ដោយៈគង់ សូរិយា

       ភ្នំពេញៈ សម្តេចតេជោហ៊ុន សែននាយករដ្ឋមន្រ្តីនៃកម្ពុជាបានថ្លែងថា បច្ចុប្បន្នកំពុងមានការសិក្សា យ៉ាងយកចិត្តទុកដាក់នូវផ្លូវចេញពីខេត្តសៀម​រាប ឆ្ពោះទៅកាន់ខេត្តបាត់ដំបង។

សម្តេចបានមានប្រសាសន៍បង្ហើបឲ្យដឹងបែបនេះ ក្នុងពិធីអញ្ជើញស ម្ភោ​ធផ្លូវជាតិលេខ១១ នៅក្នុងខេត្តព្រៃវែង នាព្រឹកថ្ងៃទី៦​ធ្នូនេះថា ហេដ្ឋារចនាសម្ព័ន្ឋធំៗចំនួនបី នឹងត្រុវសាងសង់នាពេលខាងមុខនេះ ក្នុងនោះផ្លូវតភ្ជាប់ពីខេត្តសៀមរាប ទៅកាន់ខេត្តបាត់ដំបង កំពុងសិក្សាយ៉ាងយកចិត្តទុកដាក់ ដែលផ្លូវនេះនឹងឆ្លងកាត់ទន្លេសាប និងមានការសាងសង់ស្ពានផងដែរ។

សម្តេចបានបង្ហើបឲ្យដឹងពីគំរោងសាងសង់ ស្ពានឆ្លងកាត់ទន្លេមេគង្គនៅក្នុងខេត្តក្រចេះ និងផ្លូវតភ្ជាប់ជាមួយខេត្តកំពង់ធំផងដែរ។ ជាមួយគ្នានេះ សម្តេចតេជោ ក៏បង្ហើបពីការសាងសង់ស្ពានឆ្លងកាត់ទន្លេសាប ក្នុងក្រុងកំពង់ឆ្នាំង ជាមួយផ្លូវតភ្ជាប់ទៅកាន់ខេត្តកំពង់ធំផងដែរ។

សម្តេចតេជោបានបន្តថា ការសាងសង់ហេដ្ឋារចនាសម្ព័ន្ឋរបស់យើង គឺដើម្បីធ្វើឲ្យប្រជាជនមានផ្លូវគ្រប់គ្រាន់ សម្រាប់ធ្វើដំណើរ ហើយប្រជាជន​មួយចំនួនដូចជាខេត្តពោធិសាត់ បាត់ដំបង បន្ទាយមានជ័យជាដើម មិនចាំបាច់ធ្វើដំណើរបកក្រោយនោះទេ៕

ដោយៈសុខុម

ប៉េកាំង: មហាយក្សចិន មានមហិច្ឆតាធំចង់ប្រែក្លាយទីក្រុងម៉ាកាវ ដែលជាជម្រកកាស៊ីណូធំបំផុតរបស់ពិភពលោក ទៅជាមជ្ឈមណ្ឌលបច្ចេកវិទ្យាថ្នាក់តំបន់។ នេះបើយោងតាមការទម្លាយឱ្យដឹងពីក្រុមមន្ត្រី និងក្រុមនាយកប្រតិបត្តិនៃឧស្សាហកម្មបច្ចេកវិទ្យាចិន។

យោងតាមសារព័ត៌មាន South China Morning Post ចុះផ្សាយកាលពីថ្ងៃសុក្រទី៣ ធ្នូ ឱ្យដឹងថា ស្របពេលក្រុងម៉ាកាវ ដែលធ្លាប់ស្ថិតក្រោមនឹកអាណានិគមរបស់ព័រទុយហ្គាល់ កំពុងប្រឈមការលំបាក ក្នុងការប្រយុទ្ធប្រឆាំងរុសកូវីដ-១៩ និងវិធានការរឹតបន្តឹង លើល្បែងស៊ីសងពីសំណាក់រដ្ឋាភិបាលក្រុងប៉េកាំង មជ្ឈមណ្ឌលសន្និសីទ និងពិព័រណ៍ Venetian Macao Convention and Exhibition Centre នៅក្រុងម៉ាកាវ បានរៀបចំពិព័រណ៍បច្ចេកវិទ្យាដ៏ធំមួយនៅសប្ដាហ៍នេះ ដែលមានការចូលរួមពីក្រុមវិនិយោគិន និងនាយកប្រតិបត្តិ ក្នុងឧស្សាហកម្មបច្ចេកវិទ្យារាប់រយនាក់មកពីចិន ដីគោក។

ព្រឹត្តិការណ៍ពិព័រណ៍បច្ចេកវិទ្យានេះបានធ្វើឡើង ក្នុងគ្រាល្បែងស៊ីសងដែលជាឧស្សា​ហកម្មដ៏សំខាន់របស់ក្រុងម៉ាកាវ កំពុងប្រឈមជោគវាសនាមិនប្រាកដប្រជា ខណៈរដ្ឋាភិបាលក្រុងប៉េកាំង កំពុងបង្ហាញដោយឥតលាក់លៀមថា ខ្លួនមិនសប្បាយចិត្ត ចំពោះតួនាទីនៃកាស៊ីណូក្នុងទីក្រុងម៉ាកាវ។

