ដោយ៖ សុផារី

ភ្នំពេញ៖ បរធនបាលកិច្ច គឺជាមធ្យោបាយថ្មីមួយនៅក្នុងប្រទេសកម្ពុជា ប៉ុន្តែក្នុងរយៈពេលប៉ុន្មានឆ្នាំចុងក្រោយនេះ វិស័យមួយនេះបាននិងកំពុងមានតួនាទីសំខាន់នៅក្នុងការជំរុញវិស័យអចលនទ្រព្យកម្ពុជា ឱ្យមានការរីកចម្រើន ជាពិសេស​នៅក្នុងអចលនទ្រព្យប្រភេទលំនៅឋានបុរី។

អ្នកនាង គឹម គិនកេសា អ្នក​គ្រប់គ្រង​ជាន់ខ្ពស់ CBRE Cambodia បានមានប្រសាសន៍ននៅក្នុងបទបង្ហាញរបាយការណ៍ប្រចាំឆមាសរបស់ក្រុមហ៊ុន CBRE Cambodia កាលពីសប្តាហ៍កន្លងមកថា “យើងបានសង្កេតឃើញ សកម្មភាពរួមគ្នារវាងក្រុមហ៊ុនបរធនបាល (Trust Company)ឈានជើងចូលមកកាន់វិស័យលំនៅឋានបែបបុរី ដោយក្រុមហ៊ុនបរធនបាលទាំងនោះបានធ្វើការសម្រាប់គម្រោងបុរី ដីធ្លីជាប់បុរី និងក្រៅបុរី”។

យោងតាមការឱ្យដឹងរបស់អ្នកនាងកេសា បច្ចុប្បន្ននេះ យ៉ាងហោចណាស់មានក្រុមហ៊ុនបរធនបាលប្រមាណ១២ទៅ១៤ក្រុមហ៊ុន បានបើកដំណើរការ និងគ្រប់គ្រងដោយ និយ័តករមូលបត្រកម្ពុជា (Securities and Exchange Regulator of Cambodia)។

បើតាមអ្នកជំនាញរូបនេះឱ្យដឹងថា វត្តមាននៃក្រុមហ៊ុនទាំងនោះនៅក្នុងទីផ្សារអចលនទ្រព្យកម្ពុជាបានធ្វើឱ្យអ្នកអភិវឌ្ឍន៍គម្រោងលំនៅឋាន មិនត្រឹមតែអាចផ្តល់ជូននូវបុរី ដែលមានគុណភាពខ្ពស់ ដល់អតិថិជនប៉ុណ្ណោះទេ ប៉ុន្តែក៏ផ្តល់ឱកាសក្នុងការពង្រីកបន្ថែមដល់អតិថិជនក្រៅប្រទេសផងដែរ។

អ្នកនាងបន្តថា “ខ្ញុំគិតថា វានឹងក្លាយជាមធ្យោបាយថ្មីមួយ សម្រាប់អ្នកអភិវឌ្ឍន៍គម្រោងលំនៅឋាន ក្នុងការផ្តល់ជូននូវបុរី ដែលមានគុណភាពខ្ពស់ ដើម្បីពង្រីកបន្ថែមដល់អតិថិជនក្រៅប្រទេស ខណៈការឆ្លើយតប និងតម្រូវការនៃវិនិយោគិនបរទេស គឺជាអ្វី ដែលយើងត្រូវស្រូបយក និងតាមដានមើលក្នុងរយៈពេល២ឆ្នាំទៀត”។

ក្រុមហ៊ុនបរធនបាល (ក្រុមហ៊ុនថែរក្សាទ្រព្យសម្បត្តិជំនួស) ឬភាសាអង់គ្លេសហៅថា Trust Company យោងតាមច្បាប់ស្តីពីបរធនបាលកិច្ចឆ្នាំ២០១៩ ជនបរទេសអាចទិញដីនៅកម្ពុជាបានតាមរយៈក្រុមហ៊ុនបរធនបាល ដែលបានចុះបញ្ជីបរធនបាលកិច្ចនៅក្រសួងសេដ្ឋកិច្ច និងហិរញ្ញវត្ថុត្រឹមត្រូវ។

