សក្ដានុពលនិងតម្លៃដីធ្លីអរិយក្សត្រនឹងមានសន្ទុះមួយកម្រិតទៀតក្រោយដឹងពីទីតាំងស្ពានតភ្ជាប់ពីភ្នំពេញត្រូវបានបង្ហាញ

ដោយៈវឌ្ឍនៈ

ភ្នំពេញៈ ស្ពានឆ្លងទន្លេពីភ្នំពេញទៅកាន់តំបន់អរិយក្សត្រ ត្រូវបានជ្រើសរើសទីតាំងរួចជាស្រេច សម្រាប់ត្រៀមរៀបចំដំណើរការសាងសង់ដែ​លចំណុចតភ្ជាប់គឺពីចំណុចផ្សារចាស់ ( ផ្សាររាត្រី) ឆ្ពោះទៅកាន់តំបន់អរិយក្សត្រផ្ទាល់តែម្ដង ។

ព័ត៌មានជុំវិញចំណុចតភ្ជាប់នេះ នឹងធ្វើឱ្យសក្ដានុពល និងតម្លៃដីធ្លីនៅក្នុងតំបន់អរិយក្សត្រនឹងហក់ឡើងមួយកម្រិតទៀត។

អ្នកស្រីអាន សុធីតា អគ្គនាយិកាក្រុមហ៊ុន PropNex Cambodia បានឱ្យដឹងនាព្រឹកថ្ងៃទី៣ មិនានេះថា អរិយក្សត្រជាតំបន់ដែលមិនឆ្ងាយពីភ្នំពេញប៉ុន្មាននោះទេ គឺវាបាំងតែទន្លេមួយប៉ុណ្ណោះ គ្រាន់តែការឆ្លងកាត់មកភ្នំពេញ និងពីភ្នំពេញ ទៅអរិយក្សត្រត្រូវឆ្លងកាត់ ដោយធ្វើដំណើរតាមសាឡាង។

អ្នកស្រីបន្តថា “ដូច្នេះបើសិនជាតំបន់ទាំងពីរ មានស្ពានតភ្ជាប់ត្រង់ នឹងធ្វើឱ្យតំបន់ទាំងពីរកាន់តែខិតជិតគ្នា ហើយនឹងភ្ជាប់តំបន់ទាំងនេះតែមួយ”។លោកស្រីបន្តថា “មិនយូរមិនឆាប់នៅតំបន់អរិយក្សត្រ នឹងមានការអភិវឌ្ឍលើហេដ្ឋារចនាសម្ព័ន្ធបន្ថែម ការអភិវឌ្ឍទៅលើលំនៅឋាន ក៏ដូចជាវិស័យដីធ្លីនៅតំបន់នោះផងដែរ ខណៈតំបន់នេះក៏ឃើញថាមានការចាប់អារម្មណ៍ខ្លាំងពីសំណាក់វិនិយោគិនក្នុងនិងក្រៅប្រទេស”។

តម្លៃដីធ្លី នៅតំបន់អរិយក្សត្រ ត្រូវបានហក់ឡើងម្ដងរួចទៅហើយកាលពីអំឡុងមុនកូវីដ១៩ ដោយកាលនោះវិនិយោគិនចិន និងភ្នាក់ងារអចលនទ្រព្យក្នុងស្រុកជាច្រើន បានស្វែងរកដីនៅតំបន់នោះ ដើម្បីត្រៀមទុកវិនិយោគដោយរំពឹងពីការតភ្ជាប់ស្ពានភ្នំពេញ អរិយក្សត្រ ។

លោកប៉ូ អ៊ាវគង់ អគ្គនាយកនៃក្រុមហ៊ុនអចលនទ្រព្យ Advance ក៏បានឱ្យដឹងថា តំបន់អរិយក្សត្រជាតំបន់មួយ ដែលមានសក្ដានុពលមួយនៅជិតរាជធានីភ្នំពេញ ហើយបើទោះបីជាតំបន់នេះ ស្ថិតនៅក្នុងខេត្តកណ្ដាលក៏ដោយក៏តំបន់នេះ មិនឆ្ងាយពីភ្នំពេញទេ ដូច្នេះបើសិនជាវាមានស្ពានឆ្លងពីភ្នំពេញ ដោយមិនបាច់ឆ្លងសាឡាង នោះតំបន់អរិយក្សត្រនឹងកាន់តែមានសន្ទុះទៅលើដីធ្លីនិងការអភិវឌ្ឍ ។

តំបន់អរិយក្សត្រ មានគម្រោងមួយចំនួនកំពុងត្រៀមរៀបចំ ក្នុងការអភិវឌ្ឍផងដែរ ដោយបានរៀបចំទីតាំងរួចហើយផងដែរ ហើយតំបន់ប្រជាពលរដ្ឋរស់នៅក្នុងតំបន់នេះ នឹងទទួលបានផលប្រយោជន៍ជាច្រើន ពីការអភិវឌ្ឍនៅក្នុងតំបន់អរិយក្សត្រ ជាពិសេសពីការតភ្ជាប់ស្ពានភ្នំពេញ អរិយក្សត្រនេះ៕

តុលាការឧក្រិដ្ឋកម្មអន្តរជាតិ ICC ចាប់ផ្តើមស៊ើបអង្កេតលើសកម្មភាពឈ្លានពានរបស់រុស្ស៊ីនៅអ៊ុយក្រែនហើយ

ដោយៈសុខុម

មូស្គូ: លោក Karim Khan រដ្ឋអាជ្ញានៃតុលាការឧក្រិដ្ឋកម្មអន្តរជាតិ ICC ដែលលំអៀងទៅរកលោកខាងលិចបានប្រកាសថា តុលាការអន្តរជាតិមួយនេះបានចាប់ផ្តើមស៊ើបអង្កេត លើសកម្មភាពឈ្លានពានរបស់រុស្ស៊ី ក្នុងប្រទេសអ៊ុយក្រែនហើយ។ នេះបើយោងតាមសារព័ត៌មាន The Edge Markets ចុះផ្សាយនៅថ្ងៃព្រហស្បតិ៍ ទី៣ មីនា នេះ។

សារព័ត៌មាន Sputnik បានចុះផ្សាយថា លោក Karim Khan បានចេញសេចក្តីថ្លែងការណ៍ថា “ខ្ញុំបានជូនដំណឹងទៅប្រធានតុលាការឧក្រិដ្ឋកម្មអន្តរជាតិ ICC នៅមុននេះបន្តិច អំពីការសម្រេចចិត្តរបស់ខ្ញុំ ដើម្បីបន្តការស៊ើបអង្កេតយ៉ាងសកម្មលើស្ថានភាពនេះ។ ការងាររបស់យើងនៅក្នុងការប្រមូលភ័ស្តុតាងឥឡូវនេះបានចាប់ផ្តើមហើយ”។

