រដ្ឋាភិបាលកំពុងស្នើសុំចុះបញ្ជីរប្រាសាទ សិល្បៈអរូបិយនិងទីក្រុងចំនូន១៤ទៅក្នុងបញ្ជីរបេតិកភ័ណ្ឌពិភពលោក

ដោយៈ វិវត្តន៍

ភ្នំពេញៈ រដ្ឋមន្ត្រីក្រសួងវប្បធម៌ និងវិចិត្រសិល្បៈ លោកស្រីបណ្ឌិតសភាចារ្យ ភឿង សកុណាបានថ្លែងថា ក្រសួងកំពុងស្នើសុំចុះព្រះរាជពិធីបុណ្យអុំទូក ទៅក្នុងបញ្ជីបេតិកភណ្ឌពិភពលោក។

លោកស្រីថ្លែងបែបនេះ ក្នុងពិធីបើកអង្គសន្និបាតបូកសរុបលទ្ធផលការងារឆ្នាំ២០២១ និងលើកទិសដៅការងារឆ្នាំ២០២២ របស់ក្រសួងវប្បធម៌ និងវិចិត្រសិល្ប: នៅថ្ងៃទី៩ ខែកុម្ភៈ ឆ្នាំ២០២២ នៅសាលសន្និសីទចតុម្មុខ។

ការស្នើសុំចុះ ព្រះរាជពិធីបុណ្យអុំទូក ទៅក្នុងបញ្ជីបេតិកភណ្ឌពិភពលោក គឺជាការងារមួយ ក្នុងចំណោមការងារជាច្រើន ដែលជាសមិទ្ធកម្មការងារជាងពាក់កណ្ដាលអាណត្តិ នៅក្នុងរយៈពេល៥ឆ្នាំ នៃអាណត្តិរបស់រាជរដ្ឋាភិបាលកម្ពុជា នីតិកាលទី៦នៃរដ្ឋសភា របស់ក្រសួងវប្បធម៌ នាពេលកន្លងមក។ នេះជាការងារអភិរក្សវប្បធម៌ ក្នុងទិសដៅដើម្បីលើកកម្ពស់ការអភិវឌ្ឍប្រកបដោយចីរភាព និងបរិយាប័ន្ន។

លោកស្រីភឿង សកុណា បានបញ្ជាក់ថា “ក្រសួងបានបន្តរៀបចំនិងសហការរៀបចំឯកសារដើម្បីស្នើសុំចុះ “ប្រាសាទកោះកេរ” “នំបញ្ចុក” ក្បា”ក្បាច់គុនល្បុក្កតោ” និង”ទីក្រុងបាត់ដំបង” ទៅក្នុងបញ្ជីបេតិកភណ្ឌពិភពលោក បញ្ជីបេតិកភណ្ឌវប្បធម៌អរូបីនៃមនុស្សជាតិ និងបណ្តាញទីក្រុងដែលមានភាពច្នៃប្រឌិត (Creative Cities Network) របស់អង្គការយូណេស្កូ ហើយក៏បានបន្តរៀបចំបញ្ជីត្រៀម ដើម្បីគ្រោងស្នើសុំចុះសម្បត្តិវប្បធម៌ដែលមានសក្តានុពលផ្សេងទៀត ទៅក្នុងបញ្ជីបេតិកភណ្ឌរបស់អង្គការយូណេស្កូ រួមមាន ក្រុមប្រាសាទបន្ទាយឆ្មារ រមណីយដ្ឋានអង្គរបុរីនិងភ្នំដា រមណីយដ្ឋា​នគូលែន ក្រុមប្រាសាទបេងមាលា ក្រុមប្រាសាទព្រះខ័នកំពង់ស្វាយរមណីយដ្ឋានឧដុង្គ សារមន្ទីរឧក្រិដ្ឋកម្មប្រល័យពូជសាសន៍ ទួលស្លែងមជ្ឈ​មណ្ឌលប្រល័យពូជសាសន៍ជើងឯក អតីតមន្ទីរឃុំឃាំង ម-១៣, និងព្រះរាជពិធីបុណ្យអុំទូក។

លោកស្រីរដ្ឋមន្ត្រីបានបន្ថែមថា ក្រសួងបានជួសជុល និងអភិរក្សសំ​ណង់បុរាណចំនួន១០៩សំណង់ វត្ថុបុរាណ/វត្ថុសិល្បៈចំនួន៨២៩៦ (ប្រាំបីពាន់ពីររយកៅសិបប្រាំមួយ) វត្ថុ/រូប/ដុំ/បំណែក/ផ្ទាំង/គ្រាប់ វត្ថុជាតិពន្ធុសាស្ត្រចំនួន ៥០៩មុខ, និងសាស្ត្រាស្លឹករឹត ចំនួន ៣១០៤៦ (បីម៉ឺនមួយពាន់សែសិបប្រាំមួយ)ខ្សែ។ ទន្ទឹមគ្នានេះ ក្រសួងបានរកឃើញនិងទទួលបានវត្ថុបុរាណ/វត្ថុសិល្បៈពីគ្រប់ប្រភពទាំងអស់ចំនួន ៣១៤៣៤ (បីម៉ឺនមួយពាន់បួនរយសាមសិបបួន)វត្ថុ/រូប/ដុំ/បំណែក/ផ្ទាំង/គ្រាប់ បូករួមទាំងវត្ថុបុរាណចំនួនជាង១០០រូបបន្ថែមទៀត ដែលត្រូវធ្វើមាតុភូមិនិវត្តន៍ពីបរទេស ក្រោយបញ្ចប់កិច្ចចរចាជាង៣ឆ្នាំ។

ក្រសួងបានចុះបញ្ជីវត្ថុបុរាណ/វត្ថុសិល្បៈ និងវត្ថុជាតិពន្ធុសាស្ត្រសរុប ២៣៥៨៧ (ពីរម៉ឺនបីពាន់ប្រាំរយប៉ែតសិបប្រាំពីរ) វត្ថុ/រូប/ដុំ/ផ្ទាំង/បំណែក/គ្រាប់, និងបញ្ចូលទិន្នន័យវត្ថុបុរាណ/វត្ថុសិល្បៈ និងវត្ថុជាតិពន្ធុសាស្ត្រទៅក្នុងប្រព័ន្ធទិន្នន័យ Database សរុប ១២៣៧៥ (មួយម៉ឺនពីរពាន់បីរយចិតសិបប្រាំ) វត្ថុ/រូប/ដុំ/ផ្ទាំង/បំណែក។

