ដោយៈ ប៊ី

ភ្នំពេញៈ សភាពាណិជ្ជកម្មកម្ពុជា នឹងបង្កើតតំណាងការិយាល័យរបស់ខ្លួនជាលើកដំបូងនៅប្រទេសជប៉ុននៅចុងឆ្នាំ២០២១ ឬដើមឆ្នាំ២០២២ខាងមុខ ដើម្បីផ្សព្វផ្សាយគោលនយោបាយវិនិយោគ និងសក្តានុពលរបស់កម្ពុជាដើម្បីទាក់ទាញអ្នកវិនិយោគិនឲ្យកាន់តែច្រើនថែមទៀតឲ្យមកបណ្តាក់ទុននៅកម្ពុជា។

លោកឧកញ៉ាលឹម ហេងអនុប្រធានសភាពាណិជ្ជកម្មកម្ពុជា បានឱ្យដឹងកាលពីល្ងាចថ្ងៃទី៧ ខែកក្កដាកន្លងទៅថា គម្រោងបើកតំណាងការិយាល័យនៅក្រៅប្រទេស មិនមែនមានតែនៅប្រទេសជប៉ុនមួយទេ គឺនៅមានបណ្តាប្រទេសផ្សេងទៀត ដូចជានៅកាណាដា សហគមន៍អឺរ៉ុប សហរដ្ឋអាម៉េរិក និងចិនជាដើម ប៉ុន្តែដោយសារវិបត្តិកូវីដ១៩ ទើបធ្វើឲ្យខកខាននូវគម្រោងទាំងនេះ។

លោកឧកញ៉ាបានថ្លែងដូច្នេះថា “គម្រោងយើងតាំងពីដើមឆ្នាំ២០២០យើងប្រុងបង្កើតនៅកាណាដា ដោយសារយើងត្រូវរៀបចំនីតិវិធីដើម្បីបោះឆ្នោតរើសតំណាងដោយសមាគមពាណិជ្ជករខ្មែរយើងនៅនឹងច្រើន ប៉ុន្តែដោយសារបញ្ហាកូវីដវាអាក់ខានអត់បានបង្កើតទៅ”។

លោកឧកញ៉ាបានឱ្យដឹងថា ប៉ុន្តែពេលថ្មីៗនេះ យើងបានប្រកាសតាមសារព័តមាន ជប៉ុនគាត់ដឹងឮ គាត់ចាប់អារម្មណ៍ដើម្បីរកតំណាងដាក់នៅប្រទេសគាត់ បានគាត់មកជួបសភាពាណិជ្ជកម្ម ក៏ដូចជាក្រសួងពាណិជ្ជកម្មដើម្បីដាក់តំណាងការិយាល័យសភាពាណិជ្ជកម្មនៅប្រទេសគាត់ ហើយការដាក់មិនមែនសម្រាប់ប្រទេសទេ គឺមាននៅតាមខេត្ត ឬតាមរដ្ឋដែលមានសក្តានុពលវិនិយោគច្រើនហើយនិងទៅសហគមន៍អឺរ៉ុប អាម៉េរិក។

លោកឧកញ៉ា បានឲ្យដឹងទៀតថា ក្នុងចំណោមប្រទេសគោលដៅធំៗខាងលើ ប្រទេសជប៉ុននឹងអាចជាប្រទេសដំបូងគេដែលកម្ពុជាបង្កើតតំណាងការិយាល័យ ដោយសារស្ថានទូតជប៉ុន និងធុរជនជប៉ុនបានស្នើសុំឱ្យសភាពាណិជ្ជកម្ម បើកការិយាល័យតំណាងនៅនៅទីនោះ។

លោកឧកញ៉ា បានថ្លែងបន្តថា ជប៉ុនប្រហែលជាអាចមុនគេព្រោះគាត់ទាក់ផ្ទាល់ ដល់ញ្ចឹងយើងកំពុងរៀបចំនីតិវិធីដើម្បីរៀបចំការបោះឆ្នោតដើម្បីរើសប្រធានការិយាល័យតំណាងឲ្យវាមានតម្លាភាព មានអាណិត្តញ្ចឹងទៅ។

