ដោយសហការី

ភ្នំពេញ: ក្រុមហ៊ុន ERA Cambodia ដែល​ជាក្រុមហ៊ុនជំនាញដោយផ្តោតលើឯកទេសផ្នែកទិញ លក់ និងជួល ខុនដូ មានយីហោដើមពីសហរដ្ឋអាមេរិក បានរៀបចំកម្មវិធីបូកសរុបសមិទ្ធិផល និងការទទួលស្គាល់នូវភាពជោគជ័យរបស់ភ្នាក់ងារដែលសម្រេចបានរយៈពេលពាក់កណ្តាលឆ្នាំ ២០២២ និងការដាក់ចេញផែនការសកម្មភាពបន្តបន្ទាប់ ដើម្បីពង្រីកវិសាលភាពក្នុងការចាប់យកចំណែកទីផ្សារខុនដូដែលកំពុងមានការរីកចម្រើននៅកម្ពុជា។

ក្រុមហ៊ុន ERA Cambodia បានរៀបចំកម្មវិធីទទួលស្គាល់សមិទ្ធិផល និងអាជីពការងារ ឬហៅថា Career Advancement Day នៅឯភោជនីយដ្ឋានទន្លេបាសាក់ II។ ក្រុមហ៊ុនតែងរៀបចំកម្មវិធីនេះឡើងជារៀងរាល់ឆ្នាំ ក្នុងការជំរុញលើកទឹកចិត្ត និងតម្រង់ទិសដៅក្រុមការងារ និងភ្នាក់ងារលក់ ដើម្បីបង្កើនស្មារតីនៃការខិតខំ និងបន្តផ្តល់សេវាកម្មប្រកបដោយគុណភាព និងវិជ្ជាជីវៈខ្ពស់ក្នុងទីផ្សារដែលកំពុងមានភាពប្រកួតប្រជែង។ ​​

អគ្គនាយកក្រុមហ៊ុន ERA Cambodia លោក ខន គង្គា បានលើកឡើងថា ក្រុមហ៊ុនតែងបង្កបរិយាកាសការងារល្អៗដល់បុគ្គលិកទាំងការបណ្តុះ​បណ្តាល និងតែងរៀបចំកម្មវិធីធំៗ ដើម្បីបង្ហាញការទទួលស្គាល់ពីសមិទ្ធិផល តាមរយៈការផ្តល់ពានរង្វាន់ វិញ្ញាបនបត្រ និងដំឡើងតួនាទីជាដើម។ ​

លោកថ្លែងថា៖ «ទោះឋិតក្នុងស្ថានភាពដែលបង្កឡើងដោយបញ្ហាកូវីដ-១៩ ក៏ភ្នាក់ងារលក់របស់យើងនៅតែបន្តការខិតខំ និងបោះជំហានឥតឈប់ឈ ដើម្បីជួយសម្រួលការទិញ លក់ ដល់អតិថិជន។ ហើយទាំងនេះក៏ព្រោះតែអតិថិជនចាប់ផ្តើមយល់ដឹងកាន់តែច្រើនលើការប្រើប្រាស់ក្រុមហ៊ុនដែលផ្តល់សេវាកម្មស្តង់ដារ មានភ្នាក់ងាររាប់រយពាន់នាក់ មានការទទួលស្គាល់ពីស្ថាប័នជាតិ និងអន្តរជាតិ ដែលតែងតែផ្តល់ទំនុកចិត្តខ្ពស់សម្រាប់អតិថិជន ក៏ដូចជាម្ចាស់គម្រោង»។

