន៍ខុនដូ កំពុងមានការរីកចម្រើនលឿន។

អគ្គនាយកក្រុមហ៊ុនERA Cambodia លោកខន គង្គាបានមានប្រសាសន៍ឲ្យដឹងកាលពីសប្តាហ៍មុនថា ការរីកចម្រើនទីផ្សារខុនដូ កំពុងចាប់ផ្តើមមានភាពប្រសើរឡើង ដោយសារកំំណើននៃការចាប់អារម្មណ៍ និងការយល់ដឹងរបស់ប្រជាពលរដ្ឋខ្មែរ និងឱកាសចំណេញខ្ពស់ពីការវិនិយោគ បើធៀបនឹងការទិញផ្ទះធម្មតា។

លោកបន្តថា “ដោយមើលឃលញនិន្នាការនេះ ខ្ញុំមើលឃើញតំបន់ចំនួន៤កំពុងមានការរីកចម្រើន និងបន្តរីកចម្រើនខ្លាំងនាពេលអនាគត គឺតំបន់បឹងកេងកង តំបន់ជ្រោយចង្វារ តំបន់ទួលគោក និងតំបន់ភាគខាងត្បូងរាជធានីភ្នំពេញ ដែលជាតំបន់ផ្កូវ៦០ម៉ែត្រ”។

លោកខន គង្គាបានពន្យល់ពីអ្វីដែលលោកលើកឡើង មកធ្វើជាអំណះអំណាងថា តំបន់បឹងកេងកងទី១ ដល់ទី៣ ជាតំបន់ដែលដីមានតម្លៃថ្លៃ និងអាចកើនដល់១ម៉ឺនដុល្លារ ក្នុងមួយម៉ែត្រការ៉េ សម្រាប់តំបន់បឹងកេងកង១ នា៣ឆ្នាំខាងមុខ។ ហេតុនេះអ្នកទិញដីមិនអាចសាងសង់ផ្ទះវីឡា ឬផ្ទះល្វែងបានទេ ពួកគេនឹងសាងសង់ខុនដូ ឬអាគារពាណិជ្ជកម្ម ទើបទាញបានផលត្រលប់ពីតម្លៃដីមកវិញ។

ចំណែកតំបន់ជ្រោយចង្វារ ជាតំបន់មួយមានលក្ខខ័ណ្ឌអាកាសធាតុល្អ មានទន្លេព័ទ្ឋជុំវិញ អំណោយផលដល់ការលំហែរ និងផ្តល់ផាសុខភាព​ដល់ការរស់នៅ ហើយតំបន់នេះប្រៀបដូចជាតំបន់ម៉ាហាត់តាន់ នៅសហរដ្ឋអាមេរិក។

លោកខន គង្គាបានបន្តថា ចំណែកតំបន់ទួលគោក គឺជាតំបន់នៃការធ្វើពាណិជ្ជកម្មចម្រុះ ដោយសារតំបន់នេះបណ្តុំ ដោយមជ្ឈមណ្ឌលពាណិជ្ជកម្ម និងការរស់នៅដោយក្រុមអភិជនផងដែរ។ ហេតុនេះ ការវិនិយោគខុនដូ​នៅតំបន់នេះ ក៏ងាយស្រួលជួល ស្រដៀងនឹងតំបន់បឹងកេងកងផងដែរ។

លោកបានបន្តថា រីឯតំបន់ផ្លូវ៦០ម៉ែត្រ ជាតំបន់មានការរីកចម្រើនលឿន ហើយបច្ចុប្បន្នគំរោងជាច្រើនបាន និងកំពុងសាងសង់ និងបញ្ចប់ការ​សាងសង់នៅតំបន់នេះ ពិសេសវត្តមានផ្សារទំនើបAEON Mall3បាននិងកំពុងបើកដំណើរការកាលពីពេលថ្មីៗនេះ គឺនឹងធ្វើឲ្យតំបន់នេះកាន់តែទាក់ទាញ​ថែមទៀត ព្រោះផ្សារទំនើបតម្លៃរាប់រយលានដុល្លារបែបនេះ អ្នកវិនិយោគពិតជាបានសិក្សាពីទីផ្សាររួចហើយ សិក្សាពីលំហូរមនុស្ស និងអំណា​ចទីផ្សារច្បាស់លាស់ណាស់ មុនពេលពួកគេសម្រេចចិត្តជ្រើសរើសយកទីតាំងនៅតំបន់ណាមួយ៕

