ដោយៈ សិរីជេស៊ីកា

ភ្នំពេញៈ សម្តេចតេជោហ៊ុន សែននាយករដ្ឋមន្រ្តីនៃកម្ពុជាបានបង្ហើបឲ្យដឹងថា កម្ពុជានឹងរៀបចំវេទិកាអាស៊ាន ពិភពលោកលើកទី២នៅរាជធានីភ្នំពេញ នាខែវិច្ឆិកាខាងមុខនេះ។

សម្តេចតេជោ ដែលជាប្រធា​នអាស៊ានបានថ្លែងបែបនេះ ក្នុងឱកាសសម្តេចអញ្ជើញលោកសាស្ត្រាចារ្យKlaus Schwabស្ថាបនិក និងជាប្រធា​នប្រតិបត្តិ នៃវេទិកាសេដ្ឋកិច្ចពិភពលោក ឱ្យមកចូលរួមកិច្ចសន្ទនាអាស៊ាន-ពិភពលោកលើកទី២ ដែលកម្ពុជាធ្វើជាម្ចាស់ផ្ទះ នៅខែវិច្ឆិកា ឆ្នាំ២០២២ ខាងមុខនេះ។

ការអញ្ជើញនេះ បានធ្វើឡើងក្នុងឱកាសដែលសម្តេច ជួបពិភាក្សាជាមួយ លោក សាស្ត្រាចារ្យ ខ្លុស ស្វាប់ នៅថ្ងៃទី២៤ ខែឧសភា ឆ្នាំ២០២២នេះ នៅក្រុងដាវ៉ូស ប្រទេសស្វីស។

នៅក្នុងជំនួបនេះ សម្ដេចតេជោ ហ៊ុន សែន បានមានប្រសាសន៍ថា សម្ដេចពិតជាអរគុណលោក សាស្ត្រាចារ្យ ខ្លុស ស្វាប់ ដែលមានពេលវេលាសម្រាប់ជំនួបនៅព្រឹកនេះ ហើយជាពិសេសស្របពេលការអញ្ជើញរបស់វេទិកាសេដ្ឋកិច្ចពិភពលោក ក្នុងទីក្រុងដាវ៉ូស ក្នុងឆ្នាំ២០២២ ដែលក្នុងឆ្នាំនេះ កម្ពុជាធ្វើជាប្រធានអាស៊ាន។

សម្តេចតេជោ ឆ្លៀតយកឱកាសនោះ បានអញ្ជើញលោកសាស្ត្រាចារ្យ ខ្លុស ស្វាប់ ដោយផ្ទាល់ មកចូលរួមនៅក្នុងកិច្ចសន្ទនាអាស៊ាន-ពិភពលោក លើកទី២ ដែលគ្រោងធ្វើនៅក្នុងរាជធានីភ្នំពេញ នាខែវិច្ឆិកាឆ្នាំ២០២២។

សម្ដេចបានរំលឹកដែរថា កាលពីឆ្នាំ២០១២ ពេលកម្ពុជាធ្វើជាប្រធានអាស៊ាន កម្ពុជាបានរៀបចំនូវវេទិកាដែលហៅថា កិច្ចសន្ទនាអាស៊ាន-ពិភពលោក លើកទី១ ដោយក្នុងនោះមានការចូលរួម ពីប្រធានស្ថាប័នមួយចំនួនដូចជា៖ IMF, ធនាគារពិភពលោក ក៏ដូចជាធនាគារអភិវឌ្ឍន៍អាស៊ីជាដើម។ លើសពីនេះ កិច្ចសន្ទនាអាស៊ាន-ពិភពលោក លើកទី២ ដែលគ្រោងធ្វើនៅខែវិច្ឆិកា ឆ្នាំ២០២២នេះ សម្ដេចតេជោសូមអញ្ជើញលោកសាស្ត្រាចារ្យ ក៏ដូចជា វេទិកាសេដ្ឋកិច្ចពិភពលោក ដើម្បីចូលរួមក្នុងកិច្ចប្រជុំខាងមុខនេះ ដោយសារវេទិកាសេដ្ឋកិច្ចពិភពលោក គឺមានចំណុចជាច្រើន ដែលកន្លងមកនេះ ធ្វើការងារប្រទាក់ក្រឡា ដែលមានអត្ថប្រយោជន៍ដល់អាស៊ាន ដូច្នេះ​ការអញ្ជើញចូលរួមពីវេទិកាសេដ្ឋកិច្ចពិភពលោក ក៏ដូចជាលោកសាស្ត្រាចារ្យ ខ្លូស ស្វាប់ ពិតជាមានសារៈសំខាន់។

