តើប្រទេសណាមានឥទ្ធិពលជាងគេនៅតំបន់អាក់ទិក និងកំពុងស្ថិតក្នុងភូមិសាស្រ្តនៃគំរោងផ្លូវសូត្ររបស់ចិន?

ដោយៈគង់ សូរិយា

អន្តរជាតិៈ ការពង្រីកឥទ្ឋិពលរបស់មហាយក្សចិន ក្នុងរយៈពេលប៉ុន្មានទសវត្សរ៍ចុងក្រោយនេះ បាននិងកំពុងត្រូវគេមើលឃើញថា ចិនកំពុងពង្រីកការក្តោបក្តាប់ឥទ្ឋិពល​សេដ្ឋកិច្ចលើពិភពលោក។

ជាក់ស្តែងផ្លូវសូត្រ ឬគំនិតផ្តួចផ្តើមខ្សែក្រវ៉ាត់១ ផ្លូវ១របស់ចិន ហេតុអ្វីចិនចូលក្នុងគំរោងផ្លូវសូត្រតំបន់ប៉ូល?។
ហេតុការណ៍ដែលនាវាអេវើហ្គីវិន ជាប់គាំងនៅព្រែកជីកស៊ុយអេ ដែលជាផ្លូវទឹកដ៏សំខាន់មួយរបស់ពិភពលោក កាលពីខែមិនាកន្លងមក បានធ្វើឲ្យភាគីជាច្រើនស្វែងរកផ្លូវនាវាចរណ៍ថ្មីៗ ដែលអាចនឹងការពារការខាតបង់ជាច្រើន ក្នុងតម្លៃដ៏មហាសាល ដែលអាចនឹងកើតឡើង ដូចករណីជាប់គាំងនាវាខាងលើបាន។

ក្នុងប៉ុន្មានខែថ្មីៗនេះ បន្ទាប់ពីហេតុការណ៍នេះ បណ្តាប្រទេសមហាអំណាចលោកខាងកើត តួយ៉ាងដូចជាប្រទេសចិនបានលើកយកប្រធានបទ “ផ្លូវនាវាចរណ៍ថ្មី” មកនិយាយ ហើយផ្លូវនាវាចរណ៍ថ្មីមកនិយាយ ហើយផ្លូវនាវាចរណ៍នេះ ស្ថិតនៅតំបន់ប៉ូលខាងជើង ដែលធ្វើឲ្យព្រែកជីកស៊ុយអេ លែងជាផ្លូវនាវាចរសំខាន់នាពេលអនាគត បន្ទាប់ពីការរកឃើញនាវាចរណ៍ថ្មី ដែលនឹងតភ្ជាប់ពីទ្វីបអាស៊ី ដល់ទ្វីបអឺរ៉ុបកាត់តំបន់ប៉ូលខាងជើងទាំងមូល។

ក្នុងផែនការអភិវឌ្ឍន៍រយៈពេល៥ឆ្នាំរបស់ចិន ក៏មានចែងពីចំណុចយុទ្ឋសាស្រ្តផ្លូវសូត្រតំបន់ប៉ូលផងដែរ ប៉ុន្តែសំណួរសួរថា​តើចិននឹងលុកលុយចូល តំបន់ប៉ូលខាងជើង ដើម្បីអ្វី?។

មហាសមុទ្រអាក់ទិក ជាតំបន់ដែលស្ថិតនៅចំតំបន់ប៉ូលខាងជើង បើសិនជាយើងមើលពីភូមិសាស្រ្តខាងជើង និងមើលលើផែនទីពិភពលោក ។ តំបន់អាក់ទិក មានផ្ទៃដី ស្រដៀងនឹងរង្វង់ចំណុចកណ្តាល ដែលមានរង្វង់ដូចប៉ូលខាងជើង ហើយគ្របដណ្តប់លើផ្ទៃដីប្រហែល១៤,១លានគីឡូម៉ែត្រក្រឡា ដែលដែនដីអាក់ទិក មានផ្ទៃដីមួយចំនួនជាប់ប្រទេសដូចជា រុស្ស៊ី ហ្វាំងឡង់ អាមេរិក ស៊ុយអ៊ែត ន័រវេស អ៊ីស្លង់ ដេណឺម៉ាក និងកាណាដា ប៉ុន្តែប្រទេសដែលមានផ្ទៃដីជាប់តំបន់នេះវែងជាងគេ គឺប្រទេសរុស្ស៊ី ដែលមានប្រវែង២៤១៤០គីឡូម៉ែត្រការ៉េ ស្មើនឹង៤៤ភាគរយនៃតំបន់អាក់ទិកទាំងមូល។

តំបន់អាក់ទិកនេះ នៅតែចាត់ទុកថាជាតំបន់ដែលកាន់កាប់ដោយរុស្ស៊ី ដែលប្រេងឆៅជាង៤០ភាគរយ និងឧស្ម័នធម្មជាតិជាង៩០ភាគរយជារបស់រុស្ស៊ី បានទាញចេញពីតំបន់នេះ។

ចំណែកសហរដ្ឋអាមេរិក ដែលជាលោកខាងលិច មានប្រវែហជាប់តំបន់អាក់ទិកត្រឹមតែជាង៤០០០គីឡូម៉ែត្រក្រឡា ដែលជាផ្ទៃដីទាំងមូលរបស់រដ្ឋអាឡាស្កា ដែលមានប្រជាជនរស់នៅជាង៧០,០០០នាក់ តិចជាងប្រជាជនរុស្ស៊ី រហូតដល់ជាង២លាននាក់ ដែលអាចនិយាយបានថា រុស្ស៊ីមានឥទ្ឋិពលខ្លាំងណាស់នៅតំបន់អាក់ទិក ហើយកំពុងក្លាយជាចំណុចរសើបក្នុងតំបន់នេះ គឺផ្លួវនាវាចរណ៍៍៕

