តើអចលនទ្រព្យឡើងថ្លៃដោយសារកត្តាអ្វីខ្លះ?

ដោយ ហ្សូលី

ភ្នំពេញ៖ ស្ថានភាពអចលនទ្រព្យនៅចុងឆ្នាំ ២០២០នេះ ហាក់នៅមានភាពស្រពេចស្រពិលនៅឡើយ ដែលការផ្គត់ផ្គង់នៅតែមានកំណើនដដែល ដោយឡែកអ្នកជំនាញថា កាលណាតម្រូវការនៅតំបន់ណាមានកំណើន នោះតម្លៃអចលនទ្រព្យក៏កើនឡើងដែរ។

លោកស្រី ចេវ សុឃុន ប្រធានសមាគមអ្នកជំនាញអចលនទ្រព្យកម្ពុជា បានថ្លែងប្រាប់គេហទំព័រ propertyarea.asia ថា ការប្រែប្រួលតម្លៃអចលនវត្ថុ វាស្ថិតទៅតាមតំបន់ ដូចជាតំបន់ខ្លះដែលមានលក្ខណៈដូចជា Commercial ឬហៅថាតំបន់ពាណិជ្ជកម្ម ច្បាស់ណាស់ថាតម្លៃនៅតំបន់នោះមានការហក់ឡើងខ្ពស់។

លោកស្រីបន្តថា ចំណែកឯតំបន់ខ្លះទៀតជាលក្ខណៈលំនៅដ្ឋាន ឬហៅថា Residence តម្លៃរបស់វាមានកំណើនទៅតាមកម្រិតរបស់វា។ សំខាន់គឺតំបន់ណាដែលមានតម្រូវការខ្ពស់ តម្លៃអចលនវត្ថុមានការហក់ឡើងខ្ពស់។

ប្រធានសមាគមរូបនេះពន្យល់ថា ហេតុផលត្រង់ថា កាលណាមានតម្រូវការ ត្រូវការចាំបាច់ ការផ្គត់ផ្គង់ក៏មានកម្រិតដែរ។ តម្លៃក៏ដូចគ្នា នៅពេលដែលអចលនវត្ថុនោះស្ថិតនៅក្នុងទីតាំងណាមួយដែលមានអតិថិជនត្រូវការចង់បានច្រើន នោះតម្លៃនឹងកើនឡើង។ យើងអាចកត់សម្គាល់បានថា តម្លៃនោះវាអាចឡើងខ្ពស់ បើប្រៀបធៀបជាមួយតំបន់ផ្សេងៗ តម្លៃអាចឡើងត្រឹម ៥ភាគរយ អញ្ចឹងបើតំបន់ដែលមានតម្រូវការខ្ពស់ វាអាចនឹងឡើងដល់ ៧ ភាគរយ ឬក៏ ១០ភាគរយ ជាដើម។

សរុបមកវិញ តំបន់ណាក៏អាចនឹងមានឱកាសឡើងដែរ គ្រាន់តែថាតម្លៃខ្លះវាឡើងតាមកម្រិតរបស់វា ឡើងតិច ឬឡើងច្រើនទៅតាមតម្រូវការជាក់ស្តែងរបស់អតិថិជន ដើម្បីយកមកវិនិយោគឬអភិវឌ្ឍសម្រាប់ធ្វើជាលំនៅដ្ឋាន ជាលក្ខណៈពាណិជ្ជកម្ម ឬជាលក្ខណៈតំបន់ឧស្សាហកម្ម ឬជាលក្ខណៈកសិកម្ម៕

ទន្ទឹមនេះ លោកស្រី អាន សុធីតា នាយិកាក្រុមហ៊ុនអន្តរជាតិ CBRE Cambodia បានប្រាប់គេហទំព័រ propertyarea.asia ថា ក្នុងត្រីមាសទី៣នេះ យើងឃើញមានការសម្រេចចិត្តវិនិយោគលើវិស័យអចលនទ្រព្យថ្មីៗជាច្រើន ជាពិសេសពីវិនិយោគិនក្នុងស្រុក ដោយផ្តោតសំខាន់លើគម្រោងលំនៅឋានគ្រប់ប្រភេទ ទាំងលំនៅឋាន នៅក្នុងបុរីលំនៅឋានជាប់ដី និងលំនៅឋានសហកម្មសិទ្ធិ (ខុនដូ)៕

ខេត្តកំពតកំពុងបង្អួតវិសាល និងសក្ដានុពលក្នុងនាមជាខេត្តជាប់តំបន់ឆ្នេរ

ដោយ ៖ គង់ ម៉ាលីន

កំពត ៖ ជាមួយនឹងភាពអំណោយផល នៃភូមិសាស្រ្តអំណោយផលនៃធនធានធម្មជាតិ តំបន់ឆ្នេរ ព្រៃភ្នំ ដងព្រែក និងគោលនយោបាយដ៏ត្រឹមត្រូវរបស់រដ្ឋាភិបាល និងថ្នាក់ដឹកនាំខេត្តបានធ្វើឲ្យខេត្តកំពត មានការអភិវឌ្ឍយ៉ាងលឿន ក្នុងរយៈពេលប៉ុន្មានឆ្នាំចុងក្រោយនេះ។

អាគារពាណិជ្ជកម្មកប់ពពក

ក្នុងប្រវត្តិសាស្រ្តរាប់រយឆ្នាំមកនេះ ខេត្តកំពតមិនដែលមានវត្តមានអាគារកប់ពពកនោះទេ ប៉ុន្តែបច្ចុប្បន្ននេះក្រុមហ៊ុនថៃ ប៊ុនរ៉ុងបាននិងកំពុងសាងសង់អាគារពាណិជ្ជកម្មលំដាប់អន្តរជាតិកំពស់កម្ពស់៤២ជាន់ ក្រោមទុនវិនិយោគប្រមាណ៩៥លានដុល្លារ បាននិងកំពុងចាប់ផ្តើមសាងសង់ហើយ ដែលវត្តមានមជ្ឈមណ្ឌលពាណិជ្ជកម្មនេះ នឹងរួមចំណែកលើកកំពស់ការអភិវឌ្ឍ ក្នុងក្រុងនេះកាន់តែមានសក្តានុពលថែមទៀត។

វត្តមានអាគារនេះ នឹងផ្លាស់ប្តូរមុខមាត់របស់ខេត្តកំពត និងជម្រុញ ហើយទាក់ទាញការវិនិយោគពីអ្នកវិនិយោគជាតិ អន្តរជាតិជាច្រើនទៀតទៅកាន់ខេត្តនេះ។
អភិបាលខេត្តកំពត លោក ជាវ តាយ ធ្លាប់បានមានប្រសាសន៍ថា ទីផ្សារអចលនទ្រព្យនៅកម្ពុជាប៉ុន្មានឆ្នាំចុងក្រោយនេះ បានបង្ហាញពីកំណើនយ៉ាងខ្លាំង នៃប្រភពអចលនទ្រព្យក្នុងស្រុក ហើយជាប្រទេសមានសេដ្ឋកិច្ច លូតលាស់លឿន ដែលវិស័យឧស្សាហកម្ម សំណង់ និងសេវាកម្ម នៅតែជាកម្លាំងចលករយ៉ាងសំខាន់។

