ដោយៈវឌ្ឍនៈ

ភ្នំពេញៈ ថ្លែងនៅក្នុងពិធីបើកពិព័រណ៍ចិន អាស៊ានលើកទី១៨ នៅពីថ្ងៃទី១០ កញ្ញា២០២១នេះ សម្ដេចអគ្គមហាសេនាបតីតេជោហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាបានឱ្យដឹងថា កម្ពុជានឹងអាចសម្រេចគោលដៅ នៃការបង្កើតភាពស៊ាំសហគមន៍នៅទូទាំងប្រទេស និងមានឱកាសបើកដំណើរការពេញលេញជាបណ្ដើរៗ នៃសកម្ម​ភាពសង្គម សេដ្ឋកិច្ចនាពេលឆាប់ៗខាងមុខនេះ។

សម្ដេចមានប្រសាសន៍ថា ជាលទ្ធផនៃកិច្ចខិតខំប្រឹងប្រែងខាងលើនេះ កម្ពុជាក្លាយជាប្រទេសមួយ ក្នុងចំណោមបណ្ដាប្រទេសក្នុងតំបន់ និងលើសកលលោក ដែលសម្រេចបាននូវយុទ្ធនាការចាក់វ៉ាក់សាំង ជូនប្រជាពលរដ្ឋក្នុងកម្រិតមួយខ្ពស់គួរឱ្យកត់សម្គាល់ ។ គិតត្រឹមដំណាក់ខែសីហា ឆ្នាំ២០២១នេះ ធៀបនឹងផែនការ ការចាក់វ៉ាក់សាំងចំនួន២ដូស ជូនពលរដ្ឋដែលមានអាយុ១៨ឆ្នាំឡើង សម្រេចបានចំនួន៨៦ភាគរយ និងដូសទី១សម្រាប់កុមារ និងយុវវ័យអាយុពី១២ដល់ក្រោម១៨ឆ្នាំ សម្រេចបាន៨១ភាគរយ ។

សម្ដេចតេជោបានបន្តថា ក្នុងរយៈពេលជាង១ឆ្នាំកន្លងមកនេះ រាជរដ្ឋាភិបាលដៃម្ខាងបានប្រយុទ្ធប្រឆាំង យ៉ាងសកម្មជាមួយនឹងជំងឺកូវីដ១៩ តាមរយៈការអនុវត្តន៍យុទ្ធសាស្ត្របីសំខាន់គឺទប់ស្កាត់ ព្យាបាល និងចាក់វ៉ាក់សាំង និងដៃម្ខាងទៀតអនុវត្តន៍នូវគោលនយោបាយរក្សាលំនឹងជីវភាពប្រជាជន និងធុរកិច្ចនៅក្នុងគ្រប់វិស័យ ។

សម្ដេចមានប្រសាសន៍ថា “ចិន អាស៊ាន ត្រូវបន្តជំរុញកិច្ចសហការលើគ្រប់វិស័យជាពិសេសវិស័យហិរញ្ញវត្ថុ និងពាណិជ្ជកម្ម ក្នុងគោលបំណងពន្លឿនការស្ដារសកម្មភាពសង្គម សេដ្ឋកិច្ចឡើងវិញ ក្រោយវិបត្តិកូវីដ១៩ តាមរយៈការបើកឱ្យទូលំទូលាយ ជាមុននូវទីភ្សារនិងរំហូរពាណិជ្ជកម្មសេរី ក៏ដូចជាសម្រួលដល់រំហូរវិនិយោគ ដើម្បីអនុញ្ញាតឱ្យកម្ពុជា ក៏ដូចជាប្រទេសផ្សេងទៀតក្នុងតំបន់ មានលទ្ធភាពអាចជំរុញការនាំចេញផលិតផ​លដែលមានសក្ដានុពល និងទទួលបានធនធានហិរញ្ញវត្ថុបន្ថែមទៀត”។

