ដោយ៖ វឌ្ឍនៈ

ភ្នំពេញ ៖ ធនាគារអភិវឌ្ឍន៍អាស៊ី (ADB) និងក្រសួងសេដ្ឋកិច្ចនិងហិរញ្ញវត្ថុកម្ពុជា បានចុះហត្ថលេខាលើកិច្ចព្រមព្រៀងប្រាក់កម្ចី និងជំនួយឥតសំណង សម្រាប់គម្រោងចំនួនប្រាំមួយ ដែលមានតម្លៃសរុប៣៦១,៤លានដុល្លារ នៅថ្ងៃទី២២ ធ្នូ ២០២២ ។

យោងតាមសេចក្ដីប្រកាសព័ត៌មានរបស់ធនាគារអភិវឌ្ឍន៍អាស៊ី នៅព្រឹកថ្ងៃទី២២ ខែធ្នូនេះថា កិច្ចព្រមព្រៀងថ្មីទាំងនេះ ប្រាក់កម្ចីនិងជំនួយឥតសំណងសរុប ដែលបានចុះកិច្ចព្រមព្រៀងក្នុងឆ្នាំ២០២២នេះ មានចំនួន៥៧៦,៣លានដុល្លារ។ ក្នុងនោះ១៦៣,៧លានដុល្លារជាសហហិរញ្ញប្បទានពីដៃគូអភិវឌ្ឍន៍ផ្សេងទៀត។

គម្រោងថ្មីខាងលើនឹងជួយជំរុញការអប់រំផ្នែកវិទ្យាសាស្ត្រ បច្ចេកវិទ្យា វិស្វកម្ម និងគណិតវិទ្យា(STEM)នៅកម្ពុជា ពង្រីកសេវាថែទាំសុខភាពនៅតាមតំបន់ព្រំដែន ពន្លឿនអន្តរកម្មថាមពលស្អាតរបស់ប្រទេស ពង្រឹងពាណិជ្ជកម្មនិងសមត្ថភាពប្រកួតប្រជែង និង គាំទ្រដល់ផលិតកម្មបសុសត្វ និងជលផលសមុទ្រប្រកបដោយអាកាសធាតុឆ្លាតវៃ (climate smart)។

លោកស្រី Jyotsana Varma នាយិកាធនាគារអភិវឌ្ឍន៍អាស៊ីប្រចាំប្រទេសកម្ពុជា មានប្រសាសន៍ថា គម្រោង៦ ដែលបានចុះហត្ថលេខាថ្ងៃនេះ នឹងគាំទ្រដល់អាទិភាពនានា ក្នុងការអភិវឌ្ឍសេដ្ឋកិច្ចសង្គមរបស់ប្រទេសកម្ពុជា ស្របតាមយុទ្ធសាស្ត្រចតុកោណ ដំណាក់កាលទី៤ របស់រាជរដ្ឋាភិបាល។

គម្រោងវិទ្យាសាស្ត្រ និងបច្ចេកវិទ្យាក្នុងការអប់រំមធ្យមសិក្សាទុតិយភូមិ ដែលមានទឹកប្រាក់៧០ លានដុល្លារ នឹងជួយកម្ពុជាអភិវឌ្ឍធនធានមនុស្សប្រកបដោយគុណភាពខ្ពស់ ជាពិសេសក្នុងវិស័យ STEM ខណៈដែលប្រទេសប្រាថ្នាចង់ប្រែក្លាយខ្លួនទៅជាសេដ្ឋកិច្ចដែលជំរុញដោយបច្ចេកវិទ្យា ជាមួយនិងចំណេះ ដឹងជាមូលដ្ឋាន។

គម្រោងសុខភាពតំបន់ព្រំដែននៃមហាអនុតំបន់មេគង្គ(GMS)កម្ពុជា ដែលមានទឹកប្រាក់៣២,៥លានដុល្លារ នឹងពង្រីកសេវាសុខភាព ឱ្យបានដល់ពលករចំណាកស្រុកជាច្រើនពាន់នាក់ ដែលងាយរងគ្រោះ នឹងហានិភ័យសុខភាពទូទៅ និងសម្រាប់ប្រជាពលរដ្ឋ នៅតាមតំបន់ព្រំដែន។

