ដោយសហការី

ភ្នំពេញ៖ បុរី ហ្គោលដេន ផាក បាន​ចាប់ផ្ដើមបើកសម្ពោធសាងសង់គម្រោង ដឹណេតឆឺរ៉ល ​ជាគម្រោង​សហគមន៍ធម្មជាតិបែបបៃតងមួយលើ​ផ្ទៃដីសរុប 60ហិកតា នៅថ្ងៃទី 04 ខែធ្នូ ឆ្នាំ 2021 នេះត​ទៅហើយ។
ក្នុងកម្មវិធីបើកសម្ពោធការដ្ឋានសាងសង់នេះ មានការអញ្ជើញចូលរួមពីសំណាក់គណៈគ្រប់គ្រងរបស់បុរី ហ្គោលដេន ផាក និង​ភ្ញៀវកិត្តិយស។

គម្រោង ដឹណេតឆឺរ៉ល គឺស្ថិតនៅជាប់ផ្លូវជាតិលេខ 6A គល់ស្ពានទី9 ដោយ​លោកអ្នកគ្រាន់តែចំណាយពេលធ្វើដំណើរត្រឹមតែ ៣នាទី ពីផ្លូវលីយ៉ុងផាត់ និង 12នាទី ពី​ស្ពានជ្រោយចង្វារប៉ុណ្ណោះ។

ដើម្បីជាការអបអរ ពិធីសម្ពោធបើកការសាងសង់គម្រោង ដឹណេតឆឺរ៉លនេះ បុរីហ្គោលដេន ផាក ក៏នឹងផ្តល់ជូនអតិថិជននូវការបញ្ចុះតម្លៃរហូតដល់ USD 10,800 សម្រាប់ការទិញផ្ទះនៅគម្រោង ដឹណេតឆឺរ៉ល ពេញមួយខែ គិតចាប់ពីថ្ងៃ ទី04 ធ្នូ 2021 រហូតដល់ថ្ងៃ ទី04 មករា 2022។

លោកអ្នកនឹងទទួលបាននូវបទពិសោធរស់នៅក្នុងសហគមន៍ដែលច្រើនសម្បូរបែប ក្នុងផ្ទៃដីសរុប 60ហិកតា រួមជាមួយសួនធម្មជាតិដ៏ធំ ទំហំរហូតដល់ 4.5ហិកតា រួមមានក្លិបហៅស៍ អាងហែលទឹកធំខាងក្រៅ ផ្លូវសម្រាប់រត់ ក្លឹបហាត់ប្រាណ និងកន្លែងសម្រាប់ក្មេងលេង។

គម្រោង ដឹណេតឆឺរ៉ល ជាសហគមន៍ធម្មជាតិបែបបៃតង ល្អសម្រាប់ការរស់នៅក្នុងបរិកាសបែបថ្មី មានបរិស្ថានពោរពេញដោយភាពស្រស់ស្រាយបែបធម្មជាតិ រួមទាំងភាពទាក់ទាញ និងភាពស៊ីវីល័យ គួរឱ្យចង់រស់នៅប្រកបដោយភាពថ្លៃថ្នូរក្នុងសង្គម និងស្ថិតក្នុងតំបន់មានសក្តានុពលសេដ្ឋកិច្ចខ្លាំង មានទន្លេអមសងខាងដែលនឹងបង្កើនភាពស្រស់ស្រាយមួយកម្រិតទៀតដល់ការរស់នៅក្នុងបុរី។

បន្ថែមឱ្យកាន់តែសម្បូរបែប មានច្រើនជម្រើសសម្រាប់លោកអ្នកដែរមានបំណងចង់មករស់នៅក្នុងបុរី ហ្គោលដេន ផាក មានជាប្រភេទផ្ទះដូចជា វីឡាឃីង វីឡាឃ្វីន វីឡាព្រីន វីឡាភ្លោះ វីឡាកូនកាត់ និងហូមអហ្វីស ដែលពេញនិយម និងទាន់សម័យសម្រាប់ការរស់នៅ។

