ដោយៈ វឌ្ឍនៈ

ភ្នំពេញៈ មកដល់ពេលនេះ បណ្ដាខេត្តជាប់ព្រំដែននៃប្រទេសកម្ពុជានិងប្រទេសជិតខាង កំពុងមានការចាប់អារម្មណ៍ ពីវិនិយោគិនជាតិនិងអន្តរជាតិ ប៉ុន្តែមានខេត្តមួយនៅជាប់ព្រំដែនរបស់កម្ពុជា ជាមួយប្រទេសជិតខាងមួយនោះ តែមិនមានការអភិវឌ្ឍលើដីធ្លីនិងអចលនទ្រព្យនៅឡើយ។

លោកជុំ វិចិត្រ ប្រធានសាខានៃក្រុមហ៊ុន Century 21 Zillion Holding ប្រចាំខេត្តស្ទឹងត្រែង បានមានប្រសាសន៍ឲ្យដឹងតាមទូរស័ព្ទ កាលពីថ្ងៃទី២៤ ឧសភាកន្លងមកថា មកដល់បច្ចុប្បន្ននេះ ការអភិវឌ្ឍអចលនទ្រព្យនៅក្នុងខេត្តស្ទឹងត្រែង មិនទាន់មានសន្ទុះនៅឡើយ ហើយការអភិវឌ្ឍនៅក្នុងខេត្តនេះ ក៏មើលឃើញថាមានត្រឹមតែជាការពុះដីឡូត៏លក់ និងមិនសូវមានសកម្មផុសផុលប៉ុន្មានដែរ ។

លោកបន្តថា “ដីឡូត៏ដែលអ្នកអភិវឌ្ឍន៍បានពុះ និងលក់ជូនអ្នកមានតម្រូវការឃើញថា ក៏មានទីតាំងនៅជុំវិញទីប្រជុំជនទីរួមខេត្ត ដោយមិនទាន់មានការពុះដីឡូត៏ នៅតំបន់ផ្សេងៗទៀតនៅឡើយទេ”។ លោកបន្តថា “ចំណែកដីឡូត៏ដែលបានពុះលក់នោះដែរ ក៏មានការគាំទ្រត្រឹមតែទីតាំងដីនៅជាប់ផ្លូវធំទៅទៀត ហើយចំពោះទីតាំងដីដែលនៅតាំងក្រោយៗ ឬជាប់ផ្លូវតូចៗ ក៏មិនសូវមានការគាំទ្រដែរ”។

លោកបន្ថែមថា ក្រលេកទៅមើលតំបន់ជាប់ព្រំដែនកម្ពុជា ឡាវ ក៏មិនទាន់មានការអភិវឌ្ឍខ្លាំង ដូចបណ្ដាច្រកព្រំដែនអន្តរជាតិផ្សេងៗដែរ ។ ការទិញលក់ដីធ្លី នៅតែមិនទាន់កម្រើក ហើយទីផ្សារនិងហាងឆេងដីធ្លី ក៏មិនទាន់មានសក្ដានុពលដូចបណ្ដាខេត្តមួយចំនួនដែរ ។

ចំណែកលោកព្រាប កុល ប្រធានក្រុមប្រឹក្សាភិបាលនៃក្រុមហ៊ុន Century 21 Zillion Holding ក៏បានឱ្យដឹងថា បេសកកម្មរបស់ក្រុមហ៊ុនខ្លួន គឺមានគោលដៅ ចូលទៅគ្រប់តំបន់គ្រប់ឃុំ សង្កាត់ទូទាំងប្រទេស ដើម្បីក្ដោបព័ត៌មានឱ្យគ្រប់គ្រាន់ និងផ្ដល់ព័ត៌មានដីធ្លី និងការវិនិយោគទាំងនោះ ទៅកាន់វិនិយោគិនជាតិ និងអន្តរជាតិដើម្បីសម្រេចថា នឹងទៅកាន់តំបន់មួយណា។

