ធនាគារឧស្សាហកម្មកូរ៉េ Industrial Bank of Korea ទទួលបានអាជ្ញាប័ណ្ណបើកដំណើរការធនាគារបុត្រសម្ព័ន្ធនៅមីយ៉ាន់ម៉ា

ដោយ ៖ សុខុម

ធនាគារកណ្ដាលមីយ៉ាន់ម៉ា (Central Bank of Myanmar) កាលពីថ្ងៃទី៦ មករា បានចេញអាជ្ញាប័ណ្ណអនុញ្ញាតឱ្យធនាគារឧស្សាហកម្មកូរ៉េ (Industrial Bank of Korea) ដែលគ្រប់គ្រងដោយរដ្ឋរដ្ឋាភិបាលកូរ៉េ បើកដំណើរការធនាគារបុត្រសម្ព័ន្ធក្នុងប្រទេសមីយ៉ាន់ម៉ា។ នេះជាធនាគារបរទេសទី២ ហើយដែលបានបើកដំណើរការធនាគារបុត្រសម្ព័ន្ធជាផ្លូវការក្នុងប្រទេសនេះ។

យោងតាមកាសែត Myanmar Times ចុះផ្សាយកាលពីថ្ងៃទី៨ មករា ឱ្យដឹងថា អាជ្ញាប័ណ្ណនឹងត្រូវចេញឱ្យធនាគារបរទេសដែលមានលក្ខណសម្បត្តិគ្រប់គ្រាន់ចំនួន ៧ ដែលតាមការរំពឹងថានឹងទទួលបានមូលធនហូរចូលសរុប ១ ពាន់លានដុល្លារអាមេរិក។

ធនាគារបរទេសទាំង ៧ ដែលមានសិទ្ធិទទួលបានអាជ្ញាប័ណ្ណ ត្រូវបានជ្រើសរើសកាលពីខែមេសា ឆ្នាំ២០២០ ហើយតាមការរំពឹងទុក ធនាគារកណ្ដាលមីយ៉ាន់ម៉ា នឹងចេញអាជ្ញាប័ណ្ណបុត្រសម្ព័ន្ធចំនួន ៣ និងអាជ្ញាប័ណ្ណបើកសាខាធនាគារបរទេសចំនួន ៤ ក្នុងពេលឆាប់ៗនេះ។ ការវិនិយោគផ្នែកមូលធនសម្រាប់ការបើកដំណើរការសាខាត្រូវមានដើមទុនយ៉ាងតិច ៧៥ លានដុល្លារ និង ១០០ លានដុល្លារ ប្រសិនបើវាជាសាខាបុត្រសម្ព័ន្ធ។

អាជ្ញាប័ណ្ណបុត្រសម្ព័ន្ធទី១ ត្រូវបានចេញឱ្យធនាគារកូរ៉េ មួយទៀតគឺធនាគារ KB Kookmin Bank កាលពីចុងឆ្នាំ២០២០។ ហើយអាជ្ញាប័ណ្ណបុត្រសម្ព័ន្ធទី២ ត្រូវបានចេញឱ្យធនាគារ IBK Myanmar Ltd ដែលជាបុត្រសម្ព័ន្ធនៃធនាគារឧស្សាហកម្មកូរ៉េ។

ដើម្បីចាប់ផ្ដើមដំណើរការ ត្រូវត្រៀមលក្ខណៈឱ្យរួចរាល់ក្នុងរយៈពេល ៩ ខែរួមមានដូចជាអគារ បច្ចេកវិទ្យា និងការចាត់តាំងបុគ្គលិកជាដើម។ ដើម្បីទទួលបានអាជ្ញាប័ណ្ណ ទាល់តែបំពេញបានទាំងស្រុងតាមលក្ខខណ្ឌតម្រូវទាំងនេះ។ ធនាគារកណ្ដាលមីយ៉ាន់ម៉ា លើកឡើងថា សាខាធនាគារបុត្រសម្ព័ន្ធចំនួន ១០ បន្ថែមទៀតអាចនឹងបើកដំណើរការ។

ធនាគារកណ្ដាលមីយ៉ាន់ម៉ា បានបន្ថែមទៀតថា ធនាគារ IBK Myanmar Ltd នៅពេលនេះអាចបើកដំណើរការអាជីវកម្មធនាគារពាណិជ្ជ និងធ្វើការប្រកួតប្រជែងជាមួយបណ្ដាធនាគារក្នុងស្រុកបានហើយក្រោមច្បាប់ស្តីពីស្ថាប័នហិរញ្ញវត្ថុ (Financial Institutions Law)។

ធនាគារពាណិជ្ជសៀម (Siam Commercial Bank) របស់ថៃ នឹងបង្កើតសាខាធនាគារបុត្រសម្ព័ន្ធនៅប្រទេសមីយ៉ាន់ម៉ា ក្នុងពេលឆាប់ៗនេះ ហើយក៏នឹងទទួលបានអាជ្ញាប័ណ្ណពីធនាគារកណ្ដាលមីយ៉ាន់ម៉ា ផងដែរ។

ទន្ទឹមនេះ ធនាគារ Mega International Commercial Bank Co., Ltd ធនាគារ Cathay United Bank និងធនាគារ Bank of China ក៏នឹងទទួលបានអាជ្ញាប័ណ្ណបើកធនាគារបុត្រសម្ព័ន្ធ នៅមុនដំណាច់ខែនេះផងដែរ៕

រដ្ឋាភិបាលចាប់ផ្តើមបើកកិច្ចប្រជុំដើម្បីចរចាទិញវ៉ាក់សាំងកូវីដ-១៩

ដោយ ៖ គង់ ម៉ាលីន

ភ្នំពេញ ៖ ក្រុមការងារអន្តរក្រសួង និងមន្ត្រីជំនាញមកពីស្ថាប័នពាក់ព័ន្ធបានកើបកិច្ចប្រជុំពិភាក្សាលើកទី១លើក្រុមការងារ ទទួលបន្ទុកការចរចា និងការពិគ្រោះយោបល់ទិញវ៉ាក់សាំងបង្ការជំងឺកូវីដ-១៩ និងការពិគ្រោះយោបល់អំពីយុទ្ធសាស្រ្ត និងផែនការធ្វើលទ្ធកម្មទិញវ៉ាក់សាំងបង្ការជំងឺកូវីដ-១៩ដើម្បីផ្តល់ជូនប្រជាជនកម្ពុជាឱ្យបានលឿននិងឆាប់រហ័សសមល្មមនឹងតម្រូវការកម្ពុជា ដោយធានាបាននូវសុវត្ថិភាព, គុណភាព និងប្រសិទ្ធភាព។

រដ្ឋមន្រ្តីប្រតិភូអមនាយករដ្ឋមន្រ្តី លោក វង្សី វិស្សុត រដ្ឋលេខាធិការប្រចាំការក្រសួងសេដ្ឋកិច្ច និងហិរញ្ញវត្ថុជាប្រធានក្រុមការងារទទួលបន្ទុកការចរចានិងការពិគ្រោះយោបល់ទិញវ៉ាក់សាំងបង្ការជំងឺកូវីដ-១៩បានដឹកនាំកិច្ចប្រជុំលើកទី១នេះបានថ្លែងអោយដឹងថាយោងតាមសេចក្តីសម្រេចលេខ ១០៩ សសរ ចុះថ្ងៃទី៣០ ខែធ្នូ ឆ្នាំ២០២០ របស់រាជរដ្ឋាភិបាល។

លោកបានបញ្ជាក់ថា ក្រុមការងារអន្តរក្រសួងមានភារកិច្ចចរចា និងពិគ្រោះយោបល់ជាមួយនឹងដៃគូអភិវឌ្ឍ ទាំងទ្វេភាគីនិងពហុភាគី ក្នុងការទិញវ៉ាក់សាំងក្នុងទំហំសមល្មមទៅនឹងតម្រូវការជាក់ស្តែងរបស់កម្ពុជាក្រោមទម្រង់ជំនួយឥតសំណង ឬក្រោមឥណទានសម្បទាន ឬក្រោមថវិកាសប្បុរសជន ឬថវិកាជាតិក្នុងតម្លៃសមរម្យ ព្រមទាំងកំណត់មុខសញ្ញាក្រុមហ៊ុនផលិតវ៉ាក់សាំង ដែលមានភាពសមស្របបំផុតទៅនឹងតម្រូវការ និងស្ថានភាពជាក់ស្តែងរបស់កម្ពុជា និងត្រូវបានទទួលស្គាល់លើសុវត្ថិភាព, ប្រសិទ្ធភាព និងគុណភាពជាផ្លូវការពីអង្គការសុខភាពពិភពលោក (WHO)។

ទន្ទឹមនឹងនេះ ក្រុមការងារក៏ត្រូវគិតគូរទៅលើទិដ្ឋភាពភូមិសាស្រ្តនយោបាយអន្តរជាតិ និងឈរលើផលប្រយោជន៍ជាតិជាធំ ក្នុងភាពជាម្ចាស់ប្រទេសនិងធានាឱ្យបាននូវការដឹកជញ្ជូនវ៉ាក់សាំងនេះមកកាន់ប្រទេសកម្ពុជាប្រកបដោយសុវត្ថិភាព និងប្រសិទ្ធភាពផងដែរ។

