ដោយ៖ សុផារី

ភ្នំពេញ៖ ដើម្បីស្តារសេដ្ឋកិច្ចរបស់ខ្លួនឡើងវិញពីវិបត្តិជំងឺកូវីដ១៩ និង​វិបត្តិសេដ្ឋកិច្ច ប្រទេសនីមួយៗបានព្យាយាមដណ្តើមចំណែកទីផ្សារ និងការវិនិយោគពីសំណាក់បណ្តាវិនិយោគបរទេសនានា។ ក្នុងនោះ ប្រទេសកម្ពុជាក៏បានព្យាយាមពង្រឹងសមត្ថភាព និង​ទាក់ទាញវិនិយោគិនផងដែរ។

យ៉ាងណាក្តី អ្នកជំនាញលើកឡើងថា ប្រទេសកម្ពុជាជាប្រទេសទិសដៅវិនិយោគ ដែលមានភាពបត់បែនខ្ពស់ ហើយអាចផ្តល់ផលចំណេញខ្ពស់ជាងប្រទេសជិតខាង។

លោក ​ច្រឹក សុខនីម ​ប្រធាន​សមាគម​អ្នកវាយតម្លៃ និ​ងភ្នាក់ងារ​អចលនវត្ថុ បានមានប្រសាសន៍តាមប្រព័ន្ធទូរស័ព្ទ នៅថ្ងៃទី២២ ខែកក្កដាកន្លងមកថា ការវិនិយោគលើអចលនទ្រព្យនៅក្នុងប្រទេសកម្ពុជា នាពេលបច្ចុប្បន្នជាសញ្ញានៃភាពរីកចម្រើនមួយ ពោលគឺផលចំណូលពីការវិនិយោគលើវិស័យអចលនទ្រព្យនៅកម្ពុជាមានចំណូលខ្ពស់ បើប្រៀបធៀបទៅនឹងប្រទេសជិតខាងនៅក្នុងតំបន់។

លោកបានមានប្រសាសន៍ទៀតថា “យ៉ាងណាក្តី ប្រទេសនានា នៅក្នុងតំបន់ក៏បាននិងកំពុងចាប់ផ្ដើមទាក់ទាញអ្នកវិនិយោគមកកាន់ប្រទេសរបស់ខ្លួនដែរ ដូចជាប្រទេសថៃ បានព្យាយាមលើកកម្ពស់អ្នកវិនិយោគច្រើន ដើម្បីគាំទ្រ និងការពារគម្រោងរបស់ពួកគេ”។

ដោយឡែក សម្រាប់ប្រទេសកម្ពុជា លោក សុខនីម លើកឡើងថា កម្ពុជាក៏មានយន្តការគ្រប់គ្រប់ក្នុងការគាំទ្រ និងការពារផងដែរ ដូចជា ការផ្តល់សញ្ជាតិដល់វិនិយោគិនបរទេស ច្បាប់វិនិយោគថ្មី ដែលត្រូវបានបង្គើតមកពិសេសសម្រាប់ការទាក់ទាញជនជាតិបរទេស មក​វិនិយោគនៅក្នុងប្រទេសកម្ពុជា។

លោកបន្តទៀតថា ការប្រកួតប្រជែងនេះអាស្រ័យលើការជ្រើសរើសរបស់អតិថិជន ដែលអាស្រ័យលើគោលបំណងនៃការវិនិយោគ របស់ពួកគាត់ ថាតើគាត់ចង់វិនិយោគ ដើម្បីទាក់ទាញក្នុងវិស័យណាមួយ។

លោកបានគូសបញ្ជាក់ថា “ភាពបត់បែនរបស់ប្រទេសកម្ពុជាយើង ធៀបនឹងបណ្ដាប្រទេសជិតខាង មានភាពបត់បែនច្រើនជាង ដូចជាច្បាប់សញ្ជាតិ ដែលអនុញ្ញាតឱ្យជនជាតិបរទេសមានសិទ្ធិកាន់កាប់អចលនទ្រព្យបាន។ វាជាសញ្ញាល្អមួយ ក្នុងការផ្តល់ភាពរីកចម្រើន នៃវិស័យអចលនទ្រព្យកម្ពុជា”។

