ដោយៈ សុខុម

ម៉ានីល: ប្រធានាធិបតីហ្វីលីពីន ដែលទើបចូលកាន់តំណែងថ្មី Ferdinand Marcos បាន “វ៉េតូ” លើសេចក្ដីព្រាងច្បាប់មួយដែលស្នើបង្កើតតំបន់សេដ្ឋកិច្ចពិសេស និងផែសេរីក្នុងទីក្រុងអាកាសយានដ្ឋានខ្នាតយក្ស Bulacan Airport City។

ប្រធានាធិបតីចូលកាន់តំណែងថ្មី លោក Ferdinand Marcos បានលើកឡើងថា មូលហេតុចម្បងដែលលោក “វ៉េតូ” លើគម្រោងនេះដោយ​សារយល់ថា វាបង្ក “ហានិភ័យសារពើពន្ធធំធេងចំពោះប្រទេស”។ នេះបើយោងតាមសារព័ត៌មាន The Nation ចុះផ្សាយនៅថ្ងៃច័ន្ទ ទី៤ ខែកក្កដា នេះ។

តាមរយៈលិខិតមួយច្បាប់ផ្ញើ ទៅកាន់រដ្ឋសភាចុះថ្ងៃទី០១ ខែកក្កដា  ប្រធានាធិបតី Ferdinand Marcos ដែលទើបចូលកាន់តំណែងកាលពីថ្ងៃព្រហស្បតិ៍ ទី៣០ ខែមិថុនា បានលើកឡើងថា “ផ្ទុយទៅនឹងគោលបំណងរបស់រដ្ឋាភិបាល ក្នុងការអភិវឌ្ឍប្រព័ន្ធពន្ធដារ ដែលមានអត្រាទាប និងមូលដ្ឋានពន្ធទូលំទូលាយ សេចក្ដីព្រាងច្បាប់នេះ នឹងធ្វើឱ្យមូលដ្ឋានពន្ធរបស់យើងជាមួយគ្រឿងលើកទឹកចិត្ត សម្រាប់បណ្ដាអង្គភាព ដែលបានចុះបញ្ជី រួមតូចខ្លាំង”។

លោកបន្ថែមទៀតថា “ដោយមើលឃើញពីចំណុចគួរពិចារណាទាំងនេះ ខ្ញុំត្រូវតែ ‘វ៉េតូ’ លើសេចក្ដីព្រាងច្បាប់នេះ”។

លោកក៏បានលើកឡើងដែរថា អាជ្ញាធរសេដ្ឋកិច្ច និងអភិវឌ្ឍន៍ជាតិ (NEDA) និងក្រុមប្រឹក្សាអភិវឌ្ឍន៍តំបន់ទី៣ (EDC III) បានអំពាវនាវឱ្យមានការសិក្សាបន្ថែមទៀត អំពីទំហំនៃការចំណាយ លើគម្រោងខ្នាតយក្សមួយនេះ។

ទីក្រុងអាកាសយានដ្ឋាន ដែលមានតម្លៃរហូតដល់ទៅ១៥ពាន់លានដុល្លារអាមេរិក ខាងលើនេះត្រូវបានបង្កើតឡើង ដោយក្រុមហ៊ុនសាជីវកម្មខ្នាតយក្ស San Miguel Corp។

San Miguel Corp គឺជាក្រុមហ៊ុនដ៏ធំបំផុតមួយ ប្រចាំប្រទេសហ្វីលីពីន ដែលមានអាជីវកម្មយ៉ាងច្រើនរាប់ចាប់ពីចំណីអាហារ ភេសជ្ជៈ ថាម​ពល និងហេដ្ឋារចនាសម្ព័ន្ធ។

ទីក្រុងអាកាសយានដ្ឋាន Bulacan Airport City ដែលត្រូវបានបង្កើតឡើងអំឡុងរបបដឹកនាំ របស់អតីតប្រធានាធបតី រ៉ូឌ្រីហ្គោ ឌូទើតេ គ្របដណ្តប់លើផ្ទៃដីទំហំ២.៥០០ហិកតា ក្នុងទីក្រុងBulacan ហើយត្រូវបានរចនាឡើង ដើម្បីបម្រើអ្នកដំណើររហូតដល់១០០លាននាក់ ក្នុងមួយឆ្នាំៗ ដែលស្មើនឹងទំហំ៣ដងធៀប នឹងអាកាសយានដ្ឋានអន្តរជាតិ Ninoy Aquino International Airport ក្នុងរដ្ឋធានីម៉ានីល នាពេលបច្ចុប្បន្ន៕ The Nation៕

