ដោយៈ គង់ សូរិយា

       ភ្នំពេញៈ ក្រុមមន្រ្តីជំនាញបានរៀបចំសិក្ខាសាលា លើការរៀបចំគម្រោងផែនការ សាងសង់ហេដ្ឋារចនាសម្ព័ន្ធ និងសំណង់អាគារនៅច្រកទ្វារព្រំដែនអន្តរជាតិត្រពាំងស្រែ ព្រំដែនកម្ពុជា-វៀតណាម។

សិក្ខាសាលានេះ ដឹកនាំដោយលោកឈៀង ពេជ្រ អគ្គនាយកនៃអគ្គនាយកដ្ឋានភ័ស្តុភាកម្ម ក្រសួងសាធារណការ និងដឹកជញ្ជូន និងមានការចូលរួមពីលោក Yoo Han-Jun ទីប្រឹក្សាជាន់ខ្ពស់តំណាងក្រសួងដែនដី ហេដ្ឋារចនាសម្ព័ន្ធ និងដឹកជញ្ជូន នៃសាធារណរដ្ឋកូរ៉េ និងមន្ត្រីជំនាញពាក់ព័ន្ធក្នុងគម្រោងប្រមាណ៥០រូប។

សិក្ខាសាលានេះរៀបចំឡើង ក្នុងគោលបំណងបង្ហាញពីការរៀបចំគម្រោងផែនការ សាងសង់ហេដ្ឋារចនាសម្ព័ន្ធ និងសំណង់អាគារនៅច្រកទ្វារព្រំដែនអន្តរជាតិត្រពាំងស្រែ (Establishment of Comprehensive Plan of Cross-Border Checkpoint Facility at International Border Trapeang Srae, Cambodia) ឋិតក្នុងភូមិសាស្ត្រ ខេត្តក្រចេះ ព្រំដែនកម្ពុជា-វៀតណាម ក្នុងក្របខណ្ឌជំនួយអភិវឌ្ឍន៍ផ្លូវការ របស់សាធា​រណរដ្ឋកូរ៉េ (ODA) ដែលត្រូវចំណាយពេលវេលា សម្រាប់សិក្សាលទ្ធភាពប្រមាណ២៤ខែ ចាប់ពីខែសីហា ឆ្នាំ២០២២ ដល់ខែមិថុនា ឆ្នាំ២០២៤។

គម្រោងនេះ ផ្តោតលើការស្ថាបនាហេដ្ឋារចនាសម្ព័ន្ធ សំណង់បរិក្ខារ បម្រើឱ្យច្រកទ្វារព្រំដែនអន្តរជាតិ ត្រពាំងស្រែ ដែលក្នុងនោះរួមមាន ការិ​យាល័យអន្តោប្រវេសន៍ ការិយាល័យគ្រប់គ្រងច្រក អគារសម្រាប់ភ្ញៀវទេស​ចរណ៍ កន្លែងផលិតថាមពល អន្តេវាសិកដ្ឋាន និងទីធ្លាសម្រាប់កុងតឺន័រជាដើម។

លោកឈៀង ពេជ្រ បានថ្លែងអំណរគុណយ៉ាងជ្រាលជ្រៅ និងកោតសរសើរ ចំពោះរដ្ឋាភិបាលនៃសាធារណរដ្ឋកូរ៉េ តាមរយៈក្រសួងដែនដី ហេដ្ឋារចនាសម្ព័ន្ធ និង ដឹកជញ្ជូននៃសាធារណរដ្ឋកូរ៉េ ដែលបានប្តេជ្ញាចិត្តគាំទ្រក្នុងការអនុវត្តគម្រោងនេះ ដើម្បីរួមចំណែកលើ ការអភិវឌ្ឍន៍សង្គមកម្ពុជាឱ្យកាន់តែមានការរីកចម្រើនថែមទៀត។

