ដោយៈ លាងហួរ

ម៉ាឡេស៊ីៈ ព្រះមហាក្សត្រ Sultan Abdullah Sultan Ahmad Shah របស់ម៉ាឡេស៊ីបានជួបជាមួយលោក វ៉ាងយី ទីប្រឹក្សារដ្ឋ និងជារដ្ឋមន្ត្រីការបរទេសចិន ដែលកំពុងបំពេញទស្សនកិច្ចនៅទីនេះ បានយល់ព្រមពន្លឿនកិច្ចសហប្រតិបត្តិការជាក់ស្តែង និងជំរុញគម្រោងខ្សែក្រវាត់ និងផ្លូវសំខាន់ៗ។

ព្រះអង្គ Abdullah បានមានបន្ទូលថា ប្រទេសចិនមិនត្រឹមតែជាដៃគូពាណិជ្ជកម្មដ៏ធំបំផុត របស់ម៉ាឡេស៊ីប៉ុណ្ណោះទេ ប៉ុន្តែក៏ជាដៃគូយុទ្ធសាស្ត្រដ៏សំខាន់របស់ខ្លួនផងដែរ។

ភាគីទាំងពីរបានរួមគ្នា សម្រេចបានសមិទ្ធិផលគួរឱ្យកត់សម្គាល់ ក្នុងការប្រយុទ្ធប្រឆាំង នឹងការរាតត្បាតនៃជំងឺកូវីដ១៩ និងវឌ្ឍនភាពដ៏អស្ចារ្យលើគម្រោងសួនឧស្សាហកម្មនៃប្រទេសទាំងពីរ ដែលបានបញ្ចូលកម្លាំងជំរុញខ្លាំង ដល់ការអភិវឌ្ឍសេដ្ឋកិច្ចរបស់ប្រទេសម៉ាឡេស៊ី។

ប្រមុខរដ្ឋកំពូលរបស់ម៉ាឡេស៊ី ស្វាគមន៍ការវិនិយោគរបស់ចិន កាន់តែច្រើន ហើយបានសម្តែងឆន្ទៈរួមគ្នា កសាងគម្រោងធំៗនៃខ្សែក្រវាត់ និងផ្លូវជាមួយប្រទេសចិន ដើម្បីធ្វើជាឧទាហរណ៍នៃការតភ្ជាប់គ្នាទៅវិញទៅមក។

លោកវ៉ាងយី បានលើកឡើងថា ប្រទេសចិនគឺជាដៃគូពាណិជ្ជកម្មដ៏ធំបំផុតរបស់ម៉ាឡេស៊ី អស់រយៈពេល១៣ឆ្នាំជាប់ៗគ្នា ហើយកិច្ចសហប្រតិបត្តិការគ្រប់ជ្រុងជ្រោយ រវាងប្រទេសទាំងពីរទទួលបានផ្លែផ្កា ជំរុញការអភិវឌ្ឍ និងស្តារឡើងវិញសេដ្ឋកិច្ចរបស់ប្រទេសទាំងពីរ ព្រមទាំងផ្តល់អត្ថប្រយោជន៍យ៉ាងច្រើនដល់ប្រជាជនទាំងពីរ។

ប្រទេសចិន មានឆន្ទៈធ្វើការជាមួយម៉ាឡេស៊ី ដើម្បីពង្រឹងយុទ្ធសាស្ត្រអភិវឌ្ឍន៍ កសាងខ្សែក្រវាត់ និងផ្លូវប្រកបដោយគុណភាពខ្ពស់ ពង្រីក និងពង្រឹងគម្រោងសំខាន់ៗ បង្កើតតំបន់សាកល្បង សម្រាប់កិច្ចសហប្រតិបត្តិការសមត្ថភាពផលិតកម្ម និងតំបន់ត្រួសត្រាយផ្លូវសម្រាប់ការច្នៃប្រឌិត។

លោកវ៉ាងយី បានបន្ថែមថា ប្រទេសចិនបានត្រៀមខ្លួនរួចជាស្រេច ក្នុងការសហការជាមួយម៉ាឡេស៊ី ដើម្បីប្រកាន់ខ្ជាប់នូវភាពបើកចំហក្នុងតំបន់ ការពារសន្តិភាព ស្ថិរភាព និងការអភិវឌ្ឍ ដែលពិបាកទទួលបាននៅក្នុងតំបន់ និងរួមចំណែកកាន់តែច្រើនក្នុងការអភិវឌ្ឍ និងវឌ្ឍនភាពរបស់មនុស្សជាតិ៕

