ដីទំហំជាង២៣ម៉ឺនហិកតា ក្នុងខេត្តសៀមរាបត្រូវបានរក្សាទុកជាតំបន់ការពារធម្មជាតិ

ដោយ ៖ រ៉ាណេត

សៀមរាប ៖ ផ្ទៃដីទំហំសរុបជាង ២៣ ហិកតា នៅក្នុងខេត្តសៀមរាប ត្រូវបានរដ្ឋាភិបាលកំណត់រក្សាទុក និងអភិរក្សជាតំបន់ការពារធម្មជាតិប្រកបដោយចីរភាព បន្ទាប់ពីបានធ្វើការសិក្សាលម្អិត និងបែងចែកដាច់ដោយឡែកពីកម្មសិទ្ធិរបស់ប្រជាពលរដ្ឋដែលរស់នៅក្នុងតំបន់។

នៅថ្ងៃចុងសប្ដាហ៍កន្លងទៅនេះ ក្រុមការងារ និងមន្ត្រីជំនាញ បានបើកកិច្ចប្រជុំស្តីពីវឌ្ឍនភាព ការពិនិត្យ ការសិក្សា និងចងក្រងឯកសារទីតាំងដីដែលប្រជាពលរដ្ឋប្រើប្រាស់ និងអាស្រ័យផលជាក់ស្តែង ការប្រើប្រាស់ដីរបស់កងទ័ពក្នុងតំបន់ការពារធម្មជាតិ និងរបៀងអភិរក្សជីវៈចម្រុះ ការរៀបចំដីបម្រុងទុកសម្រាប់ការអភិវឌ្ឍន៍ក្រុង ស្រុក ខេត្តសៀមរាប។

រដ្ឋលេខាធិការក្រសួងបរិស្ថាន លោក សៅ សុភាព បានមានប្រសាសន៍កាលពីថ្ងៃចុងសប្ដាហ៍កន្លងទៅថា ការអនុវត្ត ការធ្វើទិន្នន័យប្រជាពលរដ្ឋ ដែលបានកាន់កាប់ និង អាស្រ័យផលជាក់ស្តែង ដើមី្បធ្វើការទប់ស្កាត់ការរុករានទន្រ្ទានដីរដ្ឋគ្រប់ប្រភេទ សំខាន់នៅតំបន់ឧទ្យានជាតិ ភ្នំគូលែន និង ដែនជម្រកសត្វព្រៃព្រហ្មទេព។

លោកបានបន្តទៀតថា តំបន់ការពារធម្មជាតិនៅក្នុងភូមិសាស្ត្រខេត្តសៀមរាបមានចំនួន៨កន្លែង ដែលមានផ្ទៃដីសរុបប្រមាណ ២៣៣ ៦៨៨ហិកតា ក្នុងនោះតំបន់ការពារទេសភាពអង្គរមានទំហំ ១០ ៨០០ ហិកតា , ឧទ្យានជាតិព្រះជ័យវរ័្មន.នរោត្តម (ភ្នំគូលែន) មានទំហំ ៣៧ ៣៧៣ ហិកតា (ក្នុងនោះដីអាស្រ័យផលមាន ១៥៣ ហិកតា , ដីចំការ ២ ៨៥៣ ហិកតា , ការសង់ខ្ទម និងបោះបង្គោលរបងអាណាធិបតេយ្យ ១៥៨ខ្នង , ដែនជម្រកសត្វព្រៃគូលែន.ព្រហ្មទេព ទំហំ ៤២ ៩០៣ ហិកតា , ដែនជម្រកសត្វព្រៃបឹងពែរ ទំហំ ៣៧ ៤៦៩ ហិកតា ដែនជម្រកសត្វព្រៃភ្នំត្នោត. ភ្នំពកទំហំ ១៧ ៥៦៩ ហិកតា , តំបន់ការពារទេសភាពទំនាបខាងជើងបឹងទន្លេសាប (សត្វខឹ្សប) ទំហំ ៤ ៨៧១ ហិកតា , តំបន់ប្រើប្រាស់ច្រើនយ៉ាងបឹងទន្លេសាប ទំហំ ៧៧ ៧០៣ ហិកតា និងតំបន់ស្នូលបឹងទន្លេឆ្នា (តំបន់រ៉ាមសារ) ទំហំ ៥ ០០០ ហិកតា ។

ក្នុងនោះដែរក៏មានសហគមន៍ការពារធម្មជាតិ ចំនួន១០កន្លែង មានផ្ទៃដីសរុប ១២ ៩៨៤ ហិកតា មានប្រជាពលរដ្ឋ ៣ ០៩៩ គ្រួសារ ដែលបានគ្រប់គ្រងដីព្រៃសហគមន៍តំបន់ការពារធម្មជាតិឱ្យមាននីរន្តរភាព។ ក្នុងនោះដែរលោក ក៏បានលើកនូវបទពិសោធន៍ និងវិធានការល្អៗមួយចំនួនក្នុងការធ្វើទិន្នន័យដីធ្លីឱ្យបានចប់សព្វគ្រប់ ដើមី្បបញ្ចប់នូវបញ្ហាវិវាទដីធ្លីង និងការរុករានទន្រ្ទានដីរដ្ឋដោយខុសច្បាប់ ។

អភិបាលខេត្តសៀមរាប លោក ទៀ សីហា បានធ្វើការជម្រុញដល់អាជ្ញាធរក្រុង ស្រុក ឃុំសង្កាត់ និងមេភូមិ ដើម្បីទប់ស្កាត់ លុបបំបាត់ និងបង្ក្រាបការរុករាន ក្នុងតំបន់ការពារធម្មជាតិ ដើម្បីវាតទីយកដីរដ្ឋធ្វើជាកម្មសិទ្ធិរបស់ខ្លួន សូមត្រូវចាត់ចែងអនុវត្តឲ្យមានប្រសិទ្ធភាពខ្ពស់ និងទទួលបានលទ្ធផលល្អប្រសើរ គឺយើងត្រូវតែពន្លឿនក្នុងការដោះស្រាយបញ្ហាវិវាទដីធ្លីនៅតាមស្រុកនីមួយៗឱ្យបានរួចរាល់ក្នុងឆ្នាំ២០២១ខាងមុខនោះជាកំហិត។

លោកបានបន្តឱ្យដឹងទៀតថា ពេលនេះជាឱកាសដែលអាជ្ញាធរមូលដ្ឋាន គឺត្រូវគ្រប់គ្រងដីធ្លីនៅក្នុងដែលសមត្ថកិច្ចរដ្ឋបាលខ្លួនគ្រប់គ្រងឱ្យបានជាក់ច្បាស់ ដើមី្បក្នុងការធ្វើសម្រងទិន្នន័យឱ្យបានត្រឹមត្រូវ ព្រមទាំងធ្វើការស្រាវជ្រាវពីប្រវត្តិសាវតាប្រជាពលរដ្ឋបានច្បាស់ ដើមី្បធ្វើការស្នើសុំទៅរាជរដ្ឋាភិបាលស្នើសុំធ្វើការឆ្វៀលដីជូនពួកគាត់ទៅតាមការជាក់ស្តែង។

នៅក្នុងពេលនេះការធ្វើទិន្នន័យបានច្បាស់លាស់នឹងផ្តល់ជូនពួកគាត់ហើយនោះ តែបែរជាពួកគាត់នៅតែបំពានរុករានយកដីរដ្ឋបន្តនោះ នឹងត្រូវចាត់ការអនុវត្តទៅតាមច្បាប់រដ្ឋបាលផងដែរ ។ ម៉្យាងទៀតអាជ្ញាធរមូលដ្ឋានទាំងអស់ ក៏ត្រូវធ្វើការពន្លឿនក្នុងការធ្វើទិន្នន័យប្រជាពលរដ្ឋឱ្យបានចប់សព្វគ្រប់ ដើមី្បបានទិន្នន័យសម្រាប់ជាធាតុចូលក្នុងការកំណត់បែងចែកតំបន់ផងដែរ ៕

បុគ្គលបួនរូបត្រូវបានតែងតាំងជាទីប្រឹក្សានិងថ្នាក់ដឹកនាំសមាគមអចលនទ្រព្យសកល

ដោយគង់ សូរិយា

ភ្នំពេញៈ បុគ្គលចំនួន៤រូប ដែលមានបទពិសោធន៍លើវិស័យអចលនទ្រព្យ និងចំណេះដឹងផ្នែកសង្គមច្រើន ត្រូវបានសមាគមអចលនទ្រព្យសាកល តែងតាំងជាទីប្រឹក្សានិងថ្នាក់ដឹកនាំសមាគមសំរាប់អាណត្តិទី១។

អ្នកដែលត្រូវបានតែងតាំងជាទីប្រឹក្សាសំរាប់សមាគមនេះ រួមមាន ទី១ តែងតាំងលោកលោកយិន លាងគង់សហស្ថាបនិក និងជាអគ្គនាយកគេហទំព័រPropertyarea.asia ជាទីប្រឹក្សាទទួលបន្ទុកផ្នែកព៌តមាន និងការផ្សព្វផ្សាយ ទី២ លោក ឡោ វិចិត្រ ជាអនុប្រធានសមាគមអចលនទ្រព្យសកល ប្រចាំរាជធានីភ្នំពេញទទួលបន្ទុកទំនាក់ទំនងជាតិ និងអន្តរជាតិ។

ទី៣ លោក ឃឹម យាន ប្រធានក្រុមប្រឹក្សាភិបាល និងជាប្រធានសមាគមអចលនទ្រព្យសកលប្រចាំខេត្តកណ្តាល និងទី៤ លោកស្រី គង់ សុខលីន ជាប្រធានសមាគមសកលអចលនទ្រព្យប្រចាំខេត្តកំពង់ស្ពឺ។

