ដោយ ៖ រ៉ាណេត

ភ្នំពេញ ៖ រដ្ឋាភិបាលកម្ពុជា តាមរយៈក្រសួងសាធារណៈការ និងដឹកជញ្ជូន បាន និងបន្តអនុវត្តនូវផែនការមេតភ្ជាប់អាស៊ានឆ្នាំ២០២៥ និងផ្តោតសំខាន់ទៅកិច្ចសហប្រតិបត្តិការលើវិស័យដែលមានសក្ដានុពល រួមជាមួយនឹងការអភិវឌ្ឍផ្នែកធនធានមនុស្ស។

គណៈប្រតិភូក្រសួងសាធារណការ និងដឹកជញ្ជូន ដែលដឹកនាំដោយលោក ឡេង ធនយុទ្ធា រដ្ឋលេខាធិការក្រសួងសាធារណៈការ និងដឹកជញ្ជូន នៅថ្ងៃទី៣១ ខែសីហា ឆ្នាំ២០២០ បានចូលរួមសន្និសិទស្តីពីការតភ្ជាប់អាស៊ានលើកទី១១ តាមរយៈវីដេអូពីចម្ងាយទាក់ទងនឹងការពង្រឹងសាមគ្គីភាព និងការតភ្ជាប់ហេដ្ឋារចនាសម្ព័ន្ធ និងការអភិវឌ្ឍធនធានមនុស្ស សំដៅការតភ្ជាប់កម្ពុជា-អាស៊ានឆ្នាំ២០២៥។

លោក ឡេង ធនយុទ្ធា បានឱ្យដឹងថា សន្និសីទនេះបានផ្តោតជាសំខាន់លើមធ្យោបាយនៃការពង្រឹងហេដ្ឋារចនាសម្ព័ន្ធក្នុងតំបន់អាស៊ានឱ្យកាន់តែមាននិរន្តរភាព ការអនុម័តលើការប្រើប្រាស់ប្រព័ន្ធឌីជីថលដើម្បីឆ្លើយតបទៅនឹងមេរោគ Covid-19 និងមធ្យោបាយដែលធ្វើឱ្យអ្នកជំនាន់ក្រោយរបស់អាស៊ានអាចត្រៀមខ្លួនបានល្អក្នុងការឆ្លើយតបទៅនឹងវិបត្តិនានាតាមរយៈការវិនិយោគលើធនធានមនុស្ស។

សន្និសីទស្ដីពីការតភ្ជាប់អាស៊ាននេះ គឺជាព្រឹត្តិការណ៍ប្រចាំឆ្នាំដែលចាប់ផ្ដើមតាំងពី ឆ្នាំ២០១០ ដោយសារបញ្ហាមេរោគកូវីដ-១៩ សន្និសីទលើកទី១១នេះត្រូវធ្វើឡើងតាមរយៈវីដេអូពីចម្ងាយ ដើម្បីបន្តវេទិការបស់ខ្លួនសម្រាប់ភាគីពាក់ព័ន្ធដើម្បីអនុវត្តផែនការមេតភ្ជាប់អាស៊ានឆ្នាំ២០២៥ និង កំណត់វិស័យសហប្រតិបត្តិការដែលមានសក្ដានុពលរបស់ខ្លួនសំដៅឱ្យការអនុវត្តផែនការមេតភ្ជាប់ អាស៊ានឆ្នាំ២០២៥កាន់តែប្រសើរឡើង។

អង្គសន្និសីទស្តីពីការតភ្ជាប់អាស៊ានលើកទី១១ នេះ មានលោក Tran Duc Binh ជាប្រធានគណៈកម្មាធិការសម្របសម្រួលការភ្ជាប់អាស៊ាន (Chair of the ASEAN Connectivity Coordinating Committee) ដោយមានការចូលរួមពីមន្ត្រីជំនាញនៃប្រទេសដែលជាសមាជិកអាស៊ានទាំងអស់៕

