គម្រោងអភិវឌ្ឍន៍តំបន់ឆ្នេរកម្សាន្តទំហំ ២០០ហិកតា ក្នុងខេត្តកំពតចាប់ផ្តើមដំណើរការសាងសង់ហើយ

ដោយ ៖ រ៉ាណេត

កំពត ៖ គម្រោងអភិវឌ្ឍន៍មណ្ឌលកម្សាន្តនៅតាមតំបន់ឆ្នេរដែលមានទំហំរហូតដល់២០០ហិកតា ក្រោមការបណ្តាក់ទុនវិនិយោគពីសំណាក់ក្រុមហ៊ុនឯកជនក្នុងស្រុក ស្ថិតនៅក្នុងស្រុកទឹកឈូ ខេត្តកំពត បានចាប់ផ្តើមអនុវត្តជាជំហានដំបូងហើយ ខណៈដែលរដ្ឋបាលខេត្តកំពុងរៀបចំបង្កើតសេចក្ដីព្រាងបង្កើតគណៈកម្មការ និងអនុគណៈកម្មកាដើម្បីគ្រប់គ្រងគម្រោងអភិវឌ្ឍន៍នេះ។

តាមរយៈប្រធានមន្ទីរទេសចរណ៍ខេត្តកំពត លោក សយ ស៊ីណុល បានបង្ហើបប្រាប់នៅរសៀលថ្ងៃទី១ ខែសីហា ឆ្នាំ២០២០នេះ ថា គម្រោងអភិវឌ្ឍន៍បង្កើតមណ្ឌលកម្សាន្តលក្ខណៈធម្មជាតិនៃតំបន់ឆ្នេរ (ឆ្នេរមាស) ដ៏ធំដែលមានទំហំដីសរុបប្រមាណ ២០០ហិកតា នៅភូមិទទឹងថ្ងៃ និងភូមិកែបថ្មី ឃុំបឹងទូក ស្រុកទឹកឈូ ខេត្តកំពត ក្រោមការវិនិយោគរបស់ក្រុមហ៊ុន IBG (Cambodia) Co,.Ltd បានចាប់ដំណើរការសាងសង់ក្នុងជំហានដំបូង។

លោក សយ ស៊ីណុល បានបន្តថា “ពេលនេះបើតាមខ្ញុំដឹង ខាងក្រោមហ៊ុនចាប់ចាប់ផ្តើមដំណើរការសាងសង់ក្នុងដំណាក់ដំបូង ដោយធ្វើការឈូសឆាយពង្រីកផ្លូវសម្រាប់ជួយសម្រួលដល់ការដឹកជញ្ជូនដីទៅចាក់បំពេញ និងឈូសឆាយដីវាលពង្រាបជាដើម ដើម្បីបង្កើតជាមណ្ឌលទេសចរណ៍លំដាប់ខ្ពស់ និងមានវិសាលភាពធំធេងប្រចាំនៅក្នុងស្រុកទឹកឈូរហូតដល់ប្រមាណ២០០ហិកតា”។

ជាគ្នានេះផងដែរ លោកបានបង្ហើបប្រាប់ផងដែរថា រហូតមកដល់ពេលបច្ចុប្បន្ននេះ គម្រោងវិនិយោគ និងអភិវឌ្ឍន៍ជាតំបន់ទេសចរធម្មជាតិកម្រិតខ្ពស់ក្រោមការចូលរួមពីសំណាក់ឯកជននៅក្នុងខេត្តកំពតមានចំនួន៨គម្រោងរួចមកហើយ ដែលចំនួននេះមិនបានរាប់បញ្ចូលពីគម្រោងបង្កើតតំបន់លំហែរខ្នាតតូចដែលស្ថិតនៅតាមតំបន់មាត់ព្រែកនោះឡើយ។

ខេត្តកំពតនាពេលបច្ចុប្បន្ននេះ មិនទាន់មានឆ្នេរដូចបណ្តាខេត្តដែលនៅជាប់មាត់សមុទ្រមួយចំនួនរបស់កម្ពុជានោះទេ ហើយទីតំាងឆ្នេរដែលបាននឹងកំពុងរៀបចំនេះ ស្ថិតនៅមិនឆ្ងាយពីទីរួមខេត្ត និងនៅជិតរមណីយដ្ឋានភ្នំបូកគោ ព្រមទាំងនៅមិនឆ្ងាយពីរមណីយដ្ឋានទឹកឈូនោះទេ ពោលគឺមានទីតំាងល្អសម្រាប់ភ្ញៀវទេសចរមកកំសាន្ត។ នៅពេលភ្ញៀវទេសចរមកលេងនៅក្នុងតំបន់ឆ្នេរនេះកាន់តែច្រើន នឹងផ្តល់ចំណូលដល់ពលរដ្ឋមូលដ្ឋានឱ្យមានការរីកចំរើន ហើយម្យ៉ាងវិស័យទេសចរណ៍ បានចូលរួមនៅក្នុងកំណើនសេដ្ឋកិច្ចជាតិយ៉ាងសំខាន់ តាមរយៈការផ្តល់ឱកាសការងារជូនពលរដ្ឋ និងសហគមន៍ទេសចរណ៍ នៅក្នុងមូលដ្ឋានបានកាត់តែច្រើន៕

គម្រោងផ្លូវ Asean Highway 1 របស់កម្ពុជាសម្រេចបានជាង ៤២ ភាគរយ

ដោយ ៖ វុត្ថា

ភ្នំពេញ ៖ គិតត្រឹមខែសីហា ឆ្នាំ២០២០ គម្រោងធ្វើឱ្យប្រសើរឡើងវិញកំណាត់ផ្លូវជាតិលេខ ៥ ឬ ផ្លូវ Asean Highway 1 របស់កម្ពុជា សម្រេចបានប្រមាណ ៤២,៩៩ភាគយហើយ ខណៈបច្ចុប្បន្នកំពុងពន្លឿងការសាងសង់ឱ្យចប់តាមផែនការ។

ក្រសួងសាធារណការ និងដឹកជញ្ជូននៅថ្ងៃទី១ ខែកញ្ញា ឆ្នាំ ២០២០នេះ បានឱ្យដឹងថា គម្រោងធ្វើឱ្យប្រសើរឡើងវិញកំណាត់ផ្លូវជាតិលេខ ៥ មានប្រវែងសរុបចំនួន ៣៦៦ គីឡូម៉ែត្រ ដោយឆ្លងកាត់ខេត្តកំពង់ឆ្នាំង ពោធិ៍សាត់ បាត់ដំបង និងបន្ទាយមានជ័យ។

គម្រោងនេះត្រូវបានបែងចែកជា បីផ្នែកធំៗរួមមាន៖ ផ្នែកខាងជើង(បាត់ដំបង-សិរីសោភ័ណ) មានប្រវែងសរុប ៨៤,៧៤ គីឡូម៉ែត្រ ផ្នែកកណ្តាល(ធ្លាម្អម-បាត់ដំបង) មានប្រវែងសរុប ១៤៦,០៤គីឡូម៉ែត្រ និងផ្នែកភាគខាងត្បូង(ព្រែកក្តាម ខេត្តកណ្តាល-ធ្លាម្អម ខេត្តពោធិ៍សាត់) មានប្រវែងសរុប ១៣៥,២៤គីឡូម៉ែត្រ ដោយមានការពង្រីកកំណាត់ផ្លូវជាតិមានស្រាប់ពី២គន្លងទៅ៤គន្លង ទទឹង២៣ម៉ែត្រ ជាប្រភេទផ្លូវបេតុងកៅស៊ូ (AC) និងមានសួនច្បារចំកណ្តាល។

