ដោយៈ ប៊ី

ភ្នំពេញៈ អ្នកវិនិយោគចិនបានឈរនៅលំដាប់លេខរៀងទី១ ដែលជាប្រទេសបោះទុនវិនិយោគច្រើនជាងគេនៅកម្ពុជា ហើយទឹកប្រាក់ដែលចិនបានវិនិយោគនៅកម្ពុជាមានប្រមាណ២ពាន់លានដុល្លារក្នុងឆមាសទី១ ឆ្នាំ២០២១នេះ។ នេះបើតាមរបាយការណ៍ ស្តីពីសកម្មភាពវិនិយោគនៅកម្ពុជា ឆមាសទី១ ឆ្នាំ២០២១ របស់ក្រុមប្រឹក្សាអភិវឌ្ឍន៍កម្ពុជា (CDC)។

របាយការណ៍បានបញ្ជាក់ថា តួលេខវិនិយោគមកពីប្រទេសចិន បានឈរនៅលំដា​ប់លេខរៀងទី១ ដោយចូលរួមចំណែកប្រមាណ៦៩% នៃការវិនិយោគសរុបក្នុងឆមាសទី១ ឆ្នាំ២០២១ ខណៈដែលការវិនិយោគក្នុងស្រុក បានឈរនៅលំដាប់លេខរៀងទី២ ដោ​យចូលរួមចំណែកប្រមាណ ២១%នៃការវិនិយោគសរុប។

សម្រាប់ប្រទេសឈរលេខ៣ គឺប្រទេស Cayman Islands ចំនួន៣.៣៦ភាគរយ(ប្រមាណ៩៩លានដុល្លារ) នៃការវិនិយោគសរុប លេខ៤ប្រទេស Ritisgh Virgin Islands ចំនួន២.៣៧ភាគរយ (ប្រមាណ៧០លានដុល្លារ) នៃការវិនិយោគសរុប ប្រ​ទេសថៃ ឈរលេខរៀងទី៥ ចំនួន១.៧៧ភាគរយ (ប្រមាណ៥២លានដុល្លារ) នៃការវិនិ​យោគសរុប ប្រទេសសិង្ហបុរី ឈរលេខរៀងទី៦ចំនួន០.៦៨ភាគរយ (ប្រមាណ២០លានដុល្លារ) នៃការវិនិយោគសរុប​ ប្រទេសកូរ៉េខាងត្បូង ឈរលេខរៀងទី៧ ចំនួន០.៦៧ភាគ​រយ (ប្រមាណ១៩លានដុល្លារ) នៃការវិនិយោគសរុប។

ប្រទេសម៉ាឡេស៊ី ឈរលេខរៀងទី៨ ដែលវិនិយោគមកកាន់កម្ពុជាចំនួន០.៥៦% (ប្រមាណ១៦លានដុល្លារ) នៃការវិនិយោគសរុប សហរដ្ឋអាមេរិកឈរលេខរៀងទី៩ ចំនួន០.៣២% (ប្រមាណ៩លានដុល្លារ) នៃការវិនិយោគសរុប និងប្រទេសសាម័រ ឈរលេខរៀងទី១០ ចំនួន០.១៣% (ប្រមាណ៣លានដុល្លារ) នៃការវិនិយោគសរុប។

លោកច្រឹក សុខនីមប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា បានឱ្យដឹងថា ការវិនិយោគរបស់ចិន មានច្រើនណាស់នៅអាស៊ីនិងពិភពលោក ហើយបើនិយាយពីការវិនិយោគអចលនទ្រព្យវិញ ការវិនិយោគជនជាតិចិន ចូលចិត្តកសាងបណ្ដុំសហគមន៍របស់គេ។

លោកបានថ្លែងបន្តថា “នៅក្នុងប្រទេសកម្ពុជា តំបន់ពីរដែលជនជាតិបានចាប់ផ្ដើមកសាងសហគមន៍របស់គេ គឺនៅក្នុងខេត្តព្រះសីហនុ និងនៅរាជធានីភ្នំពេញ រួមទាំងផ្នែកខ្លះនៃខេត្តកោះកុង (តារាសាគរ)”។

