ក្រុមហ៊ុនឯកជនមួយគ្រោងវិនិយោគដីទំហំ៣០៨ហិចតានៅជួរភ្នំក្រវាញ ជាតំបន់ទេសចរណ៍ធម្មជាតិ

ដោយ៖ សុផារី

ភ្នំពេញ៖ ក្រុមហ៊ុន​​ឯកជន​មួយ​បាន​ស្នើសុំ​ជួល​ដី​មួយកន្លែង​ទំហំ៣០៨​ហិកតា ​នៅក្នុង​របៀង​អភិរក្ស​ជីវចម្រុះ​ជួរ​ភ្នំ​ក្រវាញ ក្នុង​ភូមិសាស្ត្រ​ឃុំ​បឹងព្រាវ ស្រុកស្រែ​អំបិល ខេត្ត​កោះកុង​ ដើម្បី​វិនិយោគ​ទៅជា​តំបន់​ទេសចរណ៍​ធម្មជាតិ។

 

នេះបើតាម​ការចុះផ្សាយរបស់រដ្ឋបាលខេត្តកោះកុង ក្នុងដំណើរពិនិត្យសិក្សាទីតាំងជាក់ស្តែងរបស់លោកបណ្ឌិត អ៊ុក ភ័ក្ត្រា អភិបាលរង នៃគណៈអភិបាលខេត្តកោះកុង និងលោកខូវ សូវៀត ទីប្រឹក្សារដ្ឋមន្រ្តី ក្រសួងបរិស្ថាន កាលពីថ្ងៃអង្គារកន្លងទៅ។

គម្រោង​ស្នើសុំ​វិនិយោគ​អភិវឌ្ឍន៍​ទេសចរណ៍​ធម្មជាតិ​នេះ ក្រុមការងារ​របស់​ក្រសួង​បរិស្ថាន និង​រដ្ឋបាលខេត្ត​កោះកុង ​បាន​គាំទ្រ​គម្រោង​អភិវឌ្ឍន៍​ទេសចរណ៍​ផ្សារភ្ជាប់​នឹង​ធម្មជាតិ​នេះ ប៉ុន្តែ​ត្រូវ​គិតគូរ​ឱ្យបាន​ហ្មត់ចត់​ទៅលើ​កិច្ច​គាំពារ​បរិស្ថាន ការអភិរក្ស​ជីវចម្រុះ និង​លក្ខខណ្ឌ​បទដ្ឋាន​បច្ចេកទេស ជាដើម ព្រមទាំងត្រូវកំណត់ឱ្យបានច្បាស់លាស់នូវតំបន់ ដែលត្រូវអភិវឌ្ឍន៍ និងតំបន់ដែលត្រូវអភិរក្សការពារ ជាលក្ខណៈធម្មជាតិនៅក្នុងតំបន់​។

លោក អ៊ុក ភក្ត្រា អភិបាលរង​ខេត្តកោះកុង​បាន​មានប្រសាសន៍ថា គម្រោង​អភិវឌ្ឍន៍​ទេសចរណ៍​ធម្មជាតិ​នេះ តាម​ផែនការ​នឹង​វិនិយោគ​ដោយ​ក្រុមហ៊ុន​ក្នុងស្រុក ​សហការ​ជាមួយ​ក្រុមហ៊ុន​មកពី​ក្រៅ​ប្រទេស  ​អភិវឌ្ឍ​ទៅជា​តំបន់​រមណីយដ្ឋាន​ធម្មជាតិ ​សម្រាប់​លម្ហែកាយ កន្លែង​លេងកម្សាន្ត និង​សួនសត្វ​បក្សាបក្សី​ជាដើម​។ ទោះយ៉ាងណា ការអភិវឌ្ឍ​នេះ​មិន​ប៉ះពាល់​ដល់​ព្រៃ​ធម្មជាតិ​នោះទេ​។

បើតាមលោក អ៊ុក ភក្ត្រា ការជួល​ដី​ឱ្យ​វិស័យ​ឯកជន​នេះមានរយៈពេល​ប្រហែល៥០​ឆ្នាំ​ ក្នុង​ទំហំ​ដី៣០៨ហិចតា​នៃ​ដីព្រៃ ដោយ៣០​ភាគរយអាចអភិវឌ្ឍបាន តែ៧០ភាគរយទៀត ​ត្រូវតែ​រក្សាទុក​សភាព​ដើម​ដដែល។

 

លោក​បញ្ជាក់ថា​ ​តាមច្បាប់​វិនិយោគ​ក្នុង​ទំហំ​ដី៣០៨ហិចតា​នៃ​ដីព្រៃ គេ​ឱ្យតែ​៣០​ភាគរយ​ប៉ុណ្ណោះ ក្រៅពីនោះ​ត្រូវតែ​រក្សាទុក​សភាព​ដើម​ដដែល គឺ​អត់​មាន​ប៉ះពាល់​ដល់​ជីវចម្រុះ​ទេ​។ ការជួល​ដី​ឱ្យ​វិស័យ​ឯកជន​ធ្វើការ​អភិវឌ្ឍ​តំបន់​ទេសចរណ៍ធម្មជាតិ គឺ​ប្រហែល៥០​ឆ្នាំ​។ ទោះយ៉ាងណា​ការសម្រេច​គឺ​ស្ថិត​លើ​ក្រសួង និង​រាជរដ្ឋាភិបាល ​ដោយ​យើង​គ្រាន់តែ​ចុះ​ពិនិត្យមើល​ទីតាំង​ប៉ុណ្ណោះ​។

លោកថា រដ្ឋបាល​ខេត្តកោះកុង​តែងតែ​សាទរ និង​គាំទ្រ​ចំពោះ​ក្រុមហ៊ុន​ដែល​ចាប់អារម្មណ៍​ទៅលើ​ការជួល​ដី​វិនិយោគ​រៀបចំ​បង្កើត​តំបន់​ទេសចរណ៍​ធម្មជាតិ​ក្នុង​ខេត្តកោះកុង ដែលជា​ផ្នែក​មួយ​នៃ​ការអភិរក្ស​ធនធានធម្មជាតិ លើកកម្ពស់​សេដ្ឋកិច្ច​មូលដ្ឋាន និង​ចូលរួម​អភិវឌ្ឍ​ទេសចរណ៍​ធម្មជាតិ​៕

ប្រទេស៨នៅតំបន់អាស៊ានរួមទាំងកម្ពុជា រួមគ្នាពង្រឹងការតភ្ជាប់វិស័យដឹកជញ្ជូនតាមផ្លូវអាកាស

ដោយ៖ វឌ្ឍនៈ

 

