ដោយៈ ម៉ាលីនណា

    ភ្នំពេញៈ កម្ពុជាបាន និងកំពុងជំរុញបង្កើតស្ថានីយ៍បញ្ចូលថាមព​លសម្រាប់យានយន្តអគ្គិសនី ឱ្យគ្របបណ្តប់នៅទូទាំងប្រទេស សម្រា​ប់បម្រើ ដល់ការធ្វើដំណើររបស់ប្រជាពលរដ្ឋ និងការធ្វើអាជីវកម្ម ជាពិសេសសហគ្រាសដឹកជញ្ជូន តាមរយៈនៃការកាត់បន្ថយនូវការចំណា​យខ្ពស់ និងការចូលរួមលើកកម្ពស់ថាមពលស្អាត។

ការលើកឡើងបែបនេះរបស់ លោក កែវ រតនៈ បានធ្វើឡើងនៅថ្ងៃទី៨ ខែមករា ឆ្នាំ២០២៦ ក្នុងពិធីសម្ពោធដាក់ឲ្យដំណើរការជាផ្លូវការនូវស្ថានីបញ្ចូលថាមពលរបស់ ក្រុមហ៊ុន ហ្សូ ម៉ូធ័រ ខេមបូឌា។

លោក កែវ រតនៈ បានថ្លែងថា ការដាក់ឱ្យដំណើរសាកល្បង ស្ថានីយ៍បញ្ចូលថាមពលដ៏ធំមួយ នៅរាជធានីភ្នំពេញ គឺជាការឈានទៅអនុវត្ដគោលនយោបាយរបស់ សម្តេចមហាបវរធិបតី ហ៊ុន ម៉ាណែត ដើម្បីធ្វើយ៉ាងណាយកផលប្រយោជន៍ បានមកពីការកែទម្រង់របស់វិស័យអគ្គិសនី ហើយយកមកចែកផលឱ្យដល់សេដ្ឋកិច្ច និងសង្គម ពី​ព្រោះ​ក្នុងរយៈពេលជាច្រើនឆ្នាំចុងក្រោយនេះ តាំងពីសម្តេចតេជោ ហ៊ុន សែន ដែលបានកសាងមូលដ្ឋានគ្រឹះឱ្យប្រទេសកម្ពុជា ដែលធ្វើឱ្យប្រទេសកម្ពុជា មានស្ថិរភាពក្នុងការផ្គត់ផ្គង់ថាមពលអគ្គិសនី ជាពិសេ​​សអគ្គិសនីដើរដោយថាមពលស្អាត។

លោករដ្ឋមន្ត្រី បានថ្លែងបន្ដថា ឥឡូវនេះ សម្តេចបវរធិបតី បានបន្ដការកែទម្រង់នេះ ក្នុងល្បឿនមួយដែលលឿនបន្ថែមទៀត ដែលធ្វើឱ្យប្រទេសកម្ពុជា នៅឆ្នាំ២០២៥ មានថាមពលស្អាតប្រមាណ៦៣% នៃថាមពលសរុបនៅក្នុងបណ្ដាញជាតិ មានន័យថា លើសលប់នៅក្នុងបណ្តាញជាតិ គឺប្រើថាមពលស្អាត ដូច្នេះនេះមិនមែនតែជាជោគជ័យក្នុងវិស័យអគ្គិសនីទេ ប៉ុន្តែយើងយកផលប្រយោជន៍នេះមកជំរុញឲ្យវិស័យដទៃទៀត។

លោករដ្ឋមន្ត្រីបានបញ្ជាក់ថា “ថ្ងៃនេះជាក់ស្ដែងការយកផលនូវការកែទម្រង់វិស័យអគ្គិសនី មកចែកផលឲ្យវិស័យដឹកជញ្ជូន មានន័យថា ការប្រើប្រាស់ថាមពលស្អាត មិនត្រឹមតែជួយកាត់បន្ថយនូវការបំភាយឧស្ម័នទៅបរិយាកាសនោះទេ”។ លោកបន្ថែមថា “ការប្រើប្រាស់រថយន្តអគ្គិសនី នឹងជួយកាត់បន្ថយចំណាយក្នុងការធ្វើអាជីវកម្ម ចំពោះក្រុមហ៊ុនសហគ្រាស ដែលធ្វើការដឹកជញ្ជូន ធ្វើភស្តុភារកម្ម គឺជាឱកាសក្នុងការទម្លាក់ថ្លៃ ដើម្បីសន្សំសំចៃនៅក្នុងអាជីវកម្មរបស់ខ្លួន ចំពោះ​បងប្អូនប្រជាពលរដ្ឋជាលក្ខណៈគ្រួសារ ពេលដែលប្រើប្រាស់រថយន្តអគ្គិសនី មិនត្រឹមតែចូលរួមចំណែក ក្នុងការបង្កើតឲ្យបរិស្ថានរបស់យើងកាន់តែស្អាត ដោយសារគ្មានការបំភាយឧស្ម័ននោះទេ ប៉ុន្តែគឺជាការសន្សំសំចៃ ក្នុងការចំណេញដល់ថវិការបស់ខ្លួន ដោយយកថវិកានេះទៅជួយកូនចៅរៀនសូត្រ ឬមួយក៏ធ្វើការវិនិយោគផ្សេងៗ។