លំនៅឋាននីមួយៗ ត្រូវបានសាងសង់ និង រចនាម៉ូតយ៉ាងយកចិត្តទុកដាក់ដោយ ស្ថាបត្យករ និង វិស្វករជំនាញ​ៗ​មានបទពិសោធន៍ជាច្រើនឆ្នាំ ដើម្បីធានាបាននូវភាពឥតខ្ចោះការសាងសង់ផ្ទះ។

ម្ចាស់គម្រោងមួយនេះ មានបទពិសោធក្នុងការសាងសង់បុរីអស់រយៈពេលជាង 10ឆ្នាំ មកហើយ។ គ្រប់ការសាងសង់តែងតែផ្ដល់ជូននូវ គុណភាពរឹងមាំ សេវាកម្មល្អ សោភ័ណភាពប្រណិតភាព និងសុវត្ថិភាពពេញលេញ រួមជាមួយនឹងបរិស្ថានស្អាតស្រស់បំព្រង ធ្វើឱ្យអតិថិជនទទួលបាននូវការរស់នៅប្រកបដោយភាព ស្រស់ ស្រឡះ ធម្មជាតិ។

បច្ចុប្បន្ននេះលោកអ្នកអាចអញ្ជើញមកទទួលការប្រឹក្សាព័ត៌មានលម្អិតអំពីគម្រោង ដឹណេតឆឺរ៉ល ដោយផ្ទាល់ជាមួយនឹងអ្នកប្រឹក្សាផ្នែកលក់នៅគ្រប់ការិយាល័យលក់ ដែលមានទីតាំងក្បែរលោកអ្នករៀងរាល់ម៉ោងធ្វើការ។

សម្រាប់ព័ត៌មានបន្ថែម អាចទំនាក់ទំនងមកកាន់៖
⦁ លេខទូរសព្ទ៖ 060 777 998 / 070 777 998 / 095 777 998
⦁ ហ្វេសប៊ុកផេក: https://m.facebook.com/boreygoldenpark/
⦁ តេឡេក្រាម: https://t.me/boreygoldenpark
⦁ អ៊ីនស្ដាក្រាម: https://instagram.com
⦁ ទីតាំងគម្រោងដឹណេតឆឺរ៉ល: http://bit.ly/BoreyGoldenParkTheNatural

ដោយៈគង់ សូរិយា

ព្រៃវែង/កំពង់ចាមៈ សម្តេចតេជោហ៊ុន សែននាយករដ្ឋមន្រ្តីនៃកម្ពុជាបាននិងកំពុងអញ្ជើញជាអធិបតី ក្នុងពិធីសម្ភោធផ្លូវជាតិលេខ១១ ដែលផ្លួវសំខាន់នេះ ចំណាយថវិកាសាងសង់អស់ជិត១០០លានដុល្លារអាមេរិក។

ផ្លូវជាតិលេខ១១ តភ្ជាប់ពីអ្នកលឿង ទៅកាន់ផ្លូវជាតិលេខ៧ ស្ថិតក្នុងស្រុកត្បូងឃ្មុំ ខេត្តត្បូងឃ្មុំ និងផ្លូវក្នុងក្រុងព្រៃវែងជិត១០០គីឡូម៉ែត្រ ចំណា​យថវិកាជិត១០០លានដុល្លារអាមេរិក ត្រូវបានបញ្ចប់ការសាងសង់ជាស្ថាពរ។

ពិធីសម្ពោធដាក់ឱ្យប្រើប្រាស់ផ្លូវជាតិលេខ១១ និងផ្លូវក្នុងក្រុងព្រៃវែងនេះ នឹងប្រព្រឹត្តទៅក្រោមអធិបតីភាព ដ៏ខ្ពង់ខ្ពស់របស់សម្តេចតេជោ ហ៊ុន សែន នាយករដ្ឋមន្ត្រីកម្ពុជា និងលោក វ៉ាង វិនធាន ឯកអគ្គរដ្ឋទូតចិនប្រចាំនៅកម្ពុជា។

លោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូនបានឱ្យដឹងថា គម្រោងសាងសង់ផ្លូវជាតិលេខ១១ និងផ្លូវក្នុងក្រុងព្រៃវែង មានប្រវែងសរុប៩៦.៤៨គីឡូម៉ែត្រ ចាប់ពីអ្នកលឿង (ចំណុចប្រ​ស​ព្វផ្លូវជាតិលេខ១) ស្ថិតនៅភូមិលេខ៤ ឃុំព្រែកខ្សាយ-ខ ស្រុកពាមរក៍ ខេត្តព្រៃវែង ដល់ថ្នល់ទទឹង (ចំណុចប្រសព្វផ្លូវជាតិលេខ៧) ស្ថិតក្នុងភូមិស្លាបក្តោង ឃុំជប់ ស្រុកត្បូងឃ្មុំ ខេត្តត្បូងឃ្មុំ។ ក្នុងប្រវែងខ្សែផ្លូវសរុប ផ្លូវជាតិមានប្រវែង៨៦.៦៨គីឡូម៉ែត្រ ឆ្លងកាត់ទឹកដីខេត្តព្រៃវែង ប្រវែង៦៥គីឡូម៉ែត្រ និងទឹកដីខេត្តត្បូងឃ្មុំ ប្រវែង២១.៦៨គីឡូម៉ែត្រ និងផ្លូវក្នុងក្រុងព្រៃវែងប្រវែង ៩.៨០គីឡូម៉ែត្រ។

លោកទេសរដ្ឋមន្ត្រីបានឱ្យដឹងទៀតថា ផ្លូវជាតិលេខ១១ ជាប្រភេទផ្លូវក្រាលបេតុងកៅស៊ូ AC កម្រាស់៥សង់ទីម៉ែត្រ លើកកម្ពស់ និងពង្រីកទទឹងផ្លូវពី ៩ម៉ែត្រ ទៅ១១ម៉ែត្រ ក្រាលស្រទាប់គ្រឹះទាំងលើ និងក្រោមកម្រាស់ ៦០សង់ទីម៉ែត្រ។ ក្នុងទទឹងតួផ្លូវប្រវែង១១ម៉ែត្រ មាន៧ម៉ែត្រ សម្រាប់រថយន្តចរាចរណ៍ដែល ចែកជា២គន្លង (១ទៅ ១មក) ផ្លូវសម្រាប់ទោចក្រយា​នយន្ត មាន ២គន្លង (១ទៅ ១មក) ដែលគន្លងនីមួយៗមានទទឹង ១.៥០ម៉ែត្រ និងចិញ្ចើមដីក្រហមសងខាងមានទទឹង០,៥០ម៉ែត្រ។

ផ្លូវនេះសាងសង់ ដោយក្រុមហ៊ុនសាជីវកម្មស្ពាន និងថ្នល់ចិន (CRBC) និងត្រួតពិនិត្យបច្ចេកទេសដោយក្រុមហ៊ុន ទីប្រឹក្សាបច្ចេកទេសក្វាងចូវវ៉ានអាន ប្រើប្រាស់រយៈពេលសាងសង់ចំនួន៤៤ខែ ប៉ុន្តែការសាងសង់ជាក់ស្តែងត្រឹមតែ៣០ខែប៉ុណ្ណោះ គិតចាប់ថ្ងៃទី១៩ ខែធ្នូ ឆ្នាំ២០១៧ និងបញ្ចប់នៅថ្ងៃទី១៧ ខែមិថុនា ឆ្នាំ២០២០ លឿនជាងផែនការគ្រោងទុក១៤ខែ។ ផ្លូវនេះចំណាយថវិកាសាងសង់សរុប ៩៨.៣៨៨លានដុល្លារអាមេរិក រួមជាមួយនឹងថវិកាបដិភាគរបស់រាជរដ្ឋាភិបាលសម្រាប់ការងារដោះស្រាយផលប៉ះពាល់ និងយុទ្ធភ័ណ្ឌមិនទាន់ផ្ទុះផងដែរ៕

