តើអចលនទ្រព្យប្រភេទណាខ្លះត្រូវបានលើ់កលែងពន្ឋមូលធនដែលនឹងចាប់ផ្តើមអនុវត្តន៍នៅឆ្នាំ២០២២

ដោយៈគង់ សូរិយា

ភ្នំពេញៈ អគ្គនាយកដ្ឋានពន្ឋដា នឹងចាប់ផ្តើមយកពន្ឋលើប្រាក់ចំណេញនៅថ្ងៃទី១ មករា ឆ្នាំ២០២២ខាងមុខ ប្រសិនជាគ្មានការប្រែប្រួលទេនោះ។

ប៉ុន្តែរដ្ឋាភិបាលក៏នឹងលើកលែងចំពោះការលក់ ឬផ្ទេរមូលធនមួយចំនួនផងដែររួមមានដូចជា ទី១ ទ្រព្យដែលជាកម្មសិទ្ធិរបស់ស្ថាប័នរដ្ឋ ទី២ ទ្រព្យជាកម្មសិទ្ធិរបស់បេស​កកម្មទូត ឬកុងស៊ុលបរទេស អង្គការអន្តរជាតិ ឬទីភ្នាក់ងារសហប្រតិបត្តិការបច្ចេកទេស នៃរដ្ឋាភិបាលដទៃ ទី៣ និវាសនដ្ឋានជាគោលដើមរបស់អ្នកជាប់ពន្ធ ដែលបានកាន់កាប់ក្នុងរយៈពេលយ៉ាងតិច៥ឆ្នាំមុនពេលលក់ឬផ្ទេរ ក្នុងករណីមាននិវាសនដ្ឋានច្រើនជាងមួយ ឬអ្នកជាប់ពន្ធនិងសហព័ទ្ធមាននិវាសនដ្ឋានផ្សេងពីគ្នា និវាសនដ្ឋានតែមួយប៉ុណ្ណោះ ដែលត្រូវបានអនុញ្ញាតជានិវាសនដ្ឋានជាគោលដើម។

ទី៤ អចលនទ្រព្យក្នុងរង្វង់ញាតិ ដូចមានចែងក្នុងបទប្បញ្ញត្តិ ស្តីពីពន្ធប្រថាប់ត្រា វៀរលែងតែការផ្ទេរកម្មសិទ្ធិ ឬសិទ្ធិកាន់កាប់អចលនទ្រព្យរវាងបងប្អូនបង្កើត និងបងប្អូនបង្កើត រវាងឪពុក-ម្តាយក្មេកនិងកូនប្រសារ និងរវាងយាយ-តាក្មេកនិងចៅប្រសារ ទី៥​ ទ្រព្យដែលត្រូវបានលក់ឬផ្ទេរ ដើម្បីប្រយោជន៍សាធារណៈ ស្របតាមច្បាប់អស្សាមិករណ៍។

បន្ថែមលើនេះ រាជរដ្ឋាភិបាល ក៏បានសម្រេចលើកលែងពន្ធ លើចំណេញមូលធន ចំពោះការលក់ ឬផ្ទេរប្រភេទដីកសិកម្មជាកម្មសិទ្ធិ ឬសិទ្ធិកាន់កាប់របស់ប្រជាពលរដ្ឋ ដែលជាកសិករ កំពុងបង្កបង្កើនផលពិតប្រាកដ និងមានអាសយដ្ឋានរស់នៅ ស្ថិតនៅក្នុងឃុំ/សង្កាត់ ដែលដីកសិកម្មនោះស្ថិតនៅ៕

អគ្គនាយកដ្ឋានពន្ឋដានឹងចាប់ផ្តើមអនុវត្តន៍ការយកពន្ឋមូលធននៅថ្ងៃទី១ មករាឆ្នាំ២០២២

ដោយៈគង់ សូរិយា

ភ្នំពេញៈ អគ្គនាយកដ្ឋានពន្ធដារនៃក្រសួងសេដ្ឋកិច្ច និងហិរញ្ញវត្ថុ នឹងចាប់ផ្តើមអនុវត្តន៍ការប្រមូលចំណូលពន្ធ លើពន្ធចំណេញមូលធនចាប់ពីថ្ងៃទី០១ ខែមករា ឆ្នាំ២០២២តទៅ បន្ទាប់ពីពន្ធនេះត្រូវបានពន្យារពេល អនុវត្តន៍រយៈពេល១ឆ្នាំមកនោះ។

ថ្លែងក្នុងកម្មវិធី “ពន្ធដារកម្ពុជា”ស្តីពី “ពន្ធលើចំណេញមូលធន”នៅថ្ងៃទី២៦ ខែសីហា ឆ្នាំ២០២១នេះ លោក ជ័យ រិទ្ធី អនុប្រធាននាយកដ្ឋានពន្ធចលនទ្រព្យ និងអចលនទ្រព្យ នៃអគ្គនាយកដ្ឋានពន្ធដារ បានឲ្យដឹងថា ពន្ធលើចំណេញមូលធន នឹងត្រូវអនុវត្តន៍នៅដើមឆ្នាំក្រោយ នៅថ្ងៃទី០១ ខែមករា ឆ្នាំ២០២២។

ជាថ្មីម្តងទៀត លោក ជ័យ រិទ្ធី បានអះអាងថា “ពន្ធលើចំណេញមូលធន មិនមែនជាការបង្កើតពន្ធថ្មីនោះទេ”។

