រដ្ឋាភិបាលកម្ពុជាគ្រោងបញ្ចូលច្បាប់ស្តីពីការអនុម័តយល់ព្រម FTA កម្ពុជា-ចិនទៅកាន់រដ្ឋសភានៅដើមឆ្នាំ២០២២

ដោយៈគង់ ម៉ាលីន

ភ្នំពេញៈ បន្ទាប់ពីទទួលបានការគាំទ្រទាំងស្រុង ពីគណៈកម្មការជំនាញនៃរដ្ឋសភា កម្ពុជានឹងដាក់សេចក្តីព្រាងច្បាប់ស្តីពី ការអនុម័តយល់ព្រមលើកិច្ចព្រមព្រៀង ពាណិជ្ជកម្មសេរីកម្ពុជា-ចិន ក្រសួងពាណិជ្ជកម្ម គ្រោងបញ្ជូនសេចក្តីព្រាងច្បាប់នេះ ទៅកាន់រដ្ឋសភា ដើម្បីសុំការអនុម័តនៅឆ្នាំ២០២២ខាងមុខនេះ។

រដ្ឋមន្រ្តីក្រសួងពាណិជ្ជកម្មលោក ប៉ាន សូរស័ក្តិ បានបើកកិច្ចប្រជុំការពារសេចក្តីព្រាងច្បាប់ស្តីពី ការអនុម័តយល់ព្រមលើកិច្ចព្រមព្រៀង ពាណិជ្ជកម្មសេរីកម្ពុជា-ចិន កាលពីព្រឹកថ្ងៃទី៨ ខែកក្កដា ឆ្នាំ២០២១កន្លងទៅ ដែលប្រព្រឹត្តទៅតាមប្រព័ន្ធ វីដេអូ ក្រោមវត្តមានលោកស្រី និន សាផុន ប្រធានគណៈកម្មការទី៩ នៃរដ្ឋសភា បានលើកឡើងថា គោលបំណងសំខាន់នៃកិច្ចប្រជុំនេះ ដើម្បីពិនិត្យលើសេចក្តីព្រាងច្បាប់ ដើម្បីអាចចូលជាធរមានបាននៅនៅដើមឆ្នាំ២០២២ខាងមុខ។

ក្នុងអង្គប្រជុំនោះ លោករដ្ឋមន្រ្តីបានរៀបរាប់អំពីខ្លឹមសារ និងអត្ថប្រយោជន៍សំខាន់ៗ រួមមាន ការទទួលបានការបើកទីផ្សារឱ្យបានធំជាងមុន និងប្រសើរជាងមុន សម្រាប់មុខទំនិញកសិផល បន្លែផ្លែឈើ ផលិតផលកែច្នៃ និងសិប្បកម្ម និងផលិតផលជាច្រើនទៀត ស្របពេលដែលកម្ពុជាអាចផលិតបាន និងអនុលោមតាមវិធានអនាម័យ និងស្តង់ដារ ការទទួលបានលំហូរទីផ្សារពាណិជ្ជកម្មសេវាកម្ម ដែលកម្ពុជាអាចនាំចេញ ក្នុងករណីមានការបណ្តុះបណ្តាល ជំនាញ និងមានគុណវុឌ្ឍិគ្រប់គ្រាន់ ជាពិសេសនៅពេលដែលកម្ពុជាអាចពង្រឹងខ្លួនឯង ឱ្យរឹងមាំក្នុងវិស័យសេវាកម្មនាពេលអនាគត ផ្តល់កាលានុវត្តភាព ផ្នែកវិនិយោគដល់កម្ពុជាបានកាន់តែច្រើន ដែលនឹងផ្តល់ឱកាសដល់ធុរជនកម្ពុជា ដែលមានបំណងពង្រីកទីផ្សារសេវាកម្ម និងទំនិញនាំចេញឱ្យកាន់តែសម្បូរបែបទៅកាន់ទីផ្សារចិនការទទួលបានផលប្រយោជន៍ ពីការផ្ទេរបច្ចេកវិទ្យា ចំណេះដឹង ចំណេះធ្វើ និងជំនាញថ្មីៗ ពីការវិនិយោគផ្ទាល់របស់បរទេស ព្រមទាំងបង្កើតការងារថ្មីៗជូនប្រជាជនកម្ពុជា ហើយក៏ជាកត្តាដ៏សំខាន់ចូលរួមពង្រឹង ដល់វិស័យផលិតកម្មក្នុងស្រុក និងការរៀបចំនិងការបង្កើតនូវបរិយាកាសវិនិយោគ និងនយោបាយទាក់ទាញវិនិយោគទុនពីបរទេសជាដើម។

លោករដ្ឋមន្រ្តីបន្តថា ការសម្រេចបាននូវកិច្ចព្រមព្រៀងពាណិជ្ជកម្មសេរីកម្ពុជា-ចិន ពិតជាបានចូលរួមអនុវត្តន៍យុទ្ធសាស្រ្ត ចតុកោណដំណាក់កាលទី៤ របស់រាជរដ្ឋាភិបាលនីតិកាលទី៦នៃរដ្ឋសភា ស្របតាមចំណុចទី៤ស្តីពី ការពង្រឹង សមត្ថភាពកម្ពុជា ដើម្បីបន្តសមាហរណកម្មខ្លួនចូល ក្នុងសេដ្ឋកិច្ចតំបន់និងពិភពលោក ដែលបានកំណត់ក្រោម ផ្នែកទី២.២.២ ស្តីពីបរិស្ថានគ្របដណ្តប់ សម្រាប់ការអនុវត្តយុទ្ធសាស្រ្តទាំងមូល។