ក្រសួងក៏បានយកចិត្តទុកដាក់ និងសហការជាមួយសហគមន៍ ក្នុងការបណ្តុះបណ្តាល និងរៀបចំការសម្តែងសិល្បៈ ដោយក្នុងនោះក្រសួងបានស្តារល្ខោនវត្តកៀនស្វាយក្រៅឱ្យរស់រានឡើងវិញ ព្រមទាំងបានពង្រឹងការថែរក្សាសិល្បៈវប្បធម៌របស់សហគមន៍សំខាន់ៗ នៅខេត្តចំនួន១១ រួមទាំងសហគមន៍របស់ជនជាតិដើមភាគតិចនៅខេត្តចំនួន៨។

ក្រសួងបានឆ្លាក់ចម្លងស្បែកធំឈុតថ្មី បានចំនួន៩០ផ្ទាំង និងបានសិក្សាស្រាវជ្រាវចងក្រងឯកសារ របាំក្បាច់បុរាណ ឬរបាំព្រះរាជទ្រព្យ, ក្រាំងចម្រៀងសម្រាប់ច្រៀងអមកំដរក្នុងរបាំព្រះរាជទ្រព្យ ក្បាច់ហួន ល្ខោនបាសាក់ និងល្ខោនបាមោជ្ជទ័យ ព្រមទាំងបានបោះពុម្ពសៀវភៅ“នារីរបាំកម្ពុជាសម័យចតុមុខ និងសម័យអង្គរ” ជាភាសាខ្មែរ។

ទន្ទឹមគ្នានេះ ក្រសួងក៏បានបង្កើនការផ្សព្វផ្សាយ សិល្បៈទស្សនីយភាពខ្មែរ ពិសេសស្នាដៃសិល្បៈដែលទើបដំឡើងថ្មី ដល់សាធារណជន តាមរយៈបណ្ដាញសង្គមហ្វេសប៊ុកផ្លួវការរបស់ក្រសួងផងដែរ៕

 

លោកស៊ុន ចាន់ថុលៈស្ពានតភ្ជាប់ពីភ្នំពេញទៅស្វាយជ្រុំបានសិក្សាចប់ហើយ

ដោយៈជេស៊ីកា

ភ្នំពេញៈ គំរោងសិក្សាស្ពានមិត្តភាពកម្ពុជា កូរ៉េភ្នំពេញ ស្វាយជ្រុំបានបញ្ចប់ការសិក្សារួចហើយ។ នេះបើតាមការប្រកាសឲ្យដឹងពីលោកទេសរដ្ឋមន្រ្តីស៊ុន ចាន់ថុលរដ្ឋមន្រ្តីក្រសួងសាធារណៈការ និងដឹកជញ្ជូន។

លោកបានមានប្រសាសន៍ ក្នុងកិច្ចប្រជុំបូកសរុបលទ្ធផលការងារ សុវត្ថិភាពចរាចរណ៍ផ្លូវគោក ប្រចាំឆ្នាំ២០២២១ និងលើកទិសដៅការងារឆ្នាំ២០២២ របស់ គ.ស.ច.គ ក្រោមអធិបតីភាពសម្ដេចក្រឡាហោម ស ខេង ឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃនៅព្រឹកថ្ងៃទី៩ ខែកុម្ភៈនេះ បានបញ្ជាក់ថា ស្ពានឆ្លងកាត់ទន្លេ ពីរាជធានីភ្នំពេញ-ស្វាយជ្រុំ បានសិក្សាចប់សព្វគ្រប់ហើយ ដោយក្រសួងកំពុងសិក្សាជាមួយកូរ៉េ ដើម្បីជ្រើសរើសប្រភេទស្ពានណាមួយសម្រាប់សាងសង់។

ថ្លែងក្នុងពិធីបើកការដ្ឋានស្ថាបនា និងកែលំអរផ្លូវជាតិលេខ៤៨ឡើងវិញកាលពីពេលថ្មីៗនេះ ឯកអគ្គរដ្ឋទូតសាធារណៈរដ្ឋកូរ៉េបានមានប្រសា​សន៍ថា ក្រុមហ៊ុនកូរ៉េមួយកំពុងសិក្សាស្ពាននេះ ដែលនឹងមានជម្រើសចំនួនពីរ ដោយទី១ជាស្ពានធម្មតា និងទី២ ជាស្ពានយោងដោយខ្សែកាប ដែលស្ពានយោងដោយខ្សែកាប នឹងជាជម្រើសដែលវានឹងក្លាយជាLandmarkថ្មីមួយនៅរាជធានីភ្នំពេញ ដែលនឹងទាក់ទាញភ្ញៀវទេសចរណ៍កូរ៉េ មកទស្សនានៅទីក្រុងភ្នំពេញ។

សម្តេចតេជោហ៊ុន សែននាយករដ្ឋមន្រ្តីនៃកម្ពុជាបានថ្លែងកាលពីពេលថ្មីៗនេះ ដោយបានសម្តែងអំណរគុណដល់ភាគីកូរ៉េ ដែលនឹងជួយសាងសង់ស្ពានមិត្តភាពកម្ពុជា កូរ៉េនេះឡើងនាពេលខាងមុខ៕

កម្ពុជាមានបណ្តាញខ្សែកាបអុបទិកភ្ជាប់ទៅកាន់ប្រទេសច្រើនជាង១៨មានប្រវែង៤៦ពាន់គីឡូម៉ែត្រ

ដោយៈ សុធារី

ភ្នំពេញៈ បើតាមឯកសារគោលនយោបាយ រដ្ឋាភិបាលឌីជីថលកម្ពុជា ឆ្នាំ២០២២-២០៣៥ ដែលបានដាក់ឱ្យប្រើប្រាស់កាលពីពេលថ្មីៗនេះ បានឱ្យដឹងថា គិតត្រឹមឆ្នាំ២០២១ កម្ពុជាមានបណ្តាញខ្សែកាបអុបទិកប្រមាណ៤៦ពាន់គីឡូម៉ែត្រ និងបណ្តាញខ្សែកាបអុបទិកក្រោមសមុទ្រមានចំនួន២។