កម្មវិធី Career Advancement Day របស់ក្រុមហ៊ុន ERA Cambodia ទទួលបានការចូលរួមសហការគាំទ្រពីគម្រោងអភិវឌ្ឍន៍ខុនដូធំៗដូចជាគម្រោង Morgan EnMaison, La Vista, R&F និងគម្រោងខុន Time Square​ ហើយម្ចាស់គម្រោងខុនដូទាំងនេះក៏បានប្រកាសបញ្ចុះតម្លៃពិសេស ខណៈដែលក្រុមហ៊ុន Z1 FINANCIAL ដែលជាក្រុមហ៊ុនអភិវឌ្ឍន៍ថ្នាលបច្ចេកវិទ្យាវិនិយោគដោយផ្តោតលើវិស័យអចលនទ្រព្យតាមបែបបច្ចេកវិទ្យា Blockchain​​ ក៏បានបង្ហាញវត្តមានជាអ្នកគាំទ្រដ៏សំខាន់នៅក្នុងកម្មនេះផងដែរ។​

ERA Real Estate ជាក្រុមហ៊ុនអចលនទ្រព្យលំដាប់ពិភពលោកត្រូវបានបង្កើតឡើងក្នុងឆ្នាំ ១៩៧២ មានមូលដ្ឋាននៅសហរដ្ឋអាមេរិក។ បច្ចប្បន្នក្រុមហ៊ុនអចលនទ្រព្យលំដាប់ពិភពលោកមួយនេះមានភ្នាក់ងារអាជីពប្រមាណ ៤០ ០០០នាក់ ជាមួយការរិយាល័យប្រតិបត្តិការដល់ទៅ ២ ២០០ ការិយាល័យ នៅទូទាំង ៣៧ ប្រទេសលើពិភពលោក​។

ម៉ាកយីហោអចលនទ្រព្យ ERA Real Estate ត្រូវបាននាំចូលមកកម្ពុជា ហើយប្រតិបត្តិការក្រោមឈ្មោះ ERA Cambodia ចាប់តាំងពីឆ្នាំ២០១៨ ដែលដឹកនាំដោយលោក ខន គង្គា ជាអគ្គនាយក និងនាយកប្រតិបត្តិ។ ERA Cambodia ជាក្រុមហ៊ុន​មានឯកទេសទិញ លក់ និងជួល​ខុនដូ ដោយ​ផ្ដោតលើ​តំបន់​សំខាន់៣រួមមាន រាជធានីភ្នំពេញ ខេត្តព្រះសីហនុ និងខេត្តសៀមរាប។ បច្ចុប្បន្ន​ក្រុមហ៊ុន​មានភ្នាក់ងារប្រមាណ ​១ ៥០០នាក់ សម្រាប់​បម្រើសេវាកម្មទិញ លក់ និងជួលខុនដូនៅកម្ពុជា។

រយៈពេលជាង ៤ ឆ្នាំនៃវត្តមានក្រុមហ៊ុន ERA Cambodia បើកដំណើរការនៅក្នុងទីផ្សារកម្ពុជា ក្រុមហ៊ុននេះទទួលបានការសហការដើម្បីលក់គម្រោងខុនដូធំៗជាង៣០គម្រោង ដែលទុនវិនិយោគនៃគម្រោងទាំងនេះបូកបញ្ចូលគ្នាមានតម្លៃខ្ទង់ពាន់លានដុល្លារអាមេរិក។

បើតាមអគ្គនាយកក្រុមហ៊ុន ERA Cambodia លោក ខន គង្គា បានបញ្ជាក់ថា រយៈពេល៤ឆ្នាំចុងក្រោយនេះ យុវជនកម្ពុជាដែលរស់នៅទីក្រុងភ្នំពេញដែលទិញខុនដូតាមរយៈ​ក្រុមហ៊ុន ERA Cambodia ភាគច្រើនគឺជាយុវជនក្នុងស្រុកដែលមានវ័យចន្លោះពី ២៥ ទៅ ៣៥ឆ្នាំ និងមួយចំនួនទៀតជាពលរដ្ឋខ្មែរ​រស់នៅបរទេស ទិញទុកវិនិយោគ។​​ លោកបន្ថែមថា អនាគតខុនដូនឹង​ក្លាយជាតម្រូវការចម្បងរបស់យុវជនកម្ពុជា ហើយរាជធានីភ្នំពេញជាទីតាំងយុទ្ធសាស្រ្តសម្រាប់ការផ្គត់ផ្គង់ខុនដូ៕