ភ្នំពេញ ៖ រដ្ឋមន្ត្រីដឹកជញ្ជូននៃប្រទេសប្រ៊ុយណេ កម្ពុជា ឥណ្ឌូនេស៊ី ម៉ាឡេស៊ី ហ្វីលីពីន សិង្ហបុរី ថៃ និងវៀតណាម បានចេញសេចក្តីថ្លែងការណ៍រួមមួយ ដោយសន្យាថានឹងធ្វើការយ៉ាងជិតស្និទ្ធដើម្បីស្តារ និងពង្រឹងការតភ្ជាប់ផ្លូវអាកាសរវាងអាស៊ីអាគ្នេយ៍ និងតំបន់ដទៃទៀត។

 

នេះបើយោងតាមសេចក្ដីប្រកាសព័ត៌មាន របស់រដ្ឋលេខាធិការអាកាសចរស៊ីវិលកម្ពុជា នៅថ្ងៃទី១៩ ឧសភា ២០២២នេះ។

 

សេចក្តីប្រកាសព័ត៌មានដដែល បានឱ្យដឹងថា កិច្ចព្រមព្រៀងដឹកជញ្ជូនផ្លូវអាកាសដ៏ទូលំទូលាយអាស៊ាន-សហភាពអឺរ៉ុប (CATA) ជួយសម្រួលដល់ការអភិវឌ្ឍន៍ទីផ្សារអាកាសចរណ៍អាស៊ានតែមួយ ក្រោមកិច្ចព្រមព្រៀងក្របខ័ណ្ឌអាស៊ានស្តីពីសេវាកម្ម និងផែនការមេនៃសេវាកម្មនាវាចរណ៍ ផ្លូវអាកាសអាស៊ាន និងពង្រឹងកិច្ចសហប្រតិបត្តិការក្នុងតំបន់ និងអន្តរជាតិលើគ្រប់វិស័យ រួមទាំងមនុស្ស និងការអភិវឌ្ឍន៍សមត្ថភាពស្ថាប័ន គំរូនៃការប្រើប្រាស់ និងផលិតកម្មប្រកបដោយនិរន្តរភាព។

រដ្ឋមន្ត្រីដឹកជញ្ជូនក៏បានយល់ព្រម ក្នុងការបង្កើនការចែករំលែកព័ត៌មានរវាងរដ្ឋ និងឧស្សាហកម្ម និងបង្កើតសំណុំវិធានការសុខភាពសាធារណៈ និងសុវត្ថិភាពទូទៅ ដើម្បីធានាបាននូវកម្រិតខ្ពស់បំផុត នៃសុវត្ថិភាពស្របតាមស្តង់ដារ និងការអនុវត្ត ដែលបានណែនាំរបស់អង្គការអាកាសចរណ៍ស៊ីវិលអន្តរជាតិ (ICAO)។

 

រដ្ឋមន្ត្រីដឹកជញ្ជូន នៃប្រទេសប្រ៊ុយណេ កម្ពុជា ឥណ្ឌូនេស៊ី ម៉ាឡេស៊ី ហ្វីលីពីន សិង្ហបុរី ថៃ និងវៀតណាម បានចេញសេចក្តីថ្លែងការណ៍រួមមួយ ដោយសន្យាថានឹងធ្វើការយ៉ាងជិតស្និទ្ធ ដើម្បីស្តារ និងពង្រឹងការតភ្ជាប់ផ្លូវអាកាស រវាងអាស៊ីអាគ្នេយ៍ និងតំបន់ដទៃទៀត។

 

កិច្ចព្រមព្រៀងដឹកជញ្ជូនផ្លូវអាកាសដ៏ទូលំទូលាយអាស៊ាន-សហភាពអឺរ៉ុប (CATA) ជួយសម្រួលដល់ការអភិវឌ្ឍន៍ទីផ្សារអាកាសចរណ៍តែមួយអាស៊ាន ក្រោមកិច្ចព្រមព្រៀងក្របខ័ណ្ឌអាស៊ានស្តីពីសេវាកម្ម និងផែនការមេនៃសេវាកម្មនាវាចរណ៍ផ្លូវអាកាសអាស៊ាន និងពង្រឹងកិច្ចសហប្រតិបត្តិការក្នុងតំបន់ និងអន្តរជាតិលើគ្រប់វិស័យ រួមទាំងមនុស្ស និង ការអភិវឌ្ឍន៍សមត្ថភាពស្ថាប័ន និងគំរូនៃការប្រើប្រាស់ និងផលិតកម្មប្រកបដោយនិរន្តរភាព។

រដ្ឋមន្ត្រីដឹកជញ្ជូនតំណាងប្រទេសនីមួយៗក៏បានយល់ព្រម ក្នុងការបង្កើនការចែករំលែកព័ត៌មាន រវាងរដ្ឋ និងឧស្សាហកម្ម និងបង្កើតសំណុំវិធានការសុខភាពសាធារណៈ និងសុវត្ថិភាពទូទៅ ដើម្បីធានាបាននូវកម្រិតខ្ពស់បំផុតនៃសុវត្ថិភាព ស្របតាមស្តង់ដារ និងការអនុវត្ត ដែលបានណែនាំ របស់អង្គការអាកាសចរណ៍ស៊ីវិលអន្តរជាតិ (ICAO) ៕

ឥណ្ឌាគ្រោងផ្តល់ឥណទាន១ពាន់លានដុល្លារ ដើម្បីជួយសាងសង់ផ្លូវល្បឿនលឿននៅកម្ពុជា

ដោយ៖ វឌ្ឍនៈ

 

ភ្នំពេញ ៖ លោក នរិន្ទត្រា ម៉ូឌី នាយករដ្ឋមន្ត្រីឥណ្ឌា បានប្រកាសថា ឥណ្ឌានឹងផ្ដល់ឥណទានចំនួន១ពាន់លានដុល្លារដល់កម្ពុជា សម្រាប់ប្រើប្រាស់ក្នុងគម្រោងតភ្ជាប់ផ្លូវល្បឿនលឿន ឥណ្ឌា មីយ៉ាន់ម៉ា ថៃ ដែលជាការតភ្ជាប់ដ៏សំខាន់មកកម្ពុជា។

នេះជាការបញ្ជាក់របស់លោក បណ្ឌិត កៅ គឹមហួន រដ្ឋមន្ត្រីប្រតិភូអមនាយករដ្ឋមន្ត្រី នៅក្រោយជំនួបពិភាក្សាការងាររវាងសម្ដេចតេជោហ៊ុន សែននាយករដ្ឋមន្ត្រីនៃព្រះរាជាណាចក្រកម្ពុជា ជាមួយលោក Narendra Modi នាយករដ្ឋមន្រ្តីឥណ្ឌាតាមរយៈប្រព័ន្ធទូរស័ព្ទ ពីភូមិគ្រឹះក្រុងតាខ្មៅ ខេត្តកណ្តាល នាល្ងាចថ្ងៃទី១៨ ខែឧសភា ឆ្នាំ២០២២។

