សកម្មភាពទិញលក់ដីធ្លីនៅខណ្ឌព្រែកព្នៅ មានសន្ទុះឡើងវិញក្នុងរយៈពេលប៉ុន្មានខែចុងក្រោយនេះ

ដោយៈវឌ្ឍនៈ

ភ្នំពេញៈ ខណ្ឌព្រែកព្នៅ ប៉ែកខាងជើងរាជធានីភ្នំពេញ ចាប់ផ្ដើមមានសន្ទុះនៃការទិញលក់ដីធ្លីឡើងវិញ នៅក្នុងរយៈពេលប៉ុន្មានខែចុងក្រោយនេះ បើទោះបីជាស្ថានភាពកូវីដ១៩ នៅក្នុងប្រទេសកម្ពុជានៅតែចោទជាបញ្ហាក៏ដោយ។

យោងតាមរបាយការណ៍របស់ក្រុមហ៊ុនអចលនទ្រព្យ Zillion Holding បានឱ្យដឹងថា ខណ្ឌព្រែកព្នៅមានកំណើនការទិញលក់ដីធ្លីឡើងវិញ គួរឱ្យកត់សម្គាល់ក្នុងរយៈពេល៣ខែចុងក្រោយនេះ ក្នុងនោះប្រតិបត្តិការទិញលក់ដីធ្លី ក្នុងខណ្ឌព្រែកព្នៅរយៈពេល៣ខែចុងក្រោយនេះ គិតចាប់ពីខែមិថុនាដល់ខែសីហាឆ្នាំ២០២១នេះ មានចំនួនប្រមាណជិត១៤០ប្រតិបត្តិការ កើនឡើងប្រមាណ៦០ភាគរយធៀបនឹង៣ខែដើមឆ្នាំ ។

កំណើនទិញលក់នេះ គឺជាទំនុកចិត្តរបស់វិនិយោគិន ក្នុងការចាប់យកឱកាសក្នុងការវិនិយោគដីធ្លីក្នុងខណ្ឌព្រែកព្នៅ ដែលជាទិសដៅវិនិយោគសម្រាប់លំនៅឋានតម្លៃសមរម្យនៅខណ្ឌព្រែកព្នៅ។

ទិន្នន័យរបស់ក្រុមហ៊ុនអចលនទ្រព្យដដែលនេះឱ្យដឹងថា ប្រតិបត្តិការទិញលក់ដីធ្លីក្នុងខណ្ឌព្រែកព្នៅរយៈពេល៨ខែដើមឆ្នាំ មានប្រមាណជាង២៥០ប្រតិបត្តិការ ក្នុងនោះខែសីហា មានប្រតិបត្តិការទិញលក់ខ្ពស់ជាងគេជិត៧០ប្រតិបត្តិការ ។

យោងតាមទិន្នន័យរបស់ក្រុមហ៊ុន Century 21 ប្រចាំខណ្ឌព្រែកព្នៅឱ្យដឹងថា តម្លៃដីធ្លីនៅក្នុងខណ្ឌព្រែកព្នៅ សម្រាប់អភិវឌ្ឍន៍លំនៅឋាន មានតម្លៃចន្លោះពី៨០ដុល្លារអាមេរិករហូតដល់ ២៣០០ដុល្លារអាមេរិកក្នុងមួយម៉ែត្រការ៉េ ។

អ្នកជំនាញអចលនទ្រព្យជាច្រើន ក៏បានមើលឃើញថាសក្ដានុពល តំបន់ប៉ែកខាងជើងរាជធានីភ្នំពេញ ដោយតំបន់នេះគឺកំពុងមានការអភិវឌ្ឍទៅលើលំនៅឋាន ក្នុងនោះគេមើលឃើញថា តំបន់ទីក្រុងរណបមួយ កំពុងទាក់ទាញសក្ដានុពលវិនិយោគកាន់តែខ្លាំងនៅតំបន់នៃខណ្ឌព្រែកព្នៅ ។

លោកឧកញ៉ាចេង ខេង អគ្គនាយកក្រុមហ៊ុនស៊ីភីអិល បានមានប្រសាសន៍ថា តំបន់ប៉ែកខាងជើង យើងមើលឃើញថានៅតែមានភាពទាក់ទាញ ហើយក្នុងនោះយើងមើលឃើញថា គម្រោងពហុកីឡដ្ឋានជាតិមរតកតេជោ និងវិមានឈ្នះឈ្នះ បាននិងកំពុងបង្ហាញពីសក្ដានុពល ក្នុងការទាក់ទាញវិនិយោគិនបន្ថែមទៀត ទៅកាន់តំបន់ប៉ែកខាងជើងរាជធានីភ្នំពេញ ខណៈហេដ្ឋារចនាសម្ព័ន្ធនៅតំបន់នោះ ក៏មានការអភិវឌ្ឍច្រើនក្នុងពេលបច្ចុប្បន្ន។

ចំណែកអ្នកស្រី Grace Rachy Fong នាយិកាក្រុមហ៊ុន Centurt21 Cambodia បានមានប្រសាស​ន៍ថា សកម្មភាពទិញលក់ដីធ្លីតម្លៃចាប់ពី១ ដល់១០លានដុល្លារបានកើនឡើងវិញប្រមាណ៤០ភាគរយ បើធៀបនឹងអំឡុងឆ្នាំ២០១៩ ដោយសារសកម្មភាពវិនិយោគដីធ្លីកំពុងមានភាពពេញនិយម ដោយសារដីធ្លីបានផ្តល់ផលចំណេញច្បាស់លាស់ និងផ្តល់ផលចំណេញរយៈពេលវែង។

អ្នកស្រីបន្តថា “ការរីកចម្រើននៃការទិញលក់ដីធ្លី នឹងកើនឡើងបន្ថែមទៀត ស្របពេលដែលស្ថានភាពជំងឺកូវីដបានធូរស្រាល ហើយអ្នកមានធនធានច្រើន វិនិយោគនាពេ​លនេះជារឿងល្អ ព្រោះវាផ្តល់ផលចំណេញខ្ពស់”៕

