ដោយៈលាងហួរ

តៃវ៉ាន់ៈ របាយការណ៍របស់ទីភ្នាក់ងារអចលនទ្រព្យ Savills នាពេលថ្មីៗនេះបានបង្ហាញថា ទំហំនៃការលក់សរុបនៃអចលនទ្រព្យ នៅតៃវ៉ាន់ក្នុងត្រីមាសទីមួយនៃឆ្នាំ២០២២នេះ បានធ្លាក់ចុះរហូតដល់៣៣ភាគរយ ដែលទំហំទឹកប្រាក់មានត្រឹម១.១ពាន់លានដុល្លារអាមេរិក។

កង្វះក្នុងការផ្គត់ផ្គង់ ដូចជាអគារចាស់ៗ ដែលអាចកែច្នៃអោយមានសក្តានុពលឡើងវិញ ឬរោងចក្រដែលសមស្របនឹងតម្រូវការអ្នកប្រើប្រាស់ គឺជាហេតុផលចម្បង នៅពីក្រោយកម្រិតសកម្មភាពទាប។

ទោះជាយ៉ាងណាក៏ដោយ ក្រុមហ៊ុនធានារ៉ាប់រងបានបង្ហាញពីចំណាប់អារម្មណ៍ខ្លាំង ដោយបានទិញអចលនទ្រព្យ ដែលមានតម្លៃរហូតដល់ទៅ២១ពាន់លានដុល្លារដែលស្មើនឹង៦១% នៃទំហំការលក់សរុប​ នៅក្នុងត្រីមាសទី១មុនពេលអត្រាការប្រាក់កើនឡើង។

នៅក្នុងកិច្ចព្រមព្រៀងមួយ ក្រុមហ៊ុន China Life បានទិញអគារការិយាល័យកម្រិតA នៅក្នុងទីក្រុង Taichung ក្នុងតម្លៃជាង៤០០លានដុល្លា​រ ដែលជាកិច្ចព្រមព្រៀងដ៏ធំបំផុតមិនធ្លាប់មាន នៅក្នុងទីក្រុងមួយនេះ​។

លើសពីនេះក្រុមហ៊ុន TransGlobe Life បានទិញផលប័ត្រអចលនទ្រព្យនៅទីក្រុង Hsinchu រួមជាមួយនឹងប្រភេទទ្រព្យសកម្មចម្រុះជាច្រើន រួមមានសណ្ឋាគារ២៥៧បន្ទប់ អគារការិយាល័យតូចមួយ និងអគារដែលកាន់កាប់ដោយប្រតិបត្តិករ KTV ។ អ្នកលក់បានផ្តល់រចនាសម្ព័ន្ធ និងជួលត្រឡប់មកវិញសម្រាប់រយៈពេល២០ឆ្នាំ ជាមួយនឹងទិន្នផលរំពឹងទុកលើសពី៣ភាគរយ។

នៅក្នុងលក្ខខណ្ឌនៃទីផ្សារដីធ្លី ការលក់ដីធ្លីសរុបបានឈានជិតដល់២ពាន់លានដុល្លារអាមេរិក នៅក្នុងត្រីមាសទី១ ដែលជាកម្រិតដូចគ្នាបើធៀបទៅនឹងឆ្នាំមុន ហើយអ្នកអភិវឌ្ឍន៍មានចំនួន៧២% នៃចំនួនអ្នកអភិវឌ្ឍសរុប។ ទោះបីជារដ្ឋាភិបាល និងធនាគារកណ្តាល បានដាក់ចេញនូវវិធានការមួយចំនួនដើម្បីដោះស្រាយការឡើងថ្លៃផ្ទះ រួមទាំងការរឹតបន្តឹងឥណទានរបស់អ្នកអភិវឌ្ឍន៍ និងអ្នកទិញផ្ទះក៏ដោយ ក៏ទីផ្សារលំនៅដ្ឋាននៅតែមានភាពល្អប្រសើរ។

