កម្ពុជា កំពុងរៀបចំសាងសង់ឃ្លាំងស្តុកវ៉ាក់សាំង Covid-19 មានសីតុណ្ហភាព ៨០អង្សារក្រោមសូន្យ

ដោយ ៖ រ៉ាណេត

ភ្នំពេញ ៖ តាមរយៈសារជាសំឡេង សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជាបានបញ្ជាក់ឱ្យដឹងថា ពេលនេះក្រសួងសុខាភិបាលបាន និងកំពុងរៀបចំសាងសង់សឃ្លាំងសុវត្ថិភាពសម្រាប់ស្តុកវ៉ាក់សាំង Covid-19 ដែលមានកំណត់សីតុណ្ហភាពរហូតដល់៨០អង្សារក្រោមសូន្យ ។

សម្ដេចតេជោ ហ៊ុន សែន បានមានប្រសាសន៍ថា “លោកជំទាវ យក់ សម្បត្តិ បានរាយការណ៍ឱ្យខ្ញុំបានដឹងអំពីការសាងសង់ឃ្លាំង សម្រាប់ការស្តុកទុក ដែលនៅក្នុងកន្លែងស្តុកទុកនោះ យើងអាចស្តុកទុកគឺមានកម្រិតរហូតទៅដល់ ៨០អង្សារក្រោមសូន្យ (-៨០អង្សារសេ)។ ប៉ុន្តែក៏មានក្នុងកម្រិត ៤០អង្សារ (ក្រោមសូន្យ) ឬក៏ ៣០អង្សារ (ក្រោមសូន្យ) ឬក៏ប៉ុន្មានអង្សារ។ ក៏ប៉ុន្តែកម្រិតអតិបរមា គឺបានទៅដល់ ៨០អង្សារក្រោមសូន្យឯណោះ។ អ៊ីចឹងកន្លែងស្តុក មិនជាពិបាកពេកទេ ជំរុញនូវការសាងសង់ រួចទម្រាំនឹងការបញ្ជាទិញ ល្មមស៊ីសង្វាក់គ្នា ជាមួយនឹងការមកដល់នៃវ៉ាក់សាំង”។

សម្រាប់វ៉ាក់សាំងដែលនឹងត្រូវបញ្ជាទិញក្នុងជំហានដំបូង ត្រូវបានសម្តេចតេជោ ហ៊ុន សែន បញ្ជាក់ថា បានត្រៀមទិញចំនួន1លានដូស ដើម្បីចាក់ជូនប្រជាជន ដោយឥតគិតថ្លៃ នៅកន្លែងដែលមានហានិភ័យខ្ពស់ និងអ្នកដែលមានហានិភ័យ។ ប៉ុន្តែពុំទាន់កំណត់ថា នឹងទិញពីប្រទេសណានៅឡើយនោះទេ ហើយសម្តេចបានស្នើយោបល់ថា ក្រុមគ្រូពេទ្យគួរតែជាជម្រើសអាទិភាពទីមួយសម្រាប់ការទទួលវ៉ាក់សាំង បន្ទាប់មកគឺគ្រូបង្រៀន កងកម្លាំងប្រដាប់អាវុធ និងមន្ត្រីយុត្តិធម៌ ៕

ខេត្តចំនួន៣កំពុងប្រជែងពីគម្រោងបង្កើតក្រុងរណប

ដោយ ៖ រ៉ាណេត

ភ្នំពេញ ៖ នៅក្នុងផែនការនៃការអភិវឌ្ឍស្របតាមគោលនយោបាយរបស់រាជរដ្ឋាភិបាលកម្ពុជា បច្ចុប្បន្ននេះមានខេត្តចំនួន៣បានបង្ហាញពីគោលបំណងនៃការបង្កើតក្រុងរណបក្នុងនាមជាមជ្ឈមណ្ឌលពាណិជ្ជកម្មថ្មី។

ផែនការនៃការបង្កើតក្រុងរណបនៅខេត្តចំនួន៣រួមមានខេត្តសៀមរាប ខេត្តកែប និងខេត្តមណ្ឌលគីរី ដែលត្រូវបានលើកឡើងដោយក្រសួងទេសចរណ៍កាលពីពេលកន្លងទៅថ្មីៗនេះ។

ខេត្តកែប ៖អភិបាលខេត្តកែប លោក សោម ពិសិដ្ឋ

បានបង្ហាញពីគម្រោងក្នុងការបង្កើតទីក្រុងរណបថ្មីមួយនៅក្នុងខេត្តដើម្បីទាក់ទាញវិនិយោគិនជាតិ និងអន្តរជាតិចូលមកបណ្តាកទុនវិនិយោគនៅក្នុងខេត្តកាន់តែច្រើន។ គម្រោងបង្កើតឱ្យមានទីក្រុងរណបនេះ គឺដើម្បីផ្តល់ឱកាសការងារជូនពលរដ្ឋនៅក្នុងខេត្ត ដើម្បីកាត់បន្ថយការធ្វើនេសាទខុសច្បាប់ និងអភិវឌ្ឍន៍ឱ្យសាកសមជាខេត្តទេសចរណ៍ធម្មជាតិ ដែលស្របទៅនឹងរាជរដ្ឋាភិបាលដាក់ចេញទិសដៅថាខេត្តកែបទៅថ្ងៃក្រោយទៅជាខេត្តទេសចរណ៍ធម្មជាតប្រណិតកម្រិតខ្ពស់ ។
ជាមួយគ្នានេះ លោកអភិបាលខេត្តកែបក៏បានជំរុញនិងលើកទឹកចិត្តដល់អាជីវករ វិនិយោគិនលើវិស័យទេសចរណ៍ សណ្ឋាគារ ដើម្បីចូលរួមអភិវឌ្ឍន៍ខេត្តកែបកាន់តែរីកចម្រើនបន្ថែមទៀត ខណៈខេត្តជាប់មាត់សមុទ្រមួយនេះ បាននឹងកំពុងមានភាពទាក់ទាញលើវិស័យទេសចរណ៍។

ខេត្តសៀមរាប ៖ សម្រាប់ខេត្តសៀម ក៏មានគម្រោងអភិវឌ្ឍន៍

និងបង្កើតជាក្រុងថ្មីមួយទៀតដែលស្ថិតនៅក្នុងស្រុកបន្ទាយស្រី ដែលកំពុងកំណើការអភិវឌ្ឍន៍ជាជំហានៗក្រោមការគ្រប់គ្រងដោយលោក ឃីម ហ្វីណង់ ជាអភិបាលស្រុក។

