ការសិក្សាថ្មីៈផ្សារទំនើបថ្មីៗចំនួន៤នឹងបើកដំណើរការនៅឆ្នាំនេះ ស្របពេលការប្រកួតប្រជែងកើនឡើង

ដោយៈគង់ សូរិយា

ភ្នំពេញៈ ការសិក្សាថ្មីមួយបានរកឃើញថា ទំហំផ្ទៃក្រឡាផ្សារទំនើប កំពុងកើនឡើងនៅក្នុងទីផ្សារ ខណៈផ្សារតូចធំចំនួនបួន នឹងដំណើរការដាក់ចូលទីផ្សារនៅឆ្នាំនេះ។

របាយការណ៍បច្ចុបប្បន្នភាពរបស់ CBRE Cambodiaបានបង្ហាញកាលពីសប្តាហ៍មុនថា បញ្ហាការផ្គត់ផ្គង់ច្រើនហួសតម្រូវការ និងភាពមិនប្រាកដប្រជានៃវិបត្តិកូវីដ បាននិងកំពុងបង្កជាឧបសគ្គ សម្រាប់ទីផ្សារលក់រាយ ឬផ្សារទំនើបសម្រាប់ឆ្នាំ ២០២២។

របាយការណ៍ដដែលបានបង្ហាញថា ឆ្នាំ២០២២នេះ នឹងមានផ្សារទំនើ​បធំៗ យ៉ាងហោច៤កន្លែង បើកដំណើរការ រួមមាន ផ្សារ Chip Mong Sen Sok ផ្សារ Chip Mong 271 ផ្សារ Prince International Plaza និងផ្សារ Lucky Pavilion Mall។

ផ្សារទាំងនេះ នឹងបង្កើតផ្ទៃក្រឡាផ្គត់ផ្គង់ដល់ទៅ១៩០,០០០ ម៉ែត្រការ៉េ នៅឆ្នាំ ២០២២ ដែលនឹងធ្វើឱ្យទីផ្សារកាន់តែប្រកួតប្រជែង។

កត្តានេះនឹងធ្វើឱ្យម្ចាស់អាជីវកម្មផ្សារ ត្រូវតែងាកទៅរកការឌីសាញ ផ្សារ និងសកម្មភាពក្នុងផ្សារឱ្យទាក់ទាញជាងមុន។ លើសពីនេះ និន្នាការបញ្ចុះតម្លៃជួលនឹងនៅតែបន្ដ ជាមួយនឹងកិច្ចសន្យារយៈពេលវែង។

និន្នាការថ្មីមួយទៀតដែលនឹងកើតឡើង គឺតម្រូវការធនធានមនុស្សជំនាញច្រើនជាងមុន ពិសេសលើវិស័យ mini-mart ឬ convenient store និងផ្សារលក់ទំនើបបែបរហ័សជាដើម។

កាលពីឆ្នាំ២០២១ កន្លងមក ផ្សារទំនើបថ្មី១២ឬស្មើនឹង៨៨,000 ម៉ែត្រការ៉េ ត្រូវបានបញ្ចប់ ព្រមនឹងការហូរចូលមកនូវម៉ាកយីហោថ្មីៗ២០ ខណៈដែលអត្រាជួល មានត្រឹមតែ៦៧ភាគរយប៉ុណ្ណោះ នៃផ្ទៃក្រឡាជួលសរុប៕

ប្រធានាធិបតីចិនសន្យាផ្ដល់ជំនួយកន្លះពាន់លានដុល្លារដល់បណ្ដាប្រទេសអាស៊ីកណ្ដាល

ដោយៈសុខុម

ប៉េកាំង: ប្រធានាធិបតីចិន លោកស៊ី ជីនភីង បានសន្យាផ្តល់ជំនួយចំនួន៥០០លានដុល្លារអាមេរិក ដល់បណ្ដាប្រទេសនៅអាស៊ីកណ្តាល ដោយលើកឡើងថា ប្រទេសចិននឹងគាំទ្រពួកគេឱ្យ “ដើរតាមផ្លូវរបស់ខ្លួនឯង” និងជួយការពារអធិបតេយ្យភាពនៃប្រទេសទាំងនោះ។

លោកបានប្រកាសជំនួយនេះកាលពីថ្ងៃអង្គារ ទី២៥ មករា អំឡុងពេលកិច្ចប្រជុំតាម Video Conference ជាមួយមេដឹកនាំនៃបណ្ដាប្រទេសនៅអាស៊ីកណ្ដាល រួមមានកាហ្សាក់ស្ថាន អ៊ូបេគីស្ថាន តួកមេនីស្ថាន កៀ ហ្ស៊ីស៊ីស្ថាន និងតាហ្ស៊ីគីស្ថាន។