ដោយៈ ជេស៊ីកា

ភ្នំពេញៈ ស្របពេលចិនកំពុងបង្កើនឥទ្ឋិពល សហរដ្ឋអអាមេរិកបាននិងកំពុងព្យាយាមលូកដៃកាន់តែជ្រៅ មកក្នុងតំបន់អាស៊ី ខណៈតំបន់ធ្លាប់ដេកលក់នេះ បានចាប់ផ្តើមងើបឡើងវិញដ៏គួរឲ្យចាប់អារម្មណ៍។

ឆ្លើយតបបឹងបរិការណ៍នេះ បុគ្គលល្បីៗរបស់កម្ពុជាចំនួន៤រូប នឹងជជែកដេញដោល ក្នុងកិច្ចពិភាក្សាតុមូលស្តីពី “អាស៊ាននៅក្នុងចន្លោះចិន និងអាមេរិក ក្នុងបរិបទថ្មី” ដែលរៀបចំដោយ រាជបណ្ឌិត្យសភាកម្ពុជា នៅព្រឹកថ្ងៃទី១៤ ខែកក្កដា ឆ្នាំ២០២២ នេះ។

វាគ្មិននៃវេទិកានេះ មានដូចជា លោកបណ្ឌិតសភាចារ្យ សុខ ទូច ប្រធានរាជបណ្ឌិត្យសភាកម្ពុជា លោកបណ្ឌិតគិន ភា ប្រធានវិទ្យាស្ថានទំនាក់ទំនងអន្តរជាតិ នៃកម្ពុជា នៃរាជបណ្ឌិត្យសភាកម្ពុជា លោកបណ្ឌិត មាស នី អ្នកវិភាគនិងតាមដានការអភិវឌ្ឍសង្គម និងលោក ពុយ គា អ្នកសារព័ត៌មានកម្ពុជា ដែលស្ថិតនៅក្រោមការសម្របសម្រួល ដោយលោកបណ្ឌិត យង់ ពៅ អគ្គលេខាធិការនៃរាជបណ្ឌិត្យសភាកម្ពុជា ផងដែរ។

លោកបណ្ឌិត គិន ភា បានប្រាប់បណ្តាញព័ត៌មាន Fresh News ថា បច្ចុប្បន្ននេះ សភាពការណ៍ពិភពលោក​កំពុងមានការវិវត្ថផ្លាស់ប្ដូរយ៉ាងជ្រាលជ្រៅ ឆាប់រហ័សប្រកបដោយ ភាពស្មុគស្មាញ ពិបាកប៉ាន់ស្មាន និងពោរពេញទៅដោយគ្រោះថ្នាក់។ ពិភពលោក​​ បានដើរមកសករាជនៃភូមិសា​ស្រ្តនយោបាយថ្មីមួយទៀត ដែលកកំពុងស្ថិតក្នុងដំណាក់កាលប្រែប្រួលដ៏លំបាកឆ្ពោះទៅរកប្រព័ន្ធ ពហុប៉ូលដែលតួអង្គថ្មី/ចាស់ កំពុងប្រកួតប្រជែងដណ្ដើមតួនាទីគ្នាក្នុងការសម្រេចលើកិច្ចការពិភពលោក និងតំបន់។

វាគ្មិនជំនាញ ដែលនឹងចូលខ្លួនជជែកដេញដោលរូបនេះ បានបញ្ជាក់ថា អាស៊ីអាគ្នេយ៍ គឺជាតំបន់មួយក្នុងចំណោមតំបន់ ដែលមានការរីកលូតលាស់លឿនបំផុត និងមានភាពស្វាហាប់បំផុតនៅក្នុងពិភពលោក។ ប៉ុន្តែក្តីបារម្ភកំពុងកើនឡើង ទាក់ទងនឹងការប្រកួតប្រជែង ភូមិសាស្ត្រនយោបាយដែលកំពុងកើតឡើងរវាងសហរដ្ឋអាមេរិក និងចិន។ អាស៊ាន បានក្លាយជាមជ្ឈមណ្ឌលនៃការប្រកួតប្រជែងដ៏ក្តៅគគុកនេះ។