ជាពិសេស ក្នុងកាលៈទេសៈវិបត្តិកូវីដ-១៩ ដែលកិច្ចព្រមព្រៀងនេះ ក៏នឹងជួយដល់យុទ្ធសាស្រ្តស្តារឡើងវិញនូវសេដ្ឋកិច្ចកម្ពុជា ដែលបានរងការញាំញីយ៉ាងធ្ងន់ធ្ងរពីជំងឺកូវីដ-១៩ ព្រមទាំងជួយឱ្យមានភាពសាំនៃសង្គម -សេដ្ឋកិច្ចក្នុងប្រក្រតីភាពថ្មី នៃសង្គមកម្ពុជា តាមរយៈកំណើននៃការនាំចេញទៅទីផ្សារចិន និងលំហូរវិនិយោគចូលមកកម្ពុជា ដែលនឹងជួយបង្កើតការងារ និងចំណូលជូនប្រជាពលរដ្ឋយើង៕

ក្រុមហ៊ុន Hilton គ្រោងបើកសណ្ឋាគារថ្មីធំបំផុតនៅសឹង្ហបុរី ជាគំរោងធំបំផុតប្រចាំអាស៊ីប៉ាស៊ីហ្វិកនៅឆ្នាំ២០២២

ដោយៈឧត្តម

សិង្ហបុរី: ក្រុមហ៊ុន Hilton Hotels Corporation ដែលជាក្រុមហ៊ុនបដិសណ្ឋារកិច្ចពហុជាតិសាសន៍ដ៏ធំរបស់សហរដ្ឋអាមេរិក មានគម្រោងបើកដំណើរការសណ្ឋាគារប្រណីតថ្មីមួយនៅក្នុងប្រទេសសិង្ហបុរី ដែលធំបំផុតប្រចាំតំបន់អាស៊ី-ប៉ាស៊ីហ្វិក។ នេះបើយោងតាមសារព័ត៌មាន CNA ដែលបានចុះផ្សាយកាលពីពេលថ្មីៗនេះ។

សណ្ឋាគារថ្មីមានឈ្មោះថា Hilton Singapore Orchard ដែលមានបន្ទប់សរុបចំនួន១,០៨០បន្ទប់ខាងលើ នឹងបើកដំណើរការនៅខែមករាដើមឆ្នាំ២០២២ ក្រោយពីការជួសជុលកែលម្អអគាររួចរាល់ជាស្ថាពរ។

អគារសណ្ឋាគារប្រណីតនេះ គឺជាប្រែក្លាយពីសណ្ឋាគារបច្ចុប្បន្ន ដែលមានឈ្មោះថា Mandarin Orchard Singapore។ សណ្ឋាគារថ្មី Hilton Singapore Orchard នឹងត្រូវកាន់កាប់ដោយក្រុមហ៊ុនអចលនទ្រព្យ OUE Limited និងគ្រប់គ្រងដោយក្រុមហ៊ុន Hilton Hotels Corporation។

លោក Paul Hutton អនុប្រធានផ្នែកប្រតិបត្តិការនៃក្រុមហ៊ុន Hilton Hotels Corporation ប្រចាំតំបន់អាស៊ីអាគ្នេយ៍បានលើកឡើងថា “ដោយសារសិង្ហបុរី ជាមជ្ឈមណ្ឌលហិរញ្ញវត្ថុឈានមុខ និងជាគោលដៅក្រុងទេសចរណ៍ដ៏សំខាន់មួយ យើងមានសុទិដ្ឋិនិយម ចំពោះសក្កានុពលកំណើនរយៈពេលវែង នៃវិស័យបដិសណ្ឋារកិច្ចក្នុងប្រទេសនេះ នៅពេលសេដ្ឋកិច្ចចាប់ផ្ដើមងើបឡើងពីវិបត្តិកូវីដ-១៩ ហើយការធ្វើដំណើរត្រូវបានអនុញ្ញាតដូចប្រក្រតីឡើងវិញ”។

លោកបានបន្តថា យើងមានសេចក្តីសោមនស្សរីករាយ នឹងចាប់ផ្តើមឆ្នាំថ្មីជាមួយការបើកដំណើរការសណ្ឋាគារ Hilton Singapore Orchard នៅក្នុងទីក្រុងដែលជាច្រកចេញចូលដ៏សំខាន់ សម្រាប់តំបន់អាស៊ីអាគ្នេយ៍នេះ ហើយបន្តផ្ដល់សេវាបដិសណ្ឋារកិច្ចកម្រិតខ្ពស់ល្បីល្បាញរបស់យើង ដើម្បីស្វាគមន៍ភ្ញៀវគ្រប់រូប ដែលឈានជើចូលសណ្ឋាគារនេះ”។

ក្រុមហ៊ុន Hilton Hotels Corporation បានចេញសេចក្ដីប្រកាសព័ត៌មានថា ជាមួយបន្ទប់ធម្មតា និងបន្ទប់ស្វីត (Suite) សរុបចំនួន១,០៨០បន្ទប់ សណ្ឋាគារដែលមានអគារខ្ពស់ពីរនេះ នឹងក្លាយជាសណ្ឋាគារមួយ ក្នុងចំណោមសណ្ឋាគារធំៗបំផុតក្នុងប្រទេសសិង្ហបុរី៕

ការសិក្សាថ្មីៈទីផ្សារជួលខុនដូបន្តស្រអ័ព្ទនៅឆមាសទី១ឆ្នាំនេះ ដោយសារវិបត្តិ

ដោយៈគង់ សូរិយា

ភ្នំពេញៈ ការសិក្សាថ្មីមួយបានបង្ហាញថា ទីផ្សារជួលខុនដូ និងអាផាតម៉ិនបានបន្តធ្លាក់ចុះទាំងតម្លៃ និងអត្រាប្រើប្រាស់រួមនៅក្នុងទីផ្សារ ស្របពេលវិបត្តិជំងឺកូវីដ១៩មិនទាន់បានបញ្ចប់។

