ទីផ្សារបុរីសម្រាប់អ្នកមានជីវភាពមធ្យមឡើងនឹងកើនឡើងនៅរយៈពេលបីឆ្នាំខាងមុខ

ដោយៈជេស៊ីកា

ភ្នំពេញៈ ស្របពេលលំនៅដ្ឋានតម្លៃសមរម្យ និងក្រោមមធ្យមមានការកើនឡើងលើផ្នែកតម្រូវការ អ្នកជំនាញបានបង្ហាញសុទិដ្ឋិនិយមថា ទីផ្សារលំនៅដ្ឋានតម្លៃមធ្យមឡើង នឹងមានភាពល្អប្រសើរឡើងវិញ នៅក្នុងរយៈពេលបីឆ្នាំខាងមុខ។

អ្នកស្រីអាន សុធីតាអគ្គនាយិកាក្រុមហ៊ុន PropNex Cambodia បានមានប្រសាសន៍ឲ្យដឹងតាមទូរស័ព្ទ កាលពីរសៀលថ្ងៃទី១៥ ធ្នូថា នៅក្នុងអំឡុងវិបត្តិកូវីដ១៩ ទីផ្សារលំនៅដ្ឋានប្រណីត ដែលមានតម្លៃខ្ពស់ៗ និងទីផ្សារលំនៅដ្ឋានតម្លៃមធ្យមឡើង បានរងផលប៉ះពាល់ ប៉ុន្តែលំនៅដ្ឋានតម្លៃមធ្យមចុះបានកើនឡើងនូវតម្រូវការ។

អ្នកស្រីបន្តថា “នៅក្នុងរយៈពេលបីឆ្នាំខាងមុខ ទីផ្សារលំនៅដ្ឋានតម្លៃខ្ពស់ និងមធ្យមឡើង នឹងមានតម្រូវការលឿនមកវិញ ដោយសារកំនើនប្រាក់​ចំណូលរបស់ប្រជាពលរដ្ឋ និងការគាំទ្ររបស់រដ្ឋាភិបាល ដើម្បីទប់កុំឲ្យអ្នក​មានប្រាក់ចំណូលទាបធ្លាក់ក្នុងភាពក្រីក្រឡើងវិញ”។

អ្នកស្រីបន្តថា ជាមួយនឹងចរន្តទិញលក់កើនឡើង បានធ្វើឲ្យអ្នកវិនិយោ​​គធំៗជាច្រើន បានចាប់ផ្តើមវិនិយោគលើបុរី លំនៅដ្ឋានរបស់ពួកគេឡើ​ង​វិញ ដោយសារតែទីផ្សារចាប់ផ្តើមមានសញ្ញាល្អប្រសើរ ប៉ុន្តែការមកដល់នៃមេរោគអូមីក្រុង បានធ្វើឲ្យទីផ្សារស្ថិ តក្នុងភាពមិនច្បាស់់លាស់ជាថ្មី ខណៈស្ថានភាពមិនអាចទស្សន៍ទាយបាន សម្រាប់ឆ្នាំ២០២២ខាងមុខ។

អ្នកស្រីបន្តថា ជាមួយគ្នានេះ អ្នកវិនិយោគិនមកកម្ពុជា អាចមានភាពយឺតយ៉ាវ ដោយសាររដ្ឋាភិបាលចិន បានរឹងបន្តឹងបន្ថែមទៀត នូវការហូរចេញមូលធនមកក្រៅប្រទេស។

ជាមួយគ្នានេះ អ្នកឧកញ៉ាលី ហួរប្រធានសមាគមអ្នកអភិវឌ្ឍន៍លំនៅដ្ឋានកម្ពុជា បានមានប្រសាសន៍ឲ្យដឹងកាលពីពេលថ្មីៗនេះថា ទីផ្សារលំនៅដ្ឋានបានងើបឡើងវិញ ដែលបានធ្វើឲ្យក្រុមហ៊ុនធំៗ ជាសមាជិកសមាគមបានចាប់ផ្តើមវិនិយោគគំរោងធំៗឡើងវិញផងដែរ។

លោកបន្តថា “ទីផ្សារលំនៅដ្ឋានតម្លៃមធ្យម នៅតែមានតម្រូវការខ្ពស់ ចំណែកលំនៅដ្ឋានមានតម្លៃខ្ទង់លានដុល្លារ មានតម្រូវការឬអត់អាស្រ័យលើទីតាំងគំរោង និងទស្សនទាននៃការអភិវឌ្ឍ”៕

ប្រធាន CVEA អះអាងថា ផ្នែកចំនួនពីរនៃវិស័យអចលនទ្រព្យនៅតែមានសកម្មភាពល្អជាងគេ

ដោយៈគង់ សូរិយា

ភ្នំពេញៈ ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា (CVEA) លោកច្រឹក សុខនីមបានអះអាងថា ផ្នែកចំនួនពីរនៃវិស័យអចលនទ្រព្យនៅតែមានដំណើរការទិញលក់ល្អជាងគេ។

លោកបានមានប្រសាសន៍ឲ្យដឹងតាមទូរស័ព្ទ កាលពីរសៀលថ្ងៃទី១៥​ធ្នូកន្លងមកថា សកម្មភាពនៃការទិញលក់ដីធ្លី និងលំនៅដ្ឋាននៅតែមានសកម្មភាពប្រសើរជាងផ្នែកដទៃទៀត ពិសេសទីផ្សារលំនៅដ្ឋាននៅតែដំនើរ​ការ ដោយសារមានការគាំទ្រពីប្រព័ន្ឋធនាគារនានា។