ក្រុមហ៊ុន OCIC ពន្លឿនការចាក់បំពេញដីលើទីក្រុងកោះនរាសម្រេចបាន ៨៥ភាគរយហើយ ខណៈសំណង់មួយចំនួនត្រៀមចាប់ផ្តើមសាងសង់

ដោយៈស៊ីវ ម៉េង

ភ្នំពេញៈ ថ្នាក់ដឹកនាំជាន់ខ្ពស់នៃក្រុមហ៊ុន OCIC បានមានប្រសាសន៍ឲ្យដឹងថា ការចាក់បំពេញដីនៅទីក្រុងកោះនរា សម្រេចបានប្រមាណ ៨៥ភាគរយហើយ ខណៈក្រុមហ៊ុន​មួយចំនូន បានត្រៀមចាប់ផ្តើមគំរោងរបស់ពួកគេបណ្តើរផងដែរ។

លោកទូច សំណាង អគ្គនាយករងក្រុមហ៊ុន OCIC ដែលជាក្រុមហ៊ុនកំពុងកសាងទីក្រុងរណបកោះនរា បានមានប្រសាសន៍ឲ្យដឹងនារសៀលថ្ងៃទី១៩ សីហាកន្លងមកថា រហូតមកទល់ពេលនេះ ការចាក់ដីបំពេញលើទីក្រុង​ ដែលមានទំហំ១២៥ហិកតានេះ សម្រេចបានតាមផែនការហើយ ខណៈមានក្រុមហ៊ុនមួយចំនួន ដែលបានទិញដីលើគំរោងនេះបានត្រៀមសាងសង់គំរោងរបស់ពួកគេ។

លោកបន្តថា “នាពេលខាងមុខនេះ មានក្រុមហ៊ុនមួយចំនួននឹងសាងសង់អាគាររបស់ខ្លួនកំពស់ចន្លោះពី ៨ទៅ៩ជាន់ ប៉ុន្តែមិនទាន់មានគំរោងខុនដូ ណាមួយត្រៀមសាងសង់នៅឡើយទេ”។

លោកទូច សំណាង បានបន្តថា ទស្សនទាននៃការអភិវឌ្ឍទីក្រុងនេះ មានសភាពស្រដៀងគ្នានឹងទីក្រុងកោះពេជ្រ ខណៈដែលស្ពានតភ្ជាប់រវាងទីក្រុងទាំងពីរ កំពុងសាងសង់យ៉ាងសកម្មផងដែរ។

ក្រុមហ៊ុន OCIC គ្រោងចំណាយទុន ប្រមាណ២៥០០លានដុល្លារ ដើម្បីកសាងហេដ្ឋារចនាសម្ព័ន្ឋនានា នៅលើទីក្រុងកោះនរាថ្មីនេះ ដើម្បីរួមចំណែកអភិវឌ្ឍន៍សេដ្ឋកិច្ច សង្គមកម្ពុជា។

អ្នកឧកញ៉ាពុង ឃាវសែ ប្រធានអគ្ញនាយកក្រុមហ៊ុន OCIC បានមានប្រសាសន៍ក្នុងពិធីបើកសម្ភោធការដ្ឋាន សាងសង់ស្ពានតភ្ជាប់រវាងទីក្រុងកោះពេជ្រ និងកោះនរាក្រោមអធិបតីភាពសម្តេចអគ្គមហាសេនាបតីតេជោហ៊ុន សែននាយករដ្ឋមន្រ្តីនៃកម្ពុជាកន្លងមកថា នៅពេលទីក្រុងនេះ មានការអភិវឌ្ឍពេញលេញ នឹងអាចផ្តល់ផលចំណូលពន្ឋប្រមា​ណ២៥០លានដុល្លារប្រចាំឆ្នាំដល់រដ្ឋាភិបាល៕

ប្រទេសសិង្ហបុរីគ្រោងបើកផ្លូវហោះហើរដំបូងបង្អស់សម្រាប់អ្នកដំណើរចាក់វ៉ាក់សាំងរួច

ដោយៈសុខុម

សឹង្ហបុរី: ក្រុមការងារអន្តរក្រសួងដោះស្រាយបញ្ហាកូវីដ-១៩ នៃប្រទេសសិង្ហបុរី បានប្រកាសកាលពីថ្ងៃព្រហស្បតិ៍ ទី១៩ សីហា ថា ប្រទេសនេះ គ្រោងបើកផ្លូវហោះហើរដំបូងបង្អស់របស់ខ្លួន សម្រាប់អ្នកដំណើរចាក់វ៉ាក់សាំងរួច ជាមួយប្រទេសអាល្លឺម៉ង់ និងប្រទេសព្រុយណេ នៅថ្ងៃទី៨ ខែកញ្ញា ខាងមុខនេះ។

យោងតាមការចុះផ្សាយរបស់សារព័ត៌មាន CNA បានឱ្យដឹងថា ក្រោមគម្រោងផ្លូវហោះហើរពិសេសនេះ អ្នកដំណើរចាក់វ៉ាក់សាំងពេញលេញ ឬគ្រប់ដូសដែលចាកចេញពីប្រទេសអាល្លឺម៉ង់ ឬប្រទេសព្រុយណេ អាចចូលមកប្រទេសសិង្ហបុរី បានដោយមិនចាំ​បាច់មានលិខិតបញ្ជាក់ថា អ្នកដំណើរនោះសម្រាកនៅតែផ្ទះ ដោយមិនបានចេញទៅណារហេតរហូតប៉ុន្មានថ្ងៃមុនពេលចេញដំណើរ។