លោកឧកញ៉ា បានបន្តថា ដោយសារកូវីដអូសបន្លាយក៏មានប្រជុំតាមអនឡាញខ្លះដែរ ដល់ញ្ចឹងប្រហែលជាចុងឆ្នាំនឹង ឬអាចដើមឆ្នាំក្រោយយើងអាចជំរុញឲ្យបាន ដែលជារឿងល្អដែលយើងមានតំណាងសម្រាប់ឲ្យមានទំនាក់ទំនងនៅបណ្តាប្រទេសគេនឹង។

លោកឧកញ៉ា បានឱ្យដឹងទៀតថា និយាយចំគ្រប់វិស័យទាំងអស់ដែលយើងត្រូវផ្សព្វផ្សាយ ប៉ុន្តែអ្វីដែលគាត់ចាប់អារម្មណ៍មកកម្ពុជាយើងខ្លាំង យើងឃើញថាការចុះទុនវិនិយោគឧស្សាហកម្មកែច្នៃច្រើន ជាពិសេសចាប់អារម្មណ៍លើផលិតផលកសិកម្មយើងផងជាពិសេសវិស័យកាត់ដេរ គ្រឿងអគ្គិសនី គ្រឿងបង្គុំ រថយន្ត យើងគិតថាវាជារឿងល្អ។

យោងតាមទិន្នន័យរបស់អង្គការពាណិជ្ជកម្មក្រៅប្រទេសជប៉ុន ជេត្រូ(Jetro) បានឲ្យដឹងថា គិតត្រឹមត្រីមាសទី១ ឆ្នាំ២០២១នេះ ពាណិជ្ជកម្មទ្វេភាគីកម្ពុជា-ជប៉ុន សម្រេចបានក្នុងទំហំទឹកប្រាក់សរុបជាង ៦៣៣លានដុល្លារ កើនឡើងជិត ៨ ភាគរយ ធៀបនឹងរយៈពេលដូចគ្នាឆ្នាំ២០២០។ ក្នុងនោះ ការនាំចេញពីកម្ពុជាមានតម្លៃជាង ៤៨០លានដុល្លារ និងការនាំចូល ពីជប៉ុនមានចំនួនជាង ១៤៣លាន ដុល្លារ៕

ដោយៈ ប៊ី

ភ្នំពេញៈ កម្ពុជាទទួលបានក្រុមហ៊ុនវិនិយោគថ្មី លើវិស័យឧស្សាហកម្មធុនធំមានចំនួន៧៩ក្រុមហ៊ុន ដែលគិតជាទំហំទឹកប្រាក់មានជាង១៣ពាន់លានដុល្លារអាមេរិក ក្នុងរយៈពេល៦ខែ ឆ្នាំ២០២១។ នេះបើយោងតាមការបញ្ជាក់របស់មន្ត្រីជាន់ខ្ពស់នៃក្រសួងឧស្សហកម្ម វិទ្យាសាស្រ្ត បច្ចេកវិទ្យា និងនវានុវត្តន៍។

លោកហេង សុខគង់អ្នកនាំពាក្យ និងជារដ្ឋលេខាធិការក្រសួងឧស្សហកម្ម វិទ្យាសាស្រ្ត បច្ចេកវិទ្យា និងនវានុវត្តន៍ បានឱ្យដឹងនៅថ្ងៃទី៨ ខែកក្ដដា ឆ្នាំ២០២១ នេះថា នៅក្នុងស្ថានភាពនៃវិបត្តិជម្ងឺកូវីដ១៩នេះ ស្ថានភាពនៃការវិនិយោគលើផ្នែកឧស្សាហកម្ម បានថមថយខ្លះៗ ជាក់ស្តែងគិតត្រឹមចុងខែមិថុនា ដើមឆ្នាំ២០២១នេះ កម្ពុជាមានរោងចក្រធុនធំបានបិទទ្វារ មានចំនួនប្រមាណ១៣៥ក្រុមហ៊ុន ចំពោះកត្តាសំខាន់ ដែលបណ្តាលឲ្យមានការបិទទ្វារនេះ មកពីការរីករាលដាលនៃជម្ងឺកូវីដ-១៩។