កម្មវិធីអភិវឌ្ឍន៍តាមវិស័យសម្រាប់អន្តរកម្មថាមពល ដែលមានទឹកប្រាក់៧៣លានដុល្លារមានរួមបញ្ចូល នូវកំណែទម្រង់គោលនយោបាយ និងការវិនិយោគគម្រោង ដែលនឹងគាំទ្រគ្នាទៅវិញទៅមក ដើម្បីបង្កើនផលចំណេញ និងត្រួសត្រាយផ្លូវសម្រាប់ការវិនិយោគ ពីវិស័យសាធារណៈ និងឯកជនក្នុងបច្ចេកវិទ្យាថ្មីសំខាន់ៗ ដូចជាប្រសិទ្ធភាពថាមពល និងថ្មផ្ទុក។

កម្មវិធីពាណិជ្ជកម្ម និងសមត្ថភាពប្រកួតប្រជែងដែលមានទឹកប្រាក់៥០លានដុល្លារនឹងគាំទ្រដល់កិច្ចខិតខំប្រឹងប្រែងរបស់រាជរដ្ឋាភិបាលក្នុងការស្តារសេដ្ឋកិច្ចក្រោយជំងឺរាតត្បាតនៅកម្ពុជា ដើម្បីធ្វើកំណែទម្រង់ការវិនិយោគ និងបរិយាកាសធុរកិច្ច ជំរុញកំណើនសហគ្រាសខ្នាតតូច និងមធ្យម និងកែលម្អគោលនយោបាយពាណិជ្ជកម្ម និងកិច្ចសម្រួលពាណិជ្ជកម្ម។

គម្រោងកែលម្អសុខភាព និងខ្សែសង្វាក់តម្លៃបសុសត្វឆ្លងព្រំដែនក្នុងមហាអនុតំបន់មេគង្គ(GMS)ដែលមានទឹកប្រាក់៦២,៩លានដុល្លារ នឹងជួយលើកកម្ពស់ផលិតកម្មបសុសត្វប្រកបដោយអាកាសធាតុ ឆ្លាតវៃ និង កែលម្អនិរន្តរភាពខ្សែសង្វាក់តម្លៃបសុសត្វ។

គម្រោងជលផលឆ្នេរនិងសមុទ្រប្រកបដោយនិរន្តរភាពដែលមានទឹកប្រាក់៧៣លានដុល្លារសំដៅលើខេត្តជាប់មាត់សមុទ្រចំនួន៤ក្នុងប្រទេសកម្ពុជា ដើម្បីទប់ទល់នឹងការធ្លាក់ចុះយ៉ាងគំហុក នៃវិស័យជលផល លើកកម្ពស់ការចិញ្ចឹមជលផលសមុទ្រប្រកបដោយនិរន្តរភាព និងកែលម្អទីតាំងប្រមូលទុកផល នេសាទ ដើម្បីធ្វើឱ្យប្រសើរឡើងនូវសុវត្ថិភាពអាហារសមុទ្រ។ គម្រោងនេះត្រូវបានគេរំពឹងថានឹងបង្កើតឡើងវិញនូវជលផលក្បែរឆ្នេរសមុទ្រប្រមាណ៤0% ទៅជាសហគ្រាសប្រកបដោយផលិតភាព និង និរន្តរភាព និងបង្កើនប្រាក់ចំណូលសម្រាប់សមាជិកសហគមន៍ឆ្នេរសមុទ្រប្រហែល២00.000 នាក់ ៕