លោកបានបញ្ជាក់ថា “គម្រោងសាងសង់អគារពាណិជ្ជកម្មបែបទំនើប ថៃ ប៊ុនរ៉ុង កំពត បៀលឌីង នាពេលនេះ ជាការបើកទំព័រប្រវត្តិសាស្ត្រ សំណង់អគារលំដាប់អន្តរជាតិជាលើកដំបូង និងខ្ពស់ជាងគេនៅខេត្តកំពត ដែលបានរួមចំណែកអភិវឌ្ឍន៍សេដ្ឋកិច្ចខេត្តកំពត ហើយសម្រាប់បំពេញតម្រូវការរបស់វិនិយោគិន ភ្ញៀវជាតិ និងអន្តរជាតិ ធ្វើការបណ្តាក់ទុនវិនិយោគនៅក្នុងខេត្តកំពត”។

រដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់ លោក ទេព ធន បានមានប្រសាសន៍ថា រាជរដ្ឋាភិបាលកម្ពុជា ក្រោមការដឹកនាំប្រកបដោយគតិបណ្ឌិតរបស់សម្តេចតេជោ ហ៊ុន សែន ជានាយករដ្ឋមន្ត្រី នៅតែបន្តអនុវត្តនូវកម្មវិធី យុទ្ធសាស្ត្រចតុកោណដំណាក់កាលទី៤ របស់រាជរដ្ឋាភិបាល និតិកាលទី៦ នៃរដ្ឋសភា ដើម្បីជាគន្លឹះត្រីវិស័យក្នុងការ ទ្រទ្រង់និងអភិវឌ្ឍ សេដ្ឋកិច្ចជាតិ។

វិស័យទេសចរណ៍

ជាមួយភាពអំណោយផលនៃតំបន់ឆ្នេរ ព្រៃភ្នំ ពិសេសភ្នំបូកគោ ដងព្រែក ធូរ៉េនដ៏មានឳជារស និងផលិតផលកសិកម្មជាច្រើនទៀត ពិសេសស្រែអំបិល ដែលអាចទាក់ទាញភ្ញៀវទេសចរណ៍ចូលទស្សនា ខេត្តកំពតក៏មិនទាន់ប្រើប្រាស់អស់ធនធាន និងសក្តានុពលរបស់ខ្លួនដែរ។

លោក នី ផល្លី អនុរដ្ឋលេខាធិការក្រសួងទេសចរណ៍បានថ្លែងថា ក្នុងអំឡុងពេលនៃការគ្របដណ្តប់ដោយវិបត្តិជំងឺរាតត្បាត វិស័យទេសចរណ៍បានផ្លាស់ប្តូរយ៉ាងច្រើន។ ភ្ញៀវទេសចរភាគច្រើនកំពុងស្វែងរកគោលដៅទេសចរណ៍ធម្មជាតិ ដែលក្នុងនោះ ខេត្តកំពតគឺ ជាខេត្តមានអំណោយផលល្អបំផុត សម្រាប់សកម្មភាពទេសចរណ៍ជាច្រើនទីតាំង និងផ្តល់ឱកាសដល់ការបង្កើតអាជីវកម្មថ្មីៗ ដើម្បីបំពេញតម្រូវការទេសចរណ៍ក្នុងស្រុក។

យោងតាមមន្ទីរទេសចរណ៍ខេត្តកំពតបានឱ្យដឹងថា គិតត្រឹមដើមឆមាសទី២ ឆ្នាំ២០២០ ខេត្តកំពតបានទទួលភ្ញៀវទេសចរជាតិ និងអន្តរជាតិចំនួន៨៣៨.០០០នាក់ ខណៈដែលរយៈពេលដូចគ្នាកាលពីឆ្នាំមុនមានចំនួន១,០៩ លាននាក់។ ចំនួននេះគឺជាការបង្ហាញយ៉ាងច្បាស់ថា ខេត្តកំពតមិនមានឧបសគ្គច្រើនទេ បើប្រៀបធៀបជាមួគោលដៅទេសចរណ៍ផ្សេងទៀតដូចជា ខេត្តសៀមរាប។

វិស័យអចលនទ្រព្យ

ក្រៅពីវត្តមានអាគារកប់ពពក ខេត្តកំពតក៏ទាក់ទាញគំរោងអភិវឌ្ឍន៍ធំៗជាច្រើនផងដែរ ពិសេសការវិនិយោគលើរមណីយដ្ឋានលំហែរកាយ ដូចជាគំរោងនៅតាមដងស្ទឹងព្រែកកំពង់បាយ ការពង្រីកឆ្នេរ និងគំរោងកំពតឋានសួគ៌ជាដើម។

ជាមួយនឹងកំនើននៃការវិនិយោគអចលនទ្រព្យ និងការពង្រីកហេដ្ឋារចនាសម្ព័ន្ឋរបស់រដ្ឋាភិបាល ពិសេសនៅពេលបញ្ចប់ការស្ថាបនាផ្លូវជាតិលេខ៣ នឹងធ្វើឲ្យខេត្តកំពត
ក្លាយជាមេដែកឆក់មួយ ដែលស្រូបទាញកំនើននៃការវិនិយោគពីអ្នកវិនិយោគជាតិ អន្តរជាតិបន្ថែមទៀត។

ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា លោក ច្រឹក សុខនីម បានមានប្រសាសន៍ថា ខេត្តកំពតគឺជា ខេត្តដែលមានសក្តានុពលទេសចរធម្មជាតិ ដែលខេត្តដទៃទៀតមិនមាន ហើយក៏ជាទិសដៅនៃអ្នកទេសចរនៅក្នុងស្រុក ផងដែរ ព្រោះពួកគាត់មិនសូវចង់ទៅខេត្តផ្សេងប៉ុន្មានទេ ជាពិសេសទេសចរដែលមានលំនៅដ្ឋានក្នុងរាជធានីភ្នំពេញ។

លោកបន្តថា “នៅក្នុងមួយរយៈចុងក្រោយនេះ រដ្ឋាភិបាលបានចាប់ផ្តើមអភិវឌ្ឍន៍ហេដ្ឋារចនាសម្ព័ន្ធជាលក្ខណៈទ្រង់ទ្រាយធំ នៅតាមខេត្តគោលដៅជាខេត្តដែលមានសក្តានុពលខ្ពស់។ លោកបន្តថា “រដ្ឋាភិបាលបាន និងកំពុងដើរតាម Model Pickup ដោយជ្រើសរើសខេត្តធំៗ និងមានសក្តានុពលសេដ្ឋកិច្ច អភិវឌ្ឍហេដ្ឋារចនាសម្ព័ន្ធ ដូចជា ខេត្តព្រះសីហនុ ខេត្តសៀមរាប ហើយខេត្តបន្ទាប់អាចជាខេត្តកំពត និងមានខេត្តបន្តបន្ទាប់ទៀត”៕

