បុរី ប៉េង ហួត បើកលក់វីឡាកូនកាត់ ម៉ូដថ្មី LV ទីតាំងថ្មីបន្ថែម បំពេញតម្រូវការអតិថិជន

បន្ទាប់ពីបានធ្វើការបើកលក់វីឡាកូនកាត់ ម៉ូដថ្មី LV ក្នុងគម្រោងហ្គ្រេនស្តាផ្លាទីនីម ដំណាក់កាលទី ២ អេកូ ខូឡិកសិន (បឹងស្នោ) ចាប់ពីថ្ងៃទី១៥ ដល់ថ្ងៃទី១៨ ខែតុលា ឆ្នាំ ២០២០  កន្លងទៅថ្មីៗនេះ ត្រឹមតែរយៈពេលបីថ្ងៃប៉ុណ្ណោះ វីឡាកូនកាត់ LV ម៉ូតថ្មី លក់អស់រហូតដល់ ១០០% ។  ប៉ុន្តែនៅតែមានសំណូមពរបន្ថែមពីអតិថិជន ស​ម្រាប់វីឡាកូនកាត់ ប្រភេទនេះ បុរី​ ប៉េង ហួត សម្រេចបើកលក់ទីតាំងថ្មី ជាមួយការបញ្ចុះតម្លៃរហូតដល់ ១៥% ហើយចំនួនមានកំណត់ ដែលមានសុពលភាព ត្រឹមតែដំណាច’ខែវិច្ឆិកានេះតែប៉ុណ្ណោះ ។ ​

កាន់តែពិសេសជាងនេះទៅទៀត អតិថិជនមានជម្រើសក្នុងការបង់ប្រាក់ជាច្រើនប្រភេទ ជាមួយបុរីផ្ទាល់ និងធនាគារដៃគូសហការ ដែលនឹងទទួលបានអត្រាការប្រាក់សមរម្យ ចាប់ពី 4.99% ឡើងទៅ ថែមទៀតផង។

វីឡាកូនកាត់ LV ម៉ូដថ្មី គឺជាប្រភេទផ្ទះវីឡាកូនកាត់ម៉ូដថ្មី មានរចនាបថបែបសហសម័យ ជាមួយនឹងមុខងារពិសេសៗរបស់បន្ទប់នីមួយៗដែលស័ក្ដិសមឥតខ្ចោះ សម្រាប់គ្រួសារសម័យថ្មី។ វីឡាកូនកាត់ LV នេះមានទំហំធំទូលាយប្រវែង 4.2m x 10m កម្ពស់៣ជាន់ មានបន្ទប់គេង៤ និងបន្ទប់ទឹក៥។

 

នៅជាន់ផ្ទាល់ដីទាំងមូលមើលទៅឃើញ បរិវេណធំទូលាយដែលមានរចនាម៉ូតអមជាមួយដណ្តើរដ៏ទាក់ទាញ ខុសពីប្រភេទវីឡាកូនកាត់ផ្សេងៗទៀត រួមមានបរិវេណទទួលភ្ញៀវយ៉ាងស៊ីវិល័យ បរិវេណចម្អិនអាហារ និងបរិវេណទទួលទានអាហារ អាចឱ្យខ្យល់អាកាសចេញចូលបានគ្រប់គ្រាន់តាំងពីខាងមុខរហូតដល់ខាងក្រោយ រួមនឹងកន្លែងចតឡាននៅខាងមុខផ្ទះធំទូលាយថែមទៀតផង។ ចំណែកនៅជាន់ទី១ មានបន្ទប់មេគ្រួសារ ១ ដ៏សាកសម សំរាប់គ្រួសារថ្មីថ្មោង និង បន្ទប់កូនស្រី ១ ។ ឯជាន់ទី២  មានបន្ទប់គេង២ធំទូលាយ និងបន្ទប់ទឹក២ ផ្តល់ផាសុកភាព និងភាពសុខដុមរមនាដល់ការរស់នៅរបស់លោកអ្នក។

រង់ចាំដល់ពេលណាទៀត ប្រញាប់រួសរាន់ឡើង មកមុនបានជម្រើសមុន ព្រោះចំនួនមានកំណត់។ សម្រាប់ព័ត៌មានបន្ថែម សូមទាក់ទងទូរស័ព្ទលេខ 098/ 016 / 017 596 789 ឬ រង់ចាំតាមដានគេហទំព័រ Facebook បុរី ប៉េង ហួត ឬ អាចអញ្ជើញមកសាកសួរព័ត៌មាន ពីគ្រប់ការិយាល័យលក់។

សូមបញ្ជាក់ផងដែរថា វីឡាកូនកាត់ ប្រភេទថ្មីនេះ ស្ថិតក្នុងគម្រោងដ៏ធំមួយ ដែលមានឈ្មោះថា ហ្គ្រេនស្តាផ្លាទីនីម ដំណាក់កាលទី2 “អេកូ ខលឡិកសិន” គឺជាគម្រោងអភិវឌ្ឍលំនៅឋានទំនើបចម្រុះ រួមមានឧទ្យានដ៏ធំអស្ចារ្យអមទៅដោយរុក្ខជាតិចម្រុះខៀវស្រងាត់ ទីធ្លាកម្សាន្ត ហ៊ុមព័ទ្ធដោយបឹងធម្មជាតិ ផ្លូវជិះកង់ ផ្លូវរត់ហាត់ប្រាណ និងកន្លែងក្មេងលេង ដែលពោរពេញទៅដោយបរិយាកាសបែបធម្មជាតិពិតៗ ដែលនឹងផ្តល់ជូននូវ បទពិសោធន៍ថ្មីប្លែក និង ភាពសម្បូរបែបនៃការរស់នៅបែបថ្មី។

សម្ដេចតេជោ ហ៊ុន សែន ៖ ការអភិវឌ្ឍសេដ្ឋកិច្ចឌីជីថល និងសង្គមឌីជីថល មានភាពចាំបាច់បំផុតសម្រាប់ជំរុញសេដ្ឋកិច្ច

ដោយ ៖ រ៉ាណេត

ភ្នំពេញ ៖ សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានបញ្ជាក់ថា បច្ចេកវិទ្យាឌីជីថល បាន និងកំពុងដើរតួនាទីយ៉ាងសំខាន់ក្នុងការសម្របខ្លួនទៅក្នុងបរិការថ្មីនៃការរស់នៅ និងការអនុវត្តការងារដោយបានជួយសម្រួលដល់ការប្រាស្រ័យទាក់ទងគ្នាក្នុងតំបន់ និងសាកល ជាពិសេស ការតភ្ជាប់សកម្មភាពសេដ្ឋកិច្ចពាណិជ្ជកម្ម និងវិនិយោគ។

សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានមានប្រសាសន៍នៅក្នុងពិធីបើកពិព័រណ៍ចិន-អាស៊ាន លើកទី១៧ ក្រោមមូលបទ «រួមគ្នាកសាងខ្សែក្រវាត់ និងផ្លូវ និងពង្រឹងកិច្ចសហប្រតិបត្តិការសេដ្ឋកិច្ចឌីជីថល» ថា ស្ថិតនៅក្នុងកំឡុងពេលដែលកំពុងជួបវិបត្តិនៅពេលនេះ បានជំរុញឱ្យឃើញកាន់តែច្បាស់នៃភាពចាំបាត់លើការជំរូញ និងអភិវឌ្ឍន៍សេដ្ឋកិច្ច សង្គម ឌីជីថល។

សម្ដេចបានមានប្រសាសន៍បន្តទៀតថា “ប្រាកដណាស់ថា ការអភិវឌ្ឍ ការតភ្ជាប់ឌីជីថលតំបន់ និងការប្រែក្លាយសង្គមសេដ្ឋកិច្ច ឱ្យទៅជាសង្គមសេដ្ឋកិច្ចឌីជីថល និងក្លាយជាកម្លាំងចលករដ៏សំខាន់ក្នុងការស្តារសេដ្ឋកិច្ចឡើងវិញក្រោយវិបត្តិ Covid-19 និងការអភិវឌ្ឍប្រកបដោយចិរភាព និងភាពធន់នាពេលអនាគត”។