កំណាត់ផ្លូវជាតិលេខ៥ មានសារៈសំខាន់ណាស់សម្រាប់ការដឹកជញ្ជូននៅក្នុងស្រុក ក៏ដូចជាការតភ្ជាប់វិស័យដឹកជញ្ជូនក្នុងបណ្ដាប្រទេសជាសមាជិកអាស៊ាន និងមហាអនុតំបន់មេគង្គ ហើយក៏ត្រូវបានចាត់ទុកថាជាផ្នែកមួយនៃអាស៊ានហាយវ៉េលេខ ១(Asean Highway 1) ប្រចាំតំបន់អាស៊ីអាគ្នេយ៍ផងដែរ។

គម្រោងធ្វើឱ្យប្រសើរឡើងផ្លូវជាតិលេខ៥ នេះ តភ្ជាប់រាជធានីភ្នំពេញទៅតំបន់ជាយដែនប៉ែកខាងលិចប្រទេស លាតសន្ធឹងកាត់ខេត្តកំពង់ឆ្នាំង ពោធិ៍សាត់ បាត់ដំបង និងបន្ទាយមានជ័យ ដែលត្រូវចំណាយទឹកប្រាក់ប្រមាណ ៥00 លានដុល្លារអាមេរិក ក្រោមកម្ចីឥណទានពីរដ្ឋាភិបាលជប៉ុន៕

អ្នកអភិវឌ្ឍន៍នៅតែមានសុទិដ្ឋិនិយមចំពោះទីផ្សារលំនៅដ្ឋាននៅតំបន់ជាយក្រុង

ដោយ ៖ រ៉ាណេត

ភ្នំពេញ ៖ ការគំរាមកំហែងពីវិបត្តិនៃជំងឺឆ្លងនៅពេលបច្ចុប្បន្ននេះ វាមិនមែនជាឧបសគ្គ និងធ្វើឱ្យទីផ្សារលំនៅដ្ឋានតម្លៃសមរម្យនៅកម្ពុជាទ្រុឌទ្រោមនោះឡើយ ផ្ទុយទៅវិញតម្រូវការលំនៅដ្ឋានជាក់ស្ដែងនៅតែបន្តមាន ខណៈដែលក្រុមហ៊ុនអភិវឌ្ឍន៍ជាច្រើនកំពុងមមាញឹកសាងសង់ ដើម្បីដាក់បញ្ចូលទៅក្នុងទីផ្សារ។

អគ្គនាយកក្រុមហ៊ុន PREMIUM GROUP លោក ម៉ាន់ ចាន់ឌី ដែលជាអ្នកអភិវឌ្ឍន៍ក្នុងវិស័យលំនៅដ្ឋានមួយរូប នៅព្រឹកថ្ងៃទី១ ខែកញ្ញា ឆ្នាំ២០២០នេះបានបង្ហាញពីភាពសុទិដ្ឋិនិយមចំពោះទីផ្សារលំនៅដ្ឋាននាពេលបច្ចុប្បន្ន ក៏ដូចជាបន្តទៅថ្ងៃអនាគតដែលតម្រូវការទីផ្សារនៅតែបន្តមាន ជាក់ស្ដែងត្រឹមតែតំបន់ទំនប់កប់ស្រូវដែលស្ថិតនៅជាយក្រុងមានគម្រោងសាងសង់មិនក្រោម១០គម្រោងនោះទេ ដែលមានចំនួនលំនៅដ្ឋានជិត១០០០ខ្នង។

តាមរយៈទូរស័ព្ទ លោកបានមានប្រសាសន៍ថា “មិនថាពេលនេះ ឬបន្តទៅថ្ងៃខាងមុខនោះទេ វិស័យលំនៅដ្ឋាននៅតាមតំបន់ជាយក្រុងនៅតែមានតម្រូវការ ដោយសារតែកំណើនប្រជាជនចូលមករស់នៅរាជធានីភ្នំពេញកាន់តែកើនឡើងជាលំដាប់ ជាក់ស្ដែងនិយាយត្រឹមតែវត្តមានរបស់និស្សិតដែលមកពីតាមបណ្តាខេត្តនានា ដើម្បីសិក្សាបន្ត និងបម្រើការងារមានរហូតជិតដល់៥ម៉ឺននាក់ក្នុងមួយឆ្នាំ”។

លោកបានបន្តទៀតថា “កំណើននៃចំនួននិស្សិត លំហូរនៃចំនួនប្រជាជនចំណូលថ្មីមកកាន់រាជធានីភ្នំពេញសុទ្ធតែមានតម្រូវការស្នាក់នៅ ខណៈដែលកំណើននៃចំនួនសំណង់លំនៅដ្ឋាននៅពេលបច្ចុប្បន្ននៅមិនទាន់គ្រប់តម្រូវការនៅឡើយនោះទេ។ លំនៅដ្ឋានដែលមានទីផ្សារ និងតម្រូវការខ្ពស់បច្ចុប្បន្ននេះ ជាប្រភេទលំនៅដ្ឋានតម្លៃមធ្យម ដែលស្ថិតនៅក្នុងចន្លោះ ជាង៦ម៉ឺន ទៅ៨ម៉ឺនជាង”។

លោក សរ បញ្ញា ដែលជាអ្នកជំនាញផ្នែកលក់អចលនទ្រព្យនៅក្នុងតំបន់ខណ្ឌដង្កោ បានមានប្រសាសន៍ស្រដៀងការលើកឡើងខាងលើនេះផងដែរ ដោយលោកបានបញ្ជាក់ថា “ស្ទើរតែគ្រប់គម្រោងនៅតំបន់ជុំវិញរាជធានីភ្នំពេញភាគច្រើនសុទ្ធតែមានទីផ្សារល្អ លើកលែងតែគម្រោងដែលស្ថិតនៅទីតាំងមិនសូវអំណោយផល ដែលពិបាកលក់”។

លោកបញ្ជាក់ថា “គម្រោងលំនៅដ្ឋានដែលស្ថិតនៅភាគខាងលិចក្នុងខណ្ឌដង្កោ គឺនៅតែមានស្ថានភាពល្អប្រសើរ ហើយអ្វីកាន់តែពិសេសគឺតម្លៃបានបន្តកើនឡើង ខណៈដែលអ្នកទិញក៏នៅតែមានសកម្មភាព។ នៅតំបន់នេះ គម្រោងភាគច្រើនមិននៅទ្រឹងនោះទេ ដោយសារតែទីតាំងគម្រោងមានអំណោយពីហេដ្ឋារចនាសម្ព័ន្ធដែលវិនិយោគដោយរដ្ឋាភិបាលជាច្រើនខ្សែ ជាពិសេសស្ថិតនៅជិតគម្រោងធំដូចជា ផ្សារទំនើប AEON3 ស្ថិតនៅផ្លូវ៦០ម៉ែត្រ មានផ្លូវ៥០ម៉ែត្រនៅអមជាមួយ ស្ថិតនៅជិតគម្រោងព្រលានយន្តថ្មីក្នុងខេត្តកណ្តាល និងគម្រោងទីក្រុងរណបផ្សេងៗទៀត”។

ជាមួយនឹងការរក្សាបាននូវស្ថានភាពល្អប្រសើរក្នុងទីផ្សារលំនៅដ្ឋាននាពេលនេះ លោក សរ បញ្ញា បានបង្ហាញពីភាពជឿជាក់ថា នៅក្នុងអំឡុងពេលឆ្នាំក្រោយ តម្លៃលំនៅដ្ឋានក្នុងខណ្ឌដង្កោអាចនឹងបន្តកើនឡើងមិនក្រោយ៣០ភាគរយនោះទេ ខណៈដែលតម្រូវការនៅតែមានកំណើនបន្តទៀត៕

