ដោយ ហ្សូលី

ព្រះសីហនុ៖ គម្រោងអភិវឌ្ឍហេដ្ឋារចនាសម្ព័ន្ធផ្លូវក្រុង ៣៤ ខ្សែ បានជម្រុញសក្តានុពលខេត្តឲ្យកាន់តែភាពទាក់ទាញលើការវិនិយោគបន្ថែម។ បច្ចុប្បន្នដំណើរការអភិវឌ្ឍហេដ្ឋារចនាសម្ព័ន្ធក៏មានភាពសកម្មនិងសម្រេចបានសមិទ្ធផលជាច្រើន។

ឯកឧត្តម ជា សុផារ៉ា ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដីនគរូបនីយកម្ម និងសំណង់ ,ឯកឧត្តម ស៊ុន ចាន់ថុល ទេសរដ្ឋមន្ដ្រី រដ្ឋមន្ដ្រីក្រសួងសាធារណការ និងដឹកជញ្ជូន និងឯកឧត្ដម គួច ចំរើន អភិបាលនៃគណៈអភិបាលខេត្តព្រះសីហនុ បានចុះពិនិត្យលទ្ធផល នៃការស្ថាបនាផ្លូវក្រុង ៣៤ខ្សែ នៅខេត្តព្រះសីហនុ នាថ្ងៃទី០៥ ខែតុលា ឆ្នាំ២០២០នេះ។

យោងតាមរបាយការណ៍របស់គណៈកម្មាធិការជាតិគ្រប់គ្រង និងអភិវឌ្ឍន៍តំបន់ឆ្នេរសមុទ្រ កម្ពុជា ស្តីពី បច្ចុប្បន្នភាពនៃគម្រោងស្ថាបនាផ្លូវក្រុងទាំង ៣៤ខ្សែ ដែលរួមបញ្ចូលទាំងហេដ្ឋា រចនាសម្ព័ន្ធផ្សេងៗទៀត បានសម្រេចសមិទ្ធផលដូចជា ការងារស្ថាបនាផ្លូវបេតុងសម្រេចបាន១០០ភាគរយ, ដាក់លូអមសង ខាងផ្លូវបាន១០០ភាគរយ, ដាក់លូរណបបាន៣០.៥៤ភាគរយ, រៀបខឿនថ្ម ក្រានីតបាន៨៥.៨៣ភាគរយ, ក្រាលកម្រាលថ្មក្រានីតបាន៤៩.៦៧ភាគរយ។

ទន្ទឹមនេះ ការងារដំឡើងបង្គោលភ្លើងតាមផ្លូវសាធារណៈបាន៨០.២៨ភាគរយ, បំពាក់អំពូលភ្លើងបាន ៦៧.៧៥ភាគរយ, បំពាក់កាំមេរ៉ាសុវត្ថិភាពបាន១៥ភាគរយ, ដំឡើងភ្លើងស្តុបចរាចរបាន ៤៥ភាគរយ និងដាំដើមឈើ រួមទាំងផ្កាក្រដាសសម្រេចបាន ៥០.១០ភាគរយ។

ការចុះពិនិត្យសកម្មភាពផ្លូវទាំង ៣៤ខ្សែ គឺចាប់ផ្តើមចេញពីចំណុច រង្វង់មូលរាម ស្រុកព្រៃនប់ កាត់តាមមហាវិថីជំទាវម៉ៅ មកក្នុងក្រុងព្រះសីហនុ៕

ដោយវុត្ថា

ភ្នំពេញៈ មន្ត្រីជាន់ខ្ពស់នៃក្រសួងសាធារណការ និងដឹកជញ្ជូនបានព្យាករណ៍ថា  សេដ្ឋកិច្ចកម្ពុជានឹងកាន់តែកើនឡើងខ្ពស់ បន្ទាប់ពីញ្ចប់ការសាងសង់នូវប្រព័ន្ធហេដ្ឋារចនាសម្ព័ន្ធដឹកជញ្ជូនទំនិញ នៅក្នុងខេត្តព្រះសីហនុ ខណៈបច្ចុប្បន្ននេះបាននិងកំពុងកសាង និងរៀបចំឱ្យកាន់តែមានភាពងាយ ដើម្បីកាត់បន្ថយពេលវេលានៃការដឹកជញ្ជូនទំនិញ។