យោងតាមសេចក្តីប្រកាសព័ត៌មាន របស់ក្រសួងការបរទេសកម្ពុជា ដែលចេញផ្សា​យកាលពីថ្មីៗនេះបានឱ្យដឹងថា “រដ្ឋមន្ត្រីការបរទេសប្រទេសទាំងពីរ បានឯកភាពពន្លឿននីតិវិធីផ្ទៃក្នុង សម្រាប់ការផ្តល់សច្ចាប័ន លើកិច្ចព្រមពាណិជ្ជកម្មសេរីកម្ពុជា-ចិន ដើម្បីជំរុញពាណិជ្ជកម្ម វិនិយោគ ក៏ដូចជាទេសចរណ៍រវាងប្រទេសទាំងពីរ”។

សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា ធ្លាប់មានប្រសាសន៍ថា កិច្ចព្រមព្រៀងពាណិជ្ជកម្មសេរីរវាងកម្ពុជា និងចិន នេះ នឹងដើរតួជាកត្តាដ៏សំខាន់ក្នុងការជួយធ្វើ ឱ្យកម្ពុជា ក្លាយជាគោលដៅសម្រាប់ក្រុមហ៊ុនអាមេរិក ដែលកំពុងរកទីតាំងថ្មីនៅក្នុងតំបន់អាស៊ីអាគ្នេយ៍។

ចំណែក អ្នកជំនាញសេដ្ឋកិច្ចនៅកម្ពុជាវិញ ក៏បានមើលឃើញដូចគ្នានេះដែរ តែបានបន្ថែមថា មិនមែនតែសម្រាប់វិនិយោគិនអាមេរិកទេ ពោលគឺកម្ពុជាអាចនឹងទាក់ទាញវិនិយោគ ដែលមានសក្តានុពលពីប្រទេសផ្សេងៗទៀត ដូចយ៉ាង ជប៉ុន និងកូរ៉េខាងត្បូងជាដើមតាមរយៈកិច្ចព្រមព្រៀងពាណិជ្ជកម្មសេរីរវាងកម្ពុជា និងចិននេះ៕

គិតត្រឹមឆមាសទី១ ឆ្នាំ២០២១ កម្ពុជាបានអនុម័តគម្រោងវិនិយោគថ្មីៗ និងគម្រោ​ងពង្រីកផលិតកម្ម ចំនួន៨៧គម្រោង ដែលមានទុនវិនិយោគ សរុបចំនួន២ ៩៦៩ ៦២៩ ៣៣៨ ដុល្លារអាមេរិក ដែលអាចបង្កើតការងារបានចំនួន៥០ ០២៩កន្លែង៕

ដោយ៖ ចិន្ដា

ថ្ងៃពុធ ទី 06 ខែកក្តដា ឆ្នាំ 2021

ការបិទផ្សារក្នុងស្រុកដើម្បីបង្ការការឆ្លងរាលដាល Covid-19 បានបង្ហាញថា ផ្សារទាំងនេះមាន សារៈសំខាន់ប៉ុណ្ណាសម្រាប់ការរស់នៅប្រចាំថ្ងៃរបស់ប្រជាជនកម្ពុជា។ ទីផ្សារដែលមានតម្លៃសមរម្យ និង មានកិត្យានុភាពទាំងនេះជួយប្រជាជនកម្ពុជាឲ្យទទួលបានទំនិញ ម្ហូបអាហារ និងសេវាកម្មដែលមាន តម្លៃសមល្មមដើម្បីបំពេញសេចក្តីត្រូវការរបស់ពួកគេ។ នៅពេលដែលផ្សារត្រូវបានបិទ យើងមើល ឃើញថា វាបានជះឥទ្ធិពលយ៉ាងខ្លាំងដល់តំបន់ទាំងអស់នៅក្នុងរាជធានីភ្នំពេញ និងដោយក្ដីអស់សង្ឃឹម អាជីវករជាច្រើនបានរៀបចំតូបនៅតាមបណ្តោយផ្លូវធំៗ ដើម្បីរក្សាផលិតផលរបស់ពួកគេនៅលើទីផ្សារ ប្រឈមមុខនឹងបញ្ហាផ្សេងៗ។

