ក្រុមហ៊ុន​ជប៉ុនធំៗបានរៀបចំ​ខ្លួន​រួចហើយ​សម្រាប់​វិនិយោគ​រយៈពេល​វែង​នៅ​កម្ពុជា ខណៈ​ការិយាល័យ​លំដាប់​អន្តរជាតិ​មួយ​បាន​ដាក់ចូល​ទីផ្សារ

ដោយៈ​ស៊ីវ ម៉េង

ភ្នំពេញៈ វត្តមាន​អាគារ​ការិយាល័យ​លំដាប់​អន្តរជាតិ​ថ្មី​មួយ លើ​មហាវិថី​ព្រះ​ន​រោត្ត​ម និង​ការសាងសង់​យ៉ាងសកម្ម នៃ​គម្រោង​ផ្សារ​ទំនើប AEON MALL3 ដែលមាន​តម្លៃ២៦០លាន​ដុល្លារ​អាមេរិក បាននិងកំពុង​ឆ្លុះបញ្ចាំង​ពី​ទំនុកចិត្ត របស់​អ្នកវិនិយោគ​ជប៉ុន​នៅ​កម្ពុជា​រួចហើយ។

ក្រុមហ៊ុន​ជប៉ុន​ជាច្រើន​បាន និង​កំពុង​ត្រៀមខ្លួន​ចូលមក​កម្ពុជា បន្ទាប់ពី​បញ្ចប់​វិបត្តិ​ជំងឺ​កូ​វីដ១៩ ខណៈ​ក្រុមហ៊ុន​ដែល​បាន​ចូលមក​រួចហើយ ត្រៀម​ពង្រីក​មូលដ្ឋាន​វិនិយោគ​របស់​ពួកគេ​នៅ​កម្ពុជា ដែល​បច្ចុប្បន្ន​អាគារ​ការិយាល័យ សណ្ឋាគារ អា​ផាត​ម៉ិ​ន ផ្សារ​ទំនើប មន្ទីរពេទ្យ ទីលាន​វាយ​កូន​ហ្គោល​ជាដើម ត្រូវបាន​អ្នកវិនិយោគ​ជប៉ុន​បាន​វិនិយោគ​នៅ​កម្ពុជា​រួចហើយ។

ជាពិសេសថ្មីៗនេះ ក្រុមហ៊ុន​មាន​ជំនាញ​ផ្នែក​អភិវឌ្ឃន៍ លំនៅដ្ឋាន​ធំ​មួយ​នៅ​ប្រទេស​ជប៉ុន​បាននិងកំពុង​ត្រៀម បង្ហាញ​គំរោង​ពួកគេ​ជា​លើកដំបូង​លើផ្លូវ​ជាតិ​លេខ៣ ដែលមាន​ចម្ងាយ​ប្រមាណ២០គីឡូម៉ែត្រ​ពី​រាជធានី​ភ្នំពេញ។

អ្នកស្រាវជ្រាវ​សេដ្ឋកិច្ច​នៃ​រាជបណ្ឌិតសភា​កម្ពុជា លោក​បណ្ឌិត​ហុង វណ្ណៈ​បាន​មានប្រសាសន៍ថា ការមកដល់​របស់​អ្នកវិនិយោគ​ជប៉ុន​នៅ​កម្ពុជា និង​ប្រទេស​ណាមួយ បានបង្ហាញ​ពី​ទំនុកចិត្ត របស់​អ្នកវិនិយោគ​ជប៉ុន​លើ​ប្រទេស​នោះ ពិសេស​វា​ឆ្លុះបញ្ចាំង​នូ​ប​បរិយាកាស​វិនិយោគ​នៅ​ប្រទេស​នោះ មាន​ភាពល្អប្រសើរ ទាំង​ការរីកចម្រើន​សេដ្ឋកិច្ច ក៏ដូចជា​បទដ្ឋាន​ច្បាប់​គតិយុត្តិ​នានា មាន​ភាពសមស្រប ដែល​គ្មាន​ភាព​ស្មុ​គ្រ​ស្មាញ​ដល់​ការងារ​រកស៊ី​របស់​ពួកគេ។

លោក​បន្តថា “ជាមួយនឹង​ការកែទម្រង់​ជា​បន្តបន្ទាប់ របស់​រាជរដ្ឋាភិបាល យើង​សង្ឃឹ​ម​ថា វិនិយោគិន​ជប៉ុន​នឹង​មកកាន់​កម្ពុជា កាន់តែច្រើន​នាពេលឆាប់ៗនេះ ពិសេស​ក្រោយ​វិបត្តិ​ជំងឺ​កូ​វីដ​បញ្ចប់” ។

សេដ្ឋវិទូ​ម៉ី កល្យាណ ​ទីប្រឹក្សា​ជាន់ខ្ពស់ នៃ​ឧ​ត្ត​ម​ក្រុមប្រឹក្សា​សេដ្ឋកិច្ចជាតិ​បាន​ថ្លែង​ឲ្យ​ដឹង​កាលពីពេលថ្មីៗនេះ​ថា វត្តមាន​របស់​វិនិយោគិន​ជប៉ុន កាន់តែច្រើន​កាលណា កាន់តែ​ល្អ​កាលនោះ ព្រោះ​អ្នកវិនិយោគ​ជប៉ុន​មុន​ចូល​ប្រទេស​ណាមួយ ពួកគេ​ស្ទាប​ហើយ​ស្ទាប​ទៀត ដើម្បី​ប្រាកដថា​ប្រទេស​ដែល​ពួកគេ ទៅ​វិនិយោគ​គ្មាន​ហានិភ័យ និង​អាច​ទុកចិត្តបាន។