លោកបានថ្លែងបន្តថា ទោះបីនៅក្នុងស្ថានភាពនេះ មានការបិទរោងចក្រច្រើន តែនៅក្នុងរយៈពេល៦ខែ ដើមឆ្នាំ២០២១នេះ ចំពោះការចុះបញ្ជីនៅក្រសួងឧស្សហកម្ម វិទ្យាសាស្រ្ត បច្ចេកវិទ្យា និងនវានុវត្តន៍ គឺក្រសួងទទួលបានការចុះបញ្ជីលើរោងចក្រឧស្សាហកម្មធុនធំមានចំនួន៧៩ក្រុមហ៊ុន គិតជាទំហំទឹកប្រាក់មានចំនួនប្រមាណជាង១៣ពាន់លានដុល្លារអាមេរិក បើធៀបនឹងឆ្នាំ២០២០។

លោកបានថ្លែងទៀត វិស័យនេះគឺមានកំណើនកើនឡើង ក្នុងនោះការវិនិយោគបានផ្តោតសំខាន់ទៅលើរោងចក្រកែច្នៃម្ហូបអាហារ និងរោងចក្រផលិតសម្ភារៈផ្នែកវិជ្ជសាស្រ្តជាដើមរួមមាន៖ រោងចក្រផលិតម៉ាស់, អាលកុល, ខោអាវពេទ្យ និងសម្ភារៈវិជ្ជសាស្រ្តមួយចំនួនទៀតងងដែរ។

ទាក់ទងនឹងវិស័យSME លោកហេង សុខគង់ បានថ្លែងឲ្យដឹងថា នៅក្នុងរយៈពេល៦ខែ ដើមឆ្នាំ២០២១នេះដែរ សហគ្រាសធុនតូច និងមធ្យម ដែលបានចុះបញ្ជីនៅក្រសួង គឺឈរនៅទ្រឹងមិនមានការប្រែប្រួលអ្វីខ្លាំងនោះឡើយ ព្រោះអ្នកវិនិយោគលើវិស័យទាំងនេះ អាចនឹងរង់ចាំឱកាសវិនិយោគបន្ត តែទោះបីយ៉ាងណា ក្រសួងក៏កំពុងសិក្សា ពិនិត្យមើលអំពីលទ្ធភាពនៃការវិនិយោគ នៅក្នុងស្ថានភាពនៃការរីករាលដាលជម្ងឺកូវីដ-១៩ នេះ ។

លោកឧកញ៉ាតែ តាំងប៉សម្ព័ន្ធសមាគមសហគ្រាសធុនតូច និងមធ្យមកម្ពុជា ថ្លែងថា បន្ទាប់ពីរាជរដ្ឋាភិបាលជម្រុញការចុះបញ្ជីតាមប្រព័ន្ធបច្ចេកវិទ្យាថ្នាលតែមួយ សហគ្រាសធុនតូច និងមធ្យម នៅក្រោមការគ្រប់គ្រងរបស់សាម៉ីក្រសួង គឺមានម្ចាស់សហគ្រាសមួយចំនួន បានទៅចុះបញ្ជីនៅតាមប្រព័ន្ធបច្ចេកវិទ្យានោះ តែទោះយ៉ាងណាចំនួននៃការចុះបញ្ជីនេះ នឹងអាចថមថយ បើធៀបទៅឆ្នាំ២០២០។

លោកឧកញ៉ាបានឱ្យដឹងទៀតថា សម្រាប់បញ្ហានេះ សម្ព័ន្ធសមាគមសហគ្រាសធុនតូច និងមធ្យមកម្ពុជា បានកំពុងជជែកពិភាក្សា ជាមួយស្ថាប័នពាក់ព័ន្ធ ដើម្បីលើកទឹកចិត្តលើផ្នែកពន្ធដាមួយចំនួន ចំពោះសហគ្រាមីក្រូ តូច និងមធ្យម ដើម្បីធ្វើយ៉ាងណាជម្រុញខ្សែសង្វាក់ផលិតរបស់ពួកគេ ឲ្យបានដំណើរបានដោយរលូន។