លោកបន្តថា “ការអភិវឌ្ឍដីធ្លីនៅតាមតំបន់មូលដ្ឋានជនបទ នឹងជួយលើកកម្ពស់ជីវភាព ប្រជាពលរដ្ឋក្នុងតំបន់នោះ បង្កើតការងារធ្វើបានកាន់តែច្រើន ហើយនឹងអាចធ្វើឱ្យអ្នកបញ្ចប់ ការសិក្សានៅសកលវិទ្យាល័យ ត្រលប់ទៅកាន់ភូមិកំណើតខ្លួនវិញ ចូលរួមក្នុងការអភិវឌ្ឍបន្ថែមទៀត”។លោកបន្តថា “អ្វីដែលពិសេស យើងនឹងធ្វើឱ្យគម្លាតរវាងទីក្រុង និងអ្នកជនបទកាន់តែខិតជិតទៅរកគ្នា”៕

ដោយៈសុខុម

ប៉េកាំង: ធនាគារកណ្ដាលដែលជានិយតករហិរញ្ញវត្ថុ នៃប្រទេសចិន បានប្ដេជ្ញារក្សាស្ថិរភាពកំណើន ប្រាក់កម្ចីក្នុងវិស័យអចលនទ្រព្យ និងជួយអ្នកទិញផ្ទះ ដែលរងផលប៉ះពាល់ដោយវិបត្តិកូវីដ-១៩ ពន្យារពេលទូទាត់ប្រាក់កម្ចីទិញផ្ទះរបស់ពួកគេ។

ធនាគារកណ្តាលចិន (PBOC) បានចេញសេចក្តីថ្លែងការណ៍កាលពីថ្ងៃអង្គារ ទី២៤ ខែឧសភា ថា ផ្អែកតាមទិន្នន័យផ្លូវការបានបង្ហាញ កាលពីដើមខែនេះថា កំណើនប្រាក់កម្ចីជាលុយយ័ន បានធ្លាក់ចុះយ៉ាងគំហុកកាលពីខែមេសា ខណៈវិបត្តិកូវីដ-១៩ បានជះផលប៉ះពាល់យ៉ាងខ្លាំង មកលើសេដ្ឋកិច្ច ហើយបានធ្វើឱ្យតម្រូវការប្រាក់កម្ចីដាំក្បាលចុះ។

ប្រាក់កម្ចីគេហដ្ឋានរួមទាំងកម្ចីទិញផ្ទះផង បានធ្លាក់ចុះរហូតដល់ទៅ២១៧ពាន់លានយ័ន (៣២,៦ពាន់លានដុល្លារអាមេរិក) ដោយធ្វើឱ្យប៉ះពាល់ខ្លាំងដល់ទីផ្សារអចលនទ្រព្យ ដែលជាសសរស្តម្ភដ៏សំខាន់មួយនៃសេដ្ឋកិច្ចរបស់ប្រទេសចិន។

វិស័យអចលនទ្រព្យ ដែលបានចុះខ្សោយ ដោយសារវិធានការរបស់រដ្ឋាភិបាលក្រុងប៉េកាំង នៅក្នុងការទប់ស្កាត់ការខ្ចីប្រាក់ច្រើនហួសហេតុកាលពីឆ្នាំមុន មានសន្ទុះយឺតនៅឡើយ ទោះបីជារដ្ឋអំណាចថ្នាក់មូលដ្ឋាននៅឆ្នាំ២០២២ នេះបានប្រឹងប្រែងចាត់វិធានការជំរុញតម្រូវការ តាមរយៈការបញ្ចុះអត្រាការប្រាក់លើកម្ចីទិញផ្ទះ ការបង់ប្រាក់មុន (Down Payment) តិចជាងមុនសម្រាប់ការបង់រំលស់ និងការឧបត្ថម្ភធនជាដើមយ៉ាងណាក្ដី។

ធនាគារកណ្ដាលចិន បានលើកឡើងតាមរយៈសេចក្ដីថ្លែងការណ៍ដែ​លបង្ហោះលើគេហទំព័ររបស់ខ្លួនថា ខ្លួននឹងប្រើប្រាស់ឧបករណ៍ផ្សេងៗ ដើម្បីបង្កើនប្រាក់កម្ចីសមស្រប និងជួយគាំទ្រដល់កំណើនសេដ្ឋកិច្ច។

