ដោយៈ រ៉ាណេត

កំពង់ស្ពឺៈ ខេត្តកំពង់ស្ពឺកំពុងទាក់ទាញគម្រោងវិនិយោគជាច្រើន ដែលនៅក្នុងនោះមានគម្រោងធំៗចំនួន៥ ជាមួយទុនវិនិយោគរាប់រយលានដុល្លារ ស្ថិតលើផ្ទៃដីសរុបជាង៣៣៥០០ហិកតា ដែលនឹងជួយលើកកម្ពស់កំណើនសេដ្ឋកិច្ចនៅក្នុងខេត្ត ក៏ដូចជាជួយទ្រទ្រង់សេដ្ឋកិច្ចជាតិកម្ពុជាផងដែរ។

ជាមួយនឹងវត្តមានក្រុមហ៊ុនអន្តរជាតិធំៗ ដែលកំពុងបោះជំហ៊ានចូលមកវិនិយោគ និងអភិវឌ្ឍន៍នៅក្នុងខេត្តកំពង់ស្ពឺ លោក វ៉ី សំណាង អភិបាលខេត្តបានមានប្រសាសន៍ប្រាប់តាមទូរស័ព្ទនៅថ្ងៃទី២៣ ខែកក្កដា ឆ្នាំ២០២០កន្លងមកថា បច្ចុប្បន្នមានក្រុមហ៊ុនចម្រុះ កំពុងដំណើរការក្នុងខេត្តមានចំនួន១៨៨ក្រុមហ៊ុន ដែលបម្រើដល់វិស័យឧស្សា​ហកម្មកសិកម្មហើយមួយផ្នែកទៀតបម្រើនៅក្នុងវិស័យសំណង់និងអចលនទ្រព្យ។

គម្រោងវិនិយោគ និងអភិវឌ្ឍន៍ជិត២០០គម្រោង មានក្រុមហ៊ុនវិនិយោគធំៗ ដែលលេចធ្លោប្រចាំខេត្តចំនួន៥ ក្នុងនោះ មានក្រុមហ៊ុន Great Field (Cambodia) International Limited អភិវឌ្ឍន៍នៅលើផ្ទដីទំហំ ៩០០០ហិកតា , ក្រុមហ៊ុន Yellow Field (Cambodia) International Limited ចំនួន៨៥០០ហិកតា ក្រុមហ៊ុន HLH Agriculture (Cambodia) Co Ltd ចំនួន ៩៩០០ហិកតា ក្រុមហ៊ុន កំពង់ស្ពឺ ស៊ូហ្គើរ មានផ្ទៃដីចំនួន ៤៧០០ ហិកតា និងក្រុមហ៊ុន ៩៩ អភិវឌ្ឍន៍ កសិកម្ម ខូ អិលធីឌី មានផ្ទៃដី ចំនួន១៤០០ហិកតា។

លោកវ៉ី សំណាងបានបន្តថា “រដ្ឋបាលខេត្តកំពុងទាក់ទាញក្រុមហ៊ុនវិនិយោគ ទាំងក្នុងស្រុក និងក្រៅប្រទេសមកវិនិយោគ នៅក្នុងខេត្តកំពង់ស្ពឺបន្ថែមទៀត ដើម្បីបង្កើតកា​រ​ងារធ្វើ និងរួមចំណែកអភិវឌ្ឍន៍សេដ្ឋកិច្ចជាតិ”។ លោកបន្តថា “យើងបានខិតខំផ្សព្វផ្សាយពីសក្កានុពលរបស់ខេត្តកំពង់ស្ពឺ ទាំងសុខសន្តិភាព និងមានផ្លូវជាតិច្រើន ជាពិសេសផ្លូវល្បឿនលឿនដើម្បីទាក់ទាញក្រុមហ៊ុនវិនិយោគថ្មីៗបន្ថែម”។

តំបន់សំខាន់ៗ ដែលមានសក្ដានុពលសម្រាប់វិស័យឧស្សាហកម្ម ដែលស្ថិតនៅតាមផ្លូវជាតិលេខ៤ នៅស្រុកគងពិសី និងនៅបរសេដ្ឋ ហើយក្រៅពីនេះ ក៏មាននៅតាមបណ្តោយផ្លូវជាតិលេខ៤៤ផងដែរ”។