 ដោយៈ ជេស៊ីកា

       ភ្នំពេញៈ វិនិយោគិនដីធ្លីជាច្រើនបាន និងកំពុងសម្លឹងរកឱកាសវិនិយោ​គលើដីធ្លី ដើម្បីទទួលបានផលចំណេញខ្ពស់ ជាពិសេសនោះនៅក្នុងដំណាក់កាលមួយ ដែលអ្នកលក់ដីច្រើនជាងអ្នកទិញ។

លោកឧកញ៉ាកាង សុធី វិនិយោគិនដីធ្លីជាអគ្គនាយកក្រុមហ៊ុនអចល​នទ្រព្យ Century 21 Land Station បានបង្ហាញពីគន្លឹះមួយចំនួនដល់វិនិយោគិន សម្រាប់ជាទុនមុននឹងសម្រេចទិញដីធ្លី នៅតំបន់ណាមួយនោះ។

លោកបានមានប្រសាសន៍ថា មុនទិញដីនៅតំបន់ណា ដើម្បីឱ្យទទួលបានផលចំណេញខ្ពស់ក្នុងរយៈពេលខ្លះ គេត្រូវមើលទៅកត្តាអភិវឌ្ឍន៍ហេដ្ឋារចនាសម្ព័ន្ធ ។

លោកបន្តថា “យើងត្រូវតាមដាននូវព័ត៌មាន ពីការអភិវឌ្ឍរបស់រដ្ឋាភិបាល ព្រោះនៅពេលរដ្ឋាភិបាលប្រកាស ពីការអភិវឌ្ឍនៅតំបន់ណាមួយ តំបន់នោះនឹងមានការឡើងថ្លៃដីធ្លីភ្លាមៗ”។ លោកបន្តថា “ដូច្នេះបើសិនជាយើង តាមដានព័ត៌មានជាប់លាប់ ពីផែនការអភិវឌ្ឍរបស់រដ្ឋាភិបាលនោះ យើងនឹងមានឱកាសមុនគេ ក្នុងការទិញដីធ្លីសម្រាប់យកផលចំណេញ”។

លោកឧកញ៉ាកាង សុធីបានបន្តទៀតថា ក្រោយពីរដ្ឋាភិបាលប្រកាសរួច ការអភិវឌ្ឍមិនទាន់ត្រូវបានធ្វើឡើងភ្លាមៗទេ។ ដូច្នេះយើងតាមដានមើលថា តើគម្រោងនោះអភិវឌ្ឍន៍នៅពេលណា។ ដូច្នេះនៅពេលអភិវឌ្ឍន៍ យើងអាចមានឱកាស ក្នុងការទិញដីនោះម្ដងទៀត ដើម្បីទទួលបានផលចំនេញនៅពេលអនាគត។

លោកបន្តថា “ការឡើងថ្លៃដីមិនទាន់ត្រូវបានបញ្ចប់ទេ នៅពេលគម្រោងអភិវឌ្ឍន៍បានធ្វើរួចរាល់ ឱកាសនៃការឡើងថ្លៃដីធ្លី ក៏បានឡើងមួយកម្រិតទៀតដែរ ដូច្នេះហើយអ្នកចេះក្ដាប់ឱកាសទាំងនោះ នឹងទទួលបានផលចំណេញក្នុងរយៈពេលខ្លះ”។

ជាមួយគ្នានេះ ឧកញ៉ាកាង សុធីក៏បានហាមអ្នកទិញដីធ្លី មិនគួរទិញដីក្នុងតំបន់មួយចំនួនផងដែរដូចជា តំបន់ជាប់ម៉ុងខ្មោច តំបន់ផ្លូវទ័ល តំបន់មានផ្លូវូតូចៗ ដីមានរាងសណ្ឋានមិនស្អាត ដីគ្មានកម្មសិទ្ឋច្បាស់លាស់ជាដើម៕

