សម្ដេចតេជោ ហ៊ុន សែន បដិសេធចំពោះព័ត៌មានថារដ្ឋាភិបាលបិទក្រុងភ្នំពេញ និងបណ្តាខេត្តមួយចំនួន

ដោយៈ គង់ សូរិយា

ភ្នំពេញៈ សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជាបានថ្លែងថា បងប្អូនជនរួមជាតិជាទីគោរពស្រឡាញ់ ថ្មីៗនេះមានមនុស្សអាក្រក់មួយចំនួន បានបំផុសពាក្យចចាមអារាមថា រាជរដ្ឋាភិបាលនឹងបិទរាជធានីភ្នំពេញ និងហាមឃាត់ការធ្វើដំណើរពីខេត្តមួយទៅកាន់ខេត្តមួយ។

សម្ដេចបានសរសេរលើបណ្តាញទំនាក់ទំនងសង្គមរបស់សម្តេចនាព្រឹកថ្ងៃទី១២ វិច្ឆុកានេះថា “ក្នុងឋានៈជាប្រមុខរាជរដ្ឋាភិបាល ខ្ញុំសូមបញ្ជាក់ថានឹងមិនមានការបិទប្រទេស ឬរាជធានីខេត្ត ឬតំបន់ណាមួយនោះទេ”។ សម្តេចបន្ថែមថា “”ការឃោសនាអកុសលរបស់ពួកអាក្រក់ទាំងនេះ សំដៅធ្វើឱ្យប្រទេសមានចលាចលទំនិញឡើងថ្លៃ ប្រជាជនរស់នៅមិនបានស្ងប់ចិត្ត ដើម្បីពួកគេគេងចំណេញខាងនយោបាយតែប៉ុណ្ណោះ”។

សម្តេចបន្ថែមថា បញ្ហាសំខាន់ក្នុងការប្រយុទ្ធជាមួយជម្ងឺកូវីដ-១៩នៅពេលនេះគឺប្រជាជនគ្រប់រូប ការពារខ្លួនតាមការណែនាំរបស់ក្រសួងសុខាភិបាល ពិសេសការពាក់ម៉ាស់ ការលាងដៃ ការមិនជួបជុំប្រមូលផ្តុំ ការរក្សាគម្លាតសុវត្ថិភាព។ល។

សម្ដេចបានបន្តទៀតថា “សម្រាប់ការពាក់ម៉ាស់ដែលកាលពីម្សិលមិញនេះ ខ្ញុំបានបញ្ជាឱ្យបញ្ចេញម៉ាស់ក្រណាត់ចំនួន២លានម៉ាស់ ជូនទៅសាលារាជធានីភ្នំពេញ ដើម្បីចែកជូនប្រជាជនក្រីក្រ”។ សម្តេចបន្តថា “នគរបាលចរាចរណ៍ក៏នឹងជូនម៉ាស់សម្រាប់អ្នកជិះកង់ជិះម៉ូតូដែលមិនបានពាក់ម៉ាស់”។

សូមបងប្អូនពាក់ម៉ាស់ទាំងអស់គ្នា ដើម្បីយើងឈានទៅបញ្ចប់ព្រិត្តិការណ៍៣វិច្ឆកាឱយបានឆាប់ ដើម្បីនាំប្រទេសមកកាន់ភាពប្រក្រតីដូចមុនថ្ងៃ៣ វិច្ឆិកា ២០២០វិញ។ សម្រាប់បងប្អូនដែលបាន និងកំពុងធ្វើចត្តាឡីស័កនៅតាមផ្ទះ ត្រូវបន្តធ្វើឱ្យបានហ្មត់ចត់នឹងសូមអាជ្ញាធរមូលដ្ឋានតាមដាន ត្រួតពិនិត្យ នឹងជួយដោះស្រាយជីវភាពសម្រាប់គ្រួសារក្រីក្រ ដែលពួកគាត់មិនអាចចេញប្រកបរបររកស៊ីបាន ក្នុងពេលធ្វើចត្តាឡីស័ក។ ត្រូវផ្តល់ស្បៀងអាហារ ជូនពួកគាត់កុំអោយពួកគាត់ខ្វះ ស្បៀងអាហារក្នុងពេលធ្វើចត្តាឡីស័ក”។

សូមជូនពរបងប្អូនជនរួមជាតិជួបតែសេចក្តីសុខសេចក្តីចំរើន៕

ធនាគារហត្ថានៅតែបន្តយុទ្ធសាស្ត្រក្នុងការចូលរួមលើកស្ទួយសេដ្ឋកិច្ចកម្ពុជា

ដោយ៖ ម៉ាណេត

ភ្នំពេញ៖ ធនាគារហត្ថា ម.ក ដែលបានប្រកាសប្រែក្លាយខ្លួនពីគ្រឹះស្ថានមីក្រូហិរញ្ញវត្ថុ ទៅជាធនាគារពាណិជ្ជដោយជោគជ័យ បាន និងកំពុងតែបន្តដំណើរការអាជីវកម្មប្រកបដោយភាពត្រឹមត្រូវ និងបន្តចូលរួមលើកកម្ពស់សេដ្ឋកិច្ចជាតិតាមរយៈផលិតផលហិរញ្ញវត្ថុរបស់ខ្លួន។

លោកឧកញ៉ា ហួត អៀងតុង ប្រធានអគ្គនាយកនៃធនាគារហត្ថា បានថ្លែងប្រាប់គេទំព័រ Cambodia Financial Times នៅថ្ងៃទី១១ ខែវិច្ឆិកា ឆ្នាំ២២០២០នេះ ថា ធនាគារ ហត្ថា នៅតែរីកចម្រើនធម្មតា ហើយការរីចម្រើននៅតែមានភាពប្រក្រតីធម្មតា។

