ដោយវុត្ថា
ភ្នំពេញៈ ការដ្ឋានសំណង់មួយចំនួននៅក្នុងខណ្ឌទួលគោក នៃរាជធានីភ្នំពេញ បានផ្អាក់ដំណើរសាងសង់ជាបណ្តោះអាសន្ន ដែលបង្កឡើងដោយជំងឺកូវីដ១៩ ប៉ុន្តែការដ្ឋានសំណង់ទាំងនេះ អាចនឹងដំណើរការឡើងវិញ បន្ទាប់ពីស្ថានភាពងឺកូវិដ១៩ នេះមានភាពធូរស្រាល។
ប្រធានការិយាល័យរៀបចំដែនដី នគរូបនីយកម្ម សំណង់ និងសូរិយោដីនៃខណ្ឌទួលគោកលោក សោម សម្បត្តិ បានប្រាប់គេហទំព័រ Propertyearea.asia នៅថ្ងៃទី ២៣ ខែធ្នូ ឆ្នាំ ២០២០នេះថា វិស័យសំណង់នៅក្នុងខណ្ឌទួលគោក ត្រូវបានសាងសង់ឡើងស្របទៅនឹងប្លង់គោលប្រើប្រាស់របស់រាជធានីភ្នំពេញ ហើយក្នុងរយៈពេលលមួយឆ្នាំនេះបានធ្វើឱ្យការដ្ឋានមួយចំនួន បានផ្អាកដំណើរការសាងសង់ជាបណ្តោះអាសន្ន។
លោកថ្លែងថា “វិស័យសំណងនៅក្នុងខណ្ឌនេះ មានសន្ទុះគួរឱ្យកត់សម្គាល់ក្នុងរយៈពេលកន្លងមកនេះ ប៉ុន្តែការរដ្ឋានសំណង់មួយចំនួន ក៏បានផ្អាកទៅវិញអស់ដែរ។ វាបានមួយប្រាវ ប្រៀបដូចត្រូវខ្យល់អីចឹងដែរ” ។ លោកបន្ថែមថា “ខណ្ឌទួលគោកនេះ បើធៀបជាមួយនឹងវិស័យណង់ នៅក្នុងខណ្ឌផ្សេងៗនៅក្នុងរាជធានីភ្នំពេញ គឺទៅមិនរួចនោះទេ ព្រោះមានសំណង់ខ្លះ បានត្រឹមតែសាងហើយផ្អាកដំណើរការ មិនទៅមុខនឹងគេ” ។
បើតាមលោក សោម សម្បត្តិ បញ្ជាក់ទៀតថា ការដ្ឋានសំណង់ដែលមានកំពស់ចាប់ពីប្រាំជាន់ឡើង នៅក្នុងខណ្ឌទួលគោកនាពេលបច្ចុប្បន្ននេះ មានចន្លោះពី៣០ទៅ ៤០ការដ្ឋានសំណង់ដែរ ប៉ុន្តែការដ្ឋានមួយចំនួនបានផ្អាកសាងសង់ជាបណ្តោះអាសន្ន ។
លោករំពឹងថា នៅឆ្នាំក្រោយបន្ទាប់ស្ថានភាពពិភពលោក មានភាពធូស្រាលពីជំងឺកូវីដ ១៩ ការដ្ឋានសំណង់ទាំងអស់ ដែលមានការផ្អាកសាងសង់ នឹងត្រូវចាប់ផ្តើមឡើងវិញ ព្រោះវិនិយោគិនជាតិ និងអន្តរជាតិអាចធ្វើដំណើរ និងមកបណ្តាកទុនវិនយោគកាន់តែច្រើនបន្ថែមទៀត។
ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា លោកច្រឹក សុខនីមធ្លាប់បានឲ្យដឹងកាលពីពេលថ្មីៗនេះថា តំបន់ទួលគោកបាន និងកំពុងក្លាយជាមជ្ឈមណ្ឌលពាណិជ្ជកម្ម (CBC) ខណៈពីមុនតំបន់នេះ ត្រឹមតែជាតំបន់លំនៅដ្ឋានប៉ុណ្ណោះ ប៉ុន្តែបច្ចុប្បន្នអាគារពាណិជ្ជកម្ម និងខុនដូខ្ពស់ៗកំពុងរត់ប្រជែងគ្នា និងកើនកំពស់ជារៀងរាល់ថ្ងៃ។
លោកបន្តថា “បច្ចុប្បន្នមានគំរោងខុនដូប្រមាណ២០ និងមជ្ឈមណ្ឌលពាណិជ្ជកម្មជាច្រើនកំពុងសាងសង់នៅតំបន់នេះ ហើយតម្លៃខុនដូបើគិតជាម៉ែត្រការ៉េ គឺមានតម្លៃចន្លោះពី១៨០០ដល់៣០០០ដុល្លារអាមេរិកក្នុងមួយម៉ែត្រការ៉េ” ៕