ភាគីកម្ពុជា និងកូរ៉េ បានបង្ហាញជំនឿយ៉ាងមុតមាំថា គម្រោងនេះនឹងរួមចំណែកបង្កើនទំហំពាណិជ្ជកម្ម តាមព្រំដែនកម្ពុជា-វៀតណាមជាពិសេសច្រកទ្វារអន្តរជាតិត្រពាំងស្រែ ធ្វើឱ្យប្រសើរឡើងដល់ការប្រកួតប្រជែងតម្លៃនៃការដឹកជញ្ជូន ជំរុញការធ្វើទំនើបកម្មផ្នែកភ័ស្តុភាកម្ម ឱ្យសម្រេចបាននូវគោលដៅអភិវឌ្ឍន៍សេដ្ឋកិច្ចកម្ពុជា និងប្រែក្លាយជាមជ្ឈមណ្ឌលដឹកជញ្ជូនក្នុងតំបន់ផងដែរ៕

  ដោយៈ គង់ សូរិយា

       ភ្នំពេញៈ រដ្ឋាភិបាលតាមរយៈក្រសួងរៀបចំដែនដី នគរូបនីយកម្ម និងសំណង់ដែលជាសេនាធិការ បានអនុម័តទុនវិនិយោគក្នុងវិស័យសំណង់ទំហំទឹកប្រាក់១៦៦២លានដុល្លារអាមេរិក ក្នុងរយៈពេល៨ខែឆ្នាំនេះ។

ក្នុងចំណោមទុនវិនិយោគទាំងនោះ គឺរដ្ឋាភិបាលបានចេញលិខិតអនុញ្ញាតសាងសង់ ដល់គម្រោងសរុបចំនួន២.៨១១​ ធ្លាក់ចុះ៩០គម្រោង ធៀបនឹងរយៈពេលដូចគ្នាកាលពីឆ្នាំមុន។

យោងតាមរបាយការណ៍ និន្នាការសង្គម-សេដ្ឋកិច្ចចេញផ្សាយដោយក្រសួងសេដ្ឋកិច្ច និងហិរញ្ញវត្ថុបង្ហាញឲ្យដឹងថា តម្លៃគម្រោងសាងសង់សរុប ១.៦៦២ លានដុល្លារ បានធ្លាក់ចុះ៥៦,៧ភាគរយ ធៀបនឹងរយៈពេលដូចគ្នាកាលពីឆ្នាំ២០២១។​

របាយការណ៍ដដែលបានឲ្យដឹងថា ក្នុងចំណោមគំរោងទាំងនោះគម្រោងសាងសង់ប្រភេទសំណង់លំនៅដ្ឋាន រួមចំណែកធំជាងគេក្នុងចំណោមគម្រោងសាងសង់ ដែលទទួលបានការអនុញ្ញាត ពីក្រសួងរៀបចំដែនដី នគរូបនីយកម្ម​ និងសំណង់។

ប្រភេទសំណង់លំនៅដ្ឋាន មាន២.៥២១គម្រោង ស្មើនឹង៨៩,៧ភាគរយ នៃសំណើសុំសាងសង់សរុប បានធ្លាក់ចុះ៩គម្រោង ធៀបនឹងរយៈពេលដូចគ្នាឆ្នាំមុន។

យោងតាមរបាយការណ៍ប្រចាំឆ្នាំ២០២១ របស់ក្រសួងរៀបចំដែនដី នគរូបនីយកម្ម និងសំណង់ ដែលចេញផ្សាយក្នុងខែមករា កម្ពុជា បានអនុម័តគម្រោងចំនួន៤.៣០៣គម្រោង ក្នុងឆ្នាំ២០២១ និងមានតម្លៃជាង៥,៣ ពាន់លានដុល្លារ ធៀបនឹង៤៨៤១គម្រោង ដែលមានតម្លៃជាង៧,៧ពាន់លានដុល្លារ ក្នុងឆ្នាំ ២០២០៕

  ដោយៈ គង់ សូរិយា

       ភ្នំពេញៈ សេវាកម្មទីផ្សារគ្រប់គ្រងអាគារ និងគំរោងអភិវឌ្ឍន៍អចលនទ្រព្យនានានៅកម្ពុជា បាននិងកំពុងពង្រឹង តាមរយៈការឈានជើងមកដល់​របស់ក្រុមហ៊ុនអន្តរជាតិChestertons Cambodia។