កម្ពុជានឹងមានតុលាការពាណិជ្ជកម្ម ដើម្បីដោះស្រាយវិវាទពាណិជ្ជកម្មក្នុងស្រុក

ដោយៈ រ៉ាណេត

ភ្នំពេញៈ ក្នុងគោលបំណងជួយសម្រួល និងដោះស្រាយនូវរាល់វិវាទដែលកើតឡើងនៅក្នុងទីផ្សារនៃការធ្វើពាណិជ្ជកម្មក្នុងស្រុក សភាពាណិជ្ជកម្មកម្ពុជានឹងបង្កើតស្ថាប័នតុលាការពាណិជ្ជកម្ម ខណៈដែលមានការឯកភាពពីក្រសួងពាណិជ្ជកម្ម និងក្រសួងយុត្តិធម៌រួចរាល់។

អនុប្រធានសភាពាណិជ្ជកម្មកម្ពុជា លោកឧកញ៉ា លឹម ហេង បានមានប្រសាសន៍បង្ហើបប្រាប់នៅព្រឹកថ្ងៃទី៦ ខែវិច្ឆិកា ឆ្នាំ២០២០នេះថា ដោយសារតែបញ្ហា និងរឿងវិវាទនានាដូចដែលបានលើកឡើងខាងលើនេះ តែងតែកើតមាន និងប៉ះពាល់ដល់វិស័យពា​ណិជ្ជកម្ម ជាពិសេសទីផ្សារក្នុងស្រុក បច្ចុប្បន្ននេះតាមរយៈសភាពាណិជ្ជកម្មកម្ពុជា បានពិភាក្សា និងស្នើសុំទៅកាន់ក្រសួងយុត្តិធម៌ ក្នុងបង្កើតស្ថាប័នតុលាការពាណិជ្ជកម្ម ដើម្បីចូលរួមដោះស្រាយនូវរាល់បញ្ហាផ្សេងៗ ដែលកើតមាននៅក្នុងវិស័យពាណិជ្ជកម្ម។

លោកឧកញ៉ាបានបញ្ជាក់ថា “កាលពីពេលកន្លងទៅនេះ នៅតាមបណ្តាខេត្ត ក្រុង ស្ទើរទូទាំងប្រទេស តែងកើតមានបញ្ហារវាងពាណិជ្ជកម្ម និងស្ថាប័នតុលាការ ទៅលើការដោះស្រាយពាក្យបណ្តឹង ក្នុងការធ្វើពាណិជ្ជកម្មគ្មានតម្លាភាព”។ លោកបន្តថា“ប៉ុន្តែពេលនេះ ដើម្បីជាដំណោះស្រាយកាន់តែល្អ និងអាចជួយសម្រួលដល់បណ្តាពាណិជ្ជករផងដែរ សភាពាណិជ្ជកម្មកម្ពុជា បានស្នើសុំដល់ក្រសួងយុត្តិធម៌ក្នុងការរៀបចំ និងបង្កើតឱ្យមានតុលាការពាណិជ្ជកម្ម ដែលរហូតមកដល់ពេលនេះ សំណើរត្រូវបានដាក់រួចរាល់ ហើយថ្នាក់ដឹកនាំក្រសួងយុត្តិធម៌ក៏បានពិនិត្យហើយផងដែរ នៅចាំតែការសម្រេច និងជ្រើសរើសទីតាំងប៉ុណ្ណោះ”។

លោកឧកញ៉ាបន្តថា តាមគម្រោង គឺទីតាំងស្ថាប័នតុលាការនេះ អាចនឹងត្រូវដាក់នៅក្នុងសភាពាណិជ្ជកម្មកម្ពុជាតែម្ដង ព្រោះនៅមានទីធ្លាទូលាយ និងទំនេរច្រើន ម៉្យាងទៀតស្រួលក្នុងការទទួលពាក្យបណ្តឹង ព្រោះគ្រាន់តែសមាជិករបស់សភាពាណិជ្ជកម្មកម្ពុជានៅពេលបច្ចុប្បន្ននេះ បានបន្តកើនឡើងរហូតដល់ជាង៥០០០ក្រុមហ៊ុន នៅទូទាំងប្រទេស៕

ខេត្តសៀមរាបរំពឹងនឹងស្រូបទាញភ្ញៀវទេសចររហូតដល់៧លាននាក់នៅឆ្នាំ២០៣៥ បន្ទាប់ពីបម្រោងអភិវឌ្ឍន៍ធំៗចំនួន៣បញ្ចប់

ដោយ ហ្សូលី

ភ្នំពេញៈ រដ្ឋបាលខេត្តសៀមរាបរំពឹងយ៉ាងជឿជាក់ថា ខេត្តនឹងអាចស្រូបទាញភ្ញៀវទេសចរប្រមាណ៧លាននាក់ នៅក្នុងឆ្នាំ២០៣៥ បន្ទាប់ពីគម្រោងអភិវឌ្ឍន៍ហេដ្ឋារចនាសម្ព័ន្ធធំៗ បញ្ចប់ការស្ថាបនានៅក្នុងពេលឆាប់ៗខាងមុខ។

គម្រោងអភិវឌ្ឍធំៗចំនួន៣ក្នុងខេត្តសៀមរាប មានដូចជា ព្រលានយន្តហោះអន្តរជាតិថ្មី គម្រោងស្ថាបនាផ្លូវ៣៨ខ្សែ និងទីក្រុងសៀមរាបថ្មីជាគន្លឺះ សម្រាប់ទាក់ទាញភ្ញៀវទេសចររហូតដល់៧លាននាក់ នៅឆ្នាំ២០៣៥។ នេះបើយោងតាមខ្លឺមសារសំខាន់នៅក្នុងកិច្ចប្រជុំសាមញ្ញលើកទី១៨ របស់ក្រុមប្រឹក្សាខេត្តសៀមរាបអាណត្តិទី៣ កាលពីថ្ងៃទី៥ ខែវិច្ឆិកា ឆ្នាំ២០២០ កន្លងទៅ។

លោកអភិបាលរងខេត្តសៀមរាប លោកលី សំរិទ្ធ បានមានប្រសាសន៍ថា មោទនភាព ចំពោះប្រជាពលរដ្ឋក្នុងក្រុងសៀមរាប បានចូលរួមយ៉ាងសកម្ម និងស្ម័គ្រចិត្ត ក្នុងការរុះរើសំណង់របស់ខ្លួន ទោះបីផលប៉ះពាល់នោះតិចឬច្រើនក៏ដោយ ដើម្បីជាប្រយោជន៍រួមសម្រាប់ខេត្ត និងប្រទេសជាតិទាំងមូល។ ទោះជាយ៉ាងណាក៏ដោយ លោកបានបញ្ជាក់ថា សំណង់ដែលបងប្អូនប្រជាពលរដ្ឋបានរុះរើនេះ គឺស្ថិតនៅលើដីសាធារណៈរបស់រដ្ឋ ពុំមានប៉ះពាល់ដល់ទ្រព្យសម្បត្តិឯកជនទេ។