ព្រឹត្តិការណ៍ដ៏សំខាន់នេះសបញ្ជាក់ឲ្យឃើញថា ប្រទេសកម្ពុជាត្រូវការទីផ្សារក្នុងស្រុកបន្ថែម ទៀត និងដើម្បីជួយកាត់បន្ថយការរីករាលដាលនៃជំងឺនាពេលអនាគតនៅក្នុងទីផ្សារទាំងនេះ។ នៅពេល ផ្សារថ្មី ផ្សារអូរឫស្សី និងផ្សារអូឡាំពិកបានធ្វើការពង្រីក និងជុសជុលឡើងវិញក្នុងរយៈពេលប៉ុន្មានឆ្នាំ ចុងក្រោយនេះ ក៏នៅតែមិនអាចទទួលនូវចំនួនអ្នកទិញ និងអ្នកលក់ចូលមក ក្នុងទីផ្សារជារៀងរាល់ថ្ងៃ ឡើយ។ កង្វះកន្លែងទំនេរ និងច្រកផ្លូវចង្អៀត គឺជាការចង្អុលបង្ហាញថា ទីផ្សារទាំងនេះមានតម្រូវការខ្ពស់ ហើយអ្នកអភិវឌ្ឍគួរតែវិនិយោគលើទីផ្សារប្រភេទនេះ។

ជាមួយនឹងការអភិវឌ្ឍផ្សារទំនើប និងផ្សារសហគមន៍រីកដុះដាលដូចផ្សិត អ្នកអភិវឌ្ឍហាក់មិន បានផ្តល់អាទិភាពដល់ប្រភេទផ្សារដែលអ្នកប្រើប្រាស់ក្នុងស្រុកមានតម្រូវការនោះទេ។ យើងមិនអាច ប្រកែកបានទេថាផ្សារទំនើប និងផ្សារសហគមន៍ មានភាពល្បីល្បាញ និងចាំបាច់ក្នុងការបង្កើន គុណភាពនៃការរស់នៅរបស់យុវជនកម្ពុជា ទោះជាយ៉ាងនេះក្ដីផ្សារបោះដុំ និងផ្សារលក់អាហារស្រស់ ក៏មានសក្ដានុពលដូចគ្នានេះដែរ។ វិនិយោគិនគួរតែមើលទីផ្សារក្នុងស្រុក ទាំងនេះថាជាការវិនិយោគជា យុទ្ធសាស្ត្រមួយ នៅក្នុងគម្រោងពាណិជ្ជកម្មបន្ទាប់ទៀតរបស់ពួកគេ នៅក្នុងព្រះរាជាណាចក្រកម្ពុជា។ មកដល់បច្ចុប្បន្ននេះទើបតែមានអ្នកអភិវឌ្ឍគម្រោងមួយប៉ុណ្ណោះ ដែលបានប្រកាសពីការសាងសង់ កន្លែងលក់រាយបន្ថែមសម្រាប់ទីផ្សារក្នុងស្រុកប្រភេទនេះ។

ថ្មីៗនេះGCC គ្រុប បានប្រកាសពីគម្រោងថ្មីរបស់ពួកគេ គឺផ្សារជីស៊ីអូរឫស្សីដែលមានទីតាំង ស្ថិតនៅតាមបណ្តោយមហាវិថីសហព័ន្ធរុស្សីចំងាយ 100 ម៉ែត្រពីស្ពានអាកាសផ្សារដីហុយ។ គម្រោង នេះនឹងផ្តោតលើ ទីផ្សារលក់ដុំ អ្នកប្រើប្រាស់ក្នុងស្រុក និងគេហទំព័រពាណិជ្ជកម្មអេឡិចត្រូនិក។ នៅពេលផ្សារជីស៊ី អូរឫស្សីដំណើរការ ប្រជាជនក្នុងស្រុកនឹងមានទីផ្សារលក់ដុំមួយទៀត សម្រាប់ការទិញទំនិញ។ អ្នកលក់ និងម្ចាស់អាជីវកម្មក៏អាចផ្លាស់ប្តូរទៅរកផ្សារថ្មីនេះ ដោយអាចជួយកាត់បន្ថយចំនួនអ្នកដើរផ្សារក្នុងស្រុកដ៏ច្រើនលើសលប់បានមួយចំណែកធំផងដែរ។ លើសពីនេះទៀតផ្សារជីស៊ីអូរឫស្សីបានរួមបញ្ចូលបច្ចេកវិទ្យាថ្មីទៅក្នុងផ្សាររបស់ខ្លួន ដោយអាជីវករទាំងអស់អាចប្រើគេហទំព័រពាណិជ្ជកម្មអេឡិចត្រូនិកសម្រាប់លក់ផលិតផលរបស់ពួកគេនិងស្ទូឌីយោសម្រាប់ផ្សាយផ្ទាល់ដើម្បីជួយជំរុញដល់ការលក់របស់ពួកគេ។ ដោយប្រជាជននៅទីក្រុងភ្នំពេញមានទីផ្សារក្នុងស្រុកធំៗ ក្នុងចំនួនកាន់តែច្រើន ខ្យល់ចេញចូល និងទីធ្លានៅក្នុងទីផ្សារទាំងនេះនឹងកាន់តែមានភាពប្រសើរឡើងយ៉ាងខ្លាំង ដែលបង្កើតឱ្យមានបរិយាកាសដើរទិញឥវ៉ាន់ប្រកបដោយសុខភាពសម្រាប់អ្នកទិញ និងអ្នកលក់។

