ដោយ៖ សុផារី

ភ្នំពេញ៖ ក្នុងកាលៈទេសៈដែលមិនសូវមានភ្ញៀវបរទេសចូលមកកាន់ប្រទេសកម្ពុជា ទីផ្សារខុនដូនៅកម្ពុជានៅបន្តមានដំណើរការទិញលក់ ក្នុងចំណោមអតិថិជននៅក្នុងស្រុក ដែលបង្ហាញថា ប្រជាជនកម្ពុជាចាប់ផ្តើមមានទំនោរក្នុងការងាកមករស់នៅ និងវិនិយោគលើជម្រើសវិនិយោគថ្មីមួយនេះ។

យ៉ាងណាក្តី អ្នកជំនាញមើលឃើញថា ទីផ្សារខុនដូនៅមានភាពពេញនិយមតិចជាងច្រើន ក្នុងចំណោមអតិថិជនក្នុងស្រុក បើប្រៀបធៀបទៅនឹងជនជាតិបរទេស។

លោក ច្រឹក សុខនីម ប្រធានសមាគមអ្នកវាយតម្លៃនិងភ្នាក់ងារអចលនវត្ថុកម្ពុជា បានឱ្យដឹងថា បច្ចុប្បន្ននេះ ទីផ្សារខុនដូនៅកម្ពុជាបានស្រូបយកអតិថិជន ដែលជាប្រជាជនខ្មែរប្រមាណ២៥ភាគរយ ហើយ៧៥ភាគរយផ្សេងទៀត គឺជាជនបរទេស។

លោក ច្រឹក សុខនីម បានបញ្ជាក់ថា តាមការប៉ាន់ស្មាន២៥ភាគរយនៃជនជាតិខ្មែរ ដែលរស់នៅខុនដូ គឺជាយុវវ័យដែលទើបតែត្រឡប់មកពីសិក្សាបរទេស ឬអ្នកទើបតែរៀបការហើយថ្មីថ្មោង ដែលអាចសម្របខ្លួន បានទៅនឹងការរស់នៅបែបលក្ខណៈបរិបទថ្មី។

ពាក់ព័ន្ធនឹងមូលហេតុដែលអតិថិជនក្នុងស្រុកភាគច្រើនមិនសូវនិយមក្នុងការទិញខុនដូ ដោយសារតែពូកគាត់មានទម្លាប់ចាស់ ដែលមិយមក្នុងការរស់នៅក្នុងបុរី ឬផ្ទះល្វែងច្រើនជាង ជាពិសេសមនុស្សវ័យចាស់។

លោកបានបន្តថា “ការណ៍ដែលប្រជាជនខ្មែរ មិនទាន់រស់នៅខុនដូច្រើន មិនមែនមកពីគ្មានលទ្ធភាពនោះទេ គឺដោយសារតែពលរដ្ឋភាគច្រើនទម្លាប់រស់នៅបុរី ឬផ្ទះល្វែង ជាពិសេសមនុស្សវ័យចាស់ ពួកគាត់មិនទម្លាប់រស់នៅបែបសម័យទំនើប”៕

ដោយ:លាងហួរ

ប្រទេសចិន: របាយការណ៍ថ្មីមួយ បានឱ្យដឹងកាលពីថ្ងៃព្រហស្បតិ៍ថា ប្រទេសចិនមានឆន្ទៈក្នុងការសហការជាមួយបណ្តាប្រទេស នៅតាមបណ្តោយខ្សែរថភ្លើង China-Europe Railway Express ដើម្បីរួមគ្នាលើកកម្ពស់ការសាងសង់គម្រោងហេដ្ឋារចនាសម្ព័ន្ធសំខាន់ៗ ដើម្បីបង្កើនសមត្ថភាពកាន់តែប្រសើរឡើង ក្នុងការធានានូវប្រតិបត្តិការប្រកបដោយរលូន នៃសេវាកម្មរថភ្លើងដឹកទំនិញ។

