ទីផ្សារអចលនទ្រព្យនៅប្រទេសអូស្រ្តាលីបន្តសញ្ញាវិជ្ជមាននៅឆ្នាំនេះ

ដោយៈ ម៉ាណា

អូស្រ្តាលីៈ អ្នកព្យាករណ៍អចលនទ្រព្យសំខាន់ៗ ភាគច្រើនរំពឹងថា នឹងមានការកើនឡើងនៃតម្លៃជាបន្តបន្ទាប់ នៅទូទាំងប្រទេសអូស្ត្រាលីនៅឆ្នាំ 2026 ប៉ុន្តែមិនកើនឡើងយ៉ាងខ្លាំងនោះទេ។

អ្នកជំនាញបានបង្ហាញសុទិដ្ឋិនិយមថា ទីផ្សារអចលនទ្រព្យនៅប្រទេសនេះ នឹងកើនឡើងទូទាំងប្រទេស។

ការព្យាករណ៍ឧស្សាហកម្ម (Domain, SQM Research, Cotality) ព្យាករណ៍ពីការកើនឡើង នៃតម្លៃផ្ទះទូទាំងប្រទេសប្រហែលចន្លោះពី៥ទៅ៨ភាគរយ ក្នុងឆ្នាំ២០២៦ ដែលបន្តការកើនឡើងនៃតម្លៃថ្មីៗនេះ ប៉ុន្តែក្នុងល្បឿនមធ្យមជាងឆ្នាំថ្មីៗនេះ។

ជាមួយគ្នានេះ រដ្ឋដូចជា Adelaide, Brisbane, Perth និងទីផ្សារក្នុងតំបន់មួយចំនួន អាចលើសពីមធ្យមភាគជាតិ។

តម្លៃមធ្យមនៅក្នុងទីក្រុងរដ្ឋធានីជាច្រើន រួមទាំង Sydney និង Melbourne ត្រូវបានគេរំពឹងថា នឹងឈានដល់កម្រិតកំណត់ត្រា ប៉ុន្តែដោយគ្មានការកើនឡើងទ្វេដង នៃការរីកចម្រើនពីមុន។

ទោះជាយ៉ាងណា ទីផ្សារនៅតែតឹងតែង ដោយសារការរឹតបន្តឹងការផ្គត់ផ្គង់ ការធ្វើចំណាកស្រុក និងតម្រូវការខ្ពស់នៅតែបន្តគាំទ្រតម្លៃ។ ដូច្នេះ ជំនួសឱ្យការប៉ាន់ស្មាន “ការកើនឡើង” អ្នកវិភាគពិពណ៌នាវាថា ជាដំណាក់កាលកំណើនជាបន្តបន្ទាប់។

តើហេតុអ្វីបានជាតម្លៃអាចបន្តកើនឡើង គឺការផ្គត់ផ្គង់មានកំណត់ ធៀបនឹងតម្រូវការកើនឡើងខ្ពស់។ ការអនុម័ត និងការបញ្ចប់ថ្មីនៅតែទាបជាងអ្វីដែលត្រូវការ ដើម្បីបន្ធូរបន្ថយសម្ពាធលំនៅដ្ឋាន ដែលដាក់សម្ពាធកើនឡើងលើតម្លៃ។

ជាមួយគ្នានេះ ការកាត់បន្ថយអត្រាការប្រាក់ថ្មីៗនេះ បានធ្វើឱ្យប្រសើរឡើងនូវសមត្ថភាពខ្ចីប្រាក់ ដែលពីមុនបានជំរុញសកម្មភាពរបស់អ្នកទិញរហូតដល់ឆ្នាំ២០២៦៕

ក្រសួងកែសម្រួលសេចក្តីប្រេកាសលើគោលការណ៍ណែនាំគ្រប់គ្រងគម្រោងអភិវឌ្ឍសហគមន៍ទេសចរណ៍ធម្មជាតិ

ដោយៈ ម៉ាលីនណា

ភ្នំពេញៈ រដ្ឋលេខាធិការក្រសួងបរិស្ថាន លោកសាន វណ្ណទី បានដឹកនាំកិច្ចប្រជុំ ដើម្បីពិនិត្យ និងកែសម្រួល លើសេចក្តីព្រាងប្រកាសស្តីពី “ការដាក់ឱ្យអនុវត្តគោលការណ៍ណែនាំបច្ចេកទេស សម្រាប់គ្រប់គ្រងគម្រោងអភិវឌ្ឍសហគមន៍ទេសចរណ៍ធម្មជាតិ”។

កិច្ចប្រជុំនេះ មានការចូលរួម ពីថ្នាក់ដឹកនាំ និងតំណាង អគ្គនាយកដ្ឋានជំនាញ និងមន្រ្តីបច្ចកទេស នៃអគ្គនាយកដ្ឋានសហគមន៍មូលដ្ឋានសរុបចំនួន៥២រូប។

គោលបំណងនៃកិច្ចប្រជុំនេះ គឺដើម្បីពិនិត្យ និងផ្តល់មតិយោបល់បច្ចេកទេសជាធាតុបន្ថែម ឱ្យបានគ្រប់ជ្រុងជ្រោយ ធានាថាគោលការណ៍ណែនាំបច្ចេកទេស នេះនឹងផ្តល់ផលប្រយោជន៍ ដោយផ្ទាល់ដល់សហគមន៍តំបន់ការពារធម្មជាតិ ក្នុងភាពជាម្ចាស់លើការគ្រប់គ្រងអាជីវកម្ម របស់ខ្លួន ព្រមទាំងចូលរួម ក្នុងការលើកម្ពស់ជីវភាពសហគមន៍មូលដ្ឋាន និងការអភិរក្សធន ធានធម្មជាតិប្រកបដោយចីរភាព៕