ប្រទេសចិន គឺជាប្រទេសមួយដែលដឹកមុខក្នុងការអភិវឌ្ឍវិនិយោគ និងប្រើប្រាស់បច្ចេកវិទ្យាឌីជីថលក្នុងសាកលលោក។ ក្នុងន័យនេះ ការជំរុញកិច្ចសហប្រតិបត្តិការនៅក្នុងវិស័យបច្ចេកវិទ្យាឌីជីថលក្រោមក្របខណ្ឌនៃគំនិតផ្តួចផ្ដើមខ្សែក្រវាត់ និងផ្លូវ នឹងក្លាយទៅជាប្រធានបទដ៏សំខានន់នាពេលអនាគត់។

រាជរដ្ឋាភិបាលកម្ពុជា បាន និងកំពុងលើកកម្ពស់ការធ្វើឌីជីថលលូបនីយកម្មទាំងក្នុងវិស័យផលិតកម្ម ឧស្សាហកម្ម សេវាកម្ម និងរដ្ឋាភិបាលឌីជីថល កម្ពុជានឹងដាក់ចេញនូវក្របខណ្ឌគោលនយោបាយសេដ្ឋកិច្ច និងសង្គមឌីជីថលនាពេលឆាប់ៗខាងមុខនេះ។ ដោយឡែក រាជរដ្ឋាភិបាលបានដាក់ចេញនូវវិធានការកែទម្រង់មុតស្រួចជាបន្តបន្ទាប់ ដើម្បីកែលម្អបរិយាកាសធុរកិច្ច និងវិនិយោគ រួមមាន ៖

ទី១ការដាក់ឱ្យអនុវត្តនូវថ្នាល់ចុះបញ្ជីពាណិជ្ជកម្មតាមប្រព័ន្ធអេឡិចត្រូនិក ដោយចំណាយពេលតែ៨ថ្ងៃប៉ុណ្ណោះក្នុងការបើកក្រុមហ៊ុនអាជីវកម្ម។
ទី២បានចុះកិច្ចព្រមព្រៀងពាណិជ្ជកម្មសេរីកម្ពុជា-ចិន ដែលនឹងចូលជាធរមានចាប់ពីថ្ងៃទី១ ខែមករា ឆ្នាំ២០២១។
ទី៣ ការរៀបចំផែនការមេដើម្បីអភិវឌ្ឍន៍ខេត្តព្រះសីហនុឱ្យទៅជាតំបន់សេដ្ឋកិច្ចពិសេសគំរូពហុបំណង។

ជាងនេះទៅទៀត កម្ពុជា នឹងដាកចេញនូវច្បាប់វិនិយោគថ្មី ដែលមានលក្ខណៈគ្រប់ជ្រុងជ្រោយ និងមានភាពទាក់ទាញតាមរយៈការលើកទឹកចិត្តជាកញ្ចប់ដល់ការវិនិយោគលើវិស័យឧស្សាហកម្ម អេឡិចត្រូនិក បង្គុំ កសិឧស្សាហកម្ម គ្រឿងបន្លាស់ បច្ចេកវិទ្យា និងហេដ្ឋារចនាសម្ព័ន្ធឌីជីថល។ល។ ៕

វា​គ្មឹ​នសំខាន់ៗចំនួន៤រូប​នឹង​បង្ហាញ​ពី​បច្ចុប្បន្នភាព​វិស័យ​អចលនទ្រព្យ​កម្ពុជានៅក្នុង​សិក្ខាសាលា​ពិសេស​មួយ

ដោយៈ រ៉ា​ណេ​ត

ភ្នំពេញៈ បន្ទាប់ពី​បាន​ពន្យារពេល​អស់​រយៈ​ពេល២សប្ដាហ៍​កន្លងទៅ ក្រោម​ការ​អនុវត្តតាម​ការណែនាំ​របស់​រាជរ​ដ្ឋា​ភិ​បាល ដែលមាន​សម្ដេច​តេ​ជោ ហ៊ុន សែន នាយក​រដ្ឋ​ម   ន្ត្រី​នៃ​កម្ពុជា ជា​ប្រមុខ​ដឹកនាំ ក្នុងការ​ទប់ស្កាត់ និង​លុបបំបាត់​ព្រឹត្តិការណ៍៣វិច្ឆិកា​កន្លងទៅនេះ នៅត្រឹម​រសៀល​ថ្ងៃទី១២ ខែធ្នូ ឆ្នាំ២០២០ សមាគម​អចលនទ្រព្យ​សកល (GRA) នឹង​រៀបចំ​កម្មវិធី​សិក្ខាសាលា​សាជាថ្មី​ស្ដីពី បច្ចុប្បន្នភាព​វិស័យ​អចលនទ្រព្យ ក្រោម​ការចូលរួម​ពី​សំណាក់​វាគ្មិន​ជំនាញ​ចំនួន៤រូប។

សិក្ខាសាលា​នេះ  ធ្វើឡើង​ក្នុង​គោលបំណង​បង្កើន ការយល់ដឹង​ពី​ស្ថានភាព​ជាក់ស្ដែង​នៃ​វិស័យ​អចលនទ្រព្យ​កម្ពុជា​ពិតប្រាកដ ជាពិសេស​ផ្តោតទៅលើ​ទីផ្សារ​លំនៅដ្ឋាន ទីផ្សារ​ខុន​ដូ និង​ទីផ្សារ​ដី​ឡូ​តិ៍ ក្រោម​ប្រធានបទ “បច្ចុប្បន្នភាព​អចលនទ្រព្យ​នៅ​កម្ពុជា” នៅ​សាលសន្និសីទ Factory Phnom Penh (Urban Village) នៅ​ថ្ងៃទី១២ ខែធ្នូ ឆ្នាំ២០២០ ដោយ​កំណត់​វត្តមាន​អ្នកចូលរួម​ត្រឹម២០០នាក់​តែប៉ុណ្ណោះ។

ប្រធាន​សមាគម​អចលនទ្រព្យ​សកល លោ សំ សុខ​នឿន ដែលជា​អ្នក​ផ្តួចផ្តើម​បង្កើត​សិក្ខាសាលា​នេះ បាន​មានប្រសាសន៍​នៅ​ព្រឹក​ថ្ងៃទី២៧ ខែវិច្ឆិកា ឆ្នាំ២០២០នេះ​ថា តាមរយៈ​សិក្ខាសាលា​ដ៏​មាន​សារសំខាន់​នេះ នឹងធ្វើ​ឱ្យ​អ្នកចូលរួម​មានការ​យ​ល់​ដឹង​កាន់តែច្បាស់ អំពី​ទីផ្សារ​អចលនទ្រព្យ​នៅ​កម្ពុជា ជៀសវាង​ការទទួលបាន​ព័ត៌មាន​បំផុស​ពី​ភ្នាក់ងារ​មួយចំនួន​ដែល​គ្មាន​ការពិត។

លោក​បន្តថា “យើង​ចង់ឱ្យ​អ្នកចូលរួម បាន​យល់ដឹង​កាន់តែច្បាស់​ពី​ទីផ្សារ​អចលនទ្រព្យ ដោយ​ផ្តោត​សំខាន់​ទៅលើ​ផ្នែក​បុរី​លំនៅដ្ឋាន ទីផ្សារ​ខុន​ដូ ទីផ្សារ​ដី​ឡូ​តិ៍ នាពេល​បច្ចុប្បន្ន រួម​ជាមួយនឹង​ការផ្តល់ជូន​នូវ​គន្លឹះខ្លះៗ ដែល​អាច​ជំរុញ​ដល់​ការ​អចលនទ្រព្យ​ផងដែរ” ។