លោកបញ្ជាក់ថា អគ្គនាយកដ្ឋានពន្ធដារ បាននិងកំពុងរៀបចំសេចក្ដីព្រៀងណែនាំបន្ថែមទៀត ដើម្បីផ្ដល់ភាពងាយស្រួលដល់អ្នកជាប់ពន្ធ ក្នុងការអនុវត្តន៍កតព្វកិច្ចពន្ធលើចំណេញមូលធននេះផងដែរ។

អនុលោមតាមប្រកាសលេខ ៣៤៦ សហវ.ប្រក ចុះថ្ងៃទី០១ ខែមេសា ឆ្នាំ២០២០ របស់ក្រសួងសេដ្ឋកិច្ច និងហិរញ្ញវត្ថុ ស្តីពី “ពន្ធលើចំណេញមូលធន” មានវិសាលភាពកំណត់យក លើចំណេញមូលធន ចំពោះតែរូបវន្តបុគ្គលនិវាសនជន និងអ្នកជាប់ពន្ធអនិវាសនជន (ជារូបវន្តបុគ្គល ឬនីតិបុគ្គល ដែលមិនមែនជាអ្នកជាប់ពន្ធនិវាសនជន) តាមអត្រា២០%នៃចំណេញមូលធន ពោលគឺចំណេញដែលសម្រេចបានពីការលក់ ឬផ្ទេរមូលធន ៦ប្រភេទរួមមាន៖ អចលនទ្រព្យ ភតិសន្យា ទ្រព្យវិនិយោគ កេរ្តិ៍ឈ្មោះអាជីវកម្ម កម្មសិទ្ធិបញ្ញា និងរូបិយវត្ថុបរទេស។

រីឯនីតិបុគ្គលនិវាសនជន ដែលបានចុះបញ្ជីពន្ធដារ និងប្រកាសបង់ពន្ធលើប្រាក់ចំណូលប្រចាំឆ្នាំរួចរាល់ មិនមានបន្ទុកពន្ធនេះបន្ថែមទៀតទេ។

ពន្ធលើចំណេញមូលធន ប្រមូលលើចំណេញមូលធន ដែលសម្រេចបាននៅពេលមានប្រតិបត្តិការលក់ ឬផ្ទេរមូលធនដែលមានចំណេញប៉ុណ្ណោះ ក្នុងករណីមិនមានចំណេញ គឺមិនមានកាតព្វកិច្ចបង់ពន្ធនេះទេ។

ចំពោះការគណនាប្រាក់ពន្ធ លើចំណេញមូលធន គឺយកប្រាក់ចំណេញ ពីការលក់ឬផ្ទេរមូលធន គុណនឹងអត្រាពន្ធ ២០% ហើយសម្រាប់មូលធនជាអចលនទ្រព្យ ម្ចាស់អចលនទ្រព្យអាចជ្រើសរើស វិធីសាស្ត្រកាត់កងចំណាយ ១) វិធីសាស្ត្រកាត់កងចំណាយតាមការកំណត់ គឺអនុញ្ញាតឱ្យកាត់កងចំណាយ ៨០% នៃប្រាក់ចំណូលដែលទទួល បានពីការលក់ឬផ្ទេរអចលនទ្រព្យ ឬ២) វិធីសាស្រ្តកាត់កងតាមចំណាយជាក់ស្តែង គឺត្រូវបានអនុញ្ញាតឱ្យធ្វើការកាត់កងចំណាយដែលបានកើតឡើងជាក់ស្តែង៕

សារមន្ទីរ ព្រះស្រីឦសានវរ្ម័នចុះ MOU ជាមួយក្រុមហ៊ុន Archetype Cambodia ដើម្បី ប្រឹក្សាបច្ចេកទេសក្នុងការថែរក្សា

ដោយៈសុជាតា

ភ្នំពេញៈ សារមន្ទីរ ព្រះស្រីឦសានវរ្ម័ន ចុះ MOU ជាមួយក្រុមហ៊ុន Archetype

Cambodia ដើម្បី ប្រឹក្សាបច្ចេកទេសក្នុងការថែរក្សានូវសមប្បត្តិបេតិកភ័ណ្ឌនេះឲ្យមានភាពយូរអង្វែង។

យោងតាមសេចក្តីប្រកាសព័ត៌មាន បានអោយដឹងថា អនុស្សរណៈយោគយល់នេះបានបង្ហាញពី កិច្ចសហការវាងអង្គភាពទាំងពីរ និងកម្មវិធីទំនួលខុសត្រូវសង្គម របស់ក្រុមហ៊ុន Archetype ដើម្បីរួមចំណែកដល់ការបន្តការអភិរក្សបេតិកភណ្ឌក្រុង ដែលប្លែកខុសពីគេ និងគួរឱ្យកត់សម្គាល់នៃព្រះរាជាណាចក្រកម្ពុជា។

ពិធីចុះហត្ថលេខានេះបានធ្វើឡើង រវាងលោកBlaise Kilian សហប្រធានសារមន្ទីរ ស.ស.រ និងលោក Michel Cassagnes អគ្គនាយកក្រុមហ៊ុន Archetype Cambodia។