លោកបន្តថា “ប្រសិនជាធនាគារមិនផ្តល់ការគាំទ្រ នឹងធ្វើឲ្យទីផ្សារជាប់គាំង ប៉ុន្តែស្ថាប័នធនាគារនានា បានរឹតបន្តឹងខ្លះៗផងដែរ ប៉ុន្តែអ្នកមានក្រេឌីតល្អ នៅតែមានលទ្ឋភាពច្រើនទទួលបានឥណទាន”។ លោកបន្តថា “ចំណែកដីធ្លី នៅតែមានសកម្មភាពទិញលក់ ដោយសារការវិនិយោគដីធ្លីមានផលចំណេញខ្ពស់ និងជាការវិនិយោគដែលមានភាពជឿជាក់ ហើយទី​ផ្សារដីធ្លីនៅតែបន្តកើនឡើង”។

លោកច្រឹក សុខនីមបានបន្តថា ទោះជាយ៉ាងណាចរន្តទិញលក់ គឺមា​នតែអ្នកវិនិយោគក្នុងស្រុកប៉ុណ្ណោះ ព្រោះវិនិយោគិនបរទេសមិនទាន់ចាប់ ផ្តើមនៅឡើយ ខណៈស្ថានភាពជំងឺកូវីដ១៩ បានផ្តល់សញ្ញាមិនច្បាស់​លាស់ដល់ទីផ្សារ។

លោកបន្តថា យ៉ាងណាក៏ដោយក៏មានសញ្ញាល្អផងដែរ សម្រាប់ប្រជាជនកម្ពុជា ពួកគេនឹងមិនត្រូវធ្វើចត្តាឡីស័កនោះទេ នៅពេលពួកគេទៅកាន់ប្រទេសសឹង្ហបុរី និងប្រទេសថៃនៅចុងខែធ្នូនេះ។

ជាមួយគ្នានេះ លោកស្រីតាំង ហួរ នាយិកាក្រុមហ៊ុន AMATAK Property Service បានមានប្រសាសន៍លើកឡើងស្រដៀងគ្នាថា ​ទីផ្សារដីធ្លីមានសកម្មភាពទិញលក់ជាហូរហែរ ប៉ុន្តែភាគច្រើននៃអ្នកវិនិយោគ ផ្តោតលើអចលនទ្រព្យដែលមានតម្លៃទាបជាងទីផ្សារ។

លោកស្រីបន្តថា “ទោះជាយ៉ាងណាតម្លៃអចលនទ្រព្យ មិនទាន់មានសញ្ញាប្រសើរច្រើននៅឡើយទេ ទោះជាសកម្មភាពទិញលក់ ជួលលើផ្នែកមួយចំនួនបានកើនបន្តិចក្តី”៕

ហេដ្ឋារចនាសម្ព័ន្ឋធំៗ៧ផ្នែកធំៗបាននិងកំពុងលើកកំពស់មុខមាត់កម្ពុជា

ដោយៈគង់ សិរីជេស៊ីកា

ភ្នំពេញៈ ហេដ្ឋារចនាសម្ព័ន្ឋធំៗចំនួន៥ផ្នែក បាននិងកំពុងចួលរូមយ៉ាងសកម្ម ក្នុងការលើកកំពស់មុខមាត់ និងជម្រុញកំនើនសេដ្ឋកិច្ចកម្ពុជា។

សមិទ្ឋិផលហេដ្ឋារចនាសម្ព័ន្ឋទាំងនោអ រួមមាន ផ្លូវល្បឿនលឿនតភ្ជាប់ពីរាជធានីភ្នំពេញ ទៅកំពង់ផែទឹកជ្រៅខេត្តព្រះសីហនុ ការចាក់កៅស៊ូផ្លូវជាតិផ្លូវខេត្ត និងផ្លូវជនបទបានប្រវែង១៥.០០០គីឡូម៉ែត្រ ការសាងសង់ស្ពានធំៗបានចំនួន២០ ការលើកកម្រិតព្រលានយន្តហោះចំនួន៣ តាមស្តង់ដាអន្តរជាតិ អាកាសយានដ្ឋានថ្មីចំនួនពីរកំពុងសាងសង់ និងគម្រោងលើកកម្រិតគុណភាព និងពង្រីកបណ្តាញផ្លូវថ្នល់សំខាន់ៗ គម្រោងអភិវឌ្ឍន៍ផ្លូវដែក និងកំពង់ផែជាដើម។ នេះបើតាមការបញ្ជាក់់របស់លោកទេសរដ្ឋមន្រ្តី ស៊ុន ចាន់ថុលរដ្ឋម​ន្រ្តីក្រសួងសាធារណៈការ និងដឹកជញ្ជូន។

លោកបានមានប្រសាសន៍បែបនេះ ក្នុងពេលអញ្ជើញជាវាគ្មិនកិត្តិយស សន្និបាតប្រចាំឆ្នាំ ដែលរៀបចំ ឡើងដោយសភាពាណិជ្ជកម្មសហរដ្ឋអាមេរិកប្រចាំនៅកម្ពុជា (American Chamber of Commerce in Cambodia)។

