ដោយៈលក្ខិណា

ភ្នំពេញៈ ក្នុងរយៈពេល៦ខែដំបូង ឬ ឆមាសទី១ឆ្នាំ២០២១នេះ កម្ពុជាបានសម្រេចបានការនាំចេញកសិផល ទៅកាន់ទីផ្សារក្រៅប្រទេស មានទំហំទឹកប្រាក់ជាង២,៥៧ពាន់លានដុល្លារអាមេរិក កើនឡើង៨៤,៦៤ភាគរយ ធៀបនឹងឆមាសទី១ឆ្នាំ២០២១ ទោះ​បីជាឆ្នាំ២០២១នេះ ស្ថានភាពកូវីដ១៩នៅកម្ពុជាមានភាពធ្ងន់ធ្ងរជាងឆ្នាំមុនក្ដី។

យោងតាមរបាយការណ៍របស់ក្រសួងកសិកម្ម រុក្ខាប្រមាញ់ និងនេសាទចេញផ្សាយនៅល្ងាចថ្ងៃទី៣០ មិថុនា ២០២១បានឱ្យដឹងថា តម្លៃនៃការនាំចេញកសិផល តាមការប៉ាន់ស្មានតម្លៃ ដែលទទួលបានពីការនាំចេញកសិផល មានចំនួន ២.៥៧១.១៦៩.៦៣៩ ដុល្លាអាមេរិក ក្នុងនោះការនាំចេញអង្ករមានចំនួន២៣៧.៥៤១.១៥០ ដុល្លាអាមេរិក ការនាំចេញស្រូវមានចំនួន២៧៩.៣១៤.១៤៥ ដុល្លាអាមេរិក ការនាំចេញកសិផលក្រៅពីស្រូវ-អង្ករមានចំនួន ២.០៥៤.៣១៤.៣៤៤ ដុល្លាអាមេរិក។

របាយការណ៍ដដែលបង្ហាញថា ការនាំចេញកសិផលសរុប ក្នុងរយៈពេល៦ខែឆ្នាំ២០២១ មានកំណើនចំនួន៨៤,៦៤% ក្នុងនោះកសិផលក្រៅពីអង្ករមានការកើនឡើងចំនួន ១០៧,១៦%។ រីឯការនាំចេញអង្ករមានការថយចុះចំនួន -២៩,៤៧% ដោយសារកង្វះទូរកុងតេន័រ តម្លៃដឹកជញ្ជូនកើនឡើង និងតម្លៃអង្ករនៅទីផ្សារអន្តរជាតិ មានការធ្លាក់ចុះពិសេសសហគមន៍អឺរ៉ុប។

ការនាំចេញកសិផលទៅក្រៅប្រទេស ដែលទទួលបានពីអគ្គនាយកដ្ឋានកសិកម្ម ដោយផ្អែក លើប្រព័ន្ធទិន្នន័យគ្រឹះភូតគាមអនាម័យជាតិ (National Phytosanitary Database) មានបរិមាណសរុប ៤.៤៥៤.៥០៥ តោន ទៅកាន់ទិសដៅ ៦២ប្រទេស គឺមានការកើនឡើងចំនួនជាង២០៤លានតោន ក្នុងរយៈពេល៦ខែដើមឆ្នាំ២០២១នេះ ។

យោងតាមលោកវង្សី វិស្សុតរដ្ឋលេខាធិការក្រសួងសេដ្ឋកិច្ច និងហិរញ្ញវត្ថុកាលពីពេលថ្មីៗឱ្យដឹងថា ទោះបីជាមានការរារាំងដោយកូវីដ១៩ តែទីផ្សារនាំចេញរបស់កម្ពុជានៅតែមានកំណើន ដែលអាចទប់ទល់នឹងការធ្លាក់ចុះនៃសេដ្ឋកិច្ចបាន ក្នុងនោះកម្ពុជាបានធ្វើពិពិធកម្មទីផ្សារនិងសេដ្ឋកិច្ច ដោយមួយផ្នែកបាននាំចេញទៅកាន់ប្រទេសចិន ជាពិសេសផលិតផលកសិកម្មខាងចិន បានទទួលទិញពីកម្ពុជាច្រើនណាស់ ក្នុងបរិការណ៍កូវីដ​១៩នេះ៕

ដោយៈ ប៊ី

ព្រះសីហនុៈ ខេត្តព្រះសីហនុ រយៈពេល២០ឆ្នាំចុងក្រោយនេះ បានប្រែក្លាយពីទៅជាតំបន់ដ៏ទាក់ទាញ សម្រាប់វិនិយោគិនជាតិនិងអន្តរជាតិ ព្រមទាំងភ្ញៀវទេសចរទាំងជាតិ និងអន្តរជាតិជាច្រើន ខណៈការអភិវឌ្ឍវិស័យអចលនទ្រព្យ មានការអភិវឌ្ឍយ៉ាងលឿនស្ទើមិនគួរឱ្យជឿ។

