ដោយវុត្ថា

ភ្នំពេញៈ អ្នកឧកញ៉ា គិត ម៉េង ប្រធានសភាពាណិជ្ជកម្មកម្ពុជា បានសន្យាផ្តល់ការ សហការជាមួយក្រុមហ៊ុនអូស្រ្តាលី ដែលមកវិនិយោគនៅក្នុងប្រទេសកម្ពុជា ខណៈឯក​អគ្គរដ្ឋទូតអូស្ត្រាលីប្រចាំនៅកម្ពុជាបានសន្យាថា នឹងនាំក្រុមហ៊ុនវិនិយោគធំៗមកកាន់កម្ពុជានាពេលខាងមុខនេះ។

នេះបើយោងតាមលទ្ធផលនៃជំនួបពិភាក្សាការងាររវាង អ្នកឧកញ៉ាគិត ម៉េង ប្រធា​នសភាពាណិជ្ជកម្មកម្ពុជា និងលោក Pablo Chiho Kang ឯកអគ្គរដ្ឋទូតអូស្ត្រាលីថ្មីប្រចាំកម្ពុជាស្តីអំ ពីការពង្រឹងកិច្ចសហប្រតិបត្តិការពាណិជ្ជកម្ម និងវិនិយោគ និងលើកកម្ពស់ទំនាក់ទំនងធុរកិច្ចរវាងកម្ពុជា និងអូស្ត្រាលីនាថ្ងៃទី១ ខែកក្កដា ឆ្នាំ ២០២០។

អ្នកឧកញ៉ាថ្លែងថា “កម្ពុជាស្វាគមន៍ជានិច្ច ក្នុងការសហការជាមួយគ្រប់ក្រុមហ៊ុនអូស្ត្រាលីមកវិនិយោគនៅកម្ពុជា និងចាត់ទុកថា ទំនាក់ទំនងរវាងប្រទេសទាំងពីរកាន់តែមានភាពរឹងមាំង និងរីកចម្រើនលើគ្រប់វិស័យ ជាពិសេសកិច្ចសហប្រតិបត្តិការពាណិជ្ជកម្ម និងវិនិយោគ និងទំនាក់ទំនងធុរកិច្ច”។

លោក Pablo Chiho Kang ឯកអគ្គរដ្ឋទូតអូស្ត្រាលីថ្មីប្រចាំកម្ពុជាថ្លែងថា អូស្ត្រាលីនឹងជំរុញទំនាក់ទំនងរវាងប្រទេសទាំងពីរ ឱ្យកាន់តែរឹងមាំ ទាំងលើផ្នែកធុរកិច្ច ក៏ដូចជា ទំនាក់ទំនងរវាងប្រជាជននិងប្រជាជនផងដែរ និងស្វែងយល់ឱ្យកាន់តែច្បាស់អំពីបរិយា​កាសធុរកិច្ចនិងវិនិយោគនៅកម្ពុជា ជាពិសេ សភាពាណិជ្ជកម្មកម្មកម្ពុជា ដែលជាស្ថាប័នតំណាងឱ្យវិស័យឯកជននៅកម្ពុជា។

ពាក់ព័ន្ធនឹងការជំរុញពាណិជ្ជកម្ម និងវិនិយោគ លោក ឯកអគ្គរដ្ឋទូត បានបង្ហាញពីបំណងដឹកនាំក្រុមហ៊ុនអូស្ត្រាលី មកធ្វើការវិនិយោគបន្ថែមនៅកម្ពុជា ជាពិសេសក្នុងវិស័យថាមពលកកើតឡើងវិញ ដូចជា ថាមពលវារីអគ្គីសនី និងថាមពលព្រះអាទិត្យជាដើម។

