ដោយ គង់ សូរិយា

ភ្នំពេញៈ ល្បឿននៃការអភិវឌ្ឍនៅទីក្រុងរណបING CITYដែលជាទីក្រុងរណបធំជាងគេនៅរាជធានីភ្នំពេញ បាននិងកំពុងដើរតាមផែនការមេរបស់ខ្លួន ខណៈតម្លៃដីធ្លីនៅតំបន់នេះមានកំនើនយ៉ាងខ្ពស់ ជាមួយគំរោងសាងសង់បុរី មជ្ឈមណ្ឌលពាណិជ្ជកម្មលំដាប់អន្តរជាតិនានាកំពុងលេចចេញជារូបរាង។

យោងតាមផែនការមេរបស់ក្រុមហ៊ុនING Holding ដែលគេហទំព័រPropertyarea.asiaទទួលបានឲ្យដឹងថា ទីក្រុងរណបING CITYគ្របដណ្តប់លើផ្ទៃដីជាង២០០០ហិកតា ដែលមានវិសាលភាពដ៏ធំមួយ និងជា​ទីក្រុងរណបធំជាងគេនៅរាជធានីភ្នំពេញ។ តាមគំរោងក្រុ​មហ៊ុនគ្រោងអភិវឌ្ឍន៍តំបន់នេះជាតំបន់មានការអភិវឌ្ឍបែបបៃតង និងគោរពតាមគោលការណ៍បរិស្ថាន។ តាមឯកសារដដែលបានឲ្យដឹងថា ក្រុមហ៊ុនគ្រោងអភិវឌ្ឍន៍តំបន់នេះជាមជ្ឈមណ្ឌលលំនៅដ្ឋាន មជ្ឈមណ្ឌលពាណិជ្ជកម្ម កន្លែងចំណតយានយន្ត ជាសហគមន៍សម្រាប់និវត្តន៍ជនជាតិចិន មជ្ឈមណ្ឌលកីឡាជាដើម។

ជាមួយនឹងទស្សនវិស័យចំពោះមុខ និងរៀបចំតំបន់ដែលទើបអភិវឌ្ឍន៍ថ្មីនេះ សា​លារាជធានីភ្នំពេញ រួមជាមួយសាលាក្រុងប៉ារីសដើម្បីសិក្សារួមគ្នាពីការអភិវឌ្ឍ និងដោះ​ស្រាយ​បញ្ហាប្រឈមចំពោះមុខ ទាក់ទងនឹងការកើនឡើងនូវយានយន្ត ការបំពុលទឹកកខ្វក់ និងហេដ្ឋារចនាសម្ព័ន្ឋនានា ដើម្បីធ្វើយ៉ាងណាឲ្យតំបន់នេះសមស្របជាតំបន់ដែល​មានភាពបៃតង និងត្រៀមរៀបចំនគរូបនីយកម្មឲ្យមានភាពល្អប្រសើរ និងអាចឆ្លើយតបនឹងកំនើនប្រជាសាស្រ្តនៅតំបន់នេះ។

ដោយសារជាតំបន់ថ្មី ងាយស្រួលហេដ្ឋារចនាសម្ព័ន្ឋ និងកំនើនប្រជាសាស្រ្តនៅតំ​បន់នេះ ទើបអ្នកវិនិយោគជាតិ អន្តរជាតិបាននិងកំពុងវិនិយោគគំរោងលំនៅដ្ឋានធមៗនៅ​តំបន់នេះ ពិសេសផ្សារទំនើបលំដាប់អន្តរជាតិ២កំពុងបានសាងសង់ឡើង ក្នុងចំណោ​មផ្សារទំនើបធំៗចំនួនបី។ អ្វីកាន់តែពិសេសផ្សារទំនើបAEON MALL3នឹងសាង​សង់នៅតំបន់នេះនាពេលអនាគត ខណៈក្រុមហ៊ុនEAON GROUPបានទិញដីនៅតំបន់នេះទុករួចទៅហើយ។