ដោយ ៖ រ៉ាណេត

ភ្នំពេញ ៖ នៅក្នុងចំណោមគម្រោងអភិវឌ្ឍន៍លំនៅដ្ឋានជាច្រើនដែលកំពុងសម្រុកសាងសង់នៅក្នុងតំបន់ព្រែកព្នៅនៅពេលបច្ចុប្បន្ននេះ បុរី KC បានក្លាយទៅជាគម្រោងដែលទទួលបានការចាប់អារម្មណ៍យ៉ាងច្រើនពីសំណាក់អតិថិជន ដែលក្រៅពីមានតម្លៃសមរម្យ ថែមទាំងផ្តល់នូវលក្ខខណ្ឌបង់ប្រាក់យ៉ាងងាយស្រួលទៀតផង។

សម្រាប់តែតំបន់ព្រែកព្នៅដែលស្ថិតនៅប៉ែកខាងជើងរាជធានីភ្នំពេញ បច្ចុប្បន្ននេះមានគម្រោងអភិវឌ្ឍន៍លំនៅដ្ឋានតូចធំមិនក្រោម២០ទីតាំងនោះដែលកំពុងដំណើរការសាងសង់ដើម្បីបំពេញតម្រូវការទីផ្សាររបស់ខ្លួន និងបានជួយកែប្រែតំបន់ជាយក្រុងមួយនេះក្លាយទៅជាបណ្តុំលំនៅដ្ឋានបែបទាន់សម័យស្របពេលដែលវិស័យហេដ្ឋារចនាសម្ព័ន្ធរបស់រដ្ឋាភិបាលដូចជាផ្លូវថ្នល់បានបញ្ចប់ការអភិវឌ្ឍន៍ជាច្រើន។

តាមការឱ្យដឹងពីបុគ្គលិកផ្នែកលក់គម្រោងបុរី KC ដែលកំពុងពន្លឿនការសាងសង់ និងទទួលបានការចាប់អារម្មណ៍ពីសំណាក់អតិថិជនយ៉ាងច្រើន កញ្ញា ឡេង ម៉ាឡា បានបញ្ជាក់ថា ខណ្ឌព្រែកព្នៅពេលនេះ បានក្លាយទៅជាគោលដៅវិនិយោគ និងអភិវឌ្ឍន៍លំនៅដ្ឋានតម្លៃសមរម្យមិនចាញ់តំបន់ភាគខាងលិចរាជធានីភ្នំពេញនោះឡើយ។

កញ្ញាបានបញ្ជាក់ថា “តាមខ្ញុំដឹង ពេលនេះមានគម្រោងតូចធំដែលសាងសង់លំនៅដ្ឋានមិនតិចជាង២០គម្រោងនោះទេ ហើយតម្លៃក៏មានភាពខុសគ្នាផងដែរ អាស្រ័យទៅតាមទីតាំង និងម៉ូដផ្ទះនៅក្នុងគម្រោង”។ កញ្ញាបន្តថា “យ៉ាងយូរ ត្រឹម១ឆ្នាំ ឬ២ឆ្នាំទៀត តំបន់ព្រែកព្នៅអាចនឹងក្លាយទៅជាក្រុងថ្មីមួយទៀតចំណុះឱ្យរាជធានីភ្នំពេញ ដោយសារតែកំណើនប្រជាជនមករស់នៅកាន់តែច្រើន ហើយហេដ្ឋារចនាសម្ព័ន្ធនានាដូចជាអគារពាណិជ្ជកម្ម ផ្លូវថ្នល់សំខាន់ៗមានច្រើនខ្សែ ងាយស្រួលក្នុងក្នុងធ្វើដំណើរចេញចូលក្រុង និងចេញទៅតាមបណ្តាខេត្តផ្សេងៗ”។

លំនៅដ្ឋានក្នុងបុរី KC បានផ្តល់នូវអត្ថប្រយោជន៍ជាច្រើនដល់អតិថិជនរបស់ខ្លួន ដែលក្រៅពីមានតម្លៃសមរម្យ ថែមទាំងផ្តល់ជូននូវលក្ខខណ្ឌបង់ប្រាក់ងាយស្រួល ជាពិសេសអតិថិជនបង់ប្រាក់លើកដំបូងត្រឹមតែ ១០០០ដុល្លារ នឹងក្លាយជាម្ចាស់លំនៅដ្ឋានក្នុងបុរីស្របច្បាប់។