អ្នកឧកញ៉ា គិត ម៉េង បាននាំយកក្រុមហ៊ុនអូស្ត្រាលីធំៗមួយចំនួនមកកាន់កម្ពុជា ដូចជា ធនាគារANZ Royal ក្រុមហ៊ុន Toll Group និងធនាគារវីងជាដើម ខណៈពេលដែលអ្នកឧកញ៉ា បានដឹកនាំគណៈប្រតិភូសភាពាណិជ្ជកម្មកម្ពុជា អមដំណើសម្តេចតេជោ ហ៊ុន សែននាយករដ្ឋមន្ត្រីនៃកម្ពុជា ធ្វើទស្សនកិច្ចនៅប្រទេសអូស្ត្រាលីចំនួន២លើកផងដែរ៕

ដោយ ៖ រ៉ាណេត

សៀមរាប ៖ នៅក្នុងរយៈពេល៦ខែនៃត្រីមាសទី១ ឆ្នាំ២០២០ តំបន់ទស្សនាកម្សាន្តអង្គរក្រុងសៀមរាប រកចំណូលបានប្រមាណ១៨លានដុល្លារ ពីការលក់បណ្ណចូលទស្សនា ក្រោមចំនួនទេសចរសរុបជិត៤០ម៉ឺននាក់។

ផ្អែកតាមរបាយការណ៍ផ្លូវការបស់គ្រឹះស្ថានអង្គរ នៅព្រឹកថ្ងៃទី១ ខែកក្កដា ឆ្នាំ២០២០នេះ បានបញ្ជាក់ថា នៅរយៈពេល៦ខែ ឆ្នាំ២០២០នេះ មានភ្ញៀវទេសចរបរទេសចំនួន ៣៨៧, ៨៤០នាក់ បានចូលទស្សនារមណីយដ្ឋានអង្គរ ធ្លាក់ចុះ៦៨.៨៣% បើធៀបនឹងរយៈពេលដូចគ្នាឆ្នាំ២០១៩។

សម្រាប់ចំណូលបានពីការលក់បណ្ណ ចូលទស្សនាជូនភ្ញៀវបរទេសវិញ នៅឆមាសទី១នេះ ទទួលបានចំនួន ១៨,០៩២,៥៥០ដុល្លារ ធ្លាក់ចុះ៦៧.៥៤%។

សម្រាប់ចំណូលឧបត្ថម្ភមូលនិធិគន្ធបុប្ផាកម្ពុជា រយៈពេល០៦ខែ ក្នុងឆ្នាំ២០២០ មានចំនួនសរុប ៧៧៥,៦៨០ដុល្លារ។

សម្រាប់ក្នុងខែមិថុនា ឆ្នាំ២០២០ មានភ្ញៀវទេសចរបរទេសចំនួន ១,៧៤៧នាក់ បានចូលទស្សនាអង្គរ បានចំនួន៧១,២១៩ដុល្លារ ធ្លាក់ចុះជាង៩៨ភាគរយ។ ដោយឡែកចំណូលលក់បណ្ណនៅប្រាសាទកោះកែរ រយៈពេល០៦ខែ ក្នុងឆ្នាំ២០២០ មានចំនួន៨,៥៤៤នាក់ បានចំណូល ៨៥,៤៤០ ដុល្លារ ។

ជាមួយនឹងការធ្លាក់ចុះនេះ លោកបណ្ឌិត ថោង ខុន រដ្ឋមន្ត្រី ក្រសួងទេសចរណ៍ បានបញ្ជាក់ថា ការធ្លាក់ចុះនៃចំនួនភ្ញៀវទេសចរនេះ ពិតជាបានបង្ករផលប៉ះពាល់ជាច្រើនដល់ប្រតិបត្តិករទេសចរណ៍ ជាក់ស្តែង គិតត្រឹមថ្ងៃទី០៨ ខែឧសភា ឆ្នាំ២០២០ មានអាជីវកម្មទេសចរណ៍បិទ និងបិទបណ្ដោះអាសន្នសរុប២ ៩៥៦ទីតាំង និងមានបុគ្គលិកបម្រើការងារផ្ទាល់ សរុប ៤៥,៤០៥នាក់។ យ៉ាងណាមិញយើងសង្កេតឃើញថា គោលដៅរាជធានីភ្នំពេញមិនទទួលរងផលប៉ះពាល់ធ្ងន់ធ្ងរខ្លាំងដូចគោលដៅទេសចរណ៍ធំៗផ្សេងទៀតឡើយ។