ក្នុងចំណោមខ្សែកាបអុបប្រវែ ងប្រមាណ៤៦ពាន់គីឡូម៉ែត្រនេះ ខ្សែកាបអុបទិកក្រោមសមុទ្រទី១ តភ្ជាប់កម្ពុជាទៅប្រទេសថៃ និងម៉ាឡេស៊ី (Malaysia Cambodia Thailand MCT) និងខ្សែទី២ តភ្ជាប់កម្ពុជា ទៅប្រទេសចំនួន១៨ ក្នុងទ្វីបអាស៊ី អាហ្វ្រិក និងអឺរ៉ុប (Asia Africa Europe MCT AAE-1)។

តាមរបាលការណ៍របស់រដ្ឋាភិបាលបានឱ្យដឹងថា ទោះយ៉ាងណាក្តី រចនាសម្ព័ន្ធទូរគមនាគមន៍នេះ មិនទាន់គ្រប់ដណ្តប់នៅទូទាំងប្រទេសនៅឡើយ ខណៈបណ្តាញទូរសព្ទចល័តជំនាន់ទី៤ (4G) កំពុងផ្តល់សេវាជូនប្រជាពលរដ្ឋប្រមាណ៨០%ប៉ុណ្ណោះ។

នៅក្នុងឆ្នាំ២០២១ កន្លងមកមានអ្នកចុះឈ្មោះប្រើប្រាស់ សេវាអ៊ិនធឺណិតប្រមាណ១៧,៦៥លាន ខណៈការតភ្ជាប់អ៊ីនធឺណិតតាមឧបករណ៍ចល័តមានចំនួន១៧,៣៥លានលេខ ស្មើនឹង១០៥,៦០% នេះ ។

ចំណែកក្រុមហ៊ុនផ្តល់សេវាអ៊ិនធឺណិតចល័ត មានចំនួន៥ក្រុមហ៊ុន និងក្រុមហ៊ុនផ្តល់សេវាអ៊ីនធឺណិតអចល័តមានចំនួន៣៥ ក្នុងនោះការគ្រប់ដណ្តប់សេវាទូរសព្ទចល័ត2G មានចំនួន៩២,៣% នៃប្រជាជនសរុបការគ្រប់ដណ្តប់សេវាទូរសព្ទចល័ត 3G មាន៨៥,២% និងការគ្រប់ដណ្តប់សេវាទូរសព្ទចល័ត 4G មានចំនួន៨២,៥%។

ក្រៅពីការអភិវឌ្ឍហេដ្ឋារចនាសម្ព័ន្ធឌីជីថល សេវាសាធារណៈចំនួន ៣ ៥០៨ ត្រូវបានដាក់ឱ្យប្រើប្រាស់ ក្នុងនោះការដាក់ពាក្យសុំដោយផ្ទាល់ពីការិយាល័យច្រកចេញចូលតែមួយ ស្មើនឹង៧៧,៥៤% សេវាទាញយកពាក្យសុំតាមអនឡាញ តែត្រូវដាក់ពាក្យសុំដោយផ្ទាល់ស្មើនឹង១០,៦០% និងសេវាដាក់ពាក្យសុំ តាមអនឡាញស្មើនឹង១១,៨៦%។

ប្រព័ន្ធព័ត៌មាន ឌីជីថលរបស់រាជរដ្ឋាភិបាល កំពុងដំណើរការមានចំនួនសរុប១៨២ ក្នុងនោះ មានសេវាសាធារណៈពីរដ្ឋាភិបាល ដើម្បីប្រជាពលរដ្ឋ(G4C)ចំនួន ៣០,៨% ពីរដ្ឋាភិបាលទៅធុរកិច្ច(G2B)ចំនួន៩,៥% និងពីរដ្ឋាភិបាលទៅរដ្ឋាភិបាល(G2G)ចំនួន៥៩,៨%។

រដ្ឋាភិបាលមានយុទ្ធសាស្រ្តពង្រឹង និងពង្រីកហេដ្ឋារចនាសម្ព័ន្ធទូរសព្ទចល័ត និងអ៊ីនធឺណិតល្បឿនលឿន តាមរយៈការពង្រឹងគុណភាព និងការពង្រីកវិសាលភាពគ្របដណ្តប់ សេវាទូរសព្ទចល័តជំនាន់ទី៤(4G) ដើម្បីឈោងទៅចាប់យកសេវាទូរសព្ទចល័តជំនាន់ទី៥ (5G) ព្រមទាំងជំរុញការកសាងហេដ្ឋារចនាសម្ព័ន្ធខ្សែកាបអុបទិក ក្រោមបាតសមុទ្រ និងការកសាងហេដ្ឋារចនាសម្ព័ន្ធអ៊ីនធឺណិត ល្បឿនលឿនដល់គ្រប់ឃុំសង្កាត់៕

ដំណឹងល្អៈ ផ្លូវល្បឿនលឿនភ្នំពេញ-ព្រះសីហនុ នឹងដាក់ឲ្យប្រើប្រាស់ជាបណ្ដោះអាសន្ននៅខែកក្កដាហើយ

ដោយៈ សហការី

ភ្នំពេញៈ រដ្ឋមន្ត្រីក្រសួងសាធារណការ និងដឹកជញ្ជូនបានប្រកាសថា ផ្លូវល្បឿនលឿន រាជធានីភ្នំពេញ-ខេត្តព្រះសីហនុ នឹងដាក់ឲ្យប្រើប្រាស់ជាបណ្ដោះអាសន្ននៅខែកក្កដា ឆ្នាំនេះ ។