ដោយ៖ សុផារី

ភ្នំពេញ៖ ក្នុងបរិបទនៃជំងឺកូវីដ១៩នេះ អាជិវកម្មស្ទើរគ្រប់ប្រភេទបានជួបបញ្ហាប្រឈមនានា។ សម្រាប់វិស័យអចលនទ្រព្យនិងសំណង់ ក៏ចៀសមិនផុតឡើយ មិនថាតិចឬច្រើន។ ដូច្នេះដើម្បីរក្សាអាជីវកម្ម ឱ្យនៅតែបន្ដងើបឈរឡើងវិញ ម្ចាស់អាជីវកម្មចាំបាច់ត្រូវតែមានការរៀបចំ ការគ្រប់គ្រង និងការដោះស្រាយបញ្ហាប្រកបដោយស្មារតីរឹងមាំ ដើម្បីកសាងអាជីវកម្មឡើងវិញ។

អ្នកជំនាញអចលនទ្រព្យនិងសំណង់៤ ដែលទទួលបានជោកជ័យក្នុងការគ្រប់គ្រងអាជីវកម្មនៃទីផ្សារអចលនទ្រព្យបានចែករំលែកយុទ្ធសាស្ត្រគ្រប់គ្រងនិងស្តារអាជីវកម្មក្នុងបរិបទកូវីដ-១៩ ក្នុងកិច្ចពិភាក្សាភាគទី១១ ក្នុងក្របខណ្ឌនៃ “កម្មវិធីមគ្គុទេសក៍ស្តារអាជីវកម្មក្នុងបរិបទកូវីដ-១៩” ក្រោមប្រធានបទ “មគ្គុទេសក៍ស្តារអាជីវកម្មពីវិស័យអចលនទ្រព្យ និងសំណង់” ដែលរៀបចមដោយសមាគមសហគ្រិនវ័យក្មេងកម្ពុជា នៅថ្ងៃទី០២ ធ្នូនេះ តាមប្រព័ន្ធអនឡាញ។

លោក ឡាយ គីមស៊ួរ អគ្គនាយកប្រតិបត្តិក្រុមហ៊ុន Sourkear Investment Co., LTD និងអនុប្រធានសមាគមសហគ្រិនវ័យក្មេងកម្ពុជា បានលើកទឹកចិត្តឲ្យអ្នកវិនិយោគទាំងអស់ត្រូវត្រៀមខ្លួនឲ្យល្អក្នុងវិស័យដែលខ្លួនវិនិយោគ។ លោកបានសង្កត់ធ្ងន់លើវិស័យចគឺជាសសរស្តម្ភសំខាន់មួយសម្រាប់ប្រទេសជាតិ។

លោកលើកទឹកចិត្តឲ្យមានការចូលរួមធ្វើការជាមួយគ្នា ជាពិសេស YEAC ដែលជាកន្លែងដែលបណ្តុំទៅដោយអ្នកជំនាញៗ និងអាចជួយក្នុងការដោះស្រាយបញ្ហាជារួមមួយ ហើយ YEAC មានរៀបចំកម្មវិធីជាច្រើនដែលជួយជាគំនិត មធ្យោបាយដល់អ្នកវិនិយោគទាំងឡាយ។

វេជ្ជបណ្ឌិត អៀង សុធារ៉ា ប្រធានសមាគម សមាគមពាណិជ្ជកម្ម និងវិនិយោគកម្ពុជា-ជប៉ុន (Cambodia Japan Business Investment) and និងជាសហស្ថាបនិក Arakawa Residence បានចែករំលែកទាក់ទងទៅនឹងការវិនិយោគផ្ទាល់របស់លោកគឺមិនសូវជាមានការប៉ះពាល់ទេក្នុងកំឡុងកូវីដ-១៩ ដោយសារលោកតែងតែត្រៀមខ្លួនទុកមុន វាមានការប៉ះពាល់ដែរ តែប៉ះពាល់ខាងផ្នែកលក់ ប៉ុន្តែនៅក្នុងការលក់ យើងជាអ្នកវិនិយោគត្រូវដឹងថា ពេលវេលាណាដែលការលក់ធ្លាក់ចុះ ហើយពេលវេលាណាដែលការលក់កើនឡើង។

