ដោយ: គង់ លាងហួរ
អន្តរជាតិ: ស្ថាប័នធនាគារខ្នាតយក្ស Goldman Sachs របស់សហរដ្ឋអាមេរិកគ្រោងនឹងផ្តល់ហិរញ្ញប្បទានដល់គម្រោងសាងសង់លំនៅដ្ឋានតម្លៃសមរម្យ ដែលត្រូវការទុនវិនិយោគសរុបចំនួន២៧០លានដុល្លារអាមេរិកនៅទីក្រុងញូវយ៉ក ដែលជាមជ្ឈមណ្ឌលហិរញ្ញវត្ថុរបស់ពិភពលោក។

យោងតាមកាសែត Reuters បានចុះផ្សាយថា គម្រោងនេះ រួមមានការសាងសង់អាផាតមុិនតម្លៃសមរម្យចំនួន៣៨៥យូនីត នៅក្នុងតំបន់ East New York នៃសង្កាត់ Brooklyn។នេះបើយោងតាមប្រភពពីការិយាល័យរបស់លោកស្រីអភិបាលក្រុងញូវយ៉ក Kathy Hochul។

ការិយាល័យអភិបាលក្រុងបានគូសបញ្ជាក់នៅក្នុងសេចក្តីថ្លែងការណ៍មួយថា គម្រោង ដែលផ្តល់ហិរញ្ញប្បទានដោយក្រុមហ៊ុនបុត្រសម្ព័ន្ធ Urban Investment Group របស់ធនាគារខ្នាតយក្ស Goldman Sachs នឹងរួមមានតំបន់ពាណិជ្ជកម្មផងដែរ។

លោកស្រី Hochul បានលើកឡើងថា “គម្រោងសាងសង់អាផាតមុិនតម្លៃសមរម្យនេះនឹងជួយដល់យើងក្នុងការប្រយុទ្ធប្រឆាំងនឹងវិបត្តិខ្វះខាតលទ្ធភាពទិញផ្ទះ និងផ្តល់អាទិភាពលើការកែលំអតំបន់ East New York ឱ្យកាន់តែមានភាពរស់រវើកសម្រាប់គ្រួសារ”។

ក្រុមហ៊ុន Urban Investment Group បានបណ្តាក់ទុនវិនិយោគជិត១១ពាន់លានដុល្លារទៅក្នុងគម្រោងលំនៅដ្ឋានតម្លៃសមរម្យ និងគម្រោងអភិវឌ្ឍន៍ផ្សេងទៀតនៅទូទាំងរដ្ឋញូវយ៉ក និងបានបោះទុនវិនិយោគ៩ពាន់លានដុល្លារនៅទីក្រុងញូវយ៉កចាប់តាំងពីឆ្នាំ២០០១។

លោកស្រី Asahi Pompey ប្រធានក្រុមហ៊ុន Urban Investment Group បានអះអាងថា ការ​វិនិយោគ​របស់យើងនឹងចាក់បញ្ចូលសន្ទុះដល់តំបន់ ​East New York ឱ្យបោះជំហាន​យ៉ាង​ខ្លាំង​ក្លាឆ្ពោះ​ទៅ​រក​ការរីកចម្រើន​ និង​ការ​កែ​លម្អ​ ជាពិសេស​កំណើនក្នុង​ការ​អភិវឌ្ឍ​ន៍លំនៅដ្ខាន និង​សេដ្ឋកិច្ច៕ប្រភព: Reuters៕