លោកមានប្រសាសន៍ថា ទោះបីការអភិវឌ្ឍន៍វ៉ាក់សាំងមកទល់នឹងពេលនេះ កាន់តែរីកចម្រើនទៅមុខ ហើយមានប្រទេសខ្លះបានចាប់ផ្តើមការចាក់វ៉ាក់សាំងជាបណ្តើរៗក្តីតែចំណោទអំពីប្រសិទ្ធភាពនៃវ៉ាក់សាំងទាំងនោះ នៅតែមិនទាន់មានភាពច្បាស់លាស់ទាំងស្រុងនៅឡើយ ព្រោះពិភពលោកនៅមិនទាន់អាចផ្តើមការចាក់វ៉ាក់សាំងជាទូទៅនៅឡើយទេ ហើយអង្គការសុខភាពពិភពលោក (WHO) ទើបតែផ្តល់ការអនុញ្ញាតឱ្យប្រើប្រាស់វ៉ាក់សាំង Pfizer / BioNTech សម្រាប់តែករណីបន្ទាន់ (emergency use) ប៉ុណ្ណោះ។

លោកមានប្រសាសន៍ថាពិតណាស់ថា ទោះបីវ៉ាក់សាំងមិនមែនជាដំណោះស្រាយតែមួយគត់សម្រាប់លុបបំបាត់ជំងឺកូវីដ-១៩ក្តី, តែវត្តមាននៃវ៉ាក់សាំងក៏មានភាពចាំបាច់ណាស់ សម្រាប់ការយកឈ្នះលើជំងឺកូវីដ-១៩ ទាំងស្រុងដែរ។

មន្រ្តីនាំពាក្យក្រសួងសេដ្ឋកិច្ចនិងហិរញ្ញវត្ថុបានអោយដឹងបន្ថែមថាសម្រាប់ខ្លឹមសារសំនាន់នៃកិច្ចប្រជុំអន្តរក្រសួងនៅថ្ងៃនេះគឺបានពិភាក្សានិងពិគ្រោះយោបល់អំពីយុទ្ធសាស្រ្តនិងផែនការធ្វើលទ្ធកម្មទិញវ៉ាក់សាំងបង្ការជំងឺកូវីដ-១៩ដើម្បីផ្តល់ជូនប្រជាជនកម្ពុជាឱ្យបានលឿន និងឆាប់រហ័ស សមល្មមនឹងតម្រូវការកម្ពុជា ដោយធានាបាននូវសុវត្ថិភាព, គុណភាព និងប្រសិទ្ធភាពព្រមទាំងឱ្យមានភាពឆ្លើយឆ្លងគ្នាទៅនឹងផែនការចាក់វ៉ាក់សាំងផងដែរ ព្រោះវ៉ាក់សាំងដែលទិញមកហើយ មិនអាចទុកយូរពេកបាននោះទេ។អង្គប្រជុំក៏បានពិភាក្សាផងដែរ ពាក់ព័ន្ធនឹងការកំណត់គោលការណ៍ទិញ និងបែងចែក ព្រមទាំងបរិមាណវ៉ាក់សាំង ទាំងសម្រាប់ការប្រើប្រាស់ក្នុងករណីបន្ទាន់ (emergency use) និង ទាំងសម្រាប់ការប្រើប្រាស់ជាទូទៅ (general vaccine roll out)។

កិច្ចប្រជុំក៏បានពិនិត្យលក្ខណៈសម្បត្តិនៃវ៉ាក់សាំងបង្ការជំងឺកូវីដ-១៩របស់ក្រុមហ៊ុនមួយចំនួនដែលមានសក្តានុពលក្នុងការទទួលបាននូវការទទួលស្គាល់ពីអង្គការ WHO ក្នុងពេលឆាប់ៗខាងមុខនេះ និងវាយតម្លៃអំពីជម្រើសវ៉ាក់សាំងដែលមានភាពសមស្របសម្រាប់លក្ខណៈសម្បត្តិ និងការប្រើប្រាស់នៅកម្ពុជាផងដែរ។ កិច្ចប្រជុំនេះក៏បានពិភាក្សាអំពីផែនការសកម្មភាពរបស់ក្រុមការងារ និងក្រសួងពាក់ព័ន្ធ ជាពិសេសក្រសួងសុខាភិបាល ដើម្បីឈានទៅអនុវត្តផែនការយុទ្ធសាស្ត្រនៃការទិញ និងការចាក់វ៉ាក់សាំងបានលឿនទាន់ពេលវេលា និងមានប្រសិទ្ធភាព។ បន្ថែមលើនេះបានពិភាក្សាផងដែរ អំពីហិរញ្ញប្បទាន និងជម្រើសនានា ក្នុងការប្រើប្រាស់ពីគ្រប់ប្រភពហិរញ្ញប្បទានទាំងអស់ដែលមានសម្រាប់គាំទ្រដល់ការធ្វើលទ្ធកម្មទិញវ៉ាក់សាំងជំងឺកូវីដ-១៩ ស្របតាមគោលការណ៍ និងការសម្រេចរបស់រាជរដ្ឋាភិបាល៕

រដ្ឋាភិបាលកំពុងពិនិត្យលើវឌ្ឍនភាពសាងសង់ផ្លូវទាំង៣៨ខែ្សក្នុងក្រុងសៀមរាប និងដោះស្រាយបញ្ហាដែលក្រុមហ៊ុនប្រឈម

ដោយ ៖ រ៉ាណេត

សៀមរាប ៖ រដ្ឋាភិបាលតាមរយៈក្រសួងសាធារណៈការ និងដឹកជញ្ជូន បាននឹងកំពុងត្រួតពិនិត្យទៅលើវឌ្ឍនភាពសាងសង់ផ្លូវទាំង៣៨ខ្សែនៅក្នុងក្រុងសៀមរាប រួមជាមួយនឹងការស្វែងរកដំណោះបញ្ហាមួយចំនួនដែលក្រុមហ៊ុនទទួលសាងសង់កំពុងប្រឈម និងជួបប្រទះ។

លោកទេសរដ្ឋមន្ត្រីស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន បានមានប្រសាសន៍នៅព្រឹកថ្ងៃទី៨ ខែមករា ឆ្នាំ២០២១នេះថា ដើម្បីដំណើរការសាងសង់ហេដ្ឋារចនាសម្ព័ន្ធផ្លូវថ្នល់ទាំង៣៨ខ្សែទូទាំងក្រុងសៀមរាបអាចដំណើរការទៅបានរលូន គឺតម្រូវឱ្យមានការស្វែងរកដំណោះស្រាយ ក៏ដូចជាផ្ដល់អនុសាសន៍នានា ដើម្បីធានាឱ្យការសាងសង់មានគុណភាពខ្ពស់ស្របតាមបទដ្ឋានបច្ចេកទេសនៅក្នុងសៀវភៅបន្ទុក និងមិនប៉ះពាល់ដល់ផលប្រយោជន៍របស់ប្រជាពលរដ្ឋក្នុងតំបន់។

លោកបានបន្តថា “យើងទាំងអស់គ្នាជិះទូកតែមួយរួមគ្នា គឺទូករាជរដ្ឋាភិបាលកម្ពុជាដែលដឹកនាំដោយសម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ដូចនេះយើងត្រូវសហការគ្នាឱ្យបានរឹងមាំ មានឆន្ទះខ្ពស់ និងមុតស្រួច ដោយធ្វើអ្វីៗធ្វើម្ដងឱ្យហើយធ្វើឱ្យមានប្រសិទ្ធភាព និងធ្វើឱ្យមានគុណភាពខ្ពស់”។

សម្រាប់ផែនការមេ និងប្លង់គោលប្រើប្រាស់ដីក្រុងសៀមរាបចក្ខុវិស័យឆ្នាំ២០៣៥ត្រូវបានដាក់ឱ្យប្រើប្រាស់ដោយសេចក្តីសម្រេចលេខ ០០៤ សសរ ចុះថ្ងៃទី ៥ ខែកញ្ញា ឆ្នាំ២០១៨ របស់គណៈកម្មការធិការរៀបចំដែនដី និងគរូបនីយកម្មថ្នាក់ជាតិ និងផែនការមេនៃការអភិវឌ្ឍហេដ្ឋារចនាសម្ព័ន្ធផ្លូវថ្នល់នៅក្រុងសៀមរាប ខេត្តសៀមរាប។

ដោយឡែកគម្រោងស្ថាបនាផ្លូវទំាង៣៨ខ្សែក្នុងក្រុងសៀមរាបនេះបានធ្វើឡើងបន្ទាប់ពីសម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា បានប្រកាសសម្រេចទម្លាក់កញ្ចប់ថវិកាចំនួន១៥០លានដុល្លារអាមេរិក កាលពីថ្ងៃទី៤ ខែកញ្ញា ឆ្នាំ២០២០កន្លងទៅនេះ។

គម្រោងស្ថាបនាផ្លូវទំាង៣៨ខ្សែក្នុងក្រុងសៀមរាបនេះធ្វើឡើងក្នុងគោលដៅលើកកម្ពស់ការបំរើសេវាជូនប្រជាពលរដ្ឋទេសចរនៅក្នុងក្រុងសៀមរាប និងធ្វើឱ្យក្រុងសៀមរាបក្លាយទៅជាទីក្រុងទេសចរណ៍កម្រិតពិភពលោក ដោយនឹងត្រូវកែលម្អឡើងវិញទាំងអស់ឱ្យទៅជាផ្លូវដែលមានមេត្រីភាពជាមួយវប្បធម៌ ប្រវត្តិសាស្ត្រ និងទេសចរណ៍ និងស្របតាមរូបសាស្រ្តទីក្រុង៕