បន្ថែមពីនេះ លោកបណ្ឌិតគិន ភា បានបន្តថា ចំពោះមុខការពង្រីកឥទ្ធិពល និងការប្រកួតប្រជែងអំណាចរវាងមហាយក្សចិន និងសហរដ្ឋអាមេរិក ជាញឹកញយ កម្ពុជាត្រូវបានគេចោទប្រកាន់ថា កំពុងស្ថិតនៅចំណុចកណ្តាលនៃសង្រ្គាមត្រជាក់រវាងមហាយក្សទាំងពីរទៀតផង។

លោកបានគូសបញ្ជាក់ថា ក្នុងន័យនេះ ដើម្បីតាមឱ្យទាន់ការវិវត្តនៃស្ថានការណ៍នយោបាយពិភពលោក និងតំបន់ និងដើរឱ្យទាន់យុទ្ធសាស្ត្រមហាអំណាច ទើបយើងរៀបចំកិច្ចពិភាក្សាតុមូលនេះឡើង។ ប្រជាជនកម្ពុជា ជាពិសេសយុវជនរបស់យើង មិនគួរជាអនក្ខរជននៃភូមិសាស្ត្រនយោបា​យ និងយុទ្ធសាស្ត្រមហាអំណាចនោះទេ ហើយប្រទេសយើងក៏មិនគួរស្លាប់ក្រឡាជាមួយតែមហាអំណាចណាមួយនោះដែរ។

លោកបណ្ឌិត ក៏បានចោទជាសំណួរថា យើងទាំងអស់គ្នាត្រូវយល់ច្បាស់ពីសភាពការណ៍ពិភពលោក ពីភូមិសាស្ត្រនយោបាយ និងយុទ្ធសាស្ត្ររបស់ពួកមហាអំណាច ថាពួកគេកំពុងគិតអ្វី? គេទៅណា? គេកំពុងធ្វើអ្វី? គេចង់បានអ្វី? គេប្រើយុទ្ធសាស្ត្រនិងយុទ្ធវិធីអ្វី? ហើយប្រទេសតូចៗគួររៀបចំខ្លួនបែបណា?។

លោកបណ្ឌិត បានលើកឡើងថា យើងទាំងអស់គ្នាជាជនជាតិខ្មែរ ត្រូវមានស្មារតីភ្ញាក់រលឹក កុំឱ្យរាំខុសចង្វាក់ លោតខុសក្រឡា តាមខ្សែញាក់របស់មហាអំណាច។ ប្រទេសយើងធ្លាប់ជាជនរងគ្រោះ និងធ្លាប់ទទួលរងសោកនាដកម្មរាប់មិនអស់ ដោយសារការរត់ប្រណាំងមនោគមវិជ្ជារបស់មហាអំណាច និងដោយសារតែការរាំខុសចង្វាក់ ការលោតខុសក្រឡារបស់អ្នកនយោបាយពីអតីតកាល។ យើងមិនគួរដើរជាន់ដានប្រវត្តិសាស្ត្រទៀតទេ៕

ដោយ៖ សុខុម

ហាណូយ: ក្រុមហ៊ុនវៀតណាម VinFast បានចុះកិច្ចព្រមព្រៀងជាក្របខណ្ឌជាមួយក្រុមហ៊ុន Credit Suisse (Singapore) Ltd និងក្រុមហ៊ុន Citigroup Global Markets Inc. ដើម្បីប្រមូលទុនឱ្យបានយ៉ាងតិច៤ពាន់លានដុល្លារ ដើម្បីសាងសង់រោងចក្រផលិតរថយន្តអគ្គិសនីនៅរដ្ឋ North Carolina សហរដ្ឋអាមេរិក។

ការប្រកាសនេះធ្វើឡើងបន្ទាប់ពីក្រុមហ៊ុនមេរបស់ខ្លួន Vingroup JSC កាលពីខែឧសភា និយាយថា ការប្រមូលទុនតាមរយៈការបោះផ្សាយមូលបត្រជាសាធារណៈលើកដំបូង (IPO) សម្រាប់ក្រុមហ៊ុន VinFast អាចនឹងត្រូវពន្យារពេលរហូតដល់ឆ្នាំក្រោយដោយសារភាពទីផ្សារស្ថិតក្នុងស្ថានភាពមិនប្រាកដប្រជា។  នេះបើយោងតាមសារព័ត៌មាន CNA ចុះផ្សាយនៅថ្ងៃពុធ ទី១៣ ខែកក្កដា នេះ។