 ដោយៈ វឌ្ឍនៈ

ភ្នំពេញៈ កាលពីមុន ព្រៃវែងជាខេត្តដែលមិនសូវមានការចាប់អារម្មណ៍ប៉ុន្មានទេ ទៅលើអចលនទ្រព្យ និងដីធ្លី ប៉ុន្តែដោយសារតែកំណើននៃវិស័យនេះ បានរីករាលដាលស្ទើរតែទូទាំងប្រទេស បានធ្វើឱ្យខេត្តព្រៃវែងក៏ក្លា​យជាចំណាប់អារម្មណ៍ថ្មីមួយ របស់វិនិយោគិនលើវិស័យអចលនទ្រព្យនិងដីធ្លី។

លោកថា ថេង ប្រធានក្រុមហ៊ុនអចលនទ្រព្យមួយប្រចាំតំបន់នេះ បានឱ្យដឹងនាព្រឹកថ្ងៃទី៤ កក្កដានេះថា ចាប់តាំងពីមានការអភិវឌ្ឍហេដ្ឋារចនាសម្ព័ន្ធនៅក្នុងខេត្តនេះកាន់តែច្រើន បានធ្វើឱ្យវិនិយោគិនចាប់អារម្មណ៍លើការវិនិយោគ នៅក្នុងខេត្តមួយនេះ ហើយក៏មានអ្នកវិនិយោគជាច្រើនបានសួរនាំនិងស្វែងរកការទិញដីកាន់តែច្រើនឡើងៗ ។

លោកបន្តថា ក្រៅពីហេដ្ឋារចនាសម្ព័ន្ធ ខេត្តព្រៃវែងក៏ជាខេត្ត ដែលមានព្រំប្រទល់ជាប់នឹងប្រទេសវៀតណាម ហើយបន្ទាប់ពីរដ្ឋាភិបាលបានបើកច្រកព្រំដែនអន្តរជាតិ ម៉ឺនជ័យក៏បានឃើញផងដែរថា សកម្មភាពនៃការវិនិយោគដីធ្លី នៅក្នុងតំបន់ច្រកព្រំដែនមានសន្ទុះខ្លាំង ជាមួយគ្នានោះដែរតម្លៃដីធ្លីក៏បានកើនឡើងគួរឱ្យកត់សម្គាល់ផងដែរ ។

លោកបន្តថា “អ្នកវិនិយោគមួយចំនួនបានទិញដីនៅតំបន់នោះ ដើម្បីពុះឡូត៏ខ្លះទៀតសង់ផ្ទះ និងខ្លះទៀតសម្រាប់ទុកលក់ចំណេញ នៅពេលអនាគត ពោលគឺពេលដែលមានការអភិវឌ្ឍមកដល់ ”។

លោកថេង បញ្ជាក់ថា ក្នុងរយៈពេល៦ខែកន្លងមកនេះ ការវិនិយោគនៅក្នុងខេត្តប៉ែកខាងកើតភ្នំពេញ ឃើញថាចាប់ផ្ដើមមានសន្ទុះឡើងវិញតែវាមិនទាន់ល្អ ដូចកាលពី៣ឆ្នាំមុននៅឡើយទេ ហើយអ្នកវិនិយោគនៅក្នុងតំបន់នោះភាគច្រើន ក៏ជាអ្នកវិនិយោគក្នុងស្រុក ដោយមិនទាន់មានវិនិយោគិនបរទេស ចូលទៅកាន់តំបន់នោះនៅឡើយទេ តែយើងជឿជាក់ថានៅពេលឆាប់ៗនេះ នឹងមានវិនិយោគិនបរទេស ចូលទៅកាន់តំបន់នោះដើម្បីស្វែងរកការវិនិយោគ។