ជាមួយនឹងការពង្រីកវត្តមាន និងការឈានជើងចូលទីផ្សារ របស់ក្រុមហ៊ុនអចលនទ្រព្យលំដា​ប់ពិភពលោក បាននិងកំពុងធ្វើឲ្យទីផ្សារ និងវិស័យអចលនទ្រព្យកម្ពុជាកាន់តែទទួលបានទំនុកចិត្តបន្ថែមទៀត។

ក្រុមហ៊ុនផ្តល់សេវាកម្មគ្រប់គ្រងអចលនទ្រព្យអន្តរជាតិChestertons ដែលមានមូលដ្ឋាននៅចក្រភពអង់គ្លេស បានប្រកាសបើកដំណើរការនៅកម្ពុជាកាលពីពេលថ្មីៗនេះ បានបញ្ជាក់ថា “កម្ពុជាជាទីផ្សារ”គន្លឹះរីកចម្រើនខ្លាំង” ស្របតាមយុទ្ធសាស្រ្តពង្រីកខ្លួននៅតំបន់អាស៊ី។

ក្រុមហ៊ុនលំដាប់អន្តរជាតិ ដែលមានអាយុកាល២១៦ឆ្នាំនេះ បានឈានចូលក្នុងប្រតិបត្តិការទីផ្សារនៅកម្ពុជា ទៅក្នុងបណ្តាញកម្រិតអន្តរជាតិជាង១០០ការិយាល័យរបស់ខ្លួន តាមរយៈការទិញយកប្រតិបត្តិការក្រុមហ៊ុន Focus Property Co., Ltd ដែលមានមូលដ្ឋាននៅទីក្រុងភ្នំពេញ។

ក្រុមហ៊ុន Chestertons Cambodia នឹងដំណើរការដោយមានក្រុមការងារច្រើនជាង​៥០នាក់ សម្រាប់ជំហានដំបូង ហើយត្រូវដឹកនាំដោយលោកជី មាត និងកញ្ញាសាម ចាន់ធូ ដើម្បីផ្តល់សេវាកម្មទាក់ទងនឹងអចល​នទ្រព្យលំនៅដ្ឋាននិងពាណិជ្ជកម្ម ដោយផ្តោតឯកទេសខាងផ្នែកសេវាគ្រប់គ្រងអចលនទ្រព្យ ដូចជា​ សេវាកម្មគ្រប់គ្រងអចលនទ្រព្យ​ សេវាកម្មគ្រប់គ្រងសម្ភារៈ​បរិក្ខារ​ និង​សេវាកម្មបរិក្ខារ​ផ្សេងៗ។

លោក Salah Mussa ប្រធានក្រុមហ៊ុនChestertonsនៅចក្រភព អង់គ្លេសបានបញ្ជាក់កាលពីពេលថ្មីៗនេះថា យើងមានសេចក្តីសោមនស្ស ក្នុងការដំណើរការក្រុមហ៊ុន Chestertons Cambodia និងស្វាគមន៍យ៉ាងកក់ក្តៅក្រុមហ៊ុន Focus Property មកកាន់គ្រួសារ Chestertons ដែលជាក្រុមហ៊ុនមានការរីកធំធាត់ជាដរាប។ ក្រុមហ៊ុន Chestertons Cambodia ដែលជាក្រុមហ៊ុនថ្មីជាងគេ នៃសមាជិក Franchiseរបស់យើង នឹងទទួលបានប្រយោជន៍ជាច្រើន ពីបណ្តាញដ៏ទូលំទូលាយ និងប្រកបដោយជំនាញរបស់យើង រួមទាំងប្រយោជន៍ពីម៉ាកយីហោក្រុមហ៊ុន Chestertons ដែលល្បីល្បាញកម្រិតអន្តរជាតិ។

លោក Salah Mussa អះអាងថា “ការផ្តោតជាសំខាន់របស់ក្រុមការងារលើសេវាកម្ម គ្រប់គ្រងអចលនទ្រព្យបង្ហាញពីជំនាញ និងធនធានសម្បូរបែបរបស់យើង”។លោកបន្តថា “ការដាក់គោលដៅខ្ពស់ប្រកបដោយក្រមសីលធម៌ និងវិជ្ជាជីវៈក្នុងការងារ គឺជាគុណសម្បត្តិដ៏ល្អ ដើម្បីឲ្យយើងបំពេញការងារបានយ៉ាងប្រសើរ”។