លោកបានត្រៀមខ្លួនតាមបែបព្រះពុទ្ធសាសនា គឺការត្រៀមថវិការឲ្យគ្រប់គ្រាន់ក្នុងការសាងសង់លក់ កាលណាលោកបញ្ចប់ការសាងសង់ហើយ អញ្ចឹងដំណាក់កាលបន្ទាប់គឺត្រៀមលើការលក់។

លោកបានបន្ថែមទៀតថា កាលណាយើងសាងសង់បណ្តើរ ហើយលក់បណ្តើរ អុីចឹងយើងមិនមានការត្រៀមបានល្អទេ។ តែបើកាលណាយើងមានគម្រោងនិងត្រៀមថវិការសម្រាប់គម្រោងការសាងសង់ ដូច្នេះពេលយើងសាងសង់រួចរាល់ ការងារបន្ទាប់គឺយើងប្រឹងលក់។ លោកតែងតែត្រៀមថវិការដែលរកបាន ៥០%ដើម្បីធ្វើការវិនិយោគឡើងវិញ ២៥%ប្រាក់បញ្ញើមានការកំណត់ (fixed deposit) ហើយ ២៥%ទៀតសម្រាប់ចំណាយកិច្ចការក្រុមហ៊ុន។

លោកវេជ្ជបណ្ឌិតបានឲ្យដំបូន្មានសម្រាប់អ្នកវិនិយោគថ្មី យើងត្រូវមានការបត់បែនទៅតាមកាលៈទេសៈ ទៅតាមគោលការណ៍របស់រដ្ឋាភិបាល ហើយគន្លឹះមួយទៀតយើងត្រូវការមានបីចំណុចនេះថវិការដែលរកបាន៥០%ដើម្បីធ្វើការវិនិយោគឡើងវិញ ២៥%ប្រាក់បញ្ញើមានការកំណត់ (fixed deposit) ហើយ ២៥%ទៀតសម្រាប់ចំណាយកិច្ចការក្រុមហ៊ុន មិនត្រូវអត់ទេ ហើយត្រូវតែមានតុល្យភាពរវាងឪកាសនិងលោភៈ។

ឧកញ៉ាបណ្ឌិត គីម ហ៊ាង ប្រធានក្រុមហ៊ុន KW Cambodia បានថ្លែងថា ជាការពិតស្ថិតក្នុងបរិបទនៃជំងឺកូវីដ១៩នេះ មនុស្សស្ទើរតែគ្រប់គ្នា បានជួបបញ្ហាប្រឈមនានា និយាយចំពោះអាជីវកម្មក៏ជួបបញ្ហាប្រឈមជាច្រើនផងដែរ ដូច្នេះដើម្បីរក្សាអាជីវកម្ម ឲ្យនៅតែបន្ដងើបឈរឡើងវិញ ម្ចាស់អាជីវកម្មចាំបាច់ត្រូវតែមានការចូលរួម ពីដៃគូសហការមានន័យថា ត្រូវរកដៃគូរសហការគ្នា ដើម្បីកសាងអាជីវកម្មឡើងវិញ។ លោកបានបន្ដថា ម្ចាស់អាជីវកម្មនីមួយៗអាចចែររំលែក តាមរយៈការលក់ភាគហ៊ុននៃអាជីវកម្មរបស់ខ្លួន ទៅកាន់ដៃគូណាម្នាក់ ដើម្បីទទួលបានទុនបង្វិលមកបន្ដដង្ហើមនៃអាជីវកម្ម។