លោកស៊ុន ចាន់ថុលបានបន្តថា​ “សុខសន្តិភាព និងស្ថិរភាពនយោ​បាយ ក្រោមការ ដឹកនាំដ៏ឈ្លាសវៃ របស់សម្តេចតេជោនាយករដ្ឋមន្ត្រី គឺជាកត្តាសំខាន់មិនអាចខ្វះបាន ក្នុងការទាក់ទាញវិនិយោគិនពីបរទេស បង្កើតការងារធ្វើជូនប្រជាពលរដ្ឋ ទាក់ទាញអ្នកទេសចរមកលេងកម្ពុជា ស្វែងរកទីផ្សារលក់កសិផល រួមចំណែកដល់ការរីកចម្រើន សេដ្ឋកិច្ចជាតិក្នុងរង្វង់៧ភាគរយ ក្នុងរយៈពេល២០ឆ្នាំចុងក្រោយ។

លោកបណ្ឌិតម៉ី កល្យាណទីប្រឹក្សាជាន់ខ្ពស់នៃឧត្តមក្រុមប្រឹក្សាសេដ្ឋកិច្ចជាតិបានមានប្រសាសន៍ថា ហេដ្ឋារចនាសម្ព័ន្ឋជាផ្នែកមួយដ៏សំខាន់ក្នុងសេដ្ឋកិច្ចកម្ពុជា ក៏ដូចជាបណ្តាប្រទេសនានានៅលើពិភពលោក ហេតុនេះទ់បយើងឃើញរដ្ឋាភិបាល បានវិនិយោគច្រើនលើវិស័យនេះ ដើម្បីពង្រីកភាព​ប្រកួតប្រជែងជាមួយបណ្តាប្រទេសក្នុងតំបន់។

លោកបន្តថា “ដើម្បីសេដ្ឋកិច្ចកម្ពុជារីកចម្រើនលឿនបន្ថែមទៀត កម្ពុជាត្រូវការវិនិយោគលើហេដ្ឋារចនាសម្ព័ន្ឋជាអាទិភាព”៕

តើកូវីដ១៩ប្រភេទថ្មី អូមីក្រុងនឹងបង្កផលប៉ះពាល់ដល់សេដ្ឋកិច្ចកម្ពុជា ឬយ៉ាងណា?

ដោយៈលក្ខិណា

ភ្នំពេញៈ កម្ពុជាបានប្រកាស កាលពីយប់កណ្ដាលអាធ្រាត្រថ្ងៃទី១៤ធ្នូ២០២១ ពីការរកឃើញវត្តមានមេរោគកូវីដ១៩ បំប្លែងថ្មីអូមីក្រុងលើកដំបូងលើស្ត្រីជនជាតិខ្មែរ ម្នាក់ត្រលប់មកពីប្រទេសហ្កាណា ហើយក៏មានការចែកចាយតាមបណ្ដាសារព័ត៌មានក្នុងស្រុកព្រោងព្រាង។

យ៉ាងណាក្ដីមេរោគប្រភេទថ្មីនៃកូវីដ១៩នេះ ទំនងជាមិនបង្កផលប៉ះពាល់ធ្ងន់ធ្ងរ ដល់សេដ្ឋកិច្ចរបស់ប្រទេសកម្ពុជានោះឡើយ ខណៈសម្តេចតេជោ នាយករដ្ឋមន្ត្រីអំពាវនាវកុំឱ្យមានការកត់ស្លុត។

សម្ដេចអគ្គមហាសេនាបតីតេជោហ៊ុន សែន នាយករដ្ឋមន្ត្រីនៃកម្ពុជា បានថ្លែងនៅក្នុងពិធី សម្ពោធសណ្ឋាគារមួយនៅរាជធានីភ្នំពេញ កាលពីព្រឹកថ្ងៃទី១៥ធ្នូ ២០២១ថា កម្ពុជាបានរកឃើញមេរោគកូវីដ១៩ អូមីក្រុង១ករណី លើស្ត្រីជនជាតិខ្មែរមកពីប្រទេសហ្កាណា ប៉ុន្តែសម្ដេចសូមបញ្ជាក់សុំកុំស្លន់ស្លោ ហើយបង្កើនការប្រុងប្រយ័ត្ន។

សម្ដេចបានបង្ហាញការមិនសប្បាយចិត្ត ចំពោះការប្រកាសអាសន្ននូវផ្នែកណាមួយនោះ របស់អង្គការសុខភាពពិភពលោក និងក្រសួងសុខាភិបាលប្រទេសមួយចំនួន ខណៈមេរោគអូមីក្រុង មិនទាន់បានសម្លាប់មនុស្សច្រើ​ននៅឡើយទេ ដូចជា ទើបតែមានករណីស្លាប់ម្នាក់ នៅប្រទេសអង់គ្លេស ក្នុងដែលតា និងអាល់ហ្វាសម្លាប់មនុស្សយ៉ាងច្រើន។

សម្ដេចដាក់ជាសំនួរថា Delta និងអាល់ហ្វាសម្លាប់មនុស្សជាច្រើន តែមិននាំគ្នាភ័យ បែរជាមកភ័យជាមួយអូមីក្រុង ទើបតែសម្លាប់ម្នាក់សោះ ។

សម្ដេចបញ្ជាក់ថា ស្ត្រីដែលមានផ្ទុកកូវីដ១៩ ប្រភេទអូមីក្រុងនឹងជាវិញនៅពេលឆាប់ៗនេះ ពីព្រោះគាត់បានចាក់វ៉ាក់សាំងរួចហើយ ប្រភេទវ៉ាក់សាំចនសុន&ចនសុន ហើយសុខភាពគាត់ក៏ធម្មតា អត់មានអ្វីប្លែកទេ តែអ្វីដែលយើងបារម្ភ គឺទារកក្នុងផ្ទៃរបស់ស្ត្រីនោះ ដូច្នេះក្រុមគ្រូពេទ្យត្រូវយកចិត្តទុកដាក់ខ្ពស់ចំពោះអ្នកជំងឺរូបនេះ។