យោងតាមរបាយការណ៍ផ្លូវការចុងក្រោយបំផុតរបស់ Global Property Guide បានឱ្យដឹងថា​ ផលចំណេញពីការជួលអចលនទ្រព្យ ធៀបនឹងតម្លៃអចលនទ្រព្យ មានអត្រាខ្ពស់លំដាប់ទី៣ នៅក្នុងតំបន់អាស៊ីទាំងមូល មានចំនួន៥,៣៣ភាគរយ ដោយប្រទេសមានអត្រាខ្ពស់លំដាប់ទី១ គឺប្រទេសឥណ្ឌូណេស៊ី (៧,០៩ភាគរយ) មានអត្រាខ្ពស់លំដាប់ទី២ គឺប្រទេសហ្វីលីពិន (៦,១៣ភាគរយ)។

ប្រៀបធៀបនឹងប្រទេសជិតខាង ប្រទេសកម្ពុជាស្ថិតនៅក្នុងលំដាប់ទី១ ចំណែកប្រទេសថៃ មានផលចំណេញចំនួន៥,១៣ភាគរយ ប្រទេសវៀតណាមមានផលចំណេញចំនួន៤,៣៣ភាគរយ និងប្រទេសឡាវ មិនមានទិន្នន័យបង្ហាញពីផលចំណេញឡើយ៕

ដោយ៖ លាងហួរ

ចិន៖ ប្រទេសចិនគ្រោងនឹងបង្កើតមូលនិធិអចលនទ្រព្យក្នុងទំហំទឹកប្រាក់រហូតដល់៣០០ពាន់លានយន់ (ស្មើនឹង៤៤,៣៩ពាន់លានដុល្លារអាមេរិក) ដើម្បីជួយគាំទ្រអ្នកអភិវឌ្ឍន៍អចលនទ្រព្យជាច្រើន រួមទាំងក្រុមហ៊ុន China Evergrande Group ផងដែរ។

មូលនិធិនេះបានទទួលបានទឹកប្រាក់ចំនួន៥០ពាន់លានយ័ន ពីធនាគារ China Construction Bank និងចំនួន៣០ពាន់លានយ័ន ពីធនាគារប្រជាជនចិន (PBOC)  ដោយមូលនិធិនេះអាចកើនឡើងដល់ចន្លោះពី២០០ ទៅ៣០០ពាន់លានយ័ន។

និយតករ និងរដ្ឋាភិបាលក្នុងតំបន់ នឹងធ្វើការជ្រើសរើសអ្នកអភិវឌ្ឍន៍ ដែលមានសិទ្ធិទទួលបានការគាំទ្រពីមូលនិធិនេះ ដោយបញ្ជាក់បន្ថែមថាមូលនិធិនេះអាចត្រូវបានប្រើ ដើម្បីទិញផលិតផលហិរញ្ញវត្ថុ ដែលចេញដោយអ្នកអភិវឌ្ឍន៍ ឬផ្តល់ហិរញ្ញប្បទានដល់អ្នកទិញនៃគម្រោងរបស់ពួកគេ។

របាយការណ៍មួយបានបង្ហាញថា ទីក្រុងប៉េកាំងក៏កំពុងពិចារណាលើគោលនយោបាយជាតិ សម្រាប់ការចេញលក់មូលបត្របំណុលពិសេស សម្រាប់ការអភិវឌ្ឍឡើងវិញនៅទីក្រុង shantytown ផងដែរ៕