ទោះជាយ៉ាងណា ពួកគេត្រូវឆ្លងកាត់ការធ្វើតេស្តជាច្រើនដំណាក់កាល ដើម្បីរកវីរុសកូវីដ-១៩ ដែលរួមមានដូចជា ការធ្វើតេស្តមុនពេលចេញដំណើរ ក្នុងរយៈពេល៤៨ម៉ោងនៃការហោះហើរ ការធ្វើតេស្តពេលមកដល់នៅអាកាសយានដ្ឋាន Changi Airport និងការធ្វើតេស្តក្រោយពេលមកដល់៣ថ្ងៃ និង៧ថ្ងៃនៅគ្លីនិក ដែលត្រូវបានកំណត់ក្នុងប្រទេសសិង្ហបុរី។

ការខកខានមិនបានធ្វើតេស្តតាមលក្ខខណ្ឌតម្រូវ គឺជាបទល្មើសដែលអាចធ្វើចោទប្រកាន់បានក្រោមច្បាប់ស្តីពីជំងឺឆ្លង។ ក្រុមការងារអន្តរក្រសួងដោះស្រាយបញ្ហាកូវីដ-១៩ បានគូសបញ្ជាក់ថា អ្នកដំណើរដែលមិនគោរពតាមការណែនាំ នឹងត្រូវបញ្ជូនទៅធ្វើចត្តាឡីស័កនៅមណ្ឌលចត្តាឡីស័កណាមួយ ដែលត្រូវបានកំណត់យក។

មនុស្សម្នាក់ត្រូវបានចាត់ទុកថា ចាក់វ៉ាក់សាំងពេញលេញ ឬគ្រប់ដូស គឺនៅរយៈពេល២សប្ដាហ៍ក្រោយ ពីពួកគេចាក់វ៉ាក់សាំងទាំង២ដូស មិនថាវ៉ាក់សាំង Pfizer វ៉ាក់សាំង Moderna ឬវ៉ាក់សាំងដទៃទៀត ដែលទទួលស្គាល់ដោយអង្គការសុខភាពពិភពលោក (WHO) ដូចជាវ៉ាក់សាំង Sinovac និងវ៉ាក់សាំង AstraZeneca ជាដើម។
នេះមានន័យថា កុមារអាយុក្រោម១២ឆ្នាំ ដែលមិនអាចចាក់វ៉ាក់សាំង បាននៅឡើយ នឹងមិនអាចធ្វើដំណើរបានឡើយក្រោមគម្រោងនេះ។

អាជ្ញាធរអាកាសចរណ៍ស៊ីវិលសិង្ហបុរី (CAAS) បាននិយាយថា ផ្លូវហោះហើរសម្រា​ប់អ្នកដំណើរ ដែលបានចាក់វ៉ាក់សាំងរួចនេះ នឹងបើកស្វាគមន៍ការធ្វើដំណើរ សម្រាប់គ្រប់គោលបំណង មិនថាដំណើរកម្សាន្ត ដំណើរបំពេញកិច្ចការជំនួញ ឬដំណើរមកលេងក្រុមគ្រួសារឡើយ។

អ្នកដំណើរមិនចាំបាច់គោរពតាមកម្មវិធីធ្វើដំណើរ ដែលមានការគ្រប់គ្រងតឹងរ៉ឹង ឬត្រូវមានអ្នកធានាឡើយ ប៉ុន្តែពួកគេត្រូវស្នាក់នៅក្នុងប្រទេសសិង្ហបុរី ឬប្រទេសដែលពួកគេចាកចេញ ពោលគឺអាល្លឺម៉ង់ឬព្រុយណេ រយៈពេល២១ថ្ងៃចុងក្រោយជាប់ៗគ្នា មុនពេលពួកគេចេញដំណើរមកកាន់ប្រទេសសិង្ហបុរី។

អាជ្ញាធរអាកាសចរណ៍ស៊ីវិលសិង្ហបុរី (CAAS) បានចេញសេចក្តីប្រកាសព័ត៌មានមួយថា ទន្ទឹមនេះ ពួកគេក៏ត្រូវធ្វើដំណើរឆ្ពោះត្រង់ មកកាន់ប្រទេសសិង្ហបុរី តាមផ្លូវហោះហើរដែលបានកំណត់ ដោយគ្មានការឈប់សំចតនៅតាមផ្លូវផដែរ៕

ប្រទេសចិនចាប់ផ្តើមសាកល្បងរថយន្តល្បឿនលឿនបំផុតក្នុងពិភពលោក

ដោយៈសហការី

ភ្នំពេញៈ មហាយក្សចិននឹងចាប់ផ្ដើមសាងសង់ខ្សែរសាកល្បង នៃរថភ្លើងល្បឿនលឿន ៨០០គីឡូម៉ែត្រក្នុងមួយម៉ោង នៅខេត្ត Shanxi ភាគខាងជើងនៃប្រទេសឆាប់ៗនេះ។

ក្រោយសង់រួចរថភ្លើងនេះ នឹងក្លាយរថភ្លើង ល្បឿនលឿនជាងគេបំផុតនៅលើដីក្នុងពិភពលោក។ នេះបើយោងតាមសារព័ត៌មាន Global Times ចុះផ្សាយកាលពីថ្ងៃទី១៥ ខែសីហា។

ខ្សែសាកល្បងគឺជាផ្នែកមួយ នៃការងារមន្ទីរពិសោធន៍ សម្រាប់គម្រោងរថភ្លើងល្បឿ​​នលឿនដោយការប្រើកម្លាំងម៉ាញ៉េទិច ដែលអាចឱ្យរថភ្លើងរត់បានលឿនជាងយន្តហោះក្នុងល្បឿនផ្ទាល់ដី ប្រមាណ៨០០ ទៅ១០០០ គីឡូម៉ែត្រក្នុងមួយម៉ោង។