ជាមួយគ្នានេះ លោកឧកញ៉ា នួន រឹទ្ធីអគ្គនាយកក្រុមហ៊ុនអចលនទ្រព្យKFA ក៏បានលើកឡើងផងដែរថា តាមពិតទៅព្រៃវែងជាខេត្តដែលនៅមិនឆ្ងាយពីភ្នំពេញប៉ុន្មានទេ ប៉ុន្តែដោយសារតែការអភិវឌ្ឍហេដ្ឋារចនាសម្ព័ន្ធខេត្តនេះនៅមានកម្រិត តែក្រោយពីរដ្ឋាភិបាល បានអភិវឌ្ឍន៍ហេដ្ឋារចនាសម្ព័ន្ធ កាន់តែច្រើននៅក្នុងតំបន់នោះ និងតភ្ជាប់ពីភ្នំពេញ ទៅកាន់ខេត្តព្រៃវែង និងពីបណ្ដាខេត្តនានា ទៅកាន់ខេត្តនេះកាន់តែច្រើន ធ្វើឱ្យមានការចាប់អារម្មណ៍ជាបណ្ដើរៗពីវិនិយោគិនជាតិនិងអន្តរជាតិ។

លោកឧកញ៉ាបន្តថា “នៅពេលអនាគត ខេត្តនេះនឹងកាន់តែមានការចាប់អារម្មណ៍ពីព្រោះថា ពេលនេះរដ្ឋាភិបាលក៏បាន និងកំពុងសិក្សាលើគម្រោងផ្លូវល្បឿនលឿនភ្នំពេញបាវិត ដែលផ្លូវល្បឿនលឿននេះគឺជាបច្ច័យល្អសម្រាប់ខេត្តព្រៃវែង និងស្វាយរៀង”៕

(ភ្នំពេញ)៖ ជិត បី ទសវត្សរ៍ នៃសង្គ្រាមស៊ីវីលរ៉ាំរ៉ៃដែលបានបញ្ចប់ក្នុងឆ្នាំ ១៩៩៨ បានធ្វើឱ្យប្រទេសកម្ពុជាពោរពេញដោយ គ្រាប់មីន និងយុទ្ធភណ្ឌមិនទាន់ផ្ទុះផ្សេងទៀត។ ការប៉ាន់ប្រមាណថា គ្រាប់មីនមិនទាន់ច្បាស់ពី ៤លាន ទៅ ៦លានគ្រាប់ និងគ្រាប់យុទ្ធភ័ណ្ឌមិនទាន់ផ្ទុះផ្សេងទៀត នៅតែមាននៅក្នុងប្រទេស ហើយបន្តធ្វើឱ្យប្រជាពលរដ្ឋជាច្រើននាក់ស្លាប់ និងរបួសរៀងរាល់ឆ្នាំ។

ទោះជាយ៉ាងនេះក្ដី នៅក្នុងអំឡុងពេលជាង ពីរ ទសវត្សរ៍មកនេះ ប្រទេសកម្ពុជាមានសន្តិភាពពេញលេញ ដែលធ្វើឱ្យប្រទេសមានការអភិវឌ្ឍលើគ្រប់វិស័ រួមទាំងមាន ការផ្លាស់ប្តូររីកចម្រើនគួរឱ្យកត់សម្គាល់ ដោយបានឡើងដល់ឋានៈជាប្រទេសមាន ចំណូលមធ្យមកម្រិតទាបក្នុងឆ្នាំ ២០១៥ ហើយប្រាថ្នាថា នឹងសម្រេចឱ្យបាននូវឋានៈជាប្រទេសមានចំណូលមធ្យមកម្រិតខ្ពស់នៅត្រឹមឆ្នាំ ២០៣០។ ជាមួយគ្នានេះសេដ្ឋកិច្ចរបស់កម្ពុជារក្សាបាននូវកំណើនជាមធ្យមចំនួន  ៧.៧ភាគរយក្នុងមួយឆ្នាំ នៅចន្លោះឆ្នាំ ១៩៩៨ និង ឆ្នាំ២០១៩ ដែលធ្វើឱ្យប្រទេសនេះស្ថិតនៅក្នុងចំណោមប្រទេសដែល សេដ្ឋកិច្ចមានកំណើនលឿនជាងគេនៅលើពិភពលោក។