លោកវ៉ាស៊ីម សូរិយា អ្នកនាំពាក្យក្រសួងសាធារណការ នឹងដឹកជញ្ជូន បានប្រាប់គេហទំព័រPropertyarea.asia នៅថ្ងៃទី  ៥ ខែតុលា ឆ្នាំ ២០២០នេះឱ្យដឹងថា រាជរដ្ឋាភិបាលបាន និងកំពុងសងសង់ប្រព័ន្ធហេដ្ឋារចនាសម្ព័ន្ធ ដឹកជញ្ជូនទំនិញធំៗ ដែលមានលក្ខណៈស្តង់ដារខ្ពស់ ដើម្បីជំរុញកំណើនសេដ្ឋកិច្ចជាតិ រយៈការដឹកជញ្ជូនទំនិញពីក្រៅប្រទេស និងពីក្នុងប្រទេសទៅកាន់ទីផ្សារអន្តរជាតិ។

លោកថ្លែងថា “យើងបច្ចុប្បន្ន កំពុងរៀបចំពង្រីកផ្លូវជាតិលេខ៤  សាងសង់ផ្លូវល្បឿ​នលឿនពីភ្នំពេញទៅកាន់ខេត្តព្រះសីហនុ និងពង្រីកកំពង់ផែក្រុងព្រះសីហនុ រួមជាមួយនឹងពង្រីកន្លែងផ្ទុកកុងតឺន័រ ហើយនៅពេលបញ្ចប់ នឹងជួយជំរុញឱ្យមានកំណើនសេដ្ឋកិច្ចជាតិកាន់តែខ្ពស់”។

លោកបន្ថែមថា “យើងឥឡូវកំពុងធ្វើតាមរយៈការកែលម្អ ប្រព័ន្ធដឹកជញ្ជូនឱ្យកា​ន់តែ​ទំនើប និងមានភាពងាយស្រួល  យើងគ្រាន់តែរំពឹងថា សេដ្ឋកិច្ចវានឹងរីកចំរើនកាន់តែខ្លាំងនៅពេលចប់ តែពេលនេះ យើងមិនទាន់បានបញ្ចប់វានៅឡើយទេ “។

លោកគួច ចំរើន អភិបាលខេត្តព្រះសីហនុ ឱ្យដឹងដែរថា រាជរដ្ឋាភិបាលបានកំណត់យកខេត្តព្រះសីហនុ ជាតំបន់សេដ្ឋកិច្ចពិសេសគំរូពហុបំណង ហើយបានអភិវឌ្ឍន៍នូវប្រព័ន្ធហេដ្ឋារចនាសម្ព័ន្ធជាច្រើន តភ្ជាប់ទៅកាន់ទីក្រុងភ្នំពេញ និងទៅកាន់បណ្តាខេត្តនា នានៅទូទាំងប្រទែស ដើម្បីជំរុញកំណើនសេដ្ឋកិច្ចជាតិ ។ លោកបន្តថា បច្ចុប្បន្នខេត្តមានកំពង់ផែទឹកជ្រៅ អាចឱ្យនាវាដឹកជញ្ជូនចូលចត ដែលមានជម្រៅទឹក៨,៥០ម៉ែត្រ ។

លោកបន្ថែមថា រាជរដ្ឋាភិបាលមានកិច្ចសហប្រតិបត្តិការ ជាមួយរដ្ឋាភិបាលជប៉ុន ក្នុងការអភិវឌ្ឍន៍កំពង់ផែ ដើម្បីបង្កើនសមត្ថភាពឱ្យនាវាមានជម្រៅទឹកជ្រៅ ដែលអាចចូលចតបាន និងធ្វើឱ្យតម្លៃនៃការដឹកជញ្ជូនប្រកួតប្រជែងមានការធ្លាក់ចុះ។ ធ្វើការអភិវឌ្ឍន៍អាកាសយានដ្ឋានអន្តរជាតិខេត្តព្រះសីហនុ ពីកម្រិតអាចឱ្យយន្តហោះ 3E ទៅ4E និងពង្រីកផ្លូវរត់រហូតដល់៣.២០០ម៉ែត្រ ដើម្បីជំរុញដល់ការដឹកជញ្ជូនតាមផ្លូវអាកាស។

លោកអភិបាលខេត្ត បានបន្តថាខេត្តព្រះសីនុ ជាតារារះនាទិសនារតី ដោយផ្ដើមចេញពីឆ្នេរសមុទ្រសស្អាត ខ្យល់ អាកាសបរិសុទ្ធ គួបផ្សំនឹងសក្តានុពលដ៏សម្បូរបែបក្នុងការទាក់ទាញភ្ញៀវទេសចរ និងអ្នកវិនិយោគមកកាន់ខេត្តព្រះសីហនុមានការកើនឡើង៕