ប្រធានសមាគមអចលនទ្រព្យសកល លោកសំ សុខនឿន ហៅSAMបានមានប្រសាសន៍ឲ្យដឹងកាលពីថ្ងៃទី៤ តុលាកន្លងមកថា ការតែងតាំងទីប្រឹក្សា និងអនុប្រធានសមាគម ប្រធានសមាគមនៅតាមបណ្តាខេត្តនានាជាការរួមសតិបញ្ញា ស្មារតី ក្នុងការធ្វើការងារជាក្រុម ដើម្បីជួយសមាគមឲ្យមានភាពរីកចម្រើន ពិសេសគាំទ្រគោលនយោបាយរបស់រដ្ឋាភិបាលកម្ពុជាក្នុងការអភិវឌ្ឍសេដ្ឋកិច្ចជាតិ។

លោកបន្តថា “សមាគមអចលនទ្រព្យសកលមានចក្ខុវិស័យវែងឆ្ងាយ ដើម្បីជួយជំរុញការអភិវឌ្ឍសេដ្ឋកិច្ចសង្គម និងជំរុញការទាក់ទាញអ្នកវិនិយោគជាតិ អន្តរជាតិមកវិនិយោគនៅកម្ពុជា”។

លោកបន្តថា ជាមួយគ្នានេះសមាគម នឹងទទួលយកសមាជិកភាពជាលក្ខណៈបុគ្គលនិងក្រុមហ៊ុននានា ដែលធ្វើការងារទាក់ទងនឹងវិស័យអចលនទ្រព្យនៅកម្ពុជា ពិសេសការរួមសម្លេង និងទុនរួមគ្នា ដើម្បីជំរុញនូវបរិយាកាសវិនិយោគកាន់តែល្អប្រសើរ។

លោកបន្តថា “អ្វីដែលកាន់់តែពិសេសនាពេលអនាគតឆាប់ៗនេះ សមាគមនឹងបើកការិយាល័យនៅតាមបណ្តាប្រទេសមួយចំនួនរួមមាន ប្រទេសកូរ៉េ ជប៉ុន ក្រុងហុងកុង ខេត្តគ័ងចូវប្រទេសចិនជាដើម”៕

ប្រព័ន្ធហេដ្ឋារចនាសម្ព័ន្ធទីក្រុងនឹងជួយជំរុញឱ្យមានការអភិវឌ្ឍន៍គម្រោង លំនៅឋានកាន់តែច្រើន

ដោយវុត្ថា

ភ្នំពេញៈ រដ្ឋាភិបាលតាមរយៈរដ្ឋបាលរាជធានីភ្នំពេញ បាននិងកំពុងសាងសង់ប្រព័ន្ធហេដ្ឋារនាសម្ព័ន្ធឱ្យកាន់តែល្អ និងមានភាពល្អប្រសើរនៅតាមបណ្តាជាយក្រុងបានជំរុញឱ្យមានការអភិវឌ្ឍន៍គម្រោងលំនៅឋានកាន់តែច្រើន និងមានភាពងាយស្រួលក្នុងការដឹកជញ្ជូន ព្រមទាំងកាន់បន្ថយកកស្ទះចរាចរណ៍។

លោកឡុង គឺមសួគ៌ អគ្គនាយកក្រុមហ៊ុន Century21 Advance បានប្រាប់គេហទំព័រPropertyarea.asia កាលពីចុងសប្តាហ៍កន្លងមកនេះថា រាជរដ្ឋាភិបាល តាមរយៈរដ្ឋបាលរាជធានីភ្នំពេញ បាននឹងកំពុងស្តារ និងស្ថាបនប្រព័ន្ធហេដ្ឋារចនាសម្ព័ន្ធ នៅតាមជាយក្រុងឱ្យកាន់តែប្រសើរ (ផ្លូវបេតុង និងផ្លូវក្រវ៉ាត់ក្រុងជាដើម) ដែលនេះ ជំរុញឱ្យមានការអភវិឌ្ឍន៍គម្រោងលំនៅឋាន។

លោកបានថ្លែងថា “បច្ចុប្បន្ននេះរដ្ឋបាលរាជធានីភ្នំពេញ បាននិងកំពុងអភិឌ្ឍហេ ដ្ឋារនាសម្ព័ន្ធ មានភាពល្អប្រសើរជាងមុននៅតាមជាយក្រុង ដូចជា ផ្លូវក្រវាត់ក្រុងជាដើម និងផ្លូវមួយចំនួនត្រូវចាក់បេតុងបានស្អាត ដែលជំរុញឱ្យមានការសាងសងបុរី និងគម្រោងលំនៅឋានកម្រិងមធ្យមកាន់តែច្រើន”។

លោកបន្ថែមថា នៅពេលដែលមានគម្រោងលំនៅឋានកាន់តែច្រើន តម្លៃដីធ្លី ក៏ដូចជា អចលនទ្រព្យផ្សេងៗ កាន់តែមានតម្លៃថ្លៃ តែចាប់តាំងពីមានការផ្ទុះឡើងនូវជំងឺកូវីដ ១៩ មក និងការព្យួរប្រព័ន្ធអនុគ្រោះពន្ធ EBA ស្ថានភាពទីផ្សារអចលនទ្រព្យនៅកម្ពុជាស្ថិតនៅក្នុសភាពទ្រឹង ហើយក៏វាធ្វើឱ្យប៉ះពាល់សេដ្ឋកិច្ចសកលផងដែរ។

លោកឃួង ស្រេង អភិបាលរាជធានីភ្នំពេញ កាលពីពេលថ្មីៗនេះធ្លាប់បានថ្លែងថា រាជធានីភ្នំពេញ បាននឹងកំពុងពង្រីកខ្លួនពី៣០០ ទៅ៧០០គីឡូម៉ែត្រក្រឡា ដែលមានប្រជាពលរដ្ឋរស់នៅជិត៣លាននាក់ និងប្រកបមុខរបរគ្រប់ប្រភេទ ហើយរដ្ឋបាលរាជានីភ្នំពេញបាននឹងកំពុងកែលម្អ ប្រព័ន្ធហេដ្ឋារចនាសម្ព័ន្ធព័ន្ធជុំវិញក្រុងបានយ៉ាងល្អ ដើម្បីបង្កមានភាពស្រួលក្នុងការធ្វើដំណើរ និងកាត់បន្ថយកកស្ទះចរាចរណ៍។

លោកបន្តថា “ការកែលម្អប្រព័ន្ធហេដ្ឋារចនាសម្ព័ន្ធក្រុងនេះ បានជំរុញឱ្យមានការអភិវឌ្ឍន៍លំនៅឋានកាន់តែច្រើន ជាពិសេសនៅភាគខាងលិនៃទីក្រុងភ្នពេញ បណ្តុំទៅដោយគម្រោងលំនៅឋាន និងរោងចក្រសហគ្រាសគ្រប់ប្រភេទដែលកត្តាទាំងនេះ កើតចេញពីសុខសន្តិភាពនៅក្នុងប្រទេស ក្រោមការដឹកនាំរបស់សម្តេចតេជោ ហ៊ុន សែន”៕

វិភាគ៖ តើលោក Donald Trump ឬ Joe Biden នឹងក្លាយជាប្រធានាធិបតីអាមេរិកទី៤៦

ដោយយិន លាងគង់ ស្ថាបនិកគេហទំព័រ Propertyarea.asia

ភ្នំពេញៈ ការបោះឆ្នោតនៅអាមេរិក ដើម្បីជ្រើសរើសប្រធានាធិបតីមហាអំណាចមួយនេះ បានដល់ពេលរាប់ថយក្រោយហើយ ខណៈបេក្ខជនមកពីគណបក្សទាំងពីរកំពុងបង្ហាញក្តីសង្ឃឹមរៀងៗខ្លួន។

ប៉ុន្តែការឆ្លងមេរោគ Covid-19 របស់ប្រធានាធិបតីបច្ចុប្បន្ន បានធ្វើឲ្យឆាកសម្តែងលែងសូវល្អមើល ខណៈការតស៊ូមតិដ៏ក្តៅគគុក បានទាក់ទាញការចាប់អារម្មណ៍ ហើយការលើកឡើងរបស់លោក Joe Biden បានធ្វើឲ្យប្រជាប្រិយភាពរបស់លោក Trump ធ្លាក់ចុះ។

ការបោះឆ្នោតដែលទាក់ទាញ ចំណាប់អារម្មណ៍ពីមនុស្ស មកពីជុំវិញពិភពលោកនេះ បានធ្វើឲ្យប្រែប្រួលគោលនយោបាយសង្គម សេដ្ឋកិច្ច និងយោធាក្នុងពិភពលោក ហេតុនេះការជាប់ឆ្នោតរបស់អ្នកណាម្នាក់ ក្នុងចំណោមបេក្ខភាពដ៏មានសក្តានុពលទាំងពីរបាននិងកំពុងក្លាយជាចំណោទមួយ នៃគោលនយោបាយកាទូតរបស់ពួកគេ។