អភិបាលខេត្តកំពង់ស្ពឺ លោក វ៉ី សំណាង បានបញ្ជាក់ថា “ក្រុមហ៊ុនទាំង៥ខាងលើនេះ បម្រើនៅក្នុងវិស័យផ្សេងៗពីគ្នា រួមមានដូចជា វិស័យអចលនទ្រព្យ វិស័យឧស្សាហកម្ម វិស័យកសិ–ឧស្សាហកម្ម និងវិស័យទេសចរណ៍។ ក្នុងនាមជាអាជ្ញាធរ នៅតែព្យាយាមបង្ហាញពីក្ដីសាទរ និងកិច្ចស្វាគមន៍ចំពោះវត្តមានវិនិយោគិនជាតិ និងអន្តរជាតិថ្មីៗបន្ថែមទៀត ដើម្បីវាជាការចូលរួមជាមួយរាជរដ្ឋាភិបាលកម្ពុជា ក្នុងការទ្រទ្រង់កំណើនសេដ្ឋកិច្ចជាតិទាំងមូល”៕

ដោយៈ ប៊ី

ភ្នំពេញៈ តម្លៃដីនៅកណ្តាលក្រុងភ្នំពេញ បានស្ថិតនៅទឹ្រងគិតត្រឹមបំណាច់ត្រីមាសទី២ ឆ្នាំ២០២០នេះ ខណៈតម្លៃដីនៅជាយក្រុងមានការប្រែប្រួល ធៀបនឹងដើមឆ្នាំ២០២០នេះ ខណៈអ្នកជំនាញអះអាងថា ការវិនិយោគដីធ្លីអំឡុងពេលនេះ គឺមានឱកាសចំណេញ។

របាយការណ៍របស់ក្រុមហ៊ុន CBRE Cambodia កាលពីពេលថ្មីៗនេះឱ្យដឹងថា តម្លៃដីនៅតាមបណ្តាខណ្ឌនៅភ្នំពេញ នាដំណាច់ត្រីមាសទី២ ឆ្នាំ ២០២០ នេះបានស្ថិតនៅទ្រឹងសម្រាប់តំបន់នៅកណ្តាលក្រុង និងមានការប្រែប្រួលតិចតួច សម្រាប់តំបន់ជាយក្រុង បើធៀបទៅនឹងដើមឆ្នាំ២០២០។

របាយការណ៍ដដែលបានបង្ហាញថា កាលពីចុងត្រីមាសទី២ ឆ្នាំ២០២០ ដីនៅក្នុងខណ្ឌសំខាន់ៗ នៅកណ្តាលក្រុងភ្នំពេញរួមមានខណ្ឌដូនពេញ ចំការមន និងខណ្ឌបឹងកេងកង មានតម្លៃជាមធ្យម៥,៥០០ដុល្លារក្នុង១ម៉ែត្រការ៉េ។ចំណែកដីក្នុងខណ្ឌ៧មករាមានតម្លៃ៥០០០ដុល្លារ។

តម្លៃទាំងអស់នេះ គឺរក្សានៅដដែលបើធៀបទៅនឹងដើមឆ្នាំ២០២០ ខណៈដីនៅខណ្ឌទួលគោក និងសែនសុខបានកើនឡើងប្រមាណ២ភាគរយ ដោយមានតម្លៃជាមធ្យមរៀងគ្នា៣ ៥៥០ដុល្លារ និង១ ៤២៥ ដុល្លារ កើនពី៣ ៥០០ដុល្លារ និង១៤០០ដុល្លារ។

ចំណែកដីក្នុងខណ្ឌមួយចំនួនទៀត ដូចជា ខណ្ឌឫស្សីកែវរក្សាតម្លៃដដែល១ ២៥០ ដុល្លារ និងខណ្ឌជ្រោយចង្វារតម្លៃ១១៥០ ដុល្លារ។ ដោយឡែកខណ្ឌផ្សេងៗទៀតដូចជា ខណ្ឌដង្កោ មានជ័យ ច្បារអំពៅ ពោធិ៍សែនជ័យ ព្រែកព្នៅ និងខណ្ឌកំបូលមានតម្លៃជាមធ្យមចន្លោះពី១៥០ដុល្លារ ទៅដល់៥០០ដុល្លារក្នុង១ម៉ែត្រការ៉េ។

នាយិកាប្រចាំប្រទេសក្រុមហ៊ុនភ្នាក់ងារអចលនទ្រព្យអន្តរជាតិ CBRE Cambodia លោកស្រី អាន សុធីតា បានមានប្រសាសន៍ថា រាល់ការវិនិយោគ នៅក្នុងវិស័យអចលនទ្រព្យក្នុងដំណាក់កាលនេះ មិនថាផ្នែកសំណង់លំនៅដ្ឋានឬផ្នែកដីធ្លីនោះទេ គឺមានឱកា​សចំណេញដូចគ្នា ប្រសិនបើរាល់អចលទ្រព្យវត្ថុទាំងអស់នោះ ត្រូវបានដាក់លក់ក្នុងតម្លៃទាបជាងទីផ្សារ។