អ្នកជំនាញៈការវិនិយោគដីធ្លីនៅខេត្តមណ្ឌលគិរីមានឱកាសចំណេញខ្ពស់ ខណៈគំរោងសាងសង់ព្រលានយន្តហោះកាន់តែខិតជិតមកដល់

ដោយៈសិរី ជេស៊ីកា

ភ្នំពេញៈ អ្នកជំនាញបានលើកឡើងថា ការវិនិយោគដីធ្លីនៅក្នុងខេត្តមណ្ឌលគិរី មានសក្តានុពលទទូលបានផលចំណេញខ្ពស់ ខណៈគម្រោងអភិវឌ្ឍន៍ជាច្រើនបាននិងកំពុងចាប់ផ្តើមនៅខេត្តនេះ។

ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា លោកច្រឹក សុខនីមបានមានប្រសាសន៍ឲ្យដឹងតាមទូរស័ព្ទ កាលពីថ្ងៃទី២៩ កញ្ញាកន្លងមកថា សកម្មភាពនៃការអភិវឌ្ឍរមណីយដ្ឋានលំហែរកាយ ផ្ទះលំហែរ ផ្ទះអាជីវកម្ម មជ្ឈមណ្ឌលពាណិជ្ជកម្ម និងផ្សារទំនើបបាន និងកំពុងត្រៀមចាប់ផ្តើមនៅក្នុងខេត្តមួយនេះ ស្របពេលវិនិយោគិនជាតិ និងអន្តរជាតិបាននិងកំពុងធ្វើដំណើរទៅកាន់ខេត្តដ៏មានសក្តានុពលនេះ។

លោកបន្តថា “ខេត្តមណ្ឌលគិរីជាប៉ូលសេដ្ឋកិច្ចដ៏ធំមួយ ដែលនឹងមានភាពរីកចម្រើនខ្លាំងនាពេលអនាគត ដោយសាររដ្ឋាភិបាលនឹងសាងសង់ព្រលានយន្តហោះ និងផែនការមេដើម្បីអភិវឌ្ឍន៍ខេត្តនេះ ឲ្យកាន់តែមានភាពទាក់ទាញនាពេលអនាគត”។ លោក​បន្តថា “ដោយសារលលក្ខខ័ណ្ឌអាកាសធាតុអំណោយផល សណ្ឋានដីមានភាពស្រស់ស្អាត ខេត្តមណ្ឌលគិរី នឹងទាក់ទាញការវិនិយោគផ្ទះលំហែរ និងរមណីយដ្ឋានកាន់តែច្រើន​នាពេលអនាគត”។

លោកច្រឹក សុខនីមបានបន្តថា រហូតមកទល់ពេលនេះ ស្ថាប័នហិរញ្ញវត្ថុទាំងធនាគារ ទាំងមីក្រូហិរញ្ញវត្ថុស្ទើរតែទាំងអស់ បានបង្ហាញវត្តមាននៅក្នុងខេត្តនេះ ដែលផ្តល់មូលដ្ឋានទុនដ៏ប្រសើរសម្រាប់គំរោងវិនិយោគ និងសកម្មភាពសេដ្ឋកិច្ចកាន់តឬរសរវើក ដល់ប្រជាពលរដ្ឋ និងអ្នកវិនិយោគនានានៅក្នុងខេត្តមួយនេះ។

ជាមួយនឹងការដាក់ចេញនូវផែនការមេ អភិវឌ្ឍន៍សក្តានុពលទេសចរណ៍ និងប្រែក្លាយខេត្តជាមួលដ្ឋាន សេដ្ឋកិច្ចធំលំដាប់ទី៤របស់ប្រទេស រាជរដ្ឋាភិបាលបាននិងកំពុងរៀបចំផែនការជាមួយក្រុមហ៊ុន China Power គ្រុបដើម្បីសាងសង់ព្រលានយន្តហោះលំដាប់អន្តរជាតិនៅក្នុងខេត្តមួយនេះនាពេលឆាប់ៗខាងមុខ។

លោកស៊ិន ចាន់សិរីវុត្ថាអ្នកនាំពាក្យ និងជាអនុរដ្ឋលេខាធិការ នៃរដ្ឋលេខាធិការ ដ្ឋាន​អាកាសចរណ៍ស៊ីវិលធ្លាប់បានមានប្រសាសន៍ថា គម្រោងព្រលានយន្តហោះនេះបាននិងកំពុងសិក្សាបញ្ចប់ ដោយតាមផែនការព្រលាននេះ អាចចំណាយទុនវិនិយោគរហូតដល់១០០លានដុល្លារអាមេរិក។

លោកបន្តថា “វានឹងជាព្រលានយន្តហោះខ្នាតអន្តរជាតិ ដែលអនុញ្ញាត្តឲ្យយន្តហោះអាចផ្ទុកអ្នកដំណើរចន្លោះពី១៨០នាក់ ទៅ២០០នាក់អាចចុះចតបាន”៕

ក្រសួងទេសចរណ៍បានដាក់ដំណើរការសហគមន៍ទេសចរណ៍នៅខេត្តចំនួនបី

ដោយៈតារារះ

កំពតៈ រដ្ឋមន្រ្តីទេសចរណ៍ លោកបណ្ឌិតថោង ខុន និងលោកអភិបាលខេត្ត ជាវ តាយអភិបាលខេត្តកំពត បានចូលរួមដាក់ដំណើរការ នូវសហគមន៍ទេសចរណ៍ចំនួនបី ស្ថិតនៅក្នុងខេត្តចំនួនបីនៃតំបន់ឆ្នេរកម្ពុជា។

សហគមន៍បែបរមណីយដ្ឋានអេកូទេសចរណ៍ទាំងនោះ រួមមាន សហគមន៍ទេស​ចរ​ណ៍ពាមក្រសោប ខេត្តកោះកុង រមណីយដ្ឋានទេសចរណ៍វត្តភ្នំសរសៀ ខេត្តកែប និងរមណីយដ្ឋានទេសចរណ៍ភ្នំកំពង់ត្រាច ខេត្តកំពត។

