ដោយៈ គង់ សូរិយា

    ភ្នំពេញៈ រដ្ឋលេខាធិការក្រសួងសាធារណការ និងដឹកជញ្ជូនលោក លឹម ស៊ីដេនីន បានដឹកនាំក្រុមការងារបច្ចេកទេស ដោយមានការចូលរួមពីមន្ត្រីជំនាញបច្ចេកទេសក្រសួង ក្រុមការងារបច្ចេកទេសក្រុមហ៊ុនទីប្រឹក្សាបច្ចេកទេសក្វាងចូវវ៉ានអាន (WACC) ក្រុមការងារបច្ចេកទេសក្រុមហ៊ុនសំណង់សៀងហៃ (SCG) និងមន្ត្រីជំនាញពាក់ព័ន្ធជាច្រើនរូបទៀត ចុះពិនិត្យ និងធ្វើការប្រគល់-ទទួលបញ្ចប់សុពលភាពការងារថែទាំផ្លូវ មហាវិថី ស៊ី ជីនពីង (ក្រវាត់ក្រុងទី៣) ក្នុងរយៈពេលធានាពីរឆ្នាំ។

បេសកកម្មចុះត្រួតពិនិត្យនេះ គឺដើម្បីពិនិត្យឡើងវិញនូវការងារថែទាំផ្លូវ ការបំពាក់ផ្លាកសញ្ញាចរាចរណ៍ គំនូសសញ្ញាចរាចរណ៍ ភ្លើងសញ្ញាចរាចរណ៍ បង្គោលភ្លើងបំភ្លឺផ្លូវ បង្គោលគីឡូម៉ែត្រ និងបង្គោលសុវត្ថិភាព ទៅតាមបទដ្ឋានបច្ចេកទេសផ្លូវថ្នល់ ដើម្បីប្រគល់-ទទួលបញ្ចប់សុពលភាព ដោយក្រុមការងារបានបែងចែក ជាបីក្រុមសំខាន់ៗ គឺ ក្រុមត្រួតពិនិត្យផ្លូវ ក្រុមត្រួតពិនិត្យស្ពាន និងលូ និងក្រុមត្រួតពិនិត្យបរិក្ខារសុវត្ថិភាពផ្លូវថ្នល់។

ក្រោយពីក្រុមការងារជំនាញបានត្រួតពិនិត្យរួចរាល់ នៅរសៀលថ្ងៃដដែល លោករដ្ឋលេខាធិការ បានអញ្ជើញដឹកនាំក្រុមការងារប្រជុំវាយតម្លៃ និងបានឯកភាពធ្វើការបញ្ចប់សុពលភាព ការងារថែទាំមហាវិថី ស៊ី ជីនពីង ជាផ្លូវការ។

មហាវិថីស៊ី ជីនពីង (ក្រវាត់ក្រុងទី៣) ត្រូវបានសម្ពោធដាក់ឱ្យប្រើប្រាស់ កាលពីថ្ងៃទី០៣ ខែសីហា ឆ្នាំ២០២៣ ក្រោមអធិបតីភាពដ៏ខ្ពង់ខ្ពស់ សម្តេចអគ្គមហាសេនាបតីតេជោហ៊ុន សែន និងបានសម្ពោធជានិមិត្តរូបប្រសិទ្ធនាមឈ្មោះជា “មហាវិថី ស៊ី ជីនពីង” ក្រោមអធិបតីភាពដ៏ខ្ពង់ខ្ពស់ សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា កាលពីថ្ងៃទី២៨ ខែឧសភា ឆ្នាំ២០២៤ កន្លងទៅ។

ផ្លូវក្រវាត់ក្រុងទី៣ មានប្រវែងសរុប៥២,៩៨ គីឡូម៉ែត្រ ក្នុងនោះឆ្លងកាត់ភូមិសាស្រ្ត រាជធានីភ្នំពេញប្រវែង១៧,៧៧គីឡូម៉ែត្រ និងឆ្លងកាត់ភូមិសាស្រ្ត ខេត្តកណ្តាល ប្រវែង៣៥,២១ គីឡូម៉ែត្រ ដែលមានចំណុចចាប់ផ្តើមពីគីឡូម៉ែត្រ១៤+១០៥ នៃផ្លូវជាតិលេខ៤ និងចំណុចចុងបញ្ចប់នៅគីឡូម៉ែត្រ ២៤+៨៤០ នៃផ្លូវជាតិលេខ១ ដោយក្នុងនោះរួមមាន ផ្លូវមេប្រវែង៤៧,៦០គីឡូម៉ែត្រ ក្រាលបេតុងស៊ីម៉ង់ត៍សរសៃដែក  និងផ្លូវខ្នែងតភ្ជាប់ប្រវែង ៥,៣៧ គីឡូម៉ែត្រ ក្រាលបេតុងកៅស៊ូ អេស៊ី។