ទោះជាយ៉ាងណាក៏ដោយ ការកើនឡើងយ៉ាងឆាប់រហ័ស នៃតម្លៃសាងសង់ ធ្វើអោយតម្លៃផ្ទះ អាចធ្លាក់ចុះមានសង្ឃឹមតិចតួចណាស់ ក្នុងរយៈពេលដ៏ខ្លីខាងមុខនេះ៕

ដោយ៖ សុខុម

ហុងកុង: វិបត្តិក្រុមហ៊ុន China Evergrande ដែលជាក្រុមហ៊ុនអភិវឌ្ឍន៍អចលនទ្រព្យធំបំផុតទី២ របស់ប្រទេសចិន បានបង្កចលាចលមិនត្រឹមតែក្នុងវិស័យអចលនទ្រព្យនៅប្រទេសចិន ប៉ុណ្ណោះទេ ថែមទាំងធ្វើឱ្យរង្គោះរង្គើទីផ្សារពិភពលោកទៀតផង។

ដើម្បីរម្ងាប់ចលាចលនេះ រដ្ឋាភិបាលក្រុងប៉េកាំង បានដាក់ចេញវិធានការជាបន្តបន្ទាប់ ដើម្បីសម្រាលវិបត្តិសាច់ប្រាច់របស់ក្រុមហ៊ុន China Evergrange ដែលជំពាក់បំណុលច្រើនបំផុត ដល់ទៅជាង៣០០ពាន់លានដុល្លារអាមេរិក និងក្រុមហ៊ុនផ្សេងៗទៀត។

ទោះជាយ៉ាងណា ស្ថានភាពក្នុងទីផ្សារអចលនទ្រព្យប្រទេសចិន ហាក់មិនធូរស្រាល ហើយបែរជាកាន់តែធ្ងន់ធ្ងរទៅៗ ដោយក្រុមហ៊ុនអភិវឌ្ឍន៍ចិន ជាច្រើនរួមទាំងក្រុមហ៊ុន Sunac China ដែលធំបំផុតទី៣ របស់ប្រទេសនេះផងបានខកខានសងបំណុលជាបន្តបន្ទាប់។

តួយ៉ាងពេលនេះ ក្រុមហ៊ុនអភិវឌ្ឍន៍ចិន Zhongliang Holdings កំពុងព្យាយាមសុំម្ចាស់បំណុល ពន្យារពេលសងប្រាក់ចំនួន៧២៩លានដុល្លារអាមេរិក មុនឱសានវាទមកដល់នៅសប្ដាហ៍ក្រោយ ដើម្បីជៀសផុតពីការខនខានសងបំណុលនៅក្រៅប្រទេស។ នេះបើយោងតាមសារព័ត៌មាន CNA ចុះផ្សាយនៅថ្ងៃសុក្រ ទី១៣ ខែឧសភា។

ក្រុមហ៊ុន ដែលមានមូលដ្ឋាននៅក្រុងសៀងហៃ កំពុងជួបវិបត្តិលក់ផ្ទះមិនចេញ ស្របពេលវិស័យអចលនទ្រព្យ ក្នុងប្រទេសចិន ដាំក្បាលចុះខ្លាំង ហើយបានបង្ខំចិត្តប្ដូរស្ថាប័នធនាគារ ដើម្បីខ្ចីថែមយកលុយសងអ្នកវិនិយោគ លើមូលបត្របំណុលរបស់ខ្លួន ដែលដល់ពេលកំណត់ នៅខែឧសភា និងខែកក្កដា។

ការខកខានសងថ្លៃមូលបត្របំណុល ពីសំណាក់ក្រុមហ៊ុន Zhongliang Holdings នឹងធ្វើឱ្យអ្នកវិនិយោគមានការព្រួយបារម្ភកាន់តែខ្លាំង អំពីវិស័យអចលនទ្រព្យក្នុងប្រទេសចិន ខណៈរដ្ឋាភិបាលក្រុងប៉េកាំង កំពុងព្យាយាមស្ដារ និងពង្រឹងទំនុកចិត្តមកលើសេដ្ឋកិច្ចប្រទេសចិន។