លោកSalah Mussa បញ្ជាក់ថា នៅជាង១២ខែចុងក្រោយនេះ យើងបានបង្ហាញខ្លួន ដោយបើកដំណើរការទីផ្សារថ្មីចំនួន៧ ដែលគិតមកទល់ពេលនេះ យើងបើកដំណើរការចំនួន១៥ ប្រទេសជុំវិញពិភពលោក។ យើងនឹងមិនសម្រាកត្រឹមប៉ុនហ្នឹងទេ យើងសង្ឃឹមថានឹងបន្តដំណើរដ៏អស្ចា រ្យនេះដោយពង្រីកខ្លួនបន្តទៀត ទៅកាន់ពិភពលោកនៅឆ្នាំ ២០២២ និងឆ្នាំក្រោយៗទៀត។

យោងតាមសេចក្តីប្រកាសព័ត៌មានបានឲ្យដឹងទៀតថា ក្រុមហ៊ុនអច​លនទ្រព្យ Chestertons បានបង្ហាញពីផែនការបន្ទាប់នៃការពង្រីកខ្លួន ដោយដាក់ការិយាល័យថ្មីៗ បន្ថែមទៀតនៅតំបន់អាស៊ី និងពង្រឹងប្រតិបត្តិការសេវាអចលនទ្រព្យលំនៅដ្ឋាន និងពាណិជ្ជកម្ម ដែលមានស្រាប់នៅទីក្រុងឌូបៃ ដែលជាទីក្រុងពាណិជ្ជកម្មនៅប្រទេសអេមីរ៉ាត់អារ៉ាប់រួម។

ក្រុម​ហ៊ុន Chestertons មាន​ប្រតិបត្តិការជាសកលនៅក្នុងទ្វីបចំនួន៥ មកពីចក្រភពអង់គ្លេស អឺរ៉ុប ការាបៀន អាហ្រ្វិក និងអាស៊ី។ ដោយ​សារ​តែ​ការ​រីក​ចម្រើន​យ៉ាង​ឆាប់​រហ័ស​ នៃ​វិស័យ​អចលនទ្រព្យ Chestertons បាន​ពង្រីក​សេវា​គ្រប់​គ្រង​អចលន​ទ្រព្យ​របស់​ខ្លួន ​នៅ​ក្នុង​ទីផ្សារ​កម្ពុជា៕

ដោយៈ សុផារី

ភ្នំពេញៈ ការដ្ឋានសាងសង់ស្ពានឆ្លងទន្លេសាប ក្នុងខណ្ឌឬស្សីកែវ សម្រេចបាន៧៥ភាគរយ និងស្ពានអាកាសផ្លូវជាតិលេខ៥ ដែលបានបើកការដ្ឋានសាងសង់ នៅថ្ងៃទី៣១ ខែមករា ឆ្នាំ២០២២ សម្រេចបាន៤០ភាគរយ ហើយគ្រោងបញ្ចប់ការសាងសង់ នៅខែមេសា ឆ្នាំ២០២៣។

ប្រធានមន្ទីរសាធារណការ និងដឹកជញ្ជូន រាជធានីភ្នំពេញ លោក សាំ ពិសិដ្ឋបានមានប្រសាសន៍ឱ្យដឹងនៅថ្ងៃទី១២ ខែតុលានេះថា ស្ពានឆ្លងទន្លេសាប និងស្ពានអាកាសផ្លូវជាតិលេខ៥ ក្នុងខណ្ឌឬស្សីកែវ គ្រោងបញ្ចប់ការសាងសង់នៅខែមេសា ឆ្នាំ២០២៣។ ក្នុងនោះ ស្ពានឆ្លងទន្លេឬស្សីកែវ សម្រេចបាន៧៥ភាគរយ និងស្ពានអាកាសផ្លូវជាតិលេខ៥ឬស្សីកែវ ដែលបានបើកការដ្ឋានសាងសង់ នៅថ្ងៃទី៣១ ខែមករា ឆ្នាំ២០២២ សម្រេចបាន៤០ភាគរយ។