ជាមួយនោះ ឯកឧត្តមប្រធានក្រុមប្រឹក្សាខេត្ត អ៊ឹង ហឿន បានបង្ហាញអំពីការអនុវត្តគម្រោងព្រលានយន្តហោះអន្តរជាតិ គឺនៅតែបន្តសាងសង់ ក្នុងភូមិសាស្ត្រស្រុកសូទ្រនិ​គម និងគ្រោងបញ្ចប់ដំណាក់កាលទី១ នៅឆ្នាំ២០២៣។

ដោយឡែក ទីក្រុងសៀមរាបថ្មី គឺដើម្បីទ្រទ្រង់ដល់ទីក្រុងសៀមរាបបច្ចុប្បន្ន ដែលមិនអាចសាងសង់សំណង់ខ្ពស់ៗបាន និងចូលរួមទាក់ទាញភ្ញៀវទេសចរប្រមាណ៧លាន​នាក់នៅឆ្នាំ២០៣៥។ គម្រោងទីក្រុងថ្មីនេះ នឹងរៀបចំនៅក្នុងភូមិសាស្ត្រស្រុកសូទ្រនិគម ខេត្តសៀមរាបផងដែរ។

បន្ថែមពីគម្រោងសំខាន់ៗទាំង៣នេះ  រដ្ឋបាលក្រុងស្រុកទាំងអស់ ត្រូវពិនិត្យមើលសំណង់នៅលើដីចំណីផ្លូវសាធារណ: ឬដីសាធារណ:របស់រដ្ឋ និងត្រូវមានវិធានការលើសំណង់ទាំងនោះ៕

វាគ្មឹនសំខាន់ៗៗចំនួន៤រូបនឹងបង្ហាញពីបច្ចុប្បន្នភាពវិស័យអចលនទ្រព្យក្នុង សិក្ខាសាលាពិសេសមួយ

ដោយៈ រ៉ាណេត

ភ្នំពេញៈ វាគ្មិនជំនាញៗដែលមានបទពិសោធន៍ក្នុងវិស័យអចលនទ្រព្យ នឹងបង្ហា​ញពីដំណើរវិវត្តន៍ និងបច្ចុប្បន្នភាពក្នុងវិស័យអចលនទ្រព្យក្នុងសិក្ខាសាលាពិសេសមួយ ដែលនឹងរៀបចំឡើងនៅចុងខែវិច្ឆិកាខាងមុខនេះ។

សិក្ខាសាលានេះ  ធ្វើឡើងក្នុងគោលបំណងបង្កើនការយល់ដឹង ពីស្ថានភាពជាក់ស្ដែងនៃវិស័យអចលនទ្រព្យពិតប្រាកដ ជាពិសេសផ្តោតទៅលើទីផ្សារលំនៅដ្ឋាន ទីផ្សារខុនដូ និងទីផ្សារដីឡូតិ៍ សមាគមអចលនទ្រព្យសកល នឹងបើកសិក្ខាសាលាស្ដីពី “បច្ចុប្បន្នភាពអចលនទ្រព្យនៅកម្ពុជា” នៅសាលសន្និសីទ Factory Phnom Penh (Urban Village)នាចុងខែវិច្ឆិកា ឆ្នាំ២០២០ខាងមុខនេះ។

ប្រធានសមាគមអចលនទ្រព្យសកល លោក សំ សុខនឿន ដែលជាអ្នកផ្តួចផ្តើមបង្កើតសិក្ខាសាលានេះ បានមានប្រសាសន៍នៅព្រឹកថ្ងៃទី៦ ខែវិច្ឆិកា ឆ្នាំ២០២០នេះថា តាមរយៈសិក្ខាសាលាដ៏មានសារសំខាន់នេះ នឹងធ្វើឱ្យអ្នកចូលរួមមានការយល់ដឹងកាន់​តែច្បាស់ អំពីទីផ្សារអចលនទ្រព្យនៅកម្ពុជា ជៀសវាងការទទួលបានព័ត៌មានបំផុសពីភ្នាក់ងារមួយចំនួនដែលគ្មានការពិត។

លោកបន្តថា “យើងចង់ឱ្យអ្នកចូលរួម បានយល់ដឹងកាន់តែច្បាស់ពីទីផ្សារអចលនទ្រព្យ ដោយផ្តោតសំខាន់ទៅលើផ្នែកបុរីលំនៅដ្ឋាន ទីផ្សារខុនដូ ទីផ្សារដីឡូតិ៍ នាពេលបច្ចុប្បន្ន រួមជាមួយនឹងការផ្តល់ជូននូវគន្លឹះខ្លះៗ ដែលអាចជំរុញដល់ការអចលនទ្រព្យផងដែរ”។

លោកបញ្ជាក់ថា “ភ្នាក់ងារខ្លះ ដើម្បីអាចទទួលប្រយោជន៍ពីការលក់ បានបំផុសព័ត៌មានមិនពិត ទៅដល់អតិថិជនគោលដៅរបស់ខ្លួន ហើយអ្នកខ្លះដែលចង់ចូលរួមនៅក្នុងទីផ្សារអចលនទ្រព្យ ដោយការទុកអចលនវត្ថុយកលក់បន្តយកចំណេញ ចេះតែធ្វើឡើងតាមគេ ដោយគ្មានការយល់ដឹងច្បាស់វិស័យនេះ ដែលវាជាការប្រឈមខ្ពស់ទៅនឹងហានិភ័យ។ ដូច្នេះអ្វីៗដែលជាចំណេះដឹងទាំងអស់នេះ នឹងមានបង្ហាញនៅក្នុងសិក្ខាសាលាដែលគ្រោងធ្វើនៅចុងខែវិច្ឆិកា ឆ្នាំ២០២០ ខាងមុខនេះ”។

អង្គសិក្ខាសាលាមួយនេះ នឹរៀបចំឡើងនៅថ្ងៃទី២១ ខែវិច្ឆិកា ឆ្នាំ២០២០ ក្រោមកិច្ចសហការរវាងសមាគមអចលនទ្រព្យសកល ក្រុមហ៊ុនភ្នាក់ងារអចលនទ្រព្យ KW SAM SN Realty Co,.Ltd និង Urban Village ក្រោមការចូលរួមធ្វើបទបង្ហាញពីសំណាក់អ្នកជំនាញចំនួន៤រូប រួមមានលោក សំ សុខនឿន ប្រធានសមាគមអចលនទ្រព្យសកល និងជាអគ្គនាយកក្រុមហ៊ុន KW SAM SN Realty Co,.Ltd លោក យិន លាងគង់អគ្គនាយកគេហទំព័រ Propertyrea.asia លោក ឡោ វិចិត្រ អនុប្រធានសមាគមអចលនទ្រព្យសកលរាជធានីភ្នំពេញ និងលោក វ៉េង វណ្ណនី ប្រធានក្រុមឯកទេសលក់ខុនដូ។