ធនាគារនេះ នឹងជួយក្រុមហ៊ុនតូចៗ អាជីវកម្មតាមផ្ទះ និងតៃកុងរថយន្តដឹកទំនិញ ក៏ដូចជា អ្នកទិញផ្ទះ និងប្រជាជនដែលរងផលប៉ះពាល់សេដ្ឋកិច្ច ដោយសារវិធានការទប់ស្កាត់ការរីករាល វីរុសកូវីដ-១៩ ពន្យារពេលបង់ប្រាក់កម្ចីទិញផ្ទះ និងប្រាក់កម្ចីផ្សេងៗទៀតផងដែរ។

នៅក្នុងសេចក្តីថ្លែងការណ៍ដាច់ដោយឡែកមួយ ធនាគារកណ្ដាលចិន បាននិយាយថា ខ្លួននឹងណែនាំឱ្យស្ថាប័នហិរញ្ញវត្ថុនានាចូលរួម ដើម្បីជួយបង្កើនការផ្តល់ប្រាក់កម្ចី ជាមួយនឹងគោលបំណងជំរុញកំណើនសេដ្ឋកិច្ច៕ Reuters៕

ដោយៈ សុផារី

ភ្នំពេញៈ គម្រោងធ្វើឱ្យប្រសើរឡើងវិញផ្លូវជាតិលេខ៥ ដែលឆ្លងកាត់ខេត្តចំនួន៤សំខាន់ៗ គ្រោងនឹងបញ្ចប់នាពេលឆាប់ៗនេះ ខណៈអ្នកជំនាញរំពឹងតម្លៃដីធ្លី នឹងមានកំណើនកាន់តែខ្ពស់ ក្រោយគម្រោងនេះបញ្ចប់ការសាងសង់រួចរាល់។

លោក ហ៊ិន រស់ ស្ថាបនិកភូមិចំការដូងរីសត ដែលមានទីតាំងនៅក្នុងខេត្តកំពង់ឆ្នាំង បានមានប្រសាសន៍ប្រាប់ Property Area Asia តាមប្រព័ន្ធទូរស័ព្ទកាលពីម្សិលម៉ិញនេះថា នៅតាមបណ្តោយផ្លូវជាតិលេខ៥ នៅមានដីទំនេរច្រើន និងមានតម្លៃសមរម្យនៅឡើយ។ ជាក់ស្តែង តម្លៃដីធ្លីនៅជាប់នឹងផ្លូវជាតិលេខ៥ អាចមានតម្លៃចាប់ពី៣០ដុល្លារអាមេរិក ដល់៨០ដុល្លារអាមេរិក ក្នុងមួយម៉ែត្រការ៉េ។

សម្រាប់ប្រភេទដី នៅតាមផ្លូវតូចចូលក្នុងបន្តិច លោកបញ្ជាក់ថា តម្លៃដីធ្លីអាចចន្លោះពី៥ ទៅ១០ដុល្លារអាមេរិក ក្នុងមួយម៉ែត្រការ៉េ ។ យ៉ាងណាក្តី តម្លៃមានការប្រែប្រួលទៅតាមសក្តានុពលទីតាំង ទំហំដី និងទំហំផ្លូវចូល។

លោកហ៊ិន រស់ បន្ថែមថា សព្វថ្ងៃនេះ មានក្រុមអ្នកមានលុយជាច្រើន ងាកមកស្វែងរកទិញដី នៅតាមតំបន់ខាងលើនេះ ដើម្បីទុកវិនិយោគនាពេលអនាគត។

ជាមួយគ្នានេះ លោកប៊ឹក ពោធិ៍ ប្រធានសាខាក្រុមហ៊ុនអចលនទ្រព្យ Century 21 Zillion Holding ប្រចំាខេត្តពោធិ៍សាត់បានឱ្យដឹងថា ដីធ្លីនៅតាមបណ្តោយផ្លូវជាតិលេខ៥ មានសក្តានុពលខ្លាំង ដោយ​សារដីធ្លីនៅស្របនឹងផ្លូវនេះ ភាគច្រើនជាដីលំនៅដ្ឋាន ដីឧស្សាហកម្ម និងសំរាប់សាងសង់រោងចក្រ​សហគ្រាសនានា។