ដោយ: លាងហួរ

បាងកក: សណ្ឋាគារលំដាប់ផ្កាយប្រាំ តារាវត្តី (Dhara Dhevi) នៅក្នុងខេត្តឈៀងម៉ៃ នឹងត្រូវដាក់លក់ដេញថ្លៃម្តងទៀត នៅក្នុងខែមករា ជាមួយនឹងតម្លៃធ្លាក់ចុះមកត្រឹមប្រហែល៥៧,៩៦លានដុល្លារ ពីតម្លៃដំបូងប្រហែល៦០,៨៤ពាន់លានដុល្លារ នៅក្នុងការដេញថ្លៃឆ្នាំ២០២១។

នាយកដ្ឋានផ្នែកច្បាប់នៃសណ្ឋាគារនេះ​គ្រោងនឹង​រៀបចំ​ការ​ដេញថ្លៃ​អចលនទ្រព្យ​ ចាប់ពី​ខែមករា​ដល់​ខែឧសភា​  ហើយជំហានដំបូងនៃការដេញថ្លៃ នឹងប្រព្រឹត្តទៅនៅការិយាល័យប្រតិបត្តិច្បាប់ នៃទីក្រុងឈៀងម៉ៃ នៅថ្ងៃទី២៧ ខែមករា ឆ្នាំ២០២៣ខាងមុខនេះ។

ជំហានដេញថ្លៃបន្ទាប់នឹងត្រូវធ្វើឡើងនៅថ្ងៃទី១៧ ខែកុម្ភៈ ថ្ងៃទី១០ ខែមីនា ថ្ងៃទី៣១ ខែមីនា ថ្ងៃទី២១ ខែមេសា និងថ្ងៃទី១២ ខែឧសភា។

តម្លៃសណ្ឋាគារនឹងធ្លាក់ចុះ១០ភាគរយនៅវគ្គបន្តបន្ទាប់នីមួយៗ ប៉ុន្តែតម្លៃនេះមិនអាចធ្លាក់ចុះទាបជាង៣០ភាគរយ នៃតម្លៃដេញថ្លៃដំបូងឡើយ។

កាលពីខែធ្នូ ឆ្នាំ២០១៥ កន្លងទៅ ក្រុមហ៊ុន Inter Far East Energy Corp (IFEC) បានទិញសណ្ឋាគារនេះក្នុងតម្លៃ៤,៣ពាន់លានបាត ដែលតម្លៃនេះ រួមបញ្ចូលទាំង ភាគហ៊ុន និងបំណុល។

សណ្ឋាគារនេះមានចំនួន១២៣បន្ទប់ បានបើកដំណើរការក្នុងឆ្នាំ២០០២ និងមានស្ថាបត្យកម្មរចនាម៉ូដបែបឡានណា (Lanna) បុរាណតែមួយគត់ ហើយសណ្ឋាគារនេះបានទាក់ទាញចំណាប់អារម្មណ៍ភ្ញៀវទេសចរថៃ និងបរទេសជាច្រើន។

ទោះជាយ៉ាងណាក៏ដោយ សណ្ឋាគារនេះត្រូវបានរងផលប៉ះពាល់យ៉ាងធ្ងន់ធ្ងរដោយវិបត្តិកូវីដ  និងបានបិទជាបណ្តោះអាសន្ននៅដើមឆ្នាំ២០២០។ សណ្ឋាគារបានដាក់ពាក្យស្នើសុំការស្តារអាជីវកម្មឡើងវិញ នៅខែមិថុនា ឆ្នាំ២០២០ ប៉ុន្តែឯកសារនេះត្រូវបានច្រានចោល ដោយសាលាឧទ្ធរណ៍ ក្នុងខែវិច្ឆិកាឆ្នាំនោះ ដោយបង្ខំសណ្ឋាគារជួបការក្ស័យធន។