បុរីខេ ស៊ី អំណោយផលដល់ការរស់នៅ និងប្រកអាជីវកម្មគ្រប់ប្រភេទ ដោយសារតែស្ថិតនៅជាប់ផ្លូវធំទំហំ៣០ម៉ែត្រ ជាផ្លូវតភ្ជាប់រវាងផ្លូវជាតិលេខ៥និងមហាវិថី ឈ្នះ ឈ្នះ នៃទីក្រុងមរតកសម្ដេចតេជោ ឆ្ពោះទៅកាន់ផ្លូវជាតិលេខ៤។ បន្ថែមពីនេះ ទីតាំងរបស់បុរី ខេ ស៊ី មានហ៊ុព័ទ្ធទៅដោយទីប្រជុំជនជាច្រើន ដូចជា ខាងក្រោយមានផ្សារព្រែកព្នៅចាស់ នៅខាងមុខជាប់ផ្លូវ មានផ្សារព្រែកព្នៅ សាលារៀនរដ្ឋ និងឯកជន មណ្ឌលសុខភាព គ្លីនិកឯកជន និងបណ្តាញហេដ្ឋារចនាសម្ព័ន្ធផ្លូវថ្នល់ខ្វាត់ខ្វែងជាច្រើន បន្ថែមដោយគម្រោងអភិវឌ្ឍបឹងតាម៉ោក និងតំបន់អភិវឌ្ឍរមណីយដ្ឋានគំរូ នៅតំបន់ជាយក្រុងនៃភ្នំប្រសិទ្ធិ ដែលជាគម្រោងអាទិភាពរបស់រដ្ឋបាលរាជធានីភ្នំពេញផងដែរ។

លំនៅដ្ឋាននៅក្នុង ខេស៊ី ត្រូវបានសាងសង់ឡើងជា៣ប្រភេទ រួមមានប្រភេទ Link House, Shop House និងប្រភេទ Twin Villa ដែលសុទ្ធតែសមស្របទៅនឹងការរស់នៅដែលពោរពេញទៅដោយផាសុកភាពខ្ពស់ទាំងអស់។
សម្រាប់ព័ត៌មានបន្ថែម លោកអ្នកអាចទំនាក់ទំនងបានតាមរយៈទូរស័ព្ទលេខ ៖ ០៩៣ ៦៦១ ១៥០ / ០១៦ ៧៣ ១៦ ៦១ / ០៨៩ ៧៨ ៧៧ ២១៕

ដោយវុត្ថា

ភ្នំពេញ៖ អភិបាលខេត្តព្រះសីហនុអះអាងថា កំពង់ផែទឹកជ្រៅក្រុងព្រះសីហនុ ក្រោមកិច្ចសហប្រតិបត្តិការសាងសាង់ជាមួយប្រទេសជប៉ុន (JICA) អាចស្រូបយកទំនិញនាំចេញ-នាំចូលក្នុងប្រទេស ៧០ភាគរយ ខណៈបច្ចុប្បន្ននេះ កំពុងសាងសង់ដំណាក់កាលទី១ និងទី២ ។

លោក គួច ចំរើន អភិបាលខេត្តព្រះសីហនុ នៅក្នុងជំនួបពិភាក្សាការងារជាមួយ គណៈកម្មការទី៣ថ្ងៃទី៣១នៃព្រឹទ្ធសភា នៅថ្ងៃទី៣១ ខែសីហា ឆ្នាំ២០២០ថ្លែងថាកម្ពុជា កំពុងដំណើការកសាងកំពង់ផែដំណាក់កាលទី១ និងទី២ ចាប់ពីឆ្នាំ២០២០ ដល់ ២០២៥ មានជម្រៅទឹក១៣ ម៉ែត្រ។ ការជម្រុញរបស់រាជ រដ្ឋាភិបាលកម្ពុជា កសាងកំពង់ផែជំហានទី៣ និងទី៤បន្តទៀត ២០២៦ ដល់២០២៨ មានលទ្ធភាពឲ្យនាវាជម្រៅទឹក ១៥ម៉ែត្រចូលចតបាន ធ្វើឲ្យតម្លៃដឹកជញ្ជូនមានការធ្លាក់ចុះ។