 

ខុន​ដូ Garden One តម្លៃរាប់លានដុល្លារ​កំពុង​ទទួលបាន​ការចាប់​អារម្មណ៍​ក្រោមលក្ខខណ្ឌបង់ប្រាក់​ត្រឹម៤០០ដុល្លារ​ប៉ុណ្ណោះ​ក្នុង​មួយខែ

ដោយ ៖ ​ម៉ា​ណេ​ត

ភ្នំពេញ ៖ គម្រោង​ខុន​ដូ​ទំនើប Garden One ដែលត្រូវបានអ្នកអភិវឌ្ឍន៍បណ្តាក់ទុនរាប់លានដុល្ល្ារនៅកណ្តាលរាជធានីភ្នំពេញ កំពុង​ទទួល​បានការ​ចាប់អារម្មណ៍​យ៉ាងខ្លាំងពី​សំណាក់អតិថិជនជាជនជាតិ​ខ្មែរ ក៏ដូចជា​វិនិយោគិន​បរទេស ខណៈ​គម្រោង​នេះ​នឹង​បញ្ចប់​ការសាងសង់​ទាំងស្រុង​នៅ​ចុងឆ្នាំ២០២១  និងការផ្តល់លក្ខខណ្ឌងាយស្រួលក្នុងការទិញត្រឹមដោយបង់ត្រឹម៤០០ដុល្លារក្នុងមួយខែតែប៉ុណ្ណោះ។

​គម្រោង Garden One ស្ថិតនៅក្នុង​សង្កាត់​បឹងកក់២ នៅ​ចន្លោះ​ផ្លូវ៥៧២ និង៥៧៤ ខាងក្រោយ​សាលា​ឥ​ទ្ទ្រ​ទេវី ជា​តំបន់​ទីប្រជុំជនក្នុង​ខណ្ឌទួលគោក ដែលជា​តំបន់​សម្បូរ​ដោយ​មជ្ឈមណ្ឌល​ពាណិជ្ជកម្ម ជាមួយ​វត្ត​មាននៃ​គម្រោង​អភិវឌ្ឍធំៗជាច្រើន ដែល​បាន​កំពុង​រីកដុះដាល​ស្ទើរ​គ្រប់​ទីកន្លែង ដូចជា សំណង់​លំនៅឋាន ផ្សារ​ទំនើប និង​គម្រោងផ្សេងៗជាច្រើន​ទៀត។

 

កញ្ញា​ឆាយ ថង​ឌី​ប្រធាន​គ្រប់គ្រង​ផ្នែក​អភិវឌ្ឍន៍​ធុរកិច្ចប្រចាំ​គម្រោង​ខុន​ដូ Garden One បាន​ប្រាប់ថានៅរសៀលថ្ងៃទី៨ ខែមករា ឆ្នាំ២០២១ថា គម្រោង Garden One ដែលមានកម្ពស់២៩ជាន់ ស្មើនឹង២៧១ យូ​នី​ត គ្រោងបញ្ចប់ការសាងសង់ទាំងស្រុងនៅចុងឆ្នាំ២០២១ខាងមុខនេះ ត្រូវបាន​រចនា​ឡើង​ដោយ​ភ្ជាប់​ជាមួយ​រុក្ខជាតិ​បៃតង​នៅតាម​មាត់​បង្អួច ទ្វារ និង​រាល​ហាន​ខាងមុខ ដែល​នឹង​ជួយ​បង្កើត​នូវ​បរិយាកាស​ស្រស់ស្រាយ​បែប​ធម្មជាតិ​គ្រប់ពេលវេលា​ទាំងអស់។

 

គម្រោង​មាន​ជាន់​ផ្ទាល់​ដី១ជាន់ ជា​កន្លែង​ទទួលភ្ញៀវ ដែលមាន​កន្លែង​កាហ្វេ និង​មី​នី​ម៉ា​ត។ ចាប់ពី​ជាន់​ទី១ ដល់​ជាន់​ទី៤ សម្រាប់​ចំណតរថយន្ត ហើយ​ចាប់ពី​ជាន់​ទី៥ ដល់​ជាន់​ទី១៦សម្រាប់ធ្វើ​សណ្ឋាគារ និង​ចាប់ពី​ជាន់​ទី១៧ដល់​ជាន់​ទី២៧ សម្រាប់ Residential (លំនៅឋាន) ។ ចំណែក​ក្នុង​ជាន់​ពី២៨ គឺជា​ជាន់​សម្រាប់​ក្រុមការងារ​បច្ចេកទេសរ​បស់​យើង និង​ជាន់​ទី២៩ សម្រាប់​អាង​ហែល​ទឹក ភោជនីយដ្ឋាន និង Sky Bar ជាដើម។

កញ្ញា​ឆាយ ថង​ឌី​បាន​ឲ្យ​ដឹង​ទៀតថា “គម្រោង​របស់​ពួកយើង ស្ថិតនៅ​តំបន់​វីឡា ដូច្នេះ​គម្រោង​ផ្តោតលើ​ផ្តល់​ជួន​អតិថិជន នូវ​ការរស់នៅ​បែប​ស្ងប់ស្ងាត់ ភាព​ប៉ៃ​តង​ព័ទ្ធជុំវិញ​ខាងក្រៅ​អគារ ព្រោះ​រុក្ខា​ជាតិ​ប៉ៃ​តង​ជួយ​ឱ្យ​រូបភាព​អគារ​ស្អាត​ប្លែក និង​ជួយ​កាត់បន្ថយ​កម្តៅ​នៅក្នុង​អគារ និង​ផ្តល់​ខ្យល់​បរិសុទ្ធ។ អ្វីដែលកាន់តែ​ពិសេស​គឺ​ក្នុង​មួយ​ជាន់ៗយើង​មាន​ចន្លោះ​ពី ១១ ទៅ១៣យូ​នី​ត​តែប៉ុណ្ណោះ ហើយ​គ្រប់​បន្ទប់​មាន​វេរ៉ងដា​ទាំងអស់។

សម្រាប់លក្ខខណ្ឌនៃការបង់ប្រា​ក់មាន៣ជម្រើស ក្នុងនោះ​ទី១បង់​ដាច់ ទី២បង់​ជា​ដំណាក់កាល ដោយ​អត់​មាន​អត្រា​ការប្រាក់​រយៈ២០ខែ ហើយ​អ្វីដែល​ពិសេស​នៅ​ទី​គឺ​កម្ចី ដោយសារ​ភ្ញៀវ​នៅទីនេះត្រូវ​កក់១០០០ដុល្លារ ហើយ​បង់​មុន២០ភាគរយ ហើយ១០ភាគរយ​ត្រូវ​បង់​ដោយ​គ្មាន​អត្រា​ការប្រាក់​រយៈពេល២០ខែ និង៧០ភាគរយ​អាច​បង់​រំលស់​ជាមួយ​ធនាគា​របស់​ដៃគូ​របស់​ក្រុមហ៊ុន ក្នុង​រយៈពេល​ដល់២០ឆ្នាំ ក្នុង​អត្រា​ការប្រាក់​ចន្លោះ​ពី៨ ទៅ១០ភាគរយ ហើយអតិថិជន​អាចបង់ប្រាក់ត្រឹមតែ​ពី៤០០ ទៅ៥០០ដុល្លារ​ក្នុង​មួយខែ​តែប៉ុណ្ណោះ” ។

កញ្ញា​បាន​បន្តទៀតថា ដោយសារ​ចាប់ពី​ជាន់​ទី៥ ដល់​ជាន់​ទី១៦ យើង​ធ្វើ​ជាស  ណ្ឋា​គារ ដូច្នេះ​ក្នុង​ជាន់​ទាំងនេះ ពេល​អតិថិជន​ទិញ​ហើយ គាត់​អាច​ទទួលបាន​ការជួល​ត្រឡប់មកវិញ​ក្នុង​រយៈ១០ឆ្នាំ ដោយមាន​អត្រា​ផលចំណេញ​ត្រឡប់មក ក្នុង​រយៈ​អត្រា៨ភាគរយ​ប្រចាំឆ្នាំ” ។ កញ្ញា​បាន​បន្តទៀតថា ក្នុងករណី​ការជួល​ផុត​រយៈពេល១០ឆ្នាំ​ហើយ គាត់​អត់​ចង់​បន្តកាន់កាប់​យូ​នី​ត​នេះ​ទេ គាត់​អាច​លក់​យូ​នី​ត​នេះ​ឱ្យ​ក្រុមហ៊ុន​វិញ​បាន ដូច្នេះ​ការវិនិយោគ​របស់គាត់​អត់​មាន​ហានិភ័យ​ទេ។

គម្រោង Garden One ត្រូវបាន​អភិវឌ្ឍ​ដោយ​ក្រុមហ៊ុន​ល្បីឈ្មោះ និង​មាន​បទ​ពិ សោធន៍​ច្រើន​ឆ្នាំ​មកពី​ប្រទេស​ចិន​គឺ ក្រុមហ៊ុន JianZhong YuTong Co., Ltd ។ ខុន​ដូ​ប្រណីត Garden One មាន​កម្ពស់ ២៩ជាន់ ជាមួយ​យូ​នី​ត​សរុប ២៧១ ជា​ប្រភេទ ស្ទូ​ឌី​យ៉ូ និង យូ​នី​ត​ដែលមាន​បន្ទប់​គេង​ពីរ មាន​ទំហំ​ចាប់ពី ៤៤ដល់ ៩១ម៉ែត្រការ៉េ ។