គម្រោងនេះបានរួមបញ្ចូល នូវការសាងសង់ស្ពានវែងឆ្លងកាត់ទន្លេបាសាក់ចំនួន២កន្លែង ប្រវែងសរុប៩៩៦ម៉ែត្រ ដែលក្នុងនោះ ស្ពានខាងកើតមានប្រវែង៦៣០ម៉ែត្រ និងស្ពានខាងលិច មានប្រវែង ៣៦៦ម៉ែត្រ ស្ថិតនៅក្នុងភូមិសាស្រ្តកោះអន្លង់ចិន និងត្រូវបានប្រសិទ្ធនាមថាជា “ស្ពានមិត្តភាពកម្ពុជា-ចិន កោះអន្លង់ចិន”។

បន្ថែមពីលើនេះ គម្រោងនេះក៏បានសាងសង់ផងដែរ នូវស្ពានរំលង ឬស្ពានអាកាស(Flyover) ចំនួន ២កន្លែង ប្រវែងសរុប៥៦៤ម៉ែត្រ កាត់ពីលើផ្លូវជាតិលេខ៤ និងផ្លូវជាតិលេខ២១ ស្ពានរំលងប្តូរ​ទិស(Interchange) ចំនួន២កន្លែង ប្រវែងសរុប៤៤០ម៉ែត្រ កាត់ពីលើផ្លូវជាតិលេខ២ និងផ្លូវជាតិលេខ៣ និងស្ពានមធ្យម និងខ្លីចំនួន ១១កន្លែង ប្រវែងសរុប៥៦៨ម៉ែត្រ និងការរៀបចំទីតាំងសម្រាប់រថយន្តបត់ត្រឡប់ក្រោយ(U-Turn) ព្រមទាំងការបំពាក់ផ្លាកសញ្ញាចរាចរណ៍ គំនូសសញ្ញាចរាចរណ៍ ភ្លើងសញ្ញាចរាចរណ៍ បង្គោលភ្លើងបំភ្លឺផ្លូវ បង្គោលគីឡូម៉ែត្រ និងបង្គោលសុវត្ថិភាព ទៅតាមបទដ្ឋានបច្ចេកទេសផ្លូវថ្នល់។

គម្រោងនេះ ចំណាយថវិកាសរុបប្រមាណ២៧៣ លានដុល្លារអាមេរិក ដែលជាហិរញ្ញប្បទានសម្បទាន ពីរដ្ឋាភិបាលនៃសាធារណរដ្ឋប្រជាមានិតចិន ហើយរាជរដ្ឋាភិបាលកម្ពុជា ចូលរួមថវិកាបដិភាគ សម្រាប់ការដោះស្រាយផលប៉ះពាល់ ការបោសសម្អាតមីន និងយុទ្ធភ័ណ្ឌមិនទាន់ផ្ទុះ ពន្ធ និងសួយសារអាករផ្សេងៗ។