ក្នុងនាមរដ្ឋាភិបាលកម្ពុជា សម្ដេចក៏បានថ្លែងអំណរគុណយ៉ាងជ្រាលជ្រៅ ចំពោះរដ្ឋាភិបាលនិងប្រជាជនចិន ដែលផ្ដល់ការគាំទ្រដល់រាជរដ្ឋាភិបាលកម្ពុជា និងប្រជាជនកម្ពុជាតាមរយៈជំនួយគ្រប់រូបភាព ទាំងផ្នែកបច្ចេកទេសព្យាបាលកូវីដ២៩ សម្ភារបរិក្ខារពេទ្យនិងជាពិសេសជំនួយវ៉ាក់សាំងបង្ករជំងឺកូវីដ១៩ ព្រមទាំងការជួយសម្របសម្រួលដល់ភាគីកម្ពុជានៅក្នុងការបញ្ជាទិញវ៉ាក់សាំងពីប្រទេសចិនផងដែរ  ៕

ដោយសុខុម

ញូវយ៉ក: រដ្ឋការរបស់លោកប្រធានាធិបតី ចូ បៃឌិន បានប្រកាសកាលពីថ្ងៃពុធ ទី៨ កញ្ញា ថា សហរដ្ឋអាមេរិក គួរតែបង្កើនការផ្គត់ផ្គង់ថាមពលសូឡា (ពន្លឺព្រះអាទិត្យ) ឱ្យបានជិត៥០%នៃការផ្គត់ផ្គង់ថាមពលសរុបនៅត្រឹមឆ្នាំ២០៥០។ នេះបើយោងតាមកាសែត Bangkok Post ចុះផ្សាយកាលពីថ្ងៃទី៩ កញ្ញា។

របាយការណ៍មួយដែលចេញផ្សាយដោយក្រសួងថាមពលអាមេរិក បានបញ្ជាក់ថា ថាមពលសូឡាអាចនឹងគ្របដណ្ដប់រហូតដល់ទៅ៤០%នៃការផ្គត់ផ្គង់ថាមពលសរុបនៅត្រឹមឆ្នាំ២០៣៥ និងឈានដល់៤៥%នៅត្រឹមឆ្នាំ២០៥០។

ក្រសួងនេះបានចេញសេចក្តីថ្លែងការណ៍ថា ទោះជាយ៉ាងណា ការឈានដល់គោលដៅនេះនឹងទាមទារឱ្យសហរដ្ឋអាមេរិក បង្កើនសមត្ថភាពផលិតថាមពលសូឡាប្រចាំឆ្នាំរបស់ខ្លួនដល់ទៅ៤ដងឯណោះ។

ក្រសួងដដែលបានបន្ថែមទៀតថា ដើម្បីសម្រេចបានតាមគោលដៅនេះក៏អាស្រ័យលើការវិនិយោគសាធារណៈលើថាមពលមានភាពទូលំទូលាយកម្រិតណា ព្រមទាំងការកែប្រែគោលនយោបាយដើម្បីដកគ្រឿងលើកទឹកចិត្តសម្រាប់ការផលិតថាមពលដែលផ្អែកលើកាបូនផងដែរ។

ការបញ្ចេញរបាយការណ៍នេះធ្វើឡើង ស្របពេលលោកប្រធានាធិបតី ចូ បៃឌិន ដាក់សម្ពាធឱ្យចាត់វិធានការម៉ឺងម៉ាត់លើបញ្ហាបម្រែបម្រួលអាកាសធាតុ និងថាមពលកកើតឡើងវិញ នៅពេលដែលសភាពិភាក្សាដេញដោលអំពីសំណើធំៗ ដើម្បីកែលម្អហេដ្ឋារចនាសម្ព័ន្ធក្នុងប្រទេសនេះ ក្រោយពីសហរដ្ឋអាមេរិក ជួបបាតុភូតព្យុះត្រូពិចកាន់តែកំណាច និងភ្លើងឆេះព្រៃ។