ជាមួយ​ការគិតគូរ​ពិសេស​ដល់​អ្នករស់នៅ អ្នក​អភិវឌ្ឍន៍​គម្រោង Garden One បាន​បំពាក់​ដោយ​សម្ភារ​បរិក្ខាទំនើបៗមាន​គុណភាព​ខ្ពស់ ប្រព័ន្ធ​ប្រកាសអាសន្ន កាំ​មេ​រ៉ា​សុវត្ថិភាព និង​សេវាកម្ម​សន្ដិសុខ២៤ម៉ោង មាន​កន្លែង​សម្រាប់​ចត​រថយន្ដ​ជាច្រើន​កម្ពស់៥ជាន់ លាតសន្ធឹង​ចាប់ពី​ជាន់ B1 ដល់​ជាន់​ទី៤ ដំណើរការ​ដោយ​ប្រព័ន្ធ​ចំណត​ឆ្លាត​វៃ។ ដោយឡែកសម្រាប់​តម្លៃ​ចាប់ផ្ដើម​ត្រឹមតែ៨ម៉ឺន​ដុល្លារទើងទៅតែ​ប៉ុណ្ណោះ។

ទំនាក់ទំនង​លេខ​ទូរស័ព្ទ​ទៅកាន់​ភ្នាក់ងារ​លក់ តាមរយៈ​លេខ 096 55 25 951, 011 444 647 ៕

​កាដូឆ្នាំថ្មីពីបុរី ប៉េង ហួត បានទាំងបញ្ចុះតម្លៃ និងឱកាសចំណេញរហូតដល់រាប់ម៉ឺនដុល្លារ

ដោយ ៖ គង់ ម៉ាលីន

ភ្នំពេញ ៖ ឥឡូវនេះ លោកអ្នកអាចក្លាយជាម្ចាស់ផ្ទះក្នុងក្ដីស្រមៃបានកាន់តែឆាប់រហ័សជាមួយការផ្ដល់ជូនដ៏អស្ចារ្យពីបុរី ប៉េង ហួត សម្រាប់ដើមឆ្នាំ២០២១នេះ។ សម្រាប់អតិថិជនដែលទិញផ្ទះរបស់បុរី ប៉េង ហួត ចាប់ពីថ្ងៃនេះ រហូតដល់ដំណាច់ខែមករា ២០២១ នឹងទទួលបានកាដូដ៏ពិសេសដូចខាងក្រោម៖

– ទទួល​បាន​ការ​បញ្ចុះ​តម្លៃ​​រហូត​ដល់ 13% ភ្លាមៗ

– ទទួលបានឱកាសចំណេញបន្ថែមរហូតដល់ 60,000 ដុល្លារ

– ទទួល​បាន​ការ​ដេគ័រ​បន្ទប់​មេ​គ្រួសារ​ដែល​មាន​តម្លៃ​រហូត​ដល់​ជិត 30,000 ដុល្លារ

– ទទួល​បានគោលការណ៍បង់ប្រាក់ជាមួយបុរីដែលមានភាពងាយស្រួលមិនធ្លាប់មានពីមុនមក

– ទទួលបានឈុតម៉ាស៊ីនសម្លាប់មេរោគដែលផលិតតាមបច្ចេកវិទ្យាប្រទេសជប៉ុន

ក្រៅពីការផ្ដល់ជូនដ៏ពិសេសខាងលើ អតិថិជនក៏អាចមានជម្រើសទូទាត់តាមរយៈធនាគារជាដៃគូរបស់បុរី ប៉េង ហួត ដោយរំលស់ជាមួយអត្រាការប្រាក់ចាប់ពី 4.99% ឡើងទៅ។ រួសរាន់ឡើង! ព្រោះការផ្ដល់ជូននេះមានសុពលភាពត្រឹមថ្ងៃទី៣១ ខែមករា ឆ្នាំ២០២១នេះតែប៉ុណ្ណោះ។

ដើម្បី​ជ្រាបពីការផ្ដល់ជូននេះឱ្យបាន​​កាន់​តែ​ច្បាស់ យើង​ខ្ញុំ​សូម​អញ្ជើញ​អតិថិជន​​មក​សាកសួរ​ព័ត៌មាន​លម្អិត​នៅ​​ការិយាល័យ​លក់​របស់​បុរី ប៉េង ហួត ឬ​ទាក់​ទង​មក​ទូរសព្ទ​លេខ 098 / 016 / 017 596 789 ​សហការី​យើង​ខ្ញុំ​នឹងនៅ​ចំា​ទទួល​ស្វាគមន៍ និង​ប្រឹក្សាយោបល់​ជូន​លោក​អ្នក​យ៉ាង​គាប់​ចិត្ត។

ក្រៅ​ពី​នេះ​ អតិថិជន​អាច​តាម​ដាន​នៅ​លើ​ទំព័រ​ហ្វេសប៊ុក​ Borey Peng Huoth ឬ​ចូល​រួម​ក្នុង Telegram Channel: https://t.me/boreypenghuoth ដើម្បី​ទទួល​បាន​ព័ត៌មាន និង​ប្រូម៉ូសិន​ថ្មីៗ​បាន​មុន​គេ៕

កំពង់ស្ពឺទាក់ទាញបានរោងចក្រសហគ្រាសសរុបជាង៧០០ទីតាំងរហូតដល់ពេលបច្ចុប្បន្ននេះ

ដោយ ៖ រ៉ាណេត

កំពង់ស្ពឺ ៖ កំពង់ស្ពឺ ដែលជាខេត្តកំពុងមានសក្ដានុពល និងទាក់ទាញគម្រោងវិនិយោគក្នុងវិស័យឧស្សាហកម្ម បាន និងកំពុងប្រមូលផ្តុំទៅដោយបណ្តារោងចក្រសហគ្រាសសរុបប្រមាណជា៧០០ទីតាំង និងផ្តល់ឱកាសការងារជាង១៣ម៉ឺនកន្លែង។

អភិបាលខេត្តកំពង់ស្ពឺ លោក វ៉ី សំណាង បានមានប្រសាសន៍នៅថ្ងៃទី៨ ខែមករា ឆ្នាំ២០២១ថា បច្ចុប្បន្ន ខេត្តកំពង់ស្ពឺបានក្លាយជាគោលដៅរបស់វិនិយោគិនជាតិ និងអន្តរជាតិជាច្រើន រួមមានអ្នកវិនិយោគជាជនជាតិខ្មែរ ចិន កូរ៉េ ជប៉ុន និងកុងហុងជាដើម ដែលសរុបជាង៧០០រោងចក្រ សហគ្រាសធនតូច និងមធ្យមនៅទូទាំងខេត្ត។

លោកបានបន្តថា នេះគឺជាមោទនភាពបំផុតចំពោះខេត្តកំពង់ស្ពឺ ដែលបាននឹងកំពុងទទួលបាននូវការអភិវឌ្ឍរោងចក្រសហគ្រាសរីកដុះដាលដូចផ្សិតនៅពេលនេះ ដោយបច្ចប្បន្នខេត្តកំពង់ស្ពឺមិនដូចពីអតីតកាលទៀតទេ ហើយខេត្តមួយនេះកំពុងទាក់ទាញអ្នកវិនិយោគជាបន្តបន្ទាប់ និងកំពុងតែស្រូបយកម្លាំងពលកម្មពីបណ្តាខេត្តផ្សេងៗរាប់ម៉ឺនកន្លែងផងដែរ។

លោកអភិបាលបានបញ្ជាក់ថា ការបង្រួបបង្រួមជាតិ ឯកភាពជាតិខ្មែរ និងបានដាក់ចេញនូវគោលនយោបាយ ឈ្នះឈ្នះ ធ្វើឱ្យប្រទេសជាតិជ្រកក្រោមដំបូលសុខសន្តិភាព ស្ថិរភាពនយោបាយ និងមានការអភិវឌ្ឍរីកចម្រើន ស្មើមុខស្មើមាត់ ដូចបណ្ដាប្រទេសក្នុងតំបន់ និងលើឆាកអន្តរជាតិ ក្រោមការដឹកនាំដ៏ប៉ិនប្រសប់ប្រកបដោយគតិបណ្ឌិតរបស់សម្ដេចតេជោ ហ៊ុន សែន នាយករដ្ឋមន្ត្រីកម្ពុជា។

បច្ចុប្បន្នតំបន់សំខាន់ៗដែលកំពុងមានភាពទាក់ទាញក្នុងការដាក់ទីតាំងវិនិយោគនៅក្នុងវិស័យឧស្សាហកម្មនៃខេត្តកំពង់ស្ពឺកំពុងរីកសាយភាយនៅតាមបណ្តោយផ្លូវជាតិលេខ៤ ផ្លូវជាតិលេខ៥១ ផ្លូវលេខ៤១ ផ្លូវជាតិលេខ៤៤ រួមជាមួយគម្រោងនៃបង្កើតសួនឧស្សាហកម្ម និងតំបន់សេដ្ឋកិច្ចពិសេសផងដែរ ដែលមានតម្លៃសរុបរាប់រយលានដុល្លារ៕

តើហេតុអ្វីបានជាលោក Elon Musk ក្លាយជាមហាសេដ្ឋីមានទ្រព្យសម្បត្តិច្រើនជាងគេបំផុតលើពិភពលោក?