លោកឧកញ៉ាបានថ្លែងថា “បើទោះបីយើងបានក្លាយជាធនាគាក៏ដោយ ក៏យើងនៅតែប្រកាន់នូវយុទ្ធសាស្ត្ររបស់យើង ផ្ដោតទៅលើទីផ្សារមីក្រូ បានន័យថា ផ្ដោតអារម្មណ៍ទៅលើអតិថិជន ដែលជាអតិថិជនតូចៗនៅតាមជនបទ ប្រកបរបរកសិកម្ម អតិថិជនជាស្ត្រី។ អ្នកទាំងអស់នោះ សុទ្ធតែជាអតិថិជនគោលដៅរបស់យើង” ។

លោកឧកញ្ញ៉ា បានថ្លែងបន្តទៀត “ដើម្បីចូលរួមលើកកម្ពស់សេដ្ឋកិច្ចជាតិ យើងផ្ដោតអារម្មណ៍ទៅលើវិស័យសហគ្រាសធុនតូច មធ្យម ឬ SMEs ដែលយើងគិតថា ជាវិស័យមួយ ដែលជួយជំរុញសេដ្ឋកិច្ចយើងឱ្យល្អប្រសើរ” ។

បច្ចុប្បន្ន ធនាគារជាច្រើន បាន និងកំពុងបង្ហាញវត្តមាននៅលើទីផ្សារកម្ពុជា ហើយបង្កើតជាទីផ្សារប្រកួតប្រជែងមួយក្នុងវិស័យហិរញ្ញវត្ថុនៅកម្ពុជា។

លោកឧកញ៉ា ហួត អៀងតុង បានឱ្យដឹងទៀតថា “យើងឃើញថា ការប្រកួតប្រជែងមានកាន់តែច្រើនឡើងៗ ហើយការប្រកួតប្រជែងក្នុងទីផ្សារកាន់តែជង្អៀត ដោយសារតែធនាគាមានចំនួនកាន់តែច្រើនទៅ។ ទីផ្សាររបស់យើងក៏មិនរីកលឿន ដូចជាចំនួនធនាគារ ដូច្នេះហើយធ្វើឱ្យមានការប្រកួតប្រជែងកាន់តែច្រើន” ។

លោកបានបន្តទៀតថា “តែទោះបីជាយ៉ាងណាក៏ដោយ យើងឃើញថា តម្រូវការនៅតែមាន ដោយសារតែធនាគាមួយចំនួនផ្តោតតែទៅលើជំនួញធំៗ ឫក៏អ្នកវិនិយោគក្រៅប្រទេស ប៉ុន្តែធនាគារ ហត្ថា របស់យើង ផ្តោតទៅលើអ្នក ដែលរស់នៅតាមជនបទ ដូច្នេះការប្រកួតប្រជែងរបស់យើងពុំសូវមាន ដូចធនាគាដទៃ” ។

ធនាគារ ហត្ថា បាន និងកំពុងតែបន្តដំណើរការអាជីវកម្មប្រកបដោយភាពត្រឹមត្រូវ ផ្អែកទៅតាមយុទ្ធសាស្ត្ររបស់ក្រុមហ៊ុនអាណាព្យាបាល ដើម្បីពង្រីក និងចាប់យកចំណែកទីផ្សារថ្មីៗ នៅក្នុងក្រុមប្រទេសរួមមានកម្ពុជា ឡាវ ភូមា និងវៀតណាម តាមរយៈបទពិសោធន៍អាជីវកម្មដ៏សម្បូរបែប ការបង្កើតនូវទម្រង់អាជីវកម្មថ្មីៗ និងការពង្រីកបណ្តាញប្រតិបត្តិការរបស់ខ្លួន។

បច្ចុប្បន្ន អតិថិជនសកម្មរបស់ធនាគារ ហត្ថា មានចំនួនជា ២០០,០០០នាក់ ហើយទ្រព្យសកម្មមានចំនួនជាង ១,៣០០ លានដុល្លាសហរដ្ឋអាមេរិក៕

គម្រោងតំបន់ទេសចរណ៍ដ៏ធំ “កំពតឋានសួគ៌” តម្លៃរាប់លានដុល្លារ ចាប់ផ្តើមបង្ហាញរូបរាងនិងសម្ពោធដំណាក់កាលដំបូងនៅដើមឆ្នាំ២០២១ខាងមុខនេះ

ដោយ ប្រុសពៅ

កំពត ៖ សម្របទៅនឹងគោលនយោបាយអាទិភាពរបស់រាជរដ្ឋាភិបាលកម្ពុជា ក្នុងការកែប្រែខេត្តកំពតឱ្យក្លាយជាគោលដៅទេសចរណ៍ធម្មជាតិដ៏ទាក់ទាញ និងល្បីល្បាញឈានមុខលំដាប់ពិភពលោក គម្រោងអភិវឌ្ឍន៍តំបន់ទេសចរណ៍កែច្នៃបែបធម្មជាតិ “កំពតឋានសួគ៌” បានបង្ហាញខ្លួនក្រោមការបណ្តាក់ទុនវិនិយោគពីវិស័យឯកជនក្នុងទំហំទុនរាប់លានដុល្លារ ដែលកំពុងទទួលបានការចាប់អារម្មណ៍ពីទេសចរជាតិ អន្តរជាតិយ៉ាងច្រើន។

លោកឧកញ៉ា នួន អក ម្ចាស់គំរោងអភិវឌ្ឈន៍គំរោងនេះបានមានប្រសាសន៍កាលពីល្ងាចថ្ងៃទី១១ ខែវិច្ឆិកា ឆ្នាំ២០២០ថា កំពត ជាខេត្តមួយដែលមានសក្ដានុពល និងអំណោយផលពីធម្មជាតិ ដែលក្រៅពីទីតាំងភូមិសាស្ត្រល្អជាតំបន់សមុទ្រ និងមានដៃសមុទ្រកាត់ខ្វាត់ខ្វែង នៅកៀកភ្នំពេញ ដែលមានភាពងាយស្រួល និងចំណាយពេលតិចក្នុងការធ្វើដំណើរ ហើយតម្លៃដីនៅទាបនៅឡើយ បើប្រៀបធៀបទៅនឹងខេត្តព្រះសីហនុ ដែលផ្តល់ភាពងាយស្រួលដល់អ្នកអភិវឌ្ឍន៍ និងមានឱកាសទទួលបានចំណេញច្រើនពីការវិនិយោគ។