រដ្ឋអាជ្ញារូបនេះបានលើកឡើងបន្ថែមទៀតថា តុលាការឧក្រិដ្ឋកម្មអន្តរជាតិ ICC នឹងផ្តោតលើគោលបំណងសំខាន់ៗរបស់ស្ថាប័ននោះ គឺការធានាបាននូវការទទួលខុសត្រូវ ចំពោះឧក្រិដ្ឋកម្មដែលស្ថិតនៅក្រោមយុត្តាធិការរបស់តុលាការ។

កាលពីសប្តាហ៍មុន ប្រទេសរុស្ស៊ី បានចាប់ផ្តើមបញ្ឆេះសង្គ្រាមចូលឈ្លានពានប្រទេសអ៊ុយក្រែន បន្ទាប់ពីអះអាងថា សាធារណរដ្ឋ Donetsk និងសាធារណរដ្ឋ Luhansk ដែលទើបបំបែកខ្លួនចេញពីអ៊យក្រែន បានស្នើសុំជំនួយពីរុស្ស៊ី ដើម្បីការពារខ្លួនពីការវាយប្រហារ ដែលកំពុងបន្តពីសំណាក់កងទ័ពអ៊ុយក្រែន។

បណ្តាប្រទេសលោកខាងលិច បានថ្កោលទោសយ៉ាងខ្លាំង ចំពោះការឈ្លានពានដោយយោធារុស្ស៊ី ចូលក្នុងប្រទេសអ៊ុយក្រែន ហើយបានបង្កើនការដាក់ទណ្ឌកម្មធ្ងន់ៗ ជាបន្តបន្ទាប់លើក្រុងម៉ូស្គូ៕  The Edge Markets៕

តើសេដ្ឋកិច្ចរុស្ស៊ី នឹងអាចដួលរលំទេ ហើយប្រទេសនេះងាកទៅខាងណាដើម្បីសេដ្ឋកិច្ចរបស់ខ្លួន?

ដោយ សុខុម

ក្រុងឡុងដ៍: លោកខាងលិចបានដាក់ទណ្ឌកម្មធ្ងន់ៗជាបន្តបន្ទាប់ទៅលើប្រទេសរុស្ស៊ី ដើម្បីឆ្លើយតបទៅនឹងការឈ្លានពានរបស់ប្រទេសនេះចូលអ៊ុយក្រែន។ ហើយការដាក់ទណ្ឌកម្មជុំចុងក្រោយធ្វើឡើងដើម្បីបង្កឱ្យមានវិបត្តិធនាគារ ផ្ដួលការការពារផ្នែកហិរញ្ញវត្ថុរបស់ក្រុងមូស្គូ និងរុញច្រានសេដ្ឋកិច្ចរុស្ស៊ី ឱ្យធ្លាក់ចូលក្នុងវិបត្តិសេដ្ឋកិច្ចយ៉ាងជ្រៅ។

ក្រុមអ្នកវិភាគបានលើកឡើងថា ក្នុងប្រវត្តិសាស្ត្រគេមិនធ្លាប់ឃើញប្រទេសរុស្ស៊ី ទទួលរងការដាក់ទណ្ឌកម្មច្រើន និងធ្ងន់ធ្ងរដូចពេលនេះឡើយ។ អ្នកវិភាគនិយាយទៀតថា មានហានិភ័យខ្ពស់ដែលប្រទេសរុស្ស៊ី អាចប្រឈមមុខនឹងវិបត្តិហិរញ្ញវត្ថុ ដែលកំពុងរុញច្រានឱ្យធនាគារធំៗបំផុតរបស់ខ្លួនស្ថិតលើមាត់ជ្រោះមរណៈ ពោលគឺការដួលរលំ។

ក្រុមមន្ត្រីលោកខាងលិចបានចាត់ទុកយុទ្ធនាការដាក់ទណ្ឌកម្មរបស់ពួកគេថាជាសង្រ្គាមសេដ្ឋកិច្ច ដែលធ្វើឡើងក្នុងបំណងដាក់ទណ្ឌកម្មប្រធានាធិបតីរុស្ស៊ី លោក វ្ល៉ាឌីមៀ ពូទីន ហើយរុញច្រានប្រទេសរុស្ស៊ី ឱ្យដួលរលំ បើទោះបីជាការដាក់ទណ្ឌកម្មនានាអាចនឹងត្រូវការពាររាប់ឆ្នាំទម្រាំបំផ្លាញការការពារសេដ្ឋកិច្ចរបស់រុស្ស៊ី បានយ៉ាងណាក៏ដោយ។

លោក Bruno Le Maire រដ្ឋមន្ត្រីក្រសួងហិរញ្ញវត្ថុបារាំង បានប្រាប់បណ្តាញព័ត៌មានក្នុងស្រុកកាលពីថ្ងៃអង្គារ ទី០១ មីនា ថា “យើងនឹងធ្វើឱ្យសេដ្ឋកិច្ចរុស្ស៊ី ដួលរលំ”។

ទោះជាយ៉ាងណា ដោយសាររុស្ស៊ី ជាប្រទេសផ្គត់ផ្គង់ថាមពលពិភពលោក ការធ្វើឱ្យសេដ្ឋកិច្ចរុស្ស៊ី ដួលរលំគឺមិនងាយស្រួលឡើយ។

ទិន្នន័យបង្ហាញថា ជិត៤០%នៃឧស្ម័នធម្មជាតិ និង២៥%នៃប្រេងដែលអឺរ៉ុប ប្រើប្រាស់ គឺទទួលបានការផ្គត់ផ្គង់ពីប្រទេសរុស្ស៊ី ហើយការរាំងស្ទះណាមួយចំពោះការនាំចេញទាំងនោះនឹងធ្វើឱ្យតម្លៃប្រេង និងឧស្ម័នទូទាំងពិភពលោកហក់ឡើងកាន់តែខ្ពស់។

* តើប្រទេសរុស្ស៊ី ងាកទៅខាងណាដើម្បីសេដ្ឋកិច្ចរបស់ខ្លួន?