តាមគំរោងដំណាក់កាលដំបូង នៃគម្រោងនេះនឹងធ្វើការសាកល្បង នៅលើផ្លូវដែកប្រវែង២ពាន់គីឡូម៉ែត្រ ដែលគ្រោងនឹងបញ្ចប់នៅខែមិថុនាឆ្នាំ២០២២។ ការតំឡើងឧបករណ៍សាកល្បង នឹងចាប់ផ្តើមនៅខែកក្កដាឆ្នាំ ២០២២។

ផ្លូវដែកសាកល្បងប្រវែង ១៥ គីឡូម៉ែត្រមួយទៀត នឹងត្រូវសាងសង់ក្នុងរយៈពេល ២ ឆ្នាំក្រោយ។

រថភ្លើងMagnetic Levitation ឬ Maglev គឺជាប្រព័ន្ធរថភ្លើង ដែលប្រើកំលាំងអេឡិចត្រូម៉ាញ៉េទិច ដើម្បីឱ្យខ្សែររថភ្លើងអណ្ដែតផុតពីផ្លូវរថភ្លើងបន្ដិច ដែលធ្វើឱ្យរថភ្លើងនេះមានល្បឿនដល់ទៅ ១០០ គីឡូម៉ែត្រក្នុងមួយម៉ោង។

បើនិយាយឱ្យងាយយល់ រថភ្លើងនេះមានល្បឿនហាក់ដូចជាហោះតាមគន្លងផ្លូវរថភ្លើងមិនមែនរត់លើផ្លូវនោះទេ។

គិតត្រឹមឆ្នាំ២០២០កន្លងមក ប្រទេសចិនមានបណ្តាញផ្លូវដែកល្បឿនលឿនធំបំផុតក្នុងពិភពលោក ដែលគ្របដណ្តប់៣៨,០០០ គីឡូម៉ែត្រ តភ្ជាប់៩៥ភាគរយ នៃទីក្រុងសរុបក្នុងប្រទេសចិន។

បច្ចេកវិទ្យានៃរថភ្លើងឈ្មោះMaglev បានបញ្ជាក់ពីភាពឈានមុខគេ នៃប្រទេសចិនក្នុងពិភពលោកទាក់ទិននឹងការផលិតផ្លូវដែកល្បឿនលឿន៕

 

ក្រុមហ៊ុនលំដាប់យក្សជប៉ុនToyota កាត់បន្ថយផលិតកម្មទូទាំងពិភពលោក

ដោយសារបញ្ហា

ដោយៈសុខុម

តូក្យូ: ការរីករាលដាលនៃវីរុសកូវីដ-១៩ បំប្លែងខ្លួនថ្មីDelta កំពុងតែបង្កចលាចល និងការភ័យខ្លាច នៅប្រទេសជាច្រើនក្នុងពិភពលោក ព្រោះវីរុសនេះមានភាពកាចសាហាវខ្លាំង និងងាយចម្លងពីមនុស្សម្នាក់ទៅមនុស្សម្នាក់បំផុត ហើយបានបង្កគ្រោះផ្ទួនៗទៅលើអាជីវកម្មនានា។

តួយ៉ាង ក្រុមហ៊ុនផលិតរថយន្តជប៉ុន Toyota Motor Corp នឹងត្រូវកាត់បន្ថយផលិតកម្មរបស់ខ្លួនទូទាំងពិភពលោក សម្រាប់ខែកញ្ញា ខាងមុខនេះ រហូតដល់ទៅ៤០%ពីផែនការចាស់។ នេះបើយោងតាមសារព័ត៌មានជប៉ុនNikkei បានចុះផ្សាយនៅថ្ងៃព្រហស្បតិ៍ ទី១៩ សីហា នេះ។

យោងតាមសេចក្ដីរាយការណ៍ខាងលើបង្ហាញថា ការរីករាលដាលនៃវីរុសកូវីដ-១៩ បំប្លែងខ្លួនថ្មី Delta ដែលបានផ្ទុះឡើងនៅទូទាំងតំបន់អាស៊ីអាគ្នេយ៍ ក៏បានជះផលប៉ះពាល់ធ្ងន់ធ្ងរ ដល់ការធ្វើលទ្ធកម្មរបស់ក្រុមហ៊ុននេះ លើគ្រឿងបន្លាស់រថយន្តផងដែរ។

នេះជាដំណឹងដ៏គួរឱ្យភ្ញាក់ផ្អើល និងជាសញ្ញាអវិជ្ជមានដែលបង្ហាញថា ការងើបឡើងនៃសេដ្ឋពិភពលោក ក៏ដូចជាថ្នាក់តំបន់កំពុងប្រឈម នឹងស្ថានភាពស្រពិចស្រពិល ហើយរដ្ឋាភិបាលនានា គប្បីចាត់វិធានការដោយប្រុងប្រយ័្នបំផុត និងរៀបចំផែនការអភិវឌ្ឍន៍ ប្រកបដោយចក្ខុវិស័យវែងឆ្ងាយ៕