លោកឧកញ៉ាបានបន្តថា “តាមរយៈភាពល្អប្រសើរនៃកត្តាភូមិសាស្ត្រ ជាពិសេសភាពអំណោយផលពីធម្មជាតិ ទៅលើវិស័យទេសចរណ៍ ខ្ញុំជឿជាក់ថា នៅថ្ងៃអនាគតខាងមុខដ៏ខ្លីនេះ ខេត្តកំពតនឹងទាក់ទាញទេសចរជាតិ និងអន្តរជាតិយ៉ាងច្រើនជាក់ជាមិនខាន ខណៈដែលបច្ចុប្បន្ននេះមានអ្នកវិនិយោគ និងអភិវឌ្ឍន៍ជាច្រើនចំណាយដើមទុនជាច្រើនលានដុល្លារលើការវិនិយោគ និងកែច្នៃជាតំបន់កម្សាន្តបែបធម្មជាតិជាច្រើនទីតាំង” ។

លោកឧកញ៉ា នួន អក បានមានប្រសាសន៍ប្រាប់ឱ្យថា នៅក្នុងចំណោមគម្រោងអភិវឌ្ឍន៍ និងកែច្នៃបង្កើតជាតំបន់កម្សាន្តលំហែរកាយបែបធម្មជាតិ នៅតំបន់ដែលមានជួរព្រៃភ្នំ ដងស្ទឹង ក៏ដូចជាដៃសមុទ្រជាច្រើនគម្រោងនោះ លោកក៏បានបោះដើមទុនជាច្រើនលានដុល្លារ ក្នុងការវិនិយោគបង្កើតតំបន់កម្សាន្ត និងលំហែរនៅក្នុងខេត្តកំពតផងដែរ ដោយមានឈ្មោះថា កំពតឋានសួគ៌ ស្ថិតនៅភូមិអង្គ ឃុំត្រពាំងព្រីង ស្រុកទឹកឈូ ខេត្តកំពត ។

លោកឧកញ៉ាបានបញ្ជាក់ថា “ជាគោលដៅនៃភាពជោគជ័យរបស់គម្រោងគឺការប្រមូលផ្តុំនូវមនុស្ស ឱ្យទៅរស់នៅក្នុងតំបន់ដ៏ស្រស់ស្អាតមួយនេះ បានកាន់តែច្រើន រួមជាមួយនឹងការបង្កើតជាទីប្រជុំជន ដែលក្រៅពីជាតំបន់កម្សាន្ត ថែមទាំងអាចអនុញ្ញាតឱ្យបងប្អូនប្រជាជនមានការងារធ្វើ កាត់បន្ថយការចំនាកស្រុក ហើយអាចផ្តល់ប្រាក់ចំណូលចូលគ្រួសារ យ៉ាងហោចណាស់១០០០ដុល្លារក្នុងមួយខែ ក៏ដូចជាអាចផ្តល់ចំណូលដល់រាជរដ្ឋាភិបាលកម្ពុជាផងដែរ” ។

គម្រោងមួយនេះគឺមានទំហំធំធេង និងត្រូវបានបែងចែកជាតំបន់កម្សាន្តផ្សេងៗគ្នាជាច្រើន មិនតិចជាង៥នោះទេ ដូចជា តំបន់កម្សាន្តសួនផ្កាឈូករ័ត្ន តំបន់កម្សាន្ត និងលំហែរព្រៃកោងកាង ភោជនីយដ្ឋាន តំបន់ផ្ទះលំហែរ និងសណ្ឋាគារ ដែលនៅថ្ងៃអនាគត អាចសាងសង់រហូតដល់ប្រមាណ១០០០បន្ទប់។

នៅទីនេះត្រូវបានហ៊ុព័ទ្ធ ទៅដោយខ្សែទឹកសមុទ្រទាំងរដូវប្រាំង ទាំងរដូវវស្សា មានហ្វូងសត្វស្លាបទឹក ជាពិសេសមានដើមរុក្ខជាតិ ព្រៃកោងកាងនៅជុំយ៉ាងស្រស់ស្អាត ដែលនៅពេលអនាគត កំពតឋាន អាចនឹងកា្លយជាតំបន់ទេសចរណ៍ឈានមុខគេ ដែលអាចផ្តល់អត្ថប្រយោជន៍ដល់ប្រជាជនក្នុងតំបន់ ក៏ដូចជាផ្តល់ការងារជូនដល់ប្រជាពលរដ្ឋទូទៅប្រមាណ១០០០នាក់ ខណៈដែលគម្រោងដ៏អស្ចារ្យប្រចាំខេត្តកំពតមួយនេះ នឹងបើកសម្ពោធដំណើរការជាផ្លូវការនៅត្រឹមថ្ងៃទី១ ខែមករា ឆ្នាំ២០២១ខាងមុខនេះ៕

ថៃនឹងបញ្ចប់គម្រោង «ស្ថានីយ៍រថភ្លើងធំជាងគេនៅអាស៊ីអាគ្នេយ៍» នៅឆ្នាំ២០២១

ដោយ ៖ ហ្សូលី

ភ្នំពេញ ៖ ប្រទេសថៃនឹងបញ្ចប់ស្ថានីយ៍រថភ្លើងធំបំផុតនៅអាស៊ីអាគ្នេយ៍ដែលជាផ្នែកមួយនៃផែនការ ដើម្បីធ្វើឱ្យប្រសើរឡើងនូវប្រព័ន្ធដឹកជញ្ជូនសាធារណៈរបស់ប្រទេស និងការទំនាក់ទំនងអន្តរជាតិរបស់ខ្លួន។ នេះបើតាមឱ្យដឹងពីក្រសួងការបរទេស។

ស្ថានីយ៍រថភ្លើង Bang Sue Grand Station មានគោលបំណងជួយកាត់បន្ថយការកកស្ទះចរាចរណ៍ដ៏រ៉ាំរ៉ៃរបស់ទីក្រុងបាងកក និងគាំទ្រតួនាទីជាមជ្ឈមណ្ឌលដឹកជញ្ជូនក្នុងតំបន់។ វានឹងជំនួសស្ថានីយ៍ Hua Huaphong ដែលជាស្ថានីយ៍សំខាន់របស់រាជធានីនាពេលបច្ចុប្បន្ន។