ដោយៈ សុផារី

ប្រទេសចិនៈ កាលពីឆ្នាំមុន មានព័ត៌មានអំពីក្រុមហ៊ុនអចលនទ្រព្យធំៗរបស់ចិន ដូចជាក្រុមហ៊ុន Evergrande ដែលបានពន្យាពេលសងបំណុលជាមួយក្រុមហ៊ុនដៃគូ ដែលរហូតពេលនេះ វិស័យអចលនទ្រព្យរបស់ប្រទេសចិន នឹងមិនប៉ះពាល់ដល់ក្រុមហ៊ុនតែមួយទេ ប៉ុន្តែកំពុងប៉ះពាល់ដល់អាជីវកម្មអចលនទ្រព្យចិនស្ទើរតែទាំងអស់។

សារព័ត៌មាន Bloomberg ចុះផ្សាយនៅថ្ងៃទី២១ ខែកក្កដា ឆ្នាំ២០២២នេះថា ពេលនេះអតិថិជន ដែលទិញអចលនទ្រព្យនៅចិន បានឈប់សងបំណុលអចលនទ្រព្យ លើគម្រោងជាង៣០១ នៅក្នុងទីក្រុងចំនួន៩១ ដោយសារតែអ្នកអភិវឌ្ឍន៍អចលនទ្រព្យ មិនអាចបញ្ចប់ការសាងសង់ និងប្រគល់ផ្ទះទាន់ពេលកំណត់ ទោះបីជាអតិថិជនបានខ្ចីលុយ ដើម្បីបង់រួចហើយក៏ដោយ។

ជាទូទៅ ការកក់អចលនទ្រព្យនៅក្នុងប្រទេសចិន មានលក្ខណៈខុសប្លែកពីប្រទេសផ្សេង ដោយការកក់ផ្ទះ ឬការទិញផ្ទះ ត្រូវបង់ប្រាក់កម្ចីភ្លាមៗ មុនពេលផ្ទះល្វែងត្រូវបានសាងសង់បញ្ចប់។

តើអ្វីដែលធ្វើឱ្យអាជីវកម្មអចលនទ្រព្យ របស់ប្រទេសចិនឈានមកដល់ចំណុចនេះ?។

មានមូលហេតុឬកត្តាជាច្រើន ដែលបណ្តាលឲ្យវិស័យនេះដាំក្បាលចុះ ដែលកត្តាទាំងនោះរួមមាន កត្តាទី១ កំណើនសេដ្ឋកិច្ចចិន ដែលបានរីកលូតលាស់លឿនរហ័ស បន្ទាប់ពីប្រទេសចាប់ផ្តើមអភិវឌ្ឍន៍ ចេញពីសេដ្ឋកិច្ចដែលពឹងលើកសិកម្ម ទៅជាពឹងលើឧស្សាហកម្មតាំងពី២០ឆ្នាំមុន។ ជាលទ្ធផល ប្រាក់ចំណូលរបស់ប្រជាជនមានការកើនឡើង ហើយចាប់ផ្តើមស្វែងរកកន្លែងស្នាក់នៅល្អជាងមុន ដូចជា “ផ្ទះល្វែង” ជាដើម ដើម្បីលើកកម្ពស់គុណភាពជីវិតឱ្យកាន់តែប្រសើរឡើង។

កត្តាទី២ ក្រុមកម្លាំងពលកម្មនៅក្នុងប្រទេសចិនមានចំនួនច្រើន ដែលមានតម្រូវការផ្ទះល្វែងខ្ពស់ៗជាច្រើន។ ក្រុមហ៊ុនអចលនទ្រព្យចិន ក៏បានចាប់ផ្ដើមឃើញឱកាសក្នុងអាជីវកម្មមួយនេះ។ អាជីវកម្មអចលនទ្រព្យនៅប្រទេ​សចិន បាននិងកំពុងរីកចម្រើនឥតឈប់ឈរ អស់រយៈពេល២០ឆ្នាំ ហើយដែលមានកំណើនច្រើនជាង GDP នៅប្រទេសចិនទៅទៀត។

