ដោយៈ តារា

បាត់ដំបងៈ រាជរដ្ឋាភិបាលបានដាក់ចក្ខុវិស័យ ក្នុងការពង្រីកអាកាសយានដ្ឋានខេត្តបាត់ដំបង ដែលមានស្រាប់ក្នុងកម្រិត3C ដំឡើងឱ្យទៅជាកម្រិត 4C  ដូចនឹងអាកាសយានដ្ឋានអន្តរជាតិខេត្តសៀមរាប នាបច្ចុប្បន្ននេះដែរ។

លោកសយ សុខាន់ រដ្ឋលេខាធិការ នៃរដ្ឋលេខាធិការដ្ឋាន អាកាសចរស៊ីវិល បានមានប្រសាសន៍ឲ្យដឹងនាព្រឹកថ្ងៃទី១៣ កក្កដានេះថា បច្ចុប្បន្ននេះ អាកាសយានដ្ឋានខេត្តបាត់ដំបង នៅបន្តប្រតិបត្តិការហោះហើររបស់ខ្លួន ក្នុងកម្រិត3Cនូវប្រភេទយន្តហោះតូចៗ ដែលដឹកអ្នកដំណើរបានក្រោម៧០នាក់ប៉ុណ្ណោះ ប៉ុន្តែបច្ចុប្បន្ននេះរាជរដ្ឋាភិបាល តម្រូវឱ្យរៀបចំដំឡើងអាកាសយានដ្ឋានខេត្តបាត់ដំបងនេះ ឱ្យទៅជាកម្រិត 4C នូវប្រភេទយន្តហោះធន់កណ្តាល ដែលអាចដាក់អ្នកដំណើរបានជាង១០០ ទៅ២០០នាក់ ដូចនឹងអាកាសយានដ្ឋានអន្តរជាតិខេត្តសៀមរាបដែរ។

លោកបន្តថា “អាកាសយានដ្ឋានខេត្តបាត់ដំបងនេះ នៅពេលដំឡើងទៅជាកម្រិត 4C នឹងអាចហោះហើរបានចម្ងាយ៤ពាន់គីឡូម៉ែត្រ មានន័យថាប្រទេសដែលមានចម្ងាយក្នុងចន្លោះនេះ អាចហោះហើរបានទំាងអស់”។ លោកបន្តថា ស្របនឹងប្រទេសជាតិកំពុងអភិវឌ្ឍន៍ ក្រោមដំបូងសុខសន្តិភាព ដូចនេះហើយ ទើបគណៈកម្មការអន្តរក្រសួងបានជួបប្រជុំ ដើម្បីរៀបចំកញ្ចប់ថវិកា និងរួមគ្នាដោះស្រាយផលប៉ះពាល់ ដើម្បីដាក់សំណើរជូនរាជរដ្ឋាភិបាលសម្រេច”។

បច្ចុប្បន្ននេះ អាកាសយានដ្ឋានខេត្តបាត់ដំបង មានផ្ទៃដីត្រឹម១២៨ហិកតាប៉ុណ្ណោះ ហើយនៅពេលដំឡើងកម្រិតព្រលាននេះ ឱ្យទៅជាកម្រិត4C ទាមទារត្រូវពង្រីកបន្ថែមទៀត រហូតដល់ផ្ទៃដី២៩៥ហិកតា ដូចនេះគណៈកម្មការអន្តរក្រសួង ពិសេសគឺអាជ្ញាធរខេត្តបាត់ដំបង នឹងពិនិត្យលទ្ធភាពជាក់ស្តែងលើផ្ទៃដី ដែលស្ថិតនៅជាប់នឹងព្រលានខេត្តបាត់ដំបងនេះ ដែលអាចពង្រីកបាន បន្ទាប់មកគណៈកម្មការអន្តរក្រសួង តម្រូវឱ្យបង្កកផ្ទៃដីនៅជុំវិញព្រលានទំាងអស់ជាបណ្តោះអាសន្ន រង់ចាំគណៈកម្មការអន្តរក្រសួង ចុះសិក្សាដោយផ្ទាល់ ទើបសម្រេចជាគោលការណ៍តាមក្រោយបន្ត។