ក្រៅពីរថភ្លើងអន្ដរជាតិ Bang Sue ក៏នឹងបម្រើរថភ្លើងមេត្រូ Metro អ្នកដំណើរ និងរថភ្លើងល្បឿនលឿននៅទីក្រុងបាងកក និងផ្តល់ការតភ្ជាប់យ៉ាងរហ័សជាមួយអាកាសយានដ្ឋានសុវណ្ណភូមិ អាកាសយានដ្ឋានដុនមឿង និងអាកាសយានដ្ឋានអន្តរជាតិ U Tapao ផងដែរ។

យោងតាមក្រសួងផ្លូវដែកចម្ងាយ ២២០ គីឡូម៉ែត្ររវាងដុនមឿងនៅជាយក្រុងប៉ែកខាងជើងទីក្រុងបាងកក និង U Tapao នៅខេត្តរ៉ាក់យ៉ង អាចធ្វើដំណើរបានក្នុងរយៈពេលតិចជាងមួយម៉ោង។ ការស្ថាបនាវិស្វកម្មចិន – ថៃបានចាប់ផ្តើមធ្វើការលើរចនាសម្ព័ន្ធស្ថានីយ៍នេះក្នុងឆ្នាំ ២០១៣ ហើយឥឡូវនេះបានបញ្ចប់ហើយ។ ការងារនៅផ្នែកខាងក្នុងរបស់វានឹងត្រូវបានបញ្ចប់ទាន់ពេលវេលាសម្រាប់សេវាកម្មដែលចាប់ផ្តើមនៅឆ្នាំ ២០២១ ។

នៅពេលបញ្ចប់សាងសង់ស្ថានីយ៍ ៥២០ ហិកតានេះ នឹងក្លាយជាស្ថានីយ៍ធំជាងគេនៅអាស៊ីអាគ្នេយ៍។ វាមានកម្ពស់ ៤ ជាន់ នឹងអនុញ្ញាតឱ្យផ្ទុករថភ្លើងរហូតដល់ទៅ ៤០ ក្នុងពេលតែមួយ ជាមួយសមត្ថភាពដឹកអ្នកដំណើរប្រចាំថ្ងៃ ៦០ ម៉ឺននាក់។

ស្ថានីយ៍ Bang Sue Grand នឹងក្លាយជាចំណតសម្រាប់គម្រោងរថភ្លើងល្បឿនលឿនដំបូងបង្អស់របស់ប្រទេសថៃដែលនឹងដំណើរការរវាងទីក្រុងបាងកកទៅណុងខៃ។ ដំណាក់កាលទី ១ ដែលគ្របដណ្តប់លើចម្ងាយ ២៥១ គីឡូម៉ែត្រពីទីក្រុងបាងកកភាគខាងជើងទៅទីក្រុងនគររាជសីមាកំពុងសាងសង់។ ផ្លូវដែលនៅសល់ភ្ជាប់ពីនគររាជសីមាជាមួយណុងខៃនឹងមានចម្ងាយ ៣៥៦ គីឡូម៉ែត្រ។ នៅពេលដែលបានបញ្ចប់គម្រោងនេះនឹងអនុញ្ញាតឱ្យអ្នកធ្វើដំណើរពីទីក្រុងបាងកកអាចទៅដល់ព្រំដែនឡាវក្នុងរយៈពេល៣ម៉ោង។

ក្រសួងបន្ថែមថា ខ្សែផ្លូវដែកនេះនឹងត្រូវបានពង្រីកបន្ថែមទៀតដើម្បីភ្ជាប់ជាមួយខ្សែផ្លូវដែកដែលកំពុងត្រូវបានសាងសង់ឆ្លងកាត់ប្រទេសឡាវដែលជាផ្នែកមួយនៃគំនិតផ្តួចផ្តើមខ្សែក្រវ៉ាត់ និងផ្លូវរបស់ប្រទេសចិន៕

ក្រុមហ៊ុនអចលនទ្រព្យ Alta Capital នឹងផ្តល់មូលនិធិប្រមាណ៥០ លានដុល្លារ ដើម្បីស្តារវិស័យបដិសណ្ឋារកិច្ចនៅក្នុងតំបន់អាស៊ីប៉ាស៊ីហ្វិក

ដោយ វុត្ថា

អាស៊ី៖ ក្រុមហ៊ុនអចលនទ្រព្យ Alta Capital បានដាក់ឱ្យដំណើរការនូវគម្រោងមូលនិធិចំនួន ៥០ លានដុល្លារអាមេរិក ដើម្បីស្តារវិស័យបដិសណ្ឋារកិច្ចនៅក្នុងតំបន់អាស៊ីប៉ាស៊ីហ្វិកឡើងវិញ ដោយរំពឹងថា នឹងទទួលបានអត្រាប្រាក់ត្រឡប់មកវិញចន្លោះពី ១៥ ទៅ ២០ ភាគរយក្នុងរយៈពេល៦ឆ្នាំ។

ទស្សនាវដ្តី realassets បានចុះផ្សាយកាលពីពេលថ្មីៗនេះថា មូលនិធិនេះត្រូវបានកំណត់ក្នុងការផ្តល់លើឱកាសវិនិយោគចំពោះអ្នករកស៊ីលំដាប់ពិភពលោក និងបុគ្គលឯកជន ក្រោមកម្មវិធី “បដិសណ្ឋារកិច្ចប្រកបដោយចីរភាព និងសុខភាព” នៅក្នុងទីក្រុង និងរមណីយដ្ឋានសំខាន់ៗនៅជុំវិញប្រទេសនៅក្នុងតំបន់អាស៊ីប៉ាស៊ីហ្វិករួមមានប្រទេសថៃ វៀតណាម ឥណ្ឌូនេស៊ី ស្រីលង្កា ម៉ាឡេស៊ី កូរ៉េ និងជប៉ុន។