លោកបញ្ជាក់ថា ជំនួយទាំងនេះនឹងត្រូវបានផ្តល់ជូន “ក្នុងរយៈពេល៣ឆ្នាំខាងមុខ ដើម្បីប្រើប្រាស់លើគម្រោងនានា ដែលទាក់ទងនឹងការធ្វើឱ្យប្រសើរឡើងនូវជីវភាពរស់នៅរបស់ប្រជាជន”។

ប្រធានាធិបតីចិន រូបនេះបានអំពាវនាវ ឱ្យមានការទំនាក់ទំនងជាលក្ខណៈយុទ្ធសាស្ត្របន្ថែមទៀត ដើម្បីកសាងទំនុកចិត្ត និងឯកភាពក្នុងតំបន់ ហើយបន្តជំរុញ “វិបុលភាពទៅវិញទៅមក” និងការអភិវឌ្ឍ។

ទន្ទឹមនេះ លោកក៏បានវាយបកមិនសំចៃមាត់ផងដែរ ទៅនឹងការជ្រៀតជ្រែកពីប្រទេសផ្សេង ហើយលោកបានប្រកាសជំហរយ៉ាងម៉ឺងម៉ាត់ថា រដ្ឋាភិបាលក្រុងប៉េកាំង “ប្រឆាំងដាច់ខាត ចំពោះការប្រើប្រាស់បញ្ហាសិទ្ធិមនុស្សធ្វើជាលេស ដើម្បីធ្វើអន្តរាគមន៍ក្នុងនយោបាយក្នុងស្រុក”។

លោកបានលើកឡើងថា ប្រទេសទាំង៦ (ចិន និងប្រទេសទាំង៥នៅអាស៊ីកណ្ដាល) តែងតែជួយគ្នាទៅវិញទៅមក ដើម្បីធានាបាននូវសន្តិភាព និងស្ថិរភាពក្នុងតំបន់។

កិច្ចប្រជុំនេះ រៀបចំឡើងដើម្បីអបអរខួបឆ្នាំទី៣០ នៃទំនាក់ទំនងការទូតរវាងប្រទេសចិន និងប្រទេសទាំង៥ នៅអាស៊ីកណ្ដាល ចាប់តាំងពីប្រទេសទាំងនោះ ទទួលបានឯករាជ្យពីសហភាពសូវៀត៕ South China Morning Post៕

ផ្លូវថ្មីមួយខ្សែនឹងត្រូវសាងសង់តភ្ជាប់ពីផ្លូវជាតិលេខ៤មកកាន់ភ្នំបូកគោ

ដោយៈជេស៊ីកា

ព្រះសីហនុៈ រាជរដ្ឋភិបាលកម្ពុជា នឹងសាងសង់ផ្លូវមួយខ្សែតភ្ជាប់ផ្លូវជាតិលេខ៤ ដើម្បីឡើងទៅកាន់លើភ្នំបូកគោ ដែលមានប្រវែងប្រមាណ២៧គីឡូម៉ែត្រ។

អ្នកឧកញ៉ាម៉ុង ឬទ្ធី បានមានប្រសាសន៍ឱ្យដឹងថា ផ្លូវមួយខ្សែនេះមានប្រវែង ២៧គីឡូម៉ែត្រ តភ្ជាប់ពីផ្លូវជាតិលេខ៤ ត្រង់គីឡូម៉ែត្រលេខ១៥៨-២០០ ឆ្ពោះត្រង់ទៅភ្នំបូកគោតែម្តង។

ផ្លូវមួយខ្សែនេះ កាត់ចំការដូងប្រេងរបស់លោក មួយចំនួនធំហើយលោកក៏បានធ្វើសម្បទានផងដែរ។ ដោយឡែកថវិកាសាងសង់រ៉ាប់រងដោយអ្នកឧកញ៉ា សុខ គង់ ដែលជាអ្នកកំពុងអភិវឌ្ឍន៍នៅលើភ្នំបូកគោនោះ។

កិច្ចពិភាក្សាលើការសាងសង់ផ្លូវ និងសម្របសម្រួលលើផលប៉ះពាល់ត្រូវបានធ្វើឡើងនៅថ្ងៃទី២៥ ខែមករានេះ ក្រោមអធិបតីភាពលោកឧបនា​យករដ្ឋមន្ត្រីជា សុផារា រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់៕

រដ្ឋាភិបាលកំពុងសិក្សាលទ្ធភាពជម្រុញការដឹកជញ្ជូនតាមផ្លូវទឹក

ដោយៈគង់ សូរិយា

ភ្នំពេញ: មន្រ្តីជាន់ខ្ពស់រដ្ឋាភិបាលបានថ្លែងពីផែនការរៀបចំប្រព័ន្ឋដឹកជញ្ជូនតាមផ្លូវទឹក ដើម្បីកាត់បន្ថយចំណាយលើការដឹកជញ្ជូន និងភស្តុភារកម្ម។