តួលេខចុងក្រោយពីរដ្ឋបាលខេត្តព្រះសីហនុបានឱ្យដឹងថា រយៈពេល៤ឆ្នាំចុងក្រោ​យនេះ គិតចាប់ពីឆ្នាំ២០១៧ ដល់ខែធ្នូ ឆ្នាំ២០២០ ខេត្តព្រះសីហនុមាន សំណង់សរុបបានអនុញ្ញាតឲ្យសាងសង់មានចំនួន១,៥១៤អគារ មានក្រឡាផ្ទៃសរុប១៤,៧៣៦,៥៥៩ម៉ែត្រការ៉េ និងទុនវិនិយោគសរុប ៨,០៤៩,៦៩២,៨៣១ដុល្លារអាមេរិក។

អ្នកនាំពាក្យសាលាខេត្តព្រះសីហនុ លោកឃាង ភារម្យ បានថ្លែងប្រាប់កាលពីស ប្តាហ៍មុនថា ទោះបីជាស្ថានភាពកូវីដ១៩ នៅតែបង្កជាបញ្ហាដល់ខេត្តសម្រាប់ដោះស្រាយក្ដី តែយើងក៏មិនភ្លេចពីការអភិវឌ្ឍខេត្ត ដើម្បីស្វាគមន៍ដល់វិនិយោគិនជាតិ និងអន្តរជាតិមកបណ្ដាក់ទុនរកស៊ី នៅពេលចប់វិបត្តិកូវីដ១៩នោះទេ។

លោកបានថ្លែងបន្តថា ហេដ្ឋារចនាសម្ព័ន្ធរូបវ័ន្តនៅក្នុងខេត្ត គឺជាកត្តាទាក់ទាញមួយដល់វិនិយោគិនជាតិ និងអន្តរជាតិ សម្រាប់មកបណ្ដាក់ទុននៅពេលខាងមុខឆាប់នេះ ខណៈហេដ្ឋារចនាសម្ព័ន្ធតភ្ជាប់ ពីរាជធានីក៏កំពុងតែស្ថាបនាយ៉ាងមមាញឹក ដើម្បីសម្រួលដល់បណ្ដាអ្នកវិនិយោគ ដែលមានបំណងមកកាន់ខេត្តព្រះសីហនុ។

លោកបានបន្តថា “ក្នុងខេត្តព្រះសីហនុ យើងមានផ្លូវជាច្រើនខ្សែខ្វាត់ខ្វែង ដែលជាការទាក់ទាញទេសចរជាតិនិងអន្តរជាតិ ចូលមកកាន់ខេត្តព្រះសីហនុ ខណៈនៅខេត្តនេះក៏មានព្រលានយន្តហោះអន្តរជាតិ អាចតភ្ជាប់ជើងហោះហើរពីក្រុងព្រះសីហនុ ទៅកាន់គោលដៅប្រទេសជាច្រើនទៀតលើពិភពលោក”។ លោកបន្តថា “ទាំងនេះ សុទ្ធសឹងតែអ្វីដែលយើងបានត្រៀម ចំពោះការទទួលស្វាគមន៍វិនិយោគិនចូលមកបណ្ដាក់ទុន”។

លោកបន្ថែមថា អ្វីដែលសំខាន់នោះ ខេត្តព្រះសីហនុ ក៏បាននិងកំពុងជំរុញការចាក់វ៉ាក់សាំងប្រឆាំងកូវីដ១៩ ជូនប្រជាពលរដ្ឋឱ្យបានកាន់តែច្រើន និងអាចឱ្យអាជីវកម្មនិងសកម្មភាពសេដ្ឋកិច្ចនៅក្នុងខេត្តនេះ វិលទៅរកប្រក្រតីភាពឡើងវិញ នៅពេលខាងមុខឆាប់នេះ។

លោកបានបន្តថា ទោះបីជាយើងបានចាក់វ៉ាក់សាំង ជូនពលរដ្ឋនៅក្នុងខេត្តព្រះសីហនុរួចហើយក្ដី ក៏យើងត្រូវតែអនុវត្តន៍តាមវិធានការរបស់ក្រសួងសុខាភិបាល ក៏ដូចជាប្រមុខរាជរដ្ឋាភិបាលគឺ៣កុំ ៣ការពារ ដើម្បីទប់ស្កាត់ការឆ្លងរីករាលនៃជំងឺនេះនៅក្នុងខេត្តក៏ដូចជាក្នុងប្រទេសកម្ពុជា។