មហាវិថី ស៊ី ជីនពីង នេះ គឺជាដង្ហើមសេដ្ឋកិច្ចដ៏មានសក្តានុពលថ្មីមួយបន្ថែមទៀតរបស់កម្ពុជាបើនិយាយជារួម និងរបស់រាជធានីភ្នំពេ​ញ និងខេត្តកណ្តាលបើនិយាយដោយឡែក ដែលមានភាពប្រទាក់ក្រឡា និងតភ្ជាប់ជាមួយបណ្តាញខ្សែផ្លូវសំខាន់ៗរួមមាន ដូចជា៖ មួយផ្នែកតភ្ជាប់ជាមួយផ្លូវជាតិលេខ១ ផ្លូវល្បឿនលឿនភ្នំពេញ-ក្រុងបាវិត ផ្លូវជាតិលេខ២១ និងផ្លូវជាតិលេខ២ និងមួយផ្នែកទៀត តភ្ជាប់ជាមួយផ្លូវជាតិលេខ៣ ផ្លូវជាតិលេខ៤ និងតភ្ជាប់ជាមួយមហាវិថីឈ្នះ-ឈ្នះខាងលិច(ផ្លូវទំនប់កប់ស្រូវ) ឆ្ពោះទៅកាន់ផ្លូវជាតិលេខ៥ ស្ពានព្រែកព្នៅ និងមហាវិថីឈ្នះ-ឈ្នះខាងកើត រហូតទៅដល់ផ្លូវជាតិលេខ៦ ព្រមទាំងតភ្ជាប់ជាមួយបណ្តាញខ្សែផ្លូវមួយចំនួនផ្សេងទៀត៕

ដោយៈ និស្ស័យ

    ភ្នំពេញៈ សម្តេចតេជោ ហ៊ុន សែន ក្នុងនាមប្រធានគណបក្សកាន់អំណាចនៅព្រឹកថ្ងៃទី១៣ មិថុនានេះបានលើកឡើងថា បើភាគីថៃមិនព្រមបើកច្រកព្រំដែន ដែលខ្លួនបិទជាឯកតោភាគី កម្ពុជាត្រូវធ្វើ៦ចំណុច។

ចំណុចទាំង៦នោះ មានខ្លឹមសារទាំងស្រុងរបស់សម្តេចតេជោ ហ៊ុន សែន ដែលបានលើកឡើងថា យប់ម៉ិញខ្ញុំបានចេញសារមួយហើយ ព្រឹកនេះខ្ញុំនិយាយក្នុងនាមប្រធានបក្សកាន់អំណាច ទៅកាន់រាជរដ្ឋាភិបាលបន្ថែមទៀត។ ក្នុងករណីភាគីថៃមិនព្រមបើកច្រកព្រំដែនដែលខ្លួនបិទជាឯកតោភាគី កម្ពុជាត្រូវធ្វើលើ៦ចំណុច ដូចជាទី១ ប្រកាសបិទឈប់ទិញទំនិញថៃ មកប្រើប្រាស់ក្នុងទីផ្សារកម្ពុជាគឺមានន័យថា ឈប់ប្រើទំនិញថៃ ជំនួសដោយការប្រើទំនិញក្នុងស្រុក និងទំនិញមកពីប្រទេសផ្សេងក្រៅពីថៃ។

ទី២ ត្រៀមទិញទំនិញដែលភាគច្រើន ជាកសិផលរបស់ប្រជាជនដែលធ្លាប់លក់ឲ្យថៃ ដោយខិតខំរកទីផ្សាជូនប្រជាជន ទាំងក្នុងស្រុក និងក្រៅស្រុក។ ទី៣ បង្វែរអ្នកជម្ងឺដែលធ្លាប់ទៅព្យាបាល ក្នុងប្រទេសថៃ មករកមន្ទីរពេទ្យក្នុងស្រុក ឬទៅប្រទេសផ្សេងវិញ។

ទី៤ ត្រៀមទទួលយក និងដោះស្រាយការងារជូនពលករ ដែល និងវិលត្រឡប់ពីប្រទេសថៃ។ កម្ពុជាកំពុងខ្វះកម្លាំងពលកម្មទាំងក្នុងវិស័យឧស្សាហកម្ម ទាំងក្នុងវិស័យកសិកម្ម និងសំណង់រាប់សិបម៉ឺនកន្លែង។ បងប្អូនពលករអាចចាកចេញមកកម្ពុជាមុនថៃបណ្តេញចេញ ដែលពេលនេះកំពុងទទួលការមើលងាយ និងប្រមាថយ៉ាងធ្ងន់ធ្ងរនៅតំបន់មួយចំនួន។

ទី៥ កងកម្លាំងប្រដាប់អាវុធគ្រប់ប្រភេទ ត្រូវត្រៀម២៤ម៉ោងលើ២៤ម៉ោង ដើម្បីវាយបកការពារខ្លួនក្នុងករណីមានការឈ្លានពាន និងទី៦បណ្តាខេត្តនៅជិតព្រំដែន ត្រូវត្រៀមជម្លៀសប្រជាជនចេញមកកាន់តំបន់មានសុវត្តិភាព និងដោះស្រាយស្បៀងអាហារថ្នាំពេទ្យ និងសំភារៈចាំបាច់ផ្សេងទៀត។