សារព័ត៌មាន CNN ចុះផ្សាយនៅថ្ងៃទី១៤ ខែកក្កដា ឆ្នាំ២០២២ថា ទិន្នន័យផ្លូវការបង្ហាញថា ពីឆ្នាំ២០០០ ដល់ឆ្នាំ២០២១ GDP របស់ប្រទេសចិនបានកើនឡើង១៤ដង ខណៈវិស័យអចលនទ្រព្យរបស់ប្រទេសចិន កើនឡើង៤៤ដង។ បច្ចុប្បន្ននេះ វិស័យអចលនទ្រព្យរបស់ប្រទេសចិន គ្របដណ្តប់ជាង៣០ភាគរយ នៃGDPរបស់ប្រទេសចិន ដែលនេះជាសមាមាត្រធំបំផុតនៅលើពិភពលោក។

ទោះយ៉ាងណាក្តី អចលនទ្រព្យចិនរីកចម្រើនក្នុងទំហំធំពេក ដែលលើសពីតម្រូវការជាក់ស្តែង បានបណ្តាលឱ្យមានបញ្ហា ក្នុងការចំណាយលើការសាងសង់ ដែលវាមិនមានតុល្យភាពនឹងតម្លៃ នៃចំនួនយូនីតដែលត្រូវបានកក់ឡើយ។

កត្តាទី៣ ការរាតត្បាតនៃជំងឺកូវីដ-១៩ បានធ្វើឱ្យសេដ្ឋកិច្ចចិនធ្លាក់ចុះ និងធ្វើឱ្យបំណុលគ្រួសារបន្តកើនឡើង។ បំណុលគ្រួសារប្រៀបធៀបនឹង GDP បានកើនឡើងពី៥៥,៥ភាគរយ ក្នុងឆ្នាំ២០២០ ដល់៦១,៦ភាគរយ ក្នុងឆ្នាំ២០២២ ដែលធ្វើឱ្យប្រជាជនចិនជាច្រើន គ្មានគំនិតចង់ទិញអចលនទ្រព្យទេ ជាពិសេសនៅក្នុងទីក្រុងធំៗ។

សារព័ត៌មាន Bloomberg ចេញផ្សាយនៅថ្ងៃទី៦ ខែកក្កដា ឆ្នាំ២០២២នេះ បានស្រង់សម្តីលោក Zhang Xiaojing នាយកវិទ្យាស្ថានជាតិហិរញ្ញវត្ថុ និងអភិវឌ្ឍន៍ថា បំណុលសរុបរបស់ចិន ប្រៀបធៀបនឹងផលិតផលក្នុងស្រុកសរុប ត្រូវបានព្យាករណ៍ថា នឹងកើនឡើង១១,៣ពិន្ទុភាគរយ ឡើងដល់រង្វង់២៧៥% នៅឆ្នាំ២០២២នេះ។

កត្តាទី៤ ការខ្ចីប្រាក់របស់ក្រុមហ៊ុនអចលនទ្រព្យទាំងនោះ ដើម្បីវិនិយោគលើមុខជំនួញផ្សេងទៀត ដូចជា អាជីវកម្មសួនកម្សាន្ត ផ្សារទំនើប ក្លឹបបាល់ទាត់ រួមទាំងអាជីវកម្មរថយន្តអគ្គិសនីជាដើម ហាក់មិនបានទទួលផលល្អប្រសើរដូចដែលរំពឹងនោះទេ។ ហេតុនេះហើយ ធ្វើឱ្យក្រុមហ៊ុនអចល​នទ្រព្យជាច្រើនចាប់ផ្តើមចំណាយច្រើន និងជំពាក់បំណុលគេយ៉ាងច្រើន។