លោក​បន្តថា “ការចាប់ផ្តើម​ជើងហោះហើរ​របស់​ក្រុមហ៊ុន អាកាសចរណ៍​ជប៉ុន ANA Airline កន្លងមក បានធ្វើ​ឲ្យ​ទំនាក់ទំនង​កា​ទូត និង​នយោបាយ​កម្ពុជា ជប៉ុន​ផ្លាស់ប្តូរ​ជា​ប្រវត្តិសាស្ត្រ” ។ លោក​បន្តថា “បើ​គិត​រហូត​មកទល់ពេលនេះ ជប៉ុន​បាន​ក្រាល​មូលដ្ឋាន​សម្រាប់​ការវិនិយោគ​រយៈពេល​វែង​នៅ​កម្ពុជា​រួចហើយ” ។

ជាមួយនឹង​គោលនយោបាយ​បើកចំហ​ជើងមេឃ ការកែទម្រង់​ជា​បន្តបន្ទាប់ កម្ពុជា​បានក្លាយ​ជា​កូនក្រមុំ​មួយ កម្ពុជា​បានក្លាយ​ជា​គោលដៅ​វិនិយោគ របស់​វិនិយោគិន​អន្តរជាតិ ដោយសារ​កម្ពុជា​មានច្បាប់ ដែល​លើកទឹកចិត្ត​វិនិយោគិន​បរទេស ដែល​អាច​បើ​ក្រុមហ៊ុន​ដោយ​បោះទុន១០០ភាគរយ​ដោយ​ខ្លួនឯងបាន កម្ពុជា​បានអនុម័ត​ច្បាប់​សហកម្ម​សិ​ទ្ឋ​ឆ្នាំ២០១០ ដែល​អនុ​ញ្ញា​ត្ត​ឲ្យ​ជនបរទេស​អាច​ទិញ​ផ្ទះ​ពី​ជាន់​ទី១ឡើងទៅ កម្ពុជា​បាន​រៀប​ច​ចំ​ប្រ​ព័​ន្ឋ​ច្បាប់​ព​ន្ឋ ដែល​គ្មាន​លក្ខណៈ​ស្មុ​គ្រ​ស្មាញ និង​សម្រួល​ដល់​ការនាំចេញ​នូវ​ប្រាក់ចំណេញ​ទៅ​ប្រទេស​របស់ខ្លួន​បានជា​ដើម៕

អ្នកជំនាញ​អចលនទ្រព្យ ពន្យល់​អំពី​សក្ដានុពល​នៃ​គម្រោង​ទីក្រុង​ពាណិជ្ជកម្ម​ភ្នំ​តូច

ដោយ សហការី

ភ្នំពេញ៖ គម្រោង​ទីក្រុង​ពាណិជ្ជកម្ម​ភ្នំ​តូច ត្រូវបាន​អ្នកជំនាញ​ផ្នែក​អចលនទ្រព្យ​វាយតម្លៃថា ជា​គម្រោង​ដ៏​ស៊ីវីល័យ ដែលមាន​ការអភិវឌ្ឍ​ច្នៃប្រឌិត​ខ្ពស់ ស្របតាម​សម័យកាល​សកលភាវូបនីយកម្ម។ ទីតាំង​នៃ​គម្រោង​នេះ ត្រូវបាន​ជ្រើសរើស​កន្លែង​ដែលមាន​សក្ដានុពល​សេដ្ឋកិច្ច មានការ​អភិវឌ្ឍ​រប​ស់​រដ្ឋ​និង​ឯកជន។

អ្នកជំនាញ​ផ្នែក​អចលនទ្រព្យ​បាន​លើកយក​ទឡ្ហីករណ៍​មក​ពន្យល់ថា នៅ​ជុំវិញ​គម្រោង​ទីក្រុង​ពាណិជ្ជកម្ម​ភ្នំ​តូច មាន​ផ្សារ​ថ្នល់ទទឹង ដែលមាន​ប្រជាជន​រស់នៅ​យ៉ាងច្រើន​កុះករ និង​ការប្រកប​អាជីវកម្ម​គ្រប់​ប្រភេទ។ ម្យ៉ាងទៀត ក៏​នៅមាន​ផ្លូវ៥១ ដែលជា​ផ្លូវ​ក្រវ៉ាត់​ក្រុង​និង​ជា​ផ្លូវ​សរសៃឈាម​សេដ្ឋកិច្ច​ដ៏​សំខាន់ ត​ភ្ជាប់​គ្នា​រវាងផ្លូវ​ជាតិ​លេខ៣ លេខ៤ និង​លេខ៥ ដែល​អាច​ដឹកជញ្ជូន​ទំនិញ​ទៅមក ពី​ខេត្តកំពត កំពង់ផែ​អន្តរជាតិ​ខេត្ត​ព្រះសីហនុ ខេត្តកោះកុង ខេត្តកំពង់ស្ពឺ និង ច្រកព្រំដែន​កម្ពុជា​ថៃ។ កត្តា​ទាំងនេះ បានផ្ដល់​ភាពងាយស្រួល​ដល់​ការដឹកជញ្ជូន ជួយ​កាត់បន្ថយ​ការចំណាយ​និង​ចំណេញ​ពេលវេលា។

ទឡ្ហីករណ៍​សំខាន់​មួយទៀត គឺ ផ្លូវ​ល្បឿន​លឿន​ភ្នំពេញ-ព្រះសីហនុ  ក៏​នៅ​ជិត​នឹង​គម្រោង​ទីក្រុង​ពាណិជ្ជកម្ម​ភ្នំ​តូច​ផងដែរ។ បើតាម​ក្រសួង​សាធារណៈការ​និង​ដឹកជញ្ជូន ផ្លូវ​ល្បឿន​លឿន​នេះ មាន​ប្រវែង​សរុប​ជាង ១៩០គីឡូម៉ែត្រ ត្រូវ​សាងសង់​ជា ០៤គន្លង តួ​ផ្លូវ​មាន​ទទឹង ២៤ម៉ែត្រ មាន​សួនច្បារ​ខណ្ឌ​កណ្តាល។ បច្ចុប្បន្ន សម្រេចបាន​ជិត៤០% ដែល​គ្រោង​នឹង​បញ្ចប់​នៅ​ឆ្នាំ២០២៣ ។