លោកបានបន្តថា ស្ពានទាំងពីរនេះ នឹងជួយសម្រួលចរាចរណ៍ទៅមកពីភ្នំពេញ និងតំបន់ជ្រោយចង្វារ ហើយអាចជួយកាត់បន្ថយចរាចរណ៍នៅស្ពានជ្រោយចង្វារប្រមាណ៤០ភាគរយ ខណៈការកកស្ទះចរាចរណ៍នៅត្រង់ចំណុចប្រសព្វរវាងស្ពានដែកបាឡេ និងផ្លូវជាតិលេខ៥ ទិសដៅឆ្ពោះទៅគីឡូម៉ែត្រលេខ៩ ដោយសារទទឹងផ្លូវរួមតូច និងជាចំណុចប្រសព្វគ្នា។

ប្រធានមន្ទីរសាធារណការ និងដឹកជញ្ជូនរាជធានីភ្នំពេញ បានបញ្ជាក់ថា នៅចំណុចប្រសព្វផ្លូវជាតិលេខ៥ នឹងត្រូវពង្រីកទទឹងផ្លូវបន្ថែមប្រហែល១,៥ម៉ែត្រទៀតលើផ្លូវបច្ចុប្បន្ន មានទទឹងសរុប៦គីឡូម៉ែត្រ។ នៅពេលដែលដំឡើងសសរស្ពានរួច នៅក្នុងរយៈពេលប្រមាណ១ខែខាងមុខទៀត ការកកស្ទះនៅចំណុចនោះនឹងត្រូវបានកាត់បន្ថយ។

លោកបន្ថែមថា អ្នកជំនាញកំពុងតែរៀបចំហេដ្ឋារចនាសម្ព័ន្ធ និងសាងសង់បង្ហើយគន្លងផ្លូវប៉ែកខាងលិច នៃផ្លូវជាតិលេខ៥ ចាប់ពីផ្លូវសាលាយោធា កែងនឹងរបងដីឯកជន ឆ្ពោះទៅទិសស្ពានជ្រោយចង្វារ ដែលការសាងសង់ផ្លូវនេះ នឹងបើកឲ្យដំណើរការជាបណ្តោះអាសន្ន នៅពាក់កណ្តាលខែតុលា ឆ្នាំ២០២២។

យោងតាមផែនការ តំបន់ការដ្ឋានស្ពានអាកាសផ្លូវជាតិលេខ៥ នៅរយៈពេលប្រហែលមួយខែទៀត ការកកស្ទះនឹងត្រូវកាត់បន្ថយ។ ជាដំបូងត្រូវរៀបចំដំឡើងស្ពានអាកាសពាក់កណ្តាល គន្លងប៉ែកខាងកើត រួចដាក់ឲ្យដំណើរការ ទន្ទឹមនឹងនោះនឹងមានការរៀបចំសាងសង់ ផ្លូវក្រោមស្ពានផ្ទាល់ដីផងដែរ៕

 ដោយៈ ស៊ីវ ម៉េង

       ភ្នំពេញៈ ផ្តើមចេញពីភ្នាក់ងារអចលនទ្រព្យសាមញ្ញមួយរូប លោកជំទាវឧកញ៉ាគង់ សំណាងអគ្គនាយិការបុរីវិមានសំណាង បានជួបជាមួយអតិថិជនជាច្រើន និងបានស្វែងយល់ពីចំណង់ចំណូលចិត្តរបស់ពួកគេ។

ជាមួយនឹងក្តីសុបិន ក្នុងការក្លាយជាអ្នកអភិវឌ្ឍន៍មួយរូប កាលពីអតីតកាល នៅទីបំផុតលោកជំទាវឧកញ៉ាគង់ សំណាងសម្រេចបានតាមក្តីសុបិនរបស់ខ្លូនកាលពីឆ្នាំ២០២១ ដោយលោកជំទាវនិងស្វាមី គឺលោកឧកញ៉ាបណ្ឌិតគីម ហ៊ាងប្រធានKW Cambodia បានអភិវឌ្ឍន៍បុរីជាលើកទី១ គឺបុរីKS Residences ដែលមានទីតាំង នៅក្នុងស្រុកកៀនស្វាយខេត្តកណ្តាល។