សម្តេចបញ្ជាក់ទៀតថា “បើថៃមិនធ្វើការដោះស្រាយច្រកព្រំដែនឲ្យវិលមករកភាពប្រក្រតីវិញ យើងគ្មានជម្រើសក្រៅពីធ្វើការទាំងអស់នេះទេ”។

ជាមួយគ្នានេះ សម្តេចបានថ្លែងអំពាវបងប្អូនជនរួមជាតិ សូមកុំធ្វើអំពើជ្រុលនិយម ដូចជា បាតុកម្មប្រឆាំងស្ថានទូតថៃ ក្រុមហ៊ុនថៃ និងជនជាតិថៃនៅកម្ពុជា និងសូមកុំស្អប់ខ្ពើមប្រកាន់ពូជសាសន៍ ចំពោះជនជាតិថៃ ដែលភាគច្រើនលើសលប់ជាមនុស្សល្អ។ មានតែក្រុមជ្រុលនិយម និងយោធាមួយចំនួនប៉ុណ្ណោះ ដែលបង្ករឿងជាមួយកម្ពុជា ព្រោះជាទម្លាប់រដ្ឋាភិបាលថៃ មិនអាចគ្រប់គ្រងកងទ័ពបានដូចប្រទេសយើងនោះទេ៕

ដោយៈ សហសេវិក

    ភ្នំពេញៈ សម្តេចមហាបវរធិបតីហ៊ុន ម៉ាណែតនាយករដ្ឋមន្រ្តីនៃកម្ពុជាបានបញ្ជាក់ជំហរយ៉ាងម៉ឺងមាត់ ជាមួយក្រុមជ្រុលនិយមថៃ ដែលបានធ្វើសកម្មភាពយ៉ាងគឃ្លើនមកលើកម្ពុជា។

សម្តេចបានសរសេរលើបណ្តាញ ទំនាក់ទំនងសង្គមរបស់ខ្លួនថា កន្លងមកក្រុមជ្រុលនិយមថៃ ដោយមានការគាំទ្រពីពួកយោធាដែលនិយមសង្រ្គាមបានគំរាមមកកម្ពុជាថា នឹងកាត់ភ្លើងកាត់អ៊ីនធើណែត។ កាត់ភ្លើងអី បើកម្ពុជាមិនប្រើភ្លើងថៃផង។ កាត់អ៊ីនធើណែតអី បើកម្ពុជាមានអ៊ីនធើណែតប្រើគ្រប់គ្រាន់ហើយនោះ។

សម្តេចបញ្ជាក់ថា “ខ្ញុំតែងបានអំពាវនាវ កុំឲ្យបញ្ហារីករាលដាលពីបញ្ហាជម្លោះយោធានៅតំបន់មួយ រីករាលដាលដល់កន្លែងផ្សេងទៀត និងកុំរីករាលដាលដល់វិស័យផ្សេងទៀត”។ សម្តេចបន្ថែមថា“តែពេលនេះវាបានរីករួចស្រេចទៅហើយដូចជា ការបិទព្រំដែនជាឯកតោភាគី បន្ថយចំនួនថ្ងៃស្នាក់នៅ ជាឯកតោភាគី និងការគំរាមកាត់ភ្លើង កាត់អ៊ីនធើណែត ការរាយលួសបន្លាតាមច្រកព្រំដែនខ្លះ ដោយធ្វើតាមទំនើងចិត្ត”។

សម្តេចបានបញ្ជាក់ថា “បើបានជាជ្រុលរបៀបនេះទៅហើយ ខ្ញុំសូមជូនយោបល់ទៅរាជរដ្ឋាភិបាលថា ក្រៅពីបញ្ហាប្តឹងទៅតុលាការយុត្តិធម៌អន្តរជាតិ(ICJ) កម្ពុជាគួរពិចារណាបញ្ឈប់ការចាក់ផ្សាយខ្សែ​ភាពយន្តថៃលើកញ្ចក់ទូរទស្សន៍កម្ពុជាទាំងអស់ និងអាចឈានទៅបញ្ឈប់ការនាំទំនិញថៃមកប្រើក្នុងកម្ពុជាផងដែរ”។