ក្រសួង​សាធារណៈការ​និង​ដឹកជញ្ជូន​បាន​បញ្ជាក់ថា គោលបំណង​នៃ​ផ្លូវ​ល្បឿន​លឿន​នេះ គឺ​ដើម្បី​សមាហរណកម្ម​ក្នុង​តំបន់ ទាំង​ក្នុង​អាស៊ាន និង​មហា​អនុតំបន់​ទន្លេមេគង្គ  ក៏ដូចជា​ពិភពលោក​ទាំងមូល ដែល​ជួយ​ត​ភា្ជ​ប់​បណ្តាញ​ដឹកជញ្ជូន​ក្នុង​តំបន់​ពី​ប្រទេសមួយ​ទៅ​ប្រទេស​មួយទៀត ដើម្បី​លើកកម្ពស់​សមត្ថភាព​ដឹកជញ្ជូន​កម្ពុជា​ឲ្យ​សមស្រប​ទៅតាម​ការអភិវឌ្ឍ​បែប​សាកលភាវូបនីយកម្ម។

កាន់តែ​ពិសេស​ជាង​នេះ នៅជាប់​នឹង​គម្រោង​ទីក្រុង​ពាណិជ្ជកម្ម​ភ្នំ​តូច ក៏មាន​សួន​ឧស្សា​កម្ម​កាណាឌីយ៉ា​ទំហំ៥០០ហិកតា ស្ថិតនៅ​ផ្លូវ ៥១ ក្នុង​ខេត្តកំពង់ស្ពឺ ដែល​បានចាប់ផ្ដើម​ដំណើរការ​សាងសង់​មួយ​រយៈពេល​មកហើយ។ សួន​ឧស្សាហកម្ម ដ៏​ធំ​នេះ មាន​ការសង​សង់​ជា​តំបន់​រោងចក្រ តំបន់​លំនៅដ្ឋាន ខុន​ដូ ផ្សារ​ពាណិជ្ជកម្ម សួន​កំសាន្ត និង​កន្លែង​ជាច្រើន​ទៀត ។

បើតាម​ក្រុមហ៊ុន​ខេ​អេ​ច​លែ​ន ចក្ខុវិស័យ​ដ៏​វែងឆ្ងាយ និង​ច្បាស់លាស់​នៃ​គំរោង​ក្រុង​ពាណិជ្ជកម្ម​ភ្នំ​តូច គឺ​ដើម្បី​បំពេញ​តំរូវការ​អាជីវកម្ម ដែល​ផ្គត់ផ្គង់​ដល់​វិសាលភាព​នៃ​តំបន់ឧស្សាហកម្ម សួន​ឧស្សាហកម្ម កាណាឌីយ៉ា ដែល​ត្រូវបាន​បង្កើតឡើង​ដើម្បី​ប្រកួតប្រជែង​ទីផ្សារ​ឧស្សាហកម្ម​ពិភពលោក។ តាម​ការវាយតម្លៃ បន្ទាប់ពី​ការបើក​ឱ្យ​ដំណើរការ​សួន​ឧស្សាហកម្ម​កាណាឌីយ៉ា និង​តំបន់ឧស្សាហកម្ម​ពិសេស​នៅ​ជុំវិញ​គំរោង នឹងមាន​រោងចក្រ​ប្រមាណ ១៥០០ និង​មាន​កម្មករ​ប្រមាណ ៣០ម៉ឺន​នាក់។

តាម​ការអភិវឌ្ឍ​ដ៏​ច្រើន​ឥតឈប់ឈរ​របស់​រដ្ឋ និង​ឯកជន ព្រមទាំង​កំណើនប្រជាជន​ដ៏​លឿន​រហ័ស​បែបនេះ បានធ្វើ​ឱ្យមាន​តំរូវការ​ចំ​បាច់ ជាច្រើន​ដូចជា​ការ​ស្នាក់នៅ សំលៀកបំពាក់ ចំណីអាហារ អេឡិចត្រូនិក បច្ចេកវិទ្យា សាលារៀន មន្ទីរពេទ្យ និង​ការកំសាន្ត​ជាដើម។

ទឡ្ហីករណ៍​សំខាន់​មួយទៀត​ដែល​អ្នកជំនាញ​ផ្នែក​អចលនទ្រព្យ​លើក​យកមក​ពន្យល់​នោះ​គឺ នៅជាប់​ផ្ទាល់​នឹង​គម្រោង  មាន​ប្រជាជន​រស់នៅ​កុះករ មាន​សាលារៀន មន្ទីរពេទ្យ និង​មាន​ផ្សារ​ភ្នំ​តូច។ ផ្សារ​ភ្នំ​តូច នឹងត្រូវ​ផ្លាស់ប្តូរ​ទីតាំង​ទៅ​ដាក់​នៅក្នុង​គម្រោង​ទីក្រុង​ពាណិជ្ជកម្ម​ភ្នំ​តូច ក្រោម​ការអនុញ្ញាតិ​ពី​អាជ្ញាធរ​មូលដ្ឋាន។ ដូច្នេះ គម្រោង​នេះ នឹង​ស្រូប​ទាញ​ប្រជាជន​ជុំវិញ ឱ្យមក​ប្រកប​អាជីវកម្ម​នានា​នៅក្នុង​គម្រោង ធ្វើឱ្យ​ទីក្រុង​ពាណិជ្ជកម្ម​ភ្នំ​តូច កាន់​តែមាន​សក្ដានុពល​ថែមទៀត។