ជាមួយគ្នានេះ លោកបណ្ឌិតអ៊ឹម សុធារិទ្ធ នាយកប្រតិបត្តិ ហ្សូ ម៉ូធ័រ ខេមបូឌា បានឱ្យដឹងថា ដោយមានការគាំទ្រពីរាជរដ្ឋាភិបាល និងការជួយជ្រោមជ្រែងក្រសួងរ៉ែ និងថាមពល និងស្ថាប័នពាក់ព័ន្ធ បានធ្វើឱ្យ ហ្សូ ម៉ូធ័រ ខេមបូឌា បានអភិវឌ្ឍស្ថានីយ៍បញ្ចូលថាមពលគ្រប់ទីកន្លែងនៅកម្ពុជា ក្នុងនោះសម្រាប់ជាផែនការ នឹងជំរុញពង្រាយស្ថានីយ៍បញ្ចូលថាមពល ល្បឿនលឿនឱ្យបានចំនួន៣០០ ទីតាំង នៅទូទាំងប្រទេស ក្នុងនោះនៅឆ្នាំ២០២៥ បានបង្កើតស្ថានីយ៍បញ្ចូលថាមពល មានចំនួន៣០ទីតាំង ចំណែកនៅក្នុងឆ្នាំ២០២៦នេះ គ្រោងសាងសង់ចំនួន២០០ ទីតាំង និងនៅក្នុងឆ្នាំ២០២៧ ត្រូវបានគ្រោងប្រមាណ៧០ ទីតាំងបន្ថែមទៀត ដើម្បីចូលរួមបង្កើតនូវ ហេដ្ឋារចនាសម្ព័ន្ធស្ថានីយ៍បញ្ចូលថាមពលឱ្យកាន់តែទូលាយ នៅក្នុងប្រទេសកម្ពុជា។

ហេដ្ឋរចនាសម្ព័ន្ធស្ថានីយបញ្ចូល ថាមពលដ៏ទូលំទូលាយ នឹងផ្តល់ប្រយោជន៍ជាច្រើនដូចជា ទី១៖ ផ្តល់ទំនុកចិត្តកាន់តែខ្លាំងឡើងដល់អ្នកកំពុងប្រើប្រាស់ និងអ្នកមានបំណងប្រើប្រាស់យានយន្តអគ្គិសនី
ទី២ ជួយសម្រួលដល់អាជីវកម្មលក់ និងចែកចាយយានយន្តអគ្គិសនី ឲ្យកាន់តែមានចីរភាព ទី៣ ជួយប្រើប្រាស់ថាមពលអគ្គិសនីដែលផលិតក្នុងស្រុក ទី៤ កាត់បន្ថយលំហូសាច់ប្រាក់ចេញក្រៅប្រទេស ដើម្បីទិញឥន្ធនៈពីបរទេស។

ទី៥ ជួយប្រជាពលរដ្ឋសន្សំសំចៃថវិកា ដោយប្តូរមកប្រើយានយន្តអគ្គិសនី ទី៦ លើកកម្ពស់ថាមពលស្អាត តាមរយៈការកាត់បន្ថយការបំភាយឧស្ម័នកខ្វក់ទៅលើអាកាស ទី៧ ជួយធ្វើឲ្យប្រសើរដល់សុខភាពសាធារណៈ តាមរយៈការបន្ថយជាតិពុលក្នុងបរិយាកាស និងទី៨ ធ្វើឲ្យទំនិញចុះថោក តាមរយៈតម្លៃដឹកជញ្ជូនទាបជាងមុន៕

