ជប៉ុនផ្តល់ជំនួយឥតសំណងជិត១១លានដុល្លារដល់គម្រោងអភិវឌ្ឍន៍ចរាចរណ៍នាវានៅខេត្តព្រះសីហនុ

ដោយៈ ម៉ាណេត

ភ្នំពេញៈ រដ្ឋាភិបាលជប៉ុន នៅថ្ងៃទី១ ខែមីនា ឆ្នាំ២០២១នេះ សម្រេចអនុម័តផ្តល់ហិរញ្ញប្បទានឥតសំណងរបស់ជប៉ុន មានទឹកប្រាក់ប្រមាណ១០,៨លានដុល្លារ ដើម្បីអនុវត្តន៍គម្រោងអភិវឌ្ឍន៍ចរាចរណ៍នាវា នៅកំពង់ផែស្វយ័តក្រុងព្រះសីហនុ។

ការចុះហត្ថលេខាងលើលិខិតប្តូរសារស្តីពី ការផ្តល់ហិរញ្ញប្បទានឥតសំណងរបស់ជប៉ុននេះ ត្រូវបានធ្វើឡើងដោយលោកប្រាក់ សុខុន រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ និងលោក Mikami Masahiro ឯកអគ្គរាជទូតជប៉ុនប្រចាំកម្ពុជា នៅថ្ងៃ១ ខែមីនា ឆ្នាំ២០២១នេះ។នេះបើយោងតាមសេចក្តីប្រកាសព័ត៌មានរបស់ក្រសួងការបរទេស និងសហប្រតិបត្តិការអន្តរជាតិ។

ក្រសួងការបរទេសបានឱ្យដឹងថា ហិរញ្ញប្បទានឥតសំណង ដែលផ្តល់ដោយរដ្ឋាភិបាលបជ៉ុននេះ នឹងរួមចំណែកយ៉ាងសំខាន់ ដល់ការលើកកម្ពស់ការអភិវឌ្ឍសេដ្ឋកិច្ច និងសង្គម នៃព្រះរាជាណាចក្រកម្ពុជា ព្រមទាំងពង្រឹងបន្ថែមទៀតនូវចំណងមិត្តភាព និងកិច្ចសហប្រតិបត្តិការរវាងប្រទេសទាំងពីរ។

ក្រសួងបានបញ្ជាក់ទៀតថា ក្នុងកិច្ចខិតខំប្រឹងប្រែងដើម្បីចូលរួមទប់ស្កាត់ ការផ្ទុះឡើងនៃការឆ្លងជំងឺកូវិដ១៩ នៅក្នុងសហគមន៍ ឬហៅថាព្រឹត្តិការណ៍សហគមន៍ថ្ងៃទី២០ ខែកុម្ភៈ ភាគីទាំងពិរងធ្វើការចុះហត្ថលេខា លើលិខិតប្តូរសារនេះ នៅទីកន្លែងរៀងៗខ្លួន។មន្ត្រី

ជាន់ខ្ពស់របស់កម្ពុជាលើកឡើងថា ទំនាក់ទំនងការទូតរវាងកម្ពុជា និងប្រទេសជប៉ុនកើតឡើងតាំងពីឆ្នាំ១៩៥៣មកម្ល៉េះ រហូតមកដល់ឆ្នាំ២០១៣កន្លងទៅ កម្ពុជា និងជប៉ុនបានក្លាយជាដៃគូយុទ្ធសាស្ត្រ និងកិច្ចសហប្រតិបត្តិការស៊ីជម្រៅជាមួយគ្នា។

ជប៉ុនបានជួយជ្រោមជ្រែងអភិវឌ្ឍន៍ប្រទេសកម្ពុជា តាមរយៈការស្តាឡើងវិញនូវហេដ្ឋារចនាសម្ព័ន្ធរូបវន្ត បណ្តុះបណ្តាលធនធានមនុស្ស ពង្រីកទំនាក់ទំនងសេដ្ឋកិច្ច ពាណិជ្ជកម្ម ជំរុញវិស័យទេសចរណ៍ និងវិនិយោគជាដើម។

វិនិយោគិនជប៉ុន បានបោះទុនវិនិយោគជាង២៧៩២លានដុល្លារ នៅកម្ពុជាក្នុងរយៈពេល២៧ឆ្នាំចុងក្រោយ គិតចាប់ឆ្នាំ១៩៩៣ ដល់ឆ្នាំ២០២០ ដោយបានចូលរួមចំណែកយ៉ាងសំខាន់ ក្នុងការបង្កើតការងារជាច្រើនកន្លែង ដល់ប្រជាពលរដ្ឋក្នុងស្រុក និងជំរុញកំណើនសេដ្ឋកិច្ចកម្ពុជា។

លោកហុង វណ្ណៈអ្នកស្រាវជ្រាវសេដ្ឋកិច្ចអន្តរជាតិ នៃវិទ្យាស្ថានទំនាក់ទំនងអន្តរជាតិនៃកម្ពុជា នៃរាជបណ្ឌិត្យសភាកម្ពុជា បានថ្លែងប្រាប់កាលចុងសប្តាហ៍កន្លងមកនេះ វិនិយោគិនជប៉ុន ជាមធម្មតា ទាមទារនៅលក្ខខណ្ឌចំនួនមួយ ក្នុងទី១ គឺតម្លាភាព និងទី២គឺភាពច្បាសលាស់លើច្បាប់វិនិយោគផ្សេង។

លោកបានឱ្យដឹងទៀតថា “នៅពេលវិនិយោគិនជប៉ុនកើនឡើងនៅកម្ពុជា វាអាចបង្កើតជាអត្តសញ្ញាណមួយល្អ សម្រាប់វិនិយោគបរទេសដទៃទៀត មានទំនុកចិត្ត ក្នុងការមកបណ្តាក់ទុននៅកម្ពុជា ព្រោះប្រជាជនលើពិភពលោក”។លោកបន្តថា“គេទទួលស្គាល់ហើយថា នៅពេលវិនិយោគិនជប៉ុន វិនិយោគក្នុងប្រទេសណាមួយ នោះជាសញ្ញាណមួយ ក្នុងការទាក់ទាញវិនិយោគិនបរទេសដទៃទៀត”៕

រដ្ឋាភិបាលបោះទុន២លានដុល្លារសាងសង់ផ្សារនៅតំបន់ព្រែកចាក ព្រំប្រទល់កម្ពុជា វៀតណាម

ដោយគង់ សូរិយា

ភ្នំពេញៈ រដ្ឋាភិបាលបានវិនិយោគទឹកប្រាក់២លានដុល្លារ ដើម្បីសាងសង់ផ្សារមួយ នៅតំបន់ព្រែកចាក ជាប់ព្រំប្រទល់ប្រទេសកម្ពុជា វៀតណាម ដែលគំរោងនេះបាននិងកំពុងដំណើរការ។