ក្រុមហ៊ុនបរធនបាលដើរតួជាអ្នកគ្រប់គ្រងទ្រព្យសម្បត្តិឱ្យជនបរទេស ដោយគ្មានសិទ្ធិយកទៅលក់ បន្តឡើយ ទោះជាដីនោះជាឈ្មោះកម្មសិទ្ធិរបស់ក្រុមហ៊ុនក៏ដោយ។ ការទិញដោយវិធីនេះ ជនបរទេសតែងមាន​ទំនុកចិត្តខ្ពស់៕

ដោយ៖ លាងហួរ

ថៃ៖ ដើម្បីជំរុញការលក់អចលនទ្រព្យ និងជំរុញសេដ្ឋកិច្ចជាតិ ក្រសួងមហាផ្ទៃ របស់ប្រទេសថៃគ្រោងអនុញ្ញាតឱ្យវិនិយោគិនបរទេស ដែលវិនិយោគក្នុងទំហំទឹកប្រាក់ចំនួន៤០លានបាត (ប្រមាណជាង១លានដុល្លារអាមេរិក) ក្នុងរយៈពេលយ៉ាងតិច៣ឆ្នាំ អាចទិញលំនៅដ្ឋានលើដីទំហំ១.៦០០ម៉ែត្រការ៉េ។

នេះបើយោងតាមការចុះផ្សាយរបស់សារព័ត៌មាន The Nation នៅថ្ងៃទី១២ ខែកក្កដានេះ។

លោក Nipon Boonyamanee អនុរដ្ឋមន្ត្រីក្រសួងមហាផ្ទៃ បានមានប្រសាសន៍ឱ្យដឹងនៅ ថ្ងៃអង្គារនេះថា ក្រសួងមហាផ្ទៃនឹងស្នើវិធានការនេះ ទៅកាន់ខុទ្ទកាល័យនាយករដ្ឋមន្ត្រីនាពេលឆាប់ៗនេះ។

លោក Nipon Boonyamanee បានបង្ហាញក្តីរំពឹងថា តាមរយៈវិធានការនេះនឹងជួយជំរុញទីផ្សារអចលនទ្រព្យ និងផ្តល់អត្ថប្រយោជន៍ដល់ហាងឆេងតម្លៃដីធ្លី នៅក្នុងទីក្រុងបាងកក និងខេត្តសំខាន់ៗផ្សេងទៀតដូចជាសាមុតប្រកាន (Samut Prakan) ឈុនបុរី (Chonburi) ឆៀងម៉ៃ (Chiang Mai) និង ខេត្តភូកេត (Phuket)។

អនុរដ្ឋមន្ត្រីរូបនេះ បានបន្តថា កន្លងមក ក្រសួងមហាផ្ទៃបានស្វែងរកវិធានការជំរុញការលក់អចលនទ្រព្យ ជាពិសេសក្នុងចំណោមពាណិជ្ជករបរទេស ដែលមានកម្លាំងទិញខ្ពស់។ តម្លៃអចលនទ្រព្យនៅក្នុងប្រទេសថៃមិនខ្ពស់ទេ បើប្រៀបធៀបទៅនឹងប្រទេសដទៃ ដូច្នេះវាជាឱកាសល្អក្នុងការជំរុញសេដ្ឋកិច្ច។

លោកក៏បានបញ្ជាក់ថា ក្រសួងក៏មានគោលបំណងបញ្ចុះថ្លៃ ក្នុងការផ្ទេរនិងបញ្ចាំ សម្រាប់អចលនទ្រព្យ ដែលមានតម្លៃជាង៣លានបាត(ប្រមាណជាង៨២.០០០ដុល្លារ) ចុះដល់ត្រឹមតែ០,០១ភាគរយ។

