ដោយៈ ម៉ាណេត

ភ្នំពេញៈ រាជរដ្ឋាភិបាលបានសម្រេចអនុម័តសេចក្តីព្រាងច្បាប់ស្តីពីការវិនិយោគទាំងស្រុង ក្នុងកិច្ចប្រជុំគណៈរដ្ឋមន្ត្រីដឹកនាំសម្តេចតេជោ ហ៊ុន សែន នាយករដ្ឋមន្ត្រីកម្ពុជា នាព្រឹកថ្ងៃទី៩ ខែកក្កដា ឆ្នាំ២០២១នេះ។

លោក ផៃ ស៊ីផាន រដ្ឋមន្ត្រីប្រតិភូអមនាយករដ្ឋមន្ត្រី បានឱ្យដឹង ថា សេចក្តីព្រាងច្បាប់នេះ មានការកែសម្រួលនូវពាក្យពេចន៍ និងខ្លឹមសារ នៃមាត្រា៩ ជំពូកទី៣។

សម្តេចតេជោ ហ៊ុន សែន បានថ្លែងក្នុងកិច្ចប្រជុំនោះថា សំណើច្បាប់នេះ ជាមូលដ្ឋានគតិយុត្តិសម្រាប់ទាក់ទាញ និងផ្តល់វិសាលភាពដល់វិនិយោគិនងាយស្រួលក្នុងកិច្ចវិនិយោគមកកម្ពុជា។

សេចក្តីព្រាងច្បាប់ស្តីពីវិនិយោគ ជាសេចក្តីព្រាងច្បាប់ថ្មីមួយ ដែលត្រូវបានផ្តួចផ្តើម និងចង្អុលបង្ហាញដោយឯកសារគោលនយោបាយអភិវឌ្ឍន៍វិស័យឧស្សាហកម្មកម្ពុជាឆ្នាំ២០១៥-២០២៥។

លោកផៃ ស៊ីផានបានបញ្ជាក់ថា ការងារសិក្សា និងតាក់តែងសេចក្តីព្រាងច្បាប់បឋមនេះ ត្រូវបានធ្វើឡើងយ៉ាងម៉ត់ចត់ដោយក្រុមប្រឹក្សាអភិវឌ្ឍន៍កម្ពុជា (ក. អ. ក)។ នៅក្នុងកិច្ចដំណើរការនៃការតាក់តែងសេចក្តីព្រាងច្បាប់ បានប្រជុំពិគ្រោះយោបល់ជាមួយតំណាងផ្នែកឯកជន និងអង្គពាក់ព័ន្ធផ្សេងទៀត ជាច្រើនលើកច្រើនសារ ដើម្បីធ្វើការប្រមូលធាតុចូល។

រដ្ឋមន្ត្រីប្រតិភូអមនាយករដ្ឋមន្ត្រីរូបនេះ បានបន្ថែមថា សេចក្តីព្រាងច្បាប់ស្តីពីការវិនិយោគ រៀបចំឡើងក្នុងគោលបំណងបង្កើតនូវក្របខ័ណ្ឌគតិយុត្តដែលបើកចំហ មានតម្លាភាព អាចប៉ាន់ប្រមាណទុកជាមុនបាន ប្រកបដោយភាពអំណោយផលសម្រាប់ការវិនិយោគ ដើម្បីទាក់ទាញ និងលើកកម្ពស់ការវិនិយោគដោយបុគ្គលសញ្ជាតិខ្មែរ ឬបរទេស ប្រកបដោយគុណភាព ប្រសិទ្ធភាព និងប្រសិទ្ធផល សំដៅអភិវឌ្ឍសង្គម សេដ្ឋកិច្ចនៅកម្ពុជា។

សេចក្តីព្រាងច្បាប់ក៏ត្រូវបានរៀបចំឡើងឱ្យមានភាពបត់បែន ដោយមានការផ្តល់ការលើកទឹកចិត្តពិសេស ចំពោះវិស័យនិងសកម្មភាពវិនិយោគជាក់លាក់ណាមួយដែលមានសក្តានុពលខ្ពស់ក្នុងការចូលរួមចំណែកអភិវឌ្ឍជាតិ ស្របទៅតាមគោលនយោបាយរបស់រាជរដ្ឋាភិបាល ដោយការលើកទឹកចិត្តពិសេសនេះ នឹងត្រូវកំណត់នៅក្នុងច្បាប់ស្តីពីហិរញ្ញវត្ថុសម្រាប់ការគ្រប់គ្រង។