នៅក្នុងអំឡុងពេលនៃការដេញថ្លៃលើកមុន ក្រុមហ៊ុនបុត្រសម្ព័ន្ធរបស់ IFEC Inter Far East Thermal Power (I Thermal) បានឈ្នះ ជាមួយនឹងការដេញថ្លៃចំនួន២,០១២ពាន់លានបាត។ ក្រុមហ៊ុនបាន​បង់​ប្រាក់​កក់​ចំនួន១១០លាន​បាត ប៉ុន្តែ​មិន​បាន​បង់​ប្រាក់​ ដែល​នៅ​សល់​មុន​ពេល​ដល់​កំណត់។ នាយកដ្ឋាន​បាន​រឹបអូស​ប្រាក់​កក់​នេះ ហើយ​សម្រេច​ដាក់​លក់​ដេញថ្លៃ​សណ្ឋាគារ​នេះ​ម្ដង​ទៀត៕

ដោយ: លាងហួរ

អន្តរជាតិ: នាយករដ្ឋមន្ត្រីម៉ាឡេស៊ីថ្មី លោក Datuk Seri Anwar Ibrahim បានមានប្រសាសន៍ថា គម្រោងផ្លូវរថភ្លើងEast Coast Rail Link (ECRL) ដែលមានប្រវែង៦៦៥គីឡូម៉ែត្រ នឹងបន្តដំណើរការក្រោមរដ្ឋបាលថ្មីរបស់លោក ដោយថ្លៃចំណាយសរុបលើគម្រោងនេះ ត្រូវបានកាត់បន្ថយមកនៅត្រឹម ប្រមាណ១៦,៩ពាន់លានដុល្លារប៉ុណ្ណោះ។

ទំហំនៃការចំណាយសរុបថ្មីខាងលើនេះ បានថយចុះប្រមាណ២,៤៨ពាន់លានដុល្លារ បើធៀបនឹងការចំណាយ ដែលបានគ្រោងទុកពីមុនប្រហែ​ល១៩,៣៧ពាន់លានដុល្លារ។

បណ្តាញផ្លូវដែកនេះមានផ្លូវរូងក្រោមដីចំនួន៥៩ និងឆ្លងកាត់រដ្ឋចំនួន៤ រួមមាន រដ្ឋ Kelantan រដ្ឋ Terengganu  រដ្ឋ Pahang និងរដ្ឋ Selangor ផងដែរ។

ECRL ជាគម្រោងហេដ្ឋារចនាសម្ព័ន្ធបណ្តាញផ្លូវរថភ្លើង ដែលតភ្ជាប់ទីក្រុង Port Klang នៅលើច្រកសមុទ្រម៉ាឡាកា ទៅកាន់ទីក្រុង Kota Bharu នៅភាគឦសាននៃឧបទ្វីបម៉ាឡេស៊ី រួចតភ្ជាប់បន្តទៅកាន់រដ្ឋ Pahang រដ្ឋ Terengganu រដ្ឋ Kelantan រដ្ឋ Selangor និងតំបន់ក ណ្តាល នៃឆ្នេរសមុទ្រភាគខាងលិចរបស់ឧបទ្វីបម៉ាឡេស៊ី។

ថ្លែងនៅក្នុងសន្និសីទសារព័ត៌មានមួយ បន្ទាប់ពីកិច្ចប្រជុំគណៈរដ្ឋមន្ត្រីកាលពីថ្ងៃពុធ ទី២១ ខែធ្នូ លោក Anwar Ibrahim បានមានប្រសាសន៍ថា រដ្ឋាភិបាលថ្មីនឹងបន្តដំណើរការគម្រោងដ៏ធំនេះ ដោយសារវាពាក់ព័ន្ធនឹងកិច្ចព្រមព្រៀងចាស់។

លោក Anwar បានមានប្រសាសន៍ថា ទោះបីជាមានការកើនឡើងថ្លៃបន្តិចបន្តួច ដោយសារការកែទម្រង់ផ្លូវដែកក៏ដោយ ក៏រដ្ឋាភិបាលបានគ្រប់​គ្រងកាត់បន្ថយវា បន្ទាប់ពីក្រសួងហិរញ្ញវត្ថុ ក្រសួងដឹកជញ្ជូន និងក្រសួងការងារបានធ្វើកិច្ចចរចាគ្នា។