លោកបានបន្ថែមថា ក្រសួងនឹងសិក្សាថា តើការកាត់បន្ថយថ្លៃផ្ទេរប្រាក់ និងកម្ចីទិញផ្ទះ នឹងត្រូវផ្តល់ជូនអចលនទ្រព្យ ដែលមានតម្លៃរហូតដល់២០លានបាត(ប្រមាណជាង៥៥ម៉ឺនដុល្លារ) ឬអត់៕

  ដោយៈ វឌ្ឍនៈ

ភ្នំពេញៈ ឆ្នាំ២០២២នេះ កំណើនភ្ញៀវទេសចរបរទេសចូលមកកាន់ប្រទេសកម្ពុជា ចាប់ផ្ដើមកើនឡើងវិញជាបន្តបន្ទាប់ ក្នុងនោះដែរក៏មានភ្ញៀវបរទេសជាទេសចរ និងភ្ញៀវជាវិនិយោគិនផងដែរ។

ការមកដល់នៃភ្ញៀវទេសចរបរទេស ចូលមកកាន់កម្ពុជានេះត្រូវបានរំពឹងថានឹងជួយជំរុញ ឱ្យទីផ្សារខុនដូនិងអាផាតម៉ិន ងើបឡើងវិញក្នុងពេលឆាប់ៗនេះ ។

អ្នកនាងគឹម គិនកេសា អ្នកគ្រប់គ្រងជាន់ខ្ពស់នៃក្រុមហ៊ុន CBRE Cambodia បានមានប្រសាសន៍ថាឱ្យដឹងថា ទីផ្សារខុនដូក្នុងរយៈពេល១ឆមាស២០២២នេះ បានចាប់ផ្ដើមមានសកម្មភាពល្អប្រសើរបន្តិចឡើងវិញ ។ជាក់ស្ដែងទាំងសកម្មភាពសាងសង់នូវគម្រោង ដែលបានផ្អាកដំណើរការកាលពីពេលមានវិបត្តិក៏ចាប់ផ្ដើមដំណើរការវិញ ហើយគម្រោងថ្មីៗ មួយចំនួនក៏ចាប់ផ្ដើសាងសង់ដែរ ។

អ្នកនាងបន្តថា “កំណើនភ្ញៀវទេសចរបរទេស ពិតជាបានធ្វើឱ្យតម្រូវការនូវការជួលខុនដូ និងអាផាត់មិននៅក្នុងប្រទេសកម្ពុជា ប៉ុន្តែបើនិយាយពីតម្លៃហាក់មិនទាន់មានការប្រែប្រួល គួរឱ្យកត់សម្គាល់នោះទេ នៅរក្សាតម្លៃ ថេរនិងតំបន់ខ្លះប្រែប្រួលតិចតួចប៉ុណ្ណោះ”។

ជាមួយគ្នានេះ លោកខន គង្គា អគ្គនាយកក្រុមហ៊ុនERA Cambodia ក៏បានលើកឡើងថា ក្នុងឆ្នាំ២០២២នេះ តម្រូវការទីផ្សារខុនដូ ក្នុងប្រទេសកម្ពុជា បានឃើញថាមានភាពកម្រើកជាងឆ្នាំ២០២០និងឆ្នាំ ២០២១កន្លងទៅ ហើយក៏មានសកម្មភាព នៃការទិញលក់ខុនដូច្រើនជាងរយៈពេល២ឆ្នាំកន្លងមកដែរ។ សកម្មភាពទាំងនេះ បានមកពីការបើកប្រទេសឡើងវិញ បើកសកម្មភាពសេដ្ឋកិច្ច និងការបើកឱ្យភ្ញៀវទេសចរបរទេសចូលមកកម្ពុជាឡើងវិញផងដែរ។