អាកាសយានដ្ឋានខេត្តបាត់ដំបងនេះ ស្ថិតនៅស្រុកសង្កែ ក្រុងបាត់ដំបង បានកសាង និងបើកឱ្យដំណើរការនៅថ្ងៃទី២៩ ខែតុលាឆ្នាំ១៩៦៨ ជាអាកាសយានដ្ឋានហោះហើរក្នុងស្រុក ហើយត្រូវបានផ្អាកឱ្យដំណើរការហោះហើរនៅទសវត្សន៍ឆ្នាំ៧០,១៩៧៥.១៩៧៩ ក្នុងរបបប៉ុលពត៕

ដោយ: លាងហួរ

ពិភពលោក: តម្រូវការប្រេងពិភពលោក ត្រូវបានព្យាករណ៍ថានឹងកើនឡើងបន្ថែមទៀតនៅឆ្នាំក្រោយ ទោះបីជាក្នុងល្បឿនយឺតជាងឆ្នាំ២០២២ក៏ដោយ។

អង្គការ OPEC បានឱ្យដឹងនៅក្នុងរបាយការណ៍ប្រចាំខែរបស់ខ្លួនថា ខ្លួនរំពឹងថា​ តម្រូវការប្រេងពិភពលោក នឹងកើនឡើង២,៧លានបារ៉ែលក្នុងមួយថ្ងៃ ក្នុងឆ្នាំ២០២៣ ខណៈពេលដែលការព្យាករណ៍កំណើនតម្រូវការនៅឆ្នាំនេះ នៅតែមិនផ្លាស់ប្តូរនៅត្រឹម៣,៤លានបារ៉ែលក្នុងមួយថ្ងៃ។

ប្រទេសសម្ព័ន្ធមិត្តផលិតប្រេងបាននិយាយថា ការព្យាករណ៍កំណើនតម្រូវការប្រេងឆ្នាំ២០២៣ គឺផ្អែកលើការទប់ស្កាត់កាន់តែប្រសើរឡើងនៃជំងឺរាតត្បាតកូវីដ១៩ និងការរំពឹងទុកកំណើនសេដ្ឋកិច្ច ពិភពលោកយ៉ាងរឹងមាំ។

ទោះជាយ៉ាងណាក៏ដោយ អង្គការOPEC បានកត់សម្គាល់ថា ហានិភ័យធ្លាក់ចុះ នៅតែមានសម្រាប់តម្រូវការប្រេង រួមទាំងបញ្ហាប្រឈមទាក់​ទងនឹងជំងឺរាតត្បាត និងភាពមិនច្បាស់លាស់ នៃភូមិសាស្ត្រនយោបាយ។

អង្គការ OPEC បានបង្ហាញនៅក្នុងរបាយការណ៍ខ្លួន ដោយបានព្យាករណ៍ថា ផលិតផលក្នុងស្រុកសរុបរបស់ពិភពលោក នឹងកើនឡើង៣,២ភាគរយនៅឆ្នាំ២០២៣ ដោយសន្មតថាជំងឺរាតត្បាត ការប្រែប្រួលភូមិសាស្ត្រនយោបាយនៅអឺរ៉ុបខាងកើត និងការរឹតបន្តឹងហិរញ្ញវត្ថុពិភពលោកចំពេលអតិផរណាកើនឡើង មិនប៉ះពាល់ជាអវិជ្ជមានដល់កំណើន នៅឆ្នាំ២០២៣ដល់កម្រិតធំមួយនោះទេ៕