កាលពីថ្ងៃទី៦ ខែធ្នូ កន្លងទៅ រដ្ឋមន្ត្រីក្រសួងដឹកជញ្ជូន លោក Anthony Loke ធ្លាប់បានបញ្ជាក់ថា ទោះបីជាមានការផ្លាស់ប្តូរនៅក្នុងរដ្ឋាភិបាល បន្ទាប់ពីការបោះឆ្នោតសកលថ្មីៗនេះក៏ដោយ ប៉ុន្តែគម្រោងECRL នឹងបន្តដំណើរការ ដោយគ្មានការផ្លាស់ប្តូរអ្វីទាំងអស់៕

ដោយ: លាងហួរ

ប៉េកាំង: យោងតាមវិទ្យាស្ថានស្រាវជ្រាវHurun បានឱ្យដឹងថា បណ្តាក្រុមហ៊ុនបរទេសធំៗបំផុត ចំនួន១០០នៅក្នុងប្រទេសចិន រកចំណូលបាន១ពាន់ពាន់លានដុល្លារ ក្នុងការលក់កាលពីឆ្នាំ២០២១ ដែលស្មើនឹង៧ភាគរយ នៃផលិតផលក្នុងស្រុកសរុបរបស់ប្រទេសនេះ។

ជាក់ស្តែង ក្រុមហ៊ុនផលិតគ្រឿងអេឡិចត្រូនិក របស់តៃវ៉ាន់ Hon Hai Precision ដែលគេស្គាល់យ៉ាងច្បាស់ថាជា Foxconn បានឈរនៅលើកំពូលតារាងបញ្ជី ជាក្រុមហ៊ុនបរទេសធំបំផុតទី១ សម្រាប់ឆ្នាំទី២ជាប់ៗគ្នា  តាមពីក្រោយដោយក្រុមហ៊ុន ផលិតរថយន្តអាល្លឺម៉ង់ Volkswagen និងក្រុមហ៊ុន Apple មកពីសហរដ្ឋអាមេរិក។

ក្រុមហ៊ុនទាំងនោះត្រូវបានជ្រើសរើស ដោយផ្អែកលើការលក់របស់ពួកគេ និងចំនួនបុគ្គលិកនៅក្នុងប្រទេសចិន។

ក្រុមហ៊ុនបរទេសភាគច្រើន មានប្រភពមកពីអឺរ៉ុប និងអាមេរិក ប៉ុន្តែវាក៏រួមបញ្ចូលក្រុមហ៊ុនមកពីហុងកុង ម៉ាកាវ និងតៃវ៉ាន់ ផងដែរ។

ឧស្សាហកម្មធំៗចំនួន៤ ដូចជា រថយន្ត ទំនិញប្រើប្រាស់  ការថែទាំសុខភាព និងគ្រឿងអេឡិចត្រូនិក មានចំនួនជិតពាក់កណ្តាលនៃបញ្ជីក្រុមហ៊ុនបរទេសក្នុងប្រទេសចិន។

ថ្វីបើវិធានការកូវីដសូន្យ ដ៏តឹងរ៉ឹងរបស់ប្រទេសចិន បានធ្វើឲ្យអារម្មណ៍របស់ក្រុមអ្នកធុរកិច្ចធ្លាក់ចុះយ៉ាងណាក្តី  ប៉ុន្តែបណ្តាក្រុមហ៊ុនបរទេសនានាក៏បានពង្រីកអាជីវកម្មរបស់ពួកគេ នៅក្នុងប្រទេសនេះផងដែរ។

របាយការណ៍របស់វិទ្យាស្ថានHurun បានបង្ហាញថា កាលពីឆ្នាំ២០២០កន្លងទៅ បណ្តាក្រុមហ៊ុនបរទេសធំៗចំនួន១០០ បានជួលបុគ្គ​លិកប្រហែល២,៥លាននាក់  និងមានទំហំការលក់ចំនួន៩០០ពាន់លានដុល្លារអាមេរិក ដែលស្មើនឹង៦ភាគរយនៃផលិតផល ក្នុងស្រុកសរុបរបស់ប្រទេសចិន។