ដោយៈ ស៊ីវ ម៉េង

       ភ្នំពេញៈ ក្រុមហ៊ុនអភិវឌ្ឈន៍អចលនទ្រព្យដ៏ធំ របស់ប្រទេសចិន JOVAN Group បានចុះហត្ថលេខាផ្តល់សិទ្ឋលក់ផ្តាច់មុខ ដល់ក្រុមហ៊ុនPropnex Cambodia ដើម្បីលក់បុរីJOVAN CITY។

ពិធីចុះហត្ថលេខានេះ បានប្រារពធ្វើកាលពីថ្ងៃទី២៣ កក្កដាកន្លងមកនេះ ដោយមានការចូលរួមចុះហត្ថលេខា ដោយលោកAlan Neo នាយកគ្រប់គ្រងទូទៅនៃក្រុមហ៊ុនPropnex Cambodia និងលោកស្រីLiu Yujiao នាយិកាផ្នែកលក់ និងទីផ្សារនៃក្រុមហ៊ុនJOVAN East Asia ជាបុត្រសម្ព័ន្ឋរបស់ក្រុមហ៊ុនJOVAN Group ដែលបានចុះបញ្ជីរនៅផ្សារហ៊ុនទីក្រុងហុងកុង ដោយមានការចូលរួមជាអធិបតីពីលោកKong Jian Mingប្រធានក្រុមហ៊ុនJOVAN Groupនិងភ្ញៀវកិត្តិយសជាច្រើនទៀត។

ក្រុមហ៊ុនJOVAN Group បានទិញដី១៤០ហិកតា ដែលមានតម្លៃលើទីផ្សារ២០០លានដុល្លារអាមេរិក ហើយបើបូកបញ្ចូលថ្លៃសំំណង់ និងការអភិវឌ្ឍន៍នានាក្នុងបុរីនេះ គំរោងវិនិយោគJOVAN CITY គ្រោងចំណា​យទឹកប្រាក់សរុប៨០០លានដុល្លារអាមេរិកបន្ថែមទៀត។ នេះបើតាមការឲ្យដឹងពីលោកKong Jian Mingប្រធានក្រុមហ៊ុនJOVAN Group ដែលបានថ្លែងប្រាប់ក្រុមអ្នកសារព៌តមាន បន្ទាប់ពីពិធីចុះហត្ថលេខាកាលពីថ្ងៃទី២៣ កក្កដាកន្លងមកនេះ។

លោកបន្ថែមថា “គោលដៅនៃការវិនិយោគរបស់JOVAN Group នៅកម្ពុជា គឺដើម្បីចូលរួមលើកកំពស់វិស័យលំនៅដ្ឋាន និងជីវភាពរបស់ប្រជាពលរដ្ឋកម្ពុជាកាន់តែប្រសើរឡើង”។

លោកKong Jian Mingបានបន្តថា ជាមួយនឹងទស្សនទាននៃការអភិវឌ្ឍន៍ដើម្បីលើកកំពស់ វិស័យលំនៅដ្ឋាននៅកម្ពុជា ឲ្យមានភាពទំនើប ស៊ីវិល័យ និងផាសុខភាព និងលើកកំពស់សេដ្ឋកិច្ចកម្ពុជា បានធ្វើឲ្យយើងគិតពីគុណភាពជាចម្បង ជាមួយការឌីសាញលំនៅដ្ឋានទំនើប ទាន់សម័យ និងផ្តោតលើបរិស្ថានបៃតង ពិសេសការរៀបចំLandscapeដ៏ប្រណីត។

ក្រុមហ៊ុនJOVAN Group នឹងរៀបចំការអភិវឌ្ឍបុរីនេះ នូវភាពងាយស្រួលសម្រាប់ការរស់នៅ ដោយក្រុមហ៊ុននឹងមានរៀបចំជាMart ហាងកាហ្វេ និងសេវាកម្មជាច្រើនទៀត។