អតីតវីរស្ថាត្យករកម្ពុជា លោកបណ្ឌិតវណ្ណ ម៉ូលីវណ្ណធ្លាប់បានផ្តល់អនុសាសន៍ឲ្យអភិវឌ្ឍន៍រាជធានីភ្នំពេញឆ្ពោះទៅកាន់ភាគខាងត្បូង ដោយសារតំបន់ភាគខាងត្បូងមាន​ដីទំនេរច្រើន មានសណ្ឋានដីខ្ពស់មិនប្រឈមនឹងការលិចទឹក និងងាយស្រួលរៀបចំហេដ្ឋា​រចនាសម័​ន្ឋនានា ដោយសារជាតំបន់មានការអភិវឌ្ឍថ្មី។

នាយិកាប្រចាំប្រទេសនៃក្រុមហ៊ុន CBRE Cambodia អ្នកនាងអាន សុធីតាធ្លាប់បានមានប្រសាសន៍ឲ្យដឹងថា តំបន់នេះជាទីក្រុងថ្មី និងមាន​ការរៀបចំហេដ្ឋារចនាសម្ព័ន្ឋថ្មី ដែលវាមានភាពងាយស្រួល ក្នុងការរៀបចំការអភិវឌ្ឍជាងទីក្រុងចាស់ ពិសេសមានចម្ងា​យជិតជាងគេចេញពីកណ្តាលក្រុង បើធៀបនឹងទីក្រុងរណ​បដទៃទៀត។

អ្នកនាងបន្តថា “តំបន់នេះកំពុងមានការរីកចម្រើន ដោយរយៈពេល៥ឆ្នាំខាងមុខវា​នឹងជាតំបន់លំនៅដ្ឋាន ហើយរយៈពេល១០ឆ្នាំទៀត ខ្ញុំគិតថាតំបន់នេះនឹងប្រែក្លាយជាតំបន់ពាណិ​ជ្ជកម្ម”។

បច្ចុប្បន្នតំបន់នេះកំពុងមានការរីកចម្រើនយ៉ាងលឿន ដោយមានបុរីជាច្រើនកំពុង​សាងសង់នៅតំបន់នេះ ដូចជាបុរីប៉េង ហួត បុរី WOODLAND, គំរោងផ្សារទំនើបAEON MALL3 និងគំរោងបង្កើតផ្សារទំនើបរបស់បុរីជីព ម៉ុងជាដើម។

ជាមួយគ្នានេះលោក វ៉ា វីរៈ អ្នកជំនាញអចលនទ្រព្យអន្តរជាតិ និងជាអគ្គនាយកក្រុមហ៊ុន Century21 Fortuna Investmen tបានមានប្រសាសន៍ឲ្យដឹងផងដែរថា មានគំរោងវិនិយោគជាច្រើន បានចាប់ផ្តើមនៅតំបន់នេះរួចហើយ ដោយសារតំបន់នេះកំពុងមានសក្តានុពល និងមានប្លង់មេអភិវឌ្ឍន៍ត្រឹមត្រូវ មានហេដ្ឋារចនាសម្ព័ន្ឋល្អប្រសើរនិងធំជាងគេនៅក្រុងភ្នំពេញ។លោកបន្តថា ការមានប្លង់មេអភិវឌ្ឍន៍ ពិតជាមានសារៈសំខាន់ណាស់ ដើម្បីធ្វើឲ្យតំបន់នោះ មានការអភិវឌ្ឍន៍ប្រកបដោយភាពរៀបរយ និងទាក់ទាញអ្នកវិនិយោគអន្តរជាតិនានា។

លោកបន្តថា “ខ្ញុំគិតថាតំបន់នេះស័ក្តិសមជាតំបន់ពាណិជ្ជកម្ម នាពេលអនាគត ព្រោះទីតាំងនេះល្អប្រសើរ និងស័ក្តិសមជាទីក្រុងថ្មីមួយដែលមានវិសាលភាពធំ និងមាន​ហេដ្ឋារចនាសម័្ពន្ឋតភ្ជាប់យ៉ាងល្អប្រសើរ”។លោកបន្តថា “វាស្ថិតនៅកៀកក្រុងតាខ្មៅ ហើ​យប្រសិនជាព្រលានយន្តហោះថ្មី សាងសង់នៅស្រុកកណ្តាលស្ទឹង នឹងធ្វើឲ្យមានចរាចរឆ្លងកាត់តំបន់នេះកាន់តែច្រើន ពេលនោះសកម្មភាពពាណិជ្ជកម្មនឹងរសរវើក”។