ដោយ៖ ប៊ី

អន្តរជាតិ៖ សារព័ត៌មាន Bloomberg បានរាយការណ៍កាលពីថ្ងៃព្រហស្បតិ៍ថា លោក Elon Musk មេក្រុមហ៊ុន Tesla Inc បានវ៉ាដាច់លោក Jeff Bezos ដែលម្ចាស់ក្រុមហ៊ុន Amazon.com ក្លាយជាអ្នកមានបំផុតនៅលើពិភពលោក។

របាយការណ៍បានឱ្យដឹងថា ដោយរួមបញ្ចូលទាំងការចំណេញភាគហ៊ុនរបស់ក្រុមហ៊ុន Tesla កាលពីថ្ងៃព្រហស្បតិ៍ លោក Elon Musk អាយុ ៤៩ ឆ្នាំមានទ្រព្យសម្បត្តិសរុបជាង១៨៨,៥ពាន់លានដុល្លារអាមេរិក ដែលមានទំហំទឹកប្រាក់ជាង១,៥ពាន់លានដុល្លារច្រើនជាងលោក Bezos ។

ទ្រព្យសម្បត្តិផ្ទាល់ខ្លួនរបស់លោក Elon Musk ត្រូវបានកើនឡើងចំនួន៨ដង ដោយសារកើនឡើងនៃភាគហ៊ុនរបស់ក្រុមហ៊ុន Tesla ដែលបានក្លាយជាក្រុមហ៊ុនផលិតរថយន្តដ៏មានតម្លៃបំផុតនៅលើពិភពលោក។

លោក Elon Musk មានភាគហ៊ុន២០ភាគរយ នៅក្នុងក្រុមហ៊ុនផលិតរថយន្តនេះ និងទទួលបានចំណេញប្រហែល៤២ពាន់លានដុល្លារអាមេរិក។ នេះបើយោងតាមរបាយការណ៍របស់ Bloomberg ។

ភាគហ៊ុនរបស់ក្រុមហ៊ុន Tesla បានកើនឡើង៧,៤ភាគរយនៅថ្ងៃព្រហស្បតិ៍ ក្នុងកម្រិតខ្ពស់បំផុតដែលតម្លៃ ៨១១,៦១ដុល្លារអាមេរិកក្នុងមួយហ៊ុន។

ទោះយ៉ាងណា បញ្ជីឈ្មោះមហាសេដ្ឋី Forbes បានឱ្យដឹងថា ក្រុមហ៊ុនរបស់លោក Elon Musk នៅតែតាមពីក្រោយក្រុមហ៊ុន Amazon របស់លោក Bezos ចំនួន៧,៨ពាន់លានដុល្លារអាមេរិក។

លោក Elon Musk ដែលធ្លាប់ជាសហស្ថាបនិក និងបានលក់ក្រុមហ៊ុនទូទាត់ PayPal Holdings Inc ឥឡូវនេះដឹកនាំក្រុមហ៊ុន ដែលត្រូវបានមើលឃើញថានឹងមានការរីកចម្រើនខ្លាំងបំផុត លើពិភពលោកនាពេលអនាគត។

ក្រៅពីក្រុមហ៊ុន Tesla លោកជាប្រធានក្រុមហ៊ុន SpaceX និង Neuralink ដែលជាក្រុមហ៊ុនមួយ កំពុងបង្កើតម៉ាស៊ីនខួរក្បាល ដែលមានល្បឿនលឿន ដើម្បីភ្ជាប់ខួរក្បាលមនុស្សទៅនឹងកុំព្យូទ័រ។

លោកបានបង្កើតក្រុមហ៊ុន Boring Company ដើម្បីធ្វើផ្លូវរូងក្រោមដី នៅខាងក្រោមផ្លូវទីក្រុង ដែលមមាញឹកសម្រាប់ប្រព័ន្ធដឹកជញ្ជូនសាធារណៈអគ្គិសនី ដើម្បីចៀសវាងការកកស្ទះចរាចរណ៍នៅទីក្រុងនានារបស់សហរដ្ឋអាមេរិក៕

អ្នកជំនាញ ៖ តំបន់ភាគខាងកើតរាជធានីភ្នំពេញហាក់ស្ថិតនៅឆ្ងាយពីក្រសែភ្នែកអ្នកអភិវឌ្ឍន៍លំនៅដ្ឋាន


ដោយ ៖ រ៉ាណេត

ភ្នំពេញ ៖ ស្ថិតនៅភាគខាងកើតត្រើយម្ខាងរាជធានីភ្នំពេញនៅពេលបច្ចុប្បន្ននេះត្រូវបានអ្នកជំនាញនៅក្នុងវិស័យអចលនទ្រព្យលើកឡើងថា នៅមិនទាន់មានភាពទាក់ទាញ និងសក្ដានុពលខ្លាំងក្នុងការអភិវឌ្ឍន៍លំនៅដ្ឋានដូចនៅតំបន់ភាគខាងត្បូង និងខាងជើងក្រុងនោះទេ។

នាយិកាប្រចាំប្រទេសក្រុមហ៊ុនភ្នាក់ងារអចលនទ្រព្យអន្តរជាតិ CBRE Cambodia លោកស្រីអាន សុធីតា បានមានប្រសាសន៍នៅព្រឹកថ្ងៃទី៨ ខែមករា ឆ្នាំ២០២១ថា សម្រាប់ប៉ែកខាងកើត និងស្ថិតនៅត្រើយម្ខាងនៃរាជធានីភ្នំពេញ នៅមិនទាន់មានភាពទាក់ទាញខ្លាំងក្នុងការអភិវឌ្ឍន៍លំនៅដ្ឋានដូចជាសំណង់បុរីនៅឡើយនោះទេ បើមានក៏មានតិចតួចដែលជាតម្រូវទៅតាមតម្រូវការជាក់ស្ដែងនៅក្នុងតំបន់តែប៉ុណ្ណោះ។

លោកស្រីបានបន្តថា “បើនិយាយពីលក្ខខណ្ឌភូមិសាស្ត្រនៅប៉ែកខាងកើតនេះគឺមានអំណោយផលល្អដល់ការរស់នៅ ព្រោះខ្យល់ជំនោរត្រជាក់ពីដងទន្លេដែលស្ថិនៅសងខាង ហើយក៏មានភាពស្ងប់ស្ងាត់ល្អផងដែរ ប៉ុន្តែអ្វីដែលជាឧបសគ្គក្នុងកិច្ចអភិវឌ្ឍន៍ពីវិស័យឯកជននោះគឺកត្តាកង្វះខាតហេដ្ឋារចនាសម្ព័ន្ធ ដែលជាចំណុចសំខាន់បំផុតក្នុងការទាក់ទាញនៅក្នុងតំបន់មួយនេះ”។

លោកស្រីបន្តថា “យើងធ្លាប់បានឃើញរួចមកហើយ គ្រាន់តែមានដំណឹងពីការកសាងស្ពានតភ្ជាប់ពីតំបន់អរិយក្សត្រមកកាន់ជ្រោយចង្វារបានធ្វើឱ្យកំសួលនៃការទិញលក់ដីធ្លីនៅក្នុងតំបន់មានការកើនឡើង ប៉ុន្តែក៏ស្ងប់បាត់ទៅវិញនៅពេលដែលពេលវេលាចេះតែរំលងផុតទៅ និងនៅមិនទាន់មានដំណឹងជាក់លាក់នៅឡើយ”។

ប្រធានសមាគមអចលនទ្រព្យសកល (GRA) លោកសំ សុខនឿន បានមានប្រសាសន៍ផងដែរថា ជាមួយនឹងភាពអំណោយផលដល់ការរស់នៅ បច្ចុប្បន្នមានឈ្មួញមួយចំនួនបានដើរទិញដីគ្រប់ទំហំទាំងតូចទាំងធំសម្រាប់លក់បន្តយកចំណេញ ជាពិសេសក្រោយពេលមានការតភ្ជាប់ស្ពានដូចការបង្ហើបរបស់រាជរដ្ឋាភិបាលកាលពីកន្លងទៅថ្មីៗនេះ។

លោកបន្តថា “តាមខ្ញុំដឹងពេលមានក្រុមហ៊ុនអភិវឌ្ឍន៍មួយចំនួនបានទិញដីទុករួចហើយសម្រាប់គម្រោងអភិវឌ្ឍន៍លំនៅដ្ឋាន គ្រាន់តែសកម្មភាពនៃការចាប់ផ្តើមនៅមិនទាន់មកដល់។ ពួកគេនៅរង់ចាំពេលបន្តិចទៀត ព្រោះបើសាងសង់នៅពេលនេះក៏មនសូវជាមានទីផ្សារខ្ពស់នោះដែរ ដោយសារតែភាពខ្វះខាតហេដ្ឋារចនាសម្ព័ន្ធនៅក្នុងតំបន់”។