យោងតាមទីភ្នាក់ងារព័ត៌មាន Reuters ចុះផ្សាយកាលពីថ្ងៃទី០១ មីនា ឱ្យដឹងថា ប្រទេសចិន និងរុស្សី កាន់តែមានភាពស្និទ្ធស្នាលខ្លាំងឡើងក្នុងប៉ុន្មានឆ្នាំចុងក្រោយនេះ រួមទាំងជាដៃគូពាណិជ្ជកម្មផងដែរ ហើយទំនាក់ទំនងនាំមកនូវទាំងឱកាស និងហានិភ័យ នៅពេលរុស្ស៊ី កំពុងប្រឹងរើខ្លួនចេញពីទណ្ឌកម្មថ្មីៗ និងធ្ងន់ៗដែលដឹកនាំដោយលោកខាងលិចនៅក្នុងការឆ្លើយតបទៅនឹងការឈ្លានពានរបស់រុស្ស៊ី ចូលប្រទេសអ៊ុយក្រែន។

ទិន្នន័យគយរបស់ប្រទេសចិន បង្ហាញថា ពាណិជ្ជកម្មសរុបរវាងប្រទេសចិន និងប្រទេសរុស្ស៊ី បានកើនឡើង៣៥,៩%កាលពីឆ្នាំមុន ដល់១៤៦,៩ពាន់លានដុល្លារអាមេរិក ដោយប្រទេសរុស្ស៊ី ជាប្រភពដ៏ធំនៃប្រេង ឧស្ម័ន ធ្យូងថ្ម និងទំនិញកសិកម្មផ្សេងៗសម្រាប់ប្រទេសចិន។

ដូចនេះសរបង្ហាញឱ្យឃើញថា ខណៈលោកខាងលិចសម្រុកបង្កើនការដាក់ទណ្ឌកម្មសេដ្ឋកិច្ចរបស់ខ្លួន ប្រទេសរុស្ស៊ី មានប្រទេសចិន ជាខ្នងបង្អែកសេដ្ឋកិច្ច ព្រោះជាដៃគូពាណិជ្ជកម្មយក្សដែលអាចជួយឱ្យសេដ្ឋកិច្ចរបស់ខ្លួនបន្តរស់រាន៕ CNN៕

កំណើនក្រុមហ៊ុននិងអាជីវកម្មថ្មីៗ ជំរុញឱ្យមានតម្រូវការការិយាល័យងើបឡើងវិញ

ដោយៈវឌ្ឍនៈ

ភ្នំពេញៈ ក្នុងឆ្នាំ២០២២នេះ ក្រុមហ៊ុននិងអាជីវកម្មដែលរងផលប៉ះពាល់ពីវិបត្តិកូវីដ១៩ បានចាប់ផ្ដើមដំណើរការឡើងវិញ និងក្រុមហ៊ុនខ្លះក៏បានបើកថ្មីក្រោយពីវិបត្តិបានស្ងប់ស្ងាត់។

ការបើកដំណើរការឡើងវិញ និងការបើកថ្មីៗ នៃក្រុមហ៊ុននៅក្នុងប្រ​ទេសកម្ពុជា ធ្វើឱ្យតម្រូវការការិយាល័យ ក៏មានសន្ទុះកើនឡើងវិញផងដែរជាពិសេសការិយាល័យកម្រិត B និង កម្រិត C។

លោកច្រឹក សុខនីម ប្រធានសមាគមអ្នកវាយតម្លៃ និងភ្នាក់ងារអចល​នវត្ថុកម្ពុជាបានមានប្រសាសន៍ថា ការផ្គត់ផ្គង់ទៅលើការិយាល័យ នៅក្នុងឆ្នាំ២០២២ និងឆ្នាំបន្តបន្ទាប់នឹងមានសក្ដានុពលខ្ពស់ ហើយទីផ្សារនឹងមានតម្រូវការខ្ពស់នៅឆ្នាំនេះ និងឆ្នាំបន្តបន្ទាប់ផងដែរ ជាពិសេសការិយាល័យកម្រិត B និង កម្រិត C ជាទីផ្សារដែលមានសក្ដានុពលខ្ពស់ ។

លោកបន្តថា កំណើនតម្រូវការការិយាល័យទាំងនេះ ដោយសារតែកំណើននៃក្រុមហ៊ុនថ្មីៗ និងក្រុមហ៊ុនដែលបានផ្អាកដំណើរការ និងបើកវិញក្នុងឆ្នាំ២០២២នេះ ។ ក្រុមហ៊ុនទើបតែបើកថ្មីៗ បានស្វះស្វែងរកការិយាល័​យដែលមានស្តង់ដារ តែស្ថិតនៅក្នុងតម្លៃមួយសមរម្យ ក្នុងនោះកម្រិត B និង កម្រិត C ជាប្រភេទដែលមានការពេញនិយមខ្ពស់ ខណៈកម្រិត A ជាប្រភេទការិយាល័យ ដែលមានតម្លៃខ្ពស់ និងសម្រាប់ក្រុមហ៊ុនអន្តរជាតិចូលមកវិនិយោគនៅក្នុងប្រទេសកម្ពុជា។

លោកបន្តថា ពីមុនក្រុមហ៊ុនមួយចំនួន បានប្រើប្រាស់ផ្ទះវីឡា ឬផ្ទះល្វែង សម្រាប់ជាការិយាល័យរបស់ពួកគេ ប៉ុន្តែមួយរយៈចុងក្រោយនេះ ពួកគេក៏បានផ្លាស់ប្តូរឥរិយាបថ ដោយបានជួលការិយាល័យ នៅតំបន់ពាណិជ្ជកម្មដូចជាអគារពាណិជ្ជកម្ម ដែលជាបណ្ដុំការិយាល័យ និងក្រុមហ៊ុនជាដើម។

អ្នកនាងគឹម គិនកេសា អ្នកគ្រប់គ្រងជាន់ខ្ពស់នៃក្រុមហ៊ុនអចលនទ្រព្យអន្តរជាតិមួយបានឱ្យដឹងថា ឆ្នាំ២០២២នេះ ម្ចាស់ទីតាំងអាជីវកម្មួមួយចំនួនបានទម្លាក់តម្លៃ នៃការជួលរបស់ខ្លួន ដើម្បីសម្រួលដល់ម្ចាស់ក្រុមហ៊ុន ម្ចាស់អាជីវកម្មក្រោយងើបពីវិបត្តិ ហើយបើសិនជាកាលណាម្ចាស់ទីតាំងជួលក្នុងតម្លៃខ្ពស់ ឬដូចនឹងមុនវិបត្តិគឺពិបាក ក្នុងការរកអ្នកមកជួល ដែលធ្វើឱ្យអគារមួយៗមិនមានអ្នកជួលនៅសល់ទំនេរច្រើន ។

អ្នកនាងបន្តថា សម្រាប់អ្នកជួលទីតាំងអាជីវកម្ម ក្នុងឆ្នាំ២០២២នេះ ក៏ភាគច្រើនជាអ្នកក្នុងស្រុកដែរ ខណៈបរទេសមិនទាន់រំពឹង ឬមិនទាន់ច្បាស់ថានឹងចូលមកកម្ពុជា ដើម្បីស្វែងរកការវិនិយោគ ឬក៏មកបង្កើតក្រុមហ៊ុនថ្មីៗនៅឡើយ ស្របពេលមេរោគកូវីដ១៩បំប្លែងថ្មីកំពុងរាលដាល ទូទាំងសកលលោក៕

រដ្ឋាភិបាលចិនបញ្ជាឱ្យបណ្ដាសហគ្រាសរដ្ឋពង្រឹងការគ្រប់គ្រងលើការវិនិយោគអចលនទ្រព្យ និងហិរញ្ញវត្ថុ