សហគមន៍ទេសចរណ៍ពាមក្រសោប ខេត្តកោះកុង បានទទួលមណ្ឌលព័ត៌មាន បង្គន់អនាម័យសាធារណៈ មណ្ឌលផលិត និងលក់ផលិតផលសហគមន៍ រួមទាំងការបំពាក់សម្ភារបរិក្ខាបម្រើឱ្យការផលិត និងឡដុតសំរាមមួយ ដែលមានសមត្ថភាពដុតសំរាមបានពី ២-៤ តោនក្នុងមួយថ្ងៃ។

សហគមន៍ទេសចរណ៍វត្តភ្នំសរសៀ ខេត្តកែប បានទទួលបានមណ្ឌលព័ត៌មាន បង្គន់អនាម័យសាធារណៈ បង្កាន់ដៃប្រវែង២២៧ម៉ែត្រ និងជណ្តើរនៅក្នុងរូងភ្នំចំនួនពីរប្រវែង១៣ម៉ែត្រ។

ចំណែករមណីយដ្ឋានភ្នំកំពង់ត្រាច ខេត្តកំពត បានទទួលមណ្ឌលព័ត៌មាន បង្គន់អនាម័យសាធារណៈ តូបលក់ចំនួន១៥តូប បង្កាន់ដៃ និងជណ្តើរនៅក្នុងល្អាងភ្នំប្រវែង ២៤០ម៉ែត្រ៕

រដ្ឋាភិបាលមានផែនការសម្ភោធវិមានពហុកីឡដ្ឋានមរតកតេជោនៅចុងខែវិច្ឆិកានេះ

        ដោយៈ សិរី ជេស៊ីកា

        ភ្នំពេញៈ មន្រ្តីជាន់ខ្ពស់នៃគណកម្មាធិការអូឡាំពិកកម្ពុជា បានលើកលើកឡើងថា រដ្ឋាភិបាលគ្រោង បើកសម្ភោធឲ្យប្រើប្រាស់ជាផ្លូវការ នូវវិមានពហុកីឡដ្ឋានមរតកតេជោ នៅចុងខែវិច្ឆិកានេះ។

មានប្រសាសន៍ក្នុងកិច្ចប្រជុំប្រចាំសប្តាហ៍របស់គណៈកម្មាធិការរៀបចំការប្រកួតកីឡាអាស៊ីអាគ្នេយ៍ លើកទី៣២ ឆ្នាំ២០២៣ (CAMSOC) លោកថោង ខុនប្រធានគណកម្មាធិការអូរឡាំពិកម្ពុជា និងជារដ្ឋមន្រ្តីក្រសួងទេសចរណ៍ បានលើកឡើងពីផែនការនេះ។

លោកបានពិភាក្សាអំពីផែនការ នៃការរៀបចំសម្ភោធជាផ្លូវការនៃកីឡដ្ឋាននេះឱ្យមានភាពអធឹកអធម និងអស្ចារ្យបំផុត ឱ្យសមទៅនឹងគុណតម្លៃនៃសមិទ្ធិផលជាប្រវត្តិ​សាស្រ្តនេះ ក៏ដូចជាបង្ហាញនូវចំណងមិត្តភាពដែកថែប នៃព្រះរាជាណាចក្រកម្ពុជា និងសាធារណរដ្ឋប្រជាមានិតចិន។

បើតាមការឱ្យដឹងនៅក្នុងកិច្ចប្រជុំនោះ ពិធីសម្ភោធដាក់ឱ្យប្រើប្រាស់ជាផ្លូវការ នឹងប្រព្រឹត្តទៅក្រោមអធិបតីភាពដ៏ខ្ពង់ខ្ពស់ របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា។

ជាមួយគ្នានេះ លោក វ៉ាត់ ចំរើន អគ្គលេខាធិការនៃគណៈកម្មាធិការជាតិ CAMSOC បានឱ្យដឹងថា ពិធីសម្ភោធដាក់ឱ្យប្រើប្រាស់ជាផ្លូវការនេះ កំពុងស្ថិតក្នុងដំណាក់កាលសំណើរសុំការអនុញ្ញាតពីប្រមុខរាជរដ្ឋាភិបាល ត្បិតពិធីនេះក៏នឹងមានការប្រកួតជាលក្ខណៈមិត្តភាពនៃប្រភេទកីឡាណាមួយ រវាងកម្ពុជា និងចិនសម្រាប់ជាសក្ខីភាពផងដែរ។

ពហុកីឡដ្ឋានជាតិមរតកតេជោ បានប្រារព្ធពិធីប្រគល់ទទួលកាលពីថ្ងៃទី១២ ខែកញ្ញា ឆ្នាំ២០២១កន្លងទៅ ក្រោមអធិបតីភាពសម្តេចតេជោ ហ៊ុន សែន នាយករដ្ឋមន្រ្តី និងឯកឧត្តម វ៉ាង យី ទិប្រឹក្សារដ្ឋ និងជារដ្ឋមន្រ្តីការបរទេស បន្ទាប់ពីសំណង់ដ៏ប្រណិតនេះបានបញ្ចប់ការសាងសង់់ជាផ្លូវការ ក្នុងតម្លៃប្រមាណ ១៦០លានដុល្លារអាមេរិក ដែលជាជំនួយឥតសំណងនៃរដ្ឋាភិបាល និងប្រជាជននៃសាធារណរដ្ឋប្រជាមានិតចិន៕

 

 

ក្រសួងការងារថៃទុកឱសានវាទ ឱ្យនិយោជកចុះឈ្មោះពលករចំណាកស្រុកពីកម្ពុជានិងប្រទេសដទៃ ដើម្បីឱ្យពួកគេធ្វើការដោយស្របច្បាប់

ដោយៈសុខុម

បាងកក: ក្រសួងការងារថៃ បានទុកឱសានវាទរយៈពេល៣០ថ្ងៃ ឱ្យនិយោជកចុះឈ្មោះពលករចំណាកស្រុករួមទាំងទៅពីកម្ពុជា ដែលគ្មានលិខិតស្នាមត្រឹមត្រូវ ដើម្បីឱ្យពួកគេធ្វើការនៅក្នុងប្រទេសថៃ ដោយស្របច្បាប់។ នេះបើយោងតាមកាសែត Bangkok Post ចុះផ្សាយនៅថ្ងៃពុធ ទី២៩ កញ្ញា នេះ។