ដោយឡែកលក្ខខណ្ឌចូលរួម សម្រាប់សិក្ខាកាមចុះឈ្មោះចំនួន៥០នាក់ឥតគិតថ្លៃ ៥០នាក់បន្ទាប់ នឹងត្រូវចំណាយ១៥ដុល្លារក្នុងម្នាក់ ហើយ១០០នាក់បន្ទាប់ត្រូវចំណាយ២០ដុល្លារក្នុងម្នាក់ ហើយថវិកាដែលប្រមូលបានទាំងអស់ នឹងនឹងយកទៅបរិច្ចាកជូនជនរងគ្រោះដោយទឹកជំនន់។ ព័ត៌មានលម្អិតសូមទាកើទងតាមរយៈទូរស័ព្ទលេខ ៖ ០៩៣ ៣១០ ៧៣៧ / ០៧៧ ៣៩១ ០០០៕

ខ្លីៗ..ទាក់ទងនឹងដំណើរវិវត្តន៍៍នៃលទ្ឋផលឆ្នោតអាមេរិក ស្របពេលលោកត្រាំបន្តឡាំប៉ា ហើយJoe បន្តស្ងប់ស្ងាត់

        ដោយស៊ីវ ម៉េង

        ភ្នំពេញៈ មេដឹកនាំលើពិភពលោកកំពុងតាមដាន ការវិវត្តនៃការប្រកាសលទ្ឋផលឆ្នោតនៅសហរដ្ឋអាមេរិក ខណៈបាតុកម្មជុំវិញការរាប់សន្លឹកឆ្នោត បានផ្ទុះឡើងនៅតាមបណ្តារដ្ឋជាច្រើននៅអាមេរិក។

ត្រាំចោទប្រកាន់លើភាពមិនប្រក្រតី

        ប្រធានាធិបតីពោរពេញដោយភាពចម្រូងចម្រាស់ លោកដូណាល់ ត្រាំនៅតែប្រកា ន់ជំហថា “បើគេរាប់សន្លឹកឆ្នោតស្របច្បាប់នោះលោកគឺជាអ្នកឈ្នះ”។

ប៉ុន្តែសំណួរនៅទីនេះគឺថា តើសហរដ្ហអាមេរិក ដែលជាប្រទេសមហាអំណាចមួយ ពិតជាមិនអាចរៀបចំប្រព័ន្ឋបោះឆ្នោតបានដោយសេរី យុត្តិធ៌មបានឬយ៉ាងណា?។

ចៅក្រមនៅរដ្ឋចំនួនពីរច្រានចោលបណ្តឹងរបស់ក្រុមយុទ្ឋនាការរបស់ត្រាំ

ចៅក្រមនៅរដ្ឋចំនួន២របស់អាមេរិក គឺរដ្ឋមីឈីហ្គេន និងរដ្ឋចចៀរបានទាត់ចោលពាក្យបណ្តឹង របស់ក្រុមយុទ្ឋនាការឃោសនាបោះឆ្នោតរបស់ត្រាំ ជុំវិញការរាប់សន្លឹកឆ្នោតនៅរដ្ឋ Swing Stateទាំងពីរ ខណៈលោកJoe Bidenជាអ្នកឈ្នះ ក្នុងរដ្ឋទាំងពីរនេះ។

លោកស្រីCynthia Stephens ចៅក្រមក្នុងរដ្ឋមីឈីហ្គេនបានមានប្រសាសន៍ថា លោកស្រីមានគំរោងចេញផ្សាយ ពីការសម្រេចចិត្តជាលាយលក្ខណ៍អក្សរ នៅសុក្រថ្ងៃនេះ។

ការស៊ើបអង្កេតថ្មី

លោកBill Pascrellសមាជិកសភាមកពីគណបក្សប្រជាធិបតេយ្យ បានប្តឹងទៅកាន់ការិយាល័យប្រឹក្សាយោបល់ពិសេស នៃសហរដ្ឋអាមេរិកឲ្យបើកការស៊ើបអង្កេតថ្មីមួយលើ​ក្រុមយុទ្ឋនាការរបស់លោកត្រាំ  បានប្រើប្រាស់សេតវិមាន ជាទីបញ្ជាការមួយនៅថ្ងៃបោះឆ្នោត  ដែលនេះជាទង្វើបំពានច្បាប់សហព័ន្ឋ។

សំណើរសមាជិកសភាគណបក្សប្រជាធិបតេយ្យ ត្រូវបានទទួលយកហើយដើម្បីធ្វើឲ្យប្រាកដថា តើក្រុមយុទ្ឋនាការឃឃោសនាបោះឆ្នោតរបស់លោកត្រាំ ពិតជាបានបំពានច្បាប់Hatch Actឬទេ។

ច្បាប់ Hatch Act ដែលត្រូវបានបង្កើតឡើងកាលពីឆ្នាំ១៩៣៩ គឺជាច្បាប់មួយដែលដាក់កំហិតលើសកម្មភាពនយោបាយ របស់មន្ត្រីរដ្ឋាភិបាលសហព័ន្ធ លើកលែងតែប្រ ធា នាធិបតី និងអនុប្រធានាធិបតីប៉ុណ្ណោះ។

បើតាមលោក Pascrell ក្រុមយុទ្ធនាការឃោសនាបោះឆ្នោតរបស់លោក ត្រាំ រួមទាំងលោក ត្រាំ ត្រូវបានគេចោទថា បានប្រើប្រាស់បន្ទប់សង្រ្គាមនៃការិយាល័យប្រតិបត្តិ អ៉ីសិនហូវើ (Eisenhower Executive) នៃសេតវិមាន ដើម្បីតាមដានការវិវត្តលទ្ធផលនៅថ្ងៃបោះឆ្នោត។

លោកJoe Bidenនៅរក្សាភាពហ្នឹងន

បេក្ខជនប្រធានាធិបតីមកពីគណបក្សប្រជាធិបតេយ្យ លោកJoe Bidenនៅតែរក្សាភាពហ្នឹងនរបស់ខ្លួន ខណ

ៈលោកបានកំពុងនាំមុខដោយសម្លេងឆ្នោត ហើយរហូតមកទល់ពេលនេះ លទ្ឋផលឆ្នោតហាក់ជាប់គាំង ដោយលោកJoeនៅតែរក្សាសម្លេងនាំមុខ២៦៤សម្លេង និងលោកដូណាល់ត្រាំនៅរក្សាសម្លេង២១៤។