ដោយៈសុខុម

ប៉េកាំងៈ រដ្ឋាភិបាលចិន បានបញ្ជាឱ្យបណ្ដាសហគ្រាសរដ្ឋ ពង្រឹងការគ្រប់គ្រងរបស់ខ្លួន លើការវិនិយោគក្នុងវិស័យដូចជា អចលនទ្រព្យ ហិរញ្ញវត្ថុ ការច្របាច់អាជីវកម្មបញ្ចូលគ្នា និងការទិញយកអាជីវកម្ម នៅក្រៅប្រទេស គម្រោងក្នុងបណ្ដាប្រទេស និងតំបន់ដែលមានហានិភ័យខ្ពស់ជាដើម។

លោក Weng Jieming នាយករងនៅគណៈកម្មាធិការត្រួតពិនិត្យ និងគ្រប់គ្រងទ្រព្យសកម្មរដ្ឋ របស់រដ្ឋាភិបាលចិន បានលើកឡើងថា បណ្ដាសហគ្រាសរដ្ឋ ត្រូវតែគ្រប់គ្រងឱ្យបានតឹងរ៉ឹងនូវទិសដៅ និងទំហំនៃការវិនិ​យោគ ក្នុងអាជីវកម្ម ដែលមិនមែនជាអាជីវកម្មស្នូលរបស់ខ្លួន។ នេះបើយោងតាមសារព័ត៌មាន CNA ចុះផ្សាយកាលពីថ្ងៃពុធ ទី០២ មីនា។

សារព័ត៌មានហិរញ្ញវត្ថុចិន Yicai បានដកស្រង់សម្តីលោក Weng Jieming ដែលបានលើកឡើង កាលពីថ្ងៃអង្គារ ទី១ មីនា ថា ការទទួលយកបំណុលលើសពីលទ្ធភាពសងរបស់ខ្លួន ដើម្បីយកប្រាក់ទៅវិនិយោគ ត្រូវបានហាមឃាត់ដាច់ខាត។

ប្រទេសចិន កំពុងធ្វើការរឹតបន្តឹងលើការវិនិយោគ ដែលមានហានិភ័យ ការជំពាក់បំណុល និងភាពកម្សោយនៃការគ្រប់គ្រង ក្នុងចំណោមបណ្ដាសហគ្រាសរដ្ឋ ហើយនេះគឺជាផ្នែកមួយ នៃការធ្វើកំណែទម្រង់ហិរញ្ញវត្ថុរយៈពេលវែង។

កាលពីខែមុន ស្ថាប័នប្រឆាំងអំពើពុករលួយ កំពូលរបស់ប្រទេសចិន បានរកឃើញបញ្ហាមិនប្រក្រតីជាច្រើន ដូចជា ការត្រួតពិនិត្យហិរញ្ញវត្ថុមិនបានគ្រប់ជ្រុងជ្រោយជាដើម បន្ទាប់ពីធ្វើការស៊ើបអង្កេតជាច្រើនខែ លើស្ថាប័នចំនួន២៥ រួមទាំងផ្សារភាគហ៊ុន និងស្ថាប័នផ្តល់ឥណទានពាណិជ្ជកម្មផងដែរ។

លោក Weng Jieming ព្រមានថា បណ្ដាសហគ្រាសរដ្ឋ មិនត្រូវវិនិយោគទាំងងងឹតងងុល នៅក្នុងវិស័យដែលខ្លួនឯង មានមូលដ្ឋានទន់ខ្សោយ ឬ ខ្វះសមត្ថភាពប្រកួតប្រជែងនោះឡើយ៕ Reuters៕

តើហេតុការណ៍សំខាន់ៗអ្វីខ្លះបានកើតឡើងចាប់តាំងពីការឈ្លានពានរបស់រុស្ស៊ីចូលអ៊ុយក្រែន?

ដោយៈសុខុម

អន្តរជាតិ: យោធារុស្ស៊ី អះអាងថា ខ្លួនបានគ្រប់គ្រងទីក្រុងដ៏សំខាន់ជាយុទ្ធសាស្ត្រ Kherson នៅភាគខាងត្បូងប្រទេសអ៊ុយក្រែន ខណៈកងកម្លាំងប្រដាប់អាវុធអ៊ុយក្រែន និយាយថា កងទ័ពអាកាសរុស្ស៊ី បានចុះចតក្នុងទីក្រុងធំបំផុតទី២ Kharki របស់អ៊ុយក្រែន ហើយបានឈានដល់ការប៉ះទង្គិចគ្នាភ្លាមៗ។

ខាងក្រោមនេះ ជាព្រឹត្តិការណ៍សំខាន់ៗគិតត្រឹមថ្ងៃពុធ ទី២ ខែមីនា ជាថ្ងៃទី៧ នៃការចូលឈ្លានពានពីសំណាក់ប្រទេសរុស្ស៊ី ចូលប្រទេសអ៊ុយក្រែន៖

*ក្រុង Kherson
យោធារុស្ស៊ី អះអាងថាបានគ្រប់គ្រងទាំងស្រុងលើ Kherson ដែលជាទីក្រុងកំពង់ផែដ៏សំខាន់របស់អ៊ុយក្រែន នៅសមុទ្រខ្មៅ។ រូបភាពវីដេអូបង្ហាញពីកងកម្លាំង និងរថក្រោះរបស់រុស្ស៊ី នៅកណ្តាលទីក្រុងនេះ ចំពេលមានសេចក្ដីរាយការណ៍ អំពីការដំឡើងប៉ុស្តិ៍ត្រួតពិនិត្យជុំវិញទីក្រុងនេះ។

*ការប្រយុទ្ធគ្នាក្នុងទីក្រុង Kharkiv
ទាហានឆត្រយោងរុស្ស៊ី បានចុះចតនៅទីក្រុងទី២ របស់អ៊ុយក្រែន ចំពេលមានការប្រយុទ្ធគ្នាយ៉ាងខ្លាំងក្លា។ ក្រុមមន្ត្រីអ៊ុយក្រែន និយាយថា មន្ទីរពេទ្យមួយត្រូវបានវាយប្រហារ ហើយបន្ទាយនៃសាលាហ្វឹកហាត់ បើកយន្តហោះមួយត្រូវបានឆេះ បន្ទាប់ពីការវាយឆ្មក់តាមអាកាស។

*ប្រធានាធិបតី ចូ បៃឌិន ហៅលោក ពូទីន ថាជាជនផ្តាច់ការ
ប្រធានាធិបតីអាមេរិក លោក ចូ បៃឌិន បានហៅប្រធានាធិបតីរុស្ស៊ី លោក វ្ល៉ាឌីមៀ ពូទីន ថាជា “ជនផ្តាច់ការ” ក្នុងសុន្ទរកថាប្រចាំឆ្នាំរបស់លោកនៅសភាអាមេរិក ហើយបានប្រកាសហាមឃាត់ យន្តហោះរុស្ស៊ី មិនឱ្យប្រើប្រាស់ដែនអាកាសអាមេរិក។