លោកស្រីបញ្ជាក់ថា “សកម្មភាពនៃការទិញ លក់ក្នុងពេលនេះ មានភាពស្ងប់ស្ងាត់បន្តិចបើប្រៀបធៀបទៅនឹងដើមឆ្នាំ ឬអំឡុងពេលត្រីមាសទី១ ប៉ុន្តែសម្រាប់តម្លៃវិញគឺមិនមានការធ្លាក់ចុះនោះទេ”។ លោកស្រីបន្តថា“នៅក្នុងឆមាសទី២នៃឆ្នាំនេះ តម្លៃទីផ្សារអាចនឹងមានភាពល្អប្រសើរឡើងវិញបន្តិចបន្តួច ក្រោមវិធានការរបស់រាជរដ្ឋាភិបាល ដែលអនុញ្ញាតឱ្យផ្នែកមួយចំនួនបើកដំណើរការឡើងវិញ” ។

ទោះជាយ៉ាងណា ទីផ្សារអចលនទ្រព្យទាំងមូលអាចវិលត្រឡប់ ទៅរកសភាពដើមដូចចុងឆ្នាំ២០១៩ អាចត្រូវការពេលវេលាយូរបន្តិច យ៉ាងហោសណាស់១ឆ្នាំឬអាចលើសពីនេះ។នេះតាមការបញ្ជាក់ឲ្យដឹងពីលោកស្រីអាន សុធីតា៕

ដោយវុត្ថា

ភ្នំពេញ៖ ទីក្រុងឌូបៃពិតជាAmazing ដែលពោពេញទៅដោយការប្រមូលផ្តុំនូវអាគា​រ​ខ្ពស់ៗ និងស្ថាបត្យកម្មទំនើបជាច្រើនប្រភេទ ហើយភាគច្រើនគឺជាស្ថាបត្យកម្មតាមបែបបទសាសនាអ៊ីស្លានៅក្នុងទីក្រុងឌូបៃ។

គេហទំព័រPropertyarea.asia បានបង្ហាជូនអ្នកអានបានសិក្សាស្វែងយល់ ពីអគាខ្ពស់ៗជាច្រើនទាំងនៅក្នុងពិភពអារ៉ាប់ និងពិភពលោក។ សម្រាប់ពេលនេះ នឹងបន្តបង្ហា​ញជូននូវអគារAlmas Tower (អគារពេជ្យ) មួយបន្ថែមទៀត ទុកគ្រាន់បានស្វែងយល់ពីការរីកចម្រើនវិស័យសំណង់។

អាគារAlmas Tower ឬ ហៅថា Diamond Tower មានកំពស់៣៦០ម៉ែត្រនិង ៦៨ជាន់ គឺជាអគារខ្ពស់កប់ពពកមួយ ស្ថិតនៅក្នុងតំបន់មាត់បឹងJumeirah ទីក្រុង Dubai ប្រទេសអារ៉ាប់រួម។ អាគារនេះ បានចាប់ផ្តើមសាងសង់នៅក្នុងឆ្នាំ ២០០៥ និងបានបញ្ចប់នៅក្នុងឆ្នាំ២០០៩។

Almas Tower គឺជាអគារដែលខ្ពស់ជាងគេ ក្នុងតំបន់អភិវឌ្ឍន៍មួយនេះ ដោយសាងសាងឡើង ក្នុងគោលបំណងសម្រាប់ពាណិជ្ជកម្មពេជ្យ។ អគារនេះ ផងដែរត្រូវបានរចនាប្លង់ដោយក្រុមហ៊ុន Atkins Middle East ។ ចំណែកកំពូលអគារវិញ កសាងដោយក្រុមហ៊ុនTaisei Corperation របស់ប្រទេសជប៉ុន សហការជាមួយក្រុមហ៊ុន Arabian Construction Co. ដែលជាក្រុមហ៊ុនទទួលបានពានខាងផ្នែកសាងសង់ ពីក្រុមហ៊ុន Nakheel Properties កាលពីឆ្នាំ២០០៥។

អាគារAlmas Tower បំរើសេវាកម្មជាច្រើនប្រភេទ រួមមាន កន្លែងលក់ពេជ្យ ឧស្សាហកម្មត្បូង រ៉ែ  ដែលគេហៅអគារនេះថា ជាមណ្ឌលជួញដូរមាស ពេជ្យ និងរ៉ែ  ព្រមទាំងមានកន្លែងប្រជុំរបស់អ្នកជំនួញមាសនៅទូទាំងពិភពលោកផងដែរ។អគារនេះត្រូវបានគេសាងសងឡើងប្រកបដោយសុវត្ថិភាពបំផុត។

ជាមួយគ្នានោះអគារនេះ ក៏ធ្លាប់ទទួលបានរង្វាន់ជាអគារខ្ពស់លំដាប់ទី៨ ក្នុងឆ្នាំ២០០​៩ ពីEmporis Skyscraperផងដែរ៕