ប្រធានាធិបតីលោក Donald Trump

ប្រធានាធិបតីរូបនេះ ទំនងជាមនុស្សមានភាពចម្រូងចម្រាស់ច្រើនជាងគេ ក្នុងចំណោមប្រធានាធិបតីអាមេរិកទាំងអស់ សំរាប់សហគមន៍អន្តរជាតិ ដោយសារលោកបានដាក់ចេញនូវគោលនយោបាយ អាមេរិកជាអាទិភាព (American First) ដែលគោលនយោបាយនេះ សំដៅធ្វើឲ្យអាមេរិកមានសេដ្ឋកិច្ច និងអ្វីៗគ្រប់យ៉ាងមានភាពអស្ចារ្យ ប៉ុន្តែលទ្ឋផលទទួលបាន គឺធ្វើឲ្យសេដ្ឋកិច្ចរបស់មហាអំណាចនេះងើបឡើងមួយរយៈខ្លីប៉ុណ្ណោះ។

ផ្ទុយទៅវិញប្រធានាធិបតីរូបនេះ បានធ្វើឲ្យសហគមន៍អន្តរជាតិក្តៅក្រហាយ តាមរយៈការដកខ្លួនចេញពីសទ្ឋិសញ្ញានានា ការដាក់ទ័ណ្ឌកម្មជាឯកតោភាគី ដោយមិនគោរពតាមគោលការណ៍អង្គការសហប្រជាជាតិ ការដាក់ទ័ណ្ឌកម្មលើប្រទេសជាច្រើន ពិសេសបង្កើតសង្គ្រាមពាណិជ្ជកម្មជាមួយមហាយក្សចិនជាដើម។

គោលនយោបាយរបស់ Donald Trump

ក្តីសង្ឃឹម ដែលសេដ្ឋកិច្ចនឹងងើបឡើងវិញឆាប់ៗ កំពុងបាត់បង់បន្តិចម្តង។ អ្នកបោះឆ្នោតគាំទ្រលោក Donald Trump កំពុងងឿងឆ្ងល់ថា តើប្រធានាធិបតី Donald Trump ឬអតីតៈអនុប្រធានាធិបតី Joe Biden មានផែនការល្អប្រសើរជាងមុន ដើម្បីធ្វើឱ្យសេដ្ឋកិច្ចឆ្លងផុតពីការរាតត្បាត និងវិលត្រឡប់មករកភាពរឹងមាំឡើងវិញ។

ផែនការរបស់ពួកគេមិនអាចខុសគ្នាច្រើនទេ។ ផ្អែកលើការវិភាគរបស់យើង លោក Biden មានផែនការត្រឹមត្រូវ ហើយ Trump មានផែនការមិនត្រឹមត្រូវ។ ផែនការរបស់លោក Trump គឺសាមញ្ញ – បង្កើនធ្វើការងារទ្វេដងលើគោលនយោបាយ ដែលលោកបានធ្វើនៅក្នុងអាណត្តិដំបូងរបស់លោក។

ការដែលលោក Trump ធ្វើបែបនេះ ដោយសារតែលោកគិតថាលោក បានស្តារសេដ្ឋកិច្ចមុនពេលមានជំងឺរាតត្បាត ដូច្នេះលោកគិតថាលោកអាចស្ដារវាម្តងទៀត។ បញ្ហាជាគឺលោកគិតថា សេដ្ឋកិច្ចកំពុងតែដំនើរការល្អ នៅពេលដែលលោកចូលកាន់ដំណែងតែប៉ុណ្ណោះ។

លោក Joe ជាអ្នកណា និងដាក់ចេញគោលនយោបាយបែបណា?

តើលោក Joe Bidn eជាអ្នកណា? លោក Joe Biden (ឈ្មោះពេញ Joseph Robinette Biden Jr) កើតនៅថ្ងៃទី ២០ ខែវិច្ឆិកាឆ្នាំ ១៩៤២ គឺជាអ្នកនយោបាយអាមេរិក ដែលបានបម្រើការជាអនុប្រធានាធិបតីទី៤៧ របស់សហរដ្ឋអាមេរិកឆ្នាំ ២០០៩ ដល់ឆ្នាំ២០១៧ និងបានធ្វើជាតំណាងឱ្យរដ្ឋ Delaware នៅព្រឹទ្ធសភាអាមេរិកពីឆ្នាំ១៩៧៣ ដល់ ២០០៩ ។

ជាសមាជិកម្នាក់ នៃគណបក្សប្រជាធិបតេយ្យ លោក Biden គឺជាបេក្ខជនដែលបានតែងតាំងជាអ្នកតំណាងបក្សប្រជាធិបតេយ្យ ដើម្បីឈរឈ្មោះជាប្រធានាធិបតីនៅក្នុងការបោះឆ្នោតឆ្នាំ២០២០ ។ លោកមិនទទួលបានជោគជ័យ ក្នុងការតែងតាំងប្រធានាធិបតីប្រជាធិបតេយ្យនៅឆ្នាំ១៩៨៨ និងឆ្នាំ ២០០៨ នោះទេ។

លោក Biden ត្រូវបានចិញ្ចឹមបីបាច់នៅទីក្រុង Scranton រដ្ឋ Pennsylvania និងទីក្រុង New Castle County រដ្ឋ Delaware ។ គាត់បានសិក្សានៅសាកលវិទ្យាល័យUniversity of Delaware មុនពេលគាត់បានទទួលសញ្ញាប័ត្រច្បាប់ ពីសាកលវិទ្យាល័យSyracuse University ។

លោកបានក្លាយជាមេធាវីនៅឆ្នាំ១៩៦៩ ហើយត្រូវបានជាប់ឆ្នោតជាសមាជិកក្រុមប្រឹក្សា New Castle County Council នៅឆ្នាំ ១៩៧០ ។ លោក Joe Biden ត្រូវបានជ្រើសរើសជាថ្មីចំនួន៦ដង និងជាសមាជិកព្រឹទ្ធសភាជាន់ខ្ពស់បំផុតទី៤ នៅពេលដែលគាត់បានលាលែងពីតំណែង ដើម្បីកាន់តំណែងជាអនុប្រធានាធិបតីនៅឆ្នាំ ២០០៩ ។

ការចរចាររបស់លោកជាមួយ សមាជិកសភាសាធារណរដ្ឋ បានជួយរដ្ឋបាលលោក អូបាម៉ា អនុម័តច្បាប់រួមមានការបន្ធូរបន្ថយពន្ធ ការធានារ៉ាប់រងភាពគ្មានការងារធ្វើឡើងវិញនិង ច្បាប់បង្កើតការងារឆ្នាំ២០១០ ដែលបានដោះស្រាយការជាប់ពន្ធ។ ច្បាប់ត្រួតពិនិត្យថវិកាឆ្នាំ២០១១ ដែលបានដោះស្រាយវិបត្តិបំណុលឆ្នាំនោះ និងច្បាប់ផ្តល់ជំនួយដល់អ្នកជាប់ពន្ធអាមេរិកឆ្នាំ២០១២ ដែលបានដោះស្រាយអំពីសារពើពន្ធ ដែលជិតមកដល់។ លោកអូបាម៉ា និងលោក Biden ត្រូវបានជ្រើសរើសជាថ្មីក្នុងឆ្នាំ ២០១២ ។

នៅខែតុលាឆ្នាំ ២០១៥ បន្ទាប់ពីមានការសង្ស័យជាច្រើនខែ លោក Biden បានប្រកាសថា លោកនឹងមិនស្វែងរកតំណែងប្រធានាធិបតី នៅក្នុងការបោះឆ្នោតឆ្នាំ២០១៦ទេ។ នៅខែមករាឆ្នាំ ២០១៧ លោកអូបាម៉ា បានប្រគល់មេដាយសេរីភាពប្រធានាធិបតីដល់លោក។ បន្ទាប់ពីបញ្ចប់អាណត្តិទីពីររបស់លោក ជាអនុប្រធានាធិបតីលោក Joe Biden បានចូលរួមជាមួយមហាវិទ្យាល័យ នៃសាកលវិទ្យាល័យ Pennsylvania ជាកន្លែងដែលលោក ត្រូវបានគេដាក់ឈ្មោះជាសាស្ត្រាចារ្យ Benjamin Franklin នៃការអនុវត្តប្រធានាធិបតី។

លោកបានប្រកាសបេក្ខភាពជាប្រធានាធិបតី របស់លោកនៅឆ្នាំ២០២០ នៅថ្ងៃទី ២៥ ខែមេសាឆ្នាំ ២០១៩ ដោយចូលរួមជាមួយបេក្ខជនប្រជាធិបតេយ្យជាច្រើន ដើម្បីស្វែងរកការតែងតាំងគណបក្ស។

សារនយោបាយ និងយុទ្ឋសាស្ត្រលោក Joe Biden

លោក Biden សន្យាអនុវត្តន៍ ផ្ទុយពីគោលនយោបាយជាច្រើនរបស់ Trump ។ លោកបានសន្យាថា លោកនឹងបន្តជំរុញប្រជាជនចិន ឱ្យគោរពតាមច្បាប់ពាណិជ្ជកម្មអន្តរជាតិ ប៉ុន្តែលោកនឹងធ្វើដូច្នេះដោយចូលរួមឡើងវិញ ជាមួយអង្គការពាណិជ្ជកម្មពិភពលោក និងអនុវត្តយុទ្ធសាស្ត្រពហុភាគីផ្សេងទៀត។

លោក Biden បាននិយាយអំពីលទ្ធភាព នៃការផ្តល់អនុសាសន៍ទៅកិច្ចព្រមព្រៀងពាណិជ្ជកម្មសេរីភាព ជាដៃគូអន្តរប៉ាស៊ីហ្វិក ជាមួយនឹងបទប្បញ្ញត្តិពលកម្ម និងបរិស្ថានតឹងរឹងជាងមុន។ TPP គឺជាកិច្ចព្រមព្រៀងរវាងសហរដ្ឋអាមេរិក និងបណ្តាប្រទេសនៅ ប៉ាស៊ីហ្វិកផ្សេងទៀត ដែលមិនរាប់បញ្ចូលប្រទេសចិន ពីព្រោះប្រទេសចិនមិនមានភាពយុត្តិធម៌ក្នុងការធ្វើពាណិជ្ជកម្មជាមួយទេ។