ដោយ៖ សហាការី

កណ្ដាល៖ សួនច្បារស្ទឹងព្រែកត្នោត បែបស៊ីវីល័យ ស្រស់ស្អាត និង ទាន់សម័យ នៅប៉ែកខាងត្បូងស្ទឹង ក្រុងតាខ្មៅ ខេត្តកណ្តាល ត្រូវបានបើកការដ្ឋានសាងសង់ជាផ្លូវការ។គម្រោងស្ថាបនាកែលម្អច្រាំងស្ទឹងព្រែកត្នោតនេះ មានប្រវែងសួនសាធារណៈ ៥៩០ម៉ែត្រ និង គ្រឿងបង្គំថ្មីប្រវែង ៤៥០ម៉ែត្រ គ្រោងនឹងបញ្ចប់ការសាងសង់ ១០០% នៅចុងឆ្នាំ២០២៦។

យោងតាមរបាយការណ៍ពីអាជ្ញាធរខេត្តកណ្តាល បានគូសបញ្ជាក់ថា គម្រោងស្ថាបនាកែលម្អច្រាំងស្ទឹងព្រែកត្នោតប៉ែកខាងត្បូងស្ទឹង ក្នុងក្រុងតាខ្មៅ ខេត្តកណ្តាល មានប្រវែងសួនសាធារណៈ ៥៩០ម៉ែត្រ និង គ្រឿងបង្គំថ្មីប្រវែង ៤៥០ម៉ែត្រ។រៀបចំចំនួន ៣ ថ្នាក់ ដោយថ្នាក់ទី១មានផ្លូវថ្មើរជើងដើរកំសាន្តក្នុងសួន ផ្លូវជិះកង់ និងរត់ហាត់ប្រាណ សួនបៃតង់ សួនកំសាន្តកុមារ កន្លែងហាត់ប្រាណសំរាប់មនុស្សចាស់ កន្លែងអង្គុយលំហែតាមសួន អាហារដ្ឋាន (Food Court) អំពូលភ្លើងបំភ្លឺផ្លូវ និង បំភ្លឺតាមសួនចំណតរថយន្តក្រុង ចំណតរថយន្ត និង ចំណតម៉ូត។

ចំណែកឯថ្នាក់ទី២ មានជម្រាលសម្រាប់ជនពិការ ផ្លូវដើរកំសាន្តថ្មើរជើង អគារហាងកាហ្វេ រួមជាមួយបន្ទប់ទឹកសាធារណៈ សួនស្មៅ និង រុក្ខជាតិតូចៗ ជណ្តើរ រង្គសាលសម្រាប់អង្គុយលេង ឆ័ត្រដែក ដែលមានទម្រង់ដូចផ្សិត និង មានកន្លែងអង្គុយជ្រកពីក្រោម មានអំពូលភ្លើងបំភ្លឺតាមសួន។

រីឯថ្នាក់ទី៣ មានរៀបចំជា ជម្រាលសម្រាប់មនុស្សចាស់ និង ជនពិការ ផ្លូវដើរកំសាន្តថ្មើរជើង សួនរុក្ខជាតិតូចៗ រួមជាមួយកន្លែងអង្គុយលំហែមាត់ទឹក ជាមួយ បង្កាន់ដៃបេតុង និង ដែក ហើយមានបំពាក់អំពូលភ្លើងសូឡាបំភ្លឺតាមបង្កាន់ដៃច្រាំងស្ទឹង៕

ដោយៈ គង់ សូរិយា

    ភ្នំពេញៈ មន្រ្តីជាន់ខ្ពស់ក្រសួងសាធារណការ និងដឹកជញ្ជូនបានបើកកិច្ចប្រជុំដំបូង ជាមួយក្រុមហ៊ុនទីប្រឹក្សាបច្ចេកទេសជប៉ុន លើការរៀបចំគម្រោងអភិវឌ្ឍន៍ផែនការមេ ដើម្បីប្រែក្លាយកំពង់ផែក្រុងព្រះសីហនុ ទៅជាកំពង់ផែ និងមជ្ឈមណ្ឌលឡូជីស្ទីកថ្នាក់តំបន់។