លោកប៉ាន សូរស័ក្តិរដ្ឋមន្រ្តីក្រសួងពាណិជ្ជកម្ម និងលោកជាវ តាយអភិបាលខេត្តកំពតបានចុះចុះពិនិត្យទីតាំង សាងសង់ផ្សារគំរូ ព្រំដែន ជិតច្រកទ្វារព្រំដែនអន្តរជាតិព្រែកចាកកាលពីចុងសប្តាហ៍មុន។

ទីតាំងគម្រោងអភិវឌ្ឍសាងសង់ ផ្សារគំរូព្រំដែននេះគឺស្ថិតនៅ ក្នុងភូមិថ្កូវ ឃុំឫស្សីស្រុកខាងកើត ស្រុកកំពង់ត្រាច ខេត្តកំពត លើផ្ទៃដីចំនួន ២ ហ.ត ជាជំហានដំបូង តាមគម្រោងផែនការគឺក្នុងទំហំផ្ទៃដីសរុប៥០ ហ.ត។ គម្រោងនេះទៀតសោត គឺជាគម្រោងអាទិភាពទី២ បន្ទាប់ពីផ្សារគំរូព្រំដែនបានកសាងរួចរាល់នៅក្នុងខេត្ត ត្បូងឃ្មុំ ក្នុងចំណោមខេត្តនានាជាប់ព្រំដែនវៀតណាម។

នៅក្នុងជំហានដំបូងនេះដែរ គម្រោងនេះអភិវឌ្ឍទៅលើហេដ្ឋារចនាសម្ព័ន្ធ មានការកសាងតភ្ជាប់ផ្លូវ ក្នុងតំបន់ព្រំដែនរវាងកម្ពុជា វៀតណាម អគារផ្សារកម្ពស់២ជាន់រួមនឹងហេដ្ឋារចនាសម្ព័ន្ធផ្សេងៗទៀត ដោយប្រើប្រាស់ថវិការបស់រាជរដ្ឋាភិបាលប្រមាណ២លានដុល្លារ និងអាចសាងសង់បញ្ចប់នៅដើមឆ្នាំ ឬពាក់កណ្ដាលឆ្នាំ២០២២ខាងមុខនេះ។

លោកប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម ក្នុងឱកាសនោះក៏បាន ស្នើដល់ អភិបាលខេត្ត ក៏ដូចអាជ្ញាធរមូលដ្ឋានគ្រប់ថ្នាក់ និងអ្នកពាក់ព័ន្ធទាំងអស់ជួយសម្រួលនិងសហការបានល្អ ជាមួយនឹងក្រុមហ៊ុនសាងសង់ ដើម្បីធ្វើយ៉ាងណាឲ្យដំណើរការគម្រោងសាងសង់នេះ បានសម្រេចលទ្ធផលជោគជ័យឆាប់រហ័ស តាមគោលការណ៍របស់សម្ដេចតេជោហ៊ុនសែនប្រមុខរាជរដ្ឋាភិបាល។

លោកជាវ តាយ អភិបាលខេត្ត បានសំដែងការអបអរសាទរ និងគាំទ្រ សហការ ព្រមទាំងសង្ឃឹមថា សមិទ្ធផលនៃគម្រោងនេះ បន្ទាប់ពីកសាងរួចរាល់ហើយ នឹងអាចធ្វើ ឱ្យការដោះដូរទំនិញតាមព្រំដែន មានលក្ខណៈកាន់តែល្អប្រសើរថែមទៀត នឹងធ្វើឲ្យជីវភាពប្រជាពលរដ្ឋកាន់តែល្អប្រសើរឡើងមួយកំរឹតទៀត៕

ចំណេះដឹង! តើអ្នកអភិវឌ្ឍអចលនទ្រព្យត្រូវដាក់ប្រាក់តម្កល់ប៉ុន្មានភាគរយ?

ដោយៈរ៉ាណេត

ភ្នំពេញៈ អ្នកអភិវឌ្ឍលំនៅឋាន ឬអគារសហកម្មសិទ្ធិ ដែលស្នើសុំអាជ្ញាបណ្ណឬលិខិតអនុញ្ញាតអាជីវកម្មប្រភេទ២ ត្រូវដាក់ប្រាក់តម្កល់ធានាអាជីវកម្មចំនួន២ភាគរយ នៃតម្លៃសំណង់សរុប ឬតម្លៃសំណង់តាមដំណាក់កាលនីមួយៗ ទៅតាមវិធីសាស្រ្តណាមួយដូចខាងក្រោម។

ក. តម្កល់ជាសាច់ប្រាក់ ក្នុងគណនីទោលរតនាគារជាតិ ដែលបើកនៅធនាគារជាតិនៃកម្ពុជា ឬនៅធនាគារពាណិជ្ជក្នុងស្រុកណាមួយ។

ខ. លិខិតធានាពីធនាគារពាណិជ្ជក្នុងស្រុកណាមួយដែលមានតម្លៃស្មើ។

ប្រាក់តម្កល់ធានាអាជីវកម្មអភិវឌ្ឍលំនៅឋាន ឬអគារសហកម្មសិទ្ធិអាចដកវិញបានលុះត្រាតែគម្រោងអភិវឌ្ឍលំនៅឋាន ឬអគារសហកម្មសិទ្ធិនោះសាងសង់ បានចាប់ពី៧០%(ចិតសិបភាគរយឡើង ឬចប់ជាស្ថាពរដោយមានលិខិតបិទការដ្ឋានសាងសង់ និងលិខិតបញ្ជាក់គុណភាពសំណង់ ពីក្រសួងរៀបចំដែនដី នគរូបនីយកម្ម និងសំណង់ និង/ ឬក្រោយពីមានការចុះវាយតម្លៃជាក់ស្តែង ពីមន្ត្រីជំនាញរបស់នាយកដ្ឋានឬមន្ទីរ។

ក្នុងករណីគម្រោងអភិវឌ្ឍលំនៅឋាន ឬអគារសហកម្មសិទ្ធិមានច្រើន ដំណាក់កាល ឬអ្នកអភិវឌ្ឍមាន គម្រោងថ្មីមួយផ្សេងទៀត ប្រាក់តម្កល់ធានាអាជីវកម្មនេះអាចធ្វើការផ្ទេរពីមួយដំណាក់កាលទៅមួយដំណាក់កាល ឬពីមួយគម្រោងទៅមួយគម្រោងទៀតបាន បន្ទាប់ពីដំណាក់កាលមុន ឬគម្រោងមុនសាងសង់បាន៥០%(ហាសិប)ភាគរយឡើង។