លោក នរិន្ទត្រា ម៉ូឌី លើកឡើងថា នេះជាការសមស្របជាមួយនឹងផែនការមេរបស់អាស៊ានទៅលើផែនការនៃការតភ្ជាប់។ សម្តេចតេជោ ហ៊ុន សែន បានប្រកាសស្វាគមន៍ ចំពោះការអនុវត្តន៍គម្រោងផ្លូវល្បឿនលឿនត្រីភាគីឥណ្ឌា មីយ៉ាន់ម៉ា ថៃ និងការពង្រីកមកកាន់ប្រទេសកម្ពុជា ឡាវ និងវៀតណាម។

 

សម្ដេចតេជោ ក៏បានស្នើឱ្យពន្លឿននីតិវិធី និងបញ្ចប់កិច្ចព្រមព្រៀងពាណិជ្ជកម្មសេរីទ្វេភាគីកម្ពុជា-ឥណ្ឌា ដើម្បីឈានដល់ការចុះហត្ថលេខាឱ្យបានឆាប់រហ័សផងដែរ។ លើសពីនេះ សម្តេចតេជោ បានស្នើឱ្យមានការហោះហើរ ពីប្រទេសឥណ្ឌាទៅកាន់ខេត្តសៀមរាប ដើម្បីជំរុញឱ្យមានការកើនឡើងភ្ញៀវទេសចររវាងប្រទេសទាំងពីរ ជាពិសេសទេសចរ ដែលបានចាក់វ៉ាក់សាំងរួចរាល់។

សម្ដេចតេជោ បញ្ជាក់ថា ទំនាក់ទំនងពាណិជ្ជកម្មទ្វេភាគី មានការធ្លាក់ចុះនៅពេលវិបត្តិកូវីដ ហើយមានការកើនឡើងវិញនៅឆ្នាំ២០២១ ចំនួន៣០០លានដុល្លារ តែគប្បីបន្តពង្រីកបន្ថែមទៀត។

 

សម្តេចតេជោ បានគូសបញ្ជាក់អំពីការបង្កើតទំនាក់ទំនងការទូតឡើងវិញរវាងកម្ពុជា និងឥណ្ឌាតាំងពី១៩៨១ ក្រោយអាក់ខានមួយរយៈ ដោយសារសង្គ្រាម។ ឥណ្ឌាគឺជាប្រទេសលទ្ធិប្រជាធិបតេយ្យទីមួយលើពិភពលោកដែលប្រកាសទទួលស្គាល់កម្ពុជា និងបង្កើតទំនាក់ទំនងការទូតជាមួយនឹងកម្ពុជា។ គិតមកដល់ពេលនេះ កម្ពុជានិងឥណ្ឌាមានទំនាក់ទំនងជាមួយគ្នា ជាង៧០ឆ្នាំមកហើយ ដែលប្រទេសទាំងពីរ បានឯកភាពគ្នានៅក្នុងការប្រារព្ធខួបលើកទី៧០ ដោយធ្វើសកម្មភាពរួមគ្នាដើម្បីអបអរសាទរ នៃការភ្ជាប់ទំនាក់ទំនងការទូតជាមួយគ្នាក្នុងស្មារតី សាមគ្គីភាពនិងកិច្ចសហការ រវាងប្រទេសនិងប្រជាជននៃទាំងពីរផងដែរ៕

អភិបាលរាជធានីភ្នំពេញ ស្នើរសុំបារាំងជួយកសាងស្ថានីយប្រតិកម្មទឹកកខ្វក់មួយកន្លែងទៀតនៅប៉ែក ជើង

ដោយ៖ វឌ្ឍនៈ

 

ភ្នំពេញ ៖ អភិបាលនៃគណៈអភិបាលរាជធានីភ្នំពេញ លោក ឃួង ស្រេង បានស្នើសុំបារាំងជួយកសាងស្ថានីយប្រតិកម្មទឹកកខ្វក់មួយកន្លែងទៀត នៅខាងជើងឆៀងខាងលិចរាជធានីភ្នំពេញ ដើម្បីឱ្យបរិស្ថានទឹកល្អប្រសើរ មុននឹងហូរចូលទៅដងទន្លេសាប ។

 

ការស្នើសុំរបស់លោកបានធ្វើឡើង ក្នុងឱកាសជួបសំដែងការគួរសម និងពិភាក្សាការងារ ជាមួយ លោក ហ្សាក់ ប៉ឺឡេ ឯកអគ្គរដ្ឋទូតវិសាមញ្ញនិងពេញសមត្ថភាព នៃសាធារណរដ្ឋបបារាំងប្រចាំព្រះរាជាណាចក្រកម្ពុជា នារសៀលថ្ងៃទី១៨ខែឧសភាឆ្នាំ២០២២នេះ នៅសាលារាជធានីភ្នំពេញ ។

លោក ឃួង ស្រេង បានមានប្រសាសន៍ថា អង្គការ ចៃកា (JICA)របស់ប្រទេសជប៉ុន បានជួយកម្ពុជាជាច្រើនពិសេសនៅរាជធានីភ្នំពេញ ដោយបានកសាងស្ថានីយទឹកកខ្វក់ជាច្រើនកន្លែងនៅរាជធានីភ្នំពេញ។ ដោយឡែកនៅខាងជើងភាគខាងលិចរាជធានីភ្នំពេញ មិនទាន់មានស្ថានីយទឹកកខ្វក់នៅឡើយទេ។ ដូច្នេះ លោក ស្នើសុំអោយបារាំងជួយរាជធានីភ្នំពេញ ក្នុងការកសាងស្ថានីយ៍ទឹកកខ្វក់មួយកន្លែងនេះ ដើម្បីទុកឱ្យក្មេងជំនាន់ក្រោយបានប្រើប្រាស់ ទោះការជួយជាកម្ចីឬក៏ជាជំនួយឥតសំណងក្តី។

បន្ថែមពីលើនេះ អភិបាលរាជធានីភ្នំពេញ បានស្នើឱ្យភាគីបារាំងជួយដោះស្រាយទៅលើបញ្ហាកកស្ទះចរាចរណ៍ នៅក្នុងរាជធានីភ្នំពេញផងដែរ ដោយសារតែរាជធានីភ្នំពេញមានការកកស្ទះចរាចរណ៍ជារៀងរាល់ថ្ងៃ។

 