យោងតាមការសិក្សារបស់ក្រុមហ៊ុន CBRE Cambodia បានបង្ហាញកាលពីដើមសប្តាហ៍នេះថា ការជួលនៅក្នុងឆមាសទី១ ឆ្នាំ ២០២១ ខុនដូប្រណីតមានតម្លៃជាមធ្យម ១២,៣ ដុល្លារក្នុង១ម៉ែត្រការ៉េ សម្រាប់រយៈពេល១ ខែ ធ្លាក់ចុះ២,៧ភាគរយ និងប្រភេទមធ្យមមានតម្លៃ១០,១ ដុល្លារ ធ្លាក់ចុះ០,៧ ភាគរយ។ ដោយឡែកប្រភេទខុនដូតម្លៃសមរម្យមានតម្លៃ៨,៤ដុល្លារ កើន៧ភាគរយ។

អ្នកនាង គឹម គិនកេសា អ្នកគ្រប់គ្រងជាន់ខ្ពស់ក្រុមហ៊ុន CBRE Cambodia បានបានមានប្រសាសន៍ឲ្យដឹងថា ការរីករាលដាលនៃជំងឺកូវីដ១៩ ជាមូលហេតុចម្បងដែលធ្វើឱ្យទីផ្សារខុនដូធ្លាក់ចុះជាបន្តបន្ទាប់ ជាពិសេសរលកនៃការឆ្លងរាលដាលកូវីដ១៩ នៃព្រឹត្តិការណ៍សហគមន៍២០ កុម្ភៈ បានជះឥទ្ធិពលកាន់តែខ្លាំងបន្ថែមទៀត ដល់អ្នកអភិវឌ្ឍន៍ និងភ្នាក់ងារលក់ ក្នុងការឈានដល់កិច្ចព្រមព្រៀងទិញ-លក់ជាមួយអតិថិជន។

អ្នកនាងបន្តថា “ក្តីព្រួយបារម្ភអំពីសុវត្ថិភាពសុខភាព បានធ្វើឱ្យចំនួនអតិថិជនមកទស្សនាកន្លែងលក់មិនសូវមានទេ”។

សម្រាប់រយៈពេល៦ខែទៀត តម្លៃទំនងជានឹងមានស្ថិរភាព។ ការចាក់វ៉ាក់សាំងនឹងផ្តល់ទំនុកចិត្តដល់វិនិយោគិនផងដែរ។

តាមការព្យាករក្នុងឆមាសទី២ ឆ្នាំ២០២១ នេះនឹងមានខុនដូប្រមាណ១២ គម្រោង ដែលស្មើនឹងបន្ទប់សរុប៦៦៣៦ យូនីតបញ្ចប់ការសាងសង់ និងដាក់ចូលទីផ្សារ។ នេះបើយោងតាម CBRE Cambodia។

យោងតាមរបាយការណ៍និន្នាការសេដ្ឋកិច្ចសង្គម នៃក្រសួងសេដ្ឋកិច្ច និងហិរញ្ញវត្ថុ ចេញផ្សាយនៅដើមខែកក្កដាឱ្យដឹងថា ក្នុងរយៈពេល៥ខែ ដើមឆ្នាំ ២០២១ រដ្ឋាភិបាលកម្ពុជា បានអនុម័តគម្រោងសាងសង់សរុប១៨២៣ បើធៀបនឹងរយៈពេលដូចគ្នាឆ្នាំ ២០២០ ធ្លាក់ចុះប្រមាណ២៧៨គម្រោង។ ក្នុងនោះគម្រោងសំណង់លំនៅឋានមានចំនួន ១៦០៧ គម្រោងស្មើនឹង៨៧,៩ភាគរយ នៃសំណើសុំសាងសង់សរុប ធ្លាក់ចុះ១៣៩ គម្រោង ធៀបនឹងរយៈពេលដូចគ្នាឆ្នាំមុន។

គម្រោងលំនៅឋានដែលបានអនុញ្ញាតសាងសង់ គិតជាប្រាក់មានប្រមាណ២ ៣៤៩ លានដុល្លារធ្លាក់៣២,៦ ភាគរយ៕

រាជធានីភ្នំពេញប្រកាសបិទបញ្ចប់យុទ្ឋនាការចាក់វាំក់សាំងបង្ការជំងឺកូវីដ១៩

ដោយៈ គង់ លាងហួរ

ភ្នំពេញៈ អាជ្ញាធររាជធានីភ្នំពេញ និងក្រសួងសុខាភិបាលបានប្រកាសបិទបញ្ចប់យុទ្ឋនាការជាតិចាក់វ៉ាក់សាំងបង្ការជំងឺកូវីដ១៩ហើយ ដោយពលរដ្ឋក្នុងទីក្រុងនេះជាង២,១លាននាក់បានទទួលការចាក់វ៉ាក់សាំងរួចហើយ។

លោកឃួង ស្រេងអភិបាលរាជធានីភ្នំពេញមានមានប្រសាសន៍បានបញ្ជាក់ថា រាជធានីភ្នំពេញ បានបិទបញ្ចប់ការចាក់វ៉ាក់សាំងជូនប្រជាពលរដ្ឋ ដោយជោគជ័យ ហើយមិនមានប្រជាពលរដ្ឋណាម្នាក់គ្រោះថ្នាក់ ឬប៉ះពាល់អាយុជីវិតដោយសារចាក់វ៉ាក់សាំងកូវីដ១៩នោះឡើយ។

លោកបានបន្ថែមទៀតថា “ក្នុងអំឡុងពេលយុទ្ធនាការ ប្រជាពលរដ្ឋជាច្រើនបាននាំគ្នាសម្រុកមកចាក់វ៉ាក់សាំង នៅតាមកន្លែងដែលអាជ្ញាធរបានកំណត់”។