ដោយ ហ្សូលី

ភ្នំពេញ៖ កូរ៉េខាងត្បូងត្រៀមបើកការចរចាលើកិច្ចព្រមព្រៀងពាណិជ្ជកម្មសេរីកម្ពុជា-កូរ៉េខាងត្បូង ជុំទី ៣ នៅក្នុងសប្តាហ៍នេះ ដើម្បីរៀបចំផែនការលម្អិតបន្ថែម ស្របតាមការខិតខំរបស់ក្រុងសេអ៊ូក្នុងការធ្វើពិពិធកម្មផលប័ត្រនាំចេញទៅកាន់តំបន់អាស៊ីអាគ្នេយ៍។ នេះបើតាមឱ្យដឹងពីភាគីកូរ៉េខាងត្បូងនៅថ្ងៃ០៥ ខែតុលា ឆ្នាំ ២០២០នេះ។

យោងតាមក្រសួងពាណិជ្ជកម្ម ឧស្សាហកម្ម និងថាមពលកូរ៉េខាងត្បូងបានឱ្យដឹងថា កិច្ចប្រជុំនឹងប្រព្រឹត្តឡើងរយៈពេល ៣ថ្ងៃ តាមប្រព័ន្ធវីដេអូ ចាប់ផ្តើមនៅថ្ងៃអង្គារ ទី ០៦ ខែតុលា ឆ្នាំ ២០២០ ជាមួយនឹងគោលដៅពិនិត្យលើសេចក្តីព្រៀងចុងក្រោយនៃកិច្ចព្រមព្រៀងសម្រាប់ចុងឆ្នាំ ២០២០នេះ។

ប្រទេសកម្ពុជា និងកូរ៉េខាងត្បូង បានបើកកិច្ចចរចាលើកទី ១ របស់ខ្លួនកាលពីខែកក្កដា កន្លងទៅ បន្ទាប់មកមានការចរចាជុំទី ២ នៅថ្ងៃទី ៣១ ខែសីហា រហូតដល់ថ្ងៃទី ០២ កញ្ញា។

នៅក្នុងសេចក្តីថ្លែងការណ៍មួយរបស់ក្រសួងពាណិជ្ជកម្មបានឱ្យដឹងថា ប្រទេសកម្ពុជាបានបង្ហាញពីកំណើនសេដ្ឋកិច្ចប្រចាំឆ្នាំប្រមាណ ៧ ភាគរយ ចាប់តាំងពីឆ្នាំ ២០១១មក។ កម្ពុជាជាប្រទេសដែលមានសក្តានុពលកំណើនខ្ពស់ ជាមួយនឹងកត្តាប្រជាសាស្រ្តដែលអត្រាប្រជាជនអាយុត្រឹម ៣៥ ឬក្រោម ៣៥ មានចំនួន ៧២ ភាគរយនៃប្រជាជនសរុប។

សេចក្តីថ្លែងការណ៍ដដែលបានបញ្ជាក់ថា កិច្ចព្រមព្រៀងពាណិជ្ជកម្មសេរីកម្ពុជា-កូរ៉េខាងត្បូង និងកូរ៉េខាងត្បូង-អាស៊ាន នឹងបង្កើតភាពអំណោយផលបរិយាកាសពាណិជ្ជកម្ម និងបង្កើនការប្រកួតប្រជែងរវាងក្រុមហ៊ុនកូរ៉េខាងត្បូង។

សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានលើកឡើងពីសំណើររៀបចំពាណិជ្ជកម្មសេរីទ្វេរភាគី កាលពីអំឡុងជំនួបជាមួយប្រធានាធិបតីកូរ៉េខាងត្បូង លោក ម៉ូន ជេអ៉ីន នៅទីក្រុងភ្នំពេញ ខែមីនា ឆ្នាំ ២០១៩ កន្លងទៅ។

ប្រទេសទាំងពីរបានចាប់ផ្តើមសិក្សារួមគ្នាលើកិច្ចព្រមព្រៀងនេះចាប់តាំងពីខែមករាដល់ខែឧសភាឆ្នាំនេះ ហើយបានប្រកាសថា ប្រទេសទាំងពីរបានចាប់ផ្តើមដំណើរការលើកិច្ចព្រមព្រៀងជាផ្លូវការនៅក្នុងខែកក្កដា។