លោកទេសរដ្ឋមន្ត្រីស៊ុន ចាន់ថុល រដ្ឋមន្រ្តីក្រសួងសាធារណៈការ និងដឹកជញ្ជូន បានលើកឡើងបែបនេះ ក្នុងជំនួបជាមួយលោកស្រី Minnie Chey នាយិកាមូលនិធិសហប្រតិបត្តិការសេដ្ឋកិច្ចកូរ៉េ (EDCF) ថ្មីប្រចាំកម្ពុជាកាលពីល្ងាចថ្ងៃទី២៥មករាកន្លងមកនេះ។

លោកបានស្នើឱ្យប្រធាន EDCF ពិនិត្យលទ្ធភាពលើការអភិវឌ្ឍប្រព័ន្ធដឹកជញ្ជូនតាមផ្លូវទឹក ជាពិសេសការប្រើប្រាស់បណ្ដាញផ្លូវទឹក របស់កម្ពុជា រួមមាន៖ ទន្លេបាសាក់ ទន្លេមេគង្គក្រោម និងទន្លេមេគង្គលើ ដែលជាប្រភពសក្កានុពលសំបូរបែបសម្រាប់វិស័យដឹកជញ្ជូន។

លោករដ្ឋមន្ត្រីបានបន្ត ថ្លែងអំណរគុណដល់រដ្ឋាភិបាល សាធារណរដ្ឋកូរ៉េ ដែលបានជួយជ្រោមជ្រែង ដល់ការកសាងហេដ្ឋារចនាសម្ព័ន្ធនៅកម្ពុជា រួមមាន៖ គម្រោងធ្វើឱ្យប្រសើរឡើងផ្លូវជាតិលេខ២ ផ្លូវជាតិលេខ២២ និងគម្រោងធ្វើឱ្យប្រសើរឡើងផ្លូវជាតិលេខ៤៨ ដែលបានបើកការដ្ឋានសាងសង់នាពេលកន្លង ទៅថ្មីៗនេះ និងបណ្តាញហេដ្ឋារចនាសម្ព័ន្ធជាច្រើនទៀតនៅកម្ពុជា។

ជាមួយគ្នានេះ លោកស្រី Minnie Chey ក៏បានបង្ហាញនូវការតាំងចិត្ត និងកិច្ចសហប្រតិបត្តិការជិតស្និទ្ធ ជាមួយក្រសួងសាធារណការ និងដឹកជញ្ជូន ដើម្បីបន្តចូលរួមអភិវឌ្ឍ ហេដ្ឋារចនាសម្ព័ន្ធនៅកម្ពុជា ឱ្យកាន់តែមានការរីកចម្រើនបន្ថែមទៀត៕

ស្ពានយោងដោយខ្សែកាបដំបូងគេនៅរាជធានីភ្នំពេញសម្រេចបានជិត ៧៤ភាគរយហើយ

ដោយៈសុខហេង

ភ្នំពេញៈ ស្ពានយោងដោយខ្សែកាបដំបូងគេ នៅរាជធានីភ្នំពេញ ដែលសាងសង់ដោយក្រុមហ៊ុន OCIC សាងសង់សម្រេចបានជិត ៧៤ភាគរយហើយ។

គិតត្រឹមថ្ងៃទី២៥ ខែមករា ឆ្នាំ២០២២នេះ ការដ្ឋានសាងសង់ស្ពានបេតុងអារមេខ្សែកាបឫស្សីកែវ ឆ្លងកាត់ទន្លេសាប សម្រេចលទ្ឋផលបាន ៦៣.៧%។ តាមផែនការ គម្រោងសាងសង់ នឹងបញ្ចប់នៅខែមីនាឆ្នាំ២០២៣នាពេលខាងមុខ។

គម្រោងស្ពាននេះ មានរចនាបទទំនើប ដែលមានសរសរធំចំនួន៤បង្គោល មានកំពស់រហូតដល់៤០ម៉ែត្រ សម្រាប់ព្យួរខ្សែកាប។

លោកទូច សំណាង អគ្គនាយករងក្រុមហ៊ុន OCIC បានមានប្រសាសន៍ឲ្យដឹងកាលពីកាលពីពេលកន្លងមកថា ស្ពាននេះមានប្រវែងប្រមាណ៥០០ម៉ែត្រ និងវិនិយោគទឹកប្រាក់ប្រមាណ៣០លានដុល្លារអាមេរិក ដែលបានមកពីការជួលដីពីរដ្ឋបាលរាជធានីភ្នំពេញ។