ដើម្បីផ្តល់ភាពកក់ក្តៅដល់វិនិយោគិន សេចក្តីព្រាងច្បាប់នេះ បានដាក់បញ្ចូលនូវកាតព្វកិច្ចជាអន្តរជាតិមួយចំនួនរបស់កម្ពុជា ដើម្បីបង្ហាញដល់វិនិយោគិនទាំងអស់នូវការប្តេជ្ញារបស់រាជរដ្ឋាភិបាលកម្ពុជាក្នុងការការពារវិនិយោគ និងផ្តល់ការធានាដោយអនុលោមតាមច្បាប់អន្តរជាតិនូវប្រព្រឹត្តកម្មដែលមិនរើសអើង ព្រមទាំងផ្តល់សេវាថែទាំវិនិយោគ ផងដែរ។

នៅក្នុងស្ថានភាពវិបត្តិនៃជំងឺកូវី២១៩ ដែលកំពុងញាំញីពិភពលោក រួមទាំងកម្ពុជាផង សេចក្តីព្រាងច្បាប់ស្តីពីវិនិយោគនេះ ពិតជាមានសារៈសំខាន់ខ្លាំងណាស់ម្រាប់ប្រទេសកម្ពុជា ដោយសារសេចក្តីព្រាងច្បាប់នេះ នឹងធ្វើឱ្យកម្ពុជាកាន់តែមានភាពទាក់ទាញចំពោះការវិនិយោគផ្ទាល់ពីបរទេសនិងការវិនិយោគក្នុងស្រុក៕

ដោយៈសុខុម

សេអ៊ូល: យោងតាមសារព័ត៌មាន The Edge Markets ឱ្យដឹងថា ប្រទេសកូរ៉េខាងត្បូង គ្រោងបោះទុនវិនិយោគដល់ទៅ៣៥ពាន់លានដុល្លារអាមេរិក ក្នុងឧស្សាហកម្មផលិតអាគុយរថយន្តអគ្គិសនីរបស់ខ្លួន ត្រឹមដំណាច់ទសវត្សរ៍នេះ ដើម្បីប្រជែងជាមួយមហាយក្សចិន និងបរទេសជប៉ុន។

រដ្ឋាភិបាលប្រទេសនេះ បានចេញសេចក្តីថ្លែងការណ៍ កាលពីថ្ងៃព្រហស្បតិ៍ ទី៨ កក្កដា ថា ក្រុមហ៊ុន LG Energy Solution Co ក្រុមហ៊ុន SK Innovation Co និងក្រុមហ៊ុន Samsung SDI Co នឹងក្លាយជាអ្នកដើរតួយ៉ាងដ៏សំខាន់ នៅក្នុងការជំរុញការវិនិយោគលើការស្រាវជ្រាវ & ការអភិវឌ្ឍន៍ (R&D) និងការផលិតអាគុយ។

សេចក្ដីថ្លែងការណ៍នោះមានខ្លឹមសារដូច្នេះថា “ផែនការនេះគឺដើម្បីធានាថា គ្រឿងលើកទឹកចិត្តផ្សេងៗ ត្រូវបានផ្តល់ជូនក្រុមហ៊ុននានា សម្រាប់ការវិនិយោគរបស់ពួកគេ និងការស្រាវជ្រាវ & ការអភិវឌ្ឍន៍ (R&D) ដើម្បីជួយឱ្យពួកគេ ក្លាយជាក្រុមហ៊ុនឈានមុខគេក្នុងពិភពលោកក្នុងទីផ្សារអាគុយ”។

សេចក្តីថ្លែងការណ៍ដដែលបានបន្តថា “រដ្ឋាភិបាលនឹងប្រឹងប្រែងគ្រប់វិធីដើម្បីគាំទ្រ និងជំរុញឱ្យឧស្សាហកម្មនេះរីកចម្រើន ដែលនឹងក្លាយជាផ្នែកសំខាន់មួយ នៃសេដ្ឋកិច្ចនាពេលអនាគតរបស់ប្រទេសកូរ៉េខាងត្បូង”។