ទោះបីជាក្រុមហ៊ុន Zhongliang Holdings ទទួលបានការយល់ព្រម ពីម្ចាស់បំណុលពន្យារពេលសងមួយឆ្នាំទៀតក្ដី ក៏ក្រុមហ៊ុនអភិវឌ្ឍន៍ ដែលកំពុងមានបញ្ហាសាច់ប្រាក់មួយនេះ នឹងត្រូវបង់ប្រាក់បន្ថែមចំនួន១,២៥លានដុល្លារអាមេរិកបន្ថែមទៀត លើមូលបត្របំណុលរបស់ខ្លួន នៅពេលនេះ ដោយសាររូបិយប័ណ្ណយ័នធ្លាក់ថ្លៃ។

លោក Albert Yau នាយកផ្នែកហិរញ្ញវត្ថុនៃក្រុមហ៊ុន Zhongliang Holdings និយាយថា “ស្ថានភាពពេនេះកាន់តែធ្ងន់ធ្ងរទៅៗហើយ” ដោយលោកបានប្រៀបធៀបស្ថានភាពបច្ចុប្បន្ន ទៅនឹងការដាំក្បាលចុះខ្លាំងនៃប្រាក់យ័ន ក្នុងឆ្នាំ២០១៨៕

ដោយ៖ សុផារី

រតនគិរី៖ សកម្មភាពទិញលក់អចលនទ្រព្យ ជាពិសេសលើដីប្រភេទកសិកម្ម ក្នុងខេត្តរតនគិរី បាននិងកំពុងមានភាពប្រសើរឡើងវិញច្រើន ដោយសារវត្តមាននៃវិនិយោគិនទាំងក្នុងស្រុក និងក្រៅស្រុក និងការជំរុញអភិវឌ្ឍហេដ្ឋារចនាសម្ព័ន្ធនានានៅក្នុងខេត្ត​។

លោក យ៉ូន សុខរិន​ ប្រធានសាខារបស់ក្រុមហ៊ុន Century 21 Zillion Holding ប្រចាំខេត្តរតនគិរី បានឱ្យដឹងថា ក្នុងរយៈពេលប៉ុន្មានឆ្នាំចុងក្រោយ តម្រូវការនៃដីធ្លីសម្រាប់កសិកម្ម មានការកើនឡើងខ្ពស់ខ្លាំង ដោយសារលំហូរអ្នកវិនិយោគ ពីភ្នំពេញមកកាន់ខេត្តរតនគិរី មានច្រើន ដោយភាគច្រើនមកវិនិយោគលើចម្ការកៅស៊ូ ដែល​មានទំហំធំចាប់ពី១០ហិចតា ទៅ២០ហិចតាឡើងទៅ។

ទោះបីមានទីតាំងនៅឆ្ងាយពីទីក្រុងភ្នំពេញក្តី កត្តាអាកាសធាតុល្អ ដីអំណោយផលលើដំណាំច្រើនមុខ តម្លៃដីធ្លីនៅទាប និងសម្បូរច្រើន និងការប្រកបរបររកស៊ីទទួលទាន បានធ្វើឱ្យកំណើនប្រជាជនចំណាកស្រុកមកពីខេត្តនានា ដូចជា ខេត្តក្រចេះ ខេត្តត្បូងឃ្មុំ ខេត្តកំពង់ចាម មករស់នៅក្នុងខេត្តរតនគិរីមានចំនួនកើនឡើងច្រើនជាលំដាប់ ពីមួយឆ្នាំ​ទៅមួយឆ្នាំ។

លោកថា “ដោយសារដីនៅទីនេះនៅធូរថ្លៃជាងនៅតាមបណ្តាខេត្តអភិវឌ្ឍហើយ ដីមានជីវជាតិល្អ អាកាសធាតុល្អ ការរស់នៅស្រួល គួបផ្សំនឹងខាងរដ្ឋាភិបាល និងរដ្ឋបាលខេត្តរៀបចំកសាង និងពង្រីកប្រព័ន្ធហេដ្ឋរចនាសម្ព័ន្ធផងនោះ ធ្វើឱ្យខេត្តមាន​ភាពទាក់ទាញបន្ថែម”។