លោកឃួង ស្រេង បានបញ្ជាក់ថា ចំពោះស្ថានទូតបារាំងប្រចាំកម្ពុជា រដ្ឋបាលរាជធានីភ្នំពេញ និងជួយការពារសន្តិសុខ សណ្ដាប់ធ្នាប់គ្រប់បែបយ៉ាង ហើយបើស្ថានទូតត្រូវការឱ្យរដ្ឋបាលរាជធានីភ្នំពេញជួយ រដ្ឋបាលរាជធានីភ្នំពេញនិងជួយសម្រួលគ្រប់ការងារ ដែលស្ថានទូតបារាំងត្រូវការផងដែរ ។លោកបានជម្រាបជូនផងដែរថា ប្រទេសកម្ពុជា បានឆ្លងកាត់របបប៉ុលពត ហើយក្រោយឆ្នាំ១៩៧៩ ប្រទេសជាតិស្ថិតនៅចំណុចសូន្យ តែក្រោមការដឹកនាំរបស់សម្ដេចអគ្គមហាសេនាបតីតេជោហ៊ុនសែនបានធ្វើឲ្យប្រទេសដ៏កំសត់មួយនេះ មានការអភិវឌ្ឍន៍រីកចម្រើនរហូតមកដល់សព្វថ្ងៃនេះ។

លោក ហ្សាក់ ប៉ឺឡេ បានសម្តែងនូវការកោតសរសើរ ចំពោះការអភិវឌ្ឍន៍រីកចំរើនរបស់រាជធានីភ្នំពេញ ក្នុងរយៈពេលប៉ុន្មានឆ្នាំចុងក្រោយនេះដោយមានសំណង់អាគារខ្ពស់ៗជាមួយផ្លូវខ្វាត់ខ្វែងខុសពីឆ្នាំ១៩៩៥ដាច់ស្រឡះតែម្តង។ ប្រទេសកម្ពុជា គឺពិតជាមានការមមាញឹកខ្លាំង ចំពោះការរៀបចំសន្តិសុខសណ្តាប់ធ្នាប់ ដោយសារតែជិតដល់ថ្ងៃបោះឆ្នោត ក្រុមប្រឹក្សា ឃុំ សង្កាត់ នៅថ្ងៃទី ០៥ ខែមិថុនា ខាងមុខនេះ ។ ចំណែកប្រទេសបារាំងក៏ត្រូវបោះឆ្នោតនៅថ្ងៃទី ០៥ ខែមិថុនា ខាងមុខនេះដែរ។ ដូច្នេះ លោកសូមស្នើឱ្យរដ្ឋបាលរាជធានីភ្នំពេញ ជួយការពារសន្តិសុខ និងសណ្តាប់ធ្នាប់ ប្រជាពលរដ្ឋរបស់បារាំងនៅភ្នំពេញដែលត្រូវបោះឆ្នោតផង។

លោកក៏បានស្នើឲ្យរដ្ឋបាលរាជធានីភ្នំពេញ ធ្វើការអភិរក្សនូវបេតិកភណ្ឌចាស់ៗ ដែលនៅសេសសល់ ព្រោះវាជាការទាក់ទាញភ្ញៀវជាតិអន្តរជាតិ អោយមកដើរលេងកំសាន្តនៅរាជធានីភ្នំពេញ ។ បន្ថែមពីនេះ លោកក៏បានលើកឡើងពីគម្រោងសិក្សាកសាងនៅរទេះភ្លើងល្បឿនលឿននៅភ្នំពេញ ក្រោយពីសិក្សារួច រយៈពេល១០ឆ្នាំហើយ ៕

អឺរុបមានផែនការចំណាយជាង ២០០ពាន់លានដុល្លារ ដើម្បីផ្ដាច់ខ្លួនពីថាមពលរុស្ស៊ី

ដោយ សុខុម

ក្រុងឡុងដ៍: សហភាពអ៊ឺរ៉ុប បានទម្លាយផែនការចំណាយរហូតដល់ទៅ២២១ពាន់លានដុល្លារអាមេរិក ដើម្បីផ្តាច់ខ្លួនចេញពីការប្រើប្រាស់ប្រេង និងឧស្ម័នរុស្ស៊ី។

តាមរយៈការធ្វើបទបង្ហាញផែនការចំណាយដ៏ធំសម្បើមរបស់ខ្លួនដែលមានឈ្មោះថា “REPowerEU” កាលពីថ្ងៃពុធ ទី១៨ ខែឧសភា គណៈកម្មការអឺរ៉ុប ប្រកាសថា ខ្លួននឹងព្យាយាមកាត់បន្ថយការប្រើប្រាស់ឧស្ម័នរុស្ស៊ី នៅទូទាំងប្លុកនេះឱ្យបាន៦៦%ត្រឹមដំណាច់ឆ្នាំនេះ ហើយនឹងឈប់ប្រើប្រាស់ទាំងស្រុងឱ្យបានមុនឆ្នាំ២០២៧ តាមរយៈការសន្សំសំចៃថាមពល ការស្វែងរកប្រភពផ្គត់ផ្គង់ជំនួស និងការពន្លឿនការផ្លាស់ប្តូរឆ្ពោះទៅប្រើប្រាស់ថាមពលកកើតឡើងវិញ។

ប្រធានគណៈកម្មការសហភាពអឺរ៉ុប លោកស្រី Ursula von der Leyen បានថ្លែងក្នុងសន្និសីទសារព័ត៌មានកាលពីថ្ងៃពុធ សប្ដាហ៍នេះថា “យើងកំពុងជំរុញមហិច្ឆតារបស់យើងឱ្យឈានមួយកម្រិតទៀតដើម្បីធ្វើឱ្យប្រាកដថា យើងឈប់ពឹងផ្អែកលើឥន្ធនៈហ្វូស៊ីលរបស់រុស្ស៊ី បានទាំងស្រុងឱ្យបានឆាប់តាមដែលអាចធ្វើទៅបាន”។

ចាប់តាំងពីរុស្ស៊ី បញ្ឆេះសង្គ្រាមចូលចូលឈ្លានពានប្រទេសអ៊ុយក្រែន នៅថ្ងៃទី២៤ ខែកុម្ភៈ ដើមឆ្នាំនេះមក សហភាពអឺរុប បានព្យាយាមកាត់បន្ថយការពឹងផ្អែករបស់ខ្លួនលើការនាំចេញថាមពលដ៏ធំសម្បើមរបស់ប្រទេសរុស្ស៊ី។

សហភាពអឺរុប បានព្រមព្រៀងដាក់បម្រាមលើធ្យូងថ្មរបស់រុស្ស៊ី នៅខែសីហា ខាងមុខនេះ ហើយកាលពីខែមុនបានកាត់បន្ថយការប្រើប្រាស់ឧស្ម័នធម្មជាតិរុស្ស៊ី មកនៅត្រឹម២៦%ពី៤០កាលពីឆ្នាំមុន។

