ដោយៈសូរិយា

ភ្នំពេញៈ លោកបណ្ឌិត ហ៊ុន ម៉ាណែត នៅថ្ងៃទី១ ខែមេសានេះ បានថ្លែងថា ការប្រើប្រាស់សមិទ្ធផលនានា ដើម្បីបម្រើដល់វិស័យអប់រំ ដែលជាវិស័យអាទិភាពសំខាន់ រួមចំណែកធានានិរន្តភាពនៃការអភិវឌ្ឍ និងឯករាជ្យម្ចាស់ការរបស់ប្រទេសយើង ដែលកំពុងបន្តវិវឌ្ឍរីកចម្រើនទៅមុខទាំងផ្នែកសង្គម-សេដ្ឋកិច្ច ជាពិសេសភាពជឿនលឿននៃបច្ចេកវិទ្យា។

លោកបណ្ឌិតថា ឯករាជ្យម្ចាស់ការក្នុងន័យនេះ សំដៅដល់សមត្ថភាពរបស់កូនខ្មែរក្នុងការដឹកនាំគ្រប់គ្រង លើគ្រប់វិស័យទាំងអស់ទាំងផ្នែករដ្ឋ និងឯកជន ព្រោះចំណេះវិជ្ជា ជាសិទ្ធិអំណាច ជាឥទ្ធិពល និងជាលទ្ធភាពនៃជម្រើសក្នុងការគ្រប់គ្រងដំណើរជីវិតរបស់យើង។

ទន្ទឺមគ្នានេះ ការទទួលបានឱកាសនៃការអប់រំស្មើគ្នា សម្រាប់បុរស- ស្ត្រី ក៏បាននាំមកនូវសង្គមមួយដែលមានសមភាព ការប្រកួតប្រជែង និងភាពច្នៃប្រឌិតខ្ពស់ ដែលជាចលករនៃការអភិវឌ្ឍ រីកចម្រើនជឿនលឿន ដូចដែលកើតមានឡើងក្នុងពេលបច្ចុប្បន្ន។

លោកបណ្ឌិត ហ៊ុន ម៉ាណែត បានមានប្រសាសន៍បន្តថា “ពិតណាស់ ការពង្រឹងសាលារៀនទាំងផ្នែកទន់ និងផ្នែករឹង គឺជាកិច្ចការសំខាន់មួយនៅក្នុងការងារកែទម្រង់វិស័យអប់រំ ប៉ុន្តែអ្វីដែលសំខាន់ផងដែរនោះ គឺការយកចិត្តទុកដាក់លើការពង្រឹងឆន្ទៈ គុណធម៌ សីលធម៌ ស្មារតីគោរពច្បាប់ ព្រមទាំងការយល់ដឹងអំពីវប្បធម៌ និងប្រវត្តិសាស្ត្ររបស់ជាតិ ឱ្យដល់ក្មួយៗសិស្សានុសិស្ស ដើម្បីឱ្យពួកគេក្លាយជាមិត្តល្អ កូនល្អ និងពលរដ្ឋល្អសម្រាប់សង្គមជាតិ ជាពិសេសក្នុងបរិការណ៍ នៃការរីកចម្រើនជឿនលឿនផ្នែកបច្ចេកវិទ្យា ដូចពេលបច្ចុប្បន្ន”។លោកបន្តថា “ទន្ទឹមនឹងការផ្តល់នូវចំណុចវិជ្ជមានជាច្រើន ប៉ុន្តែក៏បាននាំមកនូវចំណុចអវិជ្ជមានមួយចំនួនផងដែរ ដូចជា បញ្ហាព័ត៌មានមិនពិត និងអំពើល្មើសផ្សេងៗក្នុងបណ្តាញអ៊ីនធើណេតជាដើម”។

លោកបណ្ឌិត ហ៊ុន ម៉ាណែត បានបញ្ជាក់បន្ថែមទៀតថា ជាទិសដៅទៅមុខ រាជរដ្ឋាភិបាលនឹងបន្តការយកចិត្តទុកដាក់ លើការអភិវឌ្ឍវិស័យអប់រំតាមគ្រប់លទ្ធភាព និងក៏បានបើកចំហរឱ្យមានការចូលរួមរបស់វិស័យឯកជនផងដែរសំដៅ បង្កើនការប្រកួតប្រជែងនៅក្នុងវិស័យនេះ ក្នុងគោលបំណងដើម្បីធ្វើយ៉ាងណាឱ្យប្រជាពលរដ្ឋ ជាពិសេសយុវជន យុវនារី មានចំណេះដឹង និងផលិតភាពខ្ពស់ សម្រាប់ទីផ្សារការងារដ៏សម្បូរបែប ស្របពេលដែលកម្ពុជាកំពុងខិតខំពង្រឹង និងពង្រីកសក្តានុពលសេដ្ឋកិច្ចរបស់ខ្លួន ឈានឆ្ពោះទៅរកសេដ្ឋកិច្ចបែបឧស្សាហកម្ម និងបច្ចេកវិទ្យា ដែលមានតម្រូវការខ្ពស់នូវធនធានមនុស្សជំនាញបច្ចេកទេស៕