លោកវ៉ា វីរៈបានបន្តថា ចំណែករោងចក្រ សហគ្រាស ជាបណ្តើរៗនឹងរើចេញពីតំបន់នេះ ព្រោះនៅពេលសកម្មភាពពាណិជ្ជកម្មកើតនៅតំបន់ណា រោងចក្រ សហគ្រាសនៅតំបន់នោះនឹងចាកចេញ ដោយសារវិស័យពាណិជ្ជកម្មទាញយក និងបង្កើតតម្លៃបន្ថែមបានកាន់តែច្រើន។លោកបន្តថា ឧទាហរ៍រោងចក្រ សហគ្រាសអាចជួលបានត្រឹម៣ទៅ៤ដុល្លារក្នុងមួយម៉ែត្រការ៉េ និងសាងសង់អាគារពាណិជ្ជកម្ម និងលំនៅដ្ឋានអាចទាញតម្លៃបានកាន់តែខ្ពស់ ពេលនោះរោងចក្រ សហគ្រាសនឹងរើចាកចេញដោយស្វ័យប្រវត្តិ៕

ដោយ ស៊ីវ ម៉េង

ភ្នំពេញៈ រាជរដ្ឋាភិបាលកម្ពុជាបានអនុម័ត ប្លង់គោលរាជធានីភ្នំពេញ ដែលត្រូវបានរាជរដ្ឋាភិបាលអនុម័តជាផ្លូវការកាលពីប៉ុន្មានឆ្នាំមុន  បានបែកចែករាជធានីចំណាស់នេះជា១៤តំបន់ខុសៗគ្នា តាមលក្ខណៈប្រជាសាស្រ្ត សេដ្ឋកិច្ច និងកំណើននគរូបនីយកម្ម។

យោងតាមសេចក្តីព្រាងប្លង់គោលរាជធានីភ្នំពេញ ដែល propertyarea.asia សូមលើកយកមកបង្ហាញជាថ្មីបានបង្ហាញថា រដ្ឋាភិបាលបាន​កំណត់លក្ខណៈវិនិច្ឆ័យលើ១៤ចំណុច ដូចជា ទី១ ទម្រង់សេដ្ឋកិច្ចរាជធានីភ្នំពេញ ទី២ការដឹកជញ្ជូន ទី៣ ទីផ្សារអចលនវត្ថុ ទី៤ ទីផ្សារអចលនទ្រព្យ ទី៥ សង្កាត់មិនរៀបរយ ទី៦ ការកកើតនិងការរីកចំរើនរបស់ទីក្រុងពីឆ្នាំ១៨៥០ ដល់ឆ្នាំ១៩៩៣ ទី៧ លក្ខណៈសម្បត្តិរូបសាស្រ្តនិងតួនាទីលំហក្រុង ទី៨ សន្ទុះនិងបុគ្គលិកលក្ខណៈភ្នំពេញ ទី៩ ទេសភាព និងសមាសភាគទីក្រុង ទី១០ កសិកម្មនិងនគរូបនីយកម្ម ទី១១ ហេដ្ឋារចនាសម្ព័ន្ឋទីក្រុង ទី១២ មធ្យោបាយនិងសេវាសាធារណៈ ទី១៣ និន្នាការនិងទស្សនវិស័យនៃនគរូបនីយកម្មភ្នំពេញ និងទី១៤ ទស្សនវិស័យសេដ្ឋកិច្ចសង្គមនិងលំហ។​

ប្លង់គោលរាជធានីភ្នំពេញ ត្រូវបានអនុម័តកាលពីឆ្នាំ២០១៥ តាមរយៈអនុក្រិតស្តីពី “ការដាក់ឲ្យអនុវត្តប្លង់គោល ប្រើប្រាស់ដីរាជ​ធានីភ្នំពេ​ញឆ្នាំ២០៣៥”។