ទោះជាយ៉ាងណា ក្រុមហ៊ុននេះមិនបានបញ្ជាក់ឡើយថា តើបំណុលប្រភេទណាដែលខ្លួននឹងប្រមូលមកធ្វើជាដើមទុន។ ចំណែកឯក្រុមហ៊ុន Credit Suisse និងក្រុមហ៊ុន Citi ក៏មិនបានឆ្លើយតបសំណើសុំការឆ្លើយបំភ្លឺជុំវិញបញ្ហានេះដែរ។

ក្រុមហ៊ុន VinFast ដែលបានចាប់ផ្តើមប្រតិបត្តិការក្នុងឆ្នាំ២០១៩ កំពុងប្រថុយមួយក្ដារយ៉ាងធំនៅលើទីផ្សារសហរដ្ឋអាមេរិក ដោយសង្ឃឹមថាខ្លួននឹងអាចប្រកួតប្រជែងជាមួយបណ្ដាក្រុមហ៊ុនផលិតរថយន្តជើងចាស់ និងក្រុមហ៊ុន Startup ជាមួយនឹងរថយន្តប្រភេទ SUV ប្រើអគ្គិសនីសុទ្ធសាធ២ម៉ូឌែលរបស់ខ្លួន ព្រមទាំងម៉ូឌែលជួលអាគុយដែលនឹងកាត់បន្ថយតម្លៃទិញ។

ក្រុមហ៊ុននេះនិយាយថា រោងចក្រនៅរដ្ឋ North Carolina ដែលគ្របដណ្តប់លើផ្ទៃដី៨០០ហិកតា នឹងផលិតរថយន្តអគ្គិសនីបានចំនួន១៥០.០០០គ្រឿងក្នុងមួយឆ្នាំៗ។

ក្រុមហ៊ុន VinFast បានសន្យាថានឹងបង្កើតការងារចំនួន៧.៥០០កន្លែងនៅរោងចក្រនេះ ហើយបាននិយាយថា ខ្លួនមានគោលបំណងចាប់ផ្តើមផលិតកម្មនៅឆ្នាំ២០២៤៕

ដោយ៖ វឌ្ឍនៈ

ភ្នំពេញ ៖ កំណើនប្រជាពលរដ្ឋរស់នៅ តំបន់ជាយក្រុងនៃរាជធានីភ្នំពេញ បានចោទជាបញ្ហាសម្រាប់ការផ្គត់ផ្គង់ទឹកស្អាត ហើយប៉ុន្មានកន្លងមកនេះ រដ្ឋាករទឹកស្វយ័តក្រុងភ្នំពេញក៏សារភាពថាខ្លួនមិនមានសមត្ថភាពគ្រប់គ្រាន់ក្នុងផ្គត់ផ្គង់ទឹកឱ្យគ្រប់គ្រាន់ទៅតាមកំណើននៃប្រជាសាស្ត្រនៅភ្នំពេញ។

ដើម្បីកាត់បន្ថយនូវបញ្ហានេះ រដ្ឋបាលរាជធានីភ្នំពេញ បានសង់ស្ថានីយ៍ផលិតទឹកស្អាតមួយទៀតនៅជាយក្រុង ហើយរំពឹងថាស្ថានីយ៍ទឹកស្អាតនេះនឹងមានសមត្ថភាពផលិតទឹកបាន៥ពាន់ម៉ែត្រគូបក្នុងមួយថ្ងៃ។

រោងចក្រផលិតទឹកស្អាតនេះនឹងសាងសង់លើដីសណ្តស្ទឹងព្រែកត្នោត ស្ថិតក្នុងភូមិបឹងធំ២ ភូមិបឹងធំ៣ សង្កាត់បឹងធំ ខណ្ឌកំបូល ហើយក៏អាចផ្គត់ផ្គង់ទឹកដល់ពលរដ្ឋ ដែលមានតម្រូវការ នៅជុំវិញតំបន់នោះ ស្របនឹងកំណើនការអភិវឌ្ឍបុរីលំនៅឋាននៅតំបន់នោះ ក៏កើនឡើងជារៀងរាល់ឆ្នាំផងដែរ។