ប៉ុន្តែចំនួនទឹកប្រាក់តម្កល់នោះ អាចមានការប្រែប្រួលទៅតាមទំហំជាក់ស្តែង នៃការវិនិយោគរបស់គម្រោង ឬដំណាក់កាលបន្ទាប់។ ប្រាក់តម្កល់ធានាអាជីវកម្មអភិវឌ្ឍដីឡូត៍ អាចដកវិញ បានលុះត្រាតែអ្នកអភិវឌ្ឍដីឡូត៍ បានបំពេញកាតព្វកិច្ចចប់សព្វគ្រប់ រួមទាំងការផ្ទេរកម្មសិទ្ធិអចលនវត្ថុ ជ្ជនអ្នកទិញទៅតាមកិច្ចសន្យា និង/ឬក្រោយពីមានការចុះវាយតម្លៃជាក់ស្តែងពីមន្ត្រីជំនាញរបស់នាយកដ្ឋាន ឬមន្ទីរ៕

អ្នកជំនាញដីធ្លីម្នាក់ត្រូវបានព្រះមហាក្សត្រផ្តល់គោរមងារជាឧកញ៉ា

ដោយ ៖ រ៉ាណេត

ភ្នំពេញ ៖ អ្នកជំនាញនៅក្នុងទីផ្សារដីធ្លី និងអចលនទ្រព្យនៅកម្ពុជាម្នាក់ត្រូវបានព្រះមហាក្សត្រត្រាស់បង្គាប់ផ្តល់គោរមងារជាឧកញ៉ាតាមសេចក្ដីក្រាបបង្គំទូលថ្វាយរបស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា។

លោកកាង សុធី អគ្គនាយកក្រុមហ៊ុនអចលនទ្រព្យអន្តរជាតិ Century21 Land Station ដែលគេស្គាល់ថាជាអ្នកជំនាញនៅក្នុងវិស័យអចលនទ្រព្យកម្ពុជាត្រូវបានព្រះករុណា ព្រះបាទសម្ដេច ព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា ត្រាស់បង្គាប់ផ្តល់គោរមងារជា«ឧកញ៉ា»តាមរយៈព្រះរាជក្រឹត្យដែលបានធ្វើឡើងកាលពីថ្ងៃទី២៣ ខែកុម្ភៈ ឆ្នាំ២០២១កន្លងទៅនេះ៕

តោះទៅមើលតំបន់ «រាមសា» នៅខេត្តស្ទឹងត្រែងដែលមានសម្រស់ស្អាតដូចឋានសួគ៌

ដោយគង់ សូរិយា

ស្ទឹងត្រែងៈ តំបន់ «រាមសា» ខេត្តស្ទឹងត្រែង ជាតំបន់ដីសើម ដែលពោរពេញដោយជីវចម្រុះ ដែលវាបាននិងកំពុងក្លាយជាទីកន្លែងទាក់ទាញភ្ញៀវទេសចរណ៍ជាតិ និងអន្តរជាតិ។

ស្ទឹងត្រែងពិតជាស្អាតដូចឋានសួគ៌ នៅរដូវទឹកសម្រក ដែលមានឆ្នេរខ្សាច់ប្រែប្រួលតាមរដូចកាល ដោយសារកំសួលទឹកហូរ មានដើមឈើដែលមានឬសកែវ ពត់ពេនតាមខ្សែទឹកហូរ និងជាតំបន់ដែលមានផ្ទាំងសិលា ទឹកហូរតិចៗ ងាយស្រួលអុំទូកកាយ៉ាក់លំហែរកាយ ពេលវិស្សមកាល។

ស្ទឹងត្រែងមានចំណុចពិសេសជាច្រើន ដោយមានទន្លេមេគង្គ ទន្លេសេសាន ទន្លេសេកុង និងទន្លេស្រែពក ប៉ុន្តែដោយសារការធ្វើដំណើរឆ្ងាយ ពិសេសមិនសូវមានការផ្សព្វផ្សាយពីផលិតផលទេសចរណ៍តំបន់នេះ បានធ្វើឲ្យខេត្តស្ទឹងត្រែង ជាខេត្តដែលគេបំភ្លេច និងជាខេត្តដែលគ្រាន់តែគេធ្វើដំណើរឆ្លងកាត់ប៉ុណ្ណោះ។

លោកថោង អូនម្ចាស់រមណីយដ្ឋានបក្សីមេគង្គ ដែលមានទីតាំងនៅជិតទីរួមខេត្តស្ទឹងត្រែងធ្លាប់បានមានប្រសាសន៍ថា ការពិតស្ទឹងត្រែងមានសក្តានុពលទេសចរណ៍ខ្លាំងណាស់ ព្រោះតំបន់ទន្លេមេគង្គ មានធនធានទេសចរណ៍ដ៏សម្បូរបែប ដែលមិនអាចកាត់ថ្លៃបាន ពិសេសមានសត្វស្លាប មានផ្ទាំងសិលា មានតំបន់រាមសា មានត្រីធំៗ ដែលមានរសជាតិ ពិសេសមានកោះតូចៗនៅលើដងទន្លេមេគង្គ ដែលអាចសម្រាកលំហែរកាយបាននៅពេលរាត្រី។

លោកបន្តថា “អ្នកបានទៅទស្សនាតំបន់ទាំងនេះ មិនចង់ត្រលប់មកវិញឡើយ ពិសេសជនបរទេស ពួកគេនិយមទៅបោះតង់លើកោះតូចៗ ដែលផ្តល់នូវបរិយាកាសដ៏រ៉ូមែនទិកសម្រាប់ពួកគេ” ៕

ចូ បៃឌិន គ្រោងប្រើយុទ្ឋសាស្ត្ររបស់លោកដូណាល់ ត្រាំ ដើម្បីចាត់ការក្រុមហ៊ុនបច្ចេកវិទ្យាចិន ដែលបង្កការគំរាមកំហែងដល់អាមេរិក