យោ​ងតាមមាត្រា២ នៃអនុក្រិតលេខ៧៧ អនបប្រក ចុះថ្ងៃទី៧ មិថុនា​ឆ្នាំ២០១២ បានកំណត់ថា ប្លង់គោលប្រើប្រាស់ដីថ្នាក់រាជធានី ខេត្ត ក្រុង ស្រុក ខ័ណ្ឌជាផែនការកំណត់ចក្ខុវិស័យនិងយុទ្ឋសាស្រ្តរួម សម្រាប់ការអភិវឌ្ឈផ្នែករូបវ័ន្ត​ហេដ្ឋារចនាសម្ព័ន្ឋ និងគមនាគមន៍សំខាន់ៗ និងធ្វើសមាហរណកម្មថ្នាក់រាជធានី ថ្នា​ក់​​ស្រុក ថ្នាក់ខ័ណ្ឌទៅនឹងតំបន់និងថ្នាក់ជាតិ។

អតីតអភិបាលរាជធានីភ្នំពេញ លោកប៉ា សុជាតិវង្សបានថ្លែងថា “គោលដៅប្រើប្រាស់ដីរាជធានីភ្នំពេ​ញឆ្នាំ២០៣៥ ជាឯកសារយុទ្ឋសាស្រ្តបំរើឲ្យមហិច្ឆតារបស់រាជរដ្ឋាភិបាល ក៏ដូចជាសាលារាជធានីភ្នំពេញមាន​គោលដៅ និងទស្សនវិស័យដល់ឆ្នាំ២០៣៥ ក្នុងការគ្រប់គ្រង និងតំរង់ទិសការអភិវឌ្ឈសេដ្ឋកិច្ច ក្នុងព្រំប្រទល់រដ្ឋបាលរាជធានី និងតំបន់ប្រជុំជនពាក់ព័ន្ឋទាំងទ្បាយនៅជាប់ជុំវិញ ឆ្លើយតបបាននឹងកំនើននៃការវិនិយោគឯកជន និងចំនួនប្រជាជនក្នុង​រាជធានី តាមរយៈការតំរង់ទិស និងជំរុញការវិនិយោគសាធារណៈស្របតាមរបបសេដ្ឋកិច្ចទីផ្សារសេរី និងអភិវឌ្ឈន៍តាមបែបប្រជាធិបតេយ្យថ្នាក់ក្រោមជាតិ”។

ប្រជាជនសរុបនៅរាជធានីភ្នំពេញ មានចំនួន១.៦៨៨.០៤៤នាក់ (តាមការធ្វើអង្កេតប្រជាសាស្រ្តកម្ពុជាឆ្នាំ២០​១​៣នៃក្រ​សួងផែនការ)ហើយអាចកើនដល់៣លាននាក់នៅឆ្នាំ២០២០។ កំនើនន​គរូបនីយកម្ម និងកំណើនសាងសង់សំណង់ធំថ្មីៗ លើសពី៥ជាន់មានប្រមាណ៦២៨​អាគារ និងសំណង់បុរីចំនួន១១០ទីតាំង ពង្រាយនៅទាំងខ័ណ្ឌក្នុងក្រុង និងជាយក្រុង​និងបានជំរុ​ញការរីកទីក្រុងទៅតំបន់ខាងក្រៅ ចេញពីខ័ណ្ឌកណ្តាលក្រុងស្ទើរតែហួសពីតំបន់រដ្ឋបាលរបស់ខ្លួន។

លោកម៉េង ប៊ុណ្ណារិទ្ឋមន្រ្តីជាន់ខ្ពស់ក្រសួងរៀបចំដែនដី នគរូបនីយកម្មនិងសំណ​ង់បានថ្លែងថា ក្នុងប្លង់គោលនេះបានរៀបចំរាជធានីភ្នំពេញប្រមាណ១៥តំបន់​ខុសៗគ្នា ដូចជាតំបន់ពាណិជ្ជកម្ម តំបន់លំនៅដ្ឋាន តំបន់ឧស្សាហកម្ម តំបន់កសិកម្ម​តំបន់ដែលត្រូវអភិរ័ក្សជាដើម ប៉ុន្តែនៅពេលប្លង់គោលនេះត្រូវសិក្សាលំអិត តំបន់និមួយៗអាចនឹងមានច្រើនជាងនេះ អាស្រ័យលើស្ថានភាពជាក់ស្តែង។

