ដោយ:លាងហួរ

ចិន ៖ ទិន្នផលធ្យូងថ្មប្រចាំថ្ងៃ របស់ប្រទេសចិន ក្នុងខែមេសា បានកើនឡើង១១ភាគរយ ធៀបនឹងរយៈពេលដូចគ្នាកាលពីឆ្នាំមុន ជំរុញដោយការបញ្ជាទិញរបស់ទីក្រុងប៉េកាំង ក្នុងការបង្កើនការផ្គត់ផ្គង់ ដើម្បីធានាសុវត្ថិភាពនៃការផ្គត់ផ្គង់ថាមពល ខណៈបរិមាណនេះបានធ្លាក់ចុះ ពីកម្រិតខ្ពស់បំផុតនៅក្នុងខែមីនា។

ទិន្នន័យពីការិយាល័យស្ថិតិជាតិ បានបង្ហាញ កាលពីថ្ងៃចន្ទថា ប្រទេសចិន ដែលជាប្រទេសផលិតធ្យូងថ្មលំដាប់កំពូលរបស់ពិភពលោក បានជីកយករ៉ែប្រេងកាតចំនួន៣៦២,៨លានតោន កាលពីខែមុន ស្មើនឹង ១២.០៩លានតោនក្នុងមួយថ្ងៃ។

នោះធៀបនឹងកំណត់ត្រា១២,៧លានតោន ក្នុងមួយថ្ងៃ ក្នុងខែមីនា និង១០,៧៤លានតោន ក្នុងមួយថ្ងៃកាលពីឆ្នាំមុន។ ទិន្នន័យដដែលបានបង្ហាញថា ផលិតកម្មក្នុងអំឡុង ខែមករាដល់ខែមេសា មានចំនួន ១,៤៥ពាន់លានតោន ខ្ពស់ជាងរយៈពេលដូចគ្នា កាលពីឆ្នាំមុន១១ភាគរយ។

ប្រទេសចិនមានបំណងបង្កើនទិន្នផលធ្យូងថ្មប្រចាំថ្ងៃ លើសពី១២,៦លានតោន និងកសាងសារពើភ័ណ្ឌជាតិ ចំនួន៦២០លានតោន ដើម្បីធានាថាមានការផ្គត់ផ្គង់គ្រប់គ្រាន់។

រដ្ឋាភិបាលក៏បានជំរុញឱ្យតំបន់ ដែលពឹងផ្អែកភាគច្រើនលើធ្យូងថ្មនាំចូល ឱ្យចុះកិច្ចសន្យាបន្ថែមទៀត រយៈពេលយ៉ាងហោចណាស់មួយឆ្នាំ ជាមួយអ្នកផលិតធ្យូងថ្មក្នុងស្រុក ដើម្បីធានាការផ្គត់ផ្គង់៕

ធនាគារកណ្តាលរបស់ប្រទេសចិនបាននិយាយថា ដើម្បីគាំទ្រដល់ទិន្នផលកាន់តែច្រើន ខ្លួនបានបែងចែកប្រាក់កម្ចីបន្ថែមចំនួន១០០ពាន់លានយ័ន(១៤.៧ ពាន់លានដុល្លារ) ដែលការផលិត ការស្តុកទុក និងការទិញធ្យូងថ្មដោយរោងចក្រថាមពល។

ភ្នំពេញ៖ វិស័យធានារ៉ាប់រងអាយុជីវិតបានចូលមកក្នុងទីផ្សារប្រទេសកម្ពុជាក្នុងអំឡុងឆ្នាំ២០១២ ហើយកាលនោះកញ្ចប់សេវាកម្មលើការធានារ៉ាប់រងនៅកម្ពុជាគឺមានតម្លៃខ្ពស់ និងមានមនុស្សតិចតួចប៉ុណ្ណោះបានយល់ដឹងនិងហ៊ានប្រើប្រាស់កញ្ចប់សេវាធានារ៉ាប់រងនោះ ។ ប៉ុន្តែបច្ចុប្បន្ននេះ កញ្ចប់សេវាធានារ៉ាប់រងនៅក្នុងប្រទេសកម្ពុជាកាន់តែមានតម្លៃទាបនិងមានក្រុមហ៊ុនកាន់តែច្រើនបានបើកដំណើរការក្នុងប្រទេសកម្ពុជា ។