រដ្ឋបាលលោក Obama បានព្រមព្រៀងជាមួយ TPP ប៉ុន្តែលោក Trump បានដកខ្លួនចេញពីបទបញ្ជាមួយ ក្នុងចំណោមបទបញ្ជាប្រតិបត្តិដំបូងរបស់លោក។

លោក Biden ក៏នឹងធ្វើឱ្យមានការអន្តោប្រវេសន៍ពីបរទេសវិញ តាមរយៈការផ្តល់ក្តីតាមរយៈការផ្តល់ សញ្ជាតិ និងអនុញ្ញាតឱ្យជនភៀសខ្លួន និងអ្នកស្វែងរកសិទ្ធិជ្រកកោនចូលមកអាមេរិក និងគាំទ្រច្បាប់កំណែទម្រង់អន្តោប្រវេសន៍ ដែលស្ទើរតែចូលជាធរមាននៅក្នុងអាណត្តិទី២របស់អូបាម៉ា។

ផែនការរបស់លោក Biden នឹងបង្កើនការចំណាយរបស់រដ្ឋាភិបាលយ៉ាងខ្លាំង។ លោកស្នើឱ្យមានការវិនិយោគធំៗ លើហេដ្ឋារចនាសម្ព័ន្ធរួម ដោយសង្កត់ធ្ងន់ជាធម្មតាលើ ផ្លូវថ្នល់ និងស្ពាន ប៉ុន្តែក៏ថាមពលស្អាត ការស្រាវជ្រាវ និងការអភិវឌ្ឍន៍ ដូចជា បច្ចេកវិទ្យា5G បច្ចេកវិទ្យាផ្ទុកថាមពល និងបញ្ញាសិប្បនិម្មិត (AI)។ ការវិនិយោគលើវិស័យអប់រំក៏នឹងទទួលបានការជម្រុញដ៏ធំមួយផងដែរ រួមមានការអប់រំកុមារតូចៗ ការបង់ថ្លៃសិក្សានៅតាមមហាវិទ្យាល័យ សាធារណៈឥតគិតថ្លៃសម្រាប់និស្សិត ដែលមានប្រាក់ចំណូលទាប និងមធ្យម និងការដោះស្រាយបំណុលប្រាក់កម្ចីរបស់និស្សិត។

បណ្តាញសុវត្ថិភាពសង្គម ក៏នឹងកាន់តែរឹងមាំផងដែរ ដោយមានថវិកាកាន់តែច្រើនសម្រាប់ការថែទាំសុខភាពការថែរក្សាកុមារ និងមនុស្សចាស់ផ្ទះនិងសន្តិសុខសង្គម។

ការស្ទង់មតិ

ការស្ទង់មតិជាច្រើនលើកដែលធ្វើឡើង នៅតាមស្ថាប័នធំៗរបស់អាមេរិក បានរកឃើញថា ប្រធានាធិបតី Trump ទំនងគ្មានវាសនាជាប់ឆ្នោតទៀតនោះទេ ប៉ុន្តែភាពចម្រូងចំរាស់នៃការបោះឆ្នោតលើកនេះ ទំនងជាធ្វើឲ្យលទ្ឋផលចាញ់ឈឈ្នះ កាន់តែពិបាក ដោយសារប្រព័ន្ឋបោះឆ្នោតតាមប្រៃសណីយ៍ ត្រូវបានត្រាំចោទថា មានការលួចបន្លំសន្លឹកឆ្នោតច្រើន ហើយលោកទំនងជានឹងមិនចុះចេញពីដំណែង ប្រសិនជាលោកគិតថា លទ្ឋផលឆ្នោតមិនមានភាពប្រក្រតី។

ជាមួយគ្នានឹងការប្រកាសថា លោកនឹងមិនចុះចេញពីដំណែង ប្រសិនជាលទ្ឋផលឆ្នោតមានការលួចបន្លំច្រើន មេដឹកនាំយោធាដ៏មានឥទ្ឋិពលនៅអាមេរិក បានអះអាងរួវចហើយថា ពួកគេនឹងមិនលូកដៃចូលក្នុងការបោះឆ្នោតនាពេលខាងមុខនោះទេ។

ជាមួយនឹងប្រព័ន្ឋបោះឆ្នោត ដែលផ្អែកលើសម្លេងប្រតិភូធំជាង សម្លេងប្រជាពល រដ្ឋ លទ្ឋផលឆ្នោតពិតជាពិបាកប៉ាន់ស្មាន ហើយអ្នកណាជាប់ឬធ្លាក់ពិតជាពិបាកក្នុងការទស្សន៍ទាយយ៉ាងពិតប្រាកដ។

ចរិកបេក្ខជនទាំងពីរ

ការសម្រេចចិត្តរបស់ប្រជាពលរដ្ឋ ពិសេសប្រតិភូនៅតាមបណ្តារដ្ឋនិមួយៗនៅសហរដ្ឋអាមេរិក ពិតជាសំខាន់ណាស់ ដើម្បីកំណត់វាសនាមហាអំណាចមួយនេះ ក៏ដូចការប្រែប្រួលនៃពិភពលោកទាំងមូល។

ការបង្កើតនូវវប្បធ៌មគាំពារនិយម ជាការទាត់ចោលសាកលភាវូបនីយកម្ម ដែលពិភពលោកកំពុងត្រូវការ ការមិនទទួលយកកំហុស ហើយចូលចិត្តទម្លាក់កំហុសឲ្យអ្នកដទៃ ចូលចិត្តសម្លុតគំរាម និងការដាក់ទ័ណ្ឌកម្មលើបណ្តាប្រទេសនានា ដែលមិនសហការជាមួយខ្លួនគឺជាចរិករបស់ Trump ។

ជាលទ្ឋផលក្នុងកំឡុងលោកកាន់អំណាច ប្រទេសជាច្រើនត្រូវបានដាក់ទណ្ឌកម្ម ដោយអាមេរិក មានដូចជាប្រទេស Balkans, Belarus, Burundi, Central African Republic, Cuba, Democratic Republic of Congo, Hong Kong, Iran, Iraq, Lebanon, Libya, Mali, Nicaragua, North Korea, Somalia, Sudan, South Sudan, Syria, Ukraine/Russia, Venezuela, Yemen, and Zimbabwe ។

ការបង្កើតឲ្យមានដោយចេតនា នូវការរើសអើងជាតិសាសន៍ ដែលធ្វើឲ្យមានប្រតិកម្ម ពីអតីតប្រធានាធិបតីខ្មែរខ្មៅដំបូងគេ ក្នុងប្រវត្តិសាស្ត្រអាមេរិក លោក Barack Obama និងប្រធានាធិបតី Bush ពិសេសសហគមន៍ស្បែកខ្មៅនៃសហរដ្ឋអាមេរិក ការគ្រប់គ្រងជំងឺ Covid-19 មិនបានល្អ កំពុងធ្វើឲ្យ Trump ធ្លាក់ប្រជាប្រិយភាពទាំងនៅអាមេរិក និងសហគមន៍អន្តរជាតិ។

ផ្ទុយទៅវិញលោក Joe Biden ជាមនុស្សមានចិត្តត្រជាក់ ជាមួយគោលនយោបាយដាក់ចេញច្បាស់លាស់ មានភាពទន់ភ្លន់ ការជាប់ឆ្នោតរបស់លោកទំនង ជាធ្វើឲ្យសហគមន៍អន្តរជាតិ ពិសេសមហាមិត្តចិនទំនងជាសម្បាយចិត្ត ដោយសារលោកមានគោលនយោបាយសហវិជ្ជមាន និងជ្រើសរើសសាកលភាវូបនីយកម្ម ជាជាងការគាំពារនិយមឬឯកតោភាគី។

ក្នុងពេលឈរដំណែងជាអនុប្រធានាធិបតី លោក Joe បានជួយលោក Barack Obama ជាច្រើន លើការរៀបចំគោលនយោបាយនានាទាក់ទងនឹងសង្គម សេដ្ឋកិច្ច ការកាត់បន្ថយភាពគ្មានការងារធ្វើ គោលនយោបាយគាំពារសង្គមជាដើម។

ការសម្រេចចិត្តចុងក្រោយ

ប្រជាពលរដ្ឋ និងប្រតិភូនៅតាមបណ្តារដ្ឋនិមួយៗរបស់អាមេរិក បាននិងកំពុងឈានដល់ការទាត់បាល់ប៉េណាល់ទី ដើម្បីវាស់ពីកម្រិតសមត្ថភាពនៃការវិនិច្ឆ័យរបស់ពួកគេ ប៉ុន្តែការវិនិចឆ័យដែលនឹងបង្ហាញលទ្ឋផលក្នុងរូបភាពពីរ ដែលឆ្លុះបញ្ចាំងពីចរិកប្រជាជាតិអាមេរិក។

ទី១ ប្រសិនជាប្រធានាធបតី Trump ជាប់ឆ្នោតជាថ្មី វានឹងបង្ហាញថាប្រជាជនអាមេរិកមិនមែនជាមនុស្សស៊ីវិល័យទៀតទេ ពួកគេចាប់ផ្តើមមានគំនិតអញនិយមកាន់តែខ្លាំង ហើយសង្គមអាមេរិកនឹងចាប់ផ្តើមបែកបាក់ នឹងដួលរលំកាន់តែឆាប់រហ័ស ពិសេសធ្លាក់ចេញពីដំណែងលេខ១របស់ពិភពលោក។