ការបញ្ចេញរបាយការណ៍នេះក៏ធ្វើឡើងមិនយូរប៉ុន្មានផងដែរ ក្រោយពីសេតវិមាន ប្រកាសកាលពីខែមុនដោយកំណត់យកឆ្នាំ២០៣០ ជាឆ្នាំគោលដៅបង្កើនការលក់រថយន្តអគ្គិសនីឱ្យបានពាក់កណ្ដាលនៃការលក់រថយន្តសរុបនៅសហរដ្ឋអាមេរិក ជាគោលដៅដ៏មោះមុតមួយទៀតដែលនឹងពឹងផ្អែកលើភាពស្របគ្នានៃគោលនយោបាយសាធារណៈ ការវិនិយោគក្នុងវិស័យឯកជន និងចំណង់ចំណូលចិត្តរបស់អ្នកប្រើប្រាស់៕ Bangkok Post

ដោយៈសុខុម

បាងកក: ចំនួនគណនីជួញដូររូបិយប័ណ្ណឌីជីថល បានកើនឡើងខ្ពស់រហូតដល់ទៅ២៧,៦ភាគរយ ពីមួយខែធៀបនឹងមួយខែ ខណៈអត្រាការប្រាក់សម្រាប់គណនីប្រាក់បញ្ញើធ្លាក់ចុះខ្លាំង។ នេះបើយោងតាមកាសែត Bangkok Post ចុះផ្សាយកាលពីថ្ងៃទី៩ កញ្ញា។

យោងតាមក្រុមហ៊ុនស្រាវជ្រាវអំពីមីក្រូ និងម៉ាក្រូសេដ្ឋកិច្ច Kasikorn Research Centerឱ្យដឹងថា បច្ចុប្បន្នមានគណនីជួញដូររូបិយប័ណ្ណឌីជីថល សរុបចំនួនជាង១.៣លានគណនីក្នុងទីផ្សារថៃ ពោលគឺតិចជាងពាក់កណ្តាល បើធៀបនឹងចំនួនគណនីផ្សារភាគហ៊ុន ប៉ុន្តែវាជាអត្រាកំណើនខ្ពស់ប្រចាំខែ។

ក្រុមហ៊ុនខាងលើនេះ បានធ្វើការស្ទង់មតិកាលពីពេលថ្មីៗនេះ ដើម្បីស្វែងយល់ពីឥរិយាបថវិនិយោគ របស់បុគ្គលិកក្រុមហ៊ុនឯកជន មានប្រាក់ចំណូលខ្ពស់ ដែលរស់នៅក្នុងទីក្រុងបាងកក និងតំបន់ជុំវិញទីក្រុងនេះ។

លទ្ធផលនៃការស្ទង់មតិនេះបង្ហាញថា ចំនួន៦៩.៤%នៃអ្នកឆ្លើយសំណួរបានដឹងអំពីរូបិយប័ណ្ណឌីជីថល ហើយ៥២%បានបង្ហាញចំណាប់អារម្មណ៍ ចង់វិនិយោគលើរូបិយប័ណ្ណឌីជីថល ដែលនេះឆ្លុះបញ្ចាំងពីការកើនឡើងប្រជាប្រិយភាព នៃការជួញដូរបែបនេះ។

ទោះជាយ៉ាងណា ការជួញដូររូបិយប័ណ្ណឌីជីថល នៅតែត្រូវបានចាត់ទុកថាសម្រា​ប់តែមនុស្សមួយក្រុមតូច ពោលគឺគ្មានលក្ខណៈទូលំទូលាយ ព្រោះអ្នកជួញដូរសកម្មភាគច្រើនជាអ្នកដែលរស់នៅតំបន់ក្រុង ដែលមានប្រាក់ចំណូល និងប្រាក់សន្សំខ្ពស់។

លើសពីនេះទៀត ៤២%នៃអ្នកឆ្លើយតប ដែលមិនបានវិនិយោគលើរូបិយប័ណ្ណឌីជីល ក៏បានបង្ហាញចំណាប់អារម្មណ៍ ចង់វិនិយោគលើរូបិយប័ណ្ណឌីជីថលដែរ នៅឆ្នាំក្រោយ ដែលនេះបង្ហាញថា ចំនួនអ្នកជួញដូររូបិយប័ណ្ណឌីជីថល នឹងកើនឡើងខ្លាំងនាពេលអនា​គតដ៏ខ្លីខាងមុខ។