លោក​បញ្ជាក់ថា ភ្នាក់ងារ​អចលនទ្រព្យ​ខ្លះ ដើម្បី​អាច​ទទួល​ប្រយោជន៍​ពី​ការលក់ បាន​បំផុស​ព័ត៌មាន​មិន​ពិត ទៅដល់​អតិថិជន​គោលដៅ​របស់ខ្លួន ហើយ​អ្នកខ្លះ​ដែល​ចង់​ចូលរួម​នៅក្នុង​ទីផ្សារ​អចលនទ្រព្យ ដោយ​ការទិញ​អចលនវត្ថុ​ទុក​លក់​បន្ត​យកចំណេញ ចេះតែធ្វើ​ឡើង​តាម​គេ ដោយ​គ្មាន​ការយល់ដឹង​ច្បាស់​វិស័យនេះ ដែល​វា​ជាការ​ប្រឈម​ខ្ពស់​ទៅនឹង​ហានិភ័យ។ ដូច្នេះអ្វីៗដែលជា​ចំណេះដឹង​ទាំងអស់នេះ នឹងមាន​បង្ហាញ​នៅក្នុង​សិក្ខាសាលា​ដែល​នឹងធ្វើ​នៅត្រឹម​ថ្ងៃទី១២ ខែធ្នូ ឆ្នាំ២០២០ ខាងមុខនេះ។

អង្គសិក្ខាសាលា​មួយ​នេះ រៀបចំឡើង​ក្រោម​កិច្ចសហការ រវាង​សមាគម​អចលនទ្រព្យ​សកល ក្រុមហ៊ុន​ភ្នាក់ងារ​អចលនទ្រព្យ Kw Sam Sn Realty Co,.Ltd និង​ក្រុមហ៊ុន​អភិវឌ្ឍន៍​គម្រោង​ខុន​ដូរ​ប្រណីត​Urban Village ក្រោម​ការចូលរួម​ធ្វើ​បទ​បង្ហាញ​ពី​សំណាក់​អ្នកជំនាញ​ចំនួន ៤រូប រួមមាន​លោក សំ សុខ​នឿន ប្រធាន​សមាគម​អចលនទ្រព្យ​សកល និង​ជា​អគ្គនាយក​ក្រុមហ៊ុន Kw Sam Sn Realty Co,.Ltd លោក​យិន លាង​គង់ អគ្គនាយក​គេហទំព័រ Propertyrea.asia លោក ឡោ វិចិត្រ អនុប្រធាន​សមាគម​អចលនទ្រព្យ​សកល​រាជធានី​ភ្នំពេញ និង​លោក​វ៉េង វណ្ណ​នី ប្រធាន​ក្រុម​ឯកទេស​លក់​ខុន​ដូ។

ដោយឡែក​លក្ខខណ្ឌ​នៃ​ការចូលរួម សម្រាប់​សិក្ខាកាម​ចុះឈ្មោះ​ចំនួន៥០នាក់​ដំបូង​ឥតគិតថ្លៃ។ ៥០នាក់​បន្ទាប់​នឹងត្រូវ​ចំណាយ១៥ដុល្លារ​ក្នុង​ម្នាក់ ហើយ១០០នាក់​បន្ទាប់​ត្រូវ​ចំណាយ២០ដុល្លារ​ក្នុង​ម្នាក់ ហើយ​ថវិកា​ដែល​ប្រមូលបាន​ទាំងអស់ នឹង​យកទៅ​បរិច្ចាក​ជូន​កម្មវិធី​មនុស្សធម៌។

ព័ត៌មាន​លម្អិត​សូម​ទាក់ទង​តាមរយៈ​ទូរស័ព្ទ​លេខ ៖ ០៩៣ ៣១០ ៧៣៧ / ០៧៧ ៣៩១ ០០០ ៕

ទីក្រុង Quito នៃ​ប្រទេស​អេ​ក្វា​ឌ័​រ​នឹងមាន​អគារ​លំនៅឋាន​ខ្ពស់​ជា​លើកដំបូង

ដោយ ​វុត្ថា

ពិភពលោកៈ ទីក្រុង Quito នៃ ប្រទេស​អេ​ក្វា​ឌ័​រ  នឹង​សាងសង់​អគារ​លំនៅឋាន​ប្រើប្រាស់​ចម្រុះ​ជា​លើកដំបូង​រស់​ខ្លួន ដែល​រចនា​ប្លង់​ដោយ​ស្ថាបត្យករ លោក Carlos Zapata ដែល​គ្រោង​សាងសង់​នៅ​ទីតាំង ស្ថិតនៅ​ផ្នែក​ខាងជើង​នៃ​ឧទ្យាន La Carolina។

លោក Carlos Zapata បាន​រចនា​អគារ​នេះ បាន​ក្លាយជា​អគារ​ខ្ពស់​ជាងគេ​មួយ​ក្នុងចំណោម​ទីក្រុង​នានា​របស់​ប្រទេស​អេ​ក្វា​ឌ័​រ ។ អគារ​នេះ​មាន២៤ជាន់ មាន​ទាំង​អាង​ហែល​ទឹក​រួម និង​កន្លែង​លំហែកាយ​ក៏ដូចជា​សួន​ដ​ឆើតឆាយ។ អគារ​ថ្មី​ត្រូវ​នេះ បាន​បង្កើតឡើង ដើម្បី​បើកចំហ​ជើងមេឃ​របស់​ទីក្រុង Quito និង គយគន់​ទេសភាព​ពីលើ​ភ្នំ Andes ។

អគារ​នេះ មាន​លក្ខណៈ​ប្លែក​ខុសពី​គេ ហើយ​មាន​អា​ផាត​ម៉ិ​ន​ចំនួន៩៩យូ​នី​ត ដែលមាន​ជញ្ជាំង​បំពាក់​កញ្ចក់ និង​អាលុយមីញ៉ូម​ដើម្បី​បង្កើន​ប្រសិទ្ធភាព​ពន្លឺ និង​ភាព​ឯកជន​នៅក្នុង​អា​ផាត​មិន។

លោក Carlos Zapata បានឱ្យដឹងថា “ ក្នុងនាម​ជា​អគារ​លំនៅដ្ឋាន​ដំបូងបង្អស់​នៅ​ប្រទេស​អេ​ក្វា​ឌ័​រ នឹងត្រូវ​សាងសង់​ន​ក្នុង​ទីក្រុង Quito ក្បែរ​ជ្រលង​ភ្នំ​ព័ទ្ធជុំវិញ និង​ជា​កន្លែង​ដែល​មមាញឹក​នៃ​ការធ្វើដំណើរ ព្រម​ជាមួយនឹង​តំបន់​បៃតង” ។ លោក​បន្តថា “អគារ​នេះ​នឹង​ក្លាយជា​តំណាង​របស់​ទីក្រុង  និង​ក្រសោប​យក​តំបន់​ជុំវិញ និង​សហគមន៍​ប្រកបដោយ​ថាមពល” ។

អគារ​នេះ​រចនា​ប្លង់​ឡើង មាន​លក្ខណៈពិសេសប្លែកៗជាច្រើន រួមទាំង​អាង​ហែល​ទឹក​នៅ​ខាងក្រោម និង​អាង​ហែល​ទឹក​នៅលើ​ដំបូល បន្ទប់​ហាត់ប្រាណ ដែលមាន​ស្ទូ​ឌី​យោ​វិល ស្ប៉ា សូ​ណា បន្ទប់​ចំហុយ និង​បន្ទប់​ម៉ាស្សា។ ក្រៅពីនេះ​ក៏​កន្លែង​កំសាន្ត និង​កន្លែង​សាច់​អាំង​សាច់ កន្លែង​លេង​ហ្គេម និង​កន្លែង​សម្រាប់​កុមារ​លេង កន្លែង​មើល​កុន មជ្ឈមណ្ឌល​ពាណិជ្ជកម្ម​ក៏ដូចជា​កន្លែង​ទទួលភ្ញៀវ៕

សំណង់​ប្រកប​អាជីវកម្ម​ទេសចរណ៍​ក្នុង​ខេត្ត​កែប​មិនមាន​ច្បាប់​អាច​ប្រឈមនឹង​ការផ្អាក​អាជីវកម្ម

ដោយ ហ្សូ​លី

កែបៈ មន្ទីរ​ក្រសួង​ដែនដី នគររូបនីយកម្ម និង​សំណង់​ខេត្ត​កែប នឹង​ចាប់ផ្តើម​ចាត់វិធានការ​តឹងរឹង​ទៅលើ សំណង់​សម្រាប់​អាជីវកម្ម​ទេសចរណ៍ ដែល​សាងសង់​គ្មាន​ច្បាប់​ត្រូវគោរព​ច្បាប់​ឲ្យ​បាន​គ្រប់គ្នា។