អ្នកអភិវឌ្ឍន៍គួរតែសម្លឹងមើលគន្លងរបស់ GCC និងអភិវឌ្ឍទីផ្សារក្នុងស្រុកបន្ថែមទៀត ដើម្បីជួយកសិករក្នុងស្រុក ម្ចាស់អាជីវកម្មខ្នាតតូច អ្នកលក់ និងអ្នកប្រើប្រាស់ក្នុងស្រុក ដោយសារប្រជាជនកម្ពុជាត្រូវការទីផ្សារប្រភេទនេះខ្លាំង។ លើសពីនេះអ្នកអភិវឌ្ឍគួរតែចាត់ទុកទីផ្សារបែបប្រពៃណីនេះថាជាឱកាសវិនិយោគដ៏អស្ចារ្យមួយដែលជួយពង្រឹងម៉ាកយីហោរបស់ពួកគេនៅក្នុងបេះដូងប្រជាជនកម្ពុជាគ្រប់រូប។ ផ្សារក្នុងស្រុកមិនត្រឹមតែជាទីផ្សារប៉ុណ្ណោះទេ ទីនេះមានប្រវត្តិល្បីល្បាញតាំងពីយូរលង់ណាស់មក ហើយដែលបានដក់ជាប់នៅក្នុងស្មារតីនៃប្រជាជនកម្ពុជាគ្រប់រូប។

សម្រាប់ពត័មានលម្អិតបន្ថែមអំពីគម្រោងផ្សារ GC Orussey Market លោកអាចអាចស្វែងរកតាមរយៈ:
Facebook Page https://www.facebook.com/gc.orusseymarket
ឬ Telegram Channel: https://t.me/GCOrusseyMarket

ឬទំនាក់ទំនងទៅកាន់: (+855) 099 331015, 098 331015
បញ្ចប់

ចិន្ដា គឺជាអ្នកវិភាគ និងនិពន្ធអំពីការវិនិយោគរយៈពេលវែង។ អត្ថបទនេះ គឺជាការយល់ឃើញទាំងស្រុងរបស់លោក។

ដោយៈ ប៊ី

ភ្នំពេញៈ ក្រុមប្រឹក្សាអភិវឌ្ឍន៍កម្ពុជា (CDC) តាមរយៈគណៈកម្មាធិការវិនិយោគកម្ពុជា និងគណៈកម្មាធិការតំបន់សេដ្ឋកិច្ចពិសេសកម្ពុជា បានសម្រេចអនុម័តទុនវិនិយោគសរុបចំនួន២.៩៦៩.៦២៩.៣៣៨ដុល្លារអាមេរិក (ជាង២,៩ពាន់លានដុល្លារ) លើគម្រោងវិនិយោគថ្មីៗចំនួន៨៧គម្រោង។ នេះបើយោងតាមរបាយការណ៍ផ្លូវការ របស់CDC នៅថ្ងៃទី៦ ខែកក្កដា ឆ្នាំ២០២១នេះ