ក្រុមហ៊ុនផលិតអាគុយរថយន្តអគ្គិសនីធំៗបំផុត មួយចំនួនរបស់ពិភពលោក មានមូលដ្ឋាននៅក្នុងប្រទេសនេះ ហើយក្រុមហ៊ុនទាំងនោះ មានចំណែកទីផ្សាររហូតដល់ទៅ១ភាគ៣នៃទីផ្សារទូទាំងពិភពលោក ក្នុងរយៈពេល៥ខែដើមឆ្នាំ២០២១នេះ ហើយក្រុមហ៊ុននានាកំពុងតែពង្រីក និងបង្កើតរោងចក្របន្ថែមនៅបរទេស ដើម្បីបំពេញឱ្យទាន់តម្រូវការរថយន្តអគ្គិសនី (EV) ដែលកំពុងកើនឡើង។

យោងតាមរដ្ឋាភិបាលឱ្យដឹងថា សមត្ថភាពផលិតរបស់ក្រុមហ៊ុនទាំងនោះ បានកើនឡើងស្ទើរតែ៤ដង រហូតដល់២១៧ជីហ្គាវ៉ាត់ម៉ោង (gWh) ក្នុងឆ្នាំ២០២០ បើធៀបនឹង៥៩ជីហ្គាវ៉ាត់ម៉ោង (gWh) ក្នុងឆ្នាំ២០១៦។

យោងតាមសារព័ត៌មាន SNE Research ឱ្យដឹងថា គ្រាន់តែក្រុមហ៊ុនចិន មួយដែលមានឈ្មោះថា Contemporary Amperex Technology Co Ltd មានចំណែកទីផ្សារលក់អាគុយរហូតដល់ទៅ៣១%គិតត្រឹមខែឧសភា ឆ្នាំនេះ។ សារព័ត៌មានដដែលរំពឹងថា ទីផ្សារអាគុយពិភពលោក នឹងកើនឡើងពី៤៦ពាន់លានដុល្លារ កាលពីឆ្នាំមុនដល់៣៥២ពាន់លានដុល្លារ ក្នុងឆ្នាំ២០៣០។

លោក Yoon Joon-won អ្នកគ្រប់គ្រងមូលនិធិនៅក្រុមហ៊ុន DS Asset Management Co បានលើកឡើងថា “ការវិនិយោគបន្ថែម និងការគាំទ្រពិតជាមានសារៈសំខាន់ណាស់នៅចំណុចនេះ ព្រោះយើងរំពឹងថានឹងទទួលបានកំណើន រយៈពេលវែងពីទីផ្សារនេះ”។

ក្រុមហ៊ុន LG Energy បានចេញសេចក្ដីថ្លែងការណ៍ថា ខ្លួនគ្រោងបោះទុនវិនិយោគប្រមាណ១៣ពាន់លានដុល្លារ នៅត្រឹមឆ្នាំ២០៣០ រួមទាំង៨,៤ពាន់លានដុល្លារ នៅក្នុងការស្រាវជ្រាវ&ការអភិវឌ្ឍន៍ (R&D) ផងដែរ។ ក្រុមហ៊ុននេះ នឹងសាងសង់វិទ្យាស្ថានមួយនៅក្នុងប្រទេសកូរ៉េខាងត្បូង សម្រាប់ការបណ្តុះបណ្តាល ផ្នែកបច្ចេកវិទ្យាអាគុយ ដែ​លតាមការរំពឹងទុកថា នឹងរួចរាល់ជាស្ថាពរនៅខែមករា ដើមឆ្នាំ២០២៣។ ក្រុមហ៊ុននេះនិយាយថា ខ្លួនទទួលបានការបញ្ជាទិញអាគុយរថយន្តអគ្គិសនី ដែលគិតជាតម្លៃសរុប១៥,៦ទ្រីលានដុល្លារ។

ទោះជាយ៉ាងណា ក្រុមហ៊ុន SK Innovation និងក្រុមហ៊ុន Samsung SDI មិនបានផ្តល់ព័ត៌មានលម្អិតអំពីផែនការវិនិយោគនោះទេ។