នៅពេលសាកសួរថាតើទីក្រុងភ្នំពេញ នឹងត្រូវពង្រីកបន្ថែមទៀតឬយ៉ាងណា​លោកម៉េង ប៊ុណ្ណារិទ្ឋបានថ្លែងថា “នៅពេលនយោបាយកម្ពុជានៅតែមានស្ថិរភាព សេដ្ឋកិច្ចកម្ពុជាបន្តកើនទ្បើង និងមានកំណើននៃការអភិវឌ្ឈ ការពង្រីកក្រុងអាចត្រូវ ពិនិត្យតាមស្ថានភាពជាក់ស្តែងរៀងរាល់៥ឆ្នាំម្តង”។ លោកបន្ថែមថា“ប្លង់របស់យើងអាចមានការ​លំអៀង ដូច្នេះការពង្រីកទីក្រុងនឹងត្រូវសិក្សាទ្បើងវិញ តាមស្ថានភាពជាក់ស្តែង​នៃការរីកចំរើននគរូបនីយកម្ម និងកំណើនប្រជាសាស្រ្ត”។

ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា លោកច្រឹក សុខនីម បានថ្លែងថា នេះជាដំណឹងដ៏ល្អ ដែលយើងបានរង់ចាំរាប់ឆ្នាំមកហើយ។ គ្រប់ទីក្រុងធំៗ នៅតាមបណ្តាប្រទេសនៅលើពិភពលោក សុទ្ឋតែមានប្លង់គោលនៅទ្បើយ តែកម្ពុជាមិនទាន់​មាន។ ដូច្នេះការមានប្លង់គោលជាការប្រសើរណាស់ ព្រោះទី១ អាច​បង្ហាញពីរចនា​សម្ព័ន្ឋទីក្រុងច្បាស់លាស់ថា ត្រូវសាងសង់អ្វី និងជាការងាយស្រួលដែលយើងបង្ហា​ញពីប្លង់គោលទីក្រុងរបស់យើងទៅអ្នកវិនិយោគ។

ទី២ អាចដឹងពីតំបន់ណាត្រូវធ្វើអ្វី និងកសាងអាគារកំពស់ប៉ុណ្ណា ទី៣ អាចកាត់បន្ថយការសាងសង់សំណង់អា​ណាធិបតេយ្យ និងទី៤ អាចកាត់បន្ថយផលរំខាននានាលើការសាងសង់លំនៅដ្ឋាន និងទ្រព្យសម្បត្តិសាធារណៈ៕

ដោយ រ៉ាណេត

ភ្នំពេញៈ អ្នកជំនាញអចលនទ្រព្យអន្តរជាតិបានថ្លែងថាតម្លៃអចលនទ្រព្យដែលស្ថិតនៅតាមបណ្តោយផ្លូវព្រះមុនីរ៉េតកំពុងមានសក្តានុពលហើយតម្លៃបន្តកើនឡើងប្រចាំឆ្នាំ។

នាយកក្រុមហ៊ុន Century21 Fortuna Investment លោកវ៉ាវីរៈបានប្រាប់ឱ្យដឹងតាមរយៈទូរស័ព្ទកាលពីពេលថ្មីៗនេះថាអចលនទ្រព្យដែលស្ថិតនៅតាមបណ្តោយផ្លូវព្រះមុនីរ៉េតបើប្រៀបធៀបជាមួយតំបន់ដទៃទៀតដូចជានៅតាមបណ្តោយផ្លូវព្រះមុនីវង្សផ្លូវកម្ពុជាក្រោមផ្លូវហ្សាឌឺហ្គោលឬមហាវិថីសហព័ន្ធរុស្ស៊ីគឺនៅមានកម្រិតទាបនៅឡើយ។

លោកបន្តថា “យើងមើលឃើញជាក់ស្ដែងស្រាប់ ចំពោះសំណង់អាគារដែលស្ថិតនៅតាមផ្លូវព្រះមុនីរ៉េត មិនសូវជាមានភាពទាក់ទាញខ្លាំង ដូចតាមបណ្តាផ្លូវដូចដែលបានរៀបរាប់ខាងលើនោះទេ”។