លោកទេសរដ្ឋមន្រ្តី ស៊ុន ចាន់ថុល រដ្ឋមន្ដ្រីក្រសួងសាធារណការ និងដឹកជញ្ជូន និងជាអនុប្រធានអចិន្ដ្រៃយ៍ គណៈកម្មាធិការជាតិ សុវត្ថិភាពចរាចរណ៍ផ្លូវគោក (គ.ស.ច.គ) ក្នុងកិច្ចប្រជុំបូកសរុបលទ្ធផលការងារ សុវត្ថិភាពចរាចរណ៍ផ្លូវគោក ប្រចាំឆ្នាំ២០២២១ និងលើកទិសដៅការងារឆ្នាំ២០២២ របស់ គ.ស.ច.គ ក្រោមអធិបតីភាពសម្ដេចក្រឡាហោម ស ខេង ឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃ និងជាប្រធាន គ.ស.ច.គ នៅព្រឹកថ្ងៃទី៩ ខែកុម្ភៈនេះ បានបញ្ជាក់ថា ក្រោយពីដាក់ឲ្យប្រើប្រាស់ផ្លូវល្បឿនលឿនភ្នំពេញ-ព្រះសីហនុ ជាបណ្ដោះអាសន្ននៅខែកក្កដាហើយនោះ នឹងដាក់សម្ពោធឲ្យប្រើប្រាស់ជាផ្លូវការ ខែកញ្ញា ឆ្នាំ២០២២ ។

ផ្លូវល្បឿនលឿនពីភ្នំពេញ ទៅក្រុងព្រះសីហនុ ត្រូវបានធ្វើពិធីបើកការដ្ឋានសាងសង់ កាលពីខែ មីនា ឆ្នាំ២០១៩ ក្រោមអធិបតីភាពសម្តេចតេជោនាយករដ្ឋមន្រ្តីនៃកម្ពុជា ក្នុងទុនវិនិយោគរបស់ក្រុមហ៊ុន សាជីវកម្មស្ពាន និងថ្នល់ ចិន (CRBC) តាមរយៈក្រុមហ៊ុន Cambodian PPSHV Expressway Co.,Ltd ចំណាយការវិនិយោគប្រមាណ២ពាន់លានដុល្លារ និងហិរញ្ញប្បទានឥតសំណងពីរដ្ឋាភិបាលចិន លើទឹកប្រាក់ប្រមាណ១៥០លានដុល្លារ៕

ក្រុមហ៊ុនដ៏ធំរបស់ថៃ Central Retail គ្រោងបោះទុនវិនិយោគច្រើនពាន់លានដុល្លារអាមេរិកដើម្បីពង្រីកអាជីវកម្ម

ដោយៈសុខុម

បាងកក: ក្រុមហ៊ុនលក់រាយដ៏ធំរបស់ថៃ Central Retail Corporation Plc (CRC) បានប្រកាសកាលពីថ្ងៃអង្គារ ទី៨ កុម្ភៈ ថា ខ្លួនគ្រោងនឹងបោះទុន វិនិយោគ ៣,០៤០លានដុល្លារអាមេរិក សម្រាប់រយៈពេល៥ឆ្នាំខាងមុខ ដើម្បីពង្រីកអាជីវកម្មលក់រាយរបស់ខ្លួន។

ក្រុមហ៊ុននេះក៏បានចេញសេចក្តីថ្លែងការណ៍ផងដែរថា ខ្លួនមានបំណ​ងបង្កើនប្រាក់ចំណូល និងមូលធនប័ត្រទីផ្សារ (Market Capitalization) ឱ្យបាន ២,៥ដងក្នុងរយៈពេលនេះ។ នេះបើយោងតាមសារព័ត៌មាន Bangkok Post ចុះផ្សាយកាលពីថ្ងៃអង្គារម្សិលម៉ិញនេះ។

លោក Yol Phokasub យកប្រតិបត្តិក្រុមហ៊ុននេះលើកឡើងថា យុទ្ធសាស្ត្ររយៈពេល៥ឆ្នាំ របស់ក្រុមហ៊ុនរួមមានទាំងការពង្រីក Platform ទិញទំនិញតាមអនឡាញរបស់ខ្លួនផងដែរ ដើម្បីជំរុញខ្សែសង្វាក់ចំណីអាហារ សម្លៀកបំពាក់ និងអាជីវកម្មផ្សេងៗទៀតរបស់ខ្លួន។

លោកបានបញ្ជាក់ ក្នុងសន្និសីទសារព័ត៌មានតាមអនឡាញថា មួយភាគធំនៃការវិនិយោគនេះ នឹងត្រូវបានប្រើសម្រាប់ការពង្រីក និងជួសជុលកែលម្អហាង ហើយដល់ប៉ុន្មានទុកចំណាយទៅលើបច្ចេកវិទ្យា។

ក្នុងរយៈពេល៩ខែដល់ខែកញ្ញា ឆ្នាំ២០២១ ក្រុមហ៊ុននេះទទួលបានប្រាក់ចំណូល១២៦,៨ពាន់លានបាត (៤,១៦០លានដុល្លារអាមេរិក) ព្រមទាំងចំណូល មិនទាន់កាត់ពន្ធ១២ពាន់លានបាត (៣៦៥លានដុល្លារអាមេរិក) ផងដែរ។

ប្រមាណ៧២ភាគរយ នៃប្រាក់ចំណូលរបស់ក្រុមហ៊ុននេះ រកបាននៅក្នុងប្រទេសថៃ ហើយសល់ប៉ុន្មានរកបាននៅវៀតណាម និងប្រទេសអ៊ីតាលី។

កាលពីខែធ្នូ ចុងឆ្នាំ២០២១ Central Group ដែលជាក្រុមហ៊ុនមេរបស់ Central Retail និងដែលគ្រប់គ្រងដោយគ្រួសារមហាសេដ្ឋី Chirathivat បានទិញយកហាងលក់ទំនិញប្រណីត Selfridges របស់អង់គ្លេស ជាមួយក្រុមហ៊ុនអចលនទ្រព្យអូទ្រីស Signa Group ក្នុងតម្លៃ៥ពាន់លានដុល្លារអាមេរិក។