ប៉ុន្តែរហូតមកដល់ពេលនេះ មានតំបន់មួយចំនួនទៀតកំពុងរងផលប៉ះពាល់ខ្លាំងដោយសារគ្រាប់មីន កប់ដី  ដែលនៅសេសសល់ពីសង្គ្រាម។  កាលពីចន្លោះឆ្នាំ១៩៧៩  និង  ឆ្នាំ២០២១  របាយការណ៍អាជ្ញាធរសកម្មភាពកម្ចាត់មីនកម្ពុជាបង្ហាញថា  មានជនរងគ្រោះស្លាប់ និង របួសចំនួន ៦៤,៩៥០នាក់ ក្នុងនោះមានអ្នកស្លាប់ចំនួន ១៩,៨០៦នាក់ ដោយសារគ្រាប់មីន កប់ដីទាំងនោះ។

ដូច្នេះ ដើម្បីចូលរួមថែរក្សាសន្តិភាព និងជំរុញការអភិវឌ្ឍប្រទេសជាតិឱ្យរីកចម្រើន ដើម្បីឈានទៅសម្រេចបាននូវឋានៈជាប្រទេសមានចំណូលមធ្យមកម្រិតខ្ពស់នៅត្រឹមឆ្នាំ ២០៣០ ខាងមុខនេះ ក្រុមហ៊ុន ប៉េង ហួត គ្រុប បានបរិច្ចាគថវិកាចំនួន ១លានដុល្លារ ជូនដល់រាជរដ្ឋាភិបាលកម្ពុជា ដើម្បីដោះស្រាយបញ្ហាមីន នៅទូទាំងប្រទេសកម្ពុជា បន្ទាប់ពីមានការអំពាវនាវរបស់ សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា បន្ទាប់ពីសម្តេច ទទួលបានរបាយការណ៍ពីស្ថានភាព នៃការគំរាមកំហែងយ៉ាងខ្លាំងដោយគ្រាប់មីនចំពោះប្រជាពលរដ្ឋ ក្នុងឱកាសសម្តេចអញ្ជើញលែងកូនត្រី នៅឃុំប៉ោយចារ ស្រុកភ្នំស្រុក ខេត្តបន្ទាយមានជ័យ នៅព្រឹកថ្ងៃទី០១ ខែកក្កដា ឆ្នាំ២០២២។

សូមរំលឹកផងដែរថា រហូតមកដល់ពេលនេះ ខេត្តដែលនៅតែមានបញ្ហាគ្រាប់មីនច្រើនជាងគេនោះ គឺ ខេត្តមួយចំនួនដែលស្ថិតនៅតាមបណ្តោយព្រំដែន កម្ពុជា-ថៃ ហើយជាពិសេសនោះ គឺខេត្តបាត់ដំបង ព្រមទាំងបណ្តាស្រុកចំនួន ២១ទៀត នៅតាមបណ្តោយព្រំដែននេះ។

សូមបញ្ជាក់ផងដែរ៖ កន្លងមក និងថ្មីៗនេះ ក្រុមហ៊ុន ប៉េង ហួត គ្រុប បានចូលរួមក្នុងការងារសង្គមជាច្រើន រួមមាន៖  ការងារបរិស្ថាន អប់រំ និងការងារសង្គម (វប្បធម៌ សុខុមាលភាព  និងសហគមន៍) និងសាងសង់ផ្ទះជូនធោធិនពិការ ។ល។

ជាពិសេសថ្មីៗនេះ ក្រុមហ៊ុន បានសហការបង្កើតទិវាច្បារអំពៅដែលផ្ដោតសំខាន់ធំៗចំនួនពីរគឺ កម្មវិធីរត់ពាក់កណ្ដាលម៉ារ៉ាតុន ដើម្បីកៀរគរថវិកា ជូនដល់មន្ទីរពេទ្យកុមារអង្គរ និងកម្មវិធីបរិច្ចាគឈាម ដើម្បីឆ្លើយតបដល់អ្នកជំងឺជាច្រើននាក់ ដែលកំពុងសង្រ្គោះបន្ទាន់នៅតាមមន្ទីរពេទ្យនានា  និងការអំពាវនាវរបស់មជ្ឈមណ្ឌលជាតិផ្ដល់ឈាម ព្រមទាំងចូលរួមលើកកម្ពស់វិស័យសុខាភិបាល និងការនាំយកនូវថវិកាមួយចំនួន និងគ្រឿងឧបភោគបរិភោគ ឧបត្ថម្ភដល់សិស្សានុសិស្សក្រីក្រប្រមាណជាង ១០០នាក់ ដែលកំពុងស្នាក់នៅ និងសិក្សានៅក្នុងសាលាមធ្យមវិចិត្រសិល្បៈ៕