កាន់តែ​ពិសេស សក្ដា​នុ​ល​នៅក្នុង​គម្រោង​ទីក្រុង​ពាណិជ្ជកម្ម​ភ្នំ​តូច មានការ​អភិវឌ្ឍ​ដូចជា ដី​ឡូ​តិ៍ អាជីវកម្ម​ដ៏​ពេញនិយម​ទាំង១០ប្រភេទ ដូចជា ហាង​លក់​គ្រឿង​អេឡិចត្រូនិក ហាង​លក់​ទូរ​សព្ទ ផាប់ ម៉ា​ត សាឡ​ន  ហាង​លក់​សម្លៀកបំពាក់ ហាង​នំ ហាង​ស៊ុប ហាង​កាហ្វេ និង​តូប​អាហារ និង​មាន​ហេដ្ឋារចនាសម្ព័ន្ធ ប្រព័ន្ធ​ផ្លូវ​បេតុង ប្រព័ន្ធ​លូ ប្រព័ន្ធ​ទឹក​ភ្លើង និង​មាន ផ្ទះ​អាជីវកម្ម វីឡា​ទោល ផ្សារ និង​ទីធ្លារ​សម្រាប់​តាំងពិព័រណ៍។

អ្នកជំនាញ​ផ្នែក​អចលនទ្រព្យ បាន​លើកឡើងថា ការអភិវឌ្ឍ​ដ៏​ស៊ីវីល័យ​ប្រកបដោយ​ការច្នៃប្រឌិត​ខ្ពស់​នៅក្នុង​គម្រោង​ទីក្រុង​ពាណិជ្ជកម្ម​ភ្នំ​តូច បានធ្វើឱ្យ​គម្រោង​នេះ មាន​សក្ដានុពល​ខ្លាំងក្លា សម្រាប់​ការវិនិយោគ ការប្រកប​អាជីវកម្ម និង​ការរស់នៅ៕

World Bank ត្រៀមបញ្ចេញប្រាក់២ពាន់លានដុល្លារដើម្បីគាំទ្រការផ្តល់វ៉ាក់សាំងដល់ប្រទេសកំពុងអភិវឌ្ឍន៍

ដោយៈ ម៉ាណេត

អន្តរជាតិៈ ធនាគារពិភពលោក (World Bank) ត្រៀមបញ្ចេញប្រាក់២ពាន់លានដុល្លារអាមេរិក នៅ ចុងខែមេសានេះ ដើម្បីជួយគាំទ្រការផ្តល់វ៉ាក់សាំង បង្ការជំងឺកូវីដ១៩ ដល់ប្រទេសកំពុងអភិវឌ្ឍន៍ ចំនួន៤០ នៅលើពិភពលោក។ នេះបើយោងតាមការ ចេញផ្សាយរបស់សារព័ត៌មាន Reuters នាព្រឹក ថ្ងៃសៅរ៍ ទី១០ ខែមេសា ឆ្នាំ២០២១។

នាយកចាត់ចែងប្រតិបត្តិការនៃធនាគារពិភពលោក លោក អាសែល វ៉ាន ត្រូតសិនប៊ឺក (Axel van Trotsenburg) បានឱ្យដឹងថា កញ្ចប់ថវិកា ២ពាន់លានដុល្លារខាងលើនេះ គឺជាផ្នែកមួយនៃក ញ្ចប់ថវិកាធំ១២ពាន់លានដុល្លារ ដែល ធនាគារពិភពលោក បានត្រៀមទុកជាស្រេច ដើម្បី គាំទ្រដល់កម្មវិធីចាក់វ៉ាក់សាំង ទៅដល់បណ្តាប្រទេស មានប្រាក់ចំណូលទាប និងប្រទេសមានប្រាក់ចំណូល មធ្យមកម្រិតទាប។

ប្រធានធនាគារពិភពលោកលោក ដេវីដ ម៉ាលផាស (David Malpass) បានថ្លែងទៅកាន់ គណៈកម្មាធិការអភិវឌ្ឍរបស់ក្រុមអ្នកផ្តល់កម្ចី នៅ ធនាគារពិភពលោកថា យើងអាចនឹងបង្កើនការផ្តល់ រហូតដល់៤ពាន់លានដុល្លារអាមេរិក សម្រាប់កម្មវិធី ជួយទ្រទ្រង់វ៉ាក់សាំង ដល់ប្រទេសចំនួន៥០ នៅពាក់ កណ្តាលឆ្នាំ២០២១។

ក្រុមអ្នកជំនាញសុខាភិបាលទូទាំងពិភពលោក បាន ព្រមានកន្លងមកនេះ ថា ការធ្វើសង្គ្រាមប្រឆាំងវីរុស កូរ៉ូណាអាចនឹងត្រូវបរាជ័យ ប្រសិនបើប្រទេសកំពុង អភិវឌ្ឍ មិនទទួលវ៉ាក់សាំងគ្រប់គ្រាន់ទេនោះ។

ដោយឡែក អង្គការសុខភាពពិភពលោក (WHO) ក៏ ធ្លាប់បានលើកឡើងផងដែរថា វ៉ាក់សាំងដែលមាន ស្រាប់ អាចនឹងលែងមានប្រសិទ្ធភាព ប្រសិនបើវីរុស (COVID-19) នៅតែបន្តរាតត្បាត ហើយបំប្លែងខ្លួនជា បន្តបន្ទាប់នោះ៕

អ្នកឧកញ៉ាពុង ឃាវសែផ្តល់សាលពិព៌ណនិងសន្និបាតកោះពេជ្រជាកន្លែងព្យាបាលអ្នកជំងឺកូវីដ១៩

ដោយៈ គង់ ម៉ាលីន

ភ្នំពេញៈ ដោយសារចំ​នូនអ្នកជំងឺកូវីដ១៩ កើនឡើងលើសការរំពឹងទុក អ្នកឧកញ៉ាពុង ឃាវសែអគ្គនាយកក្រុមហ៊ុនOCICបានផ្តល់សាលពិព៌ណ និងសន្និបាតកោះពេជ្រជាកន្លែងព្យាបាលអ្នកជំងឺកូវីដ១៩។