ជាមួយគ្នានេះ លោកស្រី ឱ វណ្ណឌីន បានឲ្យដឹងថា យុទ្ធនាការចាក់វ៉ាក់សាំងនេះ បានចាប់ផ្ដើមឡើងនៅថ្ងៃទី១០ ខែកុម្ភៈ ឆ្នាំ២០២១ ហើយមកទល់ថ្ងៃទី៧ ខែកក្កដាម្សិលមិញនេះ អ្នកដែលបានស្ម័គ្រចិត្តមកចាក់វ៉ាក់សាំង នៅក្នុងរាជធានីភ្នំពេញ សរុបចំនួន២,១៥២,៥៩៥នាក់ ក្នុងនោះមានប្រមាណ២ម៉ឺននាក់ មិនបានចាក់វ៉ាក់សាំងទេ ដោយសារបញ្ហាសុខភាពផ្ទាល់ខ្លួន មានន័យថាអ្នកបានចាក់សរុប (ដូសទី១) ចំនួន២,១២៨,៧៩១នាក់។

លោកស្រីវេជ្ជបណ្ឌិតបានបន្តថា ក្នុងអំឡុងពេលយុទ្ធនាការចាក់វ៉ាក់សាំង ប្រជាពលរដ្ឋមានឆន្ទៈខ្ពស់ណាស់ ក្នុងការចង់ចូលរួមចាក់វ៉ាក់សាំង មិនដូចមនុស្សអគិតមួយចំនួនដែលមានបំណងចង់រារាំង ដល់ដំណើរការចាក់វ៉ាក់សាំងនោះទេ។ បើគិតជាភាគរយ នៃចំនួនប្រជាជនសរុប នៅក្នុងរាជធានីភ្នំពេញ១២០.៦៥ភាគរយ ដែលនេះបញ្ជាក់ថា មានប្រជាពលរដ្ឋ មកធ្វើដំណើរមកពីខេត្តផ្សេង មកចាក់វ៉ាក់សាំងនៅភ្នំពេញ។

លោកស្រី ឱ វណ្ណឌីន និងលោកឃួង ស្រេង ក៏បានថ្លែងអំណរគុណយ៉ាងជ្រាលជ្រៅចំពោះសម្ដេចតេជោ ហ៊ុន សែន នាយករដ្ឋមន្ដ្រីនៃកម្ពុជា ដែលបានរិះរក និងខិតខំប្រឹងប្រែងធ្វើយ៉ាងណាឲ្យកម្ពុជា អាចទទួលបានវ៉ាក់សាំង ព្រមទាំងចាក់ជូនប្រជាពលរដ្ឋដោយឥតគិតថ្លៃ ដើម្បីការពារជំងឺកូវីដ១៩។

បន្ថែមពីនេះ ក៏បានថ្លែងអំណរគុណដល់ក្រុមគ្រូពេទ្យទាំងអស់ ដែលបានចូលរួមបំពេញកិច្ចការងារចាក់វ៉ាក់សាំងនេះ ដោយស្មារតីទទួលខុសត្រូវខ្ពស់ មិនខ្លាចនឿយហត់៕

វិនិយោគិនអចលនទ្រព្យនៅតែរំពឹងថាតម្លៃអចលនទ្រព្យនៅតែបន្តកើនឡើង

ដោយៈវឌ្ឈនៈ

ភ្នំពេញៈ រយៈពេលជាង១០ឆ្នាំកន្លងមកនេះ តម្លៃអចលនទ្រព្យនៅកម្ពុជាបានបន្តកើនឡើងជាបន្តបន្ទាប់ពីមួយឆ្នាំទៅមួយឆ្នាំ ហើយមកដល់អំឡុងពេលនៃវិបត្តិកូវីដ១៩នេះ តម្លៃអចលនទ្រព្យជារួមមិនមានការធ្លាក់ចុះនោះទេ។

តំបន់ខ្លះនៅតែខ្ពស់ តំបន់ខ្លះទៀតនៅទ្រឹងមួយរយៈ ។ វិនិយោគិនអចលនទ្រព្យនៅតែមើលឃើញពីឱកាស នៃការវិនិយោគ ដើម្បីបានប្រាក់ចំណេញបន្ថែមទៀតទៅលើអចលនទ្រព្យជាពិសេសដីធ្លី ។

លោកឧកញ៉ាលឹម លាង អគ្គនាយកក្រុមហ៊ុនតំបន់សេដ្ឋកិច្ចពិសេសឆកកំពង់សោម បានមានប្រសាសន៍នៅក្នុងកិច្ចសម្ភាសន៍មួយ កាលពីពេលថ្មីៗឱ្យដឹងថា ទីផ្សារអចលនទ្រព្យយើងនៅតែសង្ឃឹមថា នឹងឡើងថ្លៃបន្តទៀតនៅពេលអនាគត ដែលអាចបង្កើតប្រាក់ចំណេញដល់វិនិយោគិន ក៏ប៉ុន្តែបើចង់បានប្រាក់ចំណេញខ្ពស់ គួរតែវិនិយោគនៅតំបន់ណា ដែលនៅឆ្ងាយពីរាជធានីភ្នំពេញ ដូចជា ទៅជាយរាជធានីភ្នំពេញ ឬទៅខេត្តណា ដែលតម្លៃអចលនទ្រព្យនៅមានកម្រិតនៅឡើយ។

លោកបន្តថា “អ្នកមានទុន អាចពង្រីកការវិនិយោគរបស់ខ្លួន ដោយទិញដីធ្លីទុកដើម្បីអភិវឌ្ឍន៍នៅពេលអនាគត ហើយវាក៏នឹងនាំមកនូវប្រាក់ចំនេញបន្តបន្ទាប់ផងដែរ”។

លោកបន្តថា “សម្រាប់រូបលោកមុននឹងទិញដី នៅតំបន់ណាមួយកន្លែងណាមួយ គឺត្រូវគិតម៉ត់ចត់”។

ឧទាហរណ៍ថា មុននឹងទិញដី១កន្លែងតម្លៃ១០ម៉ឺនដុល្លារ ត្រូវគិតថារយៈពេលប៉ុន្មានឆ្នាំទើបអាចបានផលចំណេញគុណជាពីរ ជាបី ហើយបើសិនជាទិញហើយ ស្រាប់តែមានវិបត្តិសេដ្ឋកិច្ច ឬវិបត្តិអ្វីមួយកើតឡើងថា តើត្រូវចំណាយពេលប៉ុន្មានឆ្នាំទើបទទួលបានផលចំណេញត្រលប់មកវិញ។ ដូច្នេះមុននឹងធ្វើអ្វីមួយ ត្រូវគិតឱ្យបានល្អិតល្អន់ ទើបមិនចំណាយពេលក្នុងការវិនិយោគឬចំនេញបានតិចតួច ។