ដោយៈ គង់ វិវឌ្ឍន៍

ក្រុងកែបៈ គំរោងវិនិយោគដីលំហែរកាយ “ឆ្នេរសមុទ្រកោងកាង”តម្លៃ ជាង១០លានដុល្លារ បាននិងកំពុងពន្លឿនល្បឿន នៃការអភិវឌ្ឍន៍ និងកំពុងទាក់ទាញការវិនិយោគ។

ជាគំរោងមួយ ស្ថិតក្នុងសង្កាត់អូរក្រសារ ក្រុងកែប ខេត្តកែប ឆ្នេរសមុទ្រកោងកាង ជាគំរោងអភិវឌ្ឍន៍ដីលំហែរធំដំបូងគេ ដែលមាននៅក្នុងក្រុងកែប ជាមួយទេសភាព១៨០ដឺក្រេ ដោយគំរោងនេះមានដងព្រែកធម្មជាតិ អាចជិះទូកទៅកំសាន្តនៅផ្ទៃសមុទ្របាន អាចស្ទូចត្រីកំសាន្ត មានឆ្នេរសមុទ្រដ៏ស្រស់ ស្អាត ដើមកោងកាងខៀវស្រងាត់ មានទេសភាពស្រែអំបិល និងទេសភាពភ្នំដ៏វែងអន្លាយ។

អ្នកនាងឆយ ហ្រ្វីដានាយិកាគ្រប់គ្រងទូទៅគំរោង “ឆ្នេរសមុទ្រកោងកាង”បានមានប្រសាសន៍ឲ្យដឹងតាមទូរស័ព្ទ កាលពីចុងសប្តាហ៍មុនថា ស្របនឹងផែនការមេអភិវឌ្ឍន៍ទេសចរណ៍ ខេត្តកែបរយៈពេលវែងត្រូវបានដាក់ចេញ ដោយរដ្ឋាភិបាល ដើម្បីប្រែក្លាយខេត្តកែបជាតំបន់វិស្សមកាលកម្រិតខ្ពស់ គំរោងឆ្នេរសមុទ្រកោងកាងបាន និងកំពុងគាំទ្រគោលនយោ​បាយ​របស់រាជរដ្ឋាភិបាល ដើម្បីអភិវឌ្ឍន៍ខេត្តដ៏ស្រស់ស្អាតនេះ កាន់តែមានភាពទាក់ទាញថែមទៀត។

អ្នកនាងបន្តថា “ជាមួយនឹងផែនការ និងទស្សនទាននៃការអភិវឌ្ឍន៍ដោយចីរភាពរបស់ម្ចាស់គម្រោង បានធ្វើឲ្យគំរោងនេះ ទទួលបានការចាប់អារម្មណ៍ខ្លាំងពីវិនិយោគិនជាតិ និងអន្តរជាតិ”។ អ្នកនាងបន្តថា “ជាមួយគ្នានេះ សាធារណៈជនជាច្រើនបាន និងកំពុងចូលរួមកំសាន្តនៅទីនេះ ដោយពួកគាត់អាចជិះទូកកាយ៉ាក់កំសាន្ត និងអាចបោះតង់ស្នាក់នៅក្នុងគំរោងនេះដោយឥតគិតថ្លៃ”។

ជាមួយគ្នានេះ លោកCooler Tanអគ្គនាយកក្រុមហ៊ុនYoungsia Real Estateបានមានប្រសាសន៍ឲ្យដឹងផងដែរថា ដោយសារបទពិសោ​ធន៍នៃការអភិវឌ្ឍន៍កន្លងមក យើងបាននិងកំពុងពង្រីកសក្តានុពល និងធ្វើឲ្យគំរោងនេះកាន់តែមានភាពទាក់ទាញ និងកាន់តែល្អប្រសើរជាងអ្វី ដែលអ្នកទិញអាចស្រម័យដល់។