ព័ត៌មាននេះត្រូវបានលើកឡើងកាលពីថ្ងៃទី៦ មករា ឆ្នាំ២០២៦ ក្នុងកិច្ចប្រជុំមួយ ក្រោមអធិបតីភាពលោកជំទាវ កុយ សុដានី រដ្ឋលេខាធិការប្រចាំការ ក្រសួងសាធារណការ និងដឹកជញ្ជូន ដែលបានធ្វើតាមរយៈវីដេអូពីចម្ងាយ លើការរៀបចំគម្រោងអភិវឌ្ឍន៍ផែនការមេ ដើម្បីប្រែក្លាយកំពង់ផែក្រុងព្រះសីហនុ ទៅជាកំពង់ផែ និងមជ្ឈមណ្ឌ​លឡូជីស្ទីកថ្នាក់តំបន់ ជាមួយក្រុមហ៊ុនទីប្រឹក្សាបច្ចេកទេសជប៉ុន និងក្រុមជំនាញការទីភ្នាក់ងារ សហប្រតិបត្តិការអន្តរជាតិជប៉ុន (JICA)​ដឹកនាំដោយលោកស្រី មីអ៊ូរ៉ា យូស៊ីកូ តំណាងជាន់ខ្ពស់ នៃទីភ្នាក់ងារ JICA ប្រចាំកម្ពុជា ដោយមានការចូលរួមពីថ្នាក់ដឹកនាំក្រសួង តំណាងកំពង់ផែស្វយ័តក្រុងព្រះសីហនុ តំណាងស្ថានទូតជប៉ុនប្រចាំកម្ពុជា និងមន្ត្រីជំនាញបច្ចេកទេសពាក់ព័ន្ធជាច្រើនរូប។

កិច្ចប្រជុំនេះរៀបចំឡើងក្នុងគោលបំណង ដើម្បីណែនាំសមាសភាពក្រុមការងារគម្រោងរវាងភាគីកម្ពុជា និងភាគីជប៉ុន ក្រុមជំនាញការនៃក្រុមហ៊ុនទីប្រឹក្សាបច្ចេកទេសជប៉ុន និងធ្វើបទបង្ហាញអំពីផែនការការងារសិក្សាផែនការលម្អិត លើការរៀបចំអនុវត្តគម្រោងអភិវឌ្ឍន៍ផែនការមេ ដើម្បីប្រែក្លាយកំពង់ផែក្រុងព្រះសីហនុ ទៅជាកំពង់ផែ និងមជ្ឈមណ្ឌលឡូជីស្ទីកថ្នាក់តំបន់។

លោកជំទាវរដ្ឋលេខាធិការប្រចាំការ ក៏បានថ្លែងអំណរគុណចំពោះសមាជិកអង្គប្រជុំ និងភាគីជប៉ុន ដែលបានធ្វើបង្ហាញពីការរៀបចំផែនការការងារគម្រោង ដើម្បីប្រមូលនូវធាតុចូលបន្ថែម និងការចូលរួមសហការគ្នាយ៉ាងយកចិត្តទុកដាក់ និងបន្តកិច្ចសហការគ្នាបន្ថែមទៀត ធ្វើយ៉ាងណាជំរុញឱ្យការសិក្សាផែនការលម្អិត របស់គម្រោងនេះ មានភាពច្បាស់លាស់ គ្រប់ជ្រុងជ្រោយ និងត្រឹមត្រូវតាមលក្ខណៈបច្ចេកទេស សំដៅឱ្យការសិក្សាទទួលបានលទ្ធផលផ្លែផ្កា ស្របតាមផែនការដែលបានគ្រោងទុក។

តាមការគ្រោងទុក ក្រុមជំនាញការនៃក្រុមហ៊ុនទីប្រឹក្សាបច្ចេក​ទេសជប៉ុនខាងលើ នឹងចាប់ផ្តើមបំពេញបេសកកម្មអនុវត្តការងាររបស់ខ្លួននៅកម្ពុជា ចាប់ពីសប្តាហ៍ទី២ ខែមករា ខាងមុខ ហើយកិច្ចប្រជុំលើកទី១ នៃគណៈកម្មាធិការសម្របសម្រួលរួម  (1st JCC Meeting) នៃគម្រោងអភិវឌ្ឍន៍ផែនការមេ ដើម្បីប្រែក្លាយកំពង់ផែក្រុងព្រះសីហនុទៅជាកំពង់ផែ និងមជ្ឈមណ្ឌលឡូជីស្ទីកថ្នាក់តំបន់នេះ នឹងត្រូវរៀបចំឡើង ក្រោមអធិបតីភាពរបស់លោកប៉េង ពោធិ៍នា រដ្ឋមន្រ្តីក្រសួងសាធារណការ និងដឹកជញ្ជូន នាពេលខាងមុននេះ៕