បច្ចុប្បន្ននៅក្នុងស្រុកបន្ទាយស្រីត្រូវបានគេមើលឃើញថាកំពុងមានអភិវឌ្ឍនៅតាមភូមិ ឃុំគោលដៅមួយចំនួន ដូចជាការស្ថាបនាហេដ្ឋារចនាសម្ព័ន្ធ ការអនុវត្តនូវគោលនយោបាយផ្ទះមួយអំពូលមួយ រួមជាមួយនឹការបង្កើតជាភូមិទេសចរណ៍ និងវប្បធម៌ប្រចាំតំបន់ បន្ថែមពីលើតំបន់ទេសចរណ៍ធម្មជាតិដែលមានស្រាប់។
នៅក្នុងយុទ្ធនាការ «ផ្ទះ១អំពូល១» ផ្តើមចេញពីការបំភ្លឺអំពូល នៅតាមផ្ទះនីមួយៗនៅទូទាំងស្រុកបន្ទាយស្រី ខេត្តសៀមរាបចំនួន១ម៉ឺនខ្នង ត្រូវបានចាប់ផ្តើមអនុវត្តជាជំហានដំបូងនៅក្នុងភូមិព្រះដាក់។ យុទ្ធនាការនេះបានប្រែក្លាយភូមិជនបទជាភូមិគំរូ និងទទួលបានការស្វាគមន៍ច្រើនពីអ្នកភូមិ។

ខេត្តមណ្ឌលគីរី ៖ ខេត្តដែលស្ថិតនៅប៉ែកឦសាននៃប្រទេស

និងស្ថិតនៅក្នុងគម្រោងប្រែក្លាយជាប៉ូលសេដ្ឋកិច្ចពិសេសមួយនេះក៏មានផែនការបង្កើតក្រុងរណបថ្មីមួយផងដែរ នៅក្នុងស្រុកអូររាំង ដែលមានគម្រោងសាងសង់ព្រលានយន្ដហោះជាចំណុចទាក់ទាញការវិនិយោគជាសំខាន់។
គោលបំណងនៃការបង្កើតក្រុងរណបនេះ ត្រូវបានប្រកាសឡើងតាមរយៈកិច្ចប្រជុំស្តីពីគម្រោអភិវឌ្ឍន៍ខេត្តមណ្ឌលគីរីរបស់ក្រសួងទេសចរណ៍កាលពីសប្ដាហ៍កន្លងទៅដោយលោកបណ្ឌិត ថោង ខុន រដ្ឋមន្ត្រីក្រសួងទេសចរណ៍។ លោកបានបញ្ជាក់ថា នៅក្នុងផែនការមេនេះគ្រោងនឹងដាក់ឆ្លងការសម្រេចពីសំណាក់រាជរដ្ឋាភិបាលនៅដើមឆ្នាំក្រោយ ដោយនឹងមានការអភិវឌ្ឍន៍ជាច្រើនកន្លែង រួមជាមួយនឹងការបង្កើនតំបន់ទេសចរធម្មជាតិកែច្នៃ ដែលជាផលិតផលទេសចរណ៍ថ្មីៗទាំងនៅក្នុង និងក្រៅក្រុងផងដែរដើម្បីធ្វើយ៉ាងណាឱ្យខេត្តមណ្ឌលគីរីក្លាយជាគោលដៅទេសចរណ៍ និងវិនិយោគកម្រិតខ្ពស់៕

ទំហំពាណិជ្ជកម្មទ្វេភាគីកម្ពុជា-អាមេរិកសម្រេចបានទឹកប្រាក់រហូត ដល់៥,៨ពាន់លានដុល្លារ

ដោយៈម៉ាណេត

ភ្នំពេញៈ ការធ្វើពាណិជ្ជកម្មទ្វេភាគីរវាងកម្ពុជា និងសហរដ្ឋអាមេរិកមានទំហំទឹកប្រាក់ប្រមាណ៥,៨ពាន់លានដុល្លារ ក្នុងរយៈពេល១០ខែដំបូងនៃឆ្នាំនេះ កើនឡើង១៦ភាគរយ បើធៀបនឹងរយៈពេលដូចគ្នាកាលពីឆ្នាំមុន។

យោងតាមតួលេខពីការិយាល័យជំរឿនសហរដ្ឋអាមេរិក ដែលបានចេញផ្សាយនៅថ្ងៃទី៧ ខែធ្នូ ឆ្នាំ២០២០ បានបង្ហាញថា ចាប់ពីខែមករាដល់ខែតុលា ឆ្នាំ២០២០ ប្រទេសកម្ពុជាបាននាំចេញ ផលិតផលគិតជាទឹកប្រាក់ប្រមាណ៥,៥ពាន់លានដុល្លារទៅសហរដ្ឋអាមេរិក កើនឡើង២១ភាគរយ។

ទន្ទឹមនឹងនេះដែរ ការនាំចូលទំនិញរបស់កម្ពុជា ពីសហរដ្ឋអាមេរិកមានតម្លៃ២៦៩លានដុល្លារធ្លាក់ចុះ៣៩ភាគរយ បើប្រៀបធៀបនឹងរយៈពេលដូចគ្នាកាលពីឆ្នាំមុន។

ផលិតផលនាំចេញសំខាន់ៗរបស់កម្ពុជា ទៅកាន់សហរដ្ឋអាមេរិក រួមមាន ផលិតផលវាយនភណ្ឌ ស្បែកជើង ទំនិញធ្វើដំណើរ និងផលិតផលកសិកម្ម ខណៈដែលការនាំចូលរបស់កម្ពុជា ពីសហរដ្ឋអាមេរិករួមមានយានយន្ត ចំណីសត្វ និងគ្រឿងម៉ាស៊ីន។

យោងតាមស្ថានទូតអាមេរិកប្រចាំកម្ពុជាបានឱ្យដឹងថា ពាណិជ្ជកម្ម ពិសេសលទ្ធភាពចូលទៅក្នុងទីផ្សារសហរដ្ឋអាមេរិក បានផ្តល់ប្រយោជន៍ដល់ប្រទេសកម្ពុជាយ៉ាងច្រើន ក្នុងពេលរាប់ឆ្នាំមកនេះ។ សហរដ្ឋអាមេរិក គឺជាគោលដៅនាំចេញធំជាងគេរបស់ប្រទេសកម្ពុជា […]។

ការនាំចេញនេះ ជួយឲ្យប្រជាជនកម្ពុជារាប់ម៉ឺននាក់មានការងារធ្វើ រាប់ពីការងារតាមរោងចក្រនៅក្រុងព្រះសីហនុ និងក្រុងបាវិត ដល់កសិករនៅខេត្តបាត់ដំបង និងកំពង់ចាម ដល់អ្នកជំនាញព័ត៌មានបច្ចេកវិទ្យា នៅភ្នំពេញ។ ការនាំចេញទាំងនេះមានចំណែកយ៉ាងសំខាន់ក្នុងកំណើនសេដ្ឋកិច្ចដ៏ច្រើនរបស់កម្ពុជា។