លោកបន្តថា “ការបើកឱ្យជនបរទេស និងអ្នកដំណើរបរទេសចូលមកកម្ពុជាឡើងវិញ បានជំរុញឱ្យទីផ្សារមួយនេះ ទទួលបានកំណើនឡើងវិញជាបន្តបន្ទាប់ ហើយក៏រំពឹងថាទីផ្សារនេះ នឹងទទួលបានកំណើនកាន់តែច្រើននៅឆ្នាំ២០២២និងឆ្នាំ២០២៣ និងឆ្នាំបន្តបន្ទាប់”។

យោងតាមរបាយការណ៍របស់ក្រសួងទេសចរណ៍ បានបង្ហាញថា ក្នុងរយៈពេល៥ខែកន្លងទៅនេះ កម្ពុជាទទួលបានភ្ញៀវទេសចរចំនួនជាង៣៤ម៉ឺននាក់ ខណៈរយៈពេលពេញមួយឆ្នាំនៃឆ្នាំ២០២១ កម្ពុជាទទួលបានភ្ញៀវទេសចរបរទេសតែជាង១៩ម៉ឺននាក់ប៉ុណ្ណោះ ។ ក្នុងឆ្នាំ២០២២នេះ ក្រសួងទេសចរណ៍រំពឹងថា នឹងទទួលបានភ្ញៀវទេសចរ១លាននាក់ និងឆ្នាំ២០២៣រំពឹងថានឹងទទួលបាន២លាននាក់ ក្រោយពីកម្ពុជាបានដាក់ចេញនូវវិធានការថ្មីៗបន្តបន្ទាប់៕

 ដោយៈ ជេស៊ីកា

       ភ្នំពេញៈ ការសិក្សាថ្មីមួយបានរកឃើញថា តម្លៃលក់ និងតម្លៃជួលទីផ្សារខុនដូនៅកម្ពុជា ក្នុងអំឡុងត្រីមាសទី ២ ឆ្នាំ ២០២២នេះ មានការកើនឡើង គួរឱ្យកត់សម្គាល់។

ការផ្គត់​ផ្គង់​កើន​ឡើង៣២ភាគរយ​ផងដែរ ដោយសារស្ថានភាពទីផ្សារមានសភាពកាន់តែល្អប្រសើរ។

យោងតាមរបាយការណ៍សិក្សាថ្មីមួយរបស់ក្រុមហ៊ុនអន្តរជាតិ CBRE Cambodia ដែលបានបង្ហាញកាលពីសប្តាហ៍មុនបានឲ្យដឹងថា តម្លៃលក់ខុនដូបានកើនឡើងចន្លោះពី០,៧ភាគរយ ទៅ២,៧ភាគរយ និងកើន​ដល់១,៤ភាគរយ សម្រាប់ខុនដូប្រភេទតម្លៃសមរម្យ ប្រភេទមធ្យម និងលំដាប់ខ្ពស់។

ជាមួយគ្នានេះ តម្លៃ​ជួល​ ក៏មានការកើនឡើង១,២ភាគរយ ទៅ៣,៣ភាគរយ និង២,៣ភាគរយរៀងគ្នា សម្រាប់ខុនដូទាំងបីប្រភេទផងដែរ។

ការសិក្សាដដែលបានឲ្យដឹងទៀតថា រហូតដល់បច្ចុប្បន្នចំនួនខុនដូ បានសាងសង់រួចរាល់ក្នុងត្រីមាសទី២នេះ កើនឡើងបានចំនួនជាង៤៧០០យូនីត ស្មើនឹង៣៧ភាគរយនៃចំនួនសរុប ដែលបានគ្រោងទុកសម្រាប់ផ្គត់ផ្គង់ឆ្នាំ២០២២។

ចំណែកគម្រោង​សាងសង់​ ដែលមានយខុនដូជាង​១២០០យូនីត ដែលបានពន្យារពេលកន្លងមក ឥឡូវ​នេះបាននិងកំពុងចាប់ផ្តើមដំណើរការឡើងវិញហើយ៕