ដោយៈ ម៉ាលីនណា

    ភ្នំពេញៈ ក្រសួងសាធារណការ និងដឹកជញ្ជូនបានឲ្យដឹងថា គិតត្រឹមដើមខែមករា ឆ្នាំ២០២៦នេះ គម្រោងស្ថាបនាស្ពានឆ្លងទន្លេបាសាក់ចាក់អង្រែក្រោម-ព្រែកប្រា សម្រេចបាន៥៤,២០%ហើយ។

ព័ត៌មាននេះត្រូវបានបង្ហើបឲ្យដឹង ដោយលោកសួង ហេង រដ្ឋលេខាធិការ និងជានាយកគម្រោង ចុះពិនិត្យតាមដានការអនុវត្តគម្រោង ដែលគិតត្រឹមដើមខែមករា ឆ្នាំ២០២៦នេះ សម្រេចបាន ៥៤,២០% ហើយ បន្ទាប់ពីសម្ពោធបើកការដ្ឋានសាងសង់ នាថ្ងៃទី១៩ ខែកុម្ភៈ ឆ្នាំ២០២៤ ក្រោមអធិបតីភាពដ៏ខ្ពង់ខ្ពស់របស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា។

វឌ្ឍនភាពគម្រោងគិតត្រឹមដំណាច់ខែធ្នូ ឆ្នាំ២០២៥ សម្រេចបាន ៥៤,២០ % លឿនជាងផែនការ ៣,៤៥% ក្នុងនោះ ៖ ១/ ផ្នែកគ្រឹះស្ពាន សម្រេច  ១០០%។ ២/ រចនា សម្ព័ន្ធ ក្រោមស្ពានសម្រេចបាន៨៩% (ជញ្ជាំងក្បាលស្ពាន ចំនួន៤ សម្រេចបាន២ក្បាលសសរស្ពានចំនួន៤ សម្រេចបាន២។ តួសសរស្ពាន១២បានសាងសង់រួចរាល់   សសរស្ពាន៥២ បានសាងសង់រួចរាល់   និងធ្នឹមភ្ជាប់ក្បាលសសរទទឹងស្ពាន ចំនួន៣៤ សម្រេចបាន៣០ ធ្នឹម )។

៣/ រចនាសម្ព័ន្ធលើស្ពាន  សម្រេចបាន២៩% ( ធ្នឹមT តម្លើង ១៨០ ដើម សម្រេចបាន៨៣   និងធ្នឹមT ចាក់នៅកន្លែង១៨០ដើម សម្រេចបាន៦៦)។ ៤/បណ្តាញ ផ្លូវសម្រេចបាន ៣១,៣០ % (តភ្ជាប់ ប្រវែង៨០៤,៣០ម. សម្រេចបាន២៩%  និងផ្លូវបង្វែរទិស( Ram) ប្រវែង១,៥៤ម. សម្រេចបាន៣៦%)។

ក្រុមការងារបានចុះពិនិត្យស្ថានភាព ជម្រើសតម្រាយផ្លូវសម្រាប់ដឹកជញ្ជូនធ្នឹមT ពីការដ្ឋានចាក់ធ្នឹម ខាងលិចស្ពានទៅខាងកើតស្ពាន ដោយជំរុញឱ្យក្រុមហ៊ុនសាងសង់ សិក្សាគិតគូរឱ្យបានល្អិតល្អន់បន្ថែម លើជម្រើសខ្សែផ្លូវ  និងប្រភេទមធ្យោបាយដឹកជញ្ជូន ដើម្បីជៀសវាងការខូចខាតផ្លូវនិងស្ពាន ដែលមាននៅលើដងផ្លូវ ដែលត្រូវជ្រើសរើសសម្រាប់ការដឹកជញ្ជូនធ្នឹម។

ក្រុមការងារវាយតម្លៃខ្ពស់ ចំពោះក្រុមហ៊ុនសំណង់សៀងហៃ ដែលបានអនុវត្តគម្រោងដែលបញ្ចប់ និងកំពុងដំណើរការបានគោរពតាមបទដ្ឋានបច្ចេកទេស  និងកិច្ចសន្យាបច្ចេកទេសប្រកបដោយគុណភាព និងសោភ័ណភាព៕