រោងចក្រផលិតសំបកកង់រថយន្តតម្លៃ២០០លានដុល្លារចាប់ផ្ដើមបើកដំណើរការនៅក្រុងបាវិត

(ស្វាយរៀង)៖ រោងចក្រផលិតសំបកកង់រថយន្តថ្មីមួយទៀតនៅកម្ពុជា ត្រូវបានសម្ពោធដាក់ឱ្យដំណើរការជាផ្លូវការនាព្រឹកថ្ងៃចន្ទ ទី១២ ខែមករា ឆ្នាំ២០២៦នេះ បន្ទាប់ពីដំណើរការសាងសង់រយៈពេលមួយឆ្នាំ។ រោងចក្រផលិតសំកង់រថយន្តដែលសម្ពោធនាព្រឹកថ្ងៃនេះ វិនិយោគដោយក្រុមហ៊ុន វ៉ាន់លី ថាយអឺរ របស់ចិន ជាមួយទុនដំណាក់កាលដំបូងជិត ២០០លានដុល្លារ និងផ្តល់ការងារដល់ពលរដ្ឋកម្ពុជាជាង ៦០០កន្លែង។

រោងចក្រផលិតសំបកកង់រថយន្តទី៧នៅកម្ពុជានេះ មានទីតាំងស្ថិតក្នុងតំបន់សេដ្ឋកិច្ចពិសេសស៊ីនបាវិត ក្នុងក្រុងបាវិត ខេត្ត ស្វាយរៀង លាតសន្ធឹងលើផ្ទៃដីប្រមាណ ៣២ហិកតា។ ពិធីសម្ពោធនូវសមិទ្ធផលបង្ហាញពីវឌ្ឍនភាពដ៏ល្អប្រសើរលើការវិនិយោគនៅកម្ពុជានេះ ត្រូវបានប្រព្រឹត្តទៅក្រោមអធិបតីភាព លោកឧបនាយករដ្ឋមន្ត្រី ស៊ុន ចាន់ថុល អនុប្រធានទី១ ក្រុមប្រឹក្សាអភិវឌ្ឍន៍កម្ពុជា ព្រមទាំងមានការអញ្ជើញចូលរួមពីសំណាក់លោក ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ លោក ស សុដានី អភិបាលរងខេត្តស្វាយរៀង ថ្នាក់ដឹកនាំក្រុមហ៊ុន ថ្នាក់ដឹកនាំ មន្ត្រីរាជការក្រុមប្រឹក្សាអភិវឌ្ឍន៍កម្ពុជា ថ្នាក់ដឹកនាំ មន្ត្រីរាជការខេត្តស្វាយរៀង ភ្ញៀវកិត្តិយស និងបុគ្គលិក កម្មករ និយោជិតរបស់ក្រុមហ៊ុនជាច្រើនរូបទៀត។

ការកៀរវិនយោគបរទេសចូលមកដាក់ទុនវិនិយោគនៅកម្ពុជា គឺជាគោលដៅធំបំផុតរបស់រាជរដ្ឋាភិបាលកម្ពុជាទាំងក្នុងនីតិកាលកន្លងទៅដឹកនាំដោយសម្តេចតេជោ ហ៊ុន សែន និងក្នុងនីតិកាល នីតិកាលទី៧ ដឹកនាំដោយសម្តេចមហាបវរធិបតី ហ៊ុន ម៉ាណែត។ ការវិនិយោគរបស់ក្រុមហ៊ុនវ៉ាន់លី ថាយអឺរ ជាផ្លែផ្កាកើតចេញពីគោលនយោបាយទាក់ទាញការវិនិយោគរបស់រាជរដ្ឋាភិបាល ជាពិសេសដំណើរគោះទ្វារវិនិយោគរបស់លោកឧបនាយករដ្ឋមន្ត្រី ស៊ុន ចាន់ថុល កាលពីខែតុលា ឆ្នាំ២០២៣។ ក្នុងបេសកកម្មនោះ លោក ស៊ុន ចាន់ថុល បានជួបជាមួយលោក JING GUANGJUN ប្រធានក្រុមប្រឹក្សាភិបាល ក្រុមហ៊ុន Guangzhou Industrial Investment Holding Group និងបានទស្សនកិច្ចដោយផ្ទាល់នៅរោងចក្រ វ៉ាន់លី ថាយអឺរ នៅទីក្រុងក្វាងចូវ ប្រទេសចិន។ រយៈពេលមួយឆ្នាំក្រោយដំណើរបេសកកម្មនោះ ក្រុមហ៊ុនចាប់ផ្តើមវិនយោគ និងសាងសង់រោងចក្រ ហើយមួយឆ្នាំបន្ទាប់រោងចក្រចាប់ផ្តើមដំណើរការ។ នេះជាដំណើរការវិនិយោគដ៏លឿនរហ័ស និងបង្ហាញឱ្យឃើញពីជំនឿចិត្តដ៏មុតមាំរបស់ក្រុមហ៊ុនសម្រាប់ការធ្វើអាជីវកម្មនៅកម្ពុជា។

លោកឧបនាយករដ្ឋមន្ត្រី ស៊ុន ចាន់ថុល បានសម្តែងការសាទរចំពោះការសម្ពោធជាផ្លូវការនូវរោងចក្រ និងបានចាត់ទុកការវិនិយោគរបស់ក្រុមហ៊ុន គឺជាការជឿទុកចិត្តចំពោះបរិយាកាសវិនិយោគ ស្ថានភាពទីផ្សារ និងស្ថេរភាពនយោបាយនៅកម្ពុជា។

ក្រុមហ៊ុនវ៉ាន់លី ថាយអឺរ ជាក្រុមហ៊ុនដ៏ធំមួយរបស់ចិន ផលិតសំបកកង់ម៉ាកល្បីៗដូចជា WANLI, MILEVER, SUNNY, APTANY, DIAMOND… សម្រាប់នាំចេញទៅកាន់ទីផ្សារជ្រើនលើពិភពលោក។ ការវិនិយោគនៅកម្ពុជា គឺជារោងចក្រក្រៅប្រទេសលើកដំបូងរបស់ក្រុមហ៊ុន។ ច្រវាក់ផលិតកម្មរបស់ក្រុមហ៊ុនបំពាក់ដោយប្រព័ន្ធស្វ័យប្រវត្តិកម្ម និងបច្ចេកវិទ្យាខ្ពស់។