របាយការណ៍អភិវឌ្ឍន៍រថភ្លើង ដែលចងក្រងដោយការិយាល័យនៃក្រុមឈានមុខគេ សម្រាប់ការលើកកម្ពស់គំនិតផ្តួចផ្តើមខ្សែក្រវាត់ និងផ្លូវ និងក្រុមហ៊ុន China State Railway Group Co Ltd បានបង្ហាញថា ប្រទេសចិនត្រៀមខ្លួនជាស្រេច ក្នុងការធ្វើការជាមួយប្រទេសទាំងនោះ ដើម្បីសិក្សារួមគ្នាលើការបង្កើតយន្តការសហប្រតិបត្តិការអន្តររដ្ឋាភិបាលសម្រាប់ចិន-អឺរ៉ុប។

រថភ្លើងដឹកទំនិញ កសាងប្រព័ន្ធសង្វាក់ផ្គត់ផ្គង់ឧស្សាហកម្ម និងឧស្សាហកម្មអន្តរជាតិប្រកបដោយស្ថិរភាព ក៏ដូចជាអនុវត្តការស្រាវជ្រាវលើបច្ចេកវិទ្យា និងឧបករណ៍ថ្មីៗ។

ប្រទេសចិនត្រៀមខ្លួនជាស្រេច ក្នុងការបង្កើនកិច្ចខិតខំប្រឹងប្រែង ដើម្បីជំរុញការអភិវឌ្ឍន៍ឌីជីថល និងឆ្លាតវៃនៃរថភ្លើងដឹកទំនិញចិន-អឺរ៉ុប រួមគ្នាលើកកំពស់ការអនុវត្ត និងស្តង់ដារបទប្បញ្ញត្តិ គោលនយោបាយ និងស្តង់ដារបច្ចេកទេស។

ប្រទេសចិននឹងបន្តដើរតួនាទីយ៉ាងពេញលេញ ក្នុងគម្រោងផ្តល់ប្រាក់កម្ចីពិសេសខ្សែក្រវ៉ាត់ និងផ្លូវ មូលនិធិផ្លូវសូត្រ និងមូលនិធិវិនិយោគពិសេស ក្នុងការជំរុញការតភ្ជាប់រវាងទ្វីបទាំងពីរ។

កិច្ចខិតខំប្រឹងប្រែងបន្ថែមទៀត ក៏នឹងត្រូវបានធ្វើឡើងផងដែរ ក្នុងការអភិវឌ្ឍចំណងដៃលើផ្លូវសូត្រ និងគាំទ្រដល់ប្រតិបត្តិការប្រកប ដោយប្រសិទ្ធភាព នៃមជ្ឈមណ្ឌលសហប្រតិបត្តិការពហុភាគី សម្រាប់ការអភិវឌ្ឍហិរញ្ញវត្ថុ ដែលជាយន្តការហិរញ្ញវត្ថុរួមគ្នា ដែលត្រូវបានរចនាឡើង ដើម្បីលើកកម្ពស់ហេដ្ឋារចនាសម្ព័ន្ធគុណភាពខ្ពស់ និងការវិនិយោគ នៅក្នុងប្រទេសកំពុងអភិវឌ្ឍន៍ តាមរយៈភាពជាដៃគូ៕

ដោយ៖ សុផារី

ភ្នំពេញ៖ ផ្លូវជាតិលេខ៥ គឺជាផ្នែកមួយនៃផ្លូវអាស៊ានហាយវ៉េលេខ១ (AH1) ដែលតភ្ជាប់គ្នា រវាងរាជធានីភ្នំពេញទីក្រុងបាងកក និងទីក្រុងហូជីមិញ និងជាខ្សែផ្លូវស្ថិតក្នុងរបៀងសេដ្ឋកិច្ចខាងត្បូងដ៏មានសក្តានុពល និងការប្រកួតប្រជែងខ្លាំងសម្រាប់វិស័យទេសចរណ៍ ពាណិជ្ជកម្ម វិនិយោគ ភស្តុភារកម្ម និងសេដ្ឋកិច្ចរបស់អាស៊ាន។​