*រុស្ស៊ី ជំរុញប្រជាជនក្នុងរដ្ឋធានីគៀវ ភៀសខ្លួនចេញ
ក្រសួងការពារជាតិរបស់រុស្ស៊ី បានជំរុញឱ្យប្រជាជន ក្នុងរដ្ឋធានីគៀវ ប្រញាប់ភៀសខ្លួនចេញ ហើយនិយាយថា ខ្លួននឹងបើការវាយប្រហារដោយមិនរើសមុខ ឱ្យតែតំបន់ណា ដែលប្រើប្រាស់ដោយកងទ័ពអ៊ុយក្រែន។

រុស្ស៊ី បានហៅការវាយប្រហាររបស់ខ្លួន លើប្រទេសអ៊ុយក្រែនថាជា “ប្រតិបត្តិការពិសេស” មិនមែនជាការឈ្លានពាន ដើម្បីដណ្ដើមទឹកដីនោះឡើយ។

*ជួរកងរថពាសដែក
មន្ត្រីអាមេរិកម្នាក់និយាយថា កងរថពាសដែកមួយជួរប្រវែងរាប់គីឡូម៉ែត្រ ដែលតម្រង់ចូលទៅកាន់រដ្ឋធានីគៀវ មិនបានរុលរុលទៅមុខទេក្នុងរយៈពេ២៤ម៉ោងកន្លងមកនេះ ដោយបានជាប់គាំងដោយបញ្ហាដឹកជញ្ជូ​ន កង្វះខាតប្រេងឥន្ធនៈ និងស្បៀងអាហារ ហើយប្រហែលជាផ្អាកដើម្បីវាយតម្លៃយុទ្ធសាស្ត្រឡើងវិញ។

*ជនស៊ីវិលរត់ភៀសខ្លួន
ទីភ្នាក់ងារទទួលបន្ទុកជនភៀសខ្លួន នៃអង្គការសហប្រជាជាតិនិយា​យថា មនុស្សជាង៦៧៧.០០០នាក់ បានភៀសខ្លួនចេញពីប្រទេសអ៊ុយក្រែន ចាប់តាំងពីរុស្ស៊ី ចូលឈ្លានពាន ហើយចំនួននេះ នឹងកើនឡើងយ៉ាងឆាប់រហ័ស។

*តុលាការ ICJ របស់អង្គការសហប្រជាជាតិ នឹងបើកសវនាការសង្គ្រាម
តុលាការយុត្តិធម៌អន្តរជាតិ (ICJ) របស់អង្គការសហប្រជាជាតិនិយា​យថា ខ្លួននឹងបើកសវនាការជាសាធារណៈនៅថ្ងៃទី៧ និងទី៨ ខែមីនា ខាងមុខនេះ ជុំវិញការចោទប្រកាន់របស់អ៊ុយក្រែន អំពី “អំពើប្រល័យពូជសាសន៍” ប្រព្រឹត្តដោយប្រទេសរុស្ស៊ី ខណៈមហាសន្និបាតអង្គការសហប្រជាជាតិនឹងត្រូវបោះឆ្នោតនៅថ្ងៃពុធ ទី២ មីនា នេះថា តើត្រូវបញ្ជាឱ្យរុស្ស៊ី ដកកងទ័ពរបស់ខ្លួនចេញ ពីប្រទេសអ៊ុយក្រែន ឬយ៉ាងណា។

*ក្រុមហ៊ុននានាសម្រុកចាកចេញពីប្រទេសរុស្ស៊ី
ក្រុមហ៊ុនលោកខាងលិចជាច្រើននិយាយថា ខ្លួននឹងផ្អាក ឬកាត់បន្ថ​យការធ្វើពាណិជ្ជកម្ម ជាមួយប្រទេសរុស្ស៊ី រួមទាំងក្រុមហ៊ុន Apple ក្រុមហ៊ុន Eni ក្រុមហ៊ុន ExxonMobil និងក្រុមហ៊ុន Boeing ផងដែរ។

*គម្រោងបំពង់បញ្ជូនឧស្ម័ន Nord Stream 2 ក្ស័យធន
គម្រោងបំពង់បញ្ជូនឧស្ម័ន Nord Stream 2 របស់រុស្ស៊ី បានក្ស័យធន បន្ទាប់ពីប្រទេសអាល្លឺម៉ង់ បញ្ឈប់ការដំណើរការបំពង់បង្ហូរឧស្ម័នដ៏ធំនេះ បន្ទាប់ពីការក្រុងមូស្គូ ចូលឈ្លានពានប្រទេសអ៊ុយក្រែន។ ក្រុមហ៊ុនបុត្រនៃធនាគាររុស្ស៊ី Sberbank នៅអឺរ៉ុប ក៏កំពុងត្រៀមក្ស័យធនផងដែរ។

*តម្លៃប្រេងហក់ឡើងខ្ពស់យ៉ាងគំហុក
តម្លៃប្រេងបានឡើងលើស១១០ដុល្លារអាមេរិក ក្នុងមួយបារ៉ែល បើទោះបីជាបណ្ដាសមាជិក នៃទីភ្នាក់ងារថាមពលអន្តរជាតិ (IEA) យល់ព្រមព្រៀងបញ្ចេញស្តុកប្រេង រហូតដល់ទៅ៦០លានបារ៉ែល ដើម្បីទប់តម្លៃក៏ដោយ។

*បណ្តាញដឹកជញ្ជូនរបស់ពិភពលោកឈប់ដឹកទំនិញឱ្យរុស្ស៊ី
ក្រុមហ៊ុនដឹកជញ្ជូនយក្សរបស់ដាណឺម៉ាក Maersk ក្រុមហ៊ុនស្វីស MSC និងក្រុមហ៊ុនបារាំង CMA CGM បាននិយាយថា ពួកគេនឹងលែងទទួលយកការកក់ទំនិញ ពីប្រទេសរុស្ស៊ីទៀតហើយ ហើយនឹងផ្អាកការដឹកជញ្ជូនទំនិញភាគច្រើន។

*ជំនួយរបស់ធនាគារពិភពលោក
ធនាគារពិភពលោក (World Bank) បានត្រៀមកញ្ចប់ជំនួយចំនួន៣ពាន់លានដុល្លារអាមេរិក សម្រាប់ជួយដល់ប្រទេសអ៊ុយក្រែន រួមទាំង​មូលនិធិភ្លាមៗ យ៉ាងហោចណាស់៣៥០លានដុល្លារផងដែរ៕ Aljazeera៕