លោកបន្តថា ក្រៅពីនេះ ខេត្តព្រះសីហនុ មានព្រលានយន្តហោះអន្តរជាតិដែលមានកិច្ចសហប្រតិបត្តិការជាមួយក្រុមហ៊ុនបារាំងពង្រីកផ្លូវហោះហើរ ហើយនៅឆ្នាំ២០២១ និង២០២២ អាចឲ្យយន្តហោះដែលមានកៅអី ៣ជួរ ចុះចតបាន និងមានផ្លូវរត់រហូតដល់ ៣,២០០ម៉ែត្រ ។

លោក គួច ចំរើនបន្តថា សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជាដាក់ចេញនូវគោលនយោបាយ២ ទី១ “ស្លឹកត្នោត ខ្ចប់ស្ករត្នោត” ដោយប្រគល់ភារកិច្ចជូនលោក ជា សុផារ៉ា ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដីនគរូបនីយកម្ម និងសំណង់ ជាអ្នកដឹកនាំកសាងផ្លូវ៣៤ខ្សែ មានប្រវែង ៨២,៥៧៤ម៉ែត្រ និងស្ពានថ្មីចំនួន៥ រង្វង់មូល០៣ ក្នុងក្រុងព្រះសីហនុ កំពុងកសាងដាក់ឲ្យប្រើប្រាស់នូវប្រព័ន្ធលូ និងរៀបចំខឿន ផ្លូវថ្មើរជើង ផ្លូវជិះកង់ និងការដាំដើមឈើ ភ្លើងបំភ្លឺផ្លូវ ដាក់កាំម៉ារ៉ាសុវត្ថិភាព អ៊ុតបេទីម និងគំនូសចរាចរណ៍ ។

លោកបន្ថែមថា បច្ចុប្បន្នខេត្តកំពុងកសាងអាងប្រព្រឹត្តកម្មទឹកកខ្វក់ចំនួន២ សម្រេចបាន ២០ភាគរយ និងជម្រុញឲ្យហើយនៅចុងឆ្នាំ២០២០ខាងមុខដើម្បីកាត់បន្ថយទឹកកខ្វក់ហូរចូលសមុទ្រ ។ ទន្ទឹមនោះផងដែរ គណៈកម្មការឆ្នេររៀបចំសាងសង់បង្គន់អនាម័យនៅតាមតំបន់ឆ្នេរចំនួន ១៥ ទៅ ១៦កន្លែង មានឆ្នេរប្រវែង ១៥គីឡូម៉ែត្រ ចាប់ពីឆ្នេរជ័យជំនះរហូតដល់ឆ្នេរជំទាវម៉ៅ ដើម្បីបំរើឲ្យភ្ញៀវទេសចរ ។

ទី២ សម្តេចតេជោ បានបញ្ចេញកញ្ចប់ថវិការសន្សំរបស់រាជរដ្ឋាភិបាលចំនួន ១០០លានដុល្លា ប្រគល់ជូន លោក អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុ និងលោក ស៊ុន ចាន់ថុល ទេសរដ្ឋមន្ដ្រី រដ្ឋមន្ត្រីក្រសួងសាធារណការ និងដឹកជញ្ជូន អនុវត្តគម្រោងស្ថាបនាផ្លូវចំនួន១១ខ្សែ សម្រេចបានប្រមាណ១០ភាគរយ និងការស្តារអូរប្រឡាយធម្មជាតិមានប្រវែងសរុប១១.០៨៧ម៉ែត្រសម្រេចបានជាង៧០ភាគរយ។

តាមគោលនយោបាយ ខេត្តព្រះសីហនុ ជាតំបន់សេដ្ឋកិច្ចពិសេសគំរូពហុបំណង និងជាតារារះនាទិសនារតី ផ្អែកលើសក្តានុពលធម្មជាតិ ខេត្តមានឆ្នេរសរស្អាតក្នុងការទាក់ទាញភ្ញៀវទេសចរ ផ្តើមចេញពីសក្តានុពលខេត្តមានផ្លូវជាតិលេខ៤ តភ្ជាប់ទៅរាជធានីភ្នំពេញ ទទួលបានប្រជាប្រិយជាបន្ត បន្ទាប់ ជំរុញដំណើរការកសាងនិងអភិវឌ្ឍសង្គមជាតិ ៕