ដោយៈសុខុម

វ៉ាស៊ីនតោនៈ យើងដឹងហើយថា ទំនាក់ទំនងការទូតរវាងសហរដ្ឋអាមេរិក និងមហាយក្សចិន មានភាពប្រេះឆាយ៉ាងខ្លាំង នៅរយៈពេលប៉ុន្មានឆ្នាំចុងក្រោយនេះ ដោយសាររដ្ឋការរបស់លោកដូណាល់ ត្រាំ បានបញ្ឆេះសង្គ្រាមពាណិជ្ជកម្មប្រឆាំងចិន។ មជ្ឈដ្ឋានទូទៅព្យាករថា ក្រោមរដ្ឋការថ្មីរបស់លោក ចូ បៃឌិន ទំនាក់ទំនងរវាងប្រទេសមហាអំណាចទាំងពីរនឹងធូរស្រាលឡើង ប៉ុន្តែប្រហែលជាមិនងាយស្រួលដូច្នេះឡើយ។

យោងតាមសារព័ត៌មាន CNA ចុះផ្សាយកាលពីថ្ងៃទី២៧ កុម្ភៈ ឱ្យដឹងថា រដ្ឋការរបស់លោកចូ បៃឌិន មានផែនការអនុញ្ញាតឱ្យវិធានការ ក្នុងសម័យដឹកនាំរបស់លោក ដូណាល់ ត្រាំ ចូលជាធរមាន បើទោះបីជាមានការជំទាស់ពីបណ្ដាក្រុមហ៊ុន សហគ្រាសរបស់សហរដ្ឋអាមេរិកយ៉ាងណាក្ដី។

ក្រសួងពាណិជ្ជកម្មសហរដ្ឋអាមេរិក បានបញ្ជាក់កាលពីថ្ងៃសុក្រ ទី២៦ កុម្ភៈ ថា វិធាននោះ មានគោលបំណងចាត់វិធានការណ៍ លើក្រុមហ៊ុនបច្ចេកវិទ្យាចិនណា ដែលគេរកឃើញថាបង្កការគំរាមកំហែងមកលើសហរដ្ឋអាមេរិក។

ក្រសួងនេះ បានចេញវិធានចុងក្រោយជាបណ្តោះអាសន្នមួយ ក្នុងគ្រាដែលលោក ដូណាល់ ត្រាំ សល់ពេលកាន់អំណាចតែប៉ុន្មានចុងក្រោយ។ វិធាននោះមានគោលបំណងដោះស្រាយក្ដីកង្វល់នានាអំពីសង្វាក់ផ្គត់ផ្គង់បច្ចេកវិទ្យាព័ត៌មាន និងទូរគមនាគមន៍ ហើយបានបញ្ជាក់ថា វិធាននោះនឹងមានប្រសិទ្ធភាពអនុវត្តន៍ បន្ទាប់ពីសាធារណជនបញ្ចេញមតិយោបល់រយៈពេល៦០ ថ្ងៃ។

កាលពីថ្ងៃសុក្រ សប្ដាហ៍នេះ អ្នកនាំពាក្យក្រសួងពាណិជ្ជកម្ម បានលើកឡើងតាម រយៈសេចក្ដីថ្លែងការណ៍ថា ក្រសួងពាណិជ្ជកម្ម នឹងបន្តទទួលយកការបញ្ចេញមតិយោបល់របស់សាធារណជន អំពីវិធាននេះរហូតដល់ថ្ងៃទី២២ មីនា ជាពេលដែលវិធាននេះត្រូវចូលជាធរមាន។

សេចក្ដីថ្លែងការណ៍ដដែលមានខ្លឹមសារដូច្នេះថា “បច្ចេកវិទ្យា ព្រមទាំងសេវាព័ត៌មាន និងទូរគមនាគមន៍ដែលអាចជឿទុកចិត្តបាន ពិតជាមានសារៈសំខាន់ណាស់ចំពោះសន្តិសុខជាតិ និងសន្តិសុខសេដ្ឋកិច្ចរបស់យើង ហើយវានៅតែជាគោលនយោបាយអាទិភាពកំពូលសម្រាប់រដ្ឋការលោក ចូ បៃឌិន” ។

សភាពាណិជ្ជសហរដ្ឋអាមេរិក និងក្រុមតំណាងឧស្សាហកម្មសំខាន់ៗ បានលើកឡើងពីក្ដីព្រួយបារម្ភ នៅក្នុងលិខិតមួយផ្ញើជូនទៅក្រសួងពាណិជ្ជកម្ម កាលពីខែមករាថា “វិធាននេះ ទទួលបានអំណាចស្ទើរតែគ្មានដែនកំណត់ នៅក្នុងការអន្តរាគមន៍ក្នុងការធ្វើប្រតិបត្តិពាណិជ្ជកម្ម រវាងក្រុមហ៊ុនសហរដ្ឋអាមេរិក និងក្រុមហ៊ុនបរទេសពាក់ព័ន្ធនឹងប ច្ចេកវិទ្យា ដែលមានតិចតួច ឬក៏គ្មានសោះនូវដំណើរការត្រឹមត្រូវ គណនេយ្យភាព តម្លាភាព ឬការសម្របសម្រួលជាមួយកម្មវធីផ្សេងៗទៀតរបស់រដ្ឋាភិបាល” ។

កិច្ចប្រជុំតុមូលរបស់ក្រុមតំណាងនាយកប្រតិបត្តិ នៃក្រុមហ៊ុនធំៗរបស់សហរដ្ឋអាមេរិក បានលើកឡើងមុននេះថា វិធាននេះ “មិនអាចទៅរួចឡើយ សម្រាប់ក្រុមហ៊ុនសហគ្រាសសហរដ្ឋអាមេរិក បើស្ថិតនៅក្នុងទម្រង់បច្ចុប្បន្ន” ។

ទោះជាយ៉ាងណា ខណៈក្រសួងពាណិជ្ជកម្មអាមរិក កំពុងទទួលយកមតិយោបល់ពីសាធារជននៅឡើយ ក្រសួងប្រហែលជាអាចកែប្រែវិធាននេះលើចំណុចខ្លះ ដោយផ្អែកតាមការជំទាស់ពីក្រុមហ៊ុនសហគ្រាស និងភាគីពាក់ព័ន្ធផ្សេងទៀត៕

ផ្ទះជាង ៣០០ត្រូវបានលក់ក្នុងកម្មវិធីបើកសម្ពោធជាផ្លូវការ គម្រោងថ្មីបែបអេកូធម្មជាតិ៣ គម្រោងព្រមគ្នា “សុភមង្គលថ្មីបែបធម្មជាតិ”

ដោយៈ សហការី

ភ្នំពេញៈ បុរី ប៉េង ហួត ទើបតែប្រកាសបើកលក់ជាផ្លូវការគម្រោងថ្មី បែបអេកូធម្មជាតិ៣គម្រោងព្រមគ្នា ជាគម្រោងដែលអតិថិជនទន្ទឹងរង់ចាំ ហើយចង់បានការរស់នៅបែបអេកូធម្មជាតិ។