រដ្ឋាភិបាលតម្រូវឲ្យរាល់ការសាងសង់ឬរុះរើសំណង់នានាត្រូវមានការអនុញ្ញាតពីអាជ្ញាធរ

ដោយ: សុផារី

ភ្នំពេញ: ក្រសួងរៀបចំដែនដី នគរូបនីយកម្ម និងសំណង់ នៅថ្ងៃទី០២ ខែមីនា ឆ្នាំ២០២២ បានប្រកាសមិនអនុញ្ញាតឱ្យធ្វើការសាងសង់ ឬរុះរើសំណង់ទាំងឡាយណា ដែលមិនទាន់ទទួលបានការអនុញ្ញាត ពីអាជ្ញាធរឬមន្ត្រីមានសមត្ថកិច្ចឡើយ។

តាមរយៈលិខិតចុះផ្សាយថ្ងៃទី០២ ខែមីនា ឆ្នាំ២០២២ បានឱ្យដឹងថា ក្រសួងរៀបចំដែនដី នគរូបនីយកម្ម និងសំណង់ មិនអនុញ្ញាតឱ្យធ្វើការចុះកិច្ចសន្យាម៉ៅការ សាងសង់ឬរុះរើសំណង់ ដែលមិនទាន់ទទួលបានលិខិតអនុញ្ញាតសាងសង់ លិខិតអនុញ្ញាតជួសជុល លិខិតអនុញ្ញាតរុះរើ និងលិខិ​តអនុញ្ញាត បើកការដ្ឋានសំណង់ពីអាជ្ញាធរ ឬមន្ត្រីមានសមត្ថកិច្ចឡើយ។

ក្រសួងចាត់ទុក សកម្មភាពទាំងនេះជាអំពើខុសច្បាប់ ព្រោះគម្រោងសាងសង់សំណង់នោះ មិនមានប្លង់ស្ថាបត្យកម្ម និងប្លង់គ្រឿងផ្គុំសំណង់ដែលទទួលបានការយល់ព្រមពីអាជ្ញាធរ ឬមន្ដ្រីមានសមត្ថកិច្ច។ នេះអាចបង្កឱ្យ ប៉ះពាល់ដល់បទប្បញ្ញត្តិស្តីពីធ្លាម្លាត សន្តិសុខ សណ្តាប់ធ្នាប់សាធារណៈ គុណភាព សុវត្ថិភាពសំណង់ សោភណភាព ទ្រព្យសម្បត្តិ និងសុខុ​មាលភាពរបស់ម្ចាស់សំណង់ អ្នកប្រើប្រាស់សំណង់ និងសាធារណជន និងអាចបង្កឱ្យមានវិវាទ។

ក្រសួងរៀបចំដែនដី នគរូបនីយកម្ម និងសំណង់ នឹងចាត់មន្ត្រីអធិការកិច្ចសំណង់ចុះត្រួតពិនិត្យ បទល្មើសតាមការដ្ឋានសំណង់ ដើម្បីចាត់វិធានការដកហូតអាជ្ញាបណ្ណ ឬលិខិតអនុញ្ញាតប្រកបអាជីវកម្ម សាងសង់ និងការដាក់ទណ្ឌកម្មផ្សេងៗទៀត ចំពោះក្រុមហ៊ុនឬក្រុមជាងរបស់ក្រុមហ៊ុន។

ទណ្ឌកម្ម មានដូចជា ការកសាងសំណុំរឿងបញ្ចូនទៅតុលាការ ដើម្បីស្នើសុំការរឹបអូសសម្ភារៈ បរិក្ខារ និងឧបករណ៍ផ្សេងៗទៀត ការផ្តន្ទាទោសពិន័យជាប្រាក់ ការផ្តន្ទាទោសដាក់ពន្ធនាគារ ការរំលាយក្រុមហ៊ុនឬក្រុមជាងការដាក់ឱ្យ ស្ថិតនៅក្រោមការត្រួតពិនិត្យ តាមដានរបស់តុលាការ ការហាមឃាត់ចំពោះការធ្វើសកម្មភាព ការបណ្ដេញ ចេញពីលទ្ធកម្មសាធារណៈ ការបិទផ្សាយសេចក្ដីសម្រេចផ្ដន្ទាទោស និងការផ្សាយសេចក្តីសម្រេចផ្តន្ទា ទោសជាសាធារណៈ៕

អ្នកទិញគំរោង The Palm តម្លៃ១០០លានដុល្លាររបស់អ្នកឧកញ៉ា សៀ រិទ្ធី សម្តែងការខកចិត្ត

ដោយៈស៊ីវ ម៉េង

ភ្នំពេញៈ រហូតមកទល់ពេលនេះ លំនៅដ្ឋានបានសាងសង់រួចស្ទើរអស់១០០ភាគរយហើយ ប៉ុន្តែអ្វីដែលអ្នកទិញគម្រោងនេះ មិនសប្បាយចិត្ត គឺការខកចិត្តមួយដ៏ធំ។

គំរោងដែលបានបោះទុនវិនិយោគតម្លៃ​ ១១០លាន​ដុល្លារ​អាមេរិក​បានប្រកាស​លក់​ជា​ផ្លូវការ​ តាំងពី​ថ្ងៃទី១ ខែធ្នូ ឆ្នាំ២០១៧កន្លងមកនេះ។

អ្នកទិញលំនៅដ្ឋានមួយរូប ដែលបាននិយាយឲ្យដឹងក្នុងលក្ខខ័ណ្ឌមិនបញ្ចេញឈ្មោះ បានប្រាប់សហភាគហ៊ុនិកគេហទំព័រ Propertyarea.asia ដឹងកាលពីសប្តាហ៍មុនថា លោកបានទិញផ្ទះនៅក្នុងគំរោងខាងលើនេះ ដោយផ្ទះរបស់លោកស្ថិតនៅជួរក្រោយគេ ជាប់ទន្លេធំ ជាទីតាំងដែលលោកអាចគយគន់ទិដ្ឋភាពដងទន្លេមេគង្គ និងប្រជុំទន្លេចតុមុខ។

លោកបន្តថា “ការទិញលំនៅដ្ឋាននេះ ដើមឡើយវាជាក្តីស្រម័័យមួយ ប៉ុន្តែពេលនេះវាជាការខកចិត្តមួយ ដោយសារទាំងតាំងផែ និងទូកជិះកំសាន្តត្រូវបានរួមតូច និងមិនអាចមើលឃើញអ្វីទាំងអស់ ពេលទីក្រុងកោះនរាសាងសង់សំណង់ផ្សេងៗរួច”។

លោកបាននិយាយឲ្យដឹងថា វាជាការខកចិត្តមួយធំណាស់់ សម្រាប់ខ្ញុំ ដែលនេះជាអ្វីដែលអ្នកឧកញ៉ា សៀ រិទ្ឋីបានធ្វើនិងសន្យាគឺស្មើសូន្យ ប៉ុន្តែរហូតមកទល់ពេលនេះ យើងពិបាកបន្ទោសគាត់ដែរ ដោយសារតែរាជរដ្ឋាភិបាលបានអនុញ្ញាត្តឲ្យក្រុមហ៊ុន OCIC សាងសង់ទីក្រុងកោះនរាឡើង។