ការស្ទង់មតិនេះក៏បានរកឃើញដែរថា ជាធម្មតាវិនិយោគិននានា ដែលបានវិនិយោគលើរូបិយប័ណ្ណឌីជីថលរួចហើយ ផ្ដោតលើហាងឆេងឡើងចុះ ច្រើនជាងការជួញដូររយៈពេលវែង។

ការស្ទង់មតិដដែរបានរកឃើញថា ចំនួន៧៦.៣%នៃអ្នកជួញដូរររូបិយប័ណ្ណឌីជីថលសរុបបាននិយាយដូចៗគ្នាថា ពួកគេនៅតែមានឆន្ទៈប្រថុយប្រថាន ទោះបីជាការវិនិ​យោគរបស់ពួកគេ ត្រូវខាតបង់លើសពី៥០% ក្នុងរយៈពេលមួយថ្ងៃក៏ដោយ។ នេះឆ្លុះបញ្ចាំងពីទំនុកចិត្តខ្លាំងថា រូបិយប័ណ្ណឌីជីថល មានសមត្ថភាពអាចហក់ឡើងវិញយ៉ាងឆាប់រហ័ស។

ប្រហែល៤៨.៥%នៃអ្នកឆ្លើយតប ដែលបានវិនិយោគលើរូបិយប័ណ្ណឌីជីថលរួចហើយ បានចំណាយមិនលើសពី ១០%ឡើយ នៃប្រាក់សន្សំរបស់ខ្លួន ដើម្បីវិនិយោគលើរូបិយប័ណ្ណឌីជីថល។ នេះបង្ហាញថា ពួកគេមានការយល់ច្បាស់ អំពីហានិភ័យដែលទាក់ទងនឹងរូបិយប័ណ្ណឌីជីថល ហើយមានសមត្ថភាព អាចរៀបចំយុទ្ធសាស្ត្រត្រឹមត្រូវដើម្បីការពារការខាតបង់ធំ។

រូបិយប័ណ្ណឌីជីថលបាន និងកំពុងទាក់ទាញវិនិយោគិន កាន់តែច្រើនឱ្យហក់ចូលក្នុងទីផ្សារ ហើយតាមការពឹងថា ប្រជាប្រិយភាពរបស់វានឹងបន្តកើនឡើងកាន់តែខ្លាំង។ យោងតាមការស្ទង់មតិដដែលបង្ហាញថា វិនិយោគិនភាគច្រើន បង្ហាញពីការយល់ដឹងច្បាស់អំពីហានិភ័យនៃការវិនិយោគ។

ទោះជាយ៉ាងណា វិនិយោគិនខ្លះដែលឆ្លើយតប នៅក្នុងស្ទង់មតិនេះ ក៏បានបង្ហាញពីការយល់ដឹងខុសឆ្គង ចំពោះហានិភ័យទាក់ទង នឹងការប្រែប្រួលយ៉ាងឆាប់រហ័សនៃរូបិយប័ណ្ណឌីជីថលផងដែរ ព្រោះពួកគេជឿជាក់ថា ប្រាក់ចំណេញដែលបានពីរូបិយប័ណ្ណឌីជីថលនឹងកើនឡើងខ្ពស់ជាលំដាប់។

ក្រុមហ៊ុន Kasikorn Research Center បានឱ្យជាយោបល់ថា ដើម្បីកាត់បន្ថយហានិភ័យ និងបង្កើតឱកាស ពីការវិនិយោគលើរូបិយប័ណ្ណឌីជីថល បណ្ដាវិនិយោគិនក៏ដូចជា អាជ្ញាធរទីផ្សារចាំបាច់ ត្រូវមានទាំងចំណេះដឹងផ្នែកហិរញ្ញវត្ថុ និងចំណេះដឹងស៊ីជម្រៅអំពីបច្ចេកវិទ្យាហិរញ្ញវត្ថុ៕ Bangkok Post៕

ដោយ សុជាតា

ដោយៈ រដ្ឋសភាជាតិបានអនុម័តសេចក្តីព្រាងច្បាប់ស្តីពីការវិនិយោគនៅព្រះរាជាណាចក្រកម្ពុជាហើយ ដែលសេចក្តីព្រាងច្បាប់នេះមានលក្ខណៈបើកចំហ និងផ្តល់ភាពអនុគ្រោះជាងមុនពីរាជរដ្ឋាភិបាល ដល់វិនិយោគិនជាតិ និងអន្តរជាតិ។