ការនាំចេញរបស់កម្ពុជាថែមទាំងផ្តល់ការចំណេញ ដល់អតិថិជនអាមេរិកផងដែរ ដោយផ្តល់ឲ្យនូវជម្រើស។ ពេលនេះមានទំនិញពីកម្ពុជា នៅក្នុងហាងក្នុងសហរដ្ឋអាមេរិកច្រើនជាងពេលណាទាំងអស់។

ទំនិញទាំងនេះមានមិនត្រឹមតែសម្លៀកបំពាក់ និងស្បែកជើងតែប៉ុណ្ណោះទេ តែថែមទាំងមានផលិតផលកសិកម្ម ដែលបានទទួលរង្វាន់ ដូចជា ម្រេចកំពត និងអង្ករកម្ពុជា។ លើសពីនេះទៀត លោកអ្នកអាចឃើញមានទំនិញសម្រាប់ការធ្វើដំណើរ ដែលធ្វើនៅកម្ពុជា មានលក់កាន់តែច្រើនឡើងនៅក្នុងសហរដ្ឋអាមេរិក។

បន្ទាប់ពីសហរដ្ឋអាមេរិក បានផ្តល់ការលើកលែងពន្ធគយ ដល់ទំនិញសម្រាប់ការធ្វើដំណើរ នៅឆ្នាំ២០១៦ នៅក្រោមកម្មវិធីនៃប្រព័ន្ធផ្តល់ការអនុគ្រោះទូទៅ (GSP) ទំនិញសម្រាប់ការធ្វើដំណើរដែលនាំចេញពីកម្ពុជា មានតម្លៃកើនពី៥០លានដុល្លារដល់ជិត ១ ពាន់លានដុល្លារ។

ពាណិជ្ជកម្មទ្វេភាគីរវាងប្រទេសទាំងពីរ មានទំហំទឹកប្រាក់ប្រមាណ៥,៨ពាន់លានដុល្លារអាមេរិក កើនឡើង៣៧ភាគរយ កាលពីឆ្នាំ២០១៩ បើធៀបនឹងឆ្នាំ២០១៨៕

តោះ! មកស្គាល់ទីតាំងអចលនទ្រព្យមានតម្លៃខ្ពស់បំផុតទាំង១០នៅប្រទេសអង់គ្លេស

ដោយៈសុខុម

អង់គ្លេសៈ ប្រទេសអង់គ្លេសធ្លាប់ជាចក្រភពមួយ ដែលមានឥទ្ឋិពលយ៉ាងខ្លាំង និងជាប្រទេសអភិវឌ្ឍន៍មួយ ដែលមានសេដ្ឋកិច្ចរីកចម្រើនជាងគេទាំង១០ នៅលើពិភពលោក ពិសេសតម្លៃអចលនទ្រព្យក៏មានតម្លៃខ្ពស់ផងដែរ។

តើអចលនទ្រព្យនៅតំបន់ណាខ្លះ ដែលមានតម្លៃខ្ពស់ តោះយើងទៅសិក្សាស្វែងយល់ទាំងអស់គ្នា។

ក្រុងបឺមីងហែម (Birmingham) បានជាប់ចំណាត់ថ្នាក់កំពូល ក្នុងតារាងឈ្មោះតំបន់ដែលមានតម្លៃខ្ពស់បំផុត ក្នុងទីផ្សារអចលនទ្រព្យរបស់ចក្រភពអង់គ្លេស ក្រៅពីក្រុងឡុងដ៍ ហើយក្រុងអេឌីនបឺក (Edinburgh) ជាប់ចំណាត់ថ្នាក់លេខ២ ចំណែកឯក្រុងលីតស៍ (Leeds) ជាប់ចំណាត់ថ្នាក់លេខ៣ ។

ដោយមានអចលនទ្រព្យចំនួន ៤៤១.៥៣៦កន្លែង ហើយតម្លៃផ្ទះជាមធ្យមមានតម្លៃចាប់ពី១៨៩.៩៨៨ផោន (២៥១.៤៧៧ ដុល្លារ) ក្រុងបឺមីងហែម គឺជាទីផ្សារអចលនទ្រព្យមួយ ដែលមានតម្លៃសរុបរហូតដល់ទៅ៨៣.៩ពាន់លានផោន (ជិត ១១២ ពាន់លានដុល្លារ)។ នេះបើយោងតាមទិន្នន័យប្រមូលដោយ GetAgent ដែលជាគេហទំព័រប្រៀបធៀបភ្នាក់ងារអចលនទ្រព្យ។

គេហទំព័រដដែលបានធ្វើការវិភាគទៅលើតួលេខ នៃតារាងលំនៅដ្ឋានទទួលបានពីគេហទំព័រ Gov.uk និងតម្លៃផ្ទះជាមធ្យមនាពេលបច្ចុប្បន្ន ដែលចេញដោយអាជ្ញាធរមូល ដ្ឋានដើម្បីស្ទង់មើលថា តើតំបន់ណាខ្លះមានតម្លៃខ្ពស់បំផុតក្នុងទីផ្សារអចលនទ្រព្យ។

ទីក្រុងអេឌីនបឺក ជាប់ចំណាត់ថ្នាក់លេខ២ ជាទីផ្សារអចលនទ្រព្យមានតម្លៃខ្ពស់បំផុតក្រៅពីក្រុងឡុងដ៍ ដោយទីផ្សារអចលនទ្រព្យមានតម្លៃប្រមាណ៧០.៦ពាន់លានផោន (ជាង ៩៤ ពាន់លានដុល្លារ)។

ក្រុងលីតស៍ ជាប់ចំណាត់ថ្នាក់លេខ៣ ចំណែកឯតំបន់ខនវ៉ល (Cornwall) តំបន់វីលសៀ (Wiltshire) ក្រុងប្រ៊ីស្តូល (Bristol) ក្រុងមាត់ឆ្នេរប៊នមៅស៍ (Bournemouth) ក្រុងមាត់ឆ្នេរភូល (Poole) ក្រុងប្រាយថុន (Brighton) ក្រុងមាត់ឆ្នេរហូវ (Hove) ក្រុងក្លាសហ្គូវ (Glasgow) ក្រុងមែនឆេស្ទ័រ (Manchester) និងក្រុងសេហ្វៀល (Sheffield) ក៏ជាប់ឈ្មោះ ជាតំបន់ ដែលទីផ្សារអចលនទ្រព្យមានតម្លៃខ្ពស់បំផុតដែរ ក្រៅពីក្រុងឡុងដ៍ដ៏ឆើតឆាយ៕