លោកថា “យើងឃើញមានក្រុមហ៊ុនមួយចំនួនអភិវឌ្ឍន៍ជាសំណង់បុរីប្រមាណ៥គម្រោង ប៉ុន្តែភាគច្រើនគម្រោងទាំងនេះគឺអភិវឌ្ឍន៍នៅតំបន់ដែលមានហេដ្ឋារចនាសម្ព័ន្ធស្រាប់ និងជាទីប្រជុំដែលមានមនុស្សរស់ស្រាប់ ជាក់ស្ដែងដូចជាបុរីទួលសង្កែរ បុរីចតុមុខជាដើម ប៉ុន្តែសម្រាប់តំបន់ផ្សេងទៀតនៅមិនទាន់ចាប់អនុវត្តគម្រោងនោះទេ ព្រោះត្រូវការចំណាយទុនថ្លៃដើមបន្ថែមក្នុងការរៀបចំហេដ្ឋារចនាសម្ព័ន្ធ ប៉ុន្តែប្រសិនបើស្ពានត្រូវបានសាងសង់តភ្ជាប់ជាមួយជ្រោយចង្វាររាជធានីភ្នំពេញ នោះនឹងមានភាពទាក់ទាញ ហើយតម្លៃអចលនវត្ថុក៏កើនឡើង ដូច្នេះអ្នកអភិវឌ្ឍន៍អាចគិតឡើងវិញពីការរៀបចំហេដ្ឋារចនាសម្ព័ន្ធបន្ថែមដើម្បីងាយស្រួលលក់គម្រោងរបស់ខ្លួន” ៕

សារ​ព៌​ត​មាន​បរទេស៖ សៀមរាប​នឹង​ប្រែក្លាយ​មុខមាត់​ថ្មី​ទៅជា​ទីក្រុង​ឆ្លាត​វៃ និង​ទេសចរណ៍វប្បធម៌​ដ៏​មាន​សក្តានុពល

ដោយៈ​សុខុម

សៀមរាបៈ គម្រោង​បង្កើត “ទីក្រុង​ឆ្លាត​វៃ” (Smart City) នៅ​សៀមរាប បាន​ល្បី​រន្ទឺ​ដល់​អន្តរជាតិ ដោយ​ត្រូវបាន​កាសែត​ចិន​South China Morning Post យកទៅ​ចុះផ្សាយ​កាលពី​ថ្ងៃទី៤ មករា ឆ្នាំ២០២១ នេះ។

សារព័ត៌មាន​នេះ បាន​សរសេរ​វិភាគ​យ៉ាង​វែង​អន្លាយ​ដូច្នេះ​ថា នៅក្នុង​តំបន់​អាស៊ី ក្នុង​រយៈពេល​ជាច្រើន​ឆ្នាំ​មកនេះ មាន​កន្លែង​តិចតួច​ណាស់ ដែលមាន​ទេសចរណ៍វប្បធម៌​ច្រើនជាង​ក្រុង​សៀមរាប ដែលជា​ផ្លូវ​ចូលទៅ​កាន់​ឧទ្យាន​បុរាណ​អង្គរ មុនពេល​ក្លាយជា​គោលដៅ​ទេសចរណ៍ ដែល​លែង​សូវ​ពឹងផ្អែក​ខ្លាំង​លើ​ប្រាសាទអង្គរវត្ត ដោយសារ​តែមាន​គម្រោង​អភិវឌ្ឍន៍​ហេដ្ឋារចនាសម្ព័ន្ធធំៗនៅ​ទីនោះ។

សេដ្ឋកិច្ច​ក្នុង​ក្រុង​សៀមរាប បាន​រង​ផលប៉ះពាល់​ខ្លាំង ដោយសារ​ការឆ្លង​រាតត្បាត​វីរុស​កូ​វីដ-១៩ ប៉ុន្តែ​ដោយសារ​មាន​គម្រោង​ហេដ្ឋារចនាសម្ព័ន្ធធំៗ កំពុងតែបន្ត​ដំណើរកា​រ ក្រុង​នេះ ទំនងជា​មិន​ប្រឈម​វិបត្តិ​អ្វី​ធំដុំ​រយៈពេល​វែង​នោះឡើយ។

ក្រុង​សៀមរាប ទទួលបាន​ការរីកចម្រើន​យ៉ាងខ្លាំង ក្នុង​ទសវត្សរ៍​ឆ្នាំ២០១០ ដោយសារ​ទទួលបាន​កំណើន​ភ្ញៀវទេសចរ​ជាតិ និង​អន្តរជាតិ​យ៉ាងច្រើន​ដែល​សម្រុក​ទៅ​ដើរលេង​កម្សាន្ត តាម​មាត់​ស្ទឹង​ដ៏​ទាក់ទាញ និង​ដោយសារ​ទីនោះ​សម្បូរ​សណ្ឋាគារ​ប៊ូ​ទិ​ក (Boutique) និង​សេវាកម្ម​បដិសណ្ឋារកិច្ច​យ៉ាង​កក់ក្ដៅ។

ចំនួន​ភ្ញៀវទេសចរ​បាន​ធ្លាក់ចុះ​ខ្លះ​ក្នុង​ឆ្នាំ២០១៩ ហើយ​ការផ្ទុះ​ករណី​ឆ្លង​រាតត្បាត​វីរុស​កូវ​ដ-១៩ បាន​បង្ក​ផលប៉ះពាល់​កាន់តែខ្លាំង ដល់​វិស័យ​ទេសចរណ៍​ក្នុង​ក្រុង​នេះ។ គិត​មក​ត្រឹម​ចុងឆ្នាំ២០២០ ក្រុង​នេះ​បានចាប់ផ្ដើម​វិល ទៅរក​ស្ថានភាព​ស្ងាត់ជ្រងំ​ដូច​កាលពី ២០ ឆ្នាំមុន។

ទោះបីជា​នៅក្នុង​ប្រទេស​កម្ពុជា គ្មាន​ករណី​ស្លាប់​ដោយសារ​វីរុស​កូ​វីដ-១៩ និង​មាន​ការឆ្លង​តែ​ប៉ុន្មាន​រយ​នាក់​បានការ​ណី​ក្ដី ក៏​ភោជនីយដ្ឋាន និង​សណ្ឋាគារ​ជាច្រើន​នៅ​សៀមរាប បាន​បិទទ្វារ​ជា​បណ្ដោះអាសន្ន ឬ​ខ្លះ​បិទ​ជា​អចិន្ត្រៃយ៍ ហើយ​សូម្បីតែ​សណ្ឋាគារប្រណីតៗរួមមាន​សណ្ឋាគារ Belmond សណ្ឋាគារ Sofitel និង​សណ្ឋាគារ Raffles ក៏បាន​បិទទ្វារ​ដែរ ហើយ​មនុស្ស​រាប់ពាន់នាក់ នៅក្នុង​វិស័យ​សណ្ឋាគារ ទេសចរណ៍ និង​បដិសណ្ឋារកិច្ច​បាន​បាត់បង់​ការងារ​ធ្វើ។

ដោយឡែក គម្រោង​ជួសជុល​កែលម្អ​ផ្លូវថ្នល់​មួយ ដែល​បានចាប់ផ្ដើម​នៅ​ចុងរដូវ​វស្សា​ឆ្នាំ​កន្លងទៅ ដែល​បាន​បង្ក​គ្រោះទឹកជំនន់​ធ្ងន់ធ្ងរ បំផុត​ក្នុងប្រទេស​កម្ពុជា ក្នុង​រយៈពេល​ប៉ុន្មាន​ទសវត្សរ៍​មកនេះ បានធ្វើឱ្យ​ប្រជាជន​នៅ​សៀមរាប រងទុក្ខវេទនា​កាន់តែខ្លាំង ខណៈ​ពួកគេ​ត្រូវបាន​ក្រសួង​សាធារណការ និង​ដឹកជញ្ជូន ជូនដំណឹង​ឱ្យ​រុះរើ​មួយផ្នែក​នៃ​ផ្ទះសម្បែង និង​អាជីវកម្ម​របស់​ពួកគេ​រួចទៅហើយ ដោយសារ​គម្រោង​ជួសជុល​កែលម្អ​ផ្លូវ​នោះ។

វិស័យ​ទេសចរណ៍​ក្នុង​ខេត្តសៀមរាប បាន​បាត់បង់​ភ្ញៀវទេសចរ​អន្តរជាតិ​យ៉ាងច្រើន​ដោយសារ​ការឆ្លង​រាតត្បាត​វីរុស​កូ​វីដ-១៩ ប៉ុន្តែ​ភ្ញៀវ​ជាតិ​នៅតែ​និយម​ទៅលេង​នៅ​ទីនោះ។ តួយ៉ាង​ក្នុងឱកាស​បុណ្យចូលឆ្នាំ​ខ្មែរ២០២០ ដែល​ត្រូវបាន​លើក​ពេល​មក​ធ្វើ​នៅ​ខែសីហា ជា​ប្រវត្តិសាស្ត្រ​ដោយសារ​ការឆ្លង​វីរុស​កូ​វីដ-១៩ ក្រុង​នេះ​ទទួលបាន​ភ្ញៀវទេសចរ​ជាតិ​ជាង២១៤.០០០នាក់ និង​ប្រាក់ចំណូល​បាន​ពី​ការចាយវាយ របស់​ពួកគេ​សរុប​ត្រូវបាន​ប៉ាន់់ប្រមាណ​ថា មាន​ទំហំ​ទឹកប្រាក់​ចំនួន១០០លាន​ដុល្លារ​អាមេរិក។

ទោះជា​យ៉ាងណា វិស័យ​ទេសចរណ៍​ក្នុង​ក្រុង​នេះ ដែល​រកចំណូលបាន១៥% នៃ​សេដ្ឋកិច្ច​របស់​ប្រទេស​ទាំងមូល នៅតែ​ធ្លាក់ចុះ​ខ្លាំង​នៅឡើយ។