ទោះជាយ៉ាងណាលោកបានហៅអ្នកឧកញ៉ាសៀ រិទ្ឋីជាមនុស្សអំណួត និងមិនក្តាប់ព៌តមានច្បាស់លាស់ មុនពេលគាត់ចាប់ផ្តើមគំរោងនេះ។

គម្រោង​បុរី​លំនៅដ្ឋាន The Palm ស្ថិតនៅតាម​បណ្តោយ​ផ្លូវជាតិ​លេខ១ ចម្ងាយ​ប្រមាណ ៤គីឡូម៉ែត្រ ពី​គល់ស្ពាន​ព្រះមុនីវង្ស ដែល​ត​ភ្ជាប់​រហូតដល់​មាត់ទន្លេ ក្នុងភូមិ​ក្តី​តា​កុយ​សង្កាត់​វាល​ស្បូវ ខណ្ឌ​ច្បារអំពៅ រាជធានី​ភ្នំពេញ និង​ជា​គម្រោង​អភិវឌ្ឍន៍​លំនៅដ្ឋាន​ដ៏​ប្រណីត​ប្លែក​ពី​គេ មិន​ធ្លាប់​មាននៅ​កម្ពុជា ដោយមាន​ការសហការ​ជាមួយ​ដៃគូ​វិនិយោគ​មកពី​ប្រទេស​សិង្ហ​បុរី។

យោងតាមសេចក្តីប្រកាសព៌តមានកន្លងមកបានឲ្យដឹងថា គម្រោង​នេះ​នឹង​ចាប់ផ្តើម​ដំណើរការ​សាងសង់ ជា​ផ្លូវការតាំងពី​ដើមឆ្នាំ២០១៨នេះហើយអាមេរិក។

អ្នក​ឧកញ៉ា សៀ ឫទ្ធី ប្រធាន​ក្រុមប្រឹក្សាភិបាល​ក្រុមហ៊ុន វើ​ល​ប្រ៊ី​ដ គ្រុបជាម្ចាស់គម្រោងនេះ។

អ្នក​ឧកញ៉ា​ធ្លាប់បានមានប្រសាសន៍ឲ្យដឹងថា គម្រោង The Palm នេះ សាងសង់​នៅលើ​ផ្ទៃដី​ចំនួន៣,៧ហិកតា។
ការទាក់ទងសុំការបំភ្លឺពីអ្នកឧកញ៉ាសៀ រិទ្ឋីមិនទទួលបានជោគជ័យនោះទេ៕

ខណ្ឌសែនសុខក្លាយទីតាំងលក់រាយថ្មីមួយ នៅរាជធានីភ្នំពេញ

ដោយៈវឌ្ឍនៈ

ភ្នំពេញៈ ខណ្ឌសែនសុខ បាននិងកំពុងក្លាយជាទីតាំងលក់រាយនៃទំនិញជាច្រើននៅក្នុងរាជធានីភ្នំពេញ ខណៈតំបន់មួយនេះ ក៏បាននិងកំពុងមានការអភិវឌ្ឍ លំនៅឋានតម្លៃខ្ពស់ៗដ៏មានសក្ដានុពល នៅក្នុងរាជធានីភ្នំពេញផងដែរ។

តំបន់មួយចំនួនក្នុងមូលដ្ឋាននេះ ត្រូវបានមើលឃើញថា មានការអភិវឌ្ឍលើផ្សារទំនើបធំៗជាច្រើន ដូចជាផ្សារទំនើបអ៊ីអន ផ្សារទំនើបគ្លូបលហៅស៍ ផ្សារទំនើបម៉ាក្រូ និងមជ្ឈមណ្ឌលពាណិជ្ជកម្មមួយចំនួនផងដែរ ។តំបន់នេះក៏មានការអភិវឌ្ឍលើហេដ្ឋារចនាសម្ព័ន្ធ ខ្វាត់ខ្វែងផងដែរក្នុងរយៈពេលប៉ុន្មានឆ្នាំមកនេះ ដែលធ្វើឱ្យវិនិយោគិនក្នុង និងក្រៅប្រទេសជាច្រើនបានសម្លឹងទៅលើតំបន់មួយនេះ ។

លោកបណ្ឌិតគីម ហ៊ាង វិនិយោគិនអចលនទ្រព្យមួយនៅក្នុងប្រទេសកម្ពុជាបានមានប្រសាសន៍កន្លងមកថា តំបន់ខណ្ឌសែនសុខ មានការប្រែប្រួលខ្លាំង នៅក្នុងរយៈចុងក្រោយនេះ ទាំងតម្លៃដីធ្លី និងការអភិវឌ្ឍអចលនទ្រព្យ។ កត្តាដែលជំរុញឱ្យតំបន់នេះ មានការអភិវឌ្ឍលឿនបែបនេះយើងឃើ​ញថា មានគម្រោងធំៗរបស់រដ្ឋជាច្រើន បានបោះទីតាំងនៅតំបន់នោះ ដូចជាក្រសួងរៀបចំដែនដី នគរូបនីយកម្ម និងសំណង់ ធនាគារជាតិ និង គម្រោងផ្សារទំនើបធំៗជាច្រើន។

នៅក្នុងតំបន់នេះ ក៏មានការអភិវឌ្ឍហេដ្ឋារចនាសម្ព័ន្ធ កាន់តែច្រើនផងដែរ ដែលជាការសម្រួល ដល់ការធ្វើដំណើររបស់ប្រជាពលរដ្ឋ និងវិនិយោគិនជាដើម ហើយតំបន់នេះ នឹងកាន់តែមានសក្ដានុពលបន្ថែមទៀតនៅពេលអនាគតខាងមុខនេះ ។

លោកច្រឹក សុខនីម ប្រធានសមាគមអ្នកវាយតម្លៃនិងភ្នាក់ងារអចលនវត្ថុកម្ពុជាក៏បានលើកឡើងផងដែរថា ទីតាំងមានមនុស្សរស់នៅច្រើន ទីនោះនឹងមានតម្រូវការប្រើប្រាស់សម្ភារៈនៅក្នុងផ្ទះ និងប្រើប្រាស់ផ្ទាល់ខ្លួន ដូច្នេះទើបមានការវិនិយោគទៅលើផ្សារទំនើប និងហាងលក់រាយ ជាក់ស្ដែងតាមបទពិសោធន៍នាពេលកន្លងមក ទីណាមានបណ្ដុំមនុស្សរស់នៅកាន់តែច្រើនទីតាំងលក់រាយក៏មានច្រើនដូចគ្នាដែរ៕