ផ្លាស់ប្តូរការរស់នៅ បែបស៊ីវិល័យរបស់អ្នក ជាមួយនឹងខុនដូ ដឹស្តាប៉ូឡារីស ២៣

ក្នុងពេលបច្ចុប្បន្ននេះ ប្រជាជនកម្ពុជា បានស្វែងរកការរស់នៅ បែបជីវិតស៊ីវិល័យ ដោយងាកមករកគេហដ្ឋានបែបបុរី និង ខុនដូ។ ចំពោះការផ្លាស់ប្តូរបែបនេះ ដោយសារតែការរស់នៅក្នុង បុរី និង ខុនដូ បានបន្ថែមនូវភាពសម្បូរបែប និងតម្រូវការ ដែលមិនអាចខ្វះបានសម្រាប់ការរស់នៅប្រចាំថ្ងៃ។ ដើម្បីជ្រាបកាន់តែច្បាស់ពីជីវិតបែបស៊ីវិល័យ សម្រាប់ការរស់នៅក្នុងខុនដូ ដឹស្តាប៉ូឡារីស ២៣ យើងខ្ញុំសូមមកបង្ហាញលោកអ្នកអោយកាន់តែច្បាស់ក្នុងអត្ថបទនេះ។

ខុនដូ ដឹស្តាប៉ូឡារីស ២៣ មានទីតាំងនៅតាមបណ្តោយផ្លូវជាតិលេខ១ ប្រមាណជា២គីឡូម៉ែត្រ ពីស្ពានព្រះមុនីវង្ស (បឹងស្នោ) សាងសង់ឡើងលើផ្ទៃដីប្រមាណជាជាង២ ហិចតា ដែលមានកំពស់២៦ជាន់ ចែកចេញជាបន្ទប់គេង 1 និងបន្ទប់គេង 2 អមជាមួយគ្រឿងសង្ហារិមទំនើបគ្រប់ប្រភេទ បំពាក់ជូនរួចជាស្រេច ស្របតាមតំរូវការរបស់អតិថិជន។

អ្វីដែលពិសេសនោះ គឺ លោកអ្នកអាចកំសាន្ត និង ស្រូបយកខ្យល់អាកាស នៅក្នុងសួនច្បារលើអាកាសបែបឯកជន នៅជាន់ទី២៦ នៃអគារ ដែលមានបរិយាកាសស្រស់ស្រាយ ជាមួយនឹងទេសភាពដ៏ល្អឥតខ្ចោះ អមដោយទន្លេសងខាង និងទិដ្ឋភាពសួនកំសាន្តបែបអឺរ៉ុបថែមទៀតផង។ សម្រាប់ជាន់ទី១ និង ទី២ នៃអគារខុនដូ បានរៀបចំអោយមានហាងទំនិញដ៏សម្បូរបែប មានទំនិញរាប់រយមុខ ដោយអតិថិជន ពុំចាំបាច់ចាកចេញពីខុនដូ ទៅស្វែងរកនៅឆ្ងាយ។

ភោជនីយដ្ឋាន និង អាហារដ្ឋាន ក៏ជាតម្រូវការចាំបាច់ប្រចាំថ្ងៃ សម្រាប់ការរស់នៅ។ ដូច្នោះហើយទើបបុរី ប៉េង ហួត បានបង្កើតអោយមាន ប៉ូឡារីស អេហ្វ អែន ប៊ី ដែលប្រមូលផ្តុំភោជនីយដ្ឋាន និង អាហារដ្ឋានល្បីៗលើដងវិថីតែមួយដែលមានចំងាយប្រមាណជា៥០០ម៉ែត្រប៉ុណ្ណោះពីទីតាំងខុនដូ។

សួនកម្សាន្តយូរ៉ូផាក ស្ថិតនៅលើទីតាំងតែមួយ (បឹងស្នោរ) ជាមួយនឹងខុនដូ ដែលសួនកម្សាន្តនេះ ជាសួនកម្សាន្តស្តង់ដារបែបអឺរ៉ុប ដំបូងគេបង្អស់ក្នុងប្រទេសកម្ពុជា ជាទីកន្លែងលំហែកាយបែបធម្មជាតិ ដែលមានភោជនីយដ្ឋានបែបបស្ចឹមប្រទេស ការជិះទូកកម្សាន្ត និងការកម្សាន្តផ្សេងៗទៀតជាច្រើន ដែលធ្វើអោយអ្នកទៅកំសាន្តនៅទីនោះ មានអារម្មណ៍ថា ដូចកំពុងស្ថិតនៅក្នុងទីក្រុងតូចមួយនៅប៉ែកអឺរ៉ុបយ៉ាងដូច្នេះដែរ។

បន្ថែមពីលើនេះទៀត ការហាត់កីឡាក៏ជាផ្នែកមួយ ជួយដល់លោកអ្នកបំបាត់ភាពតានតឹង និងធ្វើអោយមានសុខភាពល្អ។ បុរី ប៉េង ហួត ក៏បានបង្កើតអោយមាន ក្លឹបហាត់ប្រាណ អាងហែលទឹក និងកីឡដ្ឋាន សម្រាប់អតិថិជនមកហាត់ប្រាណ និងកំសាន្ត ជាមួយនឹងកីឡាវាយកូនហ្គោល និង កីឡាបាល់ទាត់ ដែលកំពុងពេញនិយម នាពេលបច្ចុប្បន្ន។

សរុបរួមមក ជីវិតបែបស៊ីវិល័យ សម្រាប់ការរស់នៅក្នុងខុនដូ ដឹស្តាប៉ូឡារីស ២៣ ពិតជាមិនធ្វើអោយអតិថិជនខកបំណងឡើយ ក្នុងការទទួលបានជីវិតដ៏ស្រស់បំព្រង រួមផ្សំនឹងភាពសម្បូរបែបដែលនៅជុំវិញ ដែលស័ក្តិសមនឹង ពាក្យស្លោករបស់បុរី ប៉េង ហួត “ធ្វើអោយជីវិតលោកអ្នកកាន់តែមានន័យ”។

សម្រាប់ព័ត៌មានបន្ថែម សូមទាក់ទងទូរសព្ទលេខ 015 90 6789 Email: [email protected] ឬចូលទៅកាន់គេហទំព័រ Facebook: www.facebook.com/boreypenghuoth ឬអាចអញ្ជើញមកសាកសួរព័ត៌មាន ពីគ្រប់ការិយាល័យលក់ ដែលមានទីតាំងក្បែរលោកអ្នក រៀងរាល់ម៉ោងធ្វើការ៕

តើអ្នកវិយោគក្នុងវិស័យអចលនទ្រព្យនៅកម្ពុជាគួរមានលក្ខណៈដូចម្តេច?

ដោយ ៖ វុត្ថា

ភ្នំពេញ ៖ អ្នកវិនិយោគអចលនទ្រព្យ ជាពិសេសអ្នកវិនិយោគដីធ្លីនៅក្នុងប្រទេសកម្ពុជា ត្រូវបានបែងចែក ជា៣ ប្រភេទធំៗ ដែលកំពុងប្រតិបត្តិការនៅតាមបណ្តាខេត្ត ក្រុង និងតំបន់ដែលសក្តានុពលខ្ពស់។

លោក ឡុង គឺមសួគ៌ អគ្គនាយកក្រុមហ៊ុន Century21 Advance បានមើញឃើញថា អ្នកវិនិយោគអចលនទ្រព្យនៅក្នុងប្រទេសកម្ពុជានាពេលបច្ចុប្បន្ននេះ មាន ៣ ប្រភេទធំៗ និងអាស្រ័យលើធនធាន និងលំហូរសាច់ប្រាក់របស់ពួកគេ។