អ្នកជំនាញ៖គម្រោងសាងសង់ផ្សារទំនើបនានានៅក្នុងទីក្រុងភ្នំពេញនៅតែដំណើរការធម្មតា

ដោយៈវុត្ថា

ភ្នំពេញៈ បើទោះបីជំងឺកូវីដ១៩ បាននឹងកំពុងញាំញីនៅក្នុងប្រទេសកម្ពុជារហូតមកដល់បច្ចុប្បន្ននេះយ៉ាងណាក្តី អ្នកជំនាញនៅតែមើលឃើញថា ដំណើរការនៃការសាងសង់គម្រោងផ្សារទំនើបទាំងធំ និងតូចៗ នានៅក្នុងប្រទេសនៅតែដំណើរការជាធម្មតា។

លោកឃាង ពុទ្ធី ប្រធានក្រុមប្រឹក្សាភិបាល នៃសមាគមអ្នកជំនាញអចលនវត្ថុកម្ពុជាបានប្រាប់គេហទំព័រPropertyarea.asia កាលពីថ្ងៃទី ៧ ខែធ្នូឆ្នាំ ២០២០ កន្លងមកនេះថា ដំណើរការនៃសាងសង់ផ្សារទំនើបនានា នៅតែដំណើរការធម្មតា បើទោះបីកន្លងមកនេះមានបញ្ហាខ្លះ ដែលជំរុញឱ្យមានការបិទផ្សារទំនើបក៏ដោយ។

លោកថ្លែងថា `វាដំណើរការធម្មតា ខណៈដែលជាងសំណង់ ក៏ត្រូវបានអនុវត្តតាមវិធានការរបស់រាជរដ្ឋាភិបាលកម្ពុជាជាធម្មតា។ បញ្ហាអាចនឹងមានបញ្ហាខ្លះ ដោយសារបញ្ហាគម្លាតសង្គម ព្រោះត្រូវចូលរួមទាំងអស់គ្នា ដើម្បីទប់ស្កាតា់រីករាលដាលនៃជំងឺកូវីដ ១៩” ។

លោកឃាង ពុទ្ឋីបានបន្តថា “យើងត្រូវចូលរួមទាំងអស់គ្នា ជាមួយរាជរដ្ឋាភិបាល ក្នុងការទប់ស្កាត់អោយបានទាំងជាងសំណង់ ពលរដ្ឋធម្មតា អ្នករកស៊ី និងអ្នកទាំងអស់គ្នាដើម្បីប្រទេសយើងមានសុវត្ថិភាពខ្ពស់ពីជំងឺកូវីដ១៩” ។

បើតាមលោក ឃាង ពុទ្ធី នៅក្នុងប្រទេសកម្ពុជានាពេលពច្ចុប្បន្ននេះ មានផ្សារទំនើបទាំងតូច និងធំប្រមាណ៣០បាននឹងកំពុងសាងសង់ ព្រោះគម្រោងខុនដូខ្លះ ក៏មានផ្សារទំនើបនៅក្នុងទីនោះដែរ។

លោកឡុង គឹមសួគ៌ អគ្គនាយក្រុមហ៊ុន Century21 Advance ធ្លាប់បានឱ្យដឹងថា សម្រាប់គម្រោងសាងសង់ផ្សារទំនើប អាចនឹងមានបញ្ហាខ្លះពាក់ព័ន្ធ នឹងការនាំចូលសម្ភារៈបរិក្ខាផ្សេងៗ ពីក្រៅប្រទេសដោយសារបញ្ហាជំងឺកូវីដ១៩ ប៉ុន្តែយ៉ាងគម្រោងទាំងអស់នៅតែដំណើរការជាធម្មតា។

លោកបន្តថា ជំងឺកូវីដ១៩បាន និងកំពុងធ្វើឱ្យមានបញ្ហាទាំងអាជីវកម្ម និងវិស័យអចលនទ្រព្យ ប៉ុន្តែសម្រាប់កម្ពុជាមិនធ្ងន់ធ្ងរនោះទេ ហើយបញ្ហានេះអាចនឹងត្រូវបានដោះស្រាយឆាប់ខាងមុខនេះ បន្ទាប់ពីពិភពលោករកឃើញនូវវាក់សុំាងសម្រាប់ព្យាបាល” ៕

តើភ្នាក់ងារលក់ដីឡូតិ៍ត្រូវសិក្សាលើកត្តាអ្វីខ្លះ ដើម្បីលក់ឱ្យទទួលបានជោគជ័យ?

ដោយៈវុត្ថា

ភ្នំពេញៈ ភ្នាក់ងារលក់វិស័យអចលនទ្រព្យ ជាពិសេសលក់ដីឡូតិ៍មានភាពងាយស្រួល ទាមទារឱ្យមានភាពអត់ធ្មត់ ព្យាយាម និងសិក្សាឱ្យបានគ្រប់ជ្រុងជ្រោយ ដើម្បីកលក់ឱ្យទទួលបានជោគជ័យ ដើម្បីជាផលប្រយោជន៍សម្រាប់ផ្ទាល់ខ្លួនផង និងក្រុមហ៊ុនផងដែរ។

ការលក់ដីឡូត៍ប្រកដណាស់ មានភាពផលលំបាកមួយចំនួន ដែលទាមទាឱ្យភ្នាក់ងារលក់ស្វែងយល់ និងសិក្សាឱ្យបានស៊ីជម្រៅជុំវិញគម្រោងឡូតិ៍នោះដូចជា៖

១) សក្តានុពលតំបន់

ដីឡូតិ៍ស្ថិតនៅក្នុងតំបន់ ដែលពុំមានសក្តានុពល គឺមានផលលំបាកសម្រាប់ភ្នាក់ងារលក់ចេញ ដែលទាមទា និងស្វែងវិធីសាស្ត្របែបណា ដើម្បីប្រែក្លាយតំបន់នោះឱ្យទៅជាតំបន់ដែលមានតំបន់សក្តានុពល ដោយពង្រីកសោភណភាពល្អ និងមានគំនិតច្នៃប្រឌិតខ្ពស់ឱ្យស្របទៅនឹងអ្វីដែលកំពុងធ្វើ ដើម្បីយកព័ត៌មានទាំងអស់នេះ ទៅអតិថិជនឱ្យមានភាពជឿជាក់មកលើគម្រោងវិនិយោគ។

២) ទីតាំងភូមិសាស្ត្រ

ទីតាំងភូមិសាស្ត្រក៏ជារឿងសំខាន់ផងដែរ សម្រាប់ភ្នាក់ងារលក់ដីឡូតិ៍ ដែលអ្នកខ្លះយល់ឃើញថា ការវិនិយោគដីឡូតិ៍នៅក្នុងភូមិសាស្ត្រ ឆ្ងាយពិបាករកភ្ញៀវឱ្យមកទិញ តែ សម្រាប់ លោក លោកស្រី ដែលមានបទពិសោធន៍វិញយល់ថា បើក្នុងនាមជាភ្នាក់ងារលក់គឺមិនការលំបាកទេក្នុងការលក់។