សម្តេចបន្តថា កម្ពុជាមិនគួរខ្លាចថៃបណ្តេញពលករខ្មែរ ត្រឡប់មកប្រទេសវិញនោះទេ ព្រោះរឿងនេះយើងក៏លំបាក ថៃខ្លួនឯងក៏លំបាក ដោយសារក្រុមហ៊ុនថៃ ខ្វះកម្លាំងពលកម្មដែលធ្វើឲ្យសេដ្ឋកិច្ចថៃរងផលប៉ះពាល់មួយផ្នែកផងដែរ។ រឿងទាំងនេះ សុទ្ធតែជាផ្តល់មតិសម្រាប់ការពិចារណាតែរឿង គួរធ្វើភ្លាមគឺបញ្ឈប់ការចាក់បញ្ចាំងខ្សែភាពយន្តថៃលើកញ្ចក់ទូរទស្សន៍កម្ពុជា៕

ដោយៈ និស្ស័យ

    ប៉ារីសៈ លោកប្រធានាធិបតីបារាំង លោក Emmanuel MACRON បានអះអាងថា បារាំងអាចជួយសម្របសម្រួលផ្តល់ឯកសារដល់ភាគីកម្ពុជា-ថៃ ដើម្បីដោះស្រាយជម្លោះព្រំដែន ក្នុងករណីចាំបាច់។

ការបញ្ជាក់បែបនេះ បានធ្វើឡើង ក្នុងជំនួបទ្វេភាគីជាមួយសម្តេចមហាបវរធិបតី ហ៊ុន ម៉ាណែត នៅទីក្រុងនីស ប្រទេសបារាំង។ នេះបើតាម លោក ហ្សង់ ហ្វ្រង់ស័រ តាន់ រដ្ឋមន្ត្រីប្រតិភូអមនាយករដ្ឋមន្ត្រី ទទួលបន្ទុកកិច្ចការការបរទេស និងសហប្រតិបត្តិការអន្តរជាតិ ថ្លែងក្នុងសន្និសីទសារព័ត៌មាននៅព្រឹកនេះ។

ថ្លែងក្នុងសន្និសីទសារព័ត៌មាន នៅឯព្រលានយន្តហោះអន្តរជាតិភ្នំពេញ នាព្រឹកថ្ងៃទី១២ ខែមិថុនា លោក ហ្សង់ ហ្វ្រង់ស័រ តាន់ បានសង្ខេបអំពីលទ្ធផល នៃរបស់សម្តេចបវរធិបតី ទៅកាន់ទីក្រុងនីសប្រទេសបារាំង ដោយលោកអះអាងថា សម្តេចបានជួបជាមួយមេដឹកនាំមួយចំនួន ជាពិសេសប្រធានាធិបតីបារាំង។

លោកបញ្ជាក់ថា ក្នុងជំនួបជាមួយមេដឹកនាំបណ្តាប្រទេសជាមិត្ត និងដៃគូរបស់កម្ពុជា ជាពិសេសប្រធានាធិបតីបារាំង សម្តេចបវរធិបតី ហ៊ុន ម៉ាណែត បានបញ្ជាក់អំពីជំហរកម្ពុជា ក្នុងការដោះស្រាយបញ្ហាព្រំដែនជាមួយប្រទេសថៃ ដែលជំហរនេះ សម្តេចក៏បានបញ្ជាក់ប្រាប់នាយករដ្ឋមន្រ្តីម៉ាឡេស៊ី កាលពីពេលថ្មីៗនេះផងដែរ។

លោកហ្សង់ ហ្វ្រង់ស័រ តាន់ បានបញ្ជាក់បន្ថែមថា យ៉ាងហោចណាស់ ជាមួយប្រធានាធិបតីបារាំង ជាការពិតសម្តេចបានលើកឡើងពីរឿងរ៉ាវបច្ចុប្បន្នរវាងកម្ពុជា និងថៃ ប៉ុន្តែខ្ញុំសូមឡើងយ៉ាងទទូចថា សម្តេចបវរធិបតី លើកឡើងពីបញ្ហាកម្ពុជាថៃ នៅចំពោះមុខ​ប្រធានាធិបតីបារាំងម៉ាក្រុង ដើម្បីបញ្ជាក់ពីគោលជំហររបស់ ប្រទេសកម្ពុជាតែប៉ុណ្ណោះ គ្មានឡើយគោលដៅផ្សេងៗ។