នាយកប្រតិបត្តិ និងជាស្ថាបនិក ក្រុមហ៊ុន Alta លោក Rakesh Patel បានឱ្យដឹងថា គម្រោងវិនិយោគនេះ ត្រូវការទាមទារចំពោះការប្តេជ្ញាចិត្តខ្ពស់ពីអ្នកវិនិយោគិន។

លោក Patel ថ្លែងថា“ អតិថិជនកំពុងតែស្វែងរកការធ្វើដំណើរដែលមានអត្ថន័យបំផុត ដែលរួមបញ្ចូលទាំងការអនុវត្តសុខភាព និងបែបប្រពៃណីក៏ដូចជាបទពិសោធន៍ក្នុងស្រុកពិតប្រាកដ” ។ លោកបន្តថា “ពួកគេមានការយកចិត្តទុកដាក់កាន់តែខ្លាំងឡើងចំពោះវិធីសាស្ត្រការការពារបរិស្ថាន បុគ្គលិក និងសហគមន៍ដែលកំពុងប្រតិបត្តិការ ។

លោកបញ្ជាក់ទៀតថា សុខភាព និងចីរភាពគឺជាស្នូលនៃយុទ្ធសាស្ត្រវិនិយោគរបស់ក្រុមហ៊ុន Alta ហើយអាចផ្តល់ប្រាក់ចំណេញដ៏គួរឱ្យទាក់ទាញសម្រាប់វិនិយោគិនដែលបានធ្វើឱ្យភ្ញៀវមានការចងចាំ និងបន្ថែមតម្លៃដល់សហគមន៍មូលដ្ឋាន និងបរិស្ថាន៕

អ្នកជំនាញលើកទឹកចិត្តឱ្យអ្នកក្នុងវិស័យអចលនទ្រព្យមានជំនឿចំពោះរដ្ឋាភិបាលក្នុងការប្រយុទ្ធប្រឆាំងជំងឺកូវីដ ១៩

ដោយ វុត្ថា

ភ្នំពេញ៖ ក្នុងកាលៈទេសៈដ៏លំបាកនេះ ក្នុងនាមជាអ្នករកស៊ីក្នុងវិស័យអចលនទ្រព្យ ត្រូវមានជំនឿចិត្តខ្ពស់ចំពោះរាជរដ្ឋាភិបាលកម្ពុជា ក្នុងការប្រយុទ្ធប្រឆាំងទៅនឹងជំងឺកូវីដ ១៩ ដែលកំពុងយាយីនៅក្នុងប្រទេស។

លោកស្រី តាំង ហួរ នាយិកាក្រុមហ៊ុន Amatak Property Service បានប្រាប់គេហទំព័រ propertyrea.asia កាលពីថ្ងៃទី ១១ ខែវិច្ឆិកា ម្សិលមិញនេះថា អ្នករកស៊ីក្នុងវិស័យអចលទ្រព្យមួយចំនួនហាក់លមានអារម្មណ៍ភ័យព្រួយចំពោះអាជីវកម្ម ខណៈដែលរាជរដ្ឋាភិបាលកម្ពុជា បាននឹងកំពុងប្រយុទ្ធប្រឆាំងទៅនឹងជំងឺកូវីដ ១៩ ។

លោកស្រីថ្លែងថា “យើងកុំមានអារម្មណ៍ស្លេស្លារ នៅក្នុងអំឡុងពេលនេះ យើងត្រូវតែមានជំនឿរចំពោះរាជរដ្ឋាភិបាលរបស់យើដែលគាត់កំពុងតែប្រយុទ្ធយ៉ាងខ្លាំងក្លា ហើយត្រូវចូលរួមទប់ស្កាត់ទាំងអស់គ្នាតាមការណែនាំរបស់គាត់” ។

លោកស្រីបន្ថែមថា “ មិនយូរមិនឆាប់ នៅពេលដែលយើងចូលរួមជាមួយការប្រយុទ្ធប្រឆាំងទទួលបានជោគជ័យទៅនឹងវិបត្តិមួយនេះនឹងធ្វើឱ្យអាជីវកម្ម និងការរកស៊ីនៅក្នុងវិស័យអចលនទ្រព្យរបស់យើងមានស្ថានភាពល្អប្រសើរឡើងវិញ” ។

លោកស្រីបញ្ជាក់ថា “រាជរដ្ឋាភិបាល មិនចង់ឱ្យមានការចម្លងនូវជំងឺកូវីដ ១៩ នេះនៅក្នុងប្រទេសនោះទេ ព្រោះថាអ្វីដែលយើងមើលមិនឃើញ ហើយអ្វីដែលរាជរដ្ឋាភិបាលបាននឹងកំពុងធ្វើគឺដើម្បីជាតិឱ្យមានសេដ្ឋកិច្ចរីកចំរើន និងប្រជាជនមានភាពធូរធាតាមរយៈបង្កើតមុខរបរ និងអាជីវកម្មផ្សេង” ។

ចំណែក លោក ឃាង ពុទ្ធី ប្រធានក្រុមប្រឹក្សាភិបាលនៃសមាគមអ្នកជំនាញអចលនទ្រព្យកម្ពុជា បានឱ្យដឹងដែរថា នៅក្នុងពេលនេះ ទាំងអ្នករកស៊ី និងប្រជាពលរដ្ឋ ត្រូវតែចូលរួមជាមួយរាជរដ្ឋាភិបាលកម្ពុជាក្នុងការទប់ស្កាត់នូវជំងឺកូវីដ ១៩នេះ ដើម្បី ជៀសវាងប៉ះពាល់កាន់តែធំដល់សង្គមកម្ពុជាទាំងមូល។

លោក ឃាង ពុទ្ធី បានថ្លែងថា “ក្នុងដំណាក់កាលនេះ ប្រសិនបើយើងមិនអនុវត្ត ហើយបញ្ហាកាន់តែកើតឡើងធំ វាមិនត្រឹមតែប៉ះពាល់ដល់ខ្លួនតែម្នាក់ឯងនោះទេ ប៉ុន្តែវានឹងជះឥទ្ធិពលអាក្រក់ដល់ក្រុមគ្រួសារ អ្នកជិតខាង ជាពិសេសសង្គមជាតិទាំងមូលតែម្ដង” ៕

ចំណេះដឹង ! តើសេដ្ឋកិច្ចឌីជីថលនៅកម្ពុជាផ្តល់ផលប្រយោជន៍ប៉ុន្មានយ៉ាង?