ប្រទេសកូរ៉េខាងត្បូង បានចូលរួមជាមួយប្រទេសចិន និងប្រទេសជប៉ុន កាលពីឆ្នាំមុន នៅក្នុងការកំណត់កាលបរិច្ឆេទ សម្រាប់ការកាត់បន្ថយការបញ្ចេញ ឧស្ម័នកាបូន ឱ្យមកនៅកម្រិតសូន្យត្រឹមឆ្នាំ២០៥០៕

ដោយៈ ម៉ាណេត

ភ្នំពេញៈ កម្ពុជារំពឹងទុកថា កិច្ចព្រមព្រៀងពាណិជ្ជកម្មសេរីកម្ពុជា-ចិននឹងជួយឱ្យសេដ្ឋកិច្ចរបស់ខ្លួនងាកចេញវិបត្តិសេដ្ឋកិច្ច ដែលបណ្តាលមកពីជំងឺកូវីដ១៩ ខណៈកិច្ចព្រមព្រៀងពាណិជ្ជកម្មសេរីកម្ពុជា-ចិនេះ នឹងអាចចូលជាធរមានបាននៅថ្ងៃទី១ ខែមករា ឆ្នាំ២០២២ ខាងមុខនេះ។

រដ្ឋមន្រ្តីក្រសួងពាណិជ្ជកម្ម លោកប៉ាន សូរស័ក្តិ បានដឹកនាំគណៈប្រតិភូអន្តរក្រសួង នៅថ្ងៃទី៨ ខែកក្កដា ឆ្នាំ២០២១ នៅទីស្តីការក្រសួងពាណិជ្ជកម្ម បានរួមកិច្ចប្រជុំការពារសេចក្តីព្រាងច្បាប់ ស្តីពីការអនុម័តយល់ព្រមលើកិច្ច ព្រមព្រៀងពាណិជ្ជកម្មសេរីកម្ពុជា-ចិន ជាមួយគណៈកម្មការជំនាញនៃរដ្ឋសភា។ នេះបើយោងតាមសេចក្តីប្រកាសព័ត៌មានរបស់ក្រសួងពាណិជ្ជកម្ម នៅយប់ថ្ងៃទី៨ ខែកក្កដា ឆ្នាំ២០២១។

គោលបំណងសំខាន់នៃកិច្ចប្រជុំនេះ ដែលបានប្រារព្ធធ្វើឡើងតាមរយៈប្រព័ន្ធវីដេអូក្រោមអធិបតីភាពដ៏ខ្ពង់ខ្ពស់លោកស្រីនិន សាផុនប្រធានគណៈកម្មការទី៩ នៃរដ្ឋសភា និងមានការចូលរួមពីសមាជិក សមាជិកា នៃគណៈកម្មការជំនាញពាក់ព័ន្ធនៃរដ្ឋសភា គឺដើម្បីពិនិត្យលើសេចក្តីព្រាងច្បាប់ ស្តីពីការអនុម័តយល់ព្រមលើកិច្ច ព្រមព្រៀងពាណិជ្ជកម្មសេរីកម្ពុជា-ចិន ដើម្បីកិច្ចព្រមព្រៀងនេះអាចចូលជាធរមានបាននៅថ្ងៃទី០១ ខែមករា ឆ្នាំ២០២២ ខាងមុខ។

លោករដ្ឋមន្រ្តី បានថ្លែងពីខ្លឹមសារ និងអត្ថប្រយោជន៍សំខាន់ៗ រួមមានជាអាទិ៍៖
– ការទទួលបានការបើកទីផ្សារឱ្យបានធំជាងមុន និងប្រសើរជាងមុន សម្រាប់មុខទំនិញកសិផល បន្លែផ្លែឈើ ផលិតផលកែច្នៃ និងសិប្បកម្ម និងផលិតផលជាច្រើនទៀត ស្របពេលដែលកម្ពុជាអាចផលិតបាន និងអនុលោមតាមវិធានអនាម័យ និងស្តង់ដារ។