ទំហំពាណិជ្ជកម្មរួមគ្នារវាងប្រទេសទាំងពីរបានឈានដល់កម្រិតខ្ពស់បំផុតគឺ ១,០៣ ពាន់លានដុល្លារក្នុងឆ្នាំ ២០១៩ ដែលកើនឡើង ៦ ភាគរយបើប្រៀបធៀបទៅនឹងឆ្នាំមុន។ ការនាំចេញសម្រេចបាន ៦៩៧ លានដុល្លារកើន ៥,៥ ភាគរយធៀបនឹងឆ្នាំមុន។ ប្រទេសកម្ពុជាគឺជាទិសដៅនាំចេញធំជាងគេទី ៥៨ សម្រាប់ប្រទេសកូរ៉េខាងត្បូងក្នុងឆ្នាំ ២០១៩ ។ កូរ៉េខាងត្បូងភាគច្រើននាំចេញរថយន្តដឹកទំនិញភេសជ្ជៈនិងវាយនភ័ណ្ឌមកកម្ពុជា ខណៈនាំចូលទំនិញពីកម្ពុជាមានដូចជា សម្លៀកបំពាក់ និងស្បែកជើង។

ទីក្រុងសេអ៊ូលបាននិងកំពុងដាក់ចេញនូវគោលនយោបាយថ្មីភាគខាងត្បូងដែលមានគោលបំណងជំរុញទំនាក់ទំនងយុទ្ធសាស្ត្រ និងសេដ្ឋកិច្ចរបស់ទីក្រុងសេអ៊ូលជាមួយដៃគូអាស៊ីដែលកំពុងរីកចម្រើន និងកាត់បន្ថយការពឹងផ្អែកយ៉ាងខ្លាំងទៅលើប្រទេសចិនឬសហរដ្ឋអាមេរិក។

ប្រទេសដែលមានសេដ្ឋកិច្ចធំជាងគេពីរនៅលើពិភពលោកមានចំនួនប្រហែល ៤០ ភាគរយនៃការនាំចេញសរុបរបស់កូរ៉េខាងត្បូងដែលធ្វើឱ្យកូរ៉េខាងត្បូងងាយរងគ្រោះពីការធ្លាក់ចុះសេដ្ឋកិច្ចពីភាពតានតឹងដែលកំពុងកើនឡើងរវាងទីក្រុងវ៉ាស៊ីនតោននិងប៉េកាំង។

នៅពេលដែលកតិកាសញ្ញានេះត្រូវបានចុះហត្ថលេខាប្រទេសកម្ពុជានឹងត្រូវបញ្ចូលទៅក្នុងបញ្ជីដៃគូពាណិជ្ជកម្មសេរីដាច់ដោយឡែករបស់កូរ៉េខាងត្បូងប្រចាំតំបន់អាស៊ីអាគ្នេយ៍ដែលបច្ចុប្បន្នគ្របដណ្តប់លើប្រទេសវៀតណាម និងសិង្ហបុរី៕ Yonhap

ដោយៈ រ៉ាណេត

ភ្នំពេញៈ ក្រៅពីខេត្តសំខាន់ៗ ដែលមានសក្ដានុពលលើវិស័យទេសចរណ៍បែបធម្មជាតិ ដែលមានតម្រូវការទីផ្សារដីធ្លីដូចជាខេត្តកោះកុង កែប និងកំពត សម្រាប់ខេត្តចំនួន៣ផ្សេងទៀត ដែលស្ថិតនៅជុំវិញរាជធានីភ្នំពេញ ក៏កំពុងតែមានសកម្មភាពទិញ-លក់យ៉ាងមមាញឹកផងដែរ រួមមានខេត្តកណ្តាល តាកែវ និងខេត្តកំពង់ស្ពឺ។

អគ្គនាយកក្រុមហ៊ុនភ្នាក់ងារអចលនទ្រព្យ Century21 Fortuna Investment លោក វ៉ា វីរៈ បានមានប្រសាសន៍ប្រាប់តាមទូរស័ព្ទនៅព្រឹកថ្ងៃទី៥ ខែតុលា ឆ្នាំ២០២០នេះថា សម្រាប់ទីផ្សារអចលនទ្រព្យរួមនៅទូទាំងប្រទេស គឺហាក់មានភាពស្ងប់ស្ងាត់បន្តិច ប៉ុន្តែសម្រាប់សកម្មភាពទិញ-លក់នៅតាមបណ្តាខេត្តក្រុងមួយចំនួននៅបន្តមានទីផ្សារ។

លោកបានបញ្ជាក់ថា “ក្រៅពីក្រុងភ្នំពេញ ដែលនៅតែបន្តមានសកម្មភាពសាងសង់ ក៏ដូចជាខេត្តកំពត កែប និងខេត្តកោះកុង នៅមានសកម្មភាពទិញ-លក់ សម្រាប់អភិវឌ្ឍន៍បម្រើដល់វិស័យទេសចរណ៍ និងលំហែរនោះ គេឃើញមានខេត្តចំនួន៣ផ្សេងទៀត ក៏មានសកម្មភាពទិញ-លក់ និងមានតម្រូវការប្រើប្រាស់ដីធ្លីផងដែរ រួមមានខេត្តតាកែវ កណ្តាល និងកំពង់ស្ពឺ”។