លោកបន្តថា “យើងកសាងហេដ្ឋារចនាសម្ព័ន្ឋដ៏ល្អ មានបំពាក់អំពូលសឡា មានដាំផ្កាសាគូរ៉ា អមដោយសម្បត្តិធម្មជាតិ ដែលមានស្រាប់នៅនឹងកន្លែង ដីក្នុងគំរោងនេះ នឹងឡើងថ្លៃខ្លាំងនាពេលអនាគត”។ លោកបន្តថា “យើងបាននិងកំពុងកសាងនូវសហគមន៍មួយ ស្របតាមស្តង់ដាអន្តរជាតិ និងក្លាយជាផលិតផលទេសចរណ៍ ដ៏ស្រស់បំព្រងមួយនាពេលអនាគត”៕

ដោយៈ សុខុម

ហុងកុង: ក្រុមហ៊ុនអភិវឌ្ឍន៍អចលនទ្រព្យ លំដាប់យក្សរបស់ចិន Shimao Group បានខកខានទូទាត់ការប្រាក់ និងប្រាក់ដើមនៃមូលបត្របំណុលក្រៅប្រទេសរហូត ដល់ទៅ១ពាន់លានដុល្លារអាមេរិក ដែលដល់ពេលកំណត់កាលពីថ្ងៃអាទិត្យ ទី៣ កក្កដា។

ការខកខានទូទាត់បំណុល របស់ក្រុមហ៊ុនអភិវឌ្ឍន៍អចលនទ្រព្យនេះ គឺជាការវាយប្រហារចុងក្រោយ មកលើទីផ្សារអចលនទ្រព្យ ដែលកំពុងដុនដាបខ្លាំងរបស់ប្រទេសចិន ក្រោយពីផ្ទុះវិបត្តិក្រុមហ៊ុនអភិវឌ្ឍន៍ China Evergrande Group ដែលជំពាក់បំណុលច្រើនបំផុតប្រចាំប្រទេសចិន ជាមួយនឹងបំណុលរហូតដល់៣៥០ពាន់លានដុល្លារអាមេរិក។

ក្រុមហ៊ុននេះបានទទួលស្គាល់ តាមរយៈឯកសារមួយផ្ញើទៅកាន់ផ្សារហ៊ុនក្រុងហុងកុង កាលពីថ្ងៃអាទិត្យ កន្លងទៅថា ខ្លួនគ្មានលទ្ធភាពទូទាត់ប្រាក់ដើម និងការប្រាក់សរុប១,០២៣ពាន់លានដុល្លារអាមេរិក ជូនម្ចាស់បំណុល ដែលចុះបញ្ជីនៅផ្សារហ៊ុនសិង្ហបុរិនោះទេ ដោយលើកឡើងពី “ស្ថានភាពមិនប្រាកដប្រជាក្នុងទីផ្សារ ដោយសារការផ្ទេរបុរេហិរញ្ញប្បទាន (Debt Refinancing) និងស្ថានភាពប្រតិបត្តិការ និងការផ្តល់ហិរញ្ញប្បទានដ៏លំបាក”។

ក្រុមហ៊ុនអភិវឌ្ឍន៍នេះនិយាយថា ខ្លួនមិនទាន់ទទួលបានការជូនដំណឹងពីម្ចាស់បំណុល ឱ្យពន្លឿនការទូទាត់នៅឡើយទេ ហើយថាម្ចាស់បំណុល មិនទាន់បានចាត់វិធានការតាមផ្លូវច្បាប់នោះទេ។

ក្រុមហ៊ុន Shimao Group បានជួលក្រុមហ៊ុន Admiralty Harbor Capital ឱ្យធ្វើទីប្រឹក្សាហិរញ្ញវត្ថុរបស់ខ្លួន ដើម្បីសហការជាមួយទីប្រឹក្សាផ្នែកច្បាប់របស់ខ្លួន គឺក្រុមហ៊ុន Sidley Austin សម្រាប់ជួយវាយតម្លៃ និងស្វែងរកវិធី ដើម្បីគ្រប់គ្រងវិបត្តិសាច់ប្រាក់នេះ៕ Reuters៕