របាយការណ៍បានឱ្យដឹងទៀតថា ក្រុមហ៊ុនដែលធ្វើការវិនិយោគលើគម្រោងថ្មី និងគម្រោងពង្រីកផលិតកម្មចំនួន៨៧នេះ អាចបង្កើតការងារបានចំនួន៥០.០២៩កន្លែង។

បើធៀបនឹងរយៈពេលដូចគ្នានៅឆ្នាំ២០២០ ចំនួនគម្រោងវិនិយោគមានការថយចុះចំនួន៦៣គម្រោង ខណៈទុនវិនិយោគមានការកើនឡើងចំនួនប្រមាណ៣១៥លានដុល្លារអាមេរិក ដោយសារវត្តមាននៃគម្រោងវិនិយោគធំៗមួយចំនួន។

គម្រោងវិនិយោគធំៗនេះមានដូចជាគម្រោងរោងចក្រផលិតអគ្គិសនីដើរដោយធ្យូងថ្ម អានុភាព៧០០មេហ្កាវ៉ាត់ របស់ក្រុមហ៊ុន Huadian Sihanoukville Power Generation Co., Ltd ក្នុងទុនវិនិយោគចំនួនប្រមាណ ១.៣ប៊ីលានដុល្លារអាមេរិក, គម្រោងរោងចក្រផលិតក្រដាសរបស់ក្រុមហ៊ុន Shunying Pulp and Paper Company Limited ក្នុងទុនវិនិយោគចំនួនប្រមាណ ៥០៤លានដុល្លារអាមេរិក និងគម្រោងរោងចក្រផលិតសំបកកង់យានយន្តរបស់ក្រុមហ៊ុន Cart Tire Co., Ltd. ក្នុងទុនវិនិយោគចំនួន ៣៥០លានដុល្លារអាមេរិក។

ក្នុងចំណោមគម្រោងវិនិយោគ៨៧មានគម្រោងវិនិយោគថ្មី ក្រៅតំបន់សេដ្ឋកិច្ចពិសេស៥៣គម្រោង ដែលមានទុនវិនិយោគសរុបចំនួន៩៤១.៥៩៣.១៨០ដុល្លារអាមេរិក និងអាចបង្កើតការងារបានចំនួន៣៧.៤២៩កន្លែង គម្រោងពង្រីកផលិតកម្មចំនួន១១គម្រោង ក្នុងទុនវិនិយោគសរុបចំនួន១៥៩.៥៧៣.៥៤២ដុល្លារអាមេរិក និងអាចបង្កើតការងារបានចំនួន២.៨០៣កន្លែង និងគម្រោងវិនិយោគថ្មី ក្នុងតំបន់សេដ្ឋកិច្ចពិសេសវិញ មានចំនួន២៣គម្រោង ដែលមានទុនវិនិយោគសរុបចំនួន១.៨៦៨.៤៦២.៦១៦ដុល្លារអាមេរិក និងអាចបង្កើតការងារបានចំនួន៩.៧៩៧កន្លែង។

ក្នុងឆមាសទី១ ឆ្នាំ២០២១ តួលេខវិនិយោគមកពីប្រទេសចិន បានឈរនៅលំដាប់លេខរៀងទី១ ដោយចូលរួមចំណែកប្រមាណ ៦៩%នៃការវិនិយោគសរុប ខណៈដែលការវិនិយោគក្នុងស្រុក បានឈរនៅលំដាប់លេខរៀងទី២ ដោយចូលរួមចំណែកប្រមាណ ២១%នៃការវិនិយោគសរុប។

រដ្ឋមន្ត្រីប្រតិភូអមនាយករដ្ឋមន្ត្រី និងជាអគ្គលេខាធិការក្រុមប្រឹក្សាអភិវឌ្ឍន៍កម្ពុជាលោក សុខ ចន្តាសោភា បានឱ្យដឹងថា ថ្វីត្បិតចំនួនគម្រោងវិនិយោគដែលCDC បានអនុម័តក្នុងឆមាសទី១ ឆ្នាំ២០២១ មានការថយចុះគួរឱ្យកត់សម្គាល់បើធៀបនឹងរយៈពេលដូចគ្នាក្នុងឆ្នាំ២០២០ ពោលគឺថយចុះចំនួន៦៣គម្រោង ទុនវិនិយោគក្នុងរយៈពេល៦ខែដើមឆ្នាំនេះ មានការកើនឡើងប្រមាណ១២% ដោយសារវត្តមាននៃគម្រោងវិនិយោគធំៗមួយចំនួន។