លោក​ថា ប្រសិនបើវិនិយោគិនត្រូវវិនិយោគទិញ-លក់ លើវិស័យអចលនទ្រព្យ ដើម្បីវិនិយោគ ត្រូវប្រើប្រាស់ថវិកាដែលខ្លួនមាន ដោយមិនត្រូវខ្ចីលុយពីអ្នកណាម្នាក់ ដើម្បីវិនិយោគនោះទេ ដោយសារតែការខ្ចីប្រាក់មកធ្វើការវិនិយោគ នឹងមិនទទួលបានលុយចំណេញនោះឡើយ ដោយសារតែត្រូវបង់ការប្រាក់សងត្រឡប់ទៅម្ចាស់ដើមវិញ។

លោក លឹម សុជាតិ ប្រធាននាយកប្រតិបត្តិ Laskmi Prime Investment Co.,Ltd ក៏បានឲ្យដឹងថា ដើម្បីស្ដារអាជីវកម្មឲ្យឈរជើងបាន ដាច់ខាតត្រូវតែរក្សាឲ្យបាននូវធនធានមនុស្ស ដរាបណាមានធនធានមនុស្ស អាជីវកម្មនៅតែអាចបន្ដទៅមុខជានិច្ច។ លោកបញ្ជាក់ថា “ជាក់ស្ដែងសម្រាប់ក្រុមហ៊ុនរបស់ខ្ញុំផ្ទាល់ ក៏ទទួលរងផលប៉ះពាល់ដោយសារតែជំងឺកូវីដ១៩ជិត២ឆ្នាំមកនេះ ប៉ុន្ដែកត្តាដែលធ្វើឲ្យក្រុមហ៊ុនអាចឈរជើងបានដូចសព្វថ្ងៃនេះ គឺការរក្សាឲ្យបាននូវធនធានមនុស្សនេះឯង។”

លោក ឌិន សុមេធារិទ្ធិ ប្រធានសមាគមសណ្ឋាគារកម្ពុជា និងជាស្ថាបនិក និងអគ្គនាយកភូមិផ្កាត្រកួន បានលើកឡើងថា ក្រៅអំពីការរក្សាធនធានមនុស្ស ការចែករំលែកគ្នានេះ ដើម្បីរក្សាអាជីវកម្មឲ្យឈរជើងបានយូរ គឺមិនភ្លេចនោះឡើយ ចំពោះការធ្វើកិច្ចការអ្វីមួយមានផែនការច្បាស់លាស់ តើកាលណាមានផែនការច្បាស់លាស់ ឧបសគ្គបែបណាក៏អាចដោះស្រាយចេញបានដែរ។ កត្តាមួយទៀត គឺការចេះគ្រប់គ្រងបំណុល ត្រូវចេះគ្រប់គ្រងបំណុលឲ្យបានល្អ និងចេះប្រើប្រាស់ឲ្យត្រូវតាមកាលៈទេសៈ៕

ដោយៈជេស៊ីកា

ភ្នំពេញៈ ក្រុមហ៊ុនចិនដែលកំពុងស្ថាបនាផ្លូវជាតិលេខ១០ បាននិងកំពុងសាងសង់ស្ពានមួយមានកំពស់រហូតដល់ ៧៥ម៉ែត្រ ដែលជាស្ពានខ្ពស់បំផុតនៅកម្ពុជា កាត់តាមជ្រលងភ្នំនៅតំបន់ថ្មដា ក្នុងខេត្តពោធិសាត់។