លោក JING GUANGJUN បានឱ្យដឹងថា រោងចក្រនៅកម្ពុជា ដែលសម្ពោធដាក់ឱ្យដំណើរការនៅព្រឹកថ្ងៃនេះ មានសមត្ថភាពផលិតសំបកកង់បានប្រមាណ ៦លានសំបកក្នុងមួយឆ្នាំសម្រាប់ដំណាក់កាលដំបូង ហើយបានរហូតដល់១២លានសំបក នៅពេលរោងចក្រដំណើរការបានពេញលេញនៅចុងឆ្នាំ២០២៦នេះ។

លោក JING GUANGJUN បានប្រកាសថា នឹងប្រឹងប្រែងអភិវឌ្ឍខ្សែច្រវាក់ផលិតកម្មនៅកម្ពុជា ហើយមូលដ្ឋាននៅកម្ពុជា ដើម្បីផលិត និងចែកចាយនៅតំបន់អាស៊ាន ក៏ដូចជាលើពិភពលោក។

ការវិនិយោគរបស់បរទេសជាពរជ័យដ៏វិសេសវិសាលសម្រាប់សេដ្ឋកិច្ចកម្ពុជា ផ្តល់ឱកាសការងារ លើកកម្ពស់ជីវភាពប្រជាពលរដ្ឋ និងផ្តល់ជំនាញផងដែរ។ លោកឧបនាយករដ្ឋមន្ត្រី ស៊ុន ចាន់ថុល បានអំពាវនាវដល់អាជ្ញាធរពាក់ព័ន្ធ ជាពិសេសរដ្ឋបាលខេត្តស្វាយរៀង យកចិត្តទុកដាក់ថែទាំឱ្យបានល្អចំពោះការវិនិយោគរបស់ក្រុមហ៊ុន។

លោក ស៊ុន ចាន់ថុល ក៏បានប្រកាសប្តេជ្ញាជួយជ្រោមជ្រែងក្រុមហ៊ុនឱ្យទទួលបានការរីកចម្រើនលើការវិនិយោគរបស់ពួកគេនៅកម្ពុជា។

សូមបញ្ជាក់ថា កម្ពុជា ទើបនឹងមានការវិនិយោគផលិតសំបកកង់រថយន្តសម្រាប់នាំចេញក្នុងរយៈពេលប្រមាណ៥ឆ្នាំចុងក្រោយនេះ។ បច្ចុប្បន្នកម្ពុជា មានរោងចក្រចំនួន៧ កំពុងផលិតសំបកកង់រថយន្តនាំទៅកាន់ទីផ្សារអន្តរជាតិ។ ឆ្នាំ២០២៥ កម្ពុជា ផលិត និងនាំចេញបានសំបកកង់រថយន្តចំនួន ៣១លានសំបក ស្មើនឹងទឹកប្រាក់ប្រមាណ ១,៣៨៥លានដុល្លារអាមេរិក៕

រដ្ឋបាលខេត្តសៀមរាបជម្រុញឲ្យអាជ្ញាធរមូលដ្ឋានយកចិត្តទុកដាក់លើអាងទន្លេ ស្ទឹង ព្រែក អូរ ប្រឡាយ បឹងបួរ និងអាងទឹក

ដោយៈ ចំណាន

សៀមរាបៈ អភិបាលរងខេត្តសៀមរាប លោកអ៊ឹង គឹមលាង បានរៀបចំកិច្ចប្រជុំគណៈកម្មាធិការ គ្រប់គ្រងអាងទន្លេ ស្ទឹង ព្រែក អូរ ប្រឡាយ បឹងបួរ និងអាងទឹក។

កិច្ចប្រជុំនេះ មានសមាសភាពចូលរួមពីមន្ទីរធនធានទឹក និងឧតុនិយមខេត្ត តំណាងអាជ្ញាធរជាតិអប្សរា ទីចាត់ការអន្តរវិស័យសាលាខេត្ត តំណាងរដ្ឋបាលក្រុង ស្រុកទាំង១៣ មន្ទីរកសិកម្ម រុក្ខាប្រមាញ់ និងនេសាទខេត្ត លោក នាយខណ្ឌរដ្ឋបាលជលផលសៀមរាប មន្ទីររ៉ែ និងថាមពលខេត្ត មន្ទីរសាធារណការ និងដឹកជញ្ជូនខេត្ត មន្ទីរបរិស្ថានខេត្ត មន្ទីរជំនាញពាក់ព័ន្ធ និងលោក លោកស្រីមន្ត្រីពាក់ព័ន្ធ សរុបអ្នកចូលរួមប្រមាណ៨០នាក់។

លោកអ៊ឹង គឹមលាង កិច្ចប្រជុំនាពេលនេះ យើងនឹងបញ្ជាក់អំពីគោលបំណងនៃកិច្ចប្រជុំ គឺដើម្បីពិនិត្យលើការស្រង់ទិន្នន័យអាងទន្លេ ស្ទឹង ព្រែក អូរ ប្រឡាយ បឹងបួរ និងអាងទឹក ទាំងអស់នៅតាមបណ្តាក្រុង ស្រុក ដើម្បីលេខាធិការដ្ឋាននៃគណៈកម្មាធិការគ្រប់គ្រងអាងទន្លេ ស្ទឹង ព្រែក អូរ ប្រឡាយ បឹងបួរ និងអាងទឹក ខេត្តសៀមរាប បូកសរុប និងចងក្រងជាទិន្នន័យ ងាយស្រួលលើការគ្រប់គ្រងឱ្យមានប្រសិទ្ធភាព។

ម្យ៉ាងទៀតក៏ពិនិត្យលើការស្នើសុំជីកស្តារអាង ប្រឡាយ អូរសាធារណៈ នៅតាមបណ្តាក្រុង ស្រុក។

លោក អភិបាលងខេត្ត ក៏បានណែនាំដល់អាជ្ញាធរមូលដ្ឋាន ឬសហគមន៍មូលដ្ឋាន ដែលមានបំណងជីកស្តារអាងទន្លេ ស្ទឹង ព្រែក អូរ ប្រឡាយ បឹងបួរ និងអាងទឹកសាធារណៈក្នុងភូមិសាស្ត្រ ខេត្តសៀមរាប ត្រូវគិតគូរពីកត្តាដូចជា ទី១ ស្តារដើម្បីស្តុកទឹកសម្រាប់ប្រើប្រាស់ប្រចាំថ្ងៃ និងវិស័យកសិកម្ម ទី២ ស្តារដើម្បីស្តុកទឹកសម្រាប់អភិរក្សពូជត្រី។

ទី៣ ស្តារដើម្បីស្តុកទឹក សម្រាប់បង្កើតតំបន់អេកូទេសចរណ៍ ទី៤ ស្តារដើម្បីស្តុកទឹកសម្រាប់កាត់បន្ថយ ការប្រែប្រួលអាកាសធាតុ និងទី៥ ទប់ស្កាត់ការទន្ទ្រានកាន់កាប់ ជាកម្មសិទ្ធិផ្ទាល់ខ្លួនរបស់ជនមួយចំនួនជាដើម៕

តើលោក អ្នកយល់ឃើញបែបណាលើស្ថានភាពវិស័យ អចលនទ្រព្យកម្ពុជាឆ្នាំ២០២៦?