៣) អតិថិជន

អតិថិជនភាគច្រើនដែលដើររកទិញដីឡូតិ៍ គឺពួកគាត់ទិនៅតំបន់ណា ដែលមានផ្លូវរដ្ឋខ្វាត់ខ្វែងព័ទ្ធជុំវិញ ។ ម្យ៉ាងទៀត អតិថិជនផ្សេងទៀត ពិនិត្យទៅលើតំបន់ និងខេត្តណាដែលមានការអភិវឌ្ឍន៍ និងរីកចំរើនលឿននៅក្នុងស្ថានភាពជាក់ស្តែង។ បើទោះបីដីឡូតិ៍នោះ នៅឆ្ងាយពីផ្លូវ ឬនៅឆ្ងាយពីតំបន់អភិវឌ្ឍន៍ ក៏ពួកគាត់នៅតែទិញផងដែរ។ បើសិនឱ្យកាន់តែទាក់ទាញពីអតិថិជន ត្រូវរៀបចំកែលម្អសោភណភាព មានហេដ្ឋារសម្ព័ន្ធផ្លូវថ្នល់ឱ្យបានល្អ និងបណ្តាញអគ្គិសនីប្រើសប្រាស់ឱ្យបានត្រឹមត្រូវ នោះភ្នាក់ងារលក់លក់ឆាប់អស់គម្រោង។

៤) អាជ្ញាធរមូលដ្ឋាន

អតិថិជនមុននឹងសម្រេចចិត្តទិញឡូតិ៍ ពួកគេតែងតែសាកសួរព័ត៌មានជុំវិញគម្រោងដីឡូតិ៍នោះទេ ប្រការនេះក្នុងនាមភ្នាក់ងារលក់ ត្រូវធ្វើកិច្ចសហការ រៀបចំច្បាប់ឱ្យបានត្រឹមត្រូវ និងត្រូវយល់ឱ្យបានច្បាស់ពីអាជ្ញាធរ ។នៅពេលដែលយើងបានធ្វើដូច្នេះ ហើយ អ្វីៗនឹងល្អប្រសើរ ដល់ការលក់គម្រោងដីឡូតិ៍មានប្រសិទ្ធខ្ពស់៕

អ្នកជំនាញអះអាងថា ឆ្នាំ២០២១ តម្លៃអចលនទ្រព្យនៅក្នុងរាជធានីភ្នំពេញនៅតែរក្សាបានលំនឹង

ដោយៈ រ៉ាណេត

ភ្នំពេញ ៖ ក្រោមហេតុផលសំខាន់ៗមួយចំនួនបានធ្វើឱ្យបណ្តាអ្នកជំនាញ និងជាប្រតិបត្តិករ នៅក្នុងវិស័យអចលនទ្រព្យបង្ហាញពីភាពជឿជាក់ថា នៅដើមឆ្នាំ២០២១ខាងមុខនេះ តម្លៃអចលនវត្ថុនៅក្នុងរាជធានីភ្នំពេញ នឹងនៅតែបន្តបាននូវភាពលំនឹងដដែល ពោលគឺមិនមានការធ្លាក់ចុះនោះទេ។

លោកស្រីអាន សុធីតា នាយិកាប្រចាំប្រទេសក្រុមហ៊ុន CBRE Cambodia បានមានប្រសាសន៍ឲ្យដឹងកាលពីរសៀលថ្ងៃទី៧ ធ្នូកន្លងមកថា រហូតដល់ឆ្នាំ២០២១ខាងមុខនេះ តម្លៃអចលនវត្ថុនៅក្នុងរាជធានីភ្នំពេញ ដែលរួមមានតម្លៃដីធ្លី និងសំណង់លំនៅដ្ឋាននានានៅតែបន្តរក្សាបាននូវលំនឹងដូចឆ្នាំ២០២០ដដែល។

លោកស្រីបានបញ្ជាក់ “ទាំងតម្លៃដី ទាំងតម្លៃអចលនវត្ថុផ្សេងៗ ដូចជា សំណង់លំនៅដ្ឋាន ខុនដូជាដើម គឺអាចបន្តបានស្ថានភាពដូចបច្ចុប្បន្នដដែល លើកលែងតែម្ចាស់អចលវត្ថុមួយចំនួនតូច ដែលមានបញ្ហាចរន្តសាច់ប្រាក់បន្ទាន់ ពួកគាត់អាចនឹងបង្ខំចិត្តប្រកាសលក់ក្នុងតម្លៃមួយទាបជាងទីផ្សារតែប៉ុណ្ណោះ” ។

លោកស្រីបន្តថា “នៅក្នុងរាជធានីភ្នំពេញ បើនិយាយពីតម្រូវការនៃការប្រើប្រាស់ដីសម្រាប់អភិវឌ្ឍន៍ គម្រោងផ្សេងៗគឺនៅតែបន្តមាន ប៉ុន្តែចំពោះផ្ទៃដីដែលទំនេរហាក់មិនមានច្រើននោះទេ ដែលជាហេតុជំរុញឱ្យតម្លៃដីឡើងថ្លៃជារៀងរាល់ឆ្នាំ លើកលែងតែក្នុងអំឡុងឆ្នាំ២០២០នេះ ដោយសារតែបញ្ហានៃជំងឺឆ្លង ដែលកំពុងរាតត្បាតជាសាកល ទើបធ្វើឱ្យតម្លៃនៅលើទីផ្សាររួមស្ថិតនៅក្នុងសភាពទ្រឹង ប៉ុន្តែមិនធ្លាក់ចុះនោះទេ” ។

ជាមួយគ្នានេះ ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា លោកច្រឹក សុខនីម បានមានប្រសាសន៍ថា ចំពោះតម្លៃដីនៅក្នុងរាជធានីភ្នំពេញ មានអត្រាមិនស្មើគ្នានោះទេ ដោយក្នុងនោះតម្លៃដីដែលថ្លៃជាងគេជាងគេ ក្នុងចំណោមខណ្ឌទាំង១៤ គឺខណ្ឌដូនពេញ ខណ្ឌបឹងកេងកង ខណ្ឌ៧មករា និងខណ្ឌទួលគោក ហើយតម្លៃទាប ឬខ្ពស់ក៏អាស្រ័យទៅតាមផ្លូវផងដែរ។

លោកថា “ដីស្ថិតនៅកណ្តាលក្រុង ជាពិសេសនៅតាមបណ្តាផ្លូវ និងមហាវិថីសំខាន់ៗ គឺមានតម្លៃខុសៗពីគ្នា ហើយក៏មិនសូវមានការទិញ លក់យ៉ាងគគ្រឹកគគ្រេង ដូចដីនៅតំបន់ផ្សេងទៀត ដែលស្ថិតនៅជាយក្រុងនោះដែរ រហូតត្រូវបានអ្នកជំនួញលើវិស័យមួយនេះចាត់ទុកថា ជាតំបន់ដីកម្រ” ។