ជាមួយគ្នានេះ លោកសន សៀបនាយកប្រតិបត្តិក្រុមហ៊ុនឃីរៀលអ៊ីស្ទេតក៏បានលើកឡើងផងដែរថា ការវិនិយោគលើដីធ្លីនៅតែទទួលបានផលចំណេញ ប៉ុន្តែអ្នកវិនិយោគ គួរតែងាកទៅរកតំបន់ដែលឆ្ងាយពីទីប្រជុំជនឬទីក្រុងបន្តិច ពីព្រោះតម្លៃដីធ្លីនៅជិតៗក្រុងវាបានឡើងថ្លៃរួចទៅហើយ។

ដូច្នេះឱកាសនៃការឡើងថ្លៃបន្តទៀតនោះ មានតិចតួចប៉ុណ្ណោះ ប៉ុន្តែសម្រាប់តំបន់នៅឆ្ងាយពីរាជធានី ឬទីក្រុងឱកាសនៃការឡើងថ្លៃបន្តគឺនៅមានច្រើនទៀត ហើយប្រើពេលខ្លីប៉ុណ្ណោះនឹងទទួលបានឱកាសចំណេញ។

លោកបន្តថា “ការវិនិយោគលើដីធ្លី គេត្រូវសម្លឹងមើលលើទិសដៅ នៃការអភិវឌ្ឍរបស់រដ្ឋាភិបាល បើរដ្ឋាភិបាលសម្លឹងលើការអភិវឌ្ឍ សាធារណៈនៅតំបន់ណាមួយ យើងគួរតែទៅរកការវិនិយោគនៅតំបន់នោះ វាពិតជាមិនខុសឡើយ”៕

តម្លៃជួលអចលនទ្រព្យនៅក្រុងព្រះសីហនុដាំក្បាលចុះស្ទើរមិនគួរឲ្យជឿ

ដោយៈគង់ សូរិយា

ភ្នំពេញៈ ស្របពេលព្រឹត្តិការណ៍កើតឡើងផ្ទួនៗនៅក្រុងព្រះសីហនុ បានធ្វើឲ្យទីផ្សារជួលអចលនទ្រព្យនៅក្រុងនេះ ដាំក្បាលចុះមិនគួរឲ្យជឿ ធៀបមុនពេលបិទហ្គេមអនឡាញ។

អ្នកនាំពាក្យរដ្ឋបាលខេត្តព្រះសីហនុ លោកឃាង ភារម្យបានមានប្រសាសន៍ឲ្យដឹងតាមទូរស័ព្ទនារសៀលថ្ងៃទី៨ កក្ដដានេះថា ទីផ្សារជួលអចលនទ្រព្យនៅក្រុងព្រះសីហនុ បានធ្លាក់ចុះខ្លាំង ដែលពីមុនផ្ទះមួយបន្ទប់ជួលបាន១០០០ដុល្លារក្នុងមួយខែ បច្ចុប្បន្ននៅសល់តម្លៃចមន្លោះពី៥០ ទៅ៨០ ឬ១០០ដុល្លារអាស្រ័យលើទីតាំង និងភាពទាក់ទាញរបស់អចលនទ្រព្យ។

លោកបន្តថា “វិបត្តិកូវីដ១៩ មិនត្រឹតែប៉ះពាល់ដល់ក្រុងព្រះសីហនុទេ ប៉ុន្តែវាប៉ះពាល់ទូទាំងពិភពលោក ប៉ុន្តែបើសិនជាយើងអាចដកជំងឺនេះចេញ ខ្ញុំជឿថាអ្វីៗនឹងឈានមករកភាពល្អប្រសើរវិញហើយ”។លោកបន្តថា “ដោយសារការព្រួយបារម្ភពីបញ្ហានេះ រដ្ឋបាលខេត្តបានធ្វើការងារយ៉ាងសកម្ម លើការចាក់វ៉ាក់សាំងដូសទី២ និងពង្រឹងការត្រួតពិនិត្យតាមផ្លូវគោក ផ្លូវទឹក និងផ្លូវអាកាស”។

លោកឃាង ភារម្យបានបន្តថា ដោយសារវិបត្តិនេះ អ្វីៗបាននិងកំពុងជួបផលវិបាក ដោយបច្ចុប្បន្នផ្សារធំៗ នៅក្នុងក្រុងមិនទាន់អនុញ្ញាត្ត ឲ្យបើកដំណើរការឡើងវិញនៅឡើយទេ ដោយសារផ្សារជាបណ្តុំមនុស្ស ដែលនាំឲ្យមានការឆ្លងរាលដាលច្រើន។

ទាក់ទងនឹងការសាងសង់គំរោងអភិវឌ្ឍន៍នានា លោកឃាង ភារម្យបានឲ្យដឹងថា គំរោងអភិវឌ្ឈន៍ធំៗរបស់ក្រុមហ៊ុនអន្តរជាតិមួយចំនួន ដែលមានទុនគ្រប់គ្រាន់នៅតែបន្តសកម្មភាព ដូចជាគម្រោងរបស់ក្រុមហ៊ុនPrice Real Estate គម្រោងសាងសង់ទីក្រុងរាម ជាដើមនៅតែបន្តសកម្មភាពចាក់ដីបំពេញ និងគំរោងអភិវឌ្ឍន៍ចំនួនចំនួនតូចបានសាងសង់បណ្តើរៗផងដែរ ប៉ុន្តែភាគច្រើនបានផ្អាកសកម្មភាព៕