អ្វីដែលនឹកស្មានមិនដល់ គម្រោងថ្មីទាំង៣នេះ ពិតជាទទួលបានការគាំទ្រយ៉ាងខ្លាំង ពីសំណាក់អតិថិជន ព្រោះគិតមកដល់ត្រឹមតែថ្ងៃទី1ប៉ុណ្ណោះ គឺលក់បានជាង 300ផ្ទះ។ ប៉ុន្តែអតិថិជនទាំងអស់ នៅតែអាចអញ្ជើញមកចូលរួមសាកសួរព័ត៌មាន ព្រោះទីតាំង ល្អៗ កំពុងរង់ចាំលោកអ្នកនៅឡើយ ហើយការបើកលក់នៅសល់រយៈពេល២ថ្ងៃទៀត។

មូលហេតុដែលអតិថិជន ពេញចិត្តចំពោះគម្រោងដ៏ថ្មីសន្លាងនេះ ព្រោះថាគម្រោងថ្មី ដឹស្តាផ្លាទីនីម អេកូ រ៉ូមែនស៍ និង ដឹស្តា ផ្លាទីនីម អេកូ វេរ៉ាន់ដា គឺជាគម្រោងអភិវឌ្ឍជាសហគមន៍ទំនើបធម្មជាតិពណ៌បៃតងមួយ ដែលផ្តល់ជូននូវបទពិសោធន៍រស់នៅដ៏អស្ចារ្យ ជាមួយនឹងប្រភេទវីឡាទំនើបចម្រុះរាប់ពាន់ខ្នង ឧទ្យានដ៏ធំអស្ចារ្យអមទៅដោយរុក្ខជាតិចម្រុះខៀវស្រងាត់ ទីធ្លាកម្សាន្ត ហ៊ុមព័ទ្ធដោយបឹង ផ្លូវជិះកង់ និងផ្លូវរត់ Marathon កន្លែងក្មេងលេង ដែលពោរពេញទៅដោយបរិយាកាសបែបធម្មជាតិពិតៗ ហើយផ្តល់ជូននូវបទពិសោធន៍ថ្មីប្លែក ទៅតាមបែបផែននៃការរស់នៅជាមួយ “សុភមង្គលថ្មីបែបធម្មជាតិ” ។

ចំណែកឯគម្រោងដឹស្តាផ្លាទីនីម អេកូ សាន់រ៉ាយ ជាគម្រោងដែលមានប្រភេទស្សបហោស៍ សម្រាប់ការធ្វើអាជីវកម្មខ្នាតតូច និងខ្នាតធំគ្រប់ប្រភេទ។ គម្រោងនេះ នឹងក្លាយជាភូមិសាស្ត្រអាជីវកម្ម ដ៏រីកចម្រើនយ៉ាងឆាប់រហ័ស ដោយសារតែទីនេះ គឺជាតំបន់ពាណិជ្ជកម្ម ដ៏សំខាន់សម្រាប់ផ្គត់ផ្គង់តម្រូវការ របស់អ្នករស់នៅក្នុងគម្រោង ហ្គ្រេនស្តា ផ្លាទីនឹម វគ្គ២ អេកូខលឡិកសិន ជាពិសេសអ្នកដែលរស់នៅជុំវិញផងដែរ។

លក្ខណៈពិសេសរបស់គម្រោងថ្មីទាំង3 នេះ គឺផ្តោតសំខាន់ទៅលើ ភាពទំនើបស៊ីវិល័យ ប្រណិតភាព ឧត្តមភាព ឯកជនភាព ផាកសុកភាព និងសុភមង្គលគ្រួសារ ដែលផ្សារភ្ជាប់ជាមួយធម្មជាតិពិតៗ សម្រាប់គ្រួសារជាទីស្រលាញ់របស់លោកអ្នក។

អ្វីដែលកាន់តែពិសេសជាងនេះទៅទៀត អតិថិជននឹងទទួលបានសំណាងផ្ទួនៗគ្នា ដែលរួមមាន- ទទួលបានការបញ្ចុះតម្លៃរហូតដល់ 11% ភ្លាម- ទទួលបានកង់ស្ព័រម៉ាកល្បី Giant ភ្លាមៗចំពោះការទិញគ្រប់ប្រភេទផ្ទះ។ – ចំណេញបន្ថែមរហូតដល់ $20,000 ។

ពិសេសលើពិសេស ដែលលោកអ្នក នឹកស្មានមិនដល់ នោះគឺឱកាសឈ្នះដំណើរកម្សាន្ត VVIP ទៅកាន់កោះសង្សារ ជាមួយមនុស្សជាទីស្រលាញ់យ៉ាងរ៉ូមែនទិកជាច្រើនរង្វាន់។ សូមរួសរាន់ឡើង ការផ្តល់ជូនពិសេសនេះ មានកំណត់ត្រឹមតែ3ថ្ងៃតែប៉ុណ្ណោះ គឺចាប់ពីថ្ងៃទី19 ដល់ថ្ងៃទី21 ខែកុម្ភៈ ឆ្នាំ 2021 ខាងមុខនេះ។

ប្រញាប់រួសរាន់ឡើង មកមុនបានជម្រើសមុន ព្រោះចំនួនមានកំណត់។ សម្រាប់ព័ត៌មានបន្ថែម សូមទាក់ទងទូរស័ព្ទលេខ 098/ 016 / 017 596 789 ឬ រង់ចាំតាមដានគេហទំព័រ Facebook បុរី ប៉េង ហួត៕

វិនិយោគិននៅតែបន្តអភិវឌ្ឍន៍អចលនទ្រព្យជាមួយក្ដីរំពឺងថាស្ថានភាពនៃវិបត្តិនឹងត្រលប់ទៅភាពដើមវិញ

ដោយៈ សហសេវិក

ភ្នំពេញៈ ថ្វីត្បិតតែ កម្ពុជាជួបវិបត្តិដោយសារតែកូវីដ១៩យ៉ាងណាក្ដី តែគេបានមើលឃើញគម្រោងអភិវឌ្ឍន៍ ដោយមានវិនិយោគិនបន្តដាក់ទុនវិនិយោគ ជាបន្តបន្ទាប់ ជាមួយនឹងក្ដីរំពឹងថា ស្ថានភាពនៃវិបត្តិដោយសារតែកូវីដ១៩ នឹងបានបញ្ចប់ហើយធ្វើឱ្យសេដ្ឋកិច្ចវិលទៅរកភាពដើមឡើងវិញ។