តួយ៉ាងដូចជា ក្រុមហ៊ុនបរទេសធំបំផុតលំដាប់ទី១ Foxconn មានទំហំការលក់ចំនួន១០០ពាន់លានដុល្លារអាមេរិក និងបុគ្គលិកចំនួន៧៥ម៉ឺននាក់។

ក្រុមហ៊ុនធំបំផុតលំដាប់ទី២ Volkswagen មានទំហំការលក់រហូតដល់៦០ពាន់លានដុល្លារ ហើយក្រុមហ៊ុនផលិតរថយន្តអាឡឺម៉ង់ ដ៏ធំមួយនេះ លក់បានរថយន្តចំនួន៣,៣លានគ្រឿង នៅក្នុងប្រទេសចិនកាលពីឆ្នាំ២០២១។

ចំណែកក្រុមហ៊ុន Apple ដែលបានដណ្តើមតំណែងជាក្រុមហ៊ុនបរទេសធំបំផុតលំដាប់ទី៣ របស់ក្រុមហ៊ុនGeneral Motors បង្កើតចំណូ​លបាន៧០ពាន់លានដុល្លារកាលពីឆ្នាំមុន។

លើសពីនេះទៅទៀតនោះ ក្រុមហ៊ុន Appleបានកាន់កាប់២៥ភាគរយនៃទីផ្សារស្មាតហ្វូនរបស់ប្រទេសចិន ជាមួយនឹងម៉ាកទូរស័ព្ទដៃ iPhone កាលពីខែតុលា។

ទោះបីជាមានវិវាទពាណិជ្ជកម្ម រវាងសហរដ្ឋអាមេរិក និងចិនក្នុងប៉ុន្មានឆ្នាំចុងក្រោយនេះយ៉ាងណាក្តី ក៏ប៉ុន្តែក្រុមហ៊ុនអាមេរិកនៅតែជាកត្តារួមចំណែកដ៏ធំបំផុត ដល់សេដ្ឋកិច្ចរបស់ប្រទេសចិន ដោយមានក្រុមហ៊ុនអាមេរិកចំនួន៣៦នៅក្នុងបញ្ជី៕

  ដោយៈ គង់ សូរិយា

       ភ្នំពេញៈ លោកKE HONGWEI នាយកថ្មីនៃក្រុមហ៊ុនស៊ីម៉ង់ត៏កម្ពុជាចក្រីទីង ក្នុងខេត្តកំពតបានលើកឡើងពីបញ្ហាប្រឈម ដោយសារអំណាចនៃការទិញបានធ្លាក់ចុះ ព្រោះវបត្តិជំងឺកូវីដ និងបញ្ហាសង្រ្គាមរវាង​រុស្ស៊ី និងអ៊ុយក្រែន។

លោកលើលឡើងបែបនេះ ក្នុងឱកាសជួបសម្តែងការគួរសមជាមួយលោកទេសរដ្ឋមន្រ្តី ចម ប្រសិទ្ធ រដ្ឋមន្រ្តីក្រសួងឧស្សាហកម្ម បច្ចេកវិទ្យា និងនវានុវត្តន៍កាលកាលពីពេលថ្មីៗនេះ។

លោកKE HONGWEI បានជម្រាបជូនលោកទេសរដ្ឋមន្រ្តីថា គោលបំណងនៃជំនួបពិភាក្សា គឺទី១ -ដើម្បីធ្វើការណែនាំខ្លួន ទី២-ជម្រាបជូនពីស្ថានភាពទូទៅ និងលទ្ធផលការងារអាជីវកម្មរយៈពេលមួយឆ្នាំកន្លងទៅ រួមជាមួយលើកឡើង ពីភាពងាយស្រួលនិងបញ្ហាប្រឈម និងទី៣-គឺជាសារជូនពរនាឱកាសឆ្នាំថ្មី ឆ្នាំសាកល២០២៣ ខាងមុខនេះ។