លោករដ្ឋមន្ត្រីបន្តថា ក្រុមប្រឹក្សាអភិវឌ្ឍន៍កម្ពុជា បាននិងកំពុងបំពេញភារកិច្ចយ៉ាងសស្រាក់ស្រស្រាំ ដើម្បីជំរុញ និងទាក់ទាញអ្នកវិនិយោគបន្ថែម។ ជាក់ស្តែង សេចក្តីព្រាងច្បាប់ស្តីពីវិនិយោគថ្មី ដែលនឹងត្រូវគោរពដាក់ជូនកិច្ចប្រជុំពេញអង្គគណៈរដ្ឋមន្ត្រីពិនិត្យ និងអនុម័ត នៅថ្ងៃទី៩ ខែកក្កដា ឆ្នាំ២០២១ ខាងមុខនេះ នឹងក្លាយជាកត្តាទាក់ទាញការវិនិយោគដ៏សំខាន់មកកម្ពុជា៕

ដោយៈ ប៊ី

ភ្នំពេញៈ ការងើបឡើងវិញនៃស្ថានភាពសេដ្ឋកិច្ចសកល និងសេដ្ឋកិច្ចដៃគូពាណិជ្ជកម្មរបស់កម្ពុជានឹងធ្វើឱ្យសេដ្ឋកិច្ចកម្ពុជា មានកំណើនវិជ្ជមាន ដោយសារការជំរុញពីកំណើនតម្រូវការផលិតផលកសិកម្ម និងលទ្ធភាពនៃការបង្វែរទិសដៅបញ្ជារទិញ។

អគ្គនាយកដ្ឋានគោលនយោបាយ នៃក្រសួងសេដ្ឋកិច្ច និងហិរញ្ញវត្ថុ បានបង្ហាញពីនិន្នាការសេដ្ឋកិច្ចសង្គមថា គិតត្រឹមខែឧសភា ឆ្នាំ២០២១ ការនាំចេញសម្លៀកបំពាក់ និងផលិតផលកាត់ដេរ ចំនួនភ្ញៀវទេសចរជាតិនិងអន្តរជាតិ, សកម្មភាពនៅក្នុងវិស័យសំណង់ និងទុនវិនិយោគពីបរទេស បាននឹងកំពុងបន្តធ្លាក់ចុះ។

ទោះបីជាយ៉ាងនេះក្តី ការនាំចេញក្រៅពីសម្លៀកបំពាក់និងផលិតផលកាត់ដេរដូចជា កង់ គ្រឿងបង្គុអេឡិចត្រូនិក ផលិតផលពីឈើ និងផលិតផលកសិកម្មផ្សេងទៀតជាដើម បានបន្តរក្សាកំណើនល្អ។

ជារួម សេដ្ឋកិច្ចកម្ពុជា រំពឹងថា នឹងមានកំណើនវិជ្ជមានក្នុងឆ្នាំ ២០២១ ដោយសារការងើបឡើងវិញនៃស្ថានភាពសេដ្ឋកិច្ចសកល និងសេដ្ឋកិច្ចដៃគូពាណិជ្ជកម្មរបស់កម្ពុជា កំណើនតម្រូវការផលិតផលកសិកម្ម លទ្ធភាពនៃការបង្វែរទិសដៅបញ្ជារទិញ និងការទទួលបានរោងចក្រកាត់ដេរពីប្រទេសមីយ៉ាន់ម៉ា មកវិនិយោគនៅកម្ពុជាជាដើម។

លោកបណ្ឌិតគី សេរីវឌ្ឍន៍អ្នកជំនាញសេដ្ឋកិច្ច នៃរាជបណ្ឌិត្យសភាកម្ពុជា លើកឡើងជុំវិញនៃការងើបឡើងកំណើនសេដ្ឋកិច្ចនេះថា បើយើងក្រឡេកមើលអំពីស្ថានភាពសេដ្ឋកិច្ចសកល បច្ចុប្បន្នប្រទេសជាច្រើនមានបទពិសោធន៍នឹងជម្ងឺកូវីដ-១៩ រួចរាល់ ក្នុងនោះសម្រាប់បញ្ហាសេដ្ឋកិច្ចវិញ គឺបានដំណើរការមានស្ថិរភាពជាងមុន។