*តើអ្វីទៅជាមូលធនប័ត្រទីផ្សារ (Market Capitalization)?
មូលធនប័ត្រទីផ្សារ សំដៅទៅលើតម្លៃទីផ្សារ ជាទឹកប្រាក់សរុបជាដុល្លារ នៃភាគហ៊ុនទាំងអស់របស់ក្រុមហ៊ុនមួយ។ វាត្រូវបានគណនាដោយយកចំនួនភាគហ៊ុនសរុបរបស់ក្រុមហ៊ុនមួយ គុណនឹងតម្លៃភាគហ៊ុននៃទីផ្សារបច្ចុប្បន្ន។
ឧទាហរណ៍ ក្រុមហ៊ុនមួយមាន១០លានភាគហ៊ុន ហើយលក់ភាគហ៊ុនមួយក្នុងតម្លៃ១០០ដុល្លារក្នុងមួយហ៊ុន នោះមូលធនប័ត្រទីផ្សារនៃក្រុមហ៊ុននោះគឺ១ពាន់លានដុល្លារ៕ Bangkok Post៕

ក្រុមហ៊ុនអចលនទ្រព្យក្នុងស្រុកមួយប្រកាសបើកលក់ហ្រ្វេនឆាយរបស់ខ្លួននៅក្នុងប្រទេសកម្ពុជា

ដោយៈ សុផារី

ភ្នំពេញៈ ក្រុមហ៊ុនអចលនទ្រព្យក្នុងស្រុក Lux Realty បានបើកដំណើរការអាជីវកម្ម Franchise ដំបូងរបស់ខ្លួន នៅក្នុងទីក្រុងឆ្នេរសមុទ្រព្រះសីហនុ ជាមួយនឹងការពង្រីកតំបន់បន្ថែមទៀត ដែលជាគន្លឹះនៃផែនការកំណើនរបស់ក្រុមហ៊ុន។

ក្រុមហ៊ុន Lux Realty ត្រូវបានបង្កើតឡើងក្នុងខែកុម្ភៈ ឆ្នាំ២០២១ ដោយលោក Crispin Kirby ដែលបានចាប់ផ្តើមអាជីពអចលនទ្រព្យនៅកម្ពុជានៅ South East Asian Property Services (SEAPS)។ បន្ទាប់មកគាត់ បានក្លាយជានាយកប្រតិបត្តិផ្នែកលក់នៅ LZ Seaview Residences ក្នុងក្រុងព្រះសីហនុ ដែលជាការអភិវឌ្ឍន៍ដ៏ជោគជ័យមួយនៅក្នុងទីក្រុងជាប់មាត់សមុទ្រ ដែលមានការរីកចម្រើនយ៉ាងលឿននេះ។

យោងតាមក្រុមហ៊ុន Lux Realty ក្រុមហ៊ុនសម្រេចបានការលក់ជិត ៤លានដុល្លារ ចាប់តាំងពីការបង្កើតរបស់ខ្លួន។

លោក Kirby បានប្រាប់មានប្រសាសន៍ឱ្យដឹងថា លទ្ធផលនេះសម្រេ​ចបាន ដោយការផ្តោតលើការអភិវឌ្ឍន៍ថ្មីៗ ជាញឹកញាប់លើទីតាំងមិនសូវពេញនិយម និងជៀសវាងទីផ្សារជួលដែលមិនសូវចំណេញច្រើន។

ក្រុមហ៊ុន Lux បានចុះហត្ថលេខាលក់ហ្រ្វេនឆាយរបស់ខ្លួន នៅឆ្នាំនេះ ដែលមានតម្លៃ៥ម៉ឺនដុល្លារអាមេរិក ដោយផ្តល់ជូននូវភាពផ្តាច់មុខក្នុងតំបន់ក្នុងខេត្តព្រះសីហនុ ការបណ្តុះបណ្តាលយ៉ាងទូលំទូលាយ ការចូលទៅកាន់ CRM របស់ក្រុមហ៊ុន និងការចូលទៅកាន់បណ្តាញអតិថិជនដ៏ធំរបស់ក្រុមហ៊ុន និងអត្ថប្រយោជន៍ផ្សេងទៀត។

លោក Kirby មានប្រសាសន៍ថា “ខណៈពេលកូវីដ១៩ បានរីករាលដាលខ្លាំង ធ្វើឱ្យមានផលប៉ះពាល់ដ៏អាក្រក់ មកលើសេដ្ឋកិច្ចកម្ពុជា តាមទស្សនវិស័យអចលនទ្រព្យ វាក៏បានបង្កើតទីផ្សារ អ្នកទិញមួយឱ្យកើតឡើងផងដែរ”។

លោក Kirby បានបន្ថែមថា “បច្ចុប្បន្នយើងជោគជ័យលើការិយា​ល័យចំនួនពីរ ក្រោមការដឹកនាំនិងគ្រប់គ្រងដ៏ល្អ ប៉ុន្តែការស្វែងរកបុគ្គលិកល្អដែលអាចទុកចិត្តបានគឺពិបាកណាស់”។ លោកបន្តថា “នេះបាននាំឱ្យយើងដើរលើផ្លូវនៃសិទ្ធិអាជីវកម្ម។ ខ្ញុំជឿថា សម្រាប់អ្នកដែលមានថវិកាផ្ទាល់ខ្លួននិងចាប់អារម្មណ៍វិនិយោគលើវិស័យនេះ នឹងមិនត្រឹមតែផ្តល់ផលប្រយោជន៍ដល់ខ្លួនឯងប៉ុណ្ណោះទេ ប៉ុន្តែថែមទាំងជួយជាផ្នែកមួយ ធ្វើឱ្យក្រុមហ៊ុនរីកចម្រើនលឿនជាងមុនផងដែរ”។

ក្រុមហ៊ុននឹងកំពុងស្វែងរកដៃគូ សហការក្នុងប្រទេសកម្ពុជា ហើយមានដៃគូសហការរួចហើយ នៅប្រទេសថៃហើយ គ្រោងពង្រីកទៅកាន់ទីផ្សារសក្តានុពលផ្សេងទៀតនៅក្នុងតំបន់។

កន្លងមក គំរូអាជីវកម្ម Franchise ក្នុងវិស័យអចលនទ្រព្យរបស់កម្ពុជាបាន និងកំពុងពង្រីកដោយក្រុមហ៊ុន Franchiseល្បីៗមួយចំនួនរួមមាន Century 21 Cambodia ដែលជាផ្នែកមួយនៃក្រុមហ៊ុន Century 21 Real Estate LLC ដែលមានមូលដ្ឋាននៅសហរដ្ឋអាមេរិក និង Keller Williams Realty Inc (KW) ជាដើម។ នេះជាការបន្ថែមទៅលើសាខានៃក្រុមហ៊ុនសេវាកម្មអចលនទ្រព្យសកល និងក្រុមហ៊ុនវិនិយោគ CBRE Group Inc និង Knight Frank LLP នៅកម្ពុជា៕

China-funded Indonesian rail link may take 40 years to become profitable

A consortium building a Chinese-funded high-speed rail link in Indonesia expects it will now take 40 years for its investment to become profitable, twice as long as initial estimates, due to plans to relocate the country’s capital city, an executive said.