នាយកប្រតិបត្តិក្រុមហ៊ុនPropNex Cambodia លោក Alan Neoបានមានប្រសាសន៍ឲ្យដឹងផងដែរថា មុនសហការជាមួយក្រុមហ៊ុនJOVAN ក្រុមហ៊ុនPropNex Camnbodia បានធ្វើការសិក្សាទៅលើប្រវត្តិ និងសកម្មភាពវិនិយោគនានា របស់ក្រុមហ៊ុនJOVAN Group ដែលមានមូល ដ្ឋាននៅប្រទេស​ចិន និងចុះបញ្ជីរផ្សារហ៊ុននៅទីក្រុងហុងកុង។

លោកបន្តថា “ក្រុមហ៊ុនPropnex មានកិត្តិយស ដែលបានសហការជាមួយក្រុមហ៊ុនJOVAN ដែលបានមកវិនិយោគ លើការអភិវឌ្ឍលំនៅដ្ឋាន ដើម្បីលើកកំពស់ទីផ្សារលំនៅដ្ឋាន ឲ្យកាន់តែមានការរីកចម្រើនបន្ថែមទៀត”។

ជាមួយគ្នានេះ លោកKong Jian Mingបានមានប្រសាសន៍ឲ្យដឹងផងដែរថា ការសម្រេចចិត្តជ្រើសរើសក្រុមហ៊ុនPropNex Cambodiaដើម្បីទទួលបានសិទ្ឋលក់ផ្តាច់មុខ របស់គំរោងJOVAN CITY គឺដោយសារក្រុមហ៊ុននេះ ជាក្រុមហ៊ុនជាប់លំដាប់ថ្នាក់លេខ១ និងបានចុះបញ្ជីរក្នុងផ្សារហ៊ុន​នៅប្រទេសសឹង្ហបុរី និងជាក្រុមហ៊ុនមានគុណវុឌ្ឍិគ្រប់គ្រាន់ ដែលនឹង

ចូលរួមលើកកំពស់កេរ្ត៍ឈ្មោះ និងជម្រុញការលក់បុរីនេះ ឲ្យទទួលបានជោគជ័យ៕

ដោយៈ សុផារី

ប៉ៃលិនៈ ខេត្តប៉ៃលិនជាខេត្តមួយ ក្នុងចំណោមខេត្តជាប់ព្រំដែន ដែលមានសកម្មភាពពាណិជ្ជកម្ម ជាមួយប្រទេសជិតខាង ដែលនៅមិនទាន់មានភាពទាក់ទាញទៅលើការអភិវឌ្ឍអចលនទ្រព្យច្រើននៅឡើយ។

អ្នកជំនាញមូលដ្ឋានលើកឡើងថា ទីផ្សារអចលនទ្រព្យនៅក្នុងខេត្តមួយនេះមានសភាពយឺតយ៉ាវ ដោយសារកត្តាចំនួនបី។

លោកហេង តុងហៃ ប្រធានសាខាក្រុមហ៊ុន Century 21 Zillion Holding ប្រចាំខេត្តប៉ៃលិន បានមានប្រសាសន៍តាមប្រព័ន្ធតេឡេក្រាមនៅរសៀលថ្ងៃទី២២ ខែកក្កដាកន្លងមកថា មូលហេតុដែលខេត្តនេះមិនសូវទាក់ ទាញការវិនិយោគ ដោយសារកត្តាមួយចំនួន ដូចជា កត្តាទី១ ដោយសារតែខេត្តប៉ៃលិ នមានរយៈចម្ងាយឆ្ងាយពីរាជធានីភ្នំពេញ រួមផ្សំនឹងកង្វះប្រព័ន្ធហេដ្ឋារចនាសម្ព័ន្ធធំៗ។ ពីរាជធានីភ្នំពេញ មកកាន់ខេត្តប៉ៃលិនមានចម្ងាយប្រមាណ គីឡូម៉ែត្រ។