ដោយវុត្ថា

ភ្នំពេញ៖ អ្នកនាំពាក្យក្រសួងពាណិជ្ជកម្ម បានអះអាងថាកិច្ចព្រមព្រៀងពាណិជ្ជកម្មសេរីកម្ពុជា-ចិនមិនទាន់ចូលជាធរមាននៅឡើយទេ បើទោះបីភាគីទាំងពីរបានប្រកាសបញ្ចប់ជាផ្លូវការយ៉ាងណាក្តី ខណៈការចុះហត្ថលេខាជាផ្លូវការរវាងភាគីទាំងពីរមិនទាន់បានកំណត់ពេលវេលាជាក់លាក់។

អ្នកនាំពាក្យក្រសួងពាណិជ្ជកម្ម លោក ស៊ាង ថៃ បានប្រាប់គេហទំព័រ propertyarea.asia នៅថ្ងៃទី ៣១ ខែសីហា ឆ្នាំ ២០២០នេះ ឱ្យដឹងថា ក្រសួងពាណិជ្ជកម្មបានទទួលការណែនាំ និង ភារកិច្ចក្នុងការចចារជាមួយភាគីចិនបានបញ្ចប់កិច្ចព្រមព្រៀងពាណិជ្ជកម្មសេរីកម្ពុជា-ចិនជាផ្លូវវការកាលពីកន្លងមកនេះ និងត្រៀមសម្រាប់តែចុះហត្ថលេខាដ៏ខ្លីនៅពេលខាងមុខ។

លោកបន្តថា “តែសម្រាប់ការរៀបចំគណៈប្រតិភូជាន់ខ្ពស់ដែលមានសម្តេចតេជោ ហ៊ុន សែន ទៅកាន់ប្រទេសចិន ដើម្បីចុះហត្ថលេខាលើកិច្ចព្រមព្រៀងនេះ មិនមែនភារកិច្ចរបស់ក្រសួងពាណិជ្ជកម្មនោះទេ “។ លោកបញ្ជាក់ថា “ភារកិច្ចនេះ អាចជាខុទ្ធការល័យរបស់សម្តេច ឬ ក្រសួងការបរទេស សហប្រតិបត្តិការអន្តរជាតិ ខណៈក្រសួងពាណិជ្ជកម្ម កំពុងតែត្រៀមខ្លួនដែរក្នុងការចូលរួម”។

លោកបន្ថែមថា “សម្រាប់ក្រសួងពាណិជ្ជកម្មកំពុងតែត្រៀមខ្លួន និងឯកសារផ្សេងៗ រងចាំ គណៈប្រតិភូកម្ពុជាទៅចុះហត្ថលេខាជាមួយភាគីចិនតែប៉ុណ្ណោះ ហើយអ្វីដែលប្រកាសកាលពីកន្លងមកនេះ ចំពោះកិច្ចព្រមព្រៀងពាណិជ្ជកម្មកម្ពុជា-ចិននេះ មិនទាន់ចូលជាធរមាននៅឡើយទេ ដោយរងចាំងនិតិវិធី និងការឯកភាពពីរដ្ឋសភា ព្រឹត្តិសភា និង ឡាយព្រះហស្ថលេខាដាក់ឱ្យប្រើប្រាស់ ទើបកិច្ចព្រមព្រៀងនេះ ចូលជាធរមាន”។

បើតាមអ្នកនាំពាក្យរូបនេះ បញ្ជាក់ថា តាមផែនការរបស់រដ្ឋាភិបាលគ្រោងនឹងដាក់ឱ្យដំណើរការនៅក្នុងថ្ងៃទី ១ ខែមករា ឆ្នាំ ២០២១ ខាងមុខនេះ តែយ៉ាងណា អាស្រ័យលើការរៀបចំនិតិវិធី និងការអនុម័តពីរដ្ឋសភា និងព្រឹទ្ធិសភា និងចុះព្រះហត្ថលេខាពីព្រះពីមហាក្សត្រ។