បើតាមអ្នកឯកទេសដីធ្លីប្រចាំតំបន់រូបនេះ បានឱ្យ​ដឹង​ថា​ ទីតាំងដីធ្លីកសិកម្មក្នុងតំបន់ជិតទីរួមខេត្ត មានតម្លៃដាក់លក់ជាមធ្យម៣ម៉ឺនដុល្លារ ក្នុងមួយហិចតា ស្របពេលដែលទីតាំងដីនៅជុំវិញផ្សារ និងនៅជិតរង្វង់មូលខេត្ត មានតម្លៃខ្ពស់​រហូតសល់ ៣ទៅ៣ម៉ឺន៥ពាន់ដុល្លាក្នុងមួយម៉ែត្រដើរ សម្រាប់ដី ដែលមានទទឹងប្រហែល១០ម៉ែត្រ និងបណ្តាយ២០ទៅ៣០ម៉ែត្រ ហើយតម្លៃនេះប្រែប្រួលទៅតាមប្រវែងដីជម្រៅដីធ្លីនោះ។

លោក ឡុក​ ពិសិដ្ឋ មន្រ្តីរាជការប្រចាំខេត្តរតនគិរី និង​ជាម្ចាស់ចម្ការធំមួយ​នៅក្នុងខេត្តរតនគិរី បាន​បង្ហើបថា វិស័យ​ដីធ្លី នៅក្នុងខេត្តរតនគិរីមានការធ្លាក់ចុះបន្ទិច ដោយសារផលប៉ះពាល់ពីកូវីដ១៩ ប៉ុន្តែមួយរយៈចុងក្រោយនេះ បានចាប់ផ្តើមងើបឡើងវិញបណ្តើរៗហើយ ដោយសារវត្តមាន​នៃទេសចរចូលមកកំសាន្ត និងការសកម្មឡើងវិញនៃការទិញលក់ដីធ្លី ជាពិសេសលើដីប្រភេទកសិកម្ម។

លោកមាន​ប្រសាសន៍ថា “វិស័យដីធ្លីពេលកូវីដ វាធ្លាក់ចុះនិងស្ងាត់ ពេលស្បើយកូវីដ មានភ្ញៀវទេសចរមកលេង វាងើបឡើងវិញ ជាពិសេស វិស័យដីធ្លី លើការដាំដំណាំ ជាពិសេសដីនៅជុំវិញមាត់បឹង​ចាប់ផ្តើមងើបឡើងវិញខ្លាំង”។

បើតាមលោកពិសិដ្ឋ រដ្ឋាភិបាលបានចាប់ផ្តើមអភិវឌ្ឍប្រព័ន្ធហេដ្ឋារចនាសម្ព័ន្ធនានា ដែលបាន​នឹងកំពុងជំរុញសក្តានុពលវិស័យដីធ្លី និង​តម្លៃដីនៅតាមតំបន់ទាំងនោះឱ្យ​មាន​កំណើនមួយកម្រិតទៀត។

លោកបានបន្តថា “ដោយសារខេត្តកាន់តែអភិវឌ្ឍផ្លូវថ្នល់ ផ្លូវជុំវិញផ្សារ ផ្លូវជុំវិញខេត្ត ដោយចាប់ផ្តើមចាក់កៅស៊ូ និងធ្វើផ្លូវធំៗ និយាយទៅដីវាងើបតាមហ្នឹងដែរហើយ។​ ឥឡូវ ខេត្តចាប់ផ្តើមអភិវឌ្ឍស្អាតណាស់”។

លោកពិសិដ្ឋបញ្ជាក់ថា នៅក្នុងខេត្តរតនគិរី បច្ចុប្បន្ននេះ ដីកសិកម្មត្រូវបាននិយមទិញក្នុងការដំាំចុះប្រភេទដំណាំ ដូចជា ប័រ សាវម៉ាវ ធុរេន ចន្ទី កៅស៊ូ ជាដើម។​