ហើយផែនការថ្មីនេះគឺមានបំណងបង្កើនការនាំចូលឧស្ម័នធម្មជាតិរាវពីសហរដ្ឋអាមេរិក និងកាណាដា យ៉ាងឆាប់រហ័ស និងបង្កើនរំហូរឧស្ម័នតាមបំពង់បង្ហូរពីប្រទេសន័រវែស។

ទន្ទឹមនេះគណៈកម្មការអឺរ៉ុប ក៏បានបង្កើត Platform មួយដើម្បីបង្កលក្ខណៈងាយស្រួលឱ្យប្រទេសនានាមានលទ្ធភាពទិញថាមពលរួមគ្នាបានផងដែរ ជាមួយនឹងគោលបំណងជួយបញ្ចុះថ្លៃថាមពលដែលបានហក់ឡើងថ្លៃយ៉ាងគំហុក៕

ក្បួនវិនិយោគអចលនទ្រព្យរបស់មហាសេដ្ឋីអចលនទ្រព្យលំដាប់ពិភពលោក Warren Buffet

ដោយ៖ សហការី

ភ្នំពេញ៖ លោក Warren Buffet គឺជាកំពូលអ្នកវិនិយោគ និងជាមហាសេដ្ឋីមានទ្រព្យសម្បត្តិមហាសាល​មួយរូបលើពិភពលោក។ អ្នកជំនួញចាស់វស្សា​រូបនេះ បានចាប់ផ្តើមវិនិយោគលើផ្សារហ៊ុនតាំងពីវ័យ ១៦ឆ្នាំ ដែលគ្រានោះគាត់បានទិញ ភាគហ៊ុនចំនួនបីក្នុងតម្លៃ $38។​ ប៉ុន្ដែ ភាគហ៊ុននោះបានធ្លាក់ចុះមកត្រឹម $27 ហើយក៏បានងើបឡើងមកវិញបន្ដិចម្ដងៗរហូតដល់ $40។

ក្រោយមក​ លោកក៏បានលក់ភាគហ៊ុនរបស់គាត់ដោយបានចំនេញបន្ដិចបន្ដួច។ មិនយូរប៉ុន្មានភាគហ៊ុននោះបានឡើងដល់ទៅ $200 ក្នុងមួយភាគហ៊ុន ដែលធ្វើឲ្យលោកមានការសោកស្ដាយជាខ្លាំង។ យ៉ាងណាមិញ វាបានបង្រៀនគាត់ពីសារៈសំខាន់នៃការអត់ធ្មត់ ចំពោះការបណ្តាក់ទុនរយៈពេលវែង។ ហើយការប្រឡូកក្នុងវិស័យហ៊ុននាពេលនោះ បានក្លាយជាមេរៀនដ៏សំខាន់ក្នុងការត្រួសត្រាយផ្លូវ​សម្រាប់ការវិនិយោគរបស់លោក Warren ហើយបានក្លាយជាអ្នកជំនួញដ៏ជោគជ័យ និងមានទ្រព្យសម្បត្តិដល់ទៅជាង ១២០ ពាន់លានដុល្លារនាពេលបច្ចុប្បន្ន។ ​

ចាប់តាំងពីពេលនោះមក លោកបានដឹងពីវិធីសាស្រ្ដក្នុងការវិនិយោគ ដែលយុទ្ធសាស្រ្ដនេះ អាចយកទៅប្រើប្រាស់ក្នុងផ្នែកជាច្រើនដែលមនុស្សមួយចំនួនមិនបានដឹងពីមុនមក ដូចជាការវិនិយោគលើវិស័យអចលនទ្រព្យ តាមរយៈ៣ចំណុចសំខាន់ៗដូចខាងក្រោម៖

1/ វិនិយោគក្នុងរយៈពេលយូរ

មនុស្សជាច្រើនតែងគិតថា ការវិនិយោគរយៈពេលខ្លីមានភាពងាយស្រួល រហ័ស និងមិនសូវស្មុគស្មាញ។ ប៉ុន្ដែជាក់ស្ដែង ការវិនិយោគរយៈពេលយូរទើបជាមធ្យោបាយផ្ដល់ចំនេញច្រើន។ សម្រាប់លោក Warren Buffett គាត់មិនបានខ្វល់ខ្វាយរឿង ផ្ទះនៅជាន់ផ្ទាល់ដី ឬត្រូវរង់ចាំដល់ពេលវេលាជាក់លាក់ណាមួយឡើយ។ ផ្ទុយទៅវិញ គាត់ផ្ដោតទៅលើការវិនិយោគ ដែលមានស្ថេរភាព និងរយៈពេលវែង។ តាមរយៈការមើលបំណាំរបស់ឪពុក និងបទសោធន៍ពីកំហុសនៃការវិនិយោគរបស់គាត់ បានជួយឲ្យ លោក Warrent យល់ដឹងពីយុទ្ធសាស្រ្ដនៃការវិនិយោគរយៈពេលយូរ។

ពេលដែលអ្នកផ្ដោតតែលើការវិនិយោគក្នុររយៈពេលខ្លី នោះអ្នកនឹងជួបប្រទះបញ្ហាដែលជៀសមិនផុត។ ដូច្នេះហើយ គួរធ្វើការវិនិយោគដោយល្អិតល្អន់ និងគិតឲ្យបានគ្រប់ជ្រុងជ្រោយ។ ជាច្រើនឆ្នាំមកនេះ អាជីវកម្ម និងវិស័យអចលនទ្រព្យបានផ្លាស់ប្ដូរយ៉ាងឆាប់រហ័យ ប៉ុន្ដែយើងមើលឃើញថាវិស័យអចលនទ្រព្យនៅតែជាវិស័យមានសក្តានុខ្ពស់ក្នុងការបង្កើតផលចំណេញ។

2/ ទោះជាមានវិបត្តសេដ្ឋកិច្ចកើតឡើង ការវិនិយោគលើអចលនទ្រព្យអាចជួយអ្នកបាន

វិបត្តសេដ្ឋកិច្ចអាចកើតឡើងបានគ្រប់ពេលវេលា ដូច្នេះហើយគួរតែមានការតៀមទុកសម្រាប់គ្រាមានអាសន្នទាក់ទងនឹងតម្រូវការមូលដ្ឋានដូចជា លំនៅឋាននិងកន្លែងសម្រាប់ធ្វើការងារ។ ប្រសិនបើអ្នក ជួលអាគារធ្វើការក្នុងតម្លៃ $10,000 ក្នុងមួយខែក្នុងរយៈពេល 2 ឆ្នាំ ប៉ុន្ដែអ្នកនឹងមិនបានសល់នោះអ្វីទេ បើធៀបនឹងការទិញអាគារនោះហើយលក់ចេញវិញបន្ទាប់ពី 2ឆ្នាំ នោះអ្នកនឹងទទួលបានប្រាក់ចំនេញមកវិញ។ ដូច្នេះទោះបីជាមានវិបត្តកើតឡើង ប្រសិនបើអ្នកវិនិយោគលើអចលនទ្រព្យនោះអ្នកមិនសូវជាបារម្ភខ្លាំងពេកនោះទេ។