ជាការឆ្លើយតប លោក សាស្ត្រាចារ្យ ពិតជាអរគុណសម្ដេចតេជោ ដែលបានអញ្ជើញលោកដោយផ្ទាល់។

លោកសាស្ត្រាចារ្យ ក៏ដូចជាវេទិកាសេដ្ឋកិច្ចពិភពលោក ចាត់ទុកអាស៊ាន មានសារៈសំខាន់ណាស់ សម្រាប់វេទិកាសេដ្ឋកិច្ចពិភពលោក ហើយជាពិសេសទៀត លោកសាស្ត្រាចារ្យ បានគូសបញ្ជាក់ថា នៅពេលនេះសម្ដេ​ចតេជោបានដើរតួនាទីយ៉ាងសំខាន់ ជាពិសេសដោយសារសម្ដេចតេជោ មិនមែនត្រឹមតែជា នាយករដ្ឋមន្ត្រីកម្ពុជាទេ តែជាប្រធានអាស៊ានផងដែរ។

លោកសាស្ត្រាចារ្យ មានប្រសាសន៍បន្តថា លោកក៏បានទទួលការអញ្ជើញពីក្រុមបណ្ដាប្រទេសG20 ដើម្បីចូលរួមក្នុងកិច្ចប្រជុំG20 នៅប្រទេសឥណ្ឌូនេស៊ី។

លោកសាស្ត្រាចារ្យ បានឆ្លើយតបថា លោកនឹងអញ្ជើញចូលរួមនូវកិច្ចប្រជុំនេះ ដែលនឹងធ្វើឡើងនៅរាជធានីភ្នំពេញ ហើយលោកបានគូសបញ្ជាក់ថា នេះក៏ជាឱកាសដ៏ល្អសម្រាប់លោក ទៅទស្សនកិច្ចនៅប្រទេសកម្ពុជា ដើម្បីបានឃើញវឌ្ឍនភាព នៃការរីកចម្រើនរបស់ប្រទេសកម្ពុជា។

ជាការឆ្លើយតប សម្តេចតេជោមានប្រសាសន៍ថា សម្រាប់លោកសាស្ត្រាចារ្យ ក៏អាចទៅទស្សនកិច្ចនៅកម្ពុជា ដែលនឹងឃើញពីការរីកចម្រើន ក្រោយប្រទេសកម្ពុជា ទទួលរងការខ្ទេចខ្ទាំដោយសារសង្គ្រាម។ ដូច្នេះនេះ គឺជាឱកាស ដែលអាចឃើញផ្ទាល់នូវការអភិវឌ្ឍការរីកចម្រើន និងសមិទ្ធផលទាំងឡាយរបស់កម្ពុជា៕

ដោយៈ គង់ សូរិយា

       ភ្នំពេញៈ ក្រសួងរៀបចំដែនដី នគរូបនីយកម្ម និងសំណង់ និងស្ថានទូតអូស្រ្តាលីប្រចាំកម្ពុជា បានដាក់ឲ្យដំណើរការនូវកម្មវិធីប្រគ​ល់-ទទួល​ “សៀវភៅគោលការណ៍ណែនាំស្តីពីសុខភាព​ និងសុវ​ត្ថិភាពនៅការដ្ឋានសំណង់នៅកម្ពុជា”។

ពិធីនេះបានប្រារពឡើងក្រោមអធិបតីភាព លោកឧបនាយករដ្ឋមន្រ្តីជា សុផារ៉ា រដ្ឋមន្រ្តីក្រសួងរៀបចំដែនដី នគរូបនីយកម្ម និងសំណង់ និងលោកPablo Kang ឯកអគ្គរដ្ឋទូតអូស្រ្តាលីប្រចាំកម្ពុជា។

យោងតាមឯកសាររបស់ក្រសួងបានបង្ហាញឲ្យដឹងថា សៀវភៅនេះ នឹងបំពេញបន្ថែមនូវវិធានការច្បាប់ និងលិខិតបទដ្ឋានគតិយុត្តនានា ដែលជួយដល់កម្មករ និយោជិក ក្រុមហ៊ុនសិក្សាគម្រោងប្លង់ ក្រុមហ៊ុនសាងសង់ និងអ្នកពាក់ព័ន្ធនឹងការងារសាងសង់ ដើម្បីបញ្ចៀសគ្រោះថ្នាក់ផ្សេងៗនៅការដ្ឋានសំណង់ និងផលប៉ះពាល់ជីវិត សុខភាព និងផែនការនៃគម្រោងសាងសង់។

សៀវភៅដ៏មានសារៈសំខាន់នេះ ជាគោលការណ៍ណែនាំដំបូងនៅកម្ពុជា បានបង្កើតឡើងក្រោមកិច្ចព្រមព្រៀងផ្លូវការ លើកិច្ចសហប្រតិបត្តិការពង្រឹង និងលើកកម្ពស់សុវត្ថិភាពការដ្ឋានសំណង់ ដែលបានចុះហត្ថលេខា រវាងក្រសួងដែនដី និងស្ថានទូតអូស្ត្រាលី កាលពីថ្ងៃទី១៦ ខែកញ្ញា ឆ្នាំ២០២១៕