យោងតាមរបាយការណ៍របស់ក្រសួងសាធារណៈការ និងដឹកជញ្ជូនបានឲ្យដឹងថាគម្រោងសាងសង់ផ្លូវជាតិលេខ១០ មានប្រវែងសរុបចំនួន ១៩៨,៧១គីឡូម៉ែត្រតភ្ជាប់ពីសំឡូត-វាលវែង-អូរសោមដល់កោះកុង សាងសង់ស្របតាមបទដ្ឋានបច្ចេកទេសកម្រិត៣របស់សាធារណរដ្ឋប្រជាមានិតចិន មានទទឹងតួផ្លូវសរុបចំនួន៩ម៉ែត្រ ជាប្រភេទផ្លូវកៅស៊ូពីរស្រទាប់ (DBST) សាងសង់ស្ពានចំនួន២៣កន្លែង ប្រវែង ១៧២១,៤៦ម៉ែត្រដែលក្នុងនោះ មានស្ពានខ្ពស់ជាងគេមួយ ដែលមានកម្ពស់៧៥ម៉ែត្រ បណ្តោយ៥៣០ម៉ែត្រ និងទទឹង១០ម៉ែត្រ ព្រមទាំងមានបំពាក់ផ្លាកសញ្ញាចរាចរណ៍ គំនូសចរាចរណ៍ បង្គោលគីឡូ​ម៉ែត្រ និងបង្គោលសុវត្ថិភាពផងដែរ។

គម្រោងផ្លូវនេះ ត្រូវបានបើកការដ្ឋានសាងសង់កាលពីថ្ងៃទី០៩ ខែមីនា ឆ្នាំ២០២០ ក្រោមអធិបតីភាពដ៏ខ្ពង់ខ្ពស់សម្តេចនាយករដ្ឋមន្រ្តី ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា។

គម្រោងផ្លូវនេះមានការជ្រើសរើសគន្លងផ្លូវថ្មី ប្រវែងសរុប ៦៥,៨៩គីឡូម៉ែត្រ ដើម្បីធ្វើផ្លូវពង្វាងពីភ្នំក្រវាញ ព្រោះតែមិនចង់វះកាត់ភ្នំក្រវាញជាពីរ នាំឱ្យប៉ះពាល់ដល់បរិស្ថាននិងជម្រកសត្វព្រៃធ្ងន់ធ្ងរ ដែលនេះជាការបង្ហាញឱ្យឃើញ ពីការយកចិត្តទុកដាក់ខ្ពស់របស់រាជរដ្ឋាភិបាលលើការថែរក្សាបរិស្ថាន។

ក្នុងដំណើរចុះពិនិត្យនេះ លោកទេសរដ្ឋមន្ត្រី បានដឹកនាំក្រុមការងារបច្ចេកទេសធ្វើដំណើរយ៉ាងស្វិតស្វាញបំផុត ក្នុងការត្រួសត្រាយតម្រាយផ្លូវជាតិលេខ១០ ពុះពារគ្រប់ឧបសគ្គ ឆ្លងកាត់ជ្រោះជ្រោងជ្រលងដងអូរ កាត់ខ្នងភ្នំក្រវាញដើម្បីពិនិត្យស្ថានភាពទឹកដីភូមិសាស្ត្រសមស្របសម្រាប់ការសាងសង់។

គម្រោងផ្លូវនេះ គ្រោងចំណាយថវិកាសរុប ប្រមាណ១៨៨,៣៨លានដុល្លារសហអាមេរិក ជាហិរញ្ញប្បទាន ពីរដ្ឋាភិបាលនៃសាធារណរដ្ឋប្រជាមានិតចិន រួមជាមួយថវិកាបដិភាគរបស់រាជរដ្ឋាភិបាលកម្ពុជា សម្រាប់ការដោះស្រាយផលប៉ះពាល់ ការបោសសម្អា​តគ្រាប់មីន យុទ្ធភ័ណ្ឌមិនទាន់ផ្ទុះ សាងសង់ដោយក្រុមហ៊ុន សាជីវកម្មស្ពានថ្នល់ចិន(CRBC) ត្រួតពិនិត្យបច្ចេកទេសសាងសង់ ដោយក្រុមហ៊ុនទីប្រឹក្សាបច្ចេកទេសក្វាងចូវ វ៉ានអាន និងគ្រោងចំណាយពេលសាងសង់ចំនួន៤៨ខែ ចាប់ពីខែធ្នូ ឆ្នាំ២០១៩ ដល់ខែធ្នូ ឆ្នាំ២០២៣៕