សារមន្ទីរ ស.ស.រ បង្កើតឡើងក្នុងឆ្នាំ២០១៩ ដោយធនាគារជាតិនៃកម្ពុជា ដើម្បីបង្ហាញពីប្រវត្តិសេដ្ឋកិច្ច និងរូបិយវត្ថុរបស់ព្រះរាជាណាចក្រកម្ពុជា ក្នុងរយៈពេល២០០០ឆ្នាំ តាមរយៈវត្ថុបុរាណ ឯកសារសោតទស្សន៍ និងឧបករណ៍អន្តរកម្មដែលតាំងបង្ហាញតាមការរៀបចំពិព័រណ៍មួយដ៏ទំនើបបំផុត។

សារមន្ទីរនេះត្រូវបានរៀបចំឡើង នៅក្នុងអគារបេតិកភណ្ឌ ដែលមានអាយុកាលចាប់តាំងពីសម័យអាណាព្យាបាលបារាំង និងធ្លាប់បានប្រើប្រាស់ធ្វើជាលំនៅដ្ឋានរបស់  លោក  រ៉េស៊ីដង់បារាំងនៅឆ្នាំ១៩០៨ និងជាសាលាក្រុងភ្នំពេញចាប់តាំងពីឆ្នាំ ១៩២០ ហើយបានធ្លាក់ក្នុងសភាពទ្រុឌទ្រោម និងត្រូវបានធនាគារជាតិនៃកម្ពុជាជួសជុលឡើងវិញដើម្បីធ្វើជាសារមន្ទីរ ស.ស.រ៕

កម្ពុជាទាក់ទាញទុនវិនិយោគជាង២៥០០លានដុល្លារអាមេរិកក្នុងវិស័យសំណង់

ដោយៈគង់ សូរិយា

ភ្នំពេញៈ រដ្ឋាភិបាលកម្ពុជា បានអនុម័តទុនវិនិយោគលើវិស័យសំណង់ក្នុងទំហំទឹកប្រាក់ជាង២៥០០លានដុល្លារអាមេរិក នៅក្នុងឆមាសទី១ឆ្នាំ២០២១នេះ។

យោងតាមទិន្នន័យរបស់រដ្ឋាភិបាលបានឲ្យដឹងថា ក្រសួងរៀបចំដែនដី នគរូបនីយកម្ម និងសំណង់ បានចេញលិខិតអនុញ្ញាតឱ្យគម្រោងសាងសង់សរុប២២៣៥ គម្រោង ឬស្មើនឹងទុនវិនិយោគជាង២,៥០០លានដុល្លារ ថយចុះ២៨ភាគរយ បើធៀបនឹងរយៈពេលដូចគ្នាកាលពីឆ្នាំមុន។

រដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់លោកឡៅ ទិព្វសីហាបានឱ្យដឹងកាលពីដើមសប្តាហ៍នេះថា ទាំងការស្នើសុំគម្រោងសាងសង់ ផ្ទៃក្រឡាសំណង់ ទុនវិនិយោគ និងសម្ភារៈសំណង់នាំចូល គឺបានថយចុះទាំងអស់ ដោយសារវិបត្តិកូវីដ១៩។

ជាក់ស្ដែង ធនាគារជាតិធ្លាប់ចេញរបាយការណ៍ថា នៅក្នុងឆមាសទី១ ឆ្នាំ២០២១ នេះ ចំនួនគម្រោងសំណង់ តម្លៃទុនវិនិយោគ និងផ្ទៃក្រឡា បានធ្លាក់ចុះ ១១,៤%-៣៤,៣% និង ២៩,៩% រៀងគ្នាៗ បើធៀបទៅនឹងរយៈពេលដូចគ្នានៅឆ្នាំ ២០២០។

ទោះជាយ៉ាងណា លោកឡៅ ទិព្វសីហាបានថ្លែងថា វិស័យសំណង់នឹងកើនឡើងវិញ នៅពេលស្ថានភាពនៃការរីករាលដាលជំងឺកូវីដ១៩ ប្រសើរឡើង។

ទោះក្នុងវិបត្តិកូវីដក្ដី ក្រសួងក៏បន្តរឹតបន្តឹងច្បាប់សំណង់ ដើម្បីពង្រីកគុណភាពសំណង់ និងការត្រួតពិនិត្យតាមស្តង់ដារបច្ចេកទេស៕

ក្នុងវិស័យអចលនទ្រព្យចាប់ផ្ដើមមានក្រុមដើរកកូរតម្លៃលើសស្ថានភាពទីផ្សារជាក់ស្តែង

ដោយៈវឌ្ឈនៈ

ភ្នំពេញៈ ដោយសារតែ វិស័យអចលនទ្រព្យនៅក្នុងប្រទេសកម្ពុជា បានក្លាយជាវិស័យសំខាន់មួយក្នុងទ្រទ្រង់សេដ្ឋកិច្ច វិស័យនេះក៏បានរីកចម្រើនជាបន្តបន្ទាប់ ប៉ុន្តែក៏មានជនមួយក្ដាប់តូច ចាប់ផ្ដើមធ្វើសកម្មភាពប្រាសចាកពីសីលធម៌ ដោយឃុបឃិតជាមួយម្ចាស់ទ្រព្យកែប្រែតម្លៃអចលនទ្រព្យឱ្យខ្ពស់ ដើម្បីទទួលបានប្រាក់កម្ចីពីក្រុមហ៊ុនឯកជនបានច្រើន។