ដោយៈ ចំណាន

ភ្នំពេញៈ មនុស្សភាគច្រើនប្រតិកម្ម នៅពេលនិយាយពីអចលនទ្រព្យកម្ពុជានឹងមានភាពល្អប្រសើរនៅឆ្នាំ២០២៦ ផ្ទុយទៅវិញពួកគេទុទិដ្ឋិយមលើទីផ្សារសម្រាប់បវិស័យនេះ។

បញ្ហានេះ បានធ្វើឲ្យអ្នកជំនាញនានា បានរក្សាភាពស្ងៀមស្ងាត់ និងលើកឡើងដោយប្រុងប្រយ័ត្ន មុនពេលផ្តល់បទសម្ភាសន៍ដល់អ្នកសារព័ត៌មាននានា។

ទោះជាយ៉ាងណា ទីផ្សារអចលនទ្រព្យរបស់ប្រទេសកម្ពុជាកំពុងមានស្ថិរភាពបន្ទាប់ពីការផ្គត់ផ្គង់លើស និងការកែតម្រូវអស់រយៈពេលជាច្រើនឆ្នាំ ដោយកំណើនតម្លៃកម្រិតមធ្យម ត្រូវបានគេរំពឹងទុករហូតដល់ឆ្នាំ ២០២៦។

ទីផ្សារលំនៅដ្ឋាន ជាពិសេសនៅក្នុងផ្នែកលំនៅដ្ឋាន ដែលមានតម្លៃសមរម្យ និងកម្រិតមធ្យមកំពុងងើបឡើងវិញខ្លាំង ជាងផ្នែកលំនៅដ្ឋានប្រណីត។

នៅក្នុងបរិបទបរិបទសេដ្ឋកិច្ច ដែលកម្ពុជារំពឹងថា នឹងមានកំណើនផលិតផលក្នុងស្រុកសរុបប្រហែល៥% វាគាំទ្រដល់តម្រូវការលំនៅដ្ឋាន និងការអភិវឌ្ឍទីក្រុង។

១. អចលនទ្រព្យលំនៅដ្ឋាន

លំនៅដ្ឋានដែលមានតម្លៃសមរម្យ និងកម្រិតមធ្យម នឹងមានតម្រូវការខ្លាំងបំផុត ពីអ្នកស្រុកដែលមានប្រាក់ចំណូលមធ្យម និងអ្នកប្រើប្រាស់ចុងក្រោយ។

តម្លៃត្រូវបានព្យាករណ៍ថា នឹងកើនឡើងកម្រិតមធ្យម (ប្រហែល ៥-១០% ជារៀងរាល់ឆ្នាំនៅក្នុងទីផ្សារសំខាន់ៗនៅភ្នំពេញ)។

ផលចំណេញពីការជួល អាចបន្តមានសុខភាពល្អប្រហែល ដែលមានអត្រាចន្លោះពី៦ ទៅ៨ភាគរយនៅក្នុងទីក្រុងធំៗដូចជាភ្នំពេញ។

ផ្នែកទាំងនេះងាយស្រួលលក់ ឬជួលបំផុត ព្រោះវាត្រូវគ្នានឹងអំណាចទិញពិតប្រាកដ និងតម្រូវការរបៀបរស់នៅរបស់អ្នកស្រុក និងជនបរទេស។

២. លំនៅដ្ឋានប្រណីត និងខុនដូលំដាប់ខ្ពស់

មិនមែនជាកំណើនឈានមុខគេនៅឆ្នាំ២០២៦ ឱកាសតម្លៃមាន ប៉ុន្តែមានហានិភ័យខ្ពស់ និងរយៈពេលកាន់កាប់យូរជាង។

តម្លៃអចលនទ្រព្យនៅក្រុងភ្នំពេញ មានស្ថេរភាពឬកើនឡើងបន្តិចជាទូទៅមិនផ្លាស់ប្តូរជារៀងរាល់ឆ្នាំ ជាមួយនឹងកំណើនមធ្យមពី២ ទៅ៥ ឬច្រើនជាងនេះ អាស្រ័យលើទីផ្សាររង។

ខុនដូកម្រិតមធ្យម និងផ្ទះនៅតាមបុរីនានា បុរីបង្ហាញពីការកើនឡើងល្អជាងអង្គភាពខុនដូកម្រិតខ្ពស់។

ស្រុកដែលកំពុងរីកចម្រើន (ឧទាហរណ៍ តំបន់ខាងក្រៅមួយចំនួន) ផ្តល់ជូនតម្លៃកាន់តែច្រើនក្នុងមួយចំណុចតម្លៃ និងតម្រូវការជួល។

៣. អចលនទ្រព្យឧស្សាហកម្ម និងពាណិជ្ជកម្ម

ផ្នែកមួយដែលមានដំណើរការខ្លាំងបំផុត ជំរុញដោយការផលិត ភស្តុភារកម្ម និងតំបន់សេដ្ឋកិច្ចពិសេស (SEZs)។ ឃ្លាំង និងសម្ភារៈដឹកជញ្ជូនមានភាពទាក់ទាញ សម្រាប់អ្នកជួលរយៈពេលវែង ដោយសារលំហូរពាណិជ្ជកម្មក្នុងតំបន់កាន់តែរឹងមាំ៕