គោលជំហរ៤ចំណុចរបស់កម្ពុជា ក្នុងការដោះស្រាយជម្លោះព្រំដែនជាមួយថៃ ត្រូវបានសម្តេចនាយករដ្ឋមន្រ្តី បញ្ជាក់កន្លងមកក្នុងនោះរួមមានដូចជា ទី១ កម្ពុជាប្រកាន់ខ្ជាប់នូវគោលជំហររក្សាសន្តិភាព មិត្តភាព និងកិច្ចសហប្រតិបត្តិការល្អជាមួយថៃ។ ទី២ ការសម្រេចចិត្តរបស់កម្ពុជា ដើម្បីយកបញ្ហាប្រាសាទតាមាន់ធំ ប្រាសាទតាមាន់តូច ប្រាសាទតាក្របី និងតំបន់មុំបី ទៅតុលាការយុត្តិធម៌អន្តរជាតិ (ICJ) គឺដើម្បីស្វែងរកដំណោះស្រាយបញ្ហាព្រំដែន នៅតំបន់ទាំងនោះដោយសន្តិវិធីអោយបានឆាប់ចប់ជាស្ថាពរ ជាជាងបន្សល់ទុកបញ្ហាអោយនៅបន្តស្រពិចស្រពិលរយៈពេលវែង ដែលអាចបង្កអោយកើតមានជាជម្លោះប្រដាប់អាវុធសារជាថ្មី។

ទី៣ បន្តសហការជាមួយភាគីថៃ ដើម្បីជំរុញការវាស់វែង ខ័ណ្ឌ​សីមា និងបោះបង្គោលព្រំដែនរវាងប្រទេសទាំងពីរ ដែលនៅសេសសល់ (ក្រៅពីតំបន់ទាំង៤ខាងលើ) ដោយប្រើប្រាស់យន្តការគណៈកម្មការព្រំដែនចម្រុះ(JBC) កម្ពុជា-ថៃ និងទី៤៖ បន្តរក្សាទំនាក់ទំនងរវាងប្រទេសទាំងពីរ តាមរយៈគ្រប់យន្តការដែលមានស្រាប់ ដើម្បីជាឧត្តមប្រយោជន៍ សម្រាប់ប្រជាពលរដ្ឋនៃប្រទេសទាំងពីរកម្ពុជា-ថៃ។

លោកហ្សង់ បានបញ្ជាក់ទៀតថា សម្តេចបវរធិបតី លើកឡើងពីបញ្ហាទាំងនេះ ចំពោះមុខប្រធានាធិបតីម៉ាក្រុង គឺដើម្បីតែគោលដៅមួយគត់ នោះគឺបញ្ជាក់ពីគោលជំហររបស់ប្រទេសកម្ពុជា នៅក្នុងរឿងរ៉ាវហ្នឹង មិនមែនសម្រាប់គោលដៅអីផ្សេងទេ ម្ល៉ោះហើយយើងក៏មិនបានទន្ទឹងរង់ចាំចម្លើយបញ្ជាក់ច្បាស់ ពីប្រធានាធិបតីម៉ាក្រុងដែរ យ៉ាងណាក៏ដោយ ខ្ញុំសូមអះអាងថា ប្រធានាធិបតីបារាំងម៉ាក្រុង បានថ្លែងបញ្ជាក់ថា​ “បារាំងអាចជួយសម្រួល ជាអាទិ៍តាមរយៈការផ្តល់ឯកសារ ឯកសារនេះឬឯកសារនោះ ដល់ភាគីទាំងពីរ​ ដល់ថៃផងដល់កម្ពុជាផង បើសិនជាមានការចាំបាច់”។

សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានអញ្ជើញចូលរួម ក្នុងសន្និសីទអង្គការសហប្រជាជាតិ ស្តីពីមហាសមុទ្រលើកទី៣ ដែលធ្វើឡើង នៅទីក្រុងនីស ប្រទេសបារាំង ចាប់ពីថ្ងៃទី៩-១១ ខែមិថុនា ឆ្នាំ២០២៥៕