លោក មាឃ រិទ្ធីជ័យ ប្រធានសាខាក្រុមហ៊ុន Century 21 Zillion Holding ប្រចាំខេត្តមណ្ឌលគិរីបានមានប្រសាសន៍ថា ខេត្តរតនគិរីជាខេត្តកសិឧស្សាហកម្ម សម្បូរចម្ការធំៗច្រើន ភាគច្រើនជាដីចម្ការដាំដំណាំ ឬជាដីរបស់ក្រុមហ៊ុន ឬចម្ការរបស់អ្នករស់នៅក្នុងតំបន់នេះ ដូចជា ចម្ការកៅស៊ូ ម្រេច ស្វាយចន្ទីជាដើម។

អ្នកនាង Yoko Lee អ្នកភ្នំពេញមួយរូប ដែល​បានផ្លាស់ប្តូរទីលំនៅទៅចាប់យកអាជីពជាកសិករទំនើបមួយរូបនៅក្នុងខេត្តរតនគិរី បាន​មាន​ប្រសាសន៍ឱ្យ​ដឹង​នៅថ្ងៃទី១២ ខែឧសភានេះថា ដីធ្លីនៅក្នុងខេត្ត និងតំបន់ជុំវិញ នៅមាន​ដី​ល្អៗច្រើន ហើយតម្លៃក៏នៅធូរថ្លៃផងដែរ ដែល​សាកសមបំផុតសម្រាប់ការវិនិយោគលើចំការដំណាំ ជាពិសេស ចំការដំណាំប្រភេទធំៗ។

អ្នកនាងបញ្ជាក់ថា តម្លៃដីធ្លីនៅក្នុងខេត្តមាន​ការ​ប្រែប្រួល ទៅតាមប្រភេទដី ថា​ជាប្រភេទដីសម្រាប់ធ្វើចម្ការ ដីក្នុងក្រុង ជាយក្រុង ដីទទេរ ដីនៅជិតផ្សារ ដោយអ្នកនាងក៏មិនអាចបញ្ចាក់តម្លៃជាក់ស្តែងបានដែរ អាស្រ័យតាម​ស្ថានភាពជាក់ស្តែងនៃ​ដីនោះ។

ជាម្ចាស់ចម្ការផ្លែឈើចម្រុះលើផ្ទៃដីជាច្រើនហិចតា អ្នកនាង Yoko បាន​បញ្ជាក់ថា នៅក្នុងឆ្នាំ២០២២នេះ ចម្ការរបស់អ្នកនាងបានផ្តល់ទិន្នផលល្អប្រសើរណាស់ ជាពិសេសលើដំណាំផ្លែប័រ ហើយក៏រំពឹងថា ផលដំណាំធុរេន​នឹងទទួលបានទិន្នផលគាប់ប្រសើរផងដែរ៕

ដោយៈ និស្ស័យ

ព្រះសីហនុៈ គំរោងអគារដែលបានជាប់គាំងនានា នៅក្រុងព្រះសីហនុបានចាប់ផ្តើមសាងសង់ឡើងវិញបណ្តើរៗហើយ ស្របពេលសកម្មភាពសេដ្ឋកិច្ចចាប់ផ្តើម មានសកម្មភាពកាន់តែប្រសើរឡើង។

អ្នកនាំពាក្យរដ្ឋបាលខេត្តព្រះសីហនុ លោកឃាង ភារម្យបានមានប្រសាសន៍ឲ្យដឹងតាមទូរស័ព្ទកាលពីថ្ងៃទី១២ ឧសភាម្សិលម៉ិញថា រហូតមកទល់ពេលនេះ សកម្មភាពសេដ្ឋកិច្ចនីខេត្តព្រះសីហនុ បានចាប់ផ្តើមវិវត្តន៍មករកភាពល្អប្រសើរឡើងវិញបណ្តើរៗហើយ ពិសេសលំហូរភ្ញៀវទេសច​រណ៍ក្នុងស្រុកកំពុងមានកំនើនខ្ពស់ ធៀបជាមួយជនបរទេស។