ក្នុងរយៈពេល៦ ខែឆ្នាំ២០២១ នេះដែរ ក្រុមប្រឹក្សាអភិវឌ្ឍន៍កម្ពុជា ហៅកាត់ថា CDC បានសម្រេចចេញវិញ្ញាបនបត្រចុះបញ្ជីជូនក្រុមហ៊ុនវិនិយោគចំនួន ៦៩ គម្រោង មានទឹកប្រាក់វិនិយោគសរុបចំនួនជិត ២,៤ ពាន់លានដុល្លារអាមេរិក ក្នុងនោះគម្រោងលេចធ្លោជាងគេ គឺគម្រោងវិនិយោគរោងចក្រថាមពលអគ្គិសនីដើរដោយធ្យូងថ្ម មានទុនវិនិយោគប្រមាណជាង ១,២ ពាន់លានដុល្លារអាមេរិក និងគម្រោងវិនិយោគផលិតក្រដាសមានទុនវិនិយោគ ៥០៤ លានដុល្លារអាមេរិកផងដែរ ។ ចំណែកផ្នែកកម្មន្តសាល ដែលបានស្នើរសុំចុះបញ្ជី តាមប្រព័ន្ធចុះបញ្ជីអាជីវកម្មតាមថ្នាលបច្ចេកវិទ្យាព័ត៌មានរបស់រាជរដ្ឋាភិបាល គឺមានចំនួនជាង ៨%, ដោយមានទុនវិនិយោគជិត ១៤% បើធៀបទៅនឹងការវិនិយោគទៅលើវិស័យផ្សេងៗ៕

ដោយៈ មា៉ណេត

ភ្នំពេញៈ កម្ពុជាទទួលបានការវិនិយោគដោយផ្ទាល់ពីបរទេស (FDI) មានតម្លៃ៨២៥លានដុល្លារ ក្នុងរយៈពេល៥ខែដំបូងនៃឆ្នាំ២០២១ ធ្លាក់ចុះ៥៩ភាគរយ ធៀបនឹងរយៈពេលដូចគ្នាកាលពីឆ្នាំ២០២០ និងគម្រោងនេះរំពឹងថានឹងបង្កើតការងារក្នុងស្រុកចំនួន៣០,០០០។ នេះបើតយោងរបាយការណ៍តាមក្រសួងសេដ្ឋកិច្ច និងហិរញ្ញវត្ថុ។

ការធ្លាក់ចុះដ៏ខ្លាំងនេះ គឺដោយសារជំងឺរាតត្បាតសកល ប៉ុន្តែអ្នកជំនាញរំពឹងថាលំហូរ FDI នឹងមានការងើបឡើងវិញ នៅពេលអត្រាចាក់វ៉ាក់សាំងកើនឡើង ហើយច្បាប់វិនិយោគថ្មីត្រូវបានព្រាង ហើយមានសុទិដ្ឋិនិយមអំពីកំណើនលំហូរវិនិយោគ ផ្អែកលើភាពខ្លាំងនៃច្បាប់វិនិយោគថ្មី។

ច្បាប់អាចជម្រុញកំណើនសេដ្ឋកិច្ច សង្វាក់ផលិតកម្មរបស់សហគ្រាសធុនតូចនិងមធ្យម និងទាក់ទាញការវិនិយោគផ្ទាល់ពីបរទេសកាន់តែច្រើន។

សេចក្តីព្រាងច្បាប់ថ្មីនេះគឺស្ថិតនៅលើរបៀបវារៈនៃសម័យប្រជុំពេញអង្គនៃទីស្តីការគណៈរដ្ឋមន្រ្តី ដែលគ្រោងធ្វើនៅថ្ងៃសុក្រខាងមុខ។ ច្បាប់វិនិយោគបច្ចុប្បន្នត្រូវបានអនុម័ត និងផ្តល់សច្ចាប័នកាលឆ្នាំ១៩៩៤។