ផ្លូវនេះ ត្រូវបានគេបែងចែកជា២តំបន់ គឺតំបន់ទី១ ចាប់ពីផ្សារដើមគរឆ្ពោះមកអាងទឹកអូឡាំពិក និងតំបន់ទី២ ចាប់ពីផ្សារដើមគរ ឆ្ពោះទៅស្ពានស្ទឹងមានជ័យ។

លោកវ៉ាវីរៈបានបន្តទៀតថាចំពោះតំបន់ទី១មានភាពទាក់ទាញជាងព្រោះនៅសងខាងផ្លូវភាគច្រើនត្រូវបានគេបើកលក់ជាអាជីវកម្មចំរុះបាននិងមានមនុស្សចរាចរណ៍ឆ្លងកាត់ច្រើនដែលដីនៅតំបន់នេះមានតម្លៃចន្លោះពី៣៥០០ទៅ៤៥០០ដុល្លារក្នុងមួយម៉ែត្រការ៉េ។ដោយឡែកចំពោះតំបន់ទី២ហាក់មិនសូវសម្បូរផ្ទះអាជីវកម្មនោះទេហើយប្រភេទផ្ទះនីមួយៗភាគច្រើនមានប្រវែងខ្លីហើយក៏មានតែមួយជួរព្រោះនៅទល់មុខជារបងសណ្ឋាគារនិងរបងភូមិគ្រឹះ។ដូច្នេះតំបន់ទី២នេះមានតម្លៃទាបជាងតំបន់ទី១ដែលអាចស្ថិតនៅក្នុងចន្លោះពី៣០០០ទៅ៤០០០ដុល្លារក្នុងមួយម៉ែត្រការ៉េ។

យ៉ាងណាក៏ដោយ លោកវ៉ា វីរៈ ក៏បានបញ្ជាក់បន្ថែមថា តម្លៃខាងលើនេះជាតម្លៃនៅលើទីផ្សារនាពេលបច្ចុប្បន្ន ប៉ុន្តែនៅថ្ងៃខាងមុខនេះ អាចនឹងមានការកើនឡើងខ្ពស់ជាងនេះ ព្រោះជាទូទៅតម្លៃដីនៅក្នុងរាជធានីភ្នំពេញ តែងមានការកើនឡើងក្នុងរង្វង់ប្រមាណ១០–១៥ ភាគរយប្រចាំឆ្នាំ៕

ដោយៈលក្ខិណា

ភ្នំពេញៈ អគ្គនាយកក្រុមហ៊ុនដ៏ធំមួយ មានមូលដ្ឋាននៅប្រទេសចិនបានថ្លែងថា រាជធានីភ្នំពេញកំពុងអភិវឌ្ឍទៅមុខដោយឥតឈប់ឈរ រហូតបានក្លាយទៅជាទីពេញចិត្ត និងពេញនិយមបំផុត ក្នុងចំណោមអ្នកទិញនិងវិនិយោគិននៅលើពិភពលោក។

លោកDing Yongjun អគ្គនាយកក្រុមហ៊ុន Morgan Group ដែលកំពុងអភិវឌ្ឍន៍គំរោងខុនដូដ៏ធំនៅតំបន់ជ្រោយចង្វារបានថ្លែងបែបនេះ ក្នុងពិធីបើកបង្ហាញគម្រោងវីឡា លើអាកាសសម្រាប់អភិជនកាលពីថ្ងៃម្សិលម៉ិញថា ជាមួយនឹងការអភិវ​ឌ្ឍជាបន្តបន្ទាប់នៃសេដ្ឋកិច្ចពិភពលោក កម្ពុជាដែលជាតំបន់ខ្ពង់រាបថ្មី សម្រាប់ការអភិវឌ្ឍសេដ្ឋកិច្ចនៅអាស៊ី ក្នុងនៅរយៈពេលប៉ុន្មានឆ្នាំចុងក្រោយនេះ ក៏បានទទួលការចាប់អារម្ម​ណ៍ កាន់តែខ្លាំងឡើ​ងនៅលើពិភពលោក។