លោកបញ្ជាក់ថា កាលពីមុនតម្លៃដីធ្លី ស្ថិតនៅចន្លោះពី១៥០០ដុល្លារអាមេរិក ដល់២០០០ដុល្លារអាមេរិក ក្នុងមួយម៉ែត្រដើរ នាពេលបច្ចុប្បន្ននេះ អាចកើនថ្លៃដល់៣០០០ដុល្លារ ទៅ៤០០០ដុល្លារអាមេរិក ក្នុងមួយម៉ែត្រដើរ។
បើតាមអ្នកជំនាញរូបនេះ សព្វថ្ងៃនេះ គេសង្គេតឃើញ កំណើនច្រើននៃអ្នកទិញ សម្រាប់វិនិយោគទៅជាទីតាំងអាជីវកម្ម និងលំនៅឋាន។ សម្រា​ប់អ្នកវិនិយោគនៅតាមបណ្តោយផ្លូវនេះ គេមើលឃើញពីសក្តានុពល ដោយ​សារផ្លូវនេះជាផ្លូវអាស៊ាន និងអំណោយផល ដល់ការសាងសង់គំរោងអភិវ ឌ្ឈ​ន៍អចលនទ្រព្យ សម្រាប់ធ្វើអាជីវកម្ម និងលំនៅឋាន។

លោកថា “ប្រជាជនដែលទិញដីនៅតាមតំបន់នេះ ភាគច្រើនគឺទិញសម្រាប់ធ្វើជាកន្លែងស្នាក់នៅ និងជាទីតាំងសម្រាប់ធ្វើអាជីវកម្ម”។

គម្រោងធ្វើឱ្យប្រសើរឡើងវិញ កំណាត់ផ្លូវជាតិលេខ៥ មានប្រវែងសរុបចំនួន៣៦៦គីឡូម៉ែត្រ។ ផ្លូវដ៏វែងនេះឆ្លងកាត់ខេត្តចំនួន៤ រួមមាន ខេត្តកំពង់ឆ្នាំង ពោធិ៍សាត់ បាត់ដំបង និងខេត្តបន្ទាយមានជ័យ។

ផ្លូវជាតិលេខ៥ ជាផ្លូវហាយវេកម្រិតអាស៊ាន ដែលតភ្ជាប់រវាងប្រទេសកម្ពុជា ជាមួយប្រទេសថៃ និងប្រទេសវៀតណាម ហើយស្ថិតនៅក្នុងច្រករបៀងផែនការអភិវឌ្ឍត្បូង ត្បូងនៃក្របខ័ណ្ឌបណ្តាប្រទេស មហាអនុតំបន់ទន្លេមេគង្គផងដែរ៕

ដោយៈ គង់ សូរិយា

ភ្នំពេញៈ ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា (CVEA) លោកច្រឹក សុខនីម បានអះអាងថា ការវិនិយោគដីធ្លីនៅតែទទួល​បានផលចំណេញជាមធ្យម១៥ភាគរយក្នុងមួយឆ្នាំ។

លោកបានមានប្រសាសន៍ឲ្យដឹងតាមទូរស័ព្ទ កាលពីល្ងាចថ្ងៃ ទី២៤ ឧសភាកន្លងមកថា ទីផ្សារដីធ្លីនៅតែទទួលបានផលចំនេញខ្ពស់ ដោយរយៈពេលពីរបីឆ្នាំខាងមុខ អត្រាចំណេញនៅតែរក្សាបាន១៥ភាគរយ ក្នុងមួយឆ្នាំ ធៀបនឹងការវិនិយោគ។