The Belt and Road Initiative project also faces a cost overrun of about US$2 billion, bumping up estimated costs to 113 trillion rupiah (US$7.84 billion), Dwiyana Slamet Riyadi, president director of PT KCIC, told a parliamentary hearing on Monday.

PT KCIC is a consortium of Chinese and Indonesian companies building the 142km (88-mile) railway line connecting the capital Jakarta to the city of Bandung in West Java.

Because of the plan to move the capital from Jakarta to Borneo island in 2024, trains connecting the cities are expected to carry 31,215 passengers per day, down from a previous estimate of 61,157 passengers per day, Riyadi said.

“Looking at the investment value, number of passengers and ticket prices, it’s very difficult to follow the earlier feasibility study where the assumption of a return on investment will occur within 20 years,” Riyadi said, noting a break-even point would be reached in 40 years with proposed ticket prices ranging from 150,000 to 350,000 rupiah.

Source: South China Morning Post

ការកែប្រែរចនាបទសំណង់លំនៅឋានជាការបន្តទាក់ទាញអតិថិជនក្នុងការទិញផ្ទះ

ដោយៈវឌ្ឍនៈ

ភ្នំពេញៈ ក្នុងរយៈពេលប៉ុន្មានឆ្នាំចុងក្រោយនេះ សំណង់លំនៅឋានត្រូវបានមើលឃើញថា មានការកែប្រែរូបរាង និងរចនាបថជាថ្មីៗជាបន្តបន្ទា​ប់ជាបន្តបន្ទាប់ ដោយក្រុមហ៊ុនអភិវឌ្ឍន៍លំនៅឋាន មួយចំនួនបានជួលស្ថាបត្យករវិស្វករល្បីៗ មករចនានូវរូបរាងផ្ទះបែបថ្មី ដើម្បីជាការទាក់ទាញដល់អ្នកទិញ។

កញ្ញាគឹម គិនកេសា អ្នកគ្រប់គ្រងជាន់ខ្ពស់នៃក្រុមហ៊ុនអចលនទ្រព្យ CBRE Cambodia បានមានប្រសាសន៍ថា អ្នកអភិវឌ្ឍន៍ដែលមានការច្នៃប្រឌិតថ្មីសម្រាប់លំនៅឋាន នៅតែទទួលបានការគាំទ្រ ពីអ្នកមានតម្រូវការលំនៅឋាន ដូច្នេះហើយក្រុមហ៊ុនអភិវឌ្ឍន៍ជាច្រើន បានប្រជែងគ្នាក្នុងការរចនាម៉ូដផ្ទះដើម្បីលក់ជូនអតិថិជន។

ដោយឡែកយើងឃើញថា គម្រោងផ្ទះ ដែលមិនមានការកែប្រែឬទាក់ទាញក៏មិនសូវមានការគាំទ្រដែរ។ ក្នុងន័យនោះមិនមែនមានន័យថា អត់មានទិញសោះនោះទេ គឺអ្នកទិញនៅតែទិញ គ្រាន់តែមិនសូវមានច្រើនប៉ុណ្ណោះ ។

ចំណែកលោកប៉ូ អ៊ាវគង់ អគ្គនាយកនៃក្រុមហ៊ុនអចលនទ្រព្យ Advance Realty បានឱ្យដឹងថា ពីមួយឆ្នាំទៅមួយឆ្នាំ ប្រជាពលរដ្ឋកម្ពុជាកាន់តែមានកំណើននៃប្រាក់ចំណូល ហើយការរស់របស់ពួកគាត់ ក៏កាន់តែមានភាពទំនើបជាបន្តបន្ទាប់ ទៅតាមបរិបទនៃសម័យថ្មី ដូច្នេះហើយអ្នកអភិវឌ្ឍន៍លំនៅឋាន ក៏បានផ្លាស់ប្តូរ និងកែប្រែនូវសំណង់របស់ខ្លួនទៅរកភាពទំនើបកម្មដែរ។

លោកបន្តថា ពេលខ្លះយើងបានមើលឃើញនៅនឹងភ្នែកផ្ទាល់ លំនៅឋានក្នុងទីតាំងតែមួយ តម្លៃដូចគ្នា គ្រាន់តែគម្រោងមួយបានផ្លាស់ប្តូរម៉ូដផ្ទះ ធ្វើឱ្យអតិថិជនទៅទិញ ផ្ទះនៅក្នុងគម្រោងយ៉ាងច្រើន ហើយគម្រោងដែលមានម៉ូដផ្ទះចាស់ដដែលៗ មិនសូវមានការចាប់អារម្មណ៍ ពីអ្នកទិញនោះទេ ដូច្នេះហើយទើបមួយរយៈនេះ ម្ចាស់អភិវឌ្ឍលំនៅឋានក្នុងប្រទេសកម្ពុជាបានជួលស្ថាបត្យករថ្មីៗ និងចំណាយខ្ពស់ដើម្បីរចនាម៉ូដផ្ទះ ដែលទំនើបថ្មីប្លែកដើម្បីទាក់ទាញ ហើយក៏ទទួលបានការចាប់អារម្មណ៍ខ្លាំង ពីអ្នកទិញដែរ។