១) អ្នកវិនិយោគអចលនទ្រព្យកម្រិតទាប

អ្នកវិនិយោគប្រភេទនេះ បានចំណាយធនធានរបស់ខ្លួនលើការទិញដីក្នុងទំហំតូច ៗ ដែលអាស្រ័យទៅលើធនធានរបស់ពួកគេដែលមាន ដូចជាការទិញដីឡូតិ៍ ៤ x ២០, ៥x២០ និង ១០ x ២០ ជាដើម ហើយមានតម្លៃធូថ្លៃ។

២)អ្នកវិនិយោគអចលនទ្រព្យកម្រិតកណ្តាល

អ្នកវិនិយោគប្រភេទនេះ បានចំណាយថវិការបស់ខ្លួប្រមាណ ១០ ទៅ ៥០ម៉ឺនដុល្លារអាមេរិកក្នុងការវិនិយោគអចលនទ្រព្យ ជាពិសេសដីធ្លី ឬ អាចនិយាយបានថា អ្នកវិនិយោគប្រភេទនេះ ជាអ្នកវិនិយោគកម្រិតមធ្យម។

៣) អ្នកវិនិយោគអចលនទ្រព្យកម្រិតខ្ពស់

អ្នកវិនិយោគប្រភេទនេះ ត្រូវបានចំណាយថវិកាប្រមាណ៥០ ម៉ឺនដុល្លារអាមេរិកឡើង ក្នុងការវិនិយោគលើវិស័យអចលនទ្រព្យ ហើយអ្នកដែលចំណាយថវិកាច្រើនបែបនេះ ជាប្រភេទអ្នកមាន ឬ អ្នកដែលមានធនធានគ្រប់គ្រាន់ ។

លោក ឡុង គឹមសួគ៌ បានបញ្ជាក់ថា អ្នកវិនិយោគទាំង ៣ ប្រភេទនេះ គឺមានគោលបំណងផ្សេងៗគ្នា ដោយអ្នកខ្លះ វិនិយោគសម្រាប់សាងសងលំនៅឋាន ផ្ទះល្វែង ខុនដូ និងទុកលក់យកចំណេញជាដើម ខណៈអ្នកអភិវឌ្ឍន៍ភាគច្រើនវិនិយោគលើវិស័យអចលនទ្រព្យមិនបានដឹងពីគោលបំណងច្បាស់លាស់ដែលបណ្តាលឱ្យមានការខូចប្រយោជន៍ (លក់មិនចេញ)។

លោកក៏បានណែនាំដល់អ្នកវិនិយោគក្នុងវិស័យអចលនទ្រព្យទាំងអស់ត្រូវដឹងពីគោលបំណងរបស់ខ្លួនមុននឹងសម្រេចចិត្តក្នុងការដាក់ទុនវិនិយោគក្នុងវិស័យអចលនទ្រព្យ ឬវិស័យដីធ្លីជាដើម ជាពិសេសត្រូវដឹងពីតំបន់សក្តានុពល និងគម្រោងអភិវឌ្ឍន៍ឱ្យច្បាស់លាស់៕

ការនាំចេញអង្កររបស់កម្ពុជាកើនឡើង ៣១ ភាគរយ ក្នុងរយៈពេល ៨ខែ ឆ្នាំ២០២០

ដោយ ហ្សូលី

ភ្នំពេញ៖ គិតមកពេលនេះ ក្នុងរយៈពេល៨ខែ កម្ពុជាសម្រេចការនាំចេញអង្ករចំនួន ៤៤៨,២០៣ តោន ទៅកាន់ទីផ្សារអន្តរជាតិ មានកំណើនចំនួន ៣១ ភាគរយ បើប្រៀបធៀបនឹងរយៈពេលដូចគ្នាកាលពីឆ្នាំ ២០១៩ កន្លងទៅ។

នេះបើតាមឱ្យដឹងពីរបាយការណ៍របស់ក្រសួងកសិកម្ម ដែលទទួលបានពីលោក ងិន ឆាយ អគ្គនាយកនៃអគ្គនាយកដ្ឋានកសិកម្ម។

ប្រទេសចិននៅតែជាគោលដៅនាំចេញអង្ករធំជាងគេ ដោយកម្ពុជាទទួលបានកំណើនក្នុងការនាំចេញអង្ករទៅកាន់ប្រទេសចិនសរុប ១៥៩,២៥៣ តោន គិតមកត្រឹមរយៈពេល ៨ ខែ ឆ្នាំនេះ កើនឡើងជិត ២០ ភាគរយ បើប្រៀបធៀបនឹងរយៈពេលដូចគ្នាកាលពីឆ្នាំ ២០១៩ កន្លងទៅ។ ឭ

របាយការណ៍ដដែលបង្ហាញថា កម្ពុជាបាននាំចេញអង្ករទៅកាន់ទីផ្សារអ៉ីរ៉ុបបានប្រមាណ ១៤៩,៨៤៨ តោន កើនឡើង ២៤,៨ភាគរយ និងទៅកាន់សមាគមន៍អាស៊ានបានចំនួន ៦០,៩៣៣ តោន កើនឡើង ៤២ ភាគរយ ក្នុងរយៈពេល ៨ខែនេះ។

កំណើននៃការនាំចេញអង្កររបស់កម្ពុជាបណ្តាលមកពី កំណើនតម្រូវការអង្ករកម្ពុជាអំឡុងវិបត្តិជំងឺរាតត្បាត Covid-19។ អគ្គនាយកនៃអគ្គនាយកដ្ឋានកសិកម្មបានព្យាករណ៍ថា កម្ពុជានឹងអាចនាំចេញអង្ករទៅកាន់ទីផ្សារអន្តរជាតិរហូតដល់ ៨០០,០០០ តោន ក្នុងឆ្នាំ ២០២០នេះ។

កាលពីឆ្នាំ ២០១៩ កម្ពុជាអាចផលិតស្រូវអង្ករប្រហែល ១០លានតោន ហើយចំនួននេះកម្ពុជាយល់ឃើញថា ស្រូវអង្ករ ៥.៦តោន គឺស្មើនឹងអង្ករចំនួន ៣.៥លានតោន។ ការនាំចេញអង្ករក្រអូប មានកំណើនជាលំដាប់ ហើយកំណើនអង្ករស និងអង្ករចំហុយក៏មានក្នុងដំណាក់កាលនៃជំងឺកូវីដ១៩ រីឯអង្ករសរីរាង្គមានកំណើនជាបន្តបន្ទាប់នៅឆ្នាំ២០២០៕ Xinhua

អណ្តូងប្រេងថ្មីចំនួន ៥ របស់ក្រុមហ៊ុន Kris Energy នៅកម្ពុជានឹងចាប់ផ្តើមខួងពីខែតុលាខាងមុខនេះ

ដោយ ៖ ប៊ី

ភ្នំពេញ ៖ ក្រុមហ៊ុន The PetroVietnam Drilling & Well Service Corporation (PV Drilling) ដែលមានមូលនៅប្រទេសវៀតណាមបានបញ្ជាក់ថា ខ្លួននឹងអនុវត្តកិច្ចសន្យាក្នុងការខួងអណ្តូងថ្មីចំនួន៥ របស់ក្រុមហ៊ុនប្រេង Kris Energy ខណៈការខួងអណ្តូងប្រេងនៅកម្ពុជានេះនឹងមានរយៈពេល ៣ ខែដោយចាប់ផ្តើមពីខែតុលា ឆ្នាំ២០២០ខាងមុខ។

ទន្ទឹមនឹងនេះ ក្រុមហ៊ុនក៏នឹងខួងអណ្តូងសម្រាប់គម្រោង PV Drilling II នឹងចាប់ផ្តើមយុទ្ធនាការខួងរយៈពេល ១០០ ថ្ងៃនៅវៀតណាមចាប់ពីខែកញ្ញា។ នេះបើយោងតាមការចុះផ្សាយរបស់សារព័ត៌មានវៀតណាម Vietnamplus ចុះផ្សាយកាលពីពេលថ្មីៗនេះ ។