ប្រធានគ្រប់គ្រងសាខារបស់ក្រុមហ៊ុន Century 21 Zillion Holding ប្រចាំខណ្ឌឬស្សីកែវ កញ្ញាសូ សុគុណឌឿន បានលើកឡើងថា រំហូរចរាចរណ៍ដែលឆ្លងកាត់ផ្លូវជាតិលេខ៥ ឆ្ពោះទៅបណ្តាខេត្តនានានឹងកាន់តែល្អប្រសើរ និងមមាញឹកជាងមុ​ន។ កត្តានេះនឹងជួយជំរុញសក្តានុពលតំបន់ដែលចេញពីរាជធានីភ្នំពេញ ដូចជាកំណាត់ផ្លូវជាតិលេខ៥ ក្នុងខណ្ឌឬស្សីកែវ ដោយបង្កើនតម្រូវការផ្ទះសម្រាប់ធ្វើអាជីវកម្មកាន់តែច្រើន។​

កញ្ញាបន្តថា “បើធៀបនឹង ៣ ឆ្នាំមុន​ ទីតាំងមួយចំនួននៅតាមបណ្តោយផ្លូវជាតិលេខ ៥ ហាក់មានការអភិវឌ្ឍតិចតូច។ ប៉ុន្តែបច្ចុប្បន្ន សហគមន៍ផ្សារទំនើប និងលំនៅឋានដ្ឋានបែបអាជីវកម្មនៅតាមបណ្តោយផ្លូវជាតិលេខ៥ ក្នុងខណ្ឌឬស្សីកែវមានការអភិវឌ្ឍជាបន្តបន្ទាប់ ដោយសារតំបន់នេះមានទំហំដីធំៗច្រើន និងតម្លៃដីមានលក្ខណៈប្រកួតប្រជែង បើធៀបនឹងតំបន់សក្តានុពលផ្សេងៗទៀត”។

ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា លោក ច្រឹក សុខនីម ធ្លាប់បានលើកឡើងថា ម្ចាស់គម្រោង​ធំៗមួយចំនួនបានទិញដីនៅតំបន់ចន្លោះផ្លូវជាតិលេខ៥ និងផ្លូវ៦A ហើយលាតសន្ទឹងដល់ផ្លូវ៦១ ក្នុងគោលដៅអភិវឌ្ឍន៍ជាអគារពាណិជ្ជកម្ម និងសំណង់លំនៅដ្ឋាននាពេលអនាគត។

លោកថ្លែងថា ​”ជាពិសេសក្រវាត់ក្រុងផ្លូវជាតិលេខ៥​ ផ្លូវជាតិ​៦A នឹងមានកំណើនសន្ទុះនៃការអភិវឌ្ឍ ព្រោះ ម្ចាស់បុរី​ធំៗកំពុង​អភិវឌ្ឍរួមគ្នានៅតំបន់ផ្លូវជាតិទាំងពីរនេះ។ គាត់ទិញដីធំៗច្រើនណាស់ អ៊ីចឹងពេលក្រោយទៅអគារណិជ្ជកម្មខ្ពស់ៗ នឹងទៅប្រមូលផ្តុំនៅតំបន់នោះ”។

ផ្លូវជាតិលេខ៥ តភ្ជាប់ភ្នំពេញជាមួយខេត្តកណ្តាល កំពង់ឆ្នាំង ពោធិ៍សាត់ បាត់ដំបង និងបន្ទាយមានជ័យ។ បច្ចុប្បន្នផ្លូវជាតិមួយខ្សែនេះកំពុងអភិវឌ្ឍដោយពង្រីកពី២គន្លង ទៅ៤កន្លង គិតចាប់ពីចំនុចព្រែក្តាម រហូតដល់ក្រុងប៉ោយប៉ែត ខេត្តបន្ទាយមានជ័យ។ គម្រោងផ្លូវជាតិនេះ មានប្រវែងសរុប៣៦៦គីឡូម៉ែត្រ គ្រោងចំណាយប្រមាណ​៥០០លានដុល្លារអាមេរិក ដែលជាកម្ចីឥណទានរបស់រដ្ឋាភិបាលជប៉ុន៕