មន្រ្តីទេសចរណ៍អាស៊ានឯកភាពគ្នាសហការរៀបចំកីឡាស៊ីហ្គេមនៅកម្ពុជា ដើម្បីទាក់ទាញទេសចរណ៍មកកាន់តំបន់ឡើងវិញ

ដោយៈសុខហេង

ភ្នំពេញៈ បណ្តាមន្រ្តីទេសចរណ៍អាស៊ាន បានឯកភាពគ្នា ក្នុងការសហការរៀបចំព្រឹត្តិការណ៍កីឡាស៉ីហ្គេម ឆ្នាំ២០២៣ ឱ្យក្លាយជាយុទ្ធនាការទាក់ទាញភ្ញៀវទេសចរអន្តរជាតិ ឱ្យមកទស្សនានៅក្នុងតំបន់អាស៊ានឡើងវិញ ក្រោយមានការធ្លាក់ចុះដោយសារវិបត្តិជំងឺកូវីដ-១៩ ចូលមករំខានដល់ការធ្វើដំណើររបស់ភ្ញៀវអន្តរជាតិចូលមកក្នុងតំបន់នេះ។

ការឯកភាពគ្នានេះធ្វើឡើងក្នុងកិច្ចប្រជុំ ស្ថាប័នទេសចរណ៍ជាតិអាស៊ានលើកទី៥៤ តាមប្រព័ន្ធអនឡាញ នាថ្ងៃទី០៧ ខែកក្កដា ឆ្នាំ២០២១ ដឹកនាំដោយកម្ពុជា។

នាឱកាសនោះដែរ តំណាងប្រទេសសមាជិកអាស៊ាន បានដាក់ចេញនូវគំនិតផ្តួច ផ្តើម និងផែនការស្តារវិស័យទេសចរណ៍អាស៊ាននៅពេលខាងមុខ ជាពិសេសបានសម្រេចរៀបចំ សកម្មភាពផ្សព្វផ្សាយទេសចរណ៍អាស៊ាន ដោយយកព្រឹត្តិការណ៍កីឡាស៊ីហ្គេម ២០២៣ (SEA Game 2023) ជាព្រឹត្តិការណ៍ទាក់ទាញទេសចរអន្តរជាតិ មកទស្សនាតំបន់របស់ខ្លួន។

ក្រសួងទេសចរណ៍កម្ពុជាបានបញ្ជាក់ថា ការរៀបចំផែនការផ្សព្វផ្សាយនេះនឹងពិភាក្សាលម្អិតក្នុងកម្រិតគណៈកម្មាការទេសចរណ៍អាស៊ាន។

ស្របនឹងគំនិតផ្តួចផ្តើមនេះ អាស៊ានក៏បានឯកភាព លើការដាក់ឲ្យអនុវត្តនៅពេលខាងមុខ នូវផែនការស្តារវិស័យទេសចរណ៍អាស៊ាន អមដោយការរៀបចំគោលការណ៍អាស៊ានរួមស្តីពី អនាម័យ និងសុវត្ថិភាពដែលនឹងដាក់ឲ្យប្រើប្រាស់ក្នុងឆ្នាំ២០២១នេះ។

លើសពីនេះទៀត អាស៊ានក៏បានឯកភាពដាក់ចុះ កម្មវិធីស្តារវិស័យទេសចរណ៍ផ្ទៃក្នុង (Intra-ASEAN Travel Program) អាស៊ានដែលនឹងត្រូវអនុវត្តនៅពេលខាងមុខ។

ប្រទេសសមាជិកអាស៊ានទាំងអស់ រួមទាំងកម្ពុជាផងដែរ បាននិងកំពុងរៀបចំបើកទទួលឡើងវិញនូវវិស័យទេសចរណ៍អន្តរជាតិរបស់ខ្លួន៕

កំពូលមហាសេដ្ឋី Elon Musk ដេញថ្លៃយកគម្រោងសាងសង់ផ្លូវរថភ្លើងក្រោមដី នៅរដ្ឋផ្លរីដា

ដោយៈសុខុម

កាលីហ្វ័រញ៉ា: ក្រុមហ៊ុនសាងសង់ផ្លូវក្រោមដី Boring Company របស់កំពូលមហាសេដ្ឋី Elon Musk ដែលមេរបស់Tesla បានដាក់សំណើដេញថ្លៃ យកគម្រោងសាងសង់ផ្លូវរថភ្លើងក្រោមដីនៅក្រុង Fort Lauderdale រដ្ឋផ្លរីដា សហរដ្ឋអាមេរិក។ នេះបើយោងតាមទីភ្នាក់ងារព័ត៌មាន Reuters ចុះផ្សាយនៅថ្ងៃទី៨ កក្កដា នេះ។

លោក Dean J. Trantalis ចៅហ្វាយក្រុង Fort Lauderdale បានលើកឡើងតាមបណ្ដាញទំនាក់ទំនងសង្គម Twitter កាលពីថ្ងៃអង្គារទី៦ កក្កដា ថា “គម្រោងនេះជាវិធីដ៏ល្អមួយ ប្រកបដោយភាពច្នៃប្រឌិតខ្ពស់ ដើម្បីកាត់បន្ថយការកកស្ទះចរាចរណ៍”។ លោកបានបន្ថែមទៀតថា “ក្រុមហ៊ុនផ្សេងៗទៀតមានរយៈពេល៤៥ថ្ងៃ សម្រាប់ការដាក់សំណើដេញថ្លៃយកគម្រោងនេះ”។

ទោះជាយ៉ាងណា លក្ខខណ្ឌផ្សេងៗនៃការដេញថ្លៃយកគម្រោងនេះ មិនត្រូវបានទម្លាយឱ្យដឹងទេ ហើយក្រុមហ៊ុន Boring Company ក៏មិនបានធ្វើការអត្ថាធិប្បាយនោះដែរជុំវិញបញ្ហានេះ។