ដោយៈគង់ សូរិយា

       ភ្នំពេញៈ អ្នកជំនាញបានលើកឡើងថា តម្រូវការផ្ទះ ហាង សម្រាប់   ធ្វើអាជីវកម្មនានាបានកើនឡើងវិញ បន្ទាប់ពីវិបត្តិកូវីដ១៩បានស្ងប់ស្ងាត់ ហើយសកម្មភាពសេដ្ឋកិច្ច បានវិលមករកភាពប្រក្រតីឡើងវិញ។

លោកវ៉ន ចាន់ថនអគ្គនាយកក្រុមហ៊ុនTown City Real Estateបានមានប្រសាសន៍ឲ្យដឹងតាមទូរស័ព្ទ កាលពីរសៀលថ្ងៃ ទី២៤ ឧសភានេះថា បច្ចុប្បន្នសកម្មភាពជួលហាង និងផ្ទះធ្វើអាជីវកម្មបានកើនឡើងគួរឲ្យកត់សំគាល់ ដែលសញ្ញាបង្ហាញឲ្យឃើញថា ​ប្រជាពលរដ្ឋចាប់ផ្តើមផ្តោតលើសកម្មភាពអាជីវកម្មឡើងវិញច្រើន ធៀបនឹងវិបត្តិ២ឆ្នាំកន្លងមកនេះ។

លោកបន្តថា “សកម្មភាពអាជីវកម្មកាន់តែល្អ នៅពេលចរន្តសេដ្ឋកិច្ចកាន់តែល្អ ដែលឆ្លុះបញ្ចាំងពីភាពរីកចម្រើនឡើងវិញ ក្នុងទីផ្សារលក់រាយនៅ​កម្ពុជា”។ លោកបានបន្តថា “ការកំរើកឡើងវិញនេះ កំពុងធ្វើឲ្យតម្រួវការShowroom ផ្ទះអាជីវកម្មនៅតាមផ្លូវសំខាន់ៗ មានហាងឆេងឡើងវិញផងដែរ”។

ជាមួយគ្នានេះ ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា លោកច្រឹក សុខនីមបានមានប្រសាសន៍ឲ្យដឹងនៅថ្ងៃដដែលថា ពិតមែនហើយសកម្មភាពអាជីវកម្ម និងហាងលក់ទំនិញនានាបានចាប់ផ្តើមមាន​សញ្ញាសុទិដ្ឋិនិយម​ច្រើន ប៉ុន្តែតម្លៃជួលមិនទាន់កើនឡើងនៅឡើយទេ គឺអ្នកជួលនៅតែមានអំណាចក្នុងការចចារច្រើន។

លោកបន្តថា “ការកើនឡើងនូវតម្រូវការសេវាកម្មជួលហាង ជួលផ្ទះធ្វើអាជីវកម្មវាជាសញ្ញា នៃការងើបឡើងនៃសេដ្ឋកិច្ចជាតិ និងប្រក្រតីភាពនៃ​ការវិលត្រលប់់មកវិញនូវសកម្មភាពសេដ្ឋកិច្ច សង្គម”៕

ដោយៈសុខុម

សេអ៊ូល: ក្រុមហ៊ុន Samsung Group បានប្រកាសនៅថ្ងៃអង្គារ ទី២៤ ខែឧសភានេះថា ខ្លួនមានផែនការបោះទុនវិនិយោគ រហូតដល់ទៅដល់ទំហំទឹកប្រាក់៣៥៦ពាន់លានដុល្លារអាមេរិក នៅរយៈពេល៥ឆ្នាំខាងមុខដើម្បីឱ្យខ្លួនឈានមុខគេ ក្នុងវិស័យជាច្រើនរាប់ចាប់ពីការផលិតបន្ទះឈីបរហូតដល់ការផលិតឱសថ។

ទំហំទុនវិនិយោគថ្មីនេះ គឺកើនឡើងជាង១ភាគ៣ បើធៀបនឹងទំហំវិនិយោគរបស់ខ្លួន ដែលបានចំណាយក្នុងរយៈពេល៥ឆ្នាំកន្លងមក។

ក្រុមហ៊ុនបច្ចេកវិទ្យាខ្នាតយក្សមួយនេះ គឺជាក្រុមហ៊ុនធំជាងគេបំផុតរបស់ប្រទេសកូរ៉េខាងត្បូង ហើយចំណូលសរុបរបស់វាគឺស្មើនឹង១ ភាគ៥នៃផលិតទុនជាតិសរុប (GDP) របស់ប្រទេសនេះ។