លោកបន្តថា “វាជាស្ពានធំដែលមានខ្សែកាបនៅចំកណ្តាល និងមានគន្លងរថយន្តពីរទៅពីរមក ហើយវានឹងជួយសម្រួល ដល់ការកកស្ទះចរាច​រណ៍នៅតំបន់នេះមួយកម្រិតទៀត”៕

រដ្ឋបាលខេត្តបាត់ដំបង បើកការដ្ឋានជួលជុលផ្លូវ៦ខ្សែសម្រួលដល់ការធ្វើដំណើរនិងទាក់ទាញការវិនិយោគ

ដោយៈ ម៉ាលីស

បាត់ដំបងៈ ដើម្បីសម្រួលដល់ការធ្វើដំណើររបស់ប្រជាពលរដ្ឋក្នុងខេត្ត ក៏ដូចជា ទាក់ទាញភ្ញៀវទេសចរនិងការវិនិយោគ រដ្ឋបាលខេត្តបាត់ដំបងបានបើកការដ្ឋានជួលជុល ស្ដារនិងលើកកម្ពស់ផ្លូវ៦ខ្សែ ក្នុងក្រុងបាត់ដំបងឡើងវិញ។

នៅក្នុងពិធីបើកការដ្ឋានកាលពីព្រឹកថ្ងៃទី២៥ មករា ២០២២នេះ លោកសុខ លូ អភិបាលខេត្តបាត់ដំបង បានមានប្រសាសន៍ណែនាំដល់រដ្ឋបាលក្រុង និងសង្កាត់រៀបចំសណ្ដាប់ធ្នាប់ អនាម័យបរិស្ថានឱ្យបានហើយស្រេច ទាំងចំណីផ្លូវសំណង់ អនាធិបតេយ្យ និងការលក់ដូរគ្មានរបៀបរៀបរយនៅតាមសាធារណៈ ព្រោះបើមិនធ្វើការ រៀបចំពីឥឡូវទេ ថ្ងៃទៅមុខនឹងធ្វើឱ្យ សណ្ដាប់ធ្នាប់ក្នុងក្រុងកាន់តែគ្មានរបៀបរៀបរយ ហើយពេលដែលមានគម្រោងចង់ពង្រីកផ្លូវ បង្កការលំបាកក្រុមការងារក្នុងការដោះស្រាយ។

លោកបានអំពាវនាវដល់ប្រជាពលរដ្ឋ ត្រូវចេះរៀបចំសំរាម កាកសំ​ណល់ផ្សេងៗឱ្យ មានរបៀប និងចូលរួមថែរក្សាផ្លូវថ្នល់ទាំងអស់ ដើម្បីយើងអាចប្រើប្រាស់ផ្លូវថ្នល់បាន យូរអង្វែង និងដើម្បីសោភណភាព ក្នុងក្រុងបាត់ដំបង ឱ្យស័ក្តិសម នឹងក្រុងដែលទើបទទួល ពានរង្វាន់ទីក្រុងទេសចរណ៍ស្អាតអាស៊ាន។

ចំពោះដំណើរការជួសជុលផ្លូវក្នុងក្រុងនេះ រួមមានទី១ ការងារជួសជុលផ្លូវក្រាល កៅស៊ូ ប្រភេទ DBST ផ្លូវលេខ ៥២៦ ចាប់ពីផ្លូវជាតិលេខ៥ ដល់ផ្លូវលេខ៥១៥ (ផ្លូវទៅវត្តពោធិ៍ ពីមុខស្នាក់ការ ស.ស.យ.ក ខេត្ត) ដែលមានប្រវែង១១៦៥ម៉ែត្រ គុណ១០ម៉ែត្រស្ថិតក្នុង សង្កាត់ចំការសំរោង ក្រុងបាត់ដំបង។

ទី២ ការងារជួសជុលផ្លូវក្រាលកៅស៊ូប្រភេទ DBST ផ្លូវលេខ ៦១៤ ចាប់ពីផ្លូវជាតិលេខ៥ ដល់ផ្លូវលេខ ១៥៣ (ផ្លូវមុខស្នងការនគរបាលខេត្ត ពីស្តុប រំចេក ដល់ផ្លូវមាត់ស្ទឹង) ដែលមានប្រវែង១៥២០ម៉ែត្រ គុណ៨ម៉ែត្រ ស្ថិតក្នុងសង្កាត់រតនៈ ក្រុងបាត់ដំបង។