ក្រសួងទេសចរណ៍រៀបចំចលនាប្រលងប្រណាំងផ្ទៃក្នុង ដែលមិនធ្លាប់មានពីមុនមក

ដោយៈ ម៉ាលីនណា

ភ្នំពេញៈ រដ្ឋមន្រ្តីក្រសួងទេសចរណ៍ លោកហួត ហាក់បានថ្លែងថា ក្រសួងនឹងរៀបចំចលនាប្រលងប្រណាំង រវាងមន្ទីរទេសចរណ៍ទាំង២៥រាជធានី ខេត្ត រវាងអគ្គនាយកដ្ឋាន និងអគ្គនាយកដ្ឋាន និងនាយកដ្ឋាននិមួយៗផងដែរ។

លោកបានជម្រុញឲ្យ មន្ទីរទេសចរណ៍រាជធានី ខេត្តទាំង២៥ ប្តេជ្ញាចូលរួមជំរុញផ្សព្វផ្សាយ និងរៀបចំព្រឹត្តិការណ៍ទេសចរណ៍ក្នុងឆ្នាំ២០២៦ ឱ្យកាន់តែផុលផុស ដើម្បីទាក់ទាញភ្ញៀវទេសចរជាតិ និងអន្តរជាតិ ជាពិសេសការបង្កើនសមត្ថភាព និងជំនាញវិជ្ជាជីវៈរបស់មន្ត្រី ដើម្បីលើកកម្ពស់គុណភាពសេវាទេសចរណ៍ និងការអភិវឌ្ឍវិស័យទេសចរណ៍ ឱ្យកាន់តែមានប្រសិទ្ធភាព។

នេះជាលើកទី១ ហើយដែលលោកហួត ហាក់ រដ្ឋមន្ត្រីក្រសួងទេសចរណ៍ បានអញ្ជើញដឹកនាំកិច្ចប្រជុំ ជាមួយមន្ទីរទេសចរណ៍រាជធានី ខេត្តទាំង២៥ តាមរយៈប្រព័ន្ធបញ្ជូនរូបភាព និងសម្លេង (Zoom Meeting) ដើម្បីតាមដាន វាយតម្លៃលទ្ធផលការងារ និងពិនិត្យវឌ្ឍនភាពការងារដែលបានអនុវត្តកន្លងមក និងបានដាក់ចេញទិសដៅការងារបន្តឆ្នាំ២០២៦ របស់មន្ទីរទេសចរណ៍រាជធានី ខេត្តទាំង២៥ រួមទាំងដំណោះស្រាយបញ្ហាប្រឈម ទាក់ទងទៅនឹងបញ្ហាសណ្តាប់ធ្នាប់ សុវត្ថិភាព អនាម័យ ការគ្រប់គ្រង និងអាជីវកម្មទេសចរណ៍។

ថ្លែងក្នុងកិច្ចប្រជុំនេះ លោករដ្ឋមន្រ្តីមានប្រសាសន៍ថា ការរៀបចំសន្និបាតបូកសរុប លទ្ធផលការងារវិស័យទេសចរណ៍ឆ្នាំ២០២៥ និង លើកទិសដៅការងារឆ្នាំ២០២៦ ដែលរៀបចំពីថ្ងៃទី៣ ដល់ទី៤ ខែកុម្ភៈ ឆ្នាំ២០២៦ ខាងមុខនេះ ក្រសួងនឹងដាក់ចេញចលនាប្រឡងប្រណាំង រវាងមន្ទីរ រវាងអគ្គនាយកដ្ឋាន និងរវាងនាយកដ្ឋានក្រោមឱវាទរបស់ក្រសួងទេសចរណ៍ផងដែរ។

លោកហួត ហាក់បានបន្តថា មន្ទីរទេសចរណ៍រាជធានី ខេត្តទាំងអស់ត្រូវចូលរួមលើកកម្ពស់ និងអភិវឌ្ឍគោលដៅទេសចរណ៍នៅតាមមូលដ្ឋានរបស់ខ្លួន តាមរយៈការកែលម្អតំបន់ទេសចរណ៍ បរិស្ថាន សេវាកម្ម និងហេដ្ឋារចនាសម្ព័ន្ធ ពោលគឺអភិវឌ្ឍគោលដៅទេសចរណ៍ថ្មីៗ ដើម្បីបង្កើនភាពទាក់ទាញ និងអត្តសញ្ញាណទេសចរណ៍នៅតាមមូលដ្ឋានរៀងខ្លួនៗ ប្រកបទៅដោយចីរភាព និងការប្រកួតប្រជែង។

ជាមួយគ្នានេះ លោករដ្ឋមន្ត្រីបានគូសបញ្ជាក់ថា គ្រប់មន្ទីរទេសចរណ៍រាជធានី ខេត្តទាំងអស់ ត្រូវតែជំរុញ និងផ្សព្វផ្សាយសក្តានុពលទេសចរណ៍នៅតាមបណ្តាញសង្គម និងតាមមធ្យោបាយផ្សេងៗឱ្យកាន់តែសកម្មបន្ថែមទៀត ជាពិសេសគឺការរៀបចំព្រឹត្តិការណ៍ទេសចរណ៍ថ្មីៗ ប្លែក និងទាក់ទាញដល់ភ្ញៀវទេសចរជាតិ និងអន្តរជាតិឱ្យអញ្ជើញចូលទស្សនាខេត្តនីមួយៗកាន់តែច្រើនកុះករ។

ឆ្លៀតក្នុងឱកាសនោះ លោករដ្ឋមន្ត្រី ក៏បានគូសបញ្ជាក់បន្ថែមថា មន្ទីរទេសចរណ៍រាជធានី ខេត្តទាំង២៥ត្រូវពង្រឹង និងបង្កើនសមត្ថភាពមន្ត្រី ដែលជាចំណុចសំខាន់ ដើម្បីលើកកម្ពស់គុណភាពសេវាទេសចរណ៍ និងការអភិវឌ្ឍវិស័យទេសចរណ៍ ឱ្យមានប្រសិទ្ធភាព និងចីរភាព តាមរយៈការបណ្តុះបណ្តាលជំនាញវិជ្ជាជីវៈ ការលើកកម្ពស់ជំនាញភាសា ការអភិវឌ្ឍជំនាញឌីជីថល ការផ្លាស់ប្តូរបទពិសោធន៍ និងការវាយតម្លៃ និងលើកទឹកចិត្ត ពោលគឺវាយតម្លៃសមត្ថភាព លទ្ធផលការងារ លើកទឹកចិត្ត និងផ្តល់រង្វាន់ចំពោះមន្ត្រីមានសមត្ថភាពល្អ និងសកម្ម៕