ខណៈ​ពិភពលោក​ទទួលបាន​វ៉ាក់សាំង​កូ​វីដ-១៩ ជាបណ្ដើរៗ ការ​រឹតបន្តឹង​យ៉ាង​ម៉ឺងម៉ាត់​លើ​ការអនុញ្ញាត ឱ្យ​ភ្ញៀវទេសចរ​ចូលមកក្នុង​ប្រទេស​កម្ពុ​ជា នៅ​អនុវត្ត​នៅឡើយ។ នៅ​ចុងឆ្នាំ២០២០ បាន​ផ្ទុះ​ព្រឹត្តិការណ៍​សហគមន៍២៨ វិច្ឆិកា ក្នុង​រាជធានី​ភ្នំពេញ ដែល​បង្កឡើង​ដោយ​ភរិយា​របស់​អគ្គនាយក នៃ​អគ្គនាយកដ្ឋាន​ពន្ធនាគា​រ។ ស្ត្រី​ជា​ភរិយា​របស់​មន្ត្រីជាន់ខ្ពស់​រូបនេះ​បាន​ឆ្លង​វីរុស​កូ​វីដ-១៩ ហើយ​គាត់​បាន​ទៅ​កន្លែងផ្សេងៗគ្នា និង​បាន​ចម្លង​ទៅ​មនុស្ស​ជាច្រើន។ មនុស្ស​រាប់ពាន់នាក់ ត្រូវបានធ្វើ​តេស្តរ​កវី​រុស​កូ​វីដ-១៩ ឬ​ធ្វើ​ច​ត្តា​ឡី​ស័ក។

អាកាសយានដ្ឋាន​អន្តរជាតិ​នៅក្នុង​ប្រទេស​កម្ពុជា នៅ​ដំណើរ​នៅឡើយ ប៉ុន្តែ​ភ្ញៀវ​ដែល​ចុះចត​មាន​ចំនួន​តិចតួច​ប៉ុណ្ណោះ ដោយ​ភាគច្រើន​នៅក្នុង​រាជធានី​ភ្នំពេញ។ នៅ​ខែតុលា មាន​ជើងហោះហើរ ចេញ ចូលមក​ប្រចាំ​ថ្ងៃជា​មធ្យម​ត្រឹមតែ១៧ជើង​ប៉ុណ្ណោះ។

ជាមួយគ្នានេះ ខេត្ត​ដ៏​មាន​សក្តានុពល​នេះ បាន​លេចឡើង​គម្រោង​អភិវឌ្ឍន៍ធំៗរួមទាំង​គម្រោង​រមណី​យ​ដ្ឋា​ន​ធម្មជាតិ​ធំជាងគេ​នៅ​កម្ពុជា មាន​ឈ្មោះថា “Song Saa Reserve” ដែល​គ្របដណ្តប់​ផ្ទៃដី​ប្រមាណ១២៥ហិកតា បូក​ជាមួយ​បឹង​ឈូក​បន្ទាយស្រី​ទំហំ​ប្រមាណ៨០ហិកតា​ផង​នោះ នឹង​ជួយ​លើក​សោភ័ណភាព ស្រុក​បន្ទាយស្រី​ឱ្យ​កាន់តែ​មាន​ភាព​ទាក់ទាញ បន្ថែមទៀត​នៅត្រឹម​ឆ្នាំ២០២៣ ។

ក្នុង​រយៈពេល​ប៉ុន្មាន​ខែ​ចុង​ក្រោយនេះ សាធារណជន​មានការ​ចាប់អារម្មណ៍​យ៉ាងខ្លាំង លើ​គម្រោង​ហេដ្ឋារចនាសម្ព័ន្ធធំៗចំនួន៣ ដែល​អាច​កែប្រែ​សោភ័ណភាព​ក្នុង​តំបន់​នេះ ដែល​នឹង​ជួយ​ទាក់ទាញ​ភ្ញៀវទេសចរ​បាន​កាន់តែច្រើន។

គម្រោង​ធំជាងគេ ក្នុងចំណោម​គម្រោង​ទាំងនោះ​គឺ​ទីក្រុង​រណប ដែល​នឹង​លេចចេញ​ជា​រូបរាង​ក្នុងស្រុក​សូត្រ​និគម ស្ថិតនៅ​ចម្ងាយ​ប្រមាណ៦០គីឡូម៉ែត្រ នា​ភាគ​ខាងកើត​នៃ​ខេត្តសៀមរាប។ ទីក្រុង​ឆ្លាត​វៃ (Smart City) ដែលជា​បណ្ដុំ​មជ្ឈមណ្ឌល​ពាណិជ្ជកម្ម និង​អគារខ្ពស់ៗនេះ ត្រូវបាន​ឌី​ហ្សា​ញ​ឡើង ដើម្បីឱ្យ​ភ្ញៀវទេសចរ​មានឱកាស​បាន​ទៅ​កម្សាន្ត​នៅ​ឧទ្យាន​ជាតិ​ភ្នំ​គូលែន ក្បែរ​នោះ​ដែលជា​ប្រភពដើម​កំណើត នៃ​អាណាចក្រ​អង្គរ និង​ទន្លេសាប ដែលជា​បឹង​ទឹកសាប​ធំ​បំផុត​នៅ​អាស៊ីអាគ្នេយ៍។

ទីក្រុង​ថ្មី​ដែលមាន​ឈ្មោះថា “ហ្គ្រែ​ន​សៀមរាប” (Grand Siem Reap) នេះ​គឺជា​ផ្នែក​មួយ​នៃ “ផែនការមេ​សម្រាប់​ការអភិវឌ្ឍន៍ វិស័យ​ទេសចរណ៍​ខេត្តសៀមរាប ឆ្នាំ២០២០-២០៣៥ (Siem Reap Tourism Development Master Plan 2020-2035)។ ផែនការ​នេះ ត្រូវបាន​ផ្ដួចផ្ដើមឡើង មុនពេល​ផ្ទុះ​ករណី​ឆ្លង​វីរុស​កូ​វីដ-១៩ និង​ត្រូវ​បានសម្រេច​ជា​ចុងក្រោយ​ក្នុង​ខែតុលា ចុងឆ្នាំ២០២០ ។

លោក​ជុក ជំនោ អ្នកនាំពាក្យ​ក្រសួងទេសចរណ៍​បានប្រកាសថា “យើង​កំពុង​ត្រៀម​បង្កើត​ក្រុង​ថ្មី​មួយ ដោយ​អនុញ្ញាតឱ្យ​សាងសង់​អគារខ្ពស់ៗ ដែល​នឹងមិន​ធ្វើឱ្យប៉ះពាល់​ដល់​តម្លៃ​នៃ​សម្បត្តិ​បេតិកភណ្ឌ​ក្នុង​ខេត្ត​នេះឡើយ” ។

ជាមួយគ្នានេះ លោក David-Jaya Piot ប្រធាន​សមាគម​សណ្ឋាគារ​ប្រចាំ​ខេត្តសៀមរាប​បានលើកឡើង​ថា ដោយសារ​អង្គការ​យូណេស្កូ មិន​អនុញ្ញាតឱ្យ​មានការ​សាងសង់​អគារខ្ពស់ៗនៅ​ជិត​ប្រាសាទអង្គរវត្ត ទើបបានជា​គម្រោង​ក្រុង​សៀមរាប​ថ្មី ត្រូវបាន​លើកសំណើ​ឡើង។ លោក​បាន​បន្ថែមថា គម្រោង​ទី២ ពោលគឺ​គម្រោង​សាងសង់​អាកាសយានដ្ឋាន​អន្តរជាតិ​មួយ​ក្នុង​ខេត្តសៀមរាប ដែល​ធំ​បំផុត​នៅក្នុង​ប្រទេស​កម្ពុជា នឹង​ចំណាយ​អស់​ទឹកប្រាក់៨៨០លាន​ដុល្លារ។

គម្រោង​អាកាសយានដ្ឋាន​សៀមរាប​អង្គរ (Siem Reap-Angkor Airport) ដែល​គ្របដណ្ដប់​លើ​ផ្ទៃដី៧០០ហិកតា ស្ថិតនៅ​ចម្ងាយ​ប្រមាណ៤០គីឡូម៉ែត្រ នៅ​ភាគ​អាគ្នេយ៍​នៃ​ប្រាសាទ​នេះ គ្រោង​នឹង​បញ្ចប់​ជា​ស្ថាពរ​នៅ​ខែមីនា ឆ្នាំ២០២៣ ក្រោម​ការវិនិយោគ​រប​ស់​ក្រុមហ៊ុន​ហេដ្ឋារចនាសម្ព័ន្ធ​ចិន Yunnan Investment ។

គម្រោង​ទី៣ ពោលគឺ​គម្រោង​រមណីយដ្ឋាន​មួយ​មាន​ឈ្មោះថា “បឹង​អង្គរ​អច្ឆរិយៈ” (Angkor Lake of Wonder) លើ​ផ្ទៃដី៧៥ហិកតា ដែល​ស្ថិតនៅ​ចម្ងាយ​តែ៥០០ម៉ែត្រ​ពី​ឧទ្យាន​អង្គរ​នេះ នឹង​ចំណាយ​អស់ប្រាក់​រហូតដល់ ៣៥០លាន​ដុល្លារ ហើយនឹង​បញ្ចប់​ជា​ស្ថាពរ​នៅ​ឆ្នាំ២០២៥ ។ គំរោង​នេះ​ជាការ​វិនិយោគ​ដោយ​ក្រុមហ៊ុន​កាស៊ីណូ​ដ៏​ធំ NagaCorp។  គម្រោង​នេះ​នឹង​ក្លាយជា​បណ្ដុំ​សណ្ឋាគារ​ផ្កាយ៥ សួន​ទឹក និង​ឆាយ​ណា​ថោ​ន (Chinatown) ឬ​ក្រុង​ចិន។