អភិបាល​នៃ​គណៈ​អភិបាលខេត្ត​កែប លោក សោម ពិសិដ្ឋ បាន​មានប្រសាសន៍​ក្នុង​កិច្ចប្រជុំ​នេះ គណៈកម្មការ​រដ្ឋបាល​ពិនិត្យ ពិភាក្សា​លើ​លទ្ធផល​នៃ​ការវាស់វែង​ដីធ្លី​ចុះបញ្ជី​ជា​លក្ខណៈ​ប្រព័ន្ធ នៅ​ភូមិ​កោះ​សោម ឃុំ​អង្កោល ស្រុក​ដំណាក់​ចង្អើរ ខេត្ត​កែប កាលពី​រសៀល​ថ្ងៃទី២៦ ខែវិច្ឆិកា ឆ្នាំ២០២០កន្លងមក ដោយបាន​ណែនាំ​ដល់​ប្រធាន​មន្ទីរ​រៀបចំ​ដែនដី នគររូបនីយកម្ម និង​សំណង់ ជាពិសេស​អាជ្ញាធរ​ក្រុង-ស្រុក ត្រូវ​ចុះ​ត្រួតពិនិត្យ​ឡើងវិញ​នៅផ្ទះ​សំណាក់ សណ្ឋាគារ បឹង​កា​ឡូ មិនមាន​ច្បាប់​នានា ដែល​កំពុង​ធ្វើ​អាជីវកម្ម ដោយ​ត្រូវ​ជូនដំណឹង​ឲ្យ​ម្ចាស់​សំណង់​បានដឹងថា បើ​នៅ​រឹងទទឹង​មិន​គោរព​តាមច្បាប់ នឹងត្រូវ​ផ្អាក​អាជីវកម្ម​តែម្តង។

លោក​បញ្ជាក់ថា “បច្ចុប្បន្ននេះ​ផ្ទះសំណាក់ សណ្ឋាគារ​មាន​រាប់រយ​កន្លែង យើង​មិនអាច​ចាំបាន​អស់នោះ​ទេ ដូចនេះ​ការជំរុញ​ឲ្យ​ពួកគាត់ គោរព​តាមច្បាប់​ទម្លាប់​នានា គឺ​ផ្តល់​ភាពងាយស្រួល​សម្រាប់​អាជ្ញាធរ​ក្នុងការ​គ្រប់គ្រង” ។

អភិបាលខេត្ត​រូបនេះ​បន្តថា លោក​មិន​តឹងតែង​ទេ ចំពោះ​អ្នក​ដែល​ចង់​មក​អភិវឌ្ឍន៍ តែ​ត្រូវមាន​ច្បាប់ទម្លាប់​ត្រឹមត្រូវ និង​ធ្វើ​ដោយ​ប្រាកដប្រជា។ លោក​ថា លោក​ក៏​មិន​ចង់ទុក​ឲ្យ​ទីតាំង​មួយ​នៅ​ទំនេរ ដោយ​មិន​ផ្តល់​ផល​អី​សោះ​ដល់​ពលរដ្ឋ​ក្នុង​តំបន់​នោះទេ។ ដូចនេះ​ត្រូវ​ចាត់ចែង​អភិវឌ្ឍន៍ ដោយ​ប្រៀបធៀប​សេដ្ឋកិច្ច ជីវភាព​ប្រជាជន ចំពោះ​ទីតាំង​ដែល​ត្រូវ​អភិវឌ្ឍន៍ តើ​ផ្តល់​ផល​អ្វីខ្លះ​ឲ្យ​ពលរដ្ឋ បើ​យើង​ទុក​កន្លែង​នោះ​ឲ្យ​នៅ​ទំនេរ។

លោក​បាន​លើក​ឧទាហរណ៍ ករណី​រំលោភ​យក​ដី​គម្រប​ព្រៃឈើ សហគមន៍​អ្នកតា​ឈរ នៅ​តំបន់ភ្នំ​វ​ល្លិ៍ ហើយ​សង់​បឹង​កា​ឡូ​នៅលើ​នោះ ដោយ​លោក​អភិបាលខេត្ត បានដាក់​ជា​សំណួរ​ថា ពេលនេះ​អង្ករ​ក្លាយទៅជា​បាយ​ទៅហើយ តើ​ត្រូវ​វាយកម្ទេច​ចោល ឬ​យ៉ាងណា?

លោក​អភិបាលខេត្ត​កែប ចោទ​សួរថា “តើ​យើង​ចង់បាន​ការអភិវឌ្ឍរ​ក្សា អភិរក្ស​ឬក៏​អភិរក្ស​គាំទ្រ​នូវ​ការអភិវឌ្ឍ?” ៕

ក្រសួងទេសចរណ៍៖ ប៉ូល​ទេសចរណ៍ធំ៦ត្រូវបាន​កំណត់​ក្នុង​ផែនការមេ​អភិវឌ្ឍន៍​ទេសចរណ៍​ខេត្តមណ្ឌលគិរី

ដោយ​វុត្ថា

ភ្នំពេញៈ ផែនការ​អភិវឌ្ឍ​ប៉ូល​ទេសចរណ៍ធំៗចំនួន៦ ត្រូវបាន​គណៈកម្មការ​អន្តរក្រសួង​ជ្រើសរើស​កំណត់ និង​ដាក់បញ្ចូល​ក្នុង​ផែនការមេ​អភិវឌ្ឍន៍ វិស័យ​ទេសចរណ៍​ខេត្តមណ្ឌលគិរី​ឆ្នាំ២០២០-២០៣៥ ខណៈ​តំបន់​ប៉ូល​ទេសចរណ៍​ទាំងនេះ មាន​ទីតាំង​ភូមិសាស្ត្រ និង​សក្ដានុពលសំខាន់ផ្សេងៗគ្នា។

លោ​ជុក ជំនោរ ប្រធាន​នាយកដ្ឋាន​អភិវឌ្ឍន៍​ផលិតផល​ទេសចរណ៍​បាន​ថ្លែង​យ៉ាង​ដូច្នេះ​ក្រោយ​បញ្ចប់​កិច្ចប្រជុំ​គណៈកម្មការ​អន្តរក្រសួង ដើម្បី​ពិគ្រោះ​យោបល់​លើ​សេចក្ដីព្រាង​លើក​ទី៣ នៃ​ផែនការមេ​អភិវឌ្ឍន៍​វិស័យ​ទេសចរណ៍ ខេត្តមណ្ឌលគិរី ក្រោម​អធិបតីភាព​លោក ថោង ខុន រដ្ឋមន្ត្រី​ក្រសួងទេសចរណ៍ នា​ថ្ងៃទី២៦ ខែវិច្ឆិកា ឆ្នាំ២០២០ នៅ​ទី​ស្ដី​ក្រសួងទេសចរណ៍។

លោក​បន្តថា ក្នុង​កិច្ចប្រជុំ​ខាងលើនេះ​អង្គប្រជុំ​បាន​ពិគ្រោះ និង​លើកឡើង​យោបល់​ជាច្រើន ដើម្បី​ជា​ធាតុ​ចូល​បន្ថែម​ពាក់ព័ន្ធ នឹង​វិស័យ​ទឹកស្អាត អគ្គស​នី កសិកម្ម រ៉ែ និង​ថាមពល អគ្គិសនី ដែនដី អាកាសយានដ្ឋាន សហគ្រាស​ធន​តូច និង​មធ្យម ហេ​ដ្ឋា​រចនា​សម្ពន្ធ ការរៀបចំ​នូវ​នវានុវត្តន៍ អាកាសធាតុ សោភ័ណភាព​វាលស្មៅ និង​ព្រៃព្រឹក្សា ទីក្រុង​វៃឆ្លាត​ជាដើម ដើម្បីឱ្យ​គោលដៅ​ទេសចរណ៍​ខេត្តមណ្ឌលគិរី ក្លាយទៅជា​គោលដៅ​ទេសចរណ៍​លំដាប់​អន្តរជាតិ និង​ដើម្បី​ឱ្យមាន​លក្ខ​ណៈស​ង្គ​ត​ភាព។