លោកគី សេរីវឌ្ឍន៍អ្នកវិភាគសេដ្ឋកិច្ចមួយរូបក្នុងប្រទេសកម្ពុជាក៏បានមានប្រសាសន៍តាមទូរសព្ទនៅរសៀលថ្ងៃទី១៥ធ្នូ ២០២១នេះថា អូមីក្រុងមកដល់កម្ពុជា គឺជារឿងមួយដែលគួរប្រុងប្រយ័ត្ន ហើយហានិភ័យនៃការឆ្លងរាលដាលក៏មានដែរ បើពុំមានវិធានការការពារ និងការចូលរួមទាំងអស់គ្នា។

យ៉ាងណាក្ដី លោកជឿជាក់ថាតាមរយៈបទពិសោធន៍ នៃព្រឹត្តិការណ៍សហគមន៍២០កុម្ភៈ២០២១កន្លងទៅ រាជរដ្ឋាភិបាលនឹងមានវិធានការនិងចំណាត់ការ ក្នុងការទប់ស្កាត់មេរោគនេះ មិនឱ្យរាលដាលនិងធ្វើឱ្យប៉ះពាល់ដល់សេដ្ឋកិច្ចធំធេងដូច២០កុម្ភៈ២០២១ ។

លោកបន្តថា ទន្ទឹមនឹងនេះដែរ ក៏ត្រូវមានការចូលរួមទាំងអស់គ្នា ដើម្បីទប់ស្កាត់នូវមេរោគ ប្រភេទថ្មីនេះកុំឱ្យឆ្លងរាលដាលធំ ដោយក្នុងនោះអាជ្ញាធរត្រូវអប់រំពលរដ្ឋបន្ថែម ពីមេរោគមួយនេះ ហើយពលរដ្ឋខ្លួនឯងក៏ត្រូវតែបង្កើនការប្រុងប្រយ័ត្ន ឱ្យបានខ្លាំងជាងមុន ត្រូវបង្កើនការអនុវត្តន៍វិធានការអនាម័យរបស់ក្រសួងសុខាភិបាល។

បណ្ដាវិនិយោគិនជាច្រើន ក៏បានផ្ដល់ទំនុកចិត្ត និងជឿជាក់ថារាជរដ្ឋាភិបាលកម្ពុជា នឹងអាចទប់ស្កាត់នូវការរីករាលដាល នៃជំងឺកូវីដមិនឱ្យត្រលប់ទៅរក ការរាលដាលធ្ងន់ធ្ងរទៀតនោះទេ ហើយក៏សង្ឃឹមថាបណ្ដាវិនិយោគិនបរទេសជាច្រើន នឹងចូលកម្ពុជាវិញនៅពេលឆាប់នេះដែរ៕

ចំណេះដឹងមិនគួរមើលរំលងៈសិក្សាលើ៩ចំនុចនេះសិន មុនពេលសម្រេចចិត្តជួលផ្ទះ

ដោយៈ ម៉ាលីស

ភ្នំពេញៈ ការជួលផ្ទះរឺអាផាតម៉ិន គឺមានការចំបាច់ណាស់ តើមុនសម្រេចចិត្តជួលផ្ទះ ឬអាផាតមិន តើអ្នកត្រូវពិចារណាលើអ្វីខ្លះ? ។

ខាងក្រោមនេះគឺជាចំនុចសំខាន់ទាំង៩ ដែលអ្នកត្រូវគិតគូរអោយបានហ្មត់ចត់ មុននឹងធ្វើការចុះកិច្ចសន្យាជួលផ្ទះ ឬអាផាតម៉ិន។

១ ស្រាវជ្រាវពីទីតាំង

គិតអំពីតំបន់នៃកន្លែងរស់នៅ មុនពេលអ្នកផ្លាស់ទីលំនៅ។ តើវាជិតមន្ទីរពេទ្យ ឬក្លិបកំសាន្ត ដែលអាចបង្កសំលេងរំខានដល់អ្នកដែរឬទេ? តើទីតាំងនោះនៅជិតកន្លែងធ្វើការ ឬសាលារបស់កូនអ្នកដែរទេ? តើនៅតំបន់នោះមានសុវត្ថិភាពដែរឬយ៉ាងណា? ពិនិត្យមើលមជ្ឈដ្ឋានជុំវិញអោយបានច្បាស់ មុនអ្នកសម្រេចចិត្តជួល។

២ ពិនិត្យមើលប្រព័ន្ធសុវត្ថិភាព

ពិនិត្យមើលច្រកចេញចូល សោរទ្វាររបង។ តើមាន បំពាក់កាមេរ៉ាសុវត្ថិភាព និងប្រព័ន្ធផ្តល់ដំណឹង ឬការពារផ្សេងៗដែរទេ?។

៣ ពិនិត្យមើលឧបករណ៍ប្រើប្រាស់

តើផ្ទះឬបន្ទប់ជួលនោះ មានភ្ជាប់មកជាមួយនឹងម៉ាស៊ីនបោកខោអាវ ទូទឹកកក ម៉ាស៊ីនត្រជាក់ និងឧបករណ៍អេឡិចត្រូនិចដទៃទៀតដែរឬទេ? តើពួកវាមានសភាពចាស់ទ្រុដទ្រោម ឬនៅថ្មីអាចប្រើប្រាស់បាន? បើពួកវាត្រូវការការត្រួតពិនិត្យឬជួសជុល អ្នកត្រូវចរចារជាមួយម្ចាស់ផ្ទះ មុននឹងយល់ព្រមជួល។