ទី២ ប្រសិនជាលោក Joe Biden ជាប់ឆ្នោត ដែលលោកមានគោលនយោបាយទន់ភ្លន់ និងលើកកំពស់នូវសាកលភាវូបនីយកម្ម វានឹងបង្ហាញថាប្រជាជនអាមេរិក ជាជនជាតិដែលមានភាពស៊ីវិល័យ ជាជាតិសាសន៍ដែលមានអរិយធ៌ម ជាជនដែលគួរឲ្យគោរពមិនមែនជាមនុស្សគួរឲ្យភ័យខ្លាចនោះឡើយ៕

កំឡុងខែកញ្ញារដ្ឋាភិបាលអនុម័តគម្រោងវិនិយោគចំនួន១០មានទុនសរុបជិត ៣៥លានដុល្លារ

ដោយៈ រ៉ាណេត

ភ្នំពេញៈ នៅក្នុងរយៈពេល៣០ថ្ងៃនៃកញ្ញា ឆ្នាំ២០២០កន្លងទៅថ្មីៗនេះ រាជរដ្ឋាភិបាលតាមរយៈក្រុមប្រឹក្សាអភិវឌ្ឍន៍កម្ពុជា បានសម្រេចអនុម័ត និងគាំទ្រទៅលើគម្រោងវិនិយោគចំនួន១០ ដែលមានទុនសរុបជិត៣៥លានដុល្លារ នៅក្នុងវិស័យឧស្សាហកម្មរោងចក្រកាត់ដេរ និងរោងចក្រគ្រឿងអគ្គិសនី។

យោងតាមតួលេខដែលកត់ត្រា ដោយក្រុមប្រឹក្សាអភិវឌ្ឍន៍កម្ពុជា (CDC) បានបង្ហាញថា នៅក្នុងខែកញ្ញា ឆ្នាំ២០២០កន្លងទៅនេះ មានគម្រោងវិនិយោគថ្មីចំនួន១០គម្រោង ត្រូវបានអនុម័តឱ្យដំណើរការវិនិយោគនៅកម្ពុជា ដែលមានទុនវិនិយោគសរុបជិត៣៥លានដុល្លារអាមេរិក។

គម្រោងវិនិយោគថ្មីៗទាំង១០នោះ ដែលទទួលបានការគាំទ្ររួមមាន ទី១៖ ក្រុមហ៊ុន GLOBAL ASIA APPAREL (CAMBODIA) CO., LTD គម្រោងបង្កើតរោងចក្រកាត់ដេរសម្លៀកបំពាក់ ដែលមានទីតាំងវិនិយោគស្ថិតនៅផ្លូវអន្លង់គង ភូមិអន្លង់គងចាស់ សង្កាត់ព្រៃស ខណ្ឌដង្កោ រាជធានីភ្នំពេញ មានទុនវិនិយោគប្រមាណ ៣លានដុល្លារអាមេរិក និងអាចបង្កើតការងារបានចំនួន ៩៤៨កន្លែង។

ទី២ ក្រុមហ៊ុន SINODEX GARMENT (CAMBODIA) CO., LTD គម្រោងបង្កើតរោងចក្រកាត់ដេរសម្លៀកបំពាក់ ដែលមានទីតាំងវិនិយោគស្ថិតនៅភូមិជ្រៃកោង សង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ មានទុនវិនិយោគប្រមាណ ៣លានដុល្លារអាមេរិក និងអាចបង្កើតការងារបានចំនួន ៧២០កន្លែង។

ទី៣ ក្រុមហ៊ុន GOOD PLUS (CAMBODIA) MANUFACTURE CO.,LTD គម្រោងកាត់ដេរសម្លៀកបំពាក់ និងផលិតម៉ាស់ ដែលមានទីតាំងវិនិយោគស្ថិតនៅផ្លូវជាតិលេខ៣ ភូមិស្រែញ័រ សង្កាត់ពងទឹក ខណ្ឌដង្កោ រាជធានីភ្នំពេញ មានទុនវិនិយោគប្រមាណ២.៧លានដុល្លារអាមេរិក និងអាចបង្កើតការងារបានចំនួន ៧៦៤កន្លែង។

ទី៤ ក្រុមហ៊ុន Biao Xin Sheng Packaging and Printing Co., Ltd.: គម្រោងបង្កើតរោងចក្រផលិតតែមកង់ បោះពុម្ពក្រដាស់ និងសម្ភារ:វេចខ្ចប់គ្រប់ប្រភេទ, មានទីតាំងស្ថិតនៅក្នុងតំបន់សេដ្ឋកិច្ចពិសេស តាយសេង បាវិត ខេត្តស្វាយរៀង, មានទុនវិនិយោគចំនួន ១លានដុល្លារអាមេរិក និងអាចបង្កើតការងារបានចំនួន ៣៩០កន្លែង។

ទី៥ ក្រុមហ៊ុន Leadone International Co., Ltd.: គម្រោងបង្កើតរោងចក្រផលិតផលិតផលផ្លាស្ទិក គ្រាប់ជ័រ និងស្បែកសិប្បនិម្មិតគ្រប់ប្រភេទ, មានទីតាំងស្ថិតនៅក្នុងតំបន់សេដ្ឋកិច្ចពិសេស ស្វាយរៀង ហ្គីហ្គា រីស៍ស ខេត្តស្វាយរៀង, មានទុនវិនិយោគចំនួន ២.៨លានដុល្លារអាមេរិក និងអាចបង្កើតការងារបានចំនួន ២១០កន្លែង។

ទី៦ ក្រុមហ៊ុន New Phoenix Development Industry Co., Ltd.: គម្រោងបង្កើតរោងចក្រផលិតអំពូលភ្លើងគ្រឿងបង្គុំអំពូល និងខ្សែភ្លើង, មានទីតាំងស្ថិតនៅក្នុងតំបន់សេដ្ឋកិច្ចពិសេស តាយសេង បាវិត ខេត្តស្វាយរៀង, មានទុនវិនិយោគចំនួន ៩លានដុល្លារអាមេរិក និងអាចបង្កើតការងារបានចំនួន៨៣០កន្លែង។

ទី៧ ក្រុមហ៊ុន Simple Packing Products Co., Ltd.: គម្រោងបង្កើតរោងចក្រផលិតកេសកាតុង និងសម្ភារៈវេចខ្ចប់គ្រប់ប្រភេទ មានទីតាំងស្ថិតនៅក្នុងតំបន់សេដ្ឋកិច្ចពិសេស តាយសេង បាវិត ខេត្តស្វាយរៀង, មានទុនវិនិយោគចំនួន ២.១២លានដុល្លារអាមេរិក និងអាចបង្កើតការងារបានចំនួន ២២០កន្លែង។

ទី៨ ក្រុមហ៊ុន JIN XINSHENG (CAMBODIA) CO., LTD. គម្រោងបង្កើតរោងចក្រផលិតក្រដាសទ្រនាប់ពុម្ព ទ្រនាប់កអាវ ស្កុត និងខារអំបោះ ដែលមានទីតាំងវិនិយោគស្ថិតនៅក្នុងសួនឧស្សាហកម្ម វៀលស៊ុន អគារ A ផ្លូវជាតិលេខ៤ ភូមិផ្សារកំបូល សង្កាត់កំបូល ខណ្ឌកំបូល រាជធានីភ្នំពេញ មានទុនវិនិយោគប្រមាណ ៥លានដុល្លារអាមេរិក និងអាចបង្កើតការងារបានចំនួន ១៩៨នាក់។

ទី៩ ក្រុមហ៊ុន G.C.H INTERNATIONAL TRADE CO., LTD. គម្រោងបង្កើតរោងចក្រផលិតកាបូបគ្រប់ប្រភេទ ដែលមានទីតាំងវិនិយោគស្ថិតនៅភូមិចាស់ ឃុំពេជ្រមុនី ស្រុកគងពិសី ខេត្តកំពង់ស្ពឺ មានទុនវិនិយោគប្រមាណ៣.២លានដុល្លារអាមេរិក និងអាចបង្កើតការងារបានចំនួន ១,០២៨នាក់។

ទី១០ ក្រុមហ៊ុន LOGWOOD APPAREL CO., LTD. គម្រោងបង្កើតរោងចក្រកាត់ដេរសម្លៀកបំពាក់ សម្លៀកបំពាក់ពេទ្យ និងម៉ាស់គ្រប់ប្រភេទ ដែលមានទីតាំងវិនិយោគស្ថិតនៅភូមិអន្លង់រមៀតខាងលិច ឃុំអន្លង់រមៀត ស្រុកកណ្តាលស្ទឹង ខេត្តកណ្តាល ទុនវិនិយោគប្រមាណ ២.៧លានដុល្លារអាមេរិក និងអាចបង្កើតការងារបានចំនួន៨១៤កន្លែង៕

គេហទំព័រ PROPERTY AREA ASIA ចុះអនុស្សារណយោគយល់ជាមួយសមាគមអចលនទ្រព្យសកល (GRA)

ដោយៈ រ៉ាណេត

ភ្នំពេញៈ ក្នុងគោលបំណងលើកស្ទួយ និងជំរុញការផ្សព្វផ្សាយពី វិស័យអចលនទ្រព្យកម្ពុជា ឱ្យកាន់តែមានភាពទូលំទូលាយ ក្រុមហ៊ុនគេទំព័រអចលនទ្រព្យ និងសេដ្ឋកិច្ច PROPERTY AREA ASIA បានចុះកិច្ចអនុស្សារណយោគយល់ ជាមួយសមាគមអចលនទ្រព្យសកល (GRA) ក្រោមការចូលរួមអបអរសាទរ និងធ្វើជាសាក្សីពីសំណាក់អ្នកវិនិយោគក្នុងវិស័យអចលនទ្រព្យជាច្រើននាក់។