ដោយៈគង់ សូរិយា

ភ្នំពេញៈ បន្ទាប់ពីទទួលបានភាពជោគជ័យគំរោងទី១ នៃបុរីខេមរភូមិ ឥឡូវនេះក្រុមហ៊ុន ម៉ូណាចឈី លេនដ៍ អេន អីនវេសមិន (Monarchy land & Investment )ដែលជាអ្នកអភិវឌ្ឈ និងស្ថាបនិកបុរីខេមរភូមិ បានចាប់ផ្តើមសម្ពោធ បើកការដ្ឋានសាងសង និងលក់ជាផ្លូវការ នូវគំរោងទី២ របស់ខ្លួន នាព្រឹកថ្ងៃទី០៣ ខែកក្កដា ឆ្នាំ២០២២កន្លងមកនេះ។

ជាមួយនិងការផ្តល់ជូននូវរង្វាន់ធំរថយន្ត Mazdaចំនួន២គ្រឿងជូនអតិថិជនដែលបានគាំទ្រ។

ពិធីនេះមានវត្តមានចូលរួម ពីសំណាក់លោកបណ្ឌិត សោម វឌ្ឍនៈ ស្ថាបនិក នៃបុរីខេមរភូមិ និងមានការចូលរួម ពីសំណាក់អតិថិជនចាស់ និងអតិថិជនថ្មីជាច្រើនទៀត។

បុរីខេមរភូមិគំរោងទី២នេះ មានទីតាំងនៅផ្លូវជាតិលេខ២ ក្នុងភូមិសាស្ត្រ នៃតំបន់ដ៏មានសក្តានុពលថ្មី របស់ស្រុកកណ្តាលស្ទឹង ស្ថិតក្នុងភូមិឆ្មាពួន ឃុំជើងកើប ស្រុកណ្តាលស្ទឹង ខេត្តកណ្តាល ដែលចម្ងាយត្រឹមតែ៧០០ម៉ែត្រ ពីផ្កូវជាតិលេខ២(ខាងឆ្វេងដៃ បើមកពីព្រែកហូរ និងខាងស្តាំដៃ បើមកពីរង្វង់មូលគួរស្រូវ)។

លោកស្រីសុខ បូរី តំណាងផ្នែកលក់ បុរីខេមរភូមិ បានឲ្យដឹងថា គំរោងទី២របស់បុរីខេមរភូមិ ដែលបានសម្ពោធ បើកការដ្ឋានសាងសង់ និងបើកលក់ជាផ្លូវការនាពេលនេះ សាងសង់នៅលើផ្ទៃដីជិត២ហិចតា ហើយចំពោះសំណង់វិញ ត្រូវបានចែកចេញជា៣ប្រភេទផ្ទះ ក្នុងនោះមាន ប្រភេទផ្ទះល្វែងបែបអាជីវកម្ម ឬ(Shophouse ), ប្រភេទផ្ទះវីឡាកូនកាត់ (link Villa),និង ប្រភេទផ្ទះវីឡាទោល(Single Villa) ហើយដែលសំណង់លំនៅដ្ឋានទាំងនេះ ប្រើពេលសាងសង់១៨ខែ ដោយចាប់ពីខែកក្កដា ឆ្នាំ២០២២ តទៅ។

សំណង់លំនៅដ្ឋាន នៅក្នុងបុរីខេមរភូមិ សំរាប់ គំរោងទី២នេះ ត្រូវបានរចនានិងសាងសង់ឡើង តាមបែបស៊ីវិល័យស្របទៅតាមតម្រូវការ និងដែលមានទំហំខុសៗគ្នាសំរាប់អតិថិជន ក្នុងនោះ ទី១ ប្រភេទផ្ទះល្វែង បែបអាជីវកម្ម(Shophouse) មានទំហំដី៤.២ម៉ែត្រ គុណ២៥ម៉ែត្រ និងមានទំហំផ្ទះ៤.២ម៉ែត្រ គុណ១៤.៥ម៉ែត្រ )មាន៤បន្ទប់គេង និងបន្ទប់ទឹក៥ នៅសល់ដីក្រោយផ្ទះ2,5m និងសល់ដីមុខផ្ទះ6m លក់ក្នុងតំលៃចាប់ពី 85,800$ ទ្បើងទៅ។