3/ ការអត់ធ្មត់នាំមកនូវសមិទ្ធិផលដ៏អស្ចារ្យ
យុទ្ធសាស្រ្ដដ៏សំខាន់បំផុតរបស់ លោក Warren Buffett គឺការអត់ធ្មត់។ ជាជំនាញមួយដែលត្រូវការខិតខំប្រឹងប្រែងតិចតួចតែទទួលបានមកវិញច្រើន។ មិនមែនមនុស្សគ្រប់គ្នាសុទ្ធតែដឹងពីវិធីរកលុយដោយការបង់រំលោះ និងរស់នៅក្នុងផ្ទះរបស់ពួកគេនោះទេ ។ ឧទាហរណ៍ ប្រាក់បៀវត្សម្រាប់អ្នកធ្វើការងារគឺ $100,000 ប៉ុន្ដែប្រសិនបើអ្នកយកលុយនោះទៅទិញផ្ទះហើយបង់រំលោះជារៀងរាល់ខែ ក្នុរយៈពេល 20 ឆ្នាំ ហើយតម្លៃនៃផ្ទះនោះឡើងថ្លៃដល់ទៅ $400,000។ មានន័យថា អ្នកទទួលបានប្រាក់ចំនេញ ចំនួន $300,000 ដោយគ្រាន់តែវិនិយោគលើផ្ទះរបស់អ្នកផ្ទាល់។

ជារួមមានរឿង២យ៉ាងដែលអ្នកគួរចងចាំនៅពេលត្រៀមខ្លួនវិនិយោគលើអចលនទ្រព្យគឺ ប្រសិនបើវាមើលទៅមិនគួរឲ្យជឿ គួរតែទិញទុកសិន រីឯមួយវិញគទៀតគឺអ្នកអាចនឹងគិតថាខ្លួនបានសាងកំហុងក្នុងការវិនិយោគលើអចលនទ្រព្យ ប៉ុន្ដែ 20 ឆ្នាំទៅមុខទៀតនោះអ្នកនឹងដឹងថាបានវាជារឿងដែលត្រឹមត្រូវបំផុត៕

តម្លៃផ្ទះថ្មីនៅទីផ្សារប្រទេសចិន ធ្លាក់ចុះជាលើកដំបូងចាប់តាំងពីឆ្នាំ២០២១

ដោយ សុខុម

ប៉េកាំង: តម្លៃផ្ទះថ្មីនៅទីផ្សារប្រទេសចិន ក្នុងខែមេសា ដើមឆ្នាំ២០២២ បានធ្លាក់ចុះជាលើកដំបូងចាប់តាំងពីខែធ្នូ ចុងឆ្នាំ២០២១ ដោយសារការបិទខ្ទប់យ៉ាងតឹងរ៉ឹងនៅក្នុងទីក្រុងជាច្រើន ទោះបីជារដ្ឋាភិបាលបានដាក់ចេញវិធានការបន្ធូរបន្ថយបន្ថែមទៀតក្នុងគោលបំណងជំរុញតម្រូវការលំនៅដ្ឋានក្ដី។

ទិន្នន័យខែមេសា ពីការិយាល័យស្ថិតិជាតិ (NBS) នៃប្រទេសចិន បានបង្ហាញកាលពីថ្ងៃពុធ ទី១៨ ខែឧសភា ថា តម្លៃផ្ទះថ្មីជាមធ្យមក្នុងទីក្រុងធំៗចំនួន៧០បានធ្លាក់ចុះ០,២%បើធៀបនឹងកំណើន០%ក្នុងខែមីនា ដើមឆ្នាំនេះ។

តម្លៃផ្ទះថ្មីក្នុងទីផ្សារប្រទេសចិន បានហក់ឡើង០,៧%បើធៀបនឹងឆ្នាំ២០២១ ដែលជាល្បឿនយឺតបំផុតចាប់តាំងពីខែតុលា ឆ្នាំ២០១៥។

ទីផ្សារអចលនទ្រព្យក្នុងប្រទេសចិន បានធ្លាក់ចូលក្នុងស្ថានភាពដ៏អាក្រក់មិនធ្លាប់ជួបក្នុងរយៈពេលប៉ុន្មានខែចុងក្រោយនេះ ដោយការលក់អចលនទ្រព្យបានដាំក្បាលចុះខ្លាំង ក្រោយពីវិស័យដែលជាសសរស្តម្ភដ៏រឹងមាំនៃសេដ្ឋកិច្ចធំបំផុតទី២ របស់ពិភពលោកមួយនេះបានធ្លាក់ចូលក្នុងវិបត្តិធ្ងន់ធ្ងរដោយសារវិធានការរបស់រដ្ឋាភិបាលក្រុងប៉េកាំង ក្នុងការរឹងបន្តឹងការខ្ចីប្រាក់ច្រើនហួសហេតុពីសំណាក់បណ្ដាក្រុមហ៊ុនអភិវឌ្ឍន៍។

កាលពីខែមេសា ទីក្រុងជាង៤០បានដាក់ចេញវិធានការជាច្រើនដើម្បីទាក់ទាញចំណាប់អារម្មណ៍របស់អ្នកទិញផ្ទះ ដោយក្នុងនោះរួមមានទាំងការឧបត្ថម្ភធន ការបញ្ចុះអត្រាការប្រាក់លើកម្ចីទិញផ្ទះ និងការអនុញ្ញាតឱ្យផ្តល់ប្រាក់កម្ចីបន្ថែមទៀតនៅក្នុងមូលនិធិលំនៅដ្ឋានផងដែរ។

ជាងនេះទៅទៀត អាជ្ញាធរហិរញ្ញវត្ថុចិន កាលពីថ្ងៃអាទិត្យ ចុងសប្ដាហ៍កន្លងទៅបានអនុញ្ញាតឱ្យបញ្ចុះអត្រាការប្រាក់បន្ថែមទៀតលើកម្ចីទិញផ្ទះសម្រាប់អ្នកទិញផ្ទះមួយចំនួនផងដែរ ដើម្បីជំរុញកំណើនលក់៕

កំណើនឧស្សាហកម្មកំពុងជំរុញសក្តានុពលទីផ្សារដីធ្លីនៅតំបន់ជាយក្រុង និងខេត្តនៅកៀករាជធានីភ្នំពេញ