លោ​រដ្ឋមន្ត្រី ថោង ខុន បានឱ្យដឹងថា ការបំពេញ​នូវ​ធាតុ​ចូល​ទាំងនេះ គឺ​ដើម្បី​ចូលរួម​អភិវឌ្ឍ​វិស័យ​ទេសចរណ៍ នៅ​ខេត្តមណ្ឌលគិរី ឱ្យ​កាន់​តែមាន​ភាព​ទាក់ទាញ សំដៅ​ទាក់ទាញ​ភ្ញៀវទេសចរ​អន្តរជាតិ នឹង​កើនឡើង​ប្រមាណ៩០ម៉ឺន​នាក់ និង​ភ្ញៀវទេសចរ​ក្នុងស្រុក​ប្រមាណ​ជាង២លាន​នាក់​ផងដែរ​នៅ​ឆ្នាំ២០៣៥ ជាមួយនឹង​ការអភិវឌ្ឍ​ផលិតផល​ទេសចរណ៍ថ្មីៗស្របតាម​ស្មារតី​នៃ​ផែនការ​មេនេះ។

លោក​រដ្ឋមន្ត្រី​បានបញ្ជាក់​បន្ថែមថា “នៅក្នុង​ផែនការមេ​អភិវឌ្ឍន៍​វិស័យ​ទេសចរណ៍​ខេត្តមណ្ឌលគិរី​នេះ បាន​បែងចែក​ប៉ូល​ទេសចរណ៍ធំៗចំនួន៥ ទៅតាម​ទីតាំង​ភូមិសាស្ត្រ និង​សក្ដានុពល​ផ្សេងគ្នា” ។

ទីតាំង​ទាំងនោះ​រូ​ម​មានដូចជា

*តំបន់​អេកូ​ទេសចរណ៍​ក្នុង​ដែនជម្រកសត្វព្រៃៈ ដោយសារ​នៅក្នុង​ខេត្តមណ្ឌលគិរី​មាន​ដែនជម្រកសត្វព្រៃ​ចំនួន៥ ដែល​ស្ថិតក្រោម​ការគ្រប់គ្រងរ​បស់​ក្រសួងបរិស្ថាន និង​ពោរពេញ​ដោយ​សក្ដានុពល​ក្នុង​វិស័យ​អេកូ​ទេសចរណ៍។

*តំបន់​របៀង​អេកូ​ទេសចរណ៍ និង​ទេសចរណ៍​ជនជាតិដើម​ភាគ​តិ​ចៈ ដែល​ប៉ូល​ទេសចរណ៍​ទី​ពីរ​នេះ នឹងត្រូវ​ភ្ជាប់​ពី​តំបន់​ប៊ូ​ស្រា​ទៅកាន់​តំបន់​ដាក់​ដាំ។

* តំបន់​ក្រុង​សែន​មនោរ​ម្យៈ នឹង​អភិវឌ្ឍ​ក្រុង​នេះ​ទៅជា​តំបន់ អភិវឌ្ឍន៍​ពហុ​បំណង ដែលមាន​សកម្មភាព​ក​ម្សា​ន្តផ្សេងៗមាន​លក្ខណៈ​សម្បូរបែប។

*តំបន់​ប្រជុំជន​ស្រុក​កោះ​ញែកៈ មាន​សក្ដានុពល​ជា​តំបន់​ក​សិ​ទេសចរណ៍ ពិសេស​អាច​រៀបចំ​ជា​ចំណត​យន្តហោះ​លើទឹក (Water Plan) នៅ​ទន្លេស្រែពក​នៃ​ស្រុក​កោះ​ញែក។ ថ្វី​ដ្បិត​ទន្លេស្រែពក មិន​អំណោយផល​ដល់​ការធ្វើ​នាវាចរ​ទេសចរណ៍ ឬ​ដឹកជញ្ជូន​មិនបាន​ក៏ពិតមែន (ដោយសារ​សម្បូរ​ថ្ម​ប៉ប្រះ​ទឹក) តែ​គេ​អាច​រៀបចំ​ជា​ចំណត​យន្ត​លើទឹក​ដូច​បណ្ដា​ប្រទេស​មួយចំនួន ដែល​ឱ្យ​យន្តហោះ​ហោះហើរ​មកកាន់​តំបន់​បឹង​ទន្លេសាប ឬ​ទៅកាន់​កោះរ៉ុង​បាន​ទៀតផង។

* តំបន់​អាកាសយានដ្ឋាន​មណ្ឌលគិរី នៅ​ស្រុក​អូររាំង៖ ដែល​នឹងត្រូវ​អភិវឌ្ឍ​ជាទី​ក្រុង​រណប​នៃ​ក្រុង​សែន​មនោ​រម្យ។

* តំបន់ស​មា​ហណកម្ម​ច្រកទ្វារព្រំដែនៈ នៅ​ខេត្តមណ្ឌលគិរី​មាន​ច្រកទ្វារព្រំដែន​ទ្វេភាគី​ជាមួយ​វៀតណាម​ចំនួន៤កន្លែង ដែល​អាច​ជំរុញឱ្យមាន​សកម្មភាព​អភិវឌ្ឍន៍ និង​ទេសចរណ៍​នៅតាម​ច្រកព្រំដែន​នេះ។

លោក​ថោង ខុន បាន​បន្តថា ក្រោយ​ទទួលបាន​ការផ្ដល់​យោបល់​ខាងលើ​នេះហើយ ក្រុមការងារ​ជំនាញ នឹង​សរសេរ​បន្ថែម​នូវ​ធាតុ​ចូលសំខាន់ៗមួយចំនួនទៀត ពី​អន្តរក្រសួង-ស្ថាប័ន ដើម្បី​រៀបចំ​ជា​សេចក្ដីព្រាង​ចុងក្រោយ នឹង​បន្ត​ដាក់ជូន​គណៈកម្មការ​អភិវឌ្ឍ​ទេសចរណ៍​ថ្នាក់ជាតិ​នៅ​ចុងខែ​ធ្នូ ឆ្នាំ២០២០ ។ បន្ទាប់ពី​បាន​ឯកភាព​ពី​គណៈកម្មការ​នេះហើយ នឹង​បន្ត​ដាក់​ឆ្លង​រាជរដ្ឋាភិបាល​នៅ​ដើមឆ្នាំ២០២១ខាងមុខ​តែម្ដង៕

វិស័យ​អចលនទ្រព្យ​នៅតែ​ទទួលបាន​ឥណទាន​សម្រាប់​ជម្រុញ​ចរន្ត​ទីផ្សារ

ដោយ​លក្ខិណា

ភ្នំពេញៈ បើទោះបីជា​វិស័យ​អចលនទ្រព្យ​នៅ​កម្ពុជា បាន​ទទួលរង​ឥទ្ធិពល​ពី​វិបត្តិ​កូ​វីដ១៩ក្ដី តែ​វិស័យនេះ​នៅតែ​ទទួលបាន​ការផ្ដល់​ឥណ​ទាន​ពី​ធនាគារ សម្រាប់​អភិវឌ្ឍន៍ ដែល​ខុសពី​ប្រទេសមួយ​ចំនួន​ដូចជា​ថៃ​ជាដើម ធនាគារ​មិនបាន​ផ្ដល់​ឥណទាន​នោះទេ បើទោះបីជា​មានទ្រព្យ​បញ្ចាំ​ក្ដី។

លោក​ច្រឹ​ក សុខ​នី​ម ប្រធាន​សមាគម​អ្នកវាយតម្លៃ និង​ភ្នាក់ងារ​អចលនវត្ថុ​កម្ពុជា បាន​មានប្រសាសន៍​ឲ្យ​ដឹង​តាម​ទូរស័ព្ទ នា​រសៀល​ថ្ងៃទី២៥ វិច្ឆិកា​កន្លងមក​ថា វិស័យ​អចលនទ្រព្យ​នៅ​កម្ពុជា​នៅតែមាន​ដំណើរការ និង​មិនទាន់​មានការ​គាំង​ធ្ងន់ធ្ងរ​នោះទេ ដែល​ធ្វើឱ្យ​វិស័យនេះ អាច​ទទួលបាន​កម្ចី​សម្រាប់​អភិវឌ្ឍន៍​ជា​បន្តបន្ទាប់ ។ ម្យ៉ាងទៀត​តាម​តួលេខ​ដែល​បានបង្ហាញ ពី​ការកើនឡើង​នៃ​ឥណទាន សម្រាប់​វិស័យ​អចលនទ្រព្យ  ដោយ​តែ​ផែនការ​កម្ចី​ខ្លះ បានធ្វើ​តាំង​ចុងឆ្នាំ២០១៩ ឬ​ដើមឆ្នាំ២០២០ ដែល​មិនទាន់មាន​ការរីក​រាល​ដាល​ខ្លាំង​នៃ​ជំងឺ​កូ​វីដ១៩នៅក្នុង​ប្រទេស​កម្ពុជា​នៅឡើយ។