ចាប់ពីខែសីហា ឆ្នាំ២០២០ ចំនួននៃការដេញថ្លៃសម្រាប់ការខួងយកប្រេងនៅឆ្នាំនេះនៅវៀតណាមក៏ដូចជាតំបន់អាស៊ីអាគ្នេយ៍ បានថមថយដោយមានឧបករណ៍ជណ្តើរខួងចំនួន ២៦ ក្នុងចំណោម ៦១ នៅក្នុងតំបន់ដែលមិនត្រូវបានប្រើប្រាស់។
ក្រុមហ៊ុន PV Drilling ក៏ជួបប្រទះនឹងការលំបាកដូចគ្នាដែរនៅពេលដែលឧបករណ៍ខួងទាំង ២ របស់ PV Drilling II និង PV Drilling III ត្រូវបញ្ឈប់ប្រតិបត្តិការនៅប្រទេសម៉ាឡេស៊ីចាប់ពីខែកក្កដា ឆ្នាំ២០២០ និងខែមិថុនា ឆ្នាំ២០២០ រៀងៗខ្លួន លឿនជាងផែនការក្នុងកិច្ចសន្យា។ ដូច្នេះក្រុមហ៊ុន PV Drilling នឹងតាមដានស្ថានភាពតំរូវការផ្គត់ផ្គង់នៅលើទីផ្សារដើម្បីស្វែងរកកិច្ចសន្យាខួងថ្មីដើម្បីបំពេញតាមគោលដៅអាជីវកម្មសម្រាប់ឆ្នាំនេះដែលត្រូវបានអនុម័តនៅឯកិច្ចប្រជុំទូទៅរបស់ក្រុមហ៊ុន ។

ក្រុមហ៊ុន PV Drilling បានឱ្យដឹងថា ឧបករណ៍ជណ្តើរសម្រាប់ខួងអណ្តូង អាចដំណើរការនៅឆ្នាំក្រោយ។ ក្នុងនោះចាប់ពីត្រីមាសទី ២ ឆ្នាំ២០២១ ស្ថានីយ៍ខួងអណ្តូងប្រេង PV នឹងចាប់ផ្តើមអនុវត្តកិច្ចសន្យារយៈពេលវែងដែលបានចុះហត្ថលេខាជាមួយក្រុមហ៊ុនប្រេងប្រ៊ុយណេសែលប្រេង (BSP) ។
ក្រុមហ៊ុនបានឱ្យដឹងទៀតថា ខ្លួនទទួលបានកំណើនប្រចាំឆ្នាំ ៦៤ ភាគរយនៃប្រាក់ចំណូលសរុបក្នុងរយៈពេល ៦ ខែដំបូងនៃឆ្នាំនេះដល់ចំនួន ៣,១៨ ពាន់លានដុង (១៣៧,៥ លានដុល្លារអាមេរិក)។ ខណៈពេលដែលប្រាក់ចំណេញក្រោយពន្ធរបស់ខ្លួនបានឈានដល់ ៨២ ពាន់លានដុងគឺខ្ពស់ជាងប្រាក់ចំណេញវៀតណាម ២២,២ ពាន់លានដុល្លារក្នុងរយៈពេល ៦ ខែដំបូងនៃឆ្នាំកន្លងមក៕

ក្រុមហ៊ុនអាកាសចរណ៍ Silk Air ចាប់ផ្តើមហោះហើរឡើងពីសិង្ហបុរី មកភ្នំពេញនៅថ្ងៃនេះ

ដោយ ៖ វុត្ថា

ភ្នំពេញ ៖ ក្រុមហ៊ុនអាកាសចរណ៍ Silk Air ដែលចេញដំណើរពីសិង្ហបុរី មកភ្នំពេញបានចាប់ផ្តើមដំណើរការហោះហើរឡើងវិញនៅថ្ងៃទី១ ខែកញ្ញា ឆ្នាំ ២០២០នេះ បន្ទាប់ពីផ្អាកមួយរយៈដោយការព្រួយបារម្ភពីការឆ្លងនូវជំងឺ covid-19 ។

តាមសេចក្តីជូនដំណឹងរបស់រដ្ឋាភិបាលកម្ពុជាកាលពីពេលថ្មីៗនេះបានឱ្យដឹងថា ក្រុមហ៊ុនអាកាសចរណ៍ Silk Air នឹងចាប់ផ្តើមហោះហើរឡើងវិញរៀងរាល់ថ្ងៃអង្គារ និងថ្ងៃអាទិត្យ រៀងរាល់សប្ដាហ៍សម្រាប់គោលដៅមករាជធានីភ្នំពេញ។

សម្រាប់ការហោះហើរនេះ រដ្ឋាភិបាលតាមរយៈក្រសួង និងស្ថាប័នពាក់ព័ន្ធបានក្រើនរំលឹកដល់អ្នកធ្វើដំណើរទាំងអស់ ដែលមានបំណងចូលមកប្រទេសកម្ពុជា ត្រូវកត់សម្គាល់ថាប្រទេសកម្ពុជា បានផ្អាកការលើកលែងទិដ្ឋាការ (រួមទាំងជនជាតិសិង្ហបុរី) ទិដ្ឋាការពេលមកដល់ ទិដ្ឋាការទេសចរណ៍ និងទិដ្ឋាការអេឡិចត្រូនិច។

រាល់អ្នកដំណើរចាំបាច់ត្រូវដឹងមុនចេញដំណើរ ៖ ស្នើសុំទិដ្ឋាការនៅស្ថានអគ្គរាជទូតកម្ពុជាប្រចាំនៅប្រទេសសិង្ហបុរី
ត្រូវមានលិខិតបញ្ជាក់សុខភាព ៧២ ម៉ោងមុនចេញដំណើរ ត្រូវទិញកញ្ចប់ធានារ៉ាប់រងសុខភាពរយៈពេល ២០ថ្ងៃ តម្កល់ប្រាក់ ២០០០ ដុល្លារ សម្រាប់ចំណាយលើការតេស្ត ស្នាក់នៅ និងការធ្វើដំណើរពេលមកដល់ និងធ្វើតេស្តភ្លាមៗ ហើយត្រូវរង់ចាំ ២៤ម៉ោង ដើម្បីទទួលលទ្ធផល ។

បើសិនអ្នកដំណើរណាម្នាក់តេស្តឃើញកូវីដ ១៩ អ្នករួមដំណើរទាំងអស់ត្រូវធ្វើចត្តាឡីស័កនៅមណ្ឌលដែលបានរៀបចំ។

អ្នកនាំពាក្យរដ្ឋលេខាធិការអាកាសចរណ៍ស៊ីវិល បានឱ្យដឹងថា តាមការគ្រោងទុក ចាប់ពីខែកញ្ញា ឆ្នាំ២០២០នេះ ជើងហោះហើររបស់កម្ពុជានឹងមានសកម្មភាពឡើងវិញ ដោយមានការហោះហើរមកពីប្រទេសមួយចំនួននៅក្នុងតំបន់ និងប្រទេសជប៉ុនផងដែរ។

លោកបន្តថា ក្នុងរយៈពេលប៉ុន្មានខែចុងក្រោយនេះ អាកាសយានដ្ឋានអន្តរជាតិរបស់កម្ពុជា ទទួលបាននូវជើងហោះហើរប្រមាណ ១០ ជើងប៉ុណ្ណោះក្នុងមួយថ្ងៃ ដែលធ្វើឱ្យវិស័យមួយនេះមានការចុះធ្លាក់យ៉ាងខ្លាំង៕