កម្ពុជាបានពង្រីកការធ្វើពិពិធកម្មទំនិញនាំចេញកាន់តែប្រសើរឡើង

ដោយៈ ម៉ាណា

ភ្នំពេញៈ ឧបនាយករដ្ឋមន្ត្រី ស៊ុន ចាន់ថុល អនុប្រធានទី១ ក្រុមប្រឹក្សាអភិវឌ្ឍន៍កម្ពុជា បានលើកឡើងថា កម្ពុជាមិនអាចពឹងផ្អែក តែលើវិស័យកាត់ដេរ-ស្បែកជើង និងសម្ភារធ្វើដំណើរនោះទេ បើចង់ក្លាយជាប្រទេសចំណូលកម្រិតខ្ពស់ នៅឆ្នាំ២០៥០។

ការលើកឡើងបែបនេះ ធ្វើឡើងក្នុងឱកាសដែល ឧបនាយករដ្ឋមន្ត្រី ស៊ុន ចាន់ថុល តំណាងសម្តេចបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា អញ្ជើញជាអធិបតីភាព ក្នុងពិធីបិទសន្និបាត បូកសរុបការងារពាណិជ្ជកម្ម ឆ្នាំ២០២៥ និងទិសដៅការងារពាណិជ្ជកម្ម ឆ្នាំ២០២៦ នាល្ងាចថ្ងៃទី៩ ខែមករា ឆ្នាំ២០២៥។

ឧបនាយករដ្ឋមន្ត្រី ស៊ុន ចាន់ថុល បានបញ្ជាក់ថា បើយើងចង់ឲ្យប្រទេសយើង ក្លាយទៅជាប្រទេស ដែលមានចំណូលកម្រិតខ្ពស់ នៅឆ្នាំ២០៥០ យើងមិនអាចពឹងផ្អែក លើវិស័យកាត់ដេរ ស្បែកជើង សម្ភារធ្វើដំណើរនោះទេ គឺត្រូវមានវិស័យគ្រឿងបង្គុំអេឡិចត្រូនិក កង់ សំបកយានយន្ដ និងគ្រឿងសង្ហារិម -ល”។

លោកឧបនាយករដ្ឋមន្ត្រី ស៊ុន ចាន់ថុល បានលើកឡើងថា កម្ពុជាសម្រេចបានជោគជ័យ ក្នុងការធ្វើពិពិធកម្មមុខទំនិញ ដោយពង្រីកការផលិត និងការនាំចេញកសិផលកែច្នៃ ឧស្សាហកម្មធុនស្រាល និងអេឡិចត្រូនិក ហើយបន្ថយការពឹងផ្អែកលើផលិតផលកាត់ដេរ និងវត្ថុធាតុដើមមិនទាន់កែច្នៃ។

លោកបន្ថែមថា ជាក់ស្តែងភាគរយ នៃការនាំចេញផលិតផលកាត់ដេរសម្លៀកបំពាក់ ស្បែកជើង និងសម្ភារធ្វើដំណើរ (GFT) បានថយចុះពី៩១% ក្នុងឆ្នាំ២០០០មក នៅប្រមាណ៣៧.៨៩% ក្នុងឆ្នាំ២០២៥។

ខណៈទំនិញកម្មន្តសាលមិនមែនកាត់ដេរ ដូចជា គ្រឿងបង្គុំអេឡិចត្រូនិក កង់ សំបកកង់យានយន្ត គ្រឿងសង្ហារិម រួមទាំងកសិផលកែច្នៃ បានកើនឡើងពី៩% ទៅ ៦២.១១% ក្នុងរយៈពេលដូចគ្នា។ នេះជាបញ្ជាក់បន្ថែម របស់ឧបនាយករដ្ឋមន្ត្រី ស៊ុន ចាន់ថុល៕

រដ្ឋមន្ត្រីពាណិជ្ជកម្ម៖ ផលិតផលខ្មែរ ត្រូវបាននាំយកទៅដាក់លក់នៅក្នុងផ្សារទំនើបធំៗ និងមីនីម៉ាតល្បីៗជាង ២ម៉ឺន២ពាន់ទីតាំង នៅតាមបណ្តាប្រទេសជាច្រើន នៅលើពិភពលោក

(ភ្នំពេញ)៖ លោកស្រី ចម និម្មល រដ្ឋមន្រ្តីក្រសួងពាណិជ្ជកម្ម បានឱ្យដឹងថា ផលិតផលខ្មែរបានបង្ហាញវត្តមានជាបន្តបន្ទាប់នៅលើថ្នើក្នុងផ្សារទំនើបធំៗនិងផ្សារមីនីម៉ាតល្បីៗជាច្រើន នៅតាមបណ្តាប្រទេសនានា ដែលគិតមកទល់ពេលនេះ ផលិតផលខ្មែរជាច្រើនប្រភេទត្រូវបាននាំចេញយកទៅដាក់លក់នៅក្នុងផ្សារទំនើបនិងមីនីម៉ាតល្បីៗជាង២ម៉ឺន២ពាន់ទីតាំង ក្នុងប្រទេសជប៉ុន កូរ៉េ ចិន ម៉ាឡេស៊ី អង់គ្លេសអាមេរិក និងសហភាពអឺរ៉ុប។

លោកស្រី ចម និម្មលគូសបញ្ជាក់បែបនេះ ធ្វើឡើងក្នុងពិធីបិទសន្និបាទបូកសរុបលទ្ធផលការងារពាណិជ្ជកម្មឆ្នាំ២០២៥ និងលើកទិសដៅការងារពាណិជ្ជកម្ម ឆ្នាំ២០២៦ នៅទីស្តីការក្រសួងពាណិជ្ជកម្ម នារសៀលថ្ងៃទី៩ ខែមករា ឆ្នាំ២០២៦នេះ។