ដោយៈ សុផារី

ភ្នំពេញៈ វិស័យបរធនបាលកិច្ច បានចាប់ផ្តើមឡើងនៅឆ្នាំ២០០៨ ហើយផ្តើមមានសន្ទុះខ្លាំងនៅឆ្នាំ២០២០។ រហូតមកដល់ខែមីនាឆ្នាំ២០២៣ បរធនបាលកិច្ច ដែលបានចុះបញ្ជីនៅនិយ័តករមានចំនួន១៧ គិតជាទឹកប្រាក់ចំនួន២៥៦លានដុល្លារអាមេរិក។

នេះបើតាមការបញ្ជាក់ដោយលោក សុខ ដារ៉ា អគ្គនាយកនៃនិយ័តករបរធនបាលកិច្ច នៅក្នុងសិក្ខាសាលាស្តីពី “ការឈ្វេងយល់ពីកិច្ចដំណើរការអភិវឌ្ឍន៍វិស័យបរធនបាលកិច្ចនៅកម្ពុជា” ថ្ងៃទី៣១ ខែមីនា ឆ្នាំ២០២២។

បរធនបាលកិច្ចគឺជាកិច្ចការ ក្នុងការថែរក្សាទ្រព្យសម្បត្តិរបស់អ្នកដទៃ ដើម្បីប្រើប្រាស់ជាប្រយោជន៍ នៃបុគ្គលឬសាធារណៈ ឬក្នុងវិស័យអ្វីមួយ។ បរធនបាលកិច្ច គឺជាដំណើរនៃការថែរក្សាប្រាក់ ទ្រព្យ មូលនិធិ ជាដើម របស់ម្ចាស់ដើម (បរធនបាលទាយក) ដោយអ្នកផ្តល់សេវាកម្ម (បរធានបាល) មុននឹងសម្រេចផ្ទេរប្រាក់ ឬមូលនិធិទាំងនោះទៅកាន់បុគ្គល សាធារណៈ ឬក្នុងវិស័យអភិវឌ្ឍន៍អ្វីមួយ (អត្តគាហកៈ) ស្របទៅបទបញ្ញត្តិនិងខ្លឹមសារដែលមានចែង។

លោកសុខ ដារ៉ា បានបញ្ជាក់ថា ក្នុងនោះបរធនបាលកិច្ចហិរញ្ញវត្ថុបានចុះបញ្ជី ដែលជាប្រតិបត្តិការនៃការចាត់ចែង គ្រប់គ្រង ថែរក្សាសមត្ថភាពមូលនិធិដៃគូអភិវឌ្ឍន៍ និងអនុមណ្ឌល ដែលបច្ចុប្បន្នកំពុងធ្វើការគ្រប់គ្រងចាត់ចែងនៅគ្រឹះស្ថានធនាគារ និងមីក្រូហិរញ្ញវត្ថុមានចំនួន៩ បានចុះបញ្ជី ក្នុងទំហំបរធនប្រហែល១៥០លានដុល្លាអាមេរិក។

បន្ថែមពីនេះ មានបរធនបាលកិច្ច៨ មានបរធនបាលកិច្ចសាធារណៈ១ គឺបរធនបាលកិច្ចគន្ធបុប្ផា បរធនបាលកិច្ចពាណិជ្ជកម្ម៤ បរធនបាលកិច្ចបុគ្គលចំនួន៣ ដែលបានចុះបញ្ជី ក្នុងទំហំបរធនចំនួន១០១លានដុល្លាអាមេរិក។

លោកសុខ ដារ៉ាបានបន្ថែមថា “បរធនបាលកិច្ចមួយចំនួនទៀតក៏បានស្ថិតក្នុងនិតិវិធីចុះបញ្ជីផងដែរ។ ដំណាក់កាលនេះ ជាដំណាក់កាលធ្វើនិយ័តកម្មតួអង្គពាក់ព័ន្ធដូចជា បរធនបាល ជាបុគ្គលកាន់អាជ្ញាប័ណ្ណ ការផ្ទៀងផ្ទាត់លើលក្ខខណ្ឌគុណវុឍិ អនុវត្តបន្ថែមលើកាតព្វកិច្ចផ្តល់របាយការណ៍ រាយការណ៍ និងអនុលោមទៅតាមលក្ខខណ្ឌ នៃការធ្វើប្រតិបត្តិការក្នុងនាមជាបរធនបាល”។