រដ្ឋាភិបាលក្រុងប៉េកាំងបានធ្វើការចោទប្រកាន់ថា កាស៊ីណូនៅក្នុងទីក្រុងម៉ាកាវ បា​ន​ដើរតួនាទីជាបណ្ដាញបញ្ជូនមូលធនខុសច្បាប់ ដែលធ្វើឱ្យប៉ះពាល់ដល់ស្ថិរភាពហិរញ្ញវត្ថុ និងការគ្រប់គ្រងគណនីមូលធន (Capital Account) របស់ប្រទេសចិន។

ប៉ូលិសចិន នៅទីក្រុងវិនចូវ (Wenzhou) បានចេញសេចក្តីប្រកាសដ៏កម្រ ដើម្បីតាមចាប់ខ្លួនបុរសឈ្មោះ Alvin Chau Cheok-wa ដែលជាប្រធានក្រុមហ៊ុនប្រតិបត្តិករកាស៊ីណូធំបំផុតនៅក្រុងម៉ាកាវ ដោយសារគាត់ជាប់សង្ស័យពាក់ព័ន្ធនឹងការគ្រប់​គ្រងសកម្មភាពល្បែងស៊ីសងឆ្លងដែនខុសច្បាប់ជាលទ្ធផល ប៉ូលិសក្រុងម៉ាកាវ ក៏បានចាប់ខ្លួនគាត់កាលពីសប្តាហ៍មុន៕ South China Morning Post៕

ដោយៈសុផារី

ភ្នំពេញៈ WingMall ពង្រីកសាខាទៅកាន់ខេត្តសំខាន់ៗ ចំនួនបីបន្ថែមទៀត គឺខេត្តកំពង់ចាម ខេត្តបាត់ដំបង និងខេត្តព្រះសីហនុ ក្រោយពីបានបើកបើកដំណើរការសេវាកម្មរបស់ខ្លួនក្នុងខេត្តសៀមរាប កាលពីថ្ងៃទី២៩ ខែកក្កដា ឆ្នាំ២០២១ កន្លងមក។

អ្នកឧកញ៉ាគិត ម៉េង ប្រធានសភាពាណិជ្ជកម្មកម្ពុជា និងជាអគ្គនាយកក្រុមហ៊ុនបា​ន​មានប្រសាសន៍ថា “ ការបើកដំណើរការសេវាកម្មបន្ថែមនេះ នឹងផ្តល់នូវបទពិសោធន៍ទិញទំនិញប្រកបដោយសុវត្ថិភាព និងតម្លៃធូរជាងសម្រាប់ពាណិជ្ជករ ជាមួយនឹងការដឹកជញ្ជូនដោយឥតគិតថ្លៃដល់អតិថិជនច្រើនជាងមុន”។

អ្នកឧកញ៉ាបានអះអាងថា វីងម៉លកំពុងកសាងសេដ្ឋកិច្ចបើកចំហនៅកម្ពុជា តាមរយៈការបង្កើតអត្ថប្រយោជន៍ កាន់តែច្រើនសម្រាប់ពាណិជ្ជករ អតិថិជន និងសហគមន៍ទាំងមូលរបស់យើង។ ជាមួយនឹងសេវាកម្មបន្ថែម ដៃគូរបស់យើងនឹងអាចបង្កើនបរិមាណលក់របស់ពួកគាត់ តាមរយៈការដឹកជញ្ជូនពីផ្ទះ ខណៈពេលដែលអតិថិជនរបស់យើងក៏អាចមានអារម្មណ៍សុវត្ថិភាព ក្នុងការទិញទំនិញដែលពួកគាត់ចូលចិត្ត ពីផ្ទះរបស់ពួកគាត់ ជាពិសេសរួមទាំងមានការដឹកជញ្ជូនដោយឥតគិតថ្លៃផងដែរ។

អ្នកឧកញ៉ាបានមានប្រសាសន៍បន្ថែមថា “អាហារមិនត្រឹមតែសំខាន់ប៉ុណ្ណោះទេ ប៉ុន្តែអាហារគឺជានិមិត្តរូបនៃសេចក្ដីស្រឡាញ់ និងការយកចិត្តទុកដាក់បំផុត។ អាហារមិនត្រឹមតែបំពេញក្រពះរបស់យើងប៉ុណ្ណោះនោះទេ ប៉ុន្តែវាបំពេញបេះដូងរបស់យើងថែមទៀតផងដែរ”។

អ្នកឧកញ៉ាគិត ម៉េងបានបន្តថា “ បេសកកម្មចម្បងរបស់ Wingmall គឺដើម្បីធានាថាក្រពះ និងបេះដូងរបស់អ្នកត្រូវបានទទួលការយកចិត្តទុកដាក់ និងពោរពេញដោយសេចក្តីស្រឡាញ់ដោយមិនមានការរំខាន”៕