ទន្ទឹមនេះក្រុមហ៊ុន Samsung Electronics ដែលជាបុត្រសម្ព័ន្ធរបស់ខ្លួន ក៏ជាក្រុមហ៊ុនផលិតទូរស័ព្ទស្មាតហ្វូន ដ៏ធំបំផុតរបស់ពិភពលោកផងដែរ។

ក្រុមហ៊ុន Samsung បានចេញសេចក្តីថ្លែងការណ៍ថា ផែនការវិនិយោគនឹងនាំមកនូវ “កំណើនរយៈពេលវែង ក្នុងអាជីវកម្មជាយុទ្ធសាស្រ្ត និងជួយពង្រឹងប្រព័ន្ធអេកូឡូស៊ី ឧស្សាហកម្មសកលនៃបច្ចេកវិទ្យាដ៏សំខាន់”។

ក្រុមហ៊ុននេះនិយាយថា ទំហំវិនិយោគនេះ នឹងជួយបង្កើតការងារថ្មីចំនួន៨០.០០០កន្លែង “ជាពិសេសនៅក្នុងអាជីវកម្មស្នូល រួមមាន ទាំងការផលិតបន្ទះឈីប និងការផលិតឱសថ” រហូតដល់ឆ្នាំ២០២៦៕ Bangkok Post៕

ដោយ៖ សុខុម

ឌូបៃ: សម្ព័ន្ធក្រុមហ៊ុនចិន បានបញ្ចប់ការសាងសង់រោងចក្រអគ្គិសនីដើរដោយធ្យូងថ្ម Hassyan Power Plant តម្លៃ៣,៤ពាន់លានដុល្លារអាមេរិក ជាស្ថាពរប្រកបដោយជោគជ័យ នៅថ្ងៃទី១៦ ខែឧសភា ឆ្នាំ២០២២។

នេះបើយោងតាមសារព័ត៌មាន The Global Herald ដែលបានចុះផ្សាយកាលពីថ្ងៃទី១៩ ខែឧសភា។

រោងចក្រនៅក្រុងឌូបៃ ប្រទេសអារ៉ាប់រួមអេមីរ៉ាត ដែលជារោងចក្រអគ្គិសនីដើរដោយធ្យូងថ្មដំបូងបង្អស់ របស់មហាយក្សចិន នៅតំបន់មជ្ឈិមបូព៌ា គឺជាគម្រោងដ៏ធំមួយ ក្រោមគំនិតផ្ដួចផ្ដើមពាណិជ្ជកម្ម “ខ្សែក្រវាត់ និងផ្លូវ” (Belt and Road Initiative) របស់មហាយក្សចិន ដើម្បីតភ្ជាប់សេដ្ឋកិច្ចនានា ឱ្យចូលទៅក្នុងបណ្ដាញពាណិជ្ជកម្មមួយ ដែលយកប្រទេសចិនជាចំណុចកណ្ដាល​។

តាមការរំពឹងទុក រោងចក្រអគ្គិសនីកម្លាំង២.៤០០មេហ្គាវ៉ាត់ (MW) នេះនឹងផលិតអគ្គិសនីបានប្រមាណ២០%នៃតម្រូវការអគ្គិសនីសរុបក្នុងក្រុងឌូបៃ។

ប្រទេសអារ៉ាប់រួមអេមីរ៉ាត បានប្រកាសថា រោងចក្រអគ្គិសនីនេះ នៅចុងបញ្ចប់ នឹងត្រូវផ្លាស់ប្ដូរទៅប្រើប្រាស់ឧស្ម័នធម្មជាតិ ដែលជាផ្នែកមួយនៃការសន្យារបស់អារ៉ាប់រួមអេមីរ៉ាត ថានឹងសម្រេចឱ្យបាននូវគោលដៅ “អព្យាក្រឹតភាពកាបូន”។

យោងតាមការចុះផ្សាយរបស់សារព័ត៌មាន NS Energy ឱ្យដឹងថា ដំណើរការនៃការសាងសង់រោងចក្រនេះបានចាប់ផ្ដើមនៅខែវិច្ឆិកា ឆ្នាំ២០១៦។

រោងចក្រនេះត្រូវបានកាន់កាប់ និងដំណើរការដោយក្រុមហ៊ុន Hassyan Energy Company ដែលជាក្រុមហ៊ុនបណ្ដាក់ទុនរួមគ្នារវាងរដ្ឋាករទឹក និងអគ្គិសនីក្រុងឌូបៃ (Dubai Electricity and Water Authority- ៥១%) និងសម្ព័ន្ធក្រុមហ៊ុនចិន រួមមាន ក្រុមហ៊ុន ACWA Power ក្រុមហ៊ុន Harbin Electric និងមូលនិធិវិនិយោគរបស់រដ្ឋាភិបាលចិន Silk Road Fund (រួមគ្នា៤៩%)៕