ភ្នំពេញ​ ថ្ងៃទី​១៨​ ខែកក្ដដា ឆ្នាំ២០២៥៖ បុគ្គលិក និងគណៈគ្រប់គ្រងរបស់ ធនាគារ ហត្ថា បានសហការជាមួយមជ្ឈមណ្ឌលជាតិផ្ដល់ឈាម រៀបចំកម្មវីធីបរិច្ចាគឈាមក្រោមប្រធានបទ ​“បរិច្ចាគឈាម សង្គ្រោះជីវិត” សម្រាប់ជួយដល់បងប្អូនប្រជាជនខ្មែរដែលកំពុងត្រូវការឈាមជាចាំបាច់ក្នុងការជួយសង្គ្រោះជីវិតអ្នកជំងឺដែលកំពុងសម្រាកព្យាបាលនៅមន្ទីពេទ្យនៅទូទាំងប្រទេស។ កម្មវិធីនេះបានប្រព្រឹត្តិទៅនៅអគារធនាគារ ​ហត្ថា ដែលស្ថិតនៅតាមបណ្តោយមហាវិថីសម្តេចតេជោ ហ៊ុនសែន សង្កាត់ចាក់អង្រែលើ ខណ្ឌមានជ័យ រាជធានីភ្នំពេញ ដោយមានការអញ្ជើញចូលរួមពីលោកវេជ្ជបណ្ឌិត សុខ ប៉ូ ប្រធានមជ្ឈមណ្ឌលជាតិផ្ដល់ឈាម ព្រមទាំងសហការី និងលោក​ មិន សុផា ប្រធាននាយកប្រតិបត្តិ ធនាគារ ហត្ថា ព្រមទាំងថ្នាក់គ្រប់គ្រង និងបុគ្គលិកនៃធនាគារ ហត្ថា ប្រមាណជិត ១៥០នាក់។

ការបរិច្ចាគឈាមរបស់បុគ្គលិក ធនាគារ ហត្ថា ក្នុងថ្ងៃនេះបានសបញ្ជាក់យ៉ាងច្បាស់អំពីការចូលរួមយ៉ាងសកម្មក្នុងសកម្មភាពទំនួលខុសត្រូវសង្គមជាមួយនឹងការយកចិត្តទុកដាក់ ការស្រលាញ់ និងចូលរួមដើម្បីជាប្រយោជន៍ដល់សហគមន៍ និងសង្គមជាតិ។ យើងទាំងអស់គ្នាពិតជាមានមោទនភាព និងសប្បាយចិត្តក្នុងការចូលរួមចំណែកជួយដល់សង្គមកម្ពុជា ក៏ដូចជាផ្ដល់នូវក្ដីស្រលាញ់ចំពោះសហគមន៍របស់យើង។

លោក មិន សុផា ប្រធាននាយកប្រតិបត្តិ ធនាគារ ហត្ថា បានមានប្រសាសន៍ថា“ នេះមិនមែនជាលើកទី១ របស់ធនាគារ ហត្ថា ទេ ដែលរៀបចំកម្មវិធីបរិច្ចាគឈាមនេះឡើង ហើយកម្មវិធីនេះ ត្រូវបានរៀបចំឡើងដើម្បីចូលរួមចំណែកជាមួយរាជរដ្ឋាភិបាលក្នុងការលើកកម្ពស់សុខមាលភាពរបស់ប្រជាជនកម្ពុជា ព្រមទាំងជួយសង្គ្រោះអាយុជីវិតរបស់អ្នកជំងឺដែលត្រូវការឈាមជាចាំបាច់។ លោកបានបន្តថា “ ខ្ញុំសូមលើកទឹកចិត្តអោយបុគ្គលិកធនាគារ ហត្ថា ទាំងអស់បន្តធ្វើការបរិច្ចាគឈាមនេះ អោយបានទៀតទាត់ដើម្បីលើកកំពស់សុខភាពផ្ទាល់ខ្លួន និងសង្រ្គោះអាយុជីវិតជនរងគ្រោះ”។