លោកបន្តថា “បើគិតនៅតំបន់ជាយក្រុងដទៃទៀត ដែលមានដូចជា ខ័ណ្ឌព្រែកព្នៅ ខ័ណ្ឌពោធិសែនជ័យ និងខ័ណ្ឌសែនសុខ អត្រាចំណេញស្ថិតក្នុងចន្លោះ២០ទៅ៣០ភាគរយ”។ លោកបន្តថា “បច្ចុប្បន្នអ្នកវិនិយោគក្នុងស្រុកដើរតួនាទីសំខាន់ជាងគេ ដោយទំហំលុយចាប់ពី៥០ម៉ឺនដុល្លារចុះនៅតែមានការបញ្ចេញ សម្រាប់ទីតាំងល្អៗនិងមានផលចំណេញខ្ពស់”។

លោកច្រឹក សុខនីម បានបន្តថា ទោះបីជាមានបញ្ហាដោយសារវិបត្តិកូវីដ១៩ រយៈពេល២ឆ្នាំកន្លងមកក្តី តែអ្នកវិនិយោគក្នុងស្រុកនៅតែបន្តទិញ នៅតែបន្តវិនិយោគ ព្រោះឱកាសចំនេញមានខ្ពស់ នៅពេលទីផ្សារនិងស្ថានភាពសេដ្ឋកិច្ចមានភាពល្អប្រសើរមកវិញ។

លោកបន្តថា “ការវិនិយោគដីធ្លី នៅតែអាចរកផលចំណេញបាន ធៀបនឹងការវិនិយោគដទៃទៀត ផលចំណេញពីទីផ្សារដីធ្លីនៅតែមានកម្រិតខ្ពស់”៕

ដោយៈសុខុម

ប្រទេសចិនៈ ក្រុមហ៊ុនស្ថាបត្យកម្មអង់គ្លេសឈ្មោះ Zaha Hadid Architects (ZHA) បានឈ្នះការប្រកួតគូរប្លង់អគារភ្លោះ កប់ពពកដ៏អស្ចារ្យ Tower C នៅគម្រោងមជ្ឈមណ្ឌលពាណិជ្ជកម្ម និងហិរញ្ញវត្ថុ Shenzhen Bay Super Headquarters Base។ នេះបើយោងតាមគេហទំព័រ Engineering Discoveries ចុះផ្សាយកាលពីពេលថ្មីៗនេះ។

គម្រោង Shenzhen Bay Super Headquarters Base នឹងក្លាយជាមជ្ឈមណ្ឌលពាណិជ្ជកម្ម និងហិរញ្ញវត្ថុដ៏សំខាន់មួយ នៅក្រុងស៊ឹនជិន (Shenzhen) ប្រទេសចិន ដែលជាកន្លែងប្រមូលផ្ដុំទៅដោយការិយាល័យកណ្ដាលរបស់ក្រុមហ៊ុនជាច្រើន ដែលអាចទទួលបុគ្គលិកបានរហូតដល់ទៅ៣០០.០០០នាក់។

មជ្ឈមណ្ឌលពាណិជ្ជកម្ម និងហិរញ្ញវត្ថុនេះ នឹងរួមបញ្ចូលទាំងសាលសន្និសីទអន្តរជាតិ សាលពិព័រណ៍ កម្មវិធីវប្បធម៌ និងសិល្បៈ ការអភិវឌ្ឍលំនៅដ្ឋាន មជ្ឈមណ្ឌលដឹកជញ្ជូន និងតំបន់ឆ្នេរដែលមានដីសើមផងដែរ។

ដូចនេះអគារភ្លោះកប់ពពក កម្ពស់៤០០ម៉ែត្រ Tower C ដែលគូរប្លង់ដោយក្រុមហ៊ុន Zaha Hadid Architects (ZHA) នៅក្នុងគម្រោងមជ្ឈមណ្ឌលពាណិជ្ជកម្ម និងហិរញ្ញវត្ថុ Shenzhen Bay Super Headquarters Base ខាងលើនេះគឺពិតជាស័ក្ដិសមឥតខ្ចោះ ទៅនឹងស្ថានភាពភូមិសាស្ត្ររបស់ក្រុងស៊ឹនជិន។