សេចក្តីព្រាងច្បាប់ស្តីពីវិនិយោគនៃព្រះរាជាណាចក្រកម្ពុជា ជាសេចក្តីព្រាងច្បាប់ថ្មីមួយ ដែលត្រូវផ្តួចផ្តើម និងចង្អុលបង្ហាញដោយឯកសារ គោលនយោបាយអភិវឌ្ឍន៍វិស័យឧស្សាហកម្មកម្ពុជាឆ្នាំ២០១៥-២០២៥។

សេចក្តីព្រាងច្បាប់នេះ នឹងទាក់ទាញលើកកម្ពស់ការវិនិយោគ ដោយបុគ្គលសញ្ជាតិខ្មែរ ឬបរទេសប្រកបដោយគុណភាព ប្រសិទ្ធភាព និងប្រសិទ្ធផល សំដៅអភិវឌ្ឍសេដ្ឋកិច្ចសង្គមកម្ពុជា តាមរយៈការបង្កើតរបបលើកទឹកចិត្តវិនិយោគមួយ ដែលមានតម្លាភាព ភាពអាចប៉ាន់ប្រមាណទុកជាមុនបាន គ្មានការរើសអើង មានលក្ខណៈប្រកួតប្រជែង និងគាំទ្រគោលនយោបាយសង្គមសេដ្ឋកិច្ច។

ការធ្វើទំនើបកម្ម ការង្កើនផលិតភាពនៃឧស្សាហកម្មក្នុងស្រុក ការពង្រឹងការតភ្ជាប់ទៅក្នុងខែ្សច្រវាក់ផ្គត់ផ្គង់ក្នុងតំបន់ និងសកលលោក តាមរយៈការជំរុញកំណើនរំហូរចូលមូលធន ការផ្ទេរបច្ចេកវិទ្យាចំណេះដឹង និងចំណេះធ្វើជាដើម។

អនុប្រធានសភាពាណិជ្ជកម្មកម្ពុជា លោកឧកញ៉ាលឹម ហេងធ្លាប់បានមានប្រ​សាសន៍ថា ច្បាប់វិនិយោគថ្មីជាច្បាប់ដ៏ល្អមួយ ដែលផ្តល់ការលើកទឹកចិត្តដល់ក្រុមហ៊ុនជាតិ អន្តរជាតិនូវការលើកទឹកចិត្ត និងអនុគ្រោះជាច្រើន ដើម្បីទាក់ទាញលំហូរទុនវិនិយោ គពីបរទេសកាន់តែច្រើនថែមទៀត។

លោកបន្តថា “ច្បាប់វិនិយោគនេះជាច្បាប់តាក់តែងថ្មី ដោយមិនមែនជាច្បាប់ចាស់ យកមកធ្វើវិសោធនកម្មឡើយ”៕

ដោយៈគង់ សូរិយា

ភ្នំពេញៈ រដ្ឋសភាជាតិ បានអនុម័តសេចក្តីព្រាងច្បាប់ចំនួន៧ ដែលស្នើឡើងដោយរាជរដ្ឋាភិបាល ត្រូវបានរដ្ឋសភាអនុម័តទាំងស្រុង នៅក្នុងសម័យប្រជុំពេញអង្គលើកទី៦ នីតិកាលទី៦ នាព្រឹកថ្ងៃទី៩ ខែកញ្ញា ឆ្នាំ២០២១កន្លងមកនេះ។

កិច្ចប្រជុំពេញអង្គរដ្ឋសភានៅថ្ងៃនេះ មានរបៀបវារៈចំនួន៨ ដែលបានធ្វើឡើងក្រោមអធិបតីភាព សម្តេចអគ្គមហាពញាចក្រី ហេង សំរិន ប្រធានរដ្ឋសភា ដោយមានសមាជិករដ្ឋសភាចូលរួមចំនួន៨៣រូប។ របៀបវាៈទី១ ជាការបោះឆ្នោតជ្រើសតាំង លោក ម៉ែន កួន ជាសមាជិកគណៈកម្មការសិទ្ធិមនុស្ស ទទួលពាក្យបណ្តឹង អង្កេត និងទំនាក់ទំនងរដ្ឋសភា ព្រឹទ្ធសភា នៃរដ្ឋសភា ក្រៅពីនោះគឺជាការពិភាក្សា និងអនុម័តលើសេចក្តីព្រាងច្បាប់ចំនួន៧។