ដោយៈវិវឌ្ឈន៍

       ភ្នំពេញៈ ការជ្រើសរើសផលិតផលទឹកដោះគោម្សៅ សម្រាប់បុត្រធីតារបស់ខ្លួនមានសារៈសំខាន់ណាស់ ដើម្បីផ្តល់ភាពលូតលាស់សតិបញ្ញាស្មារតីដល់ពួកគេ និងកំណត់នូវកម្រិតឆ្លាតវៃរបស់ពួកគេផងដែរ។

ផលិតផលទឹកដោះគោម្សៅ Balactan បាននិងកំពុងផ្តល់ជម្រើសដ៏ប្រសើ​រ សំរាប់មាតា បិតាគ្រប់រូប ដើម្បីឲ្យខួរក្បាលទារក និងកុមារមានការលូតលាស់បានល្អ​ប្រសើរ។

លោកប៊ូ​ ខេមរិន្ទ្រ ប្រធានផ្នែកលក់ និងទីផ្សារក្រុមហ៊ុន MTSL Investment Co., Ltd បានមានប្រសាសន៍ឲ្យដឹងកាលពីដើមសប្តាហ៍នេះថា បច្ចុប្បន្នផលិតផល ទឹកដោះគោម្សៅ Balactan បានបន្ថែមសារធាតុ DHA សម្រាប់ផលិតផលថ្មីរបស់យើង ដែលសារធាតុនេះ ជួយដល់ការអភិវឌ្ឍ លូតលាស់ខួរក្បាលក្មេងឲ្យចងចាំបានល្អ រៀនសូត្រចាប់បានលឿន រហ័ស និងចងចាំបានយូរ ពិសេសពួកគាត់អាចប្រើប្រាស់ខួរក្បាលបានល្អ។

លោកបន្តថា “អ្វីកាន់តែពិសេសពេលកុមារទទួលបានសារធាតុ DHA បានច្រើនរហូតដល់អាយុ៦ឆ្នាំ ធ្វើឲ្យពួកគាត់រៀនសូត្របានចេះ ចាំលឿន ពិសេសពេលពួកគាត់ចាស់ទៅ ក៏មិនមានភាពរង្វេងផងដែរ”។ លោកបន្តថា “នៅកម្ពុជាមានផលិតផលទឹកដោះគោ ដែលមានសារធាតុ DHA ផងដែរ ប៉ុន្តែគេលក់តម្លៃថ្លៃ តែសារធាតុ DHA នៅមានកម្រិត បើធៀបនឹងផលិតផ​លរបស់យើង”។

ផលិតផលទឹកដោះគោម្សៅ Balactan បាននិងកំពុងចរាចរណ៍លើទីផ្សារយ៉ាងទូលំទូលាយនៅកម្ពុជា និងកំពុងទទួលបានការគាំទ្រច្រើនពីសំណាក់មាតា បិតា អាណាព្យា​បាលកុមារនៅទូទាំងប្រទេស។

ជាមួយគ្នានេះ អគ្គនាយិការងក្រុមហ៊ុន ​​​MTSL Investment Co., Ltd លោកជំទាវថេង សុខលី បានមានប្រសាសន៍ថា ដោយសារមាននិស្ស័យស្រលាញ់កុមារ ទើបលោកជំទាវ បានសម្រេចសម្រេចជ្រើសរើសផលិ​ត​ផល ទឹកដោះគោម្សៅ ប្រកបដោយភាពសំរិតសំរាំង យកមកចែកចាយនៅកម្ពុជា ព្រោះចង់ឃើញទារក និងកុមារនៅកម្ពុជាមានសុខភាពល្អ និងបញ្ញាឆ្លាតវៃ ដូចកុមារនៅតាមបណ្តាប្រទេសជឿនលឿនមួយចំនួន។