យោងតាមសេចក្តីប្រកាសរបស់ក្រុមហ៊ុនស៊ីភីអិលឱ្យដឹងថា មានបុគ្គលទុច្ចរឹតបានធ្វើការក្លែងបន្លំ ទៅលើឯកសារវាយតម្លៃអចលនវត្ថុ និងការឆែកតម្លៃបឋមលើទំហំនិងតម្លៃអចលនវត្ថុ ដូចជា ការបង្កើនតម្លៃជាថ្នូរនឹងការទទួលបានប្រាក់កម្ចីខ្ពស់ ពីស្ថាប័នហិរញ្ញវត្ថុ និងក្រុមហ៊ុនផ្ដល់សេវាបញ្ចាំជាដើម។ ការក្លែងបន្លំនេះ ជាទង្វើប្រាស់ចាកពីច្បាប់ និងក្រមសីលធម៌របស់អ្នកវិជ្ជាជីវៈក្នុងវិស័យអចលនទ្រព្យ។

លោកស៊ឹម វិបុល មន្ត្រីសម្របសម្រួលកិច្ចការច្បាប់ នៃក្រុមហ៊ុនស៊ីភីអិល បានឱ្យដឹងថា កន្លងមកក្រុមហ៊ុនមិនដែលជួបប្រទះនឹងករណីនេះទេ វាអាចចាត់ទុកជាលើកទី១ ដែលមានក្រុមទុច្ចរឹត បានយកក្រដាសវាយតម្លៃរបស់ក្រុមហ៊ុនCPL ទៅកែតម្លៃលើសពីតម្លៃដែលបានវាយតម្លៃរួចហើយ ក្នុងន័យដើម្បីទទួលបានប្រាក់កម្ចីខ្ពស់ ។

លោកបន្តថា “ការធ្វើបែបនេះ នឹងធ្វើឱ្យខូចឈ្មោះដល់ក្រុមហ៊ុនរបស់យើង ដែលបានខិតខំធ្វើកិច្ចការដោយស្មោះត្រង់ ហើយនឹងបាត់ជំនឿពីសាធារណជនផងដែរ”។ លោកបន្តថា “ជាជំហ៊ានដំបូងយើងបានប្រកាស ឱ្យក្រុមទុច្ចរឹតទាំងនោះត្រូវបញ្ឈប់សក​ម្ម​ភាពរបស់ខ្លួនជាបន្ទាន់ ហើយបើសិនជាមានលើកក្រោយទៀត ក្រុមហ៊ុននឹងចាត់វិធានការតាមផ្លូវច្បាប់ចំពោះទង្វើមួយនេះ”។

លោកបន្តថា ការធ្វើបែបនេះនឹងអាចធ្វើឱ្យប៉ះពាល់ការវាយតម្លៃ និងបាត់បង់ជំនឿដល់វិនិយោគិន ក៏ដូចជា ពលរដ្ឋម្ចាស់ទ្រព្យក៏ដូចជាស្ថាប័នហិរញ្ញវត្ថុនានាផងដែរ ។

នៅក្នុងវិបត្តិកូវីដ១៩នេះ តម្លៃអចលនទ្រព្យនៅប្រទេសកម្ពុជា ហាក់មិនមានការឡើងថ្លៃខ្ពស់ប៉ុន្មាននោះទេ ហើយក៏មិនមានការធ្លាក់ចុះនៃតម្លៃដែរ ប៉ុន្តែមានអចលនទ្រព្យមួយចំនួន ដែលមានម្ចាស់ជួបបញ្ហាហិរញ្ញវត្ថុ ក៏បានប្រកាសលក់ក្នុងតម្លៃក្រោមទី

ឧកញ៉ាឃាង ពុទ្ឋីៈការចាក់វ៉ាក់សាំង១០លាននាក់របស់រដ្ឋាភិបាលនឹងជួយឲ្យវិស័យអចលនទ្រព្យងើបឡើងវិញនៅចុងឆ្នាំនេះ

ដោយៈសុជាតា

ភ្នំពេញៈ លោកឧកញ៉ា  ឃាង ពុទ្ធី  ប្រធានក្រុមប្រឹក្សាភិបាលសមាគមអ្នកជំនាញអចលនទ្រព្យបានមានប្រសាសន៍ថា ជាមួយនឹងផែនការចាក់វាក់សាំង អោយគ្រប់១០ លាននាក់ ដែលធ្វើអោយទីផ្សារអចលនទ្រព្យ នឹងស្ថេរភាពឡើងវិញនៅបំណាច់ឆ្នាំ ២០២១នេះ។

លោកបន្តថា ប៉ុន្តែត្រូវរំខានដោយវីរុសបំលែងDelta បាននិងកំពុងប៉ះពាល់ដល់ទីផ្សារអចលនទ្រព្យនៅក្នុងនោះដែរ ទីផ្សារលំនៅដ្ឋានមានការប៉ះពាល់ប្រមាណ៥០ភាគរយ និងផ្នែក Commercial real estate មានដូចជា shop house និង  retail market គឺ មានផលប៉ះពាល់ខ្លាំង ដោយគេសង្កេតឃើញថាផ្សារទំនើបអន្តរជាតិ ដូចជា AEON  គឺមានភាពស្ងាត់អ្នកទិញជាដើម។

លោកឧកញ៉ាបានបន្តទៀតថា វិបត្តិCovid បំលែងថ្មីធ្វើអោយប្រជាជន និងអ្នកវិនិយោគ ត្រូវមានការគិតគូរច្បាស់់លាស់ នូវផែនការវិនិយោគមុនចំណាយបា្រក់។ ហើយដំណោះស្រាយចំពោះវិបត្តិនេះ គឺ អំពាវនាវអោយប្រជាជន ចូលរួមខិតខំប្រឹងប្រែងជាមួយរដ្ឋាភិបាល ៣កុំ និង៣ការពារ។ ប្រជាជនត្រូវភ្ញាក់រលឹក ដើម្បីចូលរួមរដ្ឋាភិបាលក្នុងទប់ស្កាត់អោយខានតែបាន។