សម្តេចតេជោហ៊ុន សែននាយករដ្ឋមន្រ្តីនៃកម្ពុជាបានថ្លែងក្នុងសសេចក្តីថ្លែងការ​ណ៍ពិសេសចេញពីគេហដ្ឋាននាព្រឹកថ្ងៃទី១០ មេសានេះថា  រយៈពេលពីរថ្ងៃនេះ អ្នកជំងឺកូវីដ១៩ លើសពីសមត្ថភាពមន្ទីរពេទ្យហ្លួងម៉ែ និង Great Duck។ អ្នកឧកញ៉ា ពុង ឃាវសែ ផ្តល់អគារពិព័រណ៍ និងអគាររៀបចំការនៅកោះពេជ្រ សម្រាប់ធ្វើជាកន្លែងព្យាបាលអ្នកជំងឺកូវីដកូវីដ១៩។

ជាមួយគ្នានេះ សម្តេចតេជោ ហ៊ុន សែន បានបញ្ជាឱ្យកងទ័ពចេញជួយរៀបចំអគារនៅកោះពេជ្រសម្រាប់ព្យាបាលអ្នកជំងឺ ហើយក្រសួងសុខាភិបាលចាត់ចែងរៀបចំគ្រែ។

ឆ្លើយតបការរីករាលដាលជំងឺកូវីដ១៩ ទៅដល់តាមបណ្តាខេត្តនានា សម្តេចតេជោ ហ៊ុន សែន ណែនាំទៅគ្រប់ខេត្ត ឱ្យពង្រីកសមត្ថភាពមន្ទីរពិសោធន៍ ដើម្បីធ្វើតេស្តបានលឿន។ ខេត្តនីមួយៗ ក៏ត្រូវរៀបចំឲ្យមានគ្រែ សម្រាប់អ្នកជំងឺកូវីដ១៩ ឲ្យបានយ៉ាងតិចសម្រាប់ខេត្តនិមួយៗ៕

សម្តេចតេជោបញ្ជាឲ្យរដ្ឋមន្រ្តីក្រសួងយុត្តិធ៌មរៀបចំកាត់ទោស និងរៀបកន្លែងឃុំខ្លួនអ្នកបំពានលើចត្តាឡីស័ក

          ដោយៈ គង់ សូរិយា

          ភ្នំពេញៈ សម្តេចតេជោហ៊ុន សែននាយករដ្ឋមន្រ្តីនៃកម្ពុជាបានណែនាំរដ្ឋមន្រ្តីក្រសួងយុត្តិធ៌ម ធ្វើការជាមួយតុលាការ ដើម្បីកាត់ទោសអ្នកបំពានការធ្វើចត្តាឡីស័ក និងរៀបចំកន្លែងអ្នកទោសដែលផ្ទុកជំងឺកូវីដ១៩។

សម្តេចតេជោហ៊ុន សែននាយករដ្ឋមន្រ្តីនៃព្រះរាជាណាចក្រកម្ពុជា បានមានប្រសា​សន៍ ក្នុងសេចក្តីថ្លែងសារពិសេសនាព្រឹកថ្ងៃទី១០ មេសានេះ ដោយបានណែនាំឱ្យរៀបចំកន្លែងឃុំខ្លួន អ្នកទោសដែលមានផ្ទុកជំងឺកូវីដ១៩។

សម្តេចតេជោ បានណែនាំលោក កើត រិទ្ធ រដ្ឋមន្ត្រីក្រសួងយុត្តិធម៌ ធ្វើការងារជាមួយតុលាការ ដើម្បីកាត់ទោសអ្នកបំពានលើច្បាប់កូវីដ១៩ ពាក់ព័ន្ធការធ្វើចត្តាឡីស័ក។

មានមនុស្សទំនើងមួយចំនួន បានរត់គេចពីកន្លែងធ្ចើចត្តាឡីស័ក ដោយបានបង្កការចំលងជំងឺកូវីដ១៩ទៅអ្នកដទៃ ដែលបញ្ហានេះបានធ្វើឲ្យរីករាលដាល និងកើតមានព្រឹត្តិការណ៍២០ កុម្ភៈ។

ទាក់ទងបញ្ហានេះប្រជាពលរដ្ឋជាច្រើន បានស្នើសុំប្រមុខរដ្ឋាភិបាលកម្ពុជាដាក់ទោសឲ្យបានធ្ងន់ធ្ងរបំផុត និងគ្មានការលើកលែង លើអ្នកបំពានការធ្វើចត្តាឡីស័ក៕

ដំណឹងល្អ! ក្រុមហ៊ុនសិង្ហបុរីMVLកៀរគរទុនបាន១៥លានដុល្លារដើម្បីផលិតម៉ូតូតុក តុកនៅកម្ពុជា

ដោយៈសុខុម

ភ្នំពេញ:  ក្រុមហ៊ុនសិង្ហបុរី MVL ដែលនៅពីក្រោយកម្មវិធីហៅតាក់ស៊ីអនឡាញឈ្មោះ TADA កៀរគរប្រមូលថវិកាបានចំនួន១៥លានដុល្លារអាមេរិក ដើម្បីផលិតម៉ូតូតុក តុក តុក នៅក្នុងប្រទេសកម្ពុជា។ នេះបើយោងតាមសារព័ត៌មាន The Business Times ចុះផ្សាយកាលពីថ្ងៃសុក្រ ទី៩ មេសា។