សម្រាប់គោលដៅ ក្នុងឆ្នាំ២០២២ និយតករនឹងជម្រុញបរធនបាលកិច្ចដែលបានចុះបញ្ជីទាំងស្ដិតក្នុងនិតិវិធី ទាំងស្ថិតក្នុងនិតិវិធីសាកសួរព័ត៌មាន ឱ្យកើនឡើងរហូតដល់២០០ភាគរយ ស្មើនឹង៣០០ជាង។ បន្ថែមលើសនេះ លោករំពឹងថាតួអង្គបរធនបាល នឹងមានការកើនឡើងក្នុងរង្វង់៥០ រាប់ទាំងក្រុមហ៊ុននិងបរធនបាលឯករាជ្យ៕

ដោយៈសុខុម

បែរឡាំង: ប្រធានាធិបតីរុស្ស៊ី លោក វ្ល៉ាឌីមៀ ពូទីន បានកំណត់ឱសានវាទត្រឹមថ្ងៃសុក្រ ទី៣១ ខែមីនា ដោយទាមទារឱ្យបរទេសដែលទិញឧស្ម័នហ្គាសរបស់រុស្ស៊ី ត្រូវទូទាត់ជារូបិយប័ណ្ណជាតិរុស្ស៊ី រ៉ូប៊ល (Rouble) បើមិនដូច្នោះទេ រុស្ស៊ី នឹងលេងធម៌ក្ដៅកាត់ផ្ដាច់ការផ្គតផ្គង់តែម្ដង។

ចំណាត់ការនេះត្រូវបានអឺរ៉ុប ច្រានចោល ហើយរដ្ឋាភិបាលក្រុងបែរឡាំង (អាល្លឺម៉ង់) បានចាត់ទុកចំណាត់ការនេះថាជា “ការគំរាមកំហែង”។ នេះបើយោងតាមសារព័ត៌មានCNA ចុះផ្សាយនៅថ្ងៃសុក្រ ទី០១ ខែមេសា នេះ។

ចំណាត់ការរបស់លោក ពូទីន តាមរយៈក្រឹត្យមួយ ដែលបានចុះហត្ថលេខាកាលពីថ្ងៃព្រហស្បតិ៍ ទី៣១ ខែមីនា បានធ្វើឱ្យអឺរ៉ុប ប្រឈមការបាត់បង់ការផ្គត់ផ្គង់ឧស្ម័នច្រើនជាង១ភាគ៣។ អាល្លឺម៉ង់ ដែលជាប្រទេសពឹងផ្អែកខ្លាំងបំផុតលើរុស្សី បានដាក់ដំណើរការផែនការគ្រាអាសន្នរួចទៅហើយ ដែលអាចឈានទៅដល់ការកំណត់បរិមាណហ្គាស ត្រូវប្រើប្រាស់នៅក្នុងសេដ្ឋកិច្ចធំបំផុតរបស់អឺរ៉ុបមួយនេះ។

ការនាំចេញថាមពលគឺជាស្នៀត ដ៏មានឥទ្ធិពលបំផុតរបស់លោក ពូទីន ខណៈលោកព្យាយាមវាយបកទណ្ឌកម្ម របស់លោកខាងលិចដែលដាក់លើធនាគាររុស្ស៊ី ក្រុមហ៊ុន ពាណិជ្ជករ និងមន្ត្រីរដ្ឋាភិបាលក្រុងមូស្គូ ដើម្បីឆ្លើយតបទៅនឹងការឈ្លានពានរបស់រុស្ស៊ី ទៅលើប្រទេសអ៊ុយក្រែន។

លោក ពូទីន និយាយថា អ្នកទិញឧស្ម័ន ហ្គាសរបស់រុស្ស៊ី “ត្រូវតែបើកគណនីប្រាក់ Rouble នៅក្នុងធនាគាររុស្ស៊ី។ ការទូទាត់នឹងធ្វើឡើងចេញពីគណនីទាំងនេះ សម្រាប់ឧស្ម័នហ្គាស ដែលចែកចាយចាប់ផ្ដើមពីថ្ងៃទី០១ ខែមេសា តទៅ”។