ទី៣ ការងារជួសជុលផ្លូវក្រាលកៅស៊ូប្រភេទ DBST ផ្លូវលេខ ៥៣០ ចាប់ពី ផ្លូវជាតិលេខ៥ (ខាងជើងព្រះនរាយណ៍) ដល់ផ្លូវលេខ៥១៥ ដែលមានប្រវែង១១៦៥ម៉ែត្រ គុណ៨ម៉ែត្រ ស្ថិតក្នុងសង្កាត់ចំការសំរោង ក្រុងបាត់ដំបង។

ទី៤. ការងារជួសជុលផ្លូវក្រាល កៅស៊ូប្រភេទ DBST ផ្លូវលេខ ៧១៦ ចាប់ពីផ្លូវជាតិលេខ៥ ដល់ផ្លូវលេខ៧០០ (មុខយោធភូមិ ភាគទី៥ ផ្លូវចំការដូង) ដែលមានទំហំ១០៥០ម៉ែត្រ គុណ៨ម៉ែត្រ ស្ថិតក្នុងសង្កាត់ព្រែក ព្រះស្តេច ក្រុងបាត់ដំបង។

ទី៥ ការងារជួសជុលផ្លូវក្រាលកៅស៊ូប្រភេទ DBST ផ្លូវលេខ ១៣៩ ពីផ្លូវលេខ៣ ដល់ផ្លូវលេខ១០៦ (ផ្លូវក្រោយបុរី កាណាឌីយ៉ា) ដែលមានប្រវែង៥០៥ ម៉ែត្រគុណ៦ម៉ែត្រ ស្ថិតនៅក្នុងសង្កាត់ស្វាយប៉ោ ក្រុងបាត់ដំបង។

ទី៦. ការងារជួសជុល ផ្លូវក្រាលកៅស៊ូប្រភេទ DBST ផ្លូវលេខ ១១១ ពីផ្លូវលេខ ៥២៤ ដល់ផ្លូវលេខ១១៥ (ផ្លូវខាង ជើងអតីតសណ្ឋាគារ ហូលីដេ) ដែលមានប្រវែង២៥០ម៉ែត្រ គុណ៦ម៉ែត្រ ស្ថិតនៅក្នុងសង្កាត់ស្វាយប៉ោ ក្រុងបាត់ដំបង៕

រដ្ឋាភិបាលឡាវសម្រុកបង្កើតតំបន់សេដ្ឋកិច្ចពិសេស ឬ SEZsដើម្បីជំរុញសេដ្ឋកិច្ច

ដោយៈសុខុម

វៀងចន្ទន៍: នៅរយៈពេលប៉ុន្មានឆ្នាំចុងក្រោយនេះ ប្រទេសឡាវបានសម្រុកបង្កើតតំបន់សេដ្ឋកិច្ចពិសេស (SEZs) កាន់តែច្រើនឡើងៗ ដែលមិនត្រឹមតែដើម្បីជំរុញកំណើនសេដ្ឋកិច្ចប៉ុណ្ណោះទេ ប៉ុន្តែគឺដើម្បីបណ្ដុះកម្មករជំនាញផងដែរ។

តួយ៉ាងការិយាល័យលើកកម្ពស់ និងគ្រប់គ្រងតំបន់សេដ្ឋកិច្ចពិសេស (SEZ Promotion and Management Office) នៃប្រទេសនេះនិយាយថា ខ្លួនមានគម្រោងបណ្ដុះបណ្ដាលពលរដ្ឋឡាវ រាប់ម៉ឺននាក់ឱ្យក្លាយជាកម្មករជំនាញ ដើម្បីឱ្យពួកគេទទួលបានឱកាសការងារ នៅតាមតំបន់សេដ្ឋកិច្ចពិសេសទូទាំងប្រទេស។ នេះបើយោងតាមសារព័ត៌មាន Laotian Times ចុះផ្សាយនៅថ្ងៃអង្គារ ទី២៥ មករា នេះ។

រដ្ឋាភិបាលឡាវ បានកំណត់រួចហើយថា គម្រោងវិនិយោគខ្នាតធំមួយចំនួន នឹងទទួលបានអត្ថប្រយោជន៍ ពីរំហូរកម្មករជំនាញ រួមមាន ទាំងគម្រោងទីក្រុងឆ្លាតវៃ Amata Smart & Eco City នៅខេត្តហ្លួង ណាមថា (Luang Namtha) និងខេត្តឧត្ដមសាយ (Oudomxay) គម្រោងអាកាសយានដ្ឋានអន្តរជាតិថ្មីក្នុងខេត្តស្រះកែវ (Bokeo) គម្រោងសាងសង់ពុទ្ធបដិមារដ៏ធំនៅ That Luang Marsh គម្រោងអភិវឌ្ឍន៍ហេដ្ឋារចនាសម្ព័ន្ធនៅតំបន់ត្រីកោណមាស និងគម្រោងជាច្រើនទៀតផងដែរ។