កត្តាទី២ បណ្តាលមកពី ខេត្តប៉ៃលិនជាខេត្តថ្មីមួយដែរ ដែលទើបផ្តាច់ចេញពីខេត្តបាត់ដំបង ហើយមានប្រជាជនហូរចូលមករស់នៅ ក្នុងខេត្តថ្មីមួយនេះតិចតួចនៅឡើយ។

លោករំលឹកថា កាលពីដំបូងៗ សម្បូរដីព្រៃច្រើន ដែលធ្វើឱ្យមានអាការៈចាញ់ទៀត ធ្វើឱ្យមិនសូវមានភាពអ៊ូអរខ្លាំងនោះទេ ប៉ុន្តែមួយរយៈ ចុងក្រោយនេះ ស្ថានភាពសុខភាពរបស់ប្រជាពលរដ្ឋ មានភាពល្អប្រសើរច្រើនហើយ។
លោកបញ្ជាក់ថា “ចម្ងាយផ្លូវឆ្ងាយ ស្ថានភាពផ្លូវនៅមិនទាន់មានភាពល្អប្រសើរទៀត។ ការអភិវឌ្ឍរបស់រាជរដ្ឋាភិបាលនៅតំបន់ក្បែរៗនេះ នឹងនាំឱ្យអចលនទ្រព្យខេត្តយើង មានភាពរីកចម្រើនជាងនេះ”។

កត្តាសំខាន់ទី៣ បណ្តាលមកពីកង្វះខាត ការជំរុញវិនិយោគពីបរទេ​ស មកកាន់ខេត្តថ្មីមួយនេះផងដែរ។
លោកតុងហៃរំពឹងថា នាពេលអនាគត នឹងមានការវិនិយោគបន្ថែមពីអ្នកវិនិយោគិនបរទេស ដើម្បីជំរុញឱ្យអចលនទ្រព្យ នៅខេត្តប៉ៃលិនមានភាពរីកចម្រើន៕

ដោយៈវឌ្ឍនៈ

ភ្នំពេញៈ ទីផ្សារខុនដូនៅក្នុងប្រទេសកម្ពុជា ត្រូវបានមើលឃើញថាចាប់ផ្ដើមមានសន្ទុះកំណើនឡើងវិញ នៅត្រីមាសទី២នៃឆ្នាំ២០២២នេះ ដោយការដ្ឋានខុនដូដែលបានផ្អាកដំណើរការ បាននិងកំពុងចាប់ផ្ដើមដំណើរការសាងសង់ឡើងវិញ។

ជាមួយគ្នានេះ ការទិញ លក់លើទីផ្សារក៏ឃើញថា ចាប់មានសកម្មនិងសន្ទុះជាបន្តបន្ទាប់ផងដែរ។ អ្វីដែលពិសេសនៅចុងឆ្នាំ២០២២នេះ ទីផ្សារខុនដូរំពឹងថា នឹងមានកំណើនកាន់តែខ្ពស់ ហើយនឹងធ្វើឱ្យតម្រូវការខុនដូ កើនឡើងខ្ពស់ផងដែរ។

លោក Marcus chu អគ្គនាយកក្រុមហ៊ុន ERA ប្រចាំតំបន់អាស៊ីប៉ាស៊ីហ្វិក បានថ្លែងនៅក្នុងវេទិកាមួយ កាលពីចុងសប្ដាហ៍កន្លងទៅថា ទីផ្សារខុនដូ នៅក្នុងតំបន់អាស៊ីអាគ្នេយ៍នេះ បានហក់ងើបឡើងវិញហើយ ក្រោយពីស្ងប់ស្ងាត់ ដោយសារតែវិបត្តិកូវីដ១៩មួយរយៈ។ ជាក់ស្ដែងទីផ្សារខុនដូ នៅក្នុងប្រទេសសិង្ហបុរីនាពេលនេះ សឹងតែរកខុនដូលក់លែងបានហើយ បានន័យថា តម្រូវការខុនដូក្នុងប្រទេសនេះ បានហក់ឡើងខ្លាំង ជាពិសេសលំហូរជនជាតិចិននៅក្នុងប្រទេសសិង្ហបុរី ។