៤ ពិនិត្យមើលស្ថានភាពផ្ទះឬបន្ទប់

សង្កេតរកមើលស្នាមប្រលាក់ បាក់បែក និងលេចធ្លាយទូទាំងតួផ្ទះដូចជាជញ្ជាំង ពិដាន ទ្វារ ការ៉ូ។ល។ ពេលខ្លះស្នាមប្រលាក់ ត្រូវបានបិទបាំងដោយរូបចម្លាក់ ដែលពិបាកប្រទះ ដោយគ្រាន់តែក្រឡែកមួយភ្លែត។ តើមានសត្វចង្រៃ ដូចជាកន្លាត និងកណ្តុរមកយាយីដែរទេ?។

៥ ពិនិត្យមើលអគ្គិសនីនិងទឹក

អ្នកត្រូវសួរម្ចាស់ផ្ទះថា តើមានផ្គត់ផ្គង់អគ្គិសនី និងទឹកគ្រប់គ្រាន់ដែរឬទេ? សាកល្បងសម្ពាធទឹកគ្រប់ជាន់ ព្រោះថាជាន់កាន់តែខ្ពស់សម្ពាធទឹកកាន់តែខ្សោយ និងបើកក្បាលរ៉ូប៊ីណេ និងអំពូលភ្លើងទាំងអស់ ដើម្បីប្រាកដថាពួកវាសុទ្ធតែដំណើរការតាមប្រក្រតី។

៦ ថតស្ថានភាពផ្ទះធ្វើជាឯកសារ

អ្នកត្រូវចាំបាច់ថតស្ថានភាពផ្ទះ ឬបន្ទប់និងឧបករណ៍ ដែលមានក្នុងនោះទាំងប៉ុន្មានទុកជាភស្តុតាង មុននឹងចុះកុងត្រាជួល ព្រោះថាក្នុងកិច្ចសន្យាជួលផ្ទះនិមួយៗ សុទ្ធតែមានបញ្ជាក់អំពីសំណងខូចខាត និងបាត់បង់ទ្រព្យសម្បត្តិ ដែលអ្នកជួលត្រូវចេញថ្លៃសំណង ប្រសិនបើមានការបែកបាក់ឬខូចខាតក្នុងផ្ទះនៅខណៈដែលខ្លួនកំពុងជួល។

ក្នុងករណីដែលម្ចាស់ផ្ទះ សុំអោយអ្នកចេញថ្លៃសំណងខូចខាតទ្រព្យសម្បត្តិ ដែលកើតមានឡើងមុនអ្នករើមកនៅ អ្នកអាចយករូបថតដែលអ្នកបានថតទុកមុនចុះកិច្ចសន្យាជួលផ្ទះ មកធ្វើជាភស្តុតាងបាន។

មុនពេលចុះកិច្ចសន្យា អ្នកត្រូវត្រៀមរូបថតទាំងនោះ ចំនួន២ច្បាប់សម្រាប់អ្នកមួយ និងម្ចាស់ផ្ទះមួយ និងត្រូវអោយភាគីទាំងសងខាងដឹងលឺនិងយល់ព្រមទាំងអស់គ្នា។

៧ សួរអំពីថ្លៃបង់បន្ថែម

តើអ្នកត្រូវបង់ថ្លៃសេវាផ្សេងទៀតទេ ក្រៅពីថ្លៃផ្ទះ ដូចជា ប្រាក់កក់ សេវាសន្តិសុខ អនាម័យ ចំណតយានយន្ត?។

៨ សួរនាំអំពីសេវាកម្មជួសជុល

ប្រសិនបើឧបករណ៍ ដែលមានមកជាមួយផ្ទះ ត្រូវការជួលជុល តើភាគីម្ចាស់ផ្ទះឬអ្នកជួលជាអ្នកចេញថ្លៃសេវា? ជាធម្មតាសម្រាប់ខុនដូ ឬអាផាតមិន សេវាកម្មនេះត្រូវបានរ៉ាប់រងដោយម្ចាស់ផ្ទះ។

៩ អានកុងត្រាអោយបានច្បាស់

ជាចុងក្រោយ អ្នកត្រូវអានកុងត្រា និងយល់អោយច្បាស់អំពីលក្ខខណ្ឌទាំងអស់ដែលបានចារ។ សួរបញ្ជាក់ត្រង់កន្លែង ដែលអ្នកមិនយល់និងចរចារជាមួយម្ចាស់ផ្ទះ ចំពោះលក្ខខណ្ឌដែលអ្នកមិនយល់ស្រប។ អ្នកត្រូវស្វែងយល់អោយច្បាស់អំពីសិទ្ធិ និងតួនាទីរបស់ម្ចាស់ផ្ទះ និងអ្នកជួល កាលកំណត់របស់កុងត្រា ថ្លៃសេវាកម្មផ្សេងៗ ការឡើងថ្លៃ និងឯកសារដែលចាំបាច់ផ្សេងៗ។ល។

មួយវិញទៀត រាល់ការព្រមព្រាងជាមួយម្ចាស់ផ្ទះ ត្រូវមានលាយលក្ខ​ណ៍អក្សរ និងមិនគ្រាន់តែសន្យានឹងមាត់ ដើម្បីជៀសវាងបញ្ហាមានការក្រឡា​ស់សម្តីទៅថ្ងៃមុខ៕

China’s property investment rises 6.0per cent y/y in Jan-Nov

Reporting by Liangping Gao and Ryan Woo

BEIJING : China’s property investment rose 6.0per cent in January-November year-on-year, slowing from the 7.2per cent growth seen in the first 10 months of the year, official data showed on Wednesday.