លោកបានបញ្ជាក់ថា ដីដែលស្ថិតនៅតាមបណ្តាផ្លូវខាងលើនេះ គឺត្រូវបានគេគិតជាចំណែកផ្សេងៗពីគ្នា ដូចជាផ្លូវព្រះមុន្នីវង្ស រាប់គិតត្រឹមតែពីម្ដុំផ្សារថ្មីមកដល់តំបន់ពេទ្យចិនអាចមានតម្លៃចន្លោះពី៥០០០-៦០០០ដុល្លារក្នុងមួយម៉ែត្រការ៉េ ឬអាចលើសពីនេះអាស្រ័យលើទំហំដី និងតម្រូវការជាក់ស្ដែង។ បើគិតចាប់ពីម្ដុំពេទ្យរហូតដល់ម្ដុំស្តុបបូគោអាចមានចន្លោះ៤០០០-៥០០០ដុល្លារក្នុងមួយម៉ែត្រការ៉េ។

ដោយឡែក ដីដែលស្ថិតនៅក្នុងតំបន់មានប្រជាប្រិយភាពខ្ពស់ នៃខណ្ឌបឹងកេង សង្កាត់បឹងកេង១ មានតម្លៃស្ថិតនៅក្នុងចន្លោះ៤៥០០-៦០០០ នឹងអាចលើសពីនេះក៏មានផងដែរ៕

ចំណេះដឹង! ហេតុអ្វីរដ្ឋាភិបាលចាំបាច់កំណត់ប៉ូលអភិវឌ្ឍន៍សេដ្ឋកិច្ច?

ដោយៈវុត្ថា

ភ្នំពេញៈ ការកំណត់ប៉ូលអភិវឌ្ឍសេដ្ឋកិច្ច គឺជាការរៀបចំដែនដីនៅក្នុងប្រទេសកម្ពុជាធ្វើឡើង ក្នុងក្របខណ្ឌទូទាំងប្រទេស ដើម្បីធនាបាននូវចីរភាព សមធម៌ តុល្យភាព និងការធ្វើសមាហរណកម្មទាំងក្នុងប្រទេស ក្នុងតំបន់ និងក្នុងក្របខណ្ឌអន្តរជាតិ។

យោងតាមឯកសាររបស់ក្រសួងរៀបចំដែនដី នគរូបនីយកម្ម និងសំណង់ស្តីពីគោលនយោបាយជាតិរៀបចំដែនដីកម្ពុជាបានឱ្យដឹងថា ដោយធនធានមានកំណត់ និងដើម្បីធានានូវការផ្គត់ផ្គង់ ការរៀបចំដែនដីត្រូវធ្វើទៅតាមលំដាប់នៃអាទិភាព ចំពោះតំបន់ដែលមានកំណើនប្រជាជន និងសេដ្ឋកិច្ចខ្ពស់មានជាអាទិ៍ ប៉ូលអភិវឌ្ឍរាជធានីភ្នំពេញ ប៉ូលអភិវឌ្ឍសៀមរាប និងប៉ូលអភិវឌ្ឍព្រះសីហនុ ។

ប៉ូលសេដ្ឋកិច្ចទាំងនេះ គឺជាប៉ូលនៃកំណើនខ្ពស់ ដែលបានលេចចេញជារូបរាងពិតប្រាកដតាមរយៈសក្តានុពល និងសកម្មភាព ព្រមទាំងអ័ក្សនៃការអភិវឌ្ឍ រួមមាន អ័ក្សភ្នំពេញ-ព្រះសីហនុ តាមបណ្តោយផ្លូវជាតិលេខ៤ ឬភ្នំពេញ-តំបន់ឆ្នេរតាមបណ្តោយផ្លូវជាតិលេខ៣ និងលេខ៤ ។ អ័ក្សភ្នំពេញសៀមរាប តាមបណ្តោយផ្លូវជាតិលេខ៦ អក្សភ្នំពេញ-បាវិត តាមបណ្តោយផ្លូវជាតិលេខ១ ។ អ័ក្សភ្នំពេញ-ប៉ោយប៉ែត តាមបណ្តោយផ្លូវជាតិលេខ ៥ អ័ក្សភ្នំពេញ-ឥសាន ភ្ជាប់ទៅប្រទេសវៀតណាម និងឡាវ តាមបណ្តោយផ្លូវជាតិលខេ ៦ និងលេខ៧ ។

អ័ក្សតំបន់ឆ្នេរ ដែលភ្ជាប់ពីប្រទេសថៃ កាត់តាមខេត្តកោះកុង ខេត្តព្រះសីហនុ ខេត្តកំពត និងខេត្តកែបទៅប្រទេសវៀតណាម គឺជាអក្សដែលស្ថិតនៅក្នុងក្របខណ្ឌជាតិ និងក្របខណ្ឌតំបន់ និងអន្តរជាតិ ដូចជាអាស៊ាន និងមហាអនុតំបន់ទន្លេមេគង្គជាមួយគ្នានេះ មានអ័ក្សនៅតាមបណ្តោយផ្លូវទឹក រួមមានទន្លេមេគង្គ ទន្លេសាប បឹងទន្លេសាប និងទន្លេបាសាក់។

ដើម្បីទាញយកផលជាអតិបរមា តំបន់ស្នូល ដែលស្ថិតនៅតាមបណ្តោយអ័ក្សនៃការអភិវឌ្ឍនេះ រួមជាមួយតំបន់ស្នូលជាយុទ្ធសាស្ត្រជួរមុខ នៅតាមបណ្តោយព្រំដែន គួរត្រូវបានយកចិត្តទុកដាក់ខ្ពស់ផងដែរ។ ដោយឡែករាជរដ្ឋាភិបាល កំពុងជំរុញយុទ្ធសាស្ត្រ ដើម្បីឱ្យលេចចេញជាប៉ូលសេដ្ឋកិច្ចមួយទៀត នៅក្នុងភូមិភាគឥសាននាពេលអនាគត ដោយមានកិច្ចសហការ ឱ្យមានជាតំបន់ត្រីកោណក្នុងក្របខណ្ឌតំបន់ និងអន្តរជាតិ។

រដ្ឋបាលថ្នាក់ក្រុង ស្រុក ខណ្ឌ និងឃុំ សង្កាត់ដែលទទួលបន្ទុកការរៀបចំដែនដី និងផែនការប្រើប្រាស់ដី ជាអ្នកទទួលខុសត្រូវផ្ទាល់ ទៅតាមគោលនយោបាយរបស់រាជរដ្ឋាភិបាល ។ មុខងារ និងភារកិច្ចជាមូលដ្ឋានមួយចំនួន ដែលឃុំមិនអាចធ្វើបាន ត្រូវផ្តល់ការទទួលខុសត្រូវនៅកម្រិតរដ្ឋបាលខ្ពស់ជាង ដែលជាតំបនន់ស្នូលដោយត្រូវបន្សី រវាងតំបន់ស្នូល និងតំបន់ទ្រនាប់ដែលនៅជុំវិញ និងត្រូវតភ្ជាប់គ្នាដោយបណ្តាញគមនាគមន៍ ដែលជាអក្សនៃការអភិវឌ្ឍ។