លោក Sonepasert Dalavong អគ្គនាយកស្តីទីនៃការិយាល័យលើកកម្ពស់ និងគ្រប់គ្រងតំបន់សេដ្ឋកិច្ចពិសេស បានលើកឡើងថា ទោះបី​ជាចំនួនយុវជនគ្របដណ្ដប់៦០% នៃចំនួនប្រជាជនសរុបក្ដី ក៏ការអភិវឌ្ឍជំនាញការងារក្នុងស្រុក មិនទាន់គ្រប់គ្រាន់ សម្រាប់តម្រូវការការងារនៅក្នុងតំបន់សេដ្ឋកិច្ចពិសេស (SEZs) នីមួយៗនៅឡើយទេ។

លោកបញ្ជាក់ថា ក្រុមហ៊ុនរហូតដល់ទៅ១.០៧៥ក្រុមហ៊ុន បានបោះទុនវិនិយោគ នៅតាមតំបន់សេដ្ឋកិច្ចពិសេសនានា ទូទាំងប្រទេសឡាវ ដោយការវិនិយោគ បានពីប្រទេសចិន ជប៉ុន ដាណឺម៉ាក បារាំង និងប្រទេសថៃ ដែលបង្កើតការងារបានចំនួន៥២.៣១៩កន្លែង ប៉ុន្តែក្នុងនោះមានតែ២៣.១៥៨នាក់ប៉ុណ្ណោះដែលជាកម្មករឡាវ។

រដ្ឋាភិបាលឡាវ បានប្ដេជ្ញាថា ខ្លួននឹងព្យាយាមទាក់ទាញ ក្រុមហ៊ុនឱ្យបានជាង៧០០ក្រុមហ៊ុនទៀត ឱ្យបោះទុនវិនិយោគនៅតាមតំបន់សេដ្ឋកិច្ចពិសេសក្នុងរយៈពេល៥ឆ្នាំខាងមុខ ហើយថាក្រុមហ៊ុនទាំងនោះ នឹងបង្កើតការងារ បានជាង១៣០.០០០កន្លែង បន្ថែមទៀតសម្រាប់ពលរដ្ឋឡាវ៕  Laotian Times៕

មេដឹកនាំម៉ាឡេស៊ីគាំទ្រសម្តេចតេជោក្នុងការដោះស្រាយបញ្ហាមីយ៉ាន់ម៉ា និងចាត់ទុកកម្ពុជាជាដៃគូសំខាន់

ដោយៈគង់ សូរិយា

ភ្នំពេញៈ លោក អ៉ីស្មាអែល សាប្រ៊ី ប៊ីន យ៉ាកុប នាយករដ្ឋមន្ត្រីម៉ាឡេស៊ីបានបង្ហាញការគាំទ្រ ចំពោះសម្តេចតេជោនាយករដ្ឋមន្រ្តីនៃកម្ពុជា ដែលបានប្រងប្រែងក្នុងការដោះស្រាយបញ្ហាមីយ៉ាន់ម៉ា និងចាត់ទុកកម្ពុជាជាដៃគូសំខាន់របស់ម៉ាឡេស៊ី។

ជាមួយគ្នានឹងជំនួបតាមប្រព័ន្ឋវីដេអូ សម្តេចតេជោបានអញ្ជើញនាយ​ករដ្ឋមន្រ្តីម៉ាឡេស៊ី ​​មកបំពេញទស្សនកិច្ចនៅកម្ពុជា មុនកិច្ចប្រជុំកំពូលអាស៊ាន ដើម្បីពង្រឹងចំណងទំនាក់ទំនងរវាងកម្ពុជា និងម៉ាឡេស៊ី ក៏ដូចជាពិភា​ក្សាលើបញ្ហាផ្សេងៗ។

ការអញ្ជើញរបស់សម្តេចតេជោ ហ៊ុន សែន បានធ្វើឡើងក្នុងពេលស ម្តេចជួបពិភាក្សា ការងារជាមួយលោកនាយករដ្ឋមន្ត្រីម៉ាឡេស៊ី តាមប្រព័ន្ធវីដេអូនៅព្រឹកថ្ងៃទី២៥ ខែមករា ឆ្នាំ២០២២នេះ។

ជាការឆ្លើយតប លោកនាយករដ្ឋមន្ត្រីម៉ាឡេស៊ី បានថ្លែងអំណរគុណសម្តេចតេជោនាយករដ្ឋមន្រ្តី ចំពោះការអញ្ជើញមកទស្សនកិច្ចនៅកម្ពុជា ហើយលោករំពឹងថា នឹងអញ្ចើញមកបំពេញទស្សនកិច្ចនៅកម្ពុជា នាពេលខាងមុខនេះ ហើយអាចពិភាក្សា ដោយផ្ទាល់អំពីទំនាក់ទំនងទ្វេភាគីផង រួមទាំងអាចពិភាក្សាអំពីស្ថានភាពនៅមីយ៉ាន់ម៉ា។ បើនេះបើយោងតាមការបញ្ជាក់របស់លោកបណ្ឌិត កៅ គឹមហួន រដ្ឋមន្ត្រីប្រតិភូអមនាយករដ្ឋមន្ត្រី។