ដោយ៖ សុផារី

ភ្នំពេញ៖ ការរីកចម្រើនវិស័យឧស្សាហកម្មបានរួមចំណែកដ៏សំខាន់ ដល់ការអភិវឌ្ឍសេដ្ឋកិច្ចជាតិ ហើយកំណើននៃការវិនិយោគវិស័យនេះ នឹងធ្វើឱ្យទីផ្សារដីធ្លីនៅតំបន់ជាយក្រុង និងខេត្តនៅកៀករាជធានីភ្នំពេញ​ កាន់តែមានសក្តានុពលសម្រាប់ការវិនិយោគ។

អ្នកជំនាញក្នុងវិស័យអចលនទ្រព្យ លើកឡើងថា តំបន់ជាយក្រុង និងខេត្តនៅកៀករាជធានីភ្នំពេញ ដូចជាខេត្តកណ្តាល និងកំពង់ស្ពឺ នឹងក្លាយជាទីតាំងយុទ្ធសាស្រ្តសម្រាប់ការវិនិយោគលើរោងចក្រឧស្សាហកម្ម។

លោក ច្រឹក​ សុខនីម ប្រធានសមាគមអ្នកវាយតម្លៃ​ និងភ្នាក់ងារអចលនវត្ថុកម្ពុជា បានលើកឡើងថា “នៅពេលដែលរាជធានីភ្នំពេញកាន់តែរីកចម្រើន គម្រោងឧស្សាហកម្ម និងរោងចក្រកាត់ដេរមួយចំនួនចាប់ផ្តើមមកតាមបណ្តាខេត្តផ្សេងៗ ជាពិសេសចូលមកក្នុងខេត្តកំពង់ស្ពឺ ព្រោះខេត្តនេះមានទីតាំងជិតខេត្តព្រះសីហនុដែលងាយស្រួលក្នុងការដឹកជញ្ជូន ហើយក៏នៅជិតនឹងរាជធានីភ្នំពេញផងដែរ”។​

របាយការណ៍ព្យាករណ៍ទីផ្សារអចលនទ្រព្យឆ្នាំ ២០២២ របស់ក្រុមហ៊ុន CBRE Cambodia បានរកឃើញថា តម្លៃដីនៅតាមតំបន់ជាយក្រុងរាជធានីភ្នំពេញ (outer suburbs) មានអត្រាកំណើនជាមធ្យមប្រចាំឆ្នាំ ២០ ភាគរយ ខណៈដែលតំបន់នៅកៀកកណ្តាលក្រុង (inner suburbs) មានអត្រាកំណើន១០ភាគរយ ក្នុងមួយឆ្នាំ ដែលគិតចាប់ពីឆ្នាំ២០១១ ដល់ឆ្នាំ២០២១។

ប្រភពដដែលបានបញ្ជាក់ថា អត្រាកំណើនដីធ្លីនេះ គឺផ្អែកលើកត្តាជំរុញសំខាន់ៗមួយចំនួន ដូចជាការរីកចម្រើនផ្នែកហេដ្ឋារចនាសម្ព័ន្ធ ស្របតាមផែនការអភិវឌ្ឍក្រុង និងការទិញដីទុករំពឹងផលចំណេញ ឬសម្រាប់គម្រោងអភិវឌ្ឍន៍ផ្សេងៗ។

កាលពីពេលថ្មីៗនេះ រដ្ឋបាលរាជធានីភ្នំពេញ បានជំរុញឱ្យរោងចក្រ និងឃ្លាំងទំនិញទៅកាន់តំបន់ជាយរាជធានីភ្នំពេញ ដើម្បីកាត់បន្ថយរថយន្តធុនធំចូលក្នុងក្រុងនាំប៉ះពាល់ដល់ការធ្វើចរាចរណ៍ ខណៈដែលរដ្ឋបាលរាជធានីភ្នំពេញ កំពុងពិភាក្សាជាមួយសមាគមដឹកជញ្ជូន និងបណ្តាសហគ្រាសធំៗ ដើម្បីស្វែងរកដំណោះរួមគ្នាទាក់ទងនឹងបញ្ហានេះ។

អចលនទ្រព្យឧស្សាហកម្ម ជាចំណែកទីផ្សារមួយក្នុងវិស័យអចលនទ្រព្យ ដែលផ្តោតលើឃ្លាំងស្តុកទំនិញ រោងចក្រឧស្សាហកម្ម ដោយរាប់ទាំងរោងចក្រកាត់ដេរសម្លៀកបំពាក់ រោងកច្រកែច្នៃម្ហូបអាហារ រោងកច្រផលិតគ្រឿងអេឡិចត្រូនិច និងរោងចក្រផលិតទំនិញផ្សេងៗទៀត ដែលបម្រើដល់ការផ្គត់ផ្គង់ក្នុងស្រុក និងការនាំចេញទៅក្រៅប្រទេស៕

ក្រសួងទេសចរណ៍៖ វិស័យទេសចរណ៍អន្តរជាតិ នឹងវិលមកសភាពដើមវិញនៅឆ្នាំ២០២៥ និងទេសចរផ្ទៃក្នុង ក្នុងឆ្នាំ២០២៣

ដោយ៖ សុផារី

ភ្នំពេញ៖ ក្រោយរាជរដ្ឋាភិបាលប្រកាសបើកទទួលទេសចរអន្តរជាតិ ដែលបានចាក់វ៉ាក់សាំងពេញលេញ កាលពីខែវិច្ឆិកា ឆ្នាំ២០២១កន្លងមក ស្ថានភាពទេសចរណ៍កម្ពុជាបន្តងើបឡើងជាបណ្តើរៗ ដោយកម្ពុជារំពឹងថានឹងទទួលបានទេសចរអន្តរជាតិ៧លាននាក់នៅក្នុងឆ្នាំ២០២៥ និងទេសចរផ្ទៃក្នុង១១លាននាក់នៅក្នុងឆ្នាំ២០២៣។

ក្រសួងទេសចរណ៍ តាមរយៈសេចក្តីប្រកាសព័ត៌មានចេញផ្សាយថ្ងៃទី១៨ ខែឧសភានេះថា ការបន្តងើបឡើង នៃស្ថានភាពទេសចរណ៍កម្ពុជា ក្នុងទម្រង់ជាអក្សរ V និងរំពឹងថាអាចវិលមករកសភាពដើមវិញនៅឆ្នាំ២០២៥ សម្រាប់ទេសចរអន្តរជាតិ និងឆ្នាំ២០២៣ សម្រាប់ទេសចរផ្ទៃក្នុង។

សម្រាប់ចក្ខុវិស័យឆ្នាំ២០២២នេះ កម្ពុជារំពឹងថានឹងសម្រេចឱ្យបានទេសចរអន្តរជាតិចំនួន៨០ម៉ឺន ទៅ១លាននាក់ និងទេសចរផ្ទៃក្នុងចំនួន៨លាននាក់។ ជាក់ស្ដែង ក្នុងរយៈពេល០៤ខែ ឆ្នាំ២០២២នេះ ទេសចរអន្តរជាតិមកកម្សាន្តកម្ពុជា មានចំនួន២៤១.៤៨៥នាក់ កើនឡើង១៩១,៥% និងទេសចរផ្ទៃក្នុងមានចំនួន៥,០៤លាននាក់ កើនឡើង១៦១,៥% ធៀបនឹងរយៈពេលដូចគ្នាឆ្នាំ២០២១។