ច្បាប់ ដែលត្រូវបានធ្វើបច្ចុប្បន្នភាព ត្រូវបានកំណត់ពេលវេលា ដើម្បីភ្ជាប់ជាមួយកិច្ចព្រមព្រៀងពាណិជ្ជកម្មទ្វេភាគីជាមួយចិន និងកូរ៉េខាងត្បូង ដើម្បីឈានដល់ការផ្តល់សច្ចាប័ន និងការចុះហត្ថលេខាជាផ្លូវការក៏ដូចជាការពន្លឿនល្បឿននៃការចរចាពាណិជ្ជកម្ម ជាមួយឥណ្ឌាជប៉ុន និងសហភាពសេដ្ឋកិច្ចអឺរ៉ាស៊ី។ វាក៏អាចជំរុញសន្ទុះឆ្ពោះទៅរកការផ្តល់សច្ចាប័នដល់ប្រទេសជាច្រើននៃកិច្ចព្រមព្រៀងRCEP៕

ដោយៈគង់ សូរិយា

ភ្នំពេញៈ ប្រធានសមាគមអចលlនទ្រព្យសកល (GRA) លោកសំ សុខនឿនបានអះអាងថា នៅពេលនេះអ្នកវិនិយោគចិនកាន់តែច្រើន បានត្រលប់មកកាន់កម្ពុជាវិញហើយ ខណៈពួកគេបានចាក់វ៉ាក់សាំងបង្ការជំងឺកូវីដរួច។

លោកបានមានប្រសាសន៍ឲ្យដឹងនាល្ងាចថ្ងៃទី៧ កក្កដាកន្លងមកថា លោកបានជួបជាមួយអ្នកវិនិយោគចិនថ្មីៗជាច្រើន ដែលពួកគេបានស្វែងរកសេវាកម្មដីធ្លី និងសេវាកម្មទិញលក់ជួលជាច្រើនទៀត។ លោកបន្តថា អ្នកវិនិយោគចិនកាន់តែច្រើនបានមកដល់ខេត្តព្រះសីហនុវិញហើយ ដែលនេះជាសញ្ញាល្អសំរាប់ទីផ្សារអចលនទ្រព្យកម្ពុជា អាចងើបឡើងវិញយ៉ាងឆាប់រហ័ស។

លោកបន្តថា “មានអ្នកវិនិយោគចិនជាច្រើន បានទាក់ទងការងារជាមួយសមាគម និងក្រុមហ៊ុនរបស់ខ្ញុំជាច្រើន ក្នុងមួយរយៈចុងក្រោយនេះ ដោយសាររដ្ឋាភិបាលចិនបាន​ចាក់វ៉ាក់សាំង ជូនពលរដ្ឋរបស់ខ្លូនស្ទើរ១០០ភាគរយហើយ”។

លោកបន្តថា “ប្រមុខរដ្ឋាភិបាលកម្ពុជាសម្តេចតេជោ លោកបានខិតខំដើម្បីចាក់វ៉ាក់សាំងជូនពលរដ្ឋ ឲ្យបាន១០លាននាក់នៅឆ្នាំខាងមុខ ស្របពេលកម្ពុជានឹងទទួលបានវ៉ាក់សាំង គ្រប់២០លានដូស នៅខែសីហាខាងមុខនេះ”។

លោកសំ សុខនឿនបានបន្តថា បច្ចុប្បន្នទំនុកចិត្តក្និងទីផ្សារអចលនទ្រព្យ បានងើបឡើងវិញបណ្តើរៗហើយ ខណៈពេលស្ថានភាពសេដ្ឋកិច្ចសកល និងសេដ្ឋកិច្ចកម្ពុជាអាច​ងើបឡើងវិញល្អប្រសើរនៅឆ្នាំនេះ បើទោះបីជារងការរំខានពីជំងឺកូវីដ១៩ក្តី ប៉ុន្តែយើងឃើញហើយថា ការនាំចេញរបស់កម្ពុជានៅតែកើនឡើងក្នុងឆមាសទី១ឆ្នាំនេះ។