លោក Suchart Chomklin រដ្ឋមន្ត្រីក្រសួងការងារថៃ បានប្រកាសឱសានវាទនេះកាលពីថ្ងៃអង្គារ ទី២៨កញ្ញា បន្ទាប់ពីគណៈរដ្ឋមន្រ្តីបានយល់ព្រម តាមសំណើរបស់ក្រសួង ដើម្បីគ្រប់គ្រងលើពលករចំណាកស្រុ កដែលទៅពីប្រទេសចំនួន៣ រួមមានមីយ៉ាន់ម៉ា ឡាវ និងកម្ពុជា ក្នុងគោលបំណងគ្រប់គ្រង និងទប់ស្កាត់ការរីករាលវីរុសកូវីដ-១៩។

លោករដ្ឋមន្ត្រីបានគូសបញ្ជាក់ថា នាយកដ្ឋានការងារត្រូវបានណែនាំ ឱ្យចុះត្រួតពិនិត្យដោយផ្ទាល់នៅតាមការដ្ឋានសំណង់ រោងចក្រ និងកន្លែងធ្វើការផ្សេងទៀត ដើម្បីផ្តល់ការណែនាំ អំពីការថែរក្សាសុខភាពដល់និយោជក និងពលករចំណាកស្រុករយៈពេល៣០ថ្ងៃ។

អំឡុងពេលនេះ ពលករចំណាកស្រុកខុសច្បាប់ នឹងត្រូវចុះឈ្មោះធ្វើលិខិតស្នាមត្រឹមត្រូវ ហើយនិយោជករបស់ពួកគេ ត្រូវដាក់ពាក្យស្នើសុំលិខិតការងារ រួមជាមួយឯកសារពាក់ព័ន្ធផ្សេងៗទៀតពីមន្ទីរការងារខេត្ត ឬការិយាល័យនានាក្នុងក្រុងបាងកក។

ពាក្យស្នើសុំធ្វើលិខិតការងារមានតម្លៃត្រឹមតែ១០០បាត (៣ដុល្លារ) ប៉ុណ្ណោះ។ បន្ទាប់មក និយោជកនឹងទទួលបានឯកសារមួយ ជួសមុខឱ្យពលករចំណាកស្រុក ដែលអាចប្រើប្រាស់បានជាបណ្ដោះអាសន្ន ទម្រាំពួកគេទទួលបានលិខិតការងារ ដែលនឹងមានសុពលភាពរហូដល់ថ្ងៃទី១៣ កុម្ភៈ ឆ្នាំ២០២៣។

លោកបានបន្ថែមទៀតថា គណៈរដ្ឋមន្រ្តីថៃ ក៏បានពិចារណាពន្យាឱសានវាទនេះសម្រាប់ពលករចំណាកស្រុក ដែលកំពុងត្រូវបានដំណើរការ តាមសេចក្តីសម្រេចរបស់គណៈរដ្ឋមន្រ្តី ដែលមានរយៈពេលចាប់ពីថ្ងៃទី២៩ ធ្នូ ដល់ថ្ងៃទី៣១ មីនា ឆ្នាំក្រោយផងដែរ ដោយសារតែសេវាកម្មមួយចំនួន ត្រូវបានផ្អាកដោយសារស្ថានភាពវីរុសកូវីដ-១៩។

សេចក្តីសម្រេចនេះ អនុញ្ញាតឱ្យនិយោជកដាក់ពាក្យស្នើសុំលិខិតការងារ ជួសមុខឱ្យពលករចំណាកស្រុកតាមប្រព័ន្ធអនឡាញ។ ប្រសិនបើថ្លៃធ្វើលិខិតការងារត្រូវបានបង់រួចមុនថ្ងៃទី១៣ ខែកញ្ញា នាយកដ្ឋានការងារនឹងចេញលិខិតការងារ ដែលអាចប្រើបានរហូតដល់ថ្ងៃទី១៣ ខែកុម្ភៈ ឆ្នាំ២០២៣។

លោក Pairoj Chotikasathien អគ្គនាយកនៃអគ្គនាយកដ្ឋានការងារបានថ្លែងថា ពលករចំណាកស្រុក ដែលទទួលបានលិខិតការងារ ត្រូវចុះឈ្មោះទិញធានារ៉ាប់រងសុខភាពពីក្រសួងសុខាភិបាល ឬក្រុមហ៊ុនធានារ៉ាប់រងនានា ខណៈពេលរង់ចាំទទួលយកអត្ថប្រយោជន៍នានាពីបេឡាជាតិសន្តិសុខសង្គម៕ Bangkok Post៕

ប្រធានCVEAបញ្ហាវិបត្តិបំណូលរបស់ក្រុមហ៊ុនអចលនទ្រព្យEvergrandeមិនជះឥទ្ឋិពលខ្លាំងមកលើទីផ្សារអចលនទ្រព្យនៅកម្ពុជា

        ដោយៈស៊ីវ ម៉េង

        ភ្នំពេញៈ ប្រធានសមាគមអ្នកវាយតម្លៃ និងភ្នាក់ងារអចលវត្ថុកម្ពុជា(CVEA)លោកច្រឹក សុខនីមបានថ្លែងថា វិបត្តិបំណុលរបស់ក្រុមហ៊ុនអចលនទ្រព្យ លំដាប់យក្សរបស់ចិនEvergrande នឹងជះឥទ្ឋិពលខ្លះមកលើទីផ្សារកម្ពុជា ប៉ុន្តែមិនមានភាពធ្ងន់ធ្ងរទេ។