ក្នុងខែមិថុនា កន្លងទៅ ក្រុមហ៊ុនBoring Company បានបើកគម្រោងផ្លូវក្រោមដីដំបូងបង្អស់របស់ខ្លួន នៅក្រុងឡាសវេហ្គាស (Las Vegas) សម្រាប់ដឹកភ្ញៀវទេសចរណ៍ក្នុងទីក្រុងនេះដោយប្រើរថយន្តTesla បើកបរដោយមនុស្ស។

ក្រុមហ៊ុន Boring Company និយាយថា ផ្លូវរថភ្លើងក្រោមដីប្រវែង២,៧គីឡូម៉ែត្រនេះនឹងជួយកាត់បន្ថយការកកស្ទះ និងចំណេញពេលវេលាក្នុងការធ្វើដំណើរ។

កាលពីខែកុម្ភៈ លោក Francis Suarez ចៅហ្វាយក្រុង Miami បានលើកឡើងថា លោក Elon Musk បានបានប្រាប់លោកថា គម្រោងផ្លូវរូងក្រោមដីមួយ ដែលកាលពីមុនមានតម្លៃ១ពាន់លានដុល្លារ គឺលោកអាចបញ្ចប់ក្នុងរយៈពេល៦ខែ និងយកតម្លៃត្រឹមតែ៣០លានដុល្លារប៉ុណ្ណោះ៕

ការសិក្សាថ្មីៈទីផ្សារអចលនទ្រព្យនៅបន្តរងសម្ភាធនិងជួបភាពមិនច្បាស់់លាស់

ដោយៈគង់ សូរិយា

ភ្នំពេញៈ ការសិក្សាថ្មីបានបង្ហាញថា ទីផ្សារអចលនទ្រព្យនៅកម្ពុជា នៅតែបន្តរងសម្ពាធ និងមានភាពមិនប្រាកដប្រជាខ្ពស់ ទោះបីជាយុទ្ធនាការចាក់វ៉ាក់សាំងរបស់រដ្ឋាភិបាលកើនឡើងជាបន្តបន្ទាប់ក្ដី។

យោងតាមសន្និសីទនៃបទបង្ហាញទិន្នន័យទីផ្សារ របស់ភ្នាក់ងារអចលនទ្រព្យ CBRE កាលពីម្សិលមិញ គិតត្រឹមឆមាសទី១ វិស័យធំៗទាំង៤ នៃទីផ្សារអចលនទ្រព្យ នៅតែមាននិន្នាការធ្លាក់ចុះ។

សម្រាប់ទីផ្សារខុនដូ មានតែ៥ ក្នុងចំណោម១៧គម្រោងប៉ុណ្ណោះ ដែលបានការបញ្ចប់ការដ្ឋានតាមផែនការសម្រាប់ឆ្នាំ ២០២១។ លើសពីនេះ ចំនួនខុនដូដែលគម្រោងនឹងបញ្ចប់នៅឆ្នាំ ២០២១ ត្រូវបានព្យាករថានឹងធ្លាក់ចុះពី១០.៨២៥យូនីត មកនៅត្រឹមតែ ៧.៩០៩យូនីតប៉ុណ្ណោះ ដោយសារគម្រោងមួយចំនួនផ្អាកការសាងសង់។

ឆមាសទី១នេះ តម្លៃលក់ខុនដូកម្រិតខ្ពស់ និងកម្រិតមធ្យមធ្លាក់ចុះ៦,២% និង ៧,១%។ ដូចគ្នានេះ តម្លៃជួលក៏ធ្លាក់ចុះ២,៧% និង០,៧% បើធៀបនឹងឆមាសទី២ នៃឆ្នាំ២០២០។

សម្រាប់ទីផ្សារអាផាតមិនជួលវិញ ក៏ធ្លាក់ចុះគួរឱ្យកត់សម្គាល់ដែរ ដោយអត្រាជួលធ្លាក់ចុះ ៥,២% និង ៦,៧% សម្រាប់អាផាតមិន A និង B។

ទីផ្សារលក់រាយ ឬទីផ្សារទំនើប នៅតែជួបបញ្ហាធ្ងន់ធ្ងរជាងគេ ដោយអត្រាអ្នកជួលតូបក្នុងផ្សារទំនើបធ្លាក់ចុះ៤,៦% ជាមធ្យម។

ដូចគ្នានេះដែរ អត្រាចំនួនក្រុមហ៊ុនដែលទៅជួលទីផ្សារការិយាល័យ ក៏ធ្លាក់ចុះ ៣,៨% ដែរ ប៉ុន្តែអត្រាតម្លៃជួលបែរជាកើនបន្ដិចបន្តួច ព្រោះបានធ្លាក់ខ្លាំងកាលពីចុងឆ្នាំ ២០២០ រួចមកហើយ។

នាយកគ្រប់គ្រងក្រុមហ៊ុន CBRE Cambodia លោក James Hodge បានមានលើកឡើងថា វិបត្តិកូវីដនៅតែបន្តបង្កបញ្ហាជាច្រើន ដល់វិស័យអចលនទ្រព្យ រួមមាន ការដាច់សង្វាក់ផ្គត់ផ្គង់សម្ភារៈសំណង់ ការខ្វះកម្លាំងពលករសំណង់ បញ្ហាកង្វះរំហូរសាច់ប្រាក់របស់អ្នកអភិវឌ្ឍន៍ ការពន្យារពេលសាងសង់គម្រោង ក៏ដូចជាការផ្គត់ផ្គង់លើសតម្រូវការ។