មានន័យថា ចំនួនអាជីវកម្មបានបិទ និងផ្អាកបណ្តោះអាសន្នដោយសារបញ្ហាវិបត្តិកូវីដ-១៩ មានតែ ១២៤ទីតាំង ស្មើនឹងប្រមាណ ១០.៤៣% នៃចំនួនសរុបទូទាំងប្រទេស និងប៉ះពាល់ការងារផ្ទាល់ក្នុងវិស័យសរុបចំនួន១,៩៦០នាក់ ស្មើនឹង ៩.៣៣% នៃចំនួនបុគ្គលិកក្នុងវិស័យទេសចរណ៍សរុបទូទាំងប្រទេស (តួលេខនេះមិនគិតបញ្ចូលសេវាកម្មកម្សាន្តទេសចរណ៍មនុស្សពេញវ័យ និងសេវាកម្មស្ប៉ានិងម៉ាស្សាដែលត្រូវបានសម្រេចឱ្យផ្អាកដោយរាជរដ្ឋាភិបាល)។ ការបាត់បង់ការងារនេះ បានធ្វើឱ្យមានការជះឥទ្ធិពលយ៉ាងខ្លាំងទៅដល់វិស័យសេដ្ឋកិច្ច និងសង្គមជារួមតាមរយៈឥទ្ធិពល ដែលលើសពីឥទ្ធិពលអវិជ្ជមាននៅក្នុងវិស័យធ្វើដំណើរ និងទេសចរណ៍ជាសកល៕

រាជធានីភ្នំពេញ ៖ ក្រសួងសាធារណការ និងដឹកជញ្ជូន បានសម្រេចពន្យារពេលឱ្យប្រជាពលរដ្ឋចូលទៅសុំធ្វើការផ្ទេរកម្មសិទ្ធិយានយន្តដែលរកម្ចាស់ដើមមិនឃើញរយៈពេល៣ខែបន្ថែមទៀត បន្ទាប់ថ្ងៃបញ្ចប់ឱសានវាទកាលពីថ្ងៃទី៣០ ខែមិថុនា ឆ្នាំ២០២០ នៅតែមានប្រជាពលរដ្ឋសម្រុកទៅស្នើសុំភាពស្របច្បាប់ចំពោះការកាន់កាប់ចលនវត្ថុមួយនេះ។

ក្រសួងសាធារណការ និងដឹកជញ្ជូន នៅថ្ងៃទី១ ខែកក្កដានេះ បានបញ្ជាក់ថា ការដាក់ពាក្យស្នើសុំផ្ទេរកម្មសិទ្ធិយានយន្តដែលរកម្ចាស់ដើមមិន ត្រូវពន្យារពេលរហូតដល់ចុងខែកញ្ញា ឆ្នាំ២០២០។

ក្រសួងសាធារណការ និងដឹកជញ្ជូន និងអគ្គនាយកដ្ឋានពន្ធដារ បានឯកភាពស្នើគោលការណ៍ដាក់ឱ្យអនុវត្តនៅទីតាំងផ្តល់សេវារួមតែមួយ ដូចជាការបង់ប្រាក់សេវា និងពន្ធប្រថាប់ត្រារួមគ្នាក្នុងវិក្កយបត្រតែមួយ ខណៈប្រជាពលរដ្ឋជួបបញ្ហាស្មុគស្មាញ និងរអ៊ូរទាំអំពីបែបបទបំពេញឯកសាររដ្ឋបាល ដើម្បីកាត់ឈ្មោះពីម្ចាស់ដើមនៃយានយន្តមកម្ចាស់កាន់កាប់ចុងក្រោយ។