លោកជំទាវបន្តថា “ហេតុនេះមុនសម្រេចចិត្តជ្រើសរើស យកផលិត​ផលណាមួយ សំរាប់ទារក និងបុត្រធីតា សូមពិចារណាទៅលើសារធាតុផ្សំ និងជាផលិតផលលំដាប់ ISO ដូចជា Balactan”។ លោកជំទាវបន្តថា “ការសំរិតសំរាំងផលិតផលមានគុណភាព សុវត្ថិភាព ជាការជ្រើសរើសក្តីស្រលាញ់សំរាប់បុត្រ ធីតារបស់ខ្លួន ដែលនាងខ្ញុំផ្ទាល់ក៏បានជ្រើសរើស Balactan សំរាប់កូនរបស់ខ្ញុំផងដែរ”៕

ដោយៈ សុខុម

អន្តរជាតិ: អង្គការសហប្រជាជាតិ (UN) បានព្យាករថា ចំនួនប្រជាជនសរុបទូទាំងពិភពលោក នឹងកើនដល់៨ពាន់លាននាក់ នៅត្រឹមថ្ងៃទី១៥ ខែវិច្ឆិកា ចុងឆ្នាំ២០២២ ដោយមហាយក្សឥណ្ឌា នឹងជែងឈ្នះមហាយក្សចិន ក្លាយជាប្រទេសដែលមានប្រជាជនច្រើនជាងគេ នៅលើពិភពលោកនៅឆ្នាំ២០២៣។

អង្គការសហប្រជាជាតិ បានធ្វើការកត់សម្គាល់កាលពីថ្ងៃច័ន្ទ ទី១១ ខែកក្កដា ថា ទម្រាំតែចំនួនប្រជាជនទូទាំងពិភពលោក កើនឡើងដល់១ពាន់លាននាក់ គឺត្រូវការពេលរហូតដល់ទៅរាប់សែនឆ្នាំឯណោះ ប៉ុន្តែចំនួនប្រជាជនបានកើនឡើង រហូតដល់៧ពាន់លាននាក់ ក្នុងរយៈពេលត្រឹមតែ២០០ឆ្នាំចុងក្រោយនេះ ពោលគឺគិតមកទល់នឹងឆ្នាំ២០២១។

ទោះជាយ៉ាងណា ផ្អែកតាមរបាយការណ៍ព្យាករណ៍៍របស់នាយកដ្ឋានកិច្ចការសេដ្ឋកិច្ច និងសង្គមកិច្ច (Department of Economic and Social Affairs) នៃអង្គការសហប្រជាជាតិបង្ហាញថា ចំនួនប្រជាជនទូទាំងពិភពលោក កំពុងកើនឡើងក្នុងល្បឿនយឺតបំផុត ចាប់តាំងពីឆ្នាំ១៩៥០ មក។

អង្គការសហប្រជាជាតិនិយាយថា “កំណើនយ៉ាងខ្លាំងនេះ ភាគច្រើនត្រូវបានជំរុញដោយកំណើនចំនួនមនុស្ស ដែលនៅរស់រហូតដល់វ័យបន្តពូជ អមដោយការប្រែប្រួលខ្លាំងនូវអត្រាមានកូន កំណើននគរូបនីយកម្ម និងការពន្លឿនការធ្វើចំណាកស្រុក។ និន្នាការទាំងនេះ នឹងមានឥទ្ធិពលខ្លាំងមកលើមនុស្សជំនាន់ក្រោយៗ”។

របាយការណ៍នេះព្យាករថា ចំនួនប្រជាជនទូទាំងពិភពលោក នឹងកើនឡើងដល់៨,៥ពាន់លាននាក់នៅឆ្នាំ២០៣០ និង៩,៧ពាន់លាននៅឆ្នាំ២០៥០ ហើយនឹងកើនដល់ប្រមាណ១០,៤ពាន់លាននាក់ នៅទសវត្សរ៍ឆ្នាំ២០៨០។

យោងតាមសារព័ត៌មាន The Indian Express ចុះផ្សាយកាលពីថ្ងៃអង្គារ ទី១២ ខែកក្កដា ឱ្យដឹងថា ប្រជាជនសរុបនៃប្រទេសចិន មានចំនួន១.៤២៤លាននាក់ ចំណែកឯប្រទេសឥណ្ឌា មានប្រជាជនចំនួន១.៤១២លាននាក់ ពោលគឺលើសខ្វះគ្នាតែបន្តិចប៉ុណ្ណោះ៕ Aljazeera៕