លោក កែវ សុខវាស្នា នាយកគ្រប់គ្រងអាជីវកម្ម ហ្វីលីពឡាយហ៍អ៊ិនសួររេនបានមានប្រសាសន៍ថា កាលពីមុនប្រជាពលរដ្ឋកម្ពុជាតែងតែមានអារម្មណ៍ថា អត់មានលទ្ធភាព ក្នុងការបង់ប្រាក់ធានារ៉ាប់រងនិងមួយទៀតពួកគាត់មិនមានជំនឿជាក់ទៅលើក្រុមហ៊ុនធានារ៉ាប់រង ។ ចាប់តាំងពីកម្ពុជាមានច្បាប់ធានារ៉ាប់រងនៅក្នុងអំឡុងឆ្នាំ២០១២ ឃើញថាក្រុមហ៊ុនធានារ៉ាប់រងអាយុជីវិតនៅក្នុងប្រទេសកម្ពុជាមានជាង១០ក្រុមហ៊ុនហើយ ដូច្នេះតម្លៃនៃការប្រកួតប្រជែងក៏ចាប់ផ្ដើមកើតឡើងទៅតាមលក្ខខណ្ឌនៃធានារ៉ាប់រង ។

លោកបន្តថាទោះបីជាតម្លៃនៃកញ្ចប់សេវាកម្មធានារ៉ាប់រងមានការប្រកួតប្រជែងយ៉ាងណានោះ គោលដៅរបស់ក្រុហ៊ុននីមួយៗគឺ ធ្វើយ៉ាងណាជួយគាំទ្រសេដ្ឋកិច្ចគ្រួសាររបស់ប្រជាពលរដ្ឋកម្ពុជានៅពេលមានហានិភ័យណាមួយកើតឡើង។ បច្ចុប្បន្ននេះកញ្ចប់សេវាកម្មធានារ៉ាប់រងក្នុងប្រទេសកម្ពុជាគឺមានតម្លៃសមរម្យដែលអាចផ្ដល់លទ្ធភាពឱ្យប្រជាពលរដ្ឋអាចទិញសម្រាប់ធានារ៉ាប់រងលើស្ថានភាពហិរញ្ញវត្ថុរបស់ពួកគាត់ ។លោកថា”បច្ចុប្បន្ននេះ កញ្ចប់ធានារ៉ាប់រងនៅក្នុងប្រទេសកម្ពុជាមានក្រុមហ៊ុនខ្លះលក់ត្រឹមតែ ១០ដុល្លារអាមេរិកក្នុងមួយខែ ហើយតម្លៃនេះខ្ញុំជឿថាមានបងប្អូនប្រជាពលរដ្ឋជាច្រើនមានលទ្ធភាព ក្នុងការទិញប្រើប្រាស់”។

លោកបន្ថែមថា កញ្ចប់សេវាកម្មធានារ៉ាប់រងនៅពេលបច្ចុប្បន្ននេះដែរ ក៏ស្រដៀងនឹងការដាក់ប្រាក់សន្សំនៅក្នុងធនាគារ ។ ឧទាហរណ៍រថាបើសិនជាគាត់ទិញកញ្ចប់ធានារ៉ាប់រង៥ម៉ឺនដុល្លារអាមេរិក ហើយការពារ១០ឆ្នាំ គាត់ត្រូវបង់ជូនក្រុមហ៊ុនប្រមាណ៥ពាន់ដុល្លារអាមេរិកក្នុងមួយឆ្នាំ ហើយបើសិនជាគាត់មានបញ្ហាអ្វីកើតឡើងដល់អាយុជីវិតក្នុងអំឡុង១០ឆ្នាំ នោះគាត់នឹងទទួលបានសំណង៥ម៉ឺនដុល្លារអាមេរិក តែបើសិនជា១០ឆ្នាំនោះគាត់មិនកើតអី ទឹកប្រាក់ដែលគាត់បានបង់នោះ ក៏ត្រូវប្រគល់ជូនគាត់វិញជាមួយនឹងការប្រាក់និងអត្ថប្រយោជន៍ផ្សេងៗទៅតាមគោលការណ៍របស់ក្រុហ៊ុនដែលទិញធានារ៉ាប់រង ។