លោកបាថ្លែងបន្តថា ហើយក្នុងចំណោមប្រទេសទាំងនោះ ក៏មានប្រទេសដែលជាដៃគូរពាណិជ្ជកម្មរបស់កម្ពុជាផងដែរ ដែលកម្ពុជាអាចរំពឹងក្នុងការបញ្ជាល្អប្រសើរឡើងវិញជាមុន, ក្រៅពីនេះកម្ពុជាក៏អាចនឹងទទួលបានការបញ្ជាទិញពីអឺរ៉ុបមួយចំនួនបន្ថែមទៀត ខណៈប្រទេសភូមាកំពុងមានវិបត្តិដោយសារសង្គ្រាមស៊ីវិល ។

ដោយឡែក លោកឧកញ៉ាណាង សុធីអនុប្រធានសហព័ន្ធនិយោជក និងសមាគមពាណិជ្ជកម្មកម្ពុជា បានថ្លែងថា ជុំវិញនឹងវិបត្តិនៃការរីករាលជម្ងឺកូវីដ-១៩ នេះ ប្រទេសដែលអភិវឌ្ឍន៍ក្នុងឧស្សាហកម្មកាត់ដេរមួយចំនួន បានកំពុងទទួលវិបត្តិនៃជម្ងឺនេះយ៉ាងធ្ងន់ធ្ងរ ដែលបញ្ហាទាំងនេះ គឺជាឱកាសរបស់កម្ពុជា។

លោកបានថ្លែងបន្តថា ជាក់ស្តែងសម្រាប់ការបញ្ជាទិញនៅកម្ពុជា គឺមិនមានអ្វីចោទជាបញ្ហានោះឡើយ បច្ចុប្បន្នកម្ពុជាក៏កំពុងទទួលអ្នកបញ្ជាទិញមានចំនួនកើនឡើងផងដែរ ស្របពេលដែលរាជរដ្ឋាភិបាល ក៏ដូចធនាគារពិភពលោក និងធនាគារ ADB រំពឹងថា កំណើនសេដ្ឋកិច្ចកម្ពុជា នឹងត្រូវងើបក្នុងអត្រាវិជ្ជមានមកវិញ នៅក្នុងឆ្នាំ ២០២១ នេះ។

ជុំវិញបញ្ហាកំណើនសេដ្ឋកិច្ចនេះ នៅដើមឆ្នាំ២០២១ រាជរដ្ឋាភិបាល បានព្យាករណ៍ថា សេដ្ឋកិច្ចកម្ពុជានឹងងើបឡើងវិញក្នុងកំណើនវិជ្ជមាន គឺនៅក្នុងរង្វង់៣,៥ភាគរយ ទៅ៤ភាគរយ ក្នុងនោះធនាគារពិភពលោក ក៏បានព្យាករណ៍ផងដែរថា សេដ្ឋកិច្ចកម្ពុជានឹងទទួលបានកំណើនជិត៤ភាគរយ ក្នុងឆ្នាំ២០២១ ដោយសារការរំពឹងទុកនៃការងើបឡើងវិញបន្តិចម្តងៗនៃសេដ្ឋកិច្ចរួមមាន៖ ផ្នែកឧស្សាហកម្មផលិត, អាចងើបឡើងវិញជាបណ្តើរៗ ខណៈដែលអាជីវកម្មបោះដុំនិងលក់រាយ បានកំពុងប្រឹងងើបឡើងវិញក្នុងល្បឿនយឺត តែទោះយ៉ាងណា ការងើបឡើងវិញនេះ ស្ថិតនៅក្នុងសភាពផុយស្រួយ ខណៈវិធានការបិទខ្ទប់នៅតែបន្តអនុវត្ត ដើម្បីទប់ស្កាត់ការរាលដាលនៃការឆ្លងវីរុសកូវីដ-១៩៕