ដោយ៖ សុផារី

ភ្នំពេញ៖ ប្រព័ន្ធហេដ្ឋារចនាសម្ព័ន្ធ និងគម្រោងធំៗជាច្រើនបានឈានជើងចូលទៅវិនិយោគ នៅក្នុងតំបន់ផ្លូវក្រវាត់ក្រុងទី៣ ហើយបាន និងកំពុងធ្វើឱ្យទីតាំងនេះក្លាយជាទីតាំងវិនិយោគល្អបំផុត សម្រាប់គម្រោងលំនៅឋានប្រភេទបុរី។ ជាក់ស្តែង បុរី GB Residence ជាបុរីធំមួយដែលបានហ្នឹងកំពុងបោះទុនវិនិយោគលើផ្ទៃដីជាង១០ហិចតា រួមជាមួយហ្នឹងគុណតម្លៃពិសេសៗជាច្រើន។

លោក តាំង កៅគៀត នាយកប្រតិបត្តិ របស់បុរី GB Residence បានមានប្រសាសន៍ប្រាប់ក្នុងកិច្ចសម្ភាសន៌ជាមួយគេហទំព័រ Property Area Asia ថាគម្រោងបុរី GB ជ្រើសរើសទីតាំងផ្លូវក្រវាត់ក្រុងទី៣ សម្រាប់ការអភិវឌ្ឍន៌បុរី ដោយសារហេតុផលសំខាន់ៗមួយចំនួន។
លោក តាំង កៅគៀត បានឱ្យដឹងថា ហេតុផលទី១ តំបន់ខាងលើនេះជាតំបន់ដែលកំពុងតែមានការអភិវឌ្ឍន៌ខ្លាំង ទោះបីជាទទួលរងផលប៉ះពាល់ពីវិបត្តិជំងឺកូវីដ១៩ក៏ដោយ ការអភិវឌ្ឍន៌លើហេដ្ឋារចនាសម្ព័ន្ធផ្លូវថ្នល់ ការអភិវឌ្ឍន៌ព្រលានយន្តហោះថ្មី នៅតែបន្តដំណើរការយ៉ាងសកម្ម។

លោកបានបន្តថា ជាពិសេសតំបន់នេះមានទីតាំងជិតគម្រោងអភិវឌ្ឍន៍ធំៗ មជ្ឈមណ្ឌលសេដ្ឋកិច្ច ផ្សារទំនើបៗ សាលារៀនអន្តរជាតិផ្សេងៗ ដែលនឹងធ្វើឱ្យតំបន់នេះក្លាយជាទីតាំងល្អបំផុតសម្រាប់ការរស់នៅ។ បន្ថែមលើសនេះ ប្រព័ន្ធហេដ្ឋារចនាសម្ព័ន្ធនៅទីនេះមានភាពប្រទាក់ក្រឡាគ្នា ដែលអាចភ្ជាប់ទៅកាន់ផ្លូវជាតិសំខាន់ៗ ដែលជាសរសៃឈាមសេដ្ឋកិច្ច ហើយភ្ជាប់ទៅកាន់កំពង់ផែស្វយ័តក្រុងភ្នំពេញ។

លោកបន្ថែមទៀតថា ជាពិសេសព្រះលានយន្តហោះអន្តរជាតិភ្នំពេញថ្មី ដែលគ្រោងនឹងចាប់ផ្តើមដំណើរការនាពេលឆាប់ៗនេះ ក៏នឹងនាំមកនូវទេសចរណ៌ ព្រមទាំងជំរុញសេដ្ឋកិច្ចកម្ពុជាឱ្យរីកចម្រើនផងដែរ។