ប្រធានជាន់ខ្ពស់ និងជាប្រធាននាយកដ្ឋានស្រាវជ្រាវ និងប្រឹក្សាយោបល់របស់ CBRE Cambodia កញ្ញា គឹម កិនកេសាបានបន្ថែមថថា វិបត្តិកូវីដធ្វើឱ្យមានបញ្ហាពិតមែន តែវាក៏ជាហ្រ្វាំងទប់ កំណើនការផ្គត់ផ្គត់លើសតម្រូវការកើនឡើង ជាបន្តបន្ទាប់ក្នុងរយៈពេលជិត១០ឆ្នាំកន្លងមកនេះដែរ។

កញ្ញាបានបន្តថា នេះចាត់ទុកថាជាការផ្លាស់ប្ដូរ និងសម្របខ្លួនរបស់ទីផ្សារមួយដ៏សំខាន់ ហើយក៏ជាការតម្រង់ទិសវិជ្ជមាន ឱ្យទីផ្សារនៅពេលអនាគតផងដែរ”៕

តម្រូវការជើងហោះហើរឯកជនកើនឡើងខ្ពស់ក្នុងតំបន់រួមទាំងកម្ពុជា ជំរុញឱ្យក្រុមហ៊ុន Yugo ពន្លឿនការពង្រីកខ្លួននៅអាស៊ីអាគ្នេយ៍

ដោយៈសុខុម

ភ្នំពេញ: ទោះបីជាប្រតិបត្ដិការជើងហោះហើរពាណិជ្ជកម្ម នៅតែត្រូវការពេលវេលាយូរទៀត ទម្រាំនឹងងើបឡើងវិញពីវិបត្តិកូវីដ-១៩ យ៉ាងណាក្ដី ក៏ក្រុមហ៊ុនអាកាសចរណ៍ឯកជនមួយ ទទួលបានកំណើនជើងហោះហើរឯកជន ដែលទាមទារឱ្យក្រុមហ៊ុននេះពង្រីកផ្លូវហោះហើរថ្មីៗរបស់ខ្លួនទូទាំងអាស៊ីអាគ្នេយ៍។

ថ្លែងទៅកាន់សារព័ត៌មាន TTG Asia ដែលចុះផ្សាយនៅថ្ងៃទី៨ កក្កដា នេះ លោក Jim Baldy នាយកប្រតិបត្តិក្រុមហ៊ុន Yugo ដែលជាPlatform ភ្ជាប់ជើងហោះហើរទូទាំងតំបន់អាស៊ី-ប៉ាស៊ីហ្វិក បានលើកឡើងថា ក្រុមហ៊ុនរបស់លោកបានចាប់ផ្តើមដំណើរការផ្លូវហោះហើរថ្មីៗ ក្នុងប្រទេសហ្វីលីពីន ប្រទេសកម្ពុជា ប្រទេសម៉ាឡេស៊ី និងប្រទេសថៃ។

លោកបានបញ្ជាក់ថា ផ្លូវហោះហើរមួយចំនួនដែលទាក់ទាញជាងគេ រួមមានក្រុងម៉ានីល-កោះឯកជន Banwa ក្នុងប្រទេសហ្វីលីពីន ខេត្តកោះកុង-ក្រុងព្រះសីហនុ ក្នុងប្រទេសកម្ពុជា ក្រុងបាងកក-កោះសាមុយ(Samui) ក្នុងប្រទេសថៃ ក្រុងគូឡាឡាំពួ និង តំបន់ខ្ពង់រាបGenting Highlands-កោះឡាងហ្គាវី (Langkawi) ក្នុងប្រទេសម៉ាឡេស៊ី”។

ជាមួយនឹងផ្លូវហោះហើរបន្ថែមទាំងនេះ បច្ចុប្បន្នក្រុមហ៊ុនYugo ធ្វើប្រតិបត្តិការហោះហើរទៅកាន់ជាង១៥០គោលដៅ ក្នុងតំបន់នេះជាមួយនឹងចំនួនយន្តហោះជាង៥០គ្រឿង ដែលផលិតដោយក្រុមហ៊ុនផលិតយន្តហោះល្បីៗ ដូចជា ក្រុមហ៊ុន Gulfstream ក្រុមហ៊ុន Bombardier ក្រុមហ៊ុន Dassault Falcon ក្រុមហ៊ុន Bell ក្រុមហ៊ុន Airbus ក្រុមហ៊ុន Leonardo និងក្រុមហ៊ុន Robinson ជាដើម។

បច្ចុប្បន្នក្រុមហ៊ុន Yugoកំពុងសហការជាមួយភ្នាក់ងារទេសចរណ៍ សម្រិតសម្រាំងមួយចំនួន ដើម្បីផ្គត់ផ្គង់ជើងហោះហើរពិសេសរបស់ខ្លួន ហើយបើកទ្វារចំហរង់ចាំស្វាគមន៍ក្រុមហ៊ុនណាដែលចង់ចាប់ដៃគូសហការជាមួយខ្លួន។

ខណៈការធ្វើដំណើរតាមយន្តហោះឯកជន ត្រូវបានចាត់ទុកថាជាសេវាផ្ដាច់មុខសម្រាប់តែអ្នកមាន និងជនល្បីល្បាញ ក្រុមហ៊ុនYugo បានផ្ដល់ដំណោះស្រាយដ៏ល្អប្រសើរ ដោយយកតម្លៃធូរថ្លៃ ដើម្បីទទួលបានចំនួនភ្ញៀវច្រើនបន្តិច។ អតិថិជនរបស់ក្រុមហ៊ុនYugo អាចស្វែងរក និងកក់ជើងហោះហើរតាមអនឡាញ ឬពឹងផ្អែកភ្នាក់ងាររបស់ Yugo ជាអ្នករៀបចំឱ្យ។

លោក Jim Baldy បានគូសបញ្ជាក់ថា យន្តហោះ និងអ្នកដំណើរទាំងអស់របស់ខ្លួននៅតែត្រូវអនុវត្តតាមវិធាន និងលក្ខខណ្ឌតម្រូវផ្នែកសុខាភិបាលរបស់ប្រទេសនីមួយៗ៕

1...1,8471,8481,849...3,264 Page 1,848 of 3,264