ទោះបីជាយ៉ាងណារដ្ឋាភិបាលកម្ពុជា ជាពិសេសរដ្ឋបាលរាជធានីភ្នំពេញបានសហ​ការជាមួយនឹងវិស័យឯកជនបន្ថែមទៀត ដើម្បីទប់ស្កាត់ជំងឺដ៏កាចសាហាវនេះ អោយបាន ដោយធ្វើអោយសកម្មភាព ការងារលើវិស័យសំណង់ មិនត្រូវបានផ្អាកដំណើរការនោះទេ។

អ្នកឧកញ៉ា លី ហួរ ប្រធានសមាគមន៍អភិវឌ្ឍន៍លំនៅដ្ឋាននៅកម្ពុជា បានលើកឡើងថា ការចាក់វាក់សាំង ជាមួយនឹងការចូលរួមសហការពីវិស័យឯកជន ព្រមទាំងប្រជាពលរដ្ឋផងនោះ ធ្វើអោយវិស័យសំណង់នៅតែដំណើរទៅមុខ មិនអាក់ខានដោយសារ កូវីដ ១៩ នោះទេ៕

ប្រធានាធិបតីចិនលោកស៊ី ជីនពីងដាក់ចេញគោលនយោនបាយកាត់បន្ថយ វិសមភាពក្នុងសង្គមចិន

ដោយៈសុខុម

ប៉េកាំង: មន្ត្រីជាន់ខ្ពស់បក្សកុម្មុយនីស្តចិន មួយរូបបានលើកឡើងនៅថ្ងៃព្រហស្បតិ៍ ទី២៦ សីហា នេះថា ការជំរុញរបស់មហាយក្សចិន ដើម្បី “ភាពរុងរឿងទាំងអស់គ្នា” ខណៈប្រធានាធិបតី ស៊ី ជីនភីង មានបំណងកាត់បន្ថយវិសមភាពសង្គម ក្នុងប្រទេសមិនមានន័យថា “សម្លាប់អ្នកមានដើម្បីជួយអ្នកក្រ”ឡើយ។ នេះបើយោងតាមការចុះផ្សាយរបស់ទីភ្នាក់ងារព័ត៌មាន Reuters។

លោក Han Wenxiu មន្រ្តីមកពីគណៈកម្មាធិការកិច្ចការហិរញ្ញវត្ថុ និងសេដ្ឋកិច្ចមជ្ឈិមបក្សបានថ្លែង ក្នុងសន្និសីទកាសែតក្នុងទីក្រុងប៉េកាំងថា “អ្នកដែលក្លាយជាអ្នកមានមុនគេ” គួរតែជួយអ្នកដែលមិនទាន់មាន ប៉ុន្តែអ្នកក្រក៏គួរតែខិតខំប្រឹងប្រែងឱ្យអស់ពីសមត្ថភាព។

លោកបានគូសបញ្ជាក់ថា “យើងមិនអាចដេករង់ចាំតែជំនួយ ពឹងឱ្យអ្នកដទៃជួយ ឬអង្វរសុំជំនួយជាដាច់ខាត។ យើងមិនអាចជួយអ្នកដែលខ្ជិលច្រអូសឡើយ”។

ប្រទេសចិនបានប្រកាសថា ខ្លួននឹងការពារប្រាក់ចំណូល ដែលមានប្រភពស្របច្បាប់ ប៉ុន្តែនឹងធ្វើករ “កែសម្រួលប្រាក់ចំណូលដែលខ្ពស់ហួសហេតុ និងគ្មានប្រភពច្បា​ស់លាស់”។នេះបើយោងតាមកិច្ចប្រជុំមួយ ធ្វើឡើងក្រោមអធិបតីយភាពរបស់ប្រធានាធិបតី ស៊ី ជីនភីង កាលពីដើមខែនេះ។

ទន្ទឹមនេះ បណ្ដាក្រុមហ៊ុនដែលមានប្រាក់ចំណូលខ្ពស់ ក៏ត្រូវបានលើកទឹកចិត្តឱ្យរួមចំណែកបន្ថែមទៀតដើម្បីជួយដល់សង្គមផងដែរ។

លោក Han Wenxiu បានលើកឡើងថា ការផ្តល់អំណោយសប្បុរសធម៌ គួរតែត្រូវបានលើកទឹកចិត្ត តាមរយៈគោលនយោបាយពន្ធដារ ហើយកែលម្អ “រចនាសម្ព័ន្ធចូលរួមចំណែកជួយដល់សង្គម”។ ទោះជាយ៉ាងណា លោកបញ្ជាក់ថា ការបរិច្ចាគមិនមែនជាកាតព្វកិច្ចដែលត្រូវតែធ្វើដាច់ខាតនោះឡើយ។

ការប្រែប្រួលគោលនយោបាយនេះកើតមានឡើង ស្របពេលរដ្ឋាភិបាលក្រុងប៉េកាំង ចាត់វិធានការបង្ក្រាបផ្នែកនិយ័តកម្ម និងត្រួតពិនិត្យយ៉ាងតឹងរ៉ឹងទៅលើសកម្មភាពរបស់ក្រុមហ៊ុនធំៗ ជាពិសេសក្រុមហ៊ុនបច្ចេកវិទ្យាខ្នាតយក្សរបស់ចិន។