លោកបន្ថែមថា “ប្រទេសនីមួយៗ ធ្វើទៅតាមនិតិវិធីផ្ទៃក្នុងតាមរយៈការបញ្ជូនទៅរដ្ឋសភា ព្រឹទ្ធសភាជាដើម ដែលជាហេតុអាចនឹងប្រើប្រាស់ពេលវេលាយូជាងនេះ បន្ថែមពីនេះ ក៏អាចថាបាន តែ តាមផែនការរបស់យើងនឹងដាក់ឱ្យដំណើរការនៅថ្ងៃទី ១ ខែមករា ឆ្នាំ ២០២០ ខាងមុខនេះ”។

លោកពន្យល់ថា កិច្ចព្រមព្រៀងនីមួយៗ មាននិតិវិធីតាមប្រភេទរបស់វា សម្រាប់កិច្ចព្រមព្រៀងតូចតាច គ្រាន់តែចុះហត្ថលេខារួចហើយ វានឹងចូលជាធរមានភ្លាមៗ តែសម្រាប់កិច្ចព្រមព្រៀងធំៗបែបនេះ (កិច្ចព្រមពាណិជ្ជកម្មសេរីកម្ពុជា-ចិន) នឹងត្រូវឆ្លងកាត់រដ្ឋសភា និងព្រឹទ្ធសភា ទើបអាចចូលជាធរមាន និងផ្លូវការ ៕

ដោយវុត្ថា

ភ្នំពេញៈទំហំពាណិជ្ជកម្មនៃការនាំចេញ និងនាំចូលរបស់កម្ពុជារហូតមកដល់ពេលនេះ នៅតែដំណើរការ និងមានភាពវិជ្ជមាន បើទោះបីកម្ពុជា ប្រឈមទៅនឹងវិបត្តិសេដ្ឋកិច្ចសកល និងមានរោងចក្រសហគ្រាសមួយចំនួន បានប្រកាសពីការព្យួការ និងបិទទ្វាយ៉ាងណាក្តី។

អ្នកនាំពាក្យក្រសួងពាណិជ្ជកម្ម លោកស៊ាង ថៃបានប្រាប់គេហទំព័រ Propertyarea.asia នៅថ្ងៃទី ៣១ ខែសីហា ឆ្នាំ ២០២០នេះឱ្យដឹងថា តាមតួរលេខនៃការនាំចូល-នាំចូលរបស់កម្ពុជា ដែលបានផ្សព្វផ្សាយកន្លងមកថ្មីៗនេះ គឺមិនមានអ្វីទទួលរងផលប៉ះពាល់ និងជាឧបសគ្គនោះទេ បើទោះប្រឈមទៅនឹងជំងឺ Covid-19។

លោកបន្តថា “ចាប់តាំងពីខែមករា រហូតដល់ខែមិថុនា ឆ្នាំ២០២០កន្លងមកនេះ  ទំ ហំ ពាណិជ្ជកម្មនាំចេញ-នាំចូលរបស់កម្ពុជាទទួលបាន១៦,៥ ពាន់លានដុល្លារអាមេរិក  ខណៈក្នុងរយៈពេល ខែកក្កដាខែសីហានេះ មានចំនួន១៦,៨ ពាន់លានដុល្លារអាមេរិក”។

លោកបន្ថែមថា ដោយឡែក នៅក្នុងឆ្នាំ២០១៩ ពីខែមករា ដល់ខែ មិថុនា ឆ្នាំ ២០២០ ការនាំចេញរបស់កម្ពុជាមានចំនួន៦៦៩០ លានដុល្លារអាមេរិក ខណៈរយៈពេលដូចគ្នានៃឆ្នាំ ២០២០នេះ មានចំនួន៧៧១៧ លានដុល្លារអាមេរិក ពោលគឺកើនឡើជាង ១០០០លានដុល្លារអាមេរិក។

លោកបញ្ជាក់ទៀតថា “បើទោះបីកម្ពុជាបានប្រកាសថា មានរោងចក្រមួយចំនួន បានប្រកាសពីការព្យួរការងារ និងបិទទ្វារដែលបង្កឡើង និងងផលប៉ះពាល់ពីជំងឺ Covid-19ក៏ដោយ ក៏ការនាំចេញនូវផលិតផលផ្សេងទៀតរបស់កម្ពុជា នៅតែមានសញ្ញាវិជ្ជមាន និងកំណើន”៕