ជាបុរីមួយផ្តោតលើអ្នកមានជីវភាពមធ្យម KS Residencesទទួលបានជោគជជ័យ និងគាំទ្រពីអតិថិជនយ៉ាងច្រើន។

ជាមួយនឹងចំណង់ចំណូលចិត្ត និងសិក្សាពីទស្សនវិស័យ និងផែនការអភិវឌ្ឍន៍ ព្រមទាំងតម្រូវការរបស់អតិថិជន ទីបំផុតលោកជំទាវឧកញ៉ាគង់ សំណាង និងស្វាមីបានចាប់ផ្តើមបុរីវិមានសំណាង “ជាបុរីដែលផ្តោតលើអ្នកមានជីវភាពធូរធារឬអ្នកមាន”កាលពីចុងឆ្នាំ២០២១។

លោកជំទាវឧកញ៉ាគង់ សំណាងបានមានប្រសាសន៍ឲ្យដឹងកាលពីពេលថ្មីៗនេះថា ដោយសារលោកជំទាវ និងស្វាមីបានធ្វើការក្នុងអាជីពជាភ្នាក់ងារអចលនទ្រព្យ រយៈពេលយូរឆ្នាំមកហើយ បានធ្វើឲ្យលោកជំទាវសិក្សា និងយល់ដឹងពីចំណង់ចំណូលចិត្តរបស់អតិថិជនថា ពួកគេត្រូវការផ្ទះប្រភេទណា និងមានរសនិយមបែបណាក្នុងការរស់នៅ។

លោកជំទាវបន្តថា “ឆ្លើយតបនឹងចំណង់ចំណូលចិត្ត និងស្គាល់ពីរសនិយមអតិថិជននេះ ទើបខ្ញុំវិនិយោគបុរីវិមានសំណាងឡើង ដោយផ្តោតលើអ្នកមានជីវភាពខ្ពស់”។ លោកជំទាវបន្តថា “នៅកម្ពុជាចំនួនអ្នកមានទ្រព្យច្រើនបានកើនឡើងខ្លាំង ក្នុងប៉ុន្មានឆ្នាំចុងក្រោយនេះ ដោយសារការរីកចម្រើន​សេដ្ឋកិច្ច និងការដឹកនាំប្រទេសបានល្អពីសម្តេចតេជោហ៊ុន សែននាយករដ្ឋមន្រ្តីនៃកម្ពុជា៛”។

មូលដ្ឋានចំណេះដឹង និងការច្នៃប្រឌិត បានធ្វើឲ្យបុរីវិមានសំណាងមានភាពលេចធ្លោលើប្លង់ស្ថាបត្យកម្ម។

លោកជំទាវឧកញ៉ាគង់ សំណាងបានបន្តថា “ខ្ញុំមិនធ្លាប់បានរៀនសូត្រផ្នែកស្ថាបត្យកម្មនោះទេ ប៉ុន្តែការសិក្សានិងស្វែងយល់បានធ្វើឲ្យខ្ញុំអាចចូលរួមជាគំនិត ជាមួយស្ថាបត្យករគូរប្លង់បុរីវិមានសំណាង ដើម្បីទទួលបាន​រចនាបទផ្ទះមួយ ដែលមានភាពទាក់ទាញនិងក្លាសិក”។

លោកជំទាវបានលើកឡើងថា លំនៅដ្ឋានិមួយៗនៃបុរីវិមានសំណាងបានសាងសង់ឡើងចំណាយប្រាក់ច្រើន លើសពីបុរីនិងម៉ូតវីឡាផ្សេងៗប្រមាណ៣០ភាគរយ ដោយសារម៉ូតរបស់យើងមានភាពរសរវើក ផ្ទះនិមួយ​ៗ​សាងសង់ឡើងដោយប្រើឥដ្ឋ២០ មានបង្អួចធំៗដែលផ្តល់បរិយាកាសរស់នៅប្រកបដោយផាសុខភាព ពិសេសធ្វើឲ្យខ្យល់ និងពន្លឺថ្ងៃចេញចូលគ្រប់គ្រាន់ ដែលអាចជួយសន្សំសំចៃអគ្គិសនី និងសម្របបាននឹងលក្ខខ័ណ្ឌនៃការប្រែប្រួលអាកាសធាតុបានយ៉ាងប្រសើរ៕