ក្រុមហ៊ុនអចលនទ្រព្យចិន កំពុងប្រឈមមុខនឹងបញ្ហាសាច់ប្រាក់ ដោយសារមិនមានប្រាក់គ្រប់គ្រាន់ សម្រាប់ចំណាយលើការសាងសង់ របស់អ្នកផ្គត់ផ្គង់នោះទេ ហើយត្រូវបែងចែកលុយច្រើន ដើម្បីសងបំណុលផងនោះ ដែលធ្វើឱ្យមិនអាចសាងសង់គំរោងបញ្ចប់ទាន់ពេលវេលាបាន។

បន្ថែមលើសនេះ អ្នកទិញអចលនទ្រព្យខ្លះ បានសងប្រាក់កម្ចីរបស់ពួកគេក្នុងរយៈពេលជាច្រើនឆ្នាំ។ ប៉ុន្តែផ្ទះល្វែង នៅតែសាងសង់មិនទាន់ចប់ រហូតដល់អ្នកទិញជាច្រើន បានប្រមូលផ្តុំគ្នាឈប់បង់រំលស់ផ្ទះ ជាមួយធនាគារ ដែលធ្វើឲ្យបញ្ហាកង្វះសាច់ប្រាក់កាន់តែធ្ងន់ធ្ងរឡើង នៃក្រុមហ៊ុនអចលនទ្រព្យឈានមុខទាំងនេះ។

តើវិបត្តិខាងលើនេះប៉ះពាល់យ៉ាងណាដល់អចលនទ្រព្យនៅកម្ពុជា?

ឆ្លើយតបនឹងសំណួររបស់អ្នកសារព័ត៌មាន នៅក្នុងសន្និសិទមួយនៅដើមខែកក្កដា ឆ្នាំ២០២២នេះ អ្នកនាង គឹម គិនកេសា ជាអ្នកស្រាវជ្រាវជាន់ខ្ពស់ផ្នែកអចលនទ្រព្យរបស់ក្រុមហ៊ុន CBRE Cambodiaបានមានប្រសា​សន៍ថា វិបត្តិអចលនទ្រព្យនៅក្នុងប្រទេសចិន អាចជះឥទ្ធិពលមកកាន់ផ្នែកជាច្រើន មិនថានៅក្នុងប្រទេសចិន និងផ្នែកនានានៃពិភពលោកទាំងមូល ប៉ុន្តែសម្រាប់កម្ពុជាមានបញ្ហា ដែលសំខាន់ និងគួរផ្តោតអារម្មណ៍ជាជាងបញ្ហាវិបត្តិអចលនទ្រព្យ ដែលកំពុងកើតមានឡើងនៅក្នុងប្រទេសចិន។

អ្នកនាងយល់ថា “ជាការពិតសេដ្ឋកិច្ចកម្ពុជា និងប្រទេសចិនមានទំនាក់ទំនងគ្នា។ ប្រសិនបើសម្លឹងមើលលើលំហូរវិនិយោគ របស់ប្រទេសចិន មកកាន់សេដ្ឋកិច្ចរបស់ប្រទេសនានា បញ្ហាអចលនទ្រព្យនេះកើតឡើងនៅក្នុងប្រទេសចិនក៏ពិតមែន តែវាជះឥទិ្ធពលដល់ផ្នែកសំខាន់ៗ នៅក្នុងប្រទេសចិន ក៏ដូចជាសហរដ្ឋអាមេរិក អឺរ៉ុប ជាដើម”។

អ្នកនាងមានប្រសាសន៍ថា សម្រាប់កម្ពុជា ទោះបីជាទុនវិនិយោគបរទេសភាគច្រើន នៃអចលនទ្រព្យនៅក្នុងប្រទេសកម្ពុជា ហូរចូលមកពីប្រទេសចិនក្តី តែកម្ពុជាក៏មានប្រភពទុនវិនិយោគ វិស័យអចលនទ្រព្យពីសំណា​ក់ប្រទេសផ្សេងទៀតជាច្រើន ដូចជា ប្រទេសសិង្ហបុរី ហុងកុង ប្រទេសនានានៅក្នុងតំបន់អាស៊ី ជាដើម”។