លោកនាយករដ្ឋមន្រ្តីម៉ាឡេស៊ី បានបន្ថែម នៅចុងឆ្នាំនេះបើមិនមានការរំខាន់ពីការរាតត្បាតជំងឺកូវីដ១៩ទេ លោកនឹងអញ្ជើញចូលរួមកិច្ចប្រជុំកំពូលអាស៊ាន និងកិច្ចប្រជុំពាក់ព័ន្ធនៅកម្ពុជា។

លោកបណ្ឌិត កៅ គឹមហួន រដ្ឋមន្ត្រីប្រតិភូអមនាយករដ្ឋមន្ត្រី នៅក្នុងជំនួបព្រឹកមិញនេះ ក្រៅតែពីជជែកលើបញ្ហារបស់មីយ៉ាន់ម៉ា សម្តេចតេជោ ហ៊ុន សែន និងលោក អ៉ីស្មាអែល សាប្រ៊ី ប៊ីន យ៉ាកុប បានពិភាក្សាពាក់ព័ន្ធនឹងការពង្រឹងទំនាក់ទំនង ស្របពេលដែលឆ្នាំ២០២២នេះ ជាខួប៥៥ឆ្នាំនៃការបង្កើតទំនាក់ទំនងរវាងប្រទេសទាំងពីរ។

លោក អ៉ីស្មាអែល សាប្រ៊ី ប៊ីន យ៉ាកុប បានគូសបញ្ជាក់ថា ប្រទេសកម្ពុជា គឺជាដៃគូដ៏សំខាន់របស់ប្រទេសម៉ាឡេស៊ី។

ក្នុងជំនួបនេះសម្តេចតេជោនាយករដ្ឋមន្ត្រី និងលោកនាយករដ្ឋមន្ត្រីម៉ាឡេស៊ី ក៏បានបង្ហាញភាពរីករាយ ចំពោះភាពប្រសើរឡើង នៃការធ្វើពាណិជ្ជកម្មរវាងកម្ពុជា និងម៉ាឡេស៊ី បើទោះបីជួបស្ថានភាពលំបាកនៃជំងឺកូវីដ១៩។

លោកបណ្ឌិត កៅ គឹមហួន បានដកស្រង់ប្រសាសន៍សម្តេចតេជោមកបញ្ជាក់ថា “ប្រទេសយើងទាំងពីរ នៅតែខិតខំជំរុញកិច្ចសហប្រតិបត្តិការលើពាណិជ្ជកម្មប្រទេសទាំងពីរផងដែរ។ កម្ពុជា ជាប្រទេសតូចមែន តែលទ្ធភាព នៃការស្រូបទិញទំនិញពីប្រទេសម៉ាឡេស៊ីបានចំនួនច្រើនផងដែរ។

ក្នុងជំនួបនេះ សម្តេចតេជោហ៊ុន សែនក៏បានស្នើឱ្យមានការជំរុញកិច្ចសហប្រតិបត្តិការលើគ្រប់វិស័យរវាងកម្ពុជា និងម៉ាឡេស៊ី៕

 

អនាគតនឹងមានរថយន្តហោះកាន់តែច្រើន ខណៈប្រទេសស្លូវ៉ាគីអនុម័តឲ្យប្រើប្រាស់យានយន្តបែបនេះជាផ្លូវការ

ដោយៈសុខុម

អន្តរជាតិ: ក្នុងពេលអនាគតដ៏ខ្លីខាងមុខ អាចនឹងមានរថយន្តហោះពេញមេឃ ក្រោយរថយន្តហោះបាន (Flying Car) មួយគ្រឿងដែលមានសមត្ថភាពហោះហើរ ក្នុងល្បឿនរហូតដល់ទៅ១៦០គីឡូម៉ែត្រ ក្នុងមួយម៉ោង និងរយៈកម្ពស់លើស២.៥០០ម៉ែត្រពីដី ទទួលបានវិញ្ញាបនបត្រទទួលស្គាល់ជាផ្លូវការពីអាជ្ញាធរដឹកជញ្ជូនស្លូវ៉ាគី (Slovak Transport Authority)។