ដោយ ៖ វុត្ថា

ភ្នំពេញ ៖ រដ្ឋាភិបាលតាមរយៈក្រសួងសេដ្ឋកិច្ច និងហិរញ្ញវត្ថុ បាននឹងកំពុងរៀបចំសេចក្តីព្រាងក្របខ័ណ្ឌគោលនយោបាយ សេដ្ឋកិច្ចឌីជីថលកម្ពុជាដើម្បីឆ្លើយតបទៅនឹងការរីកចំរើនយ៉ាងលឿនលើវិស័យឌីជីថលនៅក្នុងប្រទេសក្នុងរយៈពេលលបុន្មានឆ្នាំចុងក្រោយនេះ។

សេដ្ឋកិច្ចឌីជីថលនៅកម្ពុជានេះ នឹងផ្តល់នូវអត្ថប្រយោជន៍ចម្បងៗចំនួន ៤ ដល់សង្គមជាតិរបស់ដែលរួមមាន៖

ទី១៖ ការបង្កើនប្រសិទ្ធភាព និងផលិតភាពសេដ្ឋកិច្ច ក៏ដូចជា ការបង្កើនប្រសិទ្ធភាពនៃការផ្តល់សេវាសាធារណៈរបស់រដ្ឋគ្រប់ប្រភេទ និងក្នុងសកម្មភាពធុរកិច្ច ។

ទី២៖ ការតភ្ជាប់ប្រជាជនកម្ពុជាទៅនឹងចរន្តនៃសកលភាវូបនីយកម្ម ទីផ្សារ និងបច្ចេកវិទ្យាពិភពលោក ដ៏ដូចជា ដើម្បីទទួលបាននូវព័ត៌មាន, ចំណេះដឹង, ទស្សនៈ និងររៀបនៃការរស់នៅថ្មី។ ក្រៅពីនេះ ក៏អាចតភ្ជាប់សហគ្រាសកម្ពុជាទៅនឹងខ្សែចង្វាក់ផលិតកម្មក្នុងតំបន់ ហើយសេដ្ឋកិច្ចដែលមានឌីជីថលជាថ្នាល នឹងធ្វើឱ្យមានការផ្លាស់ប្តូររចនាសម្ព័ន្ធសេដ្ឋកិច្ចកម្ពុជាបន្ថែមទៀត រួមទាំងរវាងអ្នកផលិត និងអ្នកប្រើប្រាស់ផងដែរ។

ទី៣៖ បដិវត្តន៍ឧស្សាហកម្មទី៤ ជាពិសេសក្នុងវិស័យឌីជីថល ដែលផ្អែកលើអ៊ីនធឺណែត នឹងធ្វើឱ្យមានពិពិធកម្មកាន់តែខ្លាំងក្លាឡើងក្នុង វិស័យកសិកម្ម, ឧស្សាហកម្ម និងសេវាកម្ម ពីវិស័យមួយទៅវិស័យមួយទៀត និងនៅក្នុងរង្វង់នៃវិស័យនោះផ្ទាល់ផង។

ទី៤៖ វិស័យឌីជីថលនឹងក្លាយទៅចន្ទុល ឬជាក្បាលម៉ាស៊ីនអូសកំណើនសេដ្ឋកិច្ចថ្មី ហើយនឹងដើរតួនាទីដ៏សំខាន់ និងក្លាយជាចំណែកមួយនៅក្នុងសេដ្ឋកិច្ចជាតិ។

ក្របខ័ណ្ឌគោលនយោបាយនេះ នឹងត្រូវអនុវត្តសម្រាប់រយៈពេលវែង ដោយចែកចេញជាច្រើនដំណាក់កាល ក្នុងរយៈពេល ៥ឆ្នាំម្តង ដោយមានភ្ជាប់នូវយុទ្ធសាស្ត្រ ផែនការសកម្មភាព និងផែនការវិនិយោគច្បាស់លាស់ ទាំងក្នុងផ្នែករឹង និងផ្នែកទន់ ជាពិសេសផ្នែកច្បាប់ និងនិយ័តកម្ម ស្ថាប័ន ដើម្បីធានាបានការប្រើប្រាស់ដោយងាយស្រួល មានតម្លៃសមរម្យ និងមានទុកចិត្តបាន៕

ប្រធាន GRA ៖ ទីផ្សារអចលនទ្រព្យកម្ពុជាកំពុងប្រឈមមុខនឹងឱនភាពនៅចុងឆ្នាំនេះ

ដោយ ៖ រ៉ាណេត

ភ្នំពេញ ៖ ខុសប្លែកពីការព្យាករណ៍ទុកកាលពីអំឡុងត្រីមាសទី៣ ដែលរំពឹងទុកថា ទីផ្សារអចលនទ្រព្យកម្ពុជានៅចុងឆ្នាំ២០២០នេះ នឹងមានភាពល្អប្រសើរឡើងវិញបន្តិចនោះ ដោយឡែកពេលនេះប្រធានសមាគមអចលនទ្រព្យសកល GRA បែរជាអះអាងថានឹងមានការធ្លាក់ចុះទៅវិញ ក្រោមហេតុផលទទួលរងនូវភាពអវិជ្ជមានពីព្រឹត្តិការណ៍ ៣វិច្ឆិកា ដែលទើបតែកើតមាននៅពេលនេះ។

ប្រធានសមាគមអចលនទ្រព្យសកល លោក សំ សុខនឿន បានមានប្រសាសន៍តាមទូរស័ព្ទនៅល្ងាចថ្ងៃទី១១ ខែវិច្ឆិកា ឆ្នាំ២០២០ថា ស្ថានការណ៍នៃទីផ្សារអចលនទ្រព្យនៅចុងឆ្នាំ២០២០នេះនឹងមានភាពប្រែប្រួលបន្តិចវិញ និងខុសពីការរំពឹងទុកកាលពីអំឡុងត្រីមាសទី៣ ពោលគឺអាចនឹងមិនមានកំណើននោះទេ។