លោកបន្តថា ដោយមើលឃើញពី ជនជាតិចិនបានចេញក្រៅប្រទេសឡើងវិញ ក្រោយពីវិបត្តិកូវីដ១៩ ទៅកាន់ប្រទេសផ្សេងៗនាពេលនេះ លោកគិតថា កម្ពុជានឹងទទួលបានវិនិយោគិនចិន និងទេសចរចិននៅរយៈពេល៣ទៅ៤ខែខាងមុខ ហើយក៏ជាពេលវេលា ដែលទីផ្សារខុនដូនៅក្នុងប្រទេសកម្ពុជា នឹងមានសន្ទុះកើនឡើងបន្ថែមទៀតផងដែរ។

ចំណែកលោក ខន គង្គា អគ្គនាយកក្រុមហ៊ុនERA Cambodia ក៏បានលើកឡើងផងដែរថា បើសិនជាចិនចូលមកកម្ពុជា ហើយស្វែងរកទិញខុនដូនោះ វាជាឱកាសសម្រាប់អ្នកអភិវឌ្ឍន៍ខុនដូ នៅក្នុងប្រទេសកម្ពុជាយើង ហើយចិនបើគាត់ទិញហើយ គាត់មិនមែនទិញតែមួយនោះទេ ពួកគាត់អាចតិញបួនដប់ខុនដូ ហើយទុកលក់បន្តទៅចិនគ្នាគាត់ ឬទិញជាក្រុមតែម្ដង ។

លោកបន្តថា “ស្ថានភាពទីផ្សារខុនដូ នៅក្នុងប្រទេសកម្ពុជាលោកមើលឃើញថា ចាប់ផ្ដើមមានសកម្មភាព កម្រើកឡើងវិញបន្តបន្ទាប់វិញ”។លោកបន្ថែមថា “ជាក់ស្ដែងលទ្ធផលដែលក្រុមហ៊ុនERA ទទួលបានក្នុងរយៈពេល៦ខែកន្លងមកនេះ គឺវាបានបង្ហាញពីភាពប្រសើរខ្លាំង បើធៀបនឹងរយៈពេលដូចគ្នាកាលពីឆ្នាំមុន”។

យ៉ាងណាក្ដី បើតាមភ្នាក់ងារលក់ខុនដូផ្សេងទៀត ក្នុងប្រទេសកម្ពុជាបានលើកឡើងថា ទីផ្សារបច្ចុប្បន្ននៅមិនទាន់ប្រសើរខ្លាំងទេ បើទោះបីជាស្ថានភាពកូវីដ១៩ នៅក្នុងប្រទេសកម្ពុជាបានប្រសើរ ប៉ុន្តែបណ្ដាប្រទេសមួយចំនួននៅបន្តរឹតបន្តឹង ហើយក៏ជួបនូវវិបត្តិសង្គ្រាមរវាងរុស្ស៊ី និងអ៊ុយក្រែនបន្តទៀត៕

ដោយៈ គង់ សូរិយា

ភ្នំពេញៈ អភិបាលរងរាជធានីភ្នំពេញ លោកកើត ឆែបានលើកឡើងនូវកត្តាសំខាន់ៗចំនួនពីរ ដែលជម្រុញឲ្យវិស័យអចលនទ្រព្យ ពិសេសលំនៅ ដ្ឋាននៅកម្ពុជាមានភាពរីកចម្រើន។

លោកបានមានប្រសាសន៍បែបនេះ ក្នុងកម្មវិធីសម្ភោធបុរីមួយកាលពី​ថ្ងៃទី២៤ កក្កដាកន្លងមកនេះ។