យោងតាមសារព័ត៌មាន BBC ចុះផ្សាយនៅថ្ងៃអង្គារ ទី២៥ មករា នេះឱ្យដឹងថា រថយន្តដែលអាចហោះបានមានឈ្មោះថា AirCar ខាងលើនេះត្រូវបានបំពាក់ដោយម៉ាស៊ីន BMW និងដំណើរការដោយសាំងចាក់ម៉ូតូ រថយន្តទូទៅធម្មតា។

ក្រុមហ៊ុនដែលបានបង្កើតសមិទ្ធផល ដ៏អស្ចារ្យនេះនិយាយថា រថយន្តនេះត្រូវការពេលរត់២នាទី និង១៥វិនាទី ដើម្បីអាចប្រែកាយពីរថយន្តទៅជាយន្តហោះ។

ក្រុមហ៊ុនបញ្ជាក់ថា ទម្រាំតែទទួលបានវិញ្ញាបនបត្រទទួលស្គាល់ជាផ្លូវការ រថយន្តនេះបានឆ្លងកាត់ការធ្វើតេស្តហោះហើរ សាកល្បងអស់រយៈពេល៧០ម៉ោង ព្រមទាំងហោះឡើង និងចុះចតជាង២០០ដង។

លោកសាស្រ្តាចារ្យ Stefan Klein ដែលជាអ្នកបង្កើតរថយន្តដែលអាចហោះបាននេះលើកឡើងថា “វិញ្ញាបនបត្រទទួលស្គាល់ជាផ្លូវការសម្រា​ប់ AirCar គឺជាការបើកឱកាសសម្រាប់ការផលិតរថយន្ត ដែលអាចហោះបានទ្រង់ទ្រាយធំ”។

លោក Stefan Klein ប្រសូតនៅថ្ងៃទី៥ តុលា ឆ្នាំ១៩៦៥ ហើយលោកគឺជាអ្នកជំនាញខាងរូបវិទ្យា ជាអ្នកនិពន្ធ និងជាសាស្ត្រាចារ្យនៅសក​លវិទ្យាល័យ Berlin University of the Arts ក្នុងទីក្រុងបែរឡាំង ប្រទេសអាល្លឺម៉ង់៕  BBC៕

រដ្ឋាភិបាលអនុម័តគំរោងបង្កើតរោងចក្រផលិតកង់រថយន្តជាមួយទំហំទុនវិនិយោគជិត៣០០លានដុល្លារ

ដោយៈគង់ សូរិយា

ព្រះសីហនុៈ រដ្ឋាភិបាលតាមរយៈក្រុមប្តឹក្សាអភិវឌ្ឍន៍កម្ពុជា (CDC) ទើបតែអនុម័តគម្រោងវិនិយោគថ្មីៗ ចំនួន២ទៀត សរុបទុនវិនិយោគប្រមា​ណ៣០៣លានដុល្លារ និងអាចបង្កើតការងារបានជាច្រើនរយកន្លែង។

គណកម្មការវិនិយោគនៃCDC បានបញ្ជាក់ថា តាមសំណើសុំវិនិយោគ លើគម្រោង បង្កើតរោងចក្រផលិតសំបកកង់ យានយន្តគ្រប់ប្រភេទ របស់ក្រុមហ៊ុន General Intelligence (Cambodia) Co., Ltd. គណៈកម្មាធិការតំបន់សេដ្ឋកិច្ចពិសេសកម្ពុជា CDC បានសម្រេចចេញវិញ្ញាបនបត្រ ចុះបញ្ជីជាគម្រោងវិនិយោគ ដែលមានទីតាំងវិនិយោគ ស្ថិតនៅក្នុងតំបន់សេដ្ឋកិច្ចពិសេសក្រុងព្រះសីហនុ ខេត្តព្រះសីហនុ មានទុនវិនិយោគប្រ​មាណ២៩៧លានដុល្លារអាមេរិក និងបង្កើតការងារ បានចំនួនប្រមាណ១,៦០០កន្លែង។

ជាមួយគ្នានេះ CDC ក៏បានសម្រេចចេញវិញ្ញាបនបត្រ ចុះបញ្ជីគម្រោ​ងវិនិយោគ លើគម្រោងវិនិយោគបង្កើត រោងចក្រកែច្នៃវេចខ្ចប់កសិផល (ផ្លែចេក) និងកសិដ្ឋានដំណាំចេក របស់ក្រុមហ៊ុន SING HE YI AGRICULTURE CO., LTD ដែលមានទីតាំងវិនិយោគ ស្ថិតនៅភូមិត្រណាយ ឃុំញ៉ាង ស្រុកអណ្តូងមាស ខេត្តរតនគិរី មានទុនវិនិយោគចំនួន៦លានដុល្លារអាមេរិក និងអាចបង្កើតការងារ បានចំនួន៤៥២កន្លែង៕