លោកង៉ែត ជូ សេដ្ឋវិទូមួយរូបនៅកម្ពុជា និងជាអ្នកវិនិយោគក្នុងវិស័យអចលនទ្រព្យបានឱ្យដឹងថា វិស័យអចលនវត្ថុកាលពីមុនមានវិបត្តិ គឺមានការកើនឡើងខ្ពស់ និងសកម្មភាពមមាញឹកខ្លាំង ដោយមានវិនិយោគិនក្នុង និងក្រៅប្រទេសជាច្រើនចូលមកបណ្ដាក់ទុនវិនិយោគនៅក្នុងប្រទេសកម្ពុជា។ ដូច្នេះនៅពេលមានវិបត្តិដោយសារតែកូវីដ១៩ សកម្មភាពទាំងនោះ មិនបានផ្អាកទាំងស្រុងឬបញ្ឈប់នោះឡើយ ពោលគឺនៅតែមានសកម្មភាពវិនិយោគជាហូរហែ។

លោកបន្តថា “ការវិនិយោគអចលនទ្រព្យនៅក្នុងប្រទេសកម្ពុជា មានច្រើនផ្នែកក្នុងនោះ មានដីធ្លីសម្រាប់កសិកម្ម សំណង់ រោងចក្រ និងការអភិវឌ្ឍអគារខ្ពស់ៗក្នុងរាជធានីភ្នំពេញជាដើម”។ លោកថា “អ្នកវិនិយោគដែលគិតតែផលចំណេញ វានឹងពិបាកបន្តិចក្នុងរយៈពេលនេះ តែអ្នកដែលវិនិយោគដែលគិតពីការវិនិយោគយូរអង្វែង គេនៅតែបន្តអភិវឌ្ឍន៍គម្រោងរបស់គេដដែល ដោយរំពឹងថាអ្វីៗនឹងប្រសើរ”។

ជាមួយគ្នានេះ អ្នកឧកញ៉ាលី ហួរប្រធានសមាគមអ្នកអភិវឌ្ឈន៍លំនៅដ្ឋានកម្ពុជាបានមានប្រសាសន៍ថា សកម្មភាពនៃការវិនិយោគលើវិស័យអចលនទ្រព្យ មិនបានផ្អាកនោះទេ ពិសេសគំរោងសាងសង់លំនៅដ្ឋាននានា ព្រោះគំរោងមួយមិនបញ្ចប់រយៈពេលពីរ ទៅបីខែនោះទេ ប៉ុន្តែសកម្មភាពនៃគំរោងវិនិយោគថ្មី អ្នកវិនិយោគហាក់កំពុងរង់ចាំមើលស្ថានភាពថា តើមានសភាពដូចម្តេចលើការគ្រប់គ្រងការរីករាលដាលជំងឺកូវីដ១៩។

លោកបន្តថា “លោកជឿថារដ្ឋាភិបាលនឹងអាចគ្រប់គ្រងស្ថានភាពនេះបាន ព្រោះយើងមានបទពិសោធន៍គ្រប់គ្រងបានល្អនាពេលកន្លងមក”៕

កំណើនតម្រូវការរបស់ក្រុមហ៊ុនបច្ចេកវិទ្យាធំៗផ្តល់ក្តីសង្ឃឹមឡើងវិញដល់ទីផ្សារការិយាល័យនៅអាមេរិក

ដោយៈ ប៊ី

ញូវយ៉កៈ កំណើនតម្រូវការជួលរបស់ក្រុមហ៊ុនបច្ចេកវិទ្យាធំៗ ដូចជាក្រុមហ៊ុន Amazon.com Inc ក្រុមហ៊ុន Facebook Inc និងក្រុមហ៊ុន Google នៅទីក្រុងញូវយ៉ក បានផ្តល់ឱ្យម្ចាស់អចលនទ្រព្យ និងភ្នាក់ងារអចលនទ្រព្យមានសង្ឃឹមថា ទីផ្សារការិយាល័យការិយាល័យ ដែលរងផលប៉ះពាល់យ៉ាងធ្ងន់ធ្ងរដោយវិបត្តិកូវីដ១៩ នឹងវិលត្រឡប់ទៅសភាពដើមវិញ។

បច្ចុប្បន្ន ក្រុមហ៊ុនបច្ចេកវិទ្យាធំៗទាំងនេះ បាននិងកំពុងសម្លឹងរកអាគារការិយាល័យនៅទីរដ្ឋហិរញ្ញវត្ថុដ៏ធំ របស់សហរដ្ឋអាមេរិកមួយ ដែលការណ៍នេះផ្តល់ឱ្យក្តីសង្ឃឹមយ៉ាងខ្លាំងដល់ទីផ្សារការិយាល័យ ក្នុងការងើបឡើងវិញ។ នេះបើយោងតាមការចេញផ្សារយរបស់សារព័ត៌មាន CNA នៅថ្ងៃទី២៧ ខែកុម្ភៈ ឆ្នាំ២០២១។

ប៉ុន្តែការធ្វើការពីផ្ទះ និងការចាកចេញរបស់ប្រជាជន ពីទីតំបន់ឆ្នេរសមុទ្រ ដែលមានតម្លៃនៅរស់នៅថ្លៃៗ នឹងទំនងជាមានផលប៉ះពាល់ដល់តម្រូវការ នៃទីផ្សារការិយាល័យ។

ជាមួយគ្នានេះដែរ តម្លៃលក់អាគារការិយាល័យ នៅតាមបណ្តាទីក្រុងនានារបស់សហរដ្ឋអាមេរិកនៅទ្រឹង ឬឡើងថ្លៃតិចតូចក្នុង កំឡុងពេលមានជំងឺរាតត្បាតនេះ។ ទិន្នន័យបានបង្ហាញថា ប៉ុន្តែអត្រាជួល និងចំនួនអាគារ ដែលបានលក់ចេញបានធ្លាក់ចុះ។

លោក Joe Gorin ប្រធានគ្រប់គ្រងអចលនទ្រព្យក្រុមហ៊ុន Barings នៅសហរដ្ឋអាមេរិកបានថ្លែងថា ជំងឺរាតត្បាតបានបន្សល់ទុកនូវសំនួរដ៏ធំមួយ ដែលជាប់គាំងនៅក្នុងវិស័យការិយាល័យ។