លោកស្រីបានគូសបញ្ជាក់យ៉ាងដូច្នេះថា «ក្រុមការងារនាំចេញបានសម្របសម្រួលឱ្យមានប្រតិបត្តិការទិញលក់ និងការចុះអនុស្សារណៈនៃការយោគយល់គ្នាចំនួន៣៦ និងបានជំរុញវត្តមាន ផលិតផលកម្ពុជា ចូលទៅកាន់បណ្តាទីផ្សារទំនើបធំៗ និងផ្សារមីនីម៉ាតល្បីៗជាង២ម៉ឺន២ពាន់ទីតាំងនៅក្នុងប្រទេសជប៉ុន កូរ៉េ ចិន ម៉ាឡេស៊ី អង់គ្លេសអាមេរិក និងសហភាពអឺរ៉ុប»។

បើតាមរដ្ឋមន្រ្តីក្រសួងពាណិជ្ជកម្ម ទីផ្សារម៉ាឡេស៊ីបានបញ្ជាទិញនូវដំណាប់ស្វាយ និងស្វាយចន្ទី, ទីផ្សារជប៉ុនបានបញ្ជាទិញអង្កររំដួល អង្ករនាងខុន និងបាននាំយកគ្រាប់ស្វាយចន្ទីកែច្នៃយកទៅដាក់លក់នៅក្នុងផ្សារ Family mart ចំនួន១៦ ៣២០ទីតាំង។
ចំណែកទីផ្សារអូស្រ្តាលី បាននាំយកគ្រាប់ស្វាយចន្ទី ដំណាប់ស្វាយ ខ្នុរសម្ងួត ចេកសម្ងួត ត្រាវសម្ងួត និងអង្ករសែនក្រអូប ដាក់លក់នៅទីផ្សារទំនើបមួយចំនួន ប្រមាណ៨៥០ទីតាំង។ ស្របពេលទីផ្សារអឺរ៉ុប បាននាំចេញស្វាយសម្ងួត និងគ្រាប់ស្វាយចន្ទី ដាក់លក់នៅទីផ្សារទំនើប (Mart) ជាង៦ពាន់ទីតាំងផងដែរ។

បន្ថែមពីនេះ ក្រសួងពាណិជ្ជកម្ម បានចុះហត្ថលេខាលើMOU នៃការទិញលក់កសិផលកម្ពុជា ក្នុងទឹកប្រាក់ជាង៦០០លានដុល្លារអាមេរិកសម្រាប់នាំចេញទៅកាន់ទីផ្សារចិន រួមមានដំឡូងមីស្ងួត ស្វាយចន្ទី ធុរេន ចេក ពោត ដំណាប់ស្វាយ មៀនស្រស់ និងមៀនក្រៀម។

ក្នុងគោលដៅជំរុញការនាំចេញផលិតផលខ្មែរឱ្យបានកាន់តែច្រើន ក្រសួងពាណិជ្ជកម្ម បានសហការជាមួយអង្គការដៃគូរអភិវឌ្ឍន៍សំខាន់ៗ បង្កើតមជ្ឈមណ្ឌលសេវានាំចេញ ដើម្បីផ្តល់ការគាំទ្រនិងពង្រឹងនូវសមត្ថភាពបន្ថែមដល់វិស័យឯកជនកម្ពុជា តាមរយៈវគ្គបណ្តុះបណ្តាលបង្កើនសមត្ថភាពដល់ក្រុមហ៊ុនដែលមានបំណងក្នុងការនាំចេញ ផ្តល់ព័ត៌មាន ការស្រាវជ្រាវ បង្កើតបណ្តាញទំនាក់ទំនងជាមួយអ្នកទិញទៅតាមទីផ្សារគោលដៅ សំដៅជំរុញការនាំចេញទៅកាន់ទីផ្សារអន្តរជាតិ៕

អារ៉ាប៊ីសាអូឌីតចាប់ផ្តើមបើកចំហទីផ្សារអចលនទ្រព្យទៅកាន់ជនបរទេស ខណៈផ្ទះជាង១១មុឺនយូនីតនឹងប្រគល់ជូននៅឆ្នាំ២០២៦

ដោយ: សហសេវិក
អន្តរជាតិ: ប្រទេសអារ៉ាប៊ីសាអូឌីតបានចាប់ផ្តើមបើកចំហទីផ្សារអចលនទ្រព្យ និងទីផ្សារភាគហ៊ុនរបស់ខ្លួនទៅកាន់ជនបរទេស។នេះជាការបោះជំហានថ្មីចុងក្រោយបំផុតដើម្បីជំរុញលំហូរទុនវិនិយោគចូលទៅក្នុងទីផ្សាររបស់ប្រទេសមជ្ឈិមបូព៌ាមួយនេះ។

ប្រទេសនេះបាននិងកំពុងបន្ធូរបន្ថយការរឹតបន្តឹងមួយចំនួនសម្រាប់ជនបរទេសជាដំណាក់កាល។ យ៉ាងណាមិញ ការផ្គត់ផ្គង់ផ្ទះថ្មីឱ្យបានគ្រប់គ្រាន់ មានសារៈសំខាន់ដើម្បីធានាថា ប្រជាជនអារ៉ាប៊ីសាអូឌីតមិនប្រឈមមុខនឹងកង្វះលទ្ធភាពទិញផ្ទះ នៅពេលតម្លៃផ្ទះហក់ឡើងថ្លៃ ដោយសារតម្រូវការរបស់ជនបរទេស។

ទីផ្សារអចលនទ្រព្យរបស់អារ៉ាប៊ីសាអូឌីតក៏បានទាក់ទាញក្រុមហ៊ុនអចលនទ្រព្យ Trump Organization របស់លោកប្រធានាធិបតីអាមេរិក ដូណាល់ ត្រាំ ដែលកំពុងធ្វើការជាមួយក្រុមហ៊ុនអារ៉ាប៊ីសាអូឌីត ដើម្បីសាងសង់អាផាតមុិនប្រណីតនៅប្រទេសនេះ។