– ការទទួលបានលំហូរទីផ្សារពាណិជ្ជកម្មសេវាកម្ម ដែលកម្ពុជាអាចនាំចេញ ក្នុងករណីមានការបណ្តុះបណ្តាល ជំនាញ និងមានគុណវុឌ្ឍិគ្រប់គ្រាន់ ជាពិសេសនៅពេលដែលកម្ពុជាអាចពង្រឹងខ្លួនឯងឱ្យរឹងមាំ​ ក្នុងវិស័យសេវាកម្មនាពេលអនាគត។

– ផ្តល់កាលានុវត្តភាពផ្នែកវិនិយោគដល់កម្ពុជា បានកាន់តែច្រើន ដែលនឹងផ្តល់ឱកាសដល់ធុរជនកម្ពុជា ដែលមានបំណងពង្រីកទីផ្សារសេវាកម្ម និងទំនិញនាំចេញឱ្យកាន់តែសម្បូរបែបទៅកាន់ទីផ្សារចិន។

– ការទទួលបានផលប្រយោជន៍ពីការផ្ទេរបច្ចេកវិទ្យា ចំណេះដឹង ចំណេះធ្វើ និងជំនាញថ្មីៗពីការវិនិយោគផ្ទាល់របស់បរទេស ព្រមទាំងបង្កើតការងារថ្មីៗ ជូនប្រជាជនកម្ពុជា ហើយក៏ជាកត្តាដ៏សំខាន់ចូលរួមពង្រឹងដល់វិស័យផលិតកម្មក្នុងស្រុក។

– ការកំណត់ឱ្យកាន់តែច្បាស់នូវរាល់ នីតិវិធីទាក់ទងនឹងវិធាន ដើមកំណើតទំនិញ គយ និងសម្រួលពាណិជ្ជកម្ម អនាម័យ និងភូតគាមអនាម័យ និងរបាំងបច្ចេកទេសលើការធ្វើពាណិជ្ជកម្ម និងការធ្វើសាមញ្ញកម្ម ដើម្បីងាយស្រួលអនុវត្ត និងសម្រួលដល់ការធ្វើពាណិជ្ជកម្ម។

– ការរៀបចំ និងការបង្កើតនូវបរិយាកាសវិនិយោគ និងនយោបាយទាក់ទាញវិនិយោគទុនពីបរទេសជាដើម។
លោករដ្ឋមន្រ្តីបានបញ្ជាក់ដូច្នេះថា “ការសម្រេចបាននូវកិច្ចព្រមព្រៀងពាណិជ្ជកម្មសេរីកម្ពុជា-ចិន ពិតជាបានចូលរួមអនុវត្តយុទ្ធសាស្រ្ត ចតុកោណដំណាក់កាលទី៤របស់រាជរដ្ឋាភិបាលនីតិកាលទី៦នៃរដ្ឋសភា ស្របតាមចំណុចទី៤ ស្តីពីការពង្រឹង សមត្ថភាពកម្ពុជា ដើម្បីបន្តសមាហរណកម្មខ្លួន ចូលក្នុងសេដ្ឋកិច្ចតំបន់និងពិភពលោក ដែលបានកំណត់ក្រោម ផ្នែកទី២.២.២ ស្តីពីបរិស្ថានគ្របដណ្តប់ សម្រាប់ការអនុវត្តយុទ្ធសាស្រ្តទាំងមូល”។

ជាពិសេស ក្នុងកាលៈទេសៈវិបត្តិជំងឺឆ្លងកូវីដ-១៩នេះ កិច្ចព្រមព្រៀងនេះក៏នឹងជួយដល់យុទ្ធសាស្រ្តស្តារឡើងវិញនូវសេដ្ឋកិច្ចកម្ពុជា ដែលបានរងការញាំញីយ៉ាងធ្ងន់ធ្ងរពីជំងឺកូវីដ-១៩ ព្រមទាំងជួយឱ្យមានភាពសាំនៃសង្គម -សេដ្ឋកិច្ច ក្នុងប្រក្រតីភាពថ្មីនៃសង្គមកម្ពុជា តាមរយៈកំណើននៃការនាំចេញទៅទីផ្សារចិន និងលំហូរវិនិយោគចូលមកកម្ពុជា ដែលនឹងជួយបង្កើតការងារ និងចំណូលជូនប្រជាពលរដ្ឋយើង៕