វិធានការនៃការរៀបចំដែនដី ក៏ត្រូវពិចារណាលើទិដ្ឋភាព សមធម៌សង្គម ដូចជាតម្រូវការខាងលំនៅឋានសមស្រប និងមានតុល្យភាពរវាងលទ្ធភាព ដែលគ្រួសារក្រីក្រ និងអ្នកមានប្រាក់ចំណូលទាប អាចរកបានលំនៅឋានសមរម្យ និងតម្រូវការសេដ្ឋកិច្ចរបស់រដ្ឋ និងផ្នែកឯកជន។

ផែនការអភិវឌ្ឍទីក្រុង ក្រៅពីផ្តល់ការងារធ្វើត្រូវគិតគូរជាអាទិភាព ដល់ការរៀបចំកន្លែងសម្រាប់លម្ហែសាធារណៈ ធានាបាននូវការរស់នៅប្រកបដោយគុណភាព សុវត្ថិភាព បរិស្ថានល្អ និងសោភ័ណភាព ព្រមទាំងការកំណត់ តំបន់គ្រង់គ្រងពិសេសសម្រាប់រៀបចំតំបន់ខ្សែក្រវ៉ាត់បៃតងក្រុង។

ការកសាងផែនការ និងការអភិវឌ្ឍលំនៅឋាន ត្រូវផ្សារភ្ជាប់នឹងការអភិវឌ្ឍតំបន់សេដ្ឋកិច្ចផ្សេងៗ ជាពិសេសតំបន់ឧស្សាហកម្ម ដើម្បីរួមចំណែកដល់ការធ្វើឱ្យមានតុល្យភាពនៃរបាយប្រជាជនទូទាំងប្រទេស និងសមធម៌នៃការទទួលបាន នៃការអភិវឌ្ឍសេដ្ឋកិច្ច៕

លោកច្រឹក សុខនីម៖ តើគួរប្រើប្រាស់បំណុលបែបណា ដើម្បីទទួលបានប្រសិទ្ធភាពខ្ពស់ក្នុងវិស័យអចលនទ្រព្យកម្ពុជា?

ដោយ ៖ រ៉ាណេត

ភ្នំពេញ៖ ការវិនិយោគអចលនទ្រព្យ មិនថាការទិញដី ឬទិញលំនៅដ្ឋានសម្រាប់ស្នាក់នៅ ឬទុកលក់យកផលចំណេញវិញ មិនមែនជារឿងងាយស្រួលនោះទេ ហើយក៏មិនមែនជារឿងដែលពិបាកនោះដែរ ។ លោក ច្រឹក សុខនីម ប្រធានសមាគមភ្នាក់ងារ និងវាយតម្លៃអចលនវត្ថុកម្ពុជា នឹងចូលខ្លួនមកបកស្រាយលើប្រធានបទ “តើគួរប្រើប្រាស់បំណុលបែបណា ដើម្បីទទួលបានប្រសិទ្ធភាពខ្ពស់ ក្នុងវិស័យអចលនទ្រព្យកម្ពុជា”? ។

លោក ច្រឹក សុខនីម បានឱ្យដឹងថា ជាទូទៅ និង ភាគច្រើនៅក្នុងពិភពលោកតែងតែមានបំណុលដែលបំណុលទាំងនេះ មានលក្ខណៈជាគ្រួសារ សហគមន៍ ឯកជន ក្រុមហ៊ុន និងប្រទេសជាតិ ហើយនៅពេលដែលប្រើប្រាស់បំណុលទាំងនេះ មានប្រសិទ្ធិភាពនោះ នឹងជំរុញឱ្យជីវភាពនៅក្នុងស្ថានភាពសេដ្ឋកិច្ចគ្រួសារ សហគមន៍ ប្រទេស និង ក្រុមហ៊ុនមានការរីកចំរើន។

លោកពន្យល់ថា បំណុលគឺជាការប្រើប្រាស់ធនធានអ្នកដទៃ តាមរយៈការប្រើប្រាស់ជាថវិកា ឬជាទ្រព្យសម្បត្តិ និងអ្វីផ្សេងៗទៀតសម្រាប់ធ្វើការការដោះដូរ និងជាប្រយោជន៍ក្នុងការវិស័យជំនួញឱ្យមានប្រសិទ្ធិភាព ។

លោកបន្តថា នៅក្នុងការវិនិយោគលើវិស័យអចលនទ្រព្យ អ្នកវិនិយោគអាចស្វែងរកបំណុលតាមរយៈធនាគារដែលជាស្ថាប័នឯករាជ្យក្នុងការផ្តល់ប្រាក់កម្ចីដល់អតិថិជនទូទៅ ក្នុងការទិញលំនៅឋានសម្រាប់ស្នាក់នៅ ឬ ទិញលំនៅឋានសម្រាប់ធ្វើការវិនិយោគបន្ត ។

លោកពន្យល់ថា “មុនដំបូង យើងត្រូវធ្វើការសិក្សានូវគុណតម្លៃនៃវិស័យអចលនទ្រព្យដែលយើងត្រូវវិនិយោគ តើជាប្រភេទអចលនទ្រព្យបែបណា ។ ឧទាហរណ៍បើយើងវិនិយោគលើលំនៅឋាន ដូចជាផ្ទះ ឬខុនដូ ឬមួយជាគម្រោងដែលកំពុងសាងសង់ សម្រាប់ទុកវិនិយោគបន្ត ឬ សម្រាប់ជួលជាដើមនោះ យើងត្រូវសិក្សាពីចំណូល និងកំណើនតម្លៃអចលនទ្រព្យនៅពេលខាងមុខ ដោយធៀបជាមួយនឹងបំណុល” ។

លោកបន្ថែមទៀតថា “នៅពេលដែល យើងមានគម្រោងដាក់ទុនវិនិយោគលើវិស័យអចលនទ្រព្យប្រកបដោយចីរភាព យើង ត្រូវវិភាគអំពីឱកាសនៅក្នុងការវិនិយោគ រួមផ្សំជាមួយនឹងការសងត្រឡប់បូកជាមួយប្រាក់បំរ៉ុងទុក បើយើងមានធនធានទាំងអស់នេះ បំណុលនៅក្នុងវិស័យអចលនទ្រព្យ គឺ ទុន និងជាលទ្ធភាពល្អបំផុត ពីព្រោះ នៅពេលដែលយើងប្រើប្រាស់បំណុលធ្វើឱ្យយើងចំណេញពេលវេលា និងអាចធ្វើឱ្យជីវភាពដើរលឿនជាអ្នកដែលមិនប្រើប្រាស់បំណុល” ។