បើយោងតាម នាយកប្រតិបត្តិ ជាន់ខ្ពស់ខាងលើ បានឱ្យដឹងថាគម្រោងបុរី GB Residence ត្រូវបានសាងសង់ឡើងលើផ្ទៃដីជាង១០ហិចតា ដោយបែងចែកចេញជាដំណាក់កាល ក្នុងនោះដំណាក់កាលទី១ សម្រេចការសាងសង់បានចំនួន២០ភាគរយហើយ។
លោក កៅគៀត បានបញ្ជាក់ថា ទោះបីជាប្រឈមនឹងផលប៉ះពាល់ពីកូវីដ១៩ និងវិបត្តិសេដ្ឋកិច្ចសកលក្តី គម្រោងបុរី GB នៅតែបន្តទទួលបានការគាំទ្រពីសំណាក់អតិថិជនជាបន្តបន្ទាប់។
មូលហេតុ ដែលបណ្តាលឲ្យបុរី GB នៅតែពេញនិយម ក្នុងចំណោមអ្នកទិញ ព្រោះបុរីស្ថិតនៅផ្លូវក្រវាត់ក្រុងទី៣ត្រឹមតែ៣០ម៉ែត្រប៉ុណ្ណោះ ហើយជាប់នឹងផ្លូវរដ្ឋ៥០ម៉ែត្រ ដែលអនុញ្ញាតឱ្យអ្នកទិញប្រកបរបររកស៊ីបានយ៉ាងងាយស្រួល។ បន្ថែមលើសនេះ គុណភាពខ្ពស់នៃផ្ទះក្នុងបុរី ប្រព័ន្ធហេដ្ឋារចនាសម្ព័ន្ធ ដូចជាសួនច្បារ ការរចនាឌីហ្សាញ ជាដើមត្រូវបានគិតគូរដល់សុខុមាលភាពនៃការរស់នៅរបស់ប្រជាជន។
លោកបញ្ជាក់ថា “ប្លង់ផ្ទះត្រូវបានគូរប្លង់ ដោយស្ថាបត្យករលំដាប់អន្តរជាតិ ធ្លាប់ឈ្នះរង្វាន់ជាច្រើននៅទីក្រុងឌូបៃ។ ប្លង់ដែលត្រូវបានគូរចេញមក ត្រូវបានគិតគូរអំពីភាពងាយស្រួលក្នុងការរស់នៅប្រចាំថ្ងៃ ម៉ូតទាន់សម័យ និងប្រកបដោយគុណភាពផងដែរ”។

លោកបញ្ជាក់ថា បុរី GB បានព្យាយាមធ្វើឱ្យប្រសើរលើភាពបៃតង ដូចជា ការប្រើប្រាស់ឧបករណ៍សន្សំសំចៃថាមពលខ្ពស់ ដែលរួមចំណែកដល់ការកាត់បន្ថយការប្រើប្រាស់អគ្គិសនី និងការឡើងកំដៅពិភពលោក។ ពិសេសជាងនេះទៅទៀត បុរីបានរៀបចំសាងសង់សួនច្បារទំហំប្រហែល ១០០ម៉ែត្រគុណនិង២០ម៉ែត្រ ហើយគ្រប់ផ្ទះទាំងអស់អាចភ្ជាប់ទៅកាន់សួនច្បារនេះបាន ដើម្បីជាទីកន្លែងកំសាន្ត និងហាត់ប្រាណបាន។
បុរី GB មាន២ប្រភេទផ្ទះធំៗ រួមមាន ផ្ទះអាជីវកម្ម (Shop house) និងវីឡាភ្លោះ (Twin Villa) ប្រកបដោយលក្ខខណ្ឌបង់ប្រាក់ល្អបំផុត។ តម្លៃផ្ទះមានតម្លៃចាប់ផ្ដើមពី ៨០.០០០ដុល្លារឡើងទៅជាមួយនឹងការបញ្ចុះតម្លៃជាច្រើនផងដែរ៕