ដោយៈ សហការី

ព្រះសីហនុៈ ការសាងសង់ហេដ្ឋារចនាសម្ព័ន្ធ គឺជាការបែងចែងផ្លែផ្កាសេដ្ឋកិច្ចជាតិ ប្រកបដោយសមធម៌ ហើយការតភ្ជាប់ហេដ្ឋារចនាសម្ព័ន្ធនេះ ជាតម្រូវការចាំបាច់របស់ប្រជាពលរដ្ឋ ដើម្បីកាត់បន្ថយការចំណាយការធ្វើដំណើរផង និងការបន្ថយលើការចំណាយពេលវេលាផង។

នេះបើយោងតាមការថ្លែងរបស់សម្តេចតេជោ ហ៊ុន សែន ក្នុងឱកាសអញ្ជើញសម្ពោធដាក់ឱ្យប្រើប្រាស់ផ្លូវ តភ្ជាប់ស្រុកព្រៃនប់ ទៅក្រុងព្រះសីហនុ ប្រវែងជាង៤៣គីឡូម៉ែត្រ តម្លៃ៧៦លានដុល្លារ នាព្រឹកថ្ងៃទី២២ ខែធ្នូ ឆ្នាំ២០២២។

សម្តេចតេជោ ហ៊ុន សែន បានថ្លែងថា “ខ្ញុំបានផ្តល់សារសំខាន់លើការតភ្ជាប់ ហើយការតភ្ជាប់ មិនមែនគ្រាន់តែជាការតភ្ជាប់រវាងខេត្តមួយ និងខេត្តមួយនោះទេ ប៉ុន្តែត្រូវតែគិតទៅដល់ផលចំណេញ របស់ប្រជាពលរដ្ឋរបស់យើង នៅតាមតំបន់នានា ដែលជាសេចក្តីត្រូវការចាំបាច់”។សម្តេចតេជោបន្តថា “ខ្ញុំនៅតែផ្តល់អាទិភាព រៀបចំគោលនយោបាយ សំដៅទៅលើការតភ្ជាប់ហេដ្ឋារចនាសម្ព័ន្ធរូបវន្ត ដើម្បីបម្រើដល់សេចក្តីត្រូវការរបស់ប្រជាជន កាត់បន្ថយការចំណាយ របស់ប្រជាជនក្នុងការធ្វើដំណើរ និងការចំណាយទៅលើពេលវេលា”។

សម្តេចតេជោបានថ្លែងទៀតថា “ការវិនិយោគលើហេដ្ឋារចនាសម្ព័ន្ធ ដូចជាផ្លូវថ្នល់នេះ នោះហើយគឺជាការបែងចែកផ្លែផ្កា នៃកំណើនសេដ្ឋកិច្ច ប្រកបដោយសមធម៌ ដែលខ្ញុំតែងតែនិយាយថា ការបែងចែកផ្លែផ្កានៃកំណើនសេដ្ឋកិច្ច ប្រកបដោយសមធម៌ គ្មានអ្វីល្អជាងការកសាងហេដ្ឋារចនាសម្ព័ន្ធ ដើម្បីបម្រើឲ្យប្រជាពលរដ្ឋនោះទេ”។

សម្តេចបានលើកជាឧទាហរណ៍ថា យើងមិនអាចយកលុយទៅចែកស្មើៗគ្នា ឬអ្នកនេះប៉ុណ្ណេះ អ្នកនោះប៉ុណ្ណោះ ប៉ុន្តែយើងធ្វើជាផ្លូវ ផ្លូវនេះអ្នកមានក៏ធ្វើដំណើរ អ្នកក្រក៏ធ្វើដំណើរបានដូចគ្នា ការកសាងសាលារៀន ការកសាងមន្ទីរពេទ្យ ឬការកសាងអ្វីដែលជាសម្បត្តិសាធារណៈ គឺវាជាសមធម៌ណាស់ នៃការបែងចែកផ្លែផ្កានៃកំណើនសេដ្ឋកិច្ច៕