ប្លង់គោលប្រើប្រាស់ដីក្រុងព្រះសីហនុចក្ខុវិស័យឆ្នាំ២០៣៨កំពុងឆ្ពោះទៅមុខ

ដោយៈសុជាតា

ភ្នំពេញៈ ផែនការរៀបចំដែនដីខេត្តព្រះសីហនុ ចក្ខុវិស័យឆ្នាំ២០៣០ និងប្លង់គោល និង ផែនការប្រើប្រាស់ដីក្រុង ស្រុក ខណ្ឌ និង ទីប្រជុំចំនួន១៧ និងផែនការប្រើប្រាស់ដីក្នុង ឃុំសង្កាត់ ចំនួន៨៧ ឃុំ សង្កាត់អង្គប្រជុំបានពិនិត្យ ផ្តល់ធាតុចូល និងអនុម័តប្លង់គោល ប្រើប្រាស់ដីក្រុងព្រះសីហនុ ចក្ខុវិស័យឆ្នាំ២០៣៨ កំពុងពិនិត្យដោយគណៈកម្មាធិការរៀបចំប្លង់គោលថ្នាក់ជាតិ។

ប្លង់គោលប្រើប្រាស់ដីក្រុងព្រះសីហនុ  មានចក្ខុវិស័យរៀបចំអភិវឌ្ឍន៍ ក្រុងព្រះសី​ហ​នុជាទីក្រុងស្នូល នៃប៉ូលអភិវឌ្ឍជាតិប្រកបដោយចីរភាព នៅតំបន់ឆ្នេរសមុទ្រកម្ពុជាក្នុងការជំរុញកំណើនសេដ្ឋកិច្ច  អភិវឌ្ឍន៍ ធុរកិច្ច ពាណិជ្ជកម្ម និង ទេសចរណ៍ប្រកបដោយរស់រវើក ឆ្លាត និង បរិយាប័ន្ន តាមរយៈការអភិវឌ្ឍ៦ចំណុចសំខាន់ៗ រួមមានទី១ ទីក្រុងទំនើបបៃតង ប្រកបដោយភាពច្នៃប្រឌិត រស់រវើក និង បរិស្ថានរស់នៅល្អប្រសើរ បំផុត។

ទី២. តំបន់សេដ្ឋកិច្ចពិសេសគំរូពហុបំណង មជ្ឍមណ្ឌល ហីរញ្ញវត្ថុ  និង មជ្ឍមណ្ឌលកំណើនជាតិ។ ទី៣. រមណីយដ្ឋានឆ្នេរ សមុទ្រ និង កោះដែលស្អាតបំផុតលើសកលលោក សម្រាប់ស្នាក់នៅ ទី៤. មជ្ឍមណ្ឌលគាំទ្រឧស្សាហកម្មផលិតកម្មបែបបច្ចេកវិទ្យាទំនើប នវានុវត្តន៍ ។ទី ៥. ច្រកចេញចូលអន្តរជាតិ និង ភស្តុភារកម្មជាតិ ដែលមានទំនាក់ទំនងជាមួយទីផ្សារអាស៊ាន និងសកលលោក និងទី៦ ទីក្រុងគំរូក្នុងគ្រប់គ្រង និង អភិបាលកិច្ចល្អប្រកបដោយសេវាទីក្រុង ហេដ្ឋរចនាសម្ពន្ធ បរិក្ខាទីក្រុង និង ផ្តល់ការងារសម្បូរបែប។

សេចក្តីប្រកាសព័ត៌មាននេះ បានបង្ហាញអោយដឹងថា ចក្ខុវិស័យឆ្នាំ ២០៣៨ នឹងរួមចំណែកលើកសម្ពស់សូចនាករ នៃការអភិវឌ្ឍតាមវិស័យ ក៏ដូចជាសេដ្ឋកិច្ចជាតិ៕

ព្យាករណ៍: តម្លៃលំនៅដ្ឋានក្នុងប្រទេសអូស្ត្រាលី នឹងហក់ឡើងកាន់តែខ្ពស់នៅឆ្នាំ២០២១ និងឆ្នាំ២០២២

សុខុម

ស៊ីដនី: ការស្ទង់មតិរបស់ទីភ្នាក់ងារព័ត៌មាន Reuters បង្ហាញថា តម្លៃផ្ទះនៅប្រទេសអូស្រ្តាលី នឹងហក់ឡើងកាន់តែខ្ពស់សនៅឆ្នាំនេះ និងឆ្នាំក្រោយ។

យោងតាមការចុះផ្សាយរបស់ទីភ្នាក់ងារព័ត៌មាន Reuters នៅថ្ងៃព្រហស្បតិ៍ ទី១៩ សីហា នេះឱ្យដឹងថា អត្រាការប្រាក់ទាបមិនធ្លាប់មានសម្រាប់កម្ចីទិញផ្ទះ និងកង្វះនៃផ្គត់ផ្គង់ផ្ទះក្នុងទីផ្សារបានធ្វើឱ្យពលរដ្ឋមានលទ្ធភាពកាន់តែតិចនៅក្នុងការទិញផ្ទះ។

ចាប់តាំងពីវិបត្តិកូវីដ-១៩ ចាប់ផ្ដើមផ្ទុះមក ធនាគារកណ្ដាលអូស្រ្តាលី Reserve Bank of Australia បានទម្លាក់អត្រាការប្រាក់របស់ខ្លួនមកនៅកម្រិតទាបបំផុតមិនធ្លាប់មាន ហើយបានបញ្ចេញសាច់ប្រាក់យ៉ាងច្រើនសន្ធឹកសន្ធាប់ចូលទៅក្នុងប្រព័ន្ធហិរញ្ញវត្ថុ ជាហេតុជំរុញឱ្យទីផ្សារលំនៅដ្ឋាននៅអូស្ត្រាលី ដែលស្ថិតក្នុងចំណោមទីផ្សារលំនៅដ្ឋានថ្លៃបំផុតរបស់ពិភពលោកកាន់តែឡើងថ្លៃ។