អ្នកជំនាញ៖ ទីផ្សារជួលនៅក្នុងផ្សារទំនើបមានអត្រាកំណើនតិចតួចបំផុត

ដោយ វុត្ថា

ភ្នំពេញៈ ទីផ្សារជួលនៅក្នុងផ្សារទំនើបរហូតដល់ចុងឆ្នាំ២០២០នេះ អាចនឹងមានកំណើនតិចតួចបំផុត បើទោះជាស្ថានភាពនៃជំងឺ Covid-19 នៅក្នុងប្រទេសកម្ពុជា ត្រូវបានទប់ស្កាត់ និងមានវិធានការល្អពីរាជរដ្ឋាភិបាលកម្ពុជាក៏ដោយ។

អ្នកជំនាញនៅក្នុងវិស័យផ្សារទំនើប លោកស្រីអាន សុធីតា នាយិកាក្រុមហ៊ុន CBRE ប្រចាំកម្ពុជា បានប្រាប់គេហទំព័រ Propertyarea.asia កាលពីចុងសប្តាហ៍មុននេះឱ្យដឹងថា ដោយបន្សល់ទុកពីការធ្លាក់ចុះនៅក្នុងឆមាសទី១ សម្រាប់ទីផ្សារនៃការជួលទីតាំងលក់រាយក្នុងផ្សារទំនើបនៅឆមាសទី២ ឆ្នាំ២០២០ អាចនឹងមានកំណើនឡើងវិញតិចបំផុត បើជាទោះរាជរដ្ឋាភិបាលកម្ពុជា បានអនុញ្ញាតឱ្យផ្នែកកម្សាន្តខ្លះ ចាប់ដំណើរការឡើងវិញក៏ដោយ។

លោកស្រីបន្តថា “ទីផ្សារជួលតូបនៅក្នុងផ្សារទំនើប (Retail) នៅកម្ពុជា គិតត្រឹមចុងឆមាសទី១ (ចុងខែមិថុនា) គឺមានភាពអវិជ្ជមានខ្លាំង ប៉ុន្តែទីផ្សារនេះត្រូវបានព្យាករណ៍ថា នឹងមានសន្ទុះឡើងវិញបន្តិចបន្តួចនៅក្នុងឆមាសទី២ នៃឆ្នាំ២០២០” ។

លោកស្រី អាន សុធីតា បន្ថែមថា ផ្អែកតាមភាពជាក់ស្ដែងនៅពេលបច្ចុប្បន្ននេះ យើងឃើញថា មនុស្សជាច្រើនចាប់ផ្តើមមានសកម្មភាព និងចេញដើរឡើងវិញ បន្ទាប់ពីការរាតត្បាតនៃជំងឺឆ្លងនៅក្នុងប្រទេសកម្ពុជា មានភាពស្ងប់ស្ងាត់ ជាពិសេសបន្ទាប់ពីរាជរដ្ឋាភិបាល បានសម្រេចអនុញ្ញាតឱ្យអាជីវកម្មកម្សាន្តមួយចំនួន ចាប់ដំណើរការឡើងវិញ ប៉ុន្តែស្ថិតក្នុងស្ថានភាពប្រុងប្រយ័ត្នខ្ពស់។

លោកស្រីបន្តទៀតថា ក្នុងឆមាសទី១ ក្រៅពីវិស័យឧស្សាហកម្ម គឺវិស័យសណ្ឋាគារ (Hotel) និងផ្សារទំនើប (Retail) ទទួលរងនូវផលប៉ះពាល់យ៉ាងខ្លាំង ប៉ុន្តែនៅក្នុងឆមាសទី២នៃឆ្នាំនេះ យើងរំពឹងថានឹងមានកំណើនឡើងវិញបន្តិច។

លោកស្រីបន្ថែមថា “ការអនុញ្ញាតឱ្យចាប់បើកដំណើរការឡើងវិញ នូវអាជីវកម្មផ្នែកកម្សាន្ត និងសេវាកម្មមួយចំនួនរបស់រាជរដ្ឋាភិបាល ពិតជាបានចូលរួមជួយធ្វើវិស័យទាំង២ខាងលើនេះ មានភាពល្អប្រសើរ ប៉ុន្តែកំណើននៃតម្រូវការទីផ្សារ នៅមានកម្រិតនៅឡើយ” ៕

វិភាគ៖ តើគម្រោងខ្សែក្រវ៉ាត់ និងផ្លូវរបស់ចិនជួយដល់ការងើបឡើងវិញនៃវិបត្តិសេដ្ឋកិច្ចសកលយ៉ាងដូចម្តេច?

ប្រែសម្រួលដោយ៖ ប៊ី

ភ្នំពេញៈ ខណៈជំងឺរាតត្បាត COVID-19 កំពុងធ្វើឱ្យសេដ្ឋកិច្ចពិភពលោក ធ្លាក់ចូលក្នុងវិបត្តិសេដ្ឋកិច្ចជ្រៅ គម្រោងគំនិតផ្តួចផ្តើមខ្សែក្រវ៉ាត់ និងផ្លូវ (BRI) ដោយមានការចូលរួមពីសហគ្រាសចិននៅក្រៅប្រទេស បានផ្តល់ក្តីសង្ឃឹមខ្លះឡើងវិញ។

ដោយបម្រើជាវេទិកាអន្តរជាតិ សម្រាប់កិច្ចសហប្រតិបត្តិការ គម្រោងខ្សែក្រវាត់និងផ្លូវ បានដើរតួនាទីយ៉ាងសំខាន់ ក្នុងការជួយប្រយុទ្ធប្រឆាំងនឹងជំងឺរាតត្បាត និងធ្វើឱ្យមានស្ថេរភាពការផ្គត់ផ្គង់ពិភពលោក និងខ្សែសង្វាក់ឧស្សាហកម្ម។

កម្មករនៃសហគ្រាសចិននៅក្រៅប្រទេស និងសមភាគីក្នុងស្រុករបស់ពួកគេ កំពុងមមាញឹក ក្នុងការផលិតឡើងវិញ ខណៈកំពុងចាត់វិធានការការពារយ៉ាងតឹងរឹង។

គម្រោង HEALTH SILK ROAD

នៅក្នុងកិច្ចសន្ទនាតាមទូរស័ព្ទ ដែលបានធ្វើឡើងកាលពីខែមីនា ជាមួយនាយករដ្ឋមន្ត្រីអ៊ីតាលី លោកGiuseppe Conte ប្រធានាធិបតីចិនលោកស៊ី ជីនពីងបាននិយាយថា ប្រទេសចិនមានឆន្ទៈធ្វើការជាមួយប្រទេសអ៊ីតាលី ក្នុងកិច្ចខិតខំប្រឹងប្រែងជាសកលដើ ម្បីប្រយុទ្ធប្រឆាំង នឹងការរីករាលដាលនៃជំងឺ និងបង្កើតគម្រោង Silk Road of Health។

នៅថ្ងៃទី១៤ ខែមេសា រថភ្លើងដឹកទំនិញចិន-អឺរ៉ុប ដែលផ្ទុកទៅដោយគ្រឿងផ្គត់ផ្គង់វេជ្ជសាស្ត្រ និងឧស្សាហកម្មដែលត្រូវជាចាំបាច់ បានទៅដល់ទីក្រុងឌឹសបឺគ (Duisburg) ភាគខាងលិចប្រទេសអាល្លឺម៉ង់។

ដោយកត់សម្គាល់ពីការលំបាក ដែលពលរដ្ឋអាល្លឺម៉ង់ជួបប្រទះ ដោយសារតែជំងឺរាតត្បាត រដ្ឋមន្ត្រីដឹកជញ្ជូននៃរដ្ឋអាល្លឺម៉ង់លោក Hendrik Wuest បាននិយាយថា “ទំនិញដែលដឹកមកពីប្រទេសចិន ជាពិសេសសម្ភារៈវេជ្ជសាស្ត្រ មានសារៈសំខាន់ណាស់” ។