ដោយៈ វឌ្ឍនៈ

ភ្នំពេញៈ ប្រធានថ្មីនៃសមាគមអ្នកវាយតម្លៃ និងភ្នាក់ងារអចលវត្ថុកម្ពុជាលោកសន សៀបបានថ្លែងនៅក្នុងសន្និបាត និងបោះឆ្នោតជ្រើសរើសប្រធានថ្មីឱ្យដឹងថាសព្វថ្ងៃនេះ ការទិញលក់អចលនទ្រព្យ ដោយឆ្លងកាត់សមាជិករបស់សមាគមយើង មានតិចតួចនៅឡើយ។

លោកសន សៀបបានប្រសាសន៍ថា នៅក្នុងអាណត្តិលោកដឹកនាំសមាគម លោកប្ដេជ្ញាចិត្តថានឹងពង្រីកទីផ្សារនេះ ឱ្យបានធំបន្ថែមទៀត គឺការទិញលក់អចលនទ្រព្យ គឺត្រូវឆ្លងកាត់ក្រុមហ៊ុន ដែលជាសមាជិករបស់សមាគមយើង ហើយយើងនឹងត្រូវជជែកគ្នាសហការគ្នា​ ដើម្បីពង្រឹងវិស័យដីធ្លីនិងអចលនទ្រព្យឱ្យបានកាន់តែច្រើន ។

លោកបន្ថែមថា “អាណត្តិនេះ សមាគមនឹងព្យាយាមកៀរគរភ្នាក់ងារក្រុមហ៊ុនខាងក្រៅសមាគម ឱ្យចូលរួមជាមួយសមាគមយើង ពង្រឹងវិន័យ និងកាត់បន្ថយភ្នាក់ងារខាងក្រៅ ដើម្បីធ្វើឱ្យក្រុមហ៊ុននិងវិនិយោគិនមកពីខាងក្រៅមានទំនុកចិត្ត មកកាន់កម្ពុជាកាន់តែខ្លាំងបន្ថែមទៀត”។ លោកបន្តថា “សមាជិកថ្មីៗក៏នឹងទទួលបានការបណ្ដុះបណ្ដាល ពីសមាគមបន្ថែម ដូច្នេះពួកគាត់ នឹងទទួលបានអត្ថបទប្រយោជន៍និងភ្ញៀវច្រើនជាងមុន”។

អតីតប្រធានសមាគមនេះ លោកច្រឹក សុខនីមបានលើកឡើងផងដែរថា ដើម្បីត្រៀមស្វាគមន៍ និងផ្ដល់ទំនុកចិត្តកាន់តែខ្លាំង ដល់វិនិយោគិនបរទេស យើងត្រូវតែមានភាពច្បាស់លាស់ មានធនធានមនុស្សដែលមានជំនាញនិងមានច្បាប់ទម្លាប់ត្រឹមត្រូវ ។ ដូច្នេះបើសិនជាភ្នាក់ងារយើងនៅធ្វើខាងក្រៅ មិនមានវិជ្ជាជីវៈមិនមានច្បាប់ មិនមានអាជ្ញាបណ្ណនោះនឹងធ្វើឱ្យវិនិយោគិនអាចនឹងកាត់បន្ថយការជឿទុកចិត្តមកលើយើង ។

លោកបន្តថា ភ្នាក់ងារអចលនទ្រព្យនៅកម្ពុជាមានច្រើន ប៉ុន្តែភ្នាក់ងារអចលនទ្រព្យដែលមានអាជ្ញាបណ្ណ ចេញដោយក្រសួងគឺមានចំនួនតិចតួចប៉ុណ្ណោះ ដូច្នេះ យើងចង់ឱ្យពួកគាត់ស្នើសុំអាជ្ញាបណ្ណឱ្យបានត្រឹមត្រូវ ដែលអាចជួយដល់រដ្ឋាភិបាលតាមរយៈការបង់ពន្ធផងដែរ៕