តម្លៃផ្ទះបានហក់ឡើងជិតទ្វេដងនៅទូទាំងប្រទេសអូស្ត្រាលី និងបានហក់ឡើងលើសទ្វេដងនៅក្នុងទីក្រុងធំបំផុត២របស់ប្រទេសនេះ គឺទីក្រុងស៊ីដនី និងមែលប៊ន (Melbourne) ចាប់តាំងពីវិបត្តិហិរញ្ញវត្ថុពិភពលោកឆ្នាំ២០០៧-២០០៩ ប៉ុន្តែអត្រាប្រាក់ឈ្នួលអប្បបរមានៅមានកម្រិតទាបជាងឆ្ងាយណាស់។

លោកស្រី Sarah Hunter ប្រធានក្រុមអ្នកជំនាញសេដ្ឋកិច្ចនៅ BIS Oxford Economics ដែលជាស្ថាប័នស្រាវជ្រាវ វិភាគ និងព្យាករណ៍ឧស្សាហកម្មឈានមុខគេរបស់ប្រទេសអូស្ត្រាលី បានលើកឡើងថា
“អត្រាការប្រាក់ទាបបំផុតមិនធ្លាប់មាន និងទម្រង់ផ្សេងៗទៀតនៃការគាំទ្រគោលនយោបាយរូបិយវត្ថុបានជំរុញឱ្យអត្រាការប្រាក់សម្រាប់កម្ចីទិញផ្ទះធ្លាក់ចុះទាបចាប់តាំងពីវិបត្តិកូវីដ-១៩ ចាប់ផ្ដើមផ្ទុះដំបូង។ កត្តានោះបានធ្វើឱ្យអ្នកទិញផ្ទះមួយចំនួនមានលទ្ធភាពច្រើនជាងមុន”។

ដោយធនាគារកណ្ដាលអូស្រ្តាលី និយាយថា អត្រាការប្រាក់ទំនងជាមិនកើនឡើងពីកម្រិតទាបស្ទើរតែ០%រហូតដល់ឆ្នាំ២០២៤ តម្លៃផ្ទះត្រូវបានព្យាករថានឹងហក់ឡើង១៧,០%នៅឆ្នាំនេះ និង៦,២%នៅឆ្នាំ២០២២។ នេះបើយោងតាមការស្ទង់មតិពីថ្ងៃទី១១-១៨ ខែសីហា ដែលទីភ្នាក់ងារព័ត៌មាន Reuters បានធ្វើឡើងទៅលើអ្នកវិភាគទីផ្សារអចលនទ្រព្យចំនួន១២រូប៕

ក្រសួងសាធារណការនិងដឹកជញ្ជូន ដាក់ឱ្យប្រើប្រាស់ “មណ្ឌលចត្តាឡីស័ក” សម្រាប់បុគ្គលិកមន្ត្រីរាជការ និងបុគ្គលិកជាប់កិច្ចសន្យា

ដោយ៖ សុខ ហេង
យោងតាមសេចក្តីជូនដំណឹងរបស់ក្រសួងសាធារណការ និងដឹងជញ្ជូនបានអោយដងថា៖ ដើម្បីចូលរួមជាមួយរាជរដ្ឋាភិបាលក្នុងការបង្ការទប់ស្កាត់ការរីករាលដាលជំងឺកូវីដ-១៩ ក្រសួងបានរៀបចំ មណ្ឌលចត្តាឡីស័ក ស្ថិតនៅបរិវេណទីស្ដីការក្រសួង ក្នុងគោលបំណងជួយសម្រួលបន្ទុកជូនបុគ្គលិកមន្ត្រីរាជការនិងបុគ្គលិកជាបើកិច្ច សន្យាក្រោមឱវាទក្រសួង ដែលមានការជាប់ពាក់ព័ន្ធជាមួយអ្នកវិជ្ជមានកូវីដ១៩ ជាយថាហេតុណាមួយ ហើយពុំមានលទ្ធភាពគ្រប់គ្រាន់ និងទីកន្លែងសមរម្យ សម្រាប់ការធ្វើចត្តាឡីស័ក នៅតាមគេហដ្ឋានដែលខ្លួនកំពុងរស់នៅ
មណ្ឌលចត្តាឡីស័កនេះ ត្រូវបានរៀបចំឡើងត្រឹមត្រូវតាមគោលការណ៍ណែនាំ របស់ក្រសួងសុខាភិបាលដែលមានបំពាក់គ្រែស្នាក់នៅចំនួន៥០ មានបណ្ដា ទឹកស្អាត-អគ្គិសនី មានបន្ទប់អនាម័យសមរម្យ និងការផ្ដល់ជូនអាហារ០៣ពេល (ព្រឹក-ថ្ងៃ-ល្ងាច) ព្រមទាំងផ្ដល់ជូនការធ្វើតេស្តរហ័ស (Rapid Test) ដល់អ្នកធ្វើចត្តាឡីស័កតាមពេលវេលាដែលកំណត់ទៀងទាត់ផងដែរ។


សូមបញ្ជាក់ថា៖គិតត្រឹមថ្ងៃទី១៩ ខែសីហា ឆ្នាំ២០២១នេះ ក្រសួងសុខាភិបាលបាន រកឃើញអ្នកឆ្លងថ្មី 533 នាក់ទៀត ជាសះស្បើយ 632 នាក់ និងស្លាប់ 17 នាក់ ដោយ អ្នកឆ្លងសរុប= 87,723 នាក់
– អ្នកជាសះស្បើយសរុប= 83,298 នាក់
– អ្នកស្លាប់សរុប= 1,747 នាក់

តើវៀតណាម និងកម្ពុជាកំពុងឆ្ពោះទៅមុខដូចម្តេចដើម្បីផលិតថាមពលកកើតឡើងវិញ

ដោយៈសុខុម

ភ្នំពេញ: ប្រទេសជាច្រើននៅអាស៊ី កំពុងប្រជែងគ្នានៅក្នុងការដោះស្រាយបញ្ហាបម្រែបម្រួលអាកាសធាតុ ដើម្បីសង្គ្រោះភពផែនដី តាមរយៈការងាកទៅផលិតថាមពលបៃតង ឬថាមពលកកើតឡើងវិញ ក្នុងគោលបំណងកាត់បន្ថយ ការបំភាយឧស្ម័នផ្ទះកញ្ចក់ចូលទៅក្នុងបរិយាកាស ដែលធ្វើឱ្យផែនដីកើនឡើងកម្ដៅ។

អាជ្ញាធរអគ្គិសនីកម្ពុជា (EdC) បានបង្ហាញពីផែនការ និងទិន្នន័យនៃថាមពល​របស់ខ្លួនថា ក្នុងឆ្នាំ២០២០ កន្លងទៅនេះ ប្រទេសកម្ពុជា ត្រូវការថាមពលអគ្គិសនី៤ពាន់មេហ្គាវ៉ាត់ ដើម្បីផ្គត់ផ្គង់ទូទាំងប្រទេស ខណៈការផលិតថាមពល ក្នុងស្រុកបានចំនួន២៩៦៥ម៉េហ្គាវ៉ាត់ និងនាំចូលពីប្រទេសជិតខាងប្រមាណ១ពាន់មេហ្គាវ៉ាត់បន្ថែម។  នេះបើយោងតាមការចុះផ្សាយរបស់គេហទំព័រ jochjoch.com។

ដើម្បីបំពេញតម្រូវការថាមពលអគ្គិសនី ដែលកើនឡើងឥតឈប់ឈរ និងដើម្បីចូលរួមចំណែកជាមួយពិភពលោក នៅក្នុងការកាត់បន្ថយការបំភាយឧស្ម័នផ្ទះកញ្ចក់ចូលទៅក្រុងបរិយាកាស រាជរដ្ឋាភិបាលកម្ពុជា បានខិតខំប្រឹងប្រែងយ៉ាងខ្លាំង នៅក្នុងការជំរុញ និងផ្ដល់គ្រឿងលើកទឹកចិត្ត សម្រាប់ការផលិតថាមពលអគ្គិសនី កកើតឡើងវិញតាមរយៈការអនុម័តគម្រោងទំនប់វារីអគ្គិសនី គម្រោងកសិដ្ឋានផលិតអគ្គិសនីដើរដោយបន្ទះសូឡា (Solar Farm) និងកសិដ្ឋានផលិតអគ្គិសនីដើរដោយកង្ហារខ្យល់ (Wind Farm) ជាដើម។

ខណៈនេះវៀតណាម ដែលប្រទេសក្បែរខាងជាប់របងជាមួយកម្ពុជា និងជាសមា​ជិកមួយនៃសមាគមប្រជាជាតិអាស៊ីអាគ្នេយ៍ (អាស៊ាន) បានជាប់ចំណាត់ថ្នាក់លេខ៧ ក្នុងពិភពលោក ជាប្រទេសផលិតថាមពលកកើតឡើងវិញបានច្រើនបំផុត។ នេះបើយោងតាមសារព័ត៌មាន CNA ដែលបានចុះផ្សាយកាលពីថ្ងៃពុធ ទី១៨ សីហា។

វៀតណាម កំពុងតែប្រឹងប្រែងយ៉ាងខ្លាំង នៅក្នុងការផលិតថាមពលកកើតឡើងវិញដើម្បីបំពេញតម្រូវថាមពលអគ្គិសនី ដែលកំពុងតែកើនឡើងឥតឈប់ឈរ ក្នុងទិសដៅជំរុញកំណើនសេដ្ឋកិច្ចរបស់ខ្លួន ឱ្យកាន់តែរឹងមាំប្រកបដោយនិរន្តរភាព។

ដោយមានឆ្នេរសមុទ្រយ៉ាងវែងអន្លាយ រួមជាមួយនឹងខ្យល់ធម្មជាតិ ដែលមានកម្រិតវិទ្យុសកម្មខ្ពស់ សម្រាប់ផលិតថាមពលអគ្គិសនី ដើរដោយពន្លឺព្រះអាទិត្យ វាបានផ្ដល់អំណោយផលយ៉ាងខ្លាំង ដល់ប្រទេសវៀតណាម នៅក្នុងការងាកទៅផលិតថាមពលកកើតឡើងវិញដែលចំណាយដើមទុនតិច។

ប្រទេសវៀតណាម បានដាក់ចេញគោលនយោបាយផ្ដល់គ្រឿង លើកទឹកចិត្តនានាសម្រាប់ការផលិតថាមពលកកើតឡើងវិញ នៅក្នុងឆ្នាំ២០១៧ ក្រោយពីសង្កេតឃើញទីផ្សារមានសន្ទុះកើនឡើងខ្លាំង។ ជាលទ្ធផល ការផលិតថាមពលសូឡា (ពន្លឺព្រះអាទិត្យ) បានកើនឡើងយ៉ាងឆាប់រហ័សពី០% រហូតដល់១៦ជីហ្គាវ៉ាត់ (GWh) ក្នុងរយៈត្រឹមតែ៣ឆ្នាំ៕

តើរដ្ឋាភិបាលកម្ពុជាដាក់ទិសដៅអាទិភាពអ្វីខ្លះដើម្បីស្តារសេដ្ឋកិច្ចឡើងវិញ

ដោយ សុជាតា

ភ្នំពេញៈ ស្របពេលដែលសង្គម សេដ្ឋកិច្ចសកលបន្តស្ថិត ក្នុងភាពមិនប្រាកដប្រជាខ្ពស់ ដោយការអូសបន្លាយនៃជំងឺកូវីដ ១៩ កម្ពុជាក៏អាចនឹងទទួលបាននូវកាលានុវត្តភាពមួយចំនួនវិញដែរ។

ការណ៍នេះអាស្រ័យលើសមត្ថភាព និងលទ្ធភាពកម្ពុជា ក្នុងការចេះបត់បែន និងតាមទាន់សភាពការណ៍ប្រែប្រួលក្នុងតំបន់ និងពិភពលោក ក៏ដូចជាការចេះប្រើប្រាស់លក្ខខណ្ឌអំណោយផលទាំងឡាយ សម្រាប់លើកកម្ពស់ភាពប្រកួតប្រជែងសេដ្ឋកិច្ច និង កែលម្អបរិស្ថានវិនិយោគ ដើម្បីទាក់ទាញបន្ថែមនូវការវិនិយោគ និងធុរកិច្ច ដែលអាចនឹងហូរចេញពីតំបន់មានជម្លោះពាណិជ្ជកម្ម និងមានអស្ថេរភាពនយោបាយ ព្រមទាំងការផ្លាស់ប្តូរខ្សែច្រវាក់ផ្គត់ផ្គង់ក្នុងតំបន់ចូលមកម្ពុជា។

ក្នុងន័យនេះការបោះជំហានលើគន្លងប្រក្រតីភាពថ្មី ផ្សារភ្ជាប់នឹងការផ្លាស់ប្តូរនិម្មា​បនកម្មសេដ្ឋកិច្ច និងពាណិជ្ជកម្មសកល ព្រមទាំងការបន្តគ្រប់គ្រងផលប៉ះពាល់ នៃការរីករាលដាលជំងឺកូវដ១៩ គឺទិសដៅគោលនយោបាយចម្បង និងជាយុទ្ធសាស្រ្តរបស់កម្ពុជាក្នុងឆ្នាំ ២០២២ និង ឆ្នាំបន្តបន្ទាប់។

អគ្គបណ្ឌីតសភាចារ្យ អូន ព័ន្ធមុនីរត្ន័ ឧបនាយករដ្ឋមន្ត្រី រដ្ឋមន្រ្តី ក្រសួងសេដ្ឋកិច្ច និង ហិរញ្ញវត្ថុថ្លែងនៅក្នុងសិក្ខាសាលាស្តីពី ការឈ្វេងយល់អំពីការកសាងក្របខណ្ឌក្របខណ្ឌគោលនយោបាយម៉ាក្រូសេដ្ឋកិច្ច និងគោលនយោបាយហិរញ្ញវត្ថុសាធារណៈ សម្រា​ប់ការរៀបចំសេចក្តីព្រាងច្បាប់ស្តីពី ហិរញ្ញវត្ថុសម្រាប់គ្រប់គ្រងឆ្នាំ២០២២ បានលើកឡើងថា រដ្ឋាភិបាលកម្ពុជា កំពុងរៀបចំ និង គ្រោងនឹងដាក់ចេញនូវ ផែនការស្តារសេដ្ឋកិច្ចឡើងវិញពីវិបត្តិកូវីដ ១៩ សម្រាប់ ២០២១ ២០២៣ ក្នុងគោលបំណង អូសទាញកំណើនសេដ្ឋកិច្ចអោយត្រឡប់ទៅខិតជិត កំណើនសក្តានុពលប្រកចីរភាប និង បរិយាបន្ន តាមរយៈការលើកកម្ពស់ភាពប្រកួតប្រជែង និងជំរុញការធ្វើពិពិធកម្មសេដ្ឋកិច្ច ជាពិសេសលើមូលដ្ឋានឧស្សាហកម្ម រឹងមាំដែលមានសមត្ថភាពនាំចេញខ្ពស់  និងផ្សារភ្ជាប់កាន់ខ្លាំងក្លាជាមួយខ្សែច្រវាក់ផ្គត់ផ្គង់តំបន់ និងពិភពលោក។

ផែនការអាទិភាពដែលបានដាក់ចេញរួមមានដូចជា ទី ១.ការស្តារឡើងវិញ ដោយកសាងមូលដ្ឋានរឹងមាំ សម្រាប់ស្តារសេដ្ឋកិច្ចអោយវិលទៅស្ថិតលើមាគ៌ា នៃកំណើនឡើងវិញ ទី២.ការកែទម្រង់ ដោយបន្តដាក់ចេញវិធានការកែទម្រង់សំខាន់ៗ ជារចនាសម្ពន្ធដែលមានការធ្វើប្រសើរឡើងវិញនូវបរិយាកាស និង កិច្ចសម្រួលពាណិជ្ជកម្ម និងទី៣ ការកសាងភាពធន់ ដោយពង្រឹងការតៀមខ្លួន និងការឆ្លើយតបទៅនឹងជំងឺ រឺស្ថានភាពស្រដៀងគ្នាដែលផ្ទុះឡើងនាពេលអនាគត ដោយផ្គោតលើការអភិវឌ្ឍប្រព័ន្ធ សុខាភិបាល និងប្រព័ន្ធគាំពារសង្គមដែលរឹងមាំ មានប្រសិទ្ធិភាព។

ជាមួយគ្នានេះ ក្រសួងសេដ្ឋកិច្ច និងហិរញ្ញវត្ថុ បានត្រៀមកញ្ចប់ថវិកាជិត១០០០លានដុល្លារអាមេរិក សម្រាប់ប្រយុទ្ឋជំងឺកូវីដ១៩ផងដែរ នៅឆ្នាំ២០២២ខាងមុខ ខណៈ​សេដ្ឋកិច្ចកម្ពុជាត្រូវបានរំពឹងថា នឹងសម្រេចបានកំណើន៤,៨ភាគរយ៕