លោក ឃួង ស្រេង អភិបាលរាជធានីភ្នំពេញ នៅព្រឹកថ្ងៃទី១៣ ខែកក្កដា ឆ្នាំ២០២២នេះ ខណៈចុះពិនិត្យមើលស្ថានភាពទឹក សណ្ដស្ទឹងព្រែកត្នោត បានដឹកនាំមន្ទីរអង្គភាពជំនាញពាក់ព័ន្ធ  ចុះទៅពិនិត្យគម្រោងទីតាំងសាងសង់ស្ថានីយទឹកស្អាតរបស់រដ្ឋាករទឹកស្វយ័តក្រុងភ្នំពេញនេះផងដែរ។

មន្ត្រីរដ្ឋាករទឹកស្វយ័តក្រុងភ្នំពេញ បានឱ្យដឹងថា គម្រោងសាងសង់ស្ថានីយទឹកស្អាត របស់រដ្ឋាករទឹក ស្វយ័តក្រុងភ្នំពេញខាងលើនេះ មានឈ្មោះថា រោងចក្រផលិតទឹកស្អាតបឹងធំ មានសមត្ថភាពផលិតទឹកស្អាតបាន៥០០០ម៉ែត្រគីបក្នុងមួយថ្ងៃ ដោយផ្តើមសាងសង់នៅក្នុងឆ្នាំ២០២២ ដល់២០២៤ លើផ្ទៃដី៣០ហិចតា។

រោងចក្រផលិតទឹកស្អាតនេះ អាចផ្គត់ផ្គង់ទឹកស្អាតឱ្យប្រជាពលរដ្ឋបាននៅភាគខាងលិចឈៀងខាង ត្បូងរាជធានីភ្នំពេញ នៅស្រុកកណ្ដាលស្ទឹង ខេត្តកណ្តាល និងមួយផ្នែកទៀតនៅអាកាសយានដ្ឋានអន្តរជាតិ ភ្នំពេញថ្មី។

រោងចក្រផលិតទឹកស្អាតបឹងធំ ជាជំហានទី១ នៅឆ្នាំ២០២៣នឹងអាចអោយបងប្អូនប្រជាពលរដ្ឋ ប្រើប្រាស់ទឹកស្អាតនេះបាន នៅក្នុង៣សង្កាត់នៃខណ្ឌកំបូល ហើយនឹងបន្តពង្រឹកវិសាលភាពឱ្យកាន់តែធំបន្ថែមទៀត សំដៅធ្វើយ៉ាងណាឱ្យប្រជាពលរដ្ឋរស់នៅស្អាតផឹកទឹកស្អាតមានអនាម័យល្អ ទៅតាមគោលនយោបាយរបស់សម្តេចតេជោ ហ៊ុន សែន នាយករដ្ឋមន្ត្រីកម្ពុជា។

មន្ត្រីជាន់ខ្ពស់ នៃរដ្ឋាករទឹកស្វយ័តក្រុងភ្នំពេញ បានលើកឡើងថា កំណើននៃសំណង់អគារខុនដូ បុរីនៅភ្នំពេញ និងខេត្តកណ្ដាល បានធ្វើឱ្យតម្រូវការប្រើប្រាស់ទឹកស្អាតកើនឡើង ទើបធ្វើឱ្យប្រជាពលរដ្ឋនៅតំបន់ជាយក្រុង មិនមានទឹកប្រើប្រាស់គ្រប់គ្រាន់ ហើយនៅពេលស្ថានីយ៍ផលិតទឹកស្អាតនៅបាក់ខែងសង់រួច រំពឹងថា ពលរដ្ឋនឹងមានប្រើប្រាស់គ្រប់គ្រាន់កាន់តែច្រើន ឬលែងខ្វះខាតទឹកស្អាតប្រើប្រាស់ ដូចកាលពីប៉ុន្មានឆ្នាំមុនទៀតហើយ៕