ដោយ ហ្សូលី

ភ្នំពេញៈ វិស័យសំណង់ និងអចលនទ្រព្យនៅក្នុងប្រទេសកម្ពុជា កំពុងមានវិវឌ្ឍនភាពបណ្តើរៗ ទោះបីជាកំពុងជួបវិបត្តិសេដ្ឋកិច្ចពិភពលោក​ក្តី ហើយខេត្តសំខាន់ៗចំនួន៣កំពុងទាក់ទាញ និងរីកមុខមាត់លើវិស័យសំ​ណ​ង់និងអចលនទ្រព្យ។

១.ខេត្តស្វាយរៀង

ថ្វីត្បិតតែខេត្តស្វាយរៀង គឺជាខេត្តមានសក្តានុពលពាណិជ្ជកម្មក្តី ប៉ុន្តែក្រឡេកទៅមើលវិស័យសំណង់និងអចលនទ្រព្យវិញ ឃើញថាខេត្តមានសញ្ញាវិជ្ជមានច្រើន និងមានសកម្មភាពអភិវឌ្ឍលើបណ្តាគម្រោងសាងសង់ដដែល។

តាមប្រសាសន៍របស់អភិបាលខេត្តស្វាយរៀងឱ្យដឹងថា បច្ចុប្បន្នខេត្តស្វាយរៀង មានភាពរីកចម្រើនគួរឱ្យកត់សម្កាល់ និងមានភាពទាក់ទាញមិនចាញ់ខេត្តដទៃទៀតទេ។

សំណង់លំនៅដ្ឋាន អគារខ្ពស់ៗ សម្រាប់បម្រើដល់វិស័យទេសចរណ៍ និងពាណិជ្ជកម្ម មិនមានការផ្អាកសកម្មភាពសាងសង់អ្វីទេ។

២.ខេត្តកោះកុង

បើប្រៀបធៀបនឹងខេត្តជាប់មាត់សមុទ្រដទៃដូចជា ព្រះសីហនុ កែប និងកំពត ខេត្តកោះកុង ហាក់បីដូចជាស្ថិតនៅជួរខាងក្រោយគេ លើការវិនិយោគក្នុងវិស័យអចលនទ្រ   ព្យ។ ប៉ុន្តែបច្ចុប្បន្នខេត្តមួយនេះ កំពុងផុសផុលលើសកម្មភាពវិនិយោគពីបណ្តាវិនិយោគិននានា។

អ្នកជំនាញអចលនទ្រព្យធ្លាប់បានមានប្រសាសន៍ថា ខេត្តកោះកុងមានសក្តានុពលខ្ពស់ចំពោះសេដ្ឋកិច្ច ដូច្នេះទើបការវិនិយោគលើវិស័យអចលនទ្រព្យ មានជាបន្តបន្ទាប់ ពិសេសគម្រោងធំៗដូចជា ព្រលានយន្តហោះអន្តរជាតិ។

លើសពីនេះ គម្រោងស្ថាបនាកំពង់ផែទឹកជ្រៅ ការពង្រីកផ្លូវជាតិធំៗ កំពុងមានការអភិវឌ្ឍជាបណ្តើរៗ ដែលនាំឱ្យខេត្តនេះរីកមុខមាត់ខ្លាំងលើវិស័យអចលនទ្រព្យ។

៣ ខេត្តកំពង់ស្ពឺ

ខេត្តមួយនេះ​ មានសក្តានុពលលើគម្រោងរោងចក្រ និងសហគ្រាសខុសពីគេ ដោយហេតុថា កត្តាភូមិសាស្រ្តស្ថិតនៅជិតទីក្រុងភ្នំពេញ និងអំណោយផលទៅលើការដឹកជញ្ជូន អាស្រ័យដោយការរិកចម្រើនលើវិស័យហេដ្ឋារចនាសម្ព័ន្ធទូរទាំងខេត្ត។ ដូច្នេះទើបបានជាបណ្តាវិនិយោគិនទាំងក្នុងស្រុក និងក្រៅស្រុក ម្ចាស់គម្រោងបុរីលំនោដ្ឋានឬដីឡូតិ៍នានា នាំគ្នាសម្រុកមកវិនិយោគលើវិស័យសំណង់ជាហូរហែ។

អភិបាលខេត្តកំពង់ស្ពឺ លោកវ៉ី សំណាងបានមានប្រសាសន៍ឱ្យដឹងកាលពីពេលថ្មី​ៗនេះថា ខេត្តកំពង់ស្ពឺបានទាក់ទាញលើគម្រោងវិនិយោគ ក្នុងវិស័យសំណង់ប្រមាណជាង២០០លានដុល្លារ ដែលគំរោងទាំងនោះសុទ្ធសឹង ជាគម្រោងវិនិយោគលើវិស័យឧស្សាហកម្ម៕