ទំនាក់ទំនងរ៉ឹងមាំដូចដែកថែបរវាងរដ្ឋាភិបាលចិន និងកម្ពុជា នឹងក្លាយជាស្ពានមូយដ៏សំខាន់ក្នុងការទាក់ទាញការវិនិយោគពីប្រទេសចិន ពិសេសក្រោយពេលកម្ពុជា ចិនបា​នអនុម័តកិច្ចព្រមព្រៀងពាណិជ្ជកម្មសេរីរួច នឹងធ្វើឲ្យទំហំនៃការនាំចេញពីកម្ពុជាទៅកាន់ប្រទេសចិនកើនឡើងខ្ពស់ ស្របពេលអ្នកវិនិយោគចិន និងបណ្តាប្រទេសជាច្រើនទៀត នឹងជ្រើសរើសកម្ពុជាជាមូលដ្ឋានផលិត ដើម្បីនាំចេញទៅកាន់ប្រទេសចិនដោយរួចពន្ឋ៕

ដោយៈ ប៊ី

ភ្នំពេញៈ អ្នកវិនិយោគចិនបានឈរនៅលំដាប់លេខរៀងទី១ ដែលជាប្រទេសបោះទុនវិនិយោគច្រើនជាងគេនៅកម្ពុជា ហើយទឹកប្រាក់ដែលចិនបានវិនិយោគនៅកម្ពុជាមានប្រមាណ២ពាន់លានដុល្លារក្នុងឆមាសទី១ ឆ្នាំ២០២១នេះ។ នេះបើតាមរបាយការណ៍ ស្តីពីសកម្មភាពវិនិយោគនៅកម្ពុជា ឆមាសទី១ ឆ្នាំ២០២១ របស់ក្រុមប្រឹក្សាអភិវឌ្ឍន៍កម្ពុជា (CDC)។

របាយការណ៍បានបញ្ជាក់ថា តួលេខវិនិយោគមកពីប្រទេសចិន បានឈរនៅលំដា​ប់លេខរៀងទី១ ដោយចូលរួមចំណែកប្រមាណ៦៩% នៃការវិនិយោគសរុបក្នុងឆមាសទី១ ឆ្នាំ២០២១ ខណៈដែលការវិនិយោគក្នុងស្រុក បានឈរនៅលំដាប់លេខរៀងទី២ ដោ​យចូលរួមចំណែកប្រមាណ ២១%នៃការវិនិយោគសរុប។

សម្រាប់ប្រទេសឈរលេខ៣ គឺប្រទេស Cayman Islands ចំនួន៣.៣៦ភាគរយ(ប្រមាណ៩៩លានដុល្លារ) នៃការវិនិយោគសរុប លេខ៤ប្រទេស Ritisgh Virgin Islands ចំនួន២.៣៧ភាគរយ (ប្រមាណ៧០លានដុល្លារ) នៃការវិនិយោគសរុប ប្រ​ទេសថៃ ឈរលេខរៀងទី៥ ចំនួន១.៧៧ភាគរយ (ប្រមាណ៥២លានដុល្លារ) នៃការវិនិ​យោគសរុប ប្រទេសសិង្ហបុរី ឈរលេខរៀងទី៦ចំនួន០.៦៨ភាគរយ (ប្រមាណ២០លានដុល្លារ) នៃការវិនិយោគសរុប​ ប្រទេសកូរ៉េខាងត្បូង ឈរលេខរៀងទី៧ ចំនួន០.៦៧ភាគ​រយ (ប្រមាណ១៩លានដុល្លារ) នៃការវិនិយោគសរុប។