លោកបន្តថា “ជាមួយគ្នានេះ សកម្មភាពសាងសង់បានចាប់ផ្តើមឡើងវិញបណ្តើរៗផងដែរ នៅក្នុងក្រុងព្រះសីហនុ ព្រោះអ្នកវិនិយោគបរទេសបានចាប់ផ្តើមធ្វើដំណើរចេញចូលឡើងវិញ”។ លោកបន្តថា “យើងខ្ញុំបាននិងកំពុងស្នើឲ្យមន្ទីរជំនាញ ដើម្បីសិក្សាមើលថាតើមានអគារប៉ុន្មានបាននិងកំពុងសាងសង់ឡើងវិញ និងអគារប៉ុន្មានបន្តផ្អាកផងដែរ”។

ខេត្តព្រះសីហនុ ក្នុងរយៈពេលប៉ុន្មានឆ្នាំចុងក្រោយនេះ ទទួលបានទុនវិនិយោគរហូតដល់ ប្រមាណ ៨០០០លានដុល្លារអាមេរិក ជាកំនើនមួយដ៏ខ្ពស់ ដែលបានធ្វើឲ្យទីក្រុងនេះផ្លាស់ប្តូរមុខមាត់យ៉ាងឆាប់រហ័ស។

លោកច្រឹក សុខនីមប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជាបានមានប្រសាសន៍ថា ស្ថានភាពនៅក្នុងខេត្តព្រះសីហនុ ចាប់ផ្តើម​មានសកម្មភាពឡើងវិញបណ្តើរៗហើយ ចាប់តាំងពីដើមឆ្នាំនេះមក ប៉ុន្តែសកម្មភាពទិញលក់ នៅមានកម្រិតនៅឡើយ ពិសេសទីផ្សារជួលមិនទាន់ងើបឡើងនោះទេ បន្ទាប់ពីវាបានហក់ឡើងដល់កម្រិតកំពូលមួយ។

លោកបន្តថា “អ្នកវិនិយោគបរទេស បានចាប់ផ្តើមហូរចូលមកបណ្តើរៗហើយ ដើម្បីចាប់ផ្តើមគំរោងរបស់ខ្លួនឡើងវិញ”។លោកបន្តថា “ការវិនិ​យោគលើវិស័យអចលនទ្រព្យ វិលទៅរកសភាពដើមវិញ វាត្រូវការពេលវេលាបន្ថែមទៀត”៕

ដោយៈវឌ្ឍនៈ

សៀមរាបៈ ផ្លូវ៣៨ខ្សែ ដែលរដ្ឋាភិបាលបានចំណាយទុនវិនិយោគប្រមាណ១៦០លានដុល្លារនៅខេត្តសៀមរាប បានដាក់ឱ្យដំណើរការអស់រយៈពេលជាង២ខែមកហើយ។

ហេដ្ឋារចនាសម្ព័ន្ឋសំខាន់ៗទាំងនេះ បាននិងកំពុងហុចផលប្រយោ​ជន៍ ដល់អចលនទ្រព្យក្នុងខេត្តសៀមរាប និងបានធ្វើឱ្យវិនិយោគិនជាតិនិងអន្តរជាតិចាប់ផ្ដើមសម្លឹងមើល ការវិនិយោគនៅក្នុងខេត្តមួយនេះផងដែរ។

លោកសំ សីហា ប្រធានក្រុមហ៊ុនអចលនទ្រព្យ Century 21 Zillion Holding ប្រចាំខេត្តសៀមរាបបានមានប្រសាសន៍តាមទូរសព្ទឱ្យដឹងនារសៀលថ្ងៃទី១៣ ឧសភានេះថា ការអភិវឌ្ឍហេដ្ឋារចនាសម្ព័ន្ធមិនថាទឹក ភ្លើង និងផ្លូវគឺសុទ្ធតែហុចសក្ដានុពល ទៅលើវិស័យអចលនទ្រព្យ ក្នុងនោះដែរផ្លូវ៣៨ខ្សែនៅក្រុងសៀមរាបក៏ដូចគ្នា គឺនឹងហុចសក្ដានុពលដល់ការវិនិយោគនៅក្នុងខេត្តសៀមរាបទាំងមូល ជាក់ស្ដែងពេលនេះវាក៏បានទាក់ទាញការវិនិយោគជាបន្តបណ្ដើរហើយ ។