លោក​បន្តថា “រហូតមកដល់​ពេលនេះ វិស័យ​អចលនទ្រព្យ​មិនទាន់មាន​សញ្ញា​នៃ​ការដួលរលំ​នោះទេ ដូច្នេះ​ការបន្ត​នៃ​ការផ្ដល់​ឥណទាន វា​ជាមាន​ភាពជឿជាក់​របស់​ធនាគារ ទៅលើ​វិស័យ​អចលនទ្រព្យ” ។ លោក​បន្តថា “វិស័យនេះ​នៅតែ​បន្តដំណើរ​ទៅមុខទៀត។ ម្យ៉ាងទៀត​តម្លៃ​អចលនទ្រព្យ​នៅក្នុង​ប្រទេស​កម្ពុជា មិនទាន់មាន​ការធ្លាក់​ចុះ​នោះទេ នៅតែមាន​តម្លៃ​ខ្ពស់​នៅឡើយ ដែល​ធ្វើឱ្យ​ធនាគារ​នៅតែ​ប​ន្យ​ផ្ដល់​ឥណទាន​ទៅកាន់​វិស័យនេះ​បាន​ដដែល” ។

បើតាម​លោក​បណ្ឌិត​អ៊ិន ចាន់នី​ប្រធាន​សមាគម​ធនាគារ​នៅ​កម្ពុជា​បានឱ្យដឹងថា វិស័យ​ធនាគារ​មកដល់ពេលនេះ មាន​ភាព​ងើប​ឡើងវិញ ដោយសារតែ​ការសង្គ្រោះ​របស់​រាជរដ្ឋាភិបាល​ទៅលើ​វិស័យ​ឯកជន ក៏ដូចជា​វិស័យ​ធនាគារ។ បន្ទាប់ពី​រាជរដ្ឋាភិបាល បានប្រកាស ឱ្យជួយ​ទប់​ស្គា​ត់​ការធ្លាក់ចុះ​នៃ​វិស័យ​ធានា​គារ និង​មីក្រូហិរញ្ញវត្ថុ​បានរៀបចំ​ឥណទាន​ឡើងវិញ ដើម្បី​ជួយ​សម្រួល់​អតិថិជន​ដែល​រង​ផលប៉ះពាល់​ពី​កូ​វីដ១៩ ។

លោក​បន្តថា “តាម​សន្ទុះ​នៃ​ងើប​ឡើងវិញ​នៃ​វិស័យ​ធនាគារ នៅ​រយៈពេល​ប៉ុន្មាន​ខែ​ចុង​ក្រោយនេះ វា​អាចនឹងទទួល​បាន​ប្រាក់ចំណេញ​ខ្ពស់ជាង​ឆ្នាំមុន ហើយក៏​ជា​រឿង​អ​ស្ចា រ្យ​មួយ ដែល​អាច​ធ្វើបាន​ក្នុងពេលដែល​វិស័យផ្សេងៗទៀត ទទួលរង​ឥទ្ធិពល​កូ​វីដ១៩” ៕

កម្ពុជា​ត្រៀម​រៀបចំ​វេទិកា “សេដ្ឋកិច្ច និង​ធុរកិច្ច​អាស៊ី-អឺរ៉ុប​លំដាប់​ពិភពលោក​លើក​ទី១”  

ដោយ ​វ​ឌ្ឈ​នា

ភ្នំពេញៈ ក្រសួងពាណិជ្ជកម្ម បានរៀបចំ​កិច្ចប្រជុំ​ពិភាក្សា​អំពី​វឌ្ឍនភាព​ការងារ​របស់​គណៈកម្មកា​រ លេខាធិការដ្ឋាន និង​ក្រុមការងារ​សម្រាប់​ត្រៀម​រៀបចំ​វេទិកា “សេដ្ឋកិច្ច និង​ធុរកិច្ច​អាស៊ី-អឺរ៉ុប លើក​ទី១” ។

លោក​ប៉ាន សូរ​ស័ក្ដិ រដ្ឋមន្ត្រីក្រសួង​ពាណិជ្ជកម្ម​នៅ​ព្រឹក​ថ្ងៃទី២៦ ខែវិច្ឆិកា ឆ្នាំ២០២០ នេះ​បាន​មានប្រសាសន៍ថា វេទិកា​សេដ្ឋកិច្ច និង​ធុរកិច្ច​អាស៊ី-អឺរ៉ុប​លើក​ទី១ ដែល​ក្រសួងពាណិជ្ជកម្ម​បាន​ត្រៀ​ម​រៀបចំ គឺជា​វេទិកា​របស់​អ្នកដឹកនាំ​អាជីវកម្ម មកពី​ទ្វីបអាស៊ី និង​ទ្វីបអឺរ៉ុប ក្នុង​គោលបំណង​ដើម្បី​រួមចំណែក ពង្រឹង​ទំនាក់ទំនង​ពាណិជ្ជកម្ម និង​វិនិយោគ​រវាង​ប្រទេស​ក្នុង​តំបន់​ទាំងពីរ (អាស៊ី និង​អឺរ៉ុប) ។

កិច្ចប្រជុំ​វឌ្ឍនភាព​ស្ដីពី ការត្រៀម​រៀបចំ​វេទិកា​សេដ្ឋកិច្ច និង​ធុរកិច្ច​អាស៊ី-អឺរ៉ុប​លើក​ទី១នេះ មានការ​ចូលរួម​ធ្វើ​បទ​បង្ហាញ​ពី​ក្រុមការងារ​ទាំង៣ គឺ១-ក្រុមការងារ​ឯកសារ និង​ផ្សព្វផ្សាយ​ព័ត៌មាន ២-ក្រុមការងារ​ពិធីការ រៀបចំ​កន្លែង​ប្រជុំ ដឹកជញ្ជូន សិល្បៈ និង​សន្តិសុខ និង៣-ក្រុមការងារ​ផ្នែក​ផ្គត់ផ្គង់ និង​ហិរញ្ញវត្ថុ ដោយ​ផ្ដោតជាសំខាន់​ទៅលើ៖ ការពិនិត្យ កែសម្រួល​ខ្លឹមសារ​ឯកសារ​ពាក់ព័ន្ធ នឹង​ការរៀបចំ​វេទិកា​សេដ្ឋកិច្ច និង​ធុរកិច្ច​អាស៊ី-អឺរ៉ុប​ដែល​កម្ពុជា​គ្រោង​នឹងធ្វើ​នៅពេល​ខាងមុខ។

លោក​រដ្ឋមន្ត្រី​បាន​បន្ដថា ចំពោះ​វឌ្ឍនភាព​ការងារ​ពិធីការ រៀបចំ​កន្លែង​ប្រជុំ ដឹកជញ្ជូន សិល្បៈ និង​សន្តិសុខ ក្រុមការងារ​បាន​បែង​ចែកជា៨គឺ ទី១ ក្រុមការងារ​សម្របសម្រួល ទី២ ក្រុមការងារ​ឯកសារ និង​ផ្សព្វផ្សាយ​ព័ត៌មាន ទី៣ ក្រុម​បង្ហាញ​ផលិតផល និង​តែង​លម្អ ទី៤ ក្រុមមន្ត្រី​ទំនាក់ទំនង ទី៥ ក្រុម​សិល្បៈ  ទី៦ ក្រុម​សន្តិសុខ ទី៧ ក្រុម​ដឹកជញ្ជូន ទី៨ ក្រុម​ពិធីការ ដោយ​ក្នុងនោះដែរ​ក្រុមការងារ​ផ្នែក​ផ្គត់ផ្គង់ និង​ហិរញ្ញវត្ថុ បានដាក់​លិខិត​ជូនទៅ​ក្រសួងការបរទេស និង​សហប្រតិបត្តិការ​អន្តរជាតិ​រួចហើយ នៅ​រង់ចាំតែ​ការឆ្លើយតប​ពី​ក្រសួង​តែប៉ុណ្ណោះ។