លោក ហ៊ាង សុទ្ធាយុត្តិ ប្រធាននាយកដ្ឋានព័ត៌មានវិទ្យា និងទំនាក់ទំនងសាធារណៈ និងជាអ្នកនាំពាក្យក្រសួងសាធារណការ និងដឹកជញ្ជូន បានឱ្យដឹងថា នីតិវិធីនៃការផ្ទេរកម្មសិទ្ធិថ្មីនេះ នឹងត្រូវចំណាយពេលតែ១ថ្ងៃ ប្រសិនបើមិនមានការប្តូរផ្លាកលេខ និងរយៈពេល២ទៅ៣ថ្ងៃ ប្រសិនបើមានការប្តូរផ្លាកលេខ៕

ដោយ ៖ ប៊ី
ភ្នំពេញ ៖ កិច្ចព្រមព្រៀងពាណិជ្ជកម្មសេរីកម្ពុជា-ចិន នឹងធ្វើឱ្យទីផ្សារទំនិញបើកបន្ថែមពីលើយន្តការដែលមានស្រាប់ ខណៈភាគីទាំងពីរ បានឯកភាពនឹងចុះហត្ថលេខាលើកិច្ចព្រមព្រៀងនេះ នាពេលឆាប់ៗខាងមុខ។
នេះបើយោងតាមសេចក្តីប្រកាសព័ត៌មានស្ដីពីលទ្ធផលនៃកិច្ចចរចាព្រមព្រៀងពាណិជ្ជកម្មសេរីកម្ពុជា-ចិនរបស់ក្រសួងសេដ្ឋកិច្ច និងហិរញ្ញវត្ថុចេញផ្សាយនៅថ្ងៃនេះ។

លោក សុខ សុភ័ក្រ រដ្ឋលេខាធិការក្រសួងពាណិជ្ជកម្ម និងជាប្រធានក្រុមចរចារបស់កម្ពុជា បានថ្លែងថា ជាមួយនឹងកិច្ចព្រមព្រៀងពាណិជ្ជកម្មសេរីកម្ពុជា-ចិន ទីផ្សារទំនិញត្រូវបានបើកបន្ថែមពីលើយន្តការដែលមានស្រាប់។

លោកបានបន្តថា ច្រកចូលទីផ្សារផ្នែកសេវាកម្ម ក៏ត្រូវបានធ្វើឱ្យប្រសើរឡើង កិច្ចសហប្រតិបត្តិការិនិយោគ ត្រូវយកចិត្តទុកដាក់លើសសរស្តម្ភនៃការជំរុញ និងសម្រួលវិនិយោគ វិធានការដើមកំណើត នីតិវិធី និងកិច្ចសម្រួលពាណិជ្ជកម្ម ក៏ដូចជាយន្តការអនាម័យ និងភូតគាមអនាម័យ និងរបាំងបច្ចេកទេសពាណិជ្ជកម្ម ក៏ត្រូវបានរៀបចំឡើងដោយមានភាពច្បាស់លាស់ និងអនុគ្រោះ។

លោក បានថ្លែងថា “វិស័យពាក់ព័ន្ធនានា ត្រូវបានកំណត់នៅក្នុងកិច្ចសហប្រតិបត្តិការ សំដៅលើកកម្ពស់ និងសម្រួលពាណិជ្ជកម្មរវាងភាគីទាំងពីរ និងផ្តល់លទ្ធភាពដល់ភាគីទាំងពីរ អាចពិគ្រោះយោបល់ និងឯកភាពលើការជ្រើសរើសវេទិកា និងនីតិវិធីដោះស្រាយវិវាទ”។
កិច្ចព្រមព្រៀងពាណិជ្ជកម្មសេរីកម្ពុជា-ចិន គឺកិច្ចព្រមព្រៀងពាណិជ្ជកម្មសេរីទ្វេភាគីដំបូងបង្អស់ដ៏មានសារៈសំខាន់របស់កម្ពុជា។ នៅពេលចូលជាធរមាន កិច្ចព្រមព្រៀងនេះ នឹងចូលរួមចំណែកដ៏សំខាន់ក្នុងការធ្វើពិពិធកម្មទីផ្សារនាំចេញ និងជំរុញការនាំចេញផលិតផលរបស់កម្ពុជា ជាពិសេស ផលិតផលកសិកម្ម និងកសិឧស្សាហកម្ម ទៅកាន់ទីផ្សារដ៏ធំរបស់ចិន តាមរយៈការឯកភាពលើការបើកទីផ្សារទំនិញបន្ថែមនេះ។