ដោយៈ សុផារី

ភ្នំពេញៈ តម្លៃអចលនទ្រព្យលំនៅឋាននៅតាមបុរីនានា នៅក្នុងត្រីមា​សទី២ ឆ្នាំ២០២២នេះ មាននិន្នាការផ្ទុយពីត្រីមាសទី១ ឆ្នាំ២០២២ ដោយមានតែគម្រោងតម្លៃសមរម្យ និងតម្លៃខ្ពស់ត្រូវបានសម្ពោធ ខណៈតម្លៃនៃផ្ទះគ្រប់ប្រភេទបានធ្លាក់ចុះគួរឱ្យកត់សម្គាល់។

អ្នកនាង គឹម គិនកេសា ជាអ្នកស្រាវជ្រាវជាន់ខ្ពស់ផ្នែកអចលនទ្រព្យរបស់ក្រុមហ៊ុនCBRE Cambodia បានមានប្រសាសន៍ តាមរយៈបទបង្ហា ញនៅថ្ងៃទី៧ ខែកក្កដា ឆ្នាំ២០២២ថា គម្រោងបុរី ដែលត្រូវបានដាក់សម្ពោធ និងបញ្ជប់ការសាងសង់នៅក្នុងត្រីមាសទី២នេះ មានគម្រោងប្រភេ ទតម្លៃសមរម្យ និងលំនៅឋានប្រណីត ខណៈតម្លៃមានការធ្លាក់ចុះ សម្រាប់គ្រប់ប្រភេទផ្ទះគួរឱ្យកត់សម្គាល់។

អ្នកជំនាញរូបនេះឱ្យដឹងថា “គួរឱ្យកត់សម្គាល់ថា នៅក្នុងត្រីមាសនេះ មានគម្រោងសម្ភោធថ្មីចំនួន១០គម្រោង និងបញ្ចប់ការសាងសង់ចំនួន៣គម្រោង។ ក្នុងនោះគម្រោងសម្ពោធថ្មីទាំង១០ ជាគម្រោងតម្លៃមធ្យម និងលំនៅឋានប្រណីត ដែលមិនមានគម្រោងតម្លៃសមរម្យណាមួយ ត្រូវបានសម្ពោធឡើយ”។

អ្នកនាងបន្តថា យ៉ាងណាមិញ ចំនួនផ្ទះនៅក្នុងទីក្រុងភ្នំពេញប្រមាណជាង១៧០០ខ្នង ត្រូវបានសាងសង់រួចរាល់ ក្នុងត្រីមាសទី២ឆ្នាំនេះ ដែលស្មើនឹង៣៧% នៃចំនួនផ្ទះសរុបដែលបានគ្រោងទុក សម្រាប់ការផ្គត់ផ្គង់ឆ្នាំ២០២២។

អ្នកនាងបញ្ជាក់ថា “លទ្ធផលនេះបានបង្ហាញពីសញ្ញាផ្ទុយពីអ្វី ដែលយើងបានមើលឃើញកាលពីត្រីមាសមុន ដែលគម្រោងលំនៅឋានតម្លៃសមរម្យ បានពង្រីកខ្លួនសម្ពោធ និងដាក់ដំណើរការយ៉ាងច្រើនសន្ធឹកសន្ធាប់”។

យើងសង្គេតឃើញ នៅក្នុងឆមាសទី២ ឆ្នាំ២០២២នេះ តម្លៃផ្ទះមានការធ្លាក់ចុះគួរឱ្យកត់សម្គាល់ ចន្លោះពី១,៧ភាគរយ ដល់៤,៩ភាគរយ តាមប្រភេទផ្ទះបុរី។ ក្រោយពីមានការប្រកួតប្រជែងដ៏ខ្លាំងក្លា ក្នុងរយៈពេល៩ខែចុងក្រោយនេះ។

តាមរយៈរបាយការនៃការសិក្សាបានបង្ហាញថា ក្នុងត្រីមាសទី២នេះ តម្លៃផ្ទះល្វែងបានធ្លាក់ចុះ២,៧% ដែលតម្លៃជាមធ្យមក្នុងមួយម៉ែត្រក្រឡា ចន្លោះពី៥០០ ដល់១០០០ដុល្លារអាមេរិក តម្លៃផ្ទះវីឡាកូនកាត់បានធ្លាក់ចុះ២% តម្លៃចន្លោះពី៥០០ ដល់១០០០ដុល្លារអាមេរិក តម្លៃផ្ទះអាជីវកម្មបានធ្លាក់ចុះ១,៧% តម្លៃចន្លោះពី១០០០ ដល់១៥០០ដុល្លារអាមេរិក ផ្ទះវីឡាភ្លោះបានធ្លាក់ចុះច្រើនជាងគេរហូតដល់៤,៩% តម្លៃចន្លោះពី១០០០ ដល់១៥០០ដុល្លារអាមេរិក៕