លោកJoe បាននិយាយនៅក្នុងបណ្តាញ ទំនាក់ទំនងសង្គមរបស់ខ្លួនថា លោករំពឹងថា លោកនឹងឈ្នះការបោះឆ្នោតអាណត្តិថ្មីនេះ ហើយសូមឲ្យអ្នកគាំទ្ររបស់ខ្លួនបន្តរក្សាភាពជឿជាក់៕

អ្នកជំនាញ៖ ៤ ចំនុចគួរពិនិត្យ បើមិនចង់ទិញឬវិនិយោគចំគម្រោងខុនដូបោកប្រាស់

ដោយ ហ្សូលី

ភ្នំពេញ៖ ទីផ្សារខុនដូ គឺជានិន្នាការថ្មីស្រឡាងសម្រាប់ការរស់នៅទាន់សម័យ ដែលប្រជាជនកម្ពុជាកំពុងមានការចាប់អារម្មណ៍យ៉ាងខ្លាំងពីការរស់នៅបែបថ្មីនេះ។ អ្នកជំនាញបានបង្ហាញប្រាប់ពីចំនុចគួរប្រុងប្រយ័ត្ន និងត្រូវពិនិត្យឱ្យបានល្អិតល្អន់ មុននឹងសម្រេចចិត្តទិញឬវិនិយោគលើគម្រោងណាមួយ ជៀសវាងហានិភ័យទៅថ្ងៃមុខ។

អ្នកជំនាញលើផ្នែកខុនដូ និងជាអគ្គនាយកក្រុមហ៊ុន ERA Cambodia បានថ្លែងប្រាប់គេហទំព័រ Propertyarea.asia ថា ដើម្បីចៀសវាងទិញចំគម្រោងបោកប្រាស់ និងបង្កើនការប្រុងប្រយ័ត្ន ទី ១ អ្នកទិញឬចង់វិនិយោគគប្បីពិនិត្យឱ្យបានច្បាស់លាស់ទៅលើក្រុមហ៊ុនភ្នាក់ងារលក់។

លោកបន្តថា ព្រោះថាមិនគ្រប់គម្រោងលើទីផ្សារសុទ្ធតែល្អនោះទេ ហើយរបស់ថោកមិនប្រាកដថាល្អ ចំណែកឯរបស់ថ្លៃក៏មិនប្រាកដថាល្អដែរ អញ្ចឹងចាំបាច់ត្រូវមើលទៅលើក្រុមហ៊ុនភ្នាក់ងារលក់សិន ថាក្រុមហ៊ុននោះមានច្បាប់អនុញ្ញាត មានអាជ្ញាបណ្ណដែលហៅថា License មានបង់ពន្ធ ប៉ាតង់ ព្រោះភ្នាក់ងារលក់ខ្លះចេះតែលក់ទាំងគ្មានអាជ្ញាបណ្ណ។

អគ្គនាយករូបនេះបញ្ជាក់ថា ក្រៅពីនេះ អ្នកទិញត្រូវពិនិត្យមើលបន្ថែមទៅឯកសារ អាជ្ញាបណ្ណមួយចំនួនដែលបង្ហាញពីការអនុម័តរបស់រដ្ឋាភិបាល ជាពីសេសប្រវិត្តិនៃការអភិវឌ្ឍឱ្យបានច្បាស់លាស់ប្រាកដប្រជា។ ទី ៣ គឺនៅលើកត្តាទីតាំង និងសំណង់ ថាតើនៅតំបន់នោះមានការអភិវឌ្ឍលើហេដ្ឋារចនាសម្ព័ន្ធគ្រប់គ្រាន់ មិនមានហានិភ័យទិញនៅក្នុងតំបន់អភិវឌ្ឍរបស់រាជរដ្ឋាភិបាល ស៊ើបសួរលម្អិតពីគុណភាពសំណង់ និងគុណសម្បត្តិជាច្រើនទៀត។

ចុងក្រោយ ត្រូវសិក្សាពីតម្លៃរបស់គម្រោងថាតើល្អដែរឬយ៉ាងណា ជាពិសេសដំណើរការនៃការបង់ប្រាក់មានភាពងាយស្រួលឬស្មុគស្មាញដូចម្តេចខ្លះ។ ជាធម្មតាអ្នកមានបំណងចង់ទិញឬវិនិយោគ គប្បីប្រៀបធៀប និងសិក្សាពិនិត្យលើចំនុចទាំងអស់នេះ ជៀសវាងការទិញប៉ះចំគម្រោងមិនមានគុណភាព នាំឱ្យខកចិត្ត និងខាតបង់ថវិកា ព្រោះគម្រោងខុនដូនៅកម្ពុជាមានច្រើនខ្លាំងណាស់នៅក្នុងទីផ្សារក្រុងភ្នំពេញ។

របាយការណ៍របស់ក្រុមហ៊ុន CBRE Cambodia បានឱ្យដឹងថា នៅត្រីមាសទី៤ឆ្នាំនេះ នឹងឃើញការបញ្ចប់គម្រោងចំនួន៤បន្ថែមទៀត ដែលនឹងចូលរួមចំណែកក្នុងទីផ្សារ ប្រមាណ២,៦០០យូនីត ។ ទោះយ៉ាងណា ការពន្យាពេលនៃការសាងសង់ នៅតែបន្តកើតមាននៅក្នុងវិស័យនេះ ដោយបច្ចុប្បន្នមានគម្រោងចំនួន៦ ពន្យាពេលបញ្ចប់គម្រោងទៅឆ្នាំ២០២១៕

ចំណេះដឹង! តើ​អ្វី​ជា​គោ​លន​យ​បាយ​បើកចំហរ​សេដ្ឋកិច្ចកម្ពុជា?

ដោយៈ​វុត្ថា

ភ្នំពេញៈ កម្ពុជា គឺជា​ប្រទេស​បើកចំហរ​សេដ្ឋកិច្ច ជាមួយ​គោលនយោបាយ​គាំពារ​វិនិយោគ​ល្អ​ជាងគេ​នៅក្នុង​តំបន់ ក្នុងការ​ស្វាគមន៍​ការវិនិយោគ​ផ្ទា​ល់ពី​បរទេស។

រាជរដ្ឋាភិបាល​កម្ពុជា បានដាក់​ចេញ​នូវ​គោលនយោបាយ បើកចំហរ​ជើងមេឃ​នេះ គឺ​គ្មាន​ការរើសអើង ចំពោះ​ការធ្វើ​ពាណិជ្ជកម្ម​ឆ្លងកាត់​ព្រំដែន ហើយ​វិនិយោគិន​បរទេស​មាន​សិទ្ធិ​កាន់កាប់​ភាគហ៊ុន​បាន​ទាំងស្រុង និង​អាច​ប្រមូល​ប្រាក់ចំណេញ ពី​ការធ្វើ​ធុរកិច្ច​បាន១០០ភាគរយ។