ក្នុងនោះ ការធ្វើដំណើរតាមផ្លូវអាកាសមានចំនួន ១៣១.៨៦៤នាក់ កើនឡើង ២៤៣,៩% តាមផ្លូវគោកមានចំនួន១០៦.៦១៤នាក់ កើនឡើង១៣៨,៦% និងផ្លូវទឹកមានចំនួន៣.០០៧នាក់។

ក្រសួងទេសចរណ៍វាយតម្លៃថា កំណើនភ្ញៀវទេសចរនឹងអាចងើបឡើងលឿនចាប់ពីខែសីហា ឆ្នាំ២០២២ តទៅ ដោយទីផ្សារទេសចរណ៍អាទិភាពរបស់កម្ពុជារួមមាន អាស៊ាន(វៀតណាម ថៃ ឥណ្ឌូនេស៊ី ម៉ាឡេស៊ី និងហ្វីលីពីន) ទ្វីបអាស៊ី (ចិន កូរ៉េ ជប៉ុន) ទ្វីបអាមេរិក (អាមេរិក) ទ្វីបអ៊ឺរ៉ុប (បារាំង អង់គ្លេស)។

ក្រសួងទេសចរណ៍បានឱ្យដឹងទៀតថា អាជីវកម្មទេសចរណ៍បានបន្តបើកដំណើរការឡើងវិញជាបណ្តើរៗ ក្នុងនោះគិតត្រឹមខែមីនា ឆ្នាំ២០២២នេះ អាជីវកម្មទេសចរណ៍បិទ/ព្យួរមាន ចំនួន ១.៤២៨ទីតាំង និងប៉ះពាល់បុគ្គលិកសរុបចំនួន ២៣.៨៤៣នាក់ បើធៀបនឹងខែមិថុនា ឆ្នាំ២០២១ ដែលជាដំណាក់កាលប៉ះពាល់ខ្លាំងដោយវិបត្តិជំងឺកូវីដ ១៩ អាជីវកម្មទេសចរណ៍ចំនួន ១.៧៤៩ទីតាំង (ស្មើនឹង៥៥% អាជីវកម្មបិទ/ព្យួរកន្លងមក) បានបើកដំណើរឡើងវិញ និងបុគ្គលិកផ្គាប់រងផលប៉ះពាល់ទទួលបានការងារធ្វើឡើងវិញមានចំនួន ២៦.៣៧៦នាក់ (ស្នើនឹង៥២%នៃបុគ្គលិកដែលរងផលប៉ះពាល់សរុប)។

ក្នុងអំឡុងពេលនៃវិបត្តិនេះ រាជរដ្ឋាភិបាលបានឧបត្ថម្ភសាច់ប្រាក់ដល់បុគ្គលិកដែលត្រូវបានព្យួរការងារក្នុងវិស័យទេសចរណ៍បានចំនួន២២.៩៨១ នាក់ ស្មើនឹង ៥៤៥,៨២៤លើក គិតជាទឹកប្រាក់សរុប ៣០.១៩៦.៥៨៩.៤០០រៀល ប្រហែលនឹង ៧,៥៥លានដុល្លារ អាមេរិក៕

រដ្ឋាភិបាលធ្វើសម្បទានដីសេដ្ឋកិច្ចខេត្តកោះកុងជាង៤ម៉ឺនហិកតាដល់ក្រុមហ៊ុនអភិវឌ្ឍន៍ចំនួន៧ក្រុមហ៊ុន

ដោយ៖​ សុផារី

កោះកុង៖ រដ្ឋាភិបាលកម្ពុជា បានធ្វើសម្បទានដីសេដ្ឋកិច្ច ក្នុងខេត្តកោះកុង ដល់ក្រុមហ៊ុនអភិវឌ្ឍន៍សម្បទានដីសេដ្ឋកិច្ចចំនួន៧ក្រុមហ៊ុន ដែលគ្របដណ្តប់ផ្ទៃដីសរុបចំនួន៤៤.១៧៧ហិកតា​។​

នេះបើយោងតាមរបាយការណ៍បូកសរុបការងារ ឆ្នាំ២០២១ និងលើកទិសដៅឆ្នាំ២០២២ រដ្ឋបាលខេត្តកោះកុង បញ្ជាក់ថា ក្រុមហ៊ុនសម្បទានដីសេដ្ឋកិច្ច វិនិយោគលើការដាំដើមប្រេងខ្យល់ អំពៅ និងកៅស៊ូ។​

ក្នុងនោះ ផ្ទៃដីក្រុមហ៊ុន Greerich Group Co Ltd ដែលជាក្រុមហ៊ុនមួយក្នុងចំណោមក្រុមហ៊ុនទាំង៧ កាលពីមុនមានដីទំហំ១០.០៧៧ហិកតា។ ក្រោយចេញអនុក្រឹត្យ​លេខ៤៦អនក្រ ចុះថ្ងៃទី២ ខែមីនា ឆ្នាំ២០២១ របស់រាជរដ្ឋាភិបាល បានកាត់ដីរបស់ក្រុមហ៊ុននេះចំនួន ៤.៩២៣ហិកតា ជាទ្រព្យសម្បត្តិឯកជនរបស់រដ្ឋ ដើម្បីធ្វើប្រទានកម្មជាកម្មសិទ្ធជូនប្រជាពលរដ្ឋ និងមួយចំណែករក្សាទុក ជាទ្រព្យសម្បត្តិឯកជនកាន់កាប់ដោយរដ្ឋបាលខេត្តកោះកុង ដែលធ្វើឱ្យផ្ទៃដីក្រុមហ៊ុននៅសល់ជាក់ស្តែងមានទំហំ៥.១៥៤ហិកតា​។

ខេត្តកោះកុង ជាខេត្តមួយក្នុងចំណោម ២៥រាជធានីខេត្ត ដែលមានសក្តានុពលដល់ការដាំដុះដំណាំកៅស៊ូ និងដំណាំផ្សេងៗទៀត។ ផ្ទៃដីដាំដុះកៅស៊ូទូទាំងខេត្តសរុបចំនួន១៤.៣៩៨ហិកតា ផ្ទៃដីអំពៅ១៩.៧០០ហិកតា ផ្ទៃដីអាកាស្យា៩.៦១០ហិកតា និងផ្ទៃដីប្រេងខ្យល់១.៤២៩ហិកតា៕