ទីតាំង​នៃ​គម្រោង​រមណីយដ្ឋាន​នេះ បាន​បង្ក​ឱ្យ​ប្រជាជន​ក្នុង​មូលដ្ឋាន និង​ក្រុម​អ្នក​បរិស្ថាន​មានការ​ព្រួយបារម្ភ។ អង្គការ​តម្លាភាព​អន្តរជាតិ​ប្រចាំ​កម្ពុជា (Transparency International Cambodia) បាន​សម្ដែង​ការព្រួយបារម្ភ​ថា តំបន់​កម្សាន្ត​ខាងលើនេះ​អាច​បង្ក​ផលប៉ះពាល់ ដល់​តំបន់​បេតិកភណ្ឌ​របស់​ដូនតា ហើយនឹង​បំផ្លាញ​គុណ​តម្លៃ​នៃ​តំបន់​បេតិកភណ្ឌ​វប្បធម៌។

ទោះជា​យ៉ាងណា អាជ្ញាធរ​អប្សរា​បាន​បដិសេធ​មិន​ឆ្លើយបំភ្លឺ​ទេ ជុំវិញ​ការចុះផ្សាយ​អត្ថបទ​នេះ៕

សំណង់​អាជីវកម្ម​ទេសចរណ៍​មួយចំនួន​នៅក្នុង​ខេត្ត​ក្នុង​ក្រុងព្រះសីហនុ​បានចាប់ផ្តើម​សាងសង់​ឡើងវិញ


ដោយៈ​វុត្ថា

ព្រះសីហនុៈ សំណង់​អាជីវកម្ម​បំរើឱ្យ​វិស័យ​ទេសចរណ៍ នៅក្នុង​ក្រុងព្រះសីហនុ បាន​ដំណើរ​ឡើងវិញបណ្តើរៗ និង​មានការ​បើកសម្ពោធ​ថ្មី​កាលពី​ចុងឆ្នាំ២០២០ ដើម្បី​ស្វាគមន៍​ភ្ញៀវ​ទេសចរណ៍ ដែល​មកលេង​កម្សាន្ត នៅក្នុង​ខេត្ត​ទេសចរណ៍​ជាប់មាត់​សមុទ្រ​មួយ​នេះ។

ប្រធាន​មន្ទីរ​ទេសចរណ៍​ខេត្ត​ព្រះសីហនុ លោក តាំង សុចិត្រ​គ្រឹ​ស្នា​បានឱ្យដឹង​តាម​ទូរស័ព្ទ​កាលពី​ថ្ងៃទី៧ មករា​កន្លងមក​ថា  ចាប់តាំងពី​ចុងឆ្នាំ២០១៩ រហូត​ល​ដល់​ដើមឆ្នាំ ២០២០ នៃ​ការផ្តើម​ផ្ទុះឡើង​នូវ​ជំងឺ​កូ​វីដ១៩ បានធ្វើឱ្យ​សំណង់​អាជីវកម្ម​ទេសចរណ៍​នៅក្នុង​ខេត្ត​ព្រះសីហនុ ត្រូវបាន​ផ្អាក​សកម្មភាព​ប្រមាណ៦៥ភាគរយ ។ ប៉ុន្តែ​សម្រាប់​ចុងឆ្នាំ ២០២០ មាន​ការបើក​ដំណើរ​ខ្លះ និង​សម្ពោធ​ដាក់ចូល​ទីផ្សារ​ថ្មី​ខ្លះ ដែល​នេះ​ជា​សញ្ញា​ល្អ​សម្រាប់​ខេត្ត​ព្រះសីហនុ។

លោក​ថ្លែងថា “បន្ទាប់ពី​ស្ថានភាព​នៃ​ជំងឺ​កូ​វិដ ១៩ មាន​ភាពល្អ​ប្រសើរឡើង​វិញ​នៅ​ចុងឆ្នាំ២០២០ ។ នេះ​គឺជា​សញ្ញា​វិជ្ជមាន​ល្អ​មួយ សម្រាប់​វិស័យ​បដិសណ្ឋារកិច្ច​នៅក្នុង​ខេត្ត​ព្រះសីហនុ ប៉ុន្តែ​វា​ក៏​អាស្រ័យ​លើ​ស្ថានភាព​នៃ​ជំងឺ​កូ​វិដ១៩ផងដែរ” ។

លោក​សុចិ​ត្ត​ក្រឹ​ស្នា​បាន​បន្តថា បើសិន​រដ្ឋាភិបាល​គ្រប់គ្រង​មិនបាន​ល្អ   ដូច​នៅ​បណ្តា​ប្រទេស​មួយចំនួន វា​នឹង​បញ្ហា​ឡើងវិញ  ប៉ុន្តែ​រដ្ឋាភិបាល​និង​អាជ្ញាធរ​ពាក់ព័ន្ធ​គ្រប់គ្រង​ជំងឺ​កូ​វីដ១៩បានល្អ ដែល​បានធ្វើឱ្យ​បានធ្វើ​ឱ្យមាន​សំណង់​អាជីវកម្ម​បើក​ថ្មី និង​អាជីវកម្ម​ដែលមាន​ការផ្អាក​ក៏​បន្ត​បើក​ឡើងវិញបណ្តើរៗផងដែរ។

លោក​ថ្លែងថា  “បើក​មិនមាន​ករណី​ឆ្លង​ជំងឺ​កូ​វីដ១៩ នៅក្នុង​ប្រទេស​ធ្ងន់ធ្ងរ​ទេ យើង​រំ​ពឺ​ង​ថា​នៅក្នុង​ឆ្នាំ ២០២១ នេះ នឹងមាន​ស​ញ្ញ​វិជ្ជមាន​កាន់​ប្រសើរ  ហើយ​វា​នឹង​ឡើង​រហូត វា​មិន​ចុះ​នោះទេ” ។ លោក​បន្តថា “នេះ​គឺជា​អ្វីដែល​យើង​មើលឃើញ ហើយ​មានការ​រំ​ពឺ​ង​ទុក​ថា ឧស្សាហកម្ម​ទេសចរណ៍​របស់​កម្ពុជា ក៏ដូចជា នៅក្នុង​ខេត្ត​ព្រះសីហនុ និង​ពិភពលោក​នឹងមាន​ស្ថានភាព​ល្អប្រសើរ​ឡើងវិញ​មិន​ខាន​នោះទេ” ។

លោក​ឃាង ភារ​ម្យ អ្នកនាំពាក្យ​រដ្ឋបាលខេត្ត​ព្រះសីហនុ បានឱ្យដឹង​ដែរ​ថា នៅ​ដើមឆ្នាំ២០២១ មិនទាន់​អាចធ្វើ​ការវាយតម្លៃ​បាន​នោះទេ ព្រោះ​ស្ថានភាព​សេដ្ឋកិច្ច​ពាក់ព័ន្ធ​នឹង ការគ្រប់គ្រង​ការរីក​រាល​នៃ​ជំងឺ​កូ​វីដ១៩ បាន​ឬ​មិនបាន ប៉ុន្តែ​សម្រាប់​ខេត្ត​ព្រះសីហនុ មិនទាន់​រកឃើញ​ករ​ណី​ឆ្លង​ចូលទៅក្នុង​សហគមន៍​នោះទេ។

លោក​ថ្លែងថា “ដូច្នេះ​យើង​រង​ចាំមើល​បន្តិចទៀត បើសិនជា​មានការ​គ្រង់​គ្រង​នូវ​ជំងឺ​កូ​វីដ១៩បាន​ទាំងស្រុង ខ្ញុំ​គិតថា នឹងមាន​កំណើនសេដ្ឋកិច្ច​ឡើងវិញ អាជីវកម្ម​នានា​នឹង​ដាក់ឱ្យ​ដំណើរការ​ពេញលេញ ស្រប​ពេលដែល​នៅក្នុង​ខេត្ត​ព្រះសីហនុ មាន​ហេដ្ឋារចនាសម្ព័ន្ធ៣៤ខ្សែ​នឹងត្រូវ​បញ្ចប់​ខាងមុខ​ដ៏​ខ្លី  និង​ស្តារ១១ខ្សែ​បន្ថែមទៀត” ។ លោក​បន្តថា តាមពិតទៅ គ្មានអ្វី​ដែល​យើង​ត្រូវរ​ចាំ​នូវ​ការប្រែប្រួល​នៃ​ជំងឺ​កូ​វីដ១៩នោះទេ” ។

បើតាម​លោក​តាំង សុចិត្រ​ក្រឹ​ស្នា​បាន​ឲ្យ​ដឹងថា នៅ​ចុងឆ្នាំ២០១៩ មាន​សំណង់​អាជីវកម្ម​ទេសចរណ៍​ប្រមាណ​ជាង៨០០ បាន​បើក​ដំណើរការ ប៉ុន្តែ​បន្ទាប់ពី​មាន​បិទ​អាជីវកម្ម​អន​ឡាន  និង​ការ​ផ្ទុះឡើង​នូវ​កូ​វីដ១៩  បានធ្វើឱ្យ​សំណង់​អា​ជីក​ម្ម​ប្រភេទ​នេះ ថយចុះ ចំនួន៦៥ភាគរយ៕