គម្រោងសាងសង់ហេដ្ឋារចនាសម្ព័ន្ធទេសចរណ៍ខេត្តកែបចំនួន៣គ្រោងនឹងបញ្ចប់ក្នុងឆ្នាំ២០២៣

ដោយៈ ម៉ាលីស

កែបៈ អភិបាលខេត្តកែប លោកបណ្ឌិតសោម ពិសិដ្ឋ បានលើកឡើងថា គម្រោងសាងសង់ហេដ្ឋារចនាសម្ពន័្ធខេត្តកែប ចំនួន៣គ្រោងនឹងបញ្ចប់ក្នុងឆ្នាំ២០២៣។

លោកបានបានលើកឡើងបែបនេះ នៅក្នុងពិធីក្រុងពលី បើកការដ្ឋានសាងសង់ផ្លូវ កៅស៊ូអាសេ ប្របមាត់សមុទ្រខេត្តកែប ប្រវែង១២គីឡូម៉ែត្រ ៧៥០ម៉ែត្រ ដែលពីធីនេះប្រព្រឹត្តទៅក្រោមអធិបតីភាព លោក វង្ស ពិសិដ្ឋ អនុរដ្ឋលេខាធិការក្រសួងសាធារណការ និងដឹកជញ្ជូន លោកសំ សារីន ប្រធានក្រុមប្រឹក្សាខេត្ត លោកបណ្ឌិតសោម ពិសិដ្ឋ អភិបាល នៃគណៈអភិបាលខេត្តកែប នៅមន្ទីរសាធារណការ និងដឹកជញ្ជូនខេត្តកែប ថ្ងៃទី១ មិនា ឆ្នាំ២០២២នេះ។

សម្រាប់គម្រោង ហេដ្ឋារចនាសម្ព័ន្ធទេសចរណ៍ជំហានទី២ ដែលខេត្តកែបទទួលបានមានបីគម្រោង ដូចជា ទី១-គម្រោងសាងសង់ទីលានកប់សម្រាម ក្នុងនោះមានការកសាងហេដ្ឋារចនាសម្ព័ន្ធមួយ ផ្លូវបេតុប្រវែង ៣.៥គឺឡូម៉ែត្រ ទី២- គម្រោងសាងសង់ផ្លូវប្របមាត់សមុទ្រ ប្រវែងជាង១២គីឡូម៉ែត្រ និងទី៣ គម្រោងសាងសង់ ផែទេសចរណ៍នៅកោះទន្សាយ ដែលគ្រោងនិងបច្ចប់នៅឆ្នាំ២០២៣ខាងមុខ។

ចំណែកផ្លូវប្របមាត់សមុទ្រប្រវែងជាង១២គីឡូម៉ែត្រ គឺជាអនុគម្រោ​ងទី២ នៃគម្រោងហេដ្ឋារចនាសម្ព័ន្ធទេសចរណ៍ខេត្តកែប សម្រាប់កំណើនប្រកបដោយបរិយាប័ន្ន ក្នុងមហាអនុតំបន់មេគង្គ ផ្លូវនេះតភ្ជាប់ពីចំណុច កំពង់ផែទេសចរណ៍កោះទន្សាយ ក្នុងក្រុងកែប ភ្ជាប់ទៅកាន់ផ្លូវជាតិលេខ១៣៣២ ស្ថិតនៅឃុំអង្កោល ស្រុកដំណាក់ចង្អើរ ខេត្តកែប ដោយសារស្ថានភាពភូមិសាស្ត្រ ការស្ថាបនាផ្លូវនេះ ត្រូវបានចែកចេញជា៤ផ្នែក គឺ
-ផ្នែកដំបូងចាប់ចំណុចផែកោះទន្សាយ K0+00 ដល់ K1+200ម ប្រវែង១២០០ម៉ែត ទទឹង៩ម៉ែត្រ គន្លងជិះកង់ទទឹង ២ម៉ែត្រផ្នែកខាងស្តាំ។

– ផ្នែកសំខាន់ចាប់ពី K1+200ម ដល់K9+500ម ប្រវែង៨៣០០ម៉ែត្រ ទទឹង១៥ម៉ែត្រ គន្លងជិះកង់ ២.៥ម៉ែត្រផ្នែកខាងស្តាំ។

-ផ្នែកទី៣ តភ្ជាប់ពីផ្លូវ លេខ១៣៣២ ពីK9+669ម ដល់ K11+620ម ប្រវែង ១០៩៩ម៉ែត្រ ទទឹង៩ម៉ែត្រ ចញ្ចើមផ្លូវ១.៥ម៉ែត្រសងខាង និងផ្នែកទី៤ ចាប់ពី K9+669ម ដល់ K10+00 ទទឹង ១៥ម៉ែត្រ ផ្នែកស្តាំ ២.៥ម៉ែត្រ សម្រាប់ជិះកង់ និងផ្នែកឆ្វេង ១.៥ម៉ែត្រសម្រាប់ថ្មើរជើង។ ដោយឡែកសម្រាប់សំណង់សិល្បៈការ្យរួមមាន ធ្វើលូប្រអប់១៣កន្លែប លូមូល ២៦កន្លែង សាងសង់ជញ្ជាំងថ្មទប់ដីប្រវែប១២០០ម៉ែត្រ បំពាក់បង្គោលភ្លើងLED ប្រើពន្លឺព្រះអាទិត្យ លើផ្លូវប្រវែង ៣៥០០ម៉ែត្រ។

លោកអភិបាលបានបញ្ជាក់ថា បច្ចុប្បន្នរដ្ឋបាលខេត្តកំពុង ធ្វើការពង្រីក និងកែលម្អឆ្នេរជ្រោយដូង មុខសាលាខេត្ត, សម្របសម្រួលការកសាងឆ្នេរកំសាន្តសាធារណៈប្រវែង២៧០០ម៉ែត្រ ចាប់ពីផ្សារក្តាម ដល់ព្រៃកោងកាង។

លោកវង្ស ពិសិដ្ឋ អនុរដ្ឋលេខាធិការ ក្រសួងសាធារណៈការ និងដឹកជញ្ជូន និងជាប្រធានគម្រោងហេដ្ឋារចនាសម្ព័ន្ធ ទេសចរណ៍ជំហានទី២ បានគូបញ្ជាក់ថា ផ្លូវនេះនិងបានជាសមិទ្ធផលថ្មីបន្ថែមទៀត សម្រាប់ខេត្តកែប ក្នុងការបំពេញសម្បទាទេសចរណ៍ ពិសេសនិងប្រែក្លាយតំបន់ទេស​ចរណ៍ឆ្នេរអង្កោលនេះ អោយកាន់តែមានសោភណភាព ងាយស្រួសដល់ការធ្វើដំណើររបស់ភ្ញៀវទសចរណ៍ជាតិ អន្តរជាតិ មកកាន់តំបន់នេះ៕