ក្នុងឆមាសទីមួយ ឆ្នាំ២០២០ ការដឹកជញ្ជូនទំនិញរវាងចិន និងអឺរ៉ុបបានកើនឡើង ៣៦ភាគរយពីមួយឆ្នាំទៅមួយឆ្នាំ ស្មើនឹង៥.១២២ជើង ដោយដឹកជញ្ជូន៣,៦៧លានសម្រាប់ និងវត្ថុធាតុដើមប្រឆាំងនឹងជំងឺរាតត្បាត២៧.០០០តោន ទៅកាន់ប្រទេសអឺរ៉ុបរួមមានអ៊ីតាលី អាល្លឺម៉ង់ បារាំង អេស្ប៉ាញ ប៉ូឡូញ និងហុងគ្រី។

ដោយត្អូញត្អែរអំពីការរំខានយ៉ាងខ្លាំង នៃបណ្តាញផ្គត់ផ្គង់ ដែលបណ្តាលមកពីកូវីដ១៩ លោក Michael Schumann ប្រធានក្រុមប្រឹក្សាភិបាលនៃសហព័ន្ធល្លឺម៉ង់សម្រាប់ការអភិវឌ្ឍសេដ្ឋកិច្ច និងពាណិជ្ជកម្មបរទេសបានមានប្រសាសន៍ថា “ក្នុងន័យនេះ គំនិត ផ្តួចផ្តើមខ្សែក្រវ៉ាត់ និងផ្លូវ ពិតជាអាចចូលរួមចំណែកយ៉ាងសំខាន់ក្នុងការអនាគត” ។

ផ្លូវសូត្របុរាណ បានក្លាយជាទាំងមធ្យោបាយដឹកទំនិញ និងជាចំណងសាមគ្គីភាព។

ភ្លាមៗបន្ទាប់ពីប្រទេសអ៊ីរ៉ាក់ បានរាយការណ៍ករណីដំបូងនៃការការពារជំងឺ COVID-19 ក្រុមគ្រូពេទ្យចិន ដែលមានអ្នកជំនាញចំនួន៧នាក់ បានទៅដល់រដ្ឋធានីបាកដាដ របស់អ៊ីរ៉ាក់នៅថ្ងៃទី៧ខែមីនា។ ប៉ុន្មានថ្ងៃក្រោយមក មន្ទីរពិសោធន៍ដែលបង្កើតដោយជនជាតិចិន សម្រាប់ការធ្វើតេស្ត៍រកជំងឺ COVID-19 ត្រូវបានបើកសម្ពោធនៅក្នុងប្រទេស ដែលហែកហួរដោយសង្គ្រាម។

នាយកមន្ទីរពិសោធន៍លោក Ghanim Mahdi បាននិយាយថា “អ្នកជំនាញចិនគឺមានការគាំទ្រ និងជួយខ្លាំង។ នៅពេលពួកគេនៅទីនេះ ពួកគេបានផ្តល់ការបណ្តុះបណ្តាលបច្ចេកទេសទាំងអស់ ដែលយើងត្រូវការ។ នេះអាចជាទ្រព្យសម្រាប់យើង” ។

លោក Keshmeer Makun សាស្ត្រាចារ្យនៅសាកលវិទ្យាល័យ University of the South Pacific បានមានប្រសាសន៍ថា ជំងឺរាតត្បាត បានពង្រឹងកិច្ចសហប្រតិបត្តិការក្រោមក្របខ័ណ្ឌខ្សែក្រវាត់ និងផ្លូវ។

HOPE REKINDLED សេចក្តីសង្ឃឹម

ធនាគារពិភពលោកបានព្យាករណ៍ថា ពិភពលោក នឹងទទួលរងនូវវិបត្តិសេដ្ឋកិច្ចធ្ងន់ធ្ងរបំផុត គិតចាប់តាំងពីសង្គ្រាមលោកលើកទី២ ជាមួយនឹងការធ្លាក់ចុះ៥,២ ភាគរយនៃផលិតផលក្នុងស្រុកសរុបនៅឆ្នាំនេះ។តួលេខនេះបង្ហាញពីតម្រូវការបន្ទាន់ សម្រាប់ការផលិតឡើងវិញ។

ដោយមានវិធានការណ៍ការពារយ៉ាងតឹងរឹង កម្មករចិន នៅក្រៅប្រទេសកំពុងរួមដៃគ្នា ជាមួយសហសេវិកក្នុងតំបន់របស់ពួកគេ ដើម្បីពន្លឿនការស្ថាបនាគម្រោងការណ៍សំខាន់ៗនៅទូទាំងពិភពលោក។

ចាប់តាំងពីត្រូវអនុញ្ញាតចេញកាលពីថ្ងៃទី២២ ខែសីហាពីការដាក់ឱ្យនៅដាច់ឡែករយៈពេល១៤ថ្ងៃ បន្ទាប់ពីការមកដល់ពួកគេ កម្មករចិនជាង ១៤០នាក់នេះ បានលះបង់ក្នុងការសាងសង់ស្ពាន Peljesat ដែលជាគម្រោងហេដ្ឋារចនាសម្ព័ន្ធធំជាងគេ នៅប្រទេសក្រូអាត។

ការស្ថាបនាស្ពាននេះ ដែលត្រូវបានពន្យាពេលដោយជំងឺរាតត្បាត ត្រូវបានបង្កើនល្បឿន ដោយសារលទ្ធផលនៃការព្យាយាមរបស់កម្មករ។

លោក Lu Shengwei តំណាងក្រុមអ្នកសាងសង់ចិន បានមានប្រសាសន៍ថា “យើងមិនអាចសង្កត់ធ្ងន់បន្ថែមទៀតលើថា តើស្ពានមានសារៈសំខាន់ដល់ប្រជាជនក្រូអាត និងយើងប៉ុណ្ណានោះទេ។ មនុស្សគ្រប់គ្នាដឹងថាស្ពាន ដែលឧបត្ថម្ភដោយសហភាពអឺរ៉ុប ដែលភ្ជាប់ទឹកដីរបស់ក្រូអាត ត្រូវបានប្រគល់ការទុកចិត្ត លើការសាងសង់ឱ្យក្រុមហ៊ុនចិនមួយ។

នៅប្រទេសកម្ពុជា viJ ទោះបីមានឧបសគ្គទាំងអស់ ដែលបង្កឡើងដោយជំងឺរាតត្បាតក៏ដោយ ក៏ពលករចិន និងកម្ពុជា កំពុងតែជម្រុញទៅមុខជាមួយនឹងការកសាងផ្លូវល្បឿនលឿនដំបូងគេរបស់ប្រទេសនេះ។

តភ្ជាប់ពីទីក្រុងភ្នំពេញ និងខេត្តកំពង់ផែសមុទ្រជ្រៅខេត្តព្រះសីហនុ នៅទិសនិរតីនៃប្រទេសកម្ពុជា ផ្លូវល្បឿនលឿនវិនិយោគចិន ដែលមានទឹកប្រាក់២ពាន់លានដុល្លារ ត្រូវបានរំពឹងថា នឹងក្លាយជាសរសៃឈាមសេដ្ឋកិច្ចរបស់ប្រទេសកម្ពុជា។ ផ្លូវល្បឿនលឿ ននេះនឹងក្លាយជាផ្លូវយុទ្ធសាស្ត្រដ៏សំខាន់មួយ ហើយនឹងចូលរួមចំណែកជំរុញកំណើនសេដ្ឋកិច្ចរបស់កម្ពុជា។