បណ្ដាវិនិយោគិនជឿថា ពេលនេះមានការផ្លាស់ប្ដូរយ៉ាងខ្លាំងក្នុងប្រទេសចិន ខណៈពេលរដ្ឋាភិបាលក្រុងប៉េកាំង កំពុងប្រឹងប្រែងធ្វើកំណែទម្រង់ ក្នុងគោលបំណងកាត់បន្ថយសម្ពាធថ្លៃ ទ្រទ្រង់ជីវភាពដោយសារក្រុមហ៊ុនសហគ្រាសនានា។

លោក Han Wenxiu បានសង្កត់ធ្ងន់ថា “គោលនយោបាយថ្មីៗសម្រាប់កែតម្រូវ និងគ្រប់គ្រង Platform អនឡាញនានា ដើម្បីបង្ក្រាបភាពមិនប្រក្រតីនានា និងអាកប្បកិរិយាខុសច្បាប់”។

លោកបញ្ជាក់ថា “យើងមិនមានបំណងផ្ដោតគោលដៅ ធ្វើបាបក្រុមហ៊ុនឯកជន ឬក្រុមហ៊ុនបរទេសឡើយ”៕

សមាគមអចលនទ្រព្យសកលពង្រីកបណ្តាញថ្នាក់ដឹកនាំទៅកាន់ខេត្តសៀមរាប

ដោយៈគង់ សូរិយា

ភ្នំពេញៈ សមាគមអចលនទ្រព្យសកល បានសម្រេចតែងតាំងបុគ្គលពីរូបជាអនុប្រធានសមាគមប្រចាំខេត្តសៀមរាប ដើម្បីពង្រីកបណ្តាញក្នុងគោលដៅលើកកំពស់ការផ្សព្វផ្សាយ ក៏ដូចពង្រីកសក្តានុពលលើវិស័យអចលនទ្រព្យនៅកម្ពុជា។

ថ្នាក់ដឹកនាំសមាគមប្រចាំខេត្តសៀមរាប ដែលត្រូវបានតែងតាំងនោះរួមមានទី១ លោក ប៉ែន សូរ ជាអនុប្រធានសមាគមអចលនទ្រព្យសកលខេត្តសៀមរាបទទួលបន្ទុកផ្នែកសំណង់ និងទី២ លោក យ៉ាង វិនយុង ជាអនុប្រធានសមាគមអចលនទ្រព្យសកលខេត្តសៀមរាបទទួលបន្ទុកផ្នែកអភិវឌ្ឍន៍។

លោកឧកញ៉ាសំ សុខនឿនប្រធានសមាគមអចលនទ្រព្យសកល(GRA)បានមានប្រសាសន៍ឲ្យដឹងនៅព្រឹកថ្ងៃទី២៦ សីហានេះថា សមាគមអចលនទ្រព្យសកលមានគោលដៅចូលរួមចំណែក ជាមួយរាជរដ្ឋាភិបាលកម្ពុជា ក្នុងការចូលរួមលើកកំពស់វិស័យ​សំណង់ និងអចលនទ្រព្យនៅកម្ពុជា ហេតុនេះសមាគមមានគោលដៅពង្រីកបណ្តាញថ្នាក់ដឹកនាំឲ្យបានទូទាំងប្រទេស និងពង្រីកទៅកាន់ក្រៅប្រទេស នាពេលខាងមុខបន្ថែមទៀត។

លោកបន្តថា “យើងមានគោលដៅក្នុងការផ្សព្វផ្សាយ ពីការរីកចម្រើនអចលនទ្រព្យ​នៅកម្ពុជាទៅកាន់ទីផ្សារអន្តរជាតិ ដើម្បីទាក់ទាញទុនវិនិយោគពីក្រៅប្រទេសមកកាន់កម្ពុជាកាន់តែច្រើនថែមទៀត”៕

 

ក្រុមហ៊ុនទូរទស្សន៍ធំៗ៣នៅកម្ពុជារួមគ្នាវិនិយោគថ្នាលទូរទស្សន៍ឌីជីថលតែមួយ

ដោយៈវឌ្ឍនៈ

ភ្នំពេញៈ ក្រុមហ៊ុនទូរទស្សន៍ចំនួន៣នៅកម្ពុជា រួមមាក្រុមហ៊ុនCBS របស់ រ៉ូយ៉ាល់គ្រុប ក្រុមហ៊ុនទូរសទ្សន៍ហង្សមាស និងក្រុមហ៊ុនទូរទស្សន៍បាយ័ន បានរួមគ្នាក្នុងការបណ្ដា​ក់ទុនវិនិយោគ លើថ្នាលទូរទស្សន៍ឌីជីថលតែមួយនៅម្ពុជា ។ នេះបើតាមសេចក្តីប្រកាសព័ត៌មាននៅព្រឹកថ្ងៃទី២៦ សីហា២០២១នេះ ក្រោយពិធុះហត្ថលេខារួមគ្នានៅព្រឹកនេះដែរ ។