លោកបន្តថា “រាជធានីភ្នំពេញមានសក្តានុពលខ្លាំង ក្នុងការអភិវឌ្ឍជាមួយនឹងការកើនឡើងនូវកម្រិតជីវភាពរបស់ប្រជាជន និងបរិស្ថានលំនៅដ្ឋានប្រណីត តាមបែបប្រពៃ​ណីដែលអាចបំពេញតំរូវការរបស់ប្រជាជន សម្រាប់ការតាំងទីលំនៅនិងការរស់នៅខ្ពស់បូករួមនឹងឧបករណ៍បច្ចេកទេសដ៏ល្អឥតខ្ចោះច្រើនសំបូរបែប”។

ដើម្បីឆ្លើយតបទៅនឹងតម្រូវការ របស់ប្រជាជនលំដាប់ថ្នាក់ខ្ពស់ នៅលើពិភពលោកហើយក៏សម្រាប់ភាពជាម្ចាស់លំនៅឋាន ក្នុងភាពថ្លៃថ្នូរ និងបង្កើតអនាគតនៃការរស់នៅថ្មី ក្រុមហ៊ុនMORGAN GROUP បានសិក្សាអស់រយៈពេលជាច្រើនឆ្នាំ ដោយទទួលបានបទពិសោធន៍ ក្នុងការរស់នៅបែបលំដាប់កំពូលនៅអាស៊ីអាគ្នេយ៍ លើមាត់ទន្លេដ៏ល្បីល្បាញលើពិភពលោក ដែលបានបង្កើតស្នាដៃដល់ MORGAN ENMAISON ។

គម្រោងថ្មី GOLDEN SKY វានឹងអាចត្រូវគេរំពឹងថានឹងអាចផ្លាស់ប្តូររបៀបរស់នៅបែបប្រពៃណីនិងបង្កើតស្នាដៃសិល្បៈស្ថាបត្យកម្មដែលអាចបង្ហាញពីគុណតម្លៃគ្មានដែនកំណត់របស់អន្តរជាតិ។

លោកអគ្គនាយកបន្ថែមថា គម្រោងថ្មីរបស់Morganអាចនិយាយបានថា ជាគម្រោ​ងដ៏អស្ចារ្យមួយនៅក្នុងប្រទេសកម្ពុជាដោយវាមានទីតាំងនៅជាប់មាត់ទឹកនៃដងទន្លេមេគង្គក្នុងតំបន់ជ្រោយចង្វារហើយដូចបានដឹងហើយប្រទេសអភិវឌ្ឍន៍ជាច្រើននិយមសាងសង់លំនៅដ្ឋាននិងអាគារខ្ពស់ៗនៅក្បែរមាត់ទឹក។

គម្រោងនេះមានទីតាំងសម្រាប់ចតឧទ្ទម្ភាគចក្រមានទីតាំងសម្រាប់ធុរជនក្នុងការជួបជជែកគ្នាពីការងារមានផ្សារទំនើបនិងលក់ផលិតផលល្បីៗលំដាប់ពិភពលោកផងដែរ។

លោកបណ្ឌិតគីម ហ៊ាង ប្រធានក្រុមហ៊ុនKW Cambodia បានមានប្រសាសន៍ឲ្យដឹងផងដែរថា ការអភិវឌ្ឍអ្វីមួយ អោយតែធ្វើពិតប្រាកដ ច្បាស់លាស់នឹងទទួលបានការគាំទ្រពីអ្នកវិនិយោគ និងសាធារណជន ក៏ប៉ុន្តែសម្រាប់គម្រោង ដែលមិនច្បាស់លាស់ នោះហានិភ័យនៃភាពបរាជ័យនឹងមានខ្ពស់៕

ដោយវុត្ថា

ភ្នំពេញៈ អចលនទ្រព្យនៅក្នុងតំបន់ចោមចៅនឹងកាន់តែមានតម្លៃខ្ពស់បន្ថែមទៀតបន្ទាប់ពីត្រូវបានបញ្ចប់នៃការសាងសង់ស្ពានអាកាសនៅក្នុងតំបន់នេះ។