បន្ថែមពីនេះ កិច្ចព្រមព្រៀងនេះ ក៏នឹងជួយពន្លឿនដំណើរការនៃការធ្វើសមាហរណកម្មសេដ្ឋកិច្ចកម្ពុជាទៅក្នុងតំបន់ និងសកលលោក តាមរយៈការពង្រឹងការចូលរួមរបស់កម្ពុជានៅក្នុងខ្សែសង្វាក់ផលិតកម្មតំបន់ និងសកលលោក ក៏ដូចជាប្រែក្លាយកម្ពុជាជាប្រទេសមានសក្តានុពលទាក់ទាញវិនិយោគធ្វើជាមូលដ្ឋានផលិតកម្ម សម្រាប់នាំចេញទៅកាន់ទីផ្សារចិន។

កិច្ចព្រមព្រៀងនេះ គឺជាសមិទ្ធផល និងផ្លែផ្គាដែលកើតចេញកិច្ចសហប្រតិបត្តិការភាពជាដៃគូយុទ្ធសាស្ត្រគ្រប់ជ្រុងជ្រោយរវាងប្រទេសទាំងពីរ កម្ពុជា-ចិន និងបានឆ្លុះបញ្ចាំងយ៉ាងច្បាស់លាស់អំពីការយកចិត្តទុកដាក់ខ្ពស់ពីថ្នាក់ដឹកនាំនៃប្រទេសទាំងពីរ ក្នុងការប្តេជ្ញាបន្តរឹតចំណងកិច្ចសហប្រតិបត្តិការដ៏ស្អិតល្មួត និងរឹងមាំលើគ្រប់វិស័យ សំដៅចូលរួមចំណែកអភិវឌ្ឍន៍សង្គម-សេដ្ឋកិច្ច នៃប្រទេសទាំងពិរ។

សេចក្តីប្រកាសព័ត៌មានខាងលើ បានឱ្យដឹងថា “ភាគីទាំងពីរ បានឯកភាពនឹងចុះហត្ថលេខាលើកិច្ចព្រមព្រៀងនេះ នាពេលឆាប់ៗខាងមុខ”។

អ្នកស្រាវជ្រាវសេដ្ឋកិច្ចនៃរាជបណ្ឌិតសភាកម្ពុជា លោកបណ្ឌិត ហុង វណ្ណៈ បានប្រាប់គេទំព័រ Propertyarea.asia កាលពីថ្មីៗនេះថា កិច្ចព្រមព្រៀងពាណិជ្ជកម្មសេរី (FTA)រវាងកម្ពុជា និងចិនជាដំណាក់ទី៣ហើយ ហើយបើនិយាយពីសារៈប្រយោជន៍វិញ វាច្បាស់លាស់ជាងមុន។
លោកបន្តថា “ការកិច្ចការងារនេះសុក្រឹត្យជាងមុន ហើយការធ្វើពាណិជ្ជកម្មរវាងប្រទេសទាំងពីរ មានភាពប្រាកដជាងមុនទៅលើប្រភេទទំនិញផ្សេងៗ ដែលមាននៅក្នុងកិច្ចព្រមព្រៀង”។

លោកបន្តថា “ទំនិញទាំងឡាយ ដែលបានចុះកិច្ចព្រមព្រៀជាមួយគ្នា មានភាពប្រសើរជាង។ របាំងពាណិជ្ជកម្មផ្សេងៗ និងភាពស្មុគស្មាញផ្សេងៗ នឹងត្រូវបានសម្រួលឱ្យកាន់តែភាពប្រសើរជាងមុន”។
លោកបានថ្លែងថា ជាទូទៅប្រទេសចិនគឺធំ ប្រជាជនច្រើន ហើយប្រទេសយើងតូច។ ឧទាហរណ៍ បើនៅក្នុងកិច្ចព្រមព្រៀងទំនិញមាន១ម៉ឺនមុខ ដូច្នេះសំនួរសួរថា តើយើងមានទំនិញ១ម៉ឺនមុខ សម្រាប់ធ្វើការនាំចេញឱ្យដូចប្រទេសចិនដែរឬទេ។ ប៉ុន្តែកិច្ចព្រមព្រៀងនេះ នឹងធ្វើឡើងទៅតាមដំណាក់កាល។