ដោយៈជេស៊ីកា

កំពង់ស្ពឺ/ពោធិសាត់ៈ ផ្លួវជាតិសំខាន់ៗចំនួន២ គឺផ្លូវជាតិលេខ៤ និង​ផ្លូវជាតិលេខ៥៥ ត្រូវបានផ្អាកឲ្យធ្វើដំណើរបណ្តោះអាសន្ន ដោយសារគ្រោះថ្នាក់ធម្មជាតិ។

យោងតាមសេចក្តីជូនដំណឹងរបស់រដ្ឋបាលខេត្តកំពង់ស្ពឺ នៅថ្ងៃទី១២ ខែកក្កដា ឆ្នាំ២០២២នេះ បានចេញសេចក្តីជូនដំណឹង ពីការបញ្ចៀសចរាចរណ៍យានយន្តគ្រប់ប្រភេទ ជាបណ្ដោះអាសន្នលើដងផ្លូវជាតិលេខ៤ ត្រង់ចំណុចគីឡូម៉ែត្រលេខ១១៦-១១៧ ដោយសភាពការណ៍អាកាសធាតុមានការប្រែប្រួល ធ្វើឱ្យមានភ្លៀងធ្លាក់ជាបន្តបន្ទាប់ ក្នុងតំបន់មួយចំនួនក្នុងភូមិសាស្ត្រខេត្តកំពង់ស្ពឺ។

សេចក្តីជូនដំណឹងដដែលបានបន្តថា រដ្ឋបាលខេត្តកំពង់ស្ពឺ បានឱ្យដឹងថា ដើម្បីរក្សាបាននូវសុវត្ថិភាព និងសណ្តាប់ធ្នាប់សាធារណៈ ពិសេសបញ្ចៀសបាននូវការកកស្ទះចរាចរណ៍ សូមប្រជាពលរដ្ឋ និងសាធារណៈជនដែលជាម្ចាស់រថយន្តដឹកទំនិញគ្រប់ប្រភេទ និងម្ចាស់រថយន្តដឹកអ្នកដំណើរដែលធ្វើចរាចរណ៍ចេញ-ចូល ឆ្លងកាត់ត្រង់ចំណុចខាងលើ សូមបញ្ចៀសចរាចរណ៍តាមផ្លូវជាតិលេខ៣ វិញ។

ជាមួយគ្នានេះ បើយោងតាមសេចក្តីរាយការណ៍ពីពីភ្នាក់ងារព័ត៌មាន Fresh News ប្រចាំខេត្តពោធិ៍សាត់ បានបញ្ជាក់ថា ដោយសារតែមានភ្លៀងធ្លាក់ជាច្រើនថ្ងៃជាប់ៗគ្នា ធ្វើឱ្យដីនៅភ្នំធ្លាក់មកបិទផ្លូវជាតិលេខ៥៥ នៅត្រង់ចន្លោះគីឡូម៉ែត្រ១៤២-១៤៣ ដែលរាំងស្ទះក្នុងការធ្វើចរាចរណ៍របស់យានយន្តគ្រប់ប្រភេទ។

ជុំវិញការបាក់ដីរាំងផ្លូវជាតិនេះដែរ ប្រជាពលរដ្ឋជាអ្នកដំណើរបានស្នើសុំឱ្យអាជ្ញាធរ មេត្តាចុះជួយសម្រួលយកគ្រឿងចាក់កាយដី ដែលបានធ្លាក់ចុះមករាំងផ្លូវជាតិត្រង់ចន្លោះគីឡូម៉ែត្រ ១៤២-១៤៣ នេះ ដើម្បីឱ្យពួកគាត់អាចធ្វើដំណើរទៅវិញទៅមកបានជាដើម៕