លោក​រដ្ឋមន្ត្រី​បាន​សង្កត់ធ្ងន់ថា កិច្ចប្រជុំ​កំពូល​អាស៊ី-អឺរ៉ុប​លើក​ទី១៣ ពិត​ជាមាន​សារៈសំខាន់​ណាស់​សម្រាប់​ប្រទេស​កម្ពុជា មិន​ថា​ផ្នែក​នយោបាយ សេដ្ឋកិច្ច ឬ​វប្បធម៌​ឡើយ ហើយ​បច្ចុប្បន្ន ASEM មាន​ដៃគូរ​ចំនួន៥៣ ក្នុងនោះ២១ប្រទេស​មកពី​អាស៊ី ៣០ប្រទេស​មកពី​អឺរ៉ុប និង​អគ្គលេខាធិការដ្ឋាន​អាស៊ាន ព្រមទាំង​សហភាព​អឺរ៉ុប លើសពីនេះ ASEM បាន​ដើរតួនាទី​យ៉ាងសំខាន់​ក្នុងការ​លើកកម្ពស់​ភាព​ជា​ដៃគូរ និង​កិច្ចសហប្រតិបត្ដិការ​អា​ស៊ី-អឺរ៉ុប ដើម្បី​លើកកម្ពស់​សន្ដិភាព វិបុលភាព​សេដ្ឋកិច្ច និង​វឌ្ឍនភាព​សង្គម។

លោក​បញ្ជាក់ថា ប្រធានបទ​នៃ​ការរៀបចំ​វេទិកា​សេដ្ឋកិច្ច និង​ធុរកិច្ច​អាស៊ី-អឺរ៉ុប យើង​បានសម្រេច​កំណត់​យក​ចំណងជើង​ថា “LEVERAGING GLOBAL VALUE CHAIN AND  MULTILATERALISM FOR INCLUSIVE GROWTH IN THE 4IR AND NEW NORMAL TRANSITION” ។ ក្រុមការងារ​ក៏បាន​ត្រៀម អញ្ជើញ​វាគ្មិន​ជាតិ និង​អន្ដរជាតិ​ដែលជា CEO និង Moderator ដែលមាន​បទពិសោធន៍ មាន​កេ​រិ៍ត​ឈ្មោះ និង​ទទួលជោគជ័យ​ក្នុង​អាជីវកម្ម​ទាំង​លើ​ឆាក​ជាតិ និង​អន្តរជាតិ ជាពិសេស​តាម​បណ្តា​ស្ថានីយទូរទស្សន៍​មួយចំនួន ទាំង​នៅក្នុង​តំបន់​អាស៊ី និង​អឺរ៉ុប។

ម្យ៉ាងទៀត ដោយ​បច្ចុប្បន្ន​ស្ថិតក្នុង​បរិការណ៍ នៃ​ការ​រាតត្បាត​ជំងឺ COVID-19 ក្រុមការងារ​ក៏បាន​គិតគូ​ពី​ឧបករណ៍​សុវត្ថិភាព ដើម្បី​ត្រៀម​រៀបចំ​កិច្ចប្រជុំ​ដ៏​មាន​សារៈសំខាន់​នេះ ព្រមទាំង​ចំនួន​ភ្ញៀវ​ចូលរួម បន្ទប់​ប្រជុំ គម្លាត​សុវត្ថិភាព ម៉ាស ទឹក​អាល់កុល ឬ​ជែ​ល​លាងដៃ និង​ឧបករណ៍​ថត​សីតុណ្ហភាព ដោយ​អនុលោម​តាម​វិធានការ​របស់​ក្រសួងសុខាភិបាល​ផងដែរ៕

តម្លៃ​នៃ​ការដឹកជញ្ជូន​ទំនិញ​តាម​នាវា​មានការ​កើនឡើង​ខ្ពស់​ដោយសារ​កំនើននៃ​ការនាំចេញ​របស់​ចិន

ដោយ​វុត្ថា

ភ្នំពេញៈ ចាប់តាំងពី​ខែតុលា រហូតមកដល់​ពេលបច្ចុប្បន្ន​នេះ តម្លៃ​ឡើង​នៃ​ការដឹកជញ្ជូន​តាមផ្លូវ​ទឹក មាន​ការឡើង​ខ្ពស់​គួរឱ្យកត់សម្គាល់ ដោយសារតែ​ប្រទេស​ទេស​ចិន​មាន​ការនាំ​ចេញទៅ​ក្រៅប្រទេស​មាន​ច្រើន និង​តម្រូវការ​ច្រើន។

លោក​ឧកញ៉ា ស៊ិន ច​ន្ធី ប្រធាន​សមាគម​ភស្តុភារ​កម្ម​កម្ពុជា បានឱ្យដឹង​កាលពី​ថ្ងៃទី ២៦ ខែវិច្ឆិកា ម្សិលមិញ​នេះ​ឱ្យដឹងថា ប្រទេស​ចិន​ភាគច្រើន​បាន​នាំចេញ​ទៅកាន់​ប្រទេស​អាមេរិក អឺរ៉ុប និង​ប្រទេស​មួយចំនួនទៀត​នៅលើ​ពិភពលោក  ដោយសារ​ប្រទេស​ទាំងនេះ បាន​បញ្ជា​ទិញ​ច្រើន ខណៈ​ត្រឡប់មកវិញ គឺ​មិន​មានការ​ផ្ទុកទំនិញ​ទេ ដែលជា​បញ្ហា​ធ្វើឱ្យ​ការដឹកជញ្ជូន​តាមផ្លូវ​ទឹក​មាន​កំណើន​ខ្ពស់ ។

លោក​ឧកញ៉ា​បន្តថា  កាលពី​ខែ​មិនា និង​មេសា តម្រូវការ​នៅតាម​កំពង់ផែ និង​នៅតាម​ប្រទេសមួយ​ចំនួន​មាន​តម្រូវការ​តិចតួច និង​កំពង់ផែ​ខ្លះទៀត​កាត់បន្ថយ​បុគ្គលិក ព្រមទាំង​កាត់បន្ថយ​ជើងកា​ប៉ាល់​ជាដើម ដែលជា​បញ្ហា​ធ្វើឱ្យ​មានតម្លៃ​ខ្ពស់​ផងដែរ។លោក​បញ្ជាក់​ទៀ​ថា នាវា​ដឹកទំនិញ​ពី​ប្រទេស​ចិន​មកកាន់​កម្ពុជា ក្នុង​មួយ​កុង​តឺ​នើ​រ​មានតម្លៃ​ប្រមាណ៦០០ដុល្លារ​កាលពី​ពេលមុន ប៉ុន្តែ​បច្ចុប្បន្ននេះ​កើន​ដល់២០០០ដុល្លារ ឬ​ច្រើនជាង​នេះ ដែល​ស្ថានភាព​នេះ អាច​នឹង​អូសបន្លាយ​រហូតដល់ ខែកុម្ភៈ  និង​ខែមេសា ឆ្នាំ ២០២១ ខាងមុខ​ទើប​ល្អប្រសើរ​ឡើងវិញ។

លោក​ឧកញ៉ា​ថ្លែងថា “យើង​ក៏បាន​លើកឡើង​បញ្ហា​នេះ ជាមួយ​ភាគី​ពាក់ព័ន្ធ​ដែរ ប៉ុន្តែ​មិនអាច​ធ្វើ​អ្វី​បាន​នោះទេ និង​គ្មាន​ជម្រើស ព្រោះ​ពេលនេះ​នាវា​មាន​មូលហេតុ​ច្បាស់លាស់ មាន​តម្រូវការ​ខ្ពស់ និង​ក្រុមហ៊ុន​នាវា​មួយចំនួន​ក្ស័យធន” ។