លោកបានមានប្រសាសន៍ឲ្យដឹងតាមទូរស័ព្ទនារសៀលថ្ងៃទី២៩ កញ្ញានេះថា លំហូរ​ទុនវិនិយោគផ្ទាល់ពីប្រទេសចិន មកកម្ពុជានឹងមានភាពយឺតយ៉ាវខ្លះ ប៉ុន្តែបើរដ្ឋាភិបាលកម្ពុជា ស្ថាប័នធនាគារនានានៅតែមានភាពបត់បែន និងបន្តផ្តល់ហិរញ្ញប្បទានបន្តទៀត វិស័យសេដ្ឋកិច្ចកម្ពុជានឹងបន្តមានភាពរីកចម្រើន។

លោកបន្តថា “ជាក់ស្តែងក្នុងវិបត្តិជំងឺកូវីដ១៩នេះ យើងនៅតែបន្តមានភាពរ៉ឹងមាំ ហើយបណ្តាប្រទេសនានា ក្នុងតំបន់អាស៊ានបានកោតសរសើរ ពីភាពធន់នៃសេដ្ឋកិច្ចកម្ពុជា”។លោកបន្តថា “បើក្រុមហ៊ុនធំៗនៅតែបន្តសកម្មភាពវិនិយោគ វានឹងជួយសេដ្ឋកិច្ចរបស់យើងឲ្យងើបឡើងលឿន”។

ធនាគារពិភពលោកបានព្យាករណ៍កាលពីម្សិលម៉ិញនេះថា សេដ្ឋកិច្ចកម្ពុជា នឹងសម្រេចបានកំនើន៥,៥ភាគរយនៅឆ្នាំ២០២២ខាងមុខនេះ។

លោកច្រឹក សុខនីមបានបន្តថា ទោះជាយ៉ាងណាវិបត្តិរបស់ក្រុមហ៊ុនEvergrandeនឹងមិនអូសបន្លាយយូរពេកនោះទេ ដរាបណារដ្ឋាភិបាលចិនលូកដៃជួយលើការងារនេះ ហេតុនេះយើងរំពឹងថា វិបត្តិរបស់ក្រុមហ៊ុនដ៏ធំនេះ នឹងមិនអូសបន្លាយពេលយូរឡើយ។

យោងតាមសារព៌តមាន Reuters បានឲ្យដឹងថា រដ្ឋាភិបាលក្រុងប៉េកាំង កំពុងជំរុញឱ្យសហគ្រាសរដ្ឋ និងក្រុមហ៊ុនអភិវឌ្ឍន៍អចលនទ្រព្យ ដែលគាំទ្រដោយរដ្ឋនានា ជួយទិញទ្រព្យសកម្មមួយចំនួនរបស់ក្រុមហ៊ុន  Evergrande។

ក្រោយកិច្ចព្រមព្រៀងទិញលក់ភាគហ៊ុននេះ ភាគហ៊ុនរបស់ក្រុមហ៊ុន Evergrande នៅក្នុងធនាគារ Shengjing Bank នឹងត្រូវកាត់បន្ថយពី៣៤.៥%មកនៅត្រឹម១៤.៧៥%៕

 

ក្រុមហ៊ុនអចលនទ្រព្យចិន Evergrande គ្រោងលក់ភាគហ៊ុន១,៥ពាន់លានដុល្លារ ដើម្បីដោះបំណុល

ដោយៈសុខុម

ហុងកុង: ក្រុមហ៊ុនអភិវឌ្ឍន៍អចលនទ្រព្យចិន ដែលកំពុងជំពាក់បំណុលគេរុំកោះ Evergrande បានប្រកាសនៅថ្ងៃពុធ ទី២៩ កញ្ញា នេះថា ខ្លួនគ្រោងលក់ភាគហ៊ុន១,៥ពាន់លានដុល្លារអាមេរិក ដែលខ្លួនកាន់កាប់នៅក្នុងធនាគារShengjing Bank ទៅឱ្យក្រុមហ៊ុនគ្រប់គ្រងទ្រព្យសកម្មរដ្ឋដើម្បីដោះបំណុល។

ទោះជាយ៉ាងណា ក្រុមហ៊ុននេះនិយាយថា ធនាគារShengjing Bank បានទាម​ទារឱ្យខ្លួន យកប្រាក់ចំណេញសុទ្ធទាំងអស់ពីការលក់ភាគហ៊ុននេះ ទូទាត់សងបំណុលពាក់ព័ន្ធនានា ដែលខ្លួនដល់ពេលត្រូវសងធនាគារ Shengjing Bank។

ការទាមទារនេះបង្ហាញថា ក្រុមហ៊ុន Evergrande ដែលខកខានមិនបានបង់ការប្រាក់លើសញ្ញាប័ណ្ណកាលពីសប្តាហ៍មុន នឹងមិនអាចយកប្រាក់ដែលបានពីការលក់ភាគហ៊ុននេះទៅធ្វើអ្វីផ្សេង ដូចជា បង់ការប្រាក់ឱ្យអ្នកកាន់សញ្ញាប័ណ្ណ នៅបរទេសចំនួន៤៧,៥លានដុល្លារអាមេរិក ដែលដល់ពេលត្រូវបង់នៅថ្ងៃពុធនេះបានឡើយ។

កាលបរិច្ឆេទដែលក្រុមហ៊ុន Evergrande ដល់ពេលត្រូវបង់ការប្រាក់នេះ កំពុងត្រូវបានបណ្ដាវិនិយោគិន តាមដានយ៉ាងយកចិត្តទុកដាក់បំផុត ហើយនេះគឺជាតេស្តសាកល្បងលើទំនុកចិត្តដ៏ធំបន្ទាប់របស់ក្រុមហ៊ុនមួយនេះនៅក្នុងទីផ្សារ។

ក្រុមហ៊ុន Evergrande បានជំពាក់បំណុលគរដូចភ្នំ រហូតដល់ទៅប្រមាណ៣០៥ពាន់លានដុល្លារ ដោយក្លាយជាក្រុមហ៊ុនអភិវឌ្ឍន៍អចលនទ្រព្យ ដែលជំពាក់បំណុលច្រើនបំផុតនៅប្រទេសចិន ដោយធ្វើឱ្យរដ្ឋាភិបាលក្រុងប៉េកាំង ឈឺក្បាលយ៉ាងខ្លាំង។