ក្រុមវិនិយោគិនមួយចំនួនមើលឃើញថាទីផ្សារលំនៅឋាននៅអារ៉ាប៊ីសាអូឌីតមានស្ថិរភាពជាងទីក្រុងឌូបៃនៃប្រទេសអេមីរ៉ាត់អារ៉ាប់រួម ដែលមានប្រជាជនភាគច្រើនជាជនបរទេស ហើយជនបរទេសមួយចំនួនបានចាកចេញពីទីក្រុងឌូបៃ បន្ទាប់ពីបាត់បង់ការងារ។

ផ្ទុយទៅវិញ ចំនួនប្រជាជនអារ៉ាប៊ីសាអូឌីតប្រហែល៣៥លាននាក់ ជាមូលដ្ឋានដ៏រឹងមាំសម្រាប់តម្រូវការនាពេលអនាគត។ យោងតាមទិន្នន័យរបស់រដ្ឋាភិបាល បង្ហាញថា ចំនួន៣៤ភាគរយនៃប្រជាជនអារ៉ាប៊ីសាអូឌីតមានអាយុក្រោម១៤ឆ្នាំ ដែលនឹងជំរុញតម្រូវការលំនៅឋានក្នុងរយៈពេលប៉ុន្មានឆ្នាំខាងមុខ។

ទន្ទឹមនឹងនេះ លំនៅឋានចំនួនជាង៦០០.០០០យូនីត ត្រូវបានគេរំពឹងថា នឹងត្រូវបានសាងសង់នៅក្នុងប្រទេសអារ៉ាប៊ីសាអូឌីតនៅឆ្នាំ២០៣០ រួមទាំងផ្ទះចំនួន១១០.៩៤២យូនីត ដែលត្រូវប្រគល់ជូននៅឆ្នាំ២០២៦។ នេះបើយោងតាមក្រុមហ៊ុនប្រឹក្សាអចលនទ្រព្យ Knight Frank។

ប៉ុន្តែ បញ្ហាកង្វះលទ្ធភាពទិញអាចក្លាយជាបញ្ហានាពេលអនាគត។ តួយ៉ាង តម្លៃអាផាតមុិននៅទីក្រុងរីយ៉ាដនៃប្រទេសនេះបានហក់ឡើង៩៦ភាគរយចាប់ពីដើមឆ្នាំ២០១៩ ដល់ត្រីមាសទី៣ នៃឆ្នាំ២០២៥ ខណៈតម្លៃវីឡាបានហក់ឡើង៥៣ភាគរយ៕ប្រភព: The Business Times៕

ការស្តារស្ថិរភាពទីផ្សារលំនៅឋាន ជាគន្លឹះសំខាន់ដើម្បីជំរុញសន្ទុះសេដ្ឋកិច្ចរបស់ប្រទេសចិន

ដោយ: សហសេវិក
អន្តរជាតិ: ប្រទេសចិនត្រូវបានគេរំពឹងថា នឹងដាក់ចេញនូវវិធានការជាបន្តបន្ទាប់ដើម្បីធ្វើឱ្យទីផ្សារអចលនទ្រព្យរបស់ខ្លួនមានស្ថិរភាព ក្នុងគោលបំណងជំរុញទំនុកចិត្តទីផ្សារ និងទប់ស្កាត់មិនឱ្យការធ្លាក់ចុះនៃតម្លៃអចលនទ្រព្យជះផលប៉ះពាល់ដល់ការប្រើប្រាស់។

ក្រុមអ្នកវិភាគបានលើកឡើងបែបនេះ បន្ទាប់ពីទស្សនាវដ្តី Qiushi Journal ដ៏លេចធ្លោរបស់បក្សកុម្មុយនិស្តចិន បានអំពាវនាវឱ្យមានការដាក់ចេញគោលនយោបាយអចលនទ្រព្យដ៏ម៉ឺងម៉ាត់ និងគ្រប់ជ្រុងជ្រោយ ជាជាងការបោះជំហានបន្តិចម្តងៗ។

ទីផ្សារអចលនទ្រព្យលំនៅឋានជាផ្នែកសំខាន់មួយនៃទ្រព្យសម្បត្តិរបស់គ្រួសារនៅក្នុងប្រទេសចិន។ ដូច្នេះ នៅពេលតម្លៃអចលនទ្រព្យធ្លាក់ចុះ នោះទ្រព្យសម្បត្តិរបស់ពលរដ្ឋចិននឹងថយចុះ ដែលអាចជះផលប៉ះពាល់ដល់ទំនុកចិត្តហិរញ្ញវត្ថុ និងការប្រើប្រាស់។

ដើម្បីទប់ទល់នឹងបញ្ហានេះ ប្រទេសចិនកំពុងផ្តោតលើការកាត់បន្ថយស្តុកលំនៅដ្ឋានលើសតម្រូវការ និងការអនុវត្តវិធានការរបស់អាជ្ញាធរមូលដ្ឋាននៅតាមទីក្រុងនានា ដើម្បីគ្រប់គ្រងការផ្គត់ផ្គង់លំនៅឋានថ្មី។

គោលនយោបាយ ដែលអាចដាក់ចេញរួមមាន ការបន្ធូរបន្ថយការរឹតបន្តឹងការទិញផ្ទះ ជាពិសេសនៅចំកណ្តាលទីក្រុងធំៗ ការទិញលំនៅឋានដោយអាជ្ញាធរ ដើម្បីប្រែក្លាយទៅជាលំនៅឋានដែលមានតម្លៃសមរម្យ ការកាត់បន្ថយអត្រាការប្រាក់លើកម្ចីទិញផ្ទះ និងការឧបត្ថម្ភធនលើអត្រាការប្រាក់។

ជាមួយគ្នានេះ វិធានការជំរុញការសាងសង់លំនៅឋាន ដែលមានការឧបត្ថម្ភពីរដ្ឋាភិបាល ដើម្បីបំពេញតម្រូវការរបស់គ្រួសារដែលមានប្រាក់ចំណូលទាប អ្នករស់នៅទីក្រុងថ្មី និងយុវជនក្មេងៗ ក៏អាចត្រូវបានដាក់ចេញផងដែរ៕ប្រភព: China Daily៕

1...188189190...3,375 Page 189 of 3,375