នៅក្នុងពិធីចុះហត្ថលេខានាព្រឹកថ្ងៃទី៤ ខែតុលា ឆ្នាំ២០២០ នៅសាលសន្និសីទ Urban Village ភ្នំពេញ លោក យិន លាងគង់ ស្ថាបនិក និងជាអគ្គនាយកក្រុមហ៊ុនគេហទំព័រ PROPERTY AREA ASIA បានមានប្រសាសន៍ថា ការចុះកិច្ចអនុស្សារណយោគយល់នាពេលនេះ គឺជាការរួបរួមគ្នារវាងក្រុមហ៊ុនផ្សព្វផ្សាយព័ត៌មាន និងសមាគមអចលនទ្រព្យសកល ក្នុងការជួយជំរុញ និងលើកកម្ពស់វិស័យអចលនទ្រព្យនៅកម្ពុជា ឱ្យកាន់តែទូលំទូលាយ ប្រកបដោយប្រសិទ្ធភាពខ្ពស់។

លោកបានបន្តថា “ការផ្សព្វផ្សាយព័ត៌មានពីវិស័យអចលនទ្រព្យ មានសារសំខាន់បំផុតសម្រាប់បណ្តាអ្នកជំនួញ អ្នកវិនិយោគ និងអភិវឌ្ឍន៍ទាំងជាតិ និងអន្តរជាតិ” ។ លោកបន្តថា “បន្ថែមពីនេះ តាមរយៈការផ្សព្វផ្សាយព័ត៌មាន ប្រកបដោយប្រសិទ្ធភាព និងតម្លាភាពនេះ ប្រៀបបានទៅនឹងដែកឆក់មួយ ក្នុងការទាក់ទាញបណ្តាញក្រុមហ៊ុនអន្តរជាតិឱ្យចូលមកបណ្តាក់ទុនវិនិយោគនៅកម្ពុជា ជាពិសេសការអភិវឌ្ឍន៍ ក្នុងវិស័យអចលនទ្រព្យ និងសំណង់ផងដែរ” ។

លោកបញ្ជាក់ថា “តាមរយៈការចុះកិច្ចអនុស្សារណយោគយល់នេះ នឹងចូលរួមលើកកម្ពស់ទីផ្សារ និងវិស័យអចលនទ្រព្យនៅកម្ពុជា បានយ៉ាងល្អប្រសើរថែមមួយកម្រិតទៀត” ។

ប្រធានសមាគមអចលនទ្រព្យសកល (GRA) លោកសំ សុខនឿន បានមានប្រសាសន៍ថា “ក្នុងនាមតំណាងសមាគមអចលនទ្រព្យសកល សូមសម្ដែងនូវភាពរីករាយ ដែលបានសហការជាដៃគូ ជាមួយក្រុមហ៊ុនគេហទំព័រអចលនទ្រព្យ និងសេដ្ឋកិច្ច PROPERTY AREA ASIA ដែលជាបណ្តាញផ្សព្វផ្សាយព័ត៌មានមួយដ៏ល្បីឈ្មោះនៅកម្ពុជា” ។

លោកបន្តទៀតថា “ភាពរីកចម្រើន និងអភិវឌ្ឍន៍ក្នុងវិស័យអចលនទ្រព្យ ត្រូវពឹងផ្អែកមួយចំណែកធំ ទៅលើបណ្តាញផ្សព្វផ្សាយដែលមានគុណភាព តម្លាភាព និងប្រសិទ្ធភាព ពីទីផ្សារក្នុងស្រុក ទៅកាន់ទីផ្សារក្រៅស្រុក” ។ លោកបន្តថា “ការផ្សព្វផ្សាយព៌តមានពិត គ្រប់ជ្រុងជ្រោយនឹងផ្តល់នូវគុណប្រយោជន៍ ដែលអាចអូសទាញបណ្តាអ្នកវិនិយោគអន្តរជាតិឱ្យចូលមកកាន់កម្ពុជា” ។

ក្រៅពីនេះ រាល់ព័ត៌មានអចលនទ្រព្យ ដែលបានធ្វើការផ្សព្វផ្សាយក៏ជាធាតុមួយយ៉ាងសំខាន់ សម្រាប់អ្នកជំនួញក្នុងវិស័យមួយនេះ ដើម្បីធ្វើការសិក្សា ស្វែងយល់លម្អិតពីស្ថានភាពនៃវិស័យអចលនទ្រព្យ មុនពេលសម្រេចបណ្តាក់ទុនវិនិយោគ ក្នុងផ្នែកណាមួយ។

ក្រោយពេលបញ្ចប់កិច្ចចុះហត្ថលេខា លើអនុស្សារណយោគយល់ខាងលើនេះ លោក យិន លាងគង់ ក៏ត្រូវបានប្រកាសតែងតាំង ជាទីប្រឹក្សារបស់សមាគមអចលនទ្រព្យ សកល (GRA) ដោយទទួលបន្ទុកលើការផ្សព្វផ្សាយព័ត៌មានផងដែរ ៕

តើទីផ្សារអាគារពាណិជ្ជកម្មនៅកម្ពុជាបច្ចុប្បន្នមានស្ថានភាពបែបណា?

ដោយវុត្ថា

ភ្នំពេញៈ ទីផ្សារអគារពាណិជ្ជកម្មនៅក្នុងប្រទេសកម្ពុជា ដែលរហូតមកដល់ពេលនេះ នូវតែទទួលរងនូវផលប៉ះពាល់ ពីការរាតត្បាតជាសកលពីជំងឺកូវីដ១៩ ស្របពេលដែលវិបត្តិនេះស្ថិតនៅក្នុងភាពមិនប្រាកដប្រជា។

លោកស្រីអាន សុធិតា នាយិកាក្រុមអន្តរជាតិ CBRE Cambodia បានប្រាប់គេហទំព័រ Propertyarea.asia កាលពីពេលថ្មីៗនេះថា ការសងសង់អគារពាណិជ្ជកម្មនៅក្នុងប្រទេសកម្ពុជា គឺផ្តោតសំខាន់លើទីផ្សារអន្តរជាតិ ដែលសំដៅដល់ទីផ្សារសម្រាប់វិនិយោគិនបរទេស ដែលមករកស៊ីនៅក្នុងប្រទេសកម្ពុជា តែដោយសារការមានការផ្ទុះឡើងនូវវិបត្តិបានធ្វើឱ្យទីផ្សារមួយនេះធ្លាក់ចុះ។

លោកស្រីថ្លែងថា “កាលពីពេលថ្មីៗ នៅពេលដែលទទួលរងនូវផលប៉ះពាល់ ពីការររីករាលដាលនៃជំងឺកូវីដ១៩ បានធ្វើឱ្យទីផ្សារអគារពាណិជ្ជកម្ម ស្ថិតនៅក្នុងសភាពយឺតបន្តិច ហើយការសាងសង់អគារពាណិជ្ជកម្មភាគច្រើន ផ្តោតលើទីផ្សារអន្តរជាតិ តែដោ យសារមានបញ្ហា (ជំងឺកូវីដ១៩) បានហាមឃាត់វិនិយោគិនចូលមកកម្ពុជា” ។

លោកស្រីបញ្ជាក់ទៀតថា បើធៀបទៅនឹងទីផ្សារអគារពាណិជ្ជកម្ម នៅក្នុងប្រទេសកម្ពុជា នាពេលបច្ចុប្បន្ននេះ ជាមួយនឹងបណ្តាប្រទេសមួយចំនួន នៅក្នុងតំបន់អាស៊ានគឺនៅមានកម្រិតនៅឡើយ ដែលទាមទារឱ្យមានការវិនិយោគបន្ថែមទៀត តែយ៉ាងណាបើច្រើនពេកវាអាចនឹងមានការផ្គត់ផ្គង់លើសតម្រូវការ” ។

លោកច្រឹក សុខនីម ប្រធានសមាគមភ្នាក់ងារ និងវាយតម្លៃអចលនវត្ថុកម្ពុជាធ្លាប់បានឱ្យដឹងដែរថា វិបិត្តនៃជំងឺកូវីដ-១៩ ជាសកល បានធ្វើវិស័យជាច្រើនបានធ្លាក់ចុះ ក្នុងនោះក៏ រួមមាន វិស័យអចលនទ្រព្យមួយចំណែកផងដែរ ។ តែយ៉ាងណាស្ថានភាពទីផ្សារអចលនទ្រព្យនៅកម្ពុជា នឹងងើបឡើងវិញ បន្ទាប់ពីត្រូវបានទប់ស្កាត់នូវជំងឺកូវីដ១៩បាន ។

លោកបន្តថា ការរីករាលដាលនៃជំងឺកូវីដ១៩ បានធ្វើឱ្យការវិនិយោគពីក្រៅស្រុកធ្លាក់ចុះយ៉ាងធ្ងន់ធ្ងរ លើវិស័យអចលនទ្រព្យកម្ពុជា ដោយសារពួកគេ (អ្នកដែលមានបំណងមកវិនិយោគ) មិនអាចធ្វើដំណើរ មកកាន់កម្ពុជា ហើយត្រូវបានផ្អាក តែយ៉ាងណាសម្រាប់អ្នកវិនិយោគនៅក្នុងស្រុកនៅតែមានធម្មតា ។