លោកបានបញ្ជាក់ថា ក្រុមហ៊ុនស៊ីម៉ង់ត៏កម្ពុជាចក្រីទីង ដែលមានទីតាំងនៅស្រុកទឹកឈូ ខេត្តកំពត និងទទួលវិញ្ញាបនបត្រអនុញ្ញាតដំណើរការរោងចក្រ ចុះថ្ងៃទី ២៥ ខែ សីហា ឆ្នាំ២០២០ បច្ចុប្បន្ន មានក្រុមហ៊ុនជាបុត្រសម្ព័ន្ធ របស់ខ្លួនចំនួន២ទៀត គឺទី១-ក្រុម ហ៊ុន Cambodian Packaging Chakrey Ting Co,Ltd ផលិតសំបកបាវ ស៊ីម៉ងត៏ និងសំបកបាវអង្ករ និងទី២-ក្រុម Cambodian Concret Chakrey Ting Co.,Ltd គឺជាក្រុម ហ៊ុនស៊ីម៉ងត៏លាយស្រេច។

ក្រៅពីនោះ ក្រុមហ៊ុន ក៏មានសួនឧស្សាហកម្មកម្ពុជាចក្រីទីង ដែលផលិតសំភារៈសំណង់ និងកែច្នៃគ្រឿងសំណង់ជាដើម ។

លោក KE HONGWEI ក៏បានលើកឡើងពីភាពប្រឈមផងដែរ គឺការធ្លាក់ចុះកំលាំងទិញ ក្នុងឆ្នាំ២០២២ បើប្រៀបធៀបនឹងឆ្នាំ២០២១ គឺ ដោយសារវិបត្តិកូវីដ១៩ សង្គ្រាម រវាងអ៊ុយក្រែន និង រុស្សី កំណើន អតិផរណា និងថ្លៃវត្ថុធាតុដើមជាដើម ។

ទោះជាយ៉ាងណា លោកបញ្ជាក់ថា ក្រុមហ៊ុនក៏បានបង្ហាញនូវផែនការ សកម្មភាពសម្រាប់ឆ្នាំ២០២៣របស់ខ្លួន ដូចជា ការចំណាយទុនសម្រាប់សង្វាក់ផលិតកម្ម កែច្នៃថ្មសំណល់ ទៅជាសំភារៈសំណង់ និងការសហការជាមួយក្រុមហ៊ុន SCG ផលិតប្រភេទសម្ភារៈ សំណង់ស្មាតបត បានរាប់លានសន្លឹកផងដែរ។

លោកទេសរដ្ឋមន្រ្តី ចម ប្រសិទ្ធ បានស្វាគមន៍ និងអបអរសាទរ ដល់លោក ឃឺ ជានាយកក្រុមហ៊ុនថ្មី នឹងសង្ឃឹមថា ក្រោមការដឹកនាំរបស់លោក ក្រុមហ៊ុន នឹងបន្ត រីកចម្រើន និងជំនះបាននូវឧសគ្គទាំងឡាយ ។

លោកបានផ្តល់យោបល់ថា ការខ្វះវត្ថុធាតុដើម ជាថ្មកំបោរសម្រាប់ផលិតស៊ីម៉ង់ត៏ នាពេលអនាគត់ ក្រុមហ៊ុន អាចពិនិត្យលទ្ធភាព មើលនៅខេត្តកំពត ដែលនៅជិតទីតាំងរបស់ក្រុមហ៊ុនស្រាប់។ លោកទេសរដ្ឋមន្រ្តី ចម ប្រសិទ្ធ ក៏បានលើកទឹកចិត្ត និងគាំទ្រ ដែលក្រុមហ៊ុន បានផលិតសំបកបាវអង្ករ សម្រាប់ផ្គត់ផ្គង់លើទីផ្សារកម្ពុជា៕