អ្នកវិនិយោគ​មិន​ត្រឹមតែ​អាច​គ្រប់គ្រង​ជំនួញ និង​ប្រមូល​ប្រាក់ចំណេញ​បាន១០០ភាគរយ​ប៉ុណ្ណោះ​ទេ ប៉ុន្តែ​ពួកគេ​ថែមទាំង​អាច​រីករាយ ជាមួយ​ប្រព័ន្ធ​អនុគ្រោះ​ពន្ធផ្សេងៗផ្តល់​ដោយ​សហគមន៍​អឺរ៉ុប សហរដ្ឋអាមេរិក ប្រទេស​ចិន និង​ប្រទេសផ្សេងៗទៀត។

ដោយឡែក នៅក្រោម​ក្របខណ្ឌ​ភាពជា​ដៃគូ​សេដ្ឋកិច្ច​ទូលាយ កម្រិត​តំបន់ (RCEP) រដ្ឋាភិបាល​កម្ពុជា បានដាក់​ចេញ​នូវ​គោលនយោបាយ បើកចំហរ​ជើងមេឃ ដើម្បី​ស្វាគមន៍​រាល់​ការហោះហើរ ដោយ​ត្រង់​ពី​បណ្តា​ប្រទេស​នានា​នា នៅ​ទូទាំង​ពិភពលោក​សំដៅ​ទាក់ទាញ​វិនិយោគិន និង​ភ្ញៀវទេសចរ ចូលមក​ទស្សនា​ប្រទេស​កម្ពុជា​ឲ្យ​បាន​កាន់តែច្រើន៕

អ្នកជំនាញ៖ ទិញ​ដីធ្លី​ក្នុងពេល​មាន​បញ្ហា​មានឱកាស​ចំណេញ​ខ្ពស់​នៅពេល​អនាគត

ដោយៈ លក្ខិណា

ភ្នំពេញៈ នៅពេល​សេដ្ឋកិច្ច​មាន​បញ្ហា​ដូចជា​កូ​វីដ១៩ និង​បញ្ហា​វិបត្តិ​ផ្សេងទៀត ធ្វើឱ្យ​តម្លៃ​ដីធ្លី​ក៏មាន​បញ្ហា ដោយ​ពលរដ្ឋ​មួយចំនួន​បាន​លក់​ដី ដើម្បី​យកលុយ​មក​ដោះស្រាយ ប៉ុន្តែ​អ្នកជំនាញ​អចលនទ្រព្យ​លើកឡើងថា ទិញ​ដី​នៅមាន​បញ្ហា ទោះជា​យកលុយ​ពី​ប្រភព​ណាក៏ដោយ នឹង​អាច​មានឱកាស​ចំណេញ​ខ្ពស់​នៅពេល​អនាគត។

លោក ម៉ឹង លាង​ហ៊​ន អ្នកជំនាញ​អចលនវត្ថុ​មួយរូប​បាន​និយាយថា ខណៈ​សេដ្ឋកិច្ច​ធ្លាក់ចុះ​ដូច​នៅ​កម្ពុជា ជា​ពេលវេលា​ល្អ​សម្រាប់​អ្នក​ដែល​ចង់​ទិញ​ដី ហើយ​បើសិនជា​មិនមាន​ធនធាន​គ្រប់គ្រាន់ អាច​យក​ពី​ខាង​ណា​តាម​ដែល​អាច​ធ្វើបាន ដើម្បី​ទិញ​ដី​ទុក ព្រោះថា ទិញ​មាន​ពេល​បញ្ហា​វា​ឱកាសល្អ មួយ​សម្រាប់​ទទួលយក​ប្រាក់ចំណេញ។

លោក​បន្តថា “នៅពេល​សេដ្ឋកិច្ច​មាន​បញ្ហា មនុស្សម្នា​ជាច្រើន​ត្រូវការ​លុយ ដើម្បី​ដោះស្រាយ​ក្នុង​គ្រួសារ និង​ក្នុង​អាជីវកម្ម ដូច្នេះ​ពួកគាត់​ត្រូវ​ការលក់​ដី ដែលមាន​ក្នុងតម្លៃ​ទាប​ជាង​ទីផ្សារ” ។ លោក​បន្តថា “ជាក់ស្ដែង​បច្ចុប្បន្ន មាន​ពលរដ្ឋ​និង​ម្ចាស់​ដី​ជាច្រើន បានប្រកាស​លក់​ក្នុងតម្លៃ​ទាប​ជាង​ទីផ្សារ​រហូតដល់៣០ភាគរយ​ក៏មាន ដូច្នេះ​បើសិនជា​អ្នកមាន​លុយ អ្នក​ឆ្លាត​គេ​ពេលនេះ ដើម្បី​ទិញ​ដី​នោះ​ទុក​ចំណេញ នៅពេល​សេដ្ឋកិច្ច​ល្អប្រសើរ​ឡើងវិញ” ។

លោក​ម៉ឹង លាង​ហ៊​ន​បាន​ថ្លែងថា ជាធម្មតា​តែងតែមាន​ឆ្នាំ​ល្អ​និង​ឆ្នាំ​អាក្រក់ ។ ពេលនេះ កម្ពុជា​ជួបនឹង​ឆ្នាំ​អាក្រក់​ហើយ​វា​មិនយូរ​ទេ អាច​ថា១ឆ្នាំ​ឬ២ឆ្នាំ វា​នឹង​ល្អ​វិញ ពេលនេះ ដី​នឹង​ហក់​ឡើងវិញ ក្រោយពេលអ្វីៗត្រូវបាន​ដោះស្រាយ​រួចរាល់។

លោក​ជិន ណារិន ភ្នាក់ងារ​ទិញ​លក់​ដីធ្លី មួយរូប​ប្រចាំ​ខេត្តកំពត ក៏បាន​និយាយ​ឱ្យដឹងថា ពេលនេះ អ្នកលក់​ដីធ្លី​ក្រោម​តម្លៃ​ទីផ្សារ​ពិត​ជាមាន​ច្រើន​មែន ដោយសារតែ​ពួកគាត់​ត្រូវការ​លុយ​បន្ទាន់ ដូច្នេះ​បើសិនជា​ចង​ទិញ​ដី​ទុក​ចំណេញ គឺជា​ឱកាស​មួយ​ដ៏​ល្អ​សម្រាប់​ការទិញ​ដី។

លោក​បន្តថា “ពលរដ្ឋ​ខ្លះ​ត្រូវការ​លុយ ហើយ​គាត់​មាន​ដី ដែល​ទិញ​ពី​ពេល​កន្លង ទោះបី​មិន​ចំណេញ ឬ​ចំណេញ​តិចតួច​ពួកគាត់ ក៏ត្រូវ​តែ​លក់​ដើម្បី​ដោះស្រាយ​ចំពោះមុខ ហើយ​អ្នក​ខ្លះទៀត​ដែលមាន​ដី​កេរ ក៏ត្រូវ​លក់​ហើយ​យកលុយ​ទៅ​ដី នៅ​ទីតាំង​ផ្សេងទៀត​ដែលមាន​តម្លៃ​ទាប​ជាង​ដី​របស់ខ្លួន ហើយ​សល់​លុយ​មួយចំនួន ដើម្បី​ស្រាយ​បញ្ហា​ដែល​ជួបប្រទះ​នៅពេលនេះ” ៕