លោកឧកញ៉ាបណ្ឌិតគីម ហ៊ាង ប្រធាន KW Cambodia ដែលបាននិងកំពុវិនិយោគបុរីវិមានសំណាង ស្ថិតលើផ្ទៃដីទំហំ ២៥ហិកតា នៅលើមហាវិថីឈ្នះ ឈ្នះបាននិងកំពុងវិនិយោគវីឡាដ៏ប្រណីត ដែលមានតម្លៃរហូតដល់៥លានដុល្លារអាមេរិក។

លោកឧកញ៉ាបានបន្តថា “អ្នកមានលទ្ឋភាពទិញ Royal Villa នៅកម្ពុជាមានចំនួនច្រើន ប៉ុន្តែមានអ្នកក្លាហានទិញ លំនៅដ្ឋានបែបនេះមានមិនច្រើនទេ”។លោកបន្តថា “អ្នកមានលុយច្រើន មិនគួរទុកលុយទេ ពួកគេគួរទិញផ្ទះតាមក្តីស្រម៉ៃ និងការស្រលាញ់របស់ពួកគេ”៕

អាកាសយានដ្ឋានថ្មីៗចំនូនពីរបន្តពន្យាពេលសិក្សា និងបើកដំណើរការ

ដោយៈគង់ សូរិយា

ភ្នំពេញៈ មន្រ្តីជាន់ខ្ពស់ និងជាអ្នកនាំពាក្យរដ្ឋលេខាធិការដ្ឋានអាកាសចរណ៍ស៊ីវិលបានថ្លែងថា ការអភិវឌ្ឈន៍អាកាសយានដ្ឋាននៅកម្ពុជា មិនទាន់មានភាពរីកចម្រើនខ្លាំងនោះទេ ដោយសារភាពមិនប្រាកដប្រជានៃជំងឺកូវីដ១៩។

លោកស៊ិន ចាន់សិរីវុត្ថា អនុរដ្ឋលេខាធិការ នៃរដ្ឋលេខាធិការដ្ឋានអាកា​សចរណ៍ស៊ីវិល បានមានប្រសាសន៍ឲ្យដឹង តាមបណ្តាញទំនាក់ទំនងសង្គមកាលពីថ្ងៃទី៨ កុម្ភៈកន្លងមកថា ដោយសារភាពមិនប្រាកដប្រជា នៃវិបត្តិជំ ងឺ​កូវីដ១៩នេះ អ្នកវិនិយោគគំរោងមួយចំនួនសុំពន្យាពេល ដោយពួកគេនឹងគិតគូរឡើងវិញ ក្រោយពេលស្ថានភាពមានភាពល្អប្រសើរ ពិសេសព្រលានយន្តហោះតារាសាគរ ខេត្តកោះកុងនឹងត្រូវពន្យាពេលដល់ខែកក្កដាខាងមុខ ខណៈគំរោងព្រលានយន្តហោះខេត្តមណ្ឌលគិរី ក៏បានផ្អាកការសិក្សាផងដែរ។

លោកបន្តថា “ដោយសារមានការឆ្លងជំងឺកូវីដទ្រង់ទ្រាយធំ នៅព្រលានតារាសាគរ ធ្វើឲ្យក្រុមហ៊ុនចិនស្នើសុំពន្យា ពេលបើកដំណើរការព្រលាន​នេះ រហូតដល់ខែកក្កដាខាងមុខ”។

ទោះជាយ៉ាងណាការដឹកជញ្ជូនទំនិញ កាលពីឆ្នាំ២០២១ ធៀបនឹងឆ្នាំ២០២០សម្រេចបានកំនើន២៨ភាគរយ ដោយទំហំទំនិញកើនឡើងដល់​៥៥ពាន់តោន ប៉ុន្តែទោះជាយ៉ាងណាចំនួនអ្នកដំណើរ បានដកក្នុងរង្វង់៨០ភាគរយ បើធៀបឆ្នាំ២០២១ និងឆ្នាំ២០២០។

យ៉ាងណាក៏ដោយ លទ្ឋផលនៅឆ្នាំ២០២២នេះ ទំនងជាមានភាពប្រ​សើ​​រឡើងវិញនូវការដឹកជញ្ជូនទំនិញ និងការធ្វើដំណើរ ពិសេសភ្ញៀវទេស​ចរណ៍អន្តរជាតិ នឹងមកទស្សនាកម្ពុជាកើនឡើងវិញ ប៉ុន្តែស្ថិតក្នុងកម្រិតនៅឡើយ បើទោះជាកម្ពុជាបើកចំហ និងមិនឲ្យអ្នកដំណើរធ្វើចត្តាឡីស័កក្តី ប៉ុន្តែប្រទេសជិតខាងកម្ពុជា និងបណ្តាប្រទេសនៅសហគមន៍អឺរ៉ុប អាមេរិកនៅតែមានភាពចលាចល នឹងការឆ្លងរីករាលដាលជំងឺកូវីដ១៩ រាប់ម៉ឺននាក់ជារៀងរាល់ថ្ងៃ៕

គម្រោងផ្លូវដែកឥណ្ឌូនេស៊ី ដែលទទួលបានហិរញ្ញប្បទានពីចិននឹងត្រូវចំណាយពេល៤០ឆ្នាំទើបបានផលចំណេញ

ដោយៈសុខុម

ហ្សាការតា: នាយកប្រតិបត្តិមួយរូបទម្លាយឱ្យដឹងថា សម្ព័ន្ធក្រុមហ៊ុនដែលកំពុងស្ថាបនា គម្រោងផ្លូវដែកល្បឿនលឿនមួយខ្សែ នៅឥណ្ឌូនេស៊ី ដែលទទួលបានហិរញ្ញប្បទានពីប្រទេសចិន នឹងត្រូវចាយពេលវែងរហូតដល់ទៅ៤០ឆ្នាំ ទម្រាំបានចំណេញពីការវិនិយោគរបស់ខ្លួន។

យោងតាមសារព័ត៌មាន South China Morning Post ចុះផ្សាយកាលពីថ្ងៃអង្គារទី៨ កុម្ភៈ ឱ្យដឹងថា រយៈពេលរំពឹងទទួលបានប្រាក់ចំណេញនេះគឺវែងជាងទ្វេដង បើធៀបនឹងការប៉ាន់ស្មានដំបូង ដោយសារតែផែនការផ្លាស់ប្តូររដ្ឋធានី នៃប្រទេសនេះទៅកាន់កន្លែងផ្សេង។