លោកកើត ឆែបានបន្តថា “ការវិនិយោគនៅប្រទេសកម្ពុជា ពិសេសលើវិស័យអចលនទ្រព្យ មានភាពរីកចម្រើនខ្លាំងក្លា នាពេលបច្ចុប្បន្ននេះ មានកត្តា២យ៉ាង នោះគឺកត្តាសន្តិភាព និងមានស្ថិរភាពនយោបាយ ដែលកម្ពុជាពិសេសសម្តេចតេជោ ហ៊ុន សែន នាកយរដ្ឋមន្ត្រីនៃកម្ពុជា ប្រឹងប្រែងរកបានមកដោយលំបាក”។

លោកបន្តថា ការបើកសម្ពោធគម្រោងអភិវឌ្ឍលំនៅដ្ឋាន របស់ក្រុមហ៊ុនខាងលើនេះ ពិតជាបានបង្ហាញអោយឃើញ ពីភាពជោគជ័យថ្មីមួយទៀត របស់រាជរដ្ឋាភិបាលកម្ពុជា ដែលមានសម្តេចតេជោ ហ៊ុន សែន ជាប្រមុខដឹកនាំ ដោយបានកៀរគរ អ្នកវិនិយោគឱ្យមកវិនិយោគនៅកម្ពុជា មានការរីកចម្រើន។ ៤៣ឆ្នាំនេះ ភ្នំពេញបានប្រែមុខមាត់ថ្មីតាមរយៈការអភិវឌ្ឍ។

លោកកើត ឆែ បន្តទៀតថា “ការវិនិយោគនៅប្រទេសកម្ពុជា ពិសេ​សវិស័យអចលនទ្រព្យមានភាពរីកចម្រើនខ្លាំងក្លា គឺផ្តើមចេញមកពីកត្តា២យ៉ាង នោះគឺកត្តាសន្តិភាព និងកត្តាស្ថិរភាពនយោបាយ”។ លោកបានបញ្ជាក់ថា “ប្រទេសកម្ពុជា បើគ្មានសន្តិភាពពេញលេញទេ គឺគ្មាននរណាហ៊ានមកបណ្តាក់ទុនរកស៊ីនោះទេ។ គេមិនអាចយកលុយមករកស៊ី ដោយភាពប្រថុយប្រថាននោះទេ”។

ចំពោះកត្តាស្ថេរភាពនយោបាយវិញ កម្ពុជាមានតាំងពីឆ្នាំ១៩៩៨ រហូតមកដល់ពេលបច្ចុប្បន្ននេះ ដែលធ្វើឲ្យកំណើនសេដ្ឋកិច្ចចេះតែកើនឡើង ក្នុងរង្វង់៧ភាគរយ ក្នុងរយៈពេល៣០ឆ្នាំ លើកលែងតែបរិបទកូវីដ-១៩ រយៈពេល២ឆ្នាំប៉ុណ្ណោះ។ កត្តាទាំង២នេះនឹងធ្វើឲ្យកម្ពុជាដើរលើនាវាអភិវឌ្ឍន៍ដ៏ឆាប់រហ័ស។

លោកកើត ឆែ បានបន្តទៀតថា វិស័យឯកជន ជាដៃគូរមិនអាចខ្វះបានជាមួយរាជរដ្ឋាភិបាល។ ដើម្បីរក្សាបាននូវភាពរឹងមាំ ជាមួយវិស័យឯកជន រាជរដ្ឋាភិបាល តែងបង្កើតឡើងជាវេទិកាសាធារណៈ ជារៀងរាល់ឆ្នាំជាមួយវិស័យឯកជន៕

ដោយៈ គង់ សូរិយា

ភ្នំពេញៈ ក្រុមហ៊ុនអចលនទ្រព្យធំមួយ ក្នុងចំណោមក្រុមហ៊ុនធំទាំង៥០របស់ប្រទេសចិន បានបោះទុនវិនិយោគទឹកប្រាក់រហូត ដល់១០០០លាន​ដុល្លារដើម្បីសាងសង់បុរីនៅកម្ពុជា។