លោកបញ្ជាក់ថា “ដូច្នេះ នៅពេលដែលយើងប្រើប្រាស់បំណុលដែលត្រឹមត្រូវ ហើយ ស្ទង់មើលនូវឥទ្ធិពល នៅក្នុងកម្រិតដែលជាវិជ្ជមាន គឺជាហេតុផលចម្បងដែលធ្វើឱ្យសេដ្ឋកិច្ចក្រុមគ្រួសារ មានការរីកចំរើន។ ការប្រើប្រាស់បំណុល ជាទ្រព្យសម្បត្តិ នឹងទទួលបាននូវគុណតម្លៃពីការវិនិយោគ។ ជាមួយគ្នានេះ ដើម្បីទទួលបាននូវព័ត៌មានជុំវិញការប្រើប្រាស់បំណុលើការវនិយោគវិស័យអចលចនទ្រព្យ លោកអ្នកអាចប្រឹក្សាយោបល់ជាមួយភ្នាក់ងារអចលនវត្ថុ ឬ ក៏មន្ត្រីធនាគារ” ៕

ប្រទេសចិននឹងផ្តល់អាំងប៉ាវតាមប្រព័ន្ធអនឡាញដល់ប្រជាជនដើម្បីជំរុញការ ប្រើប្រាស់រូបិយប័ណ្ណឌីជីថលរបស់ខ្លួន

ដោយៈម៉ាណេត

ភ្នំពេញៈ ទីក្រុងមួយរបស់ប្រទេសចិន នឹងចែកចាយអាំងប៉ាវ តាមប្រព័ន្ធអនឡាញដល់ប្រជាជនរបស់ខ្លួន ដែលជាផ្នែកមួយនៃការជំរុញឱ្យប្រទេសនេះ ប្រើប្រាស់រូបិយប័ណ្ណឌីជីថលដំបូងគេនៅលើទឹកដីខ្លួន។ នេះបើយោងតាមការចេញផ្សាយរបស់សារព័ត៌មាន SCMP នៅថ្ងៃទី៧ ខែធ្នូ ឆ្នាំ២០២០។

យោងតាមសេចក្តីថ្លែងការណ៍មួយ ដែលត្រូវបានផ្សព្វផ្សាយកាលពីយប់ថ្ងៃសុក្រ កន្លងមកនេះបានឱ្យដឹងថា រដ្ឋាភិបាលក្រុងSuzhou បាននិយាយថា ខ្លួននឹងផ្តល់ប្រាក់ ២០លានយ័នដល់ប្រជាជនតាមរយៈឆ្នោត។

អាំងប៉ាវឌីជីថលសរុប១០០,០០០កញ្ចប់ ដែលនីមួយៗមានប្រាក់២០០យ័ន នឹងត្រូវចែកចាយដល់ប្រជាជន នៅថ្ងៃសុក្រខាងមុខនេះ ដែលជាថ្ងៃនៃពិធីបុណ្យទិញទំនិញទ្វេរដង។ អាំងប៉ាវទាំងអស់នេះ នឹងមានសុពលភាពរហូតដល់ថ្ងៃទី២៧ ខែធ្នូ។

ពលរដ្ឋចិនណា ដែលរស់នៅទីក្រុងភាគខាងកើតនេះ អាចចុះឈ្មោះដើម្បីទទួលបានប្រាក់តាមរយៈការលេងឆ្នោត តាមរយៈវិធីទូរស័ព្ទដៃ Suzhoudao របស់ទីក្រុងនេះ។

អ្នកឈ្នះនឹងទទួលបានអាំងប៉ានដីជីថល ដែលមាននិមិត្តរូបសំណាងល្អ តាមរយៈកម្មវិធីឌីជីថលRenminbi App ដែលមិនទាន់មានដើម្បីទាញយក ប៉ុន្តែអ្នកនឹងអាចដំណើរការកម្មវិធីនេះបាន ដើម្បីទទួលបានប្រាក់។

ប្រាក់យន់ឌីជីថល ដែលត្រូវបានស្គាល់ជាផ្លូវការជាការទូទាត់ តាមរូបិយប័ណ្ណអេឡិចត្រូនិកឌីជីថល (DCEP) គឺជាផ្នែកមួយនៃផែនការរបស់ប្រទេសចិន ក្នុងការឆ្ពោះទៅរកសង្គមមួយ ដែលមិនចាំបាច់មានសាច់ប្រាក់ក្នុងដៃ។

មិនដូច bitcoin និងរូបិយប័ណ្ណឌីជីថលផ្សេងៗទៀតទេ DCEP ត្រូវបានចេញ និងគាំទ្រដោយធនាគារកណ្តាលរបស់ប្រទេសចិន ហើយត្រូវបានប្រើប្រាស់ជាប្រាក់យ័នឌីជីថល។

ការផ្លាស់ប្តូររបស់ទីក្រុងSuzhouត្រូវបានធ្វើឡើង បន្ទាប់ពីទីក្រុង Shenzhen បានចាប់ផ្តើមការសាកល្បង ជាសាធារណៈទ្រង់ទ្រាយធំជាលើកដំបូង របស់ប្រទេសនេះសម្រាប់កំណែប្រែយន់ឌីជីថល កាលពីខែតុលា។

ហាងប្រហែល១០,០០០ នឹងចូលរួមនៅក្នុងការសាកល្បង របស់ទីក្រុង Suzhou ក្នុងការប្រើប្រាស់ប្រាក់ឌីជីថលនេះ ហើយវាក៏នឹងរួមបញ្ចូលផងដែរ នូវក្រុមហ៊ុន JD.com ដែលជាក្រុមហ៊ុនពាណិជ្ជកម្មអេឡិចត្រូនិកយក្ស របស់ប្រទេសចិនផងដែរ។

អ្នកឈ្នះឆ្នោតពីរបីរយនាក់ ក៏នឹងក្លាយជាអ្នកដំបូងគេ ដែលប្រើអ្វីដែលធនាគារកណ្តាលហៅថា “កាបូបក្រៅបណ្តាញពីរ” ដើម្បីទូទាត់ថ្លៃទំនិញនៅក្នុងហាងក្នុងស្រុក ដោយមិនចាំបាច់ភ្ជាប់អ៊ីនធឺណិត – ជំនួសការកត់ចំណាំ និងកាក់ដោយប្រើប្រាក់យ័នឌីជីថល។

ក្រុមប្រទេសG20 កំពុងសិក្សាស្វែងយល់អភិវឌ្ឍ ឬសាកល្បងរូបិយប័ណ្ណឌីជីថល ខណៈប្រទេសមិនមែនG20 ដូចជាប្រទេសស៊ុយអែត ន័រវែស ស្វ៊ីស និងកម្ពុជា ក៏កំពុងពិចារណាលើរូបិយប័ណ្ណឌីជីថល៕