លោកបានថ្លែងសុន្ទរកថាតាមទូរទស្សន៍ “បើគ្មានការទូទាត់បែបនេះទេ យើងនឹងចាត់ទុកថាវាជាការខកខានរបស់អ្នកទិញ ដែលនឹងជួបផលវិបាកធ្ងន់ធ្ងរ។ គ្មានអ្នកណាលក់ទំនិញ ដោយមិនគិតប្រាក់នោះទេ ហើយយើងក៏មិនធ្វើជាមនុស្សធម៌នោះដែរ។ នោះមានន័យថា កិច្ចព្រមព្រៀងដែលមានស្រាប់នឹងត្រូវបានបញ្ឈប់”៕  Reuters៕

        ដោយៈគង់ សូរិយា

        ភ្នំពេញៈ សង្រ្គាមរវាងរុស្ស៊ី និងអ៊ុយក្រែនបានឈានទៅរកសភាពធូរស្រាលហើយ ក្រោយភាគីទាំងពីរសម្រេចដកថយមួយជំហ៊ានម្នាក់ ហើយអ្វីសំខាន់គឺប្រទេសអ៊ុយក្រែន បានសន្យារក្សាប្រទេសក្នុងភាពអព្យាក្រិត។

យោងតាមក្នុងកិច្ចប្រជុំកាលពីថ្ងៃអង្គារ ទី២៩ខែមីនា លទ្ធផលវិជ្ជមានចំនួន២បានលេចចញ ដោយទី១នោះគឺប្រទេសរុស្ស៊ីបានសន្យា កាត់បន្ថយប្រតិបត្តិការយោធានៅជុំវិញទីក្រុង កៀវ និងទីក្រុងChirnihiv ។ ចំណែកទី២គឺ អ៊ុយក្រែនបានទទួលយកឋានៈអព្យាក្រឹត។

កិច្ចពិភាក្សា ដែលបានធ្វើឡើងនៅក្នុងវិមានទីក្រុង អ៉ីស្តង់ប៊ុល ពោលគឺមានរយៈពេលជាងមួយខែ ក្រោយផ្ទុះការវាយប្រហារធំបំផុតលើប្រទេសអឺរ៉ុបមួយ ចាប់តាំងពីសង្គ្រាមលោកលើកទី២មក ដែលបានសម្លាប់ ឬរងរបួសមនុស្សរាប់ពាន់នាក់ បង្ខំឲ្យមនុស្សជិត៤លាននាក់ភៀសខ្លួន ទៅក្រៅប្រទេស និងបានបំផ្លាញសេដ្ឋកិច្ចរបស់រុស្ស៊ីដោយការដាក់ទណ្ឌកម្ម។

អនុរដ្ឋមន្ត្រីការពារជាតិរុស្ស៊ី លោកAlexander Formin បានប្រាប់អ្នកយកព័ត៌មានកាលពីថ្ងៃអង្គារថា “ការសម្រេចចិត្តមួយត្រូវបានធ្វើឡើង ដើម្បីកាត់បន្ថយសកម្មភាពយោធានៅក្នុងទិសដៅ កៀវ និង Chernihiv”។

ទោះបីជាយ៉ាងណាក៏ដោយ លោកមិនបាននិយាយអំពីតំបន់ផ្សេងទៀត ដែលបានជួបការប្រយុទ្ធគ្នាខ្លាំងនោះទេ រួមមានជុំវិញទីក្រុង Mariupol នៅភាគអាគ្នេយ៍ តំបន់ Sumy និង Kharkiv នៅភាគខាងកើត និង Kherson និង Mykolaiv នៅភាគខាងត្បូងផងដែរ។

ចំណែកក្រុមរបស់អ៊ុយក្រែនឯណោះវិញ បាននិយាយថា ពួកគេនឹងទទួលយកឋានៈអព្យាក្រឹត សម្រាប់ប្រទេសនេះ ដែលមានន័យថា អ៊ុយក្រែន នឹងមិនចូលរួមសម្ព័ន្ធភាពនានាដូចជាNATO នោះទេ ដែលនេះជាការទាមទារដ៏សំខាន់របស់ទីក្រុងមូស្គូ ជាថ្នូរនឹងការធានាសន្តិសុខ៕

ដោយ៖ សុផារី

ភ្នំពេញ៖ កិច្ចប្រជុំពេញអង្គគណៈរដ្ឋមន្រ្តី នៅថ្ងៃទី០១ ខែមេសា ឆ្នាំ២០២២នេះ ក្រោមអធិបតីភាពសម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា បានសម្រេចអនុម័តទាំងស្រុងលើ “សេចក្តីព្រាងច្បាប់ស្តីពីសុវត្ថិភាពម្ហូបអាហារ”។