លោក ថ្លែងទៀតថា “ចំណុចដែលយើងអាចទទួលបានសារៈប្រយោជន៍ពីកិច្ចព្រមព្រៀងសេរី គឺថាប្រសិនបើយើងពន្លឿនកិច្ចព្រមព្រៀងកាន់តែលឿនពីមួយដំណាក់ទៅមួយដំណាក់ យើងនឹងទទួលបានការបញ្ជាទិញរបស់ភាគីចិន លើទំនិញពីកម្ពុជាដែលកាន់តែមានភាពរលូនជាងមុន”៕

ដោយវុត្ថា

ភ្នំពេញ៖ ខេត្តក្រចេះ នាពេលបច្ចុប្បន្ននេះ មានក្រុមហ៊ុនវិនិយោគដីសម្បទានសេដ្ឋកិច្ច ៤៩ ក្រុមហ៊ុន លើផ្ទៃដី ជិត ២០ ម៉ឺនហិកតា ដោយដំាដំណាំកៅស៊ូបានចំនួន ជាង ៨៣ ពាន់ហិកតា ដាំដំណាំកៅស៊ូលក្ខណៈគ្រួសារចំនួន២២ ពាន់ហិកតា ដំដំណាំចេកអំបូងលឿង ៣ ពាន់ក់ហិកតា និងដំណាំផ្សេងៗទៀត។

លោក វ៉ា ថន អភិបាលខេត្តក្រចេះ បានបង្ហាញរបាយការណ៍នៅក្នុងសន្និសីទសារព័ត៌មានស្តីវឌ្ឍនភាព និងទិដៅការងារបន្តរបស់រដ្ឋបាលខេត្តក្រចេះ កាលពីម្សិលមិញនេះ ឱ្យដឹងថា ក្រៅពីនេះ ក៏មានការវិនិយោគដាំដំណាំជាលក្ខណៈគ្រួសារផងដែររួមមាន ស្វាយចន្ទី ជាង ៤ ម៉ឺនហិកតា ម្រេចជិត ៨០០ ហិកតា ដំឡូងមី ៦៦ ពាន់ហិកតា និងដំាដំណាំរួមផ្សំជាច្រើនហិកតា។

លោកបន្តថា” ជាមួយគ្នានេះ ខេត្តមានក្រុមហ៊ុនធ្វើមកវិនិយោគសាងសង់រោងចក្រកែច្នៃផលិតផលកសិកម្មចំនួន ៣ កន្លែង រួមមានរោងចក្រផលិតម្សៅមី ២កន្លែង រោងចក្រផលិតស្កស ១កន្លែង”។

លោកបន្ថែមថា “ខេត្តក្រចេះក៏មានតំបន់សេដ្ឋកិច្ចពិសេស ១កន្លែងលើផ្ទៃដីជាង ៨០០ ហិកតា ស្ថិតនៅក្នុងស្រុកស្នួល វិនិយោគដោយក្រុមហ៊ុនចិន ដែលបច្ចុប្បន្នកំពុងដំណើរការសាងសង់រោងចក្រ សហគ្រាសចំនួន ៩ ទីតាំង និងគ្រោងអភិវឌ្ឍន៍បន្តបន្ទាប់ទៀត” ។