លោកវេជ្ជបណ្ឌិត សុខ ប៉ូ ប្រធានមជ្ឈមណ្ឌលជាតិផ្ដល់ឈាម  បានមានប្រសាសន៍ថា៖ “សម្រាប់យុទ្ធនាការបរិច្ចាគឈាមនៅថ្ងៃនេះ ក្នុងនាមមជ្ឈមណ្ឌលជាតិផ្ដល់ឈាម និងសហការីទាំងអស់ ខ្ញុំសូមស្វាគមន៍យ៉ាងកក់ក្តៅ និងសូមថ្លែងអំណរគុណយ៉ាងជ្រាលជ្រៅចំពោះសប្បុរសជនទាំងអស់ ជាពិសេសសូមថ្លែងអំណរគុណជូនលោក មិន សុផា ប្រធាននាយកប្រតិបត្តិ នៃធនាគារ ហត្ថា ព្រមទាំងថ្នាក់ដឹកនាំ និងបុគ្គលិក ដែលបានស្ម័គ្រចិត្តចូលរួមបរិច្ចាគឈាម ដោយក្តីសប្បុរស និងចិត្តអនុគ្រោះធម៌។ ការចូលរួមដ៏សកម្មរបស់លោកអ្នក មិនត្រឹមតែជាការរូមចំណែកជួយសង្ក្រោះជីវិតជនរងគ្រោះទេ ប៉ុន្តែជាការលើកកម្ពស់ការយល់ដឹងពីការបរិច្ចាគឈាម ដោយស្ម័គ្រចិត្ត​ ដោយគ្មានការរើសអើង មិនប្រកាន់ជាតិសាសន៍​ សាសនា ឬនិន្នាការនយោបាយ ជាពិសេសគឺផ្សារភ្ចាប់សក្មភាពនៃការបរិច្ចាគ ដោយស្ម័គ្រចិត្ត។ លោកបន្ថែមទៀតថា “ ខ្ញុំសូមអំពាវនាវឲ្យបន្តការគាំទ្រដល់យុទ្ធនាការបរិច្ចាគឈាមនៅពេលអនាគត តាមរយៈការចូលរួមដោយស្ម័គ្រចិត្តតាមគ្រប់រូបភាពក្នុងយុទ្ធនាការផ្សេងៗ ដើម្បីរួមចំណែកសង្គ្រោះជីវិតមនុស្សបន្ថែមទៀត។”

អំពី ធនាគារ ហត្ថា៖

ធនាគារ ហត្ថា ជាធនាគារពាណិជ្ជ ដែលមានវត្តមាននៅក្នុងព្រះរាជាណាចក្រកម្ពុជាអស់រយៈកាលជាង ៣០ឆ្នាំមកហើយ ដែលបានផ្តល់ជូនសេវាហិរញ្ញវត្ថុយ៉ាងទូលំទូលាយ ដល់អតិថិជនរបស់ខ្លួន ដែលរួមានអតិថិជនជាលក្ខណៈបុគ្គល សហគ្រាសខ្នាតតូច និងមធ្យម (SME) ព្រមទាំងស្ថាប័នសាអាជីវកម្មធំៗជាច្រើនទៀត។ ធនាគារ ហត្ថា ជាធនាគារពាណិជ្ជឈានមុខគេមួយក្នុងប្រទេសកម្ពុជា ដែលមានតាមបណ្ដាញសាខាយ៉ាងទូលំទូលាយរហូតដល់ ១៥៦ សាខា គ្របដណ្តប់ទូទាំងប្រទេស។ ធនាគារ ហត្ថា បានទទួលការវាយតម្លៃជាស្ថាប័នមានស្ថិរភាពហិរញ្ញវត្ថុរឹងមាំ តាមរយៈការរក្សាបាននូវចំណាត់ថ្នាក់ BBB+ អស់រយៈពេល ០៧ឆ្នាំជាប់គ្នា ពីក្រុមហ៊ុន TRIS Rating ដែលចំណាត់ថ្នាក់នេះសបញ្ជាក់ឱ្យឃើញថា ធនាគារ ហត្ថា មានដំណើរការមុខជំនួញរបស់ខ្លួនប្រកបដោយស្ថិរភាព និងឈានមុខគេនៅក្នុងទីផ្សារហិរញ្ញវត្ថុកម្ពុជា។ ជាងនេះទៅទៀត ធនាគារ ហត្ថា មានមូលធនគ្រប់គ្រាន់ ស្ថិរភាពផ្នែកហិរញ្ញវត្ថុខ្ពស់ ព្រមទាំងមានសាច់ប្រាក់បង្វិលគ្រប់គ្រាន់ ដែលអាចធានាបាននូវការបន្តប្រតិបត្តិការអាជីវកម្មដោយរលូន។ ភាពរឹងមាំផ្នែកហិរញ្ញវត្ថុនេះ ទទួលបានការគាំទ្រយ៉ាងពេញទំហឹងពីធនាគារអាណាព្យាបាល គឺ MUFG ដែលជាសម្ព័ន្ធហិរញ្ញវត្ថុធំមួយ ដែលមានសាខាប្រហែល ​២000 ទីតាំង ស្ថិតនៅក្នុងទីផ្សារជាង ៤០ ក្នុងពិភពលោក។ សម្ព័ន្ធក្រុមហ៊ុនផ្តល់សេវាកម្មហិរញ្ញវត្ថុ MUFG បានការចុះបញ្ជីនៅលើផ្សារហ៊ុន (Tokyo Stock Exchange), ណាហ្គូយ៉ា (Nagoya Stock Exchange) និងញូយ៉ក (New York Stock Exchange) ដោយមានតម្លៃទីផ្សារ និងមានតម្លៃទីផ្សាររហូតដល់ ២៤.២៧ កោដិយាន់ និងប្រាក់ចំណេញសុទ្ធចំនួន ១.៥៩១,១ ពាន់លានយាន់ នៅត្រឹមចុងខែមីនា ឆ្នាំ ២០២៥។