ដោយ: លាងហួរ

ប្រទេសថៃ: ប្រទេសថៃកំពុងរៀបចំផែនការសាងសង់ ទីក្រុងឆ្លាតវៃក្នុងទំហំទឹកប្រាក់៣៧ពាន់លានដុល្លារ នៅក្នុងមជ្ឈមណ្ឌលឧស្សាហកម្មនៅជិតទីក្រុងបាងកក។

គម្រោងទីក្រុងឆ្លាតវៃនេះ ក៏ទទួលបានការសន្យាវិនិយោគរាប់ពាន់លានដុល្លាររួចហើយ ពីក្រុមហ៊ុនរថយន្ត រ៉ូបូត ថែទាំសុខភាព និងភស្តុភារទូទាំងពិភពលោក។

ផែនការមេដើម្បីសាងសង់ទីក្រុងឆ្លាតវៃ នៅក្នុងស្រុក Huai Yai នៃខេត្តChonburi ចម្ងាយប្រហែល១៦០គីឡូម៉ែត្រ ភាគអាគ្នេយ៍នៃទីក្រុងបាងកក ត្រូវបានអនុម័តដោយក្រុមប្រឹក្សា ដែលដឹកនាំដោយនាយករដ្ឋមន្ត្រី ប្រាយុទ្ធ ចាន់អូចាកាលពីថ្ងៃចន្ទ។

x

ក្រុមមន្ត្រីបាននិយាយថា ទីក្រុងថ្មីនេះមិនទាន់មានឈ្មោះនៅឡើយទេ តែទីក្រុងនឹងត្រូវលាតសន្ធឹងលើផ្ទៃដី២៣៤០ហិចតា និងត្រូវចំណាយថវិកាអស់១,៣៤ពាន់ពាន់លានបាតរយៈពេល១០ឆ្នាំខាងមុខ។

លោក Kanit Sangsubhan អគ្គលេខាធិការនៃច្រករបៀងសេដ្ឋកិច្ចខាងកើតបានប្រាប់អ្នកយកព័ត៌មានថា គម្រោងនេះ នឹងរួមមានមជ្ឈមណ្ឌលពាណិជ្ជកម្មចំនួន៥ ដើម្បីផ្តល់ឱ្យក្រុមហ៊ុនជួល។

ទីក្រុងថ្មីនេះ នឹងរួមបញ្ចូលមជ្ឈមណ្ឌល សម្រាប់បង្កើតទីស្នាក់ការកណ្តាលរបស់ក្រុមហ៊ុនក្នុងតំបន់ មជ្ឈមណ្ឌលហិរញ្ញវត្ថុ និងតំបន់សុខាភិបាលច្បាស់លាស់ ការស្រាវជ្រាវនិងការអភិវឌ្ឍន៍អន្តរជាតិ និងឧស្សាហកម្មនាពេលអនាគតដូចជាថាមពលស្អាត និងបច្ចេកវិទ្យា 5G ជាដើម។

ចំណែកលំនៅដ្ឋានក្នុងទីក្រុងថ្មីនឹងត្រូវបានរចនាឡើង ដែលអាចឲ្យ មនុ​ស្សរស់នៅបាន៣៥ម៉ីននាក់នៅឆ្នាំ២០៣២ និងបង្កើតការងារផ្ទាល់ចំនួន២០ម៉ឺនកន្លែង​។

លោក Kanit បាននិយាយថាទីក្រុងថ្មី នឹងអាចរស់នៅបានសម្រាប់មនុស្សជំនាន់ថ្មី ក៏ដូចជាដំណើរការជាមជ្ឈមណ្ឌលពាណិជ្ជកម្ម។

លោកបានបន្ថែមថា “យើងបង្កើតគម្រោងថ្មីនេះ ដើម្បីទូទាត់ប្រាក់ចំណូលដែលបាត់បង់ ក្នុងអំឡុងពេលជំងឺរាតត្បាតកូវីដ១៩”៕