លោកអភិបាលខេត្តបន្ថែមថា “បច្ចុប្បន្ន យើងមានក្រុមហ៊ុនកំពុផលិត និងកែច្នៃផលិតផលកសិកម្ម និងឧស្សាហកម្ម ៣ កន្លែងរួមមានរោងចក្រកែច្នៃគ្រឿងសង្ហារឹម ១ កន្លែងកំពុងដំណើរការផលិត រោងចក្រផលិតផ្សៅមី និងរោងចក្រផលិតសំបកកង់រថយន្តកំពុងដំណើរការសាងសង់។ ខេត្តមានផែស្ងួត ១កន្លែងស្ថិតក្នុងស្រុកស្នួល ខេត្តក្រចេះ ដែលជាកន្លែងដ៏សំខាន់សម្រាប់ចរាចរណ៍ទំនិញចេញចូល”៕

ដោយ ៖ រ៉ាណេត

ភ្នំពេញ ៖ ក្រុមហ៊ុនដ៏ធំរបស់ចិនមួយបានបង្ហាញពីគម្រោងបណ្តាក់ទុនវិនិយោគរហូតដល់ប្រមាណ១៦០លានដុល្លារ លើការសាងសង់ទីចំណតរថយន្តស្ដង់ដាចំនួន៣ទីតាំង ដែលស្ថិតនៅតំបន់ជាយរាជធានីភ្នំពេញ។

តំណាងក្រុមហ៊ុន Good Car investmentរបស់ប្រទេសចិន លោកស្រី ឧញ៉ា ចាន់ សុទ្ធា នៅក្នុងឱកាសចូលជួបពិភាក្សាការងារជាមួយលោកអភិបាលរាជធានីភ្នំពេញ ឃួង ស្រេង កាលពីល្ងាចថ្ងៃទី៣០ ខែមិថុនា ឆ្នាំ២០២០ម្សិលមិញបានលើកឡើថា ចំណតរថយន្តចំនួន៣ទីតាំង ដែលស្ថិតនៅក្នុងគម្រោងវិនិយោគមួយនេះស្ថិតនៅជាយរាជធានីភ្នំពេញ រួមមាន នៅតំបន់រង្វង់មូលគួស្រូវជាប់ព្រំប្រទល់ខេត្ត កណ្តាល តំបន់ផ្លូវជាតិលេខ៦ ហើយមួយកន្លែទៀតកំពុងរកទីតាំងដែលស្ថិតនៅជាយក្រុង។

លោកស្រីឧញ៉ា ក៏បានបង្ហាញពីគោលបំណងនៃការវិនិយោគលើការនាំចូលប្រភេទរថយន្តដឹកទំនិញ និងរថយន្តដឹកជញ្ជូនអ្នកដំណើរមករាជធានីភ្នំពេញបន្ថែមពីលើគម្រោងកសាងចំណតរថយន្តចំនួន៣ទីតាំងដែលមានទឹកប្រាក់វិនិយោគ១៦០លានដុល្លារនេះផងដែរ។

អភិបាលរាជធានីភ្នំពេញ លោក ឃួង ស្រេង បានស្វាគមន៏ចំពោះគោលបំណងខាងលើនេះ ព្រោះស្របតាមគោលបំណងរបស់រដ្ឋបាលរាជធានីភ្នំពេញដែលត្រូវការចំណតរថយន្តជាចំណុចអទិភាពក្នុងទីក្រុងសព្វថ្ងៃដែលខ្វះចំណត។

លោកអភិបាលក៏បានស្នើឱ្យក្រុមហ៊ុនសិក្សាឱ្យច្បាស់លាស់មុនសម្រេចចិត្តវិនិយោគ ដើម្បីប្រាកដពីភាពជោគជ័យលើការវិនិយោគ ព្រោះកន្លងមកមានក្រុមហ៊ុនច្រើនមកហើយបានលើកឡើងពីការចង់វិនិយោគបែបនេះ តែមិនទទួលបានលទ្ធផលទេ បានត្រឹមមកបង្ហាញគម្រោងរបស់ខ្លួន ដោយពុំមានឃើញលទ្ធផលដោយសារតែខ្វះការសិក្សាស្វែងយល់ពីចំណង់ចំណូលចិត្ត ទំនៀមទំលាប់របស់ប្រជាពលរដ្ឋខ្មែរធ្វើឱ្យពួកគេបរាជ័យ៕