ភាគហ៊ុនរបស់ក្រុមហ៊ុន Shenyang Shengjing នៅក្នុងធនាគារ Shengjing Bank នឹងកើនឡើងដល់២០,៧៩%បន្ទាប់ពីកិច្ចព្រមព្រៀងទិញលក់ភាគហ៊ុននេះ ដោយក្លាយជាម្ចាស់ភាគហ៊ុនធំបំផុតរបស់ធនាគារនេះ។

លោក Hui Ka Yan ប្រធានក្រុមហ៊ុន Evergrande បានចេញសេចក្តីថ្លែងការណ៍ថា បញ្ហាសាច់ប្រាក់របស់ក្រុមហ៊ុនលោក បានជះផលប៉ះពាល់ដល់ធនាគារ Shengjing Bankយ៉ាងខ្លាំង។ ការណែនាំអ្នកទិញដែលជាសហគ្រាសរដ្ឋ នឹងជួយរក្សាស្ថិរភាពប្រតិ​បត្តិការរបស់ធនាគារ Shengjing Bank។

ប្រភពបានទម្លាយប្រាប់ទីភ្នាក់ងារព័ត៌មាន Reuters នៅសប្ដាហ៍នេះថា រដ្ឋាភិបាលក្រុងប៉េកាំង កំពុងជំរុញឱ្យសហគ្រាសរដ្ឋ និងក្រុមហ៊ុនអភិវឌ្ឍន៍អចលនទ្រព្យ ដែលគាំទ្រដោយរដ្ឋនានា ជួយទិញទ្រព្យសកម្មមួយចំនួនរបស់ក្រុមហ៊ុន  Evergrande។

ក្រោយកិច្ចព្រមព្រៀងទិញលក់ភាគហ៊ុននេះ ភាគហ៊ុនរបស់ក្រុមហ៊ុន Evergrande នៅក្នុងធនាគារ Shengjing Bank នឹងត្រូវកាត់បន្ថយពី៣៤.៥%មកនៅត្រឹម១៤.៧៥%៕  Reuters៕

GDPរបស់វៀតណាមដាំក្បាលចុះខ្លាំងមិនធ្លាប់មាន នៅពេលវិធានការកូវីដ-១៩ ធ្វើឱ្យប៉ះពាល់ដល់សេដ្ឋកិច្ចធ្ងន់ធ្ងរ

ដោយៈសុខុម

ហាណូយ: សេដ្ឋកិច្ចរបស់វៀតណាម បានដាំក្បាលចុះខ្លាំងមិនធ្លាប់មាននៅវិធានការទប់ស្កាត់វីរុសកូវីដ-១៩ ដ៏តឹងរ៉ឹងជះផលប៉ះពាល់ស្ទើរ តែគ្រប់វិស័យនៃសេដ្ឋកិច្ច ក្រោ​យមានការបិទទ្វាររោងចក្រ និងកាត់បន្ថយសមត្ថភាពផលិតកម្ម ដែលធ្វើឱ្យរាំងស្ទះដល់ខ្សែសង្វាក់ផ្គត់ផ្គង់។

ការិយាល័យស្ថិតិទូទៅរបស់វៀតណាម និយាយនៅថ្ងៃពុធ ទី២៩ កញ្ញា នេះថា ផលិតផលក្នុងស្រុកសរុប (GDP) របស់វៀតណាមក្នុងត្រីមាសទី៣ នេះបានធ្លាក់ចុះ៦,១៧% បើធៀបនឹងឆ្នាំ២០២០។ ការិយាល័យនេះបានបន្ថែមថា វាជាការធ្លាក់ចុះខ្លាំងបំផុតមិនធ្លាប់មាន។

អាជ្ញាធរបានដាក់ចេញវិធានការយ៉ាងតឹងរ៉ឹងជាច្រើនខែ ដើម្បីទប់ស្កាត់ការរីករាលដាលវីរុសកូវីដ-១៩ ដែលមានចាប់ពីការបញ្ជាឱ្យបិទទ្វាររោងចក្រ ប្រសិនបើរោងចក្រទាំងនោះមិនអាចផ្តល់កន្លែងស្នាក់នៅសម្រាប់កម្មករ រហូតដល់ការរារាំងប្រជាជននៅក្នុងមជ្ឈមណ្ឌលពាណិជ្ជកម្មនៃក្រុងហូជីមិញ មិនឱ្យចេញក្រៅដើម្បីទិញម្ហូបអាហារ។

លោក Pham Dinh Thuy ប្រធានស្ថិតិឧស្សាហកម្មបានថ្លែងក្នុងសន្និសីទកាសែតក្នុងទីក្រុងហាណូយថា ក្រុមហ៊ុន៩៤%នៅក្នុងប្រទេសនេះ កំពុងប្រឈមនឹងការលំបាកជាច្រើនរួមមានកង្វះកម្លាំងពលកម្ម និងការចំណាយខ្ពស់ជាងមុនសម្រាប់ប្រាក់ឈ្នួល និងកន្លែងស្នាក់នៅរបស់កម្មករជាដើម ដែលជាចំណែកធ្វើឱ្យរាំងស្ទះ ដល់ខ្សែសង្វាក់ផ្គត់ផ្គង់។

លោក Nguyen Anh Duc ប្រធានផ្នែកលក់នៅក្រុមហ៊ុន SSI Securities Corp ក៏បានលើកឡើងស្រដៀងគ្នាថា អាជីវកម្មនានាបានប្រឈមការលំបាកយ៉ាងខ្លាំង ដោយ​សាររដ្ឋាភិបាល បានដាក់ចេញវិធានការយ៉ាងតឹងរ៉ឹង ដើម្បីទប់ស្កាត់ការរីករាលដាលវីរុសកូវីដ-១៩ នៅក្នុងក្រុងហាណូយ ក្រុងហូជីមិញ និងតំបន់ឧស្សាហកម្មផ្សេងៗទៀតនៅភាគខាងត្បូងប្រទេស។