លោកបន្តថា ខេត្តទាំង៣នេះមានសក្ដានុពលក្នុងវិស័យផ្សេងគ្នា ដូចជា តំបន់ព្រំប្រទល់ខេត្តកណ្តាល (ស្រុកអង្គស្នួល) និងខេត្តកំពង់ស្ពឺ (ស្រុកឧដុង្គ) មានសក្ដានុពលក្នុងវិស័យឧស្សាហកម្ម សំណង់រោងចក្រ និងសំណង់លំនៅដ្ឋាន។ ដោយឡែកនៅតំបន់ព្រំប្រទល់ខេត្តកំពង់ស្ពឺ និងខេត្តតាកែវ (តំបន់ផ្លូវ៤១) មានសក្ដានុពលក្នុងវិស័យឧស្សាហកម្ម និងតំបន់សេដ្ឋកិច្ចពិសេស។ ហើយនៅតំបន់ព្រំប្រទល់ខេត្តតាកែវ (ស្រុកបាទី) និងខេត្តកណ្តាល (ស្រុកកណ្តាលស្ទឹង) ក៏កំពុងមានសកម្មភាពទិញ-លក់ច្រើនផងដែរ ជាពិសេសនៅជុំវិញតំបន់គម្រោងសាងសង់ព្រលានយន្តហោះអន្តរជាតិ-ភ្នំពេញថ្មី រួមជាមួយនឹងគម្រោងសាងសង់ផ្លូវក្រវ៉ាត់ក្រុងទី៣ផងដែរ”។

ប្រធានក្រុមប្រឹក្សាភិបាលក្រុមហ៊ុន DEY THMEY Real Estate លោក វិន ឈុនហ៊ាត បានមានប្រសាសន៍ថា តម្រូវការប្រើប្រាស់ដីនៅតំបន់ខាងលើនេះមានដូចគ្នា ប៉ុន្តែតម្លៃនៅទីផ្សារគឺខុសគ្នាខ្លាំង។

លោកបញ្ជាក់ថា “តម្លៃដីមានភាពខុសគ្នាទាំងអស់ ដូចជានៅតាមតំបន់ផ្លូវ៥១ និងតំបន់ព្រំប្រទល់ខេត្តកណ្តាល និងខេត្តកំពង់ស្ពឺ ដីសម្រាប់បម្រើដល់វិស័យឧស្សាហកម្មដែលមានទំហំធំមានតម្លៃក្នុងចន្លោះ៥០-៧០ដុល្លារ ក្នុងមួយម៉ែតការ៉េ ហើយដីសម្រាប់បម្រើដល់វិស័យលំនៅដ្ឋានមានតម្លៃក្នុងចន្លោះពី៨០-១០០ដុល្លារក្នុងមួយម៉ែត្រការរ៉េ ឬនៅទីតាំងខ្លះអាចខ្ពស់ជាងនេះ”។

លោកបានបន្តថា សម្រាប់ដីនៅតំបន់ផ្លូវ៤១ បច្ចុប្បន្ននេះដោយសារតែមានគម្រោ​ងអភិវឌ្ឍក្នុងវិស័យឧស្សាហកម្ម និងគម្រោងបង្កើតជាតំបន់សេដ្ឋកិច្ចពិសេស បានជំរុញឱ្យ​តម្លៃឡើងថ្លៃខ្ពស់បើប្រៀបធៀបទៅនឹងឆ្នាំកន្លងទៅ ដែលពីមុនដីនៅជាប់ផ្លូវជាតិក្នុងតំបន់គីឡូលេខ៣០ មានតម្លៃត្រឹម២០ដុល្លារ បច្ចុប្បន្នបានកើនឡើងរហូតដល់ចន្លោះពី ៣៥-៤០ដុល្លារក្នុងមួយម៉ែត្រការ៉េ”។ លោកបន្តថា “បើចុះពីផ្លូវជាតិប្រមាណ ២គីឡូម៉ែត្រ អាចស្ថិតនៅក្នុងចន្លោះប្រមាណ១៥ -២០ដុល្លារក្នុងមួយម៉ែត្រការ៉េ ហើយតម្លៃនេះនឹងបន្តឡើងថែមទៀត បន្ទាប់គម្រោងអភិវឌ្ឍន៍នានា បានចាប់ផ្តើមលេចចេញជារូបរាងពិតប្រាកដ”៕