លោក ផៃ ស៊ីផាន រដ្ឋមន្រ្តីប្រតិភូអមនាយករដ្ឋមន្ត្រី និងជាប្រធានក្រុមអ្នកនាំពាក្យរបស់រាជរដ្ឋាភិបាលកម្ពុជា បានបញ្ជាក់ឱ្យដឹងថា សេចក្តីព្រាងច្បាប់នេះ ត្រូវបានរៀបចំឡើងដោយយោងតាមការតម្រូវនៃនិន្នាការសកលនៃពាណិជ្ជកម្មអន្តរជាតិ និងស្របទៅតាមកម្មវិធីការងាររបស់រាជរដ្ឋាភិបាលឆ្នាំ២០១២-២០១៥ ពាក់ព័ន្ធនឹងវិស័យពាណិជ្ជកម្ម ដែលកម្ពុជាមានកាតព្វកិច្ចត្រូវរៀបចំប្រព័ន្ធច្បាប់ឱ្យបានរឹងមាំ ដើម្បីឆ្លើយតបទៅនឹងឧត្តមានុវត្តន៍អន្តរជាតិ នៃការធ្វើសមាហរណកម្មសេដ្ឋកិច្ចកម្ពុជា ទៅក្នុងតំបន់និងសកល។

ក្រសួងពាណិជ្ជកម្ម បានសហការរៀបចំសេចក្តីព្រាងច្បាប់ស្តីពីសុវត្ថិភាពម្ហូបអាហារនេះឡើង ដើម្បីគ្រប់គ្រងប្រតិបត្តិករអាជីវកម្មម្ហូបអាហារនៅគ្រប់ដំណាក់កាលនៃខ្សែច្រវាក់ផលិតកម្ម និងធានាថាផលិតផលម្ហូបអាហារទាំងអស់ ដែលចរាចរនៅក្នុងកម្ពុជា មានគុណភាព សុវត្ថិភាព និងអនាម័យល្អ សម្រាប់ប្រជាពលរដ្ឋគ្រប់ៗរូប។

សុវត្ថិភាពម្ហូបអាហារ គឺជាការទទួលខុសត្រូវរួម និងមានលក្ខណៈពហុវិស័យ ដែលចាំបាច់តម្រូវឱ្យមានការចូលរួមពីគ្រប់ភាគីពាក់ព័ន្ធ ត្រូវទទួលបន្ទុកអនុវត្តការគ្រប់គ្រង និងត្រួតពិនិត្យគុណភាព សុវត្ថិភាពម្ហូបអាហារ នៅតាមគ្រប់ដំណាក់កាលនៃខ្សែចង្វាក់ផលិតកម្ម។

លោក ផៃ ស៊ីផាន បានបន្តថា សេចក្តីព្រាងច្បាប់ស្តីពីសុវត្ថិភាពម្ហូបអាហារ មានសារៈសំខាន់ក្នុងការកំណត់គោលការណ៍ជាមូលដ្ឋានដើម្បីជំរុញឱ្យផលិតផលម្ហូបអាហារមានសុវត្ថិភាពនិងស្របតាមស្តង់ដាកំណត់សំដៅធានាកម្រិតនៃការការពារអាយុជីវិតនិងសុខភាពប្រជាពលរដ្ឋ ធានាប្រសិទ្ធភាពនៃការការពារផលប្រយោជន៍អ្នកប្រើប្រាស់ រួមចំណែកយ៉ាងសំខាន់ក្នុងការកាត់បន្ថយភាពក្រីក្ររបស់ប្រជាពលរដ្ឋ។

ម៉្យាងវិញទៀត តម្រូវការក្នុងផលិតកម្មនិងពាណិជ្ជកម្មម្ហូបអាហារ តម្រូវឱ្យមានកិច្ចព្រមព្រៀងពាណិជ្ជកម្មស្តីពីអនាម័យ និងភូតគាមអនាម័យ (SPS) និងរបាំងបច្ចេកទេសចំពោះពាណិជ្ជកម្ម (TBT) ដែលជាកម្លាំងចលករជំរុញឱ្យមានកំណើនវិនិយោគ ជំរុញប្រសិទ្ធភាពនៃការនាំចេញម្ហូបអាហារ និងធានាបាននូវការប្រកួតប្រជែងប្រកបដោយសមធម៌និងយុត្តិធម៌ ក្នុងវិស័យផលិតកម្មនិងពាណិជ្ជកម្មម្ហូបអាហារ៕