លោកបានបន្ថែមទៀតថា “ប្រសិនបើរដ្ឋាភិបាលបន្ថែមល្បឿនចាក់វ៉ាក់សាំង ហើយអាចគ្រប់គ្រងស្ថានភាពវីរុសកូវីដ-១៩ បានល្អ ខ្ញុំជឿថា សេដ្ឋកិច្ចនឹងចាប់ផ្ដើមងើបឡើងវិញយ៉ាងឆាប់រហ័សនៅឆ្នាំក្រោយ”។

យោងតាមក្រសួងសុខាភិបាលវៀតណាមបានឱ្យដឹងថា ក្នុងចំណោមប្រជាជនសរុបទូទាំងប្រទេសវៀតណាម មានតែប្រមាណ៨,៨%ប៉ុណ្ណោះ ដែលបានចាក់វ៉ាក់សាំងគ្រប់ដូស។ ហើយយោងតាមមជ្ឈមណ្ឌលព័ត៌មាន ក្រុងហូជីមិញបង្ហាញថា នៅក្នុងទីក្រុងនេះពលរដ្ឋជាង២៩ភាគរយ បានចាក់វ៉ាក់សាំងគ្រប់ដូសគិតត្រឹមថ្ងៃច័ន្ទ ដើមសប្ដាហ៍នេះ៕  The Edge Markets៕

IMF ព្យាករណ៍កំណើនសេដ្ឋកិច្ចកម្ពុជានឹងមានកំណើន២,២ភាគរយដូចនឹងការព្យាកររបស់ធនាគារពិភពលោក

       ដោយៈវឌ្ឍនៈ

ភ្នំពេញៈ មូលនិធិរូបិយវត្ថុអន្តរជាតិ ( IMF ) បានព្យាករណ៍កំណើនសេដ្ឋកិច្ចកម្ពុជាឆ្នាំ២០២១នេះ ដូចនឹងការព្យាកររបស់ធនាគារពិភពលោកថា នឹងកំណើននឹងសម្រេចបានត្រឹម២,២ភាគរយ និង៥ភាគរយនៅឆ្នាំ២០២២ខាងមុខ។

យោងតាមសេចក្តីប្រកាសព័ត៌មានរបស់ក្រសួងសេដ្ឋកិច្ច និងហិរញ្ញវត្ថុក្រោយកិច្ចប្រជុំតាមប្រព័ន្ធអនឡាញ រវាងរដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និងលោកAlasdair Scott ប្រធានក្រុមបេសកកម្មរបស់មូលនិធិរូបិយវត្ថុអន្តរជាតិ នៅថ្ងៃទី២៩កញ្ញា២០២១នេះ ។

លោក Alasdair Scott បានជម្រាបជូនពីទស្សនវិស័យសេដ្ឋកិច្ចសកល ដែលបានចេញផ្សាយនាខែ កក្កដា ២០២១ ដោយកំណើនសេដ្ឋកិច្ចសកល ស្ថិតនៅក្នុងរង្វង់៦ភាគរយក្នុងឆ្នាំ២០២១ និង៤,៩ភាគរយនៅក្នុងឆ្នាំ ២០២២ ហើយការងើបឡើងវិញនៃសេដ្ឋកិច្ចនៃបណ្ដាប្រទេសអភិវឌ្ឍន៍ និងប្រទេសកម្ពុជាអភិវឌ្ឍនឹងមានល្បឿនខុសគ្នា ។

ក្នុងសេចក្ដីប្រកាសបង្ហាញថា ជាលទ្ធផលនៃការវាយតម្លៃ មកលើស្ថានភាពសេដ្ឋកិច្ច និងហិរញ្ញវត្ថុកម្ពុជា សេដ្ឋកិច្ចកម្ពុជាក្នុងឆ្នាំ ២០២១ ត្រូវបានវាយតម្លៃឡើងវិញថា នឹងមានកំនើនខ្ពស់ជាងមុន ក្នុងអត្រា២,២ភាគរយ គាំទ្រដោយនិន្នាការល្អជាងគេរំពឹងទុកនៃវិស័យកម្មន្តសាល និងវិស័យកសិកកម្ម ដែលជំរុញដោយភាពរឹងមាំនៃតម្រូវការខាងក្រៅខណៈវិស័យសំណង់ វិស័យអចលនទ្រព្យ និងវិស័យសណ្ឋាគារ និងភោជនីយដ្ឋាន រងផលប៉ះពាល់ដោយសារព្រឹត្តិការណ៍សហគមន៍២០កុម្ភៈ ២០២១។

ទន្ទឹមនឹងនោះ ឆ្នាំ២០២២ សេដ្ឋកិច្ចកម្ពុជា ត្រូវបានព្យាករថានឹងបន្តងើបឡើងក្នុងរង្វង់ប្រមាណ៥ភាគរយ ដោយសារការរំពឹងទុកការបន្តងើបឡើង នៃតម្រូវការសកល ការបន្តសក្ដានុពលកំណើននៃវិស័យកាត់ដេរ និងវិស័យកម្មន្តសាលមិនមែនកាត់ដេរ និងការកើនឡើងសន្សឹមៗ នៃវិស័យគាំទ្រផ្សេងទៀត ព្រមទាំងប្រសិទ្ធភាព នៃការដាក់ចេញវិធានការគោលនយោបាយរបស់រដ្ឋាភិបាល ជាពិសេសផែនការស្ដារសេដ្ឋកិច្ចឡើងវិញក្រោយវិបត្តិកូវីដ១៩ ។

លោកអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្រ្តី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ ក៏បានវាយតម្លៃខ្ពស់ ចំពោះលទ្ធផលការងាររបស់ក្រុមការងារ Article IV របស់មូលនិធិរូបិយវត្ថុអន្តរជាតិ និងបានកត់សម្គាល់ពីភាព ប្រហាក់ប្រហែលគ្នានៃការវាយតម្លៃស្ថានភាពម៉ាក្រូសេដ្ឋកិច្ចកម្ពុជា ដោយក្រុមការងារមូលនិធិរូបិយវត្ថុអន្តរជាតិ និងដោយក្រសួងសេដ្ឋកិច្ចនិងហិរញ្ញវត្ថុ៕