អ្នកនាងបន្តថា “ក្នុងបរិបទតម្រូវការរបស់អតិថិជន មានភាពស្រដៀងគ្នាដែរ ជាពិសេសសម្រាប់ការអភិវឌ្ឍន៍ ដែលកំពុងកើនឡើងយ៉ាងខ្លាំងនៅកម្ពុជា ជនជាតិចិនត្រូវបានកំណត់ជាអតិថិជនគោលដៅ”។ អ្នកនាងបន្ថែមថា “យ៉ាងណាក្តី ក៏មានតម្រូវការពីសំណាក់អ្នកទិញសញ្ជាតិផ្សេងៗ ក្រៅពីជនជាតិចិនផងដែរ”។

ទោះជាយ៉ាងណាក្តី អ្នកជំនាញរូបនេះលើកឡើងថា បញ្ហាប្រឈម ដែលគួរឱ្យកត់សម្គាល់ជាងនេះនោះ រួមមាន ផលប៉ះពាល់លើអំណាចទិញរបស់ប្រជាជនកម្ពុជា ចំណូលជាមធ្យមរបស់អតិថិជនកម្ពុជា បញ្ហាអតិផរណា ការកើនឡើងនៃអត្រាការប្រាក់ខ្ពស់ ជាបញ្ហាដែលអាចជះឥទិ្ធពលដល់តម្រូវការសម្រាប់អចលនទ្រព្យ និងដើមទុនវិនិយោគរបស់អ្នកអភិវឌ្ឍន៍នៅក្នុងប្រទេសកម្ពុជា៕

ដោយ: លាងហួរ

សឹង្ហបុរី: តម្លៃ ផ្ទះ ឯកជន ក្នុង ប្រទេស សឹង្ហ បុរី បាន កើនឡើង ក្នុង ល្បឿន លឿន ជាង មុន ៣,៥ភាគរយ ក្នុង ត្រីមាស ទី២ឆ្នាំ នេះ ដែល កើនឡើង៥ដង បើធៀប នឹង ការ កើនឡើង ០,៧ភាគរយ ក្នុង ត្រីមាស មុន។

សន្ទស្សន៍តម្លៃអចលនទ្រព្យលំនៅដ្ឋានឯកជន បានកើនឡើងដល់១៨០,៩ក្នុងត្រីមាសទីពីរ កើនឡើងពី១៧៤,៨ ក្នុងរយៈពេលបីខែមុន នេះបើយោងតាមស្ថិតិអចលនទ្រព្យ ដែលចេញផ្សាយដោយអាជ្ញាធរអភិវឌ្ឍន៍ទីក្រុង (URA)នៅថ្ងៃសុក្រនេះ។

តម្លៃខុនដូបានកើនឡើង៣,៦ភាគរយ នៅក្នុងត្រីមាសទី២ បើធៀបនឹងការថយចុះ០,៣ភាគរយនៅក្នុងត្រីមាសទីមួយ។

តម្លៃអចលនទ្រព្យ នៅតំបន់កណ្តាលទីក្រុង បានកើនឡើង១,៩ភាគរយ ខណៈតំបន់ផ្សេងទៀតនៃតំបន់កណ្តាល បានកើនឡើង៦,៤ភាគរយ។ ចំណែកតម្លៃខុនដូ នៅក្រៅតំបន់កណ្តាលបានកើនឡើង២,១ភាគរយនៅក្នុងត្រីមាសទីពីរ។

តម្លៃលំនៅឋានផ្ទាល់ដី(landed-home) បានកើនឡើង២,៩ភាគរយ នៅក្នុងត្រីមាសទីពីរនៃឆ្នាំនេះ ធៀបនឹងការកើនឡើង៤,២ភាគរយក្នុងរយៈពេលបីខែដំបូងនៃឆ្នាំ២០២២។