ទោះជាយ៉ាងណា គ្មានព័ត៌មានលម្អិតបញ្ជាក់ថា តើដំណើរការសាងសង់អគារនេះ នឹងចាប់ផ្ដើមនៅពេលណា សាងសង់លើផ្ទៃដីប៉ុន្មានហិកតា ហើយមានទំហំទុនវិនិយោគច្រើនកម្រិតណានៅឡើយទេ៕ Engineering Discoveries៕

ដោយៈគង់ សូរិយា

ភ្នំពេញៈ អ្នកជំនាញអចលនទ្រព្យបានលើកឡើងថា ទីផ្សារអាផាតម៉ិន នៅតែមានតម្រូវការខ្ពស់នៅឡើយ ទោះបីជាទីផ្សារនេះងាកពីការពឹងផ្អែកជនបរទេស មកកាន់ទីផ្សារសំរាប់អ្នកក្នុងស្រុកក្តី។

អគ្គនាយកក្រុមហ៊ុន Towncity Real Estate លោកវ៉ន ចាន់ថនបានមានប្រសាសន៍ឲ្យដឹងតាមទូរស័ព្ទកាលពីថ្ងៃទី២៤ ឧសភាថា តម្រូវការអាផាតម៉ិនជួលនៅតែមានភាពល្អប្រសើរ ក្នុងរយៈពេលប៉ុន្មានឆ្នាំចុងក្រោយនេះ បើទោះបីជាតម្រូវការពីជនបរទេសមានកម្រិតក្តី ប៉ុន្តែតម្រូវការរបស់អ្នក​ក្នុងស្រុកបន្តកើនឡើង។

លោកបន្តថា “អត្រាប្រើប្រាស់រួមលើទីផ្សារអាផាតម៉ិន នៅតែមានកម្រិតខ្ពស់ បើទោះជាតម្លៃមិនកើនឡើងក្តី ប៉ុន្តែតម្រូវការឃើញមានភាពល្អប្រសើរ”។

យោងតាមការសិក្សារបស់ក្រុមហ៊ុន CBRE Cambodia កាលពីពេលថ្មីៗនេះបានបង្ហាញថា តម្លៃជួលអាផាតម៉ិនបានធ្លាក់ចុះ ក្នុងរង្វង់១០ទៅ១៥ភាគរយ ធៀបនឹងមុនពេលមានវិបត្តិកូវីដ១៩។

លោកច្រឹក សុខនីមប្រធានសមាគមអ្នកវាយតម្លៃ និងភ្នាក់ងារអចល​នវត្ថុកម្ពុជាបានមានប្រសាសន៍ថា អត្រាប្រើប្រាស់រួមក្នុងទីផ្សារអាផាតម៉ិនមានចន្លោះពី៦០ ទៅ៧០ភាគរយ ជាអត្រាធ្លាក់ចុះបន្តិច បើធៀបនឹងមុនពេលមានវិបត្តិកូវីដ១៩។

លោកបន្តថា “អាផាតម៉ិនលំដាប់A មានតម្លៃចន្លោះពី៧០០ទៅ១២០០ដុល្លារក្នុងមួយបន្ទប់គេង សម្រាប់តំបន់បឹងកេងកង១”។លោកបន្តថា ប៉ុន្តែអាផាតម៉ិនធម្មតាៗ ស្ថិតនៅតំបន់ទួលទំពូង និងតំបន់មិនសូវមាន​ប្រជាប្រិយភាពដទៃទៀត មានតម្លៃចន្លោះត្រឹម៣០០ ទៅ៥០០ដុល្លារក្នុងមួយបន្ទប៉គេង”។

លោកច្រឹក សុខនីមបានបន្តថា ដោយសារវិបត្តិកូវីដ១៩ ទីផ្សារអាផាតម៉ិនងាកមកពឹងផ្អែក លើទីផ្សារជួលក្នុងស្រុកច្រើន ព្រោះជនបរទេសមិនសូវបានធ្វើដំណើរចូលមកកាន់កម្ពុជា៕