ដោយ: គង់ លាងហួរ
អន្តរជាតិ: សហរដ្ឋអាមេរិក និងប្រទេសចិនជាក្បាលម៉ាសុីនរបស់សេដ្ឋកិច្ចសកល។ ហេតុនេះ ស្ថានភាពសេដ្ឋកិច្ចរបស់ប្រទេសមហាអំណាចទាំង២ អាចជះឥទ្ធិពលលើទិដ្ឋភាពសេដ្ឋកិច្ចពិភពលោក។

ខាងក្រោមនេះជាសូចនាករ ដែលបង្ហាញពីសុខភាពសេដ្ឋកិច្ចចិន និងសហរដ្ឋអាមេរិកក្នុងរយៈពេល៦ខែដំបូងដើមឆ្នាំ២០២៥៖

ទី១: ប្រទេសចិន

កំណើនផលទុនជាតិសរុប (GDP) របស់ប្រទេសមហាអំណាចសេដ្ឋកិច្ចលេខ២ នៅលើពិភពលោកបានកើនឡើងក្នុងរង្វង់៥,៣ភាគរយក្នុងឆមាសទី១ ឆ្នាំនេះ បើប្រៀបធៀបនឹងរយៈពេលដូចគ្នាកាលពីឆ្នាំមុន។

ជាមួយគ្នានេះ ស្ថាប័នជំនាញនានា ដូចជា ធនាគារ ANZ បានធ្វើការបង្កើននូវការ​ព្យាករ​ណ៍កំណើន​សេដ្ឋកិច្ចរបស់ប្រទេសចិនពេញ​មួយ​ឆ្នាំ​២០២៥ ​ដល់​ក្នុងរង្វង់ចន្លោះពី៥,១ភាគរយទៅ៥,៣ភាគរយ។

ទិន្នផលក្នុងវិស័យឧស្សាហកម្មចិនបានកើនឡើងក្នុងរង្វង់៦,៤ភាគរយនៅក្នុងឆមាសទី១ ដោយសារកំណើននៃផលិតកម្មផ្នែកបច្ចេកវិទ្យាលំដាប់ខ្ពស់។

ចំណែក ការនាំចេញទំនិញចិនបានកើនឡើង៥,៩ភាគរយនៅក្នុងឆមាសទី១។ ប្រទេសចិនបានបង្វែរទិសដៅនាំចេញទំនិញរបស់ខ្លួនទៅកាន់តំបន់អាស៊ាន សហភាពអឺរ៉ុប និងតំបន់អាហ្រ្វិក ស្របពេលមានភាពតានតឹងជាមួយសហរដ្ឋអាមេរិក។ ការវិនិយោគទ្រព្យសកម្មថេរ(Fixed-asset)បានកើនឡើង២,៨ភាគរយ ខណៈពេលដែលការលក់រាយបានកើនឡើង៥ភាគរយ។