យោងតាមការព្យាករណ៍របស់ក្រុមហ៊ុនអចលនទ្រព្យអន្តរជាតិ CBRE Cambodia បានបង្ហាញកាលពីខែមុនេះថា ទីផ្សារការិយាល័យសម្រាប់ជួល នៅក្នុងអគារពាណិជ្ជកម្មបានធ្លាក់ចុះ នៅឆ្នាំ២០២០នេះ ស្របពេលដែលអត្រានៃការជួលការិយាល័យ របស់ក្រុមហ៊ុននានានៅកម្ពុជា ស្ថិតក្នុងស្ថានភាពទ្រឹង ចាប់តាំងពីត្រីមាសទី១ឆ្នាំ២០២០មកម្លេះ។

ការព្យាករណ៍នេះ បានលើកឡើងទៀតថា ចរន្តទីផ្សារនៃការជួលអគារពាណិជ្ជកម្មសម្រាប់បម្រើជាការិយាល័យ របស់ក្រុមហ៊ុនបានចាប់ផ្តើមធ្លាក់ចុះ ចាប់តាំងពីត្រីមាសទី២នៅឆ្នាំនេះ ជាពិសេសចាប់តាំងពីខែឧសភាឆ្នាំ២០២០នេះ រហូតមកដល់បច្ចុប្បន្នផ្ទាល់តែម្តង ហើយក៏រំពឹងថា អាចនឹងបន្តធ្លាក់ចុះបន្តទៀត រហូតដល់ដំណាច់ឆ្នាំ២០២០នេះផងដែរ។

អគារពាណិជ្ជកម្មគឺជាអគារ ដែលត្រូវបានប្រើសម្រាប់ គោលបំណងពាណិជ្ជកម្មរួមអគារការិយាល័យ មជ្ឈមណ្ឌលវេជ្ជសាស្ត្រ សណ្ឋាគារ ផ្សារទំនើប ហាងលក់រាយ អគារលំនៅដ្ឋាន អគារពហុមុខងារ ឃ្លាំង និងយានដ្ឋានជាដើម។ នៅក្នុងទីក្រុង អគារពាណិជ្ជកម្មនវ ក៏ត្រូវបានគេប្រើប្រាស់រួមផងដែរ ទាំងការិយាល័យ ផ្សារទំនើប និងកន្លែងហាក់ប្រាណ ហើយការវិនិយោគអគារពាណិជ្ជកម្មនេះ ទទួលបានចំណូលពីការជួលទៅឱ្យអ្នកវិនិយោគិនជាតិ និងអន្តរជាតិ៕

ចំណេះដឹង! ហេតុអ្វីត្រូវបង្កើតយន្តការភាពជាដៃគូគយ-ផ្នែកឯកជន

ដោយវុត្ថា

ភ្នំពេញៈ យន្តការភាពជាដៃគូគយ-ផ្នែកឯកជន ត្រូវបានបង្កើតឡើងដោយប្រកាសលេខ ៩០៦ សហវ.ប្រក ចុះថ្ងៃទី០៩ ខែតុលា ឆ្នាំ២០០៩ របស់ក្រសួងសេដ្ឋកិច្ច និងហិរញ្ញវត្ថុ តាមរយៈការសម្រេចដ៏ខ្ពង់ខ្ពស់ របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃកម្ពុជា ដើម្បីលើកទឹកចិត្តឲ្យមានការចូលរួមរបស់ផ្នែកឯកជន ក្នុងការជម្រុញនូវអនុលោមភាពច្បាប់ និងប្រសិទ្ធភាពនៃកិច្ចសម្រួលពាណិជ្ជកម្មនៅកម្ពុជា។

យន្តការនេះ ត្រូវបានប្រកាសជាផ្លូវការនាថ្ងៃទី២៦ ខែមករា ឆ្នាំ២០១០ ក្នុងគោល បំណងលើកកម្ពស់បរិយាកាសវិនិយោគ និងធុរកិច្ចល្អ ប្រកបដោយសមធម៌សម្រាប់ផ្នែកឯកជនបន្ថែមទៀត។

ដើម្បីបង្កើនប្រសិទ្ធភាពនៃដំណើរយន្តការនេះ ដោយឈរលើស្មារតីភាពជាដៃគូស្នើភាពគ្នារវាងគយ និងផ្នែកឯកជន ក្រសួងសេដ្ឋកិច្ច និងហិរញ្ញវត្ថុ បានសម្រេចចេញប្រកាសលេខ ៣២០ សហវ.ប្រក ចុះថ្ងៃទី២៦ ខែមីនា ឆ្នាំ២០១៥ ស្តីពីការកែសម្រួលសមាសភាពនិងកិច្ចដំណើរការភាព ជាដៃគូគយ-ផ្នែកឯកជន ដោយកែសម្រួលឲ្យមានសហប្រធានជាតំណាង អគរ និងផ្នែកឯកជនក្នុងសមសភាពថ្នាក់ដឹកនាំ និងក្រុមការងារបច្ចេកទេសទាំងបី ។

ក្រុមការងារបច្ចេកទេសទាំងបីមាន ៖

១. ក្រុមការងារគយ-ឧស្សាហកម្មបម្រើការនាំចេញវិស័យកាត់ដេរ

២. ក្រុមការងារគយ-ឧស្សាហកម្មបម្រើការនាំចេញវិស័យមិនមែនកាត់ដេរ

៣. ក្រុមការងារគយ-ធុរកិច្ចបម្រើទីផ្សារក្នុងស្រុក

យន្តការភាពជាដៃគូគយ-ផ្នែកឯកជន ជាយន្តការសម្របសម្រួល ឲ្យមានកិច្ចសហការ និងការយោគយល់គ្នាទៅវិញទៅមក រវាងរដ្ឋបាលគយ និងផ្នែកឯកជន ពាក់ព័ន្ធដើម្បីដោះស្រាយរាល់បញ្ហាពាក់ព័ន្ធ នឹងគយឲ្យអស់លទ្ធភាពជាមុន មុននឹងឈានទៅដោះស្រាយកម្រិតអន្តរក្រសួង ឬដាក់ជូនវេទិការាជរដ្ឋាភិបាល-ផ្នែកឯកជន។

នេះគឺជាកត្តាមួយដ៏សំខាន់ ក្នុងការធានានូវប្រសិទ្ធភាព នៃការអនុវត្តគោលនយោបាយនៃកិច្ចសម្រួល ពាណិជ្ជកម្មរបស់រាជរដ្ឋាភិបាលកម្ពុជា។

ដើម្បីបង្កើនប្រសិទ្ធភាព នៃការអនុវត្តយន្តការភាពជាដៃគូគយ និងផ្នែកឯកជនប្រកបដោយប្រសិទ្ធភាព តម្រូវឲ្យមានកិច្ចសហប្រតិបត្តិការជិតស្និទ្ធបន្ថែមទៀត ពីគ្រប់ភាគីពាក់ព័ន្ធ ដើម្បីរួមគ្នាដោះស្រាយ នូវរាល់បាតុភាពអសកម្ម ដែលនាំឲ្យកំណើនសេដ្ឋកិច្ចជាតិមិនស្របតាមគោលនយោបាយរបស់រាជរដ្ឋាភិបាលកម្ពុជា៕

គម្រោងសាងសង់ទីក្រុងចិនដ៏ធំនៅខេត្តព្រះសីហនុ កំពុងដំណើរការចាក់ដីបំពេញ

ដោយ ៖ រ៉ាណេត

ព្រះសីហនុ ៖ គម្រោងសាងសង់ទីក្រុងរណបរបស់ក្រុមហ៊ុនចិនដ៏ធំមួយនៅតំបន់រាម ខេត្តព្រះសីហនុ នៅតែមានសកម្មភាព និងដំណើរទៅមុខជាបណ្តើរៗ ខណៈដែលពេលបច្ចុប្បន្ននេះកំពុងតែចាក់ដីបំពេញនៅទីតាំងគម្រោង។

លោក នងឌី ណារ៉ា ប្រធានការិយាល័យទំនាក់ទំនងសាធារណៈនៃទីចាត់ការពិធីការ និងកិច្ចសហប្រតិបត្តិការអន្តរជាតិ នៃរដ្ឋបាលខេត្តព្រះសីហនុ បានប្រាប់គេហទំព័រ Propertyarea.asia នៅព្រឹកថ្ងៃទី៣ ខែតុលា ឆ្នាំ២០២០ថា ស្ថិតនីក្នុងតំណាក់កាលដែលបណ្តាប្រទេសនានានៅលើសាកលកំពុងតែជួបវិបត្តិ សម្រាប់ប្រទេសកម្ពុជាក៏ទទួលរងនូវផលប៉ះពាល់ផងដែរ ប៉ុន្តែត្រូវបានរាជរដ្ឋាភិបាលមានវិធានការដែលអាចទប់ស្កាត់បានលទ្ធផលដ៏ល្អ ជាមួយនឹងការបន្តនូវសកម្មភាពអភិវឌ្ឍន៍នូវហេដ្ឋារចនាសម្ព័ន្ធផងដែរ។