ប្រតិបត្តិការលក់បន្តមានចំនួនប្រហែល៦២,២ភាគរយ នៃប្រតិបត្តិការលក់ទាំងអស់នៅក្នុងត្រីមាសទីពីរ។ មានប្រតិបត្តិការលក់បន្តចំនួន៤២៣៦យូនីត នៅក្នុងត្រីមាសចុងក្រោយនេះ បើធៀបនឹងប្រតិបត្តិការលក់ចំនួន៣៣៣៧យូនីតក្នុងរយៈពេលបីខែមុន៕

ដោយៈ គង់ សូរិយា

ភ្នំពេញៈ លោកទេសរដ្ឋមន្រ្តីស៊ុន ចាន់ថុលរដ្ឋមន្រ្តីក្រសួងសាធារណៈ​ការ និងដឹកជញ្ជូនបានបង្ហើបឲ្យដឹងថា សម្ដេចតេជោនាយករដ្ឋមន្ត្រីបានជម្រុញការកសាងផ្លូវកំពង់ឆ្នាំង កំពង់ធំ បាត់ដំបង-សៀមរាប ដែលជាប្រព័ន្ធភស្តុភារកម្មប្រកបដោយប្រសិទ្ធភាព។

លោកបានមានប្រសាសន៍បែបនេះព៌តមាននេះ នៅក្នុងកិច្ចប្រជុំកាលពីថ្ងៃទី២១ កក្កដាកន្លងមកនេះ ដែលមានការចូលរួមពីមន្រ្តីពាក់ព័ន្ឋ និងថ្នាក់ដឹកនាំក្រុមហ៊ុន YCH។

កន្លងមកការសាងសង់ស្ពាន តភ្ជាប់ពីខេត្តកំពង់ឆ្នាំង ទៅកាន់ស្រុកកំពង់លែង ដោយភ្ជាប់ទៅកាន់តំបន់កំពង់ថ្ម ក្នុងស្រុកបារាយណ៍ ខេត្តកំពង់ធំ ត្រូវបានជម្រុញ និងសិក្សាដោយក្រុមហ៊ុនចិន ប៉ុន្តែដោយសារបញ្ហាវិបត្តិកូវីដ១៩ បានធ្វើឲ្យគំរោងសាងសង់ហេដ្ឋារចនាសម្ព័ន្ឋជាច្រើន ត្រូវពន្យាពេល។

ជាមួយគ្នានេះ ការសិក្សាលើការសាងសង់ផ្លូវតភ្ជាប់ រវាងខេត្តសៀម​រាប ទៅកាន់ក្រុងបាត់ដំបង ឆ្លងកាត់ទន្លេសាបក៏បាននិងកំពុងសិក្សាបញ្ចប់ផងដែរ។ នេះបើតាមការឲ្យដឹងពីលោកទេសរដ្ឋមន្រ្តីស៊ុន ចាន់ថុល។

សម្តេចតេជោហ៊ុន សែននាយករដ្ឋមន្រ្តីនៃកម្ពុជាធ្លាប់បានមានប្រសា​សន៍ឲ្យដឹងនាពេលកន្លងមកថា គំថរោងសាងសង់ហេដ្ឋារចនាសម្ព័ន្ឋមួយចំនួន ដែលមិនមានភាពចាំបាច់ត្រូវបានលើកពេល ដើម្បីទុកប្រាក់សម្រាប់​ការប្រយុទ្ឋនឹងជំងឺកូវីដ១៩។

សម្តេចធ្លាប់បានមានប្រសាសន៍ថា “តំបន់ណាដែលអាចឆ្លងសាឡាងបាន ត្រូវបន្តឆ្លងសាឡាងបន្ត ព្រោះគំរោងសាងសង់ស្ពានមួយចំនួនអាចត្រូវលើកពេល”៕