លោក​ឧកញ៉ា​បញ្ជាក់​ទៀ​ថា កាលពី​អំឡុង​ខែមីនា និង​មេសា​ការដឹកជញ្ជូន​ទំនិញ បាន​ប្រឈម​ទៅនឹង​បញ្ហា​យ៉ាងខ្លាំង ដែល​តាម​ការប៉ាន់ស្មាន​គឺ មាន​ប្រមាណ៦០ភាគរយ ដោយសារ​ការ​រាតត្បាត​នៃ​ជំងឺ​កូ​វីដ១៩ ប៉ុន្តែ​ចាប់តាំងពី​ខែកញ្ញា រហូត​តុលា​នៃ​ឆ្នាំ ២០២០កន្លងមកនេះ មាន​ស្ថានភាព​ល្អប្រសើរ​ឡើងវិញ ស្រប​ពេលដែល​ប្រទេស​ចិន​មាន​ស្ថានភាព​ល្អប្រសើរ ។

លោក​បញ្ជាក់ទៀតថា និយាយ​ជារួម គឺ​មុន​ព្រឹត្តិការណ៍៣ វិច្ឆិកា ការដឹកជញ្ជូន គឺមាន​ស្ថានភាព​ល្អប្រសើរ​ជាង​ពី​អំឡុង​ខែមីនា និង​មេសា ហើយ​រហូតមក​ដល់ពេលនេះ ការដឹកជញ្ជូន​តាមផ្លូវ​ទឹក និង​ផ្លូវគោក គឺ​មិនមាន​បញ្ហា​ចោទ​នោះទេ ប៉ុន្តែ​សម្រាប់​តាមផ្លូវ​អាកាស​នូវតែ​ជា​បញ្ហា​ដដែល៕

ចំណេះដឹង! អ្វី​ជាការ​ធ្វើ​ចំណាត់ថ្នាក់​ដី​រដ្ឋ​ឡើងវិញ?

ដោយ ​វុត្ថា

ភ្នំពេញៈ ការធ្វើ​ចំណាត់ថ្នាក់​ដីរ​ឡើងវិញ​មានន័យថា ការ​ផ្តូ​រ​ឋានៈ​ដី​របស់​រដ្ឋ ក្រោយពី​ធ្វើការ​ចុះបញ្ជី និង​ការធ្វើ​ចំណាត់ថ្នាក់​លើកដំបូង។

ការធ្វើ​ចំណាត់ថ្នាក់​ដី​រដ្ឋ​ឡើងវិញ មាន​បី​ទម្រង់​ដូចជា ១) ការធ្វើ​ចំណាត់ថ្នាក់​ទ្រព្យ​សាធារណៈ​របស់​រដ្ឋ ទៅជា​ទ្រព្យ​ឯកជន​របស់​រដ្ឋ ២) ការធ្វើ​ចំណាត់ថ្នាក់​ទ្រព្យ​សាធារណៈ​របស់​រដ្ឋ ពី​ការប្រើប្រាស់​ជា​ប្រយោជន៍​សាធារណៈ​មួយ ទៅជា​ប្រភេទ​បំរើ​ប្រយោជន៍​សាធារណៈ​មួយ​ផ្សេងទៀត និង៣) ការធ្វើ​ចំណាត់ថ្នាក់​ព្រ​ទ្យ​ឯកជន​របស់​រដ្ឋ ទៅជា​ទ្រព្យ​សាធារណៈ​របស់​រដ្ឋ។

យោងតាម​ឯកសារ​របស់​ក្រសួង​រៀបចំ​ដែនដី នគរូបនីយកម្ម និង​សំណង់​ស្តីពី គោ​នយោបាយ​ស្តីពី ការគ្រប់គ្រង​ដី​រដ្ឋ​បានឱ្យដឹងថា ការធ្វើ​ចំណាត់ថ្នាក់​ដី​រដ្ឋ​ឡើងវិញ ត្រូវបាន​ធ្វើឡើង តាមរយៈ​សំណើរ​ជា​លាយ​ល័​ក្ខ​អក្សរ ពី​និតិ​បុគ្គល​សាធារណៈ​ណាមួយ​ទៅ​គណៈកម្មាធិការ​ប្រើប្រាស់ និង​បែងចែក​ដី​ថ្នាក់​ខេត្ត​ក្រុង។ សំណើរ​នេះ ត្រូវ​ប្រកាស​ឬ​បរិយាយ​អំពី​ទីតាំង ដែល​ស្នើសុំ​ធ្វើ​ចំណាត់ថ្នាក់​ឡើងវិញ ពាក្យស្នើសុំ​ធ្វើ​ចំណាត់ថ្នាក់​ឡើងវិញ និង​ហេតុផល​នៃ​ការស្នើសុំ​ធ្វើ​ចំណាត់ថ្នាក់​ឡើងវិញ។

គណៈកម្មាធិការ​ប្រើប្រាស់ និង​បែងចែក​ដី​ខេត្ត​ក្រុង នឹង​តំរូវឱ្យ​ស្ថាប័ន​បច្ចេកទេស​ជំនាញ (ចំរុះ​មន្ទីរ) ធ្វើការ​ពិនិត្យឡើងវិញ​នូវ​សំណើ ដែ​ស្នើឡើង​ក្នុង​រយៈពេល៤៥ថ្ងៃ។

ការពិនិត្យ​ឡើងវិញ​ជាលា​យ​ល័ក្ខណ៍​អក្សរ ត្រូវ​ពន្យល់​ពី​វិធីសាស្ត្រ​ដែល​បាន​ប្រើប្រាស់​ក្នុងការ​ត្រួតពិនិត្យ ហើយ​ដែល​វិធីសាស្ត្រ​នេះ​ត្រូវ​រាប់បញ្ចូល​ទាំង​ព័ត៌មាន ដែល​បានទទួល​ពី​ភាគី​ស្នើសុំ ទាំង​លទ្ធផល​រកឃើញ​ក្នុងការ​ត្រួតពិនិត្យ និង​អនុសាសន៍​របស់​ស្ថាប័ន​បច្ចេកទេស​ជំនាញ​ពាក់ព័ន្ធ ទៅនឹង​សំណើសុំ​ធ្វើ​ចំណា​ច់​ថ្នាក់​ឡើងវិញ​នេះ។

ការពិនិត្យ​ឡើងវិញ​នេះ ត្រូវ​បញ្ចប់​ក្នុង​រយៈពេល៦០ថ្ងៃ គិតពី​ថ្ងៃ​ចាប់ផ្តើម​ត្រួត​ពិ​និ ត្យ លើកលែងតែ​មានការ​ស្នើ​សុំ​ពន្យា​ពេល​បន្ថែម​ពី​អ្នកត្រួតពិនិត្យ ដោយមាន​ហេតុផល​ជាក់លាក់។ បន្ទាប់មក​គណៈកម្មាធិកា​រ​ប្រើប្រាស់ និង​បែងចែក​ដី​ខេត្ត​ក្រុង នឹងធ្វើ​ការសំរេច​ជា​លាយលក្ខណ៍អក្សរ លើ​ការធ្វើ​ចំណាត់ថ្នាក់​ឡើងវិញ​នេះ (យល់ព្រម ឬ បដិសេធ ឬ កែសម្រួល) ក្នុង​រយៈពេល៦០ថ្ងៃ គិត​ចាប់​ថ្ងៃ​ទ​ទួ​បាន​លទ្ធផល​នៃ​ការត្រួតពិនិត្យ។

ការកំណត់​របស់​គណៈ​ក​ម្មា​ធិ​ការប្រើប្រាស់ និង​បែងចែក​ដី​ថ្នាក់​ខេត្ត​ក្រុង នឹងត្រូវ​ស្នើសុំ​ការសំរេច​ជា​ផ្លូវការ ពី​ក្រុង​ប្រឹក្សា​គោលនយោបាយ​ដីធ្លី តាមរយៈ​អគ្គលេខាធិការដ្ឋាន​នៃ​ក្រុមប្រឹក្សា​គោលនយោបាយ​ដីធ្លី។

ការធ្វើ​ចំណា​ច់​ថ្នាក់​ដី​រដ្ឋ​ឡើងវិញ​នេះ នឹងត្រូវ​បញ្ចូល​ទៅក្នុង​ផែនទី ឬ​ប្រព័ន្ធ​ទិន្ន័យ​ដី​រដ្ឋ ហើយ​សេចក្តីសម្រេច​ជា​លាយលក្ខណ៍អក្សរ​ត្រូវ​រក្សា​ទុកជា​ឯកសារ៕