យោងតាមសេចក្តីប្រកាសព័ត៌មានដដែលបានឱ្យដឹងថា ថ្នាលទូរទស្សន៍ឌីជីថល​ជាតិ ដែលជាក្រុមហ៊ុនចម្រុះរវាងរដ្ឋ និងឯកជនថ្មីនេះ នឹងផ្តល់ជូននូវសេវាថ្នាល ទូរទ​ស្សន៍ឌីជីថលផ្សាយតាមប្រព័ន្ធDVB-T2 ដែលមានប៉ុស្តិ៍ច្រើនប្រភេទសម្បូរបែប សំដៅលើកស្ទួយវិស័យព័ត៌មាន អប់រំ ចំណេះដឹង សិល្បៈកម្សាន្ត កីឡា និងទស្សនីយភាពត្រជាក់ៗ ដែលនាំមកនូវភាព សុខដុមរមនាដល់ក្រុមគ្រួសារកម្ពុជា។

លោកជំទាវ ហ៊ុន ម៉ាណា ប្រធានក្រុមហ៊ុនទូរទស្សន៍បាយ័នគ្រុប បានមានប្រសា​សន៍ថា “លោកជំទាវពិតជាមាន សេចក្តីសោមនស្សរីករាយ ក្នុងការសហការគ្នាបង្កើតថ្កោលទូរទស្សន៍ឌីជីថលនេះ ហើយក៏ជាផ្នែកមួយផងដែរ ក្នុងការគាំទ្រការផ្សព្វផ្សាយគោលនយោបាយរបស់រាជរដ្ឋាភិបាលកម្ពុជា ដែលបច្ចុប្បន្នកម្ពុជាកំពុងមានការអភិវឌ្ឍលើគ្រប់វិស័យទាំងអស់ ក្រោមម្លប់សន្តិភាព និងស្ថេរភាពនយោបាយ”។

ចំណែកអ្នកឧកញ៉ា គិត ម៉េង ប្រធានក្រុមហ៊ុនរ៉ូយ៉ាល់គ្រុប បានមានប្រសាសន៍ថា  ការរួមគ្នារវាងក្រុមហ៊ុនទូរទស្សន៍ធំៗ នៅកម្ពុជាទាំង៣ នឹងរួមចំណែកក្នុងការអភិវឌ្ឍប្រ​ទេ​សកម្ពុជា ក្នុងវិស័យសោតទស្សន៍  និងផ្សព្វផ្សាយឱ្យទៅជាប្រព័ន្ធឌីជីថល ពេញលេញនិងស្របតាមគោលនយោបាយរបស់រាជរដ្ឋាភិបាល ក្នុងការចូលរួមសម្រេចឱ្យបានសេដ្ឋកិច្ចសង្គមឌីជីថលកម្ពុជា ស្របតាមគន្លង ឧស្សាហកម្មបច្ចេកវិទ្យាឌីជីថលជំនាន់ទី៤។

ជាមួយគ្នានេះ លោកឧកញ៉ា អ៊ឹង ឆៃងួន ប្រធានក្រុមហ៊ុនទូរទស្សន៍ហង្សមាសគ្រុប ក៏បានលើកឡើងផងដែរថា ថ្នាលទូរទស្សន៍ឌីជីថលនេះ នឹងនាំមកនូវទស្សនីយភាព និងស្តង់ដាថ្មីស្រឡាងមួយទៀត ដែលមានកម្រិតផ្សាយគុណភាពខ្ពស់ ច្បាស់ត្រជាក់ភ្នែកកម្រិត UHD 4K ។ ទូរទស្សន៍ឌីជីថលនេះ ជាថ្នាលប្រមូលផ្ដុំនៃកម្ម វិធីសិល្បៈ កម្មវិធីកំសាន្ត កម្មវិធីព័ត៌មាន ភាពយន្ត តន្ត្រី និងទស្សនីយភាពដ៏សម្បូរបែបជាច្រើនទៀត ដែលធានានូវការផ្ដល់ជូនចំណីចក្ខុ ដ៏រីករាយជូនទស្សនិកជនទូទាំងប្រទេស ក្នុងកន្លែងតែមួយ “One-Stop Media Services”។

លោកឧកញ៉ាបន្តថា “នេះជាភាពរីកចម្រើនមួយដ៏ធំ ក្នុងវិស័យសោតទស្សន៍ និងផ្សព្វផ្សាយ ស្របតាមគោល នយោបាយរដ្ឋាភិបាលសម្រាប់សង្គមឌីជីថលកម្ពុជា ឲ្យដើរស្របតាមគន្លង ឧស្សាហកម្មបច្ចេកវិទ្យាឌីជីថលជំនាន់ទី៤”។លោកបន្តថា “ដូច្នេះការផ្លាស់ប្តូររូបរាងថ្មី និងបទពិសោធន៍នៃការកម្សាន្តនេះ ធ្វើឲ្យប្រទេសកម្ពុជា អាចដើរតាមបច្ចេកវិទ្យាឈានមុខ ទន្ទឹមនឹងឆាកអន្តរជាតិ ដោយទស្សនិកជនអាចទស្សនារាល់ទស្សនីយភាពដែលផលិត ឡើងមានគុណភាពស្តង់ដាខ្ពស់ ច្បាស់ត្រជាក់ភ្នែកពីគេហដ្ឋាន ឬមើលតាមទូរស័ព្ទដៃ គ្រប់វេលា គ្រប់ទីកន្លែង នៅលើថ្នាលតែមួយ”៕