ការកៀរគរប្រមូលថវិកានេះ ត្រូវបានដឹកនាំដោយវិនិយោគិនចាស់Central ដែលជាក្រុមហ៊ុនផលិតគ្រឿងបន្លាស់រថយន្ត នៅក្នុងប្រទេសកូរ៉េខាងត្បូង និងមានការចូលរួមពីក្រុមហ៊ុន Trive ដែលមានមូលដ្ឋាននៅប្រទេសសិង្ហបុរី។
ម៉ូតូអគ្គិសនីម៉ូឌែលថ្មី ដែលមានឈ្មោះថា ONiONT1 នេះត្រូវបានអភិវឌ្ឍដោយសហការជាមួយក្រុមហ៊ុនCentral។ តុក តុកនេះ នឹងត្រូវប្រកាសបញ្ចេញជាផ្លូវការតាមរយៈក្រុមហ៊ុនMVL Energy ដែលជាបុត្រសម្ព័ន្ធរបស់ក្រុមហ៊ុន MVL។ តុក តុកនេះនឹងចូលរួមជាកម្លាំងបន្ថែមជាមួយTADA នៅក្នុងការផ្ដល់សេវាហៅតាក់ស៊ីអនឡាញ និងសេវាដឹកជញ្ជូនទំនិញនៅក្នុងរាជធានីភ្នំពេញ។

ក្រុមហ៊ុនMVL បានគូសបញ្ជាក់ថា ម៉ូតូអគ្គិសនីONiON T1 នេះនឹងជួយសន្សំសំចៃការចំណាយលើថ្លៃថាមពល មកនៅត្រឹមតែ៦០ដុល្លារប៉ុណ្ណោះក្នុងមួយខែ។ ក្រុមហ៊ុន ក៏មានគម្រោងសាងសង់ស្ថានីយបញ្ចូលអាគុយធំៗ នៅទូទាំងរាជធានីភ្នំពេញផងដែរ។

ម៉ូតូអគ្គិសនីនេះ នឹងត្រូវដំឡើងនៅតំបន់សេដ្ឋកិច្ច ពិសេសសុវណ្ណភូមិ ដែលមានទីតាំងស្ថិតនៅក្នុងខេត្តកណ្ដាល។

ក្រុមហ៊ុននិយាយថា ការបណ្ដាក់ទុននេះនឹងបង្កើតការងារថ្មី បានប្រមាណ៣៨០កន្លែងសម្រាប់ពលរដ្ឋក្នុងមូលដ្ឋាន។ បច្ចុប្បន្នខ្លួនកំពុងទទួលការកុម្ម៉ង់  ម៉ូតូអគ្គិសនីនេះ ហើយតាមការរំពឹងទុករថយន្តផលិតដំបូង នឹងមានលក់លើទីផ្សារកម្ពុជា នៅត្រឹមចុងឆ្នាំ២០២១។

លោក Kay Woo នាយកប្រតិបត្តិក្រុមហ៊ុន MVL មានប្រសាសន៍ថា “ក្នុងនាមក្រុមហ៊ុន យើងបានផ្តោតលើការផ្សារភ្ជាប់គម្លាតបច្ចេកវិទ្យា ដើម្បីធ្វើឱ្យម៉ូតូអគ្គិសនីមានតម្លៃធូរថ្លៃ ហើយការបញ្ចេញជាផ្លូវការនូវម៉ូតូថ្មីនេះ នឹងជួយត្រួសត្រាយផ្លូវសម្រាប់ការពង្រីកទៅផលិតម៉ូឌែលយានយន្តអគ្គិសនីផ្សេងៗទៀត”។

បច្ចុប្បន្ន កម្មវិធីហៅតាក់ស៊ីអនឡាញឈ្មោះTADA របស់ក្រុមហ៊ុនMVL មានវត្តមាននៅប្រទេសសិង្ហបុរី វៀតណាម និងប្រទេសកម្ពុជា ដោយមានអ្នកតៃកុងប្រហែល១០០.០០០នាក់ និងអ្នកប្រើប្រាស់ប្រមាណ៨៩០,០០០នាក់៕

រដ្ឋាភិបាលបានទទួលចំណូលជាង១៦០០លានដុល្លារពីអគ្គនាយកដ្ឋានពន្ធដារនិងគយ

          ដោយៈលក្ខិណា

ភ្នំពេញៈ ទោះបីជាកម្ពុជា ស្ថិតនៅក្នុងដំណាក់កាលដ៏ពិបាកយ៉ាងណាក្ដី តែកម្ពុជានៅតែទទួលបានចំណូលពីពន្ធដារ និងពន្ធគយដដែលជាក់ស្ដែងរយៈពេល៣ខែ ដើមឆ្នាំ២០២១នេះ ចំណូលពន្ធដារមានជាង១ពាន់លានដុល្លារអាមេរិក និងពន្ធគយជា៦០០លានដុល្លារអាមេរិកនេះ។

សម្ដេចអគ្គមហាសេនាបតីតេជោហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាថ្លែងសារពិសេស កាលពីព្រឹកថ្ងៃទី ១០ មេសា ២០២១នេះឲ្យដឹងថា កម្ពុជានៅតែមានទុនបម្រុង សម្រាប់ប្រើប្រាស់ហើយថវិកាបម្រុងរបស់កម្ពុជា ដែលមានបច្ចុប្បន្ននេះ អាចបើកប្រាក់ខែជូនមន្ត្រីរាជការបានបីឆ្នាំទៀត មិនមែនរដ្ឋាភិបាលកម្ពុជាអត់មានថវិកានោះទេ ។សម្ដេចតេជោហ៊ុនសែនបានឱ្យដឹងថា គ្រាន់តែខែមីនាកន្លងទៅចំណូលពីពន្ធដារបានទទួលចំនួនរហូតដល់ជាង៦០០លានដុល្លារអាមេរិក ហើយចំណូលថវិកាពីពន្ធគយជាង២០០លាន ដូច្នេះវាមានចំនួន៨០០លានដុល្លារក្នុងរយៈពេលមួយខែនៃខែមីនា។