ទី២ ប្រភេទផ្ទះវីឡាកូនកាត់ ឬ (Link Villa )មានទំហំដី៥ម៉ែត្រ គុណ២០ម៉ែត្រ និងមានទំហំផ្ទះ៥ម៉ែត្រ គុណ១០ម៉ែត្រ មាន៤បន្ទប់គេង និងបន្ទប់ទឹក៥ មានបន្ទប់ទទួលភ្ញៀវ១,ផ្ទះបាយ១ នៅសល់ដីមុខផ្ទះ៦ម៉ែត្រ និងសល់ដីក្រោយផ្ទះ៤ម៉ែត្រ មានតំលៃ 79,800$។

ទី៣ជាប្រភេទវីទ្បាទោល ឬ(Single Villa)មានទំហំដី១០ម៉ែត្រ គុណ២០ម៉ែត្រ, មានទំហំផ្ទះ៧ម៉ែត្រ គុណ១២ម៉ែត្រ មានចំនួន៦បន្ទប់គេង និងមានបន្ទប់ទឹក៧ មានបន្ទប់ទទួលភ្ញៀវ១ ផ្ទះបាយ១នៅសល់ដីមុខផ្ទះ៦ម៉ែត្រ និងក្រោយផ្ទះ៤ម៉ែត្រ មានតំលៃ 138,888$។ តំលៃលំនៅដ្ឋានទាំងបីប្រភេទ នៅក្នុងបុរីខេមរភូមិនេះ មានតម្លៃសមរម្យ ឬទាបជាងបើធៀប និងសំណង់លំនៅដ្ឋាននៃបុរីផ្សេងៗ ហើយចំពោះអតិថិជន ដែលទិញផ្ទះ នៅក្នុងគំរោង បុរីខេមរភូមិនេះនិងទទួលបានប្លង់រឹង ដោយឥតគិតថ្លៃ ប្រសិនបង់ផ្តាច់ភ្លាមៗ ឬបង់ផ្តាច់ក្នុង រយះពេល២ឆ្នាំ។
លោកស្រី សុខបុរីបានបន្តថា អ្វីដែលកាន់តែពិសេស សំរាប់គំរោងទី២ នៃបុរីខេមរភូមិនេះ អតិថិជន ដែលបានកក់ ឬបង់តាមដំណាក់កាល ឬបង ផ្តាច់ មិនថាអតិថិជនចាស់ ឬអតិថិជនថ្មីនោះទេ និងទទួលបានឪកាសឈ្នះរង្វាន់ធំ រថយន្តMazda ចំនួន២គ្រឿង និងរង្វាន់បន្ទាប់បន្សំជាច្រើនទៀត ចាប់រយៈការចាប់ឆ្នោត។

លក្ខណះពិសេស នៃគម្រោង បែបទំនើបកម្ម ស៊ីវីល័យ រចនាបថប្លែក រួមផ្សំបរិស្ថានល្អរស់នៅ ដោយភាពថ្លៃថ្នូរ និងមោទនភាព មានទីតាំងជាមួយភូមិអំណោយផល និងមានសក្តានុពល ដោយនៅមិនឆ្ងាយ ពីផ្លូវជាតិលេខ២ ដែលជាផ្លូវហាយវេយ៍ ដែលកំពុងស្ថាបនាដោយរាជរដ្ឋាភិបាល បានន័យថា ចម្ងាយតែ៧០០ម៉ែត្រប៉ុណ្ណោះ ពីផ្លូវជាតិលេខ២) ក្បែរផ្លូវក្រវ៉ាត់ក្រុងទី៣ និងព្រលានយន្តហោះថ្មី ដែលកំពុងសាងសង់ ពិសេសនៅក្បែរ ផ្សារទំនើបអីអន៣ និងមិនឆ្ងាយពីផ្លូវ៦០ម៉ែត និងផ្លូវ៥០ម៉ែត្រ. ក្បែរសាលារៀន ទីប្រជុំជន មន្ទីរពេទ្យ វត្តអារាម និងតំបន់ពាណិជ្ជកម្ម មួយចំនួនទៀត ដែលកំពុងរីកដុះដាលដូចផ្សិត ជាបន្តបន្ទាប់នោះ៕