អគ្គនាយកក្រុមហ៊ុន Century 21 Advanceលោកឡុង គឹមសួគ៌បានប្រាប់គេហទំព័រPropertyarea.asiaកាលពីរសៀលថ្ងៃទី៥ តុលាកន្លងមកថា តំបន់ចោមចៅនាពេលបច្ចុប្បន្ននេះ បាននឹងកំពុងមានការរីកចំរើន ហើយតម្លៃអចលនទ្រព្យនៅក្នុងតំបន់នឹងកាន់តែមានតម្លៃខ្ពស់បបន្ថែមទៀត។

លោកថ្លែងថា “តំបន់ចោមចៅនាពេលបច្ចុប្បន្ននេះ គេកំពុងសាងសង់ស្ពាន  ហើយតំបន់នេះ បាននិងកំពុងមានការរីកចំរើន ដូចទៅនឹងបណ្តាខ័ណ្ឌ មយចំនួន នៅក្នុងទីក្រុងភ្នំពេញដែរ ហើយជាពិសេសតំបន់នេះ រាជរដ្ឋាភិបាលបាននឹងកំពុងមានការអភិវឌ្ឍន៍លើប្រព័ន្ធហេដ្ឋារនាសម្ព័ន្ធ”។

លោកឡុង គឹមសួរបានបន្ថែមថា នៅក្នុងរយៈពេលប្រហែល២ឆ្នាំទៀត នឹងមានការអភិវឌ្ឍន៍កាន់តែខ្លាំង ហើយតំបន់អចលនទ្រព្យវិញក៏មានតម្លៃខ្ពស់ផងដែរ។លោកបញ្ជាក់ទៀតថា “ចំពោះតម្លៃលំនៅឋានសមរម្យ (មួយជាន់) បច្ចុប្បន្ននៅក្នុងតំបន់នេះ ប្រហែល៥ម៉ឺនដុល្លារអាមេរិកឡើងលើ (ចន្លោះពី ៥ម៉ឺន ទៅ ១០ម៉ឺន) ហើយតម្លៃលំនៅឋានអាជីវកម្មមានតម្លៃប្រមាណ១០ម៉ឺន ទៅ១២ ម៉ឺនដុល្លារអាមេរិក”។

លោកស្រី តាំង ហួរ នាយិកាក្រុមហ៊ុន Amatak Property Service  បានឱ្យដឹងដែរថា  តំបន់ចោមចៅនេះ មានការរីកចំរើនយ៉ាងខ្លាំង ដោយមានទាំងគម្រោងបុរី លំនៅឋាន និងលំនៅឋានពាណិជ្ជកម្ម  ហើយបានជំរុញឱ្យអចលនទ្រព្យ នៅក្នុងតំបន់កាន់តែមានតម្លៃខ្ពស់ពីមួយឆ្នាំទៅមួយឆ្នាំ។

លោកស្រីបន្ថែមថា “គេទៅទិញឬវិនិយោគនៅក្នុងតំបន់នេះ ដោយមើលឃើញពីសក្តានុពលខ្ពស់ទំាងសេដ្ឋកិច្ច និងហេដ្ឋារចនាសម្ព័ន្ធ”។

លោកស្រីបន្ថែមថា បច្ចុប្បន្ននេះ រដ្ឋាភិបាលកំពុងសាងសង់ស្ពានអាកាស និងហេ ដ្ឋារនាសម្ព័ន្ធសំខាន់ៗជាច្រើន នៅក្នុងតំបន់នេះ ដែលជំរុញឱ្យអចលនទ្រព្យកាន់តែមានតម្លៃខ្ពស់បន្ថែមទៀតនាពេលខាងមុខ។

លោកស្រីតាំង ហួរបានបញ្ជាក់ទៀតថា បើយើងឃើញជាក់ស្តែង ពីតំបន់ចោមចៅទៅកាន់ផ្លូវជាតិលេខ៣ និងផ្លូវជាតិលេខ៤ មានគម្រោងអភិវឌ្ឍនបុរី បណ្តុំលំនៅឋាន និង លំនៅឋានពាណិជ្ជកម្មជាច្រើន ស្របពេលដែលរាជរដ្ឋាភិបាល បាននិងកំពុងពង្រីកហេ ដ្ឋារនាសម្ព័ន្ធឱ្យកាន់តែល្អប្រសើរ៕