លោក Xu Song ប្រធានក្រុមសំណង់ ដែលមានកម្មករចំនួន២៨០នាក់នៅក្នុងគម្រោងនេះបានមានប្រសាសន៍ថា “យើងយល់ពីសារៈសំខាន់ នៃផ្លូវល្បឿនលឿននេះ ហើយដឹងច្បាស់ពីទំនួលខុសត្រូវរបស់យើង។ ក្នុងកំឡុងពេលពិសេសនេះ ការអនុវត្តនូវវិធានការណ៍យ៉ាងតឹងរឹង ដើម្បីការពារជំងឺ COVID-19 និងការពន្លឿនដល់ការសាងសង់ជាប្រចាំគឺជាអាទិភាពរបស់យើង។

នៅប្រទេសស្រីលង្កា ក្រុមការងារប្រតិបត្ដិការ និងថែទាំចិនបាន និងកំពុងធ្វើអស់ពីសមត្ថភាព ដើម្បីធានាឱ្យបាននូវប្រតិបត្តិការធម្មតា នៃស្ថានីយ៍ថាមពលឡាក់វីចាយ៉ា (Lakvijaya) ដែលជារោងចក្រថាមពលសាងសង់ ដោយប្រទេសចិន ដែលផ្គត់ផ្គង់អគ្គិសនីប្រហែល៤០ភាគរយ នៃថាមពលអគ្គីសនីរបស់ប្រទេស។

លោក Pang Tusheng អ្នកបច្ចេកទេសនៃក្រុមការងារនេះ បាននិយាយថា លោកមានគម្រោងវិលត្រឡប់ទៅប្រទេសចិន ដើម្បីចូលរួមពិធីមង្គលការកូនស្រី របស់លោក ប៉ុន្តែជំងឺរាតត្បាតបានផ្លាស់ប្តូរផែនការរបស់លោក។

លោក Pang បានមានប្រសាសន៍ថា “ស្ថិតក្នុងកាលៈទេសៈបែបនេះ យើងគួរតែនៅជាប់នឹងការងាររបស់យើង ព្រោះវាជាកិច្ចការដ៏សំខាន់ ដើម្បីរក្សាប្រតិបត្តិការដោយរលូននៃស្ថានីយ៍ថាមពល” ។

អនាគតរួម

បន្ទាប់ពីការរីករាលដាលនៃជំងឺនេះ ប្រទេសចិនបានប្រញាប់ប្រញាល់ ជួយស ង្គ្រោះអ្នកដែលត្រូវការជំនួយ ដោយលើកស្ទួយចក្ខុវិស័យសហគមន៍ ដែលមានអនាគតរួមគ្នាសម្រាប់មនុស្សជាតិ។

លោកស៊ី ជីនពីង បាននិយាយនៅក្នុងសន្និសីទវីដេអូ Conference ស្តីពីកិច្ចសហប្រតិបត្តិការអន្តរជាតិស្តីពីខ្សែក្រវាត់ និងផ្លូវថា “វិធីសាស្ត្រត្រឹមត្រូវ ក្នុងការដោះស្រាយវិបត្តិពិភពលោក និងការអភិវឌ្ឍរយៈពេលវែងគឺ តាមរយៈការតភ្ជាប់កាន់តែទូលំទូលាយ ការបើកចំហ និងការបញ្ចូលគ្នា” ។

លោកស៊ីបាននិយាយថា “ប្រទេសចិន នឹងធ្វើការជាមួយដៃគូរបស់ខ្លួន ដើម្បីអភិវ ឌ្ឍគម្រោងខ្សែក្រវាត់ និងផ្លូវទៅជាគំរូនៃកិច្ចសហប្រតិបត្តិការ គំរូសុខភាព គំរូនៃការស្តារឡើងវិញ និងគំរូនៃកំណើន” ។

ចក្ខុវិស័យរបស់ចិនសម្រាប់អនាគតរួមគ្នា និងសំណើរបស់ខ្លួន ដើម្បីរួមគ្នាកសាងគម្រោងខ្សែក្រវ៉ាត់ និងផ្លូវត្រូវបានស្វាគមន៍ ដោយប្រទេសនៅជុំវិញពិភពលោក។

ប្រធានអង្គការសុខភាពពិភពលោកលោក Tedros Adhanom Ghebreyesus បានមានប្រសាសន៍ថា “គម្រោងផ្លូវសូត្រសុខភាព និងផ្លូវសូត្រឌីជីថល ដែលបានដាក់ចេញដោយប្រទេសចិន បានបង្ហាញពីសារៈសំខាន់ នៃទម្រង់ច្នៃប្រឌិតថ្មីនៃកិច្ចសហប្រតិបត្តិការ ដើម្បីដោះស្រាយបញ្ហាប្រឈមដែលយើងជួបប្រទះ” ។

លោក Charles Onunaiju នាយកមជ្ឈមណ្ឌលសិក្សាចិននៅទីក្រុង Abuja ប្រទេសនីហ្សេរីយ៉ាបាននិយាយថា ការកត់សម្គាល់របស់លោកស៊ី បានធ្វើឱ្យប្រទេសអាហ្វ្រិកមានទំនុកចិត្តពេញលេញ ក្នុងការប្រយុទ្ធប្រឆាំងនឹងជំងឺរាតត្បាត។

លោកOnunaiju បាននិយាយថា “គម្រោងខ្សែក្រវាត់ និងផ្លូវ ដែលអាហ្វ្រិកបានចូលរួមយ៉ាងច្រើន នឹងដើរតួនាទីយ៉ាងសំខាន់ ក្នុងការងើបឡើងវិញនៃសេដ្ឋកិច្ចពិភពលោកនៅក្នុងពេលជំងឹរាតត្បាត” ។

លោក Pavle Basic សមាជិកក្រុមប្រឹក្សាជាតិប្រទេសស៊ែប៊ី (Serbia) សម្រាប់ការសម្របសម្រួលកិច្ចសហប្រតិបត្តិការជាមួយរុស្ស៊ី និងចិនបានមានប្រសាសន៍ថា ប្រទេសស៊ែប៊ីបានផ្តល់ការគាំទ្រយ៉ាងពេញទំហឹង ដល់គម្រោងខ្សែក្រវ៉ាត់ និងផ្លូវ។

លោក Basic បានថ្លែងថា “យើងយល់ថា គំនិតផ្តួចផ្តើមនេះ គឺជាគំនិតផ្តួចផ្តើមដ៏សំខាន់បំផុតមួយនៅលើឆាកអន្តរជាតិ ដែលនឹងរួមចំណែកដល់ការបង្កើតភាពជាដៃគូ ទូទាំងពិភពលោកលើគ្រប់វិស័យ” ។

លោក Yu Xiong សាស្ត្រាចារ្យនៅសាលាពាណិជ្ជកម្មសូរី នៅសាកលវិទ្យាល័យ University of Surrey បានមានប្រសាសន៍ថា “នៅក្នុងបរិយាកាសអន្តរជាតិស្មុគស្មាញនាពេលបច្ចុប្បន្ននេះ គម្រោងច្បាស់លាស់ នៃផែនការនាពេលអនាគត របស់ប្រទេសចិននាំមកនូវទំនុកចិត្តយ៉ាងខ្លាំង ដល់ប្រជាជនទាំងក្នុង និងក្រៅប្រទេស ដែលមានការព្រួយបារម្ភអំពីការអភិវឌ្ឍន៍របស់ប្រទេសចិន” ។

លោកសាស្ត្រាចារ្យបានមានប្រសាសន៍ថា “ប្រទេសជាច្រើនចែករំលែកចក្ខុវិស័យថាប្រទេសចិន ដែលសេដ្ឋកិច្ចរបស់ខ្លួន បានចាប់ផ្តើមងើបឡើងវិញជាបណ្តើរៗ អាចនាំ ឱ្យពួកអភិវឌ្ឍ និងប្រឈមមុខនឹងបញ្ហាប្រឈមជាបន្តបន្ទាប់ជាមួយគ្នា” ៕ Xinhua

1...2,2702,2712,272...3,256 Page 2,271 of 3,256