លោកបានថ្លែងថា “ខ្ញុំដឹងថាអ្នកធ្វើការនឹងប្រើសណ្ឋាគារ ឬនៅផ្ទះជំនួសឱ្យការិយាល័យ អំឡុងពេលជំងឺរាតត្បាត”។ ហេតុអ្វីបានជាអ្នកធ្វើការនឹងប្រើអគារការិយាល័យ? វានឹងមានផលប៉ពាល់ខ្លះ ពីព្រោះយើងនឹងត្រូវទទួលយកនូវរបៀបថ្មី នៃការប្រើប្រាស់ការិយាល័យរបស់អ្នកធ្វើការ”។

លោកGorin បាននិយាយថា ក្រុមហ៊ុនចាំបាច់ ត្រូវធ្វើឱ្យការិយាល័យកាន់តែមានភាពទាក់ទាញ ប៉ុន្តែអាគារ ដែលមិនអាចផ្តល់បរិយាកាសល្អសម្រាប់ការងារ នឹងទទួលរងនូវប៉ពាល់លើតម្រូវការ។

លោកបន្តថា “ប្រសិនបើអ្នកបង្កើតអ្វី ដែលត្រឹមត្រូវ សម្រាប់អាគារការិយាល័យ វានឹងងបង្កើនតម្លៃដល់អាគារនោះ”។

ទិន្នន័យបានបង្ហាញថា តម្លៃអាគារការិយាល័យលំដាប់ក្រោមកម្រិត A ធ្លាក់ចុះ និងអាចនឹងធ្លាក់ចុះបន្តទៀត ប្រសិនបើការធ្លាក់ចុះនៃតម្រូវការនៅតែបន្តកើតមាន។

សកម្មភាពជួលបានកើនឡើង បន្ទាប់ពីចូលឆ្នាំថ្មី ប៉ុន្តែនៅតែទាបជាងកម្រិត មុនវិបត្តិជំងឺកូវីដ១៩។

លោកSam Isaacson ប្រធានក្រុមហ៊ុន Walker & Dunlop Investment Partners នៅទីក្រុង Denver ក្នុងរដ្ឋColorado និយាយថា វិស័យការិយាល័យគឺពិបាកបំផុតក្នុងការវាយតម្លៃ ពីព្រោះការជួលជាទូទៅមានកុងត្រារយៈពេលវែង។

លោកបានថ្លែងថា “ជាមួយគ្នានេះដែរ លំហូរសាច់ប្រាក់ត្រូវតែត្រូវគ្នានឹងការឡើងតម្លៃអចលនទ្រព្យ (ការិយាល័យ) ប៉ុន្តែនៅពេលរឿងនេះមិនកើតឡើង នោះជាពេលដែលយើងនឹងឃើញ ការរងផលប៉ះពាល់យ៉ាងពិតប្រាកដ”៕

រដ្ឋាភិបាលសម្រេចអនុម័តគម្រោងវិនិយោគថ្មីចំនួន១៤បោះទុនជាង២២៥លានដុល្លារក្នុងខែកុម្ភៈនេះ

ដោយៈ ប៊ី

ភ្នំពេញៈ រដ្ឋាភិបាលតាមរយៈក្រុមប្រឹក្សាអភិវឌ្ឍន៍កម្ពុជា (CDC) ក្នុងខែកុម្ភៈ ឆ្នាំ២០២១ បានសម្រេចអនុម័តគម្រោងវិនិយោគថ្មីចំនួន១៤ ដែលប្រកាសទុនវិនិយោគប្រមាណ២២៥,១លានដុល្លារអាមេរិក និងបង្កើតការងាររាប់ពាន់កន្លែងដល់ប្រជាជនកម្ពុជា។ នេះបើយោងតាមរបាយការណ៍របស់ CDC។

ក្រុមហ៊ុន និងគម្រោងទាំង១៤ ដែលក្រុមប្រឹក្សាអភិវឌ្ឍកម្ពុជាអនុម័តគាំទ្រ និងចុះវិញ្ញាបនបត្រជាស្ថាពររួមមាន ទី១- ក្រុមហ៊ុន “CART TIRE CO., LTD” គម្រោងបង្កើតរោងចក្រផលិតសំបកកង់យានយន្ត មានទីតាំងវិនិយោគ ស្ថិតនៅក្នុងតំបន់សេដ្ឋកិច្ចពិសេសឈីលូ បាវិត ខេត្តស្វាយរៀង មានទុនវិនិយោគប្រមាណ ១៥លានដុល្លារអាមេរិក និងអាចបង្កើតការងារបានចំនួន៣៨០កន្លែង។

ទី២- ក្រុមហ៊ុន ONION MOBILITY CO., LTD គម្រោងបង្កើតរោងចក្រផ្គុំតម្លើងទោចក្រយានយន្ត និងត្រីចក្រយានយន្តប្រើដោយថាមពលអគ្គិសនី ដែលមានទីតាំងវិនិយោគស្ថិតនៅក្នុងតំបន់សេដ្ឋកិច្ចពិសេស សុវណ្ណភូមិ ខេត្តកណ្តាល មានទុនវិនិយោគប្រមាណ២០លានដុល្លារអាមេរិក និងអាចបង្កើតការងារបានចំនួន៣៨០កន្លែង។

ទី៣- ក្រុមហ៊ុន SHANE (CAMBODIA) FURNITURE CO., LTD គម្រោងបង្កើតរោងចក្រផលិតសាឡុង គ្រែ និងគ្រឿងសង្ហារឹមគ្រប់ប្រភេទ ដែលមានទីតាំងវិនិយោគស្ថិតនៅក្នុងតំបន់សេដ្ឋកិច្ចពិសេសស៊ីន បាវិត ខេត្តស្វាយរៀង, មានទុនវិនិយោគប្រមាណ៤៧,៧លានដុល្លារអាមេរិក និងអាចបង្កើតការងារបានចំនួន៨២០កន្លែង។

ទី៤- ក្រុមហ៊ុន XIN JELLY INDUSTRY AND TRADING CO., LTD គម្រោងបង្កើតរោងចក្រកាត់ដេរសម្លៀកបំពាក់ និងក្រណាត់ទ្រនាប់សម្លៀកបំពាក់ ដែលមានទីតាំងវិនិយោគស្ថិតនៅភូមិតិក្ខបញ្ញោ សង្កាត់សំរោងក្រោម ខណ្ឌពោធិ៍សែនជ័យ រាជធានីភ្នំពេញ មានទុនវិនិយោគប្រមាណ២,៦លានដុល្លារអាមេរិក និងអាចបង្កើតការងារបានចំនួន ៧៦៤កន្លែង។