កាលពីឆ្នាំ២០២០កន្លងទៅ អគ្គនាយកដ្ឋានពន្ធដារនៃក្រសួងសេដ្ឋកិច្ច និងហិរញ្ញវត្ថុបានបង្ហាញចំណូល ដែលពន្ធដារប្រមូលបានគឺមានទំហំច្រើន ជាងកាលពីឆ្នាំ២០១៩ដែលជាពេលវេលាមុនមានវិបត្តិទៅទៀត។

ការកើនឡើងនៃចំណូលនេះ គឺបានធ្វើឱ្យមានភ្ញាក់ផ្អើលមិននឹកស្មានថា ទោះស្ថិតនៅក្នុងវិបត្តិយ៉ាងណាក្ដី តែពន្ធដារនៅតែទទួលបានចំណូលខ្ពស់ ជាងការគ្រោងទុកទៅទៀត ។ ថ្មីៗនេះដែររដ្ឋាភិបាលបានចេញអនុក្រឹត្យមួយទៀត ស្តីពីការអនុវត្តអាករលើតម្លៃបន្ថែមចំពោះ ពាណិជ្ជកម្មតាមប្រព័ន្ធអេឡិចត្រូនិក ដែលនឹងធ្វើឱ្យកម្ពុជាអាចទទួលចំណូ​លពីវិស័យពាណិជ្ជកម្មតាមប្រព័ន្ធអេឡិចត្រូនិក៕

ដំណឹងល្អ | វ៉ាក់សាំងរាប់លានដូសនឹងមកដល់កម្ពុជាជាបន្តបន្ទាប់ទៀត

          ដោយៈសុខហេង

          ភ្នំពេញៈ ដំណឹងល្អសំរាប់ប្រជាពលរដ្ឋកម្ពុជា ដោយវ៉ាក់សាំងរាប់លានដូសទៀតនឹងមកដល់កម្ពុជា នៅពេលខាងមុខឆាប់ៗ និងជាបន្តបន្ទាប់ទៀត ដើម្បីចាក់ជូនប្រជាពលរដ្ឋកម្ពុជា។
យោងតាមពព៌តមានដែលយើងទទួលបាន នៅក្នុងប្រព័ន្ឋតេឡេក្រាមឈ្មោះឯកសារសាធារណៈបានឲ្យដឹងថា កម្ពុជានឹងទទួលបានវ៉ាក់សាំង៥០ម៉ឺនដូស នឹងមកដល់នៅថ្ងៃ១៧ ខែមេសា និងទទួលបាន១,៥លានដូស នៅខែឧសភាខាងមុខនេះ។ ជាមួយគ្នានេះ នៅខែមិថុនាខាងមុខ កម្ពុជានឹងទទួលបានវ៉ាក់សាំង បង្ការជំងឺកូវីដរហូតដល់៣លានដូស និង២លានដូសនៅខែកក្កដា និងចំនួន១លានដូសទៀត នៅក្នុងខែសីហាផងដែរ។
          ប្រជាជនកម្ពុជាបាន និងកំពុងវ៉ាក់សាំងកើនឡើង និងប្រជាជនកាន់តែច្រើនកំពុងចង់ទទួលបានវ៉ាក់សាំង ដោយសារការរីករាលដាលជំងឺកូវីដ១៩ ក្នុងសហគមន៍នៃព្រឹត្តិ​ការណ៍២០កុម្ភៈកាន់តែច្រើន៕

ប្រមុខរដ្ឋាភិបាលបាលបញ្ចេញប្រាក់៥០០០លានរៀលសម្រាប់ការបិទខ្ទប់់តំបន់

ដោយៈ រតនៈ

ភ្នំពេញៈ បន្ទាប់់ពីរដ្ឋបាលរាជធានីភ្នំពេញ ប្រកាសបិទខ្ទប់តំបន់ចំនួន៣កាលពីយប់ថ្ងៃទី៩ ខែ មេសា នៅថ្ងៃទី ១០ ខែ មេសានេះ ប្រមុខរដ្ឋាភិបាលកម្ពុជាបានប្រកាសបញ្ចេញប្រាក់៥ពាន់លានរៀល ដើម្បីជួយដល់ប្រជាពលរដ្ឋក្នុងតំបន់ដែលរាំងខ្ទប់នេះ។

មានប្រសាសន៍ចេញពីគេហដ្ឋានផ្ទាល់នៅថ្ងៃទី១០ ខែ មេសានេះ ប្រមុខរាជរដ្ឋាភិបាលកម្ពុជាសម្តេចតេជោហ៊ុន សែន បានបញ្ជាឲ្យអភិបាលរាជធានីភ្នំពេញបញ្ចេញកម្លាំងសមត្ថកិច្ច ដើម្បីគ្រប់គ្រងតំបន់ដែលត្រូវបានប្រកាសរាំងខ្ទប់។ ប្រមុខរដ្ឋាភិបាលបាល ចេញប្រាក់៥ពាន់លានរៀលដើម្បីទិញអង្ករ ចែកជូនគ្រួសារដែលរស់នៅក្នុងតំតំបន់ ដែលបិទខ្ទប់នេះ ក្នុងនោះសម្តេចតេជោ បានបែងចែកប្រាក់ចំនួន៣០ម៉ឺនរៀលផងដែរ។

កាលពីយប់ថ្ងៃទី៩ ខែមិនា រដ្ឋបាលរាជធានីភ្នំពេញ បានប្រកាសបិទខ្ទប់១៤ថ្ងៃតំបន់​មួយចំនួន រួមមាន សង្កាត់ស្ទឹងមានជ័យ១ ស្ទឹងមានជ័យ២ ក្នុងខណ្ឌមានជ័យ, សង្កាត់ទ្រង់មាន់ ខណ្ឌសែនសុខ ដែលមានប្រជាជនរស់នៅប្រមាណ១ម៉ឺនគ្រួសារ និងសង្កាត់ចោមចៅ១ សង្កាត់កាកាបទី១ និងសង្កាត់កាកាប់ទី២ ដែលសរុបមានចំនួន៦ភូមិ ស្ថិតនៅក្នុងខណ្ឌពោធិ៍សែនជ័យ។