យ៉ាងណាមិញ បញ្ហាប្រឈមនៅតែបន្តកើតមានចំពោះសេដ្ឋកិច្ចរបស់ប្រទេសចិន ស្របពេលការប្រើប្រាស់ក្នុងស្រុកមិនទាន់វិលទៅរកស្ថានភាពល្អប្រសើរខ្លាំងនៅឡើយ។

ជាមួយគ្នានេះ ការវិនិយោគលើអចលនទ្រព្យបានដាំក្បាលចុះ១១ភាគរយ។ សម្ពាធនៃវិបត្តិបរិត្តផរណាកំពុងកើនឡើង ដោយទាមទារឱ្យមានការទាញទម្លាក់អត្រាការប្រាក់បន្ថែមទៀតដោយធនាគារកណ្តាលចិន។

ទី២: សហរដ្ឋអាមេរិក

សេដ្ឋកិច្ចរបស់សហរដ្ឋអាមេរិកបានធ្លាក់ចុះក្នុងអត្រាប្រចាំឆ្នាំចំនួន០,៥ភាគរយកាលពីអំឡុងត្រីមាសទី១ ឆ្នាំ២០២៥ ខណៈទិន្នន័យសេដ្ឋកិច្ចអាមេរិកនៅក្នុងត្រីមាសទី២ មិនទាន់ត្រូវបានចេញផ្សាយនៅឡើយ។

យ៉ាងណាមិញ កំណើនសេដ្ឋកិច្ចជាមធ្យមរបស់សហរដ្ឋអាមេរិកនៅឆ្នាំ២០២៥នេះ ត្រូវបានគេរំពឹងថា នឹងធ្លាក់ចុះមកនៅត្រឹមចន្លោះពី១,៤ភាគរយទៅ១,៥ភាគរយ បើធៀបនឹងការសម្រេចបានកំណើនសេដ្ឋកិច្ចក្នុងរង្វង់២,៨ភាគរយកាលពីឆ្នាំមុន។

អត្រាអតិផរណានៅតែមានកម្រិតលើសពីគោលដៅចំនួន២ភាគរយរបស់ធនាគារកណ្តាលអាមេរិក(Fed) ខណៈសន្ទស្សន៍តម្លៃទំនិញប្រើប្រាស់(CPI) ស្ថិតក្នុងរង្វង់ចន្លោះពី២,៦ភាគរយទៅ២,៩ភាគរយ។

អត្រាភាពអត់ការងារធ្វើនៅតែមានកម្រិតទាបក្នុងរង្វង់៤,១ភាគរយ។ ប៉ុន្តែ អត្រានេះត្រូវបានព្យាករណ៍ថា នឹងកើនឡើងដល់ក្នុងរង្វង់៤,៥ភាគរយនៅឆ្នាំ២០២៦ខាងមុខ។

បណ្តាធនាគារធំៗនៅសហរដ្ឋអាមេរិកសម្រេចបានកំណើនប្រាក់ចំណូលប្រចាំត្រីមាសទី២។ តួយ៉ាង ធនាគារ JPMorgan សម្រេចបានកំណើនប្រាក់ចំណូលក្នុងរង្វង់៨ភាគរយ ខណៈធនាគារ Citi សម្រេចបានកំណើនប្រាក់ចំណូលក្នុងរង្វង់២៥ភាគរយ។ រីឯ ធនាគារ Wells Fargo សម្រេចបានកំណើនប្រាក់ចំណូលក្នុងរង្វង់១២ភាគរយ។

ទោះជាយ៉ាងណា ស្ថាប័ន Fitch បានទាញទម្លាក់ចំណាត់ថ្នាក់ឥណទានរបស់សហរដ្ឋអាមេរិក ស្របពេលមានការកើនឡើងនូវឱនភាពថវិកា និងភាពមិនច្បាស់លាស់នៃពន្ធគយរបស់រដ្ឋបាលប្រធានាធិបតីអាមេរិកលោក ដូណាល់ ត្រាំ៕ប្រភព: FT & Reuters & China Briefing៕