លោក សំ សុខនឿន បានមានប្រសាសន៍ថា “ដោយសារការទប់ស្កាត់នូវការរាលដាល់ជំងឺ Covid-19 ក្រោមការគ្រប់គ្រងដោយរដ្ឋាភិបាលមានភាពល្អប្រសើរ បានជំរុញឱ្យស្ថានភាពទូទៅនៅទូទាំងប្រទេសកម្ពុជាមានភាពធូស្រាលជាងបណ្តាប្រទេសនានានៅក្នុងតំបន់ ជាពិសេសជំរុញ និងលើកទឹកចិត្តឱ្យអ្នកវិនិយោគក្នុងស្រុកចាប់ផ្តើមមានសកម្មភាពឡើងវិញ ជាពិសេសនៅក្នុងវិស័យអចលនទ្រព្យចាប់ផ្តើមមានសន្ទុះឡើងវិញបន្ទាប់ពីបានស្ងប់ស្ងាត់មួយរយៈពេលខ្លី” ។

លោកបានបន្តថា “ដោយសារតែមើលឃើញពីស្ថានការណ៍មានភាពធូរស្រាល និងមានការវិវឌ្ឍទៅរកភាពល្អប្រសើរជាបន្តបន្ទាប់បានធ្វើឱ្យអ្នកដែលស្ថិតនៅក្នុងទីផ្សារអចលនទ្រព្យធ្វើការរំពឹងថា នៅត្រឹមចុងឆ្នាំ២០២០ ឬដើមឆ្នាំ២០២១ សកម្មភាពនៃការសាងសង់ ក៏ដូចជាការទិញ-លក់នឹងមានភាពកាន់តែប្រសើរ។ ប៉ុន្តែពេលនេះ ក្រោយកើតមានព្រឹត្តិការណ៍ ៣វិច្ឆិកា ស្ថានការណ៍ទូទៅនៃវិស័យមួយនេះអាចនឹងមានការប្រែប្រួលយ៉ាងខ្លាំង ជាពិសេសការទិញ-លក់ អាចនឹងមានឱនភាពខ្លាំងរហូតដល់ប្រមាណ៧០ភាគរយ បើប្រៀបធៀបទៅនឹងចុងឆ្នាំ២០១៩កន្លងទៅ” ។

ជាមួយនឹងស្ថានភាពទីផ្សារអចលនទ្រព្យអាចនឹងមានភាពប្រែប្រួលនេះ អ្វីដែលអាចជួយធ្វើឱ្យស្ថានការណ៍ទីផ្សារអចលនទ្រព្យមានភាពធូស្រាលនោះ គឺការចូលរួមអនុវត្តទៅតាមវិធានការរបស់រាជរដ្ឋាភិបាលកម្ពុជា តាមរយៈក្រសួងសុខាភិបាល ដែលទទូចឱ្យបងប្អូនប្រជាជនទូទាំងប្រទេសប្រកាន់ខ្ជាប់នូវការរក្សាខ្លួនឱ្យឆ្ងាយពីជំងឺឆ្លង ដោយការប្រកាន់ខ្ជាប់នូវអនាម័យ តាមការណែនាំរបស់ក្រសួង ដើម្បីធ្វើយ៉ាងណាអាចទប់ស្កាត់ និងឈានទៅរកការលុបបំបាត់ការរាតត្បាតនៃជំងឺឆ្លងនៅក្នុងប្រទេសបានក្នុងកម្រិតខ្ពស់” ។

លោក សំ សុខនឿន បានបញ្ជាក់ថា “ប្រសិនបើបញ្ហាដែលកំពុងប្រឈម និងកើតមាននៅពេលនេះត្រូវបានទប់ស្កាត់ និងលុបបំបានដោយជោគជ័យក្នុងពេលដ៏ខ្លីឆាប់ៗខាងមុខនេះ នោះចរន្តទីផ្សារក្នុងវិស័យមួយនេះក៏អាចនឹងប្រែប្រួលសាជាថ្មីម្ដងទៀត ដែលផ្តើមចេញពីចលនាអ្នកវិនិយោគ និងអភិវឌ្ឍន៍ ក៏ដូចជាតម្រូវការទីផ្សារក្នុងដូចគ្នាកាលពីពេលកន្លងទៅជាក់ជាមិនខាន” ៕

សម្ដេចតេជោ ហ៊ុន សែន បញ្ជារឱ្យចែកម៉ាស់ចំនួន២លាន ដល់ប្រជាជននៅក្នុងរាជធានីភ្នំពេញ

ដោយ ៖ រ៉ាណេត

ភ្នំពេញ ៖ សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា នៅរសៀលថ្ងៃទី១១ ខែវិច្ឆិកា ឆ្នាំ២០២០នេះ បានប្រកាសបញ្ចេញម៉ាស់ចំនួន២លាន ដើម្បីចែកជូនដល់បងប្អូនប្រជាពលរដ្ឋនៅរាជធានីភ្នំពេញ។

តបទៅនឹងការចង្អុលបង្ហាញដោយផ្ទាល់ពីសំណាក់ប្រមុខដឹកនាំរាជរដ្ឋាភិបាលកម្ពុជា សម្តេចតេជោ ហ៊ុន សែន ដែលតែងតែយកចិត្តទុកដាក់ខ្ពស់ទៅលើសុខទុក្ខ និងសុវត្ថិភាពបងប្អូនប្រជាជននៅទូទាំងប្រទេសកម្ពុជា ដែលបានបញ្ជាឱ្យក្រសួងសុខាភិបាល និងសាលារាជធានីភ្នំពេញ បញ្ចេញម៉ាស់បម្រុងដែលមាននៅក្នុងឃ្លាំងចំនួន២លានម៉ាស់សម្រាប់ចែកចាយដល់បងប្អូនដែលសរស់នៅក្នុងរាជធានីភ្នំពេញ ដើម្បីការពារខ្លួនឱ្យស្ថិតនៅឆ្ងាយពីការចម្លងនៃជំងឺ Covid-19។