ការប្រកាសបិទខ្ទប់រយៈ១៤ថ្ងៃនេះ ចាប់ពីថ្ងៃទី១០ ខែមេសា នេះបន្ទាប់ពីមានវិជ្ជមានកូវីត១៩នេះខ្លាំងនៅតំបន់ទាំងនោះ៕

សម្ដេចតេជោស្នើដល់ធនាគារ និងគ្រឹះស្ថានហិរញ្ញវត្ថុកុំផាកពិន័យអតិថិជនរបស់ខ្លួនដែលកំពុងរងគ្រោះដោយកូវីដ១៩

ដោយៈ រ៉ាណេត

ភ្នំពេញៈ សម្ដេចតេជោ ហ៊ុន សែន នាយករដ្ឋមន្ត្រីកម្ពុជាបានថ្លែងសារស្នើសុំទៅដល់បណ្តាធនាគារឯកជន និងគ្រឹះស្ថានហិរញ្ញវត្ថុ គួរកុំមានការផាកពិន័យចំពោះអតិថិជនដែលជាកូនបំណុលរបស់ខ្លួន ដែលកំពុងរងគ្រោះដោយសារតែវិបត្តិ នៃជំងឺកូវីដ១៩ក្នុងព្រឹត្តិការណ៍២០កុម្ភៈកំពុងរាតត្បាត។

នៅក្នុងពិធីថ្លែងសារពិសេសជូនជនរួមជាតិនៅព្រឹកថ្ងៃទី១០ ខែមេសា ឆ្នាំ២០២១នេះ សម្ដេចតេជោ ហ៊ុន សែន បានមានប្រសាសន៍ថា ពាក់ព័ន្ធទៅនឹងកម្មករដែលបាត់បង់ការងារធ្វើ រាប់ទាំងអ្នកដែលកំពុងរងគ្រោះ និងជាប់ពាក់ព័ន្ធទៅនឹងកូវីដ១៩ផងដែរនោះ សូមស្នើសុំដល់ធនាគារ ត្រូវសិក្សាជាមួយអតិថិជនផ្ទាល់ពីលទ្ធភាព នៃការបង់ប្រាក់ និងការសងត្រឡប់។

សម្ដេចតេជោបានមានប្រសាសន៍ថា “អ្នកកើតជំងឺកូវីដដែលមិនមានលទ្ធភាពក្នុងការរកចំណូល គួរទទួលបានការពន្យាពេលសង ការរួចផុតពីការផាកពិន័យ ហើយរៀបចំឥណទានឡើងវិញយ៉ាងណានោះគឺត្រូវធ្វើជាកស្ដែង”។ សម្តេចបន្តថា “”ខ្ញុំសូមអរគុណចំពោះបណ្តាធនាគារ និងគ្រឹះស្ថានហិរញ្ញវត្ថុទាំងអស់ ដែលបានចេញគោលការណ៍អនុ​គ្រោះមួយចំនួន ដើម្បីរួមចំណែកបន្ធូរបន្ថយភាពតានតឹងនៃវិបត្តិដែលកំពុងមាន”។

ជាមួយនឹងការបង្ហាញពីការថ្លែងអំណរគុណខាងលើនេះ សម្ដេចតេជោក៏បានស្នើសុំទៅដល់បណ្តាធនាគារ និងគ្រឹះស្ថានហិរញ្ញវត្ថុផងដែរថា បន្ថែមពីគោលការណ៍នៃការអនុគ្រោះទៅលើអតិថិជន ដែលជាកូនបំណុលរបស់ខ្លួន ដែលមានជំងឺកូវីដមិនត្រូវបានផាកពិន័យលើការបង់ប្រាក់ និងមិនត្រូវបានទាមទាក្នុងការបង់ប្រាក់ប្រចាំខែ ចំនួនមួយខែនោះ គួរអនុគ្រោះឱ្យបានយ៉ាងតិច២ខែ ដើម្បីអាចទុកលទ្ធភាពដល់កូនបំណុលក្នុងស្ថានភាពដែលកំពុងប្រឈមនៅពេលបច្ចុប្បន្ន។

សម្ដេចបានបញ្ជាក់ថា “ក្នុងដំណាក់កាលនេះ មិនគួរត្រូវបានប្រើនោះទេនូវពាក្យថា ផាកពិន័យ ការរឹបអូសទ្រព្យសម្បត្តិកូនបំណុលពីសំណាក់ធនាគារ”។

ទន្ទឹមនឹងការថ្លែងអំណរគុណ ចំពោះការចូលរួមរបស់សមាគមធនាគាឯកជន និងគ្រឹះស្ថានហិរញ្ញវត្ថុកម្ពុជា តាមរយៈការចេញនូវគោលការណ៍អនុគ្រោះ ដល់អតិថិជនដែលជាកូនបំណុលរបស់ខ្លួននោះ សម្ដេចក៏បានថ្លែងអំណរគុណ ចំពោះបណ្តាក្រុមហ៊ុន និងអ្នកអភិវឌ្ឍន៍ ក្នុងវិស័យអចលនទ្រព្យ ដែលបានអនុវត្តតាមការអំពាវនាវរបស់រាជរដ្ឋាភិបាលក្នុងការពន្យាពេលបង់ប្រាក់រំលស់ ជាមួយអតិថិជនរបស់ខ្លួនផងដែរ ដែលទាំងអស់នេះ គឺជាការបង្ហាញពីសកម្មភាពនៃការចូលរួម និងចែករំលែកក្នុងគ្រាដែលមានផលលំបាកនៅក្នុងប្រទេសកម្ពុជា៕