ទីផ្សារអចលនទ្រព្យទូទាំងពិភពលោកហាក់នៅទ្រឹង ខណៈតម្លៃចេះតែបន្តហក់ឡើងខ្ពស់

ដោយៈសុខុម

អន្តរជាតិៈ ការឆ្លងរីករាលដាលវីរុសកូវីដ-១៩ មិនងាយនឹងផុតរលត់ឆាប់ៗឡើយ ប៉ុន្តែតម្លៃអចលនទ្រព្យនៅតែបន្តហក់ឡើងខ្ពស់ ក្នុងរយៈពេលប៉ុន្មានសប្តាហ៍ចុងក្រោយនេះនៅតាមទីក្រុងមួយចំនួន ដូចជា ទីក្រុងឡុងដ៍ នៃប្រទេសអង់គ្លេស ទីក្រុងប៉ារីស នៃប្រទេសបារាំង និងទីក្រុងវែនឃូវើ (Vancouver) នៃប្រទេសកាណាដា និងប្រទេសនូវែលសេឡង់ ជាដើម។ នេះបើយោងតាមសារព័ត៌មាន The Edge Markets ចុះផ្សាយកាលពីថ្ងៃទី២៥ សីហា។

ក្រុមហ៊ុនអចលនទ្រព្យសិង្ហបុរី SRX Property បាននិយាយកាលពីសប្ដាហ៍មុនថា ឆ្លងទៅម្ខាងផ្លូវដែក Causeway ក្នុងប្រទេសម៉ាឡេស៊ី ការលក់ខុនដូមានសន្ទុះកើនឡើងខ្លាំងគួរឱ្យកត់សម្គាល់។ ទិន្នន័យអចលនទ្រព្យ នៅលើគេហទំព័ររបស់ក្រុមហ៊ុនខាងលើនេះបានបង្ហាញថា ចំនួននៃការលក់ខុនដូបានកើនឡើង២២.៥%ក្នុងខែកក្កដា បន្ទាប់ពីធ្លាក់ចុះ២ខែជាប់ៗគ្នា ហើយតម្លៃបានបន្តហក់ឡើងខ្ពស់ ដោយសារមនុស្សសម្រុកនាំគ្នាទិញ។

កាលពី៣សប្តាហ៍មុន អាផាតម៉ិនមួយដែលមាន៥បន្ទប់នៅតំបន់ Bishan ក្នុងប្រទេសសិង្ហបុរី លក់បានថ្លៃដល់ទៅប្រមាណ៩៦៤.០០០ដុល្លារអាមេរិក ដោយបំបែកកំណត់ត្រាចាស់ ប្រមាណ៩៣៧.០០០ដុល្លារអាមេរិក។

សារព័ត៌មាន Bloomberg បានចុះផ្សាយកាលពីសប្តាហ៍មុនថា ទីផ្សារលំនៅដ្ឋាននៅក្នុងប្រទេសសិង្ហបុរី ទទួលបានរំហូរចំណាយខ្ពស់ រហូតដល់ទៅ២៤,៣ពាន់លានដុល្លារអាមេរិក នៅក្នុងឆមាសទី១ ឆ្នាំនេះ។

ទោះជាយ៉ាងណា លោក Foo Gee Jen នាយកគ្រប់គ្រងក្រុមហ៊ុនអចលនទ្រព្យម៉ាឡេស៊ី CBRE | WTW បានព្យាករថា ការងើបឡើងនៃទីផ្សារអចលនទ្រព្យ នឹងនៅតែមានសន្ទុះយឺតសន្សឹមៗ។

ទន្ទឹមនេះ លោកStanley Toh នាយកប្រតិបត្តិក្រុមហ៊ុនអចលនទ្រព្យម៉ាឡេស៊ី LaurelCap Sdn Bhd រំពឹងថា នៅពេលបញ្ហាការផ្គត់ផ្គង់លើសតម្រូវការ ត្រូវបានដោះស្រាយ ទីផ្សារអចលនទ្រព្យនឹងស្ទុះងើបឡើងវិញយ៉ាងរហ័ស។ លោកបានបន្តថា ពលរដ្ឋអាស៊ី ចូលចិត្តទិញអចលនទ្រព្យទុកជាការវិនិយោគរយៈពេលវែង ហើយប្រជាជនម៉ាឡេស៊ី នឹងសម្រុកទិញអចលនទ្រព្យតាមគ្នា នៅពេលឃើញគេចាប់ផ្ដើមទិញ។

ទោះជាយ៉ាងណា អ្នកជំនាញអចលនទ្រព្យទាំង៣រូបនេះបានគូសបញ្ជាក់ថា ការវិនិយោគផ្ទាល់ពីបរទេស (FDI) គឺជាកត្តាដ៏សំខាន់មិនអាចខ្វះបាន ប្រសិនបើទីផ្សារអច​លនទ្រព្យចង់ងើបឡើងវិញឆាប់រហ័ស។

ប្រទេសនានាដូចជាសិង្ហបុរី ថៃ ឥណ្ឌូនេស៊ី និងវៀតណាម ជាដើមនាំមុខប្រទេសម៉ាឡេស៊ី ទាក់ទងនឹងការទាក់ទាញទុនវិនិយោគផ្ទាល់ពីបរទេស (FDI)។ ហើយប្រទេសទាំងនេះ ក៏នៅតាមមិនទាន់បណ្ដាប្រទេសជិតខាងរបស់ខ្លួនផងដែរ ទាក់ទងនឹងការត្រៀមខ្លួនរួចរាល់ផ្នែកហេដ្ឋារចនាសម្ព័ន្ធ៕