លោក Dwiyana Slamet Riyadi ប្រធានសម្ព័ន្ធក្រុមហ៊ុន PT KCIC បានលើកឡើងក្នុងសវនាការសភា កាលពីថ្ងៃច័ន្ទ ទី៧ កុម្ភៈ ថា គម្រោងផ្លូវដែក ដែលស្ថិតក្រោមគំនិតផ្ដួចផ្ដើម “ខ្សែក្រវាត់ និងផ្លូវ” (Belt and Road Initiative) របស់មហាយក្សចិន នេះក៏ប្រឈមនឹងការចំណាយលើសផែនការគ្រោងទុក រហូតដល់ទៅប្រមាណ២ពាន់លានអាមេរិកផងដែរ ដោយធ្វើឱ្យការចំណាយសរុប ក្នុងគម្រោងនេះកើនឡើងរហូតដល់៧,៨៤ពាន់លានដុល្លារ។

សម្ព័ន្ធក្រុមហ៊ុន PT KCIC ត្រូវបានបង្កើតឡើងរួមគ្នា ដោយក្រុមហ៊ុនមួយចំនួនរបស់ប្រទេសចិន និងក្រុមហ៊ុនមួយចំនួនទៀតរបស់ឥណ្ឌូនេស៊ី ដើម្បីទទួលការងារស្ថាបនា ផ្លូវដែកប្រវែង១៤២គីឡូម៉ែត្រ ដែលតភ្ជាប់ពីរដ្ឋធានីហ្សាការតា ទៅកាន់ទីក្រុងបានឌុង (Bandung) ក្នុងខេត្តជ្វាខាងលិច (West Java)។

លោក Dwiyana Slamet Riyadi បានបញ្ជាក់ថា ដោយសារផែនការផ្លាស់រដ្ឋធានីពីហ្សាកាតា ទៅកាន់កោះប័រណេអូ (Borneo) នៅឆ្នាំ២០២៤ រថភ្លើងដែលតភ្ជាប់ទីក្រុងនានាត្រូវបានរំពឹងថា នឹងទទួលបានចំនួនអ្នកដំណើចំនួនរ៣១.២១៥នាក់ក្នុងមួយថ្ងៃ ដោយធ្លាក់ចុះពីការប៉ាន់ប្រមាណពីមុនថា នឹងទទួលបានចំនួនអ្នកដំណើរ៦១.១៥៧នាក់ក្នុងមួយថ្ងៃ។

លោកបញ្ជាក់ថា ការសិក្សាពីមុនបង្ហាញថា គម្រោងនេះនឹងផ្ដល់ប្រាក់ចំណេញ ក្នុងរយៈពេល២០ឆ្នាំ ប៉ុន្តែដោយសារស្ថានភាពប្រែប្រួល វាអាចនឹងចាយពេលរហូតដល់ទៅ៤០ឆ្នាំ ទម្រាំទទួលបានប្រាក់ចំណេញ។

នាយករូបនេះ បានបកស្រាយប្រាប់ក្រុមសមាជិកសភាថា សម្ព័ន្ធក្រុមហ៊ុន PT KCIC ត្រូវចំណាយកាន់តែច្រើន សម្រាប់ការឈូសឆាយដីបន្ថែមទៀត ខណៈថ្លៃឈ្នូលកម្លាំងពលកម្ម និងសម្ភារៈសំណង់សុទ្ធតែឡើងថ្លៃ។

យោងតាមទិន្នន័យរបស់សម្ព័ន្ធក្រុមហ៊ុន PT KCIC បង្ហាញថា គិតត្រឹមដំណាច់ឆ្នាំ២០២១ ការងារស្ថាបនាផ្លូវដែកនេះ សម្រេចបាន៧៩,៩%ហើយ។ ផ្នែកខ្លះនៃផ្លូវដែកនេះ គ្រោងនឹងដាក់ឱ្យដំណើរការសាកល្បងនៅត្រឹមដំណាច់ឆ្នាំ២០២២ ហើយគ្រោងនឹងបញ្ចប់គម្រោងនេះ ជាស្ថាពរនៅត្រឹមខែមិថុនា ឆ្នាំ២០២៣។

ក្រុមហ៊ុនរដ្ឋមួយចំនួនរបស់ឥណ្ឌូនេស៊ី រួមទាំងក្រុមហ៊ុន Wijaya Karya និងក្រុមហ៊ុន PT KAI ផងគ្រប់គ្រងភាគហ៊ុន៦០% នៃសម្ព័ន្ធក្រុមហ៊ុន PT KCIC ចំណែកឯក្រុមហ៊ុនចិន China Railway Engineering Corporation និងក្រុមហ៊ុនចិន មួយចំនួនទៀតកាន់កាប់ភាគហ៊ុន៤០%។

គម្រោងដែលទទួលបានហិរញ្ញប្បទាន ពីធនាគារអភិវឌ្ឍន៍ចិន (China Development Bank) នេះត្រូវបានប្រគល់ឱ្យសម្ព័ន្ធក្រុមហ៊ុន PT KCIC ក្នុងឆ្នាំ២០១៥ ហើយបានចាប់ផ្ដើមការងារស្ថាបនា ក្នុងឆ្នាំ២០១៨ ប៉ុន្តែបានប្រឈមនឹងការពន្យារពេល ដោយសារជម្លោះកម្មសិទ្ធិដីធ្លី ព្រមទាំងមានការចោទសួរ ទាក់ទងនឹងផលចំណេញផ្នែកសេដ្ឋកិច្ច និងផលប៉ះពាល់បរិស្ថាន ដែលបង្កឡើងដោយគម្រោងនេះផងដែរ។

ការងារស្ថាបនានេះ ក៏មានការយឺតយាវ ដោយសារកង្វះកម្លាំងពលកម្មផងដែរ អំឡុងពេលផ្ទុះការឆ្លងរីករាលដាលវីរុសកូវីដ-១៩ ប៉ុន្មានខែដំបូង៕ South China Morning Post៕