ចំណែកសេចក្តីព្រាងច្បាប់ចំនួន៧ ក្នុងចំណោម៨របៀបវារៈ ដែលត្រូវបានរដ្ឋសភា​អនុម័តនេះ រួមមាន៖
* សេចក្តីព្រាងច្បាប់ស្ដីពី ការអនុម័តយល់ព្រមលើកិច្ច ព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយតំបន់។
* សេចក្តីព្រាងច្បាប់ស្តីពី វិសោធនកម្មមាត្រា១៨ថ្មីច្បាប់ស្តីពី វិសោធនកម្មមាត្រា១៨ នៃច្បាប់ស្តីពីសវនកម្មនៃព្រះរាជាណាចក្រកម្ពុជា។
* សេចក្តីព្រាងច្បាប់ស្តីពី ការអនុម័តយល់ព្រមលើកិច្ចព្រម ព្រៀងពាណិជ្ជកម្មសេរី រវាងរាជរដ្ឋាភិបាលនៃព្រះរាជាណាចក្រកម្ពុជា និងរដ្ឋាភិបាលសាធារណរដ្ឋប្រជាមានិតចិន។
*សេចក្តីព្រាងច្បាប់ស្តីពីការប្រកួតប្រជែង។
* សេចក្តីព្រាងច្បាប់ស្តីពី វិសោធនកម្មមាត្រា១២៣ មាត ១៣៨ មាត្រា១៦២ មាត្រា៣០០ មាត្រា៣៤៣ មាត្រា៣៥០ មាត្រា៣៦៣ និងមាត្រា៣៦៧ ន ច្បាប់ស្តីពីការងារ ដែលត្រូវប្រកាសឲ្យប្រើដោយព្រះរាជក្រមលេខ ជសរកម/០៣៩៧/០១ ចុះថ្ងៃទី១៣ ខែមីនាឆ្នាំ១៩៩៧។
*សេចក្តីព្រាងច្បាប់ស្ដីពីវិនិយោគនៃព្រះរាជាណាចក្រកម្ពុជា។
* សេចក្តីព្រាងច្បាប់ស្ដីពី ការអនុម័តយល់ព្រមលើពិធីសារ ធ្វើវិសោធនកម្មកិច្ចពៀងអាស៊ានបូកបីស្តីពីការត្រៀមបម្រុងអង្ករសង្គ្រោះបន្ទាន់។

សេចក្តីព្រាងច្បាប់ទំាងនេះ ផ្តល់លទ្ធភាពកាន់តែប្រសើរ ដល់រាជរដ្ឋាភិបាលកម្ពុជា ក្នុងការកសាង និងអភិវឌ្ឍប្រទេសជាតិ ព្រមទាំងរួមចំណែកជាមួយតំបន់ និងសកលលោក សំដៅធានាដល់ការអភិវឌ្ឍប្រកបដោយចីរភាព ជាពិសេសសេចក្តីព្រាងច្បាប់ស្តីពីការអនុម័តយល់ព្រមលើកិច្ចព្រមព្រៀង ភាពជាដៃគូសេដ្ឋកិច្ចគ្រប់ជ្រុងជ្រោយតំបន់ នឹងក្លាយជាក្របខ័ណ្ឌស្នូល សម្រាប់ការលើកកម្ពស់ពាណិជ្ជកម្ម និងការវិនិយោគតំបន់ ដោ​យពង្រីកបន្ថែមទៀត នូវខ្សែច្រវាក់តម្លៃតំបន់ និងនាំមកនូវឱកាសទីផ្សារ និងការងារសម្រាប់អាជីវកម្ម និងប្រជាជននៅក្នុងប្រទេស និងតំបន់៕