នៅល្ងាចថ្ងៃដដែលនេះ ក្រសួងសុខាភិបាល ក៏បានចេញសេចក្ដីប្រកាសជាផ្លូវការផងដែរ ពីការទទួលអនុវត្តតាមបទបញ្ជាក្នុងការចែកម៉ាស់ចំនួន២លានម៉ាស់ដល់បងប្អូនប្រជាពលរដ្ឋរស់នៅក្នុងសហគមន៍ក្រីក្របានពាក់ម៉ាស់ និងទុកប្រើប្រាស់ចូលរួមការពារពីជំងឺឆ្លងកូវីដ-១៩៕

គម្រោងសាងសង់ផ្សារនៅព្រំដែនកម្ពុជា-វៀតណាម អាចចាប់ផ្តើមនៅឆ្នាំ ២០២១

ដោយ ហ្សូលី

ភ្នំពេញ៖ គម្រោងសាងសង់ផ្សារនៅព្រំដែនរវាងកម្ពុជា និងវៀតណាមចំនួន ២ទីតាំងស្ថិតក្នុងខេត្តកំពត និងស្វាយរៀង គិតមកដល់ពេលនេះនៅមិនទាន់ចាប់ផ្តើមសាងសង់ជាផ្លូវការនោះទេ។ នេះបើតាមឱ្យដឹងពីអាជ្ញាធរ ពាក់ព័ន្ធ។

អ្នកនាំពាក្យក្រសួងពាណិជ្ជកម្ម លោក ប៉ែន សុវិជាតិ បានថ្លែងប្រាប់ថា ការសាងសង់ផ្សារព្រំដែនទាំង ២ នៅ មិនទាន់ចាប់ផ្តើមទេ ដោយអាចចាប់ផ្តើមនៅឆ្នាំក្រោយ ព្រោះការគ្រោងកញ្ចប់ថវិកានេះក៏នៅឆ្នាំក្រោយដែរ ។

ការកសាងផ្សារសហគមន៍គំរូនៅតាមបណ្តោយព្រំដែនកម្ពុជា-វៀតណាម ដើម្បីជួយសម្រួលដល់ការធ្វើជំនួញ និងពាណិជ្ជកម្មតូចធំ និងផ្តល់ឱកាសឱ្យប្រជាពលរដ្ឋប្រទេសទាំង ២ មានទីផ្សារសមរម្យលក់ដូរក្នុងការជួយ លើកកម្ពស់ជីវភាពរស់នៅ។ ម្យ៉ាងទៀត ក៏នឹងជួយធ្វើឱ្យកិច្ចសហប្រតិបត្តិការ និងទំហំពាណិជ្ជកម្មទ្វេភាគីមាន កំណើនផងដែរ។

អាជ្ញាធរខេត្តកំពត និងស្វាយរៀងរកទីតាំងជួយសម្របសម្រួលកិច្ចការមួយចំនួន ខណៈក្រសួងពាណិជ្ជកម្មត្រូវ ធ្វើការសិក្សា រៀបចំផ្សារនៅតាមព្រំដែនដោយយកតាមរចនាបទខ្មែរ និងប្រើថវិកាជាតិសម្រាប់សាងសង់។
គោលបំណងរបស់ផ្សារនេះនឹងបម្រើជាទីផ្សារនាំចេញទៅវៀតណាម។

លោក ជាវ តាយ អភិបាលខេត្តកំពតបានមានប្រសាសន៍ថា បច្ចុប្បន្ននេះអាជ្ញាធរសហការជាមួយមន្ត្រីជំនាញពី ក្រសួងពាណិជ្ជកម្មសិក្សា និងវាយតម្លៃទីតាំងមុននឹងចាប់ផ្តើមសាងសង់ ហើយចាប់ផ្តើមពេលណាអាស្រ័យ ទៅលើក្រសួង ខណៈ អាជ្ញាធរខេត្តមានទីតាំងត្រៀមបម្រុងរួចហើយ ។ ទីតាំងបានកំណត់អាចនៅក្បែរច្រកទ្វារព្រំដែនអន្តរជាតិព្រែកចាកក្នុងស្រុកកំពង់ត្រាច ខេត្តកំពត ទល់ជាមួយ ខេត្តគៀងយ៉ាង ។

អ្នកនាំពាក្យសាលាខេត្តស្វាយរៀង លោក រស់ ផារិទ្ធ បានឱ្យដឹងថា គម្រោងសាងសង់ផ្សារព្រំដែនក្នុងខេត្ត ស្វាយរៀងអភិវឌ្ឍនៅភាគខាងកើតជាប់ខេត្តតាយនិញ និង មួយទៀតនៅជាប់គ្នាជាមួយព្រំប្រទល់ខេត្ត ឡុងអាន ប្រទេសវៀតណាម។ ពេលមានហេដ្ឋារចនាសម្ព័ន្ធ និងផ្សារនៅព្រំដែនកាន់តែច្រើន កំណើននៃការអភិវឌ្ឍមានសន្ទុះដែរ ពិសេសបង្កភាពងាយស្រួលដល់ប្រជាជនក្នុងការដោះដូរផលិតផលកសិផល។

ទិន្នន័យពីអគ្គនាយកដ្ឋានគយវៀតណាមបានឱ្យដឹងថា ទំហំពាណិជ្ជកម្មទ្វេភាគីកម្ពុជា-វៀតណាម មានតម្លៃ សរុប ២,១៧ ពាន់លានដុល្លារ ធ្លាក់ចុះ ៨,១ ភាគរយ បើធៀបនឹងរយៈពេលដូចគ្នាកាលពីឆ្នាំមុន។ ក្នុងនោះការនាំ ទំនិញពីកម្ពុជាទៅវៀតណាមមានតម្លៃ ៤៧៦ លានដុល្លារ ធ្លាក់ចុះ ១៥ ភាគរយ ខណៈកម្ពុជានាំចូលវិញ មានតម្លៃសរុប ១,៧ ពាន់លានដុល្លារ ធ្លាក់ចុះ ៦ ភាគរយ ៕