លោកបន្តថា “បើសិនជាចង់ឱ្យវាទាក់ទាញកាន់តែខ្លាំងថែមទៀត គឺវាត្រូវការពេលវេលាបន្តិច អាចពី៦ខែទៅ២ឆ្នាំនោះ យើងនឹងពីឥទ្ធិពលនៃតម្លៃដីធ្លី កំណើនវិនិយោគិនទៅកាន់ខេត្តសៀមរាប និងការអភិវឌ្ឍកាន់តែរីកចម្រើនបន្ថែមទៀត”។ លោកថា “ពេលនេះតម្លៃដីធ្លី និងការវិនិយោគនៅក្នុងខេត្តនេះមិនទាន់មានជាធំដុំនៅឡើយទេ ពីព្រោះតែវាស្ថិតនៅក្នុងវិបត្តិរាលដាលបណ្ដាលមកពីកូវីដ១៩នៅឡើយ ហើយការអភិវឌ្ឍមួយចំនួនគឺទៅលើផ្ទះលំហែកាយ ដីឡូត៏ ដោយមិនទាន់មានក្រុមហ៊ុនធំៗ ចូលមកក្រោយការសាងសង់រួចនៃផ្លូវ៣៨ខ្សែនៅឡើយទេ”។

លោកបន្ថែមថា នៅពេលអនាគត យើងរំពឹងថាកំណើននៃការវិនិយោគនៅក្នុងខេត្តសៀមរាប នឹងកាន់តែមានសន្ទុះ ជាមួយនឹងការកើនឡើងនៃតម្លៃដីធ្លីផងដែរ ពីព្រោះក្រៅពីផ្លូវ៣៨ខ្សែ ខេត្តសៀមរាបក៏មានកត្តាទាក់ទាញជាច្រើន ដូចជា ព្រលានយន្តហោះអន្តរជាតិសៀមរាបថ្មី និងតំបន់ទេសចរណ៍ជាច្រើន ។

ចំណែកលោកច្រឹក សុខនីមប្រធានសមាគមអ្នកវាយតម្លៃភ្នាក់ងារអចលនវត្ថុកម្ពុជាបានថ្លែងថា ឱ្យតែមានការអភិវឌ្ឍហេដ្ឋារចនាសម្ព័ន្ធ ការអភិវឌ្ឍអចលនទ្រព្យ នឹងមានទៅតាមក្រោយដែរ ហើយនឹងជំរុញតម្លៃដីធ្លីកាន់តែមានសន្ទុះបន្ថែមផងដែរ។

លោកបន្តថា “ស្ថានភាពអចលនទ្រព្យនៅខេត្តសៀមរាប កំពុងឆ្ពោះទៅមុខ ប៉ុន្តែមិនទាន់មានគំរោងធំៗច្រើននៅឡើយទេ ខណៈការទិញនៅមានកំរិតនៅឡើយ”។ លោកបន្តថា “យ៉ាងណាក៏ដោយអ្វីៗនឹងមានភាពល្អប្រសើរឡើងនាពេលឆាប់ៗខាងមុខ”។

ផ្លូវ៣៨ខ្សែនៅខេត្តសៀមរាប ត្រូវបានបើកការដ្ឋានសាងសង់ជាផ្លូវការកាលពីអំឡុងខែវិច្ឆិកា២០២០ ចំណាយទុនលើការសាងសង់ជាង១៥០លានដុល្លារអាមេរិក។ ផ្លូវនេះបានសាងសង់រួចតាំងពីអំឡុង ខែធ្នូឆ្នាំ ២០២១ និងត្រៀមបើកសម្ពោធជាផ្លូវការ ក្រោមអធិបតីភាពសម្ដេចអគ្គមហាសេនាបតីតេជោហ៊ុន សែននាយករដ្ឋមន្ត្រីនៃព្រះរាជាណាចក្រកម្ពុជានៅថ្ងៃទី០៤ មេសា ២០២២ខាងមុខនេះ៕