Property sales by floor area increased 4.8per cent during January-November from the same period a year earlier, compared with a 7.3per cent gain in the first 10 months, the National Bureau of Statistics (NBS) said in a statement.

New construction starts measured by floor area fell 9.1per cent during January-November from a year earlier, compared with a decline of 7.7per cent in the first 10 months of the year.

Funds raised by China’s property developers grew 7.2per cent year-on-year in the January-November period after increasing 8.8per cent in the first 10 months of the year.

Source: Reuters

លោកយិន លាងគង់ ផ្ញើសារលិខិតគោរពជូនពរសម្តេច​កិត្តិ​ព្រឹទ្ធបណ្ឌិត ប៊ុន រ៉ានី ហ៊ុនសែន ក្នុងឱ​កាស​ចម្រើន​ជន្មា​យុ​គម្រប់៦៧ឆ្នាំ ឈានចូល៦៨ឆ្នាំ

លោកយិន លាងគង់ សហស្ថាបនិក និងជាអគ្គនាយក ថ្នាក់ដឹកនាំ និងក្រុមការងារនៃគេហទំព័រ Propertyarea.asia សូមគោរពអនុញ្ញាតផ្ញើសារលិខិតគោរពជូនពរ ព្រមទាំងសូមសម្ដែងនូវអំណរសាទរឥតឧបមា ក្នុងឱកាសចម្រើនជន្មាយុរបស់ សម្ដេចកិត្តិព្រឹទ្ធបណ្ឌិតប៊ុន រ៉ានី ហ៊ុនសែន ប្រធា​នកាកបាទក្រហមកម្ពុជា គម្រប់៦៧ឆ្នាំ ឈានចូល៦៨ឆ្នាំ ដែលប្រព្រឹត្តទៅនាថ្ងៃទី១៥ ខែធ្នូ ឆ្នាំ២០២១ នេះ។

នាឱកាសដ៏ប្រពៃវិសេសថ្លៃថ្លា ប្រកបដោយក្ដីសោមនស្សរីករាយនេះ យើងខ្ញុំទាំងអស់គ្នា សូមការអនុញ្ញាតគោរពជូនពរ សម្តេចកិត្តិព្រឹទ្ធបណ្ឌិត សូមបានប្រកបដោយសុខភាពល្អបរិបូរណ៍ បញ្ញាញាណភ្លឺថ្លា កម្លាំងពលំមាំមួន ជន្នាយុយឺនយូរ ដើម្បីបន្តដឹកនាំកាកបាទក្រហមកម្ពុជា ទទួលបាននូវជ័យជំនះថ្មីៗធំធេងថែមទៀត ជាពិសេសការស្វះស្វែងរក ជំនួយមនុស្សធម៌ពីគ្រប់មជ្ឈដ្ឋានជាតិ និងអន្តរជាតិ ដើម្បីជួយដល់ជនងាយរងគ្រោះ ទុរគតជន ជនចាស់ជរា កុមារកំព្រា ជនគរថ្លង់ យុទ្ធជន របួស ជនពិការ ព្រមទាំងជនរងគ្រោះដោយសារគ្រោះមហន្តរាយ និងគ្រោះធម្មជាតិផ្សេងៗ។

ជាថ្មីម្ដងទៀត យើងខ្ញុំទាំងអស់គ្នា សូមលំឱនកាយវាចាចិត្តលើកហត្ថប្រណមបួងសួងដល់ គុណបុណ្យព្រះរតនត្រ័យ វត្ថុស័ក្តិសិទ្ធិទាំងឡាយក្នុងលោក សូមជួយបីបាច់ថែរក្សា និងប្រោះព្រំសព្ទសាធុការពរ សិរីសួស្ដីជ័យមង្គលបវរមហាប្រសើរជូនចំពោះ សម្តេចកិត្តិព្រឹទ្ធបណ្ឌិត និង សម្តេចតេជោ នាយករដ្ឋមន្រ្តី ព្រមទាំងបុត្រា-បុត្រី និងចៅប្រុស-ចៅស្រីជាទីស្រឡាញ់ទាំងអស់ សូមបានប្រកបនូវពុទ្ធពរទាំងបួនប្រការគឺ អាយុ វណ្ណៈ សុខៈ ពលៈ ជានិច្ចនិរន្តរ៍៕

 

ទំហំទុនវិនិយោគអចលនទ្រព្យនៅប្រទេសចិនសម្រេច បានកំណើន៦ភាគរយក្នុងឆ្នាំ២០២១

ដោយ៖ សុខុម

ប៉េកាំងៈ ទិន្នន័យផ្លូវការបានបង្ហាញនៅថ្ងៃពុធ ទី១៥ ធ្នូ នេះថា ទំហំទុនវិនិយោគលើអចលនទ្រព្យរបស់ប្រទេសចិន ទទួលបានកំណើន៦,០%ក្នុងឆ្នាំ២០២១ គិតពីខែមករាដល់ខែវិច្ឆិកា។

យោងតាមការចុះផ្សាយរបស់សារព័ត៌មាន CNA ឱ្យដឹងថា តួលេខកំណើន៦,០%នេះគឺធ្លាក់ចុះបន្តិច បើធៀបនឹងកំណើន៧,២% ដែលទទួលបានក្នុងរយៈពេល១០ខែដំបូងក្នុងឆ្នាំដដែល។