ប្រទេសម៉ាឡេស៊ី ឈរលេខរៀងទី៨ ដែលវិនិយោគមកកាន់កម្ពុជាចំនួន០.៥៦% (ប្រមាណ១៦លានដុល្លារ) នៃការវិនិយោគសរុប សហរដ្ឋអាមេរិកឈរលេខរៀងទី៩ ចំនួន០.៣២% (ប្រមាណ៩លានដុល្លារ) នៃការវិនិយោគសរុប និងប្រទេសសាម័រ ឈរលេខរៀងទី១០ ចំនួន០.១៣% (ប្រមាណ៣លានដុល្លារ) នៃការវិនិយោគសរុប។

លោកច្រឹក សុខនីមប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា បានឱ្យដឹងថា ការវិនិយោគរបស់ចិន មានច្រើនណាស់នៅអាស៊ីនិងពិភពលោក ហើយបើនិយាយពីការវិនិយោគអចលនទ្រព្យវិញ ការវិនិយោគជនជាតិចិន ចូលចិត្តកសាងបណ្ដុំសហគមន៍របស់គេ។

លោកបានថ្លែងបន្តថា “នៅក្នុងប្រទេសកម្ពុជា តំបន់ពីរដែលជនជាតិបានចាប់ផ្ដើមកសាងសហគមន៍របស់គេ គឺនៅក្នុងខេត្តព្រះសីហនុ និងនៅរាជធានីភ្នំពេញ រួមទាំងផ្នែកខ្លះនៃខេត្តកោះកុង (តារាសាគរ)”។

យោងតាមសេចក្តីប្រកាសព័ត៌មាន របស់ក្រសួងការបរទេសកម្ពុជា ដែលចេញផ្សា​យកាលពីថ្មីៗនេះបានឱ្យដឹងថា “រដ្ឋមន្ត្រីការបរទេសប្រទេសទាំងពីរ បានឯកភាពពន្លឿននីតិវិធីផ្ទៃក្នុង សម្រាប់ការផ្តល់សច្ចាប័ន លើកិច្ចព្រមពាណិជ្ជកម្មសេរីកម្ពុជា-ចិន ដើម្បីជំរុញពាណិជ្ជកម្ម វិនិយោគ ក៏ដូចជាទេសចរណ៍រវាងប្រទេសទាំងពីរ”។

សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា ធ្លាប់មានប្រសាសន៍ថា កិច្ចព្រមព្រៀងពាណិជ្ជកម្មសេរីរវាងកម្ពុជា និងចិន នេះ នឹងដើរតួជាកត្តាដ៏សំខាន់ក្នុងការជួយធ្វើ ឱ្យកម្ពុជា ក្លាយជាគោលដៅសម្រាប់ក្រុមហ៊ុនអាមេរិក ដែលកំពុងរកទីតាំងថ្មីនៅក្នុងតំបន់អាស៊ីអាគ្នេយ៍។

ចំណែក អ្នកជំនាញសេដ្ឋកិច្ចនៅកម្ពុជាវិញ ក៏បានមើលឃើញដូចគ្នានេះដែរ តែបានបន្ថែមថា មិនមែនតែសម្រាប់វិនិយោគិនអាមេរិកទេ ពោលគឺកម្ពុជាអាចនឹងទាក់ទាញវិនិយោគ ដែលមានសក្តានុពលពីប្រទេសផ្សេងៗទៀត ដូចយ៉ាង ជប៉ុន និងកូរ៉េខាងត្បូងជាដើមតាមរយៈកិច្ចព្រមព្រៀងពាណិជ្ជកម្មសេរីរវាងកម្ពុជា និងចិននេះ៕

គិតត្រឹមឆមាសទី១ ឆ្នាំ២០២១ កម្ពុជាបានអនុម័តគម្រោងវិនិយោគថ្មីៗ និងគម្រោ​ងពង្រីកផលិតកម្ម ចំនួន៨៧គម្រោង ដែលមានទុនវិនិយោគ សរុបចំនួន២ ៩៦៩ ៦២៩ ៣៣៨ ដុល្លារអាមេរិក ដែលអាចបង្កើតការងារបានចំនួន៥០ ០២៩កន្លែង៕