ទី៥- ក្រុមហ៊ុន MAYCO FURNITURE COMPANY LIMITED គម្រោងបង្កើតរោងចក្រផលិតគ្រឿងសង្ហារឹមគ្រប់ប្រភេទ (ពីឈើនាំចូល) ដែលមានទីតាំងវិនិយោគស្ថិតនៅភូមិព្រហែក ឃុំសូភី ស្រុកបាទី ខេត្តតាកែវ មានទុនវិនិយោគប្រមាណ ៣,៨លានដុល្លារអាមេរិក និងអាចបង្កើតការងារបានចំនួន១៨៨កន្លែង។

ទី៦ – ក្រុមហ៊ុន P P C H Y MACHINERY MANUFACTURING CO., LTD: គម្រោងបង្កើតរោងចក្រផលិតគ្រឿងបន្លាស់ (រថយន្ត គ្រឿងចក្រ គ្រឿងយន្ត) និងប៊ូឡុងគ្រប់ប្រភេទ ដែលមានទីតាំងវិនិយោគស្ថិតនៅភូមិឫស្សី ឃុំព្រះនិព្វាន្ត ស្រុកគងពិសី ខេត្តកំពង់ស្ពឺ មានទុនវិនិយោគប្រមាណ ៦,៩លានដុល្លារអាមេរិក និងអាចបង្កើតការងារបានចំនួន ២០០កន្លែង។

ទី៧ – ក្រុមហ៊ុន KHEMA GLOBAL CO., LTD: គម្រោងសាងសង់ និងអាជីវកម្មមន្ទីរពហុព្យាបាលអន្តរជាតិ ចំនួន ៨១គ្រែ ដែលមានទីតាំងវិនិយោគស្ថិតនៅផ្លូវជាតិលេខ១ ភូមិឫស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ មានទុនវិនិយោគប្រមាណ ៦,៣លានដុល្លារអាមេរិក និងអាចបង្កើតការងារបានចំនួន២៨០កន្លែង។

ទី៨- ក្រុមហ៊ុន KHEMA GLOBAL CO., LTD: គម្រោងសាងសង់ និងអាជីវកម្មមន្ទីរពហុព្យាបាលអន្តរជាតិចំនួន៥៤គ្រែ ដែលមានទីតាំងវិនិយោគស្ថិតនៅ ផ្លូវជាតិលេខ៥២៨ ភូមិ១២ សង្កាត់បឹងកក់ទី១ ខណ្ឌទួលគោក រាជធានីភ្នំពេញ មានទុនវិនិយោគប្រមាណ ៣,៦លានដុល្លារអាមេរិក និងអាចបង្កើតការងារបានចំនួន១៨០កន្លែង។

ទី៩- ក្រុមហ៊ុន PRIME ROAD ALTERNATIVE (CAMBODIA) CO., LTD: គម្រោងបង្កើតស្ថានីយផលិតអគ្គិសនីដើរដោយពន្លឺព្រះអាទិត្យ អានុភាព ៦០មេហ្កាវ៉ាត់ ដែលមានទីតាំងវិនិយោគស្ថិតនៅភូមិព្រៃជ្រៅ ឃុំក្បាលទឹក ស្រុកទឹកផុស ខេត្តកំពង់ឆ្នាំង មានទុនវិនិយោគប្រមាណ៣៧,៤លានដុល្លារអាមេរិក និងអាចបង្កើតការងារបានចំនួន ១២កន្លែង។

ទី១០- ក្រុមហ៊ុន SYSG GARMENT COMPANY LIMITED: គម្រោងបង្កើតរោងចក្រកាត់ដេរសម្លៀកបំពាក់ ដែលមានទីតាំងវិនិយោគស្ថិតនៅអគារលេខ A-០៧ ផ្លូវជាតិលេខ៤ ភូមិស្វាយជ្រុំ ឃុំបែកចាន ស្រុកអង្គស្នួល ខេត្តកណ្តាល មានទុនវិនិយោគប្រមាណ៤,៣លានដុល្លារអាមេរិក និងអាចបង្កើតការងារបានចំនួន ១.៣៥១កន្លែង។

ទី១១- ក្រុមហ៊ុន VELONG (CAMBODIA) INDUSTRIES CO., LTD” គម្រោងបង្កើតរោងចក្រផលិតសម្ភារៈបរិក្ខារ សម្រាប់ចង្ក្រានBBQ ផ្គុំតម្លើងបរិក្ខារអេឡិចត្រូនិក និងអំពូលភ្លើង ដែលមានទីតាំងវិនិយោគ ស្ថិតនៅក្នុងតំបន់សេដ្ឋកិច្ចពិសេសស្វាយរៀង ហ្គីហ្គា រីស៍ស, មានទុនវិនិយោគប្រមាណ៣,៥លានដុល្លារអាមេរិក និងអាចបង្កើតការងារបានចំនួន ១២០កន្លែង។

ទី១២- ក្រុមហ៊ុន ALLIED MAX INTERNATIONAL (CAMBODIA) CO., LTD គម្រោងបង្កើតរោងចក្រផលិតក្រណាត់ និងកាត់ដេរសម្លៀកបំពាក់ ដែលមានទីតាំងវិនិយោគស្ថិតនៅក្នុងតំបន់សេដ្ឋកិច្ចពិសេស សានដុង សាន់សែល, មានទុនវិនិយោគប្រមាណ៣២លានដុល្លារអាមេរិក និងអាចបង្កើតការងារបានចំនួន៣៧០កន្លែង។

ទី១៣- គម្រោងបង្កើតរោងចក្រកាត់ដេរសម្លៀកបំពាក់ របស់ក្រុមហ៊ុន OCEAN APPAREL MANUFACTURING CO., LTD មានទីតាំងវិនិយោគស្ថិតនៅដីឡូតិ៍លេខ១ ផ្លូវជាតិលេខ៤ ភូមិវល្លិសរ ឃុំវល្លិសរ ស្រុកសំរោងទង ខេត្តកំពង់ស្ពឺ មានទុនវិនិយោគប្រមាណ ៤លានដុល្លារអាមេរិក និងអាចបង្កើតការងារបានចំនួន២.៣០០កន្លែង។

ទី១៤- គម្រោងបង្កើតរោងចក្រផលិតផ្ទាំងកញ្ចក់សូឡា របស់ក្រុមហ៊ុន “GLAMOR GLASS CO., LTD” មានទីតាំងវិនិយោគ ស្ថិតនៅក្នុងតំបន់សេដ្ឋកិច្ចពិសេស គិរីសាគរ កោះកុង និងមានទុនវិនិយោគប្រមាណ៧,៨លានដុល្លារអាមេរិក និងអាចបង្កើតការងារបានចំនួន១៩០កន្លែង៕

1...2,0942,0952,096...3,314 Page 2,095 of 3,314