ការិយាល័យជាតិស្ថិតិ (NBS) នៃមហាយក្សចិន បានចេញសេចក្តីថ្លែងការណ៍ថា ការលក់អចលនទ្រព្យគិតជាផ្ទៃខាងក្នុងអគារ (Floor Area) ក្នុងប្រទេសនេះទទួលបានកំណើន៤,៨%អំឡុងរយៈពេលខែមករា ដល់ខែវិច្ឆិកា បើធៀបនឹងរយៈពេលដូចគ្នាក្នុងឆ្នាំ២០២០ និងបើធៀបនឹងកំណើន៧,៣%ក្នុងរយៈពេល១០ខែដំបូងនៃឆ្នាំនេះ។

ទោះជាយ៉ាងណា ការសាងសង់ថ្មីៗដែលគិតជាផ្ទៃខាងក្នុងអគារ (Floor Area) បានធ្លាក់ចុះ៩,១% អំឡុងរយៈពេលពីខែមករា ដល់ខែវិច្ឆិកា ធៀបនឹងឆ្នាំ២០២០ និងបើធៀបនឹងការធ្លាក់ចុះ៧,៧% ក្នុងរយៈពេល១០ខែដំបូងនៃឆ្នាំនេះ។

ហិរញ្ញប្បទានដែលកៀរគរប្រមូលដោយបណ្ដាក្រុមហ៊ុនអភិវឌ្ឍន៍អចលនទ្រព្យរបស់ប្រទេសចិន ទទួលបានកំណើន៧,២% ក្នុងរយៈពេលគិតពីខែមករា ដល់ខែវិច្ឆិកា បន្ទាប់ពីទទួលបានកំណើន៨,៨%ក្នុងរយៈពេល១០ខែដំបូងនៃឆ្នាំនេះ៕

កម្ពុជាដល់ដំណាក់កាលអភិវឌ្ឍន៍ទីក្រុងបៃតងហើយ

ដោយ៖ វឌ្ឍនៈ

ភ្នំពេញ ៖ ពីមួយឆ្នាំទៅមួយឆ្នាំ កំណើននៃការអភិវឌ្ឍអគារខ្ពស់ៗនៅក្នុងប្រទេសកម្ពុជា ជាពិសេសនៅក្នុងរាជធានីភ្នំពេញ និងបណ្ដាខេត្តមួយចំនួនទៀតដែលមានសក្ដានុពល បាននិងកំពុងកើនឡើងជាបន្តបន្ទាប់ ប៉ុន្តែ ភាគច្រើននៃការអភិវឌ្ឍអគារទាំងនោះមិនទាន់គិតគូរដល់ការផលប៉ះពាល់នៃបរិស្ថាននៅឡើយ។ ស្ថាបត្យករជំនាញមួយរូបរបស់កម្ពុជាបាននិយាយថាកម្ពុជាដល់ដំណាក់មួយដែលត្រូវគិតគូពីការអភិវឌ្ឍទីក្រុងបៃតងហើយ។

លោក ជា ប៊ុនសៀង ស្ថាបត្យករជំនាញមួយរូបរបស់កម្ពុជា បានថ្លែងក្នុងកិច្ចសម្ភាសន៍មួយកាលពីពេលថ្មីៗនេះថា ការរីកចម្រើននៃប្រទេសកម្ពុជាកំពុងតែធ្វើដំណើរទៅលឿន ហើយការគិតគូរដល់ការអភិវឌ្ឍទីក្រុងបៃតងនៅក្នុងប្រទេសកម្ពុជា វាមិនមែនជារឿងថ្មីទេ។ វាគួរតែគិតគូរមកជាយូរហើយ ពីព្រោះ បច្ចុប្បន្ននេះកម្ពុជាមានសំណង់ច្រើនណាស់ បើសិនជាវារីកកាន់តែច្រើនវានឹងពិបាកក្នុងការដកដង្ហើម ឬអាចបង្កជាខ្យល់ពុលជាដើម ដូច្នេះវាដល់ដំណាក់កាលដែលកម្ពុជាត្រូវគិតគូរពីការអភិវឌ្ឍទីក្រុងបៃតងនេះហើយ។

លោកបន្តថា ប្រទេសគេរីកចម្រើនគេធូរធាគេបានគិតពីបញ្ហានេះយូរហើយ និងយកបញ្ហានជាបញ្ហាចំបង។ ដោយឡែកសម្រាប់កម្ពុជា លោកគិតថា វាដល់ដំណាក់មួយដែលត្រូវចាប់ផ្ដើគិតដូចគ្នា អញ្ចឹងដំណោះស្រាយចរាចរណ៍នៅទីតាំងសាធារណៈត្រូវគិតគូឡើងវិញ និងត្រូវមានការចូលរួមពី វិស័យឯកជន ពីអ្នកអភិវឌ្ឍន៍គម្រោងនីមួយៗ ហើយមកដល់ពេលនេះ ក៏មានគម្រោងអភិវឌ្ឍន៍ក្នុងប្រទេសកម្ពុជាមួយចំនួនចាប់ផ្ដើមធ្វើបណ្ដើរៗហើយដែរ។