លោកយក់ ចំរើនឬទ្ធិអគ្គនាយកក្រុមហ៊ុនធានារ៉ាប់រងហ្វតតេក៏បានលើកឡើងផងដែរថា បច្ចុប្បន្ននេះ ប្រជាពលរដ្ឋកម្ពុជាកាន់តែច្រើនបានយល់ដឹងពីការធានារ៉ាប់រង និងបានទិញកញ្ចប់សេវាកម្មធានារ៉ាប់រងសម្រាប់ការពារហិរញ្ញវត្ថុរបស់គាត់ ដែលជំរុញ ឱ្យបុព្វលាភពធានារ៉ាប់រងនៅកម្ពុជាបានកើនឡើងខ្ពស់ ។ ទោះបីជាយ៉ាងណាក្ដី បើធៀបនឹងប្រទេសជិតខាង បុព្វលាភធានារ៉ាប់រងនៅក្នុងប្រទេសមានតិចតួចនៅឡើយ និងបានចូលរួមក្នុងចំណែកសេដ្ឋកិច្ចកម្ពុជាបានតិចតួចនៅឡើយផងដែរ ៕

ដោយ៖ សុផារី

ភ្នំពេញ៖ សម្តេចតេជោ​ ហ៊ុន សែន នាយករដ្ឋមន្រ្តី នៃកម្ពុជា បានមានប្រសាសន៍ព្រមានដកក្រុមហ៊ុនផលិតវ៉ាក់សាំង ពីក្រុមហ៊ុនឯកជន មកឱ្យរដ្ឋដឹកនាំវិញ ខណៈដំណើរការយឺតយ៉ាវ និងគ្មានរបាយការណ៍បញ្ជូនមកកាន់រដ្ឋាភិបាល។

សម្តេចបានលើកឡើងក្នុងពិធីសំណេះសំណាលជាមួយក្រុមគ្រូពេទ្យសម្ដេចតេជោប្រឆាំងកូវីដ១៩ នៅថ្ងៃទី១៧ ខែឧសភា ឆ្នាំ២០២២នេះ។

សម្ដេចតេជោ បញ្ជាក់ធ្ងន់ៗជាមួយរដ្ឋមន្ត្រីក្រសួងសុខាភិបាលថា ក្រុមហ៊ុន ដែលទទួល អាជ្ញាប័ណ្ណ(License) ក្នុងការធ្វើរោងចក្រផលិតវ៉ាកសាំងនៅកម្ពុជារួចហើយ ហេតុអីមិនធ្វើ បើមិនធ្វើ ត្រូវឱ្យក្រុមហ៊ុនផ្សេង ដែលមានសមត្ថភាពធ្វើ។

សម្តេច​ថ្លែងថា បើដំណើរការមានការពិបាកខ្លាំងណាស់ សូមយកមកធ្វើដោយក្រសួងសុខាភិបាលផ្ទាល់តែម្ដង ព្រោះកិច្ចការនេះចាំបាច់ណាស់។

សម្តេចតេជោ ហ៊ុន សែន បញ្ជាក់ថា ខាងភាគីចិនបានលើកឡើងថា ដំណើរការយឺតយ៉ាវនេះ មកពីភាគីកម្ពុជា ខណៈចិន នៅតែរង់ចាំកិច្ចសហការជាមួយកម្ពុជា រឿងផលិតវ៉ាក់សាំង។

សម្ដេចតេជោ ស្នើឱ្យក្រសួងសុខាភិបាលត្រូវធ្វើវឌ្ឍនភាព ស្ដីពីការបង្កើតរោងចក្រផលិតវ៉ាក់សាំងប្រឆាំងកូវីដ១៩នៅក្នុងប្រទេសកម្ពុជា ក្នុងមួយសប្ដាហ៍ម្ដង។

សម្តេចតេជោ ហ៊ុន សែន បានថ្លែងថា ”ខ្ញុំសុំមួយអាទិត្យ រាយការណ៍ឱ្យខ្ញុំម្តង លើរោងចក្រផលិតវ៉ាក់សាំងនៅស្រុកខ្មែរ ព្រោះខាងចិនថា យឺតមកពីខាងយើង។ តើវិស័យឯកជនធ្វើយឺតមកពីអ្វី? ក្រសួងសុខាភិបាលខ្លួនឯង កុំធ្វើការត្រឹកៗ បើពិបាកឱ្យរដ្ឋផលិតតែម្តង ដោយធ្វើដៃគូជាមួយចិន ខ្ញុំជាអ្នកឱ្យចេញលុយពីក្រសួងសេដ្ឋកិច្ច បើឯកជនពិបាកពេក”៕