លោកបានមានប្រសាសន៍ថា “សម្រាបតែខេត្តព្រះសីហនុ គម្រោងសាងសង់មួយចំនួនត្រូវបានផ្អាកដោយសារតែភាគច្រើនក្រុមហ៊ុនអភិវឌ្ឍន៍មានប្រភពមកពីប្រទេសចិន ដែលកំពុងមានវិបត្តិ ប៉ុន្តែក៏មានគម្រោងខ្លះទៀតនៅតែបន្តសកម្មភាពសាងសង់ផងដែរ។ ដោយឡែកសម្រាប់តែគម្រោងអភិវឌ្ឍន៍ និងសាងសង់ទីក្រុងចិនដ៏ធំដែលមានឈ្មោះថា លីស៊ីន ស្ថិតនៅតំបន់រាម បច្ចុប្បន្ននេះកំពុងតែដំណើរការចាក់ដីបំពេញនៅលើទីតាំងគម្រោង ស្របពេលដែលហេដ្ឋារចនាសម្ព័ន្ធផ្លូវថ្នល់ទាំង៣៤ខ្សែនៅទូទាំងក្រុងព្រះសីហនុត្រូវបានសាងសង់រួចរាល់”។

ក្រុមហ៊ុន លីស៊ីន គ្រុប និងរដ្ឋាភិបាលប្រទេសកម្ពុជាបានសហការគ្នាសាងសង់ទីក្រុងថ្មីនៃលីស៊ីនក្រុងព្រះសីហនុ ដែលមានទំហំ២៥០០ហិតា ដោយគម្រោងនេះត្រូវបានផ្អែកទៅលើការការពារបរិស្ថានវិទ្យាធម្មជាតិនៃមូលដ្ឋានជាគោល និងក្រោមការជំរុញគោលនយោបាយជាតិ ។

តាមរយៈគម្រោងស្តង់ដារកម្រិតកំពូលមួយនេះ នឹងជួយចូលរួមអភិវឌ្ឍទាំងវិស័យសេដ្ឋកិច្ច និងពាណិជ្ជកម្មរបស់ប្រទេសកម្ពុជានាពេលអនាម័យបានយ៉ាងប្រសើរ។

ការអភិវឌ្ឍន៍តំបន់ក្រុងព្រះសីហនុ ក៏អាចជំរុញអោយវប្បធម៏នៅតំបន់នោះមានភាពរីកចំរើន ហើយអាចរកឃើញលក្ខណៈពិសេសនៃតំបន់នោះដោយពឹងផ្អែកលើធនធានដែលនៅជុំវិញ ដែលនឹងបង្កើតជាមជ្ឈមណ្ឌលហិរញ្ញវត្ថុអន្តរជាតិ ជាកន្លែងលំហែរ និងកម្សាន្តកំរិតខ្ពស់ និងជាមជ្ឈមណ្ឌលវេជ្ជសាស្ត្រលំដាប់ខ្ពស់។ ដោយឡែកអេកូទេសចរណ៍នៅតាមតំបន់ឆ្នេរ ក៏ជាទិសដៅដែលអ្នកទេសចរទាំងឡាយនៅលើសកលលោកចង់មកកម្សាន្ត និងជាទីក្រុងសេដ្ឋកិច្ចថ្មីនៃកម្ពុជា៕

កម្ពុជា-អាមេរិក បានឈានដល់កិច្ចព្រមព្រៀងក្របខ័ណ្ឌវិនិយោគដើម្បីសម្រេចបាននៅស្តង់ដារយាន្តយន្តលើទីផ្សារកម្ពុជា

ដោយវុត្ថា

ភ្នំពេញ៖ លោក ចម ប្រសិទ្ធ ទេសរដ្ឋមន្ត្រីរដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានឱ្យដឹងថា កិច្ចព្រមព្រៀងក្របខ័ណ្ឌវិនិយោគ និងពាណិជ្ជកម្មរវាងសហរដ្ឋអាមេរិក និងកម្ពុជា បានជំរុញឱ្យសម្រេចបាននូវកិច្ចព្រមព្រៀងគ្នាមួយសម្រាប់ការអនុវត្តស្តង់ដារយានយន្តសហរដ្ឋអាមេរិកនៅលើទីផ្សារកម្ពុជា ខណៈដែលកម្ពុជាបាននឹងកំពុងពង្រឹងលើការអនវត្តស្តង់ដារនេះ ។

លោក ចម ប្រសិទ្ធ ទេសរដ្ឋមន្ត្រីរដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ នៅក្នុងជំនួបពិភាក្សាការងារជាមួយលោក Patrick Murphy ឯកអគ្គរដ្ឋទូតសហរដ្ឋអាមេរិកប្រចាំកម្ពុជាកាលពីម្សិលមិញនេះ បានពិភាក្សាផ្តោតលើការយកចិត្តទុកដាក់ទលើវឌ្ឍនភាពនៃការអនុវត្តស្តង់ដារយានយន្តសហរដ្ឋអាមេរិក នៅលើទីផ្សារកម្ពុជា ការពង្រឹងវិស័យសហគ្រាសខ្នាតតូចនិងមធ្យម ក៏ដូចជាវិស័យវិទ្យាសាស្ត្រ និងបច្ចេកវិទ្យា និងកិច្ចសហប្រតិបត្តិការលើវិស័យកម្មសិទ្ធិបញ្ញាជាដើម ។

លោកថ្លែងថា កិច្ចខិតខំប្រឹងប្រែងនៃក្រុមបច្ចេកទេសភាគីទាំងពីរ (កម្ពុជា-អាមេរិក) សម្រេចបាននូវកិច្ចព្រមព្រៀងគ្នាមួយសម្រាប់ការអនុវត្តស្តង់ដារយានយន្តសហរដ្ឋអាមេរិកនៅលើទីផ្សារកម្ពុជា តាមរយៈយន្តការប្រើប្រាស់កិច្ចព្រមព្រៀងក្របខ័ណ្ឌវិនិយោគ និងពាណិជ្ជកម្មរវាងសហរដ្ឋអាមេរិក និងកម្ពុជា ។

លោកបន្តថា ក្នុងនោះក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ដែលមានវិទ្យាស្ថានស្តង់ដារកម្ពុជាជាសេនាធិការជំនាញ និងដោយឈរលើគោលជំហរការអនុវត្តក្របខណ្ឌនៃការធ្វើពាណិជ្ជកម្មអន្តរជាតិ ក្រសួងបានធ្វើប្រកាសថ្មីស្តីពីការពន្យាពេលអនុវត្តក្នុងការទទួលយកវិញ្ញាបនបត្របញ្ជាក់អំពីការបញ្ចេញសារធាតុបំពុលខ្យល់ពីយានយន្តរបស់ភ្នាក់ងារការពារបរិស្ថានសហរដ្ឋអាមេរិកក្នុងប្រការ៣ នៃប្រកាស លេខ:205 MIH/2019 ដោយផ្អែកលើសារាចរលេខ:០១សរ ចុះថ្ងៃទី០២ ខែមករា ឆ្នាំ២០២០ ស្តីពីវិធានការទប់ស្កាត់ និងកាត់បន្ថយការបំពុលខ្យល់សាធារណៈ ។

លោក Patrick Murphy ឯកអគ្គរដ្ឋទូតសហរដ្ឋអាមេរិកប្រចាំកម្ពុជា បានវាយតម្លៃខ្ពស់ចំពោះកិច្ចខិតខំប្រឹងប្រែងរបស់ក្រុមអ្នកជំនាញ ដើម្បីឲ្យការអនុវត្តកិច្ចព្រមព្រៀងទ្វេភាគីអាចដំណើរការទៅបានសម្រាប់ការចរាចរណ៌ផលិតផលយានយន្តស្តង់ដារសហរដ្ឋអាមេរិកលើទីផ្សារកម្ពុជា ។

លោកឯកអគ្គរដ្ឋទូតសហរដ្ឋអាមេរិក ក៏បានមើលលឃើញពីសមិទ្ធផលរបស់ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ក្នុងការធ្វើកិច្ចសហប្រតិបត្តិការលើវិស័យប្រកាសនីយបត្រតក្កកម្ម (Patent Cooperation ) ជាមួយបណ្តាប្រទេសជាច្រើនក្នុងតំបន់ និងជាមួយសហគមន៍អឺរុប ។

លោកថ្លែងថា កិច្ចការនេះសហរដ្ឋអាមេរិក ពិតជាមានបំណងធ្វើជាមួយកម្ពុជា សម្រាប់ក្របខណ្ឌកិច្ចការពារវិស័យកម្មសិទ្ធិបញ្ញារបស់សហរដ្ឋអាមេរិកនៅកម្ពុជាផងដែរ។

ទេសរដ្ឋមន្ត្រី ចម ប្រសិទ្ធ បានបញ្ជាក់ថា កម្ពុជាបានអនុវត្តធ្វើកិច្ចសហប្រតិបត្តិការលើវិស័យប្រកាសនីយបត្រតក្កកម្ម (Patent Cooperation ) ជាមួយប្រទេសជាច្រើនរួចទៅហើយ រួមមាន៖ជាមួយសឹង្ហបុរី ចិន កូរ៉េ ជប៉ុន និងសហគមន៍អឺរ៉ុប ដើម្បីអនវត្តការចុះបញ្ជីការពារសុពលភាពប្រកាសនីយបត្រតក្កកម្ម (Patent ) ក្នុងន័យការពារនូវការលួចចម្លងបច្ចេកវិទ្យារបស់ប្រទេសទាំងនោះ ដែលដាក់ការវិនិយោគនៅកម្ពុជា ។

ភាគីទាំងពីរបានឯកភាពគ្នាថានឹងខិតខំធ្វើការរួមគ្នាដើម្បីអាចចុះហត្ថលេខាលើអនុស្សរណៈយោគយល់គ្នា ក្នុងឱកាសនៃការប្រារព្វពិធីខួបលើកទី៧០ នៃទំនាក់ទំនងវិស័យការទូតរវាងកម្ពុជា-សហរដ្ឋអាមេរិក នាពេលខាងមុខ ៕