លោកបន្ថែមថា ការធ្វើនវានុវត្តន៍ក្នុងវិស័យស្ថាបត្យកម្មនៅកម្ពុជាក៏ត្រូវមានការចូលរួមសំខាន់ពីស្ថាបត្យករអាជីព និងត្រូវយកទស្សនទានមួយ គឺរត់តាមគេឱ្យទាន់និងមើលឱ្យឆ្ងាយជាងគេ ពីព្រោះស្ថាបត្យករជាមនុស្សដែលប្រើទស្សនៈទានជាគោល មិនមែនជាអ្នកគ្រាន់តែគូរលើក្រដាសប៉ុណ្ណោះនោះទេគឺមើលនូវអ្វីដែលកើតឡើងនៅពេលអនាគតមុនគេ ហើយនឹងត្រូវឈរលើទីតាំងនោះមុនគេ ដោយគិតថាបន្តិចនឹងដល់ហើយ ។

លោកថា “ស្ថាបត្យករដែលខ្លាំងគឺជាស្ថាបត្យករដែលគិតគូរពីផលប៉ះពាល់ដល់ធនធានធម្មជាតិ បរិស្ថាន និងធ្វើឱ្យមនុស្សជាតិរស់នៅស្រួលជាមួយនឹងធម្មជាតិ។”
លោកបន្ថែមទៀតថា ក្រៅពីស្ថាបត្យករ អ្នកចូលរួមសំខាន់មួយទៀតគឺអ្នកទទួលផល គឺជាអ្នកដែលចង់បានស្ថាបត្យកម្មដែលល្អ ទី៣ អាជ្ញាធរក៏ដូចជារដ្ឋាភិបាលក៏ត្រូវមានក្រឹតក្រមស្ថាបត្យកម្ម និងត្រូវកំណត់ទីតាំងដែលត្រូវសាងសង់និងការអភិវឌ្ឍ ដូចជាការតំបន់ពាណិជ្ជកម្ម តំបន់លំនៅដ្ឋាន និងបែកចែកទៅតាមកម្រិតជីវភាពនៃការរស់នៅផងដែរ។

សម្ដេចតេជោ ហ៊ុន សែន នាយករដ្ឋមន្ត្រីកម្ពុជា កាលពីព្រឹកថ្ងៃទី១៥ធ្នូ២០២១នេះ ក៏បានបញ្ជាក់ពីកំណើននៃសំណង់អគារខ្ពស់នៅក្នុងប្រទេសក្នុងរយៈពេលឆ្នាំចុងក្រោយនេះដែរ ដោយកាលពីមុនរាជធានីភ្នំពេញ មានអគារខ្ពស់តែប៉ុន្មានអគារប៉ុណ្ណោះ តែមកដល់ពេលនេះអគារខ្ពស់ជាច្រើនកំពុងរីកដុះដាលជាបន្តបន្ទាបហើយនឹងបន្តរីកលូតលាស់ជាបន្តបន្ទាប់ទៀត៕

សម្តេចព្រះអគ្គមហាសង្ឃរាជ ទេព វង្ស យាងប្រោសព្រំព្រះបដិមាឧមា-មហេសូរ

ដោយ៖ សូរិយា

ព្រះសីហនុ៖ នៅថ្ងៃទី១៣ ខែធ្នូ ឆ្នាំ២០២១ សម្តេចព្រះអគ្គមហាសង្ឃរាជាធិបតីកិត្តិឧទ្ទេសបណ្ឌិត ទេព វង្ស សម្តេចព្រះមហាសង្ឃរាជាគណៈមហានិកាយ នៃព្រះរាជាណាចក្រកម្ពុជា សម្តេចយាងប្រោសព្រំព្រះបដិមាឧមា-មហេសូរ នៅរង្វង់មូលរាម ស្ថិតនៅឃុំរាម ស្រុកព្រៃនប់ ខេត្តព្រះសីហនុ។

ក្នុងឱកាសនោះ សម្តេចព្រះអគ្គមហាសង្ឃរាជាធិបតីកិត្តិឧទ្ទេសបណ្ឌិត ទេព វង្ស សម្តេ ចបានប្រោសព្រំ សុំពរជ័យ សិរីសួស្តី និងសេចក្តីសុខជូនដល់ឯកឧត្តមអភិបាលខេត្ត និងលោកជំទាវ មន្ត្រីរាជការ កងកម្លាំងប្រដាប់អាវុធ និងប្រជាពលរដ្ឋខេត្តព្រះសីហនុ សម្រាប់ឆ្នាំថ្មី២០២២ខាងមុខនេះ និងចៀសផុតពីជំងឺឆ្លងកូវីដ-១៩ ទាំងអស់គ្នា ដើម្បីកសាង និងអភិវឌ្ឍន៍ខេត្តព្រះសីហនុ ឱ្យកាន់តែមានការរីកចម្រើនបន្ថែមទៀត ។

ព្រះបដិមាឧមា- មហេសូរ នៅរង្វង់មូលរាម ស្ថិតនៅឃុំរាម ស្រុកព្រៃនប់ ខេត្តព្រះសីហនុ ត្រូវបានអភិសេកកាលពីថ្ងៃទី០១ ខែធ្នូ ឆ្នាំ ២០២១កន្លងមក។ រូបបដិមាព្រះឧមា-មហេសូរ ធ្វើពីលោហធាតុ មានកម្ពស់ ៩ម៉ែត្រ គង់នៅលើបល្ល័ង្កកម្ពស់ ៦,១៥ម៉ែត្រ សរុបពីដីដល់កំពូលនៃរូបបដិមាព្រះឧមា-មហេសូរ មានកម្ពស់ ១៥.១៥ម៉ែត្រ។ ជានិមិត្តរូបនៃការបង្កើតលោក និងតំណាងឱ្យសេចក្តីសុខ សុភមង្គល ភាពសុខសាន្ត សុខដុមនីយកម្មក្នុងគ្រួសារ និងសង្គមជាតិ ៕