ក្រុមហ៊ុនJOVAN GROUPបានទិញដី១៤០ហិកតា នៅតំបន់ផ្លូវជាតិលេខ៦អា ដើម្បីសាងសង់បុរី ដែលផ្តោតលើលំនៅដ្ឋានប្រណីត ស៊ីវិល័យ​ ព្រមទាំងផ្តោតលើLandscape ដំបូងគេនៅកម្ពុជា។

លោកKong Jian Mingប្រធានក្រុមហ៊ុនJOVAN Groupបានមានប្រសាសន៍ឲ្យដឹងកាលពីថ្ងៃទី២៣ កក្កដាថា ក្រុមហ៊ុនJOVAN មានដើមកំណើតនៅខេត្តជេចៀន ប្រទេសចិន ដែលបានអភិវឌ្ឍ​ន៍តាមនិន្នាការរបស់រដ្ឋាភិបាលចិន ហើយដោយសាររដ្ឋាភិបាលចិន មានទំនាក់ទំនងល្អជាមួយរដ្ឋាភិបាលកម្ពុជា។

លោកបន្តថា ក្រុមហ៊ុនJOVAN បានវិនិយោគនៅជុំវិញពិភពលោក និងកំពុងចាប់អារម្មណ៍តំបន់អាស៊ីអាគ្នេយ៍ និងភាពជាមិត្តភាពដែកថែបរវាងប្រទេសចិន និងកម្ពុជា និងស្របតាមគំរោងគំនិតផ្តួចផ្តើមខ្សែក្រវ៉ាត់ និងផ្លូវរបស់ប្រទេសចិន។

លោកបន្ថែមថា “អ្វីកាន់តែពិសេស ខ្ញុំបានមើលឃើញសេដ្ឋកិច្ចកម្ពុជា មានការរីកចម្រើន ក្នុងរង្វង់៧ភាគរយក្នុងមួយឆ្នាំ ទើបយើងសម្រេចចិត្តបោះទុនវិនិយោគនៅទីនេះ”។លោកបន្តថា “គោលដៅនៃការវិនិយោគរបស់JOVANនៅកម្ពុជា គឺចូលរួមលើកកំពស់វិស័យលំនៅដ្ឋាន និងជីវភាពរបស់ប្រជាពលរដ្ឋកម្ពុជាកាន់តែប្រសើរឡើង”។

ក្រុមហ៊ុនJOVAN Group បានទិញដី១៤០ហិកតា ដែលមានតម្លៃទីផ្សារ២០០លានដុល្លារ ហើយបើបូកបញ្ចូលថ្លៃសំំណង់ និងការអភិវឌ្ឍន៍នានា គឺគំរោងវិនិយោគJOVAN CITY គ្រោងចំណាយទឹកប្រាក់សរុប១០០០លានដុល្លារអាមេរិក។

លោកKong Jian Mingបានបន្តថា​ ក្រុមហ៊ុនរបស់យើងសម្រេចចិត្ត បោះទុនវិនិយោគនៅកម្ពុជា ដោយសារកត្តាមួយចំនួន ដូចជា ទី១ ប្រទេសនេះមានប្រជាជនវ័យក្មេងច្រើន ទី២ ផលទុនជាតិសរុប ស្ថិតក្នុងររង្វង់៧ភាគរយក្នុងមួយឆ្នាំ ទី៣​កម្ពុជា ជាប្រទេសមានស្ថេរភាពនយោ​បាយ​ ទី៤ និន្នាការនគរូបនីយកម្ម នៅទីក្រុងនៃបណ្តាប្រទេសនានា មានការរីកចម្រើន ដូចគ្នានឹងកម្ពុជានាពេលអនាគត ដែលប្រជាជនរស់នៅរាជធានីភ្នំពេញ នឹងកើនដល់ចន្លោះពី៦ ទៅ៨លាននាក់ ដែលនឹងធ្វើឲ្យតម្រូវការលំនៅដ្ឋាននឹង​មានការកើនឡើង៕