ស្ត្រីនៅក្នុងមុខជំនួញអចលនទ្រព្យនៅមានចំនួនតិចតួចនៅឡើយធៀបនឹងបុរស

        ដោយៈវឌ្ឍនៈ

ភ្នំពេញៈ នៅក្នុងវិស័យអចលនទ្រព្យកម្ពុជា គេមើលឃើញថាសន្ទុះនៃអ្នកចូលរួមប្រឡូកក្នុងវិស័យនេះកាន់តែច្រើនឡើងៗ ប៉ុន្តែនៅក្នុងចំណោមអ្នកចូលរួមប្រឡូកនោះភាគច្រើន គឺជាបុរសនិងមានស្ត្រីតិចតួចនៅឡើយ ប៉ុន្តែនៅក្នុងវិស័យសហគ្រាសធុនតូចនិងមធ្យមនៅកម្ពុជាភាគច្រើនគឺជាស្ត្រី។

អ្នកជំនួញស្ត្រីក្នុងវិស័យអចលនទ្រព្យ ចង់ឱ្យស្ត្រីចូលរួមក្នុងវិស័យនេះ ឱ្យបានកាន់​តែច្រើន ដើម្បីចូលរួមក្នុងលើកកម្ពស់ស្ត្រីក្នុងសង្គមផង និងចូលរួមអភិវឌ្ឍន៍ប្រទេសជាតិផងដែរ។

អ្នកហ្គ្រេស រចនី អគ្គនាយិកាក្រុមហ៊ុនCentury 21 Cambodia បានមានប្រសា​សន៍ឲ្យដឹងកាលពីពេលថ្មីៗនេះថា នៅក្នុងវិស័យអចលនទ្រព្យបច្ចុប្បន្ននេះ ស្ត្រីដែលចូលរួមប្រឡូកក្នុងអចលនទ្រព្យមានប្រមាណតែ៣០ ទៅ៣៥ភាគរយប៉ុណ្ណោះ ដោយបុរស៦៥ទៅ៧០ភាគរយ។

អ្នកស្រីបានបន្ត “ស្ត្រីមានផលវិបាកមួយចំនួន ដែលពួកគាត់គិតថាមិនចូលរួមក្នុងវិស័យអចលនទ្រព្យ ដូចជាការចុះវាយតម្លៃ ដីធ្លីផ្ទាល់ៗចុះជួបជាមួយភ្ញៀវផ្ទាល់ ពេលខ្លះត្រូវចុះទៅតាមបណ្ដាខេត្តផ្សេងៗទៀត”។ អ្នកស្រីបន្ថែមថា “ការងារនេះអាចចាត់ទុកថាជាផលវិបាករបស់ស្ត្រី ប៉ុន្តែបើបុរសវិញវាមិនមែនជាបញ្ហានោះទេ”។

អ្នកស្រីបន្តថា រហូតមកដល់២០២០ នៅពេលកម្ពុជាជួបវិបត្តិកូវីដ១៩ បច្ចេកវិទ្យាបានដើរតួនាទីសំខាន់ សម្រាប់ជួយដល់អាជីវកម្មនានា ក្នុងនោះក៏ជួយដល់វិស័យអចលនទ្រព្យ។ នៅពេលបច្ចេកវិទ្យាកាន់តែរីកច្រើន ធ្វើឱ្យភ្នាក់ងារអចលនទ្រព្យមិនចាំបាច់ ក្នុងការជួបចរចាផ្ទាល់ជាមួយភ្ញៀវនោះទេ ដែលធ្វើឱ្យស្ត្រី ក្នុងជំនួញអចលនទ្រព្យ។

អ្នកស្រីបន្ថែមថា តាមពិតទៅស្រ្តីគឺជាអ្នកដែលមានរបៀបរៀបរយ ហើយនៅពេលស្ត្រីសម្របសម្រួល ក្នុងការលក់អចលនទ្រព្យ គឺពួកគាត់មិនព្យាយាមបញ្ចុះបញ្ចូលអតិថិជនទេ តែពព្យាយាមពន្យល់អតិថិជនឱ្យយល់ពីទ្រព្យដែលត្រូវទិញនោះវិញ ។

ជាមួយគ្នានេះ អ្នកស្រី ចន្ទី ទិវា នាយិកាប្រតិបត្តិក្រុមហ៊ុន Century 21 Advance Property បានមានប្រសាសន៍ផងដែរថា ក្នុងនាមជាស្ត្រីក្នុងវិស័យអចលនទ្រព្យ អ្នកស្រីចង់ឱ្យស្ត្រីចូលរួមកាន់តែច្រើន នៅក្នុងវិស័យមួយនេះ ។ អ្នកស្រីនិយាយថា កាលពីចាប់ផ្ដើមក្រុមហ៊ុនដំបូង ក្រុមហ៊ុនយើងមានបុរសច្រើនជាងនារី ប៉ុន្តែក្រោយមកយើងក៏បានជ្រើសរើសនារីច្រើនជាងបុរសវិញ ដោយភ្នាក់ងារលក់នៅក្នុងក្រុមហ៊ុន យើងសុទ្ធតែនារី មិនមានបុរសនោះទេ ដែលធ្វើឱ្យក្រុមហ៊ុនយើងមាននារី៦៥ភាគរ និងបុរស៣៥ភាគរយ ប៉ុណ្ណោះនាពេលបច្ចុប្បន្ននេះ។

អ្នកស្រីបន្តថា បច្ចុប្បន្ននេះ ស្ត្រីកាន់តែច្រើនបានយល់ដឹងច្រើន ពីអត្ថប្រយោជន៍នៅក្នុងវិស័យអចលនទ្រព្យ ដូច្នេះអ្នកស្រីជឿថា នឹងមាននារីកាន់តែច្រើនចូលរួមប្រឡូកនៅក្នុងវិស័យអចលនទ្រព្យ ហើយនៅពេលស្ត្រីកាន់តែច្រើន ចូលរួមក្នុងវិស័យអចលនទ្រព្យ ពួកគាត់នឹងធ្វើឱ្យគ្រួសារកាន់តែរីកចម្រើន ជួយដល់សង្គមយើងកាន់តែច្រើនផងដែរ៕