អ្នកជំនាញ​បង្ហើប​ពី​បណ្តា​ខេត្ត​នៅតាម​ព្រំដែន​នៅតែមាន​ចរន្ត​ទិញ-លក់​អចលនទ្រព្យ

ដោយៈ រ៉ា​ណេ​ត

ភ្នំពេញៈ នៅពេល​និយាយ​ពី​ខេត្ត​ដែលមាន​សក្ដានុពល ក្នុង​វិស័យ​អចលនទ្រព្យ ភាគច្រើន​តែង​លើក​ពី​បណ្តា​ខេត្ត ដែល​ស្ថិតនៅក្នុង​តំបន់​ប៉ូល​សេដ្ឋកិច្ច និង​បណ្តា​ខេត្ត​ដែល​ស្ថិតនៅ​តំបន់ឆ្នេរ​តែប៉ុណ្ណោះ។

ប៉ុន្តែ​ពេលនេះ អ្នកជំនាញ​នៅក្នុង​វិស័យ​អចលនទ្រព្យ បាន​បង្ហើប​ពី​ខេត្ត​មួយចំនួនទៀត​ដែល​ស្ថិតនៅ​តំបន់​ព្រំដែន ក៏មាន​សក្ដានុពល​ក្នុង​ការទិញ លក់ អចលនទ្រព្យ​ផងដែរ។

លោក​ឧកញ៉ា នួន រិទ្ធី អគ្គនាយក​ក្រុមហ៊ុន​អចលនទ្រព្យ Khmer Foundation Appraisal បាន​មានប្រសាសន៍ប្រាប់​នៅ​ល្ងាច​ថ្ងៃទី៥ ខែវិច្ឆិកា ឆ្នាំ២០២០ថា គ្រប់​បណ្តា​ខេត្ត​ក្រុង​នៅ​ទូទាំងប្រទេស​កម្ពុជា ភាគច្រើន​គឺ​សុទ្ធ​តែមាន​សក្ដានុពល ប៉ុន្តែ​វា​អាស្រ័យ​ទៅតាម​វិស័យផ្សេងៗគ្នា។

លោក​ឧកញ៉ា​បន្តថា “សក្ដានុពល​ខេត្ត​ខ្លះ​ស្ថិតនៅក្នុង​វិស័យ​កសិកម្ម ខេត្ត​ខ្លះ​ក្នុង​វិស័យ​ឧស្សាហកម្ម ខេត្ត​ខ្លះ​មាន​សក្ដានុពល​ក្នុងការ​ធ្វើ​ពាណិជ្ជកម្ម ហើយ​ខេត្ត​ខ្លះ​មាន​សក្ដានុពល​ទៅលើ​វិស័យ​ទេសចរណ៍ និង​អចលនទ្រព្យ ក៏ដូចជា​វិស័យ​សំណង់​ផងដែរ” ។ លោក​ឧកញ៉ា​បន្តថា “សម្រាប់​ខេត្ត​ដែលមាន​សក្ដានុពល ក្នុង​វិស័យ​អចលនទ្រព្យ និង​សំណង នៅពេល​បច្ចុប្បន្ននេះ ក្រៅពី​ខេត្ត​ព្រះសីហនុ ប៉ោយប៉ែត ខេត្តកណ្តាល កំពង់ស្ពឺ កំពត កែប កោះកុង​នោះ សម្រាប់​ខេត្ត​ដែល​ស្ថិតនៅតាម​តំបន់​ព្រំដែន ក៏មាន​សក្ដានុពល​ក្នុង​ការទិញ​លក់​ដីធ្លី​ផងដែរ” ។

លោក​ឧកញ៉ា នួន រិទ្ធី បាន​មានប្រសាសន៍​បន្តទៀតថា ខេត្ត​ជាប់​តំបន់​ព្រំដែន រួមមាន​ខេត្តបន្ទាយមានជ័យ រតនគីរី ស្ទឹងត្រែង ត្បូងឃ្មុំ ស្វាយរៀង តាកែវ ពោធិ៍សាត់ បាត់ដំបង ក៏មាន​សក្ដានុពល​ក្នុង​ការទិញ​លក់​ផងដែរ ជាពិសេស​ផ្នែក​ដីធ្លី​ដែល​ស្ថិតក្នុង និង​ក្បែរ​តំបន់​ដោះដូរ​ទំនិញ​សម្រាប់​នាំចូល និង​នាំចេញ​ទៅកាន់​ទីផ្សារ។ ចាប់ពីពេលនេះ ឬ​ឆ្នាំ​បន្ទាប់ តម្លៃ​អចលនទ្រព្យ ក៏ដូចជា​ដីធ្លី នឹង​ឡើងថ្លៃ​ជា​បន្តបន្ទាប់ ព្រោះ​តម្រូវការ​នៃ​ការប្រើប្រាស់​ដី​មានការ​កើនឡើង។ នេះ​ជា​ការគិត​របស់លោក។

ពាក់ព័ន្ធ​ទៅនឹង​សក្ដានុពល​នៃ​បណ្តា​ខេត្ត ដែល​ស្ថិតនៅតាម​ព្រំប្រទល់ ដែល​សំដៅទៅ​តំបន់​ច្រកទ្វារព្រំដែន បច្ចុប្បន្ន ក្រុម​ប្រឹក្សាជាតិ​ភស្តុភារ​កម្ម​បានរៀបចំ​គម្រោង​ស្តីពី​ការធ្វើឱ្យ​ប្រសើរឡើង​នូវ​ច្រកទ្វារព្រំដែន​អន្តរជាតិ​បាវិត-ម៉ុក បៃ ប៉ោយប៉ែត- អារញ្ញ ប្រាថេត ស្ទឹង​បត់-បាន​ណង​អៀន និង​ព្រៃ​វ​ល្លិ៍-ប៊ិ​ញ​ហៀ​ប ដើម្បី​បម្រើ​ដល់​ការផ្លាស់ប្តូរ​ទំនិញ និង​នាំចេញ-នាំចូល​ឱ្យបាន​ទាន់ពេលវេលា។

ក្រោយ​ការរៀបចំ​ត្រូវបាន​បញ្ចប់​ជា​ស្ថាពរ ចរន្ត​នៃ​ការដោះដូរ​ទំនិញ កាន់តែ​មមាញឹក នឹង​ក្លាយជា​ចលករ​ជំរុញ​ឱ្យ​ការធ្វើ​ពាណិជ្ជកម្ម ក្នុង​តំបន់​មាន​កាន់តែច្រើន ហើយ​កំណើន​នៃ​ការប្រើប្រាស់​ដី​នឹង​កើតមាន​ផងដែរ៕