ការអភិវឌ្ឍរបស់ក្រុងព្រះសីហនុ សម្រាប់២ទសវត្សចុងក្រោយនេះ ទទួលបានការហូរចូលនៃវិនិយោគិន ពិសេសវិនិយោគជនជាតិចិន ដែលបានជួយជំរុញទីក្រុងជាប់មាត់សមុទ្រមួយនេះជាតំបន់វិនិយោគមួយដ៏កាន់ទាក់ទាញ។
ខេត្តនេះ ត្រូវបានបានចាត់ទុកប៉ូលសេដ្ឋកិច្ចកម្ពុជាមួយ ក្នុងចំណោម៣ ដែលរួមមានភ្នំពេញ និងសៀមរាប។

រដ្ឋាភិបាលវិនិយោគប្រមាណ៣០០លានដុល្លារ នៃកញ្ចប់ថវិកាជាតិ ដើម្បីស្ថាបនាផ្លូវចំនួន៣៤ខ្សែ និងហេដ្ឋារចនាសម្ព័ន្ធដ៏ប្រណីតក្នុងក្រុងព្រះសីហនុ រួមទាំងការស្ថាបនាឆ្នេរឲ្យស្រស់ស្អាត បានប្រែក្លាយទៅជាក់ការទាក់ទាញភ្ញៀវទេសចរកាន់តែខ្លាំងមកខេត្តភាគនិរតីមួយនេះ។

លោកគួច ចំរើន អភិបាលខេត្តព្រះសីហនុ ធ្លាប់បានលើកឡើងថា ខេត្តព្រះសីហនុ ទទួលបានគម្រោងវិនិយោគ លើវិស័យសេវាកម្មទេសចរណ៍ និងសណ្ឋាគារចំនួន៦០ ដោយមានទុនវិនិយោគសរុបជាង១០,៧៤ ពាន់លានដុល្លារ គិតមកដល់ពេលនេះ៕

ដោយៈ ប៊ី

ភ្នំពេញៈ សម្តេចតេជោ ហ៊ុន សែន នាយករដ្ឋមន្ត្រីកម្ពុជា និងជាប្រធានគណៈកម្មការជាតិប្រយុទ្ធប្រឆាំងនឹងជំងឺកូវីដ១៩ នឹងអញ្ជើញដឹកនាំកិច្ចប្រជុំពិសេសមួយតាមប្រព័ ន្ធវីដេអូ នៅព្រឹកថ្ងៃព្រហស្បតិ៍ ទី១ ខែកក្កដា ឆ្នាំ២០២១នេះ ដើម្បីពិភាក្សា និងដោះស្រាយទៅលើបញ្ហាជំងឺកូវីដ១៩ ដែលកំពុងរីករាលដាលនៅក្នុងប្រទេសកម្ពុជា។

កិច្ចប្រជុំនេះ នឹងធ្វើឡើងនៅវេលាម៉ោងប្រមាណ៨,៣០នាទីព្រឹក។ ទន្ទឹមនឹងកិច្ចប្រជុំនោះ សម្តេចតេជោនាយករដ្ឋមន្ត្រី នឹងមានការថ្លែងសារពិសេសពាក់ព័ន្ធនឹងស្ថានភាពជំងឺកូវីដ១៩នៅក្នុងប្រទេសកម្ពុជាផងដែរ។

ប្រទេសកម្ពុជា មកដល់ពេលនេះ បាននិងកំពុងរងការរាតត្បាតពីជំងឺកូវីដ១៩ អស់រយៈពេលជាងមួយឆ្នាំមកហើយ។ ការរីករាលដាលនៃជំងឺឆ្លងសាកលមួយនេះ មិនទាន់ស្រាកស្រាននៅឡើយនោះទេ ហើយប៉ុន្មានថ្ងៃចុងក្រោយនេះ អត្រាឆ្លងនៃជំងឺកំពុងស្ទុះឡើងក្នុងកម្រិតគួរឱ្យព្រួយបារម្ភ។

ក្នុងនោះនៅថ្ងៃទី២៩ ខែមិថុនា កម្ពុជាបានរកឃើញអ្នកឆ្លងរហូតដល់ទៅជាង ១១០០នាក់។ កម្ពុជា គិតត្រឹមថ្ងៃទី២៩ ខែមិថុនា បានរកឃើញអ្នកឆ្លងសរុប ៥០,៣៨៥នាក់។ ក្នុងនោះអ្នកជាសះស្បើយសរុបចំនួន ៤៤,១៤៣នាក់ និងស្លាប់សរុបចំនួន៦០២នាក់។

ក្នុងរយៈពេលមួយឆ្នាំកន្លងទៅនេះ រាជរដ្ឋាភិបាល បានប្រឹងប្រែងដាក់ចេញនូវយុទ្ធសាស្ត្រជាច្រើន ដើម្បីទប់ទល់ការរីករាលដាល និងបានប្រឹងប្រែងរកវ៉ាក់សាំងមកចាក់ជូនប្រជាពលរដ្ឋ។ មកដល់ពេលនេះកម្ពុជា រកបានវ៉ាក់សាំងបានជាង១១លានដូស